Yitso Nyɔŋma Kɛ Enumɔ
Yoo Kene lɛ Mli Fili Lɛ
1. Mɛni hewɔ Sara shwe akɛ efɔ́ lɛ, ni mɛni ji eniiashikpamɔ yɛ enɛ gbɛfaŋ?
SARA miishwe ní efɔ́. Dɔlɛ sane ji akɛ, kene ji lɛ, ni no haa ehaoɔ waa diɛŋtsɛ. Yɛ ebeaŋ lɛ, abuɔ kene shihilɛ akɛ eji ahorabɔɔ, shi nibii babaoo fata Sara haomɔ lɛ he fe no pɛ kɛkɛ. Eeshwe ní ena akɛ Nyɔŋmɔ shiwoo ní ekɛha ewu lɛ eba mli. Abraham baafɔ́ seshi ko ní baafee jɔɔmɔ kɛha shikpɔŋ lɛ nɔ wekui fɛɛ. (1 Mose 12:1-3) Shi kɛlɛ, beni Nyɔŋmɔ kɛ shiwoo lɛ ha lɛ sɛɛ afii nyɔŋmai abɔ lɛ, no mli lɛ amɛfɔ́ko lolo. Sara bagbɔ ní no mli fɛɛ lɛ ebɛ bi. Bei komɛi lɛ, ekolɛ esusuɔ akɛ ani ehiɛnɔkamɔi lɛ efeko efolo lo. Shi, gbi ko lɛ, enijiaŋwujee lɛ tsɔ miishɛɛ!
2. Mɛni hewɔ esa akɛ wɔná gbalɛ ní aŋma afɔ̃ shi yɛ Yesaia yitso 54 lɛ he miishɛɛ lɛ?
2 Sara amanehulu lɛ yeɔ ebuaa wɔ ni wɔnuɔ gbalɛ ní aŋma afɔ̃ shi yɛ Yesaia yitso 54 lɛ shishi. Akɛ Yerusalem wie yɛ jɛmɛ tamɔ nɔ ni eji yoo kene ní fɔ́ɔɔ, ní baná miishɛɛ kpele ní bii babaoo afɔmɔ kɛbaa lɛ eko. Yehowa tsɔɔ musuŋtsɔlɛ henumɔi ní eyɔɔ kɛha ewebii ní hi shi yɛ blema lɛ kɛtsɔ amɛhe mfoniri ní efee kutuu ákɛ eŋa lɛ nɔ. Kɛfata he lɛ, Yesaia wolo lɛ yitso nɛɛ yeɔ ebuaa wɔ ni wɔnyɛɔ wɔnuɔ nɔ ni Biblia lɛ tsɛ́ɔ lɛ akɛ “teemɔŋ sane” krɔŋkrɔŋ lɛ fã ko ní he hiaa waa shishi. (Romabii 16:25, 26) Mɔ ni “yoo” lɛ ji, kɛ eniiashikpamɔi ní agba afɔ̃ shi yɛ gbalɛ nɛɛ mli lɛ haa wɔnáa jamɔ krɔŋŋ he shishinumɔ ko ní he hiaa waa ŋmɛnɛ.
Atsɔɔ Mɔ ni “Yoo” lɛ Ji
3. Mɛni hewɔ ‘yoo’ kene lɛ baaná yiŋtoo ní eeedamɔ nɔ ená miishɛɛ lɛ?
3 Yitso 54 lɛ jeɔ shishi kɛ miishɛɛ wiemɔ, akɛ: “Lá nyamɔ lala bo kene ní ofɔ́ɔɔ! Wó nyamɔ lala nɔ ní obolɔ kɛ miishɛɛ, bo ní okɔ̃mɔ̃ko dã! Ejaakɛ mɔ ni bɛ mɔ ko lɛ bii efá fe mɔ ni yɔɔ wu lɛ bii lɛ, Yehowa kɛɛ.” (Yesaia 54:1) Kwɛ bɔ ni Yesaia mli baafili lɛ aha akɛ eeewie wiemɔi nɛɛ! Ni kwɛ miishɛjemɔ ní amɛmlibaa baaha Yudafoi ní aŋɔ amɛ nom kɛtee Babilon lɛ aná! No mli lɛ, Yerusalem kã shi amaŋfɔ lolo. Yɛ adesa shishinumɔ naa lɛ, ebaafee tamɔ nɔ ni hiɛnɔkamɔ ko bɛ akɛ gbɔmɛi baaba amɛbahi maŋ lɛ mli ekoŋŋ, taakɛ bɔ ni akpaaa gbɛ akɛ yoo kene hiɛ baakã nɔ akɛ eeefɔ́ yɛ egbɔle beaŋ lɛ. Shi nɛkɛ “yoo” nɛɛ yɛ jɔɔmɔ kpele ní ebaaná wɔsɛɛ—ebaafɔ́ babaoo. Yerusalem baaná miishɛɛ aahu ni ebaateke nɔ. Ebaayi obɔ̃ kɛ “bii” loo maŋbii babaoo kɛteke nɔ.
4. (a) Bɔfo Paulo yeɔ ebuaa wɔ ni wɔnaa akɛ Yesaia yitso 54 lɛ baaná mlibaa ní da fe nɔ ni ba yɛ afi 537 D.Ŋ.B. lɛ yɛ mɛɛ gbɛ nɔ? (b) Mɛni ji “ŋwɛi Yerusalem” lɛ?
4 Ekolɛ Yesaia leee, shi egbalɛ lɛ baaná mlibaa fe shikome. Bɔfo Paulo tsɛ́ wiemɔi asɛɛ kɛjɛ Yesaia yitso 54 lɛ ni etsɔɔ mli akɛ “yoo” lɛ feɔ nɔ ko ní he hiaa kwraa fe shikpɔŋ nɔ maŋtiase ní ji Yerusalem he mfoniri. Eŋma akɛ: “Ŋwɛi Yerusalem lɛ ji odehe lɛ, mɔ nɔŋŋ ni ji (wɔ fɛɛ) wɔnyɛ lɛ.” (Galatabii 4:26) Mɛni ji nɛkɛ “ŋwɛi Yerusalem” nɛɛ? Eka shi faŋŋ akɛ, jeee no ji Yerusalem maŋtiase ní yɔɔ Shiwoo Shikpɔŋ lɛ nɔ lɛ. Nakai maŋtiase lɛ ji shikpɔŋ nɔ nɔ̃, jeee “ŋwɛi” nɔ̃ ní yɔɔ ŋwɛi nɔyelihe lɛ. “Ŋwɛi Yerusalem” ji Nyɔŋmɔ ŋwɛi “yoo” lɛ, ni ji egbɛjianɔtoo ní mumɔŋ bɔɔ nii ní he wa lɛ feɔ lɛ.
5. Yɛ mfonirifeemɔŋ shihilɛ ní atsɔɔ mli yɛ Galatabii 4:22-31 lɛ mli lɛ, namɔ (a) Abraham? (b) Sara? (d) Isak? (e) Hagar? (ɛ) Ishmael feɔ amɛhe mfoniri?
5 Shi kɛlɛ, te aaafee tɛŋŋ ní Yehowa aaaná mfonirifeemɔŋ yei enyɔ—ekome ŋwɛi nɔ̃ kɛ ekroko lɛ shikpɔŋ nɔ nɔ̃? Ani nɔ ko ní kɛ ehe kpãaa gbee yɛ enɛ mli? Dabi kwraa. Bɔfo Paulo tsɔɔ mli akɛ anaa hetoo lɛ yɛ gbalɛ mli mfoniri ní Abraham weku lɛ feɔ lɛ mli. (Galatabii 4:22-31; kwɛmɔ “Abraham Weku Lɛ—Eji Gbalɛ Mli Mfoniri,” ní yɔɔ baafa 218 lɛ.) Sara, ni ji yoo “odehe” kɛ Abraham ŋa lɛ, feɔ Yehowa mumɔŋ bɔɔ nii agbɛjianɔtoo ní tamɔ eŋa lɛ he mfoniri. Hagar, ni ji tsulɔ yoo kɛ Abraham ŋa ni ji enyɔ, loo ehemɔ lɛ, feɔ shikpɔŋ nɔ Yerusalem he mfoniri.
6. Mɛɛ shishinumɔ naa Nyɔŋmɔ ŋwɛi gbɛjianɔtoo lɛ kɛ be kakadaŋŋ hi shi ákɛ kene lɛ?
6 Yɛ nakai shishinumɔ ní wɔná lɛ hewɔ lɛ, ehaa wɔjeɔ shishi wɔnaa bɔ ni Yesaia 54:1 lɛ he hiaa waa diɛŋtsɛ lɛ. Beni Sara kɛ afii nyɔŋmai abɔ ehi shi ákɛ kene sɛɛ lɛ, efɔ́ Isak beni eye afii 90. Nakai nɔŋŋ Yehowa ŋwɛi gbɛjianɔtoo lɛ hu kɛ be kakadaŋŋ hi shi kɛtsɔ kene shihilɛ ko mli. Mra mli yɛ Eden tɔ̃ɔ, ni Yehowa wo shi akɛ ‘eyoo’ lɛ baafɔ́ ‘seshi’ lɛ. (1 Mose 3:15) Nɔ ni fe afii 2,000 sɛɛ lɛ, Yehowa kɛ Abraham fee ekpaŋmɔ ní kɔɔ shiwoo Seshi lɛ he lɛ. Shi ehe bahia ní Nyɔŋmɔ “yoo” lɛ kɛ afii ohai babaoo diɛŋtsɛ amɛ̃ aahu dani efɔ́ nakai Seshi lɛ. Shi kɛlɛ, be bashɛ ní nɛkɛ yoo nɛɛ ní tsutsu ko lɛ eji “kene” lɛ bii lɛ bafá kwraa fe heloo naa Israel bii lɛ. Mfonirifeemɔ ni ji yoo kene ní akɛtsu nii lɛ yeɔ ebuaa wɔ ni wɔnaa nɔ hewɔ ní ŋwɛibɔfoi lɛ shweɔ waa akɛ amɛaaye Seshi ní agba afɔ̃ shi lɛ shishɛɛ lɛ he odase lɛ. (1 Petro 1:12) Mɛɛ be enɛ ba mli yɛ naagbee kwraa?
7. Mɛɛ be “ŋwɛi Yerusalem” lɛ ná hegbɛ akɛ emli afili lɛ, taakɛ agba afɔ̃ shi yɛ Yesaia 54:1 lɛ, ni mɛni hewɔ ohaa hetoo nakai?
7 Eka shi faŋŋ akɛ Yesu fɔmɔ ákɛ adesa bi lɛ fee mlifilimɔ be yɛ ŋwɛibɔfoi lɛ ateŋ. (Luka 2:9-14) Shi jeee no ji nifeemɔ ní agba afɔ̃ shi yɛ Yesaia 54:1 lɛ. Beni akɛ mumɔ krɔŋkrɔŋ lɛ fɔ́ Yesu yɛ afi 29 Ŋ.B. lɛ mli pɛ kɛkɛ ni ebatsɔ “ŋwɛi Yerusalem” lɛ mumɔŋ bi, ni Nyɔŋmɔ diɛŋtsɛ kpɛlɛ enɔ yɛ faŋŋ mli akɛ ‘esuɔmɔ Bi lɛ.’ (Marko 1:10, 11; Hebribii 1:5; 5:4, 5) Nakai beaŋ ji be ní Nyɔŋmɔ ŋwɛi “yoo” lɛ ná nɔdaamɔ nɔ̃ kɛha mlifilimɔ, yɛ Yesaia 54:1 lɛ mlibaa mli. Yɛ naagbee lɛ, efɔ́ shiwoo Seshi, ni ji Mesia lɛ! Afii ohai abɔ ní ekɛhi shi akɛ kene lɛ sɛɛ efo. Shi kɛlɛ, jeee no ji emlifilimɔ lɛ naagbee.
Bihii Babaoo Kɛha Yoo Kene Lɛ
8. Mɛni hewɔ Nyɔŋmɔ ŋwɛi “yoo” lɛ ná yiŋtoo ní eeedamɔ nɔ emli afili lɛ yɛ be mli ní efɔ́ shiwoo Seshi lɛ sɛɛ lɛ?
8 Yɛ Yesu gbele kɛ egbohiiashitee ní nyiɛ no sɛɛ ba lɛ sɛɛ lɛ, Nyɔŋmɔ ŋwɛi “yoo” lɛ mli fili lɛ beni ehere Bi ní asumɔɔ waa nɛɛ kɛba ekoŋŋ ákɛ “gbohii ateŋ kromɔ bi lɛ.” (Kolosebii 1:18) Kɛkɛ ni yoo lɛ bɔi mumɔŋ bii babaoo fɔmɔ. Yɛ Pentekoste afi 33 Ŋ.B. lɛ, akɛ mumɔ krɔŋkrɔŋ fɔ Yesu sɛɛnyiɛlɔi aaafee 120 mu, ni atsɔ nakai nifeemɔ lɛ nɔ akpɛlɛ amɛnɔ ákɛ Kristo hefatalɔi gboshiniyelɔi. Yɛ sɛɛ mli yɛ nakai gbi lɛ nɔ nɔŋŋ lɛ, akɛ mɛi krokomɛi 3,000 hu bafata amɛhe. (Yohane 1:12; Bɔfoi lɛ Asaji 1:13-15; 2:1-4, 41; Romabii 8:14-16) Nɛkɛ kuu ni ji bii nɛɛ tee nɔ eda loo amɛyi fá. Dalɛ lɛ ba bibiibibii yɛ Kristendom hemɔkɛyeli kwamɔ lɛ shishijee gbɛ afii ohai lɛ amli. Shi, enɛ batsake yɛ afii ohai 20 lɛ mli.
9, 10. Mɛni famɔ ní akɛha akɛ ‘alɛɛ buu lɛ mli’ lɛ tsɔɔ kɛha yoo ní hiɔ buui amli yɛ blema beaŋ, ni mɛni hewɔ be nɛɛ ji miishɛɛ be kɛha yoo ní tamɔ nakai lɛ?
9 Yesaia tee nɔ egba be ko ní shweremɔ babaoo baaba lɛ he sane efɔ̃ shi akɛ: “Ha ní obuu lɛ mli alɛɛ, ní akpã oshihilɛhe lɛ he mamai lɛ amli: kaalɛte he! Ha ní otãŋkpeei lɛ akɛlɛ, ní okala oshiŋmlitsei lɛ ní awa! Ejaakɛ ooolɛɛ omli kɛaatee ninejurɔ kɛ abɛku, ni oseshi lɛ aaaye jeŋmaji lɛ anɔ, ni amɛaahe shi yɛ amaŋfɔi lɛ amli. Kaashe gbeyei, shi ohiɛ gboŋ, ni kaaha ohiɛ miishwie shi, shi agbeŋ ohiɛ dɔŋŋ; shi ohiɛ aaakpa oblayeiaŋ hiɛgbele lɛ nɔ, ni okulafeemɔ mli heguɔgbee lɛ okaiŋ dɔŋŋ!”—Yesaia 54:2-4.
10 Akɛ Yerusalem wie yɛ biɛ tamɔ nɔ ni eji ŋa kɛ biianyɛ ní hiɔ buui amli, taakɛ Sara hi buui amli lɛ. Kɛ́ akɛ weku ní miida jɔɔ lɛ lɛ, no ji be ní esa akɛ biianyɛ ní tamɔ nɛkɛ akwɛ ní elɛɛ eshia lɛ mli. Ehe miihia ní ekpã eshihilɛhe mamai lɛ kɛ tãŋkpeei lɛ amli ní ekala shiŋmlitsei lɛ ní awa yɛ amɛgbɛhei heei lɛ. Miishɛɛ nitsumɔ ji enɛ kɛha lɛ, ni akɛni nitsumɔ nɛɛ baahe ebe kɛ edekã fɛɛ hewɔ lɛ, ehiɛ baanyɛ akpá afii abɔ ní eye ní ekɛ tsuiyeli susu eyiŋ kɛji akɛ ebaanyɛ efɔ́ bii wɔsɛɛ koni amɛtsa weku tɔkpãa lɛ nɔ lɛ nɔ kwraa.
11. (a) Ajɔɔ Nyɔŋmɔ ŋwɛi “yoo” lɛ yɛ afi 1914 yɛ mɛɛ gbɛ nɔ? (Kwɛmɔ shishigbɛ niŋmaa lɛ.) (b) Kɛjɛ afi 1919 kɛbaa nɛɛ, mɛɛ jɔɔmɔ mɛi ní afɔ amɛ mu ní yɔɔ shikpɔŋ nɔ lɛ ená mli niiashikpamɔ?
11 Akɛ nibii eheefeemɔ be ní tamɔ nɛkɛ jɔɔ shikpɔŋ nɔ Yerusalem yɛ Babilonbii anomŋɔɔ lɛ sɛɛ. Shi ajɔɔ “ŋwɛi Yerusalem” babaoo fe nakai po.a Titri lɛ, kɛjɛ afi 1919 kɛbaa nɛɛ, ‘eseshi’ ní afɔ amɛ mu lɛ eshwere yɛ amɛmumɔŋ shihilɛ ní akɛ amɛ eba mli ehee lɛ mli. (Yesaia 61:4; 66:8) ‘Amɛye jeŋmaji lɛ anɔ,’ kɛ shishinumɔ ákɛ amɛgbɛ amɛshwã kɛtee maŋsɛɛ shikpɔji pii anɔ ni amɛyatao mɛi fɛɛ ní baasumɔ ní amɛfata amɛmumɔŋ weku lɛ he. Nɔ ni jɛ mli ba ji akɛ, shweremɔ ba oyayaayai yɛ bii ní afɔ amɛ mu lɛ anaabuamɔ lɛ mli. Etamɔ nɔ ni aná amɛ naagbee yibɔ ni ji 144,000 lɛ yɛ afi 1930 afii lɛ teŋgbɛ be ko mli. (Kpojiemɔ 14:3) Yɛ nakai beaŋ lɛ, shiɛmɔ nitsumɔ lɛ yiŋtoo titri fe fɛɛ lɛ efeee mɛi ní afɔ amɛ mu lɛ anaabuamɔ dɔŋŋ. Shi kɛlɛ, shweremɔ lɛ waaa mɛi ní afɔ amɛ mu lɛ pɛ nɔ.
12. Kɛfata mɛi ní afɔ amɛ mu lɛ ahe lɛ, namɛi hu abua amɛnaa kɛba Kristofoi asafo lɛ mli kɛjɛ afi 1930 afii lɛ amli kɛbaa?
12 Yesu diɛŋtsɛ gba efɔ̃ shi akɛ yɛ ‘esafoku bibioo’ ni ji enyɛmimɛi ní afɔ amɛ mu lɛ asɛɛ lɛ, ebaaná “tooi krokomɛi” hu ní esa akɛ akɛ amɛ aba tooi akuu ni ji anɔkwa Kristofoi ateŋ. (Luka 12:32; Yohane 10:16) Eyɛ mli akɛ amɛfataaa “ŋwɛi Yerusalem” bii ní afɔ amɛ mu lɛ ahe moŋ, shi mɛi ní afɔ amɛ mu lɛ ahefatalɔi anɔkwafoi nɛɛ tsuɔ gbɛfaŋnɔ ko ní he hiaa, ní agba afɔ̃ shi jeeŋmɔ lɛ he nii. (Zakaria 8:23) Kɛjɛ afi 1930 afii lɛ amli aahu kɛbashi ŋmɛnɛ, abua amɛteŋ “asafo babaoo” ko naa, ni nɔ ni ejɛ mli kɛba ji Kristofoi asafo lɛ mlilɛɛmɔ ní eko ní tamɔ nakai bako dã. (Kpojiemɔ 7:9, 10) Ŋmɛnɛ, nakai asafo babaoo lɛ ayifalɛ shɛɔ akpekpei abɔ. Nɛkɛ shweremɔ babaoo nɛɛ fɛɛ eha Maŋtsɛyeli Asai, Kpeei Asai, kɛ nitsumɔhe niji atsũi ahe ebahia waa diɛŋtsɛ. Yesaia wiemɔi lɛ ebafee nɔ ni sa jogbaŋŋ fe bei fɛɛ ní eho. Kwɛ hegbɛ ní eji akɛ wɔɔfee nakai shweremɔ ní agba afɔ̃ shi lɛ fã!
Biianyɛ ní Kwɛɔ Ebii Jogbaŋŋ
13, 14. (a) Mɛɛ sane ní mli wa anaa faŋŋ yɛ wiemɔi ní akɛ Nyɔŋmɔ ŋwɛi “yoo” lɛ wie lɛ ekomɛi agbɛfaŋ? (b) Mɛɛ sɛɛyoomɔi wɔbaanyɛ wɔná kɛjɛ bɔ ni Nyɔŋmɔ kɛ adesai awekukpaai tsu nii yɛ mfonirifeemɔŋ lɛ mli?
13 Wɔna akɛ yɛ emlibaa wulu mli lɛ, gbalɛ lɛ mli “yoo” lɛ damɔ shi kɛha Yehowa ŋwɛi gbɛjianɔtoo lɛ. Shi kɛ́ wɔkane Yesaia 54:4 lɛ, ekolɛ wɔbaasusu bɔ ni aaafee ní gbɛjianɔtoo ní mumɔŋ bɔɔ nii yɔɔ mli lɛ hiɛ aaagbo loo ehe guɔ aaagbo lɛ he. Kukuji ní nyiɛ sɛɛ lɛ kɛɔ akɛ abaakwá Nyɔŋmɔ “yoo” lɛ, abaapiŋ lɛ, ni abaatutua lɛ. Ebaatée Nyɔŋmɔ mlifu po shi. Te aaafee tɛŋŋ ní nibii ní tamɔ nɛkɛ aaakɔ gbɛjianɔtoo ní bɔɔ nii ní eye emuu ní amɛfeko esha pɛŋ lɛ yɔɔ mli lɛ ahe hu? Hetoo lɛ yɛ bɔ ni ato weku he gbɛjianɔ aha lɛ mli.
14 Yehowa kɛ wekukpaai—wu kɛ ŋa, biianyɛ kɛ bii—tsuɔ nii ni ekɛjieɔ mumɔŋ anɔkwalei ní mli kwɔlɔ kpo ejaakɛ shishinumɔ yɛ nakai okadii lɛ ahe kɛha adesai. Bɔ ni wɔ diɛŋtsɛ wɔná weku niiashikpamɔi wɔha loo bɔ ni niiashikpamɔi lɛ ji lɛ fɛɛ sɛɛ lɛ, eeenyɛ eba akɛ wɔyɛ bɔ ni esa akɛ gbalashihilɛ kpakpa loo fɔlɔ kɛ bi teŋ wekukpaa kpakpa afee lɛ he susumɔ ko. Belɛ, kwɛ bɔ ni Yehowa tsɔɔ wɔ nii faŋŋ diɛŋtsɛ, ákɛ miishɛɛ, kɛ naanyobɔɔ, kɛ hekɛnɔfɔɔ wekukpaa kã ekɛ etsuji ni ji mumɔŋ bɔɔ nii asafoi babaoo lɛ ateŋ! Ni kwɛ gbɛ fɛfɛo ní etsɔɔ nɔ etsɔɔ wɔ akɛ eŋwɛi gbɛjianɔtoo lɛ kwɛɔ ebii ni akɛ mumɔ efɔ amɛ mu ní yɔɔ shikpɔŋ nɔ lɛ anɔ! Kɛ́ etsuji ni ji adesai lɛ na amanehulu lɛ, etsuji anɔkwafoi ní yɔɔ ŋwɛi, ni ji “ŋwɛi Yerusalem” lɛ hu naa amanehulu. Nakai nɔŋŋ Yesu hu wie akɛ: “Gbii abɔ kɛ̃ ní nyɛfee nyɛha minyɛmimɛi [ní akɛ mumɔ efɔ amɛ mu] nɛɛ ateŋ bibioo kome lɛ, mi nɔŋŋ nyɛfee nyɛha lɛ.”—Mateo 25:40.
15, 16. Mɛni ji Yesaia 54:5, 6 lɛ klɛŋklɛŋ mlibaa, ni mɛni ji emlibaa ní da?
15 Belɛ ebɛ naakpɛɛ akɛ wiemɔi ní akɛ Yehowa ŋwɛi “yoo” lɛ wie lɛ mli babaoo jieɔ niiashikpamɔi ní ebii ní yɔɔ shikpɔŋ nɔ lɛ náa lɛ kpo. Susumɔ wiemɔi nɛɛ ahe okwɛ: “Owù ji ofeelɔ lɛ: Yehowa Zebaot ji egbɛi; ní okpɔlɔ ji Israel Mɔ krɔŋkrɔŋ lɛ: aaatsɛ́ lɛ shikpɔŋ lɛ fɛɛ Nyɔŋmɔ! Shi Yehowa etsɛ́o tamɔ yoo ko ní akwa lɛ ní yeɔ ŋkɔmɔ yɛ emumɔ mli, loo tamɔ oblahiiaŋ ŋa ní ashwie lɛ, o-Nyɔŋmɔ lɛ kɛɛ.”—Yesaia 54:5, 6.
16 Namɔ ji ŋa ní akɛwieɔ yɛ biɛ lɛ? Yɛ klɛŋklɛŋ mlibaa lɛ mli lɛ, lɛ ji Yerusalem, ní damɔ shi kɛha Nyɔŋmɔ webii lɛ. Beni amɛye afii 70 yɛ nomŋɔɔ mli yɛ Babilon lɛ, amɛnu he tamɔ nɔ ni Yehowa ekpoo amɛ ni eshi amɛ kwraa. Yɛ emlibaa ní da mli lɛ, wiemɔi lɛ kɔɔ “ŋwɛi Yerusalem” kɛ eniiashikpamɔ ni ji ‘seshi’ ní efɔ́ lɛ yɛ naagbee kwraa ní ekɛha 1 Mose 3:15 lɛ ba mli lɛ he.
Be Kukuoo Mli Toigbalamɔ, Naanɔ Jɔɔmɔi
17. (a) Nyɔŋmɔ mlifu ní ‘teke nɔ’ baaba shikpɔŋ nɔ Yerusalem nɔ yɛ mɛɛ gbɛ nɔ? (b) Mɛɛ nɔ ko ní ‘teke nɔ’ “ŋwɛi Yerusalem” bii lɛ ná mli niiashikpamɔ?
17 Gbalɛ lɛ yaa nɔ akɛ: “Hiŋmɛitswaa kɛkɛ mikwao, shi musuŋtsɔlɛi kpelei mikɛaabua onaa. Mimlifu ní eteke nɔ lɛ mli lɛ mikɛ mihiɛ teeo hiŋmɛitswaa, shi naanɔ mlihilɛ mimusuŋ kɛaatsɔ mi yɛ ohewɔ, Yehowa, o-kpɔlɔ lɛ, kɛɛ.” (Yesaia 54:7, 8) Shikpɔŋ nɔ Yerusalem yi kɛ Nyɔŋmɔ mlifu ní “eteke nɔ” beni Babilon asraafoi baatutua lɛ yɛ afi 607 D.Ŋ.B. lɛ. Afii 70 ní ebaaye yɛ nomŋɔɔ mli lɛ baafee tamɔ be kakadaŋŋ. Shi, nɛkɛ kaai nɛɛ asɛɛkɛlɛ fee “hiŋmɛitswaa” pɛ kɛ́ akɛto naanɔ jɔɔmɔi ní asáa ato mɛi ní boɔ tsɔsemɔ lɛ toi ní amɛtsuɔ he nii jogbaŋŋ lɛ he. Nakai nɔŋŋ “ŋwɛi Yerusalem” bii ní afɔ amɛ mu lɛ hu nu he tamɔ nɔ ni Nyɔŋmɔ mlifu ní ‘teke nɔ’ eye amɛnɔ butuu, beni Yehowa ŋmɛ gbɛ ní maŋkwramɔ hewalɛi batutua amɛ yɛ Babilon Kpeteŋkpele lɛ yisɛɛtsirɛmɔ naa lɛ. Shi kwɛ bɔ ni nakai toigbalamɔ nifeemɔ lɛ fee kuku eha yɛ sɛɛ mli, kɛ́ akɛto mumɔŋ jɔɔmɔi abe ní nyiɛ sɛɛ kɛjɛ afi 1919 kɛbaa lɛ he!
18. Mɛɛ shishitoo mla ní he hiaa abaanyɛ ayoo yɛ Yehowa mlifu ní te shi wo ewebii lɛ gbɛfaŋ, ni te enɛ baanyɛ asa wɔhe aŋkroaŋkro eha tɛŋŋ?
18 Ŋmalɛ kukuji nɛɛ jieɔ anɔkwale kroko ko hu kpo—Nyɔŋmɔ mlifu hoɔ oyá, shi emɔbɔnalɛ hiɔ shi kɛyaa naanɔ. Emli woɔ la ewoɔ efɔŋfeemɔ, shi ekudɔɔ emlila lɛ be fɛɛ be, ni ehaa yiŋtoo hu hiɔ he be fɛɛ be. Ni kɛ́ wɔkpɛlɛ tsɔsemɔ ní Yehowa kɛhaa lɛ nɔ lɛ, emlifu lɛ sɛɛkɛlɛ feɔ “hiŋmɛitswaa” pɛ, kɛkɛ lɛ enaa eba shi. Nɔ ni ekɛyeɔ najiaŋ ji ‘emusuŋtsɔlɛi kpelei’—eshaifaa kɛ mlihilɛ ní ejieɔ lɛ kpo lɛ. Enɛɛmɛi hiɔ shi kɛyaa “naanɔ.” Belɛ, kɛ́ wɔfee esha ko lɛ, esaaa akɛ wɔshashaoɔ shi akɛ wɔɔshwa wɔhe ní wɔtao akɛ wɔɔsaa wɔkɛ Nyɔŋmɔ teŋ. Kɛji esha lɛ ji nɔ ni hiɛdɔɔ yɔɔ mli lɛ, no lɛ esa akɛ wɔbɛŋkɛ asafo lɛ mli onukpai lɛ amrɔ nɔŋŋ. (Yakobo 5:14) Lɛɛlɛŋ, ekolɛ tsɔsemɔ he baahia, ni enɔkpɛlɛmɔ baanyɛ afee nɔ ni wa kɛha wɔ. (Hebribii 12:11) Shi no baafee be kukuoo mli nifeemɔ ko kɛkɛ, kɛ́ akɛto naanɔ jɔɔmɔi ní jɛɔ Yehowa Nyɔŋmɔ dɛŋ eshaifaa ní wɔnáa lɛ mli kɛbaa lɛ he!
19, 20. (a) Mɛni ji kwaabuɛtɛ kpaŋmɔ lɛ, ni ekɔɔ nomii ni yɔɔ Babilon lɛ ahe yɛ mɛɛ gbɛ nɔ?(b) ‘Hejɔlɛ kpaŋmɔ’ lɛ haa Kristofoi ní afɔ amɛ mu lɛ náa mɛɛ nɔmimaa ŋmɛnɛ?
19 Agbɛnɛ Yehowa kɛ ewebii lɛ wie nɔmimaa wiemɔi ní shɛjeɔ mɔ mii nɛɛ akɛ: “Shi enɛ tamɔ Noa nui lɛ ha mi: bɔ ni mikã kita akɛ Noa nui lɛ ebahaŋ shikpɔŋ lɛ nɔ dɔŋŋ lɛ, nakai mikã kita akɛ mimli fuŋo, ni asaŋ mijɛŋo dɔŋŋ. Shi gɔji lɛ aaatsi aya, ni gɔŋkpɔi lɛ hu aaagbeegbee shi, shi mimlihilɛ lɛ tsiŋ kɛjɛŋ onɔ, ni mihejɔlɛ kpaŋmɔ lɛ hu egbeeŋ shi, Yehowa, mɔ ni musuŋ tsɔɔ lɛ yɛ ohe lɛ, kɛɛ.” (Yesaia 54:9, 10) Yɛ Nu Afua lɛ sɛɛ lɛ, Nyɔŋmɔ fee kpaŋmɔ ko—nɔ ni atsɛ́ɔ lɛ bei komɛi ákɛ kwaabuɛtɛ kpaŋmɔ lɛ—yɛ ekɛ Noa kɛ susumai krokomɛi ní hiɛ kamɔ lɛ fɛɛ ateŋ. Yehowa wo shi akɛ ekɛ hiɛkpatamɔ baŋ shikpɔŋ lɛ nɔ kɛtsɔ jeŋ muu fɛɛ nu afua nɔ dɔŋŋ. (1 Mose 9:8-17) Mɛni no tsɔɔ kɛha Yesaia kɛ emaŋbii lɛ?
20 Eji miishɛjemɔ akɛ amɛaale akɛ toigbalamɔ ní amɛbaaná—ni ji afii 70 nomŋɔɔ yɛ Babilon lɛ—baaba shikome pɛ. Kɛ́ esɛɛ fo lɛ, eko baŋ dɔŋŋ. Yɛ no sɛɛ lɛ, Nyɔŋmɔ ‘toiŋjɔlɛ kpaŋmɔ’ lɛ baabɔi nitsumɔ. Hebri wiemɔ kɛha ‘toiŋjɔlɛ’ lɛ shishinumɔ etsɔɔɔ tawuu ní bɛ kɛkɛ, shi moŋ etsɔɔ shihilɛ hilɛ-kɛhamɔ yɛ gbɛ̀i srɔtoi fɛɛ hu nɔ. Yɛ Nyɔŋmɔ gbɛfaŋ lɛ, nɛkɛ kpaŋmɔ nɛɛ baahi shi daa. Gɔji kɛ gɔŋkpɔi lɛ baalaaje oyá, moŋ fe ní mlihilɛ ní eyɔɔ kɛha ewebii anɔkwafoi lɛ sɛɛ baafo. Dɔlɛ sane ji akɛ, yɛ naagbee lɛ, emaŋ ní yɔɔ shikpɔŋ nɔ lɛ yeŋ amɛgbɛfaŋnɔ yɛ kpaŋmɔ lɛ mli lɛ mli anɔkwale, ni amɛbaafite amɛ diɛŋtsɛ amɛtoiŋjɔlɛ lɛ kɛtsɔ kpoomɔ ní amɛaakpoo Mesia lɛ nɔ. Shi kɛlɛ, shihilɛ lɛ hi kwraa kɛha “ŋwɛi Yerusalem” bii lɛ. Beni amɛjaramɔ be ni ji toigbalamɔ lɛ ba naagbee lɛ, ama ŋwɛi hebuu nɔ mi aha amɛ agbɛnɛ.
Nyɔŋmɔ Webii Amumɔŋ Shweshweeshwe Shihilɛ
21, 22. (a) Mɛni hewɔ awieɔ “ŋwɛi Yerusalem” he akɛ enii yɛ mɔbɔ ni ahum miitswa lɛ lɛ? (b) Mɛni Nyɔŋmɔ ŋwɛi “yoo” lɛ jɔɔmɔ shihilɛ lɛ baatsɔɔ yɛ ‘ebii’ ní yɔɔ shikpɔŋ nɔ lɛ agbɛfaŋ?
21 Yehowa tee nɔ egba shweshweeshwe shihilɛ efɔ̃ shi kɛha ewebii anɔkwafoi lɛ akɛ: “Bo ní onii yɔɔ mɔbɔ ní ahum tswaao ní ashɛjeee omii! Naa, mi lɛ, matswa otɛi lɛ kɛ wulamɔ, ni mato oshishi kɛ safiro tɛi; ni maŋɔ rubi tɛi mafee ogbogboi lɛ ayiteaŋ, ni ogbói lɛ mikɛ karfunkle tɛi aaafee, ni ohusui lɛ anɔ fɛɛ lɛ tɛi fɛfɛji sɔŋŋ; ni obii lɛ fɛɛ aaafee Yehowa kaselɔi, ni maha obii lɛ hejɔlɛ babaoo. Aaaŋɔo ama shi yɛ jalɛ mli: okɛ yiwalɛ teŋ aaajɛkɛ, ni osheŋ gbeyei, okɛ hekpokpomɔ hu teŋ aaajɛkɛ, ni ebɛŋkɛŋo. Naa, kɛ́ amɛkɛo bé lɛ, jeee mi ejɛ, mɔ fɛɛ mɔ ní kɛo aaabé lɛ, aaagbee shi!”—Yesaia 54:11-15.
22 Yɛ anɔkwale mli lɛ, Yehowa “yoo” ní yɔɔ mumɔi ashihilɛhe lɛ nii efeko mɔbɔ loo ní ahum ko aaatswa lɛ tɛ̃ɛ dã. Shi ena amanehulu beni ‘ebii’ ní afɔ amɛ mu ní amɛyɔɔ shikpɔŋ nɔ lɛ na amanehulu lɛ, titri lɛ beni amɛyɔɔ mumɔŋ nomŋɔɔ shihilɛ mli yɛ afi 1918-1919 be lɛ mli lɛ. Nɔ ni tamɔɔɔ enɛ lɛ, beni awo ŋwɛi “yoo” lɛ hiɛ nyam lɛ, enɛ je kpo yɛ shihilɛ ní tamɔ nakai mli yɛ ebii lɛ ateŋ. Belɛ, susumɔ wiemɔi kpakpai ní akɛtsɔɔ bɔ ni “ŋwɛi Yerusalem” ji lɛ he okwɛ. Ojarawa tɛi ní yɔɔ agbói lɛ anɔ, “wulamɔ” ní jara wa waa, shishitoo nii lɛ, kɛ husui lɛ po tsɔɔ, taakɛ wolo ko wie he lɛ, ákɛ enɛɛmɛi fɛɛ tsɔɔ “fɛo, agbojee, krɔŋŋfeemɔ, hewalɛ, kɛ shiŋŋfeemɔ.” Mɛni baaha Kristofoi ní afɔ amɛ mu lɛ anine anyɛ ashɛ shweshweeshwefeemɔ kɛ jɔɔmɔ shihilɛ ní tamɔ nɛkɛ nɔ?
23. (a) Mɛɛ hewalɛ “Yehowa kaselɔi” ní Kristofoi ní afɔ amɛ mu lɛ ji lɛ ená yɛ amɛnɔ yɛ naagbee gbii lɛ amli? (b) Akɛ ‘husui ní akɛ tɛi fɛfɛji sɔŋŋ efo’ ejɔɔ Nyɔŋmɔ webii lɛ yɛ mɛɛ shishinumɔ naa?
23 Yesaia yitso 54, kuku 13 lɛ tsɔɔ wɔ gbɛ krɛdɛɛ ní wɔɔtsɔ nɔ wɔle—mɛi fɛɛ baafee “Yehowa kaselɔi.” Yesu diɛŋtsɛ kɛ ŋmalɛ kuku nɛɛ mli wiemɔi lɛ to esɛɛnyiɛlɔi ní afɔ amɛ mu lɛ ahe. (Yohane 6:45) Gbalɔ Daniel gba efɔ̃ shi akɛ akɛ anɔkwa nilee babaoo kɛ mumɔŋ sɛɛyoomɔ baajɔɔ mɛi ní afɔ amɛ mu lɛ, yɛ nɛkɛ “naagbee be” nɛɛ mli. (Daniel 12:3, 4) Sɛɛyoomɔ nɛɛ eye ebua amɛ ni amɛnyiɛ tsɔsemɔ he tafãa kpele fe fɛɛ yɛ yinɔsane mli lɛ hiɛ, ni amɛgbɛ ŋwɛi nitsɔɔmɔ amɛshwã shikpɔŋ lɛ fɛɛ nɔ. (Mateo 24:14) Yɛ nakai beaŋ nɔŋŋ lɛ, sɛɛyoomɔ nɛɛ eye ebua amɛ ni amɛna srɔtofeemɔ ni yɔɔ anɔkwa jamɔ kɛ apasa jamɔ teŋ. Yesaia 54:12 lɛ tsĩɔ ‘husui ní akɛ tɛi fɛfɛji sɔŋŋ efo’ tã. Kɛjɛ afi 1919 kɛbaa nɛɛ, Yehowa eha mɛi ní afɔ amɛ mu lɛ ená husui—ni ji liamɔi ní tsɔɔ mumɔŋ husui lɛ—ahe shishinumɔ ni yaa nɔ efeɔ faŋŋ, ni no haa esoroɔ amɛ kɛjɛɔ apasa jamɔ kɛ je lɛŋ nibii ní Nyɔŋmɔ gbeyeishemɔ bɛ mli lɛ ahe. (Ezekiel 44:23; Yohane 17:14; Yakobo 1:27) Enɛ hewɔ lɛ ahaa esoroɔ amɛ kwraa ákɛ Nyɔŋmɔ diɛŋtsɛ webii.—1 Petro 2:9.
24. Mɛɛ gbɛ nɔ wɔɔtsɔ wɔná nɔmimaa akɛ Yehowa miitsɔɔ wɔ nii?
24 Enɛ hewɔ lɛ, wɔteŋ mɔ fɛɛ mɔ baafee jogbaŋŋ akɛ eeebi ehe akɛ, ‘Ani Yehowa miitsɔɔ mi nii?’ Nakai tsɔsemɔ ní wɔnine shɛɔ nɔ lɛ diɛŋtsɛ baaa kɛkɛ. Esa akɛ wɔkɛ mɔdɛŋbɔɔ atsu he nii. Kɛ́ wɔkaneɔ Nyɔŋmɔ Wiemɔ lɛ daa ni wɔjwɛŋɔ nɔ, ni wɔkpɛlɛɔ gbɛtsɔɔmɔi anɔ kɛtsɔ Biblia kasemɔ woji ní “tsulɔ anɔkwafo kɛ nilelɔ” lɛ eŋmala lɛ akanemɔ nɔ, ni wɔsaa wɔhe kɛhaa Kristofoi akpeei ni wɔkɛ wɔhe woɔ mli hu lɛ, no lɛ Yehowa miitsɔɔ wɔ nii lɛɛlɛŋ. (Mateo 24:45-47) Kɛ́ wɔbɔ mɔdɛŋ akɛ wɔkɛ nɔ ni wɔkaseɔ lɛ baatsu nii koni wɔya nɔ wɔshi kpe yɛ mumɔŋ ní wɔsara lɛ, no lɛ ŋwɛi nitsɔɔmɔ baaha esoro wɔ kwraa ákɛ mɛi ni yɔɔ srɔto yɛ jeŋ ní bɛ Nyɔŋmɔ gbeyeishemɔ nɛɛ mli. (1 Petro 5:8, 9) Nɔ ni fe fɛɛ lɛ, ebaaye ebua wɔ ní ‘wɔtsi wɔbɛŋkɛ Nyɔŋmɔ.’—Yakobo 1:22-25; 4:8.
25. Mɛni Nyɔŋmɔ toiŋjɔlɛ he shiwoo lɛ tsɔɔ kɛhaa ewebii yɛ ŋmɛnɛŋmɛnɛ beaŋ?
25 Yesaia gbalɛ lɛ hu tsɔɔ akɛ akɛ toiŋjɔlɛ babaoo diɛŋtsɛ ejɔɔ mɛi ní afɔ amɛ mu lɛ. Ani enɛ tsɔɔ akɛ amɛbaaa tutuamɔ shishi kɔkɔɔkɔ? Dabi, shi Nyɔŋmɔ kɛ nɔmimaa haa akɛ efãŋ ní akɛ tutuamɔi ní tamɔ nɛkɛ aba amɛnɔ, ní eŋmɛŋ gbɛ ní amɛye omanye hu. Wɔkaneɔ akɛ: “Naa, mi mibɔ sɔ̃lɔ ní huuɔ ŋãi kɛ la, ní esɔ̃ɔ tawuu nii yɛ enitsumɔ lɛ mli lɛ; ni mi nɔŋŋ mibɔ fitelɔ hu, koni ekpata hiɛ. Tawuu nii ní asɔ̃ɔ ashiɔo lɛ eko eko nyɛŋ nɔ ko afee, ni lilɛi fɛɛ lilɛi ní aaate shi ní ekɛo akojo lɛ, ooobu lɛ fɔ́. Enɛ ji Yehowa tsuji lɛ agboshinii, kɛ amɛjalɛ ní jɛ midɛŋ, Yehowa kɛɛ!”—Yesaia 54:16, 17.
26. Mɛni hewɔ eji miishɛɛ sane akɛ aaale akɛ Yehowa ji adesai fɛɛ a-Bɔlɔ lɛ?
26 Enɛ ji shii enyɔ nɔ ní Yehowa kaiɔ etsuji yɛ Yesaia wolo lɛ yitso nɛɛ mli akɛ lɛ ji Bɔlɔ lɛ. Mra mli kɛtsɔ hiɛ lɛ, ekɛɛ efonirifeemɔŋ ŋa lɛ akɛ lɛ ji ‘Efeelɔ Kpeteŋkpele’ lɛ. Amrɔ nɛɛ, eekɛɛ akɛ lɛ ji adesai fɛɛ a-Bɔlɔ. Kuku 16 lɛ wieɔ sɔ̃lɔ ko he ní eehuu ŋãi la yɛ esɔ̃ŋmɛ mli beni esɔ̃ɔ etawuu nii ní kpataa nii ahiɛ lɛ, kɛ tabilɔ, ni ji “fitelɔ hu, koni ekpata hiɛ.” Gbɔmɛi tamɔ sɔ̃lɔ kɛ tabilɔ baanyɛ afee mɛi ní he yɔɔ gbeyei kɛha amɛnanemɛi adesai, shi te amɛaafee tɛŋŋ ní amɛaakpa gbɛ akɛ amɛaaye amɛ diɛŋtsɛ amɛ-Bɔlɔ lɛ nɔ kunim hu? No hewɔ lɛ ŋmɛnɛ, kɛ́ je lɛŋ tai ní he wa fe fɛɛ lɛ tutua Yehowa webii po lɛ, amɛnáŋ hegbɛ ko kwraa akɛ amɛaaye omanye yɛ naagbee. Te eeefee tɛŋŋ eba lɛ nakai?
27, 28. Wɔbaanyɛ wɔná nɔmimaa yɛ mɛni he yɛ jaramɔ bei nɛɛ amli, ni mɛni hewɔ wɔle akɛ Satan tutuamɔi ní ekɛshiɔ wɔ lɛ yeŋ omanye lɛ?
27 Be ní akɛ hiɛkpatamɔ tutuamɔ aaaba Nyɔŋmɔ webii kɛ amɛjamɔ ní amɛkɛhaa lɛ yɛ mumɔ kɛ anɔkwale mli lɛ nɔ lɛ eho momo. (Yohane 4:23, 24) Yehowa ŋmɛ Babilon Kpeteŋkpele lɛ gbɛ ni ekɛ tutuamɔ ko ní tamɔ nɔ ni ye omanye yɛ be kukuoo mli lɛ ba. “Ŋwɛi Yerusalem” na akɛ aha ebii lɛ efee dioo, yɛ be kukuoo ko mli, beni efee tamɔ nɔ ni shiɛmɔ nitsumɔ ní yaa nɔ yɛ shikpɔŋ lɛ nɔ lɛ sɛɛ efo kwraa lɛ. Shi ebaŋ lɛ nakai dɔŋŋ! Amrɔ nɛɛ emli filiɔ lɛ yɛ ebii lɛ ahe, ejaakɛ anyɛɛɛ aye amɛnɔ kunim dɔŋŋ, yɛ mumɔŋ shishinumɔ naa. (Yohane 16:33; 1 Yohane 5:4) Hɛɛ, asɔ̃ tawuu nii ní akɛtutuaa mɔ ashi amɛ, ni abaashɔ̃ babaoo ashi amɛ lolo. (Kpojiemɔ 12:17) Shi enɛɛmɛi eko yeko omanye, ni eko eko yeŋ omanye hu. Satan bɛ tawuu nii ko ní baanyɛ aye mɛi ní afɔ amɛ mu lɛ kɛ amɛhefatalɔi lɛ ahemɔkɛyeli kɛ ekãa ní naa wa lɛ nɔ kunim. Nɛkɛ mumɔŋ toiŋjɔlɛ nɛɛ ji “Yehowa tsuji lɛ agboshinii,” no hewɔ lɛ mɔ ko mɔ ko nyɛŋ ekɛ ekãa ahe yɛ amɛdɛŋ kɔkɔɔkɔ.—Lala 118:6; Romabii 8:38, 39.
28 Dabi, nɔ ko bɛ ní Satan je lɛ baanyɛ afee ní ekɛha Nyɔŋmɔ tsuji ní ejɔɔ amɛhe nɔ amɛha lɛ lɛ anitsumɔ kɛ jamɔ krɔŋŋ ní amɛkɛhaa lɛ daa lɛ sɛɛ afo. “Ŋwɛi Yerusalem” bii ní afɔ amɛ mu lɛ ená miishɛjemɔ kpele yɛ nakai nɔmimaa lɛ mli. Asafo babaoo lɛ mli bii lɛ hu feɔ nakai nɔŋŋ. Babaoo ní wɔbaleɔ Yehowa ŋwɛi gbɛjianɔtoo lɛ kɛ bɔ ni ekɛ ejálɔi ní yɔɔ shikpɔŋ nɔ lɛ yeɔ haa lɛ he sane lɛ, babaoo ní wɔhemɔkɛyeli lɛ mli waa ji no. Bei abɔ ní wɔhemɔkɛyeli lɛ mli wa lɛ, Satan tawuu nii lɛ baafee efolo yɛ ta ní ewuɔ eshiɔ wɔ lɛ mli!
[Shishigbɛ niŋmaa]
a Taakɛ Kpojiemɔ 12:1-17 lɛ tsɔɔ lɛ, ajɔɔ Nyɔŋmɔ “yoo” lɛ babaoo kɛtsɔ “seshi” ni he hiaa fe fɛɛ ní efɔ́ lɛ lɛ nɔ—ejeee mumɔŋ bi aŋkro ko, shi moŋ Mesia Maŋtsɛyeli lɛ yɛ ŋwɛi. Nɛkɛ fɔmɔ nɛɛ ba yɛ afi 1914. (Kwɛmɔ Kpojiemɔ—Enaagbee Kwraa lɛ Ebɛŋkɛ!, baafai 177-186.) Yesaia gbalɛ lɛ gbalaa jwɛŋmɔ kɛyaa miishɛɛ ní enáa yɛ Nyɔŋmɔ jɔɔmɔi ní yɔɔ ebii ní afɔ amɛ mu lɛ anɔ yɛ shikpɔŋ nɔ lɛ hewɔ lɛ nɔ.
[Akrabatsa ni yɔɔ baafa 218, 219]
Abraham Weku Lɛ—Eji Gbalɛ Mli Mfoniri
Bɔfo Paulo tsɔɔ mli akɛ Abraham weku lɛ feɔ mfonirifeemɔŋ okadi ko, ni ji wekukpaa ní yɔɔ Yehowa kɛ eŋwɛi gbɛjianɔtoo lɛ, kɛ eshikpɔŋ nɔ maŋ Israel ní hi Mose Mla kpaŋmɔ lɛ shishi lɛ hu teŋ lɛ he gbalɛ mli mfoniri.—Galatabii 4:22-31.
Abraham, ákɛ weku yitso lɛ, damɔ shi kɛha Yehowa Nyɔŋmɔ. Suɔmɔ mli ní Abraham jɛ ekpɛlɛ akɛ ekɛ esuɔmɔ bi Isak baashã afɔle lɛ feɔ bɔ ni Yehowa jɛ esuɔmɔ mli ekɛ lɛ diɛŋtsɛ esuɔmɔ Bi lɛ ha ákɛ afɔleshaa kɛha adesai ahe eshai lɛ he mfoniri.—1 Mose 22:1-13; Yohane 3:16.
Sara feɔ Nyɔŋmɔ ŋwɛi “ŋa,” ni ji emumɔŋ bɔɔ nii agbɛjianɔtoo lɛ he mfoniri. Awieɔ nakai ŋwɛi gbɛjianɔtoo lɛ he yɛ gbɛ ní ja nɔ akɛ Yehowa ŋa, ejaakɛ ekɛ Yehowa bɔɔ gbagbalii, ni ebaa ehe shi ehaa eyitsoyeli lɛ, ni ekɛ lɛ feɔ ekome kɛmɔɔ shi kɛhaa eyiŋtoi ahe nitsumɔ. Atsɛ́ɔ lɛ hu akɛ “ŋwɛi Yerusalem.” (Galatabii 4:26) Atsĩ nakai “yoo” lɛ nɔŋŋ tã yɛ 1 Mose 3:15, ni afee ehe mfoniri yɛ ninaa mli yɛ Kpojiemɔ 12:1-6, 13-17.
Isak feɔ Nyɔŋmɔ yoo lɛ mumɔŋ Seshi lɛ he mfoniri. Seshi lɛ diɛŋtsɛ ji Yesu Kristo. Shi kɛlɛ, Kristo nyɛmimɛi ní afɔ amɛ mu lɛ, ní akpɛlɛ amɛ nɔ ákɛ mumɔŋ bii, ní amɛbatsɔmɔ Kristo nanemɛi gboshiniyelɔi lɛ hu bafata seshi lɛ he.—Romabii 8:15-17; Galatabii 3:16, 29.
Hagar, Abraham ŋa ni ji enyɔ, loo ehemɔ lɛ, ji nyɔŋ. Efeɔ shikpɔŋ nɔ Yerusalem, he ni akɛ Mose Mla gbɛjianɔtoo lɛ tsu nii yɛ, ní ejie mɛi ni yeɔ nɔ lɛ fɛɛ kpo faŋŋ akɛ amɛji esha kɛ gbele nyɔji lɛ he mfoniri yɛ gbɛ ní ja nɔ. Paulo wie akɛ “Hagar ji Sinai gɔŋ lɛ yɛ Arabia,” ejaakɛ jɛmɛ ato Mla kpaŋmɔ lɛ shishi yɛ.—Galatabii 3:10, 13; 4:25.
Ishmael, Hagar binuu lɛ, feɔ klɛŋklɛŋ afii oha lɛ mli Yudafoi, ni ji Yerusalem bii ní ji nyɔji yɛ Mose Mla lɛ shishi lolo lɛ ahe mfoniri. Taakɛ Ishmael wa Isak yi lɛ, nakai pɛpɛɛpɛ nakai Yudafoi lɛ hu wa Kristofoi, ni ji mfonirifeemɔŋ Sara, “ŋwɛi Yerusalem” lɛ bii ní afɔ amɛ mu lɛ ayi. Ni taakɛ bɔ ni Abraham shwie Hagar kɛ Ishmael lɛ, yɛ naagbee lɛ Yehowa kpoo Yerusalem kɛ ebii atuatselɔi lɛ kwraa.—Mateo 23:37, 38.
[Mfoniri ni yɔɔ baafa 220]
Yɛ Yesu baptisimɔ sɛɛ lɛ, akɛ mumɔ krɔŋkrɔŋ fɔ lɛ mu, ni Yesaia 54:1 lɛ bɔi emlibaa ní he hiaa fe fɛɛ namɔ
[Mfoniri ni yɔɔ baafa 225]
Yehowa kɛ ehiɛ tée Yerusalem yɛ “hiŋmɛitswaa” pɛ mli
[Mfonirii ni yɔɔ baafa 231]
Ani tawulɔ kɛ sɔ̃lɔ aaanyɛ aye amɛ-Bɔlɔ lɛ nɔ kunim?