Yitso 104

Anu Nyɔŋmɔ Gbee Nɔ ni ji Shii Etɛ Nɔ

BENI Yesu yɔɔ sɔlemɔ we lɛ, no mli lɛ ewerɛ ho ehe yɛ gbele ni etsɛŋ ni ekɛbaakpe lɛ hewɔ. Nɔ ni he hiaa lɛ fe fɛɛ ji bɔ ni enɛ aaasa e-Tsɛ gbɛi lɛ he aha, no hewɔ lɛ esɔle akɛ: “Ataa, wo ogbɛi lɛ hiɛ nyam.”

Kɛkɛ ni anu gbee wulu ko kɛjɛ ŋwɛi miijaje akɛ: “Mina miwo ehiɛ nyam, ni masaa mawo ehiɛ nyam ekoŋŋ.”

Ni gbɔmɛi babaoo ni damɔ jɛmɛ lɛ hiɛ fee amɛ yaa. Amɛteŋ mɛi komɛi bɔi kɛɛmɔ akɛ: “Ŋwɛibɔfo ko kɛ lɛ ewie.” Mɛi krokomɛi hu kɛɛ akɛ nugbɔ eshi. Shi yɛ anɔkwale mli lɛ, Yehowa Nyɔŋmɔ ji mɔ ni wie lɛ! Shi kɛlɛ, jeee enɛ ji klɛŋklɛŋ ni anuɔ Nyɔŋmɔ gbee yɛ nɔ ni kɔɔ Yesu he lɛ mli.

Beni abaptisi Yesu, afii etɛ kɛ fa ni etsɔ hiɛ lɛ, Yohane Baptisilɔ lɛ nu ni Nyɔŋmɔ wie yɛ Yesu he akɛ: “Mɔ nɛ ji misuɔmɔ Bi ni minà ehe tsui lɛ.” Kɛkɛ ni yɛ be mli beni aye afi ni tsɔ hiɛ lɛ Hehoo lɛ sɛɛ, beni atsake Yesu yɛ Yakobo, Yohane kɛ Petro hiɛ lɛ, amɛnu ni Nyɔŋmɔ jaje akɛ: “Mɔ nɛ ji misuɔmɔ Bi ni minaa ehe tsui lɛ; nyɛboa lɛ toi.” Ni agbɛnɛ, adesai nu Nyɔŋmɔ gbee ekoŋŋ, nɔ ni ji shii etɛ nɔ, yɛ Nisan 10, beni eshwɛ gbii ejwɛ dani Yesu baagbo lɛ. Shi yɛ enɛ mli lɛ, Yehowa wie koni mɛi babaoo lɛ anyɛ anu!

Yesu tsɔɔ mli akɛ: “Jeee mihewɔ gbee nɛɛ ba, shi nyɛ moŋ nyɛhewɔŋ.” Ekɛ odaseyeli haa akɛ Yesu ji Nyɔŋmɔ Bi lɛ lɛlɛŋ, Mesia ni awo shi yɛ ehe lɛ. Yesu tee nɔ akɛ: “Agbɛnɛ je nɛŋ kojomɔ lɛ eshɛ; kpaako abaafã je nɛŋ lumɔ lɛ ashɛ afɔ.” Eyɛ faŋŋ akɛ, Yesu anɔkwayeli shihilɛ gbɛ lɛ maa nɔ mi akɛ, esa akɛ “ashɛ” Satan Abonsam, ni ji je nɛŋ lumɔ lɛ “afɔ,” ni akpata ehiɛ.

Beni Yesu wieɔ nɔ ni baajɛ egbele ni bɛŋkɛɔ lɛ mli aba lɛ he lɛ, ekɛɛ: “Ni mi lɛ, kɛji awo minɔ kɛjɛ shikpɔŋ lɛ nɔ lɛ, magbala mɛi fɛɛ kɛaaba miŋɔɔ.” Egbele lɛ etsɔɔɔ enɔ kunim ni aye yɛ gbɛ ko gbɛ ko nɔ, ejaakɛ kɛtsɔ no nɔ lɛ, ebaagbala mɛi krokomɛi kɛba emasɛi koni amɛbana naanɔ wala mli ŋɔɔmɔ.

Shi asafoi lɛ here nɔ ni amɛkɛɛ: “Wɔ lɛ wɔnu yɛ Mla lɛ mli akɛ Kristo lɛ hiɔ shi kɛyaa naanɔ; ni te tɛŋŋ ni bo lɛ okɛɔ akɛ: Ja awo gbɔmɔ Bi lɛ nɔŋ? Namɔ ji nɛkɛ gbɔmɔ Bi nɛɛ?”

Yɛ odaseyelii, ni Nyɔŋmɔ diɛŋtsɛ gbee ni amɛnu lɛ fata he lɛ fɛɛ sɛɛ lɛ, mɛi pii heee yeee akɛ Yesu ji anɔkwa gbɔmɔ Bi lɛ, Mesia ni awo shi yɛ ehe lɛ. Shi kɛlɛ, Yesu wie lɛ diɛŋtsɛ ehe akɛ “la lɛ,” taakɛ efee yɛ nyɔji ekpaa ni eho lɛ mli yɛ Asesei Agbijurɔ lɛ shishi lɛ, ni ewo etoibolɔi lɛ hewalɛ akɛ: “Gbii abɔ ni nyɛyɔɔ la lɛ nɛɛ, nyɛhea la lɛ nɔ nyɛyea, koni nyɛtsɔmɔ la bii.” Ni Yesu wie wiemɔi nɛɛ egbe naa lɛ, eshi jɛmɛ ni eyatee ehe, eka shi faŋŋ akɛ ejaakɛ ewalɛ yɛ oshara mli.

Hemɔkɛyeli ni Yudafoi lɛ ejieee kpo yɛ Yesu mli lɛ ha Yesaia gbalɛ ni kɔɔ ‘gbɔmɛi lɛ ahiŋmɛii ni eshwila kɛ amɛtsuii hu ni ekpilim koni amɛkakpale kɛba ni atsa amɛ’ lɛ he lɛ ba mli. Yesaia na Yehowa ŋwɛi gwabɔɔ lɛ yɛ ninaa mli, kɛ Yesu hu ni efata Yehowa he, yɛ anunyam ni eyɔɔ mli dani ebatsɔ adesa lɛ mli. Shi kɛlɛ, Yudafoi lɛ kɛ tsuiwalɛ kpoo odaseyeli nɛɛ akɛ Mɔ nɛ ji Kpɔlɔ ni awo shi yɛ ehe lɛ, ni amɛkɛwo nɔ ni Yesaia ŋma efɔ shi lɛ obɔ.

Shi yɛ gbɛ kroko nɔ lɛ, mɛi pii, ni nɔyelɔi (eka shi faŋŋ akɛ Yudafoi asaneyeli he wulu, Sanhedrin lɛ mlibii) po fata he lɛ na hemɔkɛyeli diɛŋtsɛ yɛ Yesu mli. Nɔyelɔi nɛɛ ateŋ mɛi enyɔ ji Nikodemo kɛ Yosef ni jɛ Arimatia lɛ. Shi kɛ hooo lɛ, nɔyelɔi nɛɛ ejieee amɛhemɔkɛyeli kpo yɛ nɛkɛ be nɛɛ mli, ejaakɛ amɛmiishe gbeyei akɛ abaashwie amɛ kɛjɛ amɛgbɛhei lɛ yɛ kpeehe lɛ. Kwɛ bɔ ni gbɔmɛi ni tamɔ nɛkɛ lɛ anine nyɛɔ shi haa!

Yesu tee nɔ ni etsɔɔ mli akɛ: “Mɔ ni heɔ minɔ eyeɔ lɛ, jeee mi minɔ eheɔ eyeɔ lɛ, shi moŋ mɔ ni tsu mi lɛ; ni mɔ ni naa mi lɛ naa mɔ ni tsu mi lɛ. . . . Ni kɛji mɔ ko nu miwiemɔi lɛ ni eyeee nɔ lɛ, mi lɛ mikojooo lɛ; ejaakɛ mibaaa koni mibakojo je lɛ, shi moŋ miba koni mibahere je lɛ yiwala. . . . Wiemɔ ni miwie lɛ, no nɔŋŋ aaakojo lɛ yɛ naagbee gbi lɛ nɔ.”

Suɔmɔ ni Yehowa yɔɔ kɛha adesai aje lɛ tsirɛ lɛ koni etsu Yesu bɔni afee ni ahere mɛi ni baana hemɔkɛyeli yɛ emli lɛ ayiwala. Nɔ ni baatsɔɔ akɛ abaahere gbɔmɛi lɛ ayiwala lɛ damɔ toiboo ni amɛaafee amɛha nibii ni Nyɔŋmɔ efa Yesu ni ewie lɛ nɔ. Kojomɔ lɛ baaba mli yɛ “naagbee gbi lɛ nɔ,” yɛ Kristo Afii Akpe Nɔyeli lɛ mli.

Yesu mu naa ni ekɛɛ: “Ejaakɛ mi lɛ mitooo mi diɛŋtsɛ miyiŋ miwieee; shi Tsɛ ni tsu mi lɛ, lɛ moŋ ewo mi kita, nɔ ni mikɛɛ kɛ nɔ ni miwie. Ni mile akɛ ekita lɛ naanɔ wala ni; no hewɔ lɛ nɔ fɛɛ nɔ ni miwieɔ lɛ, bɔ ni Tsɛ lɛ ekɛɛ mi lɛ, nakai miwieɔ.” Yohane 12:28-50; 19:38, 39; Mateo 3:17; 17:5; Yesaia 6:1, 8-10.

▪ Mɛɛ bei sɔrɔtoi etɛ mli anu Nyɔŋmɔ gbee yɛ nibii ni kɔɔ Yesu he lɛ amli?

▪ Te gbalɔ Yesaia na Yesu anunyam lɛ eha tɛŋŋ?

▪ Namɛi ji nɔyelɔi ni na hemɔkɛyeli yɛ Yesu mli lɛ, shi mɛni hewɔ ni amɛjieee enɛ kpo yɛ faŋŋ mli amɛtsɔɔɔ lɛ?

▪ Mɛni ji “naagbee gbi lɛ,” ni mɛni nɔ abaadamɔ ni akojo gbɔmɛi yɛ nakai be lɛ mli?