Sanekpakpa lɛ Mli Jɔɔmɔi Srɔtoi

“Yehowa efɔ mi mu, koni mishiɛ sanekpakpa lɛ mitsɔɔ ohiafoi; etsu mi koni mibatsá mɛi ni amɛtsuii ekumɔ lɛ, . . . ni mishɛje ŋkɔmɔyelɔi fɛɛ amii.”—YESAIA 61:1, 2.

 1, 2. (a) Yesu jie ehe kpo akɛ eji namɔ, ni yɛ mɛɛ gbɛ nɔ? (b) Mɛɛ jɔɔmɔi sanekpakpa ni Yesu tswa he adafi lɛ kɛba?

YESU yɛ Nazaret kpeehe lɛ yɛ Hejɔɔmɔ gbi ko nɔ, yɛ esɔɔmɔ nitsumɔ lɛ shishijee mli. Ni taakɛ nɔ ni áŋma afɔ̃ shi lɛ tsɔɔ lɛ, “aŋɔ gbalɔ Yesaia wolo lɛ aha lɛ, ni beni egbele wolo lɛ mli lɛ, ena he ni aŋma yɛ akɛ: ‘[Yehowa mumɔ, NW] lɛ yɛ minɔ, no hewɔ lɛ efɔ mi mu, koni mijaje sanekpakpa lɛ.’” Kɛkɛ ni Yesu tee nɔ ekane gbalɛ shɛɛ sane lɛ babaoo lolo. Kɛkɛ ni eho eta shi ni ekɛɛ akɛ: “Ŋmɛnɛ ŋmalɛ nɛɛ eba mli yɛ nyɛtoiiaŋ”—Luka 4:16-21.

² Nɛkɛ gbɛ nɔ Yesu jie lɛ diɛŋtsɛ ehe kpo yɛ, akɛ sanekpakpa jajelɔ ni agba yɛ ehe, mɔ ni gbaa sanekpakpa kɛ mɔ ni hiɛ miishɛjemɔ wiemɔ lɛ. (Mateo 4:23) Ni mɛɛ sanekpakpa po Yesu yɔɔ kɛɛmɔ nɛkɛ! Ekɛɛ etoibolɔi lɛ akɛ: “Mi ji je lɛ mli la lɛ. Mɔ ni nyiɛɔ misɛɛ lɛ, enyiɛŋ duŋ mli gbi ko gbi ko, shi moŋ eeená wala la lɛ.” (Yohane 8:12) Ekɛɛ hu akɛ: “Kɛji nyɛhi shi yɛ miwiemɔ lɛ mli lɛ, minɔkwa kaselɔi ji nyɛ, ni nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:31, 32) Hɛɛ, Yesu yɛ “naanɔ wala wiemɔi.” (Yohane 6:68, 69) La, wala, heyeli—yɛ anɔkwale mli lɛ, enɛɛmɛi ji jɔɔmɔi ni esa akɛ abu amɛ akɛ jwetri ko!

 3. Mɛɛ sanekpakpa Yesu kaselɔi lɛ shiɛ?

³ Yɛ Pentekoste afi 33 Ŋ.B. sɛɛ lɛ, kaselɔi lɛ tsá Yesu nitsumɔ ni ji sanekpakpa jajemɔ lɛ nɔ. Amɛshiɛ “maŋtsɛyeli lɛ he sanekpakpa lɛ” amɛtsɔɔ Israelbii kɛ gbɔmɛi ni jɛ jeŋmaji lɛ amli lɛ fɛɛ. (Mateo 24:14; Bɔfoi lɛ Asaji 15:7; Romabii 1:16) Mɛi ni kpɛlɛ nɔ lɛ bale Yehowa Nyɔŋmɔ. Akpɔ̃ amɛ kɛjɛ jamɔŋ nyɔŋyeli shishi ni amɛbatsɔmɔ mumɔŋ maŋ hee lɛ, “Nyɔŋmɔ Israel” lɛ, ní emlibii kpaa gbɛ akɛ amɛkɛ amɛ-Nuntsɔ Yesu Kristo baaye nɔ yɛ ŋwɛi kɛya naanɔ lɛ mli bii. (Galatabii 5:1; 6:16; Efesobii 3:5-7; Kolosebii 1:4, 5; Kpojiemɔ 22:5 ) Jɔɔmɔi ni jara wa waa diɛŋtsɛ nɛ!

Sanekpakpa Jajemɔ Ŋmɛnɛ

 4. Nitsumɔ akɛ ashiɛ sanekpakpa lɛ miiba mli ŋmɛnɛ yɛ mɛɛ gbɛ nɔ?

⁴ Ŋmɛnɛ, Kristofoi ni afɔ amɛ mu, ni “asafo babaoo” lɛ ni jɛ “tooi krokomɛi” lɛ ni amɛyifalɛ yaa hiɛ lɛ ateŋ lɛ fiɔ amɛsɛɛ lɛ yaa nɔ amɛhaa gbalɛ nitsumɔ ni akɛwo Yesu dɛŋ kɛjɛ shishijee lɛ baa mli. (Kpojiemɔ 7:9; Yohane 10:16) Nɔ ni ejɛ mli kɛba ji akɛ, aashiɛ sanekpakpa lɛ yɛ gbɛ ni da ni anako eko ni tamɔ nakai da lɛ nɔ. Yehowa Odasefoi etee maji kɛ shikpɔŋkukuji 235 anɔ ‘koni amɛshiɛ sanekpakpa lɛ amɛtsɔɔ ohiafoi; koni amɛtsá mɛi ni amɛtsuii ekumɔ lɛ, ní amɛjaje heyeli amɛtsɔɔ nomi lɛ, ní amɛjaje gbelemɔ amɛtsɔɔ mɛi ní awo amɛ tsuŋ lɛ; ní amɛshiɛ Yehowa duromɔ afi kɛ wɔ-Nyɔŋmɔ lɛ oweletɔɔ gbi, ni amɛshɛje ŋkɔmɔyelɔi fɛɛ amii.’ (Yesaia 61:1, 2) No hewɔ lɛ, Kristofoi asanekpakpa jajemɔ nitsumɔ lɛ yaa nɔ ekɛ jɔɔmɔi bahaa mɛi babaoo kɛ miishɛjemɔ diɛŋtsɛ kɛha “mɛi ni naa amanehulu fɛɛ amanehulu lɛ.”—2 Korintobii 1:3, 4.

 5. Yɛ sanekpakpa lɛ shiɛmɔ he lɛ, Yehowa Odasefoi yɛ srɔto yɛ Kristendom sɔlemɔi lɛ ahe yɛ mɛɛ gbɛ nɔ?

⁵ Eji anɔkwale akɛ Kristendom sɔlemɔi lɛ toɔ sanekpakpa shiɛmɔ gbɛ̀i srɔtoi ahe gbɛjianɔ. Amɛteŋ mɛi pii tsuɔ maŋsɛɛ sanekpakpa shiɛlɔi koni amɛyafee mɛi kaselɔi. Ákɛ nɔkwɛmɔnɔ lɛ, The Orthodox Christian Mission Center Magazine lɛ bɔ Ortodɔks sɔlemɔi lɛ amaŋsɛɛ sanekpakpa shiɛlɔi lɛ anitsumɔ yɛ Madagascar, Afrika wuoyigbɛ, Tanzania, kɛ Zimbabwe lɛ he amaniɛ. Shi, yɛ Ortodɔks Sɔlemɔ lɛ mli lɛ, taakɛ eji yɛ Kristendom sɔlemɔi krokomɛi lɛ amli lɛ, emlibii lɛ ateŋ mɛi ni fa kɛ amɛhe wooo nitsumɔ ni tamɔ nɛkɛ mli. Nɔ ni tamɔɔɔ nakai lɛ, Yehowa Odasefoi ni amɛjɔɔ amɛhe nɔ lɛ fɛɛ bɔɔ mɔdɛŋ ni amɛná sanekpakpa jajemɔ lɛ mli gbɛfaŋnɔ. Amɛnuɔ shishi akɛ, sanekpakpa lɛ jajemɔ yeɔ krɔŋŋ ni amɛhemɔkɛyeli lɛ ji lɛ he odase. Paulo kɛɛ: “Tsui akɛheɔ ayeɔ kɛshɛɔ jalɛ he, ni naabu akɛjajeɔ kɛshɛɔ yiwalaheremɔ he.” Hemɔkɛyeli ni kanyaaa mɔ kɛyaaa nifeemɔ he lɛ, eji nɔ ni egbo diɛŋtsɛ.—Romabii 10:10; Yakobo 2:17.

Sanekpakpa ni kɛ Naanɔ Jɔɔmɔi Baa

 6. Mɛɛ sanekpakpa ayaa nɔ ashiɛɔ ŋmɛnɛ?

⁶ Yehowa Odasefoi shiɛɔ sane ni hi fe fɛɛ eko ni aaanyɛ ashiɛ. Amɛgbeleɔ amɛ-Bibliai amli ni amɛtsɔɔ mɛi ni boɔ toi lɛ akɛ Yesu kɛ ewala shã afɔle koni eha adesai anyɛ abɛŋkɛ Nyɔŋmɔ, amɛná eshaifaa, kɛ naanɔ wala he hiɛnɔkamɔ. (Yohane 3:16; 2 Korintobii 5:18, 19) Amɛtswaa adafi akɛ ato Nyɔŋmɔ Maŋtsɛyeli lɛ ama shi yɛ ŋwɛi, yɛ Maŋtsɛ ni afɔ lɛ mu, Yesu Kristo shishi, ni ákɛ etsɛŋ ni ebaajie efɔŋfeemɔ kɛjɛ shikpɔŋ nɔ, ni ebaakwɛ ni aku sɛɛ akɛ Paradeiso aba ekoŋŋ. (Kpojiemɔ 11:15; 21:3, 4) Yɛ Yesaia gbalɛ lɛ mlibaa mli lɛ, amɛkɛɔ amɛ akutseiaŋbii lɛ akɛ, “Yehowa duromɔ afi,” ni adesai baanyɛ abo sanekpakpa lɛ toi lolo lɛ nɛ. Amɛbɔɔ kɔkɔ hu akɛ, etsɛŋ ni “wɔ-Nyɔŋmɔ lɛ oweletɔɔ gbi,” ní Yehowa baakpata efɔŋfeelɔi ni tsakeee amɛtsui lɛ ahiɛ yɛ mli lɛ baaba.—Lala 37:9-11.

 7. Mɛɛ niiashikpamɔ tsɔɔ ekomefeemɔ ni yɔɔ Yehowa Odasefoi ateŋ, ni mɛni hewɔ amɛnáa ekomefeemɔ ni tamɔ nɛkɛ mli ŋɔɔmɔ?

⁷ Yɛ jeŋ ni oshara kɛ amanehulu eyi mli obɔ nɛɛ mli lɛ, enɛ ji sanekpakpa kome pɛ ni hiɛ naanɔ sɛɛnamɔi. Mɛi ni kpɛlɛɔ nɔ lɛ batsɔmɔɔ jeŋ muu fɛɛ Kristofoi anyɛmifeemɔ ni amɛfee ekome, ni amɛŋmɛɛɛ gbɛ koni maŋ, weku, ninámɔ shihilɛ mli srɔtofeemɔ agbála amɛteŋ lɛ fa. Amɛkɛ ‘suɔmɔ eha amɛhe ejaakɛ eji ekomefeemɔ kpãa ni yeɔ emuu.’ (Kolosebii 3:14; Yohane 15:12) Ana enɛ yɛ nyɛsɛɛ afi lɛ mli yɛ Afrika maŋ ko nɔ. Leebi ko lɛ, ni anu tu tswiamɔ he yɛ maŋtiase lɛ mli. Aaka akɛ aaabutu nɔyeli lɛ ekãa naa. Beni shihilɛ lɛ batsɔ weku kɛ wiemɔ mli béi lɛ, awie ashi Odasefoi aweku ko akɛni amɛkɛ amɛnanemɛi Odasefoi komɛi ni jɛ wiemɔ kɛ weku kroko mli lɛ tee hewɔ. Weku lɛ ha hetoo akɛ: “Yehowa Odasefoi pɛ ji mɛi ni bahi wɔshia lɛ.” Kɛha amɛ lɛ, weku mligbálamɔ jeee nɔ ni he hiaa; Kristofoi asuɔmɔ—mɛi ni miishɛjemɔ he ehia amɛ ni amɛkɛaaha amɛ lɛ—ji nɔ ni he hiaa. Wekunyo ko ni jɛ nakai weku lɛ mli ni jeee Odasefonyo lɛ kɛɛ akɛ: “Jamɔi srɔtoi lɛ fɛɛ amli bii tsɔɔ amɛnanemɛi jálɔi lɛ asɛɛgbɛ. Yehowa Odasefoi pɛ ji mɛi ni efeee nakai.” Saji ni tamɔ nakai nɔŋŋ ni abɔ he amaniɛ kɛjɛ maji ni maŋ tai égbala amɛmli lɛ tsɔɔ akɛ eji anɔkwale akɛ Yehowa Odasefoi ‘yɛ suɔmɔ diɛŋtsɛ kɛha nyɛmimɛi asafo muu lɛ fɛɛ.’—1 Petro 2:17.

Sanekpakpa lɛ Tsakeɔ Gbɔmɛi

 8, 9. (a) Mɛɛ tsakemɔi mɛi ni kpɛlɛɔ sanekpakpa lɛ nɔ lɛ feɔ? (b) Mɛɛ niiashikpamɔi yeɔ hewalɛ ni sanekpakpa lɛ yɔɔ lɛ he odase?

⁸ Sanekpakpa lɛ kɔɔ nɔ ni Paulo tsɛ lɛ akɛ “wala ni yɔɔ agbɛnɛ nɛɛ kɛ nɔ ni baaba lɛ he.” (1 Timoteo 4:8) Jeee akɛ ekɛ wɔsɛɛ be he hiɛnɔkamɔ ni yɔɔ naakpɛɛ ni ji anɔkwale haa kɛkɛ, shi ekɛ nɔyaai yɛ “wala ni yɔɔ agbɛnɛ nɛɛ” mli hu baa. Ákɛ aŋkroaŋkroi lɛ, Nyɔŋmɔ Wiemɔ, ni ji Biblia lɛ ji nɔ ni tsɔɔ Yehowa Odasefoi agbɛ koni amɛha amɛshihilɛ kɛ Nyɔŋmɔ suɔmɔnaa nifeemɔ akpã gbee. (Lala 119:101) Amɛ su kɛ baŋ feɔ ehee yɛ be mli ni amɛnáa sui ni tamɔ jalɛ nifeemɔ kɛ anɔkwayeli lɛ.—Efesobii 4:24.

⁹ Susumɔ Franco nɔkwɛmɔnɔ lɛ he okwɛ. Enyɛɛɛ eye emlifu nɔ. Be fɛɛ be ni naagba ko aaaba ekɛ mɔ ko teŋ pɛ kɛkɛ lɛ, ejie emlifu fɛɛ kpo, ni ekɛfiteɔ nii po. Eŋa kɛ Yehowa Odasefoi kase Biblia lɛ, ni amɛ Kristofoi anɔkwɛmɔnɔ lɛ ye ebua Franco fiofio ni ena akɛ esa akɛ etsake. Ekɛ amɛ kase Biblia lɛ, ni yɛ naagbee lɛ enyɛ ejie mumɔ lɛ yibii ni ji toiŋjɔlɛ kɛ henɔyeli kpo. (Galatabii 5:22, 23) Efata mɛi 492 ni abaptisi amɛ yɛ Belguim yɛ afi 2001 sɔɔmɔ afi lɛ mli lɛ ahe. Agbɛnɛ hu susumɔ Alejandro he okwɛ. Tsofai ni akɛtsuɔ nii yɛ gbɛ fɔŋ nɔ lɛ baná oblanyo lɛ nɔ hewalɛ aahu akɛ eba shi kwraa ni tumo nɔ niyenii eyeɔ, ni ehalaa tumo nɔ nibii ehɔ̃ɔ bɔni afee ni ekɛwo tsofai fɔji ni eheɔ lɛ he nyɔmɔ. Alejandro eye afii 22 beni Yehowa Odasefoi fɔ̃ lɛ nine koni ekɛ amɛ akase Biblia lɛ. Ekane Biblia lɛ daa gbi, ni eyaa Kristofoi akpeei. Etsake eshihilɛ kwraa oyayaayai yɛ nɔ ni shɛɛɛ nyɔji ekpaa mli, ni enyɛ ekɛ ehe wo sanekpakpa jajemɔ nitsumɔ lɛ mli—eji mɛi 10,115 ni fee nakai yɛ nyɛsɛɛ afi lɛ mli yɛ Panama lɛ ateŋ mɔ kome.

Sanekpakpa Lɛ—Eji Jɔɔmɔ Kɛha Mɛi ni He Jɔ Lɛ

10. Namɛi hereɔ sanekpakpa lɛ nɔ lɛ, ni amɛshihilɛ tsakeɔ yɛ mɛɛ gbɛ nɔ?

¹⁰ Yesaia gba akɛ abaashiɛ sanekpakpa lɛ atsɔɔ mɛi ni he jɔ lɛ. Namɛi ji mɛi ni he jɔ nɛɛ? Amɛji mɛi ni atsɔɔ bɔ ni amɛji yɛ Bɔfoi lɛ Asaji awolo lɛ mli, ákɛ “mɛi abɔ ní ajie ato naanɔ wala lɛ.” (Bɔfoi lɛ Asaji 13:48) Amɛji aŋkroaŋkroi ni baa amɛhe shi ni anaa amɛ yɛ gbɔmɛi ashihilɛi srɔtoi fɛɛ mli, ní gbeleɔ amɛtsuii amli amɛhaa anɔkwale shɛɛ sane lɛ. Mɛi ni tamɔ nɛkɛ lɛ kaseɔ akɛ, Nyɔŋmɔ suɔmɔnaa nii ni afeɔ lɛ kɛ jɔɔmɔi ni jara wa kwraa fe nɔ fɛɛ nɔ ni je lɛ kɛhaa lɛ baaba. (1 Yohane 2:15-17) Shi, mɛɛ gbɛ Yehowa Odasefoi tsɔɔ nɔ, ni amɛnine shɛɔ tsuii anɔ yɛ amɛ sanekpakpa jajemɔ nitsumɔ lɛ mli?

11. Taakɛ Paulo tsɔɔ lɛ, mɛɛ gbɛ nɔ esa akɛ atsɔ ashiɛ sanekpakpa lɛ?

¹¹ Ojogbaŋŋ, susumɔ bɔfo Paulo, ni ŋma sane nɛɛ ekɛyaha Korintobii lɛ nɔkwɛmɔnɔ lɛ he okwɛ: “Ni mi hu, anyɛmimɛi, beni miba nyɛŋɔɔ lɛ, jeee wiemɔ flɛmii loo nilee tuutu mikɛba ni mibajaje Nyɔŋmɔ odase lɛ mitsɔɔ nyɛ lɛ; ejaakɛ mitooo miyiŋ akɛ male nɔ ko yɛ nyɛteŋ, akɛ ja Yesu Kristo, mɔ nɔŋŋ ni asɛŋ lɛ lɛ.” (1 Korintobii 2:1, 2) Paulo ebɔɔɔ mɔdɛŋ akɛ ekɛ enilee lɛ aaaha etoibolɔi lɛ anaa akpɛ amɛhe yɛ ehe. Etsɔɔɔ nɔ ko nɔ ko akɛ anɔkwa saji ni ama nɔ mi ni jɛ ŋwɛi, anɔkwa saji ni ŋmɛnɛ aŋmala yɛ Biblia lɛ mli lɛ. Kadimɔ Paulo hewalɛwoo wiemɔi ni ekɛha enaanyo sanekpakpa jajelɔ Timoteo lɛ: “Shiɛmɔ wiemɔ lɛ, kã he, dekã yɛ jio, dekã bɛ jio.” (2 Timoteo 4:2) Esa akɛ Timoteo ashiɛ “wiemɔ” lɛ, Nyɔŋmɔ shɛɛ sane lɛ. Paulo hu ŋma Timoteo akɛ: “Bɔɔ mɔdɛŋ ni okɛ ohe adamɔ Nyɔŋmɔ hiɛ, akɛ mɔ ko ni sa, nitsulɔ ni hiɛ gbooo, ni jaa anɔkwale wiemɔ lɛ mli pɛpɛɛpɛ.”—2 Timoteo 2:15.

12. Mɛɛ gbɛ nɔ Yehowa Odasefoi kɛ Paulo wiemɔi kɛ enɔkwɛmɔnii lɛ tsuɔ nii yɛ ŋmɛnɛ?

¹² Yehowa Odasefoi kaseɔ Paulo nɔkwɛmɔnɔ lɛ, ni amɛboɔ ewiemɔi ni ekɛha Timoteo lɛ toi. Amɛyɔseɔ hewalɛ ni yɔɔ Nyɔŋmɔ Wiemɔ lɛ mli lɛ, ni amɛkɛtsuɔ nii yɛ gbɛ kpakpa nɔ yɛ be mli ni amɛbɔɔ mɔdɛŋ ni amɛtsɔɔ amɛ akutseiaŋbii hiɛnɔkamɔ kɛ miishɛjemɔ wiemɔi ni sa lɛ. (Lala 119:52; 2 Timoteo 3:16, 17; Hebribii 4:12) Eji anɔkwale akɛ, amɛkɛ Biblia kasemɔ he woji tsuɔ nii yɛ gbɛ kpakpa nɔ koni mɛi ni yɔɔ wiemɔ lɛ he miishɛɛ lɛ anyɛ aná Biblia mli nilee babaoo bɔ ni amɛsumɔɔ. Shi amɛbɔɔ mɔdɛŋ be fɛɛ be ni amɛtsɔɔ gbɔmɛi lɛ Ŋmalɛi lɛ amli wiemɔi lɛ. Amɛle akɛ Nyɔŋmɔ Wiemɔ ni jɛ mumɔŋ lɛ ji nɔ ni baatsirɛ heshibalɔi lɛ atsuii. Ni ekɛ nitsumɔ yɛ nɛkɛ gbɛ nɔ lɛ wajeɔ amɛ diɛŋtsɛ amɛhemɔkɛyeli lɛ hu.

“Mishɛje Ŋkɔmɔyelɔi Fɛɛ Amii”

13. Mɛɛ saji ni ba yɛ afi 2001 mli ha ehe bahia akɛ ashɛje mɛi babaoo ni yeɔ ŋkɔmɔ lɛ amii?

¹³ Osharai ni fa ba yɛ afi 2001 mli, ni yɛ enɛ hewɔ lɛ, miishɛjemɔ he bahia aŋkroaŋkroi babaoo. Enɛ he nɔkwɛmɔnɔ ni yɔɔ srɔto kwraa ba yɛ nyɛsɛɛ September nyɔŋ lɛ nɔ yɛ United States, Amerika, beni gbɔmɛi kɛ awuiyeli tutuamɔ ba World Trade Center ni yɔɔ New York lɛ kɛ Pentagon ni bɛŋkɛ Washington, D.C. lɛ anɔ lɛ. Kwɛ bɔ ni nakai tutuamɔi lɛ ha maŋ muu lɛ fɛɛ ahe jɔ̃ amɛhe hã! Kɛji akɛ shihilɛi ni tamɔ nɛkɛ ba lɛ, Yehowa Odasefoi bɔɔ mɔdɛŋ ni amɛtsu nitsumɔ ni akɛwo amɛdɛŋ akɛ ‘amɛshɛje ŋkɔmɔyelɔi fɛɛ amii’ lɛ he nii. Niiashikpamɔi fioo ko baafee bɔ ni amɛfeɔ enɛ amɛhaa lɛ he nɔkwɛmɔnɔ.

14, 15. Te fee tɛŋŋ ni Odasefoi lɛ nyɛ amɛkɛ ŋmalɛi lɛ tsu nii yɛ gbɛ ni mɔɔ shi jogbaŋŋ nɔ yɛ bei srɔtoi enyɔ mli amɛkɛshɛje mɛi ni yeɔ ŋkɔmɔ lɛ amii?

¹⁴ Odasefonyo ko ni ji be-fɛɛ sanekpakpa shiɛlɔ ko bɛŋkɛ yoo ko yɛ gbɛjegbɛ lɛ afã gbɛ, ni ebi lɛ nɔ ni esusuɔ yɛ nyɛsɛɛ awuiyelɔi atutuamɔ nɛɛ he. Yoo lɛ bɔi yaafo. Ekɛɛ sane lɛ edɔ lɛ waa, ni ená ni kulɛ ele bɔ ni eeefee ni eye ebua. Odasefonyo lɛ kɛɛ lɛ akɛ Nyɔŋmɔ yɛ wɔ fɛɛ wɔhe miishɛɛ, ni ekane Yesaia 61:1, 2 etsɔɔ lɛ. Jwɛŋmɔ yɛ wiemɔi ni ajɛ ŋwɛi aŋmala nɛɛ amli kɛha yoo lɛ ní kɛɛ akɛ mɔ fɛɛ mɔ miiye awerɛho lɛ. Ekpɛlɛ dɛhiɛmɔ wolo lɛ eko nɔ, ni ebi ni Odasefonyo lɛ abasara lɛ yɛ eshia.

¹⁵ Odasefoi enyɔ ni kɛ amɛhe ewo sanekpakpa jajemɔ nitsumɔ lɛ mli lɛ kɛ nuu ko ni miitsu nii yɛ egba ko mli kpe. Amɛkɛɛ amɛbaatsɔɔ lɛ miishɛjemɔ wiemɔi komɛi ni jɛ Ŋmalɛi lɛ amli yɛ nyɛsɛɛ amanehulu ni ba World Trade Center lɛ nɔ lɛ hewɔ. Akɛni ekpɛlɛ nɔ hewɔ lɛ, amɛkane 2 Korintobii 1:3-7, ni wiemɔi ni ji “Kristo hewɔ lɛ wɔmiishɛjemɔ hu faa tekeɔ nɔ” fata he. Nuu lɛ hiɛ sɔ akɛ ekutseiaŋbii Odasefoi miija nɔ ko ni shɛjeɔ mɔ mii amɛmiiha mɛi krokomɛi, ni ekɛɛ akɛ: “Eba akɛ Nyɔŋmɔ aaajɔɔ nitsumɔ ni hi jogbaŋŋ ni nyɛtsuɔ lɛ nɔ.”

16, 17. Mɛɛ niiashikpamɔi enyɔ feɔ hewalɛ ni Biblia lɛ yɔɔ ni ekɛaaye ebua aŋkroaŋkroi ni yeɔ awerɛho loo osharai eha amɛhao waa lɛ he nɔkwɛmɔnɔ yɔɔ?

¹⁶ Odasefonyo ko ni miiya ayasara mɛi ni yɔɔ wiemɔ lɛ he miishɛɛ lɛ kɛ yoo ko ni jie miishɛɛ kpo yɛ wiemɔ lɛ he lɛ binuu ko kpe ni etsɔɔ mli akɛ eesusu bɔ ni akutseiaŋbii lɛ nuɔ he amɛhaa, yɛ nyɛsɛɛ oshara ni ba lɛ hewɔ. Nuu lɛ naa kpɛ ehe akɛ Odasefonyo lɛ kɛ lɛ diɛŋtsɛ ebe miitsu nii ni ekɛmiisara gbɔmɛi eekwɛ bɔ ni amɛyaa nɔ amɛhaa. Ewie akɛ eetsu nii yɛ he ko ni bɛŋkɛ World Trade Center lɛ beni tutuamɔ lɛ je shishi lɛ, ni ena bɔ ni nɔ fɛɛ nɔ tee nɔ ha. Beni ebi nɔ hewɔ ni Nyɔŋmɔ ŋmɛɔ piŋmɔ gbɛ lɛ, Odasefonyo lɛ kane saji kukuji kɛjɛ Biblia lɛ mli, ni Lala 37:39 ní kaneɔ akɛ: “Shi jalɔi lɛ ayiwalaheremɔ lɛ jɛ Yehowa ŋɔɔ; lɛ ji amɛmɔɔ yɛ fimɔ be mli” lɛ fata he. Nuu lɛ kɛ mlihilɛ bi Odasefonyo lɛ kɛ eweku shi, ni efɔ̃ lɛ nine akɛ eku esɛɛ eba, ni ejie tsuiŋ hiɛsɔɔ kpo diɛŋtsɛ kɛha saramɔ lɛ.

¹⁷ Gbɔmɛi akpei abɔ ni Yehowa Odasefoi shɛje amɛmii yɛ gbii ni nyiɛ awuiyelɔi lɛ atutuamɔi lɛ asɛɛ lɛ ateŋ mɔ kome ji yoo ko ni Odasefoi lɛ kɛ lɛ kpe beni amɛsaraa amɛ akutseiaŋbii lɛ. Nɔ ni ba lɛ eha ehao waa, ni ebo toi yɛ be mli ni amɛkaneɔ Lala 72:12-14 lɛ: “Ejaakɛ eeejie ohiafoi ni bolɔɔ lɛ, kɛ nɔnalɔ ni bɛ bualɔ lɛ. Eeena ohiafo kɛ mɔ ni efi lɛ lɛ mɔbɔ, ni ehere mɛi ni efi amɛ lɛ asusumai ayiwala. Eeekpɔ amɛsusuma kɛaajɛ fifiamɔ kɛ yiwalɛ mli, ni amɛlá jara aaawa yɛ ehiɛ.” Kwɛ bɔ ni shishinumɔ yɔɔ nakai wiemɔi lɛ amli ha! Yoo lɛ bi ni Odasefoi lɛ akane nakai kuku lɛ ekoŋŋ, ni efɔ nine etsɛ amɛ koni amɛba eshia lɛ mli koni amɛtsa sanegbaa lɛ nɔ. Beni sanegbaa lɛ baa naagbee lɛ, áje shia Biblia mli nikasemɔ shishi.

18. Te fee tɛŋŋ ni Odasefonyo ko ye ebua enanemɛi beni atsɛ lɛ ni esɔle eha amɛ lɛ?

¹⁸ Odasefonyo ko tsuɔ nii yɛ niyelihe ko yɛ akutso ko ni niiatsɛmɛi yɔɔ jɛmɛ waa ni tsutsu lɛ amɛjieee miishɛɛ tsɔ kpo yɛ Maŋtsɛyeli lɛ he sanekpakpa lɛ he lɛ mli. Etamɔ nɔ ni awuiyeli tutuamɔ lɛ hoso nakai akutso lɛ waa yɛ no sɛɛ. Yɛ Sohaa gbɛkɛ beni tutuamɔ lɛ eba lɛ sɛɛ lɛ, onukpa ni kwɛɔ niyelihe lɛ nɔ lɛ tsɛ́ ni mɔ fɛɛ mɔ aya agbo lɛ naa ni amɛyasũ kɛnɛrɛi, ni amɛfee dioo ni amɛkɛkai mɛi ni egboi lɛ. Akɛni Odasefonyo lɛ kɛ bulɛ haa amɛhenumɔi hewɔ lɛ, eje kpo ni eyadamɔ gbɛ lɛ masɛi diŋŋ. Nitsumɔtsɛ lɛ le akɛ eji Yehowa Odasefonyo sɔɔlɔ, no hewɔ lɛ beni amɛ́yasusu nɔ ni ba lɛ he lɛ sɛɛ lɛ, ebi lɛ ni edamɔ amɛ fɛɛ amɛnajiaŋ ni esɔle. Odasefonyo lɛ kpɛlɛ nɔ. Yɛ esɔlemɔ lɛ mli lɛ, etsĩ awerɛho babaoo ni ayeɔ lɛ tã, shi ekɛɛ akɛ esaaa akɛ mɛi ni fóɔ lɛ yeɔ awerɛho ni hiɛnɔkamɔ bɛ mli. Ewie be mli ni yiwalɛ nibii ni tamɔ nɛkɛ baŋ dɔŋŋ lɛ he, ni ekɛɛ akɛ amɛ fɛɛ amɛbaanyɛ amɛtsi amɛbɛŋkɛ miishɛjemɔ Nyɔŋmɔ lɛ kɛtsɔ anɔkwa nilee ni jɛ Biblia lɛ mli lɛ nɔ. Beni ekɛɛ “Amen” lɛ sɛɛ lɛ, nitsumɔtsɛ lɛ—ni gbɔmɛi fe 60 ni yɔɔ niyelihe lɛ fata ehe lɛ—ba Odasefonyo lɛ ŋɔɔ, ni amɛda lɛ shi, ni amɛfua lɛ, ni yoo lɛ kɛɛ sɔlemɔ lɛ ji nɔ ni hi fe fɛɛ ni enu dã.

Jɔɔmɔ Kɛha Akutso Lɛ

19. Mɛɛ niiashikpamɔ tsɔɔ akɛ mɛi komɛi yɔseɔ Yehowa Odasefoi ajeŋba kpakpa ni nɔ kwɔlɔ lɛ?

¹⁹ Yɛ nɛkɛ gbii nɛɛ amli titri lɛ, akutsei ni Yehowa Odasefoi tsuɔ nii yɛ mli lɛ náa jɛmɛ ni amɛyaa lɛ he sɛɛ waa—taakɛ mɛi pii ewie he lɛ. Mɛni hewɔ gbɔmɛi ni haa toiŋjɔlɛ, anɔkwayeli, kɛ jeŋba hetsemɔ shwereɔ lɛ efeŋ mɛi ni náa gbɔmɛi anɔ hewalɛ kpakpa? Odasefoi kɛ tsutsu maŋ hebulɔi ni yɔɔ Central Asia maŋ ko mli lɛ mli onukpai lɛ ateŋ mɔ kome ni eba hejɔɔmɔ lɛ kpe. Ekɛɛ akɛ, be ko lɛ akɛ nitsumɔ wo edɛŋ akɛ epɛi jamɔi agbɛjianɔtoi srɔtoi lɛ amli ekwɛ. Beni epɛi Yehowa Odasefoi ajamɔ lɛ mli ekwɛ lɛ, enaa kpɛ ehe yɛ amɛ anɔkwayeli kɛ jeŋba kpakpa lɛ hewɔ. Ehiɛ sɔ amɛhemɔkɛyeli ni yɔɔ shiŋŋ lɛ waa, kɛ anɔkwale ni eji akɛ amɛtsɔɔmɔi lɛ damɔ Ŋmalɛi lɛ anɔ lɛ. Nuu nɛɛ kpɛlɛ ni akɛ lɛ akase Biblia lɛ.

20. (a) Mɛni nitsumɔ ní Yehowa Odasefoi bɔ he amaniɛ yɛ nyɛsɛɛ afi lɛ mli lɛ tsɔɔ? (b) Mɛni tsɔɔ akɛ nitsumɔ babaoo yɛ lolo ni abaatsu, ni te wɔbuɔ hegbɛ ni wɔná akɛ sanekpakpa jajelɔi lɛ wɔhaa tɛŋŋ?

²⁰ Anaa kɛjɛɔ niiashikpamɔi akpei abɔ ni abaanyɛ agba lɛ amli niiashikpamɔi fioo ni agba he sane yɛ nikasemɔ nɛɛ mli lɛ mli akɛ, eyɛ faŋŋ akɛ Yehowa Odasefoi naaa dekã kwraa yɛ afi 2001 sɔɔmɔ afi lɛ mli.a Amɛkɛ gbɔmɛi akpekpei abɔ wie, amɛshɛje mɛi babaoo ni yeɔ awerɛho lɛ amii, ni ajɔɔ amɛ sanekpakpa jajemɔ nitsumɔ lɛ nɔ. Abaptisi mɛi 263,431 ni amɛkɛfee amɛhe nɔ ni amɛjɔɔ amɛha Nyɔŋmɔ lɛ he okadi. Sanekpakpa jajelɔi lɛ ayifalɛ tee hiɛ yɛ jeŋ fɛɛ kɛ oha mlijaa 1.7 nɔyaa. Ni yɛ anɔkwale ni eji akɛ mɛi 15,374,986 ba daa afi Yesu gbele lɛ Kaimɔ lɛ shishi lɛ tsɔɔ akɛ nitsumɔ babaoo yɛ lolo ni abaatsu. (1 Korintobii 11:23-26) Eba akɛ wɔɔya nɔ wɔtao mɛi ni he jɔ ni kpɛlɛɔ sanekpakpa lɛ nɔ lɛ. Ni yɛ bei abɔ ni Yehowa duromɔ afi lɛ yaa nɔ lɛ, eba akɛ wɔɔya nɔ wɔshɛje “mɛi ni amɛtsuii ekumɔ lɛ” amii. Mɛɛ hegbɛ ni jɔɔmɔ yɔɔ mli po wɔná nɛkɛ! Yɛ anɔkwale mli lɛ, wɔ fɛɛ wɔhaa Yesaia wiemɔi nɛɛ jijeɔ, akɛ: “Manya yɛ Yehowa mli, ni misusuma mli aaafili lɛ yɛ mi-Nyɔŋmɔ lɛ mli.” (Yesaia 61:10) Eba akɛ Nyɔŋmɔ aaaya nɔ ekɛ wɔ atsu nii yɛ be mli ni ehaa nɛkɛ gbalɛ wiemɔi nɛɛ baa mli lɛ, akɛ: “Nuntsɔ Yehowa aaaha jalɛ kɛ yijiemɔ akwɛ̃ yɛ jeŋmaji lɛ fɛɛ ahiɛ.”—Yesaia 61:11.

[Shishigbɛ niŋmaa]

Ani Okaiɔ?

• Mɛɛ gbɛ nɔ atsɔ sanekpakpa ni Yesu shiɛ lɛ nɔ ajɔɔ mɛi ni he jɔ lɛ?

• Mɛɛ jɔɔmɔi mɛi ni kpɛlɛ sanekpakpa jajemɔ nitsumɔ ni Yesu klɛŋklɛŋ afii oha lɛ mli kaselɔi lɛ tsu lɛ nɔ lɛ anine shɛ nɔ?

• Yɛ mɛɛ gbɛ nɔ átsɔ sanekpakpa lɛ nɔ ajɔɔ mɛi ni kpɛlɛɔ nɔ ŋmɛnɛ lɛ hu?

• Te wɔbuɔ hegbɛ ni wɔna ákɛ sanekpakpa jajelɔi lɛ wɔhaa tɛŋŋ?

[Akrabatsa ni yɔɔ baafa 19-22]

2001 YEHOWA ODASEFOI AJEŊ FƐƐ SƆƆMƆ AKƆNTAABUU

(Kwɛmɔ “bound volume”)

[Mfonirii ni yɔɔ baafa 15]

Yehowa Odasefoi kaiɔ gbɛnaa nii ni kã amɛnɔ akɛ amɛshiɛ sanekpakpa lɛ be fɛɛ be

[Mfonirii ni yɔɔ baafa 17]

Mɛi ni kpɛlɛɔ sanekpakpa lɛ nɔ lɛ batsɔmɔɔ jeŋ muu fɛɛ nyɛmifeemɔ ni efee ekome lɛ fã