Yitso Nyɔŋma Kɛ Etɛ
“Nyɛwoa Nyamɔ Lala”!
1. Mɛni hewɔ gbalɛ wiemɔi ni yɔɔ Yesaia yitso 52 lɛ ji miishɛɛ jɛɛhe lɛ, ni mɛɛ mlibaai enyɔ amɛyɔɔ?
KPƆMƆ! Ani gbɛkpamɔ ko baanyɛ afee miishɛɛ kɛha gbɔmɛi ní aŋɔ amɛ nom fe enɛ? Akɛni saneyitso titri ko ni jeɔ kpo yɛ Yesaia wolo lɛ mli ji kpɔmɔ kɛ sɛɛkuu kɛbaa kɛ saamɔ hewɔ lɛ, ebɛ naakpɛɛ akɛ yɛ Lalai lɛ asɛɛ lɛ, Biblia mli wolo nɛɛ hiɛ miishɛɛ wiemɔi babaoo fe woji krokomɛi ní eshwɛ lɛ fɛɛ. Yesaia yitso 52 lɛ titri tsɔɔ yiŋtoo hewɔ ní esa akɛ Nyɔmɔ webii amli afili amɛ lɛ. Emli gbalɛ wiemɔi lɛ ba mli yɛ Yerusalem nɔ yɛ afi 537 D.Ŋ.B. Ni amɛyɛ mlibaa ní da ní kɔɔ “ŋwɛi Yerusalem,” ni ji Yehowa ŋwɛi gbɛjianɔtoo ní ji mumɔŋ bɔɔ nii, ní awieɔ ehe yɛ bei komɛi amli ákɛ nyɛ kɛ ŋa lɛ he.—Galatabii 4:26; Kpojiemɔ 12:1.
“Okɛ Ohewalɛ lɛ Aha Ohe, Zion!”
2. Mɛɛ be Zion te shi, ni mɛɛ gbɛ nɔ enɛ ba yɛ?
2 Yehowa tsɔ Yesaia nɔ ekɛ E-maŋtiase Zion ní esumɔɔ lɛ wie akɛ: “Ohiɛ atsɛ̃, ohiɛ atsɛ̃! Okɛ ohewalɛ lɛ aha ohe, Zion! Wó onunyam atadei lɛ, Yerusalem, maŋ krɔŋkrɔŋ! Ejaakɛ kɛjɛ ŋmɛnɛ nɔ kɛyaa nɛɛ foolɔ loo mɔ ni he tseee ko boteŋ omli dɔŋŋ. Hosomɔ ohe mulu lɛ oshwie, tee shi otá shi, Yerusalem! Fɛ̃nemɔ okuɛ kpãai lɛ, bo Zion biyoo ní aŋɔo nom!” (Yesaia 52:1, 2) Akɛni Yerusalem maŋ lɛ mli bii lɛ tée Yehowa mlifu shi hewɔ lɛ, eha maŋ lɛ kã shi amaŋfɔ afii 70. (2 Maŋtsɛmɛi 24:4; 2 Kronika 36:15-21; Yeremia 25:8-11; Daniel 9:2) Agbɛnɛ be eshɛ ní ekɛaate shi kɛjɛ be kakadaŋŋ ní ekɛfeee nɔ ko lɛ mli, ní ekɛ heyeli atadei fɛfɛji awula ehe. Yehowa ekanya Koresh tsui koni eha “Zion biyoo ní [aŋɔ lɛ] nom” lɛ aye ehe, koni mɛi ní ji Yerusalem maŋ lɛ mli bii tsutsu ko lɛ kɛ amɛshwiei lɛ anyɛ ashi Babilon, ní amɛku amɛsɛɛ kɛya Yerusalem, ní amɛyato anɔkwa jamɔ shishi ekoŋŋ. Ánaŋ foolɔi kɛ mɛi ní he tseee dɔŋŋ yɛ Yerusalem.—Ezra 1:1-4.
3. Mɛni hewɔ abaanyɛ atsɛ́ Kristofoi ní afɔ amɛ mu lɛ asafo lɛ akɛ “Zion biyoo” lɛ, ni aha amɛye amɛhe yɛ mɛɛ shishinumɔ naa?
3 Yesaia wiemɔi nɛɛ hu yɛ emlibaa yɛ Kristofoi asafo lɛ nɔ. Abaanyɛ awie Kristofoi ní afɔ amɛ mu lɛ asafo lɛ he akɛ ŋmɛnɛŋmɛnɛ beaŋ “Zion biyoo,” akɛni “ŋwɛi Yerusalem” ji amɛnyɛ lɛ hewɔ.a Akɛni amɛye amɛhe kɛjɛ wɔŋjalɔi kɛ hemɔkɛyeli kwalɔi atsɔɔmɔi ahe hewɔ lɛ, esa akɛ mɛi ní afɔ amɛ mu lɛ ahi shidaamɔ ní he tse mli yɛ Yehowa hiɛ daa, dabi, jeee kɛtsɔ heloonaa ketiafoo nɔ, shi moŋ kɛtsɔ amɛtsuiŋ ketiafoo nɔ. (Yeremia 31:33; Romabii 2:25-29) Nɔ ni fata enɛ he ji mumɔŋ, jwɛŋmɔŋ, kɛ jeŋba mli hetsemɔ ní amɛaahiɛ mli daa yɛ Yehowa hiɛ.—1 Korintobii 7:19; Efesobii 2:3.
4. Eyɛ mli akɛ “ŋwɛi Yerusalem” gboko Yehowa nɔ toi dã moŋ, shi mɛɛ enajiaŋdamɔlɔi ní yɔɔ shikpɔŋ nɔ lɛ aniiashikpamɔ ko tamɔ blema Yerusalem maŋ lɛ mli bii lɛ anɔ̃ lɛ pɛpɛɛpɛ?
4 Lɛɛlɛŋ, “ŋwɛi Yerusalem” gboko Yehowa nɔ toi dã. Shi, yɛ klɛŋklɛŋ jeŋ ta lɛ mli lɛ, enajiaŋdamɔlɔi ní yɔɔ shikpɔŋ nɔ—ni ji Kristofoi ní afɔ amɛ mu lɛ—ku Yehowa mla mli ní amɛleee, ejaakɛ no mli lɛ amɛnuuu Kristofoi ahe ní amɛkɛwooo je lɛŋ saji amli lɛ shishi jogbaŋŋ. Akɛni ŋwɛi duromɔ ŋmɛɛ amɛ hewɔ lɛ, amɛyaje “Babilon kpeteŋkpele lɛ,” ni ji jeŋ apasa jamɔ maŋtsɛyeli lɛ mumɔŋ nomŋɔɔ mli. (Kpojiemɔ 17:5) Nyɔŋyeli shihilɛ ní amɛbote mli lɛ yashɛ he ni mli wa fe fɛɛ yɛ June 1918, beni awo Buu Mɔɔ Asafo lɛ nitsumɔhe lɛ mli bii kpaanyɔ tsuŋ yɛ amale naafolɔmɔi, ní ŋaatsɔɔ fɔŋ fata he lɛ ahewɔ lɛ. Yɛ nakai beaŋ lɛ, efee tamɔ nɔ ni sanekpakpa shiɛmɔ ní ato he gbɛjianɔ lɛ sɛɛ efo kwraa. Shi, yɛ afi 1919 mli lɛ, akɛ tsɛmɔ ko ní naa wa waa ha kɛha mumɔŋ hiɛtsɛ̃ɛ. Kristofoi ní afɔ amɛ mu lɛ bɔi amɛhe tsimɔ kɛmiijɛ Babilon Kpeteŋkpele lɛ nifeemɔi ní he tseee yɛ jeŋba mli kɛ mumɔŋ lɛ ahe kwraa. Amɛte shi kɛjɛ nomŋɔɔ mulu lɛ mli, ni “ŋwɛi Yerusalem” lɛ baná anunyam ni ji “maŋ krɔŋkrɔŋ” nɔ̃, he ni aŋmɛɛɛ gbɛ ní akɛ nɔ ko ní he tseee yɛ mumɔŋ aba lɛ.
5. Mɛni hewɔ Yehowa yɔɔ hegbɛ ni mɔɔ shi ákɛ eeekpɔ̃ ewebii lɛ ní ehaŋ mɛi ní baŋɔ amɛ nom lɛ nɔ ko kwraa kɛto amɛ najiaŋ lɛ?
5 Yehowa yɛ hegbɛ ni mɔɔ shi akɛ eeeha ewebii lɛ aye amɛhe yɛ afi 537 D.Ŋ.B. kɛ afi 1919 Ŋ.B. fɛɛ. Yesaia tsɔɔ mli akɛ: “Bɔ ni Yehowa kɛɛ nɛ: Ahɔ̃ɔ nyɛ lɛ akɛ nyɛ heee nɔ ko, ni jeee shika hu akɛaakpɔ̃ nyɛ.” (Yesaia 52:3) Blema Babilon loo Babilon Kpeteŋkpele lɛ wooo nyɔmɔ ko kwraa beni amɛnine shɛ Nyɔŋmɔ webii ní ekɛ amɛ efee kpaŋmɔ lɛ anɔ ákɛ nyɔji lɛ. Akɛni niianaayeli ko baaa yɛ shika gbɛfaŋ hewɔ lɛ, Yehowa tee nɔ efee ewebii lɛ a-Nɔ̃tsɛ yɛ mla naa lolo. Ani kulɛ esa akɛ enu he akɛ ehiɛ mɔ ko nyɔmɔ? Eka shi faŋŋ akɛ dabi. Yɛ shihilɛi enyɔ lɛ fɛɛ mli lɛ, Yehowa baanyɛ akpɔ̃ ejálɔi lɛ yɛ gbɛ ní ja nɔ ní ehaŋ mɛi ní baŋɔ amɛ nom lɛ nɔ ko kwraa kɛto amɛ najiaŋ.—Yesaia 45:13.
6. Mɛɛ nikasemɔi ní jɛ yinɔsane mli Yehowa henyɛlɔi lɛ booo toi?
6 Yehowa henyɛlɔi lɛ ekaseee nɔ ko kwraa kɛjɛɛɛ yinɔsane mli. Wɔkaneɔ akɛ: “Bɔ ni Nuntsɔ Yehowa kɛɛ nɛ: Tsutsu lɛ mimaŋ lɛ yiŋ kɛtee Mizraim ni eyato gbɔ yɛ jɛi; ni Ashur hu wa lɛ yi yakatswaa.” (Yesaia 52:4) Mizraim Farao lɛ ye Israelbii lɛ, ní afɔ̃ amɛ nine kɛba eshikpɔŋ lɛ nɔ koni amɛbahi shi ákɛ gbɔi lɛ anɔ nyɔji. Shi Yehowa ha Farao kɛ esraafoi lɛ fɛɛ gboi yɛ Ŋshɔ Tsuru lɛ mli. (2 Mose 1:11-14; 14:27, 28) Beni Ashur Maŋtsɛ Sanherib wo Yerusalem he gbeyei lɛ, Yehowa bɔfo gbe maŋtsɛ lɛ asraafoi lɛ ateŋ mɛi 185,000. (Yesaia 37:33-37) Nakai nɔŋŋ blema Babilon loo Babilon Kpeteŋkpele lɛ hu nyɛŋ ajo nibii ní baajɛ nɔnyɛɛ ní amɛkɛba Nyɔŋmɔ webii anɔ lɛ mli aba lɛ naa foi.
“Mimaŋ lɛ Aaale Migbɛi”
7. Mɛɛ hewalɛ Yehowa webii anomŋɔɔ lɛ ená yɛ egbɛi lɛ nɔ?
7 Nomŋɔɔ shihilɛ ní Yehowa webii yɔɔ mli lɛ náa hewalɛ ko yɛ egbɛi lɛ nɔ, taakɛ gbalɛ lɛ tsɔɔ lɛ, akɛ: “Agbɛnɛ, mɛni mifeɔ yɛ biɛ? Yehowa kɛɛ, beni aŋɔ mimaŋ lɛ kɛtee yakatswaa lɛ; enɔyelɔi lɛ miibolɔ sɔŋŋ, Yehowa kɛɛ, ni daa jetsɛremɔ lɛ awieɔ musubɔɔ wiemɔ ashiɔ migbɛi lɛ. Hewɔ lɛ mimaŋ lɛ aaale migbɛi lɛ; ejaakɛ nakai gbi lɛ nɔ lɛ amɛaale akɛ mi ji mɔ ni kɛɔ akɛ: Naa, mi ni!” (Yesaia 52:5, 6) Mɛɛ miishɛɛ Yehowa yɔɔ yɛ shihilɛ lɛ he? Kɛ́ Babilon miiye Israel nɔ nyɔŋ lɛ, mɛni no kɔɔ yɛ ehe? Esa akɛ Yehowa afee he nɔ ko ejaakɛ Babilon ebaŋɔ ewebii anom, ni eebolɔ sɔŋŋ yɛ kunimyeli mli. Nɛkɛ shwã ní Babilon shwãa nɛɛ eha eewie musubɔɔ wiemɔi eeshi Yehowa gbɛi lɛ. (Ezekiel 36:20, 21) Eyɔseee akɛ amaŋfɔ shihilɛ ní Yerusalem yɔɔ mli lɛ jɛ miishɛɛ ní Yehowa naaa yɛ ewebii lɛ ahe lɛ hewɔ. Shi moŋ, Babilon buɔ Yudafoi lɛ anɔ nyɔŋ ní eyeɔ lɛ akɛ odaseyeli ní tsɔɔ bɔ ni amɛ-Nyɔŋmɔ lɛ bɛ hewalɛ ko kwraa ha. Babilon maŋtsɛ najiaŋyelɔ Belshazar po ye Yehowa he fɛo kɛtsɔ E-sɔlemɔwe lɛ nibii ní ekɛnu dãa yɛ okpɔlɔŋmɛɛ ko ní ekɛwo Babilon nyɔŋmɔi lɛ ahiɛ nyam lɛ shishi lɛ nɔ.—Daniel 5:1-4.
8. Te áfee Yehowa gbɛi lɛ kɛjɛ bɔfoi lɛ agbele sɛɛ kɛbaa nɛɛ aha tɛŋŋ?
8 Te enɛɛmɛi fɛɛ kɔɔ “ŋwɛi Yerusalem” he ehaa tɛŋŋ? Kɛjɛ be mli ní hemɔkɛyeli kwamɔ bahe shi yɛ mɛi ní tsɛɔ amɛhe Kristofoi lɛ ateŋ kɛbaa nɛɛ, abaanyɛ awie akɛ “awieɔ Nyɔŋmɔ gbɛi lɛ he musubɔɔ wiemɔi yɛ [mɛi ní yɔɔ] jeŋmaji lɛ ateŋ” lɛ ahewɔ. (Romabii 2:24; Bɔfoi lɛ Asaji 20:29, 30) Enɛ hewɔ lɛ, yɛ naagbee lɛ Yudafoi lɛ kɛ Nyɔŋmɔ gbɛi kpá nitsumɔ kwraa yɛ apasa hemɔkɛyeli ní amɛná lɛ hewɔ. Bɔfoi lɛ agbele sɛɛ etsɛɛɛ kwraa, kɛkɛ ni Kristofoi hemɔkɛyeli kwalɔi hu kɔ nakai gbɛ lɛ ni amɛkɛ Nyɔŋmɔ gbɛi diɛŋtsɛ kpá nitsumɔ kwraa. Hemɔkɛyeli kwamɔ lɛ kɛ Kristendom, ni ji Babilon Kpeteŋkpele lɛ fã titri lɛ ba shihilɛ mli. (2 Tesalonikabii 2:3, 7; Kpojiemɔ 17:5) Kristendom jeŋba shara ní teke nɔ kɛ eláshishwiemɔ babaoo lɛ kɛ heguɔgbee kpele eba Yehowa gbɛi lɛ nɔ.—2 Petro 2:1, 2.
9, 10. Mɛɛ tɛi ní Yehowa efolɔ eshwie shi kɛ egbɛi lɛ he shishinumɔ ní mli kwɔ Nyɔŋmɔ webii ní ekɛ amɛ efee kpaŋmɔ yɛ ŋmɛnɛŋmɛnɛ beaŋ lɛ ebaná?
9 Beni Koresh Kpeteŋkpele, ni ji Yesu Kristo ha Nyɔŋmɔ webii ní ekɛ amɛ efee kpaŋmɔ lɛ ye amɛhe kɛjɛ Babilon Kpeteŋkpele lɛ nomŋɔɔ mli yɛ afi 1919 lɛ, eha amɛbanu Yehowa taomɔ nii lɛ ashishi jogbaŋŋ diɛŋtsɛ. No mli lɛ amɛtsuu amɛhe kɛjɛ Kristendom tsɔɔmɔi ní amɛmli babaoo ná amɛshishifã kɛjɛ be ní tsɔ Kristofoi abe lɛ hiɛ lɛ mli wɔŋjamɔ mli, tamɔ Triniti, susuma ní gbooo, kɛ naanɔ piŋmɔ yɛ hɛl la mli lɛ amli babaoo he momo. Agbɛnɛ amɛje shishi akɛ amɛaajie Babilonbii anifeemɔi ní ená amɛnɔ hewalɛ lɛ fɛɛ kɛjɛ amɛhe kwraa. Amɛbayoo bɔ ni ehe hiaa hu akɛ amɛaahi shi ákɛ mɛi ni kɛ amɛhe wooo je lɛŋ mligbalamɔ kui lɛ asaji amli. Amɛmiisumɔ ní amɛtsuu amɛhe kɛjɛ lá yi sɔ̃ ní ekolɛ amɛteŋ mɛi komɛi eye lɛ po mli kwraa.
10 Nyɔŋmɔ tsuji ni yɔɔ ŋmɛnɛŋmɛnɛ beaŋ lɛ baná bɔ ni Yehowa gbɛi lɛ hu he hiaa waa lɛ he shishinumɔ ní mli kwɔ. Yɛ afi 1931 lɛ, amɛŋɔ gbɛi ni ji Yehowa Odasefoi lɛ, ni amɛkɛ nakai feemɔ tswa adafi amɛtsɔɔ yɛ faŋŋ mli akɛ amɛfiɔ Yehowa kɛ egbɛi lɛ sɛɛ. Kɛfata he lɛ, kɛjɛ afi 1950 kɛbaa nɛɛ, Yehowa Odasefoi etsɔ New World Translation ní amɛfee lɛ nɔ amɛkɛ Nyɔŋmɔ gbɛi ewo he ni sa akɛ ehi yɛ Biblia lɛ mli. Hɛɛ, amɛbaná hiɛsɔɔ amɛha Yehowa gbɛi lɛ, ni amɛmiiha aale egbɛi lɛ kɛmiiya shikpɔŋ lɛ naagbeehei lɛ fɛɛ.
“Sanekpakpa Jajelɔ”
11. Mɛni hewɔ wiemɔ ní awie akɛ “O-Nyɔŋmɔ lɛ yeɔ maŋtsɛ lɛ!” sa jogbaŋŋ yɛ nibii ní ba yɛ afi 537 D.Ŋ.B. lɛ hewɔ lɛ?
11 Agbɛnɛ aagbala wɔjwɛŋmɔ kɛmiiya Zion nɔ ekoŋŋ beni ekã he eyɔɔ amaŋfɔ shihilɛ mli lolo lɛ. Bɔfo ko ní hiɛ sanekpakpa miibɛŋkɛ: “Kwɛ bɔ ni sanekpakpa jajelɔ ní shiɛɔ hejɔlɛ lɛ, sanekpakpa jajelɔ ní shiɛɔ yiwalaheremɔ lɛ naji yɔɔ fɛo yɛ gɔji lɛ anɔ, mɔ ni kɛɔ Zion akɛ: O-Nyɔŋmɔ lɛ yeɔ maŋtsɛ lɛ!” (Yesaia 52:7) Te aaafee tɛŋŋ akɛɛ akɛ Zion Nyɔŋmɔ lɛ ebatsɔ Maŋtsɛ yɛ afi 537 D.Ŋ.B. lɛ? Ani Yehowa jeee maŋtsɛ daa nɛɛ? Yɛ anɔkwale mli lɛ, eji ‘naanɔ Maŋtsɛ’! (Kpojiemɔ 15:3) Shi wiemɔ ní awie akɛ “O-Nyɔŋmɔ lɛ yeɔ maŋtsɛ lɛ!” sa jogbaŋŋ, ejaakɛ Babilon shigbeemɔ kɛ sanejajemɔ ní maŋ nɔyelɔ lɛ kɛha akɛ aku sɛɛ ayasaa Yerusalem sɔlemɔtsu lɛ ní ato jamɔ krɔŋŋ shishi ekoŋŋ yɛ jɛmɛ lɛ feɔ maŋtsɛ ní Yehowa yeɔ lɛ kpojiemɔ yɛ gbɛ ní yɔɔ ehee nɔ.—Lala 97:1.
12. Namɔ nyiɛ hiɛ yɛ ‘sanekpakpa jajemɔ’ lɛ mli, ni yɛ mɛɛ gbɛ nɔ?
12 Yɛ Yesaia gbii lɛ amli lɛ, atsĩii mɔ aŋkro loo gbɔmɛi aŋkroaŋkroi akuu ko tã akɛ “sanekpakpa jajelɔ” lɛ. Shi kɛlɛ, ale mɔ ni akɛ sanekpakpa etsu lɛ lɛ ŋmɛnɛ. Yesu Kristo ji Yehowa toiŋjɔlɛ he bɔfo kpeteŋkpele fe fɛɛ. Beni eyɔɔ shikpɔŋ nɔ lɛ, eshiɛ sanekpakpa akɛ abaaná heyeli kɛjɛ nibii fɛɛ ní ejɛ esha ni wɔná kɛjɛ Adam ŋɔɔ, ní hela kɛ gbele fata he lɛ mli lɛ etsɔɔ. (Mateo 9:35) Yesu fee nɔkwɛmɔnɔ ní ekãa yɔɔ mli ni ekɛshiɛ sanekpakpa ní kɔɔ nɔ̃ kpakpa he nɛɛ, ni ekɛ hegbɛ fɛɛ hegbɛ tsu nii ni ekɛtsɔɔ gbɔmɛi Nyɔŋmɔ Maŋtsɛyeli lɛ he saji. (Mateo 5:1, 2; Marko 6:34; Luka 19:1-10; Yohane 4:5-26) Ni ekaselɔi lɛ nyiɛ enɔkwɛmɔnɔ lɛ sɛɛ.
13. (a) Te bɔfo Paulo lɛɛ wiemɔ ni ji ‘Kwɛ bɔ ni sanekpakpa jajelɔ lɛ naji yɔɔ fɛo yɛ gɔji lɛ anɔ’ lɛ shishinumɔ mli eha tɛŋŋ? (b) Mɛni hewɔ abaanyɛ akɛɛ akɛ bɔfoi ní atsu amɛ lɛ anaji ‘yɛ fɛo’ lɛ?
13 Yɛ wolo ní bɔfo Paulo ŋma emaje Romabii lɛ mli lɛ, etsɛ́ Yesaia 52:7 lɛ sɛɛ ni ekɛma bɔ ni sanekpakpa shiɛmɔ nitsumɔ lɛ he hiaa ha lɛ nɔ mi. Ebibii saji ní haa asusuɔ nii ahe waa, tamɔ akɛ, ‘Te gbɔmɛi aaafee tɛŋŋ ní amɛaanu kɛ́ shiɛlɔ ko bɛ lɛ?’ Kɛkɛ ni ewie akɛ: “Taakɛ bɔ ni aŋma akɛ: ‘Kwɛ bɔ ni hejɔlɛ he sanekpakpa shiɛlɔi ni shiɛɔ nikpakpai lɛ anaji yɔɔ fɛo ha!’” (Romabii 10:14, 15) Enɛ hewɔ lɛ, Paulo lɛɛ Yesaia 52:7 lɛ shishinumɔ mli, ni ekɛ babaoo-feemɔ wiemɔ ni ji “shiɛlɔi” tsu nii, yɛ wiemɔ “shiɛlɔ” ní tsɔɔ mɔ kome, ní jeɔ kpo yɛ Yesaia ŋmalɛ lɛ mli yɛ shishijee niŋmaa lɛ mli lɛ najiaŋ. Yɛ Yesu Kristo kasemɔ mli lɛ, Kristofoi fɛɛ ji toiŋjɔlɛ sanekpakpa lɛ he bɔfoi. Mɛɛ gbɛ nɔ amɛnaji “yɔɔ fɛo” yɛ? Yesaia wieɔ tamɔ nɔ ni adafitswalɔ lɛ miibɛŋkɛ Yerusalem kɛmiijɛ Yuda gɔji ní bɛŋkɛ amɛ lɛ anɔ. Kɛ́ bɔfo ní atsu lɛ lɛ nyiɛ shɔŋŋ lɛ, anyɛŋ ana enaji. Shi moŋ, nɔ ni agbalaa jwɛŋmɔ kɛyaa nɔ yɛ biɛ lɛ ji bɔfo lɛ, ni naji lɛ damɔ shi kɛha bɔfo ní atsu lɛ lɛ diɛŋtsɛ. Taakɛ bɔ ni Yesu kɛ ekaselɔi lɛ ahe yɔɔ fɛo kɛha mɛi ní he jɔ lɛ yɛ klɛŋklɛŋ afii oha lɛ mli lɛ, nakai nɔŋŋ ŋmɛnɛŋmɛnɛ beaŋ Odasefoi lɛ ahe yɔɔ fɛo kɛha gbɔmɛi ní ji heshibalɔi ní boɔ sanekpakpa ní hereɔ mɔ yiwala lɛ toi lɛ.
14. Yehowa etsɔ Maŋtsɛ yɛ ŋmɛnɛŋmɛnɛ beaŋ yɛ mɛɛ gbɛ nɔ, ni kɛjɛ mɛɛ be abɔi enɛ he adafitswaa kɛha adesai?
14 Kɛjɛ mɛɛ be abɔi sanejajemɔ ni ji “O-Nyɔŋmɔ lɛ yeɔ maŋtsɛ lɛ!” numɔ yɛ ŋmɛnɛŋmɛnɛ beaŋ? Kɛjɛ afi 1919 kɛbaa. Yɛ nakai afi lɛ mli, yɛ kpee ko ní afee yɛ Cedar Point, Ohio lɛ shishi lɛ, J. F. Rutherford, ní no mli lɛ, lɛ ji Buu Mɔɔ Asafo lɛ sɛinɔtalɔ lɛ, kanya etoibolɔi lɛ kɛ maŋshiɛmɔ ko ní yitso ji “Wiemɔ Kɛha Nanemɛi Nitsulɔi.” Wiemɔ lɛ, ní damɔ Yesaia 52:7 kɛ Kpojiemɔ 15:2 lɛ nɔ lɛ, wo mɛi fɛɛ ní eba kpee lɛ shishi lɛ hewalɛ ní amɛkɛ amɛhe awo shiɛmɔ nitsumɔ lɛ mli. Enɛ ha ‘naji ní yɔɔ fɛo’ lɛ bɔi kpojee yɛ “gɔji lɛ anɔ.” Klɛŋklɛŋ lɛ, Kristofoi ní afɔ amɛ mu lɛ, kɛ sɛɛ mli lɛ, amɛhefatalɔi ni ji “tooi krokomɛi” lɛ kɛ ekãa je kpo ni amɛyashiɛ sanekpakpa lɛ ákɛ Yehowa etsɔ Maŋtsɛ. (Yohane 10:16) Yehowa etsɔ Maŋtsɛ yɛ mɛɛ gbɛ nɔ? Ejie emaŋtsɛyeli lɛ kpo yɛ gbɛ hee nɔ yɛ afi 1914 beni ekɛ e-Bi, Yesu Kristo tá maŋtsɛsɛi nɔ ákɛ ŋwɛi Maŋtsɛyeli ní ato shishi ehee lɛ nɔ Maŋtsɛ lɛ. Ni Yehowa saa ejie emaŋtsɛyeli lɛ kpo yɛ gbɛ kroko hu nɔ yɛ afi 1919 beni ekpɔ̃ “Nyɔŋmɔ Israel lɛ” kɛjɛ Babilon Kpeteŋkpele lɛ dɛŋ lɛ.—Galatabii 6:16; Lala 47:9; Kpojiemɔ 11:15, 17; 19:6.
“Obulɔi lɛ Agbee Nɛ”
15. Namɛi ji ‘bulɔi’ ní hole amɛgbeei anɔ yɛ afi 537 D.Ŋ.B. lɛ?
15 Ani ahereɔ ekãa ní akɛkɛɛɔ akɛ “O-Nyɔŋmɔ lɛ yeɔ maŋtsɛ lɛ” nɔ? Hɛɛ. Yesaia ŋma akɛ: “Obulɔi lɛ agbee nɛ: Amɛ fɛɛ tswɛ̃m amɛaahole amɛgbeei anɔ amɛaalá; ejaakɛ hiɛ kɛ hiɛ amɛaana bɔ ni Yehowa aaakpale Zion kɛaaba ekoŋŋ lɛ.” (Yesaia 52:8) Bulɔi diɛŋtsɛ komɛi eyadamɔɔɔ amɛbuuhei yɛ Yerusalem yɛ afi 537 D.Ŋ.B. koni amɛhere klɛŋklɛŋ nomii ní ku amɛsɛɛ kɛba lɛ atuu. Maŋtiase lɛ ekã shi amaŋfɔ aahu afii 70. (Yeremia 25:11, 12) No hewɔ lɛ eka shi faŋŋ akɛ, ‘bulɔi’ ní hole amɛgbeei anɔ lɛ baafee Israelbii ní nine shɛ Zion sɛɛkuu kɛmiiba eshikpɔŋ nɔ ekoŋŋ lɛ he adafitswaa lɛ nɔ kɛtsɔ hiɛ, ní ha amɛbafee mɛi ní gbɛnaa nii kã amɛnɔ akɛ amɛha Zion bii ní eshwɛ lɛ anine ashɛ adafitswaa lɛ nɔ lɛ. Beni amɛna akɛ Yehowa kɛ Babilon ewo Koresh dɛŋ yɛ afi 539 D.Ŋ.B. lɛ, bulɔi lɛ ayiŋ efeee amɛ kɔshikɔshi akɛ Yehowa miikpɔ̃ ewebii lɛ. Bulɔi lɛ kɛ mɛi ní here amɛtsɛmɔ lɛ nɔ lɛ, fɛɛ yaa nɔ amɛkɛ miishɛɛ jajeɔ amɛtsɔɔ, ni amɛhaa mɛi krokomɛi hu nuɔ sanekpakpa lɛ.
16. Namɔ bulɔi lɛ naa lɛ “hiɛ kɛ hiɛ” lɛ, ni yɛ mɛɛ shishinumɔ naa?
16 Bulɔi ní hiɛ yɔɔ amɛhe nɔ lɛ baná amɛkɛ Yehowa teŋ wekukpaa ní bɛŋkɛ kpaakpa, ni amɛna lɛ “hiɛ kɛ hiɛ,” loo kɛ́ wɔɔkɛɛ, kpetekplee. (4 Mose 14:14) Bɔ ni amɛbɛŋkɛɔ Yehowa, ní amɛbɛŋkɛɔ amɛ diɛŋtsɛ amɛhe hu kpaakpa lɛ maa bɔ ni ekomefeemɔ yɔɔ amɛteŋ kɛ bɔ ni amɛshɛɛ sane lɛ ji miishɛɛ nɔ̃ lɛ nɔ mi.—1 Korintobii 1:10.
17, 18. (a) Ŋmɛnɛŋmɛnɛ beaŋ bulɔ kuu lɛ ewó egbee nɔ waa yɛ mɛɛ gbɛ nɔ? (b) Bulɔ kuu lɛ kɛ gbee kome etsɛ yɛ mɛɛ shishinumɔ naa?
17 Yɛ ŋmɛnɛŋmɛnɛ beaŋ mlibaa mli lɛ, bulɔ kuu lɛ, ni ji “tsulɔ anɔkwafo kɛ nilelɔ” lɛ, wóɔ egbee nɔ, jeee kɛha mɛi ni yɔɔ Nyɔŋmɔ gbɛjianɔtoo ní anaa lɛ mli momo lɛ pɛ kɛkɛ, shi moŋ kɛha mɛi ní bɛ mli lɛ hu. (Mateo 24:45-47) Akɛ tsɛmɔ ha koni abua mɛi ní afɔ amɛ mu lɛ ateŋ shwɛɛnii lɛ anaa yɛ afi 1919, ni yɛ afi 1922 lɛ, aha tsɛmɔ lɛ mli wa waa yɛ Cedar Point, Ohio, kpee lɛ shishi kɛtsɔ hewalɛwoo wiemɔ nɛɛ nɔ akɛ “nyɛtswaa, nyɛtswaa, nyɛtswaa Maŋtsɛ lɛ kɛ emaŋtsɛyeli lɛ he adafi.” Kɛjɛ afi 1935 kɛbaa nɛɛ, agbala jwɛŋmɔ kɛtee asafo babaoo ní tamɔ gwantɛŋi lɛ anaabuamɔ nɔ. (Kpojiemɔ 7:9, 10) Yehowa maŋtsɛyeli lɛ he adafitswaa lɛ mli ewa waa yɛ nyɛsɛɛ afii nɛɛ amli. Yɛ mɛɛ gbɛ nɔ? Yɛ afi 2000 mli lɛ, mɛi aaafee akpekpei ekpaa kɛ amɛhe wo mli ni ajaje maŋtsɛ ní Yehowa ji lɛ yɛ shikpɔji kɛ kpokpai ní fa fe 230 nɔ. Kɛfata he lɛ, Buu-Mɔɔ, ni ji dɛŋdade ní bulɔ kuu lɛ kɛtsuɔ nii fe fɛɛ lɛ, gbɛɔ miishɛɛ shɛɛ sane lɛ eshwãa yɛ wiemɔi ní fa fe 130 mli.
18 Ebiɔ heshibaa kɛ nyɛmimɛi asuɔmɔ koni anyɛ akɛ he awo nitsumɔ ní feɔ mɛi ekome nɛɛ mli. Kɛ́ tsɛmɔ lɛ baamɔ shi lɛ, no lɛ esa akɛ mɛi fɛɛ ní kɛ amɛhe woɔ mli lɛ ashiɛ shɛɛ sane koome lɛ nɔŋŋ, ní amɛwie Yehowa gbɛi lɛ, kpɔmɔ nɔ̃ gbɛjianɔ ní eto lɛ, enilee, esuɔmɔ, kɛ e-Maŋtsɛyeli lɛ he babaoo. Yɛ be mli ní Kristofoi ní yɔɔ je lɛŋ fɛɛ lɛ feɔ ekome kɛtsuɔ nii lɛ, ehaa wekukpaa ní yɔɔ amɛkɛ Yehowa teŋ akɛ aŋkroaŋkroi lɛ mli waa ni amɛkɛ gbee kome jajeɔ miishɛɛ sane lɛ amɛtsɔɔ.
19. (a) “Yerusalem tsukói” lɛ baná miishɛɛ yɛ mɛɛ gbɛ nɔ? (b) Yehowa “ejie enine krɔŋkrɔŋ lɛ he” yɛ mɛɛ shishinumɔ naa?
19 Akɛni Nyɔŋmɔ webii miinya kɛ miishɛɛ hewɔ lɛ, amɛshihilɛhe lɛ po yɛ miishɛɛ diɛŋtsɛ. Gbalɛ lɛ yaa nɔ akɛ: “Nyɛ fɛɛ tswɛ̃m nyɛwoa nyamɔ lala, nyɛ Yerusalem tsukói, ejaakɛ Yehowa eshɛje emaŋ lɛ mii, ekpɔ̃ Yerusalem! Yehowa ejie enine krɔŋkrɔŋ lɛ he yɛ jeŋmaji lɛ fɛɛ ahiɛ, koni shikpɔŋ lɛ naagbeehei lɛ fɛɛ ana wɔ-Nyɔŋmɔ lɛ yiwalaheremɔ lɛ.” (Yesaia 52:9, 10) Kɛjɛ be mli ní mɛi ní ku amɛsɛɛ kɛjɛ Babilon lɛ bashɛ shi lɛ sɛɛ lɛ, Yerusalem hei ní kamɔ shi amaŋfɔ, ní yeɔ awerɛho lɛ bajie miishɛɛ su kpo ejaakɛ abaanyɛ ato Yehowa jamɔ krɔŋŋ shishi ekoŋŋ agbɛnɛ. (Yesaia 35:1, 2) Eyɛ faŋŋ akɛ, Yehowa nine yɛ enɛ mli. “Ejie enine krɔŋkrɔŋ lɛ he,” tamɔ nɔ ni ekota etade lɛ niji kɛtee sɛɛ koni etsu nitsumɔ ni ji ewebii lɛ ayiwalaheremɔ he nii.—Ezra 1:2, 3.
20. Mɛni ejɛ Yehowa nine krɔŋkrɔŋ lɛ he ní ejie yɛ ŋmɛnɛŋmɛnɛ beaŋ lɛ mli eba, ni mɛni baajɛ mli aba wɔsɛɛ?
20 Yehowa ejie enine krɔŋkrɔŋ lɛ he yɛ nɛkɛ “naagbee gbii” nɛɛ amli koni ekɛkanya shwɛɛnii ní afɔ amɛ mu lɛ, ni ji ‘odasefoi enyɔ’ ní awie amɛhe yɛ Kpojiemɔ wolo lɛ mli lɛ. (2 Timoteo 3:1; Kpojiemɔ 11:3, 7-13) Kɛjɛ afi 1919 kɛbaa nɛɛ, akɛ mɛnɛɛmɛi eba mumɔŋ paradeiso, ni ji mumɔŋ shihilɛ ní amɛkɛ amɛhefatalɔi akpekpei abɔ, ni ji tooi krokomɛi lɛ náa mli ŋɔɔmɔ bianɛ lɛ mli. Yɛ naagbee lɛ, Yehowa baajie enine krɔŋkrɔŋ lɛ he ni ebaahere ewebii lɛ ayiwala yɛ “Harmagedon.” (Kpojiemɔ 16:14, 16) Kɛkɛ lɛ, “shikpɔŋ lɛ naagbeehei lɛ fɛɛ [baana] wɔ-Nyɔŋmɔ lɛ yiwalaheremɔ lɛ.”
Taomɔ Nii ko ní He Hiaa
21. (a) Mɛni ataoɔ yɛ mɛi ní ‘tereɔ Yehowa nibii lɛ’ ahe? (b) Mɛni hewɔ Yudafoi ní shĩɔ Babilon lɛ bɛ yiŋtoo ní amɛaadamɔ nɔ ni amɛha amɛtsui afã lɛ?
21 Taomɔ nii ko yɛ ní esa akɛ mɛi ní shĩɔ Babilon akɛ amɛmiiku amɛsɛɛ kɛya Yerusalem lɛ ashɛ he. Yesaia ŋma akɛ: “Nyɛtsia nyɛhe, nyɛtsia nyɛhe! nyɛjea kpo kɛjɛa jɛi! Nyɛkataa nɔ ko ní he tseee he! Nyɛjea kpo kɛjɛa emli! Nyɛ mɛi ní nyɛtereɔ Yehowa nibii lɛ, nyɛtsuua nyɛhe! Shi jeee hejojoomɔ naa nyɛaaje kpo yɛ, ni asaŋ jeee foijee nɔ hu nyɛaanyiɛ kɛaatee; ejaakɛ Yehowa aaanyiɛ nyɛhiɛ, ni Israel Nyɔŋmɔ lɛ aaanyiɛ nyɛsɛɛ!” (Yesaia 52:11, 12) Esa akɛ Israelbii ní shĩɔ kɛyaa lɛ ashĩ nɔ fɛɛ nɔ ní Babilon apasa jamɔ he kadimɔ nii ko yɔɔ he lɛ yɛ amɛsɛɛ yɛ Babilon. Akɛni amɛtere Yehowa nibii ní akɛjɛ sɔlemɔtsu ni yɔɔ Yerusalem lɛ mli kɛba lɛ hewɔ lɛ, esa akɛ amɛhe atse, jeee yɛ kponɔgbɛ, ni ji kusum naa kɛkɛ, shi moŋ titri lɛ yɛ amɛtsuii amli. (2 Maŋtsɛmɛi 24:11-13; Ezra 1:7) Kɛfata he lɛ, Yehowa nyiɛ amɛhiɛ kɛmiiya, no hewɔ lɛ ehe ehiaaa ní amɛtsui afã, nakai nɔŋŋ hu esaaa akɛ amɛjoɔ foi kɛ hekpokpomɔ, tamɔ nɔ ni mɛi komɛi ní lá he kumai miiye amɛ miitiu amɛ. Israel Nyɔŋmɔ lɛ ji amɛhebuu nɔ̃ yɛ amɛsɛɛ gbɛ.—Ezra 8:21-23.
22. Te Paulo ma bɔ ni hetsemɔ he hiaa yɛ Kristofoi ní afɔ amɛ mu lɛ ateŋ lɛ nɔ mi eha tɛŋŋ?
22 Yesaia wiemɔi ní kɔɔ hetsemɔ he lɛ yɛ emlibaa titri yɛ “ŋwɛi Yerusalem” bii lɛ anɔ. Beni Paulo wo Korinto Kristofoi lɛ ŋaa akɛ amɛkɛ mɛi ní heee yeee lɛ akagbala kɔŋtso kome ní yeee egbɔ lɛ, etsɛ́ Yesaia 52:11 lɛ mli wiemɔi lɛ asɛɛ, akɛ: “No hewɔ lɛ Yehowa kɛɛ, nyɛjea amɛteŋ, ni nyɛtsea nyɛhe, ni nyɛkataa muji nɔ ko he.” (2 Korintobii 6:14-17) Taakɛ Israelbii ní kuɔ amɛsɛɛ kɛjɛɔ Babilon kɛyaa amɛmaŋ lɛ ji lɛ, esa akɛ Kristofoi hu atsi amɛhe kɛjɛ Babilonbii apasa jamɔ he kwraa.
23. Yehowa tsuji ní yɔɔ ŋmɛnɛ lɛ bɔɔ mɔdɛŋ akɛ amɛaahi hetsemɔ shihilɛ mli yɛ mɛɛ gbɛ̀i anɔ?
23 Enɛ fee anɔkwale yɛ Yesu Kristo sɛɛnyiɛlɔi ní afɔ amɛ mu, ní jo foi kɛshi Babilon Kpeteŋkpele lɛ mli yɛ afi 1919 lɛ ahe titri. Amɛtee nɔ fiofio ni amɛjie apasa jamɔ he okadii fɛɛ kɛjɛ amɛhe kwraa. (Yesaia 8:19, 20; Romabii 15:4) Amɛtee nɔ amɛbale bɔ ni jeŋba mli hetsemɔ hu he hiaa babaoo. Eyɛ mli akɛ Yehowa Odasefoi etee nɔ amɛhiɛ jeŋba he tɛi ní nɔ kwɔlɔ amli be fɛɛ be moŋ, shi The Watchtower lɛ ŋmala saji komɛi yɛ afi 1952 ni ekɛma bɔ ni ehe hiaa ní agbala mɛi ní hiɛ jeŋba shara lɛ atoi lɛ nɔ mi, bɔni afee ní eha asafo lɛ he atse. Nɛkɛ toigbalamɔ nifeemɔ nɛɛ hu yeɔ ebuaa nɔtɔlɔ lɛ diɛŋtsɛ koni ena bɔ ni ehe hiaa ní ejie anɔkwa heshwamɔ kpo.—1 Korintobii 5:6, 7, 9-13; 2 Korintobii 7:8-10; 2 Yohane 10, 11.
24. (a) Mɛni ji “Yehowa nibii lɛ” yɛ ŋmɛnɛŋmɛnɛ beaŋ? (b) Mɛni hewɔ Kristofoi ní yɔɔ ŋmɛnɛ lɛ yɔɔ hekɛnɔfɔɔ akɛ Yehowa baaya nɔ anyiɛ amɛhiɛ, ni eeefee amɛhebuu nɔ̃ yɛ amɛsɛɛgbɛ hu lɛ?
24 Kristofoi ní afɔ amɛ mu lɛ kɛ asafo babaoo ni ji tooi krokomɛi lɛ fɛɛ etswa amɛfai shi akɛ amɛtaŋ nɔ ko ní he tseee yɛ mumɔŋ lɛ he. Amɛshihilɛ ní he tse, ní atsuu he lɛ haa amɛfeɔ mɛi ní sa akɛ amɛtereɔ “Yehowa nibii lɛ”—ni ji nibii ní jara wa ní Nyɔŋmɔ eto he gbɛjianɔ kɛha sɔɔmɔ krɔŋkrɔŋ yɛ shia kɛ shia kɛ Biblia kasemɔ sɔɔmɔ nitsumɔ lɛ kɛ Kristofoi anitsumɔi krokomɛi amli lɛ. Akɛni amɛyaa nɔ amɛhiɛɔ shidaamɔ ní he tse mli hewɔ lɛ, Nyɔŋmɔ webii ní yɔɔ ŋmɛnɛ lɛ baanyɛ aná hekɛnɔfɔɔ akɛ Yehowa baaya nɔ enyiɛ amɛhiɛ, ni ebaafee amɛhebuu nɔ̃ yɛ amɛsɛɛgbɛ hu. Ákɛ Nyɔŋmɔ webii ní he tse lɛ, amɛyɛ yiŋtoi babaoo diɛŋtsɛ ní amɛaadamɔ nɔ ní ‘amɛ fɛɛ tswɛ̃m amɛwo nyamɔ lala’!
[Shishigbɛ niŋmaa]
a Kwɛmɔ wolo nɛɛ Yitso 15 lɛ kɛha wekukpaa ní kã “ŋwɛi Yerusalem” kɛ ebii ní afɔ amɛ mu, ní yɔɔ shikpɔŋ nɔ lɛ ateŋ lɛ mlitsɔɔmɔ fitsofitso.
[Mfoniri ni yɔɔ baafa 183]
Zion baaye ehe kɛjɛ nomŋɔɔ mli
[Mfoniri ni yɔɔ baafa 186]
Kɛjɛ afi 1919 kɛbaa nɛɛ, ‘naji ní yɔɔ fɛo’ epue yɛ “gɔji lɛ anɔ” ekoŋŋ
[Mfoniri ni yɔɔ baafa 189]
Yehowa Odasefoi kɛ gbee kome wieɔ
[Mfoniri ni yɔɔ baafa 192]
Esa akɛ mɛi ní ‘tereɔ Yehowa nibii lɛ’ ahe atse yɛ jeŋba kɛ mumɔŋ fɛɛ