Ani Okaiɔ?

Ani osusu nyɛsɛɛ nɛɛ Buu-Mɔɔ woji tɛtrɛbii sɔrɔtoi ni ba lɛ ahe jogbaŋŋ? Kɛ nakai ni lɛ, no lɛ obaana he miishɛɛ akɛ oookai nibii ni nyiɛ sɛɛ nɛɛ:

◻ Gbalashihilɛ mli hefatalɔi enyiɛ Akwila kɛ Priskila nɔkwɛmɔ nɔ ni nɔ bɛ ni amɛfee amɛfɔ shi lɛ sɛɛ ŋmɛnɛ yɛ mɛɛ gbɛ nɔ?

Akwila kɛ Priskila sɔmɔ yɛ asafoi sɔrɔtoi babaoo mli. Taakɛ amɛji lɛ, ŋmɛnɛŋmɛnɛ beaŋ Kristofoi pii kɛ amɛhe eha koni amɛyasɔmɔ yɛ hei ni hiamɔ lɛ da yɛ. Agbɛnɛ hu, amɛnaa miishɛɛ kɛ tsui ni nyɔɔ mɔ mli lɛ mli ŋɔɔmɔ yɛ na ni amɛnaa akɛ Maŋtsɛyeli lɛ he nibii miishwere, kɛ Kristofoi anaanyobɔɔ ni jara wa ni amɛnyɛɔ amɛnaa lɛ hewɔ.—12/15, baafã 24.

◻ Te Biblia lɛ susuɔ dãa ni wa he ehaa tɛŋŋ?

Biblia lɛ ŋmɛɔ pɛpɛɛpɛ yɛ esusumɔi yɛ dãa ni wa he. Yɛ gbɛ kome nɔ lɛ, Biblia lɛ kɛɔ akɛ wein ji nikeenii ni jɛ Nyɔŋmɔ ŋɔɔ. (Lala 104:1, 15) Yɛ gbɛ kroko nɔ hu lɛ, ewieɔ eshiɔ dãa ni anuɔ babaoo lɛ. (Luka 21:34; 1 Timoteo 3:8; Tito 2:3; 1 Petro 4:3)—12/15, baafã 27.

◻ Mɛni ji nɔ ko ni he hiaa waa yɛ Biblia wolo ni ji Hagai lɛ mli?

Eyɛ mli akɛ Hagai wolo lɛ hiɛ kukuji 38 pɛ moŋ, shi akɛ Nyɔŋmɔ gbɛi lɛ tsu nii shii 35 sɔŋŋ. Gbalɛ ni tamɔ nɛkɛ tamɔ nɔ ni sɛɛnamɔ bɛ he kɛji akɛ akɛ sabala ni ji “Nuntsɔ” to gbɛi Yehowa lɛ najiaŋ.—1/1, baafã 6.

◻ Mɛni abaanyɛ akase kɛjɛ David kɛ Manase eshafeemɔi lɛ amli?

Eyɛ mli akɛ Yehowa kɛ David kɛ Manase he ke amɛ moŋ, shi ehe bahia ni hii nɛɛ—ni Israel hu fata he lɛ—ahi shi yɛ nibii ni jɛ amɛ nishaianii lɛ mli ba lɛ amli. (2 Samuel 12:11, 12; Yeremia 15:3-5) Yɛ nakai gbɛ nɔŋŋ nɔ lɛ, yɛ be mli ni Yehowa kɛ efɔŋ feelɔi ni amɛtsake amɛtsui lɛ ahe keɔ amɛ ŋmɛnɛ lɛ, ekolɛ, nibii ni anyɛŋ atsi naa baajɛ amɛ nifeemɔi lɛ amli kɛba.—1/1, baafã 27.

◻ ‘Mɛi ni shiɛɔ’ Nyɔŋmɔ Maŋtsɛyeli lɛ he ‘sanekpakpa lɛ anaji’ yɛ “fɛo” yɛ mɛɛ gbɛ nɔ? (Yesaia 52:7)

Naji lɛ ji nɔ diɛŋtsɛ ni tsirɛɔ mɔ ko yɛ be mli ni eyaa ni eyashiɛɔ etsɔɔ mɛi krokomɛi lɛ. Naji nɛɛ damɔ shi diɛŋtsɛ kɛha mɔ lɛ diɛŋtsɛ. No hewɔ lɛ, kɛha mɛi pii ni boɔ Maŋtsɛyeli lɛ he sanekpakpa lɛ toi ni amɛkpɛlɛɔ nɔ lɛ, nɛkɛ tsuji nɛɛ anaji yɛ fɛo lɛlɛŋ yɛ amɛhiɛ.—1/15, baafã 13.

◻ Mɛni ji nitsumɔ ni bɔ he toi enyɔ ni yɔɔ “sanekpakpa lɛ jajemɔ” mli lɛ? (1 Korintobii 9:16, NW)

Klɛŋklɛŋ lɛ, esa akɛ wɔjaje Maŋtsɛyeli lɛ he sanekpakpa lɛ wɔtsɔɔ. Nɔ ni ji enyɔ ni kɔɔ nitsumɔ nɛɛ he lɛ kɔɔ nii ni aaatsɔɔ mɛi ni hereɔ Maŋtsɛyeli jajemɔ lɛ nɔ kɛ miishɛɛ lɛ he.—1/15, baafã 23.

◻ Mɛɛ sɛɛnamɔi mɔ diɛŋtsɛ naa kɛjɛɔ Maŋtsɛyeli lalai ni elaa yɛ asafoŋ kpeei ashishi lɛ mli?

Lala hãa wɔnaa hegbɛ ni wɔkɛjieɔ wɔhenumɔi akpo wɔtsɔɔ wɔ-Bɔlɔ lɛ. (Lala 149:1, 3) Kɛ wɔjɛ wɔtsuiŋ wɔla yɛ asafoŋ lalai amli lɛ, ebaanyɛ eha wɔ jwɛŋmɔ ni ja kɛ tsui kpakpa kɛha gbɛjianɔtoo ni baanyiɛ sɛɛ lɛ. Ebaanyɛ ewo wɔ hewalɛ koni wɔna Yehowa jamɔ mli gbɛfaŋnɔ ni fa babaoo.—2/1, baafã 28.

◻ Te eeefee tɛŋŋ eba akɛ gbele gbi hi fe fɔmɔ gbi? (Jajelɔ 7:1)

Gbele gbi baanyɛ ahi fe gbi ni akɛfɔ mɔ ko, kɛji yɛ nakai beaŋ lɛ mɔ lɛ ena gbɛi kpakpa yɛ Yehowa, mɔ ni baanyɛ atee anɔkwafoi ni egboi lɛ ashi lɛ hiɛ. (Yohane 11:25)—2/15, baafã 12.

◻ Mɛni hewɔ esa akɛ Jajelɔ wolo lɛ aye abua wɔ akɛ aŋkroaŋkro?

Ebaanyɛ eye ebua wɔteŋ mɔ fɛɛ mɔ koni ejaje eshihilɛ kɛ nɔ ni he hiaa ni wɔsusuɔ he lɛ. (Jajelɔ 7:2; 2 Timoteo 3:16, 17)—2/15, baafã 16.

◻ Ani Yehowa Odasefoi feɔ keketee yɛ jamɔ mli?

Dabi. Yɛ be mli ni amɛfeɔ shiŋŋ yɛ jamɔ mli lɛ, amɛbɛ keketee yɛ bɔ ni akɛ wiemɔ lɛ etsu nii eha lɛ naa. Amɛkɛ amɛhe wooo basabasafeemɔi kɛ awui ni ayeɔ mɛi ni kɛ amɛ kpaaa gbee lɛ mli. Amɛkaseɔ amɛ-Hiɛnyiɛlɔ Yesu Kristo.—3/1, baafã 6.

◻ Be pɔtɛ̃ɛ ni Yesu baaba abatsu Nyɔŋmɔ oweletɔɔ lɛ he nii ni aleee lɛ saa Kristofoi lɛ ahe yɛ mɛɛ gbɛ nɔ?

Enɛ hãa Kristofoi lɛ ahiɛ hiɔ amɛhe nɔ jogbaŋŋ, ni ehaa amɛ hegbɛ daa gbi koni amɛkɛtsɔɔ akɛ amɛsɔmɔɔ Yehowa ni pɛsɛmkunya bɛ mli.—3/1, baafã 13.

◻ Mɛni esa akɛ wɔsusu he dani wɔkɛ nyɛmi ko ni ekolɛ etswa wɔ ojo aye yɛ mla naa?

Esa akɛ wɔsusu bɔ ni ebaanyɛ esa wɔ, kɛ mɛi krokomɛi ni fata he, asafo lɛ, kɛ bɔ ni ebaanyɛ esa mɛi ni yɔɔ sɛɛ lɛ ahe lɛ he. (1 Korintobii 6:7)—3/15, baafã 22.

◻ Te aaafee tɛŋŋ ana anɔkwa miishɛɛ?

Anɔkwa miishɛɛ ji shihilɛ ni yɔɔ tsui mli, ni damɔ anɔkwa hemɔkɛyeli kɛ mɔ kɛ Yehowa teŋ wekukpaa kpakpa nɔ. (Mateo 5:3)—3/15, baafã 23.

◻ Mɛni esa akɛ Kristofonyo ni atsɛ lɛ koni ebafata mɛi ni yeɔ buaa kojolɔ yɛ saneyeli mli lɛ ahe lɛ afee?

Esa akɛ Kristofonyo fɛɛ Kristofonyo ni fata mɛi ni yeɔ buaa kojolɔ yɛ saneyeli mli lɛ ahe lɛ akpɛ eyiŋ yɛ gbɛ ni ebaatsɔ nɔ, ni damɔ bɔ ni enuɔ Biblia lɛ shishi ehãa lɛ kɛ lɛ diɛŋtsɛ ehenilee nɔ lɛ he. (Galatabii 6:5)—4/1, baafã, 29.