Ani Obaakɛɛ Akɛ, “Naa Mi, Tsu Mi”?
“Nuŋtsɔ lɛ . . . kɛɛ: Namɔ matsu? Ni namɔ aaatee ahawɔ? Ni mikɛɛ: Naa mi tsu mi!”—YESAIA 6:8.
1, 2. Mɛni ha gbalashihilɛ mli hefatalɔi komɛi na miishɛɛ krɛdɛɛ ko lɛ?
“WƆKƐ wɔwolo ni tsɔɔ akɛ wɔkpɛlɛ tsɛmɔ akɛ wɔya Colombia lɛ nɔ lɛ miijaje kɛ miishɛɛ. Wɔna miishɛɛ yɛ sɔɔmɔ hegbɛ ni wɔna mli ŋɔɔmɔ yɛ Ecuador lɛ babaoo fe bɔ ni nɛkɛ woloŋmaa tsɔne nɛɛ baanyɛ atsɔɔ mli.” Nɛkɛ ji bɔ ni Yehowa Odasefoi enyɔ ko ni amɛtee Ecuador he ni amaa nitsumɔ he nine hee ko yɛ amɛha Buu-Mɔɔ Asafo lɛ je amɛwolo lɛ shishi amɛha.
2 Nɛkɛ sɔɔlɔi nɛɛ tee Ecuador koni amɛyafee babaoo fe ni amɛye amɛbua yɛ tsumaa lɛ mli pɛ kɛkɛ; amɛbaanyɛ amɛye amɛbua hu akɛ tsɔɔlɔi ni ji Kristofoi. Amɛŋma akɛ: “Wɔna akɛ sɔɔmɔ nitsumɔ lɛ ji nɔ ni he hiaa fe fɛɛ lɛ ateŋ eko. Otsii etɛ pɛ nɛ ni wɔteŋ mɛi kpaanyɔ tee jara ko nɔ ni wɔkɛ woji lɛ ekomekomei 73 ha ni wɔha woji tɛtrɛbii fe 40. Otsi ni tsɔ enɛ hiɛ lɛ, no mli lɛ wɔje shia Biblia mli nikasemɔ heei enyɔ shishi. Wɔmiina akɛ nitsumɔ he nine hee lɛ he miihia diɛŋtsɛ. Mikɛ miŋa fɛɛ baasumɔ ni wɔda nyɛ shi yɛ hegbɛ ni wɔna akɛ wɔɔnyɛ wɔya nɔ yɛ nɛkɛ be fɛɛ sɔɔmɔ krɛdɛɛ nɛɛ mli lɛ” amrɔ nɛɛ yɛ Colombia.
3. Mɛɛ gbɛ nɔ mɛi pii ejie sui loo mumɔ ni Yesaia jie lɛ kpo lɛ eko kpo amɛtsɔɔ yɛ?
3 Nɛkɛ gbalashihilɛ mli hefatalɔi nɛɛ kɛ ohai abɔ krokomɛi ni ekpɛlɛ nɔ akɛ akɛ amɛ aya maŋsɛɛ lɛ jieɔ mumɔ ni tamɔ gbalɔ Yesaia nɔ lɛ kpo. Beni enu ni Yehowa miikɛɛ: “Namɔ matsu, ni namɔ baaya ahawɔ” lɛ, Yesaia ha hetoo akɛ: “Naa mi, tsu mi!” Kɛkɛ ni Nyɔŋmɔ fa lɛ akɛ,“Yaa ni oyakɛɛ maŋ nɛɛ akɛ: Nyɛnua, shi nyɛkanaa shishi, ni nyɛnaa, shi nyɛkayoa sɛɛ!” (Yesaia 6:8, 9) Mɛni ji nɔ ni Yesaia kɛ ehe haa koni atsu lɛ yɛ he nɛɛ, ni mɛni jɛ mli ba? Ni mɛni wɔbaanyɛ wɔkase kɛjɛ nɛkɛ sane nɛɛ mli ni kɔɔ ŋmɛnɛŋmɛnɛ beaŋ nɔ he kɛ nɔ ni wɔ diɛŋtsɛ lɛ, wɔɔnyɛ wɔkase kɛjɛ mli?
Famɔ ni Akɛha Yesaia Akɛ Eshiɛ
4, 5. (a) Te shihilɛ lɛ yɔɔ tɛŋŋ yɛ be mli ni Yesaia nine shɛ ninaa ni aŋma afɔ shi yɛ Yes yitso 6 lɛ nɔ lɛ? (b) Mɛni Yesaia na yɛ ninaa lɛ mli?
4 Yehowa Nyɔŋmɔ bi Yesaia akɛ: Namɔ matsu? Yɛ afi nɔ ni Maŋtsɛ Uzia gbo lɛ mli. (Yesaia 6:1) Enɛ ji afi 777 D.Ŋ.B. aloo aaafee afii oha nyɔŋmai kpawo kɛ enumɔ dani Babilonbii lɛ kpata Yerusalem hiɛ ni amɛha Yuda shikpɔŋ lɛ tso amaŋfɔ. Yehowa baanyɛ ana nakai awerɛhoo nii ni ba lɛ, ni ekɛ nitsumɔ wo Yesaia dɛŋ koni eshiɛ yɛ enɛ he. Mɛni wɔbaanyɛ wɔkase kɛjɛ shiɛmɔ nitsumɔ nɛɛ mli?
5 Taakɛ bɔ ni ekolɛ eeefee wɔ naakpɛɛ lɛ, nakai Yesaia hu naa kpɛ ehe yɛ gbɛ ni atsɔ nɔ akɛ nitsumɔ nɛɛ wo edɛŋ lɛ hewɔ. Eŋma akɛ: “Mina Nuŋtsɔ lɛ [Yehowa] ni eta maŋtsɛsɛi ni kwɔ gojoo ko nɔ, ni etaade naamuu lɛ eyi sɔlemɔwe lɛ obɔ. Serafim damɔ ehewɔ, amɛteŋ mɔ fɛɛ mɔ yɛ fiji ekpaa; ekɛ enyɔ haa ehiɛ, ni ekɛ enyɔ haa enaji ahe, ni ekɛ enyɔ hu flikiɔ. Ni mɔ nɛ boɔ kɛɔ mɔ nɛ akɛ: Krɔŋkrɔŋ, krɔŋkrɔŋ, krɔŋkrɔŋ ji Yehowa Zebaot lɛ; shikpɔŋ muu lɛ fɛɛ eyi obɔ kɛ enunyam lɛ.”—Yesaia 6:1-3.
6. Mɛni hewɔ eji hegbɛ akɛ Yesaia na nɔ ni ena lɛ?
6 Yesaia le akɛ akɛ kpiti hela tswa Uzia yɛ be mli ni ekɛ henɔwomɔ tee sɔlemɔwe lɛ He Krɔŋkrɔŋ lɛ yɛ be mli ni ejɛɛɛ osɔfoi aweku lɛ mli, ni no sɛɛ hu ebɔ mɔdɛŋ ni esha tsofa kɛ ŋma lɛ. No hewɔ lɛ, kwɛ bɔ ni Yesaia baanu jɛmɛ ni Nyɔŋmɔ yɔɔ diɛŋtsɛ lɛ he eha! Yesaia ni eji gbɔmɔ ni eyeee emuu lɛ enaaa Yehowa diɛŋtsɛ kɛ ehiŋmɛi, shi aŋmɛlɛ gbɛ ni ena Lɛ yɛ ninaa mli. (2 Mose 33:20-23) Ama bɔ ni ninaa nɛɛ nɔ kwɔ ni eyɔɔ fɛo ha lɛ nɔ mi kɛtsɔ ŋwɛibɔfoi (Serafim) ni nɔ kwɔlɔ ni sɔmɔɔ yɛ Yehowa Maŋtsɛsɛi Iɛ he lɛ ni aaaha ena amɛ lɛ hewɔ. Akɛni amɛnuɔ Nyɔŋmɔ krɔŋkrɔŋfeemɔ he hewɔ lɛ, amɛkɛ bulɛ tsiɔ ‘amɛhiɛ.’ Yɛ nɛkɛ amɛhiɛ ni amɛtsiɔ loo nii ni feɔ amɛ hiɛgbele nɛɛ sɛɛ lɛ, amɛkɛ nɔmimaa jajeɔ Nyɔŋmɔ krɔŋkrɔŋfeemɔ lɛ. Mɛɛ hewalɛ osusuɔ akɛ enɛɛmɛi fɛɛ baana yɛ adesa nɔ?
7. Te Yesaia fee enii eha tɛŋŋ, ni mɛni hewɔ wɔbaanyɛ wɔnu he nakai nɔŋŋ?
7 Ha Yesaia aha hetoo. “Kɛkɛ ni mikɛɛ: Kpoo ha mi! Shi milaaje; ejaakɛ gbɔmɔ ni naabu he tseee ji mi, ni maŋ ni amɛnaabui he tseee teŋ miyɔɔ; ejaakɛ mihiŋmɛi ena maŋtsɛ lɛ ni ji Yehowa Zebaot lɛ! (Yesaia 6:5) Yesaia le akɛ eji Nyɔŋmɔ otsaame, shi nɛkɛ ninaa nɛɛ ha enu he akɛ ehe tseee, ni ebɛ naabu ni he tse ni sa akɛ efeɔ otsaamɛ ehaa anunyam Maŋtsɛ ni yɔɔ krɔŋkrɔŋ. Wɔteŋ mɛi komɛi hu enu wɔ nɔshafeemɔ he shii abɔ ni wɔnuuu he po akɛ wɔsa mɛi ni bɛŋkɛɔ Nyɔŋmɔ yɛ sɔlemɔ mli, mbasoroo ni akɛ ekɛ egbɛi aaatsɛ wɔ. No hewɔ lɛ, esa akɛ Yesaia niiashikpamɔ ni etsɔ mli lolo lɛ awo wɔ hewalɛ.
8. Mɛni ji nɔ ni ŋwɛibɔfo ko tsu ni mɛni jɛ mli ba?
8 Serafim lɛ ateŋ mɔ kome filiki ni ekɛ ŋai ni tsoɔ ni ekɔ kɛjɛ kooloi afɔleshaa latɛ lɛ nɔ ba eŋɔɔ. Ekɛ ŋai lɛ sa Yesaia naabu, ni ŋwɛibɔfo lɛ kɛɛ: “Naa, ni enɛ esa onaabu nɛɛ, ajie onɔsha lɛ, ni atsumɔ ohe esha lɛ!” (Yesaia 6:6, 7) Yɛ Salomo gbii lɛ amli lɛ, la ni jɛɔ ŋwɛi ji odaseyeli ni tsɔɔ akɛ Yehowa ekpɛlɛ afɔleshaa nii ni yɔɔ afɔleshaa latɛ lɛ nɔ lɛ nɔ, eyɛ mli akɛ afɔleshaa nii lɛ nyɛŋ aha osɔfoi lɛ po ahe atse yɛ Nyɔŋmɔ hiɛ. (2 Kronika 7:1-3; Hebribii 10:1-4, 11) Agbɛnɛ, beni akɛ ŋai ni tsoɔ lɛ gbe Yesaia he esha lɛ sɛɛ lɛ, ebaanyɛ ekpɛlɛ Yehowa kojomɔ lɛ nɔ akɛ agbɛnɛ akpata enɔshafeemɔ lɛ kɛyashi he ni esa akɛ enine shɛɔ shiɛmɔ nitsumɔ krɛdɛɛ ko nɔ. Mɛɛ okadii loo naakpɛɛ nii ni yɔɔ miishɛɛ enɛ tsɔɔ kɛhaa wɔsɛɛ be?
9. Mɛɛ shishinumɔ yɔɔ Yesaia shɛɛ sane lɛ mli?
9 Nɛkɛ niiashikpamɔ ni yɔɔ naakpɛɛ nɛɛ ha gbalɔ lɛ nine shɛ shiɛmɔ nitsumɔ ni atsi ta lɛ nɔ. (Yesaia 6:8, 9) Shi mɛni hewɔ esa akɛ Yesaia akɛɛ akɛ gbɔmɛi lɛ baanu shii abɔ shi amɛnuŋ shishi lɛ? Nyɔŋmɔ gbee kɛfata he akɛ: “Ha nɛkɛ maŋ nɛɛ tsui akplim, ni oha amɛtoii awa, ni oshwila amɛhiŋmɛii, koni amɛkana . . . ni amɛkakpale, ni atsa amɛ!” (Yesaia 6:10) Ani no tsɔɔ akɛ Yesaia afee keketee loo mɔ ni kɛ ŋaa tsuuu nii ni eha Yudafoi lɛ akpoo esane lɛ ni amɛkɛ Yehowa abe? Dabi. Shi moŋ, enɛ tsɔɔ bɔ ni Yudafoi lɛ ateŋ mɛi ni fa baakpɛlɛ sane lɛ nɔ, ni anɔkwayeli kɛ nitsumɔ ni atsuɔ kɛmɔɔ shi ni Yesaia kɛaatsu eshiɛmɔ nitsumɔ lɛ he nii ni no ha ejɛ esuɔmɔ mli ekɛɛ akɛ “Naa mi, tsu mi!” lɛ fɛɛ kɔɔɔ he eko.
10. (a) Bɔ ni gbɔmɛi lɛ tsɔmɔ tamɔ shwilafoi kɛ toimulɔi lɛ he tɔmɔ lɛ jɛ namɛi? (b) Mɛni ji nɔ ni Yesaia tsɔɔ kɛ sane ni ebi akɛ “Kɛyashi mɛɛ beyinɔ” lɛ?
10 Tɔmɔ lɛ ka gbɔmɛi lɛ anɔ. Yɛ bɔ ni Yesaia ŋmɛ amɛ gbɛ koni ‘amɛnu,’ ni ‘amɛnu’ shii abɔ lɛ fɛɛ sɛɛ lɛ, amɛnaaa nilee ko kɛjɛɛɛ ewiemɔ lɛ mli, ni asaŋ amɛnaaa shishinumɔ ko. Nyɔŋmɔ tsɔ hiɛ ejaje akɛ amɛteŋ mɛi pii boŋ toi yɛ amɛhenɔwomɔ kɛ mumɔŋ nibii kpakpai ahe jwɛŋmɔ kpakpa ni amɛbɛ lɛ hewɔ. Shi amɛteŋ mɛi fioo ko baabo toi. Shi mɛi ni fa lɛ baashwila tamɔ oookɛɛ akɛ ama ni wa ekpɛtɛ amɛhiŋmɛi kɛ ooosusu he nakai. Be enyiɛ nɛkɛ shihilɛ gbohii nɛɛ baaya nɔ? Yesaia bi afii abɔ ni esa akɛ esɔmɔ nɛkɛ kɛ nɛkɛ wiemɔi nɛɛ: “Nuŋtsɔ, kɛyashi mɛɛ beyinɔ?” Nyɔŋmɔ ha hetoo akɛ: “Kɛyashi beyinɔ ni maji lɛ aaatsɔmɔ amaŋfɔ ni mɔ ko mɔ ko bɛ mli.” Ni eba mli nakai, shi yɛ Yesaia wala be lɛ sɛɛ. Babilonbii lɛ jie gbɔmɛi lɛ fɛɛ yɛ nɔ kɛtee, ni amɛshi Yuda shikpɔŋ lɛ amaŋfo kwraa.”—Yesaia 6:11, 12; 2 Maŋtsɛmɛi 25:1-26.
11. Yesaia shiɛmɔ lɛ kɛ miishɛjemɔ ha yɛ mɛɛ gbɛ nɔ?
11 Shi yɛ naagbee lɛ, Yehowa shɛje Yesaia mii akɛ fɛɛ efeŋ yakatswaa. “Emlijai nyɔŋma mli ekome yɛ [shikpɔŋ] lɛ nɔ.” Hɛɛ, etamɔ ‘tso agbo ko ni afo afɔ shi ni ashi etsoku, ni etsoku lɛ ji seshi krɔŋkrɔŋ.’ (Yesaia 6:13) Yɛ Babilon nomŋɔɔ mli afii 70 sɛɛ lɛ, shwɛɛ nii ko, ni ji seshi ku amɛsɛɛ amɛba shikpɔŋ lɛ nɔ, tamɔ tsoku lɛ he tso ni etsɛ ehee. (2 Kronika 36:22, 23; Ezra 1:1-4; okɛto Hiob 14:7-9; Daniel 4:10, 13-15, 26 he.) No hewɔ lɛ, yɛ be mli ni Yesaia sane lɛ ji nɔ ko ni hiɛdɔɔ yɔɔ mli lɛ, kɛlɛ miishɛjemɔ wiemɔ yɛ mli. Ni Ŋmalɛ nɔdaamɔ nɔ yɛ ni wɔɔnyɛ wɔtsɔ nɔ wɔsusu Yesaia he akɛ nɔkwɛmɔ nɔ kɛha wɔsɛɛ be nibii ni baaba. Yɛ mɛɛ gbɛ nɔ?
Emlibaa Wuji
12. Mɛɛ Ŋmalɛ nɔdaamɔ nɔ yɔɔ ni baaha wɔtsɛ Yesu akɛ Yesaia Kpeteŋkpele lɛ?
12 Yesaia gbele sɛɛ afii ohai babaoo lɛ, mɔ ko ba ni wɔbaanyɛ wɔtsɛ lɛ Yesaia Kpeteŋkpele—Yesu Kristo. Dani eeebatsɔ adesa lɛ, etsɔ hiɛ ekɛ ehe ha e-Tsɛ lɛ koni etsu lɛ kɛba shikpɔŋ nɔ, he ni ekɛ nibii ni Yesaia eŋma efɔ shi lɛ baafata eshiɛmɔ nitsumɔ lɛ he. (Abɛi 8:30, 31; Yohane 3:17, 34; 5:36-38; 7:28; 8:42; Luka 4:16-19; Yesaia 61:1) Nɔ ni yɔɔ pɔtɛɛ lɛ, Yesu kɛ ehe to Yesaia yitso 6 he beni etsɔɔ gbɛ ni E-tsɔ nɔ kɛ nɔ hewɔ ni E-fee enɛ lɛ mli lɛ. (Mateo 13:10-15; Marko 4:10-12; Luka 8:9, 10) Enɛ sa jogbaŋŋ, ejaakɛ Yudafoi pii ni nu Yesu wiemɔi lɛ sumɔɔɔ ni amɛkpɛlɛɔ nɔ, ni amɛtsuɔ he nii taakɛ bɔ ni mɛi ni nu gbalɔ Yesaia wiemɔi lɛ fee lɛ. (Yohane 12:36-43) Agbɛnɛ, yɛ afi 70 Ŋ.B. lɛ, Yudafoi lɛ ni fee amɛhe ‘shwilafoi kɛ toimulɔi’ yɛ Yesu sane lɛ toiboo mli lɛ kɛ hiɛkpatamɔ ni tamɔ afi 607 D.Ŋ.B. nɔ lɛ kpe. Nɔ ni ba klɛŋklɛŋ afii oha lɛ mli lɛ ji amanehulu ni ba Yerusalem nɔ’ ‘ni eko bako enɔ nakai da kɛjɛ je lɛ shishijee ni asaŋ eko baŋ dɔŋŋ.’ (Mateo 24:21) Ni kɛlɛ, taakɛ Yesaia gba lɛ, shwɛɛ nii komɛi aloo “seshi krɔŋkrɔŋ” ko na hemɔkɛyeli. Ato mɛnɛɛmɛi afee amɛ mumɔŋ maŋ, “Nyɔŋmɔ Israel” ni afɔ amɛ mu lɛ.—Galatabii 6:16.
13. Mɛni hewɔ wɔbaanyɛ wɔkpa Yesaia 6 mlibaa kroko gbɛ lɛ?
13 Agbɛnɛ wɔba Yesaia yitso 6 lɛ mlibaa kroko ni damɔ Biblia lɛ nɔ. Nɔ ni baaha wɔnu enɛ shishi lɛ, susumɔ Bɔfo Paulo wiemɔi ni ewie aaafee afi 60 Ŋ.B. lɛ he. Etsɔɔ nɔ hewɔ ni Yudafoi pii ni nu esane lɛ yɛ Roma lɛ ekpɛlɛɛɛ ‘edaseyeli ni kɔɔ Nyɔŋmɔ maŋtsɛyeli lɛ he’ lɛ nɔ lɛ mli. Yiŋtoo lɛ ji akɛ Yesaia 6:9, 10 miina emlibaa ekoŋŋ. (Bɔfoi lɛ Asaji 28:17-27) Ani enɛ tsɔɔ akɛ yɛ be mli ni Yesu shi shikpɔŋ nɛɛ nɔ lɛ, ekaselɔi ni afɔ amɛ mu lɛ baatsa nitsumɔ ni tamɔ Yesaia nɔ lɛ nɔ? Hɛɛ, nakai pɛpɛɛpɛ!
14. Yesu kaselɔi lɛ baatsu nitsumɔ ni tamɔ Yesaia nɔ lɛ yɛ mɛɛ gbɛ nɔ?
14 Dani Yesaia Kpeteŋkpele lɛ aaakwɔ kɛaaya ŋwɛi lɛ ekɛɛ akɛ ekaselɔi lɛ nine baashɛ mumɔ krɔŋkrɔŋ lɛ nɔ ni yɛ no sɛɛ lɛ, amɛbaatsɔmɔ edasefoi yɛ Yerusalem kɛ Yudea kɛ Samaria kɛyashi shikpɔŋ lɛ naagbee hei lɛ. (Bɔfoi lɛ Asaji 1:8) Taakɛ bɔ ni afɔleshaa latɛ lɛ kɛ nɔ ni he hiaa ni baaha Yesaia nɔtɔmɔ lɛ aje ehe lɛ ha lɛ, nakai nɔŋŋ Yesu afɔleshaa lɛ ji nɔ ni ekaselɔi lɛ damɔ nɔ ni ha ‘akpata amɛhe eshai lɛ.’ (3 Mose 6:12, 13; Hebribii 10:5-10; 13:10-15) No hewɔ lɛ, Nyɔŋmɔ baanyɛ ni ekɛ mumɔ krɔŋkrɔŋ afɔ amɛ mu, ni no hu baawo amɛ hewalɛ ni amɛfee ‘edasefoi kɛyashi shikpɔŋ lɛ naagbee hei lɛ.’ Gbalɔ Yesaia kɛ Yesaia Kpeteŋkpele lɛ fɛɛ ji mɛi ni atsu amɛ koni amɛyajaje Nyɔŋmɔ sane lɛ. Nakai nɔŋŋ hu Yesu sɛɛnyiɛlɔi ni afɔ amɛ mu lɛ ji mɛi ni “atsu amɛ kɛjɛ Nyɔŋmɔ ŋɔɔ . . . akɛ Kristo hefatalɔi.”—2 Korintobii 2:17, New World Translation.
15. Te gbɔmɛi lɛ ehere shiɛmɔ ni tamɔ Yesaia nɔ lɛ nɔ yɛ wɔbe nɛɛ mli lɛ amɛha tɛŋŋ, ni mɛni etsɔɔ yɛ wɔsɛɛ be mli?
15 Yɛ ŋmɛnɛŋmɛnɛ beaŋ, titri lɛ kɛjɛ Jeŋ Ta I naagbee lɛ, shwɛɛ nii ni afɔ amɛ mu lɛ ena bɔ ni ehe hiaa akɛ ajaje Nyɔŋmɔ sane lɛ. Nɔ ni fata enɛ he ji anɔkwa sane ni hiɛdɔɔ yɔɔ mli akɛ “Nyɔŋmɔ oweletɔɔ gbi lɛ” ebɛŋkɛ lɛ. (Yesaia 61:2) Ehiɛkpatamɔ kwraa lɛ baahoso Kristendom titri, mɔ ni ejɛ jeeŋmɔ beebe ekɛɛ akɛ eji Nyɔŋmɔ webii, taakɛ blema Israel fee lɛ. Yɛ nyɔŋma nyɔŋmai abɔ ni Nyɔŋmɔ odasefoi ni afɔ amɛ mu nɛɛ eshiɛ yɛ anɔkwayeli mli nɛɛ fɛɛ sɛɛ lɛ, mɛi pii yɛ Kristendom ni ‘amɛkplim amɛtsui ni amɛtsimɔ amɛtoi; ni amɛŋamɔ amɛhiŋmɛi.’ Yesaia gbalɛ lɛ tee nɔ etsɔɔ akɛ nɛkɛ ji bɔ ni ebaaya nɔ kɛyashi “beyinɔ ni maji lɛ aaatsɔmɔ amaŋfo, ni mɔ ko mɔ ko bɛ mli, ni shiai lɛ hu mɔ ko mɔ ko bɛ mli, ni shikpɔŋ lɛ aaatsɔ amaŋfo kwraa.” Enɛ baakadi nɛkɛ nibii agbɛjianɔtoo nɛɛ naagbee.—Yesaia 6:10-12.
“Tsu Mi!”
16. Mɛni hewɔ abaanyɛ akɛɛ akɛ: “Asafo babaoo” lɛ miina nitsumɔ ni tamɔ Yesaia nɔ lɛ mli gbɛfaŋnɔ lɛ?
16 Ŋmɛnɛ, Kristofoi akpekpei abɔ ni amɛtuu amɛhe amɛha yɛ Biblia mli hiɛnɔkamɔ akɛ amɛbaahi shi kɛya naanɔ yɛ paradeiso shikpɔŋ nɔ. Yɛ Yesu afɔleshaa la lɛ hewɔ lɛ, nɛkɛ “asafo babaoo” nɛɛ naa eshaifaa kɛyashiɔ he ni ehe hiaa yɛ bianɛ. Agbɛnɛ amɛnine shɛɔ hewalɛ kɛ sɛɛfimɔ nɔ kɛtsɔɔ Nyɔŋmɔ mumɔ lɛ nɔ yɛ be mli ni amɛkɛ amɛhe bɔɔ shwɛɛ nii ni ji Kristofoi ni afɔ amɛ mu lɛ ayibɔ lɛ he kɛ kɛɔ akɛ, “Naa mi, tsu mi!” lɛ. Atsu amɛ ni amɛyafee mɛni? Paulo kɛɔ yɛ Romabii 10:13-15 akɛ: “Ejaakɛ mɔ fɛɛ mɔ ni aaabo atsɛ Nuŋtsɔ lɛ gbɛi lɛ, aaahere eyiwala. Shi te aaafee tɛŋŋ ni amɛaabo amɛtsɛ mɔ ni amɛheko lɛ amɛyeko lɛ? Ni te aaafee tɛŋŋ ni amɛaahe mɔ ni amɛnuko ehe sane lɛ amɛyeŋ? Ni asaŋ te aaafee tɛŋŋ ni amɛaanu kɛ shiɛlɔ ko bɛ lɛ? Ni te aaafee tɛŋŋ ni amɛaashiɛ, kɛ atsukɔ amɛ lɛ? Taakɛ bɔ ni aŋma akɛ [yɛ Yesaia 52:7]: ‘Kwɛ bɔ ni hejɔlɛ sanekpakpa shiɛlɔi ni shiɛɔ nii kpakpai lɛ anaji yɔɔ fɛo ha!’—Kpojiemɔ 7:9-15.
17. Kɛ akɛto Yesaia gbalɛ lɛ he lɛ, mɛni yɔɔ sane ni ashiɛɔ lɛ mli?
17 Kaimɔ akɛ Yesaia kɛɛ, “Naa mi, tsu mi!” dani eŋɔ nɔ ni yɔɔ eshɛɛ sane lɛ fɛɛ mli. Shi nɔ ni tamɔɔɔ enɛ lɛ, wɔle nɔ ni Nyɔŋmɔ taoɔ ni mɛi ni hereɔ eninefɔɔ akɛ: “Namɔ matsu? Ni namɔ aaatee ahawɔ?” lɛ ajaje bianɛ lɛ fɛɛ. Nɔ ni fata he ji kɔkɔbɔɔ ni atsɔɔ hiɛ akɛhaa ni kɔɔ “Wɔ Nyɔŋmɔ lɛ oweletɔɔ gbi” lɛ he. Ni kɛlɛ, nɔ ni fata sane lɛ he hu ji “nibii kpakpai ahe sanekpakpa.” Akɛ nɔkwɛmɔ nɔ lɛ, mɛi ni ‘atsuɔ amɛ’ lɛ naa gbɛfaŋnɔ yɛ shɛɛ sane ni ji “mijaje heyeli miitsɔɔ nomii lɛ, ni mijaje gbelemɔ mitsɔɔ mɛi ni awo amɛ tsuŋ lɛ” mli gbɛfaŋnɔ. Ani esaaa akɛ enɛ feemɔ feɔ nɔ ni baaha wɔtsui anyɔ wɔ mli babaoo?—Yesaia 61:1, 2.
18, 19. Gbɔmɛi pii miikɛɛ yɛ gbɛi krɛdɛi anɔ akɛ “tsu mi” yɛ mɛɛ gbɛ nɔ?
18 Kɛji akɛ oojaje “nibii kpakpai ahe sanekpakpa” lɛ momo lɛ, belɛ, nɛkɛ Yesaia yitso 6 lɛ mlitii lɛ baaha obi akɛ: Te mafee tɛŋŋ mahere enɛ nɔ babaoo kɛ mumɔ loo su ni yɔɔ Yesaia 6:8 lɛ? Taakɛ eji yɛ gbalashihilɛ mli hefatalɔi ni wɔtsi amɛta yɛ nikasemɔ nɛɛ shishijee lɛ ahe lɛ, ohai abɔ kɛ amɛhe ewo Majimaji Ateŋ Tsumaa Nitsulɔi Agbɛjianɔtoo lɛ mli. Mɛi krokomɛi babaoo hu ni amɛhe esako yɛ tsumaa nitsumɔi amli lɛ efa kɛtee shikpɔji ni Maŋtsɛyeli shiɛlɔi ahe hiaa babaoo yɛ lɛ. Gbɛ ni hi jogbaŋŋ ni atsɔɔ nɔ afeɔ enɛ ji ŋaawo ni ataoɔ kɛjɛɔ Buu-Mɔɔ Asafo lɛ nitsumɔ he nine lɛ. Shi gbɛjianɔtoo he hiaa, ejaakɛ wiemɔ, shihilɛ, nitsumɔ ni aaana atsu kɛ nibii krokomɛi baafee nɔ ni yɔɔ sɔrɔto kwraa yɛ maŋsɛɛ shikpɔji nɛɛ anɔ. Ni kɛlɛ, kaajie hegbɛ ni tamɔ nɛkɛ lɛ kɛmiijɛ ojwɛŋmɔ mli amrɔ nɔŋŋ akɛ enyɛŋ eba lɛ nakai yɛ tsakemɔi wuji ni ekolɛ ehe baahia ni ofee lɛ hewɔ. Mɛi pii ni hiɛ su ni ji “Naa mi, tsu mi!” lɛ efa kɛtee hei ni tamɔ nɛkɛ ni amɛnine eshɛ Nyɔŋmɔ dɛŋ jɔɔmɔi babaoo nɔ yɛ nakai feemɔ hewɔ.—Okɛto Abɛi 24:27; Luka 14:28-30 he.
19 Mɛi krokomɛi lolo yɛ—nyɛmimɛi hii loo yei oshijafoi, gbalashihilɛ mli hefatalɔi, aloo wekui—efa kɛtee hei krokomɛi yɛ amɛ diɛŋtsɛ amɛshikpɔŋ lɛ nɔ yɛ he ni Maŋtsɛyeli shiɛlɔi loo Kristofoi nɔkwɛlɔi ahe hiaa babaoo yɛ. (Bɔfoi lɛ Asaji 16:9, 10) Enɛ feemɔ biɔ afɔlei ni aaasha tamɔ nitsumɔ kroko ni aaatao atsu, ekolɛ nɔ ni enyɔmɔwoo faaa. Mɛi komɛi hu kpaa nitsumɔ mra yɛ be mli ni amɛbe shɛko ni amɛheɔ amɛnitsumɔ kpamɔ nyɔmɔwoo ni faaa lɛ kɛkɛ lɛ, amɛyatao nitsumɔ ni amɛkɛ be fa tsuɔ bɔni afee ni amɛna be babaoo amɛha sɔɔmɔ nitsumɔ lɛ. Kwɛ bɔ ni eyɔɔ fɛo akɛ wekui aaanyɛ akɛɛ akɛ, “Naa wɔ, tsu wɔ!” Enɛ hu tsɔɔ shihilɛ mli ni Yesaia yɔɔ lɛ. Eŋa hu kɛ ehe wo Nyɔŋmɔ suɔmɔnaa nifeemɔ mli akɛ gbalɛyoo, ni ebihii lɛ hu kɛ amɛhe wo gbalɛ shɛɛ wiemɔi ni akɛhaa lɛ amli.—Yesaia 7:3, 14-17; 8:3, 4.
20. Akɛni Yesaia 6:8 yɔɔ ojwɛŋmɔ mli hewɔ lɛ, mɛni esa akɛ osusu he?
20 Kɛji akɛ shihilɛ ni wɔyɔɔ mli bianɛ lɛ eŋmɛɛɛ gbɛ ni wɔfee tsakemɔi wuji ni tamɔ nɛkɛ lɛ, obaanyɛ osusu enɛ he, ‘Ani miifee” fɛɛ ni manyɛ yɛ he ni miyɔɔ lɛ, ni ani miikase gbɛ ni Yesaia tsɔ nɔ ehere nɔ lɛ?’ Wajemɔ ohe yɛ Nyɔŋmɔ shɛɛ sane lɛ jajemɔ mli, yɛ be ni ehii po mli aloo kɛji akɛ gbɔmɛi lɛ yɛ shikplikpii; eka shi faŋŋ akɛ nakai pɛpɛɛpɛ Yesaia fee. Feemɔ ekaa yɛ mɛi krokomɛi ni ooowie “nibii kpakpai ahe sanekpakpa” lɛ he otsɔɔ amɛ lɛ mli, Yehowa ekɛɛ akɛ: “Namɔ matsu?” Jiemɔ ohe kpo, tamɔ blema Yesaia, akɛ ohetoo ji, “Naa mi, tsu mi!” koni okɛjaje E-sane lɛ.a
[Shishigbɛ niŋmai]
a Ajie kɛjɛ October 15, 1987 Watchtower lɛ mli.
Saji Otii Ni Akɛtiɔ Mli
◻ Mɛɛ shihilɛi amli Yesaia yɔɔ beni enine shɛ ninaa ni yɔɔ Yes Yitso 6 lɛ nɔ lɛ, ni mɛni ena?
◻ Mɛɛ nitsumɔ Yesaia nine shɛ nɔ?
◻ Mɛni hewɔ wɔbaanyɛ wɔtsɛ Yesu akɛ Yesaia Kpeteŋkpele Iɛ, ni ekaselɔi Iɛ kɛ amɛhe ewo nitsumɔ ni tamɔ Yesaia nɔ Iɛ mli yɛ mɛɛ gbɛ nɔ?
◻ Te ooofee tɛŋŋ ojie su ni tamɔ Yesaia nɔ Iɛ kpo?
[Mfoniri ni yɔɔ baafa 15]
Atsuu Yesaia he ni atsu lɛ koni eyashiɛ
[Mfoniri ni yɔɔ baafa 16]
Mɛi pii ehere nɔ akɛ, “Naa mi, tsu mi!’