Yitso Nyɔŋma
“Be ní Sa”
1, 2. (a) Mɛɛ jɔɔmɔ Yesaia ná mli ŋɔɔmɔ? (b) Namɛi gbalɛ wiemɔi ní aŋmala ashwie shi yɛ Yesaia yitso 49 lɛ klɛŋklɛŋ fã lɛ mli lɛ kɔɔ amɛhe?
ADESAI anɔkwafoi fɛɛ ená Nyɔŋmɔ nɔkpɛlɛmɔ kɛ ehebuu mli ŋɔɔmɔ aahu kɛjɛ jeeŋmɔ. Shi Yehowa kpãaa emlihilɛ lɛ mli ehaaa mɔ fɛɛ mɔ kɛkɛ. Esa akɛ mɔ lɛ afee mɔ ni sa kɛha jɔɔmɔ ní anyɛŋ akɛ nɔ ko ato he nɛɛ. Yesaia ji mɔ ko ní sa nakai. Ená Nyɔŋmɔ hiɛ duromɔ, ni Yehowa kɛ lɛ tsu nii ákɛ dɛŋdade ni ekɛha mɛi krokomɛi le E-suɔmɔnaa nii. Aŋma enɛ he nɔkwɛmɔnɔ afɔ̃ shi yɛ Yesaia gbalɛ lɛ yitso 49 lɛ klɛŋklɛŋ fã lɛ mli.
2 Akɛ Abraham seshi lɛ wie wiemɔi nɛɛ yɛ gbalɛ wiemɔ mli. Yɛ klɛŋklɛŋ mlibaa mli lɛ, nakai seshi lɛ ji Israel maŋ lɛ, ni jɛ Abraham mli lɛ. Shi kɛlɛ, wiemɔ ní akɛtsu nii yɛ mli lɛ mli babaoo kɔɔ Abraham Seshi ní akɛ be babaoo emɛ lɛ aahu, ni ji shiwoo Mesia lɛ he. Wiemɔi ní jɛ mumɔŋ lɛ hu kɔɔ Mesia lɛ mumɔŋ nyɛmimɛi, ni batsɔmɔɔ Abraham mumɔŋ seshi lɛ kɛ “Nyɔŋmɔ Israel lɛ” fã lɛ ahe. (Galatabii 3:7, 16, 29; 6:16) Titri lɛ, Yesaia gbalɛ lɛ fã nɛɛ tsɔɔ wekukpaa krɛdɛɛ ní yɔɔ Yehowa kɛ esuɔmɔ Bi, Yesu Kristo teŋ lɛ hu mli.—Yesaia 49:26.
Yehowa Hala Lɛ ni Ebu Ehe
3, 4. (a) Mɛɛ sɛɛfimɔ Mesia lɛ yɔɔ? (b) Namɛi Mesia lɛ kɛwieɔ lɛ?
3 Mesia lɛ náa Nyɔŋmɔ mlihilɛ, loo enɔkpɛlɛmɔ mli ŋɔɔmɔ. Yehowa ha lɛ hegbɛ kɛ ehesaai ahe odaseyelii ní he hiaa ní ekɛtsu enitsumɔ lɛ. Belɛ, eja gbɛ jogbaŋŋ akɛ mɔ ni baafee Mesia wɔsɛɛ lɛ kɛɔ akɛ: “Nyɛboa mi toi, nyɛ ŋshɔkpɔi, ni nyɛfea toi, nyɛ majimaji ní yɔɔ shɔŋŋ! Yehowa tsɛ́ mi kɛjɛ fɔmɔhe, etsĩ migbɛi atã kɛjɛ minyɛ musuŋ beebe.”—Yesaia 49:1.
4 Mɛi ni Mesia lɛ kɛwieɔ yɛ biɛ lɛ ji gbɔmɛi “ní yɔɔ shɔŋŋ.” Eyɛ mli ákɛ akɛ Mesia lɛ he shiwoo lɛ ha Yudafoi lɛ moŋ, shi esɔɔmɔ nitsumɔ lɛ baafee nɔ ni kɛ jɔɔmɔ baaha jeŋmaji fɛɛ. (Mateo 25:31-33) Eyɛ mli akɛ Yehowa kɛ “ŋshɔkpɔi” lɛ kɛ “majimaji” lɛ efeko kpaŋmɔ ko moŋ, shi esa akɛ amɛbo Israel Mesia lɛ toi ejaakɛ atsu lɛ koni ekɛ yiwalaheremɔ abaha adesai fɛɛ.
5. Awo Mesia lɛ gbɛi po dani afɔ́ lɛ akɛ adesa yɛ mɛɛ gbɛ nɔ?
5 Gbalɛ lɛ kɛɔ akɛ Yehowa baatsĩ Mesia lɛ gbɛi tã dani abaafɔ́ lɛ akɛ gbɔmɔ adesa. (Mateo 1:21; Luka 1:31) Awo Yesu gbɛi ákɛ “Naakpɛɛ, Ŋaawolɔ, Nyɔŋmɔ hewalɔ, Naanɔ tsɛ kɛ Hejɔlɛ lumɔ” kɛtsɔ hiɛ kwraa dani afɔ́ lɛ. (Yesaia 9:5) Imanuel, ni eeenyɛ efee akɛ eji Yesaia bihii lɛ ekome gbɛi lɛ hu batsɔ gbalɛ mli gbɛi kɛha Mesia lɛ. (Yesaia 7:14; Mateo 1:21-23) Agba gbɛi ní akɛha ní akɛbaatsɛ́ Mesia lɛ—ni ji Yesu—lɛ afɔ̃ shi po dani afɔ́ lɛ. (Luka 1:30, 31) Gbɛi nɛɛ jɛ Hebri wiemɔ ní eshishinumɔ ji “Yehowa Ji Yiwalaheremɔ” lɛ mli. Eyɛ faŋŋ akɛ, jeee Yesu diɛŋtsɛ hala ehe ákɛ Kristo lɛ.
6. Mesia lɛ naabu tamɔ klante ní naa ba yɛ mɛɛ gbɛ nɔ, ni aŋɔ lɛ atee, loo akɛ lɛ to yɛ mɛɛ gbɛ nɔ?
6 Mesia lɛ gbalɛ wiemɔi lɛ yaa nɔ akɛ: “Ni efee minaabu tamɔ klante ní naa ba, eŋɔ mi etee yɛ eniji ashishi hɔ̃ɔŋ lɛ mli, eŋɔ mi efee gaimlibi ní he kpɛ́ɔ, eŋɔ mi ehɔ egaimlibii akotoku lɛŋ.” (Yesaia 49:2) Beni be shɛ ní Yehowa Mesia lɛ kɛbaaje eshikpɔŋ nɔ sɔɔmɔ nitsumɔ lɛ shishi yɛ afi 29 Ŋ.B. lɛ, Yesu wiemɔi kɛ enifeemɔi lɛ bafee tamɔ tawuu nii ní naa ba, ní he kpɛ́ɔ, ní nyɛɔ egbuɔ kɛboteɔ etoibolɔi lɛ atsuii amli lɛɛlɛŋ. (Luka 4:31, 32) Ewiemɔi kɛ enifeemɔi lɛ tée Yehowa henyɛlɔ kpeteŋkpele, ni ji Satan, kɛ enajiaŋdamɔlɔi lɛ amlifu shi. Kɛjɛ Yesu fɔmɔ mli tɔ̃ɔ ni Satan ka akɛ ebaakpata E-wala hiɛ, shi Yesu tamɔ gaimlibi ní Yehowa kɛto egaimlibii akotoku lɛ mli.a Ebaanyɛ ekɛ hekɛnɔfɔɔ akpa hebuu gbɛ kɛjɛ e-Tsɛ lɛ ŋɔɔ. (Lala 91:1; Luka 1:35) Beni be ní ato lɛ shɛ lɛ, Yesu kɛ ewala ha yɛ adesai ahewɔ. Shi be baashɛ ní ebaaje kpo akɛ ŋwɛi tatsɛ ní he wa ní ewula kɛ tawuu nibii yɛ shishinumɔ kroko naa, kɛ tsi ní naa ba, ní miijɛ edaaŋ. Yɛ be nɛɛ mli lɛ, tsi ní naa ba lɛ feɔ hegbɛ ní Yesu yɔɔ ní ekɛaajaje kojomɔi eshi Yehowa henyɛlɔi lɛ, ní etsu kojomɔi ahe nii yɛ amɛnɔ lɛ he mfoniri.—Kpojiemɔ 1:16.
Nyɔŋmɔ Tsulɔ lɛ Deŋmegbomɔi lɛ Efeee Efolo
7. Yehowa wiemɔi ni yɔɔ Yesaia 49:3 lɛ kɔɔ namɔ he, ni mɛni hewɔ?
7 Agbɛnɛ Yehowa wie nɛkɛ gbalɛ wiemɔi nɛɛ akɛ: “Mitsulɔ jio, Israel, mɔ mli ní mawo mihiɛ nyam yɛ!” (Yesaia 49:3) Yehowa wieɔ Israel maŋ lɛ he ákɛ etsulɔ. (Yesaia 41:8) Shi Yesu Kristo ji Nyɔŋmɔ Tsulɔ ní fe fɛɛ. (Bɔfoi lɛ Asaji 3:13) Nyɔŋmɔ bɔɔ nii lɛ eko kwraa nyɛŋ ajie Yehowa ‘hiɛ nyam’ lɛ kpo fe Yesu. No hewɔ lɛ, eyɛ mli ákɛ akɛ Israel wie wiemɔi nɛɛ tɛ̃ɛ moŋ, shi amɛkɔɔ Yesu he diɛŋtsɛ.—Yohane 14:9; Kolosebii 1:15.
8. Te Mesia lɛ diɛŋtsɛ maŋbii lɛ fee amɛnii yɛ ehe amɛha tɛŋŋ, shi namɔ Mesia lɛ hiɛ kã enɔ akɛ ebaakojo emanyeyeli lɛ?
8 Shi, ani ejeee anɔkwale akɛ Yesu diɛŋtsɛ maŋbii lɛ ateŋ mɛi pii gbe ehe guɔ ni amɛkpoo lɛ hu? Hɛɛ. Yɛ fɛɛ mli lɛ, Israel maŋ lɛ ekpɛlɛɛɛ Yesu nɔ ákɛ Nyɔŋmɔ Tsulɔ ní efɔ lɛ mu. (Yohane 1:11) Ekolɛ nibii fɛɛ ní Yesu tsu beni eyɔɔ shikpɔŋ nɔ lɛ fee tamɔ nɔ ni he bɛ sɛɛnamɔ, nɔ ni he ehiaaa po kɛha eyinɔbii lɛ. Mesia lɛ tsĩ nɔ ni tamɔ enine ní nyɛ shi yɛ esɔɔmɔ nitsumɔ lɛ mli nɛɛ tã kɛtsa nɔ akɛ: “Migbo deŋme yakatswaa, ni mifite mihewalɛ efolo kɛ yakatswaa.” (Yesaia 49:4a) Mesia lɛ ewieee nɛkɛ wiemɔi nɛɛ yɛ enijiaŋ ní eje wui hewɔ. Susumɔ nɔ ni ewie kɛtsa nɔ lɛ he okwɛ: “Kɛlɛ mikojomɔ lɛ, Yehowa dɛŋ eyɔɔ, ni minyɔmɔwoo hu yɛ mi-Nyɔŋmɔ lɛ dɛŋ.” (Yesaia 49:4b) Jeee gbɔmɛi ji mɛi ní baakojo Mesia lɛ omanyeyeli, shi moŋ Nyɔŋmɔ.
9, 10. (a) Mɛni ji Mesia lɛ nitsumɔ ní jɛ Yehowa ŋɔɔ, ni mɛni jɛ nɔ ni etsu lɛ mli kɛba? (b) Mesia lɛ niiashikpamɔi lɛ baanyɛ awo Kristofoi ní yɔɔ ŋmɛnɛ lɛ hewalɛ yɛ mɛɛ gbɛ nɔ?
9 Nɔ ni Yesu taoɔ titri ji Nyɔŋmɔ nɔkpɛlɛmɔ, loo ni ebaaná ehiɛ duromɔ. Mesia lɛ wie yɛ gbalɛ lɛ mli akɛ: “Agbɛnɛ Yehowa kɛɛ,—mɔ ni shɔ̃ mi yɛ musuŋ, koni mifee etsulɔ, ní mikɛ Yakob aku sɛɛ aba eŋɔɔ, ní abua Israel naa abaha lɛ lɛ,—ejaakɛ mihiɛ eba nyam yɛ Yehowa hiɛ, ni mi-Nyɔŋmɔ lɛ etsɔ mihewalɛ.” (Yesaia 49:5) Mesia lɛ ba koni ebatsake Israel bii lɛ atsuii kɛku sɛɛ kɛba amɛŋwɛi Tsɛ lɛ ŋɔɔ ekoŋŋ. Mɛi pii booo lɛ toi, shi mɛi komɛi bo lɛ toi. Shi kɛlɛ, enyɔmɔwoo diɛŋtsɛ yɛ Yehowa Nyɔŋmɔ ŋɔɔ. Abuuu emanyeyeli lɛ yɛ adesai asusumɔ naa, shi moŋ yɛ tɛi ní Yehowa efolɔ eshwie shi lɛ anaa.
10 Ekolɛ Yesu sɛɛnyiɛlɔi lɛ baanu he ŋmɛnɛ, yɛ bei komɛi amli akɛ amɛmiigbo deŋme yakatswaa. Yɛ hei komɛi lɛ, ekolɛ nɔ ni jɛɔ amɛsɔɔmɔ nitsumɔ lɛ mli baa lɛ baafee nɔ ko bibioo kwraa kɛ́ akɛmiito nitsumɔ ní amɛtsu kɛ mɔdɛŋbɔɔ ní amɛkɛtsu nii lɛ he. Shi kɛlɛ, amɛŋmɛɔ amɛtsui shi, ni Yesu nɔkwɛmɔnɔ lɛ woɔ amɛ hewalɛ. Bɔfo Paulo wiemɔi ní eŋmala nɛɛ hu woɔ amɛ hewalɛ waa, akɛ: “No hewɔ lɛ, minyɛmimɛi ni misumɔɔ, nyɛfia shi ni nyɛkagbugbaa, ni nyɛtekea nɔ yɛ Nuntsɔ lɛ nitsumɔ lɛ mli daa nɛɛ, ejaakɛ nyɛle akɛ nyɛmɔdɛŋbɔɔ lɛ efeee yaka yɛ Nuntsɔ lɛ mli.”—1 Korintobii 15:58.
‘Jeŋmaji lɛ Ala’
11, 12. Mesia lɛ efee “jeŋmaji lɛ hu ala” yɛ mɛɛ gbɛ nɔ?
11 Yɛ Yesaia gbalɛ lɛ mli lɛ, Yehowa kai Mesia lɛ akɛ Nyɔŋmɔ Tsulɔ ní eji lɛ ‘kɛkɛ faaa,’ ni ekɛ nakai feemɔ wo lɛ hewalɛ. Yesu ‘baatée Yakob akutsei lɛ ashi, ní ekɛ Israel mɛi ní abaa amɛyi lɛ aku sɛɛ kɛba.’ Yehowa tsɔɔ mli kɛfata he akɛ: “Miŋɔo mifee jeŋmaji lɛ hu ala, koni otsɔ miyiwalaheremɔ kɛyashi shikpɔŋ lɛ naagbeehe lɛ!” (Yesaia 49:6) Yɛ mɛɛ gbɛ nɔ Yesu ha gbɔmɛi ná sɛɛyoomɔ “kɛyashi shikpɔŋ lɛ naagbeehe lɛ” yɛ be mli ní etsu eshikpɔŋ nɔ sɔɔmɔ nitsumɔ lɛ yɛ Israel pɛ lɛ?
12 Biblia mli sane ní aŋma afɔ̃ shi lɛ tsɔɔ akɛ Nyɔŋmɔ ‘la kɛha jeŋmaji lɛ’ gbooo beni Yesu shi shikpɔŋ nɛɛ nɔ shihilɛ mli lɛ. Aaafee Yesu gbele sɛɛ afii 15 lɛ, maŋsɛɛ sanekpakpa shiɛlɔi ni ji Paulo kɛ Barnaba tsɛ́ gbalɛ ní yɔɔ Yesaia 49:6 lɛ sɛɛ ni amɛkɛto Yesu kaselɔi lɛ, ni ji emumɔŋ nyɛmimɛi lɛ ahe. Amɛtsɔɔ mli akɛ: “[Yehowa, NW] wo wɔ kita akɛ: ‘Miŋɔo mito akɛ jeŋmaji lɛ ala, koni otsɔ̃ yiwalaheremɔ kɛyashi shikpɔŋ lɛ naagbeehei lɛ.’” (Bɔfoi lɛ Asaji 13:47) Dani Paulo diɛŋtsɛ baagbo lɛ, ena akɛ jeee Yudafoi lɛ pɛ aha amɛnine eshɛ yiwalaheremɔ sanekpakpa lɛ nɔ, shi moŋ aha “bɔɔ nii fɛɛ ní yɔɔ ŋwɛi shishi lɛ” hu nine eshɛ nɔ. (Kolosebii 1:6, 23) Ŋmɛnɛ, Kristo nyɛmimɛi ní afɔ amɛ mu lɛ ateŋ mɛi ní eshwɛ lɛ miitsá nitsumɔ nɛɛ nɔ. “Asafo babaoo” ko ní amɛyifalɛ shɛɔ akpekpei abɔ miifi amɛsɛɛ, beni amɛsɔmɔɔ akɛ “jeŋmaji lɛ hu ala” yɛ shikpɔji ní fa fe 230 nɔ yɛ je lɛŋ fɛɛ lɛ.—Kpojiemɔ 7:9.
13, 14. (a) Mɛɛ shiɛmɔ nitsumɔ lɛ he naatsii shihilɛ Mesia lɛ kɛ esɛɛnyiɛlɔi lɛ kɛkpe? (b) Mɛɛ shihilɛi atsakemɔ sɛɛsɛɛ ko eba mli?
13 Yehowa ejie ehe kpo akɛ hewalɛ ní yɔɔ e-Tsulɔ ni ji Mesia lɛ, kɛ Mesia lɛ nyɛmimɛi ní afɔ amɛ mu lɛ, kɛ mɛi fɛɛ ní fata asafo babaoo lɛ ahe, ní kɛ amɛ feɔ ekome kɛyaa nɔ yɛ sanekpakpa shiɛmɔ nitsumɔ lɛ mli lɛ asɛɛ lɛɛlɛŋ. Eji anɔkwale akɛ, Yesu kaselɔi lɛ kɛ heguɔgbee kɛ shitee-kɛ-woo kpeɔ, taakɛ eba enɔ lɛ. (Yohane 15:20) Shi Yehowa diɛŋtsɛ haa shihilɛ lɛ tsɔɔ sɛɛsɛɛ be fɛɛ be yɛ lɛ diɛŋtsɛ ebe mli, ni ekɛjieɔ etsuji anɔkwafoi lɛ ni ewoɔ amɛ nyɔmɔ. Yehowa wo shi yɛ Mesia lɛ, ní ji “susuma ní agbeɔ ehe guɔ” kɛ mɔ ní “jeŋmaji hu hiɔ ehiɛ” lɛ he akɛ: “Maŋtsɛmɛi aaana ni amɛaate shi, lumɛi hu aaana, ni amɛaakoto shi amɛjá yɛ Yehowa ni ji anɔkwafo kɛ Israel Mɔ krɔŋkrɔŋ lɛ ní ehalao lɛ hewɔ.”—Yesaia 49:7.
14 Sɛɛ mli lɛ bɔfo Paulo ŋma wolo eyaha Kristofoi ni yɔɔ Filipi lɛ yɛ nɛkɛ shihilɛ tsakemɔ sɛɛsɛɛ ní agba afɔ̃ shi nɛɛ he. Ewie Yesu he akɛ mɔ ko ní ashwie ehiɛ shi yɛ sɛŋmɔtso nɔ, shi no sɛɛ lɛ Nyɔŋmɔ wó enɔ. Yehowa ha e-Tsulɔ lɛ ‘gbɛhe ní nɔ kwɔ gojoo, ni eduro lɛ gbɛi ní tá gbɛi fɛɛ gbɛi nɔ, koni nakutso fɛɛ nakutso akula shi yɛ Yesu gbɛi lɛ amli.’ (Filipibii 2:8-11) Ábɔ Kristo sɛɛnyiɛlɔi anɔkwafoi lɛ kɔkɔ akɛ amɛ hu abaawa amɛ yi. Shi taakɛ Mesia lɛ ji lɛ, amɛ hu amɛyɛ nɔmimaa akɛ amɛbaaná Yehowa hiɛ duromɔ.—Mateo 5:10-12; 24:9-13; Marko 10:29, 30.
“Be ni Sa Jogbaŋŋ”
15. Mɛɛ “be” krɛdɛɛ ko atsĩ tã yɛ Yesaia gbalɛ lɛ mli, ni mɛni enɛ tsɔɔ?
15 Yesaia gbalɛ lɛ yaa nɔ kɛ wiemɔ ko ní he hiaa waa diɛŋtsɛ. Yehowa kɛɛ Mesia lɛ akɛ: “Be ní sa mli miboo toi yɛ, ni yiwalaheremɔ gbi nɔ hu miye mibuao yɛ: ni mibaa oyi, ni miha otsɔ maŋ lɛ kpaŋmɔ.” (Yesaia 49:8a) Aŋma gbalɛ ko ní tamɔ enɛ yɛ Lala 69:14-19 lɛ. Lalatsɛ lɛ wie “be ní sa” he yɛ jɛmɛ. Nɛkɛ wiemɔi nɛɛ tsɔɔ akɛ Yehowa kpãa eduromɔ kɛ ehebuu mli ehaa gbɔmɛi yɛ gbɛ krɛdɛɛ nɔ, shi efeɔ nakai yɛ be falɛ pɔtɛɛ ní hiɔ shi be kukuoo pɛ mli.
16. Mɛni ji Yehowa be ní sa kɛha blema Israel lɛ?
16 Mɛɛ be ji nɛkɛ be ní sa nɛɛ? Kɛjɛ shishijee kwraa lɛ, wiemɔi lɛ fata Yudafoi lɛ asɛɛkuu he gbalɛ ko ní akɛgba amɛsɛɛkuu kɛmiijɛ nomŋɔɔ mli lɛ he. Israel maŋ lɛ ná be ko ní sa mli niiashikpamɔ beni amɛnyɛ ‘amɛtée shikpɔŋ lɛ shi amɛma shi’ ní amɛnine shɛ amɛ “gboshinii ní efee amaŋfɔ” lɛ nɔ ekoŋŋ lɛ. (Yesaia 49:8b) No mli lɛ amɛjeee “mɛi ní awo amɛ tsuŋ” yɛ Babilon dɔŋŋ. Beni amɛfãa gbɛ kɛbaa amɛmaŋ lɛ, Yehowa kwɛ ákɛ “hɔmɔ” loo “kumai” yeee amɛ, ni “shia ŋã ní nɔ edɔ loo hulu esaŋ amɛhe.” Israelbii ní agbɛ amɛ ashwã lɛ ké yuu kɛku amɛsɛɛ kɛba amɛmaŋ shikpɔŋ nɔ ‘kɛjɛ shɔŋŋ, kɛjɛ kooyigbɛ kɛ anaigbɛ.’ (Yesaia 49:9-12) Yɛ eklɛŋklɛŋ mlibaa ní sa kadimɔ waa nɛɛ fɛɛ sɛɛ lɛ, Biblia lɛ tsɔɔ akɛ gbalɛ nɛɛ yɛ mlibaai krokomɛi ní mli lɛɛ.
17, 18. Mɛɛ duromɔ be ko Yehowa hala yɛ klɛŋklɛŋ afii oha lɛ mli?
17 Klɛŋklɛŋ lɛ, yɛ Yesu fɔmɔ be lɛ mli lɛ, ŋwɛibɔfoi lɛ jaje toiŋjɔlɛ kɛ Nyɔŋmɔ hiɛ duromɔ, loo adesai ahe tsuijurɔ ni eeená amɛtsɔɔ. (Luka 2:13, 14) Akɛ ehiɛ duromɔ namɔ nɛɛ haaa adesai fɛɛ kɛkɛ, shi moŋ akɛha mɛi ní jie Yesu mli hemɔkɛyeli kpo lɛ pɛ. Yɛ sɛɛ mli lɛ, Yesu kane gbalɛ ní yɔɔ Yesaia 61:1, 2 lɛ yɛ faŋŋ mli ni ekɛto lɛ diɛŋtsɛ ehe ákɛ mɔ ni jajeɔ ‘afi ní sa Yehowa hiɛ’ lɛ etsɔɔ. (Luka 4:17-21) Bɔfo Paulo wie Kristo he akɛ ená hebuu krɛdɛɛ kɛjɛ Yehowa ŋɔɔ yɛ eheloo gbii lɛ amli. (Hebribii 5:7-9) No hewɔ lɛ nɛkɛ be ní sa nɛɛ kɔɔ Nyɔŋmɔ duromɔ ni hi Yesu nɔ yɛ eshihilɛ be mli ákɛ adesa lɛ he.
18 Shi kɛlɛ, gbalɛ nɛɛ hiɛ shishinumɔ kroko hu. Beni Paulo tsɛ́ Yesaia wiemɔi ní kɔɔ be ní sa lɛ he lɛ asɛɛ lɛ, etee nɔ ekɛɛ akɛ: “Naa, be ni sa jogbaŋŋ nɛ; naa, walaheremɔ gbi nɛ.” (2 Korintobii 6:2) Paulo ŋmala wiemɔi nɛɛ yɛ Yesu gbele sɛɛ afii 22. Eka shi faŋŋ akɛ, beni afɔ́ Kristofoi asafo lɛ yɛ Pentekoste afi 33 Ŋ.B. lɛ, Yehowa kpã eduromɔ afi lɛ mli ni ekɛ Kristo sɛɛnyiɛlɔi ní afɔ amɛ mu lɛ fata he.
19. Kristofoi ni yɔɔ ŋmɛnɛ lɛ baanyɛ aná Yehowa hiɛ duromɔ be lɛ he sɛɛ yɛ mɛɛ gbɛ nɔ?
19 Shi Yesu sɛɛnyiɛlɔi ní yɔɔ ŋmɛnɛ ní afɔko amɛ mu ákɛ Nyɔŋmɔ ŋwɛi maŋtsɛyeli lɛ gboshiniyelɔi lɛ hu? Ani mɛi ni yɔɔ shikpɔŋ nɔ hiɛnɔkamɔ lɛ baanyɛ aná be ní sa nɛɛ he sɛɛ? Hɛɛ. Biblia mli wolo ni ji Kpojiemɔ lɛ tsɔɔ akɛ amrɔ nɛɛ ji Yehowa hiɛ duromɔ be kɛha asafo babaoo ní baaje “amanehulu kpeteŋkpele lɛ mli” koni amɛná shihilɛ mli ŋɔɔmɔ yɛ paradeiso shikpɔŋ nɔ lɛ. (Kpojiemɔ 7:13-17) Enɛ hewɔ lɛ, Kristofoi fɛɛ baanyɛ amɛkɛ be kukuoo ní Yehowa kɛ ehiɛ duromɔ namɔ eha adesai ní yeee emuu nɛɛ atsu nii kɛmɔ shi.
20. Kristofoi baanyɛ atsi amɛhe kɛjɛ Yehowa duromɔ ní amɛaahe lɛ yakatswaa lɛ he yɛ mɛɛ gbɛ nɔ?
20 Bɔfo Paulo kɛ kɔkɔbɔɔ ko tsɔ Yehowa be ní sa lɛ he sane jajemɔ lɛ hiɛ. Ekpá Kristofoi afai ní ‘amɛkahe Nyɔŋmɔ duromɔ lɛ yakatswaa.’ (2 Korintobii 6:1) No hewɔ lɛ, Kristofoi kɛ hegbɛ fɛɛ hegbɛ tsuɔ nii ni amɛkɛsaa Nyɔŋmɔ hiɛ ni amɛfeɔ esuɔmɔnaa nii. (Efesobii 5:15, 16) Eeefee sɛɛnamɔ kɛha amɛ akɛ amɛaanyiɛ Paulo ŋaawoo nɛɛ sɛɛ, akɛ: “Nyɛkwɛa ni ahia, anyɛmimɛi, koni nyɛteŋ mɔ ko akahi tsui fɔŋ ni heee yeee ni ekpale kɛjɛ Nyɔŋmɔ, hiɛkalɔ lɛ, he; shi moŋ nyɛwiea nyɛtsɔɔtsɔɔa nyɛhe gbi fɛɛ gbi ní atsɛɔ lɛ ŋmɛnɛ lɛ, koni akɛ esha shishiumɔ lɛ akawaje nyɛteŋ mɔ ko.”—Hebribii 3:12, 13.
21. Mɛɛ miishɛɛ wiemɔ muɔ Yesaia yitso 49 lɛ klɛŋklɛŋ fã lɛ naa?
21 Beni gbalɛ wiemɔi ní tee nɔ yɛ Yehowa kɛ e-Mesia lɛ teŋ lɛ ba naagbee lɛ, Yesaia wie wiemɔ ko ní yɔɔ miishɛɛ, akɛ: “Nyɛláa, nyɛ ŋwɛii, ni shikpɔŋ, nyã; ni nyɛ gɔji lɛ hu, nyɛláa nyamɔ lala! ejaakɛ Yehowa eshɛje emaŋ lɛ mii, ni emɛi ní nii yɔɔ mɔbɔ lɛ, emusuŋ etsɔ lɛ yɛ amɛhe!” (Yesaia 49:13) Kwɛ miishɛjemɔ wiemɔi ní ŋɔɔ ni enɛ ji kɛha blema Israelbii lɛ kɛ Yehowa Tsulɔ kpeteŋkpele, Yesu Kristo, kɛ agbɛnɛ hu kɛha Yehowa tsuji ní afɔ amɛ mu lɛ kɛ amɛhefatalɔi “tooi krokomɛi” lɛ hu ŋmɛnɛ!—Yohane 10:16.
Yehowa Hiɛ Kpaaa Ewebii Anɔ
22. Mɛɛ gbɛ nɔ Yehowa ma nɔ mi yɛ akɛ ehiɛ kpaŋ ewebii lɛ anɔ kɔkɔɔkɔ?
22 Agbɛnɛ Yesaia tee nɔ ebɔ Yehowa sane jajemɔi lɛ ahe amaniɛ. Egba efɔ̃ shi akɛ Israelbii ní yɔɔ nomŋɔɔ mli lɛ baafee tamɔ mɛi ní etɔ amɛ ní amɛhiɛnɔkamɔ etã. Yesaia wie akɛ: “Zion kɛɛ akɛ: Yehowa eshi mi, ni Nuntsɔ lɛ hiɛ ekpa minɔ!” (Yesaia 49:14) Ani enɛ yɛ mli anɔkwale? Ani Yehowa ekpoo ewebii lɛ ni ehiɛ ekpa amɛnɔ? Yesaia sɔmɔ ákɛ Yehowa naawielɔ, ni etsá nɔ akɛ: “Aso yoo hiɛ aaakpa ebi fufɔoo nɔ, aloo emusuŋ etsɔŋ lɛ yɛ emusuŋ bi hewɔ? Ni kɛ́ mɛnɛɛmɛi ahiɛ aaakpa nɔ tete lɛ, mi lɛ mihiɛ kpaŋ onɔ!” (Yesaia 49:15) Mɛɛ hetoo ní suɔmɔ yɔɔ mli, ní jɛ Yehowa ŋɔɔ nɛ! Suɔmɔ ní Nyɔŋmɔ yɔɔ kɛha ewebii lɛ da fe nɔ ni yoofɔ́yoo yɔɔ kɛha ebi. Eyaa nɔ esusuɔ emɛi anɔkwafoi lɛ ahe be fɛɛ be. Ekaiɔ amɛ, tamɔ nɔ ni akadi amɛgbɛii yɛ eniji ahe: “Naa, mikadio yɛ midɛ kɔkɔ teŋ; ogbogboi lɛ yɛ mihiɛ daa!”—Yesaia 49:16.
23. Yɛ mɛɛ gbɛ nɔ Paulo wo Kristofoi hewalɛ ní amɛkɛ amɛhiɛ afɔ̃ Yehowa nɔ akɛ ehiɛ kpaŋ amɛnɔ kɔkɔɔkɔ?
23 Bɔfo Paulo wo Kristofoi aŋaa yɛ ewolo ní eŋma kɛyaha Galatabii lɛ mli akɛ: “Nyɛkahaa ekpakpafeemɔ miitɔa nyɛ, ejaakɛ kɛ wɔnijiaŋ ejeee wui lɛ, wɔbaakpa hu yɛ be ni sa mli.” (Galatabii 6:9) Eŋmala wiemɔi ní woɔ mɔ hewalɛ nɛɛ eyaha Hebribii lɛ akɛ: “Nyɔŋmɔ jeee mɔ ni yeɔ sane ni ejaaa ni ehiɛ aaakpa nyɛnitsumɔ lɛ nɔ kɛ suɔmɔ deŋme ni nyɛgbo yɛ egbɛi lɛ ahewɔ [lɛ].” (Hebribii 6:10) Esaaa akɛ wɔnuɔ he akɛ Yehowa hiɛ ekpa ewebii lɛ anɔ kɔkɔɔkɔ. Taakɛ blema Zion ji lɛ, Kristofoi yɛ yiŋtoo kpakpa ní amɛaadamɔ nɔ, ni amɛmli afili amɛ ní amɛkɛ tsuishitoo amɛ Yehowa. Eyeɔ ekpaŋmɔ lɛ mli wiemɔi kɛ eshiwoi anɔ pɛpɛɛpɛ.
24. Akɛ Zion baasaa aba etsutsu shihilɛ lɛ mli ekoŋŋ yɛ mɛɛ gbɛ nɔ, ni mɛɛ saji ebaabi?
24 Yehowa tsɔ Yesaia nɔ ekɛ miishɛjemɔ kroko hu fata he. Mɛi ní “fiteɔ [Zion],” ni ji ekolɛ Babilonbii lɛ loo Yudafoi hemɔkɛyeli kwalɔi lɛ, jeee hegbeyeiwoo nɔ̃ dɔŋŋ. Zion ‘bii,’ ni ji Yudafoi nomii ní yeɔ Yehowa anɔkwa lɛ, “ahe aaafee oyá kɛba.” Amɛbaabua “amɛhe naa.” Akɛni amɛbaaku amɛsɛɛ oyá kɛba Yerusalem hewɔ lɛ, Yudafoi ní aha amɛtee amɛmaŋ ekoŋŋ nɛɛ baafee hewulamɔ nii kɛha amɛmaŋtiase lɛ, tamɔ bɔ ni akɛ “wulamɔ nii” sáa “ayemforo” lɛ. (Yesaia 49:17, 18) Zion hei lɛ etsɔmɔ “olɛŋlɛ.” Feemɔ bɔ ni enaa baakpɛ ehe aha kɛji ená maŋbii pii trukaa, aahu akɛ mɛi fá fe nine yɛ eshihilɛhei lɛ he mfoniri okwɛ. (Kanemɔ Yesaia 49:19, 20.) Taakɛ akpaa gbɛ lɛ, ebi hé ni nɛkɛ ebii nɛɛ fɛɛ jɛ kɛba: “Oookɛɛ yɛ otsui mli akɛ: Namɔ fɔ́ mɛnɛɛmɛi ha mi, mi ní akpakpaa mibii yɛ mihe ní mitsɔ kene, aŋɔ mi nom, ní ashwie mi lɛ? shi mɛnɛɛmɛi nɛɛ, namɔ lɛ̀ amɛ? Naa, mi lɛ, ashi mikoome; shi mɛnɛɛmɛi nɛɛ, nɛgbɛ amɛjɛ?” (Yesaia 49:21) Kwɛ miishɛɛ shihilɛ ní enɛ ji kɛha Zion ní tsutsu lɛ ebɛ bii lɛ!
25. Mɛɛ sɛɛkuu kɛ amɛ tsutsu shihilɛ lɛ mli baa ekoŋŋ mumɔŋ Israel ná mli niiashikpamɔ yɛ ŋmɛnɛŋmɛnɛ beaŋ?
25 Wiemɔi nɛɛ yɛ ŋmɛnɛŋmɛnɛ beaŋ mlibaa. Yɛ klɛŋklɛŋ jeŋ ta lɛ mli jaramɔ afii lɛ amli lɛ, mumɔŋ Israel ná amaŋfɔfeemɔ kɛ nomŋɔɔ be ko mli niiashikpamɔ. Shi akɛ lɛ ku sɛɛ kɛba etsutsu shihilɛ lɛ mli ekoŋŋ ni ebahi mumɔŋ paradeiso mli. (Yesaia 35:1-10) Taakɛ maŋtiase ní tsɔ amaŋfɔ be ko ní Yesaia wie he lɛ ji lɛ—kɛ́ wɔɔkɛɛ lɛ—emli bafili lɛ waa ákɛ Yehowa jálɔi ni yɔɔ miishɛɛ, kɛ ekãa babaoo eyi lɛ obɔ̃.
“Aflaŋaa ní Ashĩ Aha Majimaji Lɛ”
26. Mɛɛ gbɛtsɔɔmɔ Yehowa kɛha ewebii ní aŋmɛɛ amɛhe lɛ?
26 Agbɛnɛ Yehowa tsɔ gbalɛ nɔ ekɛ Yesaia tee be mli ní abaaŋmɛɛ E-webii lɛ ahe kɛjɛ Babilon lɛ mli. Ani amɛbaaná ŋwɛi gbɛtsɔɔmɔ ko? Yehowa haa hetoo akɛ: “Naa, mawó minine nɔ maha jeŋmaji lɛ, ni mashi miflaŋaa lɛ matsɔɔ majimaji lɛ, ni amɛaahiɛ obihii lɛ yɛ amɛmiinaa kɛaaba, ni amɛaahole obiyei lɛ amɛaatara amɛkɔɔji anɔ kɛba.” (Yesaia 49:22) Yɛ eklɛŋklɛŋ mlibaa lɛ mli lɛ, Yerusalem, ní tsutsu lɛ eji nɔyelihe kɛ he ni Yehowa sɔlemɔtsu lɛ yɔɔ lɛ, batsɔ Yehowa ‘aflaŋaa.’ Jeŋmaji krokomɛi amli gbɔmɛi ní ehe gbɛi ní amɛyɔɔ hewalɛ waa po, tamɔ “maŋtsɛmɛi” kɛ “amɛmaŋnyɛmɛi,” lɛ ye amɛbua Israelbii lɛ yɛ amɛgbɛfãa lɛ mli yɛ nakai beaŋ. (Yesaia 49:23a) Persia maŋtsɛmɛi ni ji Koresh kɛ Artashasta (Artaxerxes Longimanus) kɛ amɛshiabii lɛ fata nɛkɛ yelikɛbualɔi nɛɛ ahe. (Ezra 5:13; 7:11-26) Ni Yesaia wiemɔi lɛ hiɛ shishinumɔ kroko hu.
27. (a) Yɛ mlibaa ní da lɛ mli lɛ, mɛɛ “aflaŋaa” majimaji lɛ baake yuu kɛba he lɛ? (b) Mɛni baaba kɛji anyɛ jeŋmaji lɛ fɛɛ nɔ koni amɛkoto shi amɛha Mesia lɛ nɔyeli lɛ?
27 Yesaia 11:10 lɛ wieɔ “aflaŋaa ní ashĩ aha majimaji lɛ” he. Bɔfo Paulo kɛ wiemɔi nɛɛ to Kristo Yesu he. (Romabii 15:8-12) Enɛ hewɔ lɛ, yɛ emlibaa ní da mli lɛ, Yesu kɛ ehefatalɔi nɔyelɔi ní afɔ amɛ mu lɛ ji Yehowa “aflaŋaa” ní majimaji lɛ keɔ yuu kɛbaa he. (Kpojiemɔ 14:1) Yɛ be ní sa mli lɛ, shikpɔŋ lɛ nɔ gbɔmɛi fɛɛ—kɛ nɔyelɔi akui ní yɔɔ ŋmɛnɛ lɛ po—baakoto shi amɛha Mesia lɛ nɔyeli lɛ. (Lala 2:10, 11; Daniel 2:44) Mɛni baajɛ mli aba? Yehowa kɛɔ akɛ: “Oooná ole akɛ mi, mi ji Yehowa, ni mɛi ní hiɛ kã minɔ lɛ ahiɛ gboiŋ!”—Yesaia 49:23b.
“Agbɛnɛ Wɔyiwalaheremɔ lɛ Ebɛŋkɛ”
28. (a) Mɛɛ wiemɔi Yehowa kɛma nɔ mi eha ewebii lɛ ekoŋŋ akɛ abaaŋmɛɛ amɛhe? (b) Mɛɛ shiwoo Yehowa kɛha lolo yɛ ewebii lɛ agbɛfaŋ?
28 Ekolɛ mɛi ni yɔɔ nomŋɔɔ mli yɛ Babilon lɛ ateŋ mɛi komɛi ayiŋ baafee amɛ kɔshikɔshi akɛ, ‘Ani ebaanyɛ eba akɛ abaaŋmɛɛ Israel he lɛɛlɛŋ?’ Yehowa susu nakai sanebimɔ lɛ he jogbaŋŋ kɛtsɔ sane ní ebi nɛɛ nɔ, akɛ: “Ani ashɔ̃ɔ ekãalɔ hàa nii yɛ edɛŋ? aloo mɔ ni he wa lɛ nomi lɛ aaaje mli?” (Yesaia 49:24) Hetoo lɛ ji hɛɛ. Yehowa maa nɔ mi ehaa amɛ akɛ: “Aaashɔ̃ ekãalɔ nomi lɛ, ni mɔ ní he yɔɔ gbeyei lɛ hàa nii lɛ aaaje mli.” (Yesaia 49:25a) Mɛɛ shiwoo ní shɛjeɔ mɔ mii nɛ! Kɛfata he lɛ, Yehowa duromɔ ní ekpã mli eha ewebii lɛ ba kɛ shiwoo ní yɔɔ shiŋŋ akɛ ebaabu amɛhe. Ewie yɛ gbɛ ni yɔɔ faŋŋ nɔ akɛ: “Mɔ ni kɛo béɔ lɛ, mikɛ lɛ aaabé, ni mahere obii lɛ ayiwala.” (Yesaia 49:25b) Nakai shiwoo lɛ ma shi shiŋŋ lolo. Taakɛ aŋma yɛ Zakaria 2:12 lɛ, Yehowa kɛɛ ewebii lɛ akɛ: “Mɔ ni taa nyɛhe lɛ eeta ehiŋmɛiŋ ajaŋmalaatɛ he.” Lɛɛlɛŋ, wɔnáa duromɔ be mli ŋɔɔmɔ amrɔ nɛɛ beni shikpɔŋ lɛ nɔ gbɔmɛi fɛɛ yɔɔ hegbɛ akɛ amɛké yuu kɛya mumɔŋ Zion lɛ. Shi kɛlɛ, nakai duromɔ be lɛ baaba naagbee.
29. Mɛɛ gbɛkpamɔ ní yɔɔ gbeyei waa mɛɔ mɛi ní ekpɛlɛɛɛ ní amɛboɔ Yehowa toi lɛ?
29 Mɛni baaba mɛi ní kɛ kuɛŋtimɔ kpooɔ akɛ amɛaabo Yehowa toi, ní amɛwaa ejálɔi lɛ ayi po lɛ anɔ? Ekɛɔ akɛ: “Maha ohaolɔi lɛ aye amɛ diɛŋtsɛ amɛheloo, ni amɛ diɛŋtsɛ amɛlá aaatɔrɔ amɛ tamɔ dãa dɔkɔdɔkɔ.” (Yesaia 49:26a) Gbɛkpamɔ ní yɔɔ gbeyei waa nɛ! Nɛkɛ shitee-kɛ-wolɔi kuɛŋtilɔi nɛɛ bɛ wɔsɛɛ be ko ní sɛɛ tsɛɔ. Abaakpata amɛhiɛ. Enɛ hewɔ lɛ, abaatsɔ ewebii lɛ ayiwala ní eeehere kɛ ehenyɛlɔi lɛ ahiɛ ní eeekpata lɛ nɔ ale Yehowa ákɛ Yiwalaherelɔ. “Heloo fɛɛ aaaná ale akɛ mi, Yehowa, ji oyiwalaherelɔ lɛ, ni okpɔ̃lɔ ji Yakob hewalɔ lɛ.”—Yesaia 49:26b.
30. Mɛɛ yiwalaheremɔ nitsumɔ Yehowa etsu eha ewebii lɛ, ni mɛni hu ebaafee eha amɛ wɔsɛɛ?
30 Nakai wiemɔi lɛ ba mli klɛŋklɛŋ kwraa beni Yehowa kɛ Koresh tsu nii ní ekɛjie E-webii lɛ kɛjɛ Babilon nyɔŋyeli shishi lɛ. Amɛba mli nakai nɔŋŋ hu yɛ afi 1919 beni Yehowa kɛ e-Bi, Yesu Kristo ní ekɛ lɛ etá maŋtsɛsɛi nɔ lɛ tsu nii ní ekɛjie E-webii lɛ kɛjɛ mumɔŋ nyɔŋyeli mli lɛ. No hewɔ lɛ, Biblia lɛ wieɔ Yehowa kɛ Yesu fɛɛ he akɛ yiwalaherelɔi. (Tito 2:11-13; 3:4-6) Yehowa ji wɔ Yiwalaherelɔ, ni Yesu, ni ji Mesia lɛ, ji ‘e-Najiaŋdamɔlɔ Nukpa.’ (Bɔfoi lɛ Asaji 5:31) Yɛ anɔkwale mli lɛ, Nyɔŋmɔ yiwalaheremɔ nifeemɔi ní ekɛtsɔɔ Yesu Kristo nɔ lɛ yɛ naakpɛɛ. Yehowa tsɔ́ɔ sanekpakpa lɛ nɔ ehaa mɛi ní yɔɔ jalɛ tsuii lɛ yeɔ amɛhe kɛjɛɔ apasa jamɔ nyɔŋyeli shishi. Etsɔ́ɔ kpɔmɔ afɔleshaa lɛ nɔ ejieɔ amɛ kɛjɛɔ esha kɛ gbele nyɔŋyeli shishi. Yɛ afi 1919 lɛ, ejie Yesu nyɛmimɛi lɛ kɛjɛ mumɔŋ nyɔŋyeli mli. Ni yɛ Harmagedon ta ní bɛŋkɛɔ oyayaayai lɛ mli lɛ, ebaakpɔ̃ asafo babaoo ni ji adesai anɔkwafoi lɛ kɛjɛ hiɛkpatamɔ ní baaba eshafeelɔi anɔ lɛ hu mli.
31. Te esa akɛ Kristofoi afee amɛnii yɛ Nyɔŋmɔ duromɔ ní amɛná lɛ he amɛha tɛŋŋ?
31 Belɛ, kwɛ hegbɛ ní eji akɛ wɔɔná Nyɔŋmɔ hiɛ duromɔ! Eba akɛ wɔ fɛɛ wɔkɛ be ní sa nɛɛ baatsu nii yɛ nilee mli. Ni eba hu akɛ wɔbaafee wɔnii yɛ bɔ ni wɔbei nɛɛ he hiaa waa lɛ kɛ gbeekpãmɔ naa, ní wɔbo Paulo wiemɔi ní ekɛ Romabii lɛ wie lɛ toi, akɛ: “Wɔle be lɛ akɛ agbɛnɛ ŋmɛlɛtswaa ni wɔkɛaate shi kɛaajɛ wɔ mli lɛ eshɛ; ejaakɛ agbɛnɛ wɔyiwalaheremɔ lɛ ebɛŋkɛ fe tsutsu beni wɔhe wɔye lɛ. Nyɔɔŋ lɛ eho etã, ni jetsɛremɔ ebɛŋkɛ: no hewɔ lɛ nyɛhaa wɔjiea duŋ mli nitsumɔi lɛ wɔshwiea, ni wɔwo la tawuu nii lɛ. Nyɛhaa wɔbaa wɔjeŋ fɛfɛo bɔ ni sa shwane, jeee yɛ yakayaka shwɛmɔ kɛ dãatɔɔ mli; jeee ajwamaŋbɔɔ kɛ nyenyeŋtswibɔɔ mli, jeee béi kɛ awuŋayeli mli; shi moŋ nyɛwoa Nuntsɔ Yesu Kristo, ni nyɛkahaa heloo lɛ nɔjwɛŋmɔ lɛ miitsɔ heloo lɛ sɛɛdii.”—Romabii 13:11-14.
32. Mɛɛ nibii srɔtoi Nyɔŋmɔ webii yɔɔ nɔmimaa yɛ he?
32 Yehowa baaya nɔ aduro mɛi ní boɔ eŋaawoo toi lɛ. Ebaaha amɛ hewalɛ kɛ nyɛmɔi ní he hiaa koni amɛkɛtsu sanekpakpa shiɛmɔ nitsumɔ lɛ. (2 Korintobii 4:7) Yehowa kɛ etsuji lɛ baatsu nii tamɔ bɔ ni ekɛ amɛ-Hiɛnyiɛlɔ, Yesu tsu nii lɛ. Ebaafee amɛnaabui “tamɔ klante ní naa ba” koni amɛnyɛ amɛkɛ sanekpakpa lɛ he shɛɛ sane lɛ ashɛ mɛi ní he jɔ lɛ atsuii amli. (Mateo 28:19, 20) Ebaabu ewebii lɛ ahe “yɛ eniji ashishi hɔ̃ɔŋ lɛ mli.” Ekɛ amɛ baato “egaimlibii akotoku lɛŋ” tamɔ “gaimlibi ní he kpɛ́ɔ.” Lɛɛlɛŋ, Yehowa kwaŋ ewebii lɛ kɔkɔɔkɔ!—Lala 94:14; Yesaia 49:2, 15.
[Shishigbɛ niŋmaa]
a “Ŋwanejee ko bɛ he akɛ, ní Satan yóo akɛ Yesu ji Nyɔŋmɔ Bi lɛ kɛ mɔ ni agba afɔ̃ shi akɛ ebaatswa eyitso nɔ̃ (1 Mose 3:15) lɛ hewɔ lɛ, efee nɔ fɛɛ nɔ ní eeenyɛ koni ekpata Yesu hiɛ. Shi, beni bɔfo Gabriel tswaa Maria adafi yɛ Yesu hɔŋɔɔ lɛ he lɛ, ekɛɛ lɛ akɛ: ‘Mumɔ krɔŋkrɔŋ aaaba onɔ, ni Ŋwɛinyo lɛ hewalɛ aaabahà onɔ, no hewɔ lɛ nakai bi krɔŋkrɔŋ lɛ hu ni ooofɔ́ lɛ, aaatsɛ́ lɛ Nyɔŋmɔ bi.’ (Luka 1:35) Yehowa bu e-Bi lɛ he. Mɔdɛŋ srɔtoi ní abɔ koni akpata Yesu hiɛ beni eji abifao lɛ yeee omanye.”—Insight on the Scriptures, Kpo 2, baafa 868, ní Watchtower Bible and Tract Society of New York, Inc. fee lɛ.
[Mfoniri ni yɔɔ baafa 139]
Mesia lɛ tamɔ “gaimlibi ní he kpɛ́ɔ” yɛ Yehowa gaimlibii akotoku lɛ mli
[Mfoniri ni yɔɔ baafa 141]
Mesia lɛ efee “jeŋmaji lɛ hu ala”
[Mfoniri ni yɔɔ baafa 147]
Suɔmɔ ní Nyɔŋmɔ yɔɔ kɛha ewebii lɛ da kwraa fe nɔ ni yoofɔ́yoo yɔɔ kɛha ebi