Yitso Nyɔŋma Kɛ Kpaanyɔ
Yehowa Haa Mɛi ní Baa Shi lɛ Amumɔ Náa Hewalɛ Hee
1. Mɛɛ nɔmimaa Yehowa kɛha, ni ewiemɔi lɛ teeɔ mɛɛ sanebimɔi ashi?
“BƆ NI mɔ ni kwɔ ní awó enɔ, ní eyɔɔ daa, ní gbɛi ji Mɔ krɔŋkrɔŋ lɛ kɛɛ nɛ: Ŋwɛi shɔŋŋ kɛ hekrɔŋkrɔŋ lɛ mihiɔ; asaŋ mikɛ mɔ ni tswiaa shi kɛ dɔlɛ ní ebaa ehe shi yɛ emumɔ mli lɛ hiɔ shi, koni maha heshibalɔi amumɔ aná wala hee, ní mɛi ni tswiaa shi kɛ dɔlɛ lɛ atsui aná wala hee!” (Yesaia 57:15) Nakai ji bɔ ni gbalɔ Yesaia ŋma yɛ afii ohai kpaanyɔ D.Ŋ.B. lɛ mli. Mɛni yaa nɔ yɛ Yuda yɛ nakai beaŋ ní ha shɛɛ sane nɛɛ fee nɔ ni woɔ mɔ hewalɛ waa nakai lɛ? Mɛɛ gbɛ nɔ wiemɔi ní jɛ mumɔŋ nɛɛ yeɔ ebuaa Kristofoi ŋmɛnɛ? Yesaia yitso 57 lɛ he susumɔ baaye abua wɔ ní wɔha nakai sanebimɔi lɛ ahetoo.
“Nyɛ lɛ, Nyɛtsia Nyɛbaa Biɛ”
2. (a) Etamɔ nɔ ni Yesaia yitso 57 lɛ mli wiemɔi lɛ kɔɔ mɛɛ be he? (b) Mɛɛ shihilɛ mli jalɔi lɛ yɔɔ yɛ Yesaia gbii lɛ amli?
2 Etamɔ nɔ ni Yesaia gbalɛ lɛ fã nɛɛ kɔɔ Yesaia diɛŋtsɛ gbii lɛ mli bii ahe. Susumɔ bɔ ni efɔŋfeemɔ mli ewo wu ní ehé shi agbɛnɛ lɛ he okwɛ: “Jalɔ lɛ hiɛ kpataa, ni mɔ ko mɔ ko kɛwooo etsuiŋ; ni aŋɔɔ gbɔmɛi kpakpai kɛyaa, ni mɔ ko mɔ ko jwɛŋŋ he, ákɛ efɔŋ ní baaba lɛ hiɛ aŋɔɔ jalɔ lɛ kɛjɛɔ kɛyaa. Eboteɔ hejɔlɛ mli; amɛjɔɔ amɛhe yɛ amɛsaai anɔ: mɔ fɛɛ mɔ ní nyiɛɔ yɛ jalɛ mli lɛ.” (Yesaia 57:1, 2) Kɛ́ jalɔ gbee shi lɛ, jeee mɔ ko mɔ ko he sane. Egboɔ kpatu gbele ní mɔ ko mɔ ko kadiii. Wɔ ní ewɔɔ yɛ gbele mli lɛ haa lɛ hejɔlɛ, jiemɔ kɛmiijɛ piŋmɔ ní mɛi fɔji kɛbaa enɔ lɛ mli, kɛ heyeli kɛmiijɛ amanehulu mli. Nyɔŋmɔ maŋ ní ehala lɛ efite kɛbote shihilɛ ní yɔɔ mɔbɔ mli. Shi kwɛ bɔ ni eeewo mɛi ní yeɔ anɔkwa lɛ hewalɛ akɛ amɛaale akɛ, jeee na kɛkɛ Yehowa naa nɔ ni yaa nɔ lɛ, shi moŋ ebaafi amɛsɛɛ hu!
3. Te Yehowa kɛ Yuda yinɔbii fɔji lɛ wie eha tɛŋŋ, ni mɛni hewɔ?
3 Yehowa kɛ famɔ ha Yuda yinɔ fɔŋ lɛ mli bii lɛ ni ekɛɛ: “Shi nyɛ lɛ, nyɛtsia nyɛbaa biɛ, nyɛ klamɔfoi abii, gbalafitelɔi kɛ yoo ajwamaŋ seshibii!” (Yesaia 57:3) Amɛje gbɛ amɛná gbɛi ní yɔɔ hiɛgbele nɛɛ akɛ klamɔfonyo bii kɛ gbalafitelɔ kɛ yoo ajwamaŋ seshibii. Apasa jamɔ ní amɛkɛ amɛhe eyawo mli lɛ ekomɛi ji wɔŋjamɔ kɛ mumɔi atsɛmɔ nifeemɔi ní yɔɔ nyaŋemɔ, kɛ agbɛnɛ hu, bɔlɛnamɔ mli jeŋba shara nifeemɔi. No hewɔ lɛ, Yehowa bi nɛkɛ eshafeelɔi nɛɛ akɛ: “Namɔ he fɛo nyɛyeɔ nɛɛ? namɔ nyɛgbɛ nyɛdaaŋ hatoo nyɛwo, ni nyɛkpã nyɛlilɛii amli nɛɛ? Ani jeee nɔtɔ̃mɔ shwiei kɛ amale seshibii ji nyɛ? nyɛ ní nyɛhiɛ dɔɔ yɛ tsei wuji ahe yɛ tso fɛɛ tso ní ebu kusuu shishi; nyɛgbeɔ gbekɛbii yɛ jɔɔi amli yɛ tɛsaai afɔji ashishi.”—Yesaia 57:4, 5.
4. Yuda bii lɛ ateŋ gbɔmɛi fɔji lɛ yeɔ mɛni he fɔ́?
4 Gbɔmɛi fɔji ni jɛ Yuda lɛ tsuɔ amɛ wɔŋjamɔ ní yɔɔ nyaŋemɔ lɛ he nii kpetekplee, ni ‘amɛkɛyeɔ mɔ he fɛo.’ Amɛkɛ heguɔgbee yeɔ Nyɔŋmɔ gbalɔi ní etsuɔ amɛ ní amɛbajaje amɛ lɛ ahe fɛo, ni amɛkpãa amɛlilɛii amli amɛwoɔ amɛ kɛ hiɛgbejianii ní bulɛ bɛ mli. Eyɛ mli akɛ Abraham bii ji amɛ moŋ, shi amɛ atuatsemɔ gbɛ̀i lɛ eha amɛtsɔmɔ nɔtɔ̃mɔ shwiei kɛ amale seshibii. (Yesaia 1:4; 30:9; Yohane 8:39, 44) Amɛtaraa tsei ní ebu kusuu ashishi yɛ akrowai lɛ, ni amɛkanyaa jamɔ mli henumɔi ní mli wa yɛ amɛ wɔŋjamɔ lɛ mli. Ni mɛɛ yiwalɛ jamɔ po eji nɛkɛ! Ejaakɛ, amɛgbeɔ amɛ diɛŋtsɛ amɛmusuŋ bii po, tamɔ bɔ ni jeŋmaji ní amɛgbɛ̀i ní yɔɔ nyaŋemɔ lɛ ha Yehowa shwie amɛ kɛjɛ shikpɔŋ lɛ nɔ lɛ feɔ lɛ pɛpɛɛpɛ!—1 Maŋtsɛmɛi 14:23; 2 Maŋtsɛmɛi 16:3, 4; Yesaia 1:29.
Dãa Afɔle ní Afɔseɔ Ashwieɔ Shi Ahaa Tɛi
5, 6. (a) Mɛni Yuda maŋbii lɛ hala akɛ amɛaafee moŋ yɛ Yehowa ní amɛaajá lɛ lɛ najiaŋ? (b) Te Yuda amaga jamɔ lɛ yɔɔ hiɛgbele ni egbɛ eshwã tɛŋŋ?
5 Kwɛ bɔ ni Yuda maŋ lɛ mli bii lɛ ebote wɔŋjamɔ mli vii diɛŋtsɛ: “Faai anaa fɔbitɛi amli ogbɛnaa yɔɔ, nomɛi ji ogbɛfaŋnɔ; nomɛi nɔŋŋ ofɔseɔ dãa afɔle ni oshãa niyenii afɔle ohaa. Aso mitsui aaanyɔ mimli yɛ enɛɛmɛi ahe?” (Yesaia 57:6) Yudafoi lɛ ji gbɔmɛi ní Nyɔŋmɔ kɛ amɛ efee kpaŋmɔ, ni kɛlɛ, yɛ nɔ najiaŋ ní amɛaajá lɛ lɛ, amɛyahalaa fɔbitɛi kɛjɛɔ faa naa ni amɛkɛ enɛɛmɛi bafeɔ nyɔŋmɔi. David jaje faŋŋ akɛ Yehowa ji egbɛfaŋnɔ, shi nɛkɛ eshafeelɔi nɛɛ ehala tɛi ní wala bɛ amɛmli ákɛ amɛgbɛfaŋnɔ, ni amɛfɔseɔ dãa afɔlei amɛshwieɔ shi amɛhaa amɛ. (Lala 16:5; Habakuk 2:19) Mɛɛ miishɛjemɔ Yehowa baanyɛ aná kɛjɛ jamɔ fitemɔ ní tamɔ nɛkɛ, ní ewebii ní egbɛi kã amɛnɔ lɛ kɛ amɛhe eyawo mli lɛ mli?
6 Yuda miijá amagai—yɛ tsei wuji ashishi, yɛ nujɔɔi amli, yɛ gɔji anɔ yɛ amɛmaŋtiasei amli—yɛ he fɛɛ he. Shi Yehowa na nɔ fɛɛ nɔ, ni etsɔ Yesaia nɔ E-kpá amɛjeŋba ní efite lɛ he mama, akɛ: “Gɔŋ grɔŋŋ ní kwɔ nɔ oyaŋmɛ osaa yɛ, jɛi nɔŋŋ okwɔɔ kɛyaa oyashãa afɔle. Okɛ okaimɔ okadii lɛ eto shinaai kɛ shinaatsei asɛɛ.” (Yesaia 57:7-8a) Gɔji grɔŋŋi ní kwɔlɔ anɔ Yuda yaŋmɛɔ esaa ni ji mumɔŋ muji nii ní efeɔ lɛ yɛ, ni eshãa afɔlei yɛ jɛmɛ ehaa maŋsɛɛ nyɔŋmɔi.a Aŋkroaŋkroi po yɛ amagai yɛ amɛshiai ashinaai kɛ shinaatsei asɛɛ.
7. Mɛɛ henumɔ Yuda kɛtsuɔ jeŋba shara jamɔ lɛ he nii?
7 Ekolɛ mɛi komɛi baasusu nɔ hewɔ ní Yuda kɛ ehe ewo jamɔ ní he tseee mli vii nakai lɛ he. Ani hewalɛ ko ní he wa fe lɛ enyɛ enɔ koni ekwa Yehowa? Hetoo lɛ ji dabi. Ejɛ esuɔmɔ mli efee enɛ, kɛ miishɛɛ. Yehowa jaje akɛ: “Oje misɛɛ ogbele, ni okwɔ, ni olɛɛ osaa lɛ mli, ni okɛ amɛ ye naa; osumɔ amɛsaa lɛ ni okwɛ.” (Yesaia 57:8b) Yuda kɛ epasa nyɔŋmɔi lɛ efee kpaŋmɔ, ni esumɔɔ jeŋba shara wekukpaa ní ekɛ amɛ yɔɔ mli lɛ waa. Esumɔɔ bɔlɛnamɔ mli nifeemɔi fɔji titri—eeenyɛ efee akɛ bɔlɛnamɔ he okadii ní akɛtsuɔ nii—ní kadiɔ nɛkɛ nyɔŋmɔi nɛɛ ajamɔ lɛ fata he!
8. Mɛɛ maŋtsɛ nɔyeli shishi titri ni wɔŋjamɔ shwere waa yɛ Yuda lɛ?
8 Bɔ ni atsɔɔ jeŋba shara diɛŋtsɛ, kɛ yiwalɛ jamɔ lɛ mli aha lɛ kɛ nɔ ni wɔle yɛ Yuda maŋtsɛmɛi fɔji babaoo ahe lɛ kpãa gbee. Ákɛ nɔkwɛmɔnɔ lɛ, Manase mamɔ hei grɔŋŋi lɛ, ni emamɔ afɔleshaa latɛi eha Baal, ni ekɛ apasa jamɔ mli afɔleshaa latɛi mamɔ sɔlemɔwe lɛ kpoi lɛ ateŋ enyɔ nɔ. Eha ebihii tsɔ̃ la mli, ni ekɛ ehe wo ashwaifeemɔ mli, ekɛ ŋkunyaayeli tsu nii, ni eha mumɔi atsɛmɔ nifeemɔ shwere babaoo. Maŋtsɛ Manase kɛ wɔŋ tso ko ní efee lɛ he amaga ní eha ashɔ̃ bama Yehowa sɔlemɔtsu lɛ mli.b Elaka Yuda ni eha efee “efɔŋ fe jeŋmaji ní Yehowa kpata amɛhiɛ yɛ Israelbii ahiɛ lɛ tete.” (2 Maŋtsɛmɛi 21:2-9) Mɛi komɛi heɔ yeɔ akɛ Manase ji mɔ ni ha agbe Yesaia, eyɛ mli akɛ Manase gbɛi ejeee kpo yɛ Yesaia 1:1 lɛ.
“Otsu Obɔfoi Lɛ”
9. Mɛni hewɔ Yuda tsu bɔfoi “kɛtee shɔŋŋ” lɛ?
9 Yuda tɔmɔ lɛ tee shɔŋŋ fe apasa nyɔŋmɔi ní esɔmɔ lɛ kɛkɛ. Yehowa kɛ Yesaia tsu nii ákɛ enaawielɔ ni ekɛɛ: “Okɛ mu tee yaha maŋtsɛ lɛ, ni oha otsofai-kɛ-ŋmai fá pii, ni otsu obɔfoi lɛ kɛtee shɔŋŋ, ni oba ohe shi kɛtee gbohiiaje tɔ̃ɔ.” (Yesaia 57:9) Yuda maŋtsɛyeli ní yeee anɔkwa lɛ kpeleke shi kɛtee “Melek,” ni ji “maŋtsɛ lɛ” yɛ Hebri wiemɔ mli—ekolɛ maŋsɛɛ nɔyeli ko nɔ maŋtsɛ lɛ—ŋɔɔ, ni ekɛ nikeenii ní jara wa waa, ní yɔɔ fɛo, ní akɛ mu kɛ tsofai-kɛ-ŋmai fee he mfoniri lɛ yaha lɛ. Yuda tsu bɔfoi kɛtee hei ní yɔɔ shɔŋŋ. Mɛni hewɔ? Koni amɛyatsɔ Jeŋmaji lɛ ayiŋ koni amɛkɛ lɛ afee maŋkwramɔŋ kpaŋmɔi. Akɛni ekpoo Yehowa kwraa hewɔ lɛ, ekɛ ehiɛ fɔ̃ɔ maŋsɛɛ maŋtsɛmɛi anɔ.
10. (a) Maŋtsɛ Ahaz tao ní ekɛ Ashur maŋtsɛ lɛ afee kpaŋmɔ yɛ mɛɛ gbɛ nɔ? (b) Yuda ‘ba saji ashi kwraa kɛtee Sheol’ yɛ mɛɛ gbɛ nɔ?
10 Enɛ he nɔkwɛmɔnɔ kome ba yɛ Maŋtsɛ Ahaz gbii lɛ amli. Akɛni enuɔ he akɛ kpaŋmɔ ko ní Israel kɛ Aram efee lɛ miiwo ehe gbeyei hewɔ lɛ, nakai Yuda maŋtsɛ ní yeee anɔkwa lɛ tsu bɔfoi kɛtee Ashur maŋtsɛ Tiglat-Pileser III lɛ ŋɔɔ akɛ: “Otsulɔ kɛ obi ji mi; ba ni obahere mi yɛ Aram maŋtsɛ lɛ kɛ Israel maŋtsɛ lɛ dɛŋ, shi amɛte shi amɛwo mi!” Ahaz kɛ jwiɛtɛi kɛ shika tsu kɛtee ni akɛyaha Ashur maŋtsɛ lɛ ákɛ nyɔɔŋ nii, ni maŋtsɛ lɛ bo lɛ toi, ni ekɛ tutuamɔ ní mli wa waa ba Aram nɔ. (2 Maŋtsɛmɛi 16:7-9) Beni Yuda kɛ Jeŋmaji lɛ náa sharamɔ lɛ, eba shi kwraa kɛyashɛ “Sheol bui lɛ amli.” (An American Translation) Nakai sharamɔ ní ekɛ amɛ ná lɛ hewɔ lɛ, ebaagbo, loo ehiŋ shi akɛ maŋ ní yɔɔ eheyeli kɛ enɔ maŋtsɛ dɔŋŋ.
11. Mɛɛ apasa shweshweeshwe shihilɛ henumɔ Yuda jie lɛ kpo?
11 Yehowa tee nɔ ekɛ Yuda wie akɛ: “Ogbɛ ní jɛkɛ lɛ ha etɔo; shi okɛɛɛ akɛ: Maŋmɛɛ he! Akɛni oná hewalɛ hee hewɔ lɛ, ejeee otsine.” (Yesaia 57:10) Hɛɛ, maŋ lɛ egbo deŋme waa yɛ ehemɔkɛyeli kwamɔ gbɛ̀i lɛ anɔ, ni enaaa bɔ ni sɛɛnamɔ ko kwraa bɛ emɔdɛŋbɔɔi lɛ ahe lɛ. Nɔ ni tamɔɔɔ enɛ lɛ, elakaa ehe ni eheɔ eyeɔ akɛ eeye omanye yɛ lɛ diɛŋtsɛ ehewalɛ mli. Enuɔ he akɛ eyɛ ekãa kɛ hewalɛ. Shi mɛɛ kwashiafeemɔ nɛ!
12. Mɛɛ shihilɛ ní yaa nɔ yɛ Kristendom tamɔ nɔ ni tee nɔ yɛ Yuda lɛ pɛpɛɛpɛ?
12 Ŋmɛnɛ, gbɛjianɔtoo ko yɛ ní ejeŋba tamɔ bɔ ni Yuda nɔ̃ ji yɛ Yesaia gbii lɛ amli lɛ pɛpɛɛpɛ. Kristendom kɛ Yesu gbɛi tsuɔ nii, shi etiuɔ kpaŋmɔi ní ekɛ jeŋmaji lɛ feɔ lɛ asɛɛ, ni ekɛ amagai ewo esɔlemɔtsui lɛ amli fɛɛ obɔ̃. Ejamɔi amli bii lɛ hu po kɛ amagai mamɔɔ amɛ diɛŋtsɛ amɛshiai amli. Kristendom kɛ emli bii ní ji oblahii lɛ eshã afɔle yɛ tai ní jeŋmaji lɛ wuu lɛ amli. Kwɛ bɔ ni enɛɛmɛi fɛɛ baadɔ anɔkwa Nyɔŋmɔ lɛ, mɔ ni ewo Kristofoi akita akɛ: “Nyɛjoa wɔŋjamɔ naa foi” lɛ aha! (1 Korintobii 10:14) Yɛ Kristendom he ní ekɛwoɔ maŋkwramɔ mli lɛ hewɔ lɛ, ‘ekɛ shikpɔŋ lɛ nɔ maŋtsɛmɛi lɛ bɔɔ ajwamaŋ.’ (Kpojiemɔ 17:1, 2) Yɛ anɔkwale mli lɛ, eji Jeŋmaji Ekomefeemɔ Kpee lɛ sɛɛfilɔi lɛ ateŋ mɔ wulu. Mɛni baaba jamɔ mli ajwamaŋ nɛɛ nɔ wɔsɛɛ? Ojogbaŋŋ, mɛni Yehowa kɛɛ mɔ ni tamɔ lɛ pɛpɛɛpɛ, ni ji Yuda ní yeee anɔkwa lɛ, titri lɛ taakɛ emaŋtiase ni ji Yerusalem lɛ fee he mfoniri lɛ?
‘Onii ní Obua Naa lɛ Ejieŋ Bo’
13. Mɛɛ ‘malemɔ’ Yuda kɛ ehe wo mli, ni te efee enii yɛ Yehowa tsuishitoo lɛ he eha tɛŋŋ?
13 Yehowa bi akɛ: “Namɔ hewɔ otsui fãa loo osheɔ gbeyei, hewɔ ni omaleɔ nɛɛ?” Sanebimɔ ní sa diɛŋtsɛ nɛ! Eka shi faŋŋ akɛ Yuda ejieee Yehowa gbeyeishemɔ kpakpa kpo. Kɛ́ jeee nakai lɛ, kulɛ ebatsɔŋ maŋ ní eyi obɔ kɛ amalelɔi, mɛi ní jáa apasa nyɔŋmɔi. Yehowa tee nɔ ewie akɛ: “Mi lɛ okaiii mi ni okɛwooo otsui mli? Aso jeee diŋŋ mifee kɛjɛ teteete po? shi mi lɛ, osheee mi gbeyei!” (Yesaia 57:11) Yehowa efee dioo, ni ekɛ toigbalamɔ baaa Yuda nɔ amrɔ nɔŋŋ. Ani Yuda hiɛ sɔɔ enɛ? Dabi, shi moŋ ebuɔ Nyɔŋmɔ tsuishitoo lɛ akɛ shikpilikpiifeemɔ. Elaaje gbeyeishemɔ fɛɛ ni eyɔɔ kɛha lɛ lɛ.
14, 15. Mɛni Yehowa wie yɛ Yuda nitsumɔi lɛ kɛ ‘ewɔji ní ebua naa’ lɛ ahe?
14 Shi kɛlɛ, Nyɔŋmɔ tsuishitoo be lɛ baaba naagbee. Beni Yehowa kpáa nakai be lɛ gbɛ lɛ, ejaje akɛ: “Mi mibajaje ojalɛ lɛ matsɔɔ, ni onifeemɔ nii lɛ hu, onáŋ sɛɛ ko yɛ mli. Beni obolɔɔ lɛ, ha owɔji ní obua amɛnaa lɛ ajieo! shi amɛ fɛɛ tswɛ̃m lɛ, kɔɔyɔɔ aaaloo amɛ, mumɔ ní amuɔ aaahole amɛ kɛaatee.” (Yesaia 57:12, 13a) Yehowa baakpá jalɔ ní Yuda kɛ osatofeemɔ buɔ ehe lɛ he mama. Enitsumɔi ní ekɛ osatofeemɔ tsuɔ lɛ he baŋ sɛɛnamɔ ko kɛhaŋ lɛ. ‘Ewɔji ní ebua naa,’ ni ji amagai babaoo ní eyɔɔ lɛ, ejieŋ lɛ kɔkɔɔkɔ. Kɛ́ amanehulu ko ba lɛ, mumɔ folo ní amuɔ lɛ baaloo enyɔŋmɔi ní ekɛ ehiɛ fɔ̃ɔ amɛnɔ lɛ kɛaatee kwraa.
15 Yehowa wiemɔi lɛ ba mli yɛ afi 607 D.Ŋ.B. No ji be mli ní Babilon Maŋtsɛ Nebukadnezar kpata Yerusalem hiɛ, ní eshã sɔlemɔwe lɛ, ni eŋɔ gbɔmɛi lɛ ateŋ mɛi pii nom lɛ. “Ni aŋɔ Yuda nom kɛjɛ eshikpɔŋ lɛ nɔ kɛtee.”—2 Maŋtsɛmɛi 25:1-21.
16. Mɛni mɛɔ Kristendom kɛ “Babilon kpeteŋkpele lɛ” fã ní eshwɛ lɛ?
16 Nakai nɔŋŋ hu Kristendom amagai babaoo ní eyɔɔ lɛ ejieŋ lɛ yɛ Yehowa mlifu gbi lɛ nɔ. (Yesaia 2:19-22; 2 Tesalonikabii 1:6-10) Abaakpata Kristendom kɛ “Babilon kpeteŋkpele lɛ”—ni ji jeŋ apasa jamɔ maŋtsɛyeli lɛ—fã ni eshwɛ lɛ fɛɛ hiɛ. Mfonirifeemɔŋ kooloo ní tsuɔ tamɔ muneele lɛ kɛ ekolontoi nyɔŋma lɛ, “amɛaaŋmɛ [Babilon Kpeteŋkpele] lɛ yayai, ni amɛaaye eheloo, ni amɛkɛ la aaashã lɛ.” (Kpojiemɔ 17:3, 16, 17) Kwɛ bɔ ni wɔmli filiɔ wɔ akɛ wɔbo famɔ ní akɛha nɛɛ toi, akɛ: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ní nyɛkana ehaomɔi lɛ eko”! (Kpojiemɔ 18:4, 5) Ekaba akɛ wɔɔku wɔsɛɛ kɛya eŋɔɔ loo egbɛ̀i lɛ anɔ dɔŋŋ kɔkɔɔkɔ.
“Mɔ ni Ŋɔɔ Ehiɛ Efɔ̃ɔ Minɔ lɛ Aaaye Shikpɔŋ lɛ Nɔ”
17. Mɛɛ shiwoo akɛhaa ‘mɔ ni kɛ ehiɛ fɔ̃ɔ Yehowa nɔ lɛ,’ ni mɛɛ be enɛ baaba mli?
17 Shi, Yesaia gbalɛ lɛ mli wiemɔi ní nyiɛ sɛɛ lɛ hu? “Mɔ ni ŋɔɔ ehiɛ efɔ̃ɔ minɔ lɛ aaaye shikpɔŋ lɛ nɔ, ni migɔŋ krɔŋkrɔŋ lɛ aaatsɔ enɔ̃!” (Yesaia 57:13b) Namɔ Yehowa kɛwieɔ agbɛnɛ nɛɛ? Eekwɛ nii kɛmiiteke amanehulu ní baaba trukaa lɛ, ni eegba kpɔmɔ ní aaakpɔ̃ ewebii lɛ kɛbaajɛ Babilon kɛ jamɔ krɔŋŋ ní abaatswa ama shi ekoŋŋ yɛ egɔŋ krɔŋkrɔŋ lɛ nɔ, ni ji Yerusalem lɛ eefɔ̃ shi. (Yesaia 66:20; Daniel 9:16) Kwɛ bɔ ni enɛ baafee hewalɛwoo jɛɛhe kɛha Yudafoi fɛɛ ní baakã he amɛhi shi akɛ anɔkwafoi lɛ! Kɛfata he lɛ, Yehowa wie akɛ: “Ni eeekɛɛ akɛ: Nyɛjea, nyɛjea, nyɛjajea gbɛ lɛ, nyɛjiea pampii lɛ yɛ mimaŋ lɛ gbɛ lɛ nɔ!” (Yesaia 57:14) Kɛ́ be shɛ ní Nyɔŋmɔ baakpɔ̃ ewebii lɛ, abaajaje gbɛ lɛ, ni abaajie pampii fɛɛ kɛjɛ nɔ.—2 Kronika 36:22, 23.
18. Te atsɔɔ bɔ ni Yehowa nɔ kwɔ ha lɛ mli aha tɛŋŋ, ni kɛlɛ mɛɛ mɔ hesusumɔ ní jɛɔ suɔmɔ mli ejieɔ lɛ kpo?
18 Biɛ ji he ni gbalɔ Yesaia wie wiemɔi ní wɔtsɛ yisɛɛ kɛjɛ shishijee lɛ yɛ, akɛ: “Bɔ ni mɔ ni kwɔ ní awó enɔ, ní eyɔɔ daa, ní gbɛi ji Mɔ krɔŋkrɔŋ lɛ kɛɛ nɛ: Ŋwɛi shɔŋŋ kɛ he krɔŋkrɔŋ lɛ mihiɔ; asaŋ mikɛ mɔ ni tswiaa shi kɛ dɔlɛ ní ebaa ehe shi yɛ emumɔ mli lɛ hiɔ shi, koni maha heshibalɔi amumɔ aná wala hee, ní mɛi ni tswiaa shi kɛ dɔlɛ lɛ atsui aná wala hee!” (Yesaia 57:15) Yehowa maŋtsɛsɛi lɛ yɛ ŋwɛi shɔŋŋ diɛŋtsɛ. Gbɛhe ko bɛ ni nɔ kwɔ loo awó nɔ fe nakai. Kwɛ miishɛjemɔ ní eji akɛ aaale akɛ ejɛɔ jɛi enaa nɔ fɛɛ nɔ—jeee eshai ní mɛi fɔji feɔ lɛ kɛkɛ, shi moŋ mɛi ní bɔɔ mɔdɛŋ akɛ amɛaasɔmɔ lɛ lɛ ajalɛ nifeemɔi lɛ hu! (Lala 102:20; 103:6) Kɛfata he lɛ, enuɔ mɛi ní anyɛɔ amɛnɔ lɛ akɛ̃ɛmɔi lɛ ni etsĩɛɔ mɛi ní amĩaa amɛ lɛ atsuii ahiɛ. Eka shi faŋŋ akɛ wiemɔi nɛɛ sa Yudafoi ní tsake amɛtsui yɛ blema beaŋ lɛ atsuii ahe. Eyɛ faŋŋ akɛ amɛsaa wɔtsuii ahe ŋmɛnɛ.
19. Mɛɛ be Yehowa mlila lɛ sɛɛ foɔ?
19 Yehowa wiemɔi ní nyiɛ sɛɛ lɛ hu shɛjeɔ mɔ mii: “Mibéŋ kɛyaŋ naanɔ, ni jeee daa mimli aaawo la; ejaakɛ kulɛ mumɔi kɛ susumai ní mifee lɛ aaatɔ biti yɛ mihiɛ.” (Yesaia 57:16) Kɛji Yehowa mlila lɛ hi shi daa, ní ebaaa naagbee lɛ, no lɛ Nyɔŋmɔ bɔɔ nii lɛ eko kwraa yi naŋ wala. Shi kɛlɛ, miishɛɛ sane ji akɛ, Nyɔŋmɔ mlila lɛ hiɔ shi be kukuoo ko pɛ. Kɛ́ etsu eyiŋtoo he nii egbe naa lɛ, esɛɛ foɔ. Nɛkɛ sɛɛyoomɔ ní jɛ mumɔŋ nɛɛ yeɔ ebuaa wɔ ni wɔnáa hiɛsɔɔ ní mli kwɔ kɛhaa suɔmɔ ní Yehowa jieɔ lɛ kpo etsɔɔ ebɔɔ nii lɛ.
20. (a) Te Yehowa kɛ efɔŋfeelɔ ní tsakeee etsui lɛ yeɔ ehaa tɛŋŋ? (b) Yehowa shɛjeɔ mɔ ní eshwa ehe lɛ mii yɛ mɛɛ gbɛ nɔ?
20 Wɔnáa sɛɛyoomɔ babaoo beni Yehowa yaa nɔ ewieɔ lolo lɛ. Klɛŋklɛŋ lɛ, ekɛɛ akɛ: “Ehiɛkɔ̃ɔ nɔ̃ sha lɛ hewɔ mimli wo la ni miyi lɛ, mikɛ mihiɛ tée, ni mimli wo la; ni ekɛ sɛɛsɛɛyaa yanyiɛ etsui gbɛ lɛ nɔ.” (Yesaia 57:17) Eka shi faŋŋ akɛ, tɔmɔi ní atɔ̃ɔ yɛ hiɛjoomɔ hewɔ lɛ kɛ Nyɔŋmɔ mlifu baa. Shii abɔ ní mɔ lɛ kã he eji sɛɛsɛɛyalɔ lolo yɛ etsui mli lɛ, Yehowa hu yaa nɔ emli woɔ lɛ la. Shi kɛji sɛɛsɛɛyalɔ lɛ bo tsɔsemɔ ní akɛhaa lɛ lɛ toi hu? No lɛ Yehowa jieɔ bɔ ni esuɔmɔ kɛ musuŋtsɔlɛ tsirɛɔ lɛ ní ekɛfeɔ nii lɛ kpo: “Mina egbɛ̀i lɛ ni matsá lɛ, ni mawa lɛ, ni mashɛje lɛ kɛ ekɔmɔyelɔi lɛ amii ekoŋŋ.” (Yesaia 57:18) Beni etsu toigbalamɔ he nii sɛɛ lɛ, Yehowa tsáa mɔ ni eshwa ehe lɛ ni eshɛjeɔ lɛ kɛ mɛi ní kɛ lɛ yeɔ ŋkɔmɔ lɛ amii. No hewɔ ni Yudafoi lɛ nyɛ amɛku amɛsɛɛ kɛba amɛmaŋ yɛ afi 537 D.Ŋ.B. lɛ. Lɛɛlɛŋ, Yuda ehiii shi akɛ maŋtsɛyeli ní yeɔ lɛ diɛŋtsɛ ehe nɔ yɛ mantsɛ ni jɛ David weku lɛ mli lɛ shishi dɔŋŋ. Shi kɛlɛ, asaa ama sɔlemɔtsu ní yɔɔ Yerusalem lɛ, ni ato anɔkwa jamɔ ama shi ekoŋŋ.
21. (a) Yehowa tsĩɛ Kristofoi ní afɔ amɛ mu lɛ amumɔ hiɛ yɛ afi 1919 yɛ mɛɛ gbɛ nɔ? (b) Mɛɛ su ko wɔɔfee jogbaŋŋ akɛ wɔɔná akɛ aŋkroaŋkroi?
21 Yehowa, ‘Mɔ ní Kwɔ ní Awo Enɔ lɛ,’ jie mɔ hesusumɔ kpo yɛ shwɛɛnii ní afɔ amɛ mu lɛ hu agbɛfaŋ yɛ afi 1919. Yɛ amɛ heshwamɔ kɛ heshibaa mumɔ lɛ hewɔ lɛ, Yehowa, Nyɔŋmɔ kpeteŋkpele lɛ, kɛ mlihilɛ kadi amɛpiŋmɔ lɛ ni ejie amɛ kɛjɛ Babilonbii anyɔŋyeli shishi. Ejie gbɛtsii nii fɛɛ, ni enyiɛ amɛhiɛ kɛtee heyeli mli koni amɛnyɛ amɛkɛ jamɔ krɔŋŋ aha lɛ. Enɛ hewɔ lɛ, Yehowa wiemɔi ní etsɔ Yesaia nɔ ewie lɛ ná emlibaa yɛ nakai beaŋ. Ni nɔ ni yɔɔ nakai wiemɔi lɛ asɛɛ ji naanɔ shishitoo mlai ní kɔɔ wɔteŋ mɔ fɛɛ mɔ he. Yehowa kpɛlɛɔ mɛi ni yɔɔ heshibaa jwɛŋmɔ lɛ pɛ ajamɔ nɔ. Ni kɛ́ Nyɔŋmɔ tsuji lɛ ateŋ mɔ ko fee esha lɛ, esa akɛ ehe afee oya ní ekpɛlɛ etɔmɔ lɛ nɔ, ní ekpɛlɛ kamɔ nɔ, ní ejaje egbɛ̀i. Ekaba akɛ wɔhiɛ aaakpa nɔ akɛ Yehowa tsáa heshibalɔi lɛ ni eshɛjeɔ amɛmii, shi “ekuɔ hewolɔi anaa.”—Yakobo 4:6.
‘Toiŋjɔlɛ Kɛha Mɛi ní Yɔɔ Shɔŋŋ kɛ Mɛi ní Bɛŋkɛ Kpaakpa Lɛ’
22. Mɛɛ wɔsɛɛ be Yehowa gba efɔ̃ shi kɛha (a) mɛi ní eshwa amɛhe lɛ? (b) mɛi fɔji lɛ?
22 Beni Yehowa tsɔɔ srɔtofeemɔ ní yɔɔ mɛi ní tsakeɔ amɛtsui, kɛ mɛi ní yaa nɔ yɛ amɛgbɛ̀i fɔji lɛ anɔ lɛ awɔsɛɛ be mli lɛ, ejaje akɛ: “Mabɔ naabui ayibii: Hejɔlɛ, hejɔlɛ aha mɔ ni yɔɔ shɔŋŋ kɛ mɔ ni yɔɔ kpaakpa lɛ, . . . ni matsá lɛ! Shi mɛi fɔji tamɔ ŋshɔ ní efee hamahama, ejaakɛ enyɛɛɛ dioo efee, shi emli nu lɛ looɔ ŋmiamɔ kɛ ŋmɔtɔ shwieɔ. Hejɔlɛ ko bɛ ha mɛi fɔji lɛ.”—Yesaia 57:19-21.
23. Mɛni ji naabui ayibii lɛ, ni Yehowa ‘bɔɔ’ nɛkɛ yibii nɛɛ yɛ mɛɛ gbɛ nɔ?
23 Naabui ayibii lɛ ji yijiemɔ afɔlei ní ashãa ahaa Nyɔŋmɔ lɛ—no ji egbɛi ní ajajeɔ yɛ faŋŋ mli lɛ. (Hebribii 13:15) Mɛɛ gbɛ nɔ Yehowa ‘bɔɔ’ nakai sane jajemɔ yɛ faŋŋ mli lɛ yɛ? Kɛ́ mɔ ko baashã yijiemɔ afɔle lɛ, esa akɛ nakai mɔ lɛ akase Nyɔŋmɔ he nii klɛŋklɛŋ, koni no sɛɛ lɛ ená emli hemɔkɛyeli. Hemɔkɛyeli—ni ji Nyɔŋmɔ mumɔ lɛ yibii lɛ ateŋ ekome lɛ—tsirɛɔ nakai mɔ lɛ ni ekɛɔ mɛi krokomɛi nɔ ni enu lɛ. Kɛ́ aaawie yɛ gbɛ kroko nɔ lɛ, ejajeɔ enɛ etsɔɔ yɛ faŋŋ mli. (Romabii 10:13-15; Galatabii 5:22) Esa akɛ akai hu akɛ, yɛ naagbee lɛ, Yehowa ji mɔ ni kɛ nitsumɔ ewo etsuji adɛŋ akɛ amɛjaje eyijiemɔ amɛtsɔɔ lɛ. Ni Yehowa ji mɔ ni kpɔ̃ɔ ewebii, ni ehaa amɛnyɛɔ amɛkɛ nakai yijiemɔ afɔlei lɛ haa. (1 Petro 2:9) No hewɔ lɛ, abaanyɛ awie akɛ Yehowa ji mɔ ni bɔɔ naabui ayibii nɛɛ.
24. (a) Namɛi banáa Nyɔŋmɔ toiŋjɔlɛ lɛ, ni mɛni jɛɔ mli baa? (b) Namɛi ebanáaa toiŋjɔlɛ lɛ, ni mɛni jɛɔ mli baa kɛhaa amɛ?
24 Kwɛ naabui ayibii ní yɔɔ miishɛɛ ní Yudafoi lɛ kɛha beni amɛkuɔ amɛsɛɛ kɛbaa amɛmaŋ shikpɔŋ nɔ ní amɛláa yijiemɔ lalai amɛhaa Yehowa lɛ! Eka shi faŋŋ akɛ amɛmli fili amɛ akɛ amɛaale Nyɔŋmɔ toiŋjɔlɛ lɛ, ekɔɔɔ he eko akɛ amɛyɛ “shɔŋŋ”—he ni kɛ Yuda jɛkɛ, ní amɛmiimɛ lolo ní amɛku amɛsɛɛ—loo “[amɛbɛŋkɛ] kpaakpa”—beni amɛyɔɔ amɛmaŋ shikpɔŋ nɔ momo lɛ. Nɔ ni tamɔɔɔ enɛ kwraa lɛ, kwɛ bɔ ni nibii yɔɔ srɔto kwraa kɛha mɛi fɔji lɛ! Mɔ fɛɛ mɔ ní booo Yehowa tsɔsemɔ nifeemɔi lɛ atoi, mɛi fɔji fɛɛ, mɔ fɛɛ mɔ ní eji, kɛ he fɛɛ he ní amɛyɔɔ lɛ, amɛbɛ toiŋjɔlɛ ko kwraa. Akɛni amɛnyɛɛɛ dioo amɛfee, tamɔ ŋshɔ ní efee hamahama hewɔ lɛ, amɛyaa nɔ amɛwoɔ, jeee naabui ayibii, shi moŋ “ŋmiamɔ kɛ ŋmɔtɔ,” ni ji nɔ fɛɛ nɔ ní he tseee.
25. Gbɔmɛi ní yɔɔ he fɛɛ he ebaná toiŋjɔlɛ yɛ mɛɛ gbɛ nɔ?
25 Ŋmɛnɛ hu, Yehowa jálɔi ní yɔɔ he fɛɛ he lɛ miijaje Nyɔŋmɔ Maŋtsɛyeli lɛ he sanekpakpa lɛ amɛmiitsɔɔ. Kristofoi ní yɔɔ he fɛɛ he, yɛ shikpɔji ní fa fe 230 nɔ kɛ amɛnaabui shãa afɔlei, ni amɛjajeɔ anɔkwa Nyɔŋmɔ koome lɛ yijiemɔ amɛtsɔɔ. Anuɔ yijiemɔ lalai ní amɛláa lɛ he ‘kɛjɛɔ shikpɔŋ lɛ naagbeehei lɛ.’ (Yesaia 42:10-12) Mɛi ní nuɔ amɛwiemɔi lɛ ní amɛboɔ toi lɛ miikpɛlɛ anɔkwale ní yɔɔ Nyɔŋmɔ Wiemɔ ni ji Biblia lɛ mli lɛ nɔ. Mɛnɛɛmɛi miiná toiŋjɔlɛ ní jɛɔ “hejɔlɛ Nyɔŋmɔ lɛ” sɔɔmɔ mli baa lɛ mli ŋɔɔmɔ.—Romabii 16:20.
26. (a) Mɛɛ wɔsɛɛ kã shi kɛha mɛi fɔji lɛ? (b) Mɛɛ shiwoo ní yɔɔ nyam akɛha heshibalɔi lɛ, ni mɛni esa akɛ efee wɔfaishitswaa?
26 Lɛɛlɛŋ, mɛi fɔji lɛ booo Maŋtsɛyeli shɛɛ sane lɛ toi. Shi etsɛŋ kwraa, aŋmɛŋ amɛ gbɛ ní amɛfite jalɔi lɛ atoiŋjɔlɛ namɔ dɔŋŋ. Yehowa ewo shi akɛ: “Eshwɛ fioo kɛkɛ ni mɔ fɔŋ lɛ bɛ dɔŋŋ.” Mɛi ni yabaa Yehowa abó lɛ anine baashɛ shikpɔŋ lɛ nɔ yɛ naakpɛɛ gbɛ nɔ. “Mɛi ni he jɔ lɛ, shikpɔŋ lɛ aaatsɔ amɛnɔ̃, ni amɛmii aaashɛ amɛhe yɛ hejɔlɛ babaoo mli.” (Lala 37:10, 11, 29) Kwɛ bɔ ni wɔshikpɔŋ lɛ baafee fɛo waa yɛ nakai beaŋ aha! Eba akɛ wɔ fɛɛ wɔɔtswa wɔfai shi akɛ wɔhaŋ Nyɔŋmɔ toiŋjɔlɛ lɛ aje wɔdɛŋ kɔkɔɔkɔ, koni wɔnyɛ wɔlá kɛjie Nyɔŋmɔ yi kɛya naanɔi anaanɔ.
[Shishigbɛ niŋmai]
a Eeenyɛ efee akɛ wiemɔ ni ji ‘saa’ lɛ kɔɔ afɔleshaa latɛ lɛ loo hé ni amaga jamɔ lɛ yaa nɔ yɛ lɛ he. Tsɛmɔ ní atsɛ́ lɛ akɛ saa lɛ ji kaimɔ nɔ̃ ní tsɔɔ akɛ jamɔ ní tamɔ nɛkɛ lɛ ji mumɔŋ ajwamaŋbɔɔ.
b Ekolɛ wɔŋ kooi lɛ damɔ shi kɛha yoo fɔmɔ nii lɛ, ni ekolɛ amagai lɛ feɔ nuu bɔlɛnamɔ nii he okadii. Yuda maŋ bii ní yeee anɔkwa lɛ kɛ nibii enyɔ nɛɛ fɛɛ tsu nii.—2 Maŋtsɛmɛi 18:4; 23:14.
[Mfoniri ni yɔɔ baafa 263]
Yuda kɛ ehe woɔ jeŋba shara jamɔ mli yɛ tso wulu fɛɛ tso wulu shishi
[Mfoniri ni yɔɔ baafa 267]
Yuda mamɔ afɔleshaa latɛi yɛ shikpɔŋ lɛ nɔ he fɛɛ he
[Mfoniri ni yɔɔ baafa 275]
“Mabɔ naabui ayibii”