La-Kpɛmɔi—Wuji kɛ Bibii (Fã 2)
“Ola lɛ mli wɔnaa la yɛ.”—LALA 36:10.
1. Mɛɛ mɔdɛŋ abɔ yɛ mra mli koni anu okadi ni yɔɔ Kpojiemɔ wolo lɛ mli lɛ shishi?
BIBLIA mli wolo ni ji Kpojiemɔ lɛ etee Kristofoi amiishɛɛ shi kɛjɛ mra bei amli. Ekɛ nɔkwɛmɔ nɔ fɛfɛo ni kɔɔ bɔ ni anɔkwale la lɛ yaa nɔ ekpɛɔ waa be fɛɛ be he lɛ haa. Yɛ 1917 mli lɛ, Yehowa webii kɛ Kpojiemɔ lɛ mlitsɔɔmɔ ha yɛ wolo ko ni amɛfee ni ji The Finished Mystery lɛ mli. Ekpa Kristendom jamɔi kɛ maŋkwramɔŋ hiɛnyiɛlɔi ahe mama ni gbeyeishemɔ bɛ mli, shi ajie emlitsɔɔmɔi lɛ pii kɛjɛ hei krokomɛi. Ni kɛlɛ, The Finished Mystery lɛ ka anɔkwa ni Biblia Kaselɔi lɛ yeɔ gbɛ ni anaa ni Yehowa kɛtsuɔ nii lɛ ekwɛ.
2. Mɛɛ la sane, ‘Maŋ ko Fɔmɔ’ lɛ kpɛ shwie Kpojiemɔ wolo lɛ nɔ?
2 La-kpɛmɔ ko ni yɔɔ naakpɛɛ kpɛ shwie Kpojiemɔ wolo lɛ nɔ beni aŋma sane ni ji ‘Maŋ ko Fɔmɔ’ yɛ March 1, l925 Blɔfo Buu-Mɔɔ lɛ mli lɛ. Asusu akɛ Kpojiemɔ yitso 12 tsɔɔ tawuu ko ni ka wɔŋjalɔi ni yɔɔ Roma maŋtsɛyeli lɛ mli lɛ kɛ Roma Katolik Sɔlemɔ lɛ teŋ, ni binuu lɛ damɔ shi kɛha paapa gbɛjianɔtoo lɛ. Shi nakai sane lɛ tsɔɔ akɛ Kpojiemɔ 11:15-18 lɛ kɔɔ yitso 12 lɛ shishinumɔ he, ni etsɔɔ akɛ ekɔɔ Nyɔŋmɔ Maŋtsɛyeli lɛ fɔmɔ he.
3. Mɛɛ woji ha anu Kpojiemɔ shishi babaoo?
3 Enɛɛmɛi fɛɛ kɛ Kpojiemɔ shishinumɔ ni mli ka shi faŋŋ ba beni afee wolo ni ji Light lɛ, yɛ kpoi enyɔ mli, yɛ 1930 lɛ. Nibii amlijalemɔ babaoo lolo pue yɛ “Babylon the Great Has Fallen!” God’s Kingdom Rules! (ni afee yɛ 1963) kɛ “Then Is Finished the Mystery of God” (ni afee yɛ 1969 lɛ mli). Kɛlɛ, babaoo yɛ lolo ni abaakase yɛ Kpojiemɔ gbalɛ wolo lɛ he. Hɛɛ, la ni kpɛɔ kaŋkaŋ kpɛ shwie nɔ yɛ 1988, beni afee wolo, Kpojiemɔ—Enaagbee Kwraa lɛ Ebɛŋkɛ! lɛ. Abaanyɛ akɛɛ akɛ, nɛkɛ shishinumɔ ni yaa hiɛ fiofio nɛɛ fɛɛ anaa samfee ji anɔkwale ni eji akɛ, Kpojiemɔ gbalɛ lɛ baa mli yɛ “Nuntsɔ lɛ gbi,” ni je shishi yɛ 1914 lɛ mli. (Kpojiemɔ 1:10) No hewɔ lɛ, abaanu Kpojiemɔ wolo lɛ shishi babaoo yɛ be mli ni nakai gbi lɛ yaa hiɛ lɛ.
Atsɔɔ “Hegbɛi ni Yeɔ Nɔ” lɛ Mli Faŋŋ
4, 5. (a) Te Biblia Kaselɔi lɛ susu Romabii 13:1 he amɛha tɛŋŋ? (b) Mɛni ana yɛ sɛɛ mli akɛ no ji Ŋmalɛ naa shidaamɔ yɛ “hegbɛi ni yeɔ nɔ” lɛ ahe?
4 Ana la ko ni kpɛ kaŋkaŋ yɛ 1962 ni kɔɔ Romabii 13:1, ni kɛɔ akɛ: “Mɔ fɛɛ mɔ aba ehe shi aha hegbɛi ni yeɔ nɔ lɛ [“hegbɛi ni nɔ kwɔlɔ lɛ,” New World Translation] lɛ he. Klɛŋklɛŋ Biblia Kaselɔi lɛ nu “hegbɛi ni yeɔ nɔ” ni atsi ta yɛ jɛmɛ lɛ shishi akɛ ekɔɔ jeŋ nɔyelɔi lɛ ahe. Amɛnu ŋmalɛ nɛɛ shishi akɛ, kɛ agbala Kristofonyo awo asraafoi anitsumɔ mli yɛ tawuu be mli lɛ, gbɛnaa nii bakaa enɔ akɛ ewo asraafoi atade, ehiɛ tũ, ni eya ta naa, ebote bui amli. Anu he akɛ, akɛni Kristofonyo nyɛŋ agbe enaanyo gbɔmɔ hewɔ lɛ, enɛ baanyɛ enɔ ni etswa tũ lɛ ewo kɔɔyɔŋ kɛ ekɛ nɔ ni ehiii fe fɛɛ kpe.a
5 January 1 kɛ March 1, 1964 Buu-Mɔɔ kpɛ la eshwie sane lɛ nɔ beni etsɔɔ Yesu wiemɔi ni yɔɔ Mateo 22:21 lɛ mli lɛ: “Nyɛŋɔa Kaisare nii nyɛhaa Kaisare, ni Nyɔŋmɔ nii lɛ, nyɛŋɔhaa Nyɔŋmɔ” lɛ. Nɔ ni kɔɔ enɛ he ji bɔfoi lɛ awiemɔi ni yɔɔ Bɔfoi lɛ Asaji 5:29 lɛ: “Esa akɛ aboɔ Nyɔŋmɔ moŋ toi fe gbɔmɛi” lɛ. Kristofoi yɛ Kaisare—“hegbɛi ni yeɔ nɔ” lɛ shishi—bei abɔ ni enɛ biii ni Kristofonyo lɛ afee nii ni teɔ shi woɔ Nyɔŋmɔ mla. Ana heshibaa kɛmiiha Kaisare lɛ akɛ eyawaa he ko, shi jeee kwraa. Kristofoi kɛ nibii ni eteee shi ewooo Nyɔŋmɔ taomɔ nii lɛ pɛ haa Kaisare. Kwɛ bɔ ni tsui nyɔ mɔ mli ha akɛ anu nakai sane lɛ shishi faŋŋ!
La-Kpɛmɔi yɛ Gbɛjianɔtoo he Saji Anɔ
6. (a) Bɔni afee ni atsi he kɛjɛ osɔfoyeli gbɛjianɔtoo ni anaa yɛ Kristendom babaoo lɛ he lɛ, mɛɛ shishitoo mla akpɛlɛ nɔ? (b) Yɛ naagbee lɛ mɛni ana akɛ no ji gbɛ ni ja ni esa akɛ atsɔ nɔ ahala mɛi ni kwɛɔ asafo lɛ nɔ lɛ?
6 Sanebimɔ ni kɔɔ mɛi ni esa akɛ amɛsɔmɔ yɛ asafoi lɛ amli akɛ onukpai kɛ asafoŋ sɔɔlɔi (diakonoi) ahe lɛ yɛ. Bɔni afee ni atsi he kɛjɛ osɔfoi anɔyeli gbɛjianɔtoo ni yɔɔ Kristendom babaoo lɛ he lɛ, amu sane naa akɛ esa akɛ atsɔ oshiki ni asafoŋbii lɛ aaafɔ nɔ ahala amɛ. Shi la ni kpɛɔ kɛyaa hiɛ ni yɔɔ September 1 kɛ October 15, 1932 Blɔfo Buu-Mɔɔ lɛ mli lɛ tsɔɔ akɛ, nɔdaamɔ nɔ kɛha onukpai ni afɔ oshiki ahala amɛ bɛ Ŋmalɛi lɛ amli. No hewɔ lɛ, akɛ sɔɔmɔ ajinafoi to mɛnɛɛmɛi anajiaŋ, ni Asafo lɛ hala sɔɔmɔ nɔkwɛlɔ.
7. Mɛɛ nɔyaa jɛ la-kpɛmɔi lɛ amli ba yɛ gbɛ ni ahalaa sɔɔlɔi ni yɔɔ asafo lɛ mli lɛ gbɛfaŋ?
7 La-kpɛmɔi yɛ June 1 kɛ June 15, 1938 Blɔfo Buu-Mɔɔ lɛ mli ni miitsɔɔ akɛ, abaahala onukpai ni yɔɔ asafo lɛ mli lɛ yɛ teokrase gbɛjianɔtoo naa, shi jeee oshikifɔɔ halamɔ. La kroko kpɛ yɛ 1971, ni miitsɔɔ akɛ, esaaa akɛ asafoŋ sɔɔlɔ kome pɛ kudɔɔ asafo muu ko. Shi moŋ, esa akɛ asafo fɛɛ asafo ana onukpai akuu, loo nɔkwɛlɔi, ni Yehowa Odasefoi a-Nɔyeli Kuu lɛ kɛ nitsumɔ ewo amɛdɛŋ. No hewɔ lɛ, la ni yaa nɔ ekpɛɔ fe afii 40 mli lɛ hewɔ lɛ, ebafee faŋŋ akɛ, esa akɛ “tsulɔ anɔkwafo kɛ nilelɔ” lɛ atsɔ e-Nɔyeli Kuu lɛ nɔ ehala onukpai kɛ diakonoi, ni ale amɛ bianɛ akɛ asafoŋ sɔɔlɔi lɛ fɛɛ. (Mateo 24:45-47) Enɛ kɛ nɔ ni tee nɔ yɛ bɔfoi lɛ abei lɛ amli lɛ kpaa gbee. Klɛŋklɛŋ afii oha lɛ mli nɔyeli kuu lɛ hala hii tamɔ Timoteo kɛ Tito akɛ nɔkwɛlɔi. (1 Timoteo 3:1-7; 5:22; Tito 1:5-9) Enɛɛmɛi fɛɛ haa Yesaia 60:17 baa mli yɛ naakpɛɛ gbɛ nɔ: “Akɔɔble najiaŋ lɛ, mikɛ shika aaaba, ni dade najiaŋ lɛ, mikɛ jwiɛtɛi aaaba, ni tsei anajiaŋ lɛ, akɔɔble, ni tɛi anajiaŋ lɛ dade; ni maŋɔ hejɔlɛ mafee onɔyelɔi, ni maŋɔ jalɛ mafee o-nukpai.”
8. (a) Anɔkwale ni yaa hiɛ lɛ kɛ mɛɛ nɔyaa ba yɛ gbɛ ni Asafo lɛ tsɔɔ nɔ etsuɔ nii ehaa lɛ he? (b) Mɛni ji Nɔyeli Kuu lɛ ajinafoi akui lɛ, ni mɛni ji amɛ nitsumɔi sɔrɔtoi loo nɔkwɛmɔ?
8 Agbɛnɛ Buu Mɔɔ Asafo lɛ nitsumɔ gbɛjianɔtoo he sane hu yɛ. Akɛ afii babaoo ele Yehowa Odasefoi a-Nɔyeli Kuu lɛ akɛ amɛ nɔŋŋ ji Watch Tower Bible and Tract Society of Pennsylvania lɛ nɔkwɛlɔi lɛ, ni saji lɛ titri yɛ esɛinɔtalɔ lɛ dɛŋ. Taakɛ atsɔɔ yɛ 1977 Yearbook of Jehovah’s Witnesses lɛ (baafai 258-9) lɛ, Nɔyeli Kuu lɛ je nitsumɔ shishi kɛ ajinafoi akui ekpaa, yɛ 1976, ni akɛ jeŋ muu fɛɛ nitsumɔ lɛ nɔkwɛmɔ pɔtɛɛi komɛi ewo eko fɛɛ eko dɛŋ. Nitsulɔi Ajinafoi Akuu lɛ tsuɔ nitsulɔi lɛ asaji ahe nii, ni mɛi ni sɔmɔɔ yɛ jeŋ muu fɛɛ Betel weku lɛ mli lɛ ahilɛ-kɛhamɔ fata he. Wolo-Kalamɔ Ajinafoi Akuu lɛ kwɛɔ je lɛ kɛ mla naa saji fɛɛ nɔ, tamɔ Asafo lɛ nibii kɛ woji akalamɔ. Sɔɔmɔ Ajinafoi Akuu lɛ tsuɔ odaseyeli nitsumɔ lɛ he nii ni ekwɛɔ nɔkwɛlɔi gbɛfalɔi, gbɛgbalɔi, kɛ asafoŋ shiɛlɔi anitsumɔi anɔ. Nitsɔɔmɔ Ajinafoi Akuu lɛ toɔ asafoŋ kpeei, kpeei krɛdɛɛi agbi, kpokpaa nɔ kpeei, kpokpaa wulu nɔ kpeei kɛ majimaji ateŋ kpeei, kɛ agbɛnɛ skul sɔrɔtoi kɛha Nyɔŋmɔ webii amumɔŋ tsɔsemɔ lɛ ahe gbɛjianɔ. Niŋmaa Ajinafoi Akuu lɛ kwɛɔ woji afeemɔ kɛ amɛ shishitsɔɔmɔi fɛɛ nɔ, ni amɛkwɛɔ koni nɔ fɛɛ nɔ kɛ Ŋmalɛi lɛ akpa gbee. Sɛinɔtalɔ Ajinafoi Akuu lɛ kwɛɔ saji ni baa trukaa kɛ ekrokomɛi ni he hiaa waa lɛ anɔ.b Agbɛnɛ hu kɛjɛ 1970 afii lɛ amli kɛbaa lɛ, ajinafoi akuu kwɛɔ Buu Mɔɔ Asafo lɛ nitsumɔ he niji lɛ anɔ fe nɔkwɛlɔ kome.
La ni Kɔɔ Kristofoi Ajeŋba He
9. Anɔkwale la lɛ sa tsakpaa ni ka Kristofoi lɛ kɛ je lɛŋ nɔyelii lɛ ateŋ lɛ he yɛ mɛɛ gbɛ nɔ?
9 La-kpɛmɔi pii efee nɔ ni kɔɔ Kristofoi ajeŋba he. Akɛ nɔkwɛmɔ nɔ lɛ, susumɔ maŋ saji ni akɛ he wooo mli nɛkɛ lɛ he. La krɛdɛɛ ko je gbɛ ekpɛ shwie sane nɛɛ nɔ yɛ “Maŋ Saji ni Akɛ He Wooo Mli” ni je kpo yɛ November 1, 1939 Blɔfo Buu-Mɔɔ lɛ mli lɛ mli. Kwɛ bɔ ni eba yɛ ebe naa pɛpɛɛpɛ ha, eba beni Jeŋ Ta II je shishi lɛ sɛɛ nɔŋŋ! Sane lɛ tsɔɔ maŋ saji ni akɛ he wooo mli lɛ mli, ni etsɔɔ akɛ, esaaa akɛ Kristofoi kɛ amɛhe woɔ maŋkwramɔŋ saji loo majimaji ateŋ béi amli. (Mika 4:3, 5; Yohane 17:14, 16) Enɛ ji nɔ ko ni eha jeŋmaji fɛɛ enyɛ̃ amɛ. (Mateo 24:9) Blema Israel tawuu sɔrɔtoi lɛ efeee nɔkwɛmɔ nɔ ko kɛhaaa Kristofoi, taakɛ Yesu tsɔɔ mli faŋŋ yɛ Mateo 26:52 lɛ. Agbɛnɛ hu, maŋkwramɔ maŋ ko bɛ ni ŋmɛnɛ eji teokrase ni Nyɔŋmɔ yeɔ nɔ, taakɛ blema Israel ji lɛ.
10. Mɛni la-kpɛmɔi lɛ jie lɛ kpo yɛ bɔ ni esa akɛ Kristofoi abu lá amɛha he?
10 La kpɛ shwie krɔŋkrɔŋ ni la ji lɛ hu nɔ. Biblia Kaselɔi lɛ ateŋ mɛi komɛi susu akɛ, la ni agu eyeli yɛ Bɔfoi lɛ Asaji 15:28, 29 lɛ kɔɔ Yudafoi Kristofoi lɛ pɛ he. Shi, Bɔfoi lɛ Asaji 21:25 lɛ tsɔɔ akɛ, akɛ famɔ nɛɛ tsu jeŋmajiaŋbii ni batsɔmɔ heyelilɔi lɛ hu he nii yɛ bɔfoi lɛ agbii lɛ amli. No hewɔ lɛ krɔŋkrɔŋ ni la ji lɛ kɔɔ Kristofoi fɛɛ he, taakɛ ejeɔ kpo yɛ July 1, 1945 Blɔfo Buu-Mɔɔ lɛ mli lɛ. No tsɔɔ akɛ, jeee akɛ aakpoo kooloi ala ni aaaye kɛkɛ, taakɛ eyɔɔ bloŋ mli lɛ, shi amɛmiitsi amɛhe hu kɛmiijɛ gbɔmɔ la he, taakɛ eji yɛ la ni akɛfeɔ tsofa ni agbalaa awoɔ mɛi amli lɛ he lɛ.
11. Mɛni ana yɛ bɔ ni esa akɛ Kristofonyo lɛ akwɛ tawa kɛ nitsumɔ aha lɛ he?
11 Yɛ la ni kpɛɔ kɛyaa hiɛ lɛ hewɔ lɛ, akɛ hiɛdɔɔ ni sa tsu subaŋi komɛi ni klɛŋklɛŋ lɛ akpɛlɛɛɛ nɔ kɛkɛ lɛ ahe nii. Enɛ he nɔkwɛmɔ nɔ ji tawa kɛ nitsumɔ lɛ. Nyɛminuu Russell gbala jwɛŋmɔ kɛtee August 1, 1895 Zion’s Watch Tower lɛ nɔ, kɛba 1 Korintobii 10:31 kɛ 2 Korintobii 7:1 nɔ, ni eŋma akɛ: ‘Minaaa bɔ ni eeewo Nyɔŋmɔ hiɛ nyam, loo ehe aaaba sɛɛnamɔ aha lɛ diɛŋtsɛ, kɛ Kristofonyo ko kɛ tawa tsu nii yɛ gbɛ ko nɔ.’ Anu shishi faŋŋ kɛjɛ 1973 kɛbaa nɛɛ, akɛ mɔ ni shɛreɔ tawa nyɛŋ afee Yehowa Odasefoi lɛ ateŋ mɔ kome. Afee lɛ faŋŋ yɛ 1976 mli akɛ, Odasefonyo ko nyɛŋ ni ekɛ ehe awo asɔshwɛmɔ gbɛjianɔtoo ko mli, ni eya nɔ ehi asafo lɛ mli.
Nibii Krokomɛi ni Asaa Ajale Mli
12. (a) Mɛni la-kpɛmɔ ko jie lɛ kpo yɛ Maŋtsɛyeli lɛ naa samfei abɔ ni akɛha Petro lɛ he? (b) Petro kɛ samfee lɛ eko fɛɛ eko tsu nii yɛ mɛɛ shihilɛi amli?
12 La-kpɛmɔ lɛ hu etee hiɛ yɛ okadi samfei ni Yesu kɛha Petro lɛ nɔ. Biblia Kaselɔi lɛ kpɛlɛ nɔ akɛ Petro nine shɛ samfei enyɔ ni gbele gbɛ kɛha gbɔmɛi koni amɛbatsɔmɔ Maŋtsɛyeli niyelɔi—akɛ ekome kɛha Yudafoi lɛ tsu nii yɛ Pentekoste 33 Ŋ.B., kɛ ekroko lɛ kɛha Jeŋmajiaŋbii lɛ, ni akɛtsu nii klɛŋklɛŋ yɛ 36 Ŋ.B. beni Petro shiɛ etsɔɔ Kornelio lɛ. (Bɔfoi lɛ Asaji 2:14-41; 10:34-48) Yɛ be ni sa mli lɛ, abana akɛ kuu ni ji etɛ fata he—Samariabii lɛ. Petro kɛ samfee ni ji enyɔ lɛ tsu nii beni egbeleɔ Maŋtsɛyeli hegbɛ lɛ naa kɛhaa amɛ lɛ. (Bɔfoi lɛ Asaji 8:14-17) No hewɔ lɛ, akɛ samfee ni ji etɛ lɛ tsu nii beni Petro shiɛ etsɔɔ Kornelio lɛ.—Buu-Mɔɔ, August 1, 1980, baafai 4-10, 13.
13. Mɛni la-kpɛmɔi jie lɛ kpo yɛ tooi akui ni atsi ta yɛ Yohane yitso 10 lɛ he?
13 Ana kɛjɛ la-kpɛmɔ kroko mli akɛ, jeee tookui enyɔ pɛ he Yesu wie, shi etɛ. (Yohane, yitso 10) Enɛɛmɛi ji (1) Yudafoi atooku lɛ ni Yohane Baptisilɔ lɛ ji shinaakwɛlɔ lɛ, (2) tooku ni ji Maŋtsɛyeli gboshiniyelɔi lɛ, kɛ (3) “tooi krokomɛi” lɛ ni yɔɔ shikpɔŋ nɔ hiɛnɔkamɔ lɛ akuu lɛ.—Yohane 10:2, 3, 15, 16; Buu-Mɔɔ, August 1, 1984, baafai 14-29.
14. La-kpɛmɔ ni tee hiɛ lɛ tsɔɔ saji ni kɔɔ bɔ ni okadi Nyamɔ-Afi lɛ je shishi eha lɛ he lɛ mli yɛ mɛɛ gbɛ nɔ?
14 Atsɔɔ nɔ ni Nyamɔ-Afi lɛ feɔ he mfoniri lɛ hu he shishinumɔ lɛ mli. Yɛ Mla lɛ shishi lɛ, afi fɛɛ afi ni feɔ 50 lɛ ji Nyamɔ-Afi kpeteŋkpele, ni akuɔ sɛɛ akɛ shishijee nɔtsɛmɛi anibii haa amɛ ekoŋŋ. (3 Mose 25:10) Ajɛ jeeŋmɔ anu enɛ shishi akɛ efeɔ Kristo Afii Akpe Nɔyeli lɛ he mfoniri. Shi, yɛ nyɛsɛɛ afii nɛɛ amli lɛ, ana akɛ nɔ ni Nyamɔ-Afi lɛ fee he mfoniri lɛ je shishi diɛŋtsɛ kɛjɛ Pentekoste 33 Ŋ.B., beni aha mɛi ni amɛnine shɛɔ mumɔ krɔŋkrɔŋ ni afɔse ashwie shi lɛ nɔ lɛ ye amɛhe kɛjɛ Mose Mla kpaŋmɔ lɛ nyɔŋyeli shishi lɛ.—Buu-Mɔɔ, May 1, 1987, baafai 21-31.
Wiemɔi-Atsɛmɔ he La ni Tee Hiɛ
15. Mɛɛ la akpɛ ashwie wiemɔ “jwɛŋmɔ” loo gbɛjianɔtoo kɛ nitsumɔ nɔ?
15 “Jajelɔ lɛ tao ni ena wiemɔi ni ŋɔɔ, ni nɔ ni eŋma nɛɛ, jalɛ kɛ anɔkwale wiemɔi ni.” (Jajelɔ 12:10) Abaanyɛ akɛ wiemɔi nɛɛ ato nɔ ni wɔkaseɔ bianɛ lɛ he, ejaakɛ jeee saji ni he hiaa tamɔ tsɔɔmɔ kɛ jeŋba pɛ nɔ la ekpɛ eshwie, shi yɛ bɔ ni Kristofoi tsɛɔ wiemɔi komɛi amɛhaa kɛ amɛ shishinumɔ ni ja lɛ hu. Akɛ nɔkwɛmɔ nɔ lɛ, woji ni Biblia Kaselɔi sumɔɔ waa lɛ ateŋ ekome ji Studies in the Scriptures kpo kome lɛ ni atsɛɔ lɛ The Divine Plan of the Ages lɛ. Shi, yɛ be ni sa mli lɛ, abayoo akɛ Nyɔŋmɔ Wiemɔ lɛ wieɔ adesai pɛ he akɛ amɛ amɛtoɔ gbɛjianɔ loo amɛjwɛŋɔ. (Abɛi 19:21) Ŋmalɛi lɛ ewieee Yehowa he akɛ eejwɛŋ. Ehe ehiaaa ni ejwɛŋ. Nɔ fɛɛ nɔ ni etoɔ eyiŋ yɛ he lɛ baaye omanye kɛ̃, yɛ enilee kɛ hewalɛ ni bɛ naagbee lɛ hewɔ, taakɛ wɔkaneɔ yɛ Efesobii 1:9, 10 (NW) lɛ: “Yɛ bɔ ni sa ehiɛ jogbaŋŋ lɛ ni eto eyiŋ yɛ mli eha ehe kɛha maŋnɔkwɛmɔ gbɛjianɔtoo yɛ bei ni ato lɛ naagbee.” No hewɔ lɛ, abana fiofio akɛ, wiemɔ “yiŋtoo” lɛ sa jogbaŋŋ beni mɔ ko wieɔ Yehowa he lɛ.
16. Mɛni abana fiofio akɛ no ji Luka 2:14 shishinumɔ ni ja?
16 Agbɛnɛ Luka 2:14 ni aaanu shishi jogbaŋŋ lɛ hu yɛ. Taakɛ King James Version lɛ tsɔɔ lɛ, ekaneɔ akɛ: “Anunyam aha Nyɔŋmɔ yɛ ŋwɛi flooflo, ni toiŋjɔlɛ aba shikpɔŋ lɛ nɔ, ni ana gbɔmɛi ahe tsuijurɔ.” Ana akɛ enɛ etsɔɔɔ shishi yɛ gbɛ ni ja nɔ, ejaakɛ Nyɔŋmɔ ejieee etsuijurɔ kpo yɛ efɔŋ feelɔi ahe. No hewɔ lɛ Odasefoi lɛ susu sane nɛɛ he akɛ eji toiŋjɔlɛ kɛha gbɔmɛi ni yɔɔ Nyɔŋmɔ he tsuijurɔ. No hewɔ lɛ amɛtee nɔ amɛtsɛ mɛi ni yɔɔ Biblia lɛ he miishɛɛ lɛ akɛ tsuijurɔnaa bii. Shi abanu shishi akɛ nɔ ni kɔɔ enɛ he lɛ ji tsuijurɔ, jeee yɛ gbɔmɛi agbɛfaŋ, shi yɛ Nyɔŋmɔ gbɛfaŋ. No hewɔ lɛ New World Translation lɛ shishigbɛ niŋmaa yɛ Luka 2:14 he lɛ wieɔ he akɛ “gbɔmɛi ni [Nyɔŋmɔ] kpɛlɛɔ amɛnɔ.” Nyɔŋmɔ yɛ Kristofoi fɛɛ ni hiɔ shi yɛ amɛ henɔjɔɔmɔ kɛha Nyɔŋmɔ lɛ he kita lɛ naa lɛ he tsuijurɔ.
17, 18. Mɛni Yehowa baabu no bem, ni mɛni ebaatse he?
17 Nakai nɔŋŋ hu kɛjɛ jeeŋmɔ Odasefoi lɛ wie Yehowa gbɛi lɛ bembuu he. Shi ani Satan ebi sane yɛ Yehowa gbɛi lɛ he? Ani Satan najiaŋdamɔlɔi lɛ eko efee nakai, tamɔ nɔ ni Yehowa bɛ hegbɛ akɛ eŋɔɔ nakai gbɛi lɛ? Dabi, dabi kwraa. Jeee Yehowa gbɛi lɛ mpoa atswa, ní no hewɔ lɛ ehe baahia ni abu no bem. No hewɔ ni Buu Mɔɔ Asafo lɛ woji ni baa nyɛsɛɛ nɛɛ ewieee Yehowa gbɛi ni aaabu lɛ bem he lɛ. Amɛwieɔ maŋtsɛ ni Yehowa ji lɛ bembuu kɛ [e]gbɛi lɛ hetsemɔ he. Enɛ kɛ nɔ ni Yesu kɛɛ wɔ akɛ wɔsɔle yɛ he lɛ kpaa gbee: “Ha [o]gbɛi lɛ he atse.” (Mateo 6:9, NW) Yehowa ewie shii abɔ akɛ ebaatse egbɛi lɛ, ni Israelbii lɛ etswaaa lɛ mpoa shi amɛgbe he guɔ lɛ he.—Ezekiel 20:9, 14, 22; 36:23.
18 Nɔ ni yɔɔ miishɛɛ ji akɛ, yɛ 1971 mli lɛ, wolo, “The Nations Shall Know That I Am Jehovah”—How? kɛ sɔrɔto-feemɔ nɛɛ ba: ‘Yesu Kristo miiwuu . . . kɛha jeŋ muu fɛɛ Maŋtsɛ ni Yehowa ji lɛ bembuu kɛ Yehowa gbɛi lɛ anunyamwoo.’ (Baafai 364-5) Yɛ 1973 mli lɛ, God’s Kingdom of a Thousand Years Has Approached lɛ kɛɛ: ‘ “amanehulu kpeteŋkpele” ni baa lɛ ji be kɛha Yehowa Nyɔŋmɔ Ofe lɛ, koni ebu jeŋ muu fɛɛ maŋtsɛ ni eji lɛ bem ni etsuu egbɛi ni sa lɛ he.’ (Baafa 409) Kɛkɛ ni yɛ 1975 mli lɛ, Man’s Salvation Out Of World Distress! lɛ jaje akɛ: ‘No mli lɛ atsu sane ni da fe fɛɛ yɛ jeŋ muu fɛɛ yinɔsane mli lɛ he nii agbe naa, Yehowa jeŋ muu fɛɛ maŋtsɛyeli lɛ bembuu kɛ egbɛi krɔŋkrɔŋ lɛ he tsemɔ.’—Baafa 281.
19, 20. Mɛɛ gbɛ nɔ wɔɔtsɔ wɔjie hiɛsɔɔ kpo yɛ mumɔŋ la-kpɛmɔi ahe?
19 Kwɛ bɔ ni ajɔɔ Yehowa webii aha akɛ amɛmiina mumɔŋ la babaoo nɛɛ mli ŋɔɔmɔ! Nɔ ni tamɔɔɔ nakai kwraa ji wiemɔ ni osɔfo ko wie ni tsɔɔ mumɔŋ duŋ ni Kristendom hiɛnyiɛlɔi lɛ naa amɛhe yɛ mli lɛ: “Mɛni hewɔ esha yɔɔ? Mɛni hewɔ piŋmɔ yɔɔ? Mɛni hewɔ Abonsam yɔɔ? Enɛɛmɛi ji sanebimɔi ni masumɔ mabi Nuntsɔ lɛ kɛ mitee ŋwɛi.” Shi, Yehowa Odasefoi baanyɛ akɛɛ lɛ nɔ hewɔ: Yɛ ja ni Yehowa jeŋ muu fɛɛ maŋtsɛyeli lɛ ja lɛ kɛ sane ni kɔɔ emuuyeli mli ni bɔɔ nii ni ji adesai aaahiɛ aha Nyɔŋmɔ yɛ Abonsam shitee-kɛ-woo fɛɛ sɛɛ lɛ hewɔ.
20 La-kpɛmɔi wuji kɛ bibii ekpɛ eshwie Yehowa tsuji ni amɛjɔɔ amɛhe nɔ lɛ agbɛ nɔ yɛ afii lɛ fɛɛ mli. Ni enɛ eha ŋmalɛi tamɔ Lala 97:11 kɛ Abɛi 4:18 eba mli. Shi, nyɛkahaa wɔhiɛ kpaa nɔ akɛ, la lɛ mli nyiɛmɔ tsɔɔ hiɛsɔɔ ni wɔyɔɔ kɛhaa la ni kpɛɔ babaoo kɛyaa hiɛ lɛ kɛ wɔshihilɛ ni wɔɔha ekɛ enɛ akpa gbee. Taakɛ wɔna lɛ, nɛkɛ la ni efa nɛɛ kɔɔ wɔ jeŋba kɛ wɔ nitsumɔ akɛ wɔshiɛ lɛ fɛɛ he.
[Shishigbɛ niŋmai]
a Yɛ jwɛŋmɔ ni ahiɛ nɛɛ he wiemɔ mli lɛ, June 1 kɛ June 15, 1929 Blɔfo Buu-Mɔɔ lɛ tsɔɔ “hegbɛi ni yeɔ nɔ” lɛ shishi akɛ amɛji Yehowa Nyɔŋmɔ kɛ Yesu Kristo. Ni nɛkɛ shishinumɔ nɛɛ titri ajaje yɛ 1962.
b April 15, 1992 Buu-Mɔɔ lɛ tswa adafi akɛ, akɛ nitsumɔ miiwo nyɛmimɛi hii ni ahala amɛ, ni titri lɛ amɛji “tooi krokomɛi” lɛ mlibii, ni tamɔ Ezra gbii lɛ amli [Nethinim] Sɔlemɔwe Sɔɔlɔi lɛ adɛŋ koni amɛye amɛbua Nɔyeli Kuu ajinafoi lɛ.—Yohane 10:16; Ezra 2:58.
Ani Okaiɔ?
◻ Mɛɛ la akpɛ ashwie heshibaa kɛha “hegbɛi ni yeɔ nɔ lɛ” nɔ?
◻ Mɛɛ nɔyaa yɛ gbɛjianɔtoo mli ejɛ la-kpɛmɔi amli eba?
◻ La ni efa lɛ esa Kristofoi ajeŋba he yɛ mɛɛ gbɛ nɔ?
◻ Mɛɛ saji amlijalemɔ yɛ Ŋmalɛi komɛi ashishinumɔ he mumɔŋ la kɛba?
[He ni Mfoniri ni yɔɔ baafa 25 lɛ Jɛ]
Samfei ni yɔɔ baafa 24 lɛ tsɔɔ: Nitɛŋmɔ lɛ damɔ mfonirii ni asha yɛ Cooper-Hewitt, National Design Museum, Smithsonian Institution lɛ nɔ.