Yitso Nyɔŋmai Enyɔ
Yehowa Nine Efoko Kuku
1. Mɛni ji shihilɛ ní yɔɔ Yuda, ni mɛi pii ayiŋ feɔ amɛ kɔshikɔshi yɛ mɛni he?
YUDA maŋ lɛ kɛɔ akɛ ekɛ Yehowa yɛ kpaŋmɔ wekukpaa mli. Ni kɛlɛ, haomɔ yɛ he fɛɛ he. Ayeee jalɛ sane yɛ he ko he ko, awuiyeli kɛ nɔnyɛɛ egbɛ eshwã he fɛɛ he, ni hiɛnɔkamɔ ní anáa akɛ nibii baahi lɛ baaa mli. Tɔmɔ ko ní hiɛdɔɔ yɔɔ he waa yɛ. Mɛi pii ayiŋ feɔ amɛ kɔshikɔshi yɛ saji ni Yehowa baajaje lɛ he. Nɛkɛ ji shihilɛ ní hi shi yɛ Yesaia gbii lɛ amli. Shi saji ní Yesaia wie yɛ nɛkɛ be nɛɛ he lɛ fe yinɔsane folo ko kɛkɛ. Ewiemɔi lɛ hiɛ gbalɛ mli kɔkɔbɔɔi kɛha mɔ fɛɛ mɔ ní kɛɔ akɛ ejáa Nyɔŋmɔ, shi ekuɔ ehiɛ efɔ̃ɔ E-mlai anɔ lɛ. Ni gbalɛ ní jɛ mumɔŋ ní aŋma afɔ̃ shi yɛ Yesaia yitso 59 lɛ kɛ hewalɛwoo ní yɔɔ miishɛɛ haa mɛi fɛɛ ní bɔɔ mɔdɛŋ akɛ amɛaasɔmɔ Yehowa yɛ jaramɔ be ní yɔɔ oshara ní amɛyɔɔ mli lɛ fɛɛ sɛɛ lɛ.
Amɛtsi Amɛhe Kɛjɛ Anɔkwa Nyɔŋmɔ lɛ He
2, 3. Mɛni hewɔ Yehowa ebuuu Yuda he lɛ?
2 Bo diɛŋtsɛ susumɔ he okwɛ—Yehowa webii ní ekɛ amɛ efee kpaŋmɔ lɛ eyagbee hemɔkɛyeli kwamɔ mli! Amɛkwa amɛ-Bɔlɔ lɛ, ni amɛkɛ nakai feemɔ ejie amɛhe kɛjɛ enine ní buɔ amɛhe lɛ shishi. Yɛ enɛ hewɔ lɛ, amɛkɛ haomɔ ní mli wa waa miikpe. Ani ekolɛ amɛshwaa Yehowa yɛ jaramɔ shihilɛ ní amɛyɔɔ mli lɛ he? Yesaia kɛɛ amɛ akɛ: “Naa, Yehowa nine efoko kuku ní enyɛɛɛ yiwala ehere, ni asaŋ etoii hu tsĩmɔko ní enuuu nii; shi moŋ nyɛnishaianii lɛ ji nii ní gbálaa nyɛkɛ nyɛ-Nyɔŋmɔ lɛ teŋ, ni nyɛhe eshai lɛ ji nii ni etsĩ ehiɛ kɛjɛ nyɛhe, ni ebooo nyɛ toi lɛ.”—Yesaia 59:1, 2.
3 Wiemɔi nɛɛ yɛ kpookpoo, shi anɔkwale ni. Yehowa kã he eji yiwalaheremɔ Nyɔŋmɔ. Ákɛ ‘sɔlemɔ Toibolɔ’ lɛ, eboɔ etsuji anɔkwafoi lɛ asɔlemɔi atoi. (Lala 65:3) Shi kɛlɛ, ejɔɔɔ efɔŋfeelɔi. Gbɔmɛi lɛ diɛŋtsɛ tereɔ sɔ̃ ní jɛɔ amɛhe ní amɛtsi kɛjɛ Yehowa he lɛ mli baa lɛ. Amɛ diɛŋtsɛ amɛnɔ̃ fɔŋ feemɔ lɛ eha etsĩ ehiɛ kɛjɛ amɛhe.
4. Mɛɛ naafolɔmɔi akɛshiɔ Yuda?
4 Yɛ anɔkwale mli lɛ, nɔ ni Yuda efee lɛ ehiii kwraa. Yesaia gbalɛ lɛ tsĩɔ naafolɔmɔi ní akɛshiɔ amɛ lɛ ekomɛi atã akɛ: “Nyɛkɛ lá ebule nyɛniji ni nyɛwaabii hu kɛ nishaianii; nyɛnaabu wieɔ apasa wiemɔi, ni nyɛlilɛii lɛ wieɔ kutumpɔo wiemɔi.” (Yesaia 59:3) Gbɔmɛi lɛ maleɔ ni amɛwieɔ kutumpɔo wiemɔi. Wiemɔ ní awie akɛ ‘amɛkɛ lá ebule amɛniji’ lɛ tsɔɔ akɛ amɛteŋ mɛi komɛi po egbegbee gbɔmɛi. Kwɛ heguɔgbee ní enɛ ji kɛha Nyɔŋmɔ, mɔ ni jeee gbɔmɔgbee kɛkɛ e-Mla lɛ guɔ, shi moŋ eguɔ ‘nyɛ̃ɛ ní oooná oha onyɛmi yɛ otsui mli’ hu lɛ! (3 Mose 19:17) Esa akɛ eshafeemɔ gbɛ ní naatsii bɛ mli ní Yuda maŋ lɛ mli bii lɛ ekɔ, kɛ nɔ ni baajɛ mli aba ní amɛnyɛŋ amɛjo naa foi lɛ akai wɔteŋ mɔ fɛɛ mɔ ŋmɛnɛ akɛ ehe miihia ní wɔkudɔ eshafeemɔ susumɔi kɛ henumɔi lɛ. Kɛ́ jeee nakai lɛ, ebaaha wɔkɛ wɔhe ayawo nifeemɔi fɔji ní baagbála wɔkɛ Nyɔŋmɔ teŋ lɛ mli.—Romabii 12:9; Galatabii 5:15; Yakobo 1:14, 15.
5. Nɛgbɛ Yuda fitemɔ lɛ etee shɔŋŋ kɛyashɛ?
5 Hela ni ji esha lɛ etsɛŋe maŋ muu lɛ fɛɛ. Gbalɛ lɛ kɛɔ akɛ: “Mɔ ko bɛ ní wieɔ yɛ jalɛ naa, ni mɔ ko bɛ hu ní yeɔ sane yɛ anɔkwale naa: aŋɔɔ hiɛ afɔ̃ɔ yakayakanii anɔ, ni amaleɔ; ahiɛɔ haomɔ musu ni afɔ́ɔ nɔ̃ sha!” (Yesaia 59:4) Mɔ ko mɔ ko ewieee yɛ jalɛ naa. Kɛ́ atee mla naa kojomɔ hei po lɛ, anáaa mɔ ko ní anyɛɔ akɛ he fɔ̃ɔ enɔ loo eyeɔ anɔkwa. Yuda ekwa Yehowa, ni ekɛ ehiɛ fɔ̃ɔ kpaŋmɔi ní ekɛ jeŋmaji lɛ efee lɛ, kɛ amagai ní wala bɛ amɛmli lɛ po anɔ. Enɛɛmɛi fɛɛ lɛ, “yakayakanii” ni, ni sɛɛnamɔ ko kwraa bɛ he. (Yesaia 40:17, 23; 41:29) Enɛ hewɔ lɛ, awieɔ kɛsusuɔ nibii babaoo he, shi sɛɛnamɔ ko kwraa jɛɛɛ mli baaa. Atoɔ gbɛjianɔi srɔtoi, shi nɔ ni jɛɔ mli baa ji haomɔ kɛ amanehulu.
6. Nibii ní Kristendom efee lɛ tamɔ nɔ ni Yuda fee lɛ pɛpɛɛpɛ yɛ mɛɛ gbɛ nɔ?
6 Anaa nɔ̃ fɔŋ feemɔ kɛ yiwalɛ ní tee nɔ yɛ Yuda lɛ henɔ pɛpɛɛpɛ yɛ Kristendom. (Kwɛmɔ “Yerusalem Hemɔkɛyeli Kwalɔ Lɛ—Kristendom Henɔ Pɛpɛɛpɛ,” ní yɔɔ baafa 294 lɛ.) Áwuu jeŋ tai enyɔ ní yɔɔ gbeyei waa yɛ maji ní tsɛɔ amɛhe Kristofoi amaji lɛ ateŋ. Kɛbashi amrɔ nɛɛ, Kristendom jamɔ lɛ efee nɔ ni bɛ hewalɛ ko ní ekɛaatsĩ weku shishi bulemɔ kɛ wekui ateŋ gbɔmɔgbee ní yaa nɔ yɛ lɛ diɛŋtsɛ emli bii lɛ ateŋ lɛ naa. (2 Timoteo 3:5) Eyɛ mli akɛ Yesu tsɔɔ esɛɛnyiɛlɔi lɛ ní amɛkɛ amɛhiɛ afɔ̃ Nyɔŋmɔ Maŋtsɛyeli lɛ nɔ moŋ, shi Kristendom maji lɛ yaa nɔ amɛkɛ amɛhe fɔ̃ɔ asraafoi atawuu nii ni abua naa ashwie shi lɛ kɛ maŋkwramɔŋ kpaŋmɔi anɔ kɛha shweshweeshwefeemɔ. (Mateo 6:10) Yɛ anɔkwale mli lɛ, anaa maji ní feɔ tawuu nii babaoo fe fɛɛ lɛ ateŋ babaoo yɛ Kristendom maji lɛ amli! Hɛɛ, kɛ́ Kristendom kɛ ehiɛ fɔ̃ adesai amɔdɛŋbɔi kɛ gbɛjianɔtoi anɔ kɛha wɔsɛɛ be ní yɔɔ shweshweeshwe lɛ, lɛ hu ekɛ ehiɛ miifɔ̃ “yakayakanii” anɔ.
Yibii ní Yɔɔ Dɔlɛ Kpamɔ
7. Mɛni hewɔ nɔ̃ fɔŋ pɛ jɛɔ Yuda ŋaatsɔi lɛ amli kɛbaa lɛ?
7 Wɔŋjamɔ kɛ anɔkwa ní ayeee nyɛŋ ekɛ adesai ashihilɛ gbɛjianɔtoo kpakpa aba. Akɛni Yudafoi ní yeee anɔkwa lɛ kɛ amɛhe wo nifeemɔi ní tamɔ nɛkɛ mli hewɔ lɛ, amɛmiikpá haomɔ ní amɛ diɛŋtsɛ amɛdũ lɛ agbɛnɛ. Wɔkaneɔ akɛ: “Amɛfɛlɛɔ shikpãai awɔji, ni amɛlòɔ anaanu ntãŋ: mɔ ni yeɔ amɛwɔji lɛ, egboɔ, ni kɛ́ ajwa eko lɛ, shinɔ̃ jeɔ mli.” (Yesaia 59:5) Kɛjɛ shishijee aahu kɛyashi be mli ní aaatsu yiŋtoo lɛ he nii lɛ, nɔ̃ kpakpa ko kwraa jɛɛɛ Yuda ŋaatsɔi lɛ amli baaa. Amɛsusumɔi ní ejaaa lɛ kɛ efɔŋ pɛ baa, tamɔ bɔ ni shikpãa ní naa jaraa wɔlɔ fɛlɛɔ shikpãai ní naa jaraa pɛ lɛ. Ni maŋ lɛ naa amanehulu.
8. Mɛni jieɔ Yuda susumɔ ní egbá afã lɛ kpo faŋŋ?
8 Ekolɛ Yuda maŋbii lɛ ekomɛi baabɔi yiwalɛ nifeemɔi komɛi yɛ mɔdɛŋ ní amɛbɔɔ ní amɛbu amɛhe lɛ hewɔ, shi amɛyeŋ omanye. Hewalɛ ní akɛaafee nii yɛ ekãa naa lɛ nyɛŋ aye Yehowa mli hekɛnɔfɔɔ kɛ jalɛ nitsumɔi ní aaatsu lɛ najiaŋ ákɛ hebuu nɔ̃, tamɔ bɔ ni anaanu ntãŋi nyɛŋ aye mamai diɛŋtsɛ najiaŋ ákɛ hebuu nɔ̃ eshi kɔɔyɔŋ tsakemɔi ní naa wa lɛ. Yesaia jaje akɛ: “Amɛkpãai lɛ akɛlòŋ atade, ni amɛnitsumɔ nii ehiii ní mɔ ko kɛaahà ehe; amɛnitsumɔi, nishai anitsumɔi ni, ni niseniianiifeemɔ yɛ amɛdɛŋ. Amɛnaji sháa foi kɛyaa efɔŋfeemɔ [mli], ni amɛyeɔ oyai kɛ lá ní eye bem lɛ shishwiemɔ: amɛjwɛŋmɔi lɛ, nɔ̃ sha jwɛŋmɔi ni, fitemɔ kɛ hiɛkpatamɔ yɔɔ amɛtempɔŋi lɛ anɔ.” (Yesaia 59:6, 7) Yuda susumɔ egbá afã kwraa. Ekɛ yiwalɛ nifeemɔ ní ekɛkaa akɛ ekɛaatsu enaagbai lɛ ahe nii lɛ jieɔ Nyɔŋmɔ gbeyeishemɔ su ní ebɛ lɛ kpo faŋŋ. Ejeee ehe sane ko kwraa akɛ mɛi ní efeɔ amɛ efɔŋ lɛ ateŋ mɛi pii efeko efɔŋ ko, ni ákɛ amɛteŋ mɛi komɛi ji Nyɔŋmɔ tsuji anɔkwafoi diɛŋtsɛ.
9. Mɛni hewɔ Kristendom hiɛnyiɛlɔi lɛ anine shɛŋ anɔkwa toiŋjɔlɛ nɔ kɔkɔɔkɔ lɛ?
9 Wiemɔi ní jɛ mumɔŋ nɛɛ kaiɔ wɔ Kristendom láshishwiemɔ nibii ní aŋmala ashwie shi lɛ. Eka shi faŋŋ akɛ, Yehowa baaha ebu heguɔgbee diɛŋtsɛ ní ekɛba Kristojamɔ nɔ lɛ he akɔntaa! Taakɛ Yudafoi ní hi shi yɛ Yesaia gbii lɛ amli lɛ ji lɛ, Kristendom ekɔ jeŋba gbɛ ní efite diɛŋtsɛ ejaakɛ ehiɛnyiɛlɔi lɛ heɔ yeɔ akɛ no pɛ ji gbɛ diɛŋtsɛ ní anyɛɔ ahiɔ shi yɛ naa. Beni amɛmiiwie toiŋjɔlɛ he lɛ, belɛ amɛmiiye toikɔ̃dɔ̃mɔ sane. Mɛɛ osatofeemɔ diɛŋtsɛ nɛ! Akɛni Kristendom hiɛnyiɛlɔi lɛ kã he amɛkɛ ŋaa gbɛ nɛɛ miitsu nii lolo hewɔ lɛ, amɛnine shɛŋ anɔkwa toiŋjɔlɛ nɔ kɔkɔɔkɔ. Etamɔ bɔ ni gbalɛ lɛ yaa nɔ ekɛɔ lɛ pɛpɛɛpɛ, ákɛ: “Hejɔlɛ gbɛ lɛ amɛleee, ni jalɛsaneyeli bɛ amɛnyiɛmɔi amli, amɛkɔ̃dɔ̃ɔ amɛgbɛ̀i lɛ: mɔ fɛɛ mɔ ní nyiɛɔ nɔ lɛ eleee hejɔlɛ.”—Yesaia 59:8.
Gbɛdũu yɛ Mumɔŋ Duŋ Mli
10. Mɛɛ esha jajemɔ Yesaia fee yɛ Yuda najiaŋ?
10 Yehowa nyɛŋ ekɛ jɔɔmɔ aba Yuda gbɛ̀i fɔji ní yaa hiɛkpatamɔ mli lɛ nɔ. (Lala 11:5) No hewɔ lɛ beni Yesaia wieɔ yɛ maŋ muu lɛ fɛɛ najiaŋ lɛ, ejaje Yuda fɔ́yeli lɛ akɛ: “Kojomɔ kɛ wɔ teŋ jɛkɛ, ni jalɛ hu ninaaa wɔ lɛ; wɔkwɛɔ la gbɛ, ni naa, duŋ yɔɔ, kɛ kpɛmɔ hu, ni duŋ kpii mli wɔnyiɛɔ! Wɔgbugbuuɔ shi yɛ gbogbo he tamɔ shwilafoi, ni wɔgbugbuuɔ shi tamɔ mɛi ni bɛ hiŋmɛii; wɔtɛrɛɔ shwane fintii, tamɔ nɔ ni hiɛ ebu; wɔtamɔ gbohii yɛ hewalɔi ateŋ. Wɔ fɛɛ wɔhũuɔ tamɔ oshishibrishii, ni wɔyeɔ ŋkɔmɔ tamɔ okpoi.” (Yesaia 59:9-11a) Yudafoi lɛ haaa Nyɔŋmɔ Wiemɔ lɛ afee kane kɛha amɛnane kɛ la hu yɛ amɛtempɔŋ nɔ. (Lala 119:105) Enɛ hewɔ lɛ, amɛbɛ hiɛnɔkamɔ ko kɛha wɔsɛɛ. Shwane fintii po lɛ, amɛgbugbuuɔ shi tamɔ nɔ ni duŋ ewo. Amɛtamɔ mɛi ní egboi pɛpɛɛpɛ. Heyeli ní amɛshweɔ ní amɛná lɛ hewɔ lɛ, amɛhũuɔ waa tamɔ oshishibrishii ní hɔmɔ miiye amɛ loo apila amɛ. Mɛi komɛi kɛ awerɛhoyeli yeɔ ŋkɔmɔ, tamɔ okpoi ní he efee shoo.
11. Mɛni hewɔ Yuda hiɛnɔkamɔ kɛha jalɛsaneyeli kɛ yiwalaheremɔ lɛ ji efolo lɛ?
11 Yesaia le jogbaŋŋ akɛ yiŋtoo hewɔ ní Yuda naa amanehulu lɛ ji atua ní etse eshi Nyɔŋmɔ lɛ. Ekɛɛ akɛ: “Wɔkwɛɔ kojomɔ gbɛ, ni ebaaa, kɛ yiwalaheremɔ hu, shi ekɛ wɔ teŋ jɛkɛ. Ejaakɛ wɔnɔtɔ̃mɔi lɛ fá tsɔ yɛ ohiɛ, ni wɔhe eshai lɛ yeɔ odase shiɔ wɔ; ejaakɛ wɔnɔtɔ̃mɔi lɛ jwere wɔhiɛ, ni wɔnishaianii lɛ hu wɔle: Wɔtɔ̃ Yehowa nɔ ni wɔkwa lɛ, ni wɔkpale yɛ wɔ-Nyɔŋmɔ lɛ sɛɛ; yiwalɛ kɛ atuatsemɔ wiemɔi wɔwieɔ, wɔná amale mũsũ yɛ wɔtsuiiaŋ ni wɔjie lɛ kpo.” (Yesaia 59:11b-13) Akɛni Yuda maŋbii lɛ tsakeko amɛtsuii hewɔ lɛ, akɛ amɛhe eshai lɛ ekeko amɛ. Jalɛsaneyeli bɛ shikpɔŋ lɛ nɔ ejaakɛ gbɔmɛi lɛ eshi Yehowa. Amɛjie amɛhe kpo akɛ amɛyeee anɔkwa yɛ gbɛ ko kwraa nɔ, ni amɛnyɛɔ amɛnyɛmimɛi lɛ anɔ po. Kwɛ bɔ ni amɛtamɔ mɛi ní yɔɔ Kristendom ŋmɛnɛ lɛ pɛpɛɛpɛ! Jeee amɛhiɛ kɛkɛ amɛkuɔ amɛshwieɔ jalɛsaneyeli nɔ, shi moŋ amɛjeɔ gbɛ amɛwaa Yehowa Odasefoi anɔkwafoi, ní bɔɔ mɔdɛŋ akɛ amɛaafee Nyɔŋmɔ suɔmɔnaa nii lɛ ayi hu.
Yehowa Tsu Kojomɔ He Nii
12. Mɛni ji mɛi ní gbɛnaa nii kã amɛnɔ akɛ amɛtsu jalɛsaneyeli he nii yɛ Yuda lɛ asubaŋ?
12 Etamɔ nɔ ni jalɛsaneyeli, jalɛ nifeemɔ, kɛ anɔkwale kome folo po bɛ Yuda. “Akpale kojomɔ kɛtee, ni jalɛ hu eyadamɔ sɛɛ fɛlɛŋŋ; ejaakɛ anɔkwale egbee shi yɛ blohu lɛŋ, ni nɔ ni ja nyɛɛɛ mli abote.” (Yesaia 59:14) Ayɛ blohui yɛ maŋtiase lɛ agbói lɛ asɛɛ yɛ Yuda, he ni onukpai lɛ taraa ní amɛtsuɔ mla naa saji ahe nii yɛ lɛ. (Rut 4:1, 2, 11) Esa akɛ hii nɛɛ akojo yɛ jalɛ naa ní amɛdi jalɛsaneyeli sɛɛ, ní amɛkahe nyɔɔŋnii. (5 Mose 16:18-20) Yɛ no najiaŋ lɛ, amɛkojoɔ yɛ amɛ diɛŋtsɛ amɛ pɛsɛmkunya susumɔi anaa. Nɔ ni ehiii fe fɛɛ ji akɛ, amɛbuɔ mɔ fɛɛ mɔ ní kɛ anɔkwayeli bɔɔ mɔdɛŋ ní efee ekpakpa lɛ akɛ amɛhaanii ní mɔmɔ waaa. Wɔkaneɔ akɛ: “Anɔkwale elaaje, ni mɔ ni tsiɔ ehe kɛjɛɔ efɔŋ he lɛ, ahàa lɛ.”—Yesaia 59:15a.
13. Akɛni Yuda kojolɔi lɛ ekpoo amɛnitsumɔ lɛ kwraa hewɔ lɛ, mɛni Yehowa baafee?
13 Mɛi ní ewieee amɛshiii jeŋba mli fitemɔ lɛ ahiɛ ekpa nɔ akɛ Nyɔŋmɔ eshwilako, ni jeee akɛ eleee nɔ ni yaa nɔ lɛ, loo ebɛ hewalɛ. Yesaia ŋma akɛ: “Yehowa na, ni esaaa ehiɛ akɛ kojomɔ bɛ lɛ. Ni ena akɛ nuu ko nuu ko bɛ, ni enaa kpɛ ehe akɛ mlidamɔlɔ ko bɛ lɛ: hewɔ lɛ ekɛ lɛ diɛŋtsɛ enine here eyiwala, ni ejalɛ lɛ ye bua lɛ.” (Yesaia 59:15b, 16) Akɛni kojolɔi ní ahala amɛ lɛ ekpoo amɛnitsumɔ lɛ kwraa hewɔ lɛ, Yehowa kɛ ehe baawo sane lɛ mli. Kɛ́ efee nakai lɛ, ebaafee nii yɛ jalɛ naa kɛ hewalɛ hu.
14. (a) Mɛɛ su mɛi pii yɔɔ ŋmɛnɛ? (b) Yehowa miisaa ehe kɛha nifeemɔ ko yɛ mɛɛ gbɛ nɔ?
14 Shihilɛ ní tamɔ nakai yɛ ŋmɛnɛ. Mɛi pii yɛ ní “nɔ ko nɔ ko efeee amɛ hiɛgbele dɔŋŋ” yɛ jeŋ ní wɔyɔɔ mli nɛɛ mli. (Efesobii 4:19) Mɛi fioo pɛ heɔ yeɔ akɛ be ko baashɛ ní Yehowa kɛ ehe baawo mli ní ekɛjie efɔŋfeemɔ kɛjɛ shikpɔŋ lɛ nɔ kwraa. Shi Yesaia gbalɛ lɛ tsɔɔ akɛ Yehowa kwɛɔ adesai anifeemɔi jogbaŋŋ diɛŋtsɛ. Ekojoɔ nibii ní yaa nɔ lɛ, ni etsuɔ nakai kojomɔi lɛ ahe nii, yɛ lɛ diɛŋtsɛ ebe ní eto mli. Ani ekojomɔi lɛ ja? Yesaia tsɔɔ akɛ amɛja. Eŋma yɛ Yuda maŋ lɛ gbɛfaŋ akɛ: “Ni [Yehowa wo] jalɛ ákɛ dama, ni ebu yiwalaheremɔ dadefai yɛ eyitso, ni ewo oweletɔɔ atade ákɛ hehàa nɔ̃, ni ehà hiɛdɔɔ ákɛ mama.” (Yesaia 59:17) Gbalɛ wiemɔi nɛɛ feɔ Yehowa he mfoniri ákɛ tabilɔ ní miiwula ehe kɛha ta. Nɔ ni eto eyiŋ akɛ ebaafee ji egbɛ lɛ yiwalaheremɔ. Eyɛ nɔmimaa yɛ lɛ diɛŋtsɛ ejalɛ nifeemɔ ní eye emuu ní anyɛɛɛ ate shi ashi lɛ he. Ni ekɛ ekãa ní gbeyeishemɔ bɛ mli baatsu nii yɛ ekojomɔ nifeemɔi lɛ amli. Ŋwanejee ko bɛ he akɛ jalɛ nifeemɔ baaye kunim.
15. (a) Te anɔkwa Kristofoi baafee amɛnii amɛha tɛŋŋ beni Yehowa tsuɔ kojomɔ he nii lɛ? (b) Mɛni abaanyɛ awie yɛ Yehowa kojomɔi lɛ ahe?
15 Ŋmɛnɛ, anɔkwale lɛ henyɛlɔi komɛi bɔɔ mɔdɛŋ akɛ amɛaatsĩ Yehowa tsuji anitsumɔ naa yɛ shikpɔji komɛi anɔ kɛtsɔ amale kɛ heguɔgbee kɛ lakamɔ wiemɔi ní amɛgbɛɔ amɛshwãa lɛ nɔ. Anɔkwa Kristofoi shashaooo shi akɛ amɛaafã anɔkwale lɛ he, shi amɛtaooo akɛ amɛaatɔ amɛhe owele. (Romabii 12:19) Kɛ́ Yehowa ha Kristendom hemɔkɛyeli kwalɔ lɛ bu ehe akɔntaa eha lɛ po lɛ, ejálɔi ní yɔɔ shikpɔŋ nɔ lɛ náŋ ehiɛkpatamɔ lɛ mli gbɛfaŋnɔ ko. Amɛle akɛ Yehowa eto akɛ lɛ diɛŋtsɛ ebaatɔ ehe owele, ni ákɛ, kɛ́ be lɛ shɛ lɛ, ebaatsu he nii yɛ gbɛ ní sa nɔ. Gbalɛ lɛ maa nɔ mi ehaa wɔ akɛ: “Bɔ ni amɛfee lɛ, nakai pɛ ebaafee eto najiaŋ: emli aaawo la awo mɛi ní kɛ lɛ ená lɛ, eeewo ehenyɛlɔi lɛ anyɔmɔ; ŋshɔkpɔi lɛ, eeewo amɛ nyɔmɔ eto najiaŋ.” (Yesaia 59:18) Taakɛ eji yɛ Yesaia gbii lɛ amli lɛ, jeee akɛ Nyɔŋmɔ kojomɔi lɛ baafee jalɛ nɔ̃ kɛkɛ, shi moŋ amɛbaaye emuu kɛmɔ shi hu. Amɛbaashɛ “ŋshɔkpɔi” lɛ anɔ, yɛ hei ní yɔɔ shɔŋŋ lɛ po. Mɔ ko mɔ ko bɛ ni aaahi shɔŋŋ loo eeetsi ehe banee bɔ ni Yehowa kojomɔ nifeemɔi lɛ nyɛŋ asa ehe.
16. Namɛi baaje Yehowa kojomɔ nifeemɔi lɛ amli lɛ, ni mɛni amɛbaakase kɛjɛ amɛyiwalaheremɔ lɛ mli?
16 Yehowa kojoɔ mɛi ní miaa amɛhiɛ akɛ amɛaafee jalɛ nii lɛ yɛ jalɛ naa. Yesaia egba efɔ̃ shi akɛ gbɔmɛi ní tamɔ nɛkɛ lɛ ayi baaná wala—kɛjɛ shikpɔŋ lɛ naagbeehe kome kɛyashi naagbeehe kroko lɛ—yɛ shikpɔŋ lɛ nɔ fɛɛ. Ni Yehowa dɛŋ hebuu ní amɛbaaná mli niiashikpamɔ lɛ baaha woo kɛ bulɛ ní amɛyɔɔ kɛha lɛ lɛ mli awa waa diɛŋtsɛ. (Maleaki 1:11) Wɔkaneɔ akɛ: “Aaashe Yehowa gbɛi lɛ gbeyei yɛ hulushinyɔɔhe, kɛ enunyam lɛ hu yɛ hulushiteehe; ejaakɛ eeeba tamɔ faa ní atsĩ naa, shi Yehowa mumɔ ní emuɔ lɛ etsi eyisɛɛ.” (Yesaia 59:19) Yehowa mumɔ lɛ baabɛɛ gbɛtsii nii fɛɛ ní tsĩɔ esuɔmɔnaa nii amlibaa naa lɛ kɛya kwraa tamɔ ahum ní naa wa waa, ní miitsi nu ní ma shi tamɔ gbogbo kɛmiiya, ní eeloo nɔ fɛɛ nɔ ní yɔɔ egbɛ nɔ kɛmiiya lɛ. Emumɔ lɛ yɛ hewalɛ kwraa fe hewalɛ fɛɛ hewalɛ ní adesai yɔɔ. Kɛ́ ekɛtsu nii ní ekɛ kojomɔ ba adesai kɛ jeŋmaji lɛ anɔ lɛ, ebaaye omanye kwraa kɛmɔ shi.
Hiɛnɔkamɔ kɛ Jɔɔmɔ Kɛha Mɛi ní Etsake Amɛtsui Lɛ
17. Namɔ ji Zion Kpɔlɔ lɛ, ni mɛɛ be ekpɔ̃ Zion?
17 Yɛ Mose Mla lɛ shishi lɛ, kpɔlɔ baanyɛ eyahe Israelnyo ní ehɔ̃ɔ lɛ diɛŋtsɛ ehe ewo nyɔŋyeli mli lɛ kɛjɛ nakai nyɔŋyeli lɛ mli. Awie Yehowa he kɛtsɔ hiɛ yɛ Yesaia gbalɛ wolo lɛ mli akɛ aŋkroaŋkroi ní etsake amɛtsui lɛ a-Kpɔlɔ. (Yesaia 48:17) Amrɔ nɛɛ aawie ehe ekoŋŋ akɛ mɛi ní etsake amɛtsui lɛ a-Kpɔlɔ. Yesaia ŋma Yehowa shiwoo nɛɛ akɛ: “Eeeba akɛ kpɔlɔ eha Zion kɛ mɛi ní ekpale kɛjɛ nɔtɔ̃mɔ he yɛ Yakob mli lɛ, Yehowa kɛɛ.” (Yesaia 59:20) Nɛkɛ shiwoo ní nɔmimaa yɔɔ he nɛɛ ba mli yɛ afi 537 D.Ŋ.B. Shi eyɛ mlibaa kroko hu. Bɔfo Paulo tsɛ́ wiemɔi nɛɛ asɛɛ kɛjɛ Septuagint shishitsɔɔmɔ lɛ mli ni ekɛto Kristofoi ahe. Eŋma akɛ: “No dani aaahere Israel fɛɛ yiwala, taakɛ bɔ ni aŋma lɛ akɛ: ‘Jielɔ lɛ aaajɛ Zion aba ni eeebajie Yakob he nɔ̃ sha feemɔ lɛ eshɛ́ efɔ̃; ni enɛ ji mikɛ amɛ teŋ kpaŋmɔ lɛ, akɛ majie amɛhe eshai lɛ kɛaatee.’” (Romabii 11:26, 27) Yɛ anɔkwale mli lɛ, Yesaia gbalɛ lɛ yɛ emlibaa ní mli lɛɛ waa diɛŋtsɛ—nɔ ni mli kpãa aahu kɛbashɛɔ wɔbe nɛɛ mli kɛtekeɔ nɔ po. Yɛ mɛɛ gbɛ nɔ?
18. Mɛɛ be, ni mɛɛ gbɛ nɔ Yehowa tsɔ eha “Nyɔŋmɔ Israel lɛ” ba shihilɛ mli?
18 Yɛ klɛŋklɛŋ afii oha lɛ mli lɛ, Israel maŋ lɛ mli shwɛɛnii fioo ko kpɛlɛ Yesu nɔ ákɛ Mesia lɛ. (Romabii 9:27; 11:5) Yɛ Pentekoste gbi lɛ nɔ, yɛ afi 33 Ŋ.B. lɛ, Yehowa fɔse emumɔ krɔŋkrɔŋ lɛ eshwie nakai heyelilɔi lɛ ateŋ mɛi aaafee 120 nɔ ni ekɛ amɛ ba ekpaŋmɔ hee lɛ ní Yesu Kristo ji teŋdamɔlɔ lɛ mli. (Yeremia 31:31-33; Hebribii 9:15) Yɛ nakai gbi lɛ nɔ lɛ, “Nyɔŋmɔ Israel lɛ,” ni ji maŋ hee ní jeee Abraham heloonaa seshinyo ní mɔ ko ji lɛ akɛkadiɔ emli bii lɛ, shi moŋ kɛtsɔ fɔmɔ ní akɛ Nyɔŋmɔ mumɔ lɛ efɔ́ amɛ lɛ nɔ lɛ, ba shihilɛ mli. (Galatabii 6:16) Aje shishi kɛjɛ Kornelio nɔ, ni Jeŋmajiaŋbii foolɔi lɛ bafata nakai maŋ lɛ mli bii lɛ ahe. (Bɔfoi lɛ Asaji 10:24-48; Kpojiemɔ 5:9, 10) Enɛ hewɔ lɛ Yehowa Nyɔŋmɔ kpɛlɛ amɛnɔ, ni amɛbatsɔmɔ emumɔŋ bii, ni ji Yesu nanemɛi niyelɔi.—Romabii 8:16, 17.
19. Mɛɛ kpaŋmɔ Yehowa kɛ Nyɔŋmɔ Israel fee?
19 Yehowa kɛ Nyɔŋmɔ Israel lɛ fee kpaŋmɔ ko agbɛnɛ. Wɔkaneɔ akɛ: “Mi lɛ, enɛ ji mikɛ amɛ kpaŋmɔ lɛ, Yehowa kɛɛ: Mimumɔ ní yɔɔ onɔ lɛ, kɛ miwiemɔi lɛ ní mikɛwo onaa lɛ, ejeŋ odaaŋ kɛ oseshibii adaaŋ kɛ oseshibii aseshibii adaaŋ, Yehowa kɛɛ, kɛjɛ be nɛ mli kɛyashi naanɔ!” (Yesaia 59:21) Kɛji wiemɔi nɛɛ ba mli yɛ Yesaia diɛŋtsɛ nɔ jio, ebaaa mli jio, eka shi faŋŋ akɛ amɛba mli yɛ Yesu, mɔ ni ama nɔ mi aha lɛ akɛ ‘ebaana eseshibii’ lɛ gbɛfaŋ. (Yesaia 53:10) Yesu wie wiemɔi ní ekase kɛjɛ Yehowa ŋɔɔ lɛ, ni Yehowa mumɔ lɛ hi enɔ. (Yohane 1:18; 7:16) Eja gbɛ jogbaŋŋ akɛ enyɛmimɛi kɛ nanemɛi niyelɔi, ni ji Nyɔŋmɔ Israel lɛ mli bii lɛ hu náa Yehowa mumɔ krɔŋkrɔŋ lɛ eko, ni amɛshiɛɔ shɛɛ sane ní amɛkase kɛjɛ amɛ ŋwɛi Tsɛ lɛ ŋɔɔ lɛ. Amɛ fɛɛ amɛji “Yehowa kaselɔi.” (Yesaia 54:13; Luka 12:12; Bɔfoi lɛ Asaji 2:38) Kɛji Yehowa kɛtsɔ Yesaia loo Yesu, mɔ ni Yesaia fee ehe mfoniri yɛ gbalɛ mli lɛ nɔ jio lɛ, Yehowa kɛ kpaŋmɔ wo shi agbɛnɛ akɛ ekɛ maŋ kroko etoŋ amɛnajiaŋ kɔkɔɔkɔ, shi moŋ ekɛ amɛ baatsu nii akɛ edasefoi kɛya naanɔ. (Yesaia 43:10) Shi, namɛi ji ‘amɛseshibii’ ní amɛ hu amɛnáa kpaŋmɔ nɛɛ he sɛɛ lɛ?
20. Yehowa shiwoo ní ekɛha Abraham lɛ ba mli yɛ klɛŋklɛŋ afii oha lɛ mli yɛ mɛɛ gbɛ nɔ?
20 Yɛ blema beaŋ lɛ, Yehowa wo Abraham shi akɛ: “Oseshi lɛ mli aaajɛ ajɔɔ shikpɔŋ lɛ nɔ jeŋmaji fɛɛ.” (1 Mose 22:18) Yɛ enɛ kɛ gbeekpamɔ naa lɛ, heloonaa Israelbii lɛ ateŋ shwɛɛnii fioo ní kpɛlɛ Mesia lɛ nɔ lɛ je kpo kɛtee jeŋmaji pii amli, ni amɛyashiɛ Kristo he sanekpakpa lɛ. Aje shishi kɛjɛ Kornelio nɔ, ni Jeŋmajiaŋbii foolɔi pii ‘ná jɔɔmɔi amɛha amɛhe’ kɛtsɔ Yesu, ni ji Abraham Seshi lɛ nɔ. Amɛbatsɔmɔ Nyɔŋmɔ Israel lɛ fã kɛ Abraham seshi lɛ fã ni ji enyɔ. Amɛji Yehowa “jeŋmaŋ krɔŋkrɔŋ,” ní aha amɛ nitsumɔ akɛ ‘amɛjaje mɔ ni tsɛ́ amɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ’ amɛtsɔɔ lɛ fã.—1 Petro 2:9; Galatabii 3:7-9, 14, 26-29.
21. (a) Mɛɛ ‘seshibii’ Nyɔŋmɔ Israel lɛ ená yɛ ŋmɛnɛŋmɛnɛ beaŋ? (b) Kpaŋmɔ, loo yelikɛfuamɔ ní Yehowa kɛ Nyɔŋmɔ Israel lɛ efee lɛ shɛjeɔ ‘seshibii’ lɛ amii yɛ mɛɛ gbɛ nɔ?
21 Ŋmɛnɛ, etamɔ nɔ ni abua Nyɔŋmɔ Israel lɛ yibɔ muu lɛ fɛɛ naa. Shi kɛlɛ, jeŋmaji lɛ miiya nɔ amɛmiiná jɔɔmɔi lolo—yɛ gbɛ ní da hu nɔ. Yɛ mɛɛ gbɛ nɔ? Kɛ shishinumɔ akɛ Nyɔŋmɔ Israel lɛ ená ‘seshibii,’ ni ji Yesu kaselɔi ní amɛhiɛnɔkamɔ ji naanɔ wala yɛ paradeiso shikpɔŋ nɔ lɛ. (Lala 37:11, 29) Yehowa miitsɔɔ nɛkɛ ‘seshibii’ nɛɛ hu anii, ni eetsɔɔ amɛ egbɛ̀i lɛ. (Yesaia 2:2-4) Eyɛ mli akɛ akɛ mumɔ krɔŋkrɔŋ ebaptisiko amɛ, loo aŋɔɔɔ amɛ akɛ amɛfata kpaŋmɔ hee lɛ mli bii lɛ ahe moŋ, shi kɛlɛ Yehowa mumɔ lɛ wajeɔ amɛ ni amɛyeɔ gbɛtsii nii fɛɛ ní Satan kɛbaa koni ekɛtsĩ amɛshiɛmɔ nitsumɔ lɛ naa lɛ anɔ kunim. (Yesaia 40:28-31) Amrɔ nɛɛ, amɛyifalɛ shɛɔ akpekpei abɔ, ni amɛmiiya nɔ amɛmiishwere lolo beni amɛyaa nɔ amɛnáa amɛ diɛŋtsɛ amɛseshibii lɛ. Yehowa kpaŋmɔ, loo yelikɛfuamɔ ní ekɛ mɛi ní afɔ amɛ mu lɛ efee lɛ haa nɛkɛ ‘seshibii’ nɛɛ náa hekɛnɔfɔɔ akɛ Yehowa baaya nɔ ekɛ amɛ hu atsu nii akɛ enaawielɔi kɛya naanɔ.—Kpojiemɔ 21:3, 4, 7.
22. Mɛɛ hekɛnɔfɔɔ wɔbaanyɛ wɔná yɛ Yehowa mli, ni te esa akɛ enɛ asa wɔhe eha tɛŋŋ?
22 Belɛ, eba akɛ wɔ fɛɛ wɔɔhiɛ Yehowa mli hemɔkɛyeli ní wɔyɔɔ lɛ mli daa. Eesumɔ, ni ebaanyɛ ehere wɔyiwala hu! Enine efoŋ kuku kɔkɔɔkɔ; ebaahere ewebii anɔkwafoi lɛ ayiwala be fɛɛ be. Mɛi fɛɛ ní kɛ amɛhiɛ fɔ̃ɔ enɔ lɛ baaya nɔ amɛkɛ amɛnaabu aye enitsumɔi kpakpai lɛ ahe odase “kɛjɛ be nɛ mli kɛyashi naanɔ!”
[Akrabatsa ni yɔɔ baafa 294]
Yerusalem Hemɔkɛyeli Kwalɔ Lɛ—Kristendom Henɔ Pɛpɛɛpɛ
Yerusalem, ni ji Nyɔŋmɔ maŋ ní ehala lɛ maŋtiase lɛ, feɔ Nyɔŋmɔ ŋwɛi gbɛjianɔtoo ni ji mumɔŋ bɔɔ nii, kɛ Kristofoi ní afɔ amɛ mu lɛ akuu ní atée amɛ shi kɛtee ŋwɛi ákɛ Kristo ayemforo lɛ hu ahe mfoniri. (Galatabii 4:25, 26; Kpojiemɔ 21:2) Shi bei pii lɛ, Yerusalem maŋ lɛ mli bii lɛ yeee Yehowa anɔkwa, ni awieɔ maŋtiase lɛ he akɛ yoo ajwamaŋ kɛ gbalafitelɔ. (Ezekiel 16:3, 15, 30-42) Yɛ nakai shihilɛ lɛ mli lɛ, Yerusalem bafee Kristendom hemɔkɛyeli kwalɔ lɛ henɔ ní tamɔ lɛ pɛpɛɛpɛ.
Yesu tsɛ́ Yerusalem akɛ “bo mɔ ni ogbeɔ gbalɔi lɛ ní otswiaa mɛi ní atsuɔ amɛ oŋɔɔ lɛ atɛi.” (Luka 13:34; Mateo 16:21) Taakɛ Yerusalem ní yeee anɔkwa lɛ ji lɛ, Kristendom kɛɔ akɛ esɔmɔɔ anɔkwa Nyɔŋmɔ lɛ, shi egbá afã kwraa kɛjɛ ejalɛ gbɛ̀i lɛ ahe. Wɔbaanyɛ wɔná hekɛnɔfɔɔ akɛ Yehowa baakojo Kristendom yɛ ejalɛ shishitoo mlai ní ekɛkojo Yerusalem, hemɔkɛyeli kwalɔ lɛ nɔŋŋ naa.
[Mfoniri ni yɔɔ baafa 296]
Esa akɛ kojolɔ akojo yɛ jalɛ naa, ní etao jalɛsaneyeli sɛɛgbɛ, ní ekahe nyɔɔŋnii
[Mfoniri ni yɔɔ baafa 298]
Yehowa kojomɔi lɛ baabɛɛ gbɛtsii nii ní tsĩɔ esuɔmɔnaa nifeemɔ naa lɛ fɛɛ kɛya tamɔ bɔ ni faa ní eyi kɛteke nɔ looɔ nii kɛyaa lɛ
[Mfoniri ni yɔɔ baafa 302]
Yehowa kɛ kpaŋmɔ ewo shi akɛ hegbɛ ní ewebii ená akɛ amɛaafee edasefoi lɛ ejeŋ amɛdɛŋ kɔkɔɔkɔ