Yitso Nyɔŋma Kɛ Nɛɛhu
Akpá Osatofeemɔ He Mama!
1. Te Yesu kɛ Yehowa buɔ osatofeemɔ amɛhaa tɛŋŋ, ni eje kpo yɛ Yesaia gbii lɛ amli yɛ mɛɛ gbɛ nɔ?
YESU kɛɛ jamɔ mli hiɛnyiɛlɔi ní hi shi yɛ egbii lɛ amli lɛ akɛ: “Anaa nyɛ hu yɛ gbɔmɛi ahiɛ tamɔ jalɔi, shi osato kɛ mlatɔ̃mɔ eyi nyɛmli obɔ̃.” (Mateo 23:28) Bɔ ni Yesu bu osatofeemɔ fɔ́ lɛ jieɔ bɔ ni eŋwɛi Tsɛ lɛ susumɔ ji lɛ kpo. Yesaia gbalɛ lɛ yitso 58 lɛ gbalaa jwɛŋmɔ kɛyaa osatofeemɔ ní egbɛ eshwã babaoo yɛ Yuda lɛ nɔ titri. Béi, nɔnyɛɛ, kɛ yiwalɛ nifeemɔ ji nibii ní yaa nɔ yɛ he fɛɛ he, ni Hejɔɔmɔ gbijurɔyeli lɛ efite kwraa kɛbatsɔ kusum ko ní shishinumɔ bɛ he. Gbɔmɛi lɛ kɛ sɔɔmɔ bibioo ko kɛkɛ haa Yehowa, ni amɛjieɔ bɔ ni amɛbuɔ amɛhe krɔŋkrɔŋ lɛ kpo kɛtsɔɔ ŋmãahilɛ ní anɔkwayeli bɛ mli nɔ. Ebɛ naakpɛɛ mɔ akɛ, Yehowa kpáa amɛhe mama yɛ bɔ ni amɛji nɛɛ hewɔ!
‘Tsɔɔmɔ Gbɔmɛi lɛ Amɛhe Eshai Lɛ’
2. Mɛɛ mumɔ Yesaia jie lɛ kpo beni ejajeɔ Yehowa shɛɛ sane lɛ, ni namɛi tamɔ lɛ ŋmɛnɛ?
2 Eyɛ mli akɛ Yuda jeŋba lɛ yɛ nyaŋemɔ kɛha Yehowa moŋ, shi faikpamɔ ní jɛ E-tsui mli fata ewiemɔi lɛ ahe, koni maŋ lɛ atsake amɛtsui. Shi kɛlɛ, Yehowa sumɔɔɔ ní ekãmɔ lɛ afee nɔ ni bɛ faŋŋ. No hewɔ lɛ, ekɛ famɔ ha Yesaia akɛ: “Bolɔmɔ waa: kaaha onaa miiba shi! Wó ogbee nɔ tamɔ tɛtɛrɛmantɛrɛ, ní ojaje mimaŋ lɛ nɔtɔ̃mɔi lɛ otsɔɔ amɛ, ní otsɔɔ Yakob we lɛ amɛhe eshai lɛ!” (Yesaia 58:1) Ekolɛ ekãa ní Yesaia kɛjajeɔ Yehowa wiemɔi lɛ etsɔɔ gbɔmɛi lɛ baaha amɛná ehe mlifu, shi no haaa egbala ehe shi. Eyɛ he-kɛ-afɔleshaa mumɔ ní ejie lɛ kpo beni ekɛɛ akɛ: “Naa mi, tsu mi!” lɛ lolo. (Yesaia 6:8) Kwɛ tsuishiŋmɛɛ he nɔkwɛmɔnɔ kpakpa ní Yesaia ji kɛha ŋmɛnɛŋmɛnɛ beaŋ Yehowa Odasefoi, ní amɛ hu akɛ nitsumɔ ewo amɛdɛŋ akɛ amɛshiɛ Nyɔŋmɔ Wiemɔ lɛ ní amɛkpá jamɔ mli osatofeemɔ he mama lɛ!—Lala 118:6; 2 Timoteo 4:1-5.
3, 4. (a) Mɛɛ osatofeemɔ su ko gbɔmɛi ní hi shi yɛ Yesaia gbii lɛ amli lɛ jie lɛ kpo? (b) Mɛni ji shihilɛ diɛŋtsɛ ní yaa nɔ yɛ Yuda?
3 Gbɔmɛi ní hi shi yɛ Yesaia gbii lɛ amli lɛ tao Yehowa sɛɛgbɛ ni amɛjie miishɛɛ kpo yɛ ejalɛ kojomɔi lɛ ahe hiɛaŋhiɛaŋ, yɛ mɔ hiɛ ni amɛtaoɔ amɛsa hewɔ. Wɔkaneɔ Yehowa wiemɔi lɛ akɛ: “Mi lɛ, daa amɛtaoɔ misɛɛgbɛ, ni amɛtaoɔ migbɛ̀i lɛ amɛle; amɛbiɔ jalɛ kojomɔ yɛ midɛŋ, ni amɛtaoɔ ní Nyɔŋmɔ atsi abɛŋkɛ, tamɔ jeŋmaŋ ko ní efee jalɛ nii ní ekwako e-Nyɔŋmɔ lɛ kojomɔ lɛ.” (Yesaia 58:2) Ani Yehowa jalɛ gbɛ̀i lɛ ahe miishɛɛ ní amɛkɛɔ akɛ amɛyɔɔ nɛɛ ji anɔkwa miishɛɛ? Dabi. Amɛ “tamɔ jeŋmaŋ ko ní efee jalɛ nii,” shi eji hiɛaŋhiɛaŋ nɔ ko ní amɛmiifee kɛkɛ. Yɛ anɔkwale mli lɛ, nɛkɛ maŋ nɛɛ ‘ekwa e-Nyɔŋmɔ lɛ kojomɔ lɛ.’
4 Shihilɛ lɛ tamɔ nɔ ni ajie lɛ kpo atsɔɔ gbalɔ Ezekiel yɛ sɛɛ mli lɛ pɛpɛɛpɛ. Yehowa kɛɛ Ezekiel akɛ Yudafoi lɛ miikɛɛkɛɛ amɛhe akɛ: “Nyɛbaa ní nyɛbaboa nɔ̃ wiemɔ ní jɛ Yehowa ŋɔɔ toi!” Shi Nyɔŋmɔ bɔ Ezekiel kɔkɔ yɛ anɔkwa ní amɛyeee lɛ he akɛ: “Amɛbaa oŋɔɔ . . . ni amɛboɔ owiemɔi lɛ atoi, shi amɛyeee nɔ; ejaakɛ amɛkɛ amɛnaabu wieɔ dɔkɔbii, shi amɛtsui nyiɛɔ amɛsɛɛnamɔ sɛɛ. Ni naa, bo lɛ otamɔ lala kɛ ŋɔɔmɔ kɛ mɔ ko ní gbee ŋɔɔ ní ele saŋku tswaa jogbaŋŋ oha amɛ; ejaakɛ amɛboɔ owiemɔi lɛ atoi moŋ, shi amɛyeee nɔ.” (Ezekiel 33:30-32) Yesaia yinɔbii lɛ hu kɛɔ akɛ amɛtaoɔ Yehowa sɛɛgbɛ be fɛɛ be, shi amɛbooo ewiemɔi lɛ atoi.
Osatofeemɔ Ŋmãahilɛ
5. Yudafoi lɛ bɔɔ mɔdɛŋ ní amɛná Nyɔŋmɔ hiɛ duromɔ yɛ mɛɛ gbɛ nɔ, ni mɛni Yehowa kɛɔ yɛ enɛ he?
5 Yudafoi lɛ tsuɔ kusum naa ŋmãahilɛ ko he nii, yɛ mɔdɛŋ ní amɛbɔɔ ní amɛná Nyɔŋmɔ hiɛ duromɔ lɛ hewɔ, shi kwa ní amɛkwaa amɛfeɔ amɛhe jalɔi lɛ haa amɛtsiɔ amɛhe kɛjɛɔ Yehowa he moŋ. Amɛhiɛ feɔ amɛ yaa, ni amɛbiɔ akɛ: “Mɛɛba wɔhiɔ ŋmãa, ni onaaa lɛ, ni wɔwaa wɔhe yi, ni oleee lɛ?” Yehowa ha hetoo yɛ faŋŋ mli ni ekɛɛ: “Naa, nyɛŋmãahilɛ gbi lɛ nɔ lɛ nyɛtsuɔ nii, ni nyɛhaoɔ nyɛnitsulɔi fɛɛ! Naa, béi kɛ bolɔmɔ kɛ atswɛrɛi fɔji mãamɔ moŋ nyɛkɛhiɔ ŋmãa; ŋmɛnɛŋmɛnɛ nyɛhiii ŋmãa koni nyɛha anu nyɛgbee yɛ ŋwɛi. Ani enɛ ji ŋmãahilɛ ní sa mihiɛ, kɛ gbi ní gbɔmɔ waa ehe yi lɛ? Ani kɛ́ mɔ ko mã eyi shi tamɔ ntoo, ní eŋmɛ kpekpe kɛ lamulu ekã nɔ lɛ, enɛ otsɛ́ɔ ŋmãahilɛ loo gbi ní sa Yehowa hiɛ lɛ?”—Yesaia 58:3-5.
6. Mɛɛ Yudafoi lɛ anifeemɔi komɛi jie amɛŋmãahilɛ lɛ kpo akɛ eji osato nɔ̃?
6 Beni gbɔmɛi lɛ hiɔ ŋmãa, ní amɛkwaa amɛfeɔ amɛhe jalɔi, ní amɛbiɔ Yehowa jalɛ kojomɔi lɛ ashi po lɛ, belɛ amɛmiitiu pɛsɛmkunya akɔnɔi kɛ nitsumɔi amli sɛɛnamɔi asɛɛ. Amɛkɛ amɛhe woɔ béi, nɔnyɛɛ, kɛ yiwalɛ nifeemɔi amli. Yɛ mɔdɛŋ ní amɛbɔɔ ní amɛkɛ amɛsu lɛ atée hewɔ lɛ, amɛkɛ amɛhe woɔ awerɛhoyeli mli yɛ faŋŋ mli koni mɛi ana amɛ—ni amɛmamɔɔ amɛyi shi tamɔ ntoo, ni amɛbumɔɔ kpekpe kɛtaraa lamulu mli—ni anaa amɛ tamɔ mɛi ní eshwa amɛhe kɛjɛ amɛhe eshai lɛ amli. Mɛɛ sɛɛnamɔ yɔɔ enɛ fɛɛ he kɛji amɛyaa nɔ amɛtseɔ atua lɛ? Amɛjieee awerɛhoyeli kɛ tsuitsakemɔ ní Nyɔŋmɔ gbeyeishemɔ yɔɔ mli, ní esa akɛ ana akɛ efata anɔkwa ŋmãahilɛ he lɛ eko kwraa kpo. Amɛ bolɔmɔi lɛ—eyɛ mli akɛ eyɛ hoo moŋ—shi anuuu yɛ ŋwɛi.
7. Yudafoi ní hi shi yɛ Yesu beaŋ lɛ jie osatofeemɔ kpo yɛ mɛɛ gbɛ nɔ, ni mɛi pii feɔ nakai nɔŋŋ ŋmɛnɛ yɛ mɛɛ gbɛ nɔ?
7 Yudafoi ní hi shi yɛ Yesu gbii lɛ amli lɛ hu kɛ amɛhe wo kusum naa ŋmãahilɛ ní tamɔ nɛkɛ mli, ni mɛi komɛi po feɔ nakai shii enyɔ yɛ otsi mli! (Mateo 6:16-18; Luka 18:11, 12) Jamɔ mli hiɛnyiɛlɔi lɛ ateŋ mɛi pii hu kase Yesaia yinɔbii lɛ kɛtsɔ shɛiifeemɔ kɛ yiwalɛ ní amɛkɛyeɔ mɛi anɔ lɛ nɔ. No hewɔ lɛ, Yesu jie ekãafeemɔ kpo ni ekpá nakai jamɔ mli osatofoi lɛ ahe mama, ni ekɛɛ amɛ akɛ sɛɛnamɔ ko kwraa bɛ amɛjamɔ lɛ he. (Mateo 15:7-9) Ŋmɛnɛ hu, gbɔmɛi akpekpei abɔ “[kɛɔ] akɛ amɛle Nyɔŋmɔ, shi amɛkɛ amɛnitsumɔi kwaa lɛ, ni amɛji gbɔmɛi ní ahiɔ, kɛ toigbolɔi, mɛi ní ehiii haaa nitsumɔ kpakpa ko kwraa.” (Tito 1:16) Ekolɛ gbɔmɛi ní tamɔ nɛkɛ hiɛ baakã nɔ akɛ Nyɔŋmɔ baana amɛ mɔbɔ, shi amɛsubaŋ jieɔ anɔkwa ní amɛyeee lɛ kpo faŋŋ. Nɔ ni tamɔɔɔ nakai lɛ, Yehowa Odasefoi jieɔ anɔkwa Nyɔŋmɔ jamɔ hetuu-kɛhamɔ kɛ anɔkwa nyɛmimɛi asuɔmɔ kpo.—Yohane 13:35.
Nɔ ni Fata Anɔkwa Tsuitsakemɔ He
8, 9. Mɛɛ nifeemɔi kpakpai esa akɛ efata anɔkwa tsuitsakemɔ he?
8 Yehowa miitao ní ewebii lɛ afee babaoo fe ŋmãa ní amɛaahi yɛ amɛhe eshai lɛ ahewɔ kɛkɛ; eetao ní amɛtsake amɛtsui. No baaha amɛná ehiɛ duromɔ. (Ezekiel 18:23, 32) Etsɔɔ mli akɛ, kɛ́ ŋmãahilɛ lɛ baafee nɔ ni shishinumɔ yɔɔ he lɛ, no lɛ esa akɛ tsutsu eshai ní afee lɛ ajajemɔ hu afata he. Susumɔ saji ní pɛiɔ mɔ tsui mli, ní Yehowa bi nɛɛ ahe okwɛ, akɛ: “Ani jeee enɛ ji ŋmãahilɛ ní sa mihiɛ, ákɛ nyɛfɛne efɔŋfeemɔ kpãai lɛ, ní nyɛkpɔlɔ gboklɛi lɛ, ní nyɛha mɛi ni awaa amɛ yi lɛ aye amɛhe, ní nyɛkũ apã fɛɛ apã?”—Yesaia 58:6.
9 Gboklɛi kɛ apãi ji yiwalɛ nyɔŋyeli he okadii ní sa jogbaŋŋ. No hewɔ lɛ, yɛ nɔ najiaŋ ní gbɔmɛi lɛ baahi ŋmãa, shi amɛmiiwa amɛnanemɛi heyelilɔi lɛ ayi yɛ nakai beaŋ nɔŋŋ lɛ, esa akɛ amɛbo famɔ nɛɛ toi, akɛ: “Suɔmɔ onaanyo, taakɛ bɔ ni osumɔɔ bo diɛŋtsɛ ohe lɛ.” (3 Mose 19:18) Esa akɛ amɛŋmɛɛ mɛi fɛɛ ní amɛnyɛɔ amɛnɔ, ní amɛyeɔ amɛnɔ nyɔŋ yɛ gbɛ ní ejaaa nɔ lɛ ahe.a Jamɔ mli nifeemɔi, tamɔ ŋmãahilɛ ní afeɔ ní mɛi ana lɛ jeee nibii ní akɛyeɔ anɔkwa Nyɔŋmɔ jamɔ hetuu-kɛhamɔ kɛ nifeemɔi ní jieɔ nyɛmimɛi asuɔmɔ kpo lɛ najiaŋ. Gbalɔ Mika, ní eji Yesaia yinɔnyo lɛ ŋma akɛ: “Ajaje nɔ ni hi kɛ nɔ ni Yehowa biɔ yɛ odɛŋ atsɔɔo: no ji akɛ ofee nɔ ni ja gbɛ, ní osumɔ ejurɔfeemɔ, ní okɛ o-Nyɔŋmɔ lɛ anyiɛ yɛ heshibaa mli.”—Mika 6:8.
10, 11. (a) Yɛ Yudafoi lɛ agbɛfaŋ lɛ, mɛni baahi fe ŋmãahilɛ? (b) Kristofoi baanyɛ amɛkɛ ŋaawoo ní Yehowa kɛha Yudafoi lɛ atsu nii ŋmɛnɛ yɛ mɛɛ gbɛ nɔ?
10 Jalɛsaneyeli, mlihilɛ, kɛ hiɛshikamɔ biɔ ní afee mɛi krokomɛi ejurɔ, ni no ji nɔ̃ krɛdɛɛ ní Yehowa Mla lɛ biɔ. (Mateo 7:12) Nɔ ni hi kwraa fe ŋmãahilɛ ji amɛnii babaoo ní amɛná lɛ ní amɛkɛ ohiafoi aaaja. Yehowa bi akɛ: “Ani [ŋmãahilɛ ní mihala lɛ] jeee no ji akɛ okɛ oboloo akuma mɔ ni hɔmɔ yeɔ lɛ, ní oŋɔ ohiafoi ní bɛ shihilɛhe lɛ kɛba owe, ní kɛ́ ona mɔ ko ní nyiɛ yayai lɛ, oha lɛ mama, ní okɛ ohe akatee bo diɛŋtsɛ oheloo?” (Yesaia 58:7) Hɛɛ, yɛ nɔ̃ najiaŋ ní amɛaahi ŋmãa ní mɛi fɛɛ ana lɛ, esa akɛ mɛi ní yɔɔ hegbɛ ní amɛkɛaafee nakai lɛ aha amɛnanemɛi Yuda maŋ lɛ mli bii—ni ji amɛ diɛŋtsɛ amɛheloo lɛ, niyenii, hehaanɔ, kɛ wɔɔhe.
11 Nɛkɛ nyɛmimɛi asuɔmɔ kɛ mlihilɛ he shishitoo mlai kpakpai ní Yehowa kɛha nɛɛ kɔɔɔ Yudafoi ní hi shi yɛ Yesaia gbii lɛ amli lɛ pɛ ahe. Amɛkudɔɔ Kristofoi hu. No hewɔ lɛ, bɔfo Paulo ŋma akɛ: “Belɛ akɛ nɔ ni wɔyɔɔ dekã hewɔ lɛ, nyɛhaa wɔfea mɛi fɛɛ ejurɔ, shi titri lɛ mɛi ni ji hemɔkɛyeli lɛ webii lɛ.” (Galatabii 6:10) Esa akɛ Kristofoi asafo lɛ afee abobaahe ní suɔmɔ kɛ nyɛmimɛi ahedɔɔ yɔɔ mli, titri lɛ yɛ jaramɔ be ní mli waa kɛyaa hiɛ, ní wɔyɔɔ mli bianɛ lɛ hewɔ.—2 Timoteo 3:1; Yakobo 1:27.
Toiboo kɛ Jɔɔmɔi Babaoo Baa
12. Mɛni Yehowa baafee kɛji ewebii lɛ bo lɛ toi?
12 Eji Yehowa webii lɛ baaná sɛɛyoomɔ ní amɛbo ekãmɔ ní jɛ suɔmɔ mli lɛ toi kulɛ! Yehowa kɛɛ akɛ: “No lɛ ola lɛ aaajije taakɛ jetsɛremɔ, ni otsamɔ lɛ hu aaafee oyá, ni ojalɛ lɛ aaanyiɛ ohiɛ, Yehowa anunyam lɛ aaanyiɛ osɛɛ. No lɛ oootsɛ́, ni Yehowa aaahere nɔ, ooobolɔ, ni eeekɛɛ akɛ: Naa mi!” (Yesaia 58:8, 9a) Mɛɛ miishɛjemɔ wiemɔi ní ŋɔɔ nɛ! Yehowa jɔɔ mɛi ní náa suɔmɔ mlihilɛ kɛ jalɛ nifeemɔ he miishɛɛ lɛ ni ebuɔ amɛhe. Kɛ́ Yehowa webii lɛ tsake amɛtsui kɛjɛ amɛ yiwalɛ nifeemɔ kɛ osatofeemɔ lɛ mli ní amɛbo lɛ toi lɛ, no lɛ nibii baahi jogbaŋŋ diɛŋtsɛ kɛha amɛ. Yehowa baaha amɛná ‘tsamɔ,’ ni ji mumɔŋ kɛ heloonaa hewalɛnamɔ kɛha maŋ lɛ. Ebaabu amɛhe hu, tamɔ bɔ ni ebu amɛblematsɛmɛi lɛ ahe beni amɛshiɔ Mizraim lɛ. Ni ebaahere amɛbolɔmɔi kɛha yelikɛbuamɔ lɛ anɔ amrɔ nɔŋŋ.—2 Mose 14:19, 20, 31.
13. Mɛɛ jɔɔmɔi mɛɔ Yudafoi lɛ kɛji amɛbo Yehowa ŋaawoo lɛ toi?
13 Agbɛnɛ, Yehowa kɛ eŋaawoo ní ekɛha kɛtsɔ hiɛ lɛ fata he, ni ekɛɛ: “Kɛji ojie gboklɛ lɛ [yiwalɛ nyɔŋyeli ní ejaaa lɛ] kɛ wao ní akɛtsɔɔ mɔ [ekolɛ yɛ hefɛoyeli loo apasa naafolɔmɔ mli lɛ] kɛ wiemɔ fɔŋ kɛjɛ oteŋ, ní oŋɔ nɔ ni osusuma taoɔ lɛ oha mɔ ni hɔmɔ yeɔ lɛ, ní oha susuma ní nii yɔɔ mɔbɔ lɛ hu tɔ lɛ: no lɛ ola lɛ aaajije yɛ duŋ mli, ni oduŋ kpii lɛ aaatsɔ tamɔ shwane.” (Yesaia 58:9b, 10) Pɛsɛmkunya kɛ yiwalɛ haa mɔ nine nyɛɔ shi, ni ekɛ Yehowa mlifu baa. Shi, mlihilɛ kɛ ejurɔfeemɔ kɛ Nyɔŋmɔ dɛŋ jɔɔmɔi babaoo baa, titri lɛ kɛji ajie kpo atsɔɔ mɛi ní hɔmɔ yeɔ amɛ kɛ mɛi ní naa amanehulu lɛ. Kɛji Yudafoi lɛ baaŋɔ anɔkwalei nɛɛ amɛto amɛtsuii amli kɛkɛ! No lɛ amɛmumɔŋ kpɛmɔ kɛ shweremɔ lɛ baaha amɛla lɛ ajije tamɔ shwane fintii hulu, ni ebaajie duŋ kpii lɛ kɛya kwraa. Nɔ ni fe fɛɛ lɛ, amɛkɛ hiɛnyamwoo kɛ yijiemɔ baaha Yehowa, mɔ ni ji amɛ anunyam kɛ jɔɔmɔ lɛ Jɛɛhe lɛ.—1 Maŋtsɛmɛi 8:41-43.
Maŋ ní Akɛ Amɛ Eku Sɛɛ Kɛba Ekoŋŋ
14. (a) Te Yesaia yinɔbii lɛ fee amɛnii yɛ ewiemɔi lɛ ahe amɛha tɛŋŋ? (b) Mɛni Yehowa tee nɔ ekɛha amɛ lolo?
14 Dɔlɛ sane ji akɛ, maŋ lɛ ku amɛhiɛ amɛfɔ̃ Yehowa faikpamɔ lɛ nɔ ni amɛkɛ amɛhe wo efɔŋfeemɔ mli vii. Yɛ naagbee lɛ, nɔ̃ pɛ ní Yehowa baanyɛ efee ji ní eha amɛya nomŋɔɔ mli, tamɔ bɔ ni ebɔ amɛ kɔkɔ lɛ. (5 Mose 28:15, 36, 37, 64, 65) Shi kɛlɛ, Yehowa wiemɔi ní nyiɛ sɛɛ, ní ekɛtsɔ Yesaia nɔ lɛ tee nɔ eha amɛ hiɛnɔkamɔ. Nyɔŋmɔ gba efɔ̃ shi akɛ shwɛɛnii ko ní ekpɛlɛ tsɔsemɔ nɔ ní amɛshwa amɛhe kɛ miishɛɛ baaku amɛsɛɛ kɛba Yuda shikpɔŋ lɛ nɔ, eyɛ mli akɛ ekã shi amaŋfɔ.
15. Mɛɛ sɛɛkuu kɛbaa ní yɔɔ miishɛɛ Yehowa gba efɔ̃ shi?
15 Beni Yehowa gbalaa jwɛŋmɔ kɛyaa ewebii ní ekɛ amɛ baaku sɛɛ kɛba amɛmaŋ ekoŋŋ yɛ afi 537 D.Ŋ.B. lɛ nɔ lɛ, ewie kɛtsɔ Yesaia nɔ akɛ: “Yehowa aaawao daa nɛɛ, ni eeeha osusuma atɔ yɛ hei gbiji, ni eeeha owuiaŋ awa, ni eeetsɔ tamɔ trom ní nu hoɔ yɛ mli, loo tamɔ nuhiŋmɛi ní nu kpaaa yɛ mli.” (Yesaia 58:11) Yehowa baaha Israel maŋ shikpɔŋ ní egbĩ lɛ aku sɛɛ atsɔ shikpɔŋ kpakpa ní woɔ yibii ekoŋŋ. Nɔ ni yɔɔ naakpɛɛ fe no ji akɛ, ebaajɔɔ ewebii ní eshwa amɛhe lɛ, ni ebaaha ‘amɛwuiaŋ’ awa, kɛjɛ mumɔŋ shihilɛ ní wala bɛ mli lɛ mli kɛya shihilɛ ní eyi obɔ̃ kɛ hewalɛ mli. (Ezekiel 37:1-14) Gbɔmɛi lɛ diɛŋtsɛ baatsɔmɔ tamɔ “trom ní nu hoɔ yɛ mli,” ni eyi obɔ̃ kɛ mumɔŋ yibii.
16. Te abaasaa shikpɔŋ lɛ ekoŋŋ aha tɛŋŋ?
16 Maŋtiasei ní Babilonbii ní batutua amɛ yɛ afi 607 D.Ŋ.B. lɛ kpata hiɛ lɛ atswaa ekoŋŋ hu baafata amɛsɛɛkuu kɛbaa lɛ he. “Omɛi lɛ aaatswa blema tsũkoi lɛ, ni oootée blema yinɔi lɛ ashishitooi lɛ ashi omamɔ shi; ni aaatsɛ́o afabaŋ saalɔ, kɛ mɔ ní jeɔ gbɛ̀i ní mɛi ahi jɛi!” (Yesaia 58:12) Wiemɔi ní je amɛhe, ni ji “blema tsũkoi lɛ” kɛ “blema yinɔi lɛ ashishitooi lɛ” (loo, shishitooi ní ehi fitemɔ shihilɛ mli aahu yinɔi babaoo lɛ) tsɔɔ akɛ shwɛɛnii ní aha amɛku amɛsɛɛ kɛba amɛmaŋ lɛ baasaa amɛtswa Yuda maŋtiasei ní efite lɛ ekoŋŋ, titri lɛ Yerusalem. (Nehemia 2:5; 12:27; Yesaia 44:28) Amɛbaasaa “afabaŋ” lɛ—ni ji wiemɔ ní akɛtsuɔ nii akɛtsɔɔ Yerusalem gbogboi lɛ, kɛ maŋtiasei krokomɛi agbogboi lɛ amli hei ní ekumɔ lɛ fɛɛ lɛ.—Yeremia 31:38-40; Amos 9:14.
Jɔɔmɔi ní Anɔkwayeli ní Akɛyeɔ Hejɔɔmɔ Gbi Jurɔ lɛ Kɛbaa
17. Yehowa kpá ewebii lɛ fai ní amɛye Hejɔɔmɔ Gbi mlai lɛ anɔ yɛ mɛɛ gbɛ nɔ?
17 Hejɔɔmɔ Gbi lɛ fee bɔ ni Nyɔŋmɔ susuɔ ewebii lɛ agbɔmɔtsoŋ kɛ mumɔŋ hilɛ-kɛhamɔ he jogbaŋŋ lɛ he okadi. Yesu kɛɛ akɛ: “Gbɔmɔ hewɔ ato hejɔɔmɔ gbi lɛ.” (Marko 2:27) Nɛkɛ gbi ní Yehowa efee lɛ krɔŋkrɔŋ nɛɛ ha Israelbii lɛ ná hegbɛ krɛdɛɛ ko ní amɛkɛaajie suɔmɔ ní amɛyɔɔ kɛha Nyɔŋmɔ lɛ kpo. Dɔlɛ sane ji akɛ, beni shɛɔ Yesaia gbii lɛ amli lɛ, no mli lɛ amɛha etsɔ gbi ní amɛkɛfeɔ kusumii foji, ní amɛkɛ amɛhe woɔ pɛsɛmkunya akɔnɔi amli. No hewɔ lɛ, Yehowa yɛ yiŋtoo ní eeedamɔ nɔ ekã amɛhiɛ ekoŋŋ. Ni shikome ekoŋŋ lɛ, ebɔ mɔdɛŋ ní eshɛ amɛtsuii ahe. Ekɛɛ akɛ: “Kɛji otsĩ onane naa yɛ hejɔɔmɔ gbi lɛ nɔ, ní okatsu otsuinaa nii yɛ migbi krɔŋkrɔŋ lɛ nɔ, ní otsɛ́ hejɔɔmɔ gbi lɛ akɛ otsui he nɔ̃, kɛ Yehowa gbi krɔŋkrɔŋ lɛ akɛ onunyam nɔ ko, ní owo ehiɛ nyam, ní ofeee bo diɛŋtsɛ ogbɛ̀i anɔ nii, ní otsuuu nii, ní owieee yaka wiemɔi lɛ: no lɛ omii aaashɛ yɛ Yehowa he, ni maha oye shikpɔŋ nɔ hei grɔŋŋi lɛ anɔ, ni maha oye otsɛ Yakob gboshinii lɛ; ejaakɛ Yehowa naabu ekɛɛ!”—Yesaia 58:13, 14.
18. Mɛni baajɛ bulɛ ni Yuda kɛhaaa Hejɔɔmɔ Gbi lɛ mli aba?
18 Hejɔɔmɔ Gbi lɛ ji gbi kɛha mumɔŋ nibii anɔjwɛŋmɔ, sɔlemɔ, kɛ weku lɛ kutuu jamɔ. Esa akɛ eye ebua Yudafoi lɛ ní amɛsusu Yehowa nifeemɔi ní yɔɔ naakpɛɛ, ní etsu yɛ amɛgbɛfaŋ lɛ, kɛ jalɛsaneyeli kɛ suɔmɔ ní jeɔ kpo yɛ e-Mla lɛ mli lɛ he. Enɛ hewɔ lɛ, esa akɛ nɛkɛ gbi krɔŋkrɔŋ nɛɛ yeli aye abua gbɔmɛi lɛ ní amɛtsi amɛbɛŋkɛ amɛ-Nyɔŋmɔ lɛ kpaakpa. Shi yɛ no najiaŋ moŋ lɛ, amɛmiifite Hejɔɔmɔ Gbi lɛ, ni no hewɔ lɛ amɛyɛ oshara ní ji Yehowa jɔɔmɔi ní sɛɛ baafo yɛ amɛnɔ lɛ mli.—3 Mose 26:34; 2 Kronika 36:21.
19. Mɛɛ jɔɔmɔi babaoo ásaa ato aha Nyɔŋmɔ webii lɛ kɛji amɛku sɛɛ amɛbɔi Hejɔɔmɔ Gbi lɛ yeli ekoŋŋ lɛ?
19 Shi kɛlɛ, kɛji Yudafoi lɛ kase nii kɛjɛ toigbalamɔ lɛ mli ní amɛku sɛɛ amɛbɔi Hejɔɔmɔ Gbi gbɛjianɔtoo lɛ nɔ yeli ekoŋŋ lɛ, no lɛ ásaa jɔɔmɔi babaoo ato aha amɛ. Nibii kpakpai ní anɔkwa jamɔ kɛ bulɛ ní amɛyɔɔ kɛha Hejɔɔmɔ Gbi lɛ kɛbaa lɛ baafá aahu kɛteke nɔ kɛbote amɛshihilɛ mli nibii fɛɛ mli. (5 Mose 28:1-13; Lala 19:8-12) Ákɛ nɔkwɛmɔnɔ lɛ, Yehowa baaha ewebii lɛ “[aye] shikpɔŋ nɔ hei grɔŋŋi lɛ anɔ.” Wiemɔ nɛɛ tsɔɔ shweshweeshwe shihilɛ kɛ henyɛlɔi anɔ kunimyeli. Mɔ fɛɛ mɔ ní yeɔ hei grɔŋŋi—ni ji gɔŋkpɔi kɛ gɔji—lɛ anɔ lɛ, ji mɔ ní yeɔ shikpɔŋ lɛ nɔ. (5 Mose 32:13; 33:29) Be ko lɛ, Israel boɔ Yehowa toi, ni maŋ lɛ náa ehebuu mli ŋɔɔmɔ, ni jeŋmaji krokomɛi lɛ buɔ amɛ waa, ni amɛsheɔ amɛ gbeyei po. (Yoshua 2:9-11; 1 Maŋtsɛmɛi 4:20, 21) Kɛ́ amɛtsɔ amɛhe kɛba Yehowa ŋɔɔ yɛ toiboo mli shikome ekoŋŋ lɛ, no lɛ amɛbaaná nakai tsutsu anunyam lɛ ekomɛi. Yehowa baaha ewebii lɛ aná gbɛfaŋnɔ ni mɔɔ shi yɛ “Yakob gboshinii lɛ” amli—no ji jɔɔmɔi ní ewo shi kɛtsɔ E-kpaŋmɔ ní ekɛ amɛblematsɛmɛi lɛ fee lɛ nɔ, titri lɛ jɔɔmɔ ní ji Shiwoo Shikpɔŋ lɛ ní amɛnine baashɛ nɔ shweshweeshwe lɛ.—Lala 105:8-11.
20. Mɛɛ “hejɔɔmɔ gbi yeli” yɔɔ kɛha Kristofoi?
20 Ani nikasemɔ ko yɛ enɛ mli kɛha Kristofoi? Yɛ Yesu Kristo gbele sɛɛ lɛ, Mose Mla lɛ, ní Hejɔɔmɔ Gbi taomɔ nii lɛ fata he lɛ sɛɛ fo. (Kolosebii 2:16, 17) Shi kɛlɛ, mumɔ ní kulɛ esa akɛ Hejɔɔmɔ Gbi lɛ yeli awo he hewalɛ yɛ Yuda—ni ji mumɔŋ nibii ní akɛaaye klɛŋklɛŋ gbɛhe kɛ Yehowa ní aaabɛŋkɛ lɛ kpaakpa lɛ—he miihia waa kɛha Yehowa jálɔi lolo. (Mateo 6:33; Yakobo 4:8) Kɛfata he lɛ, Paulo wie yɛ ewolo ní eŋma eyaha Hebribii lɛ mli akɛ: “Hejɔɔmɔ gbi yeli ko kã shi kɛ̃ ha Nyɔŋmɔ maŋ lɛ.” Kristofoi boteɔ “hejɔɔmɔ gbi yeli” nɛɛ mli kɛtsɔɔ toiboo ní amɛfeɔ amɛhaa Yehowa, kɛ jalɛ sɛɛ ní amɛdiɔ kɛtsɔ Yesu Kristo lá ní efɔse eshwie shi lɛ mli hemɔkɛyeli namɔ nɔ lɛ nɔ. (Hebribii 3:12, 18, 19; 4:6, 9-11, 14-16) Yɛ Kristofoi agbɛfaŋ lɛ, amɛyeee nɛkɛ hejɔɔmɔ gbi nɛɛ akɛ gbi kome pɛ yɛ otsi mli, shi moŋ amɛyeɔ lɛ daa gbi.—Kolosebii 3:23, 24.
Mumɔŋ Israel ‘Miiye Shikpɔŋ nɔ Hei Grɔŋŋi lɛ Anɔ’
21, 22. Yehowa eha Nyɔŋmɔ Israel lɛ “[eye] shikpɔŋ nɔ hei grɔŋŋi lɛ anɔ” yɛ mɛɛ gbɛ nɔ?
21 Kɛjɛ be ní ajie amɛ kɛjɛ Babilon nyɔŋyeli mli yɛ afi 1919 kɛbaa nɛɛ, Kristofoi ní afɔ amɛ mu lɛ kɛ anɔkwayeli eye nɔ ni akɛ Hejɔɔmɔ Gbi lɛ fee he mfoniri lɛ nɔ. Nɔ ni ejɛ mli eba ji akɛ, Yehowa eha ‘amɛye shikpɔŋ nɔ hei grɔŋŋi lɛ anɔ.’ Yɛ mɛɛ shishinumɔ naa? Yɛ afi 1513 D.Ŋ.B. tɔ̃ɔ lɛ, Yehowa kɛ Abraham seshibii lɛ fee kpaŋmɔ ko akɛ, kɛ́ amɛfee toiboo amɛha lɛ lɛ, no lɛ ebaaha amɛtsɔmɔ osɔfoi amaŋtsɛyeli kɛ jeŋmaŋ krɔŋkrɔŋ. (2 Mose 19:5, 6) Yɛ afii 40 ní amɛkɛnyiɛ ŋã lɛ nɔ lɛ mli fɛɛ lɛ, Yehowa hiɛ amɛ shweshweeshwe, tamɔ bɔ ni okropɔŋ holeɔ ebii bibii lɛ, ni ekɛ nibii babaoo diɛŋtsɛ jɔɔ amɛ. (5 Mose 32:10-12) Shi kɛlɛ, maŋ lɛ naaa hemɔkɛyeli, ni yɛ naagbee lɛ, hegbɛi fɛɛ ní kulɛ amɛnine baanyɛ ashɛ nɔ lɛ ŋmɛɛ amɛ. Shi yɛ enɛ fɛɛ sɛɛ lɛ, Yehowa yɛ osɔfoi amaŋtsɛyeli ŋmɛnɛ. No ji Nyɔŋmɔ mumɔŋ Israel lɛ.—Galatabii 6:16; 1 Petro 2:9.
22 Nɛkɛ mumɔŋ maŋ nɛɛ efee nɔ ni blema Israel efeee lɛ, yɛ “naagbee be lɛ” mli. Amɛtee nɔ amɛye Yehowa anɔkwa. (Daniel 8:17) Akɛni emli bii lɛ yaa nɔ amɛyeɔ Yehowa tɛi kɛ egbɛ̀i ní nɔ kwɔlɔ lɛ anɔ kɛmɔɔ shi hewɔ lɛ, yɛ mumɔŋ shishinumɔ naa lɛ, Yehowa holeɔ amɛnɔ gojoo. (Abɛi 4:4, 5, 8; Kpojiemɔ 11:12) Akɛni abu amɛhe kɛjɛ muji nibii ní ebɔle amɛhe lɛ amli hewɔ lɛ, amɛnáa shihilɛ gbɛ ní awó nɔ gojoo mli ŋɔɔmɔ, ni yɛ nɔ̃ najiaŋ ní amɛaama nɔ mi doo akɛ amɛaanyiɛ amɛ diɛŋtsɛ amɛgbɛ̀i anɔ lɛ, ‘amɛnáa Yehowa’ kɛ e-Wiemɔ lɛ moŋ ‘he miishɛɛ’ babaoo. (Lala 37:4) Yehowa eha amɛtee nɔ amɛhi shi shweshweeshwe yɛ mumɔŋ, yɛ shitee-kɛ-woo ní amɛkɛkpeɔ yɛ jeŋ fɛɛ lɛ fɛɛ sɛɛ. Kɛjɛ afi 1919 kɛbaa nɛɛ, afiteko amɛmumɔŋ “shikpɔŋ” lɛ dɔŋŋ. (Yesaia 66:8) Amɛkã he amɛji maŋ ní ehala kɛha egbɛi ní nɔ kwɔ gojoo lɛ lolo, ni amɛkɛ miishɛɛ jajeɔ amɛtsɔɔ yɛ jeŋ fɛɛ. (5 Mose 32:3; Bɔfoi lɛ Asaji 15:14) Kɛfata he lɛ, amrɔ nɛɛ heshibalɔi ní jɛ jeŋmaji fɛɛ mli, ní amɛyi miifa be fɛɛ be, fataa amɛhe kɛnáa hegbɛ kpele ní ji tsɔɔmɔ ní atsɔɔ amɛ Yehowa gbɛ̀i lɛ, ní ayeɔ abuaa amɛ ní amɛnyiɛ etempɔŋi lɛ anɔ lɛ mli gbɛfaŋnɔ.
23. Yehowa eha etsuji ní afɔ amɛ mu lɛ ‘eye Yakob gboshinii lɛ’ yɛ mɛɛ gbɛ nɔ?
23 Yehowa eha etsuji ní efɔ amɛ mu lɛ ‘eye Yakob gboshinii lɛ.’ Beni Isak jɔ́ɔ Yakob yɛ Esau najiaŋ lɛ, blematsɛ lɛ wiemɔi lɛ gba jɔɔmɔi ní mɛi fɛɛ ní baajie Abraham Seshi ní awo shi yɛ ehe lɛ mli hemɔkɛyeli kpo lɛ baaná lɛ efɔ̃ shi. (1 Mose 27:27-29; Galatabii 3:16, 17) Taakɛ Yakob ji—kɛ mɛi ni tamɔɔɔ Esau lɛ—Kristofoi ní afɔ amɛ mu lɛ kɛ amɛhefatalɔi lɛ ‘ahiɛ sɔɔ krɔŋkrɔŋ nii,’ titri lɛ mumɔŋ niyenii ní Nyɔŋmɔ kɛhaa babaoo kɛtekeɔ nɔ lɛ. (Hebribii 12:16, 17; Mateo 4:4) Nɛkɛ mumɔŋ niyenii nɛɛ—ní nɔ ni Yehowa tsuɔ kɛtsɔ Seshi ní awo shi yɛ ehe lɛ kɛ nakai Seshi lɛ hefatalɔi lɛ anɔ lɛ he nilee fata he lɛ—woɔ mɔ hewalɛ, ekanyaa mɔ, ni ehe miihia waa kɛha amɛmumɔŋ shihilɛ. No hewɔ lɛ, ehe miihia waa akɛ amɛye mumɔŋ niyenii kpakpa daa gbi, kɛtsɔ Nyɔŋmɔ Wiemɔ lɛ kanemɔ kɛ enɔjwɛŋmɔ nɔ. (Lala 1:1-3) Eji famɔ diɛŋtsɛ akɛ amɛkɛ nanemɛi heyelilɔi abɔ yɛ Kristofoi akpeei ashishi. Ni ehe miihia ní amɛhiɛ jamɔ krɔŋŋ he tɛi ní nɔ kwɔlɔ lɛ amli, yɛ be mli ní amɛkɛ mɛi krokomɛi jaa nakai mumɔŋ niyenii kpakpai lɛ kɛ miishɛɛ lɛ.
24. Te anɔkwa Kristofoi ní yɔɔ ŋmɛnɛ lɛ feɔ amɛnii amɛhaa tɛŋŋ?
24 Yɛ be mli ní amɛkɛ miishɛɛ mɛɔ Yehowa shiwoi lɛ amlibaa lɛ, eba akɛ anɔkwa Kristofoi baaya nɔ amɛkpoo osatofeemɔi srɔtoi fɛɛ kwraa. Akɛni “Yakob gboshinii lɛ” lɛɔ amɛ kɛ niyenii kpakpa hewɔ lɛ, eba akɛ amɛaaya nɔ amɛná mumɔŋ shweshweeshwefeemɔ yɛ “shikpɔŋ nɔ hei grɔŋŋi lɛ.”
[Shishigbɛ niŋmaa]
a Yehowa to gbɛjianɔ kɛha ewebii lɛ ateŋ mɛi ní baamɔ nyɔmɔ lɛ ní amɛhɔ̃ɔ amɛhe amɛwo nyɔŋyeli mli—enɛ tsɔɔ akɛ amɛbaatsɔmɔ apaafoi—koni amɛkɛwo nyɔmɔ ní amɛmɔ lɛ. (3 Mose 25:39-43) Shi kɛlɛ, Mla lɛ biɔ ní akɛ nyɔji aye yɛ mlihilɛ mli. Esa akɛ aŋmɛɛ mɛi ní akɛ amɛ eye yɛ yiwalɛ mli lɛ ahe.—2 Mose 21:2, 3, 26, 27; 5 Mose 15:12-15.
[Mfoniri ni yɔɔ baafa 278]
Yudafoi lɛ hi ŋmãa ni amɛmamɔ amɛyi shi yɛ hefɛoyeli heshwamɔ mli—shi amɛtsakeee amɛgbɛ̀i lɛ
[Mfoniri ni yɔɔ baafa 283]
Mɛi ní yɔɔ hegbɛ ní amɛkɛaafee nakai lɛ haa mɛi ní ehia amɛ lɛ wɔɔhe, hehaanɔ, loo niyenii
[Mfoniri ni yɔɔ baafa 286]
Kɛ́ Yuda tsake etsui lɛ, ebaasaa etswa emaŋtiasei ní etsɔmɔ amaŋfɔ lɛ