Mɛni Nɔ Otswaa Otsu Lɛ Omaa?

KƐJI tsu ko baanyɛ ama shi atsɛ ni efiteee lɛ, no lɛ ebaadamɔ bɔ ni eshishitoo nɔ̃ loo faneshi lɛ yɔɔ ha lɛ nɔ titri. Bei komɛi lɛ Biblia lɛ kɛ anɔkwale ni yɔɔ sane nɛɛ mli lɛ tsuɔ nii yɛ mfonirifeemɔŋ shishinumɔ naa.

Ákɛ nɔkwɛmɔnɔ lɛ, gbalɔ Yesaia wieɔ Yehowa Nyɔŋmɔ he akɛ lɛ “eto shikpɔŋ lɛ shishi.” (Yesaia 51:13) Nɛkɛ mfonirifeemɔŋ shishitoo nɔ̃ nɛɛ damɔ shi kɛha Nyɔŋmɔ mlai ni tsakeee ní kudɔɔ shikpɔŋ lɛ shibɔlemɔ, ní haaa eje eŋɛlɛ nɔ hu lɛ. (Lala 104:5) Nyɔŋmɔ Wiemɔ ni ji Biblia lɛ wieɔ ‘shishitoo nii’ anɔ ni adesai aweku lɛ ma lɛ hu he. Shishitoo nii nɛɛ ji jalɛsaneyeli, mlai, kɛ akpɔi. Kɛ́ “afite” shishitoo nii nɛɛ loo awɔtsɔ amɛ kɛtsɔ jalɛsane ni ayeee, juu kɛ fɔ̃, kɛ efɔŋfeemɔ nɔ lɛ, ekɛ basabasafeemɔ baa, ni enɛɛmɛi fiteɔ adesai aweku lɛ.—Lala 11:2-6; Abɛi 29:4.

Anɔkwale ni yɔɔ sane nɛɛ mli lɛ hu kɔɔ aŋkroaŋkroi ashihilɛi ahe. Beni Yesu Kristo muɔ e-Gɔŋ nɔ Shiɛmɔ ni ehe gbɛi jogbaŋŋ lɛ naa lɛ, ekɛɛ akɛ: “Mɔ fɛɛ mɔ ni nuɔ miwiemɔi nɛɛ ni eyeɔ nɔ lɛ, maŋɔ lɛ mato ŋaalelɔ ni ma etsu yɛ tɛsaa nɔ lɛ he. Ni nugbɔ tue, ni faai ba, ni kɔɔyɔɔ tswa, ni amɛshimɔ tsũ lɛ, shi ewuleee; ejaakɛ ato shishi yɛ tɛsaa nɔ. Ni mɔ fɛɛ mɔ ni nuɔ miwiemɔi nɛɛ ni eyeee nɔ lɛ, aaaŋɔ lɛ ato nuu kwashia ni ma etsũ yɛ shia nɔ lɛ he. Ni nugbɔ tue, ni faai ba, ni kɔɔyɔɔ tswa, ni amɛshimɔ tsũ lɛ, ni ewule, ni ewulemɔ lɛ da.”—Mateo 7:24-27.

Mɛni nɔ otswaa owala shihilɛ omaa? Ani ootswa ooma shia ni bɛ shweshweeshwe ni ji adesai anilee ní baaha ewule lɛ nɔ? Aloo ootswa ooma tɛsaa ni ma shi shiŋŋ ni ji Yesu Kristo tsɔɔmɔi lɛ atoiboo ní baaye abua bo koni onyɛ odamɔ mfonirifeemɔŋ ahumii ni okɛkpeɔ yɛ shihilɛ mli lɛ anaa lɛ nɔ?