Yitso Kpaanyɔ

Yehowa Nyɔŋmɔ yɛ Esɔlemɔtsu Krɔŋkrɔŋ lɛ Mli

Yesaia 6:1-13

1, 2. (a) Mɛɛ be gbalɔ Yesaia na eninaa ní kɔɔ sɔlemɔtsu lɛ he lɛ? (b) Mɛni hewɔ Maŋtsɛ Uzia laaje Yehowa hiɛ duromɔ lɛ?

“AFI nɔ ni maŋtsɛ Uzia gbo lɛ, mina Nuntsɔ lɛ ní etá maŋtsɛsɛi ni kwɔ gojoo ko nɔ, ni etade naamuui lɛ eyi sɔlemɔwe lɛ obɔ̃.” (Yesaia 6:1) Gbalɔ lɛ wiemɔi nɛɛ ji nɔ ni ekɛjeɔ Yesaia wolo lɛ yitso 6 lɛ shishi. Afi lɛ ji afi 778 D.Ŋ.B.

² Afii 52 ní Uzia kɛye nɔ ákɛ Yuda maŋtsɛ lɛ mli babaoo ye omanye jogbaŋŋ diɛŋtsɛ. Akɛni efee nɔ ni “ja yɛ Yehowa hiɛ” hewɔ lɛ, ená Nyɔŋmɔ sɛɛfimɔ mli ŋɔɔmɔ yɛ esraafoi anitsumɔ, kɛ etsũmaa, kɛ okwaayeli nitsumɔi lɛ amli. Shi omanye ní eye lɛ nɔŋŋ kɛ eshigbeemɔ ba. Yɛ naagbee lɛ, etsui bawó ehe nɔ, “ni etɔ̃ Yehowa, e-Nyɔŋmɔ lɛ, nɔ; ejaakɛ etee Yehowa sɔlemɔtsu lɛŋ, ni eyashã tsofa-kɛ-ŋma.” Henɔwomɔ nifeemɔ nɛɛ kɛ emli ní fũ osɔfoi ní tsĩ enaa lɛ hewɔ lɛ, Uzia gbó akɛ kpitiyelɔ. (2 Kronika 26:3-22) Aaafee be nɛɛ mli ni Yesaia je esɔɔmɔ ákɛ gbalɔ lɛ shishi.

 3. (a) Ani Yesaia na Yehowa diɛŋtsɛ? Tsɔɔmɔ mli. (b) Mɛɛ ninaa ko Yesaia na, ni yɛ mɛɛ yiŋtoo hewɔ?

³ Akɛɛɛ wɔ he ni Yesaia yɔɔ beni ena ninaa lɛ. Shi eyɛ faŋŋ akɛ nɔ ni ekɛ ehiŋmɛii diɛŋtsɛ na lɛ ji ninaa, jeee Ofe lɛ diɛŋtsɛ ena lɛ, ejaakɛ “Nyɔŋmɔ lɛ, mɔ ko enako lɛ pɛŋ.” (Yohane 1:18; 2 Mose 33:20) Shi kɛlɛ, na ní aaana Bɔlɔ, Yehowa, yɛ ninaa mli po lɛ ji nikwɛmɔ ko ní yɔɔ gbeyei. Jeŋ Muu Fɛɛ Nɔyelɔ kɛ nɔyeli ní ja gbɛ fɛɛ Jɛɛhe lɛ tá maŋtsɛsɛi ní nɔ kwɔ gojoo, ní feɔ egbɛhe ákɛ naanɔ Maŋtsɛ kɛ Kojolɔ lɛ he mfoniri lɛ nɔ! Etade kakadaŋŋ ni tsotsoroɔ shi lɛ naamuui lɛ eyi sɔlemɔtsu lɛ obɔ̃. Aatsɛ Yesaia kɛha gbalɛ he sɔɔmɔ ní baawó Yehowa nɔyeli hewalɛ kɛ ejalɛ saneyeli lɛ nɔ gojoo. Yɛ hesaamɔ mli lɛ, abaaha ena Nyɔŋmɔ krɔŋkrɔŋfeemɔ lɛ he ninaa.

 4. (a) Mɛni hewɔ esa akɛ bɔ ni atsɔɔ akɛ ana Yehowa aha yɛ ninaa mli, ní aŋmala yɛ Biblia lɛ mli lɛ afee mfonirifeemɔ lɛ? (b) Mɛni wɔkaseɔ yɛ Yehowa he kɛjɛɔ Yesaia ninaa lɛ mli?

⁴ Yesaia kɛ bɔ ni Yehowa pueɔ ehaa lɛ mlitsɔɔmɔ ko haaa yɛ eninaa lɛ mli—taakɛ eji yɛ ninaai ní Ezekiel, Daniel, kɛ Yohane bɔ he amaniɛ lɛ amli lɛ. Ni saji nɛɛ fɛɛ yɛ srɔtoi yɛ nɔ ni ana yɛ ŋwɛi lɛ gbɛfaŋ. (Ezekiel 1:26-28; Daniel 7:9, 10; Kpojiemɔ 4:2, 3) Shi, esa akɛ aha bɔ ni ninaai nɛɛ ji, kɛ yiŋtoo ní yɔɔ sɛɛ lɛ ahi jwɛŋmɔ mli. Amɛjeee bɔ ni Yehowa ji lɛ mlitsɔɔmɔi diɛŋtsɛ. Heloonaa hiŋmɛi nyɛɛɛ ana mumɔŋ nibii, ni nakai nɔŋŋ adesa jwɛŋmɔ ní yashiɔ he ko lɛ hu nyɛŋ anu mumɔi ashihilɛhe lɛ mli nibii ashishi. No hewɔ lɛ, ninaai lɛ kɛ saji ní ataoɔ akɛha lɛ haa yɛ adesai awiemɔi amli. (Okɛto Kpojiemɔ 1:1 he.) Bɔ ni Nyɔŋmɔ pueɔ ehaa lɛ mlitsɔɔmɔ he ehiaaa yɛ Yesaia ninaa lɛ mli. Ninaa lɛ tswaa Yesaia adafi akɛ Yehowa yɛ esɔlemɔtsu krɔŋkrɔŋ lɛ mli, ni ákɛ eyɛ krɔŋkrɔŋ ni ekojomɔi lɛ hu yɛ krɔŋŋ.

Serafim Lɛ

 5. (a) Namɛi ji serafim lɛ, ni mɛni ji wiemɔ lɛ shishinumɔ? (b) Mɛni hewɔ serafim lɛ tsĩɔ amɛhiɛ kɛ amɛnaji ahe lɛ?

⁵ Bó toi! Yesaia yaa nɔ akɛ: “Serafim damɔ ehewɔ, amɛteŋ mɔ fɛɛ mɔ yɛ fiji ekpaa ekpaa; ekɛ enyɔ haa ehiɛ, ni ekɛ enyɔ haa enaji ahe, ni ekɛ enyɔ hu filikiɔ.” (Yesaia 6:2) Yesaia yitso 6 lɛ mli pɛ wɔnaa ní atsĩ serafim tã yɛ Biblia lɛ mli. Eka shi faŋŋ akɛ, amɛji bɔɔnii ni ji ŋwɛibɔfoi ní sɔmɔɔ Yehowa, ni nɔ kwɔlɔ waa yɛ hegbɛi kɛ woo gbɛfaŋ, ejaakɛ amɛdamɔɔ shi kɛbɔleɔ Yehowa ŋwɛi maŋtsɛsɛi lɛ he fɛɛ kɛkpeɔ. Ákɛ mɛi ni tamɔɔɔ Maŋtsɛ Uzia henɔwolɔ lɛ, amɛdamɔɔ amɛgbɛhe lɛ yɛ heshibaa kɛ humifeemɔ fɛɛ mli. Akɛni amɛdamɔ ŋwɛi Maŋtsɛ lɛ hiɛ diɛŋtsɛ hewɔ lɛ, amɛkɛ amɛfiji lɛ ateŋ enyɔ haa amɛhiɛ; ni bulɛ ní amɛyɔɔ kɛha shihilɛhe krɔŋkrɔŋ lɛ hewɔ lɛ, amɛkɛ enyɔ kroko hu haa amɛnaji ahe. Akɛni amɛbɛŋkɛ Jeŋ Muu Fɛɛ Maŋtsɛ lɛ hewɔ lɛ, serafim lɛ tsĩɔ amɛhiɛ yɛ amɛhiɛ ní gboɔ lɛ hewɔ, koni amɛkagbala jwɛŋmɔ kɛmiijɛ Nyɔŋmɔ diɛŋtsɛ anunyam lɛ he. Wiemɔ “serafim,” ní shishi ji “mɛi ní tamɔ la” loo “mɛi ní tsoɔ” lɛ tsɔɔ akɛ, la kpɛlɛɔ kɛjɛɔ amɛhe, ni kɛlɛ amɛtsĩɔ amɛhiɛ kɛjɛɔ Yehowa kpɛmɔ kɛ anunyam kpeteŋkpele lɛ he.

 6. Mɛni ji serafim lɛ agbɛhe kɛ́ akɛ amɛ miito Yehowa he?

⁶ Serafim lɛ kɛ amɛfiji enyɔ ní eshwɛ lɛ filikiɔ, ni ŋwanejee ko bɛ he akɛ, ni amɛkɛyaa kɛbaa, loo ‘amɛdamɔɔ shi,’ yɛ amɛgbɛhei. (Okɛto 5 Mose 31:15 he.) Nilelɔ Franz Delitzsch wie yɛ amɛgbɛhe lɛ he akɛ: “Yɛ anɔkwale mli lɛ, serafim lɛ eyaŋ ŋwɛi kɛtekeŋ Mɔ ni ta maŋtsɛsɛi lɛ nɔ lɛ yitso, shi amɛfilikiɔ kɛyaa kɛbaa yɛ E-tade yuu lɛ ní yiɔ asa lɛ obɔ̃ lɛ yiteŋ.” (Commentary on the Old Testament) Etamɔ nɔ ni nilee yɛ enɛ mli. ‘Amɛdamɔɔ ehewɔ,’ jeee ákɛ mɛi ní nɔ kwɔlɔ fe Yehowa, shi moŋ ákɛ mɛi ní sɔmɔɔ lɛ, ní feɔ toiboo ní amɛfee klalo akɛ amɛaasɔmɔ.

 7. (a) Mɛɛ nitsumɔ serafim lɛ tsuɔ? (b) Mɛni hewɔ serafim lɛ jajeɔ Nyɔŋmɔ krɔŋkrɔŋfeemɔ lɛ shii etɛ lɛ?

⁷ Agbɛnɛ, bó nakai serafim ní ená hegbɛ lɛ atoi! “Mɔnɛ boɔ kɛɔ mɔnɛ akɛ: Krɔŋkrɔŋ, krɔŋkrɔŋ, krɔŋkrɔŋ ji Yehowa Zebaot lɛ; shikpɔŋ muu lɛ fɛɛ eyi obɔ̃ kɛ enunyam lɛ!” (Yesaia 6:3) Amɛnitsumɔ ji ní amɛkwɛ ní ajaje Yehowa krɔŋkrɔŋfeemɔ lɛ, ní akpɛlɛ enunyam lɛ nɔ yɛ jeŋ muu lɛ fɛɛ, ní shikpɔŋ lɛ ji efã ko lɛ mli. Anaa enunyam lɛ yɛ nibii fɛɛ ni ebɔ lɛ mli, ni etsɛŋ ni mɛi ni yɔɔ shikpɔŋ lɛ nɔ lɛ hu fɛɛ baayoo faŋŋ. (4 Mose 14:21; Lala 19:2-4; Habakuk 2:14) Sane jajemɔ shii etɛ, ni ji “krɔŋkrɔŋ, krɔŋkrɔŋ, krɔŋkrɔŋ” lɛ jeee Triniti ko he odaseyeli. Shi moŋ, eji Nyɔŋmɔ krɔŋkrɔŋfeemɔ lɛ nɔmimaa ni bɔ he etɛ. (Okɛto Kpojiemɔ 4:8 he.) Yehowa yɛ krɔŋkrɔŋ kɛyashɛɔ he ní kwɔ fe fɛɛ.

 8. Mɛni jɛɔ serafim lɛ asane jajemɔ lɛ mli baa?

⁸ Eyɛ mli akɛ atsĩii serafim lɛ ayifalɛ tã moŋ, shi ekolɛ ayɛ serafim kui ni damɔɔ shi yɛ maŋtsɛsɛi lɛ masɛi. Amɛkɛ gbee ní ŋɔɔ láa kɛtĩɔ Nyɔŋmɔ krɔŋkrɔŋfeemɔ kɛ enunyam lɛ he lala lɛ mli kɛtsaraa nɔ. Mɛni wɔkadiɔ akɛ ejɛɔ mli baa? Bó toi ekoŋŋ beni Yesaia yaa nɔ lɛ: “Shinaai lɛ ashishi hoso yɛ mɔ ni boɔ lɛ gbee lɛ hewɔ, ni tsũ lɛ yi tɔ́ kɛ lasu.” (Yesaia 6:4) Yɛ Biblia lɛ mli lɛ, bei pii lɛ lasu loo atatu kɛ odaseyeli ní anaa haa akɛ Nyɔŋmɔ yɛ jɛmɛ. (2 Mose 19:18; 40:34, 35; 1 Maŋtsɛmɛi 8:10, 11; Kpojiemɔ 15:5-8) Etsɔɔ anunyam ní wɔ adesai bɔɔnii nɛɛ nyɛŋ wɔbɛŋkɛ.

Esaaa, Kɛlɛ Atsuu Ehe

 9. (a) Mɛɛ hewalɛ ninaa lɛ ná yɛ Yesaia nɔ? (b) Mɛɛ srɔtofeemɔ anaa yɛ Yesaia kɛ Maŋtsɛ Uzia teŋ?

⁹ Yehowa maŋtsɛsɛi lɛ he ninaa nɛɛ ná hewalɛ ní mli wa yɛ Yesaia nɔ. Eŋma akɛ: “Kɛkɛ ni mikɛɛ: Kpóo ha mi! shi milaaje; ejaakɛ gbɔmɔ ni naabu he tseee ji mi, ni maŋ ní amɛnaabui ahe tseee teŋ miyɔɔ; ejaakɛ mihiŋmɛii ena maŋtsɛ lɛ ni ji Yehowa Zebaot lɛ!” (Yesaia 6:5) Kwɛ srɔto kpele ní yɔɔ Yesaia kɛ Maŋtsɛ Uzia teŋ! Uzia shɔ̃ osɔfoi ní afɔ amɛ mu lɛ agbɛhe lɛ yɛ amɛdɛŋ, ni ebote sɔlemɔwe lɛ He Krɔŋkrɔŋ lɛ yɛ gbɛ ní Nyɔŋmɔ gbeyeishemɔ bɛ mli nɔ. Eyɛ mli akɛ Uzia na shika kanetsei lɛ, shika tsofa-kɛ-ŋma afɔleshaa latɛ lɛ, kɛ okpɔlɔi ní “Jɛmɛ ní Eyɔɔ lɛ he aboloo” lɛ mamɔɔ nɔ lɛ moŋ, shi enaaa Yehowa hiɛ ni ji enɔkpɛlɛmɔ, ni enaaa nitsumɔ krɛdɛɛ ko kɛjɛɛɛ edɛŋ. (1 Maŋtsɛmɛi 7:48-50; NW, shishigbɛ niŋmaa) Yɛ gbɛ kroko nɔ lɛ, gbalɔ Yesaia ekuuu ehiɛ efɔ̃ɔɔ osɔfoi lɛ anitsumɔ lɛ nɔ loo ní eeetɔ̃ sɔlemɔtsu lɛ nɔ. Ni kɛlɛ, ena Yehowa he ninaa ní eba esɔlemɔtsu krɔŋkrɔŋ lɛ mli, ni akɛ woo ni ji nitsumɔ ní Nyɔŋmɔ kɛha lɛ tɛ̃ɛ lɛ ha lɛ. Eyɛ mli akɛ serafim lɛ susuuu akɛ esa akɛ amɛna sɔlemɔwe lɛ Nuntsɔ ní ta maŋtsɛsɛi lɛ nɔ lɛ moŋ, shi aŋmɛ Yesaia gbɛ yɛ ninaa mli, ni ena “maŋtsɛ lɛ ni ji Yehowa Zebaot lɛ!”

10. Mɛni hewɔ Yesaia she gbeyei beni ena ninaa lɛ?

¹⁰ Srɔtofeemɔ ní Yesaia na yɛ Nyɔŋmɔ krɔŋkrɔŋfeemɔ lɛ kɛ eshafeelɔ ni lɛ diɛŋtsɛ eji lɛ teŋ lɛ ha enu he akɛ ehe tseee kwraa. Gbeyei ní mɔ lɛ hewɔ lɛ, esusu akɛ ebaagbo. (2 Mose 33:20) Eenu ní serafim lɛ kɛ naabui ni he tse miijie Nyɔŋmɔ yi, shi enaabu he tseee, ni emaŋbii ní eyɔɔ amɛteŋ, ní enuɔ amɛwiemɔ hu lɛ anaabui ní he tseee lɛ etee nɔ ewo enaabu he muji babaoo efata he. Yehowa yɛ krɔŋkrɔŋ, ni esa akɛ etsuji ajie nakai su lɛ kpo. (1 Petro 1:15, 16) Eyɛ mli akɛ áhala Yesaia akɛ Nyɔŋmɔ naawielɔ momo moŋ, shi yɔsemɔ ní eyɔse eshafeemɔ shihilɛ ní eyɔɔ mli lɛ ha enaa kpɛ ehe waa, ni enaabu he tseee bɔ ni no aaaha efee mɔ ni sa akɛ anunyam Maŋtsɛ krɔŋkrɔŋ lɛ naawielɔ. Te abaajɛ ŋwɛi ahere lɛ nɔ aha tɛŋŋ?

11. (a) Mɛni serafim lɛ ateŋ mɔ kome fee, ni nifeemɔ nɛɛ feɔ mɛni he mfoniri? (b) Yɛ mɛɛ gbɛ nɔ nɔ ni serafim lɛ kɛɛ Yesaia lɛ nɔ jwɛŋmɔ baanyɛ aye abua wɔ kɛ́ wɔnuɔ he akɛ wɔsaaa akɛ Nyɔŋmɔ tsuji lɛ?

¹¹ Yɛ nɔ najiaŋ ní aaashwie Yesaia ní baa shi lɛ kɛaajɛ Yehowa hiɛ lɛ, serafim lɛ fee nɔ ko kɛye amɛbua lɛ. Nɔ ni aŋma afɔ̃ shi lɛ kɛɔ akɛ: “Kɛkɛ ni serafim lɛ ateŋ mɔ kome ní hiɛ ŋãi ni tsoɔ ní ekɛ abɛɛle yakɔ yɛ afɔleshaa latɛ lɛ nɔ yɛ edɛŋ filiki kɛba miŋɔɔ; ni eŋɔsa minaabu ni ekɛɛ: Naa, ní enɛ esá onaabu nɛɛ, ajie onɔ̃ sha lɛ, ni atsumɔ ohe esha lɛ!” (Yesaia 6:6, 7) Yɛ mfonirifeemɔŋ shishinumɔ naa lɛ, la yɛ hewalɛ ní akɛtsuuɔ nii ahe. Beni ekɛ ŋai la ní etsɛ̃ ní jɛ afɔleshaa latɛ lɛ nɔ la krɔŋkrɔŋ lɛ mli lɛ saa Yesaia naabu he lɛ, serafim lɛ ma nɔ mi eha Yesaia akɛ atsumɔ ehe eshai lɛ kɛyashɛ he ni he hiaa ní baaha enyɛ ená Nyɔŋmɔ hiɛ duromɔ kɛ nitsumɔ kɛjɛ edɛŋ. Kwɛ bɔ ni enɛ woɔ wɔ hewalɛ ehaa! Esha yɛ wɔhe tsɔ, ni wɔsaaa mɛi ní bɛŋkɛɔ Nyɔŋmɔ. Shi akpɔ̃ wɔ kɛtsɔ Yesu kpɔmɔ afɔleshaa lɛ jarawalɛ lɛ nɔ, ni wɔbaanyɛ wɔná Nyɔŋmɔ hiɛ duromɔ ní wɔbɛŋkɛ lɛ yɛ sɔlemɔ mli.—2 Korintobii 5:18, 21; 1 Yohane 4:10.

12. Mɛɛ afɔleshaa latɛ Yesaia na, ni mɛni jɛɔ la lɛ mli baa?

¹² “Afɔleshaa latɛ” ní atsĩ tã lɛ kaiɔ wɔ ekoŋŋ akɛ ninaa ni. (Okɛto Kpojiemɔ 8:3; 9:13 he.) Afɔleshaa latɛi enyɔ yɛ sɔlemɔtsu ni yɔɔ Yerusalem lɛ mli. Tsofa-kɛ-ŋma afɔleshaa latɛ bibioo lɛ yɛ He Krɔŋkrɔŋ Fe Fɛɛ lɛ muhɔɔ lɛ hiɛ nɔŋŋ, ni afɔleshaa latɛ wulu lɛ, ní ahaa la yaa nɔ etsoɔ yɛ nɔ be fɛɛ be lɛ, yɛ gbɛ ní yaa he krɔŋkrɔŋ lɛ hiɛ gbɛ. (3 Mose 6:12, 13; 16:12, 13) Shi nɛkɛ shikpɔŋ nɔ afɔleshaa latɛi nɛɛ feɔ nibii wuji komɛi ahe okadi, loo amɛdamɔɔ shi kɛhaa nomɛi. (Hebribii 8:5; 9:23; 10:5-10) La ní jɛ ŋwɛi ji nɔ ni bashã shãa afɔle lɛ yɛ afɔleshaa latɛ lɛ nɔ beni Maŋtsɛ Salomo gbeleɔ sɔlemɔtsu lɛ naa lɛ. (2 Kronika 7:1-3) Ni agbɛnɛ, la ní jɛ anɔkwa ŋwɛi afɔleshaa latɛ lɛ nɔ ji nɔ ni jie muji ní yɔɔ Yesaia naabu lɛ.

13. Mɛɛ sane ko Yehowa bi, ni namɔ ekɛfata he beni ekɛɛ akɛ “wɔ” lɛ?

¹³ Ha wɔkɛ Yesaia abo toi. “Minu Nuntsɔ lɛ gbee ni ekɛɛ: Namɔ matsu? ni namɔ aaatee aha wɔ? Ni mikɛɛ: Naa mi, tsu mi!” (Yesaia 6:8) Eyɛ faŋŋ akɛ áto akɛ sane ní Yehowa bi lɛ atée hetoohamɔ shi kɛjɛ Yesaia ŋɔɔ, ejaakɛ gbalɔ kroko ni ji adesa ko kwraa pueee yɛ ninaa lɛ mli. Ŋwanejee ko bɛ he akɛ eji ninefɔɔ ní akɛmiiha Yesaia akɛ ebaafee Yehowa bɔfo. Shi mɛni hewɔ ni Yehowa bi akɛ, ‘Namɔ aaatee aha wɔ’ lɛ? Yɛ tsakemɔ ní etsake kɛjɛ mɔ ko najiaŋ gbɛi ni ji “mi” kɛtee mɛi pii anajiaŋ gbɛi ni ji “wɔ” nɔ lɛ hewɔ lɛ, kɛ hoo lɛ, Yehowa kɛ mɔ kome, ni ji mɔ kroko miifata ehe agbɛnɛ. Namɔ ni? Ani jeee lɛ ji e-Bi koome, mɔ ni batsɔ gbɔmɔ Yesu Kristo yɛ sɛɛ mli lɛ? Yɛ anɔkwale mli lɛ, Bi nɛɛ nɔŋŋ ji mɔ ní Nyɔŋmɔ kɛwie akɛ, “Nyɛhaa wɔfea gbɔmɔ yɛ wɔsubaŋ nɔ” lɛ. (1 Mose 1:26; Abɛi 8:30, 31) Hɛɛ, Yehowa Bi koome lɛ fata ehe yɛ ŋwɛi gwabɔɔhe lɛ.—Yohane 1:14.

14. Te Yesaia here Yehowa ninefɔɔ lɛ nɔ eha tɛŋŋ, ni mɛɛ nɔkwɛmɔnɔ efee efɔ̃ shi eha wɔ?

¹⁴ Yesaia shashaooo shi akɛ eeehere nɔ! Yɛ nɔ ni shɛɛ sane lɛ baanyɛ afee lɛ fɛɛ sɛɛ lɛ, ehere nɔ amrɔ nɔŋŋ akɛ: “Naa mi, tsu mi!” Nakai nɔŋŋ hu ebiii nɔ ni ekolɛ ebaaná kɛji ekpɛlɛ nitsumɔ lɛ nɔ. Ehe kɛhamɔ mumɔ lɛ ji nɔkwɛmɔnɔ fɛfɛo kɛha Nyɔŋmɔ tsuji fɛɛ, ní akɛ nitsumɔ ewo amɛdɛŋ akɛ amɛshiɛ ‘maŋtsɛyeli lɛ he sanekpakpa lɛ amɛtsɔɔ je nɛŋ fɛɛ’ ŋmɛnɛ lɛ. (Mateo 24:14) Taakɛ Yesaia ji lɛ, amɛkɛ amɛhe kpɛtɛɔ amɛnitsumɔ lɛ he yɛ anɔkwayeli mli ni amɛyeɔ “jeŋmaji lɛ fɛɛ odase,” yɛ hei babaoo ní abooo amɛ toi yɛ lɛ fɛɛ sɛɛ. Ni amɛkɛ hekɛnɔfɔɔ yaa hiɛ, taakɛ Yesaia fee lɛ, ejaakɛ amɛle akɛ hegbɛ ní kɛ nitsumɔ lɛ wo amɛdɛŋ lɛ nɔ kwɔ fe fɛɛ.

Nitsumɔ ní Akɛwo Yesaia Dɛŋ

15, 16. (a) Mɛni esa akɛ Yesaia akɛɛ “maŋ nɛɛ,” ni te amɛbaahere nɔ amɛha tɛŋŋ? (b) Ani bɔ ni gbɔmɛi lɛ here nɔ amɛha lɛ jɛ Yesaia tɔmɔ ko hewɔ? Tsɔɔmɔ mli.

¹⁵ Agbɛnɛ Yehowa tsɔɔ nɔ ni esa akɛ Yesaia akɛɛ kɛ bɔ ni abaahere lɛ nɔ aha, ákɛ: “Yaa ní oyakɛɛ maŋ nɛɛ akɛ: Nyɛnua, shi nyɛkanaa shishi, ni nyɛnaa, shi nyɛkayooa sɛɛ! Ha nɛkɛ maŋ nɛɛ tsui akpilim, ní oha amɛtoii awa, ní oshwila amɛhiŋmɛii, koni amɛkana kɛ amɛhiŋmɛii, ní amɛkanu kɛ amɛtoii, ní amɛtsui hu akana shishi ní amɛkakpale, ní atsá amɛ!” (Yesaia 6:9, 10) Ani enɛ tsɔɔ akɛ esa akɛ Yesaia ayawie kpookpoo ní ŋaalee bɛ mli, koni ekɛshwie Yudafoi lɛ, ní eha amɛya nɔ amɛte shi amɛwo Yehowa? Eka shi faŋŋ akɛ dabi! Yesaia diɛŋtsɛ maŋbii ni, ni enuɔ ekɛ amɛ teŋ wekukpaa ko he. Shi Yehowa wiemɔi lɛ tsɔɔ bɔ ni gbɔmɛi lɛ baahere eshɛɛ sane lɛ nɔ amɛha, ekɔɔɔ he eko bɔ ni Yesaia kɛ anɔkwayeli baatsu enitsumɔ lɛ eha.

¹⁶ Tɔmɔ lɛ jɛ gbɔmɛi lɛ. Yesaia kɛ amɛ baawie ‘shii abɔ,’ shi amɛkpɛlɛŋ shɛɛ sane lɛ nɔ ni amɛnuŋ shishi hu. Amɛteŋ mɛi babaoo baakpilim amɛtsui ni amɛboŋ toi, tamɔ mɛi ní eshwila ní amɛmu toi kwraa. Yɛ ya ni ebaaya amɛŋɔɔ shii abɔ lɛ hewɔ lɛ, Yesaia baaha “maŋ nɛɛ” atsɔɔ akɛ amɛsumɔɔɔ ní amɛnu shishi. Amɛbaama nɔ mi akɛ amɛmiiŋamɔ amɛjwɛŋmɔi kɛ amɛtsuii anaa kɛha Yesaia shɛɛ sane—ni ji Nyɔŋmɔ shɛɛ sane—kɛha amɛ lɛ. Kwɛ bɔ ni enɛ ji anɔkwale yɛ gbɔmɛi ahe ŋmɛnɛ! Amɛteŋ mɛi babaoo sumɔɔɔ ní amɛbo Yehowa Odasefoi atoi beni amɛshiɛɔ Nyɔŋmɔ Maŋtsɛyeli ni baa lɛ he sanekpakpa lɛ.

17. Beni Yesaia bi akɛ, “Kɛyashi mɛɛ beyinɔ” lɛ, no mli lɛ mɛni etsɔɔ lɛ?

¹⁷ Enɛ gbá Yesaia naa: “Ni mikɛɛ: Nuntsɔ, kɛyashi mɛɛ beyinɔ? Ni ekɛɛ: Kɛyashi beyinɔ ní maji lɛ aaatsɔmɔ amaŋfɔ, ní mɔ ko mɔ ko bɛ mli, ní shiai lɛ hu mɔ ko mɔ ko bɛ mli, ni shikpɔŋ lɛ aaatsɔ amaŋfɔ kwraa, ni Yehowa aaakpala mɛi lɛ kɛaatee shɔŋŋ, ni hei pii aaakamɔ [shi] efoji yɛ shikpɔŋ lɛ nɔ!” (Yesaia 6:11, 12) Bimɔ ní Yesaia bi akɛ, “Kɛyashi mɛɛ beyinɔ?” lɛ etsɔɔɔ akɛ eebi be sɛɛkɛlɛ ní esa akɛ eya nɔ eshiɛ etsɔɔ gbɔmɛi ní booo lɛ toi lɛ. Shi moŋ, eesusu gbɔmɛi lɛ ahe, ni eebi be sɛɛkɛlɛ ni amɛmumɔŋ shihilɛ fɔŋ lɛ baatsa nɔ kɛyashi kɛ be sɛɛkɛlɛ ní abaaya nɔ agbe Yehowa gbɛi lɛ he guɔ yɛ shikpɔŋ lɛ nɔ. (Kwɛmɔ Lala 74:9-11.) No hewɔ lɛ, shihilɛ ní nilee bɛ mli nɛɛ baaya nɔ kɛyashi mɛɛ beyinɔ?

18. Gbɔmɛi lɛ amumɔŋ shihilɛ fɔŋ lɛ baaya nɔ kɛyashi mɛɛ be, ni ani Yesaia baahi shi ni ena gbalɛ lɛ mlibaa kwraa kɛmɔ shi?

¹⁸ Ao, Yehowa hetoo lɛ tsɔɔ akɛ gbɔmɛi lɛ amumɔŋ shihilɛ fɔŋ lɛ baaya nɔ aahu kɛyashi be mli ni nibii ni jɛɔ Nyɔŋmɔ nɔ toigbele mli baa, taakɛ atsɔɔ yɛ ekpaŋmɔ lɛ mli lɛ fɛɛ baaba mli. (3 Mose 26:21-33; 5 Mose 28:49-68) Maŋ lɛ hiɛ baakpata, abaatswa gbɔmɛi lɛ ananeshi tu, ni shikpɔŋ lɛ baakã shi amaŋfɔ. Yesaia ehiŋ shi ní eeena be mli ní Babilon asraafoi lɛ baakpata Yerusalem kɛ esɔlemɔtsu lɛ hiɛ yɛ afi 607 D.Ŋ.B. lɛ, eyɛ mli akɛ ebaagba aahu nɔ ni fe afii 40 sɔŋŋ, ni ebaatsa nɔ aahu kɛyabote Maŋtsɛ Uzia nabi Hezekia nɔyeli beaŋ. Shi kɛlɛ, Yesaia baaya nɔ ekɛ anɔkwayeli atsu enitsumɔ lɛ kɛyashi be mli ní eeegbo, nɔ ni fe afii 100 dani nakai maŋ amanehulu lɛ aaaba.

19. Eyɛ mli akɛ abaafo maŋ lɛ tamɔ tso moŋ, shi mɛɛ nɔmimaa Nyɔŋmɔ kɛha Yesaia?

¹⁹ Hiɛkpatamɔ ní baaha Yuda atsɔ “amaŋfɔ kwraa” lɛ baaba kɛ̃, shi hiɛnɔkamɔ fɛɛ etako. (2 Maŋtsɛmɛi 25:1-26) Yehowa ma nɔ mi eha Yesaia akɛ: “Kɛ́ shwɛ emlijaai nyɔŋma mli ekome yɛ nɔ tete lɛ, aaaku sɛɛ akpata amɛhiɛ; tamɔ tso kpele ko loo odum ko ní atoo agbee shi ní eshwɛ ekuku; seshi krɔŋkrɔŋ ji ekuku lɛ.” (Yesaia 6:13) Hɛɛ, “emlijaai nyɔŋma mli ekome, . . . seshi krɔŋkrɔŋ” ko baashwɛ, tamɔ tso wulu ko ní atoo afɔ̃ shi lɛ tsoku ni eshwɛ. Ŋwanejee ko bɛ he akɛ, nɛkɛ nɔmimaa wiemɔi nɛɛ shɛje Yesaia mii—abaana shwɛɛnii krɔŋkrɔŋ ko yɛ emaŋbii lɛ ateŋ. Eyɛ mli akɛ ashã maŋ lɛ ekoŋŋ, tamɔ tso agbo ko ní afo afɔ̃ shi ní ashãa moŋ, shi Israel mfonirifeemɔŋ tsoku ko ni he hiaa baahi shi. Ebaafee seshi, loo shwiei ni yɔɔ krɔŋkrɔŋ kɛha Yehowa. Yɛ be ní sa mli lɛ, ebaatsɛ̃ ekoŋŋ, ni tso lɛ baasaa eda agbo.—Okɛto Hiob 14:7-9; Daniel 4:26 he.

20. Yesaia gbalɛ lɛ naagbee fã lɛ ba mli klɛŋklɛŋ yɛ mɛɛ gbɛ nɔ?

²⁰ Ani gbalɛ lɛ mli wiemɔi lɛ ba mli anɔkwale? Hɛɛ. Beni Yuda shikpɔŋ lɛ ekã shi amaŋfɔ afii 70 sɛɛ lɛ, shwɛɛnii ko ní sheɔ Nyɔŋmɔ gbeyei ku amɛsɛɛ kɛjɛ nomŋɔɔ mli yɛ Babilon. Amɛsaa amɛma sɔlemɔtsu lɛ kɛ maŋtiase lɛ ekoŋŋ, ni amɛto anɔkwa jamɔ shishi ekoŋŋ yɛ shikpɔŋ lɛ nɔ. Yudafoi ní aku sɛɛ akɛ amɛ ba amɛshikpɔŋ ní Nyɔŋmɔ kɛha amɛ lɛ nɔ ekoŋŋ nɛɛ ha gbalɛ ní Yehowa kɛha Yesaia nɛɛ mlibaa ni ji enyɔ nyɛ eba mli. Mɛni no baafee?—Ezra 1:1-4.

Mlibaai Krokomɛi

21-23. (a) Yesaia gbalɛ lɛ ná emlibaa yɛ klɛŋklɛŋ afii oha lɛ mli yɛ namɛi agbɛfaŋ, ni yɛ mɛɛ gbɛ nɔ? (b) Namɔ ji “seshi krɔŋkrɔŋ” lɛ yɛ klɛŋklɛŋ afii oha lɛ mli, ni mɛɛ gbɛ nɔ atsɔ abaa eyi?

²¹ Yesaia gbalɛ nitsumɔ lɛ feɔ nitsumɔ ni Mesia, Yesu Kristo baatsu, aaafee afii 800 sɛɛ lɛ he mfoniri. (Yesaia 8:18; 61:1, 2; Luka 4:16-21; Hebribii 2:13, 14) Eyɛ mli akɛ enɔ kwɔ fe Yesaia moŋ, shi Yesu hu miisumɔ ní eŋwɛi Tsɛ lɛ atsu lɛ nakai nɔŋŋ, ni ekɛɛ: “Naa, miba ní mibafee bo, Nyɔŋmɔ, osuɔmɔnaa nii lɛ.”—Hebribii 10:5-9; Lala 40:7-9.

²² Taakɛ Yesaia fee lɛ, Yesu kɛ anɔkwayeli tsu nitsumɔ ní akɛha lɛ lɛ ni ekɛ shihilɛ ní tamɔ nakai nɔŋŋ kpe. Yudafoi ní hi shi yɛ Yesu gbii lɛ amli lɛ sumɔɔɔ ní amɛbo shɛɛ sane lɛ toi tamɔ mɛi ní gbalɔ Yesaia shiɛ etsɔɔ amɛ lɛ nɔŋŋ pɛpɛɛpɛ. (Yesaia 1:4) Yesu kɛ abɛbuai babaoo tsu nii yɛ esɔɔmɔ nitsumɔ lɛ mli. Enɛ ha ekaselɔi lɛ bi akɛ: “Mɛni hewɔ okɛ amɛ wieɔ yɛ abɛbuai amli lɛ?” Yesu ha hetoo akɛ: “Ejaakɛ nyɛ lɛ aŋɔha nyɛ akɛ nyɛle ŋwɛi maŋtsɛyeli lɛŋ teemɔŋ saji lɛ, shi amɛ lɛ aŋɔhako amɛ. Enɛ hewɔ mikɛ amɛ wieɔ yɛ abɛbuai amli lɛ, ejaakɛ amɛmiina shi amɛnaaa, ni amɛmiinu shi amɛnuuu, ni amɛnaaa shishi hu. Ni Yesaia gbalɛ lɛ eba mli yɛ amɛhe, nɔ ni kɛɔ akɛ: ‘Nu lɛ nyɛbaanu nɛ, shi nyɛnaŋ shishi; ni na lɛ nyɛbaana nɛ, shi nyɛyooŋ sɛɛ. Ejaakɛ nɛkɛ maŋ nɛɛ tsui ekpilim, ni amɛtoii ewa, ni amɛmiamia amɛhiŋmɛii; koni amɛkana kɛ amɛhiŋmɛii, ni amɛkanu kɛ amɛtoii, ni amɛtsui hu akana shishi, ni amɛkpale ni mitsa amɛ.’”—Mateo 13:10, 11, 13-15; Marko 4:10-12; Luka 8:9, 10.

²³ Beni Yesu tsɛ́ɔ Yesaia wiemɔi asɛɛ lɛ, no mli lɛ eetsɔɔ akɛ gbalɛ lɛ ná emlibaa yɛ egbii lɛ amli. Ákɛ kuu lɛ, gbɔmɛi lɛ fɛɛ atsuii tamɔ Yudafoi ní hi shi yɛ Yesaia gbii lɛ amli lɛ atsuii pɛpɛɛpɛ. Amɛfee amɛhe mɛi ni enaaa nii kɛ mɛi ní nuuu eshɛɛ sane lɛ, ni amɛ hu amɛhiɛ kpata nakai nɔŋŋ. (Mateo 23:35-38; 24:1, 2) Enɛ ba beni Roma asraafoi ní yɔɔ Tatsɛ Tito shishi lɛ batutua Yerusalem yɛ afi 70 Ŋ.B. ní amɛkumɔ maŋtiase lɛ kɛ esɔlemɔtsu lɛ. Ni kɛlɛ, no mli lɛ mɛi komɛi ebo Yesu toi ni amɛbatsɔmɔ ekaselɔi. Yesu wie mɛnɛɛmɛi ahe akɛ “ajɔɔ” amɛ. (Mateo 13:16-23, 51) No mli lɛ etswa amɛ adafi momo akɛ kɛ́ amɛna akɛ “abɔ nsara awo Yerusalem he lɛ,” esa akɛ ‘amɛjo foi kɛya gɔji lɛ anɔ.’ (Luka 21:20-22) Enɛ hewɔ lɛ, ahere “seshi krɔŋkrɔŋ” ní ná hemɔkɛyeli, ní afee amɛ mumɔŋ maŋ ni ji “Nyɔŋmɔ Israel lɛ” yiwala.a—Galatabii 6:16.

24. Paulo kɛ Yesaia gbalɛ lɛ to mɛni he, ni mɛni enɛ tsɔɔ?

²⁴ Aaafee afi 60 Ŋ.B. lɛ, atsĩ bɔfo Paulo naa yɛ shia ákɛ gbokɛlɛfonyo yɛ Roma. Eto gbɛjianɔ yɛ jɛmɛ ni ekɛ “Yudafoi lɛ anukpai” lɛ kɛ mɛi krokomɛi hu kpe, ni ‘eye Nyɔŋmɔ maŋtsɛyeli lɛ he odase faŋŋ etsɔɔ amɛ.’ Beni mɛi pii ekpɛlɛɛɛ Paulo shɛɛ sane lɛ nɔ lɛ, etsɔɔ mli akɛ enɛ feɔ Yesaia gbalɛ lɛ mlibaa. (Bɔfoi lɛ Asaji 28:17-27; Yesaia 6:9, 10) No hewɔ lɛ, Yesu kaselɔi lɛ tsu nitsumɔ ko ni tamɔ nɔ ni Yesaia tsu lɛ pɛpɛɛpɛ.

25. Mɛni Nyɔŋmɔ Odasefoi ni yɔɔ ŋmɛnɛŋmɛnɛ beaŋ lɛ eyɔse, ni te amɛtsuɔ he nii amɛhaa tɛŋŋ?

²⁵ Nakai nɔŋŋ Yehowa Odasefoi ni yɔɔ ŋmɛnɛ lɛ hu yɔseɔ akɛ Yehowa Nyɔŋmɔ yɛ esɔlemɔtsu krɔŋkrɔŋ lɛ mli. (Maleaki 3:1) Taakɛ Yesaia kɛɛ lɛ, amɛ hu amɛkɛɔ akɛ: “Naa mi, tsu mi!” Amɛkɛ ekãa jajeɔ nibii agbɛjianɔtoo fɔŋ nɛɛ naagbee ni bɛŋkɛɔ lɛ he kɔkɔbɔɔ shɛɛ sane lɛ. Shi, taakɛ Yesu tsɔɔ lɛ, kɛ akɛmiito he lɛ, mɛi fioo ko pɛ gbeleɔ amɛhiŋmɛii kɛ amɛtoii ni amɛnaa ni amɛnuɔ koni ahere amɛyiwala. (Mateo 7:13, 14) Miishɛɛ lɛɛlɛŋ ji mɛi ní kɛ amɛtsuii haa akɛ amɛbaabo toi “ní atsá amɛ” lɛ!—Yesaia 6:8, 10.

[Shishigbɛ niŋmaa]

[Mfoniri ni yɔɔ baafa 94]

“Naa mi, tsu mi!”

[Mfoniri ni yɔɔ baafa 97]

‘Kɛyashi beyinɔ ní maji lɛ aaatsɔmɔ amaŋfɔ, ní mɔ ko mɔ ko bɛ mli’