Yitso Nyɔŋmai Enyɔ Kɛ Ekome
Anɔkwa Jamɔ Miishwere yɛ Je Lɛŋ Fɛɛ
1. Mɛɛ shɛɛ sane ní kanyaa mɔ yɔɔ Yesaia yitso 60 lɛ mli?
AŊMA Yesaia yitso 60 lɛ ákɛ sane ko ní kanyaa mɔ waa. Agbalaa wɔjwɛŋmɔ kɛyaa nifeemɔ ko ní taa mɔ mli nɔ yɛ shishijee kukuji lɛ amli. Nifeemɔi komɛi tsara nɔ kɛba oyayaayai, ni ekɛ wɔ yaa naagbee yɛ gbɛ ní kanyaa henumɔ nɔ. Yitso lɛ kɛ mfonirifeemɔ wiemɔi ní yɔɔ faŋŋ tsɔɔ bɔ ni abaato anɔkwa jamɔ ama shi ekoŋŋ yɛ blema Yerusalem, kɛ bɔ ni anɔkwa jamɔ shwereɔ yɛ je lɛŋ fɛɛ ŋmɛnɛ lɛ mli. Kɛfata he lɛ, egbalaa jwɛŋmɔ kɛyaa naanɔ jɔɔmɔi ní asaa ato aha Nyɔŋmɔ anɔkwa jálɔi fɛɛ lɛ nɔ. Wɔteŋ mɔ fɛɛ mɔ baanyɛ aná gbɛfaŋnɔ yɛ Yesaia gbalɛ lɛ fã ní yɔɔ miishɛɛ waa nɛɛ mlibaa mli. No hewɔ lɛ, nyɛhaa wɔpɛia mli jogbaŋŋ wɔkwɛa.
La Miikpɛ́ yɛ Duŋ lɛ Mli
2. Mɛɛ famɔ akɛha yoo ko ní kã shi yɛ duŋ mli lɛ, ni mɛni hewɔ ehe hiaa waa akɛ ebo toi lɛ?
2 Awie Yesaia wolo lɛ yitso nɛɛ mli shishijee wiemɔi lɛ atsɔɔ yoo ko ní yɔɔ awerɛho shihilɛi amli. Eka shi faŋŋ akɛ yoo nɛɛ kã shi shwɛtɛɛ yɛ duŋ mli ni ekɛ ehiɛ ebu shi. Trukaa kɛkɛ ni la kpɛ́ yɛ duŋ lɛ mli, ni Yehowa tsɔ Yesaia nɔ ekɛɛ lɛ akɛ: “Tee shi ní otso, shi ola lɛ miiba, ni Yehowa anunyam lɛ miikpɛ́ yɛ onɔ!” (Yesaia 60:1) Hɛɛ, esa akɛ ‘yoo’ lɛ ate shi edamɔ shi ní ejie Nyɔŋmɔ anunyam lɛ kpo etsɔɔ! Mɛni hewɔ enɛ he hiaa waa lɛ? Gbalɛ lɛ yaa nɔ akɛ: “Naa, duŋ hà shikpɔŋ lɛ nɔ, ni duŋ kpii hà majimaji lɛ anɔ; shi bo lɛ Yehowa miikpɛ́ yɛ onɔ, ni enunyam lɛ epue yɛ onɔ.” (Yesaia 60:2) Esa akɛ ‘yoo’ lɛ ‘atso,’ kɛha mɛi ní ebɔle lɛ lɛ, ní kã he amɛgbugbuuɔ shi yɛ duŋ mli lolo lɛ asɛɛnamɔ. Mɛni baajɛ mli aba? “Jeŋmaji aaanyiɛ kɛaaba ola lɛ he, ni maŋtsɛmɛi aaaba kpɛmɔ ní kpɛɔ yɛ onɔ lɛ he.” (Yesaia 60:3) Nɛkɛ shishijee wiemɔi nɛɛ haa wɔleɔ nibii titri ní abaatsɔɔ mli fitsofitso kɛmɔ shi yɛ kukuji ní nyiɛ sɛɛ lɛ amli—bɔ ni esa akɛ anɔkwa jamɔ ashwere yɛ je lɛŋ fɛɛ lɛ!
3. (a) Namɔ ji ‘yoo’ lɛ? (b) Mɛni hewɔ ‘yoo’ lɛ ekã shi aahu yɛ duŋ mli lɛ?
3 Eyɛ mli akɛ eewie nibii ní baaba wɔsɛɛ lɛ ahe moŋ, shi Yehowa kɛɛ ‘yoo’ lɛ akɛ ela lɛ “miiba.” Enɛ maa bɔ ni nɔmimaa yɔɔ he akɛ, bɔ fɛɛ bɔ ni fee lɛ, gbalɛ lɛ baaba mli lɛ nɔ mi. ‘Yoo’ ní awieɔ ehe yɛ biɛ lɛ ji Zion, loo Yerusalem, ni ji Yuda maŋtiase lɛ. (Yesaia 52:1, 2; 60:14) Maŋtiase lɛ damɔ shi kɛha maŋ muu lɛ fɛɛ. Beni gbalɛ nɛɛ ná eklɛŋklɛŋ mlibaa lɛ, no mli lɛ ana ‘yoo’ lɛ ní eka shi yɛ duŋ mli, he ni ehi aahu kɛjɛ be mli ní akpata Yerusalem hiɛ yɛ afi 607 D.Ŋ.B. lɛ. Shi, yɛ afi 537 D.Ŋ.B. lɛ, Yudafoi ní aŋɔ amɛ nom lɛ ateŋ shwɛɛnii anɔkwafoi komɛi ku amɛsɛɛ kɛba Yerusalem ni amɛbato jamɔ krɔŋŋ shishi ekoŋŋ. Yɛ naagbee lɛ, Yehowa ha la kpɛ́ yɛ ‘eyoo’ lɛ nɔ, ni ewebii ní ekɛ amɛ eku sɛɛ kɛba amɛshikpɔŋ nɔ ekoŋŋ lɛ batsɔ sɛɛyoomɔ jɛɛhe yɛ jeŋmaji ní mumɔŋ duŋ ewo yɛ amɛmli lɛ ateŋ.
Emlibaa ní Da
4. Namɛi damɔ shi kɛha ‘yoo’ lɛ yɛ shikpɔŋ nɔ ŋmɛnɛ, ni kɛ́ akpã mli lɛ, namɛi hu gbalɛ wiemɔi lɛ kɔɔ amɛhe?
4 Gbalɛ wiemɔi nɛɛ ahe miishɛɛ ní wɔyɔɔ lɛ yaa shɔŋŋ kɛtekeɔ amɛmlibaa ní ba yɛ blema Yerusalem nɔ lɛ. Ŋmɛnɛ, “Nyɔŋmɔ Israel lɛ” damɔɔ shi kɛhaa Yehowa ŋwɛi ‘yoo’ lɛ yɛ shikpɔŋ nɔ. (Galatabii 6:16) Yɛ be ní ekɛhi shi lɛ mli fɛɛ, kɛjɛ Pentekoste afi 33 Ŋ.B. aahu kɛbashi ŋmɛnɛ, nɛkɛ mumɔŋ maŋ nɛɛ ebaná emli bii 144,000 ní akɛ mumɔ efɔ amɛ mu, mɛi ní “ahé kɛjɛ shikpɔŋ lɛ nɔ” ní amɛyɔɔ gbɛkpamɔ akɛ amɛkɛ Kristo baaye maŋtsɛ yɛ ŋwɛi lɛ. (Kpojiemɔ 14:1, 3) Yesaia yitso 60 lɛ ŋmɛnɛŋmɛnɛ beaŋ mlibaa lɛ gbalaa jwɛŋmɔ kɛyaa mɛi 144,000 lɛ ateŋ mɛi ní yɔɔ wala mli yɛ shikpɔŋ nɔ yɛ “naagbee gbii lɛ” amli lɛ anɔ. (2 Timoteo 3:1) Gbalɛ lɛ kɔɔ Kristofoi ní afɔ amɛ mu nɛɛ ahefatalɔi, ni ji “asafo babaoo” ní feɔ “tooi krokomɛi” lɛ hu ahe.—Kpojiemɔ 7:9; Yohane 10:11, 16.
5. Mɛɛ be Nyɔŋmɔ Israel lɛ mli bii ní yɔɔ wala mli lolo lɛ na amɛhe akɛ amɛkamɔ duŋ mli lɛ, ni mɛɛ be Yehowa la lɛ kpɛ́ yɛ amɛnɔ?
5 Yɛ afii 1900 lɛ shishijee gbɛ be kukuoo mli lɛ, Nyɔŋmɔ Israel lɛ mli bii lɛ ateŋ mɛi ní yɔɔ shikpɔŋ nɔ lolo lɛ na amɛhe akɛ amɛbumɔ shikpɔŋ yɛ duŋ mli, kɛ́ wɔɔwie he nakai. Beni klɛŋklɛŋ jeŋ ta lɛ ba naagbee lɛ, no mli lɛ amɛyɛ shihilɛ ní atsɔɔ mli yɛ mfonirifeemɔŋ yɛ Kpojiemɔ wolo lɛ mli lɛ mli—amɛgbohii jwere “maŋ kpeteŋkpele lɛ ni atsɛɔ lɛ yɛ mumɔ mli akɛ Sodoma kɛ Mizraim lɛ . . . blohu lɛ mli.” (Kpojiemɔ 11:8) Shi, yɛ afi 1919 lɛ, Yehowa kpɛ́ ela lɛ yɛ amɛnɔ. Yɛ enɛ nɔheremɔ mli lɛ, amɛte shi amɛdamɔ shi ni amɛjie Nyɔŋmɔ la lɛ kpo, ni amɛkɛ ekãa jaje Nyɔŋmɔ Maŋtsɛyeli lɛ he sanekpakpa lɛ amɛtsɔɔ.—Mateo 5:14-16; 24:14.
6. Te je lɛŋ bii babaoo ehere ba ní Yesu eba akɛ odehe lɛ he sane jajemɔ lɛ nɔ amɛha tɛŋŋ, shi namɛi agbala kɛba Yehowa la lɛ he?
6 Akɛni Satan, ni ji “lumɛi ni yɔɔ benɛ be duŋ lɛ mli lɛ” anɔ onukpa lɛ náa adesai anɔ hewalɛ hewɔ lɛ, mɛi babaoo ekpoo ba ní Yesu Kristo, ni ji “je lɛ mli la lɛ” eba akɛ odehe lɛ he adafitswaa lɛ kwraa. (Efesobii 6:12; Yohane 8:12; 2 Korintobii 4:3, 4) Shi yɛ fɛɛ sɛɛ lɛ, Yehowa la lɛ egbala mɛi akpekpei abɔ kɛba he, ni “maŋtsɛmɛi” (ni ji mɛi ní batsɔmɔɔ ŋwɛi Maŋtsɛyeli lɛ gboshiniyelɔi ní afɔ amɛ mu lɛ) kɛ “jeŋmaji” (ni ji asafo babaoo ní feɔ tooi krokomɛi lɛ) fata he.
Shweremɔ lɛ kɛ Tsui Mli Miishɛɛ Ba
7. Mɛɛ nɔ ko ní haa mɔ tsui nyãa ‘yoo’ lɛ na?
7 Beni Yehowa wieɔ saneyitso ní aje shishi yɛ Yesaia 60:3 lɛ he lɛ, ekɛ famɔ kroko ha ‘yoo’ lɛ akɛ: “Holemɔ ohiŋmɛii anɔ ní okwɛ ohe kɛkpe.” Beni ‘yoo’ lɛ bo famɔ lɛ toi lɛ, ena nɔ ko ní ha etsui nyã waa—ena ebii lɛ ní amɛku amɛsɛɛ kɛmiiba shia! “Amɛ fɛɛ amɛbua amɛhe naa kɛmiiba oŋɔɔ! Obihii lɛ aaajɛ maŋsɛɛ shɔŋŋ aba, ni obiyei lɛ hu, aaahiɛ amɛ yɛ ŋmawuiaŋ kɛaaba.” (Yesaia 60:4) Nɔ ni jɛ majimaji ateŋ Maŋtsɛyeli sane jajemɔ ní je shishi yɛ afi 1919 lɛ mli ba ji ‘bihii’ kɛ ‘biyei’ krokomɛi akpei abɔ ní afɔ amɛ mu ní akɛ amɛ bafata Nyɔŋmɔ Israel lɛ he. Yehowa tsɔ nɛkɛ gbɛ nɔ etsu saji ahe nii ni ekɛha yibɔ ní agba afɔ̃ shi, ni ji 144,000 ní kɛ Kristo baaye maŋtsɛ lɛ ye emuu.—Kpojiemɔ 5:9, 10.
8. Mɛɛ nɔdaamɔ nɔ kɛha miishɛɛnamɔ Nyɔŋmɔ Israel ená kɛjɛ afi 1919 lɛ kɛbaa?
8 Shweremɔ nɛɛ kɛ miishɛɛ ba. “No lɛ ooona, ni ohiɛ aaakpɛ́ kɛ miishɛɛ, otsui aaakpokpo ni emli hu aaalɛɛ; ejaakɛ mɛi babaoo aaajɛ ŋshɔŋ aba oŋɔɔ, jeŋmaji lɛ ahewalɛ lɛ aaaba oŋɔɔ.” (Yesaia 60:5) Mɛi ní afɔ amɛ mu lɛ anaabuamɔ ní tee nɔ yɛ afi 1920 kɛ afi 1930 afii lɛ amli lɛ ha Nyɔŋmɔ Israel lɛ ná miishɛɛ kpele. Ni kɛlɛ, amɛná yiŋtoo kroko ní amɛaadamɔ nɔ amɛná miishɛɛ. Titri lɛ, kɛjɛ afi 1930 afii lɛ teŋgbɛ kɛbaa nɛɛ, gbɔmɛi ní tsutsu ko lɛ amɛji ‘ŋshɔ,’ ni ji adesai ní etsi amɛhe kɛjɛ Nyɔŋmɔ he lɛ fã lɛ, ejɛ jeŋmaji lɛ fɛɛ amli kɛba ni amɛkɛ Nyɔŋmɔ Israel lɛ ebafee ekome yɛ jamɔ mli. (Yesaia 57:20; Hagai 2:7) Gbɔmɛi nɛɛ baaa akɛ amɛaasɔmɔ Nyɔŋmɔ, ní mɔ fɛɛ mɔ miifee nakai yɛ gbɛ ní lɛ diɛŋtsɛ esumɔɔ nɔ. Shi moŋ, amɛbaa Nyɔŋmɔ ‘yoo’ lɛ ŋɔɔ, ni amɛbatsɔmɔɔ Nyɔŋmɔ asafoku ní efee ekome lɛ fã. Enɛ hewɔ lɛ, Nyɔŋmɔ tsuji fɛɛ náa anɔkwa jamɔ shweremɔ lɛ mli gbɛfaŋnɔ.
Jeŋmaji Babua Amɛhe Naa yɛ Yerusalem
9, 10. Namɛi anaa ní amɛbua amɛhe naa yɛ Yerusalem lɛ, ni te Yehowa here amɛ hiɛmɛɛ eha tɛŋŋ?
9 Yehowa kɛ nɔkwɛmɔnii ní Yesaia yinɔbii lɛ le jogbaŋŋ tsu nii ni ekɛtsɔɔ shweremɔ lɛ mli. Klɛŋklɛŋ lɛ, ‘yoo’ lɛ jɛ eshidaamɔ he ní kwɔ ní yɔɔ Zion Gɔŋ lɛ nɔ lɛ ekwɛ bokagbɛ ŋwɛi kɛ shikpɔŋ kpeehe lɛ. Mɛni ena? “Yomai asafo yuu aaabua ohe kutuu, kɛ Midian kɛ Efa yomai oblahii; amɛ fɛɛ amɛaajɛ Sheba amɛaaba: amɛaahiɛ shika kɛ krɔbɔo kɛaaba, ni amɛaagba Yehowa yijiemɔ lɛ.” (Yesaia 60:6) Jarayelɔi gbɛfalɔi ayomai akui ní guɔyelɔi ní jɛ majianɔ akutsei srɔtoi amli taraa amɛnɔ kɛfãa gbɛ lɛ nyiɛɔ kɛtsɔɔ gbɛjegbɛi ní baa Yerusalem lɛ anɔ. (1 Mose 37:25, 28; Kojolɔi 6:1, 5; 1 Maŋtsɛmɛi 10:1, 2) Yomai yɛ he fɛɛ he, tamɔ nu afua ní ehà shikpɔŋ lɛ nɔ! Jarayelɔi gbɛfalɔi akui lɛ kɛ nikeenii ní jara wa baa, ni tsɔɔ akɛ jarayelɔi lɛ kɛ toiŋjɔlɛ yiŋtoi baa. Amɛmiitao ní amɛbajá Yehowa, ní amɛkɛ amɛ nibii ní jara wa fe fɛɛ ní amɛyɔɔ lɛ abaha lɛ.
10 Jeee guɔyelɔi nɛɛ kome pɛ nyiɛ kɛba. “Aaabua Kedar tooi kui lɛ fɛɛ naa abahao, Nebaiot too agboi lɛ aaasɔmɔo.” Hɛɛ, tookwɛlɔi akutsei hu miifã gbɛ kɛmiiba Yerusalem. Amɛkɛ amɛ nibii ní jara wa fe fɛɛ lɛ amli nikeenii—ni ji tooi akui—miiba, ni amɛkɛ amɛhe hu miiha akɛ amɛaasɔmɔ. Te Yehowa baahere amɛ hiɛmɛɛ eha tɛŋŋ? Ekɛɛ akɛ: “Akɛ amɛ aaaba mifɔleshaa latɛ lɛ nɔ, ni eeesa mihiɛ, ni mawo minunyam shia lɛ hiɛ nyam!” (Yesaia 60:7) Yehowa kpɛlɛ amɛnikeenii ní akɛbaatsu nii yɛ jamɔ krɔŋŋ mli lɛ nɔ.—Yesaia 56:7; Yeremia 49:28, 29.
11, 12. (a) Mɛni ‘yoo’ lɛ na amrɔ nɔŋŋ beni ekwɛ anaigbɛ lɛ? (b) Mɛni hewɔ mɛi babaoo kɛ oyaiyeli yaa Yerusalem lɛ?
11 Agbɛnɛ Yehowa kɛ famɔ ha ‘yoo’ lɛ ákɛ ekwɛ anaigbɛ ŋwɛi kɛ shikpɔŋ kpeehe lɛ hu, ni ebi lɛ akɛ: “Namɛi ji mɛnɛɛmɛi ni filikiɔ tamɔ atatu, loo tamɔ okpoi ni baa amɛsamfɛjiaŋ nɛɛ?” Yehowa diɛŋtsɛ ha hetoo akɛ: “Ŋshɔkpɔi aaakwɛ mi gbɛ, ni Tarshish lɛji lɛ aaatsɔ hiɛ aba, koni amɛkɛ obihii lɛ kɛ amɛjwiɛtɛi kɛ amɛshika ajɛ shɔŋŋ aba, abaha Yehowa, o-Nyɔŋmɔ lɛ, gbɛi lɛ, kɛ Israel Mɔ krɔŋkrɔŋ lɛ, ejaakɛ ewo ohiɛ nyam.”—Yesaia 60:8, 9.
12 Feemɔ he mfoniri akɛ okɛ ‘yoo’ lɛ damɔ shi, ni nyɛmiikwɛ anaigbɛ yɛ Ŋshɔ Kpeteŋkpele lɛ sɛɛgbɛ. Mɛni nyɛnaa? Nyɛmiina nibii yɛji bibii babaoo ní nyiɛ shɔŋŋ yɛ nu lɛ hiɛ kɛmiiba. Nyɛmiina amɛ tamɔ loofɔji, shi beni amɛbɛŋkɛɔ nyɛ lɛ, nyɛmiina amɛ akɛ amɛji lɛji ní eshĩ amɛ abalaai kɛmiiba. Amɛjɛ “shɔŋŋ” kɛmiiba.a (Yesaia 49:12) Lɛji babaoo kɛ foi diɛŋtsɛ miiba Zion, aahu akɛ kɛ́ okwɛ amɛ lɛ, amɛtamɔ okpoi akuu ní miifiliki kɛmiiya amɛshia. Mɛni hewɔ lɛji akuu lɛ yeɔ oyai nakai lɛ? Amɛhe miitswa shi ní amɛyajie amɛjatsu lɛ ni ji Yehowa jálɔi ni jɛ lɛjiadaamɔhei ní yɔɔ shɔŋŋ lɛ. Lɛɛlɛŋ, mɛi heei ní ebashɛ shi—ni ji Israelbii kɛ gbɔi, mɛi ni jɛ bokagbɛ loo anaigbɛ, kɛ shikpɔji ní bɛŋkɛ loo nɔ ni yɔɔ shɔŋŋ lɛ anɔ lɛ—fɛɛ kɛ oyaiyeli miiya Yerusalem koni amɛyajɔɔ amɛ diɛŋtsɛ kɛ nɔ fɛɛ nɔ ní amɛyɔɔ lɛ nɔ amɛha Yehowa, amɛ-Nyɔŋmɔ lɛ gbɛi lɛ.—Yesaia 55:5.
13. Namɛi ji ‘bihii’ kɛ ‘biyei’ lɛ yɛ ŋmɛnɛŋmɛnɛ beaŋ, ni namɛi ji “jeŋmaji lɛ ahewalɛ lɛ”?
13 Kwɛ bɔ ni Yesaia 60:4-9 lɛ feɔ jeŋ muu fɛɛ shweremɔ ní eba kɛjɛ be mli ní Yehowa ‘yoo’ lɛ bɔi la kpɛmɔ yɛ je nɛɛ mli duŋ lɛ mli kɛbaa nɛɛ he mfoniri yɛ wiemɔi ní mli kã shi faŋŋ mli! Mɛi ní ba klɛŋklɛŋ ji ŋwɛi Zion ‘bihii’ kɛ ‘biyei,’ ni ji mɛi ní batsɔmɔ Kristofoi ní afɔ amɛ mu lɛ. Yɛ afi 1931 lɛ, amɛha abale amɛ yɛ faŋŋ mli akɛ Yehowa Odasefoi. Kɛkɛ ni no sɛɛ lɛ atatu ni ji mɛi babaoo ní he jɔ, “jeŋmaji lɛ ahewalɛ lɛ” kɛ “mɛi babaoo [ní] aaajɛ ŋshɔŋ aba” lɛ kɛ oyaiyeli bafata Kristo nyɛmimɛi lɛ ateŋ mɛi ní eshwɛ lɛ ahe.b Ŋmɛnɛ, nɛkɛ Yehowa tsuji ní jɛ shikpɔŋ lɛ kóji ejwɛ lɛ fɛɛ nɔ kɛ shihilɛi srɔtoi fɛɛ amli nɛɛ fataa Nyɔŋmɔ Israel lɛ he ni amɛjieɔ amɛ-Nuntsɔ Maŋtsɛ, Yehowa yi, ni amɛwóɔ egbɛi lɛ nɔ ákɛ gbɛi ní nɔ kwɔ fe fɛɛ yɛ jeŋ muu lɛ fɛɛ mli.
14. Akɛ mɛi heei ní baa lɛ “aaaba [Nyɔŋmɔ afɔleshaa] latɛ lɛ nɔ” yɛ mɛɛ gbɛ nɔ?
14 Shi, mɛni nɛkɛ mɛi heei ní jɛ jeŋmaji lɛ ateŋ ní “akɛ amɛ aaaba [Nyɔŋmɔ afɔleshaa] latɛ lɛ nɔ” nɛɛ tsɔɔ? Akɛ afɔle fɔ̃ɔ afɔleshaa latɛ nɔ. Bɔfo Paulo kɛ wiemɔ ní kɔɔ afɔleshaa he tsu nii beni eŋma akɛ: “Miikpa nyɛ fai, akɛ nyɛŋɔ nyɛgbɔmɔtsei lɛ nyɛdamɔ shi akɛ afɔle ní hiɛ kã ni he tse ní sa Nyɔŋmɔ hiɛ ní nyɛjamɔ lɛ afee mumɔŋ jamɔ.” (Romabii 12:1) Anɔkwa Kristofoi sumɔɔ ní amɛkɛ amɛhe aha. (Luka 9:23, 24) Amɛtuɔ amɛbe, hewalɛ, kɛ hesaai fɛɛ amɛhaa jamɔ krɔŋŋ hiɛyaa. (Romabii 6:13) Yɛ nakai feemɔ mli lɛ, amɛkɛ yijiemɔ afɔlei ní saa Nyɔŋmɔ hiɛ haa lɛ. (Hebribii 13:15) Kwɛ miishɛɛ ní eji akɛ Yehowa jálɔi akpekpei abɔ ní yɔɔ ŋmɛnɛ, gbekɛbii kɛ onukpai fɛɛ, kɛ amɛ diɛŋtsɛ amɛ nibii ni amɛshweɔ yeɔ gbɛhe ni ji enyɔ, ni Nyɔŋmɔ Maŋtsɛyeli lɛ he nibii yeɔ klɛŋklɛŋ gbɛhe! Amɛjieɔ anɔkwa he-kɛ-afɔleshaa mumɔ diɛŋtsɛ kpo.—Mateo 6:33; 2 Korintobii 5:15.
Mɛi Heei ní Baa lɛ Náa Shweremɔ lɛ Mli Gbɛfaŋnɔ
15. (a) Yehowa jie mɔbɔnalɛ kpo yɛ gbɔi agbɛfaŋ yɛ blema beaŋ yɛ mɛɛ gbɛ nɔ? (b) “Gbɔi” ená anɔkwa jamɔ tswaa kɛ shimaa mli gbɛfaŋnɔ yɛ ŋmɛnɛŋmɛnɛ beaŋ yɛ mɛɛ gbɛ nɔ?
15 Mɛi heei ní baa lɛ kɛ amɛnibii ní amɛyɔɔ kɛ amɛhewalɛ diɛŋtsɛ fɛɛ tsuɔ nii kɛfiɔ Yehowa ‘yoo’ lɛ sɛɛ. “Gbɔi abii aaatswa ogbogboi, ni amɛmaŋtsɛmɛi lɛ aaasɔmɔo; ejaakɛ mimlifu mli miyio yɛ, shi mimlihilɛ naa lɛ mimusuŋ etsɔ mi yɛ ohe.” (Yesaia 60:10) Yehowa jie emɔbɔnalɛ lɛ kpo yɛ afii ohai ekpaa D.Ŋ.B. beni gbɔi ye amɛbua tsumaa nitsumɔ ní atsu yɛ Yerusalem lɛ. (Ezra 3:7; Nehemia 3:26) Yɛ ŋmɛnɛ mlibaa ní da mli lɛ, “gbɔi,” ni ji asafo babaoo lɛ fiɔ shwɛɛnii ní afɔ amɛ mu lɛ asɛɛ kɛtswaa anɔkwa jamɔ amɛmaa shi. Amɛyeɔ amɛbuaa kɛtswaa Kristofoi asui yɛ amɛ Biblia kaselɔi lɛ amli, ni amɛtsɔɔ no nɔ amɛtswaa Kristofoi asafoi amɛmaa shi ni amɛwajeɔ Yehowa gbɛjianɔtoo lɛ ‘gbogboi’ ní tamɔ maŋtiase lɛ. (1 Korintobii 3:10-15) Amɛmamɔɔ tsũi diɛŋtsɛ hu, ni amɛkɛ mɔdɛŋbɔɔ tsuɔ nii waa yɛ Maŋtsɛyeli Asai, Kpeei Asai, kɛ Betel nitsumɔhe tsũi amaamɔ mli. Enɛ hewɔ lɛ amɛfataa amɛnyɛmimɛi ní afɔ amɛ mu lɛ ahe ni amɛtsuɔ Yehowa gbɛjianɔtoo ní shwereɔ lɛ hiamɔ nii ahe nii.—Yesaia 61:5.
16, 17. (a) Áha Nyɔŋmɔ gbɛjianɔtoo lɛ naa ‘agbói’ lɛ anaa ekamɔ yɛ mɛɛ gbɛ nɔ? (b) ‘Maŋtsɛmɛi’ esɔmɔ Zion yɛ mɛɛ gbɛ nɔ? (d) Mɛni baaba mɛi ní bɔɔ mɔdɛŋ akɛ amɛaaŋamɔ ‘agbói’ ní Yehowa sumɔɔ ní eha amɛnaa akamɔ lɛ anɔ?
16 Daa afi lɛ, yɛ mumɔŋ tsumaa he gbɛjianɔtoo ní yaa nɔ lɛ hewɔ lɛ, “gbɔi” akpei ohai abɔ kɛ Yehowa gbɛjianɔtoo lɛ bɔiɔ bɔɔ, ni hegbɛ yɛ kɛha mɛi babaoo lolo akɛ amɛ hu amɛbafata he. Yehowa kɛɔ akɛ: “Ogbói lɛ anaa aaakamɔ be fɛɛ be, shwane kɛ nyɔɔŋ fɛɛ lɛ aŋamɔŋ, koni akɛ jeŋmaji lɛ ahewalɛ lɛ aba oŋɔɔ, ní akpala amɛmaŋtsɛmɛi lɛ kɛba.” (Yesaia 60:11) Shi, namɛi ji ‘maŋtsɛmɛi’ ni nyiɛɔ hiɛ ní akɛ jeŋmaji lɛ ahewalɛ lɛ baa Zion lɛ? Yɛ blema beaŋ lɛ, Yehowa tsirɛ nɔyelɔi komɛi atsuii ni ‘amɛsɔmɔ’ Zion. Ákɛ nɔkwɛmɔnɔ lɛ, Koresh ŋɔ hegbɛ lɛ ni ewo Yudafoi lɛ agbɛ kɛku amɛsɛɛ kɛtee Yerusalem koni amɛyasaa amɛma sɔlemɔtsu lɛ. Yɛ sɛɛ mli lɛ, Artashasta kɛ nibii ní jara wawai ke ni ewo Nehemia gbɛ koni eya ní eyasaa etswa Yerusalem gbogboi lɛ. (Ezra 1:2, 3; Nehemia 2:1-8) Lɛɛlɛŋ, “maŋtsɛ tsui tamɔ faai ní hoɔ yɛ Yehowa dɛŋ.” (Abɛi 21:1) Wɔ-Nyɔŋmɔ lɛ baanyɛ atsirɛ maŋtsɛmɛi ní he wa po ní amɛfee nii yɛ esuɔmɔnaa nii kɛ gbeekpamɔ naa.
17 Yɛ ŋmɛnɛŋmɛnɛ beaŋ lɛ, ‘maŋtsɛmɛi’ loo je lɛŋ nɔyelɔi babaoo eka akɛ amɛaaŋamɔ Yehowa gbɛjianɔtoo lɛ naa ‘agbói’ lɛ. Shi kɛlɛ, mɛi krokomɛi esɔmɔ Zion kɛtsɔ yiŋkpɛi ní amɛfee, ní ye bua ní eha ‘agbói’ lɛ anaa kamɔ lɛ nɔ. (Romabii 13:4) Yɛ afi 1919 lɛ, je lɛŋ nɔyelɔi ŋmɛɛ Joseph F. Rutherford kɛ ehefatalɔi lɛ ahe kɛjɛ tsuŋwoo ní ejaaa gbɛ mli. (Kpojiemɔ 11:13) Adesai anɔyelii “emii” yiwaa babaoo ní tamɔ nu afua ní Satan kɛba yɛ eshigbeemɔ kɛmiijɛ ŋwɛi lɛ sɛɛ lɛ. (Kpojiemɔ 12:16) Nɔyelii komɛi ewo jamɔ he tsui namɔ he hewalɛ, bei komɛi lɛ, yɛ Yehowa Odasefoi agbɛfaŋ titri. Nɛkɛ sɔɔmɔ nɛɛ eha efee mlɛo kɛha gbɔmɛi asafoi babaoo ní he jɔ lɛ akɛ amɛaaho kɛtsɔ ‘agbói’ lɛ amli kɛbote Yehowa gbɛjianɔtoo lɛ mli. Ni shitee-kɛ-wolɔi ní bɔɔ mɔdɛŋ akɛ amɛaaŋamɔ nakai ‘agbói’ lɛ hu? Amɛyeŋ omanye kɔkɔɔkɔ. Yehowa wie yɛ amɛhe akɛ: “Jeŋmaŋ loo maŋtsɛyeli ní sɔmɔɔɔo lɛ hiɛ aaakpata, ni nakai jeŋmaji lɛ, fitemɔ aaafite amɛ.” (Yesaia 60:12) Mɛi fɛɛ ní wuuɔ amɛshiɔ Nyɔŋmɔ ‘yoo’ lɛ—aŋkroaŋkroi jio, gbɛjianɔtoi jio—amɛhiɛ baakpata, kɛ́ etsɛ aahu lɛ, yɛ Harmagedon ta ní baa lɛ mli.—Kpojiemɔ 16:14, 16.
18. (a) Mɛni ji shiwoo ní akɛha akɛ tsei baashwere babaoo yɛ Israel lɛ shishinumɔ? (b) Mɛni ji ‘Yehowa naji anaamɔhe’ lɛ ŋmɛnɛ?
18 Yɛ kojomɔ he kɔkɔbɔɔ nɛɛ sɛɛ lɛ, gbalɛ lɛ ku sɛɛ kɛtee hiɛnyamwoo kɛ shweremɔ he shiwoi anɔ ekoŋŋ. Yehowa jaje, beni ekɛ ‘eyoo’ lɛ wieɔ lɛ, akɛ: “Lebanon anunyam lɛ aaaba oŋɔɔ; sɛsɛo kɛ odum kɛ tsei ní nyɛɔ jalɛ lɛ fɛɛ, koni awula mihe krɔŋkrɔŋ lɛ, ní mawo minaji anaamɔhe lɛ hiɛ nyam.” (Yesaia 60:13) Tsei wuji ní buɔ kusuu lɛ feɔ hefɛo kɛ yibiiwoo babaoo he mfoniri. (Yesaia 41:19; 55:13) Wiemɔi ni ji ‘he krɔŋkrɔŋ’ kɛ “minaji anaamɔhe” ní yɔɔ kuku nɛɛ mli lɛ kɔɔ Yerusalem sɔlemɔtsu lɛ he. (1 Kronika 28:2; Lala 99:5) Shi, bɔfo Paulo tsɔɔ mli akɛ sɔlemɔtsu ní hi Yerusalem lɛ fee mumɔŋ sɔlemɔtsu kpeteŋkpele, ní ji gbɛjianɔtoo ní akɛbɛŋkɛɔ Yehowa yɛ jamɔ mli kɛtsɔɔ Kristo afɔleshaa lɛ nɔ lɛ henɔ krɛdɛɛ ko ní feɔ he mfoniri. (Hebribii 8:1-5; 9:2-10, 23) Ŋmɛnɛ, Yehowa woɔ ‘enaji anaamɔhe,’ ni ji mumɔŋ sɔlemɔtsu kpeteŋkpele nɛɛ kpoi ní yɔɔ shikpɔŋ nɔ lɛ hiɛ nyam. Kpoi nɛɛ anɔ bafeɔ fɛo aahu akɛ amɛgbalaa gbɔmɛi kɛjɛɔ jeŋmaji fɛɛ mli koni amɛbaná anɔkwa jamɔ mli gbɛfaŋnɔ yɛ jɛmɛ.—Yesaia 2:1-4; Hagai 2:7.
19. Mɛni abaanyɛ shitee-kɛ-wolɔi lɛ anɔ ní amɛkpɛlɛ nɔ, ni kɛ́ etsɛ aahu lɛ, mɛɛ be amɛbaafee enɛ?
19 Agbɛnɛ, beni Yehowa gbalaa ejwɛŋmɔ kɛyaa shitee-kɛ-wolɔi lɛ anɔ ekoŋŋ lɛ, ekɛɛ akɛ: “Mɛi ní wao yi lɛ abii lɛ hu aaaba abakotoo, ni mɛi ní gbe ohe guɔ lɛ fɛɛ aaabakula onajiashi, ni amɛaatsɛ́o akɛ Yehowa maŋ, Israel Mɔ krɔŋkrɔŋ lɛ Zion lɛ.” (Yesaia 60:14) Hɛɛ, na ní amɛaana shweremɔ babaoo kɛ shihilɛ gbɛ ní hi fe fɛɛ ní Nyɔŋmɔ jɔɔmɔ kɛbaa ewebii anɔ lɛ baanyɛ shitee-kɛ-wolɔi komɛi anɔ ni amɛbaaba amɛbakoto ‘yoo’ lɛ ni amɛaabo amɛtsɛ́ lɛ. Ni tsɔɔ akɛ, abaanyɛ amɛnɔ ní amɛkpɛlɛ nɔ—kɛ́ etsɛ aahu lɛ, yɛ Harmagedon—ákɛ shwɛɛnii ní afɔ amɛ mu lɛ kɛ amɛhefatalɔi lɛ damɔ shi kɛha Nyɔŋmɔ ŋwɛi gbɛjianɔtoo lɛ, ni ji “Yehowa maŋ, Israel Mɔ krɔŋkrɔŋ lɛ Zion lɛ” lɛɛlɛŋ.
Nibii ní Yɔɔ lɛ kɛ Nitsumɔ
20. Mɛɛ shihilɛi amli tsakemɔ kpele ‘yoo’ lɛ ná mli niiashikpamɔ?
20 Kwɛ shihilɛi amli tsakemɔ kpele ní Yehowa ‘yoo’ lɛ ná mli niiashikpamɔi! Yehowa wie akɛ: “Yɛ kwá ní aaakwao ní anyɛ̃ɔ ní mɔ ko mɔ ko tsɔɔɔ omli lɛ najiaŋ lɛ, mikɛo aaafee naanɔ anunyam kɛ yinɔi pii anyamɔ. Ni ooonu jeŋmaji afufɔ, ni oooye maŋtsɛmɛi akpokuai, ni ooole akɛ mi, Yehowa, ji oyiwalaherelɔ, ni okpɔlɔ ji Yakob hewalɔ lɛ.”—Yesaia 60:15, 16.
21. (a) Blema Yerusalem batsɔ “anunyam” maŋ yɛ mɛɛ gbɛ nɔ? (b) Mɛɛ jɔɔmɔi Yehowa tsuji ní afɔ amɛ mu lɛ ená mli ŋɔɔmɔ kɛjɛ afi 1919 kɛbaa, ni amɛnu “jeŋmaji afufɔ” yɛ mɛɛ gbɛ nɔ?
21 Afii 70 sɔŋŋ ho ní blema Yerusalem bɛ shihilɛ mli, kɛ́ wɔɔwie he nakai, “ní mɔ ko mɔ ko tsɔɔɔ [emli].” Shi kɛjɛ afi 537 D.Ŋ.B. kɛbaa lɛ, Yehowa ha gbɔmɛi bahi maŋtiase lɛ mli ekoŋŋ, ni eha etsɔ “anunyam” maŋ. Nakai nɔŋŋ hu kɛbaa klɛŋklɛŋ jeŋ ta lɛ naagbee gbɛ lɛ, Nyɔŋmɔ Israel lɛ ná amaŋfɔfeemɔ be ko, beni amɛnu he akɛ ‘akwá amɛ kwraa’ lɛ mli niiashikpamɔ. Shi Yehowa kpɔ̃ etsuji ní afɔ amɛ mu lɛ kɛjɛ nomŋɔɔ mli yɛ afi 1919, ni kɛjɛ nakai beaŋ kɛbaa nɛɛ, ekɛ hiɛyaa kɛ mumɔŋ shweremɔ babaoo ní anako eko ní tamɔ nakai dã ejɔɔ amɛ. Ewebii enu “jeŋmaji afufɔ,” ni amɛkɛ nibii ní jɛ jeŋmaji lɛ amli etsu nii kɛha anɔkwa jamɔ hiɛyaa. Ákɛ nɔkwɛmɔnɔ lɛ, ŋmɛnɛŋmɛnɛ beaŋ tsɔnei ahe nilee ní akɛtsuɔ nii yɛ nilee mli lɛ eha anyɛ atsɔɔ Bibliai kɛ Biblia kasemɔ woji ashishi ni akala yɛ wiemɔi ohai abɔ mli. Nɔ ni ejɛ enɛ mli eba ji akɛ, gbɔmɛi akpei ohai abɔ kɛ Yehowa Odasefoi kaseɔ Biblia lɛ daa afi ni amɛbaleɔ akɛ Yehowa ji amɛ-Yiwalaherelɔ kɛ Kpɔlɔ, kɛtsɔ Kristo nɔ.—Bɔfoi lɛ Asaji 5:31; 1 Yohane 4:14.
Gbɛjianɔtoo Mli Hiɛyaa
22. Mɛɛ hiɛyaa krɛdɛɛ ko he shiwoo Yehowa kɛha?
22 Gbɛjianɔtoo mli hiɛyaa fata Yehowa webii ahiɛyaa yɛ amɛyifalɛ mli lɛ he. Yehowa jaje akɛ: “Akɔɔble najiaŋ lɛ mikɛ shika aaaba, ni dade najiaŋ lɛ mikɛ jwiɛtɛi aaaba, ni tsei anajiaŋ lɛ akɔɔble, ni tɛi anajiaŋ lɛ dade; ni maŋɔ hejɔlɛ mafee onɔyelɔi, ni maŋɔ jalɛ mafee o-nukpai.” (Yesaia 60:17) Shika ní akɛyeɔ akɔɔble najiaŋ lɛ ji hiɛyaa, ni nakai nɔŋŋ eji yɛ nibii krokomɛi ní atsĩ amɛtã yɛ biɛ lɛ hu agbɛfaŋ. Yɛ enɛ kɛ gbeekpamɔ naa lɛ, Yehowa webii etee nɔ amɛná asafo gbɛjianɔtoo mli hiɛyaa mli niiashikpamɔi yɛ naagbee gbii lɛ amli fɛɛ.
23, 24. Mɛɛ hiɛyaa yɛ asafo gbɛjianɔtoo mli Yehowa webii ená mli niiashikpamɔ kɛjɛ afi 1919 kɛbaa?
23 Beni shɛɔ afi 1919 lɛ, no mli lɛ asafoi lɛ yɛ onukpai kɛ asafoŋ sɔɔlɔi ní akɛ oshikifɔɔ ehala amɛ yɛ demokrase gbɛ nɔ. Kɛjɛ nakai afi lɛ nɔ kɛbaa lɛ, atsɔ teokrase gbɛ nɔ ahala sɔɔmɔ nɔkwɛlɔ koni ekwɛ maŋ shiɛmɔ nitsumɔi anɔ yɛ asafo lɛ mli, shi shihilɛi komɛi ba, ni onukpai ní akɛ oshikifɔɔ ehala amɛ lɛ ateŋ mɛi komɛi te shi amɛwo sɔɔmɔ nɔkwɛlɔ lɛ. Yɛ afi 1932 lɛ, nibii tsake. Atsɔ Watchtower lɛ nɔ akɛ gbɛtsɔɔmɔ ha asafoi lɛ akɛ amɛkɛ oshikifɔɔ gbɛ ní atsɔɔ nɔ ahalaa onukpai kɛ asafoŋ sɔɔlɔi lɛ akatsu nii dɔŋŋ. Shi moŋ, asafo lɛ baahala sɔɔmɔ ajinafoi akuu koni amɛkɛ sɔɔmɔ nɔkwɛlɔ lɛ afee ekome kɛtsu nii. No bafee hiɛyaa kpele diɛŋtsɛ.
24 Yɛ afi 1938 lɛ, akɛ “shika” babaoo ba beni ama nɔ mi jogbaŋŋ akɛ esa akɛ atsɔ teokrase gbɛ nɔ ahala sɔɔlɔi fɛɛ yɛ asafo lɛ mli lɛ. Akɛ asafo lɛ nitsumɔ nɔkwɛmɔ wo asafo nɔkwɛlɔ ni ji company servant (sɛɛ mli lɛ, asafo lɛ sɔɔlɔ) kɛ sɔɔlɔi krokomɛi ní yeɔ buaa lɛ, ní ahalaa amɛ fɛɛ yɛ “tsulɔ anɔkwafo kɛ nilelɔ” lɛ nɔkwɛmɔ shishi lɛ adɛŋ.c (Mateo 24:45-47) Shi, yɛ afi 1972 lɛ, abana akɛ Ŋmalɛ naa gbɛ ní atsɔɔ nɔ akwɛɔ asafo nɔ ji kɛtsɔ onukpai akuu nɔ, shi jeee kɛtsɔ gbɔmɔ kome nɔ. (Filipibii 1:1) Afee tsakemɔi krokomɛi yɛ asafoi komekomei lɛ kɛ Nɔyeli Kuu lɛ hu mli. Ana Nɔyeli Kuu lɛ mli tsakemɔ ko yɛ October 7, 2000, beni atswa adafi akɛ Nɔyeli Kuu lɛ mli bii ní miisɔmɔ akɛ Watch Tower Society of Pennsylvania kɛ nitsumɔhei krokomɛi ní fata he lɛ amli nitsumɔ nɔkwɛlɔi lɛ diɛŋtsɛ ejɛ amɛsuɔmɔ mli amɛŋmɛɛ nakai gbɛhei lɛ ahe lɛ. Yɛ nɛkɛ gbɛ nɔ lɛ, Nɔyeli Kuu lɛ, ní ji tsulɔ anɔkwafo kɛ nilelɔ lɛ najiaŋdamɔlɔ lɛ, nyɛɔ egbalaa ejwɛŋmɔ kɛyaa “Nyɔŋmɔ asafo lɛ” kɛ mɛi ni kɛ asafo lɛ bɔɔ, ni ji tooi krokomɛi lɛ amumɔŋ hiamɔ nii ahe nitsumɔ nɔ babaoo. (Bɔfoi lɛ Asaji 20:28) Nɛkɛ gbɛjianɔtoi nɛɛ fɛɛ bafee hiɛyaai kpelei. Amɛwaje Yehowa gbɛjianɔtoo lɛ ni eha ejálɔi lɛ ená jɔɔmɔi.
25. Namɔ ha gbɛjianɔtoo mli hiɛyaa ní Yehowa webii ná lɛ ba, ni mɛɛ sɛɛnamɔi amɛkpá kɛjɛ mli?
25 Namɔ ha nɛkɛ hiɛyaai nɛɛ fɛɛ ba? Ani amɛjɛ adesai komɛi agbɛjianɔtoo mli nyɛmɔ loo amɛsusumɔ mli ŋaalee ko mli? Dabi, ejaakɛ Yehowa jaje akɛ: “Mikɛ shika aaaba.” Nɛkɛ hiɛyaa nɛɛ fɛɛ jɛ ŋwɛi kudɔmɔ kɛ gbɛtsɔɔmɔ hewɔ. Beni Yehowa webii baa amɛhe shi amɛhaa egbɛtsɔɔmɔ ní amɛfeɔ tsakemɔi lɛ, belɛ amɛmiikpá sɛɛnamɔi. Toiŋjɔlɛ hiɔ shi yɛ amɛteŋ, ni suɔmɔ kɛha jalɛ nifeemɔ tsirɛɔ amɛ ni amɛsɔmɔɔ lɛ.
26. Mɛɛ okadi ní shitee-kɛ-wolɔi po kadiɔ akɛnaa anɔkwa Kristofoi?
26 Toiŋjɔlɛ ní Nyɔŋmɔ kɛhaa lɛ yɛ hewalɛ ní tsakeɔ mɔ. Yehowa wo shi akɛ: “Anuŋ yiwalɛ he dɔŋŋ yɛ oshikpɔŋ lɛ nɔ, anuŋ fitemɔ loo hiɛkpatamɔ he dɔŋŋ yɛ ohusui lɛ amli, shi oootsɛ́ yiwalaheremɔ ákɛ ogbogboi, ni oootsɛ́ yijiemɔ ákɛ ogbói.” (Yesaia 60:18) Kwɛ bɔ ni enɛ ji anɔkwale ha! Shitee-kɛ-wolɔi po kpɛlɛɔ nɔ akɛ toiŋjɔlɛ shihilɛ ji anɔkwa Kristofoi akadimɔ nii ko ní sa kadimɔ jogbaŋŋ. (Mika 4:3) Nɛkɛ toiŋjɔlɛ ní amɛkɛ Nyɔŋmɔ yɔɔ, ní yɔɔ Yehowa Odasefoi diɛŋtsɛ hu ateŋ nɛɛ haa Kristofoi akpeehe fɛɛ kpeehe feɔ abobaahe ní haa mɔ hejɔɔmɔ yɛ yiwalɛ jeŋ mli. (1 Petro 2:17) Eji toiŋjɔlɛ babaoo ní baahi shi beni shikpɔŋ nɔ bii fɛɛ baafee “Yehowa kaselɔi” lɛ he okadi ní aatsɔ hiɛ aana.—Yesaia 11:9; 54:13.
Anunyam La Kpɛmɔ ni Tsɔɔ Ŋwɛi Nɔkpɛlɛmɔ
27. Mɛɛ la ní yɔɔ daa kpɛ́ɔ yɛ Yehowa ‘yoo’ lɛ nɔ?
27 Yehowa tsɔɔ bɔ ni la ní kpɛ́ɔ yɛ Yerusalem nɔ lɛ naawalɛ ji beni ejaje akɛ: “Jeee hulu baatsɔ ola shwane dɔŋŋ, ni asaŋ jeee nyɔɔŋtsere baakpɛ́ ní jeŋ atse ahao; shi moŋ Yehowa aaatsɔ ola kɛaatee naanɔ, ni o-Nyɔŋmɔ lɛ aaatsɔ onunyam. Ohulu lɛ enyɔŋ shi dɔŋŋ, ni onyɔɔŋtsere lɛ hu gboŋ; ejaakɛ Yehowa aaatsɔ ola kɛaatee naanɔ, ni okɔmɔyeli gbii lɛ hu sɛɛ aaafo.” (Yesaia 60:19, 20) Yehowa baakã he ehi shi akɛ “[la] kɛaatee naanɔ” kɛha ‘eyoo’ lɛ. “Enyɔŋ shi” tamɔ hulu, ni ‘egboŋ’ hu tamɔ bɔ ni nyɔɔŋtsere woɔ duŋ lɛ kɔkɔɔkɔ.d Enɔkpɛlɛmɔ la ní yɔɔ daa lɛ kpɛ́ɔ yɛ Kristofoi ní afɔ amɛ mu, ni ji Nyɔŋmɔ ‘yoo’ lɛ najiaŋdamɔlɔi ni ji adesai lɛ anɔ. Amɛ, kɛ asafo babaoo ní fata amɛhe lɛ, náa mumɔŋ la kpɛmɔ ní tamɔ nakai mli ŋɔɔmɔ aahu akɛ duŋ ní jɛɔ je lɛŋ maŋkwramɔ loo shika helɛtemɔ nifeemɔi amli lɛ nyɛɛɛ agbe lɛ kɔkɔɔkɔ. Ni amɛyɛ wɔsɛɛ be ní yɔɔ nyam diɛŋtsɛ ní Yehowa kɛma amɛhiɛ lɛ mli hekɛnɔfɔɔ.—Romabii 2:7; Kpojiemɔ 21:3-5.
28. (a) Mɛɛ shiwoo akɛha yɛ Yerusalem maŋ lɛ mli bii ní baaku amɛsɛɛ lɛ agbɛfaŋ? (b) Mɛni Kristofoi ní afɔ amɛ mu lɛ anine shɛ nɔ yɛ afi 1919? (d) Mɛɛ be sɛɛkɛlɛ shikpɔŋ lɛ baatsɔ jalɔi lɛ anɔ̃ kɛyashi?
28 Yehowa tee nɔ ekɛɛ yɛ Yerusalem maŋbii lɛ ahe akɛ: “Omaŋ muu lɛ fɛɛ aaatsɔmɔ jalɔi sɔŋŋ; amɛaaye shikpɔŋ lɛ nɔ kɛaatee naanɔ, amɛji miŋmɔ lɛ mli tsonine ní frɔkeɔ kɛ mininenaa nitsumɔ ní akɛaawo mihiɛ nyam.” (Yesaia 60:21) Beni heloonaa Israel ku esɛɛ kɛjɛ Babilon lɛ, ‘amɛbaye shikpɔŋ lɛ nɔ.’ Shi yɛ nakai beaŋ lɛ, “kɛaatee naanɔ” lɛ bafee kɛbashi Ŋ.B. klɛŋklɛŋ afii oha lɛ mli pɛ, beni Roma asraafoi bakpata Yerusalem kɛ Yudafoi amaŋ lɛ hiɛ lɛ. Yɛ afi 1919 lɛ, Kristofoi ní afɔ amɛ mu lɛ ateŋ shwɛɛnii lɛ ye amɛhe kɛjɛ mumɔŋ nomŋɔɔ mli ni amɛbaye mumɔŋ shikpɔŋ ko nɔ. (Yesaia 66:8) Nɔ ni kadiɔ shikpɔŋ nɛɛ, loo hegbɛ ní aha amɛ akɛ amɛkɛtsu nii lɛ ji mumɔŋ shweremɔ ní tamɔ paradeiso shihilɛi ní fiteŋ lɛ. Ákɛ mɛi ni tamɔɔɔ blema Israel lɛ, ákɛ kuu lɛ, mumɔŋ Israel efeeŋ mɛi ní yeee anɔkwa. Kɛfata he lɛ, Yesaia gbalɛ lɛ baaná emlibaa diɛŋtsɛ hu beni shikpɔŋ lɛ tsɔɔ paradeiso diɛŋtsɛ ní “hejɔlɛ babaoo” yɔɔ mli lɛ. Nakai beaŋ lɛ, shikpɔŋ lɛ baatsɔ jalɔi ní yɔɔ shikpɔŋ nɔ hiɛnɔkamɔ lɛ anɔ̃ kɛya naanɔ.—Lala 37:11, 29.
29, 30. “Mɔ bibioo” lɛ ebatsɔ “mɛi akpe” yɛ mɛɛ gbɛ nɔ?
29 Anaa shiwoo ko ní hiɛdɔɔ yɔɔ he, ní Yehowa kɛ lɛ diɛŋtsɛ egbɛi lɛ fee sɛɛdaamɔ nɔ lɛ, yɛ Yesaia yitso 60 lɛ naagbee. Ejaje akɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa: Kɛ́ shɛ ebe lɛ mi, Yehowa, maha efee oyá!” (Yesaia 60:22) Beni aha mɛi ní afɔ amɛ mu, ní amɛgbɛ amɛshwã lɛ bɔi nitsumɔ ekoŋŋ yɛ afi 1919 lɛ, no mli lɛ amɛji “mɔ bibioo.”e Shi amɛyifalɛ lɛ ku ebɔ he beni akɛ mumɔŋ Israelbii lɛ ateŋ mɛi ní eshwɛ lɛ bafata amɛhe lɛ. Ni shweremɔ lɛ tee hiɛ oyayaayai beni asafo babaoo lɛ anaabuamɔ lɛ je shishi lɛ.
30 Etsɛɛɛ kɛkɛ ni toiŋjɔlɛ kɛ jalɛ nifeemɔ ní yɔɔ Nyɔŋmɔ webii ateŋ lɛ gbala mɛi ní yɔɔ jalɛ tsuii lɛ ateŋ mɛi babaoo aahu akɛ “mɔ fioo” lɛ bada ni ebatsɔ “maŋ ni wa” diɛŋtsɛ. Amrɔ nɛɛ, emli bii lɛ ayi fá kwraa fe je lɛŋ maji ní yeɔ amɛ diɛŋtsɛ amɛhe nɔ lɛ ateŋ babaoo. Eyɛ faŋŋ akɛ, Yehowa etsɔ Yesu Kristo nɔ ekudɔ Maŋtsɛyeli nitsumɔ lɛ, ni eha etee hiɛ oyayaayai. Kwɛ miishɛɛ ní eji akɛ wɔmiina bɔ ni anɔkwa jamɔ shwereɔ yɛ je lɛŋ fɛɛ lɛ, ni wɔnáa mli gbɛfaŋnɔ hu! Hɛɛ, eji miishɛɛ sane akɛ wɔɔyɔse akɛ shweremɔ nɛɛ kɛ anunyam bahaa Yehowa, mɔ ni gba nibii nɛɛ eshwie shi jeeŋmɔ lɛ.
[Shishigbɛ niŋmai]
a Eeenyɛ efee akɛ Tarshish hi he ni ale ŋmɛnɛ akɛ Spain lɛ. Shi, taakɛ woji komɛi ní atsɛɔ amɛmli saji asɛɛ lɛ tsɔɔ lɛ, wiemɔ ni ji “Tarshish lɛji” lɛ tsɔɔ lɛlɛ henɔ pɔtɛɛ komɛi—“ŋshɔ hiɛ gbɛfaa lɛji wuji ní amɛ lɛlɛŋtsei lɛ kwɔlɔ”—ni ji lɛji ní “sa kɛha gbɛfaa kɛyaa Tarshish,” loo yɛ wiemɔ kroko mli lɛ, lɛji ni abuɔ akɛ amɛsa kɛha gbɛfaa kakadaŋŋ kɛyaa lɛjiadaamɔhei ní yɔɔ shɔŋŋ.—1 Maŋtsɛmɛi 22:48.
b Eyɛ mli akɛ Kristofoi ní yɔɔ ekãa, ní amɛyɔɔ shikpɔŋ nɔ hiɛnɔkamɔ lɛ kɛ Nyɔŋmɔ Israel lɛ bɔi bɔɔ dani afi 1930 shɛ moŋ, shi amɛyifalɛ lɛ bɔi hiɛyaa yɛ gbɛ ní sa kadimɔ waa nɔ yɛ afi 1930 afii lɛ amli.
c Yɛ nakai gbii lɛ amli lɛ, atsɛɔ asafoi ni yɔɔ lɛ akɛ companies.
d Bɔfo Yohane kɛ wiemɔi ní tamɔ nakai nɔŋŋ tsu nii ni ekɛtsɔɔ bɔ ni “Yerusalem hee,” ni ji mɛi 144,000 lɛ ji, beni amɛyɔɔ amɛ ŋwɛi anunyam mli lɛ mli. (Kpojiemɔ 3:12; 21:10, 22-26) Enɛ sa jogbaŋŋ, ejaakɛ “Yerusalem hee” lɛ damɔ shi kɛha Nyɔŋmɔ Israel lɛ mli bii fɛɛ, yɛ be mli ní amɛnine eshɛ amɛ ŋwɛi nyɔmɔwoo lɛ nɔ, ní amɛkɛ Yesu Kristo ebatsɔmɔ Nyɔŋmɔ ‘yoo’ ni ji “ŋwɛi Yerusalem lɛ” fã ní he hiaa fe fɛɛ lɛ sɛɛ.—Galatabii 4:26.
e Yɛ afi 1918 lɛ, kɛ́ aja mli lɛ, mɛi abɔ ni kɛ amɛhe woɔ wiemɔ lɛ shiɛmɔ mli daa nyɔŋ lɛ ayifalɛ shɛɛɛ mɛi 4,000.
[Mfoniri ni yɔɔ baafa 305]
Akɛ famɔ ha ‘yoo’ lɛ akɛ ‘ete shi’
[Mfoniri ni yɔɔ baafa 312, 313]
“Tarshish lɛji lɛ” tere amɛjatsu ni ji Yehowa jálɔi lɛ kɛmiiba