Wiemɔ Krɔŋŋ Kɛha Jeŋmaji Fɛɛ
“Ejaakɛ no mli lɛ maŋɔ wiemɔ krɔŋŋ maha majimaji lɛ, koni amɛ fɛɛ kwa amɛtsɛ Yehowa gbɛi lɛ, koni amɛkɛ gbee kome asɔmɔ lɛ.”—ZEFANIA 3:9, New World Translation.
1, 2. (a) Mɛni Yehowa feɔ yɛ wɔgbii nɛɛ amli, yɛ Zefania 3:9 lɛ mlibaa mli? (b) Kɛji wɔbaanu bɔ ni Zefania gbalɛ lɛ saa wɔhe ehaa shishi lɛ, mɛɛ sanebimɔi ebiɔ ni aha hetoo?
YEHOWA NYƆŊMƆ miitsu nitsumɔ ko ni yɔɔ naakpɛɛ lɛlɛŋ yɛ wɔgbii nɛɛ amli. Efee gbɔmɛi ni jɛ jeŋmaji lɛ fɛɛ mli ekome. Taakɛ egba efɔ shi mra be ko ni eho yɛ e-Wiemɔ Krɔŋkrɔŋ lɛ mli lɛ, eefee enɛ kɛtsɔ wiemɔ hee ni etsɔɔ amɛ lɛ nɔ.—Zefania 3:9.
2 Mɛni ji nakai wiemɔ lɛ? Mɛni hewɔ ni ehe hiaa lɛ? Mɛni ekasemɔ biɔ ni wɔfee akɛ aŋkroaŋkroi?
Nikeenii ni Ji Wiemɔ Lɛ
3. (a) Mɛɛ nikeenii ko ni yɔɔ naakpɛɛ akɛduro Adam? (b) Mɛni ji wiemɔ ni Adam wie?
3 Nyɛmɔ ni wɔyɔɔ ni haa wɔkɛ wɔhe sharaa kɛtsɔɔ wiemɔ nɔ lɛ ji Nyɔŋmɔ nikeenii ni haa esoroɔ adesai kwraa yɛ kooloi krokomɛi fɛɛ ni abɔ amɛ lɛ ahe. Abɔ klɛŋklɛŋ gbɔmɔ, ni ji Adam lɛ kɛ jwɛŋmɔ ni haa enyɛɔ ekɛ nilee susuɔ nii ahe. Akɛ gbee, lilɛi kɛ naabu ni ebaanyɛ ekɛtsu nii ni ekɛwie duro lɛ, kɛ agbɛnɛ hu wiemɔi komekomei kɛ hewalɛ ni eyɔɔ ni ekɛaatsɛ wiemɔi heei. Kɛ Yehowa kɛ Adam wie lɛ enuɔ shishi, ni Adam hu nyɛɔ etsɔɔ nibii ni yɔɔ ejwɛŋmɔ mli kɛtsɔɔ wiemɔi anɔ. (1 Mose 1:28-30; 2:16, 17, 19-23) Eka shi faŋŋ akɛ wiemɔ ni akɛha Adam lɛ ji nɔ ni abale yɛ sɛɛ mli akɛ Hebri lɛ. Ni etamɔ nɔ ni kɛ hooo kwraa lɛ, yɛ klɛŋklɛŋ afii 1,757 ni adesai kɛhi shi lɛ amli lɛ, nakai wiemɔ kome lɛ pɛ adesai fɛɛ tee nɔ amɛwie.—1 Mose 11:1.
4. Mɛɛ gbɛ nɔ nibii ni ba yɛ Nimrod gbii lɛ amli lɛ sa adesai awiemɔ he yɛ?
4 Kɛkɛ ni yɛ Nimrod gbii lɛ amli lɛ, bɔni afee ni ekɛfite mɛi fɔji amɔdɛŋbɔɔ lɛ, Yehowa futu mɛi fɛɛ ni ŋmɛ gbɛ ni abua amɛnaa koni amɛna gbɛfaŋnɔ yɛ Babel mɔɔ lɛ maa mli lɛ awiemɔ. (1 Mose 11:3-9) Etamɔ nɔ ni klɛŋklɛŋ kwraa lɛ Yehowa jie wiemɔ ni amɛ fɛɛ amɛwieɔ tsutsu lɛ he jwɛŋmɔ fɛɛ kɛjɛ amɛyitseiaŋ, kɛkɛ ni ekɛ wiemɔi heei wo amɛjwɛŋmɔi amli. Jeee wiemɔi komekomei heei pɛ enɛ kɛba, shi moŋ wiemɔi ahe mlai heei kɛ gbɛi heei ni atsɔɔ nɔ asusuɔ saji ahe hu. Wiemɔi krokomɛi eba fiofio kɛjɛ wiemɔi ni Yehowa je shishi kɛjɛ Babel lɛ amli aahu kɛbashi ŋmɛnɛ, ni taakɛ wiemɔi ahe nikasemɔ hei wuji lɛ tsɔɔ lɛ, awieɔ wiemɔi sɔrɔtoi aaashɛ akpei etɛ yɛ je lɛŋ fɛɛ.
5. Mɛɛ gbɛ nɔ wɔɔtsɔ wɔle nɔ ni ‘tsakemɔ kɛmiiya wiemɔ krɔŋŋ lɛ mli’ lɛ biɔ?
5 Kɛha gbɔmɛi ni wieɔ nɛkɛ wiemɔi nɛɛ fɛɛ lɛ, ani ‘tsakemɔ kɛmiiya wiemɔ krɔŋŋ lɛ mli’ lɛ baabi ni amɛkpa amɛmaji anɔ wiemɔi lɛ wiemɔ koni amɛkase shishijee wiemɔ ni Nyɔŋmɔ kɛha Adam lɛ wiemɔ? Nibii ni kɔɔ be mli ni akɛ nakai gbalɛ lɛ ha lɛ he lɛ baaye abua wɔ ni wɔha nakai sanebimɔ lɛ hetoo.
Bɔ ni Wiemɔ Krɔŋŋ lɛ he Hiaa Ha
6-8. (a) Mɛɛ jamɔ mli shihilɛ ko tee nɔ yɛ Yuda dani akɛ gbalɛ ni yɔɔ Zefania 3:9 lɛ ha? (b) Mɛɛ shihilɛ ko tee nɔ yɛ jeŋmaji ni ebɔle Yuda he kɛkpe lɛ mli?
6 Etsɛko tsɔ ni Manase klɛŋklɛŋ, kɛ agbɛnɛ esɛɛ lɛ Amon, ni mamɔ afɔleshaa latɛi amɛha Baal, ni amɛkɛ ŋkunyaayeli tsu nii, ni amɛha mumɔi atsɛmɔ nifeemɔi fa babaoo lɛ baye Yuda maŋtsɛyeli lɛ nɔ akɛ maŋtsɛmɛi. (2 Maŋtsɛmɛi 21:1-6; 2 Kronika 33:21-23) Nɔ ni jɛ mli ba ji akɛ, beni Amon binuu kɛ esɛɛyelɔ Yosia yeɔ maŋtsɛ lɛ, Yehowa kɛ nitsumɔ wo egbalɔ Zefania dɛŋ koni ebɔ kɔkɔ akɛ abaatsu ŋwɛi kojomɔ he nii yɛ shikpɔŋ lɛ nɔ.—Zefania 1:1, 2.
7 Eyɛ mli akɛ Yudeabii lɛ le kɛjɛ amɛ diɛŋtsɛ amɛyinɔsane kɛ Ŋmalɛi ni jɛ mumɔŋ lɛ mli akɛ Yehowa ji anɔkwa Nyɔŋmɔ lɛ moŋ, shi amɛtee nɔ amɛkɛ amɛhe wo Baal jamɔ he jeŋba shara nifeemɔi lɛ amli. Amɛkulaa shi amɛhaa hulu kɛ nyɔŋtsere kɛ ŋulamii kushai ni yɔɔ shibɔlemɔ ŋulamii lɛ ateŋ lɛ, yɛ be mli ni enɛ feemɔ ji Nyɔŋmɔ mla mlikuu diɛŋtsɛ. (5 Mose 4:19; 2 Maŋtsɛmɛi 23:5) Yɛ enɛɛmɛi fɛɛ sɛɛ lɛ, amɛkɛ amɛhe wo hemɔkɛyeli futumɔ nifeemɔ ko mli, ni amɛfee amɛnii tamɔ nɔ ni jamɔi fɛɛ lɛ ekome ni, kɛtsɔ kitai ni amɛkamɔ amɛha Yehowa kɛ agbɛnɛ yɛ nakai beaŋ nɔŋŋ lɛ yɛ apasa nyɔŋmɔ Malkam gbɛi amli lɛ nɔ. Subaŋ ni amɛkɔ ji akɛ “Yehowa efeŋ ekpakpa, ni esaa efeŋ efɔŋ hu!” (Zefania 1:4-6, 12) Ni jeŋmaji ni ebɔle Yuda he kɛkpe lɛ fɛɛ lɛ, ale amɛ jogbaŋŋ akɛ amɛteɔ shi amɛwoɔ Yehowa kɛ ewebii lɛ, no hewɔ lɛ amɛ hu amɛbafeɔ mɛi ni esa akɛ atsu ŋwɛi kojomɔ he nii yɛ amɛnɔ.—Zefania 2:4-15.
8 Bɔ ni nibii ba lɛ eha nɛɛ hewɔ ni Yehowa gba efɔ shi akɛ “maŋɔ wiemɔ krɔŋŋ maha majimaji lɛ, koni amɛ fɛɛ kwa amɛtsɛ Yehowa gbɛi lɛ, koni amɛkɛ gbee kome asɔmɔ lɛ” lɛ. (Zefania 3:9, NW) Belɛ, mɛni ji nakai wiemɔ krɔŋŋ lɛ?
9. (a) Mɛni hewɔ ni wiemɔ krɔŋŋ lɛ jeee Hebri aloo Nyɔŋmɔ Wiemɔ ni aŋma lɛ kɛkɛ lɛ? (b) Mɛni ji nakai wiemɔ krɔŋŋ lɛ, ni mɛɛ gbɛ nɔ esaa mɛi ni wieɔ lɛ ashihilɛ he yɛ?
9 Ani no ji Hebri wiemɔ lɛ? Dabi; Yudabii lɛ wieɔ nakai wiemɔ lɛ momo, shi eka shi faŋŋ akɛ nibii ni amɛwieɔ kɛ nibii ni amɛfeɔ lɛ bɛ krɔŋŋ ni ejaaa yɛ Yehowa hiɛ. Ni wiemɔ krɔŋŋ lɛ jeee Nyɔŋmɔ Wiemɔ ni aŋma afɔ shi lɛ kɛkɛ. Amɛyɛ no hu. Shi nɔ ni he hiaa amɛ ji Nyɔŋmɔ kɛ eyiŋtoi ahe anɔkwale lɛ he shishinumɔ ni ja, ni Yehowa pɛ baanyɛ ekɛ enɛ aha kɛtsɔ emumɔ lɛ nɔ. Beni amɛkase nakai wiemɔ krɔŋŋ lɛ wiemɔ lɛ, amɛ niiahesusumɔ, amɛwiemɔ, amɛjeŋba, fɛɛ baadamɔ yoomɔ ni amɛaayoo anɔkwale ni eji akɛ Yehowa ji anɔkwa Nyɔŋmɔ kome pɛ lɛ nɔ. (Zefania 2:3) Amɛkɛ amɛhe baafɔ enɔ koni amɛfi jeŋ muu fɛɛ maŋtsɛ ni eji lɛ sɛɛ kwraa kɛmɔ shi. Enɛ he miihia wɔ waa ŋmɛnɛ. Mɛni hewɔ?
Mɛi ni Akɛ Wiemɔ Krɔŋŋ lɛ Haa
10. Mɛɛ be sɛɛjɛkɛmɔ ko mli be bashɛ akɛ esa akɛ aha gbalɛ ni yɔɔ Zefania 3:9 lɛ aba mli?
10 Yɛ be mli ni egbalaa jwɛŋmɔ kɛyaa gbalɛ lɛ mlibaa yɛ be pɔtɛɛ ko mli lɛ nɔ lɛ, Zefania 3:9 (NW) kɛɔ akɛ: “Ejaakɛ no mli lɛ maŋɔ wiemɔ krɔŋŋ maha majimaji lɛ.” Mɛɛ be ni? Kuku 8 haa hetoo akɛ be mli ni Yehowa ‘buaa jeŋmaji lɛ anaa,’ dani ‘efɔse emlifu ni naa wa lɛ eshwie amɛnɔ lɛ,’ ji be mli ni ekɛ wiemɔ krɔŋŋ lɛ haa shikpɔŋ lɛ nɔ heshibalɔi lɛ.
11. (a) Mɛɛ mlibaa sɔrɔtoi enyɔ Zefania 3:9 lɛ na dani eshɛ wɔ ŋmɛnɛŋmɛnɛ beaŋ? (b) Mɛɛ gbɛ nɔ esoro emlibaa ŋmɛnɛ?
11 Maŋtsɛ Yosia gbii lɛ amli lɛ, dani Yehowa aaaŋmɛ Babilonbii lɛ agbɛ ni amɛtsu kojomɔ he nii lɛ, mɛi pii kpoo apasa jamɔ lɛ, ni yɛ no najiaŋ lɛ amɛsɔmɔ Yehowa. (2 Kronika 34:3-33) Agbɛnɛ hu, yɛ Ŋ.B. klɛŋklɛŋ afii oha lɛ mli lɛ, dani Romabii lɛ aaakpata Yerusalem hiɛ lɛ, gbɔmɛi akpei abɔ kase anɔkwale ni kɔɔ Nyɔŋmɔ kɛ eyiŋtoo he lɛ he nii ni amɛfee ekome yɛ esɔɔmɔ mli. Yɛ nakai beaŋ lɛ, nibii ni Yesu Kristo fee yɛ Yehowa yiŋtoo mlibaa he lɛ ha anɔkwale wiemɔ lɛ mli baka shi faŋŋ. Shi Zefania gbalɛ lɛ miiba mli yɛ wɔgbii nɛɛ amli yɛ jeŋ fɛɛ. Amrɔ nɛɛ aabua jeŋmaji lɛ fɛɛ anaa kɛmiiya Nyɔŋmɔ Ofe lɛ gbi wulu lɛ nɔ ta lɛ he yɛ Harmagedon. (Kpojiemɔ 16:14, 16) Nakai naabuamɔ lɛ etee nɔ aahu kɛjɛ be mli ni afɔ Maŋtsɛyeli lɛ yɛ 1914 lɛ. Ni nɛkɛ be nɛɛ mli nɔŋŋ ni Yehowa kɛ wiemɔ krɔŋŋ lɛ haa gbɔmɛi ni yɔɔ je lɛŋ fɛɛ lɛ yɛ nɛkɛ gbalɛ nɛɛ mlibaa mli. Nakai wiemɔ lɛ kasemɔ he miihia waa diɛŋtsɛ ejaakɛ mɛi ni baaje amanehulu kpeteŋkpele lɛ mli lɛ baafee gbɔmɛi ni eha wiemɔ krɔŋŋ lɛ etsɔ amɛ-wiemɔ yɛ anɔkwale mli.—Yoel 3:5.
12. (a) Mɛɛ tsakpaa ninaa ni aŋma he sane yɛ Yesaia yitso 6 lɛ kɛ gbalɛ ni kɔɔ wiemɔ krɔŋ lɛ he lɛ yɔɔ? (b) Mɛni hewɔ ni yelikɛbuamɔ he bahia shwɛɛnii ni afɔ amɛ mu lɛ kɛji amɛaaya nɔ amɛfee mɛi ni akpɛlɛɔ amɛnɔ kɛhaa Yehowa sɔɔmɔ lɛ?
12 Yɛ enɛ kɛ gbeekpamɔ naa lɛ, mra mli yɛ be ni nyiɛ Jeŋ Ta l sɛɛ lɛ mli nɔŋŋ ni Yehowa bɔi etsuji ni efɔ amɛ mu lɛ aniiashishinumɔ hiŋmɛii gbelemɔ koni amɛna ninaa ni yɔɔ naakpɛɛ ni aŋma yɛ Yesaia yitso 6 lɛ. (Yes 6 Kukuji 1-4) Nɛkɛ ninaa nɛɛ maa bɔ ni ehe hiaa ni wɔna naabui ni he tse bɔni afee ni wɔkɛsɔmɔ Yehowa yɛ gbɛ ni ekpɛlɛɔ nɔ lɛ nɔ mi. Etsɔɔ akɛ, Yehowa yɛ krɔŋkrɔŋ yɛ gbɛ ni nɔ kwɔ fe fɛɛ nɔ. No hewɔ lɛ esa akɛ etsuji hu ajie nɛkɛ su nɛɛ kpo. (1 Petro 1:15, 16) Shi yelikɛbuamɔ he miihia shwɛɛnii ni afɔ amɛ mu lɛ yɛ enɛ gbɛfaŋ. Yɛ Jeŋ Ta I mli lɛ, amɛŋmɛ gbɛ ni awo amɛhe muji kɛtsɔ amɛhe ni amɛkɛwo nibii ni tee nɔ yɛ je lɛ mli lɛ mli kɛyashi he ko lɛ nɔ. “Yehowa gbeyeishemɔ lɛ yɛ krɔŋŋ,” aloo ehe tse, shi amɛha gbɔmɔ kɛ adesai agbɛjianɔtoi ahe gbeyeishemɔ sa amɛnaabui ahe, ni amɛfee dioo yɛ Nyɔŋmɔ Wiemɔ lɛ jajemɔ mli kɛyashɛ shɔŋŋ kwraa. (Lala 19:9, NW) Kɛtsɔ sharamɔ ni ekɛ Kristendom na lɛ nɔ lɛ, shwɛɛnii lɛ tee nɔ amɛkɛ eblema saji kɛ enifeemɔi lɛ wo amɛhe muji.
13, 14. (a) Mɛɛ gbɛ nɔ shwɛɛnii lɛ jie su kpakpa kpo yɛ, ni mɛni Yehowa fee yɛ amɛgbɛfaŋ? (b) Mɛɛ gbɛ nɔ Yehowa ha shwɛɛnii lɛ wiemɔ krɔŋŋ yɛ?
13 Ni shwɛɛnii lɛ yoo shihilɛ nɛɛ lɛ, amɛkɛɛ, taakɛ gbalɔ Yesaia kɛɛ lɛ nɔŋŋ akɛ: “Kpoo ha mi! Shi milaaje; ejaakɛ gbɔmɔ ni naabu he tseee ji mi, ni maŋ ni amɛnaabui ahe tseee teŋ miyɔɔ; ejaakɛ mihiŋmɛii ena Maŋtsɛ lɛ ni ji Yehowa Zebaot lɛ!” (Yesaia 6:5) Amɛyoo akɛ akpɛlɛɛɛ shihilɛ mli ni amɛyɔɔ lɛ nɔ. Amɛyaaa nɔ kɛ shɔɔfeemɔ yɛ gbɛ gbonyo ni amɛnyiɛ nɔ lɛ nɔ aloo ni amɛkɛ kuɛŋtimɔ aaakpo akɛ amɛkpɛlɛɛɛ Yehowa kamɔi lɛ anɔ. Amɛyafataaa osɔfoi lɛ ahe beni amɛkɛ amɛnaabu folo jieɔ Nyɔŋmɔ Maŋtsɛyeli lɛ yi ni amɛkpɛlɛɔ Jeŋmaji Akpaŋmɔ lɛ nɔ tamɔ nɔ ni no ji nakai Maŋtsɛyeli lɛ.
14 Akɛni nakai shwɛɛnii heshibalɔi lɛ jie heshwamɔ su kpo hewɔ lɛ, Yehowa je shishi akɛ eetsuu amɛnaabui ahe yɛ emlihilɛ ni amɛsaaa lɛ mli. Yesaia 6:6, 7 kɛɔ wɔ akɛ: “Kɛkɛ ni serafim lɛ ateŋ mɔ kome ni hiɛ ŋãi ni tsoɔ ni ekɛ abɛɛle yakɔ yɛ afɔleshaa latɛ lɛ nɔ yɛ edɛŋ filiki kɛba miŋɔɔ; ni eŋɔsa minaabu ni ekɛɛ: ‘Naa, ni enɛ esa onaabu nɛɛ, ajie onɔsha lɛ, ni atsumɔ ohe esha lɛ!’” Shɛɛ sane ni akɛtsuuɔ mɔ he ni jɛ Nyɔŋmɔ Wiemɔ lɛ mli lɛ ji nɔ ni fite gbɔmɛi ablema saji kɛ amɛtsɔɔmɔi lɛ tamɔ akɛ la shaa nii lɛ. Ejie gbɔmɛi ahe gbeyeishemɔ fɛɛ kɛjɛ amɛtsuii amli ni ekɛ ekaa ni naa wa ni baaha amɛkɛ amɛnaabui awo Yehowa hiɛ nyam ye najiaŋ. Enɛ hewɔ lɛ Yehowa miiha shiwoo ni ekɛha akɛ “maŋɔ wiemɔ krɔŋŋ [yɛ faŋŋ mli lɛ, naabu ni he tse] maha majimaji lɛ, koni amɛ fɛɛ kwa amɛtsɛ Yehowa gbɛi lɛ” miiba mli.—Zefania 3:9, NW.
15. Mɛɛ gbɛ nɔ bɔ ni shwɛɛnii lɛ fee amɛnii amɛha lɛ kɛ yiŋtoo hewɔ ni Yehowa ha amɛ wiemɔ krɔŋŋ lɛ kpa gbee yɛ?
15 No hewɔ lɛ beni ŋmɛnɛŋmɛnɛ-beaŋ Yesaia kuu lɛ bɔi Yehowa gbɛɛ numɔ ni eebi sane, taakɛ aŋma yɛ Yesaia 6:8 akɛ: “Namɔ matsu? Ni namɔ aaatee aha wɔ?” lɛ, amɛkɛ miishɛɛ here nɔ akɛ: “Naa mi, tsu mi!” Efeee mlɛo kɛhaaa amɛteŋ mɔ fɛɛ mɔ akɛ eeeje shiɛmɔ nitsumɔ lɛ shishi, shi kɛlɛ amɛmiisumɔ ni Nyɔŋmɔ kɛ amɛ atsu nii akɛ maŋ ni ehala kɛha egbɛi lɛ. Emumɔ lɛ wo amɛ hewalɛ. Amɛyi fa kɛtee hiɛ.
16. (a) Mɛɛ yibii ni akpaaa gbɛ shwɛɛnii lɛ ashiɛmɔ nitsumɔ lɛ wo? (b) Mɛɛ gbɛ nɔ asafo babaoo lɛ kɛ odaseyeli haa akɛ amɛ hu amɛwieɔ wiemɔ krɔŋŋ lɛ?
16 Yɛ be ni sa mli lɛ, ebaafee faŋŋ akɛ amɛshiɛmɔ nitsumɔ lɛ miiwo yibii ni amɛkpaaa gbɛ. Kɛtsɔ amɛnɔ lɛ, Yehowa miiye kɛmiibua kuu kroko hu koni amɛ hu amɛkase wiemɔ krɔŋŋ lɛ. (Yesaia 55:5) Mɛnɛɛmɛi bɛ ŋwɛi shihilɛ he hiɛnɔkamɔ lɛ eko, shi kɛlɛ amɛbuɔ enɛ akɛ hegbɛ ni amɛna akɛ amɛaafata Maŋtsɛyeli gboshiniyelɔi lɛ ateŋ shwɛɛnii lɛ ahe ni amɛkɛ amɛ asɔmɔ kɔŋ kɛ kɔŋ akɛ Nyɔŋmɔ Maŋtsɛyeli lɛ jajelɔi. Amɛtee nɔ amɛjɛ “jeŋmaŋ fɛɛ jeŋmaŋ kɛ akutsei kɛ maji kɛ maji anɔ wiemɔi amli” amɛba aahu kɛbashi amrɔ nɛɛ, ni amɛtsɔ “asafo babaoo” ni amɛyibɔ shɛɔ akpekpei abɔ. Wiemɔ ni jeɔ kpo kɛjɛɔ amɛdaaŋ lɛ jeee nɔ ni baaha ayoo amɛ akɛ amɛfata je lɛŋ kui ni mli egbala lɛ eko he. Amɛkɛ amɛhiɛnɔkamɔ wooo gbɔmɔ ko loo adesai agbɛjianɔtoo ko mli. Shi moŋ yɛ no najiaŋ lɛ, “amɛbolɔ kɛ gbee waa amɛkɛɛ: ‘Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ lɛ, kɛ Toobi lɛ nɔ!’”—Kpojiemɔ 7:9, 10.
Nɔ ni Wiemɔ lɛ Kasemɔ Biɔ ni Wɔfee
17. Mɛni hewɔ ni ehe hiaa ni wɔkase wiemɔ krɔŋŋ lɛ jogbaŋŋ ni wɔya wɔhiɛ yɛ bɔ ni wɔnyɛɔ wɔkɛtsuɔ nii wɔhaa lɛ mli lɛ?
17 Ekɔɔɔ he eko afii abɔ ni wɔkɛ Yehowa gbɛjianɔtoo lɛ enyiɛ eha, babaoo yɛ lolo ni wɔbaanyɛ wɔfee ni wɔkɛha bɔ ni wɔle wiemɔ krɔŋŋ lɛ jogbaŋŋ wɔha kɛ bɔ ni wɔnyɛɔ wɔkɛtsuɔ nii jogbaŋŋ lɛ aya hiɛ. Ehe miihia ni wɔkɛ hiɛmiamɔ atsu nii bɔni afee ni wɔnyɛ wɔfee enɛ. Mɛni hewɔ? Ejaakɛ enɛ ji nɔ ni tsɔɔ suɔmɔ ni wɔyɔɔ kɛha anɔkwale lɛ.
18, 19. (a) Mɛni hewɔ ni ehe hiaa ni wɔna suɔmɔ ni mli wa wɔha anɔkwale lɛ kɛjɛ shishijee lɛ? (b) Mɛni hewɔ ni ehe hiaa ni wɔya nɔ wɔlɛ nakai suɔmɔ lɛ?
18 Kɛjɛ shishijee lɛ, suɔmɔ ni tamɔ nɛkɛ yeɔ ebuaa ni egbeleɔ mɔ jwɛŋmɔ kɛ etsui mli bɔni afee ni enyɛ enu ŋmalɛi ni agbalaa ejwɛŋmɔ kɛyaa nɔ lɛ ashishi; etsirɛɔ lɛ koni etsi ebɛŋkɛ Yehowa he kpaakpa koni ena hiɛsɔɔ eha E-gbɛjianɔtoo lɛ hu. No hewɔ lɛ, suɔmɔ ni ayɔɔ kɛha anɔkwale lɛ ji gbɛ pɔtɛɛ ni atsɔɔ nɔ afɛneɔ he kwraa kɛjɛɔ apasa jamɔ gboklɛi lɛ amli. Mɛi komɛi kɛɔ akɛ amɛnaa Biblia mli shɛɛ sane lɛ he miishɛɛ, shi kɛlɛ amɛjieee apasa jamɔ he nibii kɛ eshihilɛ gbɛ ni ŋmɛɔ nɔ fɛɛ nɔ feemɔ gbɛ lɛ yɛ amɛhe amɛshwieee shi. Mɛni hewɔ amɛfeee nakai lɛ? Taakɛ atsɔɔ mli yɛ 2 Tesalonikabii 2:10 lɛ, “amɛmɔɔɔ anɔkwale suɔmɔ lɛ mli ni akɛhere amɛyiwala.” Kwɛ bɔ ni ehe hiaa waa akɛ wɔna nakai suɔmɔ lɛ eko!
19 Kɛ wɔmɔ anɔkwale lɛ mli nɔŋŋ lɛ, nakai suɔmɔ lɛ ni wɔɔlɛ lɛ ni eda lɛ ji hiamɔ nii titri ko kɛha wɔmumɔŋ hiɛyaa. Esa akɛ ehi ojwɛŋmɔ mli akɛ Yehowa tsɛɔ anɔkwale lɛ akɛ “wiemɔ.” Kɛji mɔ ko kase wiemɔ hee ko lɛ, esa akɛ ekɛ hiɛmiamɔ abɔ mɔdɛŋ ni ele wiemɔi lɛ atsɛmɔ, ni etsɛ lɛ jogbaŋŋ, ni ekase wiemɔ lɛ he mlai fitsofitso, kɛ nibii krokomɛi fɛɛ hu. Suɔmɔ ni eyɔɔ kɛha wiemɔ hee lɛ kɛ mɛi ni wieɔ nakai wiemɔ lɛ baaye ebua lɛ ni eka he eya ehiɛ. Ekolɛ ebaanyɛ ewie wiemɔ lɛ kɛshɛ he ko yɛ nyɔji fioo mli, shi ebiɔ afii babaoo kɛ mɔdɛŋbɔɔ dani enyɛ ewie tamɔ maŋnyo. Nakai mɔdɛŋbɔɔ lɛ nɔŋŋ eko he miihia bɔni afee ni wɔle wiemɔ krɔŋŋ lɛ hu wiemɔ kɛmɔ shi.
20. (a) Mɛni haa wiemɔ krɔŋŋ lɛ feɔ krɔŋŋ lɛlɛŋ lɛ? (b) Mɛni hewɔ ni ehe hiaa ni wɔteŋ mɔ fɛɛ mɔ akwɛ ehe nɔ jogbaŋŋ lɛ?
20 Nɔ ni sa kadimɔ titri hu ji tsɛmɔ ni atsɛɔ wiemɔ ni Nyɔŋmɔ kɛha etsuji lɛ akɛ wiemɔ krɔŋŋ lɛ. Enɛ ji anɔkwale, jeee yɛ wiemɔ he mla ni akɛwieɔ lɛ gbɛfaŋ kɛkɛ, shi moŋ akɛni ekɛ jeŋba kɛ mumɔŋ hetsemɔ he odaseyeli hu haa lɛ hewɔ. Gbɛ ko bɛ yɛ nɛkɛ wiemɔ nɛɛ mli kɛha malemɔ, lakamɔ, aloo shishiumɔ lilɛi. Esa akɛ mɛi fɛɛ ni wieɔ wiemɔ nɛɛ awie anɔkwale be fɛɛ be. (Zefania 3:13; Efesobii 4:25) Nakai nɔŋŋ esa akɛ ana Yehowa shishitoo mlai ni nɔ kwɔlɔ ni kɔɔ bɔlɛnamɔ mli jeŋba kpakpa he lɛ yɛ amɛwiemɔ mli. (Efesobii 5:3, 4) Ŋmalɛi lɛ hu haa wɔleɔ faŋŋ akɛ nɔ fɛɛ nɔ ni kɛ Babilon Kpeteŋkpele lɛ, jeŋ apasa jamɔ maŋtsɛyeli lɛ yɔɔ tsakpaa lɛ he tseee. (Kpojiemɔ 18:2-4) Bɔ ni afeɔ amɛnyɔŋmɔi lɛ ahe mfoniri akɛ atsɛɔ amɛ ji “wɔji.” (Yeremia 50:2) Belɛ, eja jogbaŋŋ akɛ mɛi ni kaseɔ wiemɔ krɔŋŋ lɛ ajie apasa jamɔ he nibii fɛɛ ni anaa lɛ kɛjɛ amɛhe amɛshɛrɛ amɛshwie, ni amɛkpoo etsɔɔmɔi lɛ; ni amɛtsi amɛhe kwraa kɛjɛ egbijurɔyelii ahe, ni agbɛnɛ hu amɛjie nibii ni kadiɔ esusumɔi fɔji lɛ fɛɛ kɛjɛ amɛwiemɔ mli. Kɛfata enɛ he lɛ, ahɛleɔ wɔ shi yɛ Kpojiemɔ 16:13-16 akɛ lakamɔ wiemɔ ni ekɛbuaa jeŋmaji lɛ anaa koni amɛkɛte shi amɛwo Nyɔŋmɔ Maŋtsɛyeli lɛ hu he tseee, ejaakɛ ejɛ daimonioi amumɔ mli. No hewɔ lɛ ehe miihia ni wɔhiɛ ahi wɔhe nɔ ni wɔkaha nɛkɛ nibii ni he tseee nɛɛ eko miina wɔwiemɔ nɔ hewalɛ.
21. Mɛni hu yɔɔ wiemɔ krɔŋŋ lɛ mli kɛfata wiemɔi komekomei ni awieɔ lɛ he?
21 Atsɛɔ nɔ ni wɔkaseɔ lɛ akɛ wiemɔ, ni eja jogbaŋŋ nakai hu, shi no etsɔɔɔ akɛ mɛi ni wieɔ wiemɔ nɛɛ kaseɔ bɔ ni akɛ wiemɔi pɔtɛɛ komɛi ni afɔɔ numɔ yɛ Yehowa webii ateŋ lɛ tsuɔ nii haa lɛ kɛkɛ. Bɔ ni afeɔ gbee akɛwieɔ, kɛ hiɛ su kɛ nine fɔ̃ɔ hu he miihia. Enɛɛmɛi baanyɛ ekɛ saji ni wiemɔ folo nyɛŋ ekɛha lɛ aha. Yɛ bei babaoo mli lɛ ejieɔ nɔ ni wɔji yɛ wɔmli gbɛ lɛ kpo. Ebaanyɛ etsɔɔ kɛji wɔfamɔ awuŋayeli, bei, kɛ mlifu, ni fɛɛ ji heloo ni feɔ esha lɛ nitsumɔi lɛ fɛɛ shishi kwraa kɛjɛ wɔmli aloo wɔfamɔko. Kɛji Nyɔŋmɔ mumɔ lɛ tsuɔ nii kwraa yɛ wɔshihilɛi amli lɛ, anaa eyibii lɛ faŋŋ yɛ gbɛ ni wɔtsɔɔ nɔ wɔkɛ mɛi krokomɛi wieɔ lɛ mli.—Galatabii 5:19-23; Efesobii 4:31, 32.
22. Kɛji wɔkase wiemɔ krɔŋŋ lɛ jogbaŋŋ lɛ, mɛɛ gbɛ nɔ esaa bɔ ni wɔkpɛɔ wɔyiŋ wɔhaa lɛ he yɛ?
22 Mɔ fɛɛ mɔ ni ekase bɔ ni awieɔ wiemɔ hee ko lɛ le jogbaŋŋ akɛ kɛji enyɛɔ esusuɔ nii ahe yɛ nakai wiemɔ hee lɛ mli moŋ fe ni eeetsɔɔ shishi kɛjɛ lɛ diɛŋtsɛ emaŋ wiemɔ mli lɛ, belɛ eshɛ oti pɔtɛɛ ko he. No hewɔ lɛ, kɛji wɔ hu wɔkase anɔkwale lɛ, ni wɔkɛ hiɛmiamɔ bɔ mɔdɛŋ ni wɔkɛtsu nii yɛ wɔshihilɛ mli, ni wɔkɛ mɛi krokomɛi jaa daa gbi lɛ, no lɛ wɔnaa wɔhe akɛ wɔmiiya wɔhiɛ fiofio ni wɔsusuɔ nii ahe yɛ anɔkwale lɛ naa. Wɔkɛ emomo lɛ etooo ehee lɛ he kɛyaaa naanɔ ni wɔmiipele wɔhe ni wɔhala emli ekome. Ni yɛ nibii bibii amli po lɛ, Biblia mli shishitoo mlai baa wɔjwɛŋmɔ mli amrɔ nɔŋŋ ni ekɛ gbɛtsɔɔmɔ ni he hiaa lɛ haa wɔ.—Abɛi 4:1-12.
23. Mɛni tsɔɔ akɛ Yehowa Odasefoi ni yɔɔ je lɛŋ fɛɛ lɛ wieɔ wiemɔ krɔŋŋ lɛ ni amɛmaŋ nɔ wiemɔi kɔɔɔ he eko?
23 Eji anɔkwale akɛ wiemɔi akpei abɔ yɛ ni adesai kɛmiitsu nii bianɛ, shi abaanyɛ awie wiemɔ krɔŋŋ lɛ yɛ wiemɔi nɛɛ fɛɛ mli. Yehowa Odasefoi efee ekome yɛ jeŋ fɛɛ ni amɛkɛ wiemɔ krɔŋŋ lɛ miitsu nii yɛ gbɛ kpakpa nɔ yɛ be mli ni amɛsɔmɔɔ kɔŋ kɛ kɔŋ ni amɛyeɔ odase yɛ faŋŋ mli ni ekɛ hiɛnyamwoo bahaa Yehowa, wɔ-Nyɔŋmɔ ni yɔɔ suɔmɔ lɛ.
Sanebimɔi ni Akɛtiɔ Mli
◻ Mɛɛ nɔ kroko fata nikeenii ni ji wiemɔ lɛ he?
◻ Mɛni ji wiemɔ krɔŋŋ lɛ?
◻ Aha Zefania 3:9 eba mli yɛ namɛi agbɛfaŋ?
◻ Mɛɛ gbɛ nɔ wɔɔtsɔ wɔye he odase faŋŋ akɛ wɔsumɔɔ wiemɔ krɔŋŋ lɛ lɛlɛŋ?
[Mfoniri ni yɔɔ baafa 23]
Mɛi ni nuɔ wiemɔ krɔŋŋ Iɛ kɛ mɛi krokomɛi jaa
[Mfoniri ni yɔɔ baafa 25]
Bɔ fee bɔ ni amɛmaŋ nɔ wiemɔ ji lɛ, Yehowa Odasefoi ni yɔɔ je lɛŋ fɛɛ lɛ wieɔ wiemɔ krɔŋŋ lɛ