Paradeiso Ni Akɛba Ekoŋŋ Woɔ Nyɔŋmɔ Hiɛ Nyam
“Mawo minaji amamɔ he lɛ hiɛ nyam.”—YESAIA 60:13
1, 2. (a) Mɛni Nyɔŋmɔ gba yɛ shikpɔŋ lɛ he kɛtsɔ egbalɔ Yesaia nɔ? (b) Kɛ wɔkwɛ wɔsɛɛ be kɛbote afii akpe mli lɛ, mɛni wɔnaa?
YEHOWA bɔ shikpɔŋ lɛ akɛ shibɔlemɔ ŋulami ni yɔɔ enaji ashi, akɛ ekadi najiashi maaŋoo kɛha lɛ. Nyɔŋmɔ tsɔ egbalɔ Yesaia nɔ egba akɛ ‘ebaawo enaji anaamɔ he lɛ hiɛ nyam.’ (Yesaia 60:13) Wɔbaanyɛ wɔtsɔ Biblia lɛ ni jɛ mumɔŋ lɛ yelikɛbuamɔ nɔ wɔkɛtee nɔ ko ni tamɔ shwɛde ko ni naa wa waa, ni wɔkwɛ kɛbote adesai awɔsɛɛ be afii akpe mli. Mɛɛ nii ni anaa ni yɔɔ miishɛɛ babaoo wɔhiŋmɛi kɛkpeɔ nɛkɛ! Shikpɔŋ muu lɛ fɛɛ miikpe kɛ fɛo ko ni tɔmɔ bɛ mli ni Abɔɔfeelɔ ni fe fɛɛ yɛ jeŋ muu fɛɛ lɛ kɛba. No mli lɛ akɛ Paradeiso eba ekoŋŋ yɛ jeŋ muu fɛɛ kɛha adesai!
2 Hɛɛ, Ŋwɛi Flooflonyo lɛ ni je adesa shihilɛ shishi yɛ paradeiso abɔɔ lɛ mli lɛ yɛ gbɔmɔ miishɛɛ ni fe fɛɛ ni eeena lɛ he susumɔ yɛ ejwɛŋmɔ mli. Mɛɛ Bɔlɔ ni yɔɔ suɔmɔ lɛlɛŋ adesai ena nɛkɛ, akɛ ejeee wiemɔ hewoo akɛ wɔɔkɛɛ akɛ, “Nyɔŋmɔ lɛ suɔmɔ ji lɛ!” (1 Yohane 4:8, 16) Hii kɛ yei ni amɛdara baanyɛ ahi shi yɛ Paradeiso ni aku sɛɛ akɛba ekoŋŋ lɛ mli yɛ adesa emuuyeli ni fatɔɔ ko bɛ mli lɛ mli yɛ ekomefeemɔ mli akɛ nyɛmimɛi hii kɛ yei. (Yesaia 9:5) Akɛni suɔmɔ ji nɔ ni tsirɛɔ amɛ hewɔ lɛ, amɛba amɛhe shi kwraa yɛ emuuyeli mli amɛha anunyam ŋwɛi kɛ shikpɔŋ Bɔlɔ lɛ, ni ji Yehowa Nyɔŋmɔ.
3, 4. (a) Ŋwɛi kɛ shikpɔŋ kɛ amɛhe baakpa gbee yɛ mɛɛ gbɛ nɔ? (b) Te ŋwɛibɔfoi lɛ baahere nɔ amɛha tɛŋŋ yɛ be ni aku sɛɛ akɛ Paradeiso eba shikpɔŋ nɔ ekoŋŋ lɛ?
3 Afii akpei abɔ dani enɛ aaaba lɛ, yɛ be mli ni akɛ mumɔ naa wiemɔ ko tsɔɔ bɔ ni emaŋtsɛyeli he lɛ yɔɔ lɛ mli lɛ, Nyɔŋmɔ wie nɛkɛ wiemɔi ni ŋɔɔ nɛɛ etsɔɔ ewebii ni ehala amɛ lɛ: “Ŋwɛi lɛ, misɛ̃i ni, ni shikpɔŋ lɛ, minaneshi maaŋoo ni.” (Yesaia 66:1) Esa akɛ bɔ ni ‘enaneshi maaŋoo’ lɛ, ni ji Paradeiso shikpɔŋ lɛ yɔɔ nyam ha lɛ kɛ bɔ ni emaŋtsɛsɛi ni yɔɔ ŋwɛi ni anaaa jɛmɛ lɛ yɔɔ nyam ha lɛ akpa gbee.
4 Yɛ be mli ni abɔɔ shikpɔŋ lɛ, mɛi ni ebɔle Nyɔŋmɔ maŋtsɛsɛi lɛ he kɛkpe yɛ ŋwɛi maŋtsɛyeli he lɛ na nɔ ni yaa nɔ yɛ shikpɔŋ lɛ nɔ lɛ. Kwɛ miishɛɛ ni amɛbaana yɛ be mli ni amɛhiŋmɛii susuɔ enunyam kpɛmɔ lɛ he lɛ! Te aaafee tɛŋŋ ni amɛaakpa suɔmɔ mli ni amɛaajɛ amɛla yɛ enɛ he Iɛ? (Okɛto Zefania 3:17; Lala 100:2 he.) Bɔlɔ ni yɔɔ miishɛɛ ni ehiɛ sɔ nɔ ni ena lɛ kɛ mumɔ tsirɛ eshikpɔŋ nɔ niŋmalɔ lɛ koni etsɔɔ nɔ ni tee nɔ yɛ ŋwɛi lɛ mli pɛpɛɛpɛ, akɛ: “Leebi ŋulamii lɛ fɛɛ la nyamɔ lala shikome ni Nyɔŋmɔ bii lɛ fɛɛ kwa bɔ oshe.” (Hiob 38:7) Kwɛ bɔ ni Nyɔŋmɔ bii ni ji ŋwɛibɔfoi lɛ fɛɛ baabolɔ waa kɛwo Nyɔŋmɔ hiɛ nyam, yɛ be mli ni aku sɛɛ akɛ Paradeiso eba ekoŋŋ lɛ.
5. Te esa akɛ wɔnu Nyɔŋmɔ shishijee yiŋtoo ni kɔɔ shikpɔŋ lɛ he lɛ ni nine aaashɛ nɔ ekoŋŋ lɛ he wɔha tɛŋŋ?
5 Eji nɔ ni haa wɔtsuii nyaa akɛ Ŋmalɛi Krɔŋkrɔŋi ni jɛ mumɔŋ lɛ aaama nɔ mi aha wɔ akɛ paradeiso shikpɔŋ ni yɛ naagbee lɛ akɛaaba lɛ ji nɔ ko ni Nyɔŋmɔ kɛ eyiŋtoo ema nɔ mi kɛjɛ shishijee tɔɔ. Nɛkɛ Nyɔŋmɔ yiŋtoo kɛha shikpɔŋ lɛ naagbee ni kanyaa nyamɔ kɛ yijiemɔ lɛ ji nɔ ko ni ja ni abaakpa gbɛ kɛjɛ Nyɔŋmɔ ni jɛɔ anunyam kome mli kɛyaa anunyam kroko mli ni egbojee lɛ kpojiemɔ efeee yaka kɔkɔɔkɔ lɛ dɛŋ. Yijiemɔ fɛɛ aha lɛ! —Lala 150:1, 2; Yesaia 45:18; Kpojiemɔ 21:3-5.
Mɛi Ni Atee Amɛ Shi Lɛ Yeɔ Buaa Yɛ Paradeiso Ni Akɛbaa Ekoŋŋ Lɛ Mli
6. Yɛ Harmagedon sɛɛ lɛ, mɛɛ gbɛ nɔ abaatsɔ ni ayi shikpɔŋ lɛ nɔ obɔ yɛ?
6 Eyɛ mli akɛ kɛ akɛto he lɛ, mɛi ni baaje Harmagedon mli lɛ baafee mɛi fioo moŋ, shi jeee fɔ ni amɛaafɔ bii lɛ pɛ nɔ abaatsɔ ni aha gbɔmɛi ayi shikpɔŋ lɛ nɔ obɔ. Yehowa ‘baawo enaji anaamɔ he lɛ hu hiɛ nyam,’ kɛtsɔ wala ni ekɛaaha mɛi ni yɔɔ kaimɔ bui lɛ amli ni Kristo kpɔmɔ afɔleshaa lɛ he baa sɛɛnamɔ kɛhaa amɛ lɛ nɔ. Mɛnɛɛmɛi hu baana hegbɛ ni amɛna nitsumɔ ni ŋɔɔ ni ji shikpɔŋ muu lɛ fɛɛ ni atsakeɔ lɛ afeɔ lɛ paradeiso ni yɔɔ fɛo fe fɛɛ lɛ mli gbɛfaŋnɔ.—Bɔfoi lɛ Asaji 24:15.
7. Mɛɛ Yesu wiemɔi mɛi ni baaje Harmagedon mli shweshweeshwe lɛ baaha ahi amɛjwɛŋmɔ mli?
7 Mɛi ni baaje Harmagedon mli lɛ hu baaha amɛjwɛŋmɔ ahi Nuŋtsɔ Yesu Kristo wiemɔi ni kanyaa mɔ lɛ nɔ yɛ be mli ni nɔ ko tsirɛ lɛ ni ekɛɛ akɛ: “Enɛ akafee nyɛ naakpɛɛ; ejaakɛ ŋmɛlɛtswaa lɛ miiba, nɔ mli ni mɛi fɛɛ ni yɔɔ gbohii abui lɛ amli lɛ aaanu egbee, ni amɛaajɛ kpo” lɛ. (Yohane 5:28, 29) Mɛɛ ŋmɛlɛtswaa nɛkɛ enɛ baaji yɛ be mli ni adesai ni egboi ni yɔɔ amɛgbohii abui amli lɛ aaaje shishi anu Nyɔŋmɔ Bi lɛ gbee ni eekɛɛ nɔ ko ni tamɔ wiemɔi ni ejaje etsɔɔ Lazaro, ni egbonyo ka bu mli yɛ Betania lɛ, akɛ: “Lazaro ee, jee kpo!”—Yohane 11:43.
8, 9. Namɛi eka shi faŋ akɛ amɛaafee klɛŋklɛŋbii ni aaatee amɛ shi ba wala hee mli yɛ shikpɔŋ nɔ, ni mɛɛ miishɛɛ enɛ kɛbaaba abaha mɛi ni eje Harmagedon mli shweshweeshwe lɛ?
8 Namɛi eka shi faŋŋ akɛ amɛaafee klɛŋklɛŋ bii ni abaatee amɛ shi kɛba wala hee mli yɛ Yesu Kristo Afii Akpe Nɔyeli lɛ shishi akɛ efamɔ lɛ nɔheremɔ hewɔ? Ebaanyɛ efee “tooi krokomɛi” lɛ ni gboi yɛ naagbee gbii ni tsɔ nibii agbɛjianɔtoo nɛɛ naagbee lɛ hiɛ lɛ titri. Amɛbaana mra shitee. (Yohane 10:16) Ewaŋ kɛhaŋ amɛ kwraa akɛ amɛaatsake amɛhe amɛwo jeŋ hee lɛ mli shihilɛ mli.—Okɛto Mateo 25:34; Yohane 6: 53, 54 he.
9 Kwɛ miishɛɛ ni mɛi ni eje Harmagedon mli lɛ baana yɛ be mli ni amɛaana ni atee “tooi krokomɛi” lɛ ni gboi yɛ yinɔ ni tsɔ “amanehulu kpeteŋkpele” lɛ hiɛ lɛ mli lɛ ashi lɛ! (Mateo 24:21) Mɛi ni amɛje Harmagedon mli lɛ kɛ yɔsemɔ hewalɛ ni amɛyɔɔ lɛ baayoo amɛ, ni amɛhere amɛ atuu, ni amɛkɛ amɛ afee ekome yɛ ekomefeemɔ ni amɛkɛsɔmɔɔ Ŋwɛi Flooflo Nyɔŋmɔ lɛ mli!
10. Kɛ, oje Harmagedon mli lɛ, mɛni okɛ ohiŋmɛii baana?
10 Akɛni oji mɛi ni amɛje Harmagedon mli lɛ ateŋ mɔ kome hewɔ lɛ, obaana bo diɛŋtsɛ oshikpɔŋ nɔ wekumɛi lɛ ateŋ klɛŋklɛŋ mɔ lɛ shitee. Kwɛ bɔ ni henumɔ ni okɛaakpee enɛ naa lɛ aaatamɔ fɔlɔi lɛ ni na bɔ ni Nuŋtsɔ Yesu tee amɛbi yoo ni eye afii 12 lɛ shi ni ekɛ lɛ wo amɛdɛŋ lɛ na lɛ nɔŋŋ eko. “Ni amrɔ nɔŋŋ lɛ amɛmii shɛ amɛhe naakpa.” (Marko 5:42, New World Translation.) Ah, hɛɛ, miishɛɛ ni anyɛŋ atsɔɔ mli baaji onɔ yɛ be mli ni ateɔ gbohii lɛ ashi kɛjɛɔ Hades kɛ ŋshɔ mli lɛ. (Kpojiemɔ 20:13) Oh, mɛɛ anunyam wɔ enɛ aaaji nɛkɛ, wɔ ni etsɛŋ kwraa ni ebaaba lɛ!
‘Lumɛi, Yɛ Shikpɔŋ Lɛ Fɛɛ Nɔ’
11, 12. (a) Mɛni Lala 45:17 kuɔ sɛɛ emaa nɔ mi? (b) Namɛi ateŋ Maŋtsɛ Yesu Kristo baahala “lumɛi yɛ shikpɔŋ lɛ nɔ fɛɛ” lɛ yɛ?
11 Akɛni ekɛ ehewalɛ tsuɔ nii ni ekɛteɔ adesai ni egboi ni ekɛ egbɔmɔtso akɛ adesa ni yeɔ emuu lɛ fɔ shi akɛ afɔleshaa nɔ kɛha amɛ lɛ ashi hewɔ lɛ, Yesu baanyɛ ni eha Lala 45:17 (New World Translation) aba mli. Nɛkɛ Lala nɛɛ kɔɔ Yesu Kristo he yɛ gbalɛ mli akɛ mɔ ni awo lɛ Maŋtsɛ: “Oshikpɔŋ nɔ blematsɛmɛi lɛ aaabatsɔmɔ obii, ni ooohala amɛ akɛ lumɛi yɛ shikpɔŋ lɛ fɛɛ nɔ.” Nɛkɛ Lala nɛɛ maa anɔkwale ni eji akɛ Yesu Kristo baatsɔ ŋwɛi tsɛ aha bii ni yɔɔ shikpɔŋ nɛɛ nɔ lɛ nɔ mi ekoŋŋ, ni akɛ ebaahala bii nɛɛ ateŋ mɛi komɛi akɛ “lumɛi yɛ shikpɔŋ lɛ fɛɛ nɔ.” Akɛ “David bi” ni akɛ Yuda obalayoo foro Maria kromɔ bi hewɔ lɛ, Yesu yɛ shikpɔŋ nɔ blematsɛmɛi aahu kɛyashi klɛŋklɛŋ tsɛ, Adam nɔ.—Luka 3:23-38.
12 Ani Lala 45:17 miikɛɛ akɛ mɛi ni tsutsu lɛ amɛji Yesu heloonaa blematsɛmɛi lɛ baatsɔmɔ ebihii kɛtsɔ shi ni eeetee amɛ kɛaajɛ gbohii ateŋ lɛ nɔ? Hɛɛ. Ani Lala 45:17 miikɛɛ hu akɛ akɛni ejɛ amɛmli hewɔ lɛ, Yesu kɛ odehei aduromɔ krɛdɛɛ ko baaduro amɛ ni ehala amɛ pɛ akɛ “lumɛi yɛ shikpɔŋ lɛ fɛɛ nɔ” yɛ be mli ni eba e-Paradeiso shihilɛ mli lɛ? Dabi. Ŋmalɛ lɛ mlibaa yɛ nɛkɛ gbɛ nɔ lɛ baaha gbɔmɛi akuu fioo ko pɛ afee “lumɛi” yɛ shikpɔŋ lɛ fɛɛ nɔ. Yɛ anɔkwa sane nɛɛ sɛɛ lɛ, jeee nɛkɛ blematsɛmɛi nɛɛ fɛɛ ji mɛi ni sa akɛ amɛnaa gbɛhe krɛdɛɛ ko yɛ shikpɔŋ nɔ yɛ Afii Akpe Nɔyeli lɛ mli. Maŋtsɛ Yesu Kristo baana gbɔmɛi babaoo fe eshikpɔŋ nɔ blematsɛmɛi lɛ ni ehala amɛ akɛ “lumɛi”—mɛi ni je Harmagedon mli lɛ ateŋ mɛi ni sa, ni jɛ “tooi krokomɛi” lɛ ni atee amɛ shi lɛ ateŋ, ni hii ni yɔɔ hemɔkɛyeli ni hi shi dani Kristofoi abe lɛ shɛ lɛ fata he. Ebaanyɛ ejɛ mɛnɛɛmɛi fɛɛ ateŋ ehala hii ni sa ewo lumɛi agbɛhe nɛɛ mli akɛ eshikpɔŋ nɔ najiaŋdamɔlɔi.
13, 14. Mɛi ni amɛje Harmagedon mli lɛ baana hegbɛ ni amɛkɛ amɛhiŋmɛii diɛŋtsɛ nɛɛ ana namɛi ni atee amɛ shi kɛjɛ gbohii ateŋ?
13 Susumɔ mɛi ni ato amɛ naa ni abaatee amɛ shi yɛ Mesia Maŋtsɛyeli lɛ shishi lɛ ahe. Kwɛmɔ! Ani wɔbaanyɛ wɔhe nɔ ni wɔnaa nɛɛ wɔye? Naa Habel, klɛŋklɛŋ adesa la odasefonyo lɛ, kɛ Henok, ni kɛ anɔkwa Nyɔŋmɔ lɛ nyiɛ lɛ. Noa hu yɛ, mɔ ni kpɛ adeka lɛ. Abraham, Isak kɛ Yakob, Israel maŋ lɛ blematsɛmɛi lɛ hu yɛ. Mose (ni jɛ Levi osɔfoi aweku lɛ mli lɛ) kɛ David ni akɛ lɛ fee naanɔ kpaŋmɔ kɛba Maŋtsɛyeli lɛ hu yɛ. Agbɛnɛ Yesaia, Yeremia, Ezekiel, Daniel kɛ Hebri gbalɔi ni ŋmala Biblia lɛ aahu kɛbashi amɛ naagbee mɔ ni ji Maleaki nɔ lɛ, kɛ agbɛnɛ Yohane Baptisilɔ lɛ kɛ agbɛnɛ Yosef, mɔ ni ŋɔ Yesu akɛ ebi lɛ.
14 Be ko lɛ Yesu kɛɛ Yudafoi lɛ akɛ amɛaana “Abraham kɛ Isak kɛ Yakob kɛ gbalɔi lɛ fɛɛ yɛ Nyɔŋmɔ maŋtsɛyeli lɛ mli,ni nyɛ diɛŋtsɛ lɛ ashwie nyɛ.” (Luka 13:28) Akɛ duromɔ krɛdɛɛ no baaha “asafo babaoo” ni ji shikpɔŋ nɔ bii ni je “Nyɔŋmɔ Ofe lɛ gbi wulu lɛ nɔ ta” lɛ mli lɛ kɛ hegbɛ akɛ amɛkɛ amɛhiŋmɛii aaana “Abraham kɛ Isak kɛ Yakob kɛ gbalɔi lɛ fɛɛ” ni atee amɛ shi kɛba shikpɔŋ nɛɛ nɔ Paradeiso lɛ nɔ ni amɛmiisɔmɔ akɛ odehei yɛ Nyɔŋmɔ Maŋtsɛyeli ni yɔɔ “Naanɔ Tsɛ” Yesu Kristo dɛŋ lɛ shishi.—Kpojiemɔ 7:9, 14; 16:14; Yesaia 9:5.
15. Mɛɛ hegbɛ ni eko kwraa bɛ ni tamɔ nakai mɛɔ mɛi ni jeɔ Harmagedon mli lɛ?
15 Kwɛ miishɛɛ ni ooona kɛ kanyamɔ ni eeenyɛ ekanya osusuma akɛ oooje ŋmɛnɛŋmɛnɛ jeŋ fɔŋ lɛ naagbee lɛ mli ni okɛ Noa kɛ eweku kɔklɔɔ ni ji “susumai kpaanyɔ” ni je klɛŋklɛŋ jeŋ muu fɛɛ Nu Afua lɛ mli yɛ afi 2370 D.Ŋ.B. lɛ ayatara shi ni nyɛkɛ nibii ni nyɛŋmala lɛ ato he nyɛkwɛ. Mɔ ko mɔ ko bɛ ni baanyɛ ana niiashikpamɔi ni tamɔ onɔ nɛɛ ni baaha onyɛ osɔmɔ akɛ Yehowa Nyɔŋmɔ Odasefonyo yɛ nifeemɔ ni ekaaa ni akuŋ sɛɛ atiŋ mli afeŋ eko dɔŋŋ kɛmiiya naanɔ nɛɛ mli.—1 Petro 3:20; Marko 13:19; 2 Petro 3:5-7.
Akai Efɔŋfeelɔ Ni Nuɔ Nii Ahe Lɛ
16, 17. (a) Kɛ Yesu kai efɔŋfeelɔ ni nuɔ sane he lɛ, mɛɛ hegbɛ mɛi ni eje Harmagedon mli lɛ kɛ mɛi krokomɛi ni yɔɔ wala mli lɛ baana? (b) Mɛɛ hiɛnɔkamɔ anaa yɛ efɔŋfeelɔ ni atee lɛ shi lɛ he?
16 Ŋwanejee ko bɛ he akɛ no mli lɛ Paradeiso ni akuɔ sɛɛ akɛbaa shikpɔŋ nɔ ekoŋŋ lɛ etee hiɛ saŋŋ. Abaatee efɔŋfeelɔ lɛ ni asɛŋ lɛ yɛ Calvary yɛ Yesu masɛi ni agbɛnɛ ewie yɛ be mli ni eyɔse nɔ ni aŋma yɛ E-yiteŋgbɛ lɛ he akɛ, “Yesu, kaimɔ mi yɛ be mli ni oooba omaŋtsɛyeli lɛ mli lɛ” shi kɛba shikpɔŋ nɔ wala mli yɛ Paradeiso ni aku sɛɛ akɛba ekoŋŋ lɛ mli. (Luka 23:42) Ebaafee hegbɛ ni mɛi ni eje Harmagedon mli lɛ kɛ mɛi krokomɛi ni yɔɔ wala mli lɛ aaana akɛ amɛaahere lɛ atuu kɛjɛ gbohii ateŋ kɛba. Amɛbaatsɔɔ lɛ nii fɛɛ ni kɔɔ Maŋtsɛ ni yeɔ nɔ bianɛ, Yesu Kristo ni ejie musuŋtsɔlɛ kpo yɛ ehe yɛ Nisan 14 yɛ afi 33 Ŋ.B. lɛ he.
17 Nuŋtsɔ Yesu Kristo hiɛ kpaŋ enɔ yɛ be mli ni eyeɔ nɔ akɛ maŋtsɛ yɛ afii akpe lɛ mli lɛ. Ŋwanejee ko bɛ he akɛ nakai efɔŋfeelɔ lɛ ni nuɔ nii ahe ni atee lɛ shi lɛ baajie hiɛsɔɔ kpo eha Maŋtsɛ Yesu Kristo ni yeɔ nɔ lɛ, mɔ ni eshitee lɛ jɛ lɛ lɛ, kɛtsɔ anɔkwa ni eeeye jeŋ muu fɛɛ Maŋtsɛ Yehowa Nyɔŋmɔ lɛ nɔ. Kɛkɛ lɛ abaabu lɛ akɛ mɔ ni sa akɛ enaa shihilɛ yɛ Paradeiso yɛ jeŋ hee lɛ mli ŋɔɔmɔ kɛmiiya naanɔ kɛ adesai toibolɔi krokomɛi fɛɛ ni akɛ amɛ eba wala mli lɛ.
Shihilɛ Yɛ Jeŋ Muu Fɛɛ Eden Trom Ni Aku Sɛɛ Akɛba Ekoŋŋ Lɛ Mli
18. Te shihilɛ baatamɔ aha tɛŋŋ yɛ Paradeiso ni aku sɛɛ akɛba lɛ mli?
18 Mɔ fɛɛ mɔ baatsɔ enyɛmi naanyo yɛ Paradeiso ni aku sɛɛ akɛba ekoŋŋ lɛ mli. Anuɔ jeŋ muu fɛɛ wekukpaa he kɛyaa shishi tɔɔ ni enɛ saa mɔ fɛɛ mɔ susuma he. Mɔ fɛɛ mɔ nuɔ enyɛmi shishi. Amɛmiiwie jeŋ muu fɛɛ wiemɔ kome. Ebaanyɛ efee adesai ashishijee wiemɔ lɛ, ni mɔ fɛɛ mɔ wie yɛ klɛŋklɛŋ adesa shihilɛ be ni he afii 1,800 lɛ mli lɛ—kɛjɛ Adam bɔɔ be mli yɛ afii 4026 D.Ŋ.B. aahu kɛyashi Peleg gbi lɛ nɔ (2269 kɛyashi 2030 D.Ŋ.B.) , “ejaakɛ egbii lɛ amli agbala shikpɔŋ lɛ mli.” (1 Mose 10:25; 11:1) Mɔ fɛɛ mɔ miina hegbɛ ni ji shihilɛ mli ŋɔɔmɔ, ni akɛ shidaa kpeeɔ gbi fɛɛ gbi yɛ wala ni akɛfata gbi lɛ he lɛ hewɔ. Gbɔmɔtsoŋ naagbai eyaaa hiɛ dɔŋŋ yɛ be mli ni be shwieɔ mli lɛ. Gbɔmɔtsoŋ hewalɛi miiya hiɛ, ni gbɔmɔtsei gbɔjɔɔɔ dɔŋŋ.—Okɛto Hiob 33:25 he.
19. Mɛni abaayoo yɛ mɛi ni tsutsu lɛ amɛje kpa loo fatɔɔ yɔɔ amɛgbɔmɔtsei ahe lɛ he?
19 Ni kwɛmɔ! Tsutsu be ko Obubuafoi lɛ miinyiɛ, hɛɛ, amɛmiitumɔ yɛ nyamɔ hewɔ. Niji kɛ naji ni elaaje lɛ ekwɛ ekoŋŋ yɛ naakpɛɛ gbɛ nɔ. Tsutsu shwilafoi miina nii, toimulɔi miinu wiemɔ, mumuii miiwie ni amɛmiila yɛ miishɛɛ po hewɔ. (Okɛto Yesaia 35:5, 6 he.) Nibii ni bɛ fɛo yɛ adesa gbɔmɔtso lɛ he lɛ fɛɛ miilaje. Adesa gbɔmɔtso akɛ nuu lɛ fɛo kɛ yoo nɔ eŋmɛ pɛpɛɛpɛ. (1 Mose 2:18) Adesa emuuyeli woɔ Yehowa Nyɔŋmɔ, adesa gbɔmɔtso ni yeɔ emuu lɛ Bɔlɔ lɛ hiɛ nyam.
20. Mɛni abaayoo yɛ adebɔɔ mli hewalɛi ahe, niyenii, bɔɔ nii ni ji kooloi kɛ nɔ ni akɛ shikpɔŋ lɛ baatsu lɛ he?
20 Shikpɔŋ muu lɛ fɛɛ miitsɔ jeŋ muu fɛɛ fɛo nɔ. Anuuu shikpɔŋ lɛ fa ko he akɛ nu hɔmɔ eba jɛmɛ aloo nugbɔnɛmɔ ni fiteɔ nii eje ŋa yɛ jɛmɛ, laasuogbele ahum, kɔɔyɔɔ ni naa wa ni looɔ ŋshɔ mli nui efite jɛmɛ. (Okɛto Marko 4:37-41 he.) Aabua adebɔɔ mli hewalɛi lɛ fɛɛ anaa koni fɛɛ aŋmɛ pɛpɛɛpɛ koni no aha shikpɔŋ lɛ fɛɛ afee he ko ni miishɛɛ yɔɔ ni ahiɔ. Niyenii ni taa bɛ he ko ejaakɛ shikpɔŋ lɛ miiwo eyibii fɛɛ kɛmiimɔ shi. (Lala 72:16) Toiŋjɔlɛ kɛ shweshweeshwe shihilɛ yɛ jeŋ fɛɛ kɛha gbɔmɔ kɛ kooloo fɛɛ taakɛ Yehowa jaje lɛ: “Amɛfeŋ efɔŋ ni amɛfiteŋ nii hu yɛ migɔŋ krɔŋkrɔŋ lɛ nɔ fɛɛ.” (Yesaia 11:9; kwɛmɔ Yes 11 kukuji 6-8 hu.) Abaatsɔ nɛkɛ gbɛ nɔ aha shikpɔŋ lɛ afee he ko ni yɔɔ fɛo ni ahiɔ jɛmɛ ni atsuɔ Yehowa Nyɔŋmɔ, shikpɔŋ lɛ Bɔlɔ kɛ Nɔtsɛ lɛ sɔɔmɔ he nii yɛ. Akɛni enii ni, ni lɛ ebɔ hewɔ lɛ, esa akɛ akɛtsu nii yɛ gbɛ ni baasa ehiɛ ni woɔ ehiɛ nyam lɛ nɔ.—Okɛto Yesaia 35:1, 2, 6, 7 he.
21. Te adesai ni akpɔ amɛ lɛ baabu nɔ fɛɛ nɔ ni yɔɔ shikpɔŋ lɛ nɔ amɛha tɛŋŋ, ni mɛɛ lala abaanu he?
21 Eji ehee ni eshɛjeɔ mɔ mii—nakai ji bɔ ni nɔ fɛɛ nɔ ni yɔɔ shikpɔŋ lɛ nɔ lɛ ji kɛha adesai ni akpɔ amɛ ni amɛhiko Eden Paradeiso trom lɛ mli yɛ he ni adesa wala je shishi kɛjɛ yɛ emuuyeli ni yɔɔ fɛo lɛ mli da lɛ! (Kpojiemɔ 21:5) Mɛɛ lalai ni ŋɔɔ, saŋkui kɛ gbeeiaŋ nɔ aaanu nɛkɛ—ni fɛɛ miijie Yehowa yi!—1 Kronika 23:4, 5; Lala 150:3-6.
22. Te abaanu Paradeiso jeŋ hee lɛ mli shihilɛ lɛ he aha tɛŋŋ?
22 Kwɛ naakpɛɛ kɛ miishɛɛ ni enɛ aaaji akɛ aaahi shikpɔŋ ni adesa wala yeɔ emuu yɛ nɔ lɛ nɔ, yɛ he ni gbɛ ni gbele tsɔɔ nɔ ebaalɛ ni jɛ Adam shishijee esha lɛ fɛɛ efee nɔ ni eho etee lɛ nɔ! (Okɛto Yohane 10:10 he.) Hɛɛ, shikpɔŋ lɛ nɔ ji he ni adesa fɛɛ adesa bɔɔ nɔ ni akpɛlɛ enɔ lɛ jieɔ Yehowa Nyɔŋmɔ su kɛ baŋ ni ekɛbɔ klɛŋklɛŋ nuu, Adam lɛ kpo lɛ yɛ! (1 Mose 1:26, 27) Agbɛnɛ shikpɔŋ lɛ efeŋ he ko ni yɔɔ taŋ kɛhaŋ serafim lɛ, kerubim lɛ kɛ ŋwɛibɔfoi ni yɔɔ miishɛɛ lɛ dɔŋŋ. Kɛ amɛkɛ miishɛɛ tsɔ amɛhiɛ amɛkwɛ shikpɔŋ lɛ gaa lɛ, nɔ ni amɛyɔɔ pɛ ji yijiemɔ kɛ shidaa ni amɛkɛaaha Mɔ ni amɛna hegbɛ akɛ amɛaana ehiɛ yɛ be fɛɛ mli lɛ—ni ji Yehowa, Jeŋ Muu Fɛɛ Maŋtsɛ lɛ.—Mateo 18:10.
Wɔsɛɛ be ni Yɔɔ Miishɛɛ ni Baaa Naagbee
23. Mɛni baanyɛ aba mli yɛ Kristofoi ni afɔ amɛ mu lɛ ahe, ni mɛni baajɛ mli aba aha mɛi ni yɔɔ shikpɔŋ nɔ Paradeiso lɛ nɔ lɛ?
23 Ebaanyɛ eba akɛ, gbi ko yɛ wɔsɛɛ be mli lɛ, abaaŋmala Kristofoi ni afɔ amɛ mu lɛ fɛɛ ni waje ‘amɛtsɛmɔ kɛ halamɔ’ kɛha ŋwɛi Maŋtsɛyeli lɛ ni akɛ nɛkɛ ŋwɛi shitee nɛɛ ejɔɔ amɛ lɛ fɛɛ agbɛii koni adesa weku lɛ ni yɔɔ amɛshikpɔŋ nɔ Paradeiso lɛ mli lɛ ana. (2 Petro 1:10; Lala 87:5, 6) No hewɔ lɛ, mɔ fɛɛ mɔ baanu Yesu Kristo kaselɔi 144,000 ni akɛ mumɔ efɔ amɛ ni akɛfɔ amɛ mu lɛ ni anaaa amɛ yɛ shikpɔŋ nɔ Paradeiso lɛ mli dɔŋŋ lɛ shishi ni mɔ fɛɛ mɔ tsui baanyɔ emli kɛ tsuiŋ mlifilimɔ yɛ amɛhewɔ ni agbɛnɛ kɛ amɛ hu.
24. (a) No mli lɛ mɛni Yehowa efee egbe naa yɛ ‘enaneshi maaŋoo’ lɛ he? (b) Te wɔfeɔ tɛŋŋ wɔleɔ akɛ jeŋ hee lɛ baŋ naagbee gbi ko gbi ko, ni mɛɛ gbalɛ lala baaba mli?
24 Wɔsɛɛ be ni bɛ naagbee lɛ baatsɔ miishɛɛ aha mɛi fɛɛ ni hiɔ shi akɛ mɛi ni amɛkuuu amɛhe ni amɛtuu amɛha Yehowa, jeŋ muu fɛɛ Maŋtsɛ ni nɔ bɛ lɛ mli lɛ. Shikpɔŋ nɔ Paradeiso ni ayi nɔ obɔ kɛ hejɔɔmɔ lɛ baafee he ni sa diɛŋtsɛ, he ni sa yijiemɔ, akɛ “naneshi maaŋoo” ni Nyɔŋmɔ naji baajɔɔ ehe yɛ nɔ yɛ okadi gbɛ nɔ. Hɛɛ, Yehowa baawo ‘enaji anaamɔ he’ lɛ hiɛ nyam kɛya naanɔ, ni adesai fɛɛ baaba amɛhe shi amɛha lɛ ni nɔ ko nɔ ko tsiŋ amɛ kɛjɛŋ enɛ feemɔ he! (Mateo 5:34, 35; Bɔfoi lɛ Asaji 7:49) Jeŋ hee lɛ baafee jeŋ ni bɛ naagbee ejaakɛ “elumɔyeli lɛ shweremɔ kɛ hejɔlɛ lɛ sɛɛ efoŋ.” (Yesaia 9:6) Kɛkɛ lɛ, gbalɛ lala ni ŋwɛibɔfoi lɛ la yɛ be mli ni afɔ Yesu yɛ Betlehem yɛ Yudea yɛ afi 2 D.Ŋ.B. lɛ baaba mli: “Anunyam aha Nyɔŋmɔ yɛ ŋwɛi Flooflo ni hejɔlɛ aba shikpɔŋ lɛ nɔ, ni ana gbɔmɛi ahe tsuijurɔ!”—Luka 2:13, 14.
25. (a) Mɛi ni ji “tooi krokomɛi” lɛ ni jɛ “asafo babaoo” lɛ ateŋ lɛ hiɛ sɔɔ mɛni bianɛ? (b) Mɛni esa akɛ efee wɔtsuiŋ henumɔ loo taomɔ nii?
25 Mɛi ni ji Tookwɛlɔ Kpakpa lɛ “tooi krokomɛi” ni fata “asafo babaoo” lɛ ahe lɛ ahiɛ sɔɔ Paradeiso ni aku sɛɛ akɛba ekoŋŋ lɛ he shiwoo wiemɔi ni kanyaa mɔ lɛ. Eji hegbɛ ni amɛna akɛ amɛkɛ Nyɔŋmɔ gbɛjianɔtoo ni yɔɔ bianɛ lɛ aaabɔ ni amɛkɛ amɛhe awo nitsumɔ ni Nuŋtsɔ Yesu Kristo gba fɔ shi, ni ji Maŋtsɛyeli lɛ he sanekpakpa lɛ shiɛmɔ yɛ shikpɔŋ ni ayɔɔ nɔ lɛ fɛɛ nɔ kɛha naagbee odaseyeli lɛ mli kɛ ekaa. (Mateo 24:14; Marko 13:10) Nɔ ni wɔshweɔ yɛ anɔkwayeli mli kɛjɛɔ wɔtsuiŋ akɛ Yehowa Odasefoi ji ni wɔmɔ wɔ emuuyeli mli ni nɔ ko nɔ ko fiteee lɛ yɛ yinɔi fɛɛ mli, kɛwo jeŋ muu fɛɛ Maŋtsɛ, Yehowa Nyɔŋmɔ, hiɛ nyam ni akɛba lɛ bem kɛya naanɔ, yɛ e-Bi koome, Yesu Kristo, odehe lɛ nɔyeli shishi lɛ mli. “Haleluya!”—Kpojiemɔ 19:1, 3, 4, 6; Abɛi 10:9.
Te Obaaha Hetoo Oha Tɛŋŋ
◻ Mɛɛ shiwoo Yehowa kɛha yɛ okadi enaneshi maaŋoo, ni ji shikpɔŋ Iɛ he?
◻ Namɛi baaye abua ni aku sɛɛ akɛ Paradeiso aba ekoŋŋ Iɛ?
◻ Namɛi ateŋ Maŋtsɛ Yesu Kristo baahala ‘lumɛi yɛ shikpɔŋ lɛ nɔ fɛɛ, yɛ Iɛ?
◻ Mɛɛ niiashikpamɔ ni kanyaa susuma-baanyɛ afee onɔ yɛ be mli ni gbohiiashitee lɛ yaa nɔ lɛ?
◻ Mɛɛ wɔsɛɛ mɛɔ mɛi ni fiteee amɛhe ni amɛtuu amɛha Yehowa Iɛ?