Namɔ Kɛ Yiwalɛ Nifeemɔ Baaba Naagbee?

YƐ September 1999 mli lɛ, Jeŋmaji Ekomefeemɔ lɛ Hiɛnyiɛlɔ Nukpa Kofi Annan kpee najiaŋdamɔlɔi kɛba daa afi Gwabɔɔ Wulu lɛ gbɛjianɔtoo ni ji 54 nɔ̃ lɛ shishi. Taakɛ atswa he adafi yɛ The Toronto Star lɛ mli lɛ, etswa je lɛŋ hiɛnyiɛlɔi lɛ mpoa, ni ekɛɛ: “Gbɔmɛi babaoo yɛ ni nibii babaoo he miihia amɛ fe musuŋtsɔlɛ wiemɔi kɛkɛ ni jɛ jeŋmaji ateŋ akutso lɛ dɛŋ. Wajemɔ kɛ naashiwoo wiemɔ diɛŋtsɛ ko he miihia amɛ koni ekɛ yelikɛbuamɔ aha ni akɛfo amɛyiwalɛ nifeemɔ lɛ sɛɛ, ní eha amɛ shishijee gbɛ kpakpa kɛya shweremɔ shihilɛ mli.”

Ani Jeŋmaji Ekomefeemɔ lɛ kɛ emli maji lɛ baanyɛ amɛkɛ “wajemɔ kɛ naashiwoo wiemɔ diɛŋtsɛ” ni he hiaa koni akɛfo yiwalɛ sɛɛ lɛ aha? Yɛ nɔ ni atsɛ yisɛɛ yɛ Star lɛ nɔŋŋ amaniɛbɔɔ lɛ mli lɛ, United States of America Maŋhiɛnyiɛlɔ Bill Clinton wie akɛ: “Yɛ láshishwiemɔ ni etee nɔ yɛ afii oha nɛɛ mli fɛɛ sɛɛ lɛ, wɔle akɛ ewaaa akɛ wɔɔkɛɛ akɛ ‘ebaŋ mli nakai dɔŋŋ,’ shi ewa akɛ aaanyɛ afee lɛ nakai.” Ekɛ fata he akɛ: “Ní aaawo shi fe nine lɛ baanyɛ afee tamɔ yiwalɛ nɔŋŋ, tamɔ nɔ ni asusuuu mɔ he kwraa.”

Nɔ ni fe afii 2,500 ni eho nɛ lɛ, gbalɔ Yeremia wie yɛ adesai amɔdɛŋbɔɔ he akɛ: “Yehowa, mile akɛ gbɔmɔ gbɛ bɛ lɛ diɛŋtsɛ edɛŋ, ni adesa ní nyiɛ nɛɛ, bɔ ni eeetsɔ ejaje enajifaamɔi eha lɛ, ebɛ edɛŋ.” (Yeremia 10:23) Belɛ mɛɛ hiɛnɔkamɔ yɔɔ mɔ kɛha yiwalɛ ní akɛbaaba naagbee?

Taakɛ wɔkaneɔ yɛ Yesaia 60:18 lɛ, Nyɔŋmɔ kɛ nɔmimaa lɛ haa, akɛ: “Anuŋ yiwalɛ he dɔŋŋ yɛ oshikpɔŋ lɛ nɔ, anuŋ fitemɔ loo hiɛkpatamɔ he dɔŋŋ yɛ ohusui lɛ amli.” Nakai gbalɛ lɛ ná eklɛŋklɛŋ mlibaa beni Nyɔŋmɔ kɛ ewebii ni yɔɔ nomŋɔɔ mli lɛ ku sɛɛ ba amɛ shikpɔŋ nɔ ekoŋŋ lɛ. Ehiɛ mlibaa ni yɔɔ nyam babaoo hu ní wɔbaanyɛ wɔná mli ŋɔɔmɔ. Yehowa Nyɔŋmɔ ‘wooo shi fe nine.’ Akɛ Ŋwɛi Flooflonyo kɛ adesai a-Bɔlɔ lɛ, eyɛ hegbɛ ni sa akɛ ekɛ “yiwalɛ nifeemɔi” aaaba naagbee. Toiŋjɔlɛ baahi shi yɛ Nyɔŋmɔ Maŋtsɛyeli lɛ shishi. Yiwalɛ nifeemɔi sɛɛ baafo kwraa kɛya naanɔ!—Daniel 2:44.