Yitso Nyɔŋma Kɛ Ekome

‘Nyɛkaŋɔa Nyɛhiɛ Nyɛfɔa Lumɛi Anɔ’

Yesaia 50:1-11

1, 2. (a) Mɛɛ mumɔ naa ŋaawoo Yudafoi lɛ booo toi lɛ, ni mɛni jɛ mli ba? (b) Mɛni hewɔ Yehowa bi akɛ: ‘Nɛgbɛ mligbalamɔ wolo lɛ yɔɔ lɛ?’

“NYƐKAŊƆA nyɛhiɛ nyɛfɔa lumɛi loo gbɔmɔ bi ko ní yelikɛbuamɔ ko bɛ edɛŋ lɛ nɔ. . . . Ajɔɔ mɔ ni Yakob Mawu lɛ ji ebualɔ, ní ehiɛ kã Yehowa, e-Nyɔŋmɔ lɛ, nɔ lɛ; lɛ efee ŋwɛi kɛ shikpɔŋ.” (Lala 146:3-6) Kɛji Yudafoi ní hi shi yɛ Yesaia gbii lɛ amli lɛ baabo lalatsɛ lɛ ŋaawoo nɛɛ toi kɛkɛ! Kɛji amɛkɛ amɛhiɛ baafɔ̃ “Yakob Mawu lɛ” nɔ, shi jeee Mizraim loo wɔŋjalɔi amaŋ kroko nɔ kɛkɛ! Kulɛ, kɛ́ Yuda henyɛlɔi lɛ te shi amɛwo lɛ lɛ, Yehowa baafee nii ní ekɛbu ehe. Shi kɛlɛ, Yuda ekpoo akɛ eeetsɔ ehe kɛba Yehowa ŋɔɔ kɛha yelikɛbuamɔ. Enɛ hewɔ lɛ, Yehowa baaŋmɛ gbɛ ní akpata Yerusalem hiɛ, ni abaaloo Yuda shikpɔŋ lɛ nɔ bii lɛ kɛya nomŋɔɔ mli yɛ Babilon.

² Yuda nyɛŋ ashwa mɔ ko mɔ ko, fe lɛ diɛŋtsɛ ehe. Enyɛŋ ekɛɛ yɛ gbɛ ní ja nɔ akɛ ehiɛkpatamɔ lɛ ba akɛni Yehowa kɛ lɛ yeee yɛ anɔkwayeli mli, aloo akɛni eku ekpaŋmɔ ní ekɛ maŋ lɛ fee lɛ mli lɛ hewɔ. Bɔlɔ lɛ jeee mɔ ní kuɔ kpaŋmɔ mli. (Yeremia 31:32; Daniel 9:27; Kpojiemɔ 15:4) Beni Yehowa maa anɔkwa sane nɛɛ nɔ mi lɛ, ebi Yudafoi lɛ akɛ: “Nɛgbɛ nyɛnyɛ mligbalamɔ wolo ní mikɛshwie lɛ [lɛ] yɔɔ?” (Yesaia 50:1a) Yɛ Mose Mla lɛ shishi lɛ, esa akɛ nuu ní tseɔ eŋa gbala lɛ aha lɛ gbalamlitsemɔ wolo. Kɛkɛ lɛ, eyɛ hegbɛ akɛ etsɔɔ nuu kroko ŋa. (5 Mose 24:1, 2) Yɛ mfonirifeemɔŋ shishinumɔ naa lɛ, Yehowa kɛ wolo ní tamɔ nɛkɛ eha Yuda nyɛmi yoo, ni ji Israel maŋtsɛyeli lɛ, shi efeko nakai yɛ Yuda gbɛfaŋ.a Ekã he eji ‘ewu’ lolo. (Yeremia 3:8, 14) Eka shi faŋŋ akɛ Yuda bɛ hegbɛ akɛ ekɛ wɔŋjalɔi amaji lɛ bɔɔ akɛ amɛhefatalɔ. Yehowa kɛ lɛ teŋ wekukpaa lɛ baahi shi aahu “kɛyashi beyinɔ ní [Mesia lɛ] mɔ nɔ̃ ni ji lɛ aaaba.”—1 Mose 49:10.

 3. Mɛɛ yiŋtoo hewɔ Yehowa ‘hɔ̃ɔ’ ewebii lɛ?

³ Yehowa bi Yuda hu akɛ: “Minyɔjiatsɛmɛi lɛ ateŋ namɔ mihɔ̃ɔ nyɛ miha?” (Yesaia 50:1b) Akɛ Yudafoi lɛ eyaŋ nomŋɔɔ mli yɛ Babilon koni akɛwo nyɔmɔ ko ní asusuɔ akɛ Yehowa eye. Yehowa tamɔɔɔ Israelnyo ohiafo ní esa akɛ ehɔ̃ɔ emusuŋbii eha enyɔmɔtsɛ koni ekɛwo lɛ nyɔmɔ ní ehiɛ lɛ lɛ. (2 Mose 21:7) Shi moŋ, Yehowa tsɔɔ yiŋtoo diɛŋtsɛ hewɔ ní abaaye ewebii lɛ anɔ nyɔŋ lɛ akɛ: “Naa, nyɛnishaianii lɛ ahewɔ ahɔ̃ɔ nyɛ, ni nyɛnɔtɔmɔi lɛ ahewɔ ashwie nyɛnyɛ.” (Yesaia 50:1d) Yudafoi lɛ ji mɛi ní ekwa Yehowa; lɛ lɛ ekwako amɛ.

4, 5. Mɛɛ gbɛ nɔ Yehowa jie suɔmɔ ní eyɔɔ kɛha ewebii lɛ kpo yɛ, shi te Yuda here nɔ eha tɛŋŋ?

⁴ Yehowa sanebimɔ ní nyiɛ sɛɛ lɛ maa suɔmɔ ní eyɔɔ kɛha ewebii lɛ nɔ mi yɛ faŋŋ mli, akɛ: “Mɛɛ hewɔ miba, ni mɔ ko mɔ ko bɛ, ni mitsɛ́, ni mɔ ko mɔ ko hereee nɔ?” (Yesaia 50:2a) Kɛ́ wɔɔkɛɛ lɛ, Yehowa tsɔ etsuji gbalɔi lɛ anɔ eba ewebii lɛ ashia ni ebakpa amɛ fai ní amɛku amɛsɛɛ kɛba eŋɔɔ kɛ amɛtsuii fɛɛ. Shi amɛteŋ mɔ ko kwraa hereee lɛ nɔ. Yudafoi lɛ sumɔɔ ní amɛkɛ amɛhiɛ afɔ̃ adesa nɔ kɛha yelikɛbuamɔ, ni bei komɛi po lɛ amɛtsɔɔ amɛhe kɛyaa Mizraim.—Yesaia 30:2; 31:1-3; Yeremia 37:5-7.

⁵ Ani Mizraim ji yiwalaherelɔ ní anyɛɔ akɛ he fɔ̃ɔ enɔ babaoo fe Yehowa? Eyɛ faŋŋ akɛ nakai Yudafoi ní yeee anɔkwa lɛ ahiɛ ekpa nibii ní ba ní ha ato amɛmaŋ lɛ shishi afii ohai abɔ ní eho nɛ lɛ anɔ. Yehowa bi amɛ akɛ: “Ani minine efo kuku ní minyɛŋ mɔ makpɔ̃? aloo mibɛ hewalɛ ní manyɛ mɔ majie? Naa, miyiŋãa naa lɛ mihaa ŋshɔ mĩiɔ, mihaa faai tsɔmɔɔ ŋã: nu ní bɛ mli hewɔ lɛ amɛmli looi lɛ sharaa, ni kumai gbeɔ amɛ! Miwoɔ ŋwɛi ediŋ, ni mikɛ kpekpe feɔ ehehàa nɔ̃.”—Yesaia 50:2b, 3.

6, 7. Mɛɛ gbɛ nɔ Yehowa jie ehewale ní ekɛhereɔ mɔ yiwala lɛ kpo yɛ Mizraim hegbeyeiwoo be lɛ mli?

⁶ Yɛ afi 1513 D.Ŋ.B. lɛ, no mli lɛ Mizraim ji—Nyɔŋmɔ webii lɛ ahenyɛlɔ ní nyɛɔ amɛnɔ—shi jeee amɛkpɔ̃lɔ ní amɛhiɛ kã enɔ. No mli lɛ Israelbii lɛ ji nyɔji yɛ nakai wɔŋjalɔi ashikpɔŋ lɛ nɔ. Shi Yehowa kpɔ̃ amɛ, ni mɛɛ kpɔmɔ ní yɔɔ miishɛɛ waa po eji nɛkɛ! Klɛŋklɛŋ lɛ, ekɛ Haomɔi Nyɔŋma ba shikpɔŋ lɛ nɔ. Yɛ haomɔ ni ji nyɔŋma ní naa wa waa diɛŋtsɛ lɛ sɛɛ lɛ, Mizraim Farao lɛ wo Israelbii lɛ hewalɛ akɛ amɛya agbɛnɛ. (2 Mose 7:14–12:31) Shi, beni amɛfee nakai lɛ sɛɛ nɔŋŋ lɛ, Farao tsake etsui kwraa. Ebua esraafoi lɛ anaa ni amɛyi gbɛ akɛ amɛyaanyɛ Israelbii lɛ anɔ ní amɛku amɛsɛɛ kɛba Mizraim. (2 Mose 14:5-9) Mizraim asraafoi babaoo ní ejɛ amɛsɛɛ gbɛ kɛbaa lɛ, kɛ Ŋshɔ Tsuru lɛ ní yɔɔ amɛhiɛ gbɛ lɛ hewɔ lɛ, Israelbii lɛ bafee tamɔ mɛi ní adu amɛ! Shi no mli lɛ Yehowa yɛ jɛmɛ ní ebaawu eha amɛ.

⁷ Yehowa tsĩ Mizraimbii lɛ anaa amrɔ nɔŋŋ yɛ he ni amɛbanina amɛ yɛ lɛ kɛtsɔ atatu ní ekɛfo amɛ kɛ Israelbii lɛ ateŋ lɛ nɔ. He ni Mizraimbii lɛ yɔɔ yɛ atatu lɛ afã kome lɛ ewo duŋ kpii; shi he ni Israelbii lɛ yɔɔ yɛ efã kroko lɛ etse faŋŋ. (2 Mose 14:20) Kɛkɛ ni etsĩ Mizraim asraafoi lɛ anaa, ni Yehowa “ha boka kɔɔyɔɔ ni naa wa batswa nakai nyɔŋ lɛŋ fɛɛ, ni ŋshɔ lɛ ho kɛtee, ni eha ŋshɔ lɛ tsɔ shikpɔŋ gbiŋ.” (2 Mose 14:21) Beni nui lɛ amli gbá enyɔ lɛ, gbɔmɛi lɛ fɛɛ—hii, yei, kɛ gbekɛbii lɛ—nyɛ amɛfo Ŋshɔ Tsuru lɛ shweshweeshwe. Beni Yehowa webii lɛ nyiɛ kɛyaa ŋshɔ lɛ naabu kroko lɛ, eha atatu lɛ wó ehe nɔ. Kɛkɛ ni Mizraimbii lɛ tiu amɛ kɛ foi kɛbote ŋshɔ ní etsɔ shikpɔŋ gbiŋ lɛ mli. Beni ewebii lɛ yashɛ ŋshɔ lɛ naabu shweshweeshwe lɛ, Yehowa ha nui lɛ ku amɛsɛɛ ekoŋŋ, ni ebamii Farao kɛ esraafoi lɛ fɛɛ. Bɔ ni Yehowa fee ewu eha ewebii lɛ nɛ. Kwɛ hewalɛwoo ní enɛ ji kɛha Kristofoi ŋmɛnɛ!—2 Mose 14:23-28.

 8. Mɛɛ kɔkɔbɔi ní Yuda maŋbii lɛ booo toi hewɔ ni naagbee lɛ amɛtee nomŋɔɔ mli lɛ?

⁸ Beni shɛɔ Yesaia gbii lɛ amli lɛ, no mli lɛ afii ohai kpawo eho kɛjɛ nakai ŋwɛi kunimyeli lɛ sɛɛ kɛbaa. Agbɛnɛ Yuda ji maŋ ní yɔɔ lɛ diɛŋtsɛ enɔyeli hegbɛ. Bei komɛi lɛ, ekɛ maŋsɛɛ nɔyelii, tamɔ Ashur kɛ Mizraim boteɔ majimaji ateŋ yelikɛfuamɔi amli. Shi anyɛɛɛ akɛ he afɔ̃ nɛkɛ wɔŋjalɔi amaji nɛɛ ahiɛnyiɛlɔi lɛ anɔ. Amɛkɛ amɛ pɛsɛmkunya yeɔ klɛŋklɛŋ gbɛhe yɛ kpaŋmɔi ní amɛkɛ Yuda feɔ lɛ ahiɛ be fɛɛ be. Gbalɔi lɛ wie yɛ Yehowa gbɛi amli, ni amɛbɔ gbɔmɛi lɛ kɔkɔ ní amɛkɛ amɛhiɛ akafɔ̃ gbɔmɛi ní tamɔ nɛkɛ nɔ, shi amɛbooo gbalɔi lɛ awiemɔi lɛ atoi. Yɛ naagbee lɛ, abaaŋɔ Yudafoi lɛ nom kɛya Babilon ni amɛbaaye afii 70 yɛ nyɔŋyeli mli. (Yeremia 25:11) Shi kɛlɛ, Yehowa hiɛ kpaŋ ewebii lɛ anɔ, ni ekwaŋ amɛ kɛyaŋ naanɔ hu. Ebaakai amɛ yɛ be ní eto lɛ mli, ni ebaagbele gbɛ eha amɛ koni amɛku amɛsɛɛ kɛba amɛmaŋ shikpɔŋ nɔ koni amɛbato jamɔ krɔŋŋ shishi ekoŋŋ yɛ jɛmɛ. Kɛ mɛɛ yiŋtoo? Koni amɛsaa amɛhe kɛha Shilo lɛ baa, mɔ ni jeŋmaji lɛ fɛɛ baabo lɛ toi lɛ!

Shilo lɛ Ba

 9. Namɔ ji Shilo, ni mɛɛ tsɔɔlɔ nɛkɛ eji?

⁹ Afii ohai abɔ ho. “Be falɛ lɛ” bashɛ, ni mɔ ni atsɛɔ lɛ Shilo lɛ, ni ji Nuntsɔ Yesu Kristo lɛ, bapue yɛ shikpɔŋ nɛɛ nɔ. (Galatabii 4:4; Hebribii 1:1, 2) Anɔkwale ní eji akɛ Yehowa hala ehafatalɔ ní bɛŋkɛ lɛ kpaakpa fe fɛɛ lɛ akɛ e-Naawielɔ kɛha Yudafoi lɛ tsɔɔ bɔ ni Yehowa sumɔɔ ewebii lɛ waa eha. Mɛɛ naawielɔ nɛkɛ Yesu bajie ehe kpo akɛ eji? Ákɛ naawielɔ ní fe fɛɛ! Yesu fe naawielɔ kɛkɛ, eji tsɔɔlɔ—Tsɔɔlɔ Nukpa. Ebɛ naakpɛɛ, ejaakɛ eyɛ Tsɔɔlɔ ní he esa waa—ni ji Yehowa Nyɔŋmɔ diɛŋtsɛ. (Yohane 5:30; 6:45; 7:15, 16, 46; 8:26) Ama enɛ nɔ mi kɛtsɔ nɔ ni Yesu tsɔ Yesaia nɔ ewie yɛ gbalɛ wiemɔi mli lɛ nɔ, ákɛ: “Nuntsɔ Yehowa eha mi nikaselɔi alilɛi, koni male bɔ ni mikɛ mɔ ni etɔ lɛ lɛ aaawie yɛ be ni sa mli; etsĩɛɔ mi daa leebi, etsĩɛɔ mitoi, ni mikɛnu nii tamɔ nikaselɔi.”—Yesaia 50:4.b

10. Te Yesu jie suɔmɔ ní Yehowa yɔɔ kɛha E-webii lɛ kpo eha tɛŋŋ, ni te ahere Yesu nɔ aha tɛŋŋ?

¹⁰ Dani Yesu baaba shikpɔŋ nɛɛ nɔ lɛ, no mli lɛ etsuɔ nii yɛ e-Tsɛ masɛi yɛ ŋwɛi. Atsɔɔ miishɛɛ wekukpaa ní yɔɔ Tsɛ lɛ kɛ Bi lɛ teŋ lɛ mli yɛ lalafoo wiemɔi amli yɛ Abɛi 8:30 lɛ akɛ: “Miyɛ [Yehowa masɛi] akɛ ŋaalɔ; . . . mishwɛɔ yɛ ehiɛ be fɛɛ be.” Yesu Tsɛ lɛ toiboo haa Yesu náa miishɛɛ babaoo. Ená suɔmɔ ní e-Tsɛ lɛ yɔɔ kɛha “gbɔmɛi abii” lɛ eko. (Abɛi 8:31) Beni Yesu ba shikpɔŋ lɛ nɔ lɛ, ekɛ ‘mɔ ni etɔ lɛ lɛ wie yɛ be ní sa mli.’ Eje esɔɔmɔ nitsumɔ lɛ shishi kɛtsɔ shɛɛ sane ko ní yɔɔ miishɛɛ ní yɔɔ Yesaia gbalɛ lɛ mli lɛ kanemɔ nɔ, akɛ: “[Yehowa, mumɔ NW] lɛ yɛ minɔ, no hewɔ lɛ efɔ mi mu, koni mijaje sanekpakpa lɛ mitsɔɔ ohiafoi; . . . koni miŋmɛɛ pilafoi lɛ ahe ní amɛye amɛhe.” (Luka 4:18, 19; Yesaia 61:1) Sanekpakpa kɛha ohiafoi lɛ! Hejɔɔmɔ kɛha mɛi ní etɔ amɛ lɛ! Kwɛ miishɛɛ ní nakai adafitswaa lɛ baaha gbɔmɛi lɛ aná! Mɛi komɛi ná miishɛɛ—shi jeee amɛ fɛɛ. Yɛ naagbee lɛ, mɛi pii ekpɛlɛɛɛ Yesu he odaseyelii ní tsɔɔ akɛ eji mɔ ko ní Yehowa etsɔɔ lɛ nii lɛ nɔ.

11. Namɛi fata Yesu he yɛ epã lɛ shishi, ni mɛɛ niiashikpamɔ amɛnáa?

¹¹ Shi kɛlɛ, mɛi komɛi miisumɔ ní amɛnu saji babaoo. Amɛkɛ miishɛɛ here Yesu ninefɔɔ ní miishɛɛ yɔɔ mli nɛɛ nɔ, akɛ: “Nyɛbaa miŋɔɔ, nyɛ mɛi fɛɛ ni etɔ nyɛ ni nyɛjatsui fe nyɛ lɛ, ni maha nyɛ hejɔɔmɔ. Nyɛwoa mipã lɛ nyɛfɔ̃a nyɛnɔ, ni nyɛkasea mi; shi mihe jɔ, ni mibaa mihe shi kɛjɛ mitsui mli; ni nyɛaaná hejɔɔmɔ nyɛaaha nyɛsusumai lɛ.” (Mateo 11:28, 29) Mɛi ní tsi amɛbɛŋkɛ Yesu lɛ ateŋ mɛi komɛi ji mɛi ní batsɔmɔ ekaselɔi lɛ. Amɛle akɛ Yesu he ní amɛaafata yɛ apã lɛ shishi lɛ tsɔɔ nitsumɔ ní wa kɛha amɛ. Nitsumɔ nɛɛ biɔ ní amɛshiɛ Maŋtsɛyeli lɛ he sanekpakpa lɛ kɛyashi shikpɔŋ lɛ naagbeehei lɛ, kɛfata nitsumɔi krokomɛi ahe. (Mateo 24:14) Beni bɔfoi lɛ kɛ kaselɔi krokomɛi lɛ kɛ amɛhe wo nitsumɔ nɛɛ mli lɛ, amɛna akɛ eha amɛsusumai ná hejɔɔmɔ lɛɛlɛŋ. Anɔkwa Kristofoi miitsu nakai nitsumɔ lɛ nɔŋŋ ŋmɛnɛ, ni amɛhe ní amɛkɛwoɔ mli lɛ haa amɛnáa miishɛɛ ní tamɔ nakai nɔŋŋ.

Etseee Atua

12. Mɛɛ gbɛ̀i anɔ Yesu jie toiboo ní efeɔ ehaa eŋwɛi Tsɛ lɛ kpo yɛ?

¹² Yesu hiɛ kpaaa yiŋtoo hewɔ ní eba shikpɔŋ nɔ lɛ nɔ kɔkɔɔkɔ—no ji ní ebafee Nyɔŋmɔ suɔmɔnaa nii. Agba bɔ ni esusuɔ saji ahe ehaa lɛ afɔ̃ shi akɛ: “Nuntsɔ Yehowa egbele mitoi, ni mitseee atua, ni asaŋ mikuuu misɛɛ.” (Yesaia 50:5) Yesu boɔ Nyɔŋmɔ toi be fɛɛ be. Yɛ anɔkwale mli lɛ, ewie po akɛ: “Bi lɛ diɛŋtsɛ nyɛŋ eto eyiŋ efee nɔ ko, ja nɔ ni enaa akɛ tsɛ lɛ feɔ lɛ.” (Yohane 5:19) Beni Yesu yɔɔ shihilɛ mli ní ebatsɔko gbɔmɔ lɛ, eeenyɛ efee akɛ efata e-Tsɛ lɛ he kɛtsu nii aahu afii akpekpei, loo akpekpei akpei abɔ po. Beni eba shikpɔŋ nɔ lɛ, etee nɔ ekɛ Yehowa gbɛtsɔɔmɔi tsu nii. Belɛ kwɛ bɔ ni esa akɛ wɔ, ni ji Kristo sɛɛnyiɛlɔi ní yeee emuu lɛ, akwɛ jogbaŋŋ ní wɔfee nɔ ni Yehowa kɛɔ lɛ pɛpɛɛpɛ!

13. Mɛni kã Yesu hiɛ ní ekɛbaakpe, ni kɛlɛ ejie ehe kpo ákɛ mɔ ni yɔɔ ekãa yɛ mɛɛ gbɛ nɔ?

¹³ Mɛi ní kpoo Yehowa Bi koome lɛ ateŋ mɛi komɛi wa lɛ yi, ni agba enɛ hu afɔ̃ shi akɛ: “Mitsɔ mikotosɛɛ miha yilɔi, kɛ midabii hu miha mɛi ní famɔɔ tsɔi; mikɛ mihiɛ hu eteee kɛjɛɛɛ hiɛgbele kɛ lajɔ̃ he.” (Yesaia 50:6) Taakɛ gbalɛ lɛ tsɔɔ lɛ, Mesia lɛ baaná piŋmɔ kɛ hiɛshishwiemɔ mli amanehulu yɛ shitee-kɛ-wolɔi adɛŋ. Yesu le akɛ abaafee lɛ enɛ. Ni ele he ni yiwaa nɛɛ baaya nɔ aahu kɛyashɛ. Ni kɛlɛ, beni eshikpɔŋ nɔ shihilɛ be lɛ bɛŋkɛɔ enaagbee lɛ, ejieee gbeyeishemɔ kpo. Ekɛ faishitswaa ní mli wa tamɔ tswɛrɛbo yí mli kɛtee Yerusalem, he ni ewala ákɛ adesa lɛ baaba naagbee yɛ lɛ. Beni Yesu nyiɛ gbɛ nɔ kɛyaa jɛmɛ lɛ, ekɛɛ ekaselɔi lɛ akɛ: “Naa, wɔmiiya Yerusalem, ni aaaŋɔ gbɔmɔ bi lɛ awo osɔfonukpai lɛ kɛ woloŋmalɔi lɛ adɛŋ, ni amɛaabu lɛ gbele fɔ́, ni amɛaaŋɔ lɛ amɛha wɔŋjalɔi lɛ; ni amɛaaye ehe fɛo, ni amɛkɛ kplebii aaayi lɛ, ni amɛaafɛ̃ lajɔ̃ amɛaashwie ehe, ni amɛaagbe lɛ; ni enɔ gbii etɛ lɛ eeete shi ekoŋŋ.” (Marko 10:33, 34) Abaafee nɛkɛ yiwalɛ nifeemɔi nɛɛ fɛɛ yɛ gbɔmɛi ní kulɛ esa akɛ amɛle nii fe maŋbii lɛ—ni ji osɔfonukpai kɛ woloŋmalɔi lɛ ayisɛɛtsirɛmɔ naa.

14, 15. Te Yesaia wiemɔi ní ewie akɛ abaagbála Yesu mãi ni abaashwie ehiɛ shi lɛ ba mli eha tɛŋŋ?

¹⁴ Yɛ Nisan 14 lɛ gbɛkɛ, afi 33 Ŋ.B. lɛ, Yesu kɛ esɛɛnyiɛlɔi lɛ ateŋ mɛi komɛi yɛ Getsemane abɔɔ lɛ mli. Eesɔle. Trukaa kɛkɛ ni asafo yuu ko pue ni amɛbamɔ lɛ kɛtee. Shi esheee gbeyei. Ele akɛ Yehowa kɛ lɛ yɛ. Yesu ma nɔ mi eha ebɔfoi ní tsui efã waa lɛ akɛ kɛ́ eesumɔ lɛ, kulɛ ebaanyɛ ekpa e-Tsɛ fai koni etsu ŋwɛibɔfoi ní fa fe asafoi nyɔŋma kɛ enyɔ kɛba ní amɛbahere eyiwala, shi ekɛfata he akɛ: “Shi no lɛ te aaafee tɛŋŋ ni ŋmalɛi lɛ aaaba mli?”—Mateo 26:36, 47, 53, 54.

¹⁵ Nɔ fɛɛ nɔ ní agba afɔ̃ shi yɛ kaai ni Mesia lɛ kɛbaakpe kɛ egbele he lɛ fɛɛ ba mli pɛpɛɛpɛ. Yɛ saneyeli ko ni anɔkwayeli bɛ mli yɛ Sanhedrin lɛ hiɛ sɛɛ lɛ, Pontio Pilato bibii Yesu saji, ni eha akɛ kplebi yi lɛ. Roma asraafoi “[kɛ] pampolo tswia eyiteŋ, ni amɛfɛ̃ lajɔ̃ amɛshwie ehe.” Enɛ ha Yesaia wiemɔi lɛ ba mli. (Marko 14:65; 15:19; Mateo 26:67, 68) Eyɛ mli akɛ Biblia lɛ ewieee akɛ afamɔ Yesu tsɛŋ mli tsɔi lɛ ekomɛi diɛŋtsɛ—ni ji nifeemɔ ní tsɔɔ bulɛ ní abɛ kwraa kɛha mɔ lɛ moŋ—shi ŋwanejee ko bɛ he akɛ afee enɛ, taakɛ Yesaia gba efɔ̃ shi lɛ pɛpɛɛpɛ.c—Nehemia 13:25.

16. Beni Yesu kɛ nɔnyɛɛ ní naa wa waa kpe lɛ, te efee enii eha tɛŋŋ, ni mɛni hewɔ enuuu he akɛ ehiɛ eshwie shi lɛ?

¹⁶ Beni Yesu damɔ Pilato hiɛ lɛ, ekpaaa lɛ fai ní ekɛ ehe ake lɛ ní akagbe lɛ, shi moŋ ejie dioofeemɔ ní bulɛ yɔɔ mli kpo, ejaakɛ ele akɛ esa akɛ egbó bɔni afee ní Ŋmalɛi lɛ aba mli. Beni Roma amralo lɛ wie akɛ eyɛ hewalɛ ní ekɛaabu Yesu gbele fɔ́ loo eha aŋmɛɛ ehe lɛ, Yesu kɛ ekãa diɛŋtsɛ ha lɛ hetoo akɛ: “Kɛ́ jeee ŋwɛi ajɛ aŋɔhao lɛ, kulɛ onáŋ hewalɛ ko yɛ minɔ.” (Yohane 19:11) Pilato asraafoi lɛ fee Yesu niseniianii diɛŋtsɛ, shi amɛnyɛɛɛ amɛshwie ehiɛ shi. Mɛni hewɔ esa akɛ enu he akɛ ehiɛ eshwie shi? Jeee tɔmɔ ko he toigbalamɔ ní sa lɛ hewɔ enaa amanehulu lɛ. Shi moŋ, aawa lɛ yi yɛ jalɛ nifeemɔ hewɔ. Yesaia gbalɛ wiemɔi ní tsara nɔ lɛ hu ba mli yɛ enɛ gbɛfaŋ akɛ: “Nuntsɔ Yehowa yeɔ buaa mi, hewɔ lɛ mihiɛ eshwieko shi; no hewɔ hu lɛ mifee mihiɛ tamɔ tswɛrɛbo, ni mile akɛ mihiɛ gboŋ.”—Yesaia 50:7.

17. Yehowa fi Yesu sɛɛ yɛ esɔɔmɔ nitsumɔ lɛ fɛɛ mli yɛ mɛi gbɛ̀i anɔ?

¹⁷ Ekãa ní Yesu ná lɛ damɔ Yehowa mli hekɛnɔfɔɔ ni yɔɔ shiŋŋ ní eyɔɔ kɛmɔ shi lɛ nɔ. Bɔ ni efee enii eha lɛ ha ana faŋŋ akɛ ekɛ Yesaia wiemɔi nɛɛ kpãa gbee kɛmɔɔ shi, akɛ: “Mɔ ni buɔ mi bem lɛ ebɛŋkɛ: namɔ kɛ mi aaaye sane? Ha ni wɔ fɛɛ wɔdamɔ shi! Namɔ ji mɔ ni kɛ mi ená lɛ? ha etsi ebɛŋkɛ mi! Naa, Nuntsɔ Yehowa yeɔ buaa mi: namɔ ji mɔ ni aaabu mi fɔ́? Naa, amɛ fɛɛ amɛaasuu tamɔ atade, omlɛ̃gɛ̃ aaaye amɛ!” (Yesaia 50:8, 9) Gbi ní abaptisi Yesu lɛ, Yehowa tsɛ́ lɛ jalɔ yɛ faŋŋ mli, ákɛ Nyɔŋmɔ mumɔŋ bi. Yɛ anɔkwale mli lɛ, anu Nyɔŋmɔ diɛŋtsɛ gbee yɛ nakai be lɛ mli, ni ekɛɛ: “Mɔ nɛ ji misuɔmɔ bi ni mináa ehe tsui lɛ.” (Mateo 3:17) Kɛbaa Yesu shikpɔŋ nɔ shihilɛ lɛ naagbee gbɛ, beni ekula shi ní esɔleɔ yɛ Getsemane abɔɔ lɛ mli lɛ, ‘ŋwɛibɔfo ko bajie ehe kpo etsɔɔ lɛ ni ebawo lɛ hewalɛ.’ (Luka 22:41-43) No hewɔ lɛ Yesu le akɛ e-Tsɛ lɛ kpɛlɛɔ eshihilɛ gbɛ lɛ nɔ. Nyɔŋmɔ Bi ní eye emuu nɛɛ efeko efɔŋ ko. (1 Petro 2:22) Ehenyɛlɔi lɛ kɛ amale folɔ enaa akɛ ekuɔ Hejɔɔmɔ Gbi lɛ mli, ákɛ, eji dãatɔlɔ, kɛ mɔ ni daimonio yɔɔ emli, shi amɛ amalei lɛ wooo Yesu hiɛgbele. Nyɔŋmɔ kɛ lɛ yɛ, no hewɔ lɛ namɔ baanyɛ ate shi awo lɛ?—Luka 7:34; Yohane 5:18; 7:20; Romabii 8:31; Hebribii 12:3.

18, 19. Mɛɛ niiashikpamɔi ní tamɔ Yesu nɔ̃ lɛ eko Kristofoi ní afɔ amɛ mu lɛ ená?

¹⁸ Yesu bɔ ekaselɔi lɛ kɔkɔ akɛ: “Kɛ́ amɛwa mi yi lɛ, amɛaawa nyɛ hu yi.” (Yohane 15:20) Etsɛɛɛ ni nibii ní ba lɛ ha enɛ fee anɔkwale. Yɛ Pentekoste afi 33 Ŋ.B. lɛ, mumɔ krɔŋkrɔŋ ba Yesu kaselɔi anɔkwafoi lɛ anɔ, ni afɔ́ Kristofoi asafo lɛ. Aaafee no sɛɛ nɔŋŋ lɛ, jamɔ mli hiɛnyiɛlɔi lɛ bɔ mɔdɛŋ akɛ amɛaatsĩ nɛkɛ hii kɛ yei anɔkwafoi nɛɛ, ní agbɛnɛ amɛbafata Yesu he akɛ “Abraham seshibii” lɛ fã, ní akpɛlɛ amɛnɔ ákɛ Nyɔŋmɔ mumɔŋ bii lɛ ashiɛmɔ nitsumɔ lɛ naa kwraa. (Galatabii 3:26, 29; 4:5, 6) Kɛjɛ klɛŋklɛŋ afii oha lɛ mli aahu kɛbashi amrɔ nɛɛ, Kristofoi ní afɔ amɛ mu lɛ kɛ amale kɛ mɛi alakamɔ wiemɔi kɛ yiwaa ní naa wa waa ní jɛ Yesu henyɛlɔi lɛ aŋɔɔ ekpe, yɛ be mli ní amɛdamɔɔ shi shiŋŋ kɛhaa jalɛ nifeemɔ lɛ.

¹⁹ Shi kɛlɛ, amɛkaiɔ Yesu wiemɔi ní woɔ mɔ hewalɛ nɛɛ, akɛ: “Ajɔɔ nyɛ, kɛji ajɛ́ nyɛ ni awa nyɛ yi ni amale awie nyɛhe efɔŋ fɛɛ efɔŋ yɛ mihewɔ lɛ. Nyɛnyaa ni nyɛmli afilia nyɛ; shi nyɛnyɔmɔwoo fá yɛ ŋwɛi.” (Mateo 5:11, 12) No hewɔ lɛ, kɛ́ Kristofoi ní afɔ amɛ mu lɛ yaje tutuamɔi ní naa wa fe fɛɛ po shishi lɛ, amɛholeɔ amɛyitsei anɔ. Nɔ fɛɛ nɔ ní amɛ shitee-kɛ-wolɔi lɛ baawie lɛ, amɛle akɛ Nyɔŋmɔ ebu amɛ jalɔi. Amɛji gbɔmɛi ní “he bɛ kpa ko loo naafolɔmɔ ko” yɛ ehiɛ.—Kolosebii 1:21, 22.

20. (a) Namɛi fiɔ Kristofoi ní afɔ amɛ mu lɛ asɛɛ, ni mɛɛ niiashikpamɔ amɛná? (b) Mɛɛ gbɛ nɔ Kristofoi ní afɔ amɛ mu lɛ kɛ “tooi krokomɛi” lɛ tsɔɔ amɛnáa nikaselɔi alilɛi?

²⁰ “Asafo babaoo” ni ji “tooi krokomɛi” lɛ fiɔ Kristofoi ní afɔ amɛ mu lɛ asɛɛ yɛ wɔbɛi nɛɛ amli. Mɛnɛɛmɛi hu damɔɔ shi shiŋŋ kɛhaa jalɛ nifeemɔ. Enɛ hewɔ lɛ, amɛfataa amɛnyɛmimɛi ní afɔ amɛ mu lɛ ahe kɛnaa amanehulu, ni “amɛfɔ́ amɛtadei lɛ ahe, ni amɛha eyɛ futaa yɛ toobi lɛ lá lɛ mli.” Yehowa ebu amɛ jalɔi kɛ yiŋtoo ákɛ ebaahere amɛyiwala kɛfo “amanehulu kpeteŋkpele lɛ.” (Kpojiemɔ 7:9, 14, 15; Yohane 10:16; Yakobo 2:23) Kɛji etamɔ nɔ ni amɛhenyɛlɔi lɛ ahe wa amrɔ nɛɛ po lɛ, Yesaia gbalɛ lɛ kɛɔ akɛ yɛ Nyɔŋmɔ diɛŋtsɛ be ní sa mli lɛ, nakai henyɛlɔi lɛ baatsɔmɔ tamɔ atade ní omlɛ̃gɛ̃ eye, ní sa akɛ ashɛ afɔ̃. Shi dani be nɛɛ aaashɛ lɛ, Kristofoi ní afɔ amɛ mu lɛ kɛ “tooi krokomɛi” lɛ fɛɛ yaa nɔ amɛhe waa kɛtsɔɔ sɔlemɔ, Nyɔŋmɔ Wiemɔ lɛ kasemɔ, kɛ jamɔ kpeei ní amɛyaa daa lɛ nɔ. Yehowa tsɔɔ nakai gbɛ̀i anɔ etsɔɔ amɛ nii, ni amɛkaseɔ bɔ ni afeɔ akɛ nikaselɔi alilɛi wieɔ.

Okɛ Ohiɛ Afɔ̃ Yehowa Gbɛi lɛ Nɔ

21. (a) Namɛi ji mɛi ní nyiɛɔ yɛ la lɛ mli lɛ, ni mɛni baajɛ mli aba aha amɛ wɔsɛɛ? (b) Mɛni baa mɛi ní nyiɛ duŋ mli lɛ anɔ?

²¹ Agbɛnɛ kadimɔ srɔtofeemɔ ko ní jeɔ kpo faŋŋ: “Nyɛteŋ namɔ sheɔ Yehowa gbeyei, ni eboɔ etsulɔ lɛ gbee toi? Kɛ́ enyiɛ duŋ mli po ní la etsooo haaa lɛ lɛ, ha ekɛ ehiɛ afɔ̃ Yehowa gbɛi lɛ nɔ, ní ekɛ ehe akpasa e-Nyɔŋmɔ lɛ!” (Yesaia 50:10) Mɛi ní boɔ Nyɔŋmɔ Tsulɔ, Yesu Kristo gbee toi lɛ, nyiɛɔ yɛ la lɛ mli. (Yohane 3:21) Jeee akɛ amɛkɛ Nyɔŋmɔ gbɛi, ni ji Yehowa tsuɔ nii kɛkɛ, shi moŋ amɛkɛ amɛhiɛ fɔ̃ɔ mɔ ní atsɛ́ɔ lɛ nakai lɛ nɔ hu. Kɛji tsutsu ko lɛ amɛnyiɛ duŋ mli po lɛ, amrɔ nɛɛ amɛsheee gbɔmɔ gbeyei. Amɛkɛ amɛhe fɔ̃ɔ Nyɔŋmɔ nɔ. Shi kɛlɛ, gbɔmɔ he gbeyeishemɔ emɔmɔ mɛi ní yaa nɔ amɛnyiɛɔ duŋ mli lɛ waa. Nakai ji bɔ ni eba lɛ yɛ Pontio Pilato gbɛfaŋ. Eyɛ mli akɛ ele akɛ Yesu yeee amale naafolɔmɔi ní akɛshiɔ lɛ lɛ eko kwraa he fɔ́ moŋ, shi gbeyeishemɔ tsĩ nakai Roma maŋ onukpa lɛ gbɛ ni enyɛɛɛ eŋmɛɛ Yesu he. Roma asraafoi gbe Nyɔŋmɔ Bi lɛ, shi Yehowa tée lɛ shi ni ekɛ anunyam kɛ woo bú lɛ akekere. Shi Pilato hu? Taakɛ Yudafonyo yinɔsaneŋmalɔ Flavius Josephus tsɔɔ mli lɛ, Yesu gbele sɛɛ afii ejwɛ pɛ mli lɛ, atsake Pilato kɛjɛ Roma amralo gbɛhe lɛ, ni akɛ famɔ ha lɛ akɛ eku esɛɛ kɛya Roma ní eyaha tɔmɔi komɛi ní hiɛdɔɔ yɔɔ mli lɛ ahe naafolɔmɔi ní akɛshiɔ lɛ lɛ ahetoo. Ni Yudafoi ní ha agbe Yesu lɛ hu? Nɔ ni shɛɛɛ afii nyɔŋmai ejwɛ sɛɛ lɛ, Roma asraafoi lɛ bakpata Yerusalem hiɛ ni amɛgbe maŋ lɛ mli bii lɛ loo amɛloo amɛ kɛtee nomŋɔɔ mli. Hiɛnɔkamɔ ní yɔɔ miishɛɛ ko bɛ kɛha mɛi ní sumɔɔ duŋ lɛ!—Yohane 3:19.

22. Mɛni hewɔ eji kwashiafeemɔ kpele diɛŋtsɛ akɛ akɛ hiɛ aaafɔ̃ adesai anɔ kɛha yiwalaheremɔ lɛ?

²² Eji kwashiafeemɔ kpele diɛŋtsɛ akɛ akɛ hiɛ aaafɔ̃ adesai anɔ kɛha yiwalaheremɔ. Yesaia gbalɛ lɛ tsɔɔ nɔ hewɔ, akɛ: “Naa, nyɛ fɛɛ ní nyɛshɛreɔ la, ní nyɛkɛ gãimlibii ní tsoɔ bɔleɔ nyɛhe lɛ, nyɛyaa nyɛlalilɛi kɛ gãimlibii ní tsoɔ ní nyɛshɛre lɛ amli! Midɛŋ nyɛaaná enɛ kɛaajɛ, awerɛho mli nyɛaakamɔ shi yɛ!” (Yesaia 50:11) Adesai nɔyelɔi baa ni amɛyaa. Ekolɛ mɔ aŋkro ko ní náa mɛi anɔ hewalɛ baanyɛ aná gbɔmɛi asusumɔ nɔ hewalɛ waa yɛ be ko mli. Shi adesa anɔkwafo fe fɛɛ lɛ po yɛ he ní enyɛɔ etsuɔ nibii ahe nii kɛyashiɔ. Yɛ nɔ najiaŋ ní eeeshɛre la ní tsoɔ grigri, taakɛ esɛɛfilɔi lɛ kpáa gbɛ lɛ, ekolɛ eeenyɛ eshɛre lai bibii ní tsoɔ ‘hɛrɛbii,’ ní haa la kpɛmɔ kɛ dɔlɛ bibioo pɛ, kɛkɛ lɛ egbo nɔŋŋ. Shi yɛ gbɛ kroko nɔ lɛ, mɛi ní kɛ amɛhiɛ fɔ̃ɔ Shilo, ni ji Mesia ní Nyɔŋmɔ wo shi yɛ ehe lɛ nɔ lɛ, anine enyɛŋ shi kɔkɔɔkɔ.

[Shishigbɛ niŋmai]

[Mfoniri ni yɔɔ baafa 155]

Yudafoi lɛ kɛ amɛhiɛ fɔ̃ɔ adesai nɔyelɔi anɔ fe Yehowa

[Mfoniri ni yɔɔ baafa 156, 157]

Yehowa bu ewebii lɛ ahe yɛ Ŋshɔ Tsuru lɛ naa kɛtsɔ atatu ní ekɛfo amɛ kɛ Mizraimbii lɛ ateŋ lɛ nɔ