Anɔkwa Bɔfo lɛ Yɔsemɔ

“[Mi ji] . . . mɔ ni mãa etsulɔ wiemɔ nɔ mi, ni ehãa ebɔfoi agbalɛ baa mli.”—YESAIA 44:25, 26.

 1. Mɛɛ gbɛ nɔ Yehowa tsɔɔ ehaa ayɔseɔ anɔkwa bɔfoi lɛ, ni mɛɛ gbɛ nɔ ekpaa amale bɔfoi lɛ ahe mama yɛ?

YEHOWA NYƆŊMƆ ji enɔkwa bɔfoi lɛ Ayɔselɔ Kpeteŋkpele. Ehaa ayɔseɔ amɛ kɛtsɔɔ shɛɛ wiemɔi ni ekɛhaa kɛtsɔɔ amɛnɔ, ní ehaa ebaa mli anɔkwale lɛ nɔ. Yehowa ji amale bɔfoi ahe Mama Kpalɔ Kpeteŋkpele hu. Mɛɛ gbɛ nɔ ekpaa amɛhe mama yɛ? Ehaa amɛ okadii kɛ gbalɛi lɛ feɔ yaka. Etsɔɔ nɛkɛ gbɛ nɔ etsɔɔ akɛ amɛ diɛŋtsɛ amɛhala amɛhe akɛ gbalɔi, ni amɛ shɛɛ saji lɛ jɛ amɛ diɛŋtsɛ amɛ amale susumɔi amli—hɛɛ, amɛ heloonaa susumɔi ni ji kwashiaiasane lɛ!

 2. Mɛɛ naataamɔ ko ba yɛ bɔfoi ateŋ yɛ Israelbii abeaŋ?

² Yesaia kɛ Ezekiel fɛɛ wie akɛ Yehowa Nyɔŋmɔ bɔfoi ji amɛ. Shi ani ebɔfoi ji amɛ? Nyɛhaa wɔkwɛa. Yesaia gba yɛ Yerusalem kɛjɛ aaafee afi 778 D.Ŋ.B. kɛyashi afi 732 D.Ŋ.B. sɛɛ be ko mli. Aŋɔ Ezekiel nom kɛtee Babilon yɛ afi 617 D.Ŋ.B. Egba etsɔɔ enyɛmimɛi Yudafoi ni yɔɔ jɛmɛ lɛ. Gbalɔi enyɔ lɛ fɛɛ kɛ ekãa tswa adafi akɛ abaakpata Yerusalem hiɛ. Gbalɔi krokomɛi lɛ wie akɛ Nyɔŋmɔ haŋ enɛ aba mli. Namɛi ana faŋŋ akɛ amɛji anɔkwa bɔfoi lɛ?

Yehowa Kpa Amale Gbalɔi lɛ Ahe Mama

3, 4. (a) Mɛɛ shɛɛ saji ni kɛ amɛhe kpaaa gbee akɛyaha Israelbii lɛ yɛ Babilon, ni Yehowa kpa amale bɔfo ko he mama yɛ mɛɛ gbɛ nɔ? (b) Mɛni Yehowa wie akɛ ebaaba amale gbalɔi anɔ?

³ Beni Ezekiel yɔɔ Babilon lɛ, aha ena nɔ ni yaa nɔ yɛ Yerusalem sɔlemɔtsu lɛ mli lɛ he ninaa. Ena hii 25 yɛ ebokagbɛ agbo lɛ naa. Lumɛi enyɔ, ni ji Yaazania kɛ Pelatia fata amɛhe. Te Yehowa na amɛ eha tɛŋŋ? Ezekiel 11:2, 3 haa hetoo akɛ: “Gbɔmɔ bi, mɛnɛɛmɛi ji mɛi ni jwɛŋɔ nishaianii ni amɛwoɔ ŋaa fɔŋ yɛ maŋ nɛɛŋ, ni amɛkɛɔ akɛ: ‘Eshɛko be ni akɛmamɔ̃ɔ tsũi?’ ” Nɛkɛ toiŋjɔlɛ he bɔfoi henɔwolɔi nɛɛ miikɛɛ akɛ, ‘Oshara ko bɛ kɛha Yerusalem. Ejaakɛ, etsɛŋ kwraa ni wɔbaamãmɔ tsũi babaoo yɛ emli!’ No hewɔ lɛ Nyɔŋmɔ kɛɛ Ezekiel akɛ egba eshi nɛkɛ gbalɔi amalelɔi nɛɛ. Ezekiel kɛɔ wɔ nɔ ni ba amɛteŋ mɔ kome nɔ, yɛ yitso 11, kuku 13 lɛ akɛ: “Ni eba mli akɛ, beni migbaa lɛ, Pelatia, Benaia bi lɛ, gbo.” Ekolɛ enɛ ba mli nakai ejaakɛ Pelatia ji lumɔ ni abuɔ lɛ, ni eyɔɔ mɛi anɔ hewalɛ fe fɛɛ, kɛ wɔŋjalɔ kpele fe fɛɛ hu. Egbele trukaa lɛ mã nɔ mi akɛ amale gbalɔ ji lɛ!

⁴ Pelatia hiɛ ni Yehowa kpata lɛ etsĩii amale gbalɔi krokomɛi lɛ anaa ni amɛkamale yɛ Nyɔŋmɔ gbɛi amli. Nɛkɛ shishiulɔi nɛɛ tee nɔ yɛ amɛgbɛ fɔŋ ni amɛkɔ, ni ji nibii ni amɛgbaa ni kɛ Nyɔŋmɔ suɔmɔnaa nii kpaaa gbee nɛɛ mli. No hewɔ lɛ, Yehowa Nyɔŋmɔ kɛɛ Ezekiel akɛ: “Kpoo hã gbalɔi buului lɛ, ni nyiɛɔ amɛ diɛŋtsɛ amɛmumɔ kɛ nii ni amɛnako lɛ asɛɛ lɛ!” Taakɛ Pelatia ji lɛ, amɛbaafee mɛi ni “bɛ dɔŋŋ,” yɛ atuatsemɔ ni amɛkɛna ninaa amɛha Yerusalem, ni “amɛnaa omanye ninaai amɛhaa lɛ, ni omanye ko bɛ lɛ” hewɔ.—Ezekiel 13:3, 15, 16.

5, 6. Yɛ amale bɔfoi lɛ fɛɛ sɛɛ lɛ, abu Yesaia bem akɛ anɔkwa gbalɔ yɛ mɛɛ gbɛ nɔ?

⁵ Yɛ Yesaia gbɛfaŋ lɛ, eshɛɛ saji ni jɛ ŋwɛi, ni kɔɔ Yerusalem he lɛ fɛɛ ba mli anɔkwale. Yɛ afi 607 D.Ŋ.B. latsaa be mli lɛ, Babilonbii lɛ bakpata maŋtiase lɛ hiɛ ni amɛmɔ̃mɔ̃ Yudafoi shwɛɛnii ko kɛku sɛɛ kɛtee Babilon akɛ nomii. (2 Kronika 36:15-21; Ezekiel 22:28; Daniel 9:2) Ani amanehului nɛɛ hã amale gbalɔi lɛ kɛ amɛ naafuu wiemɔi lɛ kpa Nyɔŋmɔ webii lɛ atsuiyeli? Dabi, nakai bɔfoi amalelɔi lɛ tee nɔ lolo!

⁶ Oookɛɛ nɔ ni enɛ faaa lɛ, Israelbii ni aŋɔ amɛ nom lɛ nu Babilon gbalɔi, okɔmfoi, kɛ ŋulamiiaŋkwɛlɔi henɔwolɔi lɛ hu awiemɔi. Shi kɛlɛ, Yehowa hã nɛkɛ amale bɔfoi nɛɛ fɛɛ batsɔmɔ kwashiai ni nijiaŋ eje wui, ni nibii baatsɔ sɛɛsɛɛ kɛha amɛ. Yɛ be ni sa mli lɛ, etsɔɔ akɛ Ezekiel ji enɔkwa bɔfo, taakɛ Yesaia ji lɛ. Yehowa ha wiemɔi ni ewie kɛtsɔ amɛnɔ lɛ fɛɛ ba mli, tamɔ bɔ ni ewo shi lɛ pɛpɛɛpɛ, akɛ: “[Mi] mɔ ni hãa amale gbalɔi akadii feɔ yaka, ni ehãa klamɔi yeɔ sɛkɛ; mɔ ni kuɔ nilelɔi anaa, ni ehaa amɛnilee lɛ tsɔɔ kwashiafeemɔ; mɔ ni mãa etsulɔ wiemɔ nɔ mi, ni ehãa ebɔfoi agbalɛ baa mli.”—Yesaia 44:25, 26.

Babilon kɛ Yerusalem he Shɛɛ Saji ni Yɔɔ Gbeyei

7, 8. Mɛɛ shɛɛ sane ni jɛ mumɔŋ Yesaia yɔɔ kɛha Babilon, ni mɛni ji nɔ ni ewiemɔi lɛ tsɔɔ?

⁷ Yuda kɛ Yerusalem baakãmɔ shi amaŋfɔ diɛŋtsɛ ni gbɔmɔ ko kwraa ehiŋ nɔ afii 70 sɔŋŋ. Shi kɛlɛ, Yehowa jaje kɛtsɔ Yesaia kɛ Ezekiel nɔ akɛ abaasaa maŋtiase lɛ ekoŋŋ, ni abaahi shikpɔŋ lɛ nɔ ekoŋŋ yɛ be pɔtɛɛ ni egba efɔ̃ shi lɛ mli! Gbalɛ ni yɔɔ naakpɛɛ waa nɛ. Mɛni hewɔ? Ejaakɛ ale Babilon jogbaŋŋ akɛ eŋmɛɛɛ egbokɛlɛfoi ahe ni amɛye amɛhe kɔkɔɔkɔ. (Yesaia 14:4, 15-17) No hewɔ lɛ namɔ po baanyɛ akpɔ̃ nɛkɛ nomii nɛɛ? Namɔ po baanyɛ abutu Babilon maŋ ni he wa, ni abuɔ he kɛtsɔɔ gbogboi wuji kɛ faa ni fãa ehe lɛ nɔ lɛ? Yehowa Ofe lɛ baanyɛ! Ni ewie akɛ ebaafee nakai, akɛ: “[Mi ji] . . . mɔ ni kɛɔ bu kwɔŋkwɔŋ [ni ji, faa ni buɔ maŋtiase lɛ he] lɛ akɛ: ‘Omli agbĩ! ni mahã ofaai lɛ hu amii lɛ!’ Mɔ ni kɛɔ yɛ Koresh he akɛ: ‘Mitookwɛlɔ ji lɛ! ni eeeha nii ni sa mihiɛ lɛ fɛɛ aba mli,’ ni eeekɛɛ yɛ Yerusalem he akɛ: ‘Aaamã lɛ!’ kɛ sɔlemɔwe lɛ hu akɛ: ‘Aaato shishi!’ lɛ.”—Yesaia 44:25, 27, 28.

⁸ Susumɔ he okwɛ! Eufrate Faa ni fee gbɛtsii nii kpele kɛha gbɔmɛi lɛ, tamɔ nu kuli ni egbee nɔ ko ni nɔ edɔ waa nɔ, yɛ Yehowa hiɛ! Oya nɔŋŋ, ni gbɛtsii nii lɛ baagbĩ kwraa! Babilon baagbee shi! Eyɛ mli akɛ aaafee afii 150 sɛɛ dani abaafɔ Koresh ni ji Persianyo lɛ moŋ, shi Yehowa ha Yesaia gba Babilon nɔ kunim ni maŋtsɛ nɛɛ baaye lɛ kɛ heyeli ni Yudafoi nomii lɛ baaná kɛtsɔ famɔ ni ekɛaahã akɛ amɛku amɛsɛɛ ni amɛyatswa Yerusalem kɛ esɔlemɔtsu lɛ ekoŋŋ lɛ nɔ lɛ efɔ̃ shi.

 9. Namɔ Yehowa tsĩ etã akɛ enajiaŋdamɔlɔ kɛha Babilon toigbalamɔ?

⁹ Wɔnaa gbalɛ nɛɛ yɛ Yesaia 45:1-3: “Bɔ ni Yehowa kɛɔ mɔ ni efɔ lɛ mu ni ji Koresh lɛ nɛ, mɔ ni mimɔ eninejurɔ mli, koni maba jeŋmaji ashi yɛ ehiɛ, . . . ni magbele shinaai yɛ ehiɛ, ni akaŋmɛ agboi lɛ amli lɛ: ‘Mi nɔŋŋ manyiɛ ohiɛ, ni mahã hei ni yɔɔ dokoidokoi lɛ afee trɛnɛɛ, ni majwara akɔɔble shinaai lɛ, ni mafolɔ amɛsɛɛ adabaŋi lɛ amli, ni mikɛ duŋ mli jwetrii lɛ aaahão, kɛ teemɔhei anii ni jara wa lɛ, koni ona ole akɛ mi ji Yehowa, mɔ ni tsɛo kɛ ogbɛi [lɛ].’ ”

10. ‘Afɔ Koresh mu’ yɛ mɛɛ gbɛ nɔ, ni Yehowa nyɛ ekɛ lɛ wie nɔ ni fe afii oha dani afɔ lɛ yɛ mɛɛ gbɛ nɔ?

¹⁰ Kadimɔ akɛ Yehowa kɛ Koresh wie tamɔ nɔ ni eyɛ wala mli momo. Enɛ kɛ wiemɔ ni Paulo wie akɛ Yehowa “tsɛɔ nibii ni bɛ lɛ tamɔ akɛ amɛyɛ momo” lɛ kpaa gbee. (Romabii 4:17) Agbɛnɛ hu, Nyɔŋmɔ tsɛɔ Koresh akɛ “mɔ ni efɔ lɛ mu.” Mɛni hewɔ ni efee nakai? Kɛ hoo lɛ, Yehowa osɔfonukpa lɛ kɛ mu krɔŋkrɔŋ ni akɛfɔɔ mɔ lɛ eko eshwieee Koresh yiteŋ. Lɛlɛŋ ni, shi gbalɛ mli mufɔɔ nɛ. Etsɔɔ akɛ aahala lɛ aawo gbɛhe krɛdɛɛ ko mli. No hewɔ lɛ Nyɔŋmɔ baanyɛ awie halamɔ ni ahala Koresh kɛtsɔ hiɛ nɛɛ he akɛ mufɔɔ.—Okɛto 1 Maŋtsɛmɛi 19:15-17; 2 Maŋtsɛmɛi 8:13 he.

Nyɔŋmɔ Hã Ebɔfoi lɛ Awiemɔi lɛ Ba Mli

11. Mɛni hewɔ Babilon maŋ lɛ mli bii nu he akɛ amɛyɛ shweshweeshwe lɛ?

¹¹ Beni Koresh fã ta eshi Babilon lɛ, no mli lɛ maŋ lɛ mli bii lɛ susu akɛ oshara ko baŋ amɛnɔ, ni amɛyɛ shweshweeshwe hu. Eufrate Faa lɛ efee nu babaoo ni mli kwɔ ni lɛɛ kɛbɔle amɛ maŋtiase lɛ he fɛɛ kɛkpe. Lɛji adaamɔhe kakadaŋŋ yɛ faa lɛ ni tsɔɔ maŋtiase lɛ mli fɛɛ kɛhoɔ lɛ toi yɛ bokagbɛ. Bɔni afee ni efo ekɛ maŋtiase lɛ teŋ lɛ, Nebukadnezar tswa nɔ ni etsɛ lɛ akɛ “gbogbo kpeteŋkpele ko, ní taakɛ gɔŋ ji lɛ, anyɛɛɛ atsí . . . [Ewó] nɔ, ni enɔ kwɔ tamɔ gɔŋ.”a Nɛkɛ gbogbo nɛɛ yɛ agboi kɛ amɛnaa akɔɔble shinaai wuji. Dani obaabote mli lɛ, ebaabi ni okwɔ kɛjɛ he ni ema enaa shi yɛ faa lɛ naa lɛ dani onyɛ obote maŋ lɛ mli. Ebɛ naakpɛɛ akɛ nomii ni yɔɔ Babilon lɛ anijiaŋ je wui akɛ be ko baashɛ ni amɛbaaye amɛhe!

12, 13. Yɛ mɛɛ gbɛ nɔ Yehowa wiemɔi ni ekɛtsɔ etsulɔ Yesaia nɔ lɛ ba mli anɔkwale beni Babilon gbee shi yɛ Koresh hiɛ lɛ?

¹² Shi jeee nakai Yudafoi nomii ni yɔɔ hemɔkɛyeli yɛ Yehowa mli lɛ ni! Amɛyɛ hiɛnɔkamɔ ni mli wa! Nyɔŋmɔ etsɔ egbalɔi lɛ anɔ egba efɔ̃ shi akɛ ebaakpɔ̃ amɛ. Mɛɛ gbɛ nɔ Nyɔŋmɔ tsɔ eha eshiwoo lɛ ba mli? Koresh fã esraafoi lɛ ni amɛhã Eufrate Faa lɛ atsɔ̃ afã, yɛ kooyigbɛ he ko ni kɛ Babilon jɛkɛmɔ feɔ shitoi abɔ. Enɛ hã maŋtiase lɛ hefãmɔ nɔ kpele fe fɛɛ lɛ batsɔ nujɔɔ gbiŋ kwraa. Nakai gbɛkɛ ni he hiaa waa lɛ, dãatɔlɔi ahoshwibɔlɔi ni yɔɔ Babilon lɛ kɛ anyagbafeemɔ shĩ shinaai ŋtai enyɔ ni yɔɔ Eufrate faa lɛ naa lɛ amɛfɔ̃ ni aŋãaa. Yehowa kumɔɔɔ akɔɔble shinaai lɛ dukuduku diɛŋtsɛ; ni ekumɔɔɔ dade adabaŋi ni akɛlaa mli lɛ hu, shi bɔ ni etsu saji ahe nii yɛ gbɛ ni yɔɔ naakpɛɛ nɔ, ni eha agbele afɔ̃, ni akɛ dadei lɛ elaaa sɛɛ hu lɛ fee tamɔ nakai nɔŋŋ. Babilon gbogboi lɛ ahe baaa sɛɛnamɔ ko. Ehe ebahiaaa ni Koresh asraafoi lɛ akumɔ ashwie shi dani amɛbote maŋ lɛ mli. Yehowa nyiɛ Koresh hiɛ, ni ejie “hei ni yɔɔ dokoidokoi” lɛ, hɛɛ, ejie gbɛtsii nii fɛɛ. Aye Yesaia he odase akɛ Nyɔŋmɔ anɔkwa bɔfo.

¹³ Beni Koresh ye maŋtiase lɛ nɔ kunim kwraa lɛ, emli jwetrii fɛɛ, kɛ nɔ ni akɛto teemɔhei yɛ tsũi ni mli ewo duŋ mli lɛ fɛɛ baje edɛŋ. Mɛni hewɔ Yehowa Nyɔŋmɔ fee enɛ eha Koresh? Bɔni afee ni ená ele akɛ Yehowa, ‘Mɔ ni kɛ egbɛi tsɛɔ lɛ lɛ,’ ji Nyɔŋmɔ ni kɛ anɔkwa gbalɛ hãa, kɛ Jeŋ Muu Fɛɛ Nuntsɔ. Ebaale akɛ Nyɔŋmɔ ji mɔ ni to gbɛjianɔ eha lɛ koni ebaŋɔ nɔyeli hewalɛ lɛ, koni ekpɔ̃ E-webii, Israel.

14, 15. Te wɔfeɔ tɛŋŋ wɔleɔ akɛ esa akɛ akɛ Babilon nɔ kunim ni Koresh ye lɛ he yijiemɔ aha Yehowa?

¹⁴ Bo Yehowa wiemɔi ni ekɛ Koresh wie lɛ toi: “Mitsulɔ Yakob kɛ Israel ni mihala lɛ hewɔ ni mitsɛo kɛ ogbɛi, ni miwoo gbɛi, dani ole mi po. Mi ji Yehowa, ni mɔ ko bɛ dɔŋŋ, misɛɛ lɛ Nyɔŋmɔ ko Nyɔŋmɔ ko bɛ! Mimĩao, dani ole mi po, koni amɛle kɛjɛ hulu shiteehe kɛ anaigbɛ, akɛ misɛɛ lɛ mɔ ko mɔ ko bɛ. Mi ji Yehowa, ni mɔ ko bɛ dɔŋŋ. Mishɔ̃ɔ la, ni mibɔɔ duŋ hu; mi mihaa hejɔlɛ baa [kɛhaa ewebii ni aŋɔ amɛ nom lɛ], ni mibɔɔ efɔŋ [mihaa Babilon]; mi, Yehowa, lɛ nɔŋŋ mifeɔ enɛɛmɛi fɛɛ.”—Yesaia 45:4-7.

¹⁵ Esa akɛ akɛ Babilon nɔ kunim ni Koresh ye lɛ he yijiemɔ ahã Yehowa, ejaakɛ Lɛ ji mɔ ni wo lɛ hewalɛ koni etsu nɔ ni sa E-hiɛ lɛ eshi nakai maŋtiase fɔŋ lɛ, koni eha E-webii ni aŋɔ amɛ nom lɛ aye amɛhe. Yɛ enɛ feemɔ mli lɛ, Nyɔŋmɔ hã eŋwɛi lɛ nɛ jalɛ hewalɛi eshwie shi. Eha eshikpɔŋ lɛ gbele enaa ni ewo jalɛ nifeemɔi kɛ yiwalaheremɔ kɛha ewebii ni aŋɔ amɛ nom lɛ. Ni e-mfoniri-feemɔŋ ŋwɛi kɛ shikpɔŋ lɛ tsu nɛkɛ famɔ nɛɛ he nii. (Yesaia 45:8) Nɔ ni fe afii oha yɛ egbele sɛɛ lɛ, ana faŋŋ akɛ Yesaia ji Yehowa anɔkwa bɔfo lɛlɛŋ!

Sanekpakpa ni Bɔfo lɛ Hiɛ Kɛha Zion!

16. Mɛɛ sanekpakpa abaanyɛ ajaje yɛ Yerusalem maŋtiase ni etsɔ amaŋfɔ lɛ mli beni Babilon gbee shi yɛ enɔ kunimyeli mli lɛ?

¹⁶ Shi babaoo yɛ lolo. Yesaia 52:7 wieɔ sanekpakpa he kɛha Yerusalem: “Kwɛ bɔ ni sanekpakpa jajelɔi ni shiɛɔ hejɔlɛ lɛ, sanekpakpa jajelɔi ni shiɛɔ yiwalaheremɔ lɛ naji yɔɔ fɛo yɛ gɔji lɛ anɔ, mɔ ni kɛɔ Zion akɛ: ‘O-Nyɔŋmɔ lɛ yeɔ maŋtsɛ lɛ!’ ” Kwɛ bɔ ni eeefee miishɛɛ waa akɛ aaana bɔfo, ni miibɛŋkɛ Yerusalem kɛjɛ gɔji lɛ anɔ! Ehiɛ adafitswaa. Mɛɛ adafitswaa? Eji adafitswaa ni yɔɔ miishɛɛ kɛha Zion. Eji toiŋjɔlɛ he adafitswaa, Nyɔŋmɔ duromɔ he adafitswaa. Abaasaa amã Yerusalem kɛ esɔlemɔtsu lɛ ekoŋŋ! Ni bɔfo lɛ jaje enɛ kɛ miishɛɛ gbee ni tsɔɔ kunimyeli: “O-Nyɔŋmɔ lɛ yeɔ maŋtsɛ lɛ!”

17, 18. Babilon nɔ kunim ni Koresh ye lɛ sa Yehowa diɛŋtsɛ gbɛi he yɛ mɛɛ gbɛ nɔ?

¹⁷ Beni Yehowa ŋmɛ Babilonbii lɛ gbɛ ni amɛbutu emaŋtsɛsɛi ni maŋtsɛmɛi ni jɛ David seshi mli lɛ ta nɔ lɛ, ekolɛ efee tamɔ nɔ ni E-jeee Maŋtsɛ dɔŋŋ. Marduk, ni ji Babilon nyɔŋmɔ wulu fe fɛɛ lɛ moŋ bafee tamɔ mɔ ni yeɔ maŋtsɛ. Shi, beni Zion Nyɔŋmɔ lɛ butu Babilon lɛ, ejie jeŋ muu fɛɛ maŋtsɛ ni eji lɛ kpo—etsɔɔ akɛ lɛ ji Maŋtsɛ kpeteŋkpele fe fɛɛ. Ni bɔni afee ni ekɛmã oti nɛɛ nɔ mi lɛ, abaasaa atswa Yerusalem, ni ji “maŋtsɛ agbo lɛ maŋ” lɛ, kɛ esɔlemɔtsu lɛ ama shi ekoŋŋ. (Mateo 5:35) Ni eyɛ mli akɛ bɔfo ni kɛ sanekpakpa nɛɛ ba lɛ naji ahe ewo mulu, kɛ muji kɛ pilamɔi moŋ, shi oo, eyɛ fɛo waa yɛ mɛi ni sumɔɔ Zion kɛ e-Nyɔŋmɔ lɛ ahiŋmɛiiaŋ!

¹⁸ Yɛ gbalɛ shishinumɔ naa lɛ, Babilon shigbeemɔ lɛ tsɔɔ akɛ ato Nyɔŋmɔ Maŋtsɛyeli lɛ shishi, ni tsulɔ ni hiɛ sanekpakpa lɛ kɛba lɛ ji Babilon shigbeemɔ lɛ jajelɔ. Kɛfata he lɛ, nɛkɛ blema bɔfo ni he yɔɔ oya, ni agba yɛ ehe afɔ̃ shi kɛtsɔ Yesaia nɔ nɛɛ, feɔ bɔfo ni hiɛ sanekpakpa ni yɔɔ nyam fe no lɛ he mfoniri—eyɛ nyam, yɛ emli sane ni nɔ kwɔ kɛ Maŋtsɛyeli saneyitso, kɛ nibii ni yɔɔ naakpɛɛ ni baajɛ mli aba kɛha mɛi fɛɛ ni yɔɔ hemɔkɛyeli lɛ hewɔ.

19. Mɛɛ shɛɛ sane ni kɔɔ Israel shikpɔŋ lɛ he Yehowa kɛha kɛtsɔ Ezekiel nɔ?

¹⁹ Ahã Ezekiel hu gbalɛi ni yɔɔ nyam ni kɔɔ amɛ sɛɛkuu he. Egba efɔ̃ shi akɛ: “Bɔ ni Nuntsɔ Maŋtsɛ Yehowa kɛɛ nɛ: ‘. . . Mahã mɛi ahi maji lɛ amli, ni aaasaa tsukoi lɛ. Ni aaakɛɛ akɛ: “Shikpɔŋ nɛɛ ni kã shi efolo lɛ, no etsɔ tamɔ Eden trom nɛɛ!” ’ ”—Ezekiel 36:33, 35.

20. Mɛɛ ŋaawoo ni miishɛɛ yɔɔ mli Yesaia kɛha Yerusalem yɛ gbalɛ wiemɔ mli?

²⁰ Beni amɛyɔɔ Babilon nomŋɔɔ mli lɛ, Nyɔŋmɔ webii lɛ ye awerɛho yɛ Zion he. (Lala 137:1) Agbɛnɛ, amɛmii baanyɛ ashɛ amɛhe. Yesaia wo ŋaa akɛ: “Nyɛ fɛɛ tswɛm nyɛwoa nyamɔ lala, nyɛ Yerusalem tsukoi, ejaakɛ Yehowa eshɛje emaŋ lɛ mii, ekpɔ̃ Yerusalem! Yehowa ejie enine krɔŋkrɔŋ lɛ he yɛ jeŋmaji lɛ fɛɛ ahiɛ, koni shikpɔŋ lɛ naagbee hei lɛ fɛɛ ana wɔ-Nyɔŋmɔ lɛ yiwalaheremɔ lɛ.”—Yesaia 52:9, 10.

21. Wiemɔi ni yɔɔ Yesaia 52:9, 10 lɛ ba mli yɛ Babilon nɔ kunimyeli lɛ sɛɛ, yɛ mɛɛ gbɛ nɔ?

²¹ Hɛɛ, Yehowa webii ni ehala amɛ lɛ yɛ yiŋtoo kpele ni amɛaadamɔ nɔ amɛna miishɛɛ. Agbɛnɛ amɛbaahi hei ni be ko lɛ ashi ashwie shi amaŋfɔ lɛ, ni abaahã amɛtsɔmɔ tamɔ Eden trom. Yehowa “ejie enine krɔŋkrɔŋ lɛ he” eha amɛ. Kɛ́ wɔɔkɛɛ lɛ, ekota etade lɛ niji lɛ, koni enyɛ etsu nii ni ekɛ amɛ aba amɛ diɛŋtsɛ amɛmaŋ ni amɛsumɔɔ lɛ mli ekoŋŋ. Enɛ jeee nifeemɔ bibioo, ni ejeee shi faŋŋ yɛ yinɔsane mli. Dabi, gbɔmɛi ni yɔɔ wala mli yɛ nakai beaŋ lɛ fɛɛ na Nyɔŋmɔ ‘nine ni ejie he’ lɛ ni ekɛ hewalɛ miitsu nii yɛ adesai asaji amli, bɔni afee ni ehã maŋ ko yiwalaheremɔ ni yɔɔ naakpɛɛ lɛ anyɛ aba mli. Amã nɔ mi aha amɛ yɛ gbɛ ni tɔmɔ bɛ mli nɔ akɛ Yesaia kɛ Ezekiel ji Yehowa anɔkwa bɔfoi lɛlɛŋ. Mɔ ko mɔ ko nyɛɛɛ aje he ŋwane akɛ Zion Nyɔŋmɔ lɛ ji hiɛkalɔ kɛ anɔkwa Nyɔŋmɔ kome pɛ ni yɔɔ shikpɔŋ lɛ fɛɛ nɔ. Wɔkaneɔ yɛ Yesaia 35:2 akɛ: “Amɛaana Yehowa anunyam lɛ, kɛ wɔ-Nyɔŋmɔ lɛ wulamɔ lɛ hu.” Mɛi ni kpɛlɛ Yehowa Nyɔŋmɔyeli lɛ he odaseyeli nɛɛ nɔ lɛ tsake kɛba ejamɔ mli.

22. (a) Wɔbaanyɛ wɔda shi yɛ mɛni he ŋmɛnɛ? (b) Mɛni hewɔ esa akɛ wɔda shi waa titri akɛ Yehowa kpaa amale bɔfoi ahe mama lɛ?

²² Kwɛ bɔ ni esa akɛ wɔda shi waa wɔha akɛ Yehowa tsɔɔ mɛi ni ji enɔkwa bɔfoi! Lɛlɛŋ, eji “mɔ ni mãa etsulɔ wiemɔ nɔ mi, ni ehaa ebɔfoi agbalɛ baa mli.” (Yesaia 44:26) Sɛɛkuu he gbalɛi ni ekɛha Yesaia kɛ Ezekiel lɛ woɔ esuɔmɔ kpele, mlihilɛ ni wɔsaaa, kɛ mɔbɔnalɛ ni eyɔɔ kɛhaa ewebii lɛ hiɛ nyam. Lɛlɛŋ, Yehowa sa wɔ yijiemɔ fɛɛ yɛ enɛ he! Ni esa akɛ wɔda lɛ shi waa ŋmɛnɛ akɛ ekpaa amale bɔfoi lɛ ahe mama. Nɔ hewɔ ji akɛ, amrɔ nɛɛ amɛyi efa babaoo yɛ je lɛŋ. Amɛshɛɛ saji ni amɛkɛhaa yɛ henɔwomɔ mli lɛ kwaa Yehowa yiŋtoi ni etswa he adafi lɛ. Nikasemɔ ni nyiɛ sɛɛ lɛ baaye abua wɔ ni wɔyɔse nakai amale bɔfoi lɛ.

[Shishigbɛ niŋmai]

Ani Obaanyɛ Otsɔɔ Mli?

◻ Mɛɛ gbɛ nɔ Yehowa tsɔɔ ehaa ayɔseɔ enɔkwa bɔfoi?

◻ Namɔ Yehowa tsɔ Yesaia nɔ etsĩ etã akɛ enajiaŋdamɔlɔ kɛha Babilon nɔ kunimyeli?

◻ Yesaia gbalɛi ni wieɔ Babilon nɔ kunimyeli he lɛ ba mli yɛ mɛɛ gbɛ nɔ?

◻ Mɛɛ nɔ kpakpa Babilon nɔ kunimyeli lɛ kɛba Yehowa gbɛi lɛ nɔ?

[Mfoniri ni yɔɔ baafa 9]

Babilon tamɔ maŋ ni anyɛɛɛ aye enɔ kunim kɛha jeŋmaji ni hi shi yɛ Ezekiel gbii lɛ amli lɛ