Be Kɛha Bulɔ ni tamɔ Ezekiel
1. (a) Kɛjɛ mɛɛ be mli Nyɔŋmɔ eha “bulɔ” kuu lɛ ebɔ kɔkɔ lɛ, ni kɛha mɛɛ yiŋtoo? (b) Ní Kristendom aaabɔ kɔkɔ lɛ moŋ lɛ, mɛni ji nɔ ni efee?
1 YƐ NƆ NI fe afii 30 dani aaafɛ atɔmik okpɛlɛmii ashwie shi yɛ Bokagbɛ Shɔŋŋ lɛ, no mli lɛ Yehowa kɛ mɔbɔnalɛ eto ebulɔ lɛ koni ebɔ nɔ ni eka shi faŋŋ akɛ ebɛŋkɛ agbɛnɛ lɛ he kɔkɔ yɛ wɔyinɔ nɛɛ mli. Dani Jeŋ Ta I po aaafɛ yɛ 1914 mii lɛ, etsɔ hiɛ eto “bulɔ” lɛ koni ebɔ kɔkɔ lɛ. Afee enɛ, jeee ni akɛhɔ mɛi ni sumɔɔ akɛ amɛaale gbɛ ni amɛaatsɔ nɔ amɛje mli lɛ pɛ kɔkɔ, ‘shi moŋ koni akɛbɔ mɛi ni jɛɔ amɛsuɔmɔ mli amɛnyɛɔ Yehowa lɛ kɔkɔ. No hewɔ lɛ nɛkɛ henyɛlɔi nɛɛ baale heni hiɛkpatamɔ lɛ baajɛ aba. Mɛi ni taoɔ tɔmɔ Iɛ naŋ nɔ ko nɔ amɛdamɔ ni amɛwie akɛ etsɔɔɔ hiɛ E-bɔɔɔ amɛ kɔkɔ. Kulɛ esa akɛ Kristendom ni yɔɔ Ŋmalɛ Krɔŋkrɔŋ lɛ yɛ wiemɔi fe akpe mli lɛ afee mɔ ni abaatsɔ enɔ abɔ kɔkɔ nɛɛ, yɛ nɔ ni ekɛɔ akɛ eji lɛ hewɔ. Shi etsuko nii yɛ nɛkɛ gbɛ nɔ. Nɔ ni efee moŋ ji akɛ ekɛ ehe ewo jeŋ tai enyɔ lɛ kɛ tai krokomɛi ni awu yɛ afii oha nɛɛ mli lɛ mli, ni enɛ efite shikpɔŋ lɛ babaoo. No hewɔ lɛ namɛi ji “bulɔ” kuu lɛ?
2, 3. (a) Namɔ Nyɔŋmɔ hala lɛ koni ebɔ jeŋ muu fɛɛ nu afua ni baa lɛ he kɔkɔ, ni namɛi ekɛ amɛ etsu nii ni amɛbɔ kɔkɔ ni tamɔ nakai nɔŋŋ ŋmɛnɛ? (b) Mɛni hewɔ anyɛŋ akɛ wala ko ni hiɛ aaakpata Iɛ he sɔ̃ afɔ Yehowa nɔ lɛ?
2 Yɛ Noa gbii lɛ amli lɛ, jeee akɛ eshiɛ kɛkɛ, shi moŋ ekpɛ adeka agbo ko hu ni ekɛma ewiemɔ lɛ nɔ mi. No hewɔ lɛ Noa bafee Yehowa Odasefonyo kɛ bulɔ ni ekaaa. Eweku ni amɛyibɔ ji kpawo lɛ fata Noa he yɛ enitsumɔ akɛ bulɔ lɛ mli. Hebribii 11:1-7 kɛɔ wɔ akɛ aye Noa he odase akɛ Nyɔŋmɔ na ehe tsui. Eji Yehowa Nyɔŋmɔ Odasefonyo ni ekpɛlɛ enɔ. Eji “jalɛ shiɛlɔ.” (2 Pet. 2:5) Ŋmɛnɛ “Nyɔŋmɔ nifeemɔ” ko ka wɔhiɛ tamɔ nɔ ko ni ba jeŋ muu fɛɛ tamɔ Noa gbii lɛ amli nu afua lɛ. Namɛi ji mɛi ni saji ni aŋmala ashwie shi lɛ tsɔɔ akɛ akɛ amɛ tsuɔ nii koni amɛbɔ jeŋ muu lɛ fɛɛ kɔkɔ? Kristofoi ni amɛtu amɛhe amɛha, mɛi ni ale amɛ yɛ he fɛɛ he akɛ “Yehowa Odasefoi.” No hewɔ lɛ Yehowa tao lɛ nɔ tse kɛbashi bianɛ. Efɔko ŋwɛi kɔkɔ ni etsɔɔ edasefoi akpekpei anɔ ebɔɔ lɛ!
3 No hewɔ lɛ adesa wala ni baalaaje yɛ jeŋ muu fɛɛ yɛ nibii agbɛjianɔtoo nɛɛ naagbee ni baa lɛ ebafeŋ sɔ ni ka Yehowa nɔ. Ebaaka mɛi fɛɛ ni tsuuu ŋwɛi kɔkɔbɔɔ lɛ he nii lɛ ayiteŋ. Kristendom diɛŋtsɛ booo kɔkɔ ni Yehowa Odasefoi lɛ bɔ lɛ toi. Eji eyafata Yehowa Odasefoi lɛ ahe ni amɛbɔ kɔkɔ ni Nyɔŋmɔ kɛha lɛ kulɛ, mɛni? Mɛɛ sɔrɔtofeemɔ kpele enɛ baaji yɛ adesai asaji amli!
Bulɔ Kɛha Blema Israel
4. (a) Namɔ Yehowa tee lɛ shi koni ebafee gbalɔ eha lɛ diɛŋtsɛ ewebii ni ji Israel, ni nɛkɛ gbalɔ nɛɛ fee namɛi ahe mfoniri? (b) Mɛɛ nitsumɔ akɛwo Ezekiel dɛŋ?
4 Yɛ ehewalɛ ni yɔɔ krɔŋkrɔŋ lɛ hewɔ lɛ Yehowa le momo akɛ ehe baahia ni abɔ Kristendom kɔkɔ yɛ naagbee kwraa. Ele nɔ ni ewebii ni ehala amɛ dani Kristofoi abe lɛ shɛ lɛ yinɔsane tsɔɔ, aloo efeɔ he mfoniri. Etee Yudanyo ko ni atsɛɔ lɛ Ezekiel shi yɛ afi 613 D.ŊB. koni ebafee gbalɔ eha lɛ diɛŋtsɛ ewebii lɛ. No hewɔ lɛ eyɛ mli akɛ atswa enaneshishi tu kɛtee Babilon moŋ, shi kɛlɛ Ezekiel ji Yehowa bulɔ kɛha Israel. Akɛ egbalɛi lɛ tee wuoyi-anaigbɛ kɛtee Yerusalem yɛ Yuda shikpɔŋ lɛ nɔ. Wɔyɛ nɔ ni Yehowa kɛɛ Ezekiel yɛ nakai blema bei lɛ amli lɛ he miishɛɛ ŋmɛnɛ, ejaakɛ efee Yehowa Odasefoi ni afɔ amɛ mu lɛ he mfoniri ŋmɛnɛ. Nɛkɛ kuu ni afɔ amɛ mu nɛɛ etsu nɔ ni Yehowa kɛɛ Ezekiel yɛ nɛkɛ wiemɔi nɛɛ amli lɛ he nii: “Gbɔmɔbi, mitoo bulɔ miha Israel we lɛ, no hewɔ lɛ bo midaaŋ wiemɔ lɛ toi, ni obɔ amɛ kɔkɔ oha mi. Kɛ mikɛɛ efɔŋfeelɔ akɛ: Gbo ooogbo! Ni obɔɔɔ lɛ kɔkɔ ni osaa owieee otsɔɔɔ efɔŋfeelɔ lɛ ni eje egbɛ fɔŋ lɛ nɔ ni okɛhere eyiwala lɛ, nakai efɔŋfeelɔ lɛ aaagbo yɛ enishaianii lɛ hewɔ; shi ela lɛ, odɛŋ mabi shi kɛaajɛ.”—Ezek. 8:17, 18.
5, 6. (a) Mɛɛ be mli Ezekiel hi lɛ? (b) Mɛni hewɔ anyɛŋ afolɔ Nyɔŋmɔ naa akɛ ekɛ nitsumɔ ni wa ha Ezekiel?
5 Mɛni hewɔ Yehowa kɛ hiɛdɔɔ wie nɛkɛ etsɔɔ Yudanyo Ezekiel nɛɛ? Ejaakɛ yɛ nakai afi ni ji 613 D.Ŋ.B. lɛ mli lɛ, Ezekiel yɛ Yuda maŋtsɛyeli ni abu ekɛ emaŋtiase Yerusalem fɔ lɛ naagbee gbii lɛ amli. Ewebii ni yɔɔ nakai maŋtsɛyeli lɛ mli lɛ kɛ Yehowa fee maŋ kpaŋmɔ kɛtsɔ E-teŋdamɔlɔ, ni ji gbalɔ Mose nɔ, no hewɔ lɛ ákɛ nakai maŋ lɛ mlinyo lɛ, Ezekiel yɛ naanɔ gbɛnaanii shishi kɛha Yehowa. Eji osɔfo ni kulɛ esa akɛ eesɔmɔ yɛ esɔlemɔ we lɛ ni yɔɔ Yerusalem lɛ mli. No hewɔ lɛ ehiɛ Nyɔŋmɔ nyɔmɔ ko. No hewɔ lɛ anyɛŋ afolɔ Nyɔŋmɔ naa akɛ ekɛ nitsumɔ ko ni wa miifɔ Ezekiel ni afɔ lɛ yɛ maŋ kpaŋmɔ lɛ shishi, kɛ agbɛnɛ yɛ Aaron osɔfoyeli lɛ ni no mli lɛ osɔfonukpa Seraia ji amɛhiɛnyiɛlɔ lɛ shishi lɛ nɔ.—2 Maŋts. 25:18.
6 Ezekiel webii lɛ ji mɛi ni Yehowa tsɔ egbalɔ Yesaia nɔ ekɛɛ amɛ yɛ mra be mli akɛ: “Yehowa kɛɛ, nyɛji midasefoi, kɛ mitsulɔ ni mihala.” (Yes. 48:10-12) No hewɔ lɛ Ezekiel fee Yehowa Odasefoi ni ekɛ emumɔ efɔ amɛ mu lɛ kuu ni yɔɔ ŋmɛnɛŋmɛnɛ be mli, mumɔŋ Israelbii lɛ he mfoniri. Nɛkɛ Odasefoi ni afɔ amɛ mu nɛɛ yɛ be ko ni tsɔɔ nɔ ko pɔtɛɛ mli fe Ezekiel be lɛ.
7. (a) Mɛɛ nɔyeli ka oshara mli yɛ Ezekiel gbii lɛ amli, ni ŋmɛnɛ hu? (b) Be enyiɛ Ezekiel kɛbɔ kɔkɔ lɛ dani hiɛkpatamɔ ni agba he sane afɔ shi lɛ ba?
7 Yɛ blema be lɛ mli lɛ, eji nɔyeli kome, Yuda maŋtsɛyeli lɛ ni yɔɔ oshara mli. Ŋmɛnɛ lɛ eji nɔ ni nakai blema maŋtsɛyeli lɛ fee he mfoniri, ni ji Kristendom, yɔɔ oshara mli, kɛ mɛi ni kɛ amɛhe ebɔ ehe yɛ je lɛ mli lɛ fɛɛ. Yɛ anɔkwale mli lɛ, aakojo nibii agbɛjianɔtoo ni yɔɔ jeŋ muu lɛ fɛɛ lɛ, taakɛ bɔni yɛ Noa gbii lɛ amli lɛ je lɛ ji nɔ ni akpata hiɛ lɛ. Nyɔŋmɔ kɔkɔbɔɔ ni Ezekiel kɛbaaha lɛ he miihia waa, ejaakɛ Ezekiel je kɔkɔbɔɔ lɛ shishi afii ejwɛ pɛ kɛkɛ ni Babilon asraafoi lɛ yatutua emaŋ lɛ, aloo afi ekpaa sɛɛ dani amɛkpata Yerusalem kɛ esɔlemɔwe lɛ hiɛ. Yerusalem ni asraafoi egba ebɔle lɛ lɛ mlibii lɛ ateŋ mɛi babaoo gboi yɛ hɔmɔ, tsɛŋemɔhela kɛ agbɛnɛ yɛ tawuu klante naa. Aloo mɛi ni je mli lɛ ateŋ mɛi pii kɛtee nom mli yɛ shɔŋŋ shikpɔŋ nɔ yɛ Babilon. No hewɔ lɛ Ezekiel diɛŋtsɛ yinɔ lɛ yɛ oshara ni baa lɛ mli.
8. (a) Mɛɛ hiɛkpatamɔ ni baa yɛ klɛŋklɛŋ afi oha lɛ mli yeɔ ebuaa wɔ beni afee ni wɔle be mli ni jeŋ hiɛkpatamɔ ni Nyɔŋmɔ kɛbaaba lɛ baaba? (b) Namɛi kɛ Nyɔŋmɔ kɔkɔbɔɔ Iɛ ha yɛ nakai be lɛ mli ni te amɛ kɔkɔbɔɔ nitsumɔ Iɛ he hiaa ha tɛɛŋ?
8 Bɔni be ni ŋmɛnɛ wɔyɔɔ lɛ ji kukuoo ko kɛkɛ ha lɛ, wɔbaanyɛ wɔtsɔ nɔ ni yaa nɔ yɛ shikpɔŋ nɔ taakɛ Biblia gbalɛ tsɔɔ lɛ nɔ wɔyoo enɛ. Yesu tsɔ egbalɛ ni aŋma yɛ Mateo, yitso 24 kɛ 25 lɛ nɔ ebɔ ekaselɔi lɛ ni baafee “tsulɔ anɔkwafo kɛ nilelɔ” kuu lɛ klɛŋklɛŋ fã lɛ kɔkɔ yɛ hiɛkpatamɔ ni baaba Yerusalem nɔ yɛ amɛ diɛŋtsɛ amɛyinɔ lɛ mli lɛ he. Etsɔ nɛkɛ gbɛ nɛɛ nɔ eha ekaselɔi lɛ bale gbɛnaa nii ni ka amɛnɔ yɛ Yudafoi ni yɔɔ Yudea niiaŋ fɛɛ lɛ ahe. Amɛyɛ oshara kpeteŋkpele mli yɛ maŋ amanehulu ni baa lɛ hewɔ. Kɛji akɛ yɛ nakai jaramɔ be nɛɛ mli lɛ Kristofoi ni feɔ “tsulɔ” kuu lɛ ni yɔɔ jɛmɛ lɛ ebɔɔɔ Yudafoi lɛ kɔkɔ koni amɛje kpo kɛjɛ heni oshara yɔɔ nɛɛ mli eya bɔni amɛaanyɛ lɛ, belɛ Yudafoi ni abɔɔɔ amɛ kɔkɔ lɛ awala kɛ heyeli ni baalaaje lɛ he sɔ baaka amɛnɔ.
9. Mɛɛ gbɛ nɔ Ezekiel ji nɔkwɛmɔ nɔ kpakpa kɛha Nyɔŋmɔ tsulɔ ni afɔ lɛ mu ni yɔɔ ŋmɛnɛ lɛ?
9 Mɛni, kɛji akɛ Ezekiel ni hi shi yɛ jeeŋmɔ lɛ tsuuu nitsumɔ ni akɛfɔ enɔ akɛ ejɛ heni eyɔɔ shɔŋŋ lɛ ebɔ emaŋbii ni yɔɔ oshara mli lɛ kɔkɔ lɛ he nii hu? Kulɛ ejeŋ Yerusalem hiɛkpatamɔ yɛ afi 607 D.Ŋ.B. lɛ mli, ejaakɛ Yehowa kɛ amɛ la yi sɔ baafɔ enɔ. Ákɛ Ezekiel kɛ anɔkwayeli tsu nitsumɔ ni ajɛ ŋwɛi akɛfɔ enɔ nɛɛ he nii bei abɔ ni enyɛɔ ekɛ nakai Yerusalem ni abu lɛ fɔ lɛ wieɔ lɛ he odaseyeli lɛ ka shi faŋŋ, ejaakɛ Yehowa ŋmɛ lɛ gbɛ koni eya nɔ ehi shi. Eŋɔɔ Yehowa naa akɛ ekɛ lɛ aaatsu nii ni ekɛ gbalɛ ko aha yɛ enomŋɔɔ yɛ Babilon lɛ nɔ afi ni ji 27 lɛ nɔ. Enɛ ji Yerusalem hiɛkpatamɔ kpeteŋkpele ni afɔse lá babaoo ashwie shi yɛ afi 607 D.Ŋ.B. lɛ sɛɛ afii 16. (Ezek. 29:17; 40:1) Ebafee nɔkwɛmɔ nɔ fɛfɛo ni nɔ bɛ kɛha “tsulɔ” kuu ni afɔ amɛ mu lɛ yɛ wɔ jaramɔ be nɛɛ mli. Lɛlɛŋ, kɛji akɛ aŋkroaŋkroi ni feɔ “tsulɔ” kuu lɛ gbala amɛhe shi kɛjɛ kɔkɔ ni amɛaabɔ efɔŋ feelɔi lɛ he lɛ, nɛkɛ aŋkroaŋkroi nɛɛ baabu amɛhe akɔntaa amɛha Yehowa. Shi titri lɛ, “tsulɔ” kuu lɛ baajie amɛhe kpo akɛ amɛtamɔ Ezekiel. Anyɛŋ akɛ lá yi sɔ ko afɔ amɛnɔ.
10. (a) Te bulɔ lɛ gbɛhe he hiaa ha tɛɛŋ? (b) Mɛɛ gbɛ nɔ Nyɔŋmɔ tsɔɔ yɛ akɛ esusuɔ mɛi ni ehia amɛ kɛ ebulɔ lɛ fɛɛ he?
10 Eka shi faŋŋ akɛ gbɛhe ni bulɔ yɔɔ mli lɛ ji gbɛhe ko ni tsii waa. Yɛ tawuu be mli lɛ kɛji akɛ asraafonyo ko wɔ yɛ ebuuhe lɛ agbeɔ lɛ, ejaakɛ ekɛ mɛi fɛɛ ni eshwɛ lɛ awala wo oshara mli, kɛ agbɛnɛ amɛnɔ kunim hu ni abaaye (Koj. 7:19) No hewɔ lɛ jeee mɛi ni ehia akɛ abɔ amɛ kɔkɔ lɛ pɛ awala he Nyɔŋmɔ susuɔ, shi moŋ bulɔ lɛ wala hu he. Ana enɛ yɛ ewiemɔi krokomɛi ni ekɛha Ezekiel lɛ mli: “Shi kɛji obɔ efɔŋfeelɔ lɛ kɔkɔ, ni ekpaleee kɛjɛɛɛ enɔfɔŋfeemɔ lɛ mli kɛ egbɛ fɔŋ lɛ nɔ lɛ, eeegbo yɛ enishaianii lɛ hewɔ, shi bo lɛ ohere osusuma yiwala. Ni asaŋ kɛji jalɔ kpale kɛjɛ ejalɛ lɛ mli ni efee nii ni ejaaa lɛ, ekɛ pampi aaato ehiɛ ni eeegbo; kɛji obɔɔɔ lɛ kɔkɔ lɛ, eeegbo yɛ ehe esha lɛ hewɔ, ni akaiŋ ejalɛ nii ni efee lɛ; shi elá lɛ, odɛŋ mabi shi kɛaajɛ. Shi kɛji akɛ obɔ jalɔ lɛ kɔkɔ, beni afee ni jalɔ lɛ akafee esha, ni efeee esha lɛ, no lɛ eyi aaana wala, ejaakɛ ekpɛlɛ kɔkɔbɔɔ; ni bo hu ojie osusuma.”—Ezek. 3:19-21; 33:2-9.
11. “Tsulɔ anɔkwafo kɛ nilelɔ” lɛ nitsumɔ lɛ tamɔ bulɔ nɔ yɛ mɛɛ gbɛ nɔ?
11 Lala 127:1 kɛɔ akɛ: “Kɛ jeee Yehowa buɔ maŋ lɛ he lɛ, no lɛ yakatswaa bulɔ lɛ shiɔ he kpe.” Shi kɛlɛ, bulɔ ni akɛ lɛ eto buuhe yɛ maŋtiase ko gbogboi anɔ lɛ ji mɔ ko ni akɛ gbɔmɛi ni yɔɔ mli lɛ awala ewo edɛŋ. Gbɛnaa nii ka enɔ akɛ ebɔ emlibii lɛ kɔkɔ yɛ oshara fɛɛ oshara ni aaaba amɛwala kɛ amɛnibii anɔ lɛ he. Belɛ eji nɔ ni ja gbɛ akɛ ebasumɔŋ ni akɛ amɛ lá yi sɔ aaafɔ enɔ. Akɛni eshiɔ kpe ni ebuɔ hewɔ lɛ abaajie eyi yɛ adesai susumai krokomɛi awala ni ebaa yi lɛ hewɔ. Nɛkɛ shihilɛ nɛɛ mli “tsulɔ anɔkwafo kɛ nilelɔ” kuu lɛ yɔɔ yɛ nɛkɛ be nɛɛ mli yɛ be mli ni nibii agbɛjianɔtoo momo nɛɛ miihe aba naagbee lɛ. Yehowa ehala “tsulɔ” kuu lɛ akɛ ‘ebulɔ’ koni ekwɛ mɛi fɛɛ ni kɛɔ akɛ amɛji E-webii lɛ anaanɔ nibii ni he hiaa amɛ lɛ anɔ, tamɔ Ezekiel.
Kɔkɔbɔɔi Ni Jɛ Ŋmɛnɛŋmɛnɛŋ Beaŋ Bulɔ Lɛ Ŋɔɔ
12, 13. (a) Mɛni ji nɔ ni Nyɔŋmɔ taoɔ akɛ ena yɛ kɔkɔbɔɔ ni ehaa ajajea lɛ nɔ heremɔ mli? (b) Kɔkɔ ni abɔɔ Iɛ haa anyɛɔ afeɔ mɛni, shi mɛi ni booo toi lɛ hu?
12 Shi kɛlɛ, ani mɛi pɛ ni kɛɔ akɛ amɛji Kristofoi lɛ ji mɛi ni nibii agbɛjianɔtoo nɛɛ naagbee ni kɛ hiɛkpatamɔ baa lɛ ka amɛnɔ? Dabi, eka jamɔi sɔrɔtoi fɛɛ nɔ, kɛ mɛi ni kpooɔ akɛ amɛkɛ amɛhe aaabɔ jamɔ gbɛjianɔtooi lɛ ahe lɛ hu nɔ. Shikpɔŋ lɛ Bɔlɔ, Yehowa Nyɔŋmɔ le enɛ. Ebasumɔŋ ni eeekpata adesai aje lɛ hiɛ. Esuɔmɔnaa nii titri ji ni ahere amɛteŋ mɛi ni fa yiwala kɛjɛ naanɔ hiɛkpatamɔ lɛ mli ni amɛtsɔmɔ mɛi ni sa akɛ amɛnaa wala yɛ ejalɛ nibii agbɛjianɔtoo hee lɛ mli. Yɛ enɛ hewɔ lɛ eha abɔ ekɔkɔ lɛ kɛtee shɔŋŋ.
13 Emɔbɔnalɛ naa lɛ, eha “tsulɔ” kuu lɛ ni Ezekiel fee amɛhe mfoniri lɛ le. No hewɔ lɛ efee nɛkɛ kuu nɛɛ akɛ “bulɔ” kuu ni gbɔmɛi pii yɔɔ mli. Nɛkɛ “bulɔ” kuu nɛɛ ji mɛi ni akɛ ŋwɛi kɔkɔbɔɔ nɛɛ he gbɛnaa nii efɔ amɛnɔ. Akɛni amɛmiibɔ kɔkɔ yɛ ebe naa pɛpɛɛpɛ hewɔ lɛ, aaye aabua gbɔmɛi babaoo koni amɛnu ni amɛtsu nɔ ni amɛnuɔ lɛ he nii kɛ hiɛnɔkamɔ akɛ aaabaa amɛyi kɛtsɔ jeŋ momo nɛɛ naagbee be lɛ mli. Yɛ mɛi ni kpooɔ akɛ amɛaabo kɔkɔbɔɔ ni jɛ Nyɔŋmɔ ŋɔɔ nɛɛ toi lɛ, amɛlá aaabua amɛ diɛŋtsɛ amɛyiteŋ.
14, 15. (a) Namɛi ebɔ mɔdɛŋ akɛ amɛaaha akpa kɔkɔ ni abɔɔ lɛ shi efee efolo lɛ, shi namɛi ebo toi ni amɛtsu he nii Iɛ? (b) Kɛji akɛ “Nyɔŋmɔ duromɔ” be lɛ ba naagbee lɛ, mɛni ji nɔ ni no baatsɔɔ?
14 Ale Yehowa “bulɔ” kuu lɛ yɛ jeŋ fɛɛ. Amɛhenyɛlɔi lɛ baasumɔ ni amɛkpa amɛkɔkɔbɔɔ lɛ. Amɛbuɔ kɔkɔbɔɔ nɛɛ akɛ maŋjwaa nɔ̃ kɛha amɛ nibii agbɛjianɔtoo lɛ. Shi fɛɛ efee efolo! Aha kɔkɔbɔɔ lɛ ebote amɛtoiiaŋ, titri lɛ kɛjɛ 1919, afi nɔ ni je lɛ je shishi akɛ eetsa pilamɔ ni Jeŋ Ta l kɛba enɔ lɛ. Yesaia 61:2 tsɛɔ nakai be kpalaŋŋ ni je shishi yɛ nakai be lɛ mli lɛ akɛ “Yehowa duromɔ afi.” Enɛ tsɔɔ akɛ afɔseko emlifu lɛ ashwieko nibii agbɛjianɔtoo ni teɔ shi woɔ Nyɔŋmɔ lɛ nɔ. Enɛ etsu mɛɛ yiŋtoo he nii? Eha atsu Yesu gbalɛ lɛ he nii kɛbashi bianɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ni akɛye jeŋmaji lɛ fɛɛ odase; no dani naagbee lɛ aaaba.” (Mat. 24:14) Nɔ ni ejɛ enɛ mli eba ji akɛ mɛi pii ni ji shwɛɛnii aloo nakai maŋtsɛyeli lɛ yelɔi lɛ ebo Maŋtsɛyeli lɛ he sane lɛ toi. No hewɔ lɛ amɛtsu hegbɛ ni “Yehowa duromɔ afi” lɛ kɛhaa lɛ he nii. Amɛbafee ‘bulɔ” kuu lɛ fa. Amɛyafata ŋwɛi kɔkɔbɔɔ lɛ jajemɔ he.
15 Okadi “afi” ni akɛha “Yehowa duromɔ” lɛ ji be ko ni aje husu awo he. Nibii ni yɔɔ ŋmɛnɛŋmɛnɛ lɛ fɛɛ tsɔɔ akɛ eehe eba naagbee. Enaagbee lɛ efeŋ “Miishɛɛ Afi Hee!” shi moŋ tsakemɔ be kɛmiijɛ Yehowa “duromɔ” lɛ nɔ kɛmiiya emlifu lɛ mli. No tsɔɔ “Nyɔŋmɔ oweletɔɔ gbi” lɛ shishijee (Yes. 61:1, 2) Ebaafee duŋ kpii be fe fɛɛ ni adesai aje lɛ ena.
16. Kɔkɔ ni “bulɔ” kuu lɛ bɔɔ lɛ tsuɔ mɛni?
16 Enɛ haa efeɔ nɔ ko ni he hiaa akɛ “bulɔ” kuu lɛ ajaje kɔkɔbɔɔ lɛ akɛ Yehowa duromɔ “afi” lɛ miihe aba naagbee ni Nyɔŋmɔ “oweletɔɔ gbi” lɛ miihe aje shishi. Toiboo ni amɛkɛ aaabɔ ŋwɛi kɔkɔ nɛɛ hereŋ nibii agbɛjianɔtoo momo nɛɛ ni atara mli tamɔ asaasaa nɛɛ kɛ esɛɛfilɔi ni amɛtu amɛhe amɛha lɛ lɛ kɛjɛŋ hiɛkpatamɔ ni baa yɛ “amanehulu kpeteŋkpele” lɛ mli lɛ mli. Shi nɛkɛ anɔkwasane nɛɛ haaa “bulɔ” kuu lɛ nijiaŋ aje wui. Ama nɔ mi aha amɛ akɛ kɛji akɛ amɛkpɛlɛ gbɔmɛi fɔji kɛjɛ amɛgbɛi fɔji lɛ anɔ kɛba jalɛ gbɛi anɔ lɛ abaahere amɛ kɛjɛ hiɛkpatamɔ ni akɛ aaba jeŋ momo nɛɛ nɔ lɛ mli. No hewɔ lɛ abaabaa “bulɔ” kuu lɛ yi kɛjɛ lá yi sɔ ni eeeye lɛ mli yɛ mɛi ni abɔ amɛ amɛ nifɔjianii lɛ ahe kɔkɔ lɛ gbɛfaŋ. “Bulɔ” kuu lɛ hu ena nɔmimaa akɛ kɛji akɛ amɛtee nɔ kɛ hekamɔ amɛbɔ kɔkɔ lɛ, amɛbaaye amɛbua jalɔi pii koni amɛkabote efɔŋfeemɔ mli ni amɛkɛ amɛhe akawo yiwalɛ je nɛɛ mli ni amɛkɛ lɛ hiɛ akakpata yɛ “amanehulu kpeteŋkpele” lɛ. mli. Enɛ ji nɔ ko ni ŋɔɔ “bulɔ” kuu lɛ naa waa. Amɛtsɔɔmɔ lɛ efeŋ efolo!
17. (a) Mɛɛ nyɔmɔwoo ji nɔ ni “bulɔ” kuu lɛ nine eshɛ nɔ? (b) Namɛi ebafata kɔkɔ ni amɛbɔɔ lɛ he?
17 Etɔko “bulɔ” kuu lɛ yɛ egbee ni ewo nɔ waa ni ekɛbɔ “wɔ-Nyɔŋmɔ lɛ oweletɔɔ gbi” lɛ he kɔkɔ lɛ mli. Ni ebako egbee shi hu, ni etswa efai shi akɛ efeŋ nakai. Yɛ nyɔmɔwoo mli lɛ, mɛni yɔɔ fɛo nɛkɛ ni anaa ni woɔ Nyɔŋmɔ hiɛ nyam nɛɛ! “Asafo babaoo” ni anyɛɛɛ akane amɛ ni amɛbo kɔkɔbɔɔ lɛ toi lɛ eholeholei amɛhe nɔ yɛ “bulɔ” kuu lɛ hiɛ. (Kpoj. 7:9) Agbele nakai “asafo babaoo” lɛ ahiŋmɛii ni amɛna Yehowa blafo nukpa lɛ “klante” ni miihe atswia yiwalɔi ni teɔ shi woɔ e-Mesia maŋtsɛyeli lɛ nii lɛ. Beni eshwɛ afii ejwɛ dani Jeŋ Ta ll aaafɛ lɛ mli “asafo babaoo nɛɛ je shishi amɛjie amɛhe kpo ni amɛkɛ amɛhe yakpɛtɛ “bulɔ” kuu lɛ he. Yɛ emɔbɔnalɛ naa lɛ Jeŋ Ta II kɛ “wɔ-Nyɔŋmɔ lɛ oweletɔɔ gbi” lɛ baaa. Ni nakai nɔŋŋ hu Jeŋ Ta II kɛ esɛɛ nibii ni nyiɛ sɛɛ ba lɛ etsiii asafo babaoo” nɛɛ ni amɛhoɔ yuu ni amɛkɛ amɛhe yafataa “bulɔ” kuu lɛ he yɛ yiwaa ni ba amɛnɔ yɛ jeŋ muu lɛ fɛɛ mli lɛ naa ni ebaaa bɔni amɛhoɔ kɛyaa amɛmasɛi lɛ hu shi. Gbɛnaa nii ebaka amɛnɔ akɛ amɛkɛ amɛhe abɔ “bulɔ” kuu lɛ he ni amɛjaje ŋwɛi kɔkɔbɔɔ lɛ ekaa naa ni gbeyeishemɔ bɛ mli. Amɛtsiko amɛhe kɛjɛko nɛkɛ gbɛnaa nii nɛɛ he. Yɛ nɛkɛ gbɛ nɔ lɛ, belɛ jeee akɛ amɛmiisumɔ ni amɛjie toiboo ni amɛfeɔ yɛ suɔmɔ mli amɛhaa Yehowa Nyɔŋmɔ lɛ pɛ kɛkɛ kpo, shi moŋ ni amɛtsɔɔ suɔmɔ ni amɛyɔɔ kɛha amɛkuuŋbii, amɛnaanyo gbɔmɔ.
18, 19. (a) Mɛɛ nitsumɔ ehe ehia waa akɛ akɛ he awo mli. koni ekɛ wiemɔi yɔɔ Yesaia 52:8 akpa gbeei (b) Mɛni ji nɔ ni esa akɛ no akanya wɔ ni wɔkɛ wɔho awo ŋwɛi kɔkɔbɔɔ lɛ Jajemɔ mli?
18 Yɛ be ni ekpe sɛɛ nɛɛ mli, yɛ Kristendom kɛ nibii agbɛjianɔtoo ni abu lɛ fɔ nɛɛ naagbee gbii nɛɛ amli lɛ, ehe miihia waa ni afee ekome akɛtsu nii. Jeeŋmɔ beebe ni gbalɔ Ezekiel kɛ gbalɔ Yeremia ni hi shi yɛ ebe lɛ mli kɛ gbeei kome bɔ amɛmaŋbii sɛɛsɛɛyalɔi lɛ kɔkɔ yɛ “oweletɔɔ gbi” ni miihe afɛ ashwie amɛnɔ lɛ, he, tsɛbelɛ shitooi ohai babaoo kamɔ amɛteŋ Amrɔ nɛɛ, yɛ wɔ afii oha nɛɛ mli lɛ, kɛjɛ be mli ni Jeŋ Ta I ba naagbee nɛɛ, wiemɔi ni yɔɔ Yesaia 52:8 lɛ ebakɔ Yehowa webii ni amɛjɔɔ amɛhe nɔ lɛ ahe: “Obulɔi Iɛ agbee nɛ: amɛfɛɛ tswɛm amɛaahole amɛgbeei anɔ amɛaala; ejaakɛ hiɛ kɛ hiɛ amɛaana bɔni Yehowa aaakpale Zion kɛaaba ekoŋŋ lɛ.” Mɛi fɛɛ ni abua amɛnaa ekoŋŋ yɛ ‘ŋwɛi Zion’ lɛ shishi lɛ tsɛɔ Biblia mli gbalɛ ni baa mli lɛ nɔ amɛna nakai ninaa lɛ nɔŋŋ; amɛfɛɛ amɛna Yehowa nine ni miitsu nii kɛmiiha amɛ. Amɛkɛ gbee kome wie tsɔɔ je lɛ. Ŋmɛnɛ, yɛ nɔ ni fe afii 60 sɛɛ lɛ, esa akɛ amɛya nɔ yɛ amɛ odase ni amɛfeɔ ekome amɛyeɔ Iɛ mli, ni nɔ ni fata he ŋmɛnɛ ji kɔkɔbɔɔ ni he hiaa waa ni kɔɔ Yehowa “oweletɔɔ gbi” lɛ he lɛ. Esa akɛ “asafo babaoo” ni jɛ jeŋmaji fɛɛ mli kɛ wiemɔi babaoo mli lɛ kɛ amɛgbee hu afata “bulɔ” lɛ nɔ̃ lɛ he.
19 Belɛ nyɛyaa nyɛhiɛ yɛ ekomefeemɔ mli kɛ “wɔ-Nyɔŋmɔ lɛ oweletɔɔ gbi” lɛ he kɔkɔbɔɔ lɛ mli! Nyɛhaa wɔyea wɔhe kɛjɛa lá yi sɔyeli he ejaakɛ wɔmiisumɔ ni abaa wɔyi yɛ “oweletɔɔ gbi” lɛ mli. Wɔkuuŋbii babaoo baasumɔ ni amɛna nakai yiwalaheremɔ lɛ nɔŋŋ eko. Eba akɛ wɔsuɔmɔ kpele ni wɔyɔɔ kɛha Yehowa kɛ Kristo kɛ adesai asuɔmɔ ni wɔyɔɔ kɛha wɔkuuŋbii kɛ wɔnaanyo gbɔmɔ lɛ baatsirɛ wɔ ni wɔya wɔhiɛ ni nɔ ko nɔ ko nyɛɛɛ atsi wɔ gbɛ ni wɔkajaje kɔkɔbɔɔ ni hereɔ yiwala nɛɛ. Miishɛɛ babaoo ji nɔ ni baafee wɔ nɔ̃! Ni nɔ ni fe fɛɛ lɛ, abaabu Yehowa bem akɛ ekɛ suɔmɔ esusu wɔhe ni ekwɛ wɔ nɔ!a
[Shishigbɛ niŋmai]
a Ajie kɛjɛ February 1, 1981 Blɔfo Buu-Mɔɔ lɛ mli.
[Mfoniri ni yɔɔ baafa 13]
Taakɛ Ezekiel bɔ kɔkɔ lɛ, Babilonia asraafoi lɛ kpata Yerusalem hiɛ ni amɛloo mɛi ni je mli lɛ ateŋ mɛi babaoo kɛtee nom mli