“Mɔ Bibioo” lɛ Etsɔ “Mɛi Akpe”
“Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa.”—YESAIA 60:22.
1, 2. (a) Mɛni hewɔ duŋ ha shikpɔŋ lɛ nɔ ŋmɛnɛ lɛ? (b) Yehowa la lɛ ekpɛ yɛ ewebii anɔ fiofio yɛ mɛɛ gbɛ nɔ?
“DUŊ ha shikpɔŋ lɛ nɔ, ni duŋ kpii ha majimaji lɛ anɔ; shi bo lɛ Yehowa miikpɛ yɛ onɔ, ni enunyam lɛ epue yɛ onɔ.” (Yesaia 60:2) Nɛkɛ wiemɔi nɛɛ tsɔɔ shihilɛ ni yɔɔ shikpɔŋ lɛ nɔ kɛjɛ afi 1919 kɛbaa lɛ mli jogbaŋŋ. Kristendom ekpoo okadi ni tsɔɔ ba ni Yesu Kristo, ni ji “je lɛ mli la lɛ” eba akɛ odehe lɛ. (Yohane 8:12; Mateo 24:3) Akɛni Satan, ni ji “je nɛŋ lumɛi ni yɔɔ benɛ be duŋ lɛ mli lɛ” alumɔ lɛ “egiri naakpa” hewɔ lɛ, afii ohai 20 lɛ efee adesai ayinɔsane mli be ni yiwalɛ kɛ efɔŋfeemɔ fá yɛ mli fe fɛɛ. (Kpojiemɔ 12:12; Efesobii 6:12) Mɛi babaoo yɛ mumɔŋ duŋ mli.
2 Shi, la kã he eetso lolo ŋmɛnɛ. Yehowa “miikpɛ” yɛ etsuji shwɛɛnii ni afɔ amɛ mu, ni ji eŋwɛi “yoo” lɛ najiaŋdamɔlɔi ni yɔɔ shikpɔŋ lɛ nɔ lɛ anɔ. (Yesaia 60:1) Ni titri lɛ, kɛjɛ be mli ni ajie amɛ kɛjɛ Babilon nomŋɔɔ mli yɛ afi 1919 kɛbaa nɛɛ, mɛnɛɛmɛi ejie Nyɔŋmɔ anunyam lɛ kpo ni ‘amɛha amɛla etso yɛ gbɔmɛi ahiɛ.’ (Mateo 5:16) Kɛjɛ afi 1919 kɛbashi afi 1931 lɛ, Maŋtsɛyeli la lɛ tso babaoo yɛ be mli ni mɛnɛɛmɛi jieɔ Babilon susumɔi ni eshwɛ yɛ amɛhe lɛ amɛshweɔ shi lɛ. Amɛshwere babaoo kɛyashɛ akpei nyɔŋmai abɔ yɛ be mli ni Yehowa haa eshiwoo baa mli lɛ, akɛ: “Kpeemɔ hu makpee Israel mɛi ni eshwɛ lɛ kɛaakpe! Maŋɔ amɛ mato he kome tamɔ tooi ni yɔɔ tsũ mli, loo tamɔ tooiku ni yɔɔ amɛlɛɛhe lɛ teŋ, ni amɛaafee hoo yɛ mɛi lɛ afalɛ hewɔ.” (Mika 2:12) Yɛ afi 1931 lɛ, Yehowa anunyam ni yɔɔ ewebii anɔ lɛ bafee faŋŋ beni amɛkpɛlɛ gbɛi ni ji Yehowa Odasefoi lɛ nɔ lɛ.—Yesaia 43:10, 12.
3. Ebafee faŋŋ akɛ Yehowa la lɛ baakpɛ yɛ mɛi krokomɛi anɔ yɛ shwɛɛnii lɛ asɛɛ yɛ mɛɛ gbɛ nɔ?
3 Ani Yehowa baakpɛ yɛ “asafoku bibioo” lɛ mli shwɛɛnii lɛ pɛ nɔ? (Luka 12:32) Dabi. The Watch Tower ni je kpo yɛ September 1, 1931 lɛ tsɔɔ kuu kroko. Beni egbálaa Ezekiel 9:1-11 lɛ mli jogbaŋŋ lɛ, etsɔɔ akɛ nuu ni woloŋmaa tɔ ŋmɔ ehɛ ni atsĩ etã yɛ nakai kukuji lɛ amli lɛ damɔ shi kɛha shwɛɛnii ni afɔ amɛ mu lɛ. Ni namɛi ji mɛi ni “nuu” lɛ kadiɔ amɛhiɛnaa lɛ? “Tooi krokomɛi” ni ji mɛi ni yɔɔ hiɛnɔkamɔ akɛ amɛbaahi shi kɛya naanɔ yɛ paradeiso shikpɔŋ nɔ lɛ. (Yohane 10:16; Lala 37:29) Yɛ afi 1935 mli lɛ, ayoo “tooi krokomɛi” akuu nɛɛ akɛ amɛji “asafo babaoo . . . ni jɛ jeŋmaŋ fɛɛ jeŋmaŋ” ni bɔfo Yohane na yɛ ninaa mli lɛ. (Kpojiemɔ 7:9-14) Ágbala jwɛŋmɔ babaoo kɛtee asafo babaoo lɛ naabuamɔ nɔ kɛjɛ afi 1935 kɛbashi ŋmɛnɛ.
4. Namɛi ji “maŋtsɛmɛi” kɛ “jeŋmaji” ni atsĩ amɛtã yɛ Yesaia 60:3 lɛ?
4 Atsĩ naabuamɔ nitsumɔ nɛɛ tã yɛ Yesaia gbalɛ lɛ mli beni ekɛɛ akɛ: “Jeŋmaji aaanyiɛ kɛaaba ola lɛ he, ni maŋtsɛmɛi aaaba kpɛmɔ ní kpɛɔ yɛ onɔ lɛ he.” (Yesaia 60:3) Namɛi ji “maŋtsɛmɛi” ni atsĩ amɛtã yɛ biɛ lɛ? Mɛi 144,000 lɛ mli shwɛɛnii, ni kɛ Yesu Kristo baafee ekome kɛye nɔ yɛ ŋwɛi Maŋtsɛyeli lɛ mli, ni nyiɛ odaseyeli nitsumɔ lɛ hiɛ lɛ. (Romabii 8:17; Kpojiemɔ 12:17; 14:1) Ŋmɛnɛ, “jeŋmaji” ni ji mɛi ni yɔɔ shikpɔŋ nɔ hiɛnɔkamɔ, ni baa Yehowa ŋɔɔ kɛha gbɛtsɔɔmɔ, ni amɛfɔɔ mɛi krokomɛi anine ni amɛfee nakai lɛ ayi fa kwraa fe shwɛɛnii ni afɔ amɛ mu lɛ mli mɛi ni eshwɛ lɛ.—Yesaia 2:3.
Yehowa Tsuji ni Yɔɔ Ekãa
5. (a) Mɛɛ anɔkwalei tsɔɔ akɛ ekãa ni Yehowa webii yɔɔ lɛ bako shi? (b) Mɛɛ maji ná nɔyaa ni sa kadimɔ waa yɛ afi 1999 mli? (Kwɛmɔ tao ni yɔɔ baafa 17-20 lɛ.)
5 Mɛɛ ekãa Yehowa Odasefoi ni yɔɔ ŋmɛnɛŋmɛnɛ beaŋ lɛ jie lɛ kpo yɛ afii ohai 20 nɛɛ fɛɛ mli! Ni yɛ nɔnyɛɛ ní kã he emli waa lɛ fɛɛ sɛɛ lɛ, ekãa ni amɛyɔɔ lɛ baaa shi yɛ be mli ni afi 2000 lɛ bɛŋkɛɔ lɛ. Amɛkã he amɛkɛ hiɛdɔɔ buɔ Yesu famɔ nɛɛ: “Nyɛyafea jeŋmaji fɛɛ mikaselɔi.” (Mateo 28:19, 20) Yɛ nyɛsɛɛ afii ohai 20 lɛ mli sɔɔmɔ afi lɛ mli lɛ, sanekpakpa shiɛlɔi ni yɔɔ ekãa lɛ ná yifalɛ hee ni ji 5,912,492. Amɛkɛ ŋmɛlɛtswai 1,144,566,849 tsu nii kɛgba Nyɔŋmɔ kɛ eyiŋtoo he sane amɛtsɔɔ mɛi krokomɛi. Amɛfee sɛɛsaramɔi 420,047,796 yɛ mɛi ni yɔɔ wiemɔ lɛ he miishɛɛ lɛ anɔ ni amɛfee shia Biblia mli nikasemɔi 4,433,884. Mɛɛ sɔɔmɔ ni ekãa yɔɔ mli he nibii ni aŋmala ashwie shi ni yɔɔ naakpɛɛ nɛ!
6. Mɛɛ gbɛjianɔ hee ato aha gbɛgbalɔi, ni te ahere nɔ aha tɛŋŋ?
6 Nyɛsɛɛ January lɛ, Nɔyeli Kuu lɛ tswa tsakemɔ ni afee yɛ gbɛgbalɔi aŋmɛlɛtswaa he lɛ he adafi. Mɛi babaoo kɛ hegbɛ nɛɛ tsu nii ni amɛkɛ amɛhe wo daa gbɛgbamɔ loo gbɛgbalɔi awamɔ nitsumɔ lɛ mli. Ákɛ nɔkwɛmɔnɔ lɛ, yɛ klɛŋklɛŋ nyɔji ejwɛ ni yɔɔ afi 1999 lɛ mli lɛ, Netherlands nitsumɔhe nine lɛ nine shɛ gbɛgbamɔ gbɛbimɔ woji ni fa fe nakai nyɔji lɛ nɔŋŋ yɛ afi ni tsɔ hiɛ lɛ mli toi ejwɛ. Ghana bɔ amaniɛ akɛ: “Kɛjɛ be mli ni akɛ gbɛgbalɔi aŋmɛlɛtswaa hee lɛ bɔi nitsumɔ nɛɛ, wɔ daa gbɛgbalɔi ayibɔ lɛ etee hiɛ kɛtsara nɔ.” Yɛ afi 1999 sɔɔmɔ afi lɛ mli lɛ, gbɛgbalɔi ayifalɛ yɛ jeŋ fɛɛ lɛ yashɛ 738,343—‘ekãa ni ayɔɔ kɛha nitsumɔi kpakpai’ akpojiemɔ ni sa kadimɔ waa.—Tito 2:14.
7. Yehowa ejɔɔ ekãa ni etsuji kɛtsuɔ nii lɛ nɔ yɛ mɛɛ gbɛ nɔ?
7 Ani Yehowa ejɔɔ nitsumɔ ni ekãa yɔɔ mli nɛɛ nɔ? Hɛɛ. Ewie kɛtsɔ Yesaia nɔ akɛ: “Holemɔ ohiŋmɛii anɔ ní okwɛ ohe kɛkpe: Amɛ fɛɛ amɛbua amɛhe naa kɛmiiba oŋɔɔ! Obihii lɛ aaajɛ maŋsɛɛ shɔŋŋ aba, ni obiyei lɛ hu, aaahiɛ amɛ yɛ ŋmawuiaŋ kɛaaba.” (Yesaia 60:4) “Oblahii” kɛ “oblayei” ni afɔ amɛ mu ni abua amɛnaa lɛ kã he amɛkɛ ekãa miisɔmɔ Nyɔŋmɔ. Ni amrɔ nɛɛ, aabua Yesu tooi krokomɛi lɛ anaa aafata Yehowa “oblahii” kɛ “oblayei” ni afɔ amɛ mu lɛ ahe yɛ shikpɔji kɛ ŋshɔkpɔi 234 nɔ.
“Nitsumɔ Kpakpa Fɛɛ Nitsumɔ Kpakpa”
8. Mɛɛ ‘nitsumɔi kpakpai’ Yehowa Odasefoi bɔɔ he mɔdɛŋ?
8 Sɔ̃ kã Kristofoi anɔ akɛ amɛshiɛ Maŋtsɛyeli lɛ he sanekpakpa lɛ ni amɛye amɛbua mɛi ni yɔɔ wiemɔ lɛ he miishɛɛ lɛ ni amɛbatsɔmɔ kaselɔi. Shi “asaa” amɛ ‘aha nitsumɔ kpakpa fɛɛ nitsumɔ kpakpa.’ (2 Timoteo 3:17) No hewɔ lɛ, amɛjɛɔ suɔmɔ mli amɛkwɛɔ amɛwekui, amɛfeɔ gbɔ, ni amɛsaraa helatsɛmɛi. (1 Timoteo 5:8; Hebribii 13:16) Ni nitsulɔi ni ejɛ amɛsuɔmɔ mli fata mɛi ni kɛ amɛhe ewo nitsumɔi tamɔ Maŋtsɛyeli Asa maa—nitsumɔ ni lɛ hu eyeɔ odase lɛ mli. Beni ama asa ko agbe naa yɛ Togo lɛ, mumɔŋ sɔlemɔ ko mli onukpai komɛi tao ni amɛle nɔ hewɔ ni Yehowa Odasefoi diɛŋtsɛ nyɛɔ amɛmaa amɛ diɛŋtsɛ amɛtsũi ni amɛsɔlemɔ lɛ bɔɔ mɛi apaa dani amɛnyɛɔ amɛtsuɔ nɛkɛ nitsumɔ nɛɛ! Togo bɔ amaniɛ akɛ, Maŋtsɛyeli Asai fɛfɛji ni amamɔɔ lɛ ená jɛmɛ bii lɛ anɔ hewalɛ waa akɛ mɛi komɛi bɔɔ mɔdɛŋ ni amɛhai tsũ loo amɛmamɔ tsũi yɛ hei ni abaamamɔ asai yɛ lɛ.
9. Yehowa Odasefoi etsu shihilɛi ahe nii yɛ hei ni oshara eba yɛ lɛ yɛ mɛɛ gbɛ nɔ?
9 Bei komɛi lɛ, ehe bahiaa ni atsu nitsumɔ kpakpa kroko. Osharai ba yɛ shikpɔji babaoo nɔ yɛ nyɛsɛɛ sɔɔmɔ afi lɛ mli, ni bei pii lɛ mɛi klɛŋklɛŋ ni kɛ yelikɛbuamɔ nibii yahaa ji Yehowa Odasefoi. Ákɛ nɔkwɛmɔnɔ lɛ, lasuogbele ko ni atsɛɔ lɛ Hurricane Mitch fite Honduras fã kpotoo. Oya nɔŋŋ ni nitsumɔhe nine lɛ to ajinafoi akui ni baatsu fimɔ saji ahe nii lɛ he gbɛjianɔ koni amɛkɛ yelikɛbuamɔi aha. Odasefoi ni yɔɔ Honduras kɛ shikpɔji krokomɛi anɔ lɛ kɛ atadei, niyenii, tsofai, kɛ hiamɔ nibii krokomɛi yaha. Kpokpaa Wuji Anɔ Tsumaa Ajinafoi Akui kɛ amɛhesaai lɛ tsu nii ni amɛkɛmamɔ tsũi. Etsɛɛɛ ni aye abua wɔnyɛmimɛi ni oshara eshara amɛ lɛ ni amɛku amɛsɛɛ amɛyatsu amɛnii. Yɛ Ecuador lɛ, Yehowa Odasefoi ye amɛbua amɛnyɛmimɛi lɛ, beni nu bafite mɛi komɛi ashiai lɛ. Beni nɔyeli lɛ mli onukpa ko kwɛɔ bɔ ni atsuɔ shihilɛ lɛ he nii ahaa lɛ, ekɛɛ akɛ: “Eji miná kuu nɛɛ kulɛ, mafee nibii wuji! Esa akɛ aná gbɔmɛi ní tamɔ nyɛ yɛ shikpɔŋ lɛ nɔ he fɛɛ he.” Nitsumɔi kpakpai ni tamɔ enɛ kɛ yijiemɔ bahaa Yehowa Nyɔŋmɔ, ni eji ‘wɔ Nyɔŋmɔ jamɔ hetuu-kɛhamɔ ni he yɔɔ sɛɛnamɔ kɛha nibii fɛɛ’ lɛ he odaseyeli.—1 Timoteo 4:8.
‘Amɛfilikiɔ Tamɔ Atatu’
10. Yɛ bɔ ni mɛi ni afɔ amɛ mu lɛ anɔ gbɔɔ lɛ fɛɛ sɛɛ lɛ, mɛni hewɔ ajajeɔ Yehowa gbɛi lɛ fe bei fɛɛ ní eho lɛ?
10 Yehowa biɔ amrɔ nɛɛ akɛ: “Namɛi ji mɛnɛɛmɛi ni filikiɔ tamɔ atatu, loo tamɔ okpoi ni baa amɛsamfɛjiaŋ nɛɛ? Lɛɛlɛŋ, ŋshɔkpɔi aaakwɛ mi gbɛ, ni Tarshish lɛji lɛ aaatsɔ hiɛ aba, koni amɛkɛ obihii lɛ . . . ajɛ shɔŋŋ aba . . . Gbɔi abii aaatswa ogbogboi, ni amɛmaŋtsɛmɛi lɛ aaasɔmɔo.” (Yesaia 60:8-10) Mɛi klɛŋklɛŋ ni kpɛlɛ Yehowa ‘kpɛmɔ’ lɛ nɔ ji ‘ebii,’ ni ji Kristofoi ni afɔ amɛ mu lɛ. Kɛkɛ ni “gbɔi,” ni ji asafo babaoo ni kɛ anɔkwayeli sɔmɔɔ amɛnyɛmimɛi ni afɔ amɛ mu lɛ, ni amɛnyiɛɔ amɛsɛɛ yɛ sanekpakpa shiɛmɔ nitsumɔ lɛ mli lɛ hu ba. No hewɔ lɛ, eyɛ mli akɛ mɛi ni afɔ amɛ mu lɛ anɔ miigbɔ moŋ, shi aajaje Yehowa gbɛi lɛ yɛ shikpɔŋ lɛ nɔ he fɛɛ he fe bei fɛɛ ní eho.
11. (a) Mɛni kã he eyaa nɔ lolo, ni mɛni jɛ mli ba yɛ afi 1999 lɛ mli? (b) Mɛɛ maji ná baptisimɔ yibɔi ní sa kadimɔ waa kɛha afi 1999 lɛ? (Kwɛmɔ tao ni yɔɔ baafa 17-20 lɛ.)
11 Enɛ hewɔ lɛ, mɛi akpekpei abɔ miike “tamɔ okpoi ni baa amɛsamfɛjiaŋ,” ni amɛmiiná abobaahe yɛ Kristofoi asafo lɛ mli. Gbɔmɛi akpei ohai abɔ bafataa he daa afi, ni gbɛ egbele kɛha mɛi babaoo lolo. Yesaia kɛɛ akɛ: “Ogbói lɛ anaa aaakamɔ be fɛɛ be, shwane kɛ nyɔɔŋ fɛɛ lɛ aŋamɔŋ, koni akɛ jeŋmaji lɛ ahewalɛ lɛ aba oŋɔɔ.” (Yesaia 60:11) Nyɛsɛɛ afi lɛ mɛi 323,439 kɛ nu mli baptisimɔ fee amɛ henɔjɔɔmɔ kɛha Yehowa lɛ he okadi, ni eŋamɔko agbói lɛ anaa lolo. “Jeŋmaji lɛ fɛɛ anii ni jara wa,” ni ji asafo babaoo lɛ mli bii lɛ kã he amɛmiibote mli babaoo lolo. (Hagai 2:7) Ahereɔ mɔ fɛɛ mɔ ni sumɔɔ ni eshi duŋ lɛ mli. (Yohane 12:46) Eba akɛ hiɛsɔɔ ni mɛi fɛɛ ni tamɔ nɛkɛ yɔɔ kɛha la lɛ naa baŋ shi kɔkɔɔkɔ!
Amɛsheee Shitee-kɛ-woo ko Gbeyei
12. Mɛi ni sumɔɔ duŋ lɛ ebɔ mɔdɛŋ ni amɛgbe la lɛ yɛ mɛɛ gbɛ nɔ?
12 Mɛi ni sumɔɔ duŋ lɛ nyɛ̃ɔ Yehowa la lɛ. (Yohane 3:19) Mɛi komɛi po bɔɔ mɔdɛŋ ní amɛgbe nakai la lɛ. Enɛ jeee nɔ ko ni wɔkpaaa gbɛ. Aye Yesu, ni ji “anɔkwa la lɛ ní tɛjeɔ mɔ fɛɛ mɔ nɔ” lɛ po he fɛo, ate shi awo lɛ, ni naagbee lɛ emaŋbii lɛ gbe lɛ. (Yohane 1:9) Yɛ afii ohai 20 lɛ fɛɛ mli lɛ, áye Yehowa Odasefoi hu ahe fɛo, awo amɛ tsuŋ, atsĩ amɛnaa, ni agbegbee amɛ po yɛ be mli ni amɛkɛ anɔkwayeli haa Yehowa la lɛ kpɛɔ lɛ. Yɛ nyɛsɛɛ afii nɛɛ amli lɛ, shitee-kɛ-wolɔi etsɔ adafitswaa nibii anɔ ni amɛmiigbɛ apasa wiemɔi ni kɔɔ mɛi ni haa Nyɔŋmɔ la lɛ kpɛɔ lɛ ahe lɛ amɛmiishwã. Mɛi komɛi miisumɔ ni mɛi ahe aye akɛ Yehowa Odasefoi ahe yɛ gbeyei, ni esa akɛ atsĩ amɛnaa. Ani nakai shitee-kɛ-wolɔi lɛ eye omanye?
13. Mɛni ejɛ ŋaa mli ni wɔjɛɔ wɔtsɔɔ wɔnitsumɔ lɛ mli yɛ adafitswaahei lɛ mli kɛba?
13 Dabi. Yɛ hei ni sa lɛ, Yehowa Odasefoi etee adafitswaahei lɛ ni amɛyagbála saji amli amɛtsɔɔ. Nɔ ni ejɛ mli eba ji akɛ, atsĩ Yehowa gbɛi lɛ tã yɛ adafitswaa woji kɛ woji tɛtrɛbii amli, kɛ redio kɛ tɛlivishiŋ nɔ. Enɛ ewo yibii kpakpai yɛ shiɛmɔ nitsumɔ lɛ mli. Ákɛ nɔkwɛmɔnɔ lɛ, yɛ Denmark lɛ, maŋ lɛ TV nɔ nifeemɔ ko wie saneyitso ko ni ji “Nɔ hewɔ ni Denmarkbii ahemɔkɛyeli lɛ baa shi lɛ” he. Abibii Yehowa Odasefoi kɛ jamɔŋ bii krokomɛi saji. Sɛɛ mli lɛ, yoo ko ni kwɛ nifeemɔ lɛ wie akɛ: “Eha ana mɛi ni yɔɔ Nyɔŋmɔ mumɔ lɛ faŋŋ.” Akɛ lɛ je nikasemɔ shishi.
14. Mɛni etsɛŋ ni abaanyɛ shitee-kɛ-wolɔi lɛ anɔ ni amɛyɔse yɛ mlifu kɛ hiɛgbele mli?
14 Yehowa Odasefoi le akɛ je lɛ mli bii pii baate shi awo amɛ. (Yohane 17:14) Shi kɛlɛ, Yesaia gbalɛ lɛ wajeɔ amɛ, akɛ: “Mɛi ní wao yi lɛ abii lɛ hu aaaba abakotoo, ni mɛi ní gbe ohe guɔ lɛ fɛɛ aaabakula onajiashi, ni amɛaatsɛ́o akɛ Yehowa maŋ, Israel Mɔ krɔŋkrɔŋ lɛ Zion lɛ.” (Yesaia 60:14) Etsɛŋ ni shitee-kɛ-wolɔ baayɔse yɛ mlifu kɛ hiɛgbele mli akɛ amɛmiiwuu amɛmiishi Nyɔŋmɔ diɛŋtsɛ. Namɔ baanyɛ aye nɛkɛ ta nɛɛ mli kunim?
15. Yehowa Odasefoi ‘nuɔ jeŋmaji afufɔ’ yɛ mɛɛ gbɛ nɔ, ni enɛ eje kpo yɛ amɛnitsɔɔmɔ kɛ shiɛmɔ nitsumɔ lɛ mli yɛ mɛɛ gbɛ nɔ?
15 Yehowa tee nɔ ewo shi akɛ: “Mikɛo aaafee naanɔ anunyam . . . ooonu jeŋmaji afufɔ, ni oooye maŋtsɛmɛi akpokuai, ni ooole akɛ mi, Yehowa, ji oyiwalaherelɔ.” (Yesaia 60:15, 16) Hɛɛ, Yehowa ji ewebii lɛ a-Yiwalaherelɔ. Kɛ amɛkɛ amɛhe fɔ̃ enɔ lɛ, amɛbaahi shi ‘kɛyashi naanɔ.’ Ni ‘amɛaanu jeŋmaji afufɔ,’ ni amɛkɛ amɛnibii komɛi ní yɔɔ lɛ baatsu nii ni amɛkɛha anɔkwa jamɔ ashwere. Ákɛ nɔkwɛmɔnɔ lɛ, kumpiuta kɛ adafitswai ahe tsɔji ni akɛtsuɔ nii yɛ nilee mli lɛ eha anyɛɔ akalaa Buu-Mɔɔ yɛ wiemɔi 121 mli kɛ Awake! yɛ wiemɔi 62 mli yɛ be kome mli. Akɛ gbɛjianɔ krɛdɛɛ ko ni ato yɛ kumpiuta nɔ lɛ miitsu nii akɛmiitsɔɔ New World Translation lɛ shishi kɛmiiya wiemɔi heei amli, ni enɛ kɛ miishɛɛ babaoo baa. Beni ajie Kristofoi a-Hela Ŋmalɛ lɛ kpo yɛ Croatia wiemɔ mli yɛ afi 1999 mli lɛ, mɛi akpei abɔ fo miishɛɛ yaafonui. Nyɛminuu onukpa ko wie akɛ: “Mikɛ bei babaoo emɛ Biblia nɛɛ aahu. Agbɛnɛ manyɛ magbo yɛ toiŋjɔlɛ mli!” New World Translation muu lɛ fɛɛ loo efãi ní akala ní aja lɛ fá fe akpekpei 100 yɛ wiemɔi 34 mli.
Jeŋba He Tɛi ni Nɔ Kwɔlɔ
16, 17. (a) Eyɛ mli akɛ ewa moŋ, shi mɛni hewɔ ehe hiaa waa akɛ wɔhiɛ Yehowa tɛi ni nɔ kwɔlɔ lɛ amli lɛ? (b) Mɛɛ niiashikpamɔ tsɔɔ akɛ oblahii kɛ oblayei baanyɛ atsi amɛhe kɛjɛ jeŋ ni aaawo amɛhe muji lɛ he?
16 Yesu kɛɛ akɛ: “Mɔ fɛɛ mɔ ni tsuɔ nifɔjianii lɛ nyɛ̃ɔ la lɛ.” (Yohane 3:20) Yɛ gbɛ kroko nɔ lɛ, mɛi ni hiɔ shi yɛ la lɛ mli lɛ sumɔɔ Yehowa tɛi ni nɔ kwɔlɔ lɛ. Yehowa wie kɛtsɔ Yesaia nɔ akɛ: “Omaŋ muu lɛ fɛɛ aaatsɔmɔ jalɔi sɔŋŋ.” (Yesaia 60:21a) Ebaanyɛ ewa akɛ aaahiɛ jalɛ tɛi amli yɛ jeŋ ni bɔlɛnamɔ mli jeŋba shara, amale, hiɛjoomɔ, kɛ henɔwomɔ fa babaoo yɛ mli lɛ mli. Ákɛ nɔkwɛmɔnɔ lɛ, yɛ shikpɔji komɛi anɔ lɛ, shika helɛtemɔ gbɛjianɔtoi miiya hiɛ waa, ni ewaaa kwraa akɛ ebaahe mɔ ko ni etswa efai shi akɛ ebaatiu heloonaa ninamɔ sɛɛ lɛ jwɛŋmɔ. Shi kɛlɛ, Paulo bɔ kɔkɔ akɛ: “Mɛi ni taoɔ nii pii aná lɛ gbeeɔ kaa kɛ tsɔne kɛ kwashiai akɔnɔi pii ni fiteɔ mɔ ní tsiɔ mɛi ewoɔ hiɛkpatamɔ kɛ laajemɔ mli lɛ amli.” (1 Timoteo 6:9) Kwɛ bɔ ni eyɔɔ awerɛho akɛ mɔ ko kɛ ehe baawo heloonaa nitsumɔi amli vii ni ekɛ nibii ni he hiaa diɛŋtsɛ, tamɔ Kristofoi anaanyobɔɔ, sɔɔmɔ krɔŋkrɔŋ, jeŋba he shishitoo mlai, kɛ weku mli gbɛnaa nii aaashã afɔle!
17 Jalɛ mlai ni aaahiɛ mli lɛ baanyɛ afee nɔ ni wa kɛha gbekɛbii titri, beni amɛtipɛŋfoi babaoo kɛ amɛhe woɔ tsofai fɔji kɛ nitsumɔ kɛ jeŋba shara mli lɛ. Yɛ Suriname lɛ, skul gbekɛ nuu ko ni he yɔɔ fɛo yakɛɛ gbekɛ yoo ko ni eye afii 14 lɛ koni ekɛ lɛ abaná bɔlɛ. Ekpoo enɛ, ni etsɔɔ mli akɛ, Biblia lɛ tsiɔ gbalashihilɛ sɛɛ nifeemɔi ni tamɔ nɛkɛ naa. Gbekɛbii yei krokomɛi ni yɔɔ skul lɛ ye ehe fɛo ni amɛkɛɛ lɛ akɛ mɔ fɛɛ mɔ miisumɔ ni ekɛ nakai gbekɛ nuu lɛ awɔ, ni amɛkɛ enɛ bɔ mɔdɛŋ ni amɛkɛnyɛ enɔ koni etsake ejwɛŋmɔ. Shi kɛlɛ, gbekɛ yoo lɛ damɔ shi shiŋŋ. Otsii fioo komɛi asɛɛ lɛ, akwɛ gbekɛ nuu lɛ lá mli ni ana akɛ ená HIV muawai lɛ eko ni hela mɔ lɛ waa. Gbekɛ yoo lɛ ná miishɛɛ akɛ ebo Yehowa famɔ akɛ ‘atsi he kɛjɛ ajwamaŋbɔɔ he’ lɛ toi. (Bɔfoi lɛ Asaji 15:28, 29) Yehowa Odasefoi amii shɛɔ oblahii kɛ oblayei ni yɔɔ amɛteŋ ni damɔɔ shi shiŋŋ kɛhaa nɔ ni ja lɛ ahe waa. Amɛhemɔkɛyeli lɛ, kɛ amɛfɔlɔi anɔ lɛ ‘woɔ Yehowa hiɛ nyam’—ni ekɛ woo haa lɛ.—Yesaia 60:21b.
Yehowa Eha Shweremɔ Eba
18. (a) Mɛɛ nii wuji Yehowa efee eha ewebii lɛ? (b) Mɛɛ odaseyeli yɔɔ ni tsɔɔ akɛ shweremɔ baaya nɔ lolo, ni mɛɛ gbɛkpamɔi ni yɔɔ nyam mɛɔ mɛi ni hiɔ la lɛ mli lɛ?
18 Hɛɛ, Yehowa haa la kpɛɔ kɛhaa ewebii lɛ, ejɔɔ amɛ, ekudɔɔ amɛ, ni ewajeɔ amɛ. Amɛna Yesaia wiemɔi lɛ amlibaa yɛ afii ohai 20 lɛ mli, akɛ: “Mɔ bibioo ko aaatsɔ mɛi akpe, ni mɔ fioo hu aaatsɔ maŋ ni wa: Kɛ́ shɛ ebe lɛ mi, Yehowa, maha efee oyá!” (Yesaia 60:22) Kɛjɛ mɛi fioo ni yɔɔ yɛ afi 1919 mli lɛ, “mɔ bibioo” lɛ ebafee nɔ ni fe “mɛi akpe.” Ni shweremɔ nɛɛ bako naagbee! Nyɛsɛɛ afi lɛ mɛi 14,088,751 ba Yesu gbele lɛ Kaimɔ he gbi jurɔ lɛ shishi. Mɛnɛɛmɛi ateŋ mɛi babaoo jeee Odasefoi ni yɔɔ ekãa. Eŋɔɔ wɔnaa akɛ amɛba nakai nifeemɔ ni he hiaa lɛ shishi, ni wɔmiifɔ̃ amɛ nine ni amɛya nɔ ni amɛbɛŋkɛ la lɛ he. Yehowa miiha la miikpɛ yɛ ewebii anɔ lolo. Egbɛjianɔtoo lɛ agbó lɛ naa kã lolo. Belɛ, nyɛhaa wɔ fɛɛ wɔtswaa wɔfai shi akɛ wɔbaahi Yehowa la lɛ mli. Kwɛ jɔɔmɔi ni jɛɔ mli baa kɛha wɔ amrɔ nɛɛ! Ni kwɛ miishɛɛ ni ebaaji kɛha wɔ wɔsɛɛ beni bɔɔ nii fɛɛ baajie Yehowa yi ni amɛbaanya yɛ enunyam ni yɔɔ naakpɛɛ lɛ mli lɛ!—Kpojiemɔ 5:13, 14.
Ani Obaanyɛ Otsɔɔ Mli?
• Namɛi ejie Yehowa anunyam lɛ kpo yɛ naagbee gbii nɛɛ amli?
• Mɛni tsɔɔ akɛ ekãa ni Yehowa webii yɔɔ lɛ naa bako shi lɛ?
• Mɛni ji nitsumɔi kpakpai ni Yehowa Odasefoi kɛ amɛdekã fɛɛ tsuɔ lɛ ekomɛi?
• Yɛ shitee-kɛ-woo ni yɔɔ gbeyei lɛ fɛɛ sɛɛ lɛ, mɛɛ hekɛnɔfɔɔ wɔyɔɔ?
[Akrabatsa ni yɔɔ baafa 17-20]
1999 YEHOWA ODASEFOI AJEŊ FƐƐ SƆƆMƆ AKƆNTAABUU
(Kwɛmɔ “bound volume”)
[Mfonirii ni yɔɔ baafa 15]
Gbɔmɛi miike kɛmiiba Yehowa gbɛjianɔtoo lɛ mli lolo
[Mfoniri ni yɔɔ baafa 16]
Wɔyɛ miishɛɛ akɛ Yehowa eha egbó lɛ naa kã kɛha mɛi ni sumɔɔ la lɛ