Yitso Nyɔŋma Kɛ Ekpaa
Hiɛnɔkamɔ Shɛɛ Sane Kɛha Nomii ní Tsuii Ekumɔ Lɛ
1. Tsɔɔmɔ bɔ ni Yudafoi nomii lɛ ashihilɛ ji yɛ Babilon lɛ mli.
EJI Yuda yinɔsane mli be ní ehiii fe fɛɛ. Akɛ nɔnyɛɛ eloo Nyɔŋmɔ webii ní ekɛ amɛ efee kpaŋmɔ lɛ kɛjɛ amɛmaŋ shikpɔŋ nɔ, ni amrɔ nɛɛ amɛmiina amanehulu yɛ nomŋɔɔ mli yɛ Babilon. Wɔkpɛlɛɔ nɔ akɛ, aha amɛ heyeli fioo ní amɛkɛtsu amɛ daa gbi shihilɛ mli saji ahe nii. (Yeremia 29:4-7) Amɛteŋ mɛi komɛi ná ninenaa nitsumɔ mli hesaai loo amɛkɛ amɛhe wo jarayeli nitsumɔi amli.a (Nehemia 3:8, 31, 32) Shi fɛɛ sɛɛ lɛ, shihilɛ lɛ efeee mlɛo kɛhaaa Yudafoi nomii lɛ. No mli lɛ amɛyɛ nyɔŋyeli mli, yɛ heloonaa kɛ mumɔŋ fɛɛ. Ha wɔkwɛ bɔ ni eba lɛ eha.
2, 3. Te nomŋɔɔ lɛ sa jamɔ ní Yudafoi lɛ kɛhaa Yehowa lɛ he eha tɛŋŋ?
2 Beni Babilon asraafoi lɛ kpata Yerusalem hiɛ yɛ afi 607 D.Ŋ.B. lɛ, amɛfite nibii babaoo fe maŋ lɛ hiɛ ní amɛkpata kɛkɛ; amɛfite anɔkwa jamɔ hu kwraa yɛ nakai beaŋ. Amɛloo Yehowa sɔlemɔwe lɛ nibii lɛ ni amɛkpata hiɛ, ni amɛfite osɔfoyeli gbɛjianɔtoo lɛ kɛtsɔ Levi akutso lɛ mli bii lɛ ekomɛi ní amɛŋɔ amɛ nom, kɛ mɛi krokomɛi ní amɛgbe amɛ lɛ nɔ. Akɛni amɛbɛ sɔlemɔtsu, amɛbɛ afɔleshaa latɛ, ní amɛbɛ osɔfoi ní ato amɛhe gbɛjianɔ hewɔ lɛ, Yudafoi lɛ nyɛɛɛ amɛshã afɔlei amɛha anɔkwa Nyɔŋmɔ lɛ, taakɛ Mla lɛ biɔ ní amɛfee lɛ.
3 Yudafoi anɔkwafoi lɛ baanyɛ abaa amɛjamɔ mli nifeemɔi ní akɛkadiɔ amɛ lɛ ayi kɛtsɔ ketia ní amɛfoɔ kɛ Mla lɛ nɔ ní amɛyeɔ kɛyashɛɔ he ni amɛaanyɛ lɛ nɔ. Ákɛ nɔkwɛmɔnɔ lɛ, amɛbaanyɛ amɛtsi amɛhe kɛjɛ niyenii ní agu amɛ yeli lɛ ahe ní amɛye Hejɔɔmɔ Gbi lɛ. Shi beni amɛfeɔ nakai lɛ, belɛ amɛkɛ amɛhe miiwo amɛhe fɛo ní mɛi ní ebaŋɔ amɛ nom lɛ baaye lɛ mli, ejaakɛ Babilonbii lɛ buɔ Yudafoi ajamɔ mli kusumii lɛ akɛ kwashiai anifeemɔ. Anaa nijiaŋwujee shihilɛ ní nomii lɛ hi mli lɛ yɛ lalatsɛ lɛ wiemɔi nɛɛ amli, akɛ: “Babel faai lɛ anaa lɛ, jɛi wɔho wɔtara shi yɛ, ni wɔfófói, beni wɔkai Zion lɛ. Jɛi faa naa kpãai lɛ anɔ wɔŋɔ wɔsaŋkui lɛ wɔtsotsoro. Ejaakɛ jɛi mɛi ni ŋɔ wɔ nom lɛ bi wɔ lalai yɛ, ni wɔhaolɔi lɛ tao ní wɔmli afili wɔ, amɛkɛɛ: ‘Nyɛláa Zion lalai lɛ eko nyɛtsɔɔa wɔ!’”—Lala 137:1-3.
4. Mɛni hewɔ sɛɛnamɔ ko baŋ he kɛhaŋ Yudafoi lɛ akɛ amɛkɛ amɛhiɛ aaafɔ̃ jeŋmaji krokomɛi anɔ kɛha kpɔmɔ lɛ, shi namɔ ŋɔɔ amɛbaanyɛ amɛya kɛha yelikɛbuamɔ?
4 Belɛ, namɔ ŋɔɔ Yudafoi nomii lɛ baatsɔ amɛhe kɛya kɛha miishɛjemɔ mɔ? Nɛgbɛ amɛyiwalaheremɔ baajɛ aba? Eka shi faŋŋ akɛ ebaŋ kɛjɛŋ jeŋmaji ní ebɔle amɛ lɛ eko ŋɔɔ! Nakai jeŋmaji lɛ eko kwraa bɛ hewalɛ ní ekɛaate shi eshi Babilon asraafoi lɛ, ni amɛteŋ babaoo nyɛɔ Yudafoi lɛ. Shi shihilɛ lɛ jeee nɔ ni hiɛnɔkamɔ ko bɛ mli. Yehowa, mɔ ni amɛtse ehiɛ atua beni amɛji maŋ ní yɔɔ heyeli lɛ, kɛ mlihilɛ kpã ninefɔɔ ní yɔɔ miishɛɛ mli eha amɛ, beni amɛyɔɔ nomŋɔɔ mli lolo lɛ po.
“Nyɛbaa Nu He”
5. Te wiemɔi ni ji “nyɛbaa nu he” lɛ he hiaa ha tɛŋŋ?
5 Yehowa tsɔ Yesaia nɔ ekɛ Yudafoi nomii ní yɔɔ Babilon lɛ wie yɛ gbalɛ wiemɔ mli akɛ: “Huui! nyɛ mɛi fɛɛ ní kumai yeɔ nyɛ lɛ, nyɛbaa nu he! ni mɛi ní bɛ shika hu, nyɛbaa nyɛbahea ní nyɛyea! Nyɛbaa nyɛbahea wein kɛ fufɔ, shi jeee shika aloo yinii anaa!” (Yesaia 55:1) Mfonirifeemɔŋ wiemɔi fá babaoo yɛ wiemɔi nɛɛ amli. Ákɛ nɔkwɛmɔnɔ lɛ, susumɔ ninefɔɔ ní ekɛha akɛ: “Nyɛbaa nu he” lɛ he okwɛ. Kɛ́ nu bɛ lɛ, wala nyɛŋ ahi shi. Kɛ́ wɔnáaa nu ní he hiaa waa nɛɛ, wɔ ni ji adesai lɛ baanyɛ ahi wala mli aaafee otsi pɛ. No hewɔ lɛ, eja gbɛ jogbaŋŋ akɛ Yehowa kɛ nu tsu nii kɛfee hewalɛ ní ewiemɔi lɛ baaná yɛ Yudafoi nomii lɛ anɔ lɛ he mfoniri. Eshɛɛ sane lɛ baaha amɛná hejɔɔmɔ, tamɔ nu ní mli ejɔ beni jeŋ edɔ waa lɛ. Ebaahole amɛnɔ kɛjɛ jwɛŋmɔŋ nɔnyɛɛ kɛ nijiaŋwujee shihilɛ ní amɛyɔɔ mli lɛ mli, ni ebaagbe anɔkwale kɛ jalɛ he kumai ní yeɔ amɛ lɛ. Ebaaha amɛná hiɛnɔkamɔ akɛ amɛbaaná heyeli kɛjɛ nomŋɔɔ lɛ mli. Shi kɛlɛ, dani amɛbaaná he sɛɛ lɛ, esa akɛ Yudafoi nomii lɛ anu Nyɔŋmɔ shɛɛ sane lɛ, ní amɛbo toi, ní amɛtsu he nii.
6. Kɛ́ Yudafoi lɛ bahe “wein kɛ fufɔ” lɛ, te amɛbaaná he sɛɛ amɛha tɛŋŋ?
6 Yehowa kɛ “wein kɛ fufɔ” hu ha amɛ. Fufɔ haa gbekɛbii agbɔmɔtsei náa hewalɛ ni eyeɔ ebuaa amɛ ni amɛdaraa. Nakai nɔŋŋ hu Yehowa wiemɔi lɛ baawo ewebii lɛ hewalɛ yɛ mumɔŋ ni ebaaye ebua amɛ ní amɛwaje wekukpaa ní kã amɛkɛ lɛ teŋ lɛ. Shi wein lɛ hu? Bei pii lɛ, akɛ wein fɔɔ nitsumɔ yɛ gbijurɔyeli bei amli. Yɛ Biblia lɛ mli lɛ, akɛtoɔ ninamɔ kɛ mlifilimɔ he. (Lala 104:15) Yehowa kɛ kɛɛmɔ ní ekɛɛ ewebii lɛ akɛ ‘amɛbahe wein’ lɛ miima nɔ mi kɛmiiha amɛ akɛ amɛtsui muu fɛɛ ní amɛkɛaaku amɛsɛɛ kɛba anɔkwa jamɔ mli ekoŋŋ lɛ baaha ‘amɛmii ashɛ amɛhe jogbaŋŋ.’—5 Mose 16:15; Lala 19:9; Abɛi 10:22.
7. Mɛni hewɔ musuŋtsɔlɛ ní Yehowa jie kpo etsɔɔ nomii lɛ sa kadimɔ waa lɛ, ni mɛni enɛ tsɔɔ wɔ yɛ ehe?
7 Kwɛ mɔbɔnalɔ ní Yehowa ji akɛ eha Yudafoi nomii lɛ mumɔŋ hejɔɔmɔ ní tamɔ nɛkɛ! Emlihilɛ lɛ sa kadimɔ babaoo po kɛji wɔkai Yudafoi lɛ ayinɔsane ni ji gbɛ fɔŋ ní amɛkɔ kɛ atuatsemɔ lɛ. Ejeee akɛ amɛsa Yehowa nɔkpɛlɛmɔ. Shi kɛlɛ, lalatsɛ David ŋma afii ohai abɔ kɛtsɔ hiɛ akɛ: “Mɔbɔnalɔ kɛ durolɔ ji Yehowa, emli fuuu mra, ni emɔbɔnalɛ fá. Ehiɛɛɛ béi amli daa, ni ebɛɛɛ mɔ ewooo emli kɛyaaa naanɔ.” (Lala 103:8, 9) Yɛ nɔ najiaŋ ní Yehowa kɛ ewebii lɛ aaafo tako mli kwraa lɛ, lɛ klɛŋklɛŋ eeŋɔ hegbɛ lɛ ní ekɛsáa ekɛ amɛ teŋ. Lɛɛlɛŋ, eji Nyɔŋmɔ ní ‘náa mɔbɔnalɛ he tsui.’—Mika 7:18.
Hekɛnɔfɔɔ ní Egbá Afã
8. Namɛi anɔ Yudafoi pii kɛ amɛhiɛ efɔ̃, yɛ mɛɛ kɔkɔbɔɔ fɛɛ sɛɛ?
8 Kɛbashi amrɔ nɛɛ Yudafoi pii kɛ amɛhiɛ efɔ̃ko Yehowa nɔ kɛmɔko shi kɛha yiwalaheremɔ. Ákɛ nɔkwɛmɔnɔ lɛ, dani Yerusalem baagbee shi lɛ, enɔyelɔi lɛ kɛ amɛhiɛ fɔ̃ jeŋmaji ní he wa lɛ anɔ kɛha sɛɛfimɔ, ni kɛ́ wɔɔkɛɛ lɛ, amɛkɛ Mizraim kɛ Babilon fɛɛ bɔ ajwamaŋ. (Ezekiel 16:26-29; 23:14) Yeremia kɛ yiŋtoo kpakpa bɔ amɛ kɔkɔ akɛ: “Alomɔ gbɔmɔ ní ŋɔɔ ehiɛ efɔ̃ɔ adesa nɔ, ní eŋɔɔ heloo efeɔ enine, ní etsui eje Yehowa he lɛ!” (Yeremia 17:5) Ni kɛlɛ, nakai pɛpɛɛpɛ ji bɔ ni Nyɔŋmɔ webii lɛ fee!
9. Yudafoi pii ‘miikane shika kɛmiihe nɔ ni jeee aboloo’ yɛ mɛɛ gbɛ nɔ?
9 Amrɔ nɛɛ amɛtsɔmɔ nyɔji amɛha jeŋmaji ní amɛkɛ amɛhiɛ fɔ̃ amɛnɔ lɛ ateŋ ekome. Ani amɛkase nii kɛjɛ enɛ mli? Eeenyɛ efee akɛ amɛteŋ mɛi pii ekaseko nii kɛjɛko mli, ejaakɛ Yehowa bi akɛ: “Mɛɛba nyɛkaneɔ shika nyɛheɔ nɔ ni jeee aboloo, ni nyɛkɛ nyɛnitsumɔ nii lɛ heɔ nɔ ni etɔɔɔ mɔ?” (Yesaia 55:2a) Kɛji Yudafoi lɛ kɛ amɛhiɛ miifɔ̃ mɔ kroko moŋ nɔ fe Yehowa lɛ, no lɛ ‘amɛmiikane shika kɛmiihe nɔ ni jeee aboloo.’ Eka shi faŋŋ akɛ amɛnáŋ heyeli kɛjɛŋ Babilon ní eyiŋtoo ji eŋmɛɛɛ nomii ahe ní amɛku amɛsɛɛ kɛya amɛmaŋ kɔkɔɔkɔ lɛ dɛŋ. Yɛ anɔkwale mli lɛ, Babilon, kɛ enɔyeli gbɛjianɔtoo, ejarayeli, kɛ epasa jamɔ lɛ, bɛ nɔ ko kwraa ní ekɛaaha Yudafoi nomii lɛ.
10. (a) Mɛɛ nyɔmɔwoo Yehowa kɛbaaha Yudafoi nomii lɛ kɛji amɛbo lɛ toi lɛ? (b) Mɛɛ kpaŋmɔ Yehowa kɛ David efee?
10 Yehowa kpá ewebii lɛ fai akɛ: “Nyɛboa mi toi moŋ, ní nyɛye nii kpakpai, ní nyɛsusuma mii ashɛ yɛ fɔ nii ahe! Nyɛfea toi, ni nyɛbaa miŋɔɔ! Nyɛboa toi, ní nyɛsusuma yi aná wala! ni mikɛ nyɛ aaakpaŋ naanɔ kpaŋmɔ ní ji David mɔbɔnalɛi ní ma shi shiŋŋ lɛ!” (Yesaia 55:2b, 3) Hiɛnɔkamɔ kome pɛ ní yɔɔ kɛha gbɔmɛi ní naaa mumɔŋ niyenii kpakpa nɛɛ damɔ Yehowa, ní amrɔ nɛɛ ekɛ amɛ miiwie gbalɛ wiemɔi kɛtsɔ Yesaia nɔ lɛ pɛ nɔ. Amɛwala diɛŋtsɛ damɔ Nyɔŋmɔ shɛɛ sane lɛ toiboo nɔ, ejaakɛ ewie akɛ kɛ́ amɛfee nakai lɛ, ‘amɛsusuma yi aaaná wala.’ Shi, mɛni ji “naanɔ kpaŋmɔ” ní Yehowa kɛ mɛi ní boɔ lɛ toi lɛ baakpãŋ lɛ? Nakai kpaŋmɔ lɛ kɔɔ “David mɔbɔnalɛi” lɛ he. Afii ohai abɔ ní etsɔ hiɛ lɛ, Yehowa wo David shi akɛ emaŋtsɛsɛi lɛ “aaama shi shiŋŋ kɛaatee naanɔ.” (2 Samuel 7:16) Enɛ hewɔ lɛ, “naanɔ kpaŋmɔ” ní atsĩ tã yɛ biɛ lɛ kɔɔ nɔyeli he.
Naanɔ Gboshiniyelɔ Kɛha Naanɔ Maŋtsɛyeli Ko
11. Mɛni hewɔ Nyɔŋmɔ shiwoo ní ekɛha David lɛ baafee tamɔ nɔ ni nyɛŋ aba mli kɛha nomii ní yɔɔ Babilon lɛ?
11 Akpɛlɛɔ nɔ akɛ, ekolɛ sane ní kɔɔ nɔyeli ní baahi David wekukpaa lɛ mli lɛ he lɛ baafee nɔ ni nyɛŋ aba mli kɛha nakai Yudafoi nomii lɛ. Amɛshikpɔŋ lɛ kɛ hegbɛ ní amɛyɔɔ akɛ maŋ lɛ po éŋmɛɛ amɛ! Shi enɛ baahi shi be kukuoo ko kɛkɛ. Yehowa hiɛ kpako kpaŋmɔ ní ekɛ David fee lɛ nɔ. Bɔ fɛɛ bɔ ni etamɔ nɔ ni nyɛŋ aba mli yɛ adesai asusumɔ naa po lɛ, Nyɔŋmɔ yiŋtoo ní kɔɔ naanɔ Maŋtsɛyeli ní baahi David wekukpaa lɛ mli lɛ he lɛ baaye omanye. Shi yɛ mɛɛ gbɛ nɔ, ni mɛɛ be? Yɛ afi 537 D.Ŋ.B. lɛ, Yehowa kpɔ̃ ewebii lɛ kɛjɛ Babilon nomŋɔɔ mli ni ekɛ amɛ ku sɛɛ kɛba amɛmaŋ shikpɔŋ nɔ ekoŋŋ. Ani enɛ ha amɛnyɛ amɛto naanɔ maŋtsɛyeli ko amɛma shi? Dabi, amɛtee nɔ amɛhi wɔŋjalɔi amaŋtsɛyeli kroko, ni ji Medo-Persia shishi. “Bei ní ato” aha jeŋmaji lɛ ní amɛkɛye nɔ lɛ bako naagbee lolo. (Luka 21:24) Akɛni abɛ maŋtsɛ yɛ Israel hewɔ lɛ, shiwoo ní Yehowa kɛha David lɛ baakã he afee nɔ ni bako mli lolo yɛ afii ohai abɔ ní baaba lɛ amli.
12. Mɛɛ nɔ̃ titri ko Yehowa fee koni ekɛha Maŋtsɛyeli he kpaŋmɔ ní ekɛ David fee lɛ aba mli?
12 Nɔ ni fe afii 500 yɛ Israel jiemɔ kɛmiijɛ Babilon nomŋɔɔ mli lɛ sɛɛ lɛ, Yehowa fee nɔ̃ titri ko koni ekɛha Maŋtsɛyeli he kpaŋmɔ lɛ aba mli beni etsake ekromɔ Bi lɛ, ni ji enibɔɔ nitsumɔi lɛ ashishijee lɛ wala kɛjɛ ŋwɛi anunyam mli kɛbawo Yudanyo oblayoo foro Maria fɔmɔ kotoku mli lɛ. (Kolosebii 1:15-17) Beni Yehowa bɔfo lɛ tswaa nakai nifeemɔ lɛ he adafi lɛ, ekɛɛ Maria akɛ: “Eeetsɔ agbo, ni aaatsɛ́ lɛ Ŋwɛinyo lɛ bi, ni Nuntsɔ Nyɔŋmɔ aaaŋɔ etsɛ David maŋtsɛsɛi lɛ aha lɛ. Ni eeeye Yakob we lɛ nɔ maŋtsɛ kɛaatee naanɔ, ni emaŋtsɛyeli lɛ sɛɛ efoŋ.” (Luka 1:32, 33) No hewɔ lɛ afɔ́ Yesu awo David maŋtsɛmɛi awekukpaa lɛ mli, ni ená maŋtsɛyeli hegbɛ ákɛ gboshinii. Kɛ́ akɛ Yesu tá maŋtsɛsɛi lɛ nɔ lɛ, ebaaye maŋtsɛ “kɛyashi naanɔ.” (Yesaia 9:6; Daniel 7:14) Enɛ hewɔ lɛ, gbɛ egbele agbɛnɛ kɛha shiwoo ní Yehowa kɛha afii ohai abɔ ní eho nɛ, ákɛ ebaaha Maŋtsɛ David aná naanɔ gboshiniyelɔ lɛ mlibaa.
“Mlawolɔ Ha Majimaji Lɛ”
13. Yesu fee ‘odasefonyo kɛha majimaji lɛ’ yɛ esɔɔmɔ nitsumɔ be lɛ mli kɛ eshitee lɛ sɛɛ hu yɛ mɛɛ gbɛ nɔ?
13 Mɛni nɛkɛ wɔsɛɛ be mli maŋtsɛ nɛɛ baafee? Yehowa wie akɛ: “Naa, mikɛ lɛ efee odase miha majimaji lɛ, lumɔ kɛ mlawolɔ ha majimaji lɛ!” (Yesaia 55:4) Beni Yesu da lɛ, etsɔ Yehowa najiaŋdamɔlɔ yɛ shikpɔŋ nɔ, Nyɔŋmɔ odasefonyo kɛha jeŋmaji lɛ. Yɛ eshihilɛ be ákɛ adesa lɛ mli lɛ, etsu sɔɔmɔ nitsumɔ lɛ he nii yɛ “Israel we tooi ní elaaje lɛ aŋɔɔ.” Shi kɛlɛ, beni eshwɛ fioo ní ebaakwɔ kɛya ŋwɛi lɛ, Yesu kɛɛ esɛɛnyiɛlɔi lɛ akɛ: “No hewɔ lɛ nyɛyaa ní nyɛyafea jeŋmaji fɛɛ mikaselɔi . . . Naa, mi lɛ mikɛ nyɛ yɛ daa kɛyashi jeŋ naagbee lɛ.” (Mateo 10:5, 6; 15:24; 28:19, 20) Enɛ hewɔ lɛ, yɛ be ko sɛɛ lɛ, akɛ Maŋtsɛyeli shɛɛ sane lɛ tee mɛi ní jeee Yudafoi lɛ aŋɔɔ, ni amɛteŋ mɛi komɛi ná kpaŋmɔ ní akɛ David fee lɛ mlibaa mli gbɛfaŋnɔ. (Bɔfoi lɛ Asaji 13:46) Yɛ nɛkɛ gbɛ nɔ lɛ, yɛ Yesu gbele, eshitee, kɛ ekwɔɔ kɛ ŋwɛi yaa lɛ sɛɛ lɛ, etee nɔ etsu nii akɛ Yehowa ‘odasefonyo kɛha majimaji lɛ.’
14, 15. (a) Yesu jie ehe kpo akɛ “lumɔ kɛ mlawolɔ” yɛ mɛɛ gbɛ nɔ? (b) Mɛɛ gbɛkpamɔ Yesu sɛɛnyiɛlɔi ní hi shi yɛ klɛŋklɛŋ afii oha lɛ mli lɛ ná?
14 Yesu baasɔmɔ ákɛ “lumɔ kɛ mlawolɔ” hu. Yɛ bɔ ni awie Yesu he aha yɛ gbalɛ wiemɔ mli lɛ naa lɛɛlɛŋ lɛ, beni eyɔɔ shikpɔŋ nɔ lɛ, ekpɛlɛ yitsoyeli he gbɛnaa nii ní akɛha lɛ lɛ nɔ kɛmɔ shi, ni enyiɛ hiɛ yɛ gbɛ̀i srɔtoi fɛɛ nɔ, ni egbala gbɔmɛi babaoo kɛba eŋɔɔ, ni etsɔɔ amɛ anɔkwale wiemɔi lɛ, ni etsɔɔ sɛɛnamɔi ní mɛi ni nyiɛɔ ehiɛnyiɛmɔ sɛɛ lɛ baaná lɛ mli faŋŋ. (Mateo 4:24; 7:28, 29; 11:5) Etsɔse ekaselɔi lɛ jogbaŋŋ kɛmɔ shi, ni esaa amɛ koni amɛkɛ amɛhe awo shiɛmɔ he tafaa ní kã amɛhiɛ lɛ mli. (Luka 10:1-12; Bɔfoi lɛ Asaji 1:8; Kolosebii 1:23) Yɛ afii etɛ kɛ fã pɛ mli lɛ, Yesu to shishitoo nɔ̃ ema shi kɛha majimaji ateŋ asafo ní efee ekome, kɛ emli bii akpei abɔ ní ahala amɛ kɛjɛ hewolonɔ sui pii amli! Anɔkwa “lumɔ kɛ mlawolɔ” pɛ baanyɛ atsu nitsumɔ kpele ní tamɔ nɛkɛ he nii.b
15 Akɛ Nyɔŋmɔ mumɔ krɔŋkrɔŋ lɛ fɔ mɛi ní abua amɛnaa awo klɛŋklɛŋ afii oha lɛ mli Kristofoi asafo lɛ mli lɛ mu, ni amɛná gbɛkpamɔ akɛ amɛaafee Yesu hefatalɔi nɔyelɔi yɛ eŋwɛi Maŋtsɛyeli lɛ mli. (Kpojiemɔ 14:1) Shi kɛlɛ, Yesaia gbalɛ lɛ yaa shɔŋŋ kɛtekeɔ Kristojamɔ shishijee beaŋ kɛkɛ. Odaseyeli tsɔɔ akɛ afi 1914 lɛ nɔ dani Yesu Kristo bɔi maŋtsɛyeli ákɛ Nyɔŋmɔ Maŋtsɛyeli lɛ nɔ Maŋtsɛ. No sɛɛ be fioo ko lɛ, shihilɛ ko te shi yɛ Kristofoi ní afɔ amɛ mu lɛ ateŋ yɛ shikpɔŋ nɔ, ní emli nibii babaoo tamɔ shihilɛ ní Yudafoi nomii lɛ hi mli yɛ afii ohai ekpaa D.Ŋ.B. lɛ. Yɛ anɔkwale mli lɛ, nɔ ni ba nakai Kristofoi lɛ anɔ lɛ feɔ Yesaia gbalɛ lɛ mlibaa wulu.
Ŋmɛnɛŋmɛnɛ Beaŋ Nomŋɔɔ kɛ Heŋmɛɛmɔ
16. Mɛɛ haomɔ ba beni akɛ Yesu tá maŋtsɛsɛi nɔ yɛ afi 1914 lɛ sɛɛ?
16 Jeŋ haomɔ ní eko ní tamɔ nakai bako dã kadi be ní akɛ Yesu tá maŋtsɛsɛi nɔ ákɛ Maŋtsɛ yɛ afi 1914 lɛ. Mɛni hewɔ? Eba lɛ nakai ejaakɛ beni Yesu batsɔ Maŋtsɛ lɛ, eshwie Satan kɛ mumɔŋ bɔɔ nii fɔji krokomɛi lɛ kwraa kɛjɛ ŋwɛi. Akɛni atsĩ Satan naa awo shikpɔŋ lɛ nɔ hewɔ lɛ, eje shishi ewuu ta eshi krɔŋkrɔŋbii ní eshwɛ, ni ji Kristofoi ní afɔ amɛ mu lɛ ateŋ shwɛɛnii lɛ. (Kpojiemɔ 12:7-12, 17) Eshɛ hé ni mli wa fe fɛɛ yɛ afi 1918 beni maŋ shiɛmɔ nitsumɔ lɛ sɛɛ fo kwraa, ní ayawo onukpai ní kwɛɔ Buu Mɔɔ Asafo lɛ nitsumɔ lɛ nɔ lɛ atsuŋ yɛ apasa naafolɔmɔi ni ji maŋjwaa hewɔ lɛ. Yɛ nɛkɛ gbɛ nɔ lɛ, Yehowa tsuji ni yɔɔ ŋmɛnɛŋmɛnɛ beaŋ lɛ tee mumɔŋ nomŋɔɔ mli, nɔ ni haa akaiɔ blema Yudafoi lɛ anomŋɔɔ shihilɛ diɛŋtsɛ ní ba amɛnɔ lɛ. Ahorabɔɔ kpele diɛŋtsɛ ba amɛnɔ.
17. Atsake mɛi ní afɔ amɛ mu lɛ ashihilɛ lɛ sɛɛsɛɛ yɛ afi 1919 yɛ mɛɛ gbɛ nɔ, ni mɛɛ gbɛ nɔ awaje amɛ yɛ?
17 Shi kɛlɛ, Nyɔŋmɔ tsuji ní afɔ amɛ mu lɛ anomŋɔɔ shihilɛ lɛ sɛɛ etsɛɛɛ. Yɛ March 26, 1919 lɛ, aŋmɛɛ onukpai ní awo amɛ tsuŋ lɛ ahe, ni yɛ sɛɛ mli lɛ ajie naafolɔmɔi ní akɛshi amɛ lɛ kwraa. Yehowa fɔse mumɔ krɔŋkrɔŋ eshwie ewebii ní ekpɔ̃ amɛ lɛ anɔ, ni ewo amɛ hewalɛ kɛha nitsumɔ ní kã amɛhiɛ lɛ. Amɛkɛ miishɛɛ here ninefɔɔ ní akɛha amɛ akɛ ‘amɛbayɛ wala nu lɛ yaka’ lɛ nɔ. (Kpojiemɔ 22:17) Amɛbahe “wein kɛ fufɔ, shi jeee shika loo yinii anaa,” ni awaje amɛ yɛ mumɔŋ kɛha hiɛyaa ní baaba wɔsɛɛ, ní ji hiɛyaa ní shwɛɛnii ní afɔ amɛ mu lɛ enako kɛtsɔko hiɛ lɛ.
Asafo Babaoo ko Jo Foi Kɛtee Mɛi ní Nyɔŋmɔ Efɔ Amɛ Mu lɛ Aŋɔɔ
18. Mɛɛ kui enyɔ anaa yɛ Yesu Kristo kaselɔi lɛ ateŋ, ni mɛɛ kuu amɛfeɔ ŋmɛnɛ?
18 Yesu kaselɔi lɛ hiɛ hiɛnɔkamɔi enyɔ lɛ ateŋ ekome. Klɛŋklɛŋ lɛ, abua “asafoku bibioo” ni amɛyibɔ ji 144,000—ni ji Kristofoi ní afɔ amɛ mu, ní jɛ Yudafoi kɛ Jeŋmajiaŋbii lɛ ateŋ, ní feɔ “Nyɔŋmɔ Israel lɛ,” ní amɛyɔɔ hiɛnɔkamɔ akɛ amɛkɛ Yesu baaye maŋtsɛ yɛ eŋwɛi Maŋtsɛyeli lɛ mli lɛ anaa. (Luka 12:32; Galatabii 6:16; Kpojiemɔ 14:1) Nɔ ni ji enyɔ lɛ, “asafo babaoo” ko ni ji “tooi krokomɛi” ejie amɛhe kpo yɛ naagbee gbii nɛɛ amli. Mɛnɛɛmɛi yɛ hiɛnɔkamɔ akɛ amɛbaahi shi kɛya naanɔ yɛ paradeiso shikpɔŋ nɔ. Dani amanehulu kpeteŋkpele lɛ baafɛ́ lɛ, nɛkɛ asafo babaoo nɛɛ—ní atsɔɔko bɔ ni amɛyifalɛ baaji lɛ—fataa asafoku bibioo lɛ ahe kɛsɔmɔɔ, ni kui enyɔ lɛ fɛɛ feɔ “kuu kome” yɛ “kwɛlɔ kome” shishi.—Kpojiemɔ 7:9, 10; Yohane 10:16.
19. “Jeŋmaŋ” ní tsutsu ko lɛ Nyɔŋmɔ Israel leee amɛ lɛ ehere tsɛmɔ ní nakai mumɔŋ maŋ lɛ kɛha lɛ nɔ yɛ mɛɛ gbɛ nɔ?
19 Abaanyɛ ayoo asafo babaoo nɛɛ naabuamɔ lɛ yɛ Yesaia gbalɛ lɛ mli wiemɔi ní nyiɛ sɛɛ nɛɛ amli, akɛ: “Naa, oootsɛ́ jeŋmaŋ ní oleee kɛaaba, ni jeŋmaŋ ní leeeo hu aaajo foi kɛaaba oŋɔɔ, yɛ Yehowa, o-Nyɔŋmɔ lɛ, kɛ Israel Mɔ krɔŋkrɔŋ lɛ hewɔ, ejaakɛ ewo ohiɛ nyam!” (Yesaia 55:5) Yɛ amɛ jiemɔ kɛjɛ mumɔŋ nomŋɔɔ mli lɛ sɛɛ afii lɛ amli lɛ, klɛŋklɛŋ lɛ, kulɛ shwɛɛnii ní afɔ amɛ mu lɛ nuuu shishi akɛ dani Harmagedon baashɛ lɛ, amɛbaaná gbɛfaŋnɔ krɛdɛɛ ko yɛ “jeŋmaŋ” kpeteŋkpele ní amɛaatsɛ́ amɛ kɛba Yehowa jamɔ mli lɛ mli. Shi kɛlɛ, beni be shwieɔ mli lɛ, gbɔmɛi ní yɔɔ jalɛ tsuii, ní amɛbɛ ŋwɛi hiɛnɔkamɔ lɛ ateŋ mɛi pii kɛ mɛi ní afɔ amɛ mu lɛ bɔi bɔɔ, ni amɛsɔmɔ Yehowa kɛ ekãa tamɔ bɔ ni mɛi ní afɔ amu lɛ hu yɔɔ ekãa lɛ pɛpɛɛpɛ. Nɛkɛ mɛi heei nɛɛ kadi Nyɔŋmɔ webii ashihilɛ ní aha ehiɛ eba nyam nɛɛ, ni amɛyɔse akɛ Yehowa yɛ amɛteŋ. (Zakaria 8:23) Yɛ afi 1930 afii lɛ amli lɛ, mɛi ní afɔ amɛ mu lɛ banu mɛi ni kuu nɛɛ mli bii, ní amɛyifalɛ yaa hiɛ yɛ amɛteŋ lɛ ji diɛŋtsɛ lɛ shishi. Amɛbayɔse akɛ naabuamɔ nitsumɔ kpele ko kã amɛhiɛ lolo ní amɛbaatsu. Asafo babaoo lɛ ahe miitswa shi ní amɛkɛ Nyɔŋmɔ webii ní ekɛ amɛ efee kpaŋmɔ lɛ abɔ, ni amɛmiifee enɛ kɛ yiŋtoo kpakpa.
20. (a) Mɛni hewɔ ehe hiaa ní ‘atao Yehowa’ yɛ wɔgbii nɛɛ amli lɛ, ni mɛɛ gbɛ nɔ atsɔɔ afeɔ enɛ? (b) Te Yehowa baahere mɛi ní taoɔ lɛ lɛ anɔ eha tɛŋŋ?
20 Akɛ tsɛmɔ nɛɛ ha yɛ Yesaia gbii lɛ amli akɛ: “Nyɛtaoa Yehowa, be mli ní eeeha ana lɛ, nyɛtsɛ́a lɛ, be mli ní ebɛŋkɛ!” (Yesaia 55:6) Wiemɔi nɛɛ sa jogbaŋŋ yɛ wɔgbii nɛɛ amli, kɛha mɛi ní feɔ Nyɔŋmɔ Israel lɛ kɛ asafo babaoo ní amɛyifalɛ yaa hiɛ lɛ fɛɛ. Yehowa jɔɔmɔ lɛ jeee nɔ ni ekɛhaa ní ebiii nɔ ko yɛ he, ni nakai nɔŋŋ hu ekpãaa eninefɔɔ lɛ mli kɛyaaa naanɔ. Amrɔ nɛɛ ji be ni esa akɛ wɔtao Nyɔŋmɔ hiɛ duromɔ. Kɛ́ Yehowa be ní eto kɛha kojomɔ lɛ shɛ lɛ, no mli lɛ ebaafee be ní ekpe sɛɛ fe nine. No hewɔ lɛ, Yesaia kɛɛ akɛ: “Ha ní mɔ fɔŋ akwa egbɛ̀i lɛ, ni nɔ̃ sha feelɔ akwa ejwɛŋmɔi lɛ, ní eku esɛɛ kɛba Yehowa ŋɔɔ, ni emusuŋ aaatsɔ lɛ yɛ ehewɔ, kɛ wɔ-Nyɔŋmɔ lɛ ŋɔɔ, shi ekɛaafa lɛ aahu!”—Yesaia 55:7.
21. Israel maŋ lɛ yeee sanejajemɔ ní amɛblematsɛmɛi lɛ kɛha lɛ mli anɔkwale yɛ mɛɛ gbɛ nɔ?
21 Wiemɔ kuku ni ji “eku esɛɛ kɛba Yehowa ŋɔɔ” lɛ tsɔɔ akɛ tsutsu ko lɛ, mɛi ní ehe hiaa ní amɛtsake amɛtsui lɛ kɛ Nyɔŋmɔ hi wekukpaa ko mli. Wiemɔ lɛ haa wɔkaiɔ akɛ Yesaia gbalɛ lɛ fã nɛɛ mli nibii babaoo ná amɛ klɛŋklɛŋ mlibaa yɛ Yudafoi nomii ní hi Babilon lɛ agbɛfaŋ. Afii ohai abɔ ni eho lɛ, nɛkɛ nomii nɛɛ ablematsɛmɛi lɛ jaje amɛfai shi ní amɛtswa akɛ amɛbaabo Yehowa toi lɛ amɛtsɔɔ faŋŋ beni amɛkɛɛ akɛ: “Enɛ akagbale wɔ fɔ̃ɔŋfɔ̃ akɛ wɔɔshi Yehowa, ní wɔyasɔmɔ nyɔŋmɔi krokomɛi!” (Yoshua 24:16) Yinɔsane tsɔɔ akɛ nɔ ni amɛkɛɛ akɛ ‘ekagbale amɛ’ lɛ ba mli kɛ̃—shii abɔ! Hemɔkɛyeli ní Nyɔŋmɔ webii lɛ bɛ lɛ ji yiŋtoo hewɔ ní amɛyɔɔ nomŋɔɔ mli yɛ Babilon lɛ.
22. Mɛni hewɔ Yehowa kɛɔ akɛ ejwɛŋmɔi kɛ egbɛ̀i lɛ anɔ kwɔlɔ kwraa fe adesai anɔ̃ lɛ?
22 Mɛni baaba kɛji amɛtsake amɛtsui lɛ? Yehowa tsɔ Yesaia nɔ ewo shi akɛ ‘ekɛbaafa amɛ aahu.’ Ni ekɛfata he akɛ: “Shi jeee mijwɛŋmɔi lɛ ji nyɛjwɛŋmɔi lɛ, ni jeee nyɛgbɛ̀i lɛ ji migbɛ̀i lɛ, Yehowa kɛɛ; shi bɔ ni ŋwɛi kwɔ fe shikpɔŋ lɛ, nakai migbɛ̀i lɛ kwɔ fe nyɛgbɛ̀i lɛ, ni mijwɛŋmɔi lɛ hu kwɔ fe nyɛjwɛŋmɔi lɛ!” (Yesaia 55:8, 9) Yehowa eye emuu, ni esusumɔi kɛ egbɛ̀i lɛ anɔ kwɔlɔ kwraa fe bɔ ni abaanyɛ ashɛ he. Emɔbɔnalɛ lɛ po nɔ kwɔ bɔ ni wɔ adesai lɛ nyɛŋ wɔkpá gbɛ akɛ wɔɔshɛ he kɔkɔɔkɔ. Susumɔ enɛ he okwɛ: Kɛ́ wɔkɛ tɔmɔ ke wɔnaanyo adesa lɛ, ebafeɔ eshafeelɔ ní kɛ eshafeelɔ kroko tɔmɔ eke lɛ. Wɔyɔseɔ akɛ etsɛɛɛ ni wɔ hu ehe bahiaa ní wɔnaanyo adesa kɛ wɔtɔmɔ ake wɔ. (Mateo 6:12) Eyɛ mli akɛ ehe ehiaaa ní akɛ tɔmɔ ake Yehowa moŋ, shi ekɛ tɔmɔ ‘keɔ aahu’! Lɛɛlɛŋ, eji Nyɔŋmɔ ni yɔɔ suɔmɔ kɛ mlihilɛ kpele. Ni Yehowa jɛɔ emɔbɔnalɛ lɛ mli egbeleɔ ŋwɛi samfɛji lɛ anaa, ni enɛɔ jɔɔmɔi eshwieɔ mɛi ní kuɔ amɛsɛɛ kɛbaa eŋɔɔ kɛ amɛtsuii fɛɛ lɛ anɔ aahu.—Maleaki 3:10.
Jɔɔmɔi Kɛha Mɛi ní Kuɔ Amɛsɛɛ Kɛbaa Yehowa Ŋɔɔ Lɛ
23. Te Yehowa fee bɔ ni ewiemɔ baa mli pɛpɛɛpɛ lɛ he mfoniri eha tɛŋŋ?
23 Yehowa ewo ewebii lɛ ashi akɛ: “Shi tamɔ bɔ ni nugbɔnɛmɔ kɛ snoo jɛɔ ŋwɛi shwieɔ shi, ní ekuuu esɛɛ kɛyaaa jɛi dɔŋŋ, akɛ ja eha shikpɔŋ lɛ nu, ní eha eba nii ní ewo yibii, ní ekɛ dumɔ nii eha nidulɔ ní ekɛ niyenii hu eha mɔ ni yeɔ lɛ: nakai miwiemɔi ni jɛɔ midaaŋ lɛ hu aaafee: ekuŋ esɛɛ kɛbaŋ miŋɔɔ efolo, shi moŋ eeefee nɔ ni sa mihiɛ lɛ, ni eeeha nɔ ni mitsu lɛ yɛ hewɔ lɛ aya nɔ!” (Yesaia 55:10, 11) Bɔ fɛɛ bɔ ní fee lɛ, nɔ fɛɛ nɔ ní Yehowa wieɔ lɛ baaba mli. Taakɛ bɔ ni nugbɔnɛmɔ kɛ snoo ní jɛɔ ŋwɛi shwieɔ shi lɛ tsuɔ amɛyiŋtoo ni ji nu ní amɛhaa shikpɔŋ lɛ kɛ yibii ní amɛhaa ewoɔ lɛ he nii lɛ, nakai pɛpɛɛpɛ anyɛɔ akɛ he fɔ̃ɔ Yehowa wiemɔ ní jɛɔ edaaŋ lɛ nɔ kwraa kɛmɔɔ shi. Kɛ́ ewo shi lɛ, ebaaha eba mli—ni ebaafee nakai kɛmɔ shi.—4 Mose 23:19.
24, 25. Mɛɛ jɔɔmɔi asaa ato Yudafoi nomii ní tsuɔ Yehowa shɛɛ sane ní ekɛtsɔ Yesaia nɔ lɛ he nii lɛ?
24 No hewɔ lɛ, kɛ́ Yudafoi lɛ bo wiemɔi ní atsɔ Yesaia nɔ akɛ amɛ wie yɛ gbalɛ wiemɔ mli lɛ toi lɛ, no lɛ bɔ fɛɛ bɔ ni fee lɛ amɛnine baashɛ yiwalaheremɔ ní Yehowa ewo shi yɛ he lɛ nɔ. Nɔ ni baajɛ mli aba ji akɛ, amɛbaaná miishɛɛ kpele diɛŋtsɛ. Yehowa jaje akɛ: “Nyɛaaje kpo kɛ nyamɔ, ni aaakpala nyɛ kɛaaje kpo yɛ hejɔlɛ mli. Gɔji lɛ kɛ ŋmeŋmei lɛ aaawó nyamɔ lala nɔ yɛ nyɛhiɛ, ni ŋã nɔ tsei lɛ fɛɛ aaatswa amɛdɛ̃. Sɛsɛo aaakwɛ̃ yɛ ŋmeitso najiaŋ, ni mirtotso hu aaakwɛ̃ yɛ aklati najiaŋ; ni eeetsɔ gbɛi eha Yehowa kɛ naanɔ okadi hu ní afiteŋ.”—Yesaia 55:12, 13.
25 Yɛ afi 537 D.Ŋ.B. lɛ, yɛ anɔkwale mli lɛ, Yudafoi nomii lɛ shi Babilon kɛ mlifilimɔ. (Lala 126:1, 2) Beni amɛyashɛ Yerusalem lɛ, amɛna akɛ shikpɔŋ lɛ nɔ eyi obɔ̃ kɛ ŋmeei kɛ aklatii—kaimɔ akɛ, shikpɔŋ lɛ ekã shi amaŋfɔ afii nyɔŋmai abɔ. Shi Nyɔŋmɔ webii ní aha amɛku amɛsɛɛ kɛba amɛmaŋ ekoŋŋ lɛ baanyɛ aye abua agbɛnɛ ní akɛ tsakemɔ ní yɔɔ fɛo diɛŋtsɛ aba! Tsei ní kɛlɛɔ fɛfɛo, tamɔ sɛsɛo kɛ mirto tsei, baye ŋmeei kɛ aklatii anajiaŋ. Aana Yehowa jɔɔmɔi ahe odaseyeli faŋŋ ní tsɔɔ akɛ ewebii lɛ miisɔmɔ lɛ kɛ “nyamɔ lala.” Etamɔ nɔ ni shikpɔŋ lɛ diɛŋtsɛ mli efili lɛ.
26. Mɛɛ jɔɔmɔ shihilɛ Nyɔŋmɔ webii náa mli ŋɔɔmɔ ŋmɛnɛ?
26 Yɛ afi 1919 lɛ, akpɔ̃ Kristofoi ní afɔ amɛ mu lɛ ateŋ shwɛɛnii lɛ kɛjɛ mumɔŋ nomŋɔɔ mli. (Yesaia 66:8) Amrɔ nɛɛ asafo babaoo lɛ kɛ amɛ efee ekome, ni amɛmiisɔmɔ Nyɔŋmɔ kɛ mlifilimɔ yɛ mumɔŋ paradeiso shihilɛ mli. Akɛni amɛye amɛhe kwraa kɛjɛ Babilon hewalɛ he kadimɔ nii fɛɛ amli hewɔ lɛ, amɛnáa duromɔ shihilɛ, ní ebatsɔ “gbɛi” kɛha Yehowa lɛ mli ŋɔɔmɔ. Amɛmumɔŋ shweremɔ shihilɛ lɛ woɔ egbɛi lɛ hiɛ nyam, ni ewóɔ enɔ gojoo ákɛ anɔkwa gbalɛ Nyɔŋmɔ lɛ. Nɔ ni Yehowa etsu eha amɛ lɛ jieɔ Nyɔŋmɔ ní eji lɛ kpo faŋŋ, ni efeɔ bɔ ni eyeɔ eshiwoo nɔ kɛ bɔ ni ejieɔ mɔbɔnalɛ kpo etsɔɔ mɛi ní tsakeɔ amɛtsui lɛ he odaseyeli. Eba akɛ mɛi fɛɛ ní yaa nɔ ‘amɛheɔ wein kɛ fufɔ, shi jeee shika loo yinii anaa’ lɛ aaanya yɛ esɔɔmɔ mli kɛya naanɔ!
[Shishigbɛ niŋmai]
a Ana Yudafoi agbɛii pii yɛ blema Babilon nitsumɔi amli saji ní aŋmala ashwie shi lɛ amli.
b Yesu miiya nɔ eekwɛ kaselɔ-feemɔ nitsumɔ lɛ nɔ lolo. (Kpojiemɔ 14:14-16) Ŋmɛnɛ, Kristofoi hii kɛ yei buɔ Yesu ákɛ asafo lɛ Yitso. (1 Korintobii 11:3) Ni yɛ Nyɔŋmɔ be ní sa mli lɛ, Yesu baatsu nii ákɛ “lumɔ kɛ mlawolɔ” yɛ gbɛ kroko hu nɔ, beni ebaanyiɛ kunimyeli ta ní ebaawuu eshi Nyɔŋmɔ henyɛlɔi lɛ hiɛ yɛ Harmagedon lɛ.—Kpojiemɔ 19:19-21.
[Mfoniri ni yɔɔ baafa 234]
Aafɔ̃ Yudafoi ní mumɔŋ kumai yeɔ amɛ lɛ nine ní ‘amɛba nu lɛ he,’ ní ‘amɛbahe wein kɛ fufɔ’
[Mfoniri ni yɔɔ baafa 239]
Yesu jie ehe kpo akɛ “lumɔ kɛ mlawolɔ” kɛha majimaji akui lɛ
[Mfonirii ni yɔɔ baafa 244, 245]
“Ha ní mɔ fɔŋ akwa egbɛ̀i lɛ”