Yitso Nyɔŋma Kɛ Enyɔ
Miishɛjemɔ Kɛha Nyɔŋmɔ Webii
1. Mɛɛ gbɛkpamɔi ní mli wa waa kã Yerusalem maŋ lɛ kɛ emli bii lɛ ahiɛ, ni kɛlɛ mɛɛ hiɛnɔkamɔ yɔɔ?
AFII 70—adesa wala be sɛɛkɛlɛ—nakai ji be falɛ ní Yuda maŋ lɛ kɛbaahi Babilon nomŋɔɔ mli lɛ. (Lala 90:10; Yeremia 25:11; 29:10) Israelbii ní aŋɔ amɛ nom kɛtee lɛ ateŋ mɛi pii baagbɔlɔ ni amɛbaagboi yɛ Babilon. Susumɔ bɔ ni amɛhenyɛlɔi lɛ ahorabɔɔ wiemɔi kɛ amɛyiwɔmɔ lɛ baaha amɛhiɛ ashwie shi lɛ he okwɛ. Agbɛnɛ hu, susumɔ heguɔgbee ní baaba amɛ-Nyɔŋmɔ, Yehowa nɔ, beni maŋtiase ní ekɛ egbɛi fɔ̃ nɔ lɛ kãa shi amaŋfɔ aahu be kakadaŋŋ lɛ he okwɛ. (Nehemia 1:9; Lala 132:13; 137:1-3) Sɔlemɔtsu ní amɛsumɔɔ waa, ní Nyɔŋmɔ anunyam lɛ yí lɛ obɔ beni Salomo jɔɔ nɔ lɛ ehiŋ shi dɔŋŋ. (2 Kronika 7:1-3) Mɛɛ gbɛkpamɔi ní mli wa waa nɛ! Shi Yehowa tsɔ Yesaia nɔ egba sɛɛkuu he gbalɛ efɔ̃ shi. (Yesaia 43:14; 44:26-28) Wɔnaa saneyitso ni kɛ miishɛjemɔ kɛ hewalɛwoo haa nɛɛ he gbalɛi krokomɛi yɛ Yesaia wolo lɛ yitso 51 lɛ mli.
2. (a) Namɛi Yehowa tsɔ Yesaia nɔ ekɛ emiishɛjemɔ shɛɛ sane lɛ yaha? (b) Yudafoi anɔkwafoi lɛ ‘nyiɛɔ jalɛ sɛɛ’ yɛ mɛɛ gbɛ nɔ?
2 Yehowa kɛɛ mɛi ni yɔɔ Yuda ní kpaleɔ amɛtsuii kɛbaa eŋɔɔ lɛ akɛ: “Nyɛboa mi toi, nyɛ mɛi ní nyɛnyiɛɔ jalɛ sɛɛ, ní nyɛtaoɔ Yehowa sɛɛgbɛ lɛ.” (Yesaia 51:1a) ‘Jalɛ sɛɛ ní anyiɛɔ’ lɛ tsɔɔ nifeemɔ. Mɛi ní ‘nyiɛɔ jalɛ sɛɛ’ lɛ ewieŋ efolo kɛkɛ akɛ Nyɔŋmɔ webii ji amɛ. Amɛkɛ ekãa baabɔ mɔdɛŋ ní amɛfee jalɔi, ní amɛhi shi yɛ Nyɔŋmɔ suɔmɔnaa nii kɛ gbeekpamɔ naa. (Lala 34:16; Abɛi 21:21) Amɛkɛ amɛhiɛ baafɔ̃ Yehowa nɔ akɛ jalɛ Jɛɛhe koome pɛ, ni ‘amɛbaatao akɛ amɛaana Yehowa.’ (Lala 11:7; 145:17) No etsɔɔɔ akɛ amɛleee mɔ ni Yehowa ji momo loo gbɛ ní atsɔɔ nɔ abɛŋkɛɔ lɛ yɛ sɔlemɔ mli. Shi moŋ, amɛbaabɔ mɔdɛŋ akɛ amɛaatsi amɛbɛŋkɛ lɛ, ní amɛjá lɛ, ní amɛsɔle amɛha lɛ, ní amɛtao egbɛtsɔɔmɔ yɛ nɔ fɛɛ nɔ ní amɛfeɔ lɛ mli.
3, 4. (a) Namɔ ji “tɛsaa” ní agbá Yudafoi lɛ kɛjɛ mli lɛ, ni namɔ ji “bu ní atsa” amɛ kɛjɛ mli lɛ? (b) Mɛni hewɔ Yudafoi lɛ ajɛɛhe ní amɛaakai lɛ baaha amɛná miishɛjemɔ lɛ?
3 Shi, kɛ́ akɛmiito he lɛ, mɛi ní nyiɛɔ jalɛ sɛɛ lɛɛlɛŋ yɛ Yuda lɛ ayi faaa kwraa, ni ekolɛ enɛ baaha amɛshe gbeyei ní amɛnijiaŋ aje wui waa. No hewɔ lɛ beni Yehowa kɛ tɛbu ní atsaa tɛ yɛ mli lɛ feɔ he mfoniri lɛ, ewo amɛ hewalɛ akɛ: “Nyɛkwɛa tɛsaa ní agbá nyɛ kɛjɛ mli lɛ, kɛ bu ní atsa nyɛ kɛjɛ mli lɛ! Nyɛkwɛa nyɛtsɛ Abraham, kɛ Sara hu ní fɔ́ nyɛ lɛ; ejaakɛ ekome eyɔɔ, ni mitsɛ́ lɛ lɛ, ni mijɔɔ lɛ, ni miha eyi fá!” (Yesaia 51:1b, 2) “Tɛsaa” ní agbá Yudafoi lɛ kɛjɛ mli lɛ ji Abraham, ni ji yinɔsane mli gbɔmɔ ní Israel maŋ lɛ kɛ lɛ shwãa waa lɛ. (Mateo 3:9; Yohane 8:33, 39) Lɛ ji maŋ shishitolɔ, ni ji adesa ní maŋ lɛ jɛ emli kɛba. “Bu ní atsa” lɛ ji Sara, mɔ musu mli ní Israel blematsɛ Isak jɛ kɛba lɛ.
4 Abraham kɛ Sara efo mli yɛ afii ní amɛbaanyɛ amɛfɔ́ lɛ mli ní amɛbɛ bi. Ni kɛlɛ, Yehowa wo shi akɛ ebaajɔɔ Abraham ni ‘ebaaha eyi afá.’ (1 Mose 17:1-6, 15-17) Abraham kɛ Sara tsɔ ŋwɛi ní ajɛ aha amɛná amɛfɔmɔ hewalɛ ekoŋŋ lɛ nɔ amɛfɔ́ bi yɛ amɛgbɔlɛ be lɛ mli, ni Nyɔŋmɔ maŋ ní ekɛ amɛ fee kpaŋmɔ lɛ jɛ emli kɛba. Nɛkɛ gbɛ nɔ Yehowa tsɔ ni eha nakai nuu kome lɛ batsɔ jeŋmaŋ kpeteŋkpele ní mli bii ayi bafá babaoo ní anyɛɛɛ akane, tamɔ ŋwɛi ŋulamii lɛ atsɛ. (1 Mose 15:5; Bɔfoi lɛ Asaji 7:5) Kɛji Yehowa baanyɛ atsɔ nɛkɛ gbɛ nɔ eŋɔ Abraham kɛjɛ maŋsɛɛ shikpɔŋ ko nɔ yɛ shɔŋŋ ní eha etsɔ jeŋmaŋ kpeteŋkpele lɛ, no lɛ eka shi faŋŋ akɛ ebaanyɛ etsu shiwoo ní ekɛha akɛ ebaaha shwɛɛnii anɔkwafoi komɛi aye amɛhe kɛjɛ Babilon nyɔŋyeli mli, ní ekɛ amɛ aku sɛɛ kɛba amɛmaŋ shikpɔŋ nɔ ekoŋŋ, koni eha amɛtsɔ maŋ kpeteŋkpele ekoŋŋ lɛ hu he nii. Nyɔŋmɔ shiwoo ní ekɛha Abraham lɛ ba mli; ebaatsu shiwoo ní ekɛha nakai Yudafoi nomii lɛ hu he nii.
5. (a) Abraham kɛ Sara feɔ namɛi ahe mfoniri? Tsɔɔmɔ mli. (b) Namɛi náa amɛshishijee kɛjɛɔ “tɛsaa” lɛ mli yɛ naagbee mlibaa lɛ mli?
5 Eeenyɛ efee akɛ mfonirifeemɔŋ tɛsaa ní yɔɔ Yesaia 51:1, 2 lɛ hiɛ shishinumɔ kroko hu. Mose Wolo ni Ji Enumɔ 32:18 lɛ tsɛɔ Yehowa akɛ “tɛsaa” ní fɔ́ Israel maŋ lɛ kɛ ‘Mɔ ni fɔ́ Israel kɛ kɔ̃ɔmɔi amli piŋmɔi lɛ.’ Yɛ sɛɛkpee wiemɔ lɛ mli lɛ, akɛ Hebri feemɔ-wiemɔ kome lɛ nɔŋŋ tsu nii tamɔ nɔ ni yɔɔ Yesaia 51:2 lɛ yɛ nɔ ni kɔɔ fɔmɔ ní Sara fɔ́ Israel he lɛ gbɛfaŋ. No hewɔ lɛ, Abraham damɔɔ shi ákɛ Yehowa, ni ji Abraham Kpeteŋkpele lɛ henɔ ko yɛ gbalɛ mli. Abraham ŋa, Sara feɔ Yehowa jeŋ muu fɛɛ ŋwɛi gbɛjianɔtoo ni ji mumɔŋ bɔɔ nii, ní akɛdamɔɔ shi yɛ Ŋmalɛ Krɔŋkrɔŋ lɛ mli ákɛ Nyɔŋmɔ ŋa, loo eyoo lɛ he mfoniri jogbaŋŋ. (1 Mose 3:15; Kpojiemɔ 12:1, 5) Yɛ Yesaia gbalɛ lɛ mli wiemɔi nɛɛ anaagbee mlibaa mli lɛ, jeŋmaŋ ní jɛ “tɛsaa” lɛ mli kɛba lɛ ji “Nyɔŋmɔ Israel lɛ,” ni ji Kristofoi ní afɔ amɛ mu lɛ asafo lɛ, ní afɔ́ lɛ yɛ Pentekoste afi 33 Ŋ.B. lɛ. Taakɛ wɔsusu he yɛ wolo nɛɛ yitsei ní etsɔ hiɛ lɛ amli lɛ, nakai maŋ lɛ yaje Babilonbii anomŋɔɔ mli yɛ afi 1918, shi akɛ amɛ ku sɛɛ kɛba mumɔŋ shweremɔ shihilɛ mli ekoŋŋ yɛ afi 1919 mli.—Galatabii 3:26-29; 4:28; 6:16.
6. (a) Mɛni baaba Yuda shikpɔŋ lɛ nɔ wɔsɛɛ, ni mɛni nibii enɛ baabi ni afee amɛ ehee? (b) Mɛɛ ŋmɛnɛŋmɛnɛ beaŋ shihilɛ tsakemɔ ko Yesaia 51:3 lɛ kaiɔ wɔ?
6 Nibii babaoo fata miishɛjemɔ ní Yehowa kɛha Zion, loo Yerusalem lɛ he fe shiwoo ní ekɛha lɛ akɛ maŋ ní yi fá baajɛ emli aba lɛ kɛkɛ. Wɔkaneɔ akɛ: “Yehowa eshɛje Zion mii, eshɛje emaŋfɔi lɛ fɛɛ amii, ni eha eŋã lɛ nɔ etsɔ tamɔ Eden, ni eŋã olɛŋlɛ lɛ nɔ etsɔ tamɔ Yehowa trom. Mlifilimɔ kɛ miishɛɛ aaana yɛ mli, kɛ shidaa hu kɛ yijiemɔ lala gbee.” (Yesaia 51:3) Yuda shikpɔŋ lɛ baaku sɛɛ etsɔ ŋã nɔ ekoŋŋ, yɛ afii 70 ní ebaakã shi amaŋfɔ lɛ mli, ni kpitikpitii kɛ ŋmeei, kɛ ŋã nɔ jwɛi krokomɛi baakwɛ̃ yɛ nɔ fɛɛ. (Yesaia 64:10; Yeremia 4:26; 9:10-12) No hewɔ lɛ kɛfata Yuda ní akɛ lɛ aaaba eshikpɔŋ nɔ ekoŋŋ lɛ he lɛ, esa akɛ shikpɔŋ lɛ ní aaafee lɛ ehee ekoŋŋ, ní abaatsake lɛ ní etsɔ abɔɔ fɛfɛo tamɔ Eden, kɛ emli ŋmɔji ní baa nii waa, ní nujɔɔi fa yɛ mli kɛ yeli-tsei ní woɔ yibii pii lɛ hu afata sɛɛkuu lɛ he. Ebaafee tamɔ nɔ ni shikpɔŋ lɛ ená miishɛɛ. Kɛ́ akɛ amaŋfɔ shihilɛ ní shikpɔŋ lɛ hi mli yɛ nomŋɔɔ be lɛ mli lɛ to he lɛ, shikpɔŋ lɛ baafee tamɔ paradeiso. Nyɔŋmɔ Israel lɛ mli shwɛɛnii ní afɔ amɛ mu lɛ bote paradeiso shihilɛ ní tamɔ nakai mli yɛ mumɔŋ shishinumɔ naa yɛ afi 1919.—Yesaia 11:6-9; 35:1-7.
Yiŋtoi Kɛha Yehowa Mli Hekɛnɔfɔɔ
7, 8. (a) Mɛni tsɛmɔ ní Yehowa tsɛ́ ní abo lɛ toi lɛ tsɔɔ? (b) Mɛni hewɔ ehe hiaa akɛ Yuda abo Yehowa toi lɛ?
7 Beni Yehowa biɔ ní asaa abo lɛ toi jogbaŋŋ lɛ, ekɛɛ akɛ: “Mimaŋbii, nyɛfea toi nyɛhaa mi, ni mimaŋ, nyɛboa mi toi! shi mla aaajɛ miŋɔɔ aje kpo, ni mikɛ mikojomɔ lɛ aaama shi akɛ majimaji lɛ ala. Mijalɛ lɛ ebɛŋkɛ, miyiwalaheremɔ lɛ eje kpo, ni miniji aaakojo majimaji lɛ; ŋshɔkpɔi lɛ aaakwɛ mi gbɛ, ni minine nɔ amɛkɛ amɛhiɛ aaafɔ̃.”—Yesaia 51:4, 5.
8 Tsɛmɔ ní Yehowa tsɛɔ ní abo lɛ toi lɛ tsɔɔ babaoo fe nu ni amɛaanu eshɛɛ sane lɛ kɛkɛ. Etsɔɔ toiboo ní amɛaafee kɛ jwɛŋmɔ akɛ amɛbaatsu nɔ ni amɛnuɔ lɛ he nii. (Lala 49:2; 78:1) Esa akɛ maŋ lɛ anu shishi jogbaŋŋ akɛ Yehowa ji gbɛtsɔɔmɔ, jalɛsaneyeli, kɛ yiwalaheremɔ Jɛɛhe. Lɛ pɛ ji mumɔŋ sɛɛyoomɔ Jɛɛhe. (2 Korintobii 4:6) Lɛ ji adesai fɛɛ anaagbee Kojolɔ. Mlai kɛ kojomɔi ní jɛɔ Yehowa ŋɔɔ kɛbaa lɛ ji la kɛha mɛi ní ŋmɛɔ gbɛ ni nibii nɛɛ kudɔɔ amɛ lɛ.—Lala 43:3; 119:105; Abɛi 6:23.
9. Yɛ Nyɔŋmɔ webii ni ekɛ amɛ fee kpaŋmɔ lɛ asɛɛ lɛ, namɛi hu baaná Yehowa yiwalaheremɔ nifeemɔi lɛ ahe sɛɛ?
9 Enɛɛmɛi fɛɛ baafee anɔkwale, jeee yɛ Nyɔŋmɔ webii ní ekɛ amɛ efee kpaŋmɔ lɛ pɛ agbɛfaŋ, shi moŋ kɛha gbɔmɛi ní yɔɔ he fɛɛ he, kɛ ŋshɔkpɔi ní yɔɔ shɔŋŋ fe fɛɛ lɛ po nɔ, ní amɛsumɔɔ jalɛ nifeemɔ lɛ. Ahaŋ hekɛnɔfɔɔ ní amɛyɔɔ yɛ Nyɔŋmɔ mli kɛ nyɛmɔ ní eyɔɔ akɛ eeefee nii yɛ etsuji anɔkwafoi lɛ agbɛfaŋ ní ekɛhere amɛyiwala lɛ afee efolo. Enyɛmɔ, loo hewalɛ, ní akɛ enine fee he mfoniri lɛ, yɛ shiŋŋ; mɔ ko mɔ ko nyɛɛɛ atsĩ naa. (Yesaia 40:10; Luka 1:51, 52) Nakai nɔŋŋ hu Nyɔŋmɔ Israel lɛ mli bii ní eshwɛ lɛ ashiɛmɔ nitsumɔ ní ekãa yɔɔ mli ŋmɛnɛ lɛ eha gbɔmɛi akpekpei abɔ, ní amɛteŋ mɛi pii jɛ ŋshɔkpɔi ní yɔɔ shɔŋŋ lɛ anɔ lɛ etsɔ amɛhe kɛba Yehowa ŋɔɔ ni amɛnáa emli hemɔkɛyeli.
10. (a) Mɛɛ anɔkwale ko abaanyɛ Maŋtsɛ Nebukadnezar nɔ ní ekase? (b) Mɛɛ “ŋwɛi” kɛ “shikpɔŋ” akɛ amɛ baaba naagbee lɛ?
10 No sɛɛ lɛ, Yehowa tsĩ anɔkwale ko ní ebaabi ní Babilon Maŋtsɛ Nebukadnezar akase lɛ tã. Nɔ ko nɔ ko bɛ ŋwɛi loo shikpɔŋ nɔ ní baanyɛ atsĩ Yehowa naa ní ekanyɛ etsu eyiŋtoo he nii. (Daniel 4:34, 35) Wɔkaneɔ akɛ: “Nyɛholea nyɛhiŋmɛii anɔ kɛyaa ŋwɛi, ní nyɛkwɛa shikpɔŋ lɛ nɔ yɛ shishigbɛ: shi ŋwɛi aaalaaje tamɔ lasu, ni shikpɔŋ lɛ aaasuu tamɔ atade, ni enɔ bii lɛ aaagboi tamɔ adɔ̃dɔ̃ji; shi miyiwalaheremɔ lɛ aaahi shi kɛaatee naanɔ, ni mijalɛ lɛ hu sɛɛ efoŋ.” (Yesaia 51:6) Eyɛ mli akɛ eteɔ shi ewoɔ Babilon maŋtsɛmɛi lɛ anɔyeli nifeemɔi akɛ amɛaaŋmɛ nomii agbɛ ní amɛku amɛsɛɛ amɛya amɛmaŋ moŋ, shi afiteŋ yiwalaheremɔ ní Yehowa kɛbaaha ewebii lɛ kɔkɔɔkɔ. (Yesaia 14:16, 17) Abaakumɔ Babilon “ŋwɛi,” loo hewalɛi ní yeɔ nɔ lɛ kwraa yɛ enɔ kunimyeli mli. Babilon “shikpɔŋ,” ni ji nakai hewalɛi ní yeɔ nɔ lɛ ashishibii lɛ hu baaba naagbee fiofio. Hɛɛ, hewalɛ ní he wa fe fɛɛ yɛ nakai beaŋ lɛ po nyɛŋ ate shi awo Yehowa nyɛmɔ lɛ loo etsĩ eyiwalaheremɔ nifeemɔi lɛ anaa.
11. Mɛni hewɔ gbalɛ ní tsɔɔ akɛ akɛ Babilon “ŋwɛi” kɛ “shikpɔŋ” lɛ baaba naagbee kwraa lɛ mlibaa ni mɔɔ shi lɛ woɔ Kristofoi ni yɔɔ ŋmɛnɛ lɛ hewalɛ lɛ?
11 Kwɛ hewalɛwoo ní eji kɛha Kristofoi ní yɔɔ ŋmɛnɛ lɛ akɛ amɛaale akɛ nɛkɛ gbalɛ wiemɔi nɛɛ ba mli kɛmɔ shi! Mɛni hewɔ? Ejaakɛ bɔfo Petro kɛ wiemɔi ní tamɔ nakai nɔŋŋ tsu nii kɛkɔ wɔsɛɛ be mli nifeemɔ ko he. Ewie Yehowa gbi ní bɛŋkɛɔ oyayaayai, ní “no mli ni ŋwɛi aaahere kɛ la ni eeeshã, ni jeŋ shishijee nii hu aaasere yɛ la mli” lɛ he. Kɛkɛ ni ewie akɛ: “Shi yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:12, 13; Yesaia 34:4; Kpojiemɔ 6:12-14) Eyɛ mli akɛ ekolɛ jeŋmaji ní he wa kɛ amɛnɔyelɔi ní nɔ kwɔlɔ tamɔ ŋulamii lɛ baadamɔ shi amɛshi Yehowa moŋ, shi abaaba amɛ shi kwraa yɛ lɛ diɛŋtsɛ ebe ní eto mli—abaakpɔtɔ amɛ yɛ gbɛ ní waaa kwraa nɔ tamɔ adɔ̃dɔ̃ŋ. (Lala 2:1-9) Nyɔŋmɔ jalɛ nɔyeli lɛ pɛ baaye nɔ kɛya naanɔ, yɛ adesasi aweku ni ji jalɔi anɔ.—Daniel 2:44; Kpojiemɔ 21:1-4.
12. Mɛni hewɔ esaaa akɛ Nyɔŋmɔ tsuji sheɔ gbeyei kɛ́ amɛhenyɛlɔi ni ji adesai lɛ miiwie amɛhe efɔŋ lɛ?
12 Beni Yehowa kɛ ‘gbɔmɛi ní nyiɛɔ jalɛ sɛɛ’ lɛ wieɔ lɛ, ewie agbɛnɛ akɛ: “Nyɛboa mi toi, nyɛ mɛi ní nyɛle jalɛ, maŋ ní mimla yɔɔ nyɛtsuiiaŋ: Nyɛkashea adesa ahorabɔɔ gbeyei, ni asaŋ nyɛtsui akafãa yɛ amɛlimɔ lɛ hewɔ! Ejaakɛ omlɛ̃gɛ̃ aaaye amɛ tamɔ atade, ni gɔ̃gɔ̃mii aaaye amɛ tamɔ kuntu; shi mijalɛ lɛ aaahi shi kɛaatee naanɔ, ni miyiwalaheremɔ lɛ aaahi shi kɛaatee yinɔi fɛɛ nɔ!” (Yesaia 51:7, 8) Abaawie mɛi ní kɛ amɛhiɛ fɔ̃ɔ Yehowa nɔ lɛ ahe efɔŋ ni abaagbe amɛhe guɔ yɛ amɛshidaamɔ ní ekãa yɔɔ mli lɛ hewɔ, shi enɛ jeee nɔ ko ní esa akɛ eha amɛshe gbeyei. Amɛ heguɔgbelɔi lɛ ji adesai foji ní gboiɔ, ní ‘abaaye amɛ,’ tamɔ bɔ ni omlɛ̃gɛ̃ yeɔ atade ní akɛ kooloo hewolo fee lɛ.a Taakɛ Yudafoi anɔkwafoi ni hi shi yɛ blema lɛ ji lɛ, anɔkwa Kristofoi ni yɔɔ ŋmɛnɛ lɛ bɛ nɔ ni amɛaadamɔ nɔ amɛshe mɛi ní teɔ shi woɔ amɛ lɛ gbeyei. Yehowa, naanɔ Nyɔŋmɔ lɛ, ji amɛyiwalaheremɔ. (Lala 37:1, 2) Heguɔgbee ní Nyɔŋmɔ henyɛlɔi lɛ kɛbaa lɛ feɔ odaseyeli ní tsɔɔ akɛ Yehowa webii lɛ yɛ emumɔ lɛ.—Mateo 5:11, 12; 10:24-31.
13, 14. Mɛni akɛ wiemɔi ni ji “Rahab” kɛ “drako” lɛ fee he mfoniri, ni ‘afolɔ emli’ ni ‘agbu lɛ nɔ̃’ yɛ mɛɛ gbɛ nɔ?
13 Agbɛnɛ Yesaia wie oookɛɛ eebi ní Yehowa afee nɔ ko eha E-webii ní yɔɔ nomŋɔɔ mli lɛ, akɛ: “Ohiɛ atsɛ̃, ohiɛ atsɛ̃! Okɛ hewalɛ aha ohe, Yehowa nine! Ohiɛ atsɛ̃, tamɔ bɔ ni ohiɛ tsɛ̃ yɛ blema gbii lɛ amli, yɛ blemabii lɛ ayinɔ lɛ! Ani jeee bo ji mɔ ni folɔ Rahab mli, ni egbulɔ drako lɛ? Ani jeee bo oha ŋshɔ mĩi, bu kwɔŋkwɔŋ lɛ mli nu babaoo lɛ? mɔ ni je gbɛ yɛ ŋshɔ shishi eha mɛi ní akpɔ̃ amɛ lɛ ní amɛfo mli lɛ?”—Yesaia 51:9, 10.
14 Yesaia hala yinɔsane mli nɔkwɛmɔnii ní ewieɔ he lɛ jogbaŋŋ diɛŋtsɛ. Israelnyo fɛɛ Israelnyo le bɔ ni akpɔ̃ maŋ lɛ kɛjɛ Mizraim kɛ bɔ ni amɛfo Ŋshɔ Tsuru lɛ. (2 Mose 12:24-27; 14:26-31) Wiemɔi ni ji “Rahab” kɛ “drako lɛ” miitsɔɔ Mizraim ni yɔɔ e-Farao ni te shi ewo Israel Kpojee kɛmiijɛ Mizraim lɛ shishi lɛ. (Lala 74:13; 87:4; Yesaia 30:7) Akɛni blema Mizraim shikpɔŋ lɛ yitsogbɛ yɛ Nilo Faa lɛ Niji lɛ amligbɛ, ní eshikpɔŋ kakadaŋŋ lɛ yaa shɔŋŋ aahu shitoi ohai abɔ kɛyaa Nilo Faa lɛ Nujɔɔ ní baa nii lɛ mli hewɔ lɛ, ehaa shikpɔŋ lɛ shikãmɔ jeɔ onufu kpeteŋkpele ko. (Ezekiel 29:3) Shi afolɔ kooloo ní he yɔɔ gbeyei nɛɛ mli dukuduku beni Yehowa fɔse Haomɔi Nyɔŋma eshwie enɔ lɛ. Agbu lɛ nɔ̃, ni apila lɛ gbele pilamɔ, ni agbɔjɔ lɛ kwraa beni akpata esraafoi lɛ ahiɛ yɛ Ŋshɔ Tsuru lɛ mli lɛ. Hɛɛ, Yehowa jie hewalɛ ní enine yɔɔ lɛ kpo yɛ bɔ ni ekɛ Mizraim ye ha lɛ mli. Ani efeŋ klalo akɛ ebaawu eha ewebii ní aŋɔ amɛ nom kɛtee Babilon lɛ hu nakai nɔŋŋ?
15. (a) Mɛɛ be, ni mɛɛ gbɛ nɔ Zion awerɛho kɛ ŋtsɔidɔɔmɔ aaajo foi yɛ? (b) Mɛɛ be awerɛho kɛ ŋtsɔidɔɔmɔ jo foi kɛha Nyɔŋmɔ Israel lɛ yɛ ŋmɛnɛŋmɛnɛ beaŋ?
15 Agbɛnɛ beni ekwɛɔ wɔsɛɛ be, beni abaakpɔ̃ Israel kɛjɛ Babilon lɛ, gbalɛ lɛ tee nɔ akɛ: “Ni mɛi ní Yehowa ekpɔ̃ amɛ lɛ aaaku amɛsɛɛ kɛaaba ekoŋŋ, ni amɛaaba Zion kɛ nyamɔ lala, ni naanɔ miishɛɛ aaahi amɛyiteaŋ; amɛnine aaashɛ mlifilimɔ kɛ miishɛɛ nɔ, ni awerɛho kɛ ŋtsɔidɔɔmɔ aaajo foi!” (Yesaia 51:11) Bɔ fɛɛ bɔ ni amɛshihilɛ yɛ Babilon lɛ baafee awerɛho aha lɛ, mɛi ní taoɔ Yehowa jalɛ lɛ sɛɛgbɛ lɛ yɛ gbɛkpamɔi ni yɔɔ nyam. Be ko baashɛ ní awerɛho kɛ ŋtsɔidɔɔmɔ ehiŋ shi dɔŋŋ. Nyamɔ oshebɔɔi, miishɛɛ, mlifilimɔ—enɛɛmɛi ji nibii ní abaanu yɛ mɛi ní aha amɛye amɛhe, loo akpɔ̃ amɛ lɛ anaa. Yɛ nakai gbalɛ wiemɔi lɛ ŋmɛnɛŋmɛnɛ beaŋ mlibaa mli lɛ, aŋmɛɛ Nyɔŋmɔ Israel lɛ he kɛjɛ Babilonbii anyɔŋyeli mli yɛ afi 1919. Amɛku amɛsɛɛ kɛtee amɛmumɔŋ shihilɛ lɛ mli kɛ mlifilimɔ kpele diɛŋtsɛ—mlifilimɔ ní etsa nɔ aahu kɛbashi ŋmɛnɛ.
16. Mɛɛ nyɔmɔ awo koni ányɛ akpɔ̃ Yudafoi lɛ?
16 Mɛni akɛbaawo Yudafoi lɛ ajiemɔ lɛ he nyɔmɔ? Yesaia gbalɛ lɛ ejie lɛ kpo momo akɛ Yehowa ŋɔ “Mizraim [eha] akɛ okpɔmɔ nii, kɛ Kush kɛ Seba hu yɛ onajiaŋ.” (Yesaia 43:1-4) Enɛ baaba mli yɛ sɛɛ mli. Kɛ́ Persia Maŋtsɛyeli lɛ ye Babilon nɔ kunim ní eŋmɛɛ Yudafoi nomii lɛ ahe sɛɛ lɛ, ebaaye Mizraim, Kush, kɛ Seba hu nɔ kunim. Akɛ mɛnɛɛmɛi baaha yɛ Israelbii lɛ asusumai anajiaŋ. Enɛ kɛ shishitoo mla ní ajaje yɛ Abɛi 21:18 lɛ kpãa gbee, akɛ: “Gbɔmɔ fɔŋ lɛ, jalɔ kpɔmɔ nii ni, ni kutumpɔfo bayeɔ jalɔ najiaŋ.”
Nɔmimaa Wiemɔ Kroko
17. Mɛni hewɔ ehe ehiaaa ní Yudafoi lɛ ashe Babilon mlifu lɛ gbeyei lɛ?
17 Yehowa tee nɔ ema nɔ mi kɛha ewebii lɛ akɛ: “Mi, mi ji nyɛmiishɛjelɔ. Namɔ jio ni osheɔ adesa ní baagbo, aloo gbɔmɔ bi ní tamɔ jwɛi lɛ gbeyei? ni ohiɛ kpaa Yehowa mɔ ni feo lɛ, mɔ ni lɛɛ ŋwɛi mli ní eto shikpɔŋ lɛ shishi lɛ nɔ? ni ohe kpokpoɔ daa jenamɔ yɛ haolɔ lɛ girimɔ lɛ hewɔ, kɛ́ esaa ehe ní ebaafite lɛ? Shi nɛgbɛ haolɔ lɛ girimɔ lɛ yɔɔ po?” (Yesaia 51:12, 13) Nomŋɔɔ afii babaoo kã amɛhiɛ. Shi kɛlɛ, yiŋtoo ko bɛ ní amɛaadamɔ nɔ amɛshe Babilon mlifu lɛ gbeyei. Eyɛ mli akɛ nakai jeŋmaŋ lɛ, ni ji jeŋ hewalɛ ní ji etɛ yɛ Biblia mli saji amli lɛ baaye Nyɔŋmɔ webii lɛ anɔ kunim ni ebaatao akɛ ‘ehao amɛ,’ loo etsĩ gbɛ ní amɛaatsɔ nɔ amɛná heyeli lɛ moŋ, shi Yudafoi anɔkwafoi lɛ le akɛ Yehowa egba Babilon shigbeemɔ ní baaba yɛ Koresh dɛŋ lɛ efɔ̃ shi. (Yesaia 44:8, 24-28) Ákɛ mɛi ní tamɔɔɔ Bɔlɔ lɛ—naanɔ Nyɔŋmɔ, Yehowa lɛ—Babilon maŋ lɛ mli bii lɛ ahiɛ baakpata tamɔ bɔ ni jwɛi gbĩɔ yɛ hulutsoo be mli hulu la ní naa wa waa lɛ mli lɛ. Kɛkɛ lɛ nɛgbɛ amɛhegbeyeiwoo kɛ amɛmlifu lɛ baahi? Kwɛ bɔ ni nilee bɛ mli ha akɛ amɛaashe gbɔmɔ gbeyei ní amɛhiɛ aaakpa Yehowa, mɔ ni fee ŋwɛi kɛ shikpɔŋ lɛ nɔ!
18. Eyɛ mli akɛ Yehowa webii lɛ baatsɔmɔ gboklɛfoi yɛ be ko mli moŋ, shi mɛɛ shiwoo ekɛha amɛ?
18 Eyɛ mli akɛ Yehowa webii lɛ baatsɔmɔ nomii, kɛ́ wɔɔkɛɛ lɛ, ‘gboklɛfoi’ yɛ be ko mli moŋ, shi amɛ jiemɔ lɛ baaba trukaa. Akpataŋ amɛhiɛ yɛ Babilon loo ní amɛaagboi yɛ hɔmɔ hewɔ ákɛ gboklɛfoi—mɛi ní wala bɛ amɛmli yɛ Sheol, ni ji gbonyobu lɛ mli. (Lala 30:4; 88:4-6) Yehowa wo amɛ shi akɛ: “Aaafɛ̃ne gboklɛfonyo lɛ oyá, ni egboŋ ni eeetee bu lɛ mli, ni eboloo hu ebɔŋ lɛ.”—Yesaia 51:14.
19. Mɛni hewɔ Yudafoi anɔkwafoi lɛ baanyɛ aná Yehowa wiemɔi lɛ amli hekɛnɔfɔɔ kɛmɔ shi lɛ?
19 Beni Yehowa shɛjeɔ Zion mii lolo lɛ, etee nɔ akɛ: “Shi mi ji Yehowa, o-Nyɔŋmɔ lɛ, mɔ ni teeɔ ŋshɔ lɛ shi ní emli ŋshɔkei lɛ feɔ hamahama lɛ: Yehowa Zebaot ji egbɛi! ni mikɛ miwiemɔi lɛ ewo odaaŋ, ni mikɛ minine hɔ̃ɔŋ lɛ eha onɔ, koni matɛo ŋwɛi, ní mato shikpɔŋ lɛ shishi, ní makɛɛ Zion akɛ: Mimaŋ jio!” (Yesaia 51:15, 16) Biblia lɛ tsĩɔ nyɛmɔ ní Nyɔŋmɔ yɔɔ ní ekɛkpãa ehewalɛ mli yɛ ŋshɔ lɛ nɔ ní ekudɔɔ lɛ lɛ tã shii abɔ. (Hiob 26:12; Lala 89:10; Yeremia 31:35) Enyɛɔ ekudɔɔ adebɔɔ mli hewalɛi lɛ kɛmɔɔ shi, taakɛ ejie lɛ kpo faŋŋ beni ejie ewebii lɛ kɛjɛ Mizraim lɛ. Namɔ abaanyɛ akɛ lɛ ato “tai a-Yehowa” lɛ he yɛ gbɛ bibioo fe fɛɛ po nɔ?—Lala 24:10.
20. Mɛɛ “ŋwɛi” kɛ “shikpɔŋ” baaba shihilɛ mli beni Yehowa kɛ Zion kuɔ sɛɛ kɛbaa ekoŋŋ lɛ, ni mɛɛ miishɛjemɔ wiemɔi ebaawie?
20 Yudafoi lɛ kã he amɛji Nyɔŋmɔ webii ní ekɛ amɛ efee kpaŋmɔ, ni Yehowa ma nɔ mi eha amɛ akɛ amɛbaaku amɛsɛɛ kɛba amɛmaŋ shikpɔŋ nɔ, ní amɛbahi e-Mla lɛ shishi ekoŋŋ. Amɛbaasaa amɛma Yerusalem kɛ sɔlemɔtsu lɛ ekoŋŋ, ni amɛbaabɔi gbɛnaa nii ní jwere amɛnɔ yɛ kpaŋmɔ ní ekɛ amɛ fee kɛtsɔ Mose nɔ lɛ mli lɛ he nitsumɔ ekoŋŋ. Kɛ́ Israelbii ní aha amɛku amɛsɛɛ kɛba amɛmaŋ lɛ kɛ amɛshia kooloi lɛ bɔi shikpɔŋ lɛ nɔ hilɛ ekoŋŋ lɛ, ebaaha “shikpɔŋ hee” ko aba shihilɛ mli. Abaaha “ŋwɛi hee,” ni ji nɔyeli gbɛjianɔtoo hee ko aye nɔ. (Yesaia 65:17-19; Hagai 1:1, 14) Yehowa baakɛɛ Zion ekoŋŋ akɛ: “Mimaŋ jio!”
Ninefɔɔ Kɛha Nifeemɔ Ko
21. Mɛɛ ninefɔɔ kɛha nifeemɔ ko Yehowa kɛha?
21 Beni Yehowa ema ewiemɔ lɛ nɔ mi ekoŋŋ eha Zion sɛɛ lɛ, ekɛ ninefɔɔ ha kɛha nifeemɔ ko. Beni ewieɔ tamɔ nɔ ni eshɛ emanehului lɛ anaagbee lɛ, ekɛɛ lɛ akɛ: “Wó ohe nɔ! wó ohe nɔ! tee shi odamɔ shi, Yerusalem! bo ní onu Yehowa mlila kpulu lɛ yɛ edɛŋ; onu didãamɔ kpulu lɛ, ni olɛmɔ mli.” (Yesaia 51:17) Hɛɛ, esa akɛ Yerusalem awó ehe nɔ kɛjɛ emanehulu shihilɛ lɛ mli ní ebaŋɔ etsutsu gbɛhe kɛ anunyam lɛ. Be ko baashɛ ní ebaalɛmɔ mfonirifeemɔŋ kpulu ni tsɔɔ ŋwɛi toigbalamɔ lɛ mli kwraa. Nyɔŋmɔ mlifu ní ekɛba enɔ lɛ eko kwraa eshwɛko dɔŋŋ.
22, 23. Mɛni baaba Yerusalem nɔ kɛ́ enu Yehowa mlifu kpulu lɛ?
22 Shi fɛɛ sɛɛ lɛ, beni agbalaa Yerusalem toi lɛ, no mli lɛ emli bii lɛ, ni ji “ebihii” lɛ ateŋ mɔ ko mɔ ko nyɛɛɛ atsĩ nɔ ni yaa nɔ lɛ naa. (Yesaia 43:5-7; Yeremia 3:14) Gbalɛ lɛ kɛɔ akɛ: “Ebihii fɛɛ ní efɔ́ lɛ ateŋ mɔ ko mɔ ko bɛ ní aaatsɔɔ lɛ gbɛ, ebihii fɛɛ ní elɛ̀ lɛ ateŋ mɔ ko mɔ ko bɛ ní aaamɔ enine mli.” (Yesaia 51:18) Kwɛ bɔ ni ebaana amanehulu yɛ Babilonbii lɛ adɛŋ! “Nɛkɛ nibii enyɔ nɛɛ eba onɔ; namɔ aaayeo ŋkɔmɔ? Fitemɔ kɛ hiɛkpatamɔ, kɛ hɔmɔ kɛ klante; té mafee tɛŋŋ mashɛje omii hu? Obii lɛ etɔ biti; amɛkãmɔkãmɔɔ shi yɛ blohui lɛ fɛɛ akoji anɔ tamɔ baayelɔ ní adũ lɛ yɛ tsɔne mli, ni amɛyimɔ obɔ̃bɔ̃ kɛ Yehowa mlila kɛ o-Nyɔŋmɔ lɛ kãmɔ lɛ.”—Yesaia 51:19, 20.
23 Yerusalem ní nii yɔɔ mɔbɔ! Ebaatsɔ “fitemɔ kɛ hiɛkpatamɔ” mli, kɛ agbɛnɛ hu “hɔmɔ kɛ klante” mli. Akɛni “ebihii” lɛ nyɛɛɛ amɛtsɔɔ lɛ gbɛ ní amɛha edamɔ enaji anɔ hewɔ lɛ, amɛbaadamɔ shi efolo ní amɛnyɛɛɛ nɔ ko kwraa amɛfee, ní amɛgbɔjɔ, ní amɛhe waaa bɔ ni amɛbaanyɛ amɛshwie Babilonbii ní ebatutua amɛ lɛ kɛya. Abaana faŋŋ akɛ amɛkãmɔkãmɔɔ shi yɛ blohui lɛ akoji, ní amɛtɔ biti, ní amɛfee gbedee, ní etɔ amɛ. (Yaafo 2:19; 4:1, 2) No mli lɛ amɛnu Nyɔŋmɔ mlifu kpulu lɛ ni amɛbɛ hewalɛ ko kwraa, tamɔ kooloi ní adũ amɛ yɛ tsɔne mli.
24, 25. (a) Mɛni atĩŋ mli ekoŋŋ kɛhaŋ Yerusalem? (b) Yɛ Yerusalem sɛɛ lɛ, namɔ baafee mɔ ni baanyiɛ sɛɛ ní baanu Yehowa mlifu kpulu lɛ?
24 Shi awerɛho shihilɛ nɛɛ baaba naagbee. Yesaia kɛ miishɛjemɔ kɛɔ akɛ: “No hewɔ lɛ bo ní onii yɔɔ mɔbɔ, bo ní otɔ, shi jeee kɛ wein, bó enɛ toi! Bɔ ni o-Nuntsɔ, Yehowa, o-Nyɔŋmɔ, mɔ ni yeɔ emaŋ lɛ sane lɛ, kɛɛ nɛ: Naa, mihe didãamɔ kpulu lɛ yɛ odɛŋ kɛ mlila kpulu lɛ hu, ni onuŋ dɔŋŋ; shi mikɛaawo mɛi ní haoɔ bo lɛ adɛŋ, mɛi ní kɛɔ osusuma akɛ: Kotomɔ shi, koni wɔtsɔ onɔ! ni okɛ okotosɛɛ fɔ̃ shi tamɔ shikpɔŋ loo tamɔ gbɛjegbɛ ní anyiɛɔ nɔ lɛ!” (Yesaia 51:21-23) Yɛ Yerusalem toigbalamɔ lɛ sɛɛ lɛ, Yehowa efee klalo akɛ ebaafee nii kɛ mɔbɔnalɛ ní ejie eshaifaa mumɔ kpo etsɔɔ lɛ.
25 Agbɛnɛ Yehowa baajie emlifu lɛ kɛjɛ Yerusalem nɔ ni ebaatsɔ kɛya Babilon nɔ. No mli lɛ Babilon ekpata Yerusalem hiɛ kwraa ni eshwie ehiɛ shi. (Lala 137:7-9) Shi ebaŋ lɛ akɛ Yerusalem baanu kpulu ní tamɔ nɛkɛ dɔŋŋ yɛ Babilonbii lɛ kɛ ehefatalɔi lɛ adɛŋ. Shi moŋ, abaahe kpulu lɛ kɛjɛ Yerusalem dɛŋ ni akɛbaaha mɛi ní mli fili amɛ yɛ ehiɛshishwiemɔ lɛ hewɔ lɛ. (Yaafo 4:21, 22) Babilon baagbee shi, ní etɔ dãa kpɔtɔɔ. (Yeremia 51:6-8) Nakai beaŋ lɛ, Zion baate shi! Mɛɛ shihilɛ lɛ tsakemɔ sɛɛsɛɛ nɛ! Lɛɛlɛŋ, gbɛkpamɔ ní tamɔ nɛkɛ baanyɛ ashɛje Zion mii. Ni Yehowa tsuji hu baanyɛ aná nɔmimaa akɛ ebaatse egbɛi lɛ he kɛtsɔ eyiwalaheremɔ nifeemɔi lɛ anɔ.
[Shishigbɛ niŋmaa]
a Eka shi faŋn akɛ omlɛ̃gɛ̃ ní awieɔ he yɛ biɛ lɛ ji mama mli omlɛ̃gɛ̃, titri lɛ beni eyɔɔ gɔgɔmi su mli ní efiteɔ nii waa lɛ.
[Mfoniri ni yɔɔ baafa 167]
Yehowa, Abraham Kpeteŋkpele lɛ, ji “tɛsaa” ní “agbá” ewebii lɛ kɛjɛ mli lɛ
[Mfoniri ni yɔɔ baafa 170]
Nyɔŋmɔ webii ahenyɛlɔi lɛ baalaaje kwraa, tamɔ atade ní omlɛ̃gɛ̃ eye
[Mfoniri ni yɔɔ baafa 176, 177]
Yehowa ejie ehewalɛ ní ekɛkudɔɔ adebɔɔ mli hewalɛi lɛ kpo
[Mfoniri ni yɔɔ baafa 178]
Akɛ kpulu ní Yerusalem enu dãa kɛjɛ mli lɛ baaha Babilon kɛ ehefatalɔi lɛ ní amɛnu