Yitso Nɛɛhu

Okɛ Ohiɛ Afɔ̃ Yehowa Nɔ yɛ Haomɔ Bei Amli

Yesaia 7:1–8:18

 1. Mɛni hewɔ Kristofoi ni yɔɔ ŋmɛnɛ lɛ baaná Yesaia yitsei 7 kɛ 8 lɛ mlipɛimɔ he sɛɛ lɛ?

YESAIA yitsei 7 kɛ 8 lɛ jieɔ nifeemɔi srɔtoi ní kɛ amɛhe kpãaa gbee kpo. Yesaia kɛ Ahaz fɛɛ jɛ maŋ ní ejɔɔ amɛhe nɔ amɛha Yehowa lɛ mli; mɛi enyɔ lɛ fɛɛ yɛ nitsumɔi ni Nyɔŋmɔ kɛha amɛ, mɔ kome lɛ, ákɛ gbalɔ, kɛ mɔ kroko lɛ, ákɛ Yuda maŋtsɛ; ni mɛi enyɔ lɛ fɛɛ kɛ hegbeyeiwoo kome lɛ nɔŋŋ kpe—henyɛlɔi atai ní he wa ebatutua Yuda. Shi kɛlɛ, Yesaia kpee hegbeyeiwoo lɛ naa kɛ hekɛnɔfɔɔ yɛ Yehowa mli, shi Ahaz ŋmɛɛ ehe eha gbeyeishemɔ. Mɛni hewɔ amɛfee amɛnii yɛ gbɛ̀i srɔtoi anɔ lɛ? Akɛni henyɛlɔi atai ebɔle Kristofoi ni yɔɔ ŋmɛnɛ lɛ ahe yɛ gbɛ ní tamɔ nakai nɔŋŋ nɔ hewɔ lɛ, amɛaafee jogbaŋŋ akɛ amɛaasusu Yesaia wolo lɛ yitsei enyɔ nɛɛ ahe koni amɛna nikasemɔi ni yɔɔ mli.

Yiŋkpɛɛ ko Feemɔ

2, 3. Te Yesaia fo sane lɛ kuku yɛ eshishijee wiemɔi lɛ amli eha tɛŋŋ?

² Bɔ ni nitɛŋlɔ kɛ brɔshi kɛ pɛnte gbálaa liamɔi fioo komɛi ní ekɛjeɔ enitɛŋmɔ hee ko shishi lɛ, nakai Yesaia jeɔ esane lɛ shishi kɛ wiemɔi fioo komɛi ní kɔɔ nibii babaoo he, ní kadiɔ nibii ní ebaawie he lɛ ashishijee kɛ naagbee, akɛ: “Eba mli yɛ Yuda maŋtsɛ Ahaz ni ji Uzia bi Yotam bi lɛ yinɔ, ákɛ Aram maŋtsɛ Rezin kɛ Israel maŋtsɛ Peka ni ji Remalia bi lɛ fã kɛba Yerusalem ní amɛkɛ lɛ abawu, shi amɛnyɛɛɛ lɛ.”—Yesaia 7:1.

³ Afi lɛ ji afii kpaanyɔ D.Ŋ.B. Ahaz ebaye etsɛ Yotam sɛɛ akɛ Yuda nɔ maŋtsɛ. Rezin, ni ji Aram maŋtsɛ lɛ, kɛ Peka, ni ji Israel kooyigbɛ maŋtsɛyeli lɛ nɔ maŋtsɛ lɛ, batutua Yuda, ni amɛsraafoi lɛ atutuamɔ lɛ mli wa waa. Yɛ naagbee lɛ, amɛbaawo Yerusalem diɛŋtsɛ he ká. Shi kɛlɛ, káwoo lɛ yeŋ omanye. (2 Maŋtsɛmɛi 16:5, 6; 2 Kronika 28:5-8) Mɛni hewɔ? Wɔbaale no yɛ sɛɛ mli.

 4. Mɛni hewɔ gbeyeishemɔ yimɔ Ahaz kɛ emaŋbii lɛ atsuii amli obɔ̃bɔ̃ lɛ?

⁴ Ta lɛ shishijee gbɛ lɛ, “abatswa David we lɛ adafi, akɛ Arambii lɛ ebabɔ nsara yɛ Efraim. Kɛkɛ ni etsui kɛ emaŋbii lɛ atsui hoso tamɔ kɔɔyɔɔ hosoɔ koo mli tsei [lɛ].” (Yesaia 7:2) Hɛɛ, Ahaz kɛ emaŋbii lɛ she gbeyei beni amɛná amɛle akɛ Arambii lɛ kɛ Israelbii lɛ efee ekome kɛte shi ewo amɛ, ni ákɛ amɛsraafoi lɛ ebabɔ nsara yɛ Efraim (Israel) shikpɔŋ nɔ yɛ nɛkɛ be pɔtɛɛ nɛɛ mli lɛ. He ni amɛbashɛ lɛ kɛ Yerusalem jɛkɛmɔ aaafee gbii enyɔ loo gbii etɛ gbɛnyiɛmɔ kɛkɛ!

 5. Nyɔŋmɔ webii ni yɔɔ ŋmɛnɛ lɛ je Yesaia yɛ mɛɛ gbɛ nɔ?

⁵ Yehowa kɛɛ Yesaia akɛ: “Yaa ni okɛ Ahaz ayakpe, bo kɛ obi Shear-Yashub, yɛ kpaakpo ni yɔɔ yiteŋgbɛ lɛ nujɔɔ lɛ naa yɛ niiahefɔlɔi abɔɔ lɛ tempɔŋ lɛ nɔ.” (Yesaia 7:3) Bo diɛŋtsɛ susumɔ he okwɛ! Be mli ni esa akɛ maŋtsɛ lɛ atao Yehowa gbalɔ lɛ sɛɛgbɛ ní ebi gbɛtsɔɔmɔ lɛ, esa akɛ gbalɔ lɛ moŋ aya ní eyatao maŋtsɛ lɛ! Ni nakai po lɛ, Yesaia kɛ miishɛɛ bo Yehowa toi. Nakai nɔŋŋ Nyɔŋmɔ webii ni yɔɔ ŋmɛnɛ lɛ hu yaa amrɔ nɔŋŋ amɛyataoɔ gbɔmɛi ní sheɔ gbeyei yɛ je nɛŋ nɔnyɛɛ shihilɛi lɛ ahewɔ lɛ asɛɛgbɛ. (Mateo 24:6, 14) Kwɛ bɔ ni eyɔɔ miishɛɛ akɛ daa afi lɛ gbɔmɛi akpei ohai abɔ hereɔ sanekpakpa shiɛlɔi nɛɛ asaramɔi lɛ anɔ, ni amɛmɔɔ Yehowa nine ní buɔ mɔ he lɛ mli!

 6. (a) Mɛɛ shɛɛ sane ní woɔ mɔ hewalɛ gbalɔ lɛ kɛyaha Maŋtsɛ Ahaz? (b) Mɛɛ shihilɛ yɔɔ ŋmɛnɛ?

⁶ Yesaia yana Ahaz yɛ Yerusalem gbogboi lɛ asɛɛ, ní maŋtsɛ lɛ etee eekwɛ bɔ ni he ni maŋtiase lɛ náa nu kɛjɛɔ lɛ yɔɔ, koni ekɛsaa ehe kɛha káwoo ni ekpaa gbɛ lɛ. Yesaia kɛ Yehowa shɛɛ sane lɛ ha lɛ akɛ: “Kwɛ ohe ní ahi ní ofee dioo; kaashe gbeyei ni otsui akafã yɛ nɛkɛ latsei kukuji enyɔ ní jeɔ lasu nɛɛ ahewɔ, yɛ Rezin kɛ Aram kɛ Remalia bi lɛ mlila lɛ hewɔ!” (Yesaia 7:4) Beni tutualɔi lɛ bakpata Yuda hiɛ be ko ní eho lɛ, no mli lɛ amɛmlifu lɛ naa wa tamɔ lalilɛii. Amrɔ nɛɛ amɛji ‘latsei kukuji enyɔ ní miije lasu’ kɛkɛ. Esaaa akɛ Ahaz sheɔ Aram Maŋtsɛ Rezin loo Israel Maŋtsɛ Peka, ni ji Remalia bi lɛ gbeyei. Etamɔ nakai nɔŋŋ ŋmɛnɛ. Afii ohai abɔ nɛ, ní Kristendom hiɛnyiɛlɔi lɛ kɛ yiwaa ní naa wa tamɔ la eba anɔkwa Kristofoi anɔ. Shi, amrɔ nɛɛ, Kristendom tamɔ lai kuku ní eshwɛ fioo ni fɛɛ baashã kwraa agbɛnɛ. Enaagbee eshɛ etã.

 7. Mɛni hewɔ Yesaia gbɛi kɛ ebinuu lɛ hu gbɛi haa anáa yiŋtoo ní aaadamɔ nɔ aná hiɛnɔkamɔ lɛ?

⁷ Yɛ Ahaz gbii lɛ amli lɛ, jeee Yesaia shɛɛ sane lɛ kɛkɛ, shi moŋ Yesaia gbɛi lɛ, kɛ ebinuu lɛ hu gbɛi lɛ ashishinumɔ ha mɛi ni kɛ amɛhiɛ fɔ̃ɔ Yehowa nɔ lɛ ná hiɛnɔkamɔ. Lɛɛlɛŋ, Yuda yɛ oshara mli, shi gbɛi Yesaia, ní shishinumɔ ji “Yehowa Yiwalaheremɔ” lɛ, tsɔɔ akɛ Yehowa kɛ kpɔmɔ baaha. Yehowa kɛɛ Yesaia akɛ ekɛ ebinuu Shear-Yashub, ní egbɛi lɛ shishi ji “Shwɛɛnii Fioo ko Baaku Amɛsɛɛ” lɛ, afata ehe kɛya. Kɛ́ Yuda maŋtsɛyeli lɛ gbee shi yɛ naagbee kwraa po lɛ, Nyɔŋmɔ baajɛ mɔbɔnalɛ mli ekɛ shwɛɛnii ko aku sɛɛ kɛba shikpɔŋ lɛ nɔ.

Ejeee Jeŋmaji Ateŋ Ta Kɛkɛ

 8. Mɛni hewɔ Yerusalem tutuamɔ lɛ fe jeŋmaji ateŋ ta kɛkɛ lɛ?

⁸ Yehowa tsɔ Yesaia nɔ ejie ŋaa gbɛ ní Yuda henyɛlɔi lɛ kɛbaatsu nii lɛ kpo. Ŋaa ní amɛtsɔɔ nɛ: “Nyɛhaa wɔfãa wɔyatuaa Yuda ní wɔgbaa enaa, ní wɔŋɔ lɛ wɔha wɔhe, ní wɔwó Tabeel bi lɛ maŋtsɛ yɛ mli!” (Yesaia 7:5, 6) Aram kɛ Israel ní efee ekome lɛ miitsɔ ŋaa ní amɛye Yuda nɔ kunim, ní amɛwó amɛ diɛŋtsɛ amɛmaŋtsɛ yɛ Ahaz, ni ji David bi lɛ najiaŋ. Eyɛ faŋŋ akɛ, agbɛnɛ tutuamɔ ní akɛba Yerusalem nɔ lɛ fe jeŋmaji ateŋ ta kɛkɛ. Ebatsɔ mpleshii ní kã Satan kɛ Yehowa teŋ. Mɛni hewɔ? Ejaakɛ Yehowa Nyɔŋmɔ kɛ Maŋtsɛ David fee kpaŋmɔ, ni etsɔ no nɔ ema nɔ mi eha lɛ akɛ ebihii baaye Yehowa webii lɛ anɔ maŋtsɛ. (2 Samuel 7:11, 16) Kwɛ kunimyeli ní eeeji kɛha Satan kɛji eeenyɛ ekɛ odehei aweku kroko mli nyo ata maŋtsɛsɛi lɛ nɔ yɛ Yerusalem! Ebaanyɛ efite Yehowa yiŋtoo kɛha David seshi lɛ akɛ naanɔ gboshiniyelɔ, ní “Hejɔlɛ lumɔ” lɛ baajɛ mli kɛba lɛ po.—Yesaia 9:5, 6.

Yehowa Nɔmimaa Wiemɔi ni Jɛ Suɔmɔ Mli

 9. Mɛɛ nɔmimaa wiemɔi esa akɛ ewo Ahaz kɛ Kristofoi ni yɔɔ ŋmɛnɛ lɛ hu ekãa?

⁹ Ani ŋaa ní Aram kɛ Israel tsɔɔ lɛ baaye omanye? Dabi. Yehowa jaje akɛ: “Edamɔŋ shi ni ebaŋ mli nakai!” (Yesaia 7:7) Yehowa tsɔ Yesaia nɔ ewie akɛ jeee akɛ Yerusalem he káwoo lɛ yeŋ omanye kɛkɛ, shi moŋ “biɛ afii nyɔŋmai ekpaa kɛ enumɔ lɛ aaabutu Efraim ni efeŋ maŋ dɔŋŋ!” (Yesaia 7:8) Hɛɛ, afii 65 sɛɛ lɛ, Israel ehiŋ shi ákɛ maŋ dɔŋŋ.a Esa akɛ nɛkɛ nɔmimaa wiemɔi, kɛ ebe he gbɛjianɔtoo pɔtɛɛ nɛɛ, awo Ahaz ekãa. Nakai nɔŋŋ Nyɔŋmɔ webii ni yɔɔ ŋmɛnɛ lɛ hu náa hewalɛwoo kɛjɛɔ le ní amɛle akɛ be ni eshwɛ kɛha Satan je lɛ etã kwraa lɛ mli.

10. (a) Anɔkwa Kristofoi ni yɔɔ ŋmɛnɛ lɛ baanyɛ akase Yehowa yɛ mɛɛ gbɛ nɔ? (b) Mɛɛ hegbɛ ko Yehowa kɛha Ahaz?

¹⁰ Ekolɛ Ahaz hiɛ su tsɔɔ akɛ eheee eyeee, ejaakɛ Yehowa tsɔ Yesaia nɔ ewie akɛ: “Kɛ́ nyɛheee nyɛyeee lɛ, nyɛdamɔŋ shi!” Yehowa jɛ tsuishitoo mli ‘esaa ekɛ Ahaz wie.’ (Yesaia 7:9, 10) Mɛɛ nɔkwɛmɔnɔ fɛfɛo nɛ! Ŋmɛnɛ, eyɛ mli akɛ mɛi babaoo hereee Maŋtsɛyeli shɛɛ sane lɛ nɔ amrɔ nɔŋŋ moŋ, shi wɔɔfee jogbaŋŋ akɛ wɔɔkase Yehowa kɛtsɔ ‘saamɔ ní wɔɔsaa wɔwie ekoŋŋ’ beni wɔyaa mɛi lɛ aŋɔɔ shii abɔ lɛ nɔ. No sɛɛ lɛ, Yehowa kɛɛ Ahaz akɛ: “Bi okadi kɛjɛ Yehowa, o-Nyɔŋmɔ lɛ, dɛŋ oha ohe, gbohiiaje tɔ̃ɔ obi yɛ jio, ŋwɛi shɔŋŋ jio!” (Yesaia 7:11) Ahaz baanyɛ abi okadi, ni Yehowa baafee ákɛ shiwoo ní ekɛhaa akɛ ebaabu David we lɛ he.

11. Mɛni nɔmimaa anaa yɛ wiemɔ ní Yehowa wie akɛ ‘o-Nyɔŋmɔ’ lɛ mli?

¹¹ Kadimɔ akɛ Yehowa kɛɛ akɛ: ‘Bi okadi kɛjɛ o-Nyɔŋmɔ lɛ dɛŋ.’ Yehowa mli hi lɛɛlɛŋ. Ábɔ amaniɛ momo akɛ Ahaz jáa apasa nyɔŋmɔi, ni ekɛ ehe woɔ wɔŋjalɔi anifeemɔi ni yɔɔ nyaŋemɔ mli. (2 Maŋtsɛmɛi 16:3, 4) Yɛ enɛ fɛɛ sɛɛ, kɛ agbɛnɛ, yɛ Ahaz gbeyeishemɔ su lɛ fɛɛ sɛɛ lɛ, Yehowa tsɛɔ ehe akɛ Ahaz Nyɔŋmɔ lolo. Enɛ maa nɔ mi kɛhaa wɔ akɛ Yehowa kɛ kpalakpalafeemɔ kpooo adesai kɛkɛ. Eesumɔ ní ekpã yelikɛbuamɔ mli eha mɛi ní tɔ̃ɔ loo mɛi ni hemɔkɛyeli egbɔjɔ lɛ. Ani Nyɔŋmɔ suɔmɔ lɛ nɔmimaa nɛɛ baatsirɛ Ahaz ní ekpɛlɛ Yehowa dɛŋ yelikɛbuamɔ nɔ?

Kɛjɛ Yiŋkɔshikɔshifeemɔ Mli Kɛtee Toigbele Mli

12. (a) Mɛɛ henɔwomɔ su Ahaz ná? (b) Yɛ nɔ najiaŋ ní eeeya Yehowa ŋɔɔ lɛ, namɔ ŋɔɔ Ahaz tee kɛha yelikɛbuamɔ?

¹² Ahaz kɛ atuatsemɔ ha hetoo akɛ: “Mibiii ni misaa mikaaa Yehowa!” (Yesaia 7:12) Enɛ etsɔɔɔ akɛ Ahaz miiye mla lɛ mli wiemɔi ní kɛɔ akɛ: “Nyɛkakaa Yehowa, nyɛ-Nyɔŋmɔ lɛ” nɔ yɛ biɛ. (5 Mose 6:16) Afii ohai abɔ sɛɛ lɛ, Yesu tsɛ́ nakai mla lɛ nɔŋŋ sɛɛ beni Satan kaa lɛ lɛ. (Mateo 4:7) Shi, yɛ Ahaz gbɛfaŋ lɛ, Yehowa miifɔ̃ lɛ nine ní eku esɛɛ kɛba anɔkwa jamɔ he ekoŋŋ, ni eeha lɛ hegbɛ akɛ ebaafee okadi ko ní ekɛwo ehemɔkɛyeli lɛ hewalɛ. Shi kɛlɛ, Ahaz miisumɔ ní eyatao hebuu yɛ he kroko moŋ. Eeenyɛ efee akɛ nɛkɛ be nɛɛ mli ji beni maŋtsɛ lɛ kɛ shika babaoo tsu kɛtee Ashur, beni etaoɔ yelikɛbuamɔ ni ekɛwuu eshi ehenyɛlɔi ni jɛ kooyigbɛ lɛ. (2 Maŋtsɛmɛi 16:7, 8) Beni enɛ yaa nɔ lɛ, no mli lɛ Aram kɛ Israel asraafoi lɛ efee ekome kɛbɔle Yerusalem he ni amɛwo maŋ lɛ he ká.

13. Mɛɛ tsakemɔ ko wɔkadiɔ yɛ kuku 13 lɛ, ni mɛni etsɔɔ?

¹³ Beni hemɔkɛyeli ní maŋtsɛ lɛ bɛ lɛ yɔɔ ejwɛŋmɔ mli lɛ, Yesaia wie akɛ: “Nyɛboa toi ko, David we! Aso ní nyɛhaoɔ gbɔmɛi lɛ, no faaa haaa nyɛ, hewɔ ni nyɛbahao mi-Nyɔŋmɔ lɛ hu nɛɛ?” (Yesaia 7:13) Hɛɛ, atua ní aaaya nɔ atse be fɛɛ be lɛ baanyɛ ahao Yehowa. Kadimɔ hu akɛ, agbɛnɛ gbalɔ lɛ kɛɔ akɛ ‘mi-Nyɔŋmɔ,’ jeee ‘nyɛ-Nyɔŋmɔ.’ Tsakemɔ ko ni yɔɔ gbeyei nɛ! Beni Ahaz kpoo Yehowa ní etsɔ ehe kɛtee Ashur lɛ, elaaje hegbɛ fɛfɛo ní ená ni kulɛ ekɛaasaa ekɛ Nyɔŋmɔ teŋ wekukpaa lɛ ekoŋŋ lɛ. Ekaba akɛ wɔkɛ wekukpaa ní kã wɔkɛ Nyɔŋmɔ teŋ lɛ aaashã afɔle kɛtsɔ wɔ Ŋmalɛ mli hemɔkɛyelii ahe ní wɔɔŋmɛɛ ní wɔkɛsaa, koni wɔná hegbɛi komɛi ní sɛɛ etsɛɛɛ lɛ mli ŋɔɔmɔ lɛ nɔ kɔkɔɔkɔ.

Imanuel Okadi Lɛ

14. Yehowa jie bɔ ni eyeɔ kpaŋmɔ ní ekɛ David fee lɛ mli anɔkwale lɛ kpo yɛ mɛɛ gbɛ nɔ?

¹⁴ Yehowa tee nɔ eye kpaŋmɔ ní ekɛ David fee lɛ anɔkwa. Akɛ okadi ko ha, ni akɛ okadi ko baaha! Yesaia tee nɔ akɛ: “[Yehowa, “NW”] diɛŋtsɛ aaaha nyɛ okadi: Naa, oblayoo fro aaaná musu ni eeefɔ́ binuu, ni eeetsɛ́ egbɛi Imanuel. Eeeye butru kɛ wò kɛyashi beyinɔ ni eeele efɔŋ kwamɔ kɛ ekpakpa kɔmɔ. Shi dani gbekɛ nuu lɛ aaale efɔŋ kwamɔ kɛ ekpakpa kɔmɔ lɛ, aaashi maŋtsɛmɛi enyɔ ní osheɔ amɛ gbeyei lɛ ashikpɔŋ lɛ afɔ̃ shi.”—Yesaia 7:14-16.

15. Mɛɛ nibii enyɔ gbalɛ ní kɔɔ Imanuel he lɛ kɛɔ wɔ?

¹⁵ Náa sanekpakpa kɛha mɔ fɛɛ mɔ ní sheɔ gbeyei akɛ tutualɔi lɛ kɛ maŋtsɛmɛi ní jɛ David weku lɛ mli lɛ anɔyeli lɛ baaba naagbee lɛ. “Imanuel” shishi ji “Nyɔŋmɔ Kɛ Wɔ Yɛ.” Nyɔŋmɔ kɛ Yuda yɛ, ni eŋmɛŋ gbɛ ní afite kpaŋmɔ ní ekɛ David fee lɛ kɔkɔɔkɔ. Kɛfata he lɛ, jeee nɔ ni Yehowa baafee lɛ pɛ akɛɛ Ahaz kɛ emaŋbii lɛ, shi moŋ akɛɛ amɛ be ní ebaafee hu. Dani gbekɛ nuu Imanuel lɛ baada bɔ ni sa ní eeele srɔto ni yɔɔ ekpakpa kɛ efɔŋ mli lɛ, no mli lɛ akpata henyɛlɔi lɛ amaji lɛ ahiɛ momo. Ni enɛ ba mli anɔkwale!

16. Mɛni hewɔ ekolɛ Yehowa etsɔɔɔ mɔ pɔtɛɛ ní Imanuel lɛ ji yɛ Ahaz gbii lɛ amli lɛ?

¹⁶ Biblia lɛ etsɔɔɔ mɔ bi ni ji Imanuel lɛ. Shi akɛni gbekɛ nuu fioo Imanuel lɛ baasɔmɔ akɛ okadi, ni Yesaia wie yɛ sɛɛ mli hu akɛ lɛ kɛ ebii lɛ “ji okadii” hewɔ lɛ, ekolɛ Imanuel baafee gbalɔ lɛ binuu. (Yesaia 8:18) Ekolɛ Yehowa haaa ale mɔ pɔtɛɛ ni Imanuel lɛ ji yɛ Ahaz gbii lɛ amli bɔni afee ní ekagbala yinɔi ní baaba yɛ sɛɛ mli lɛ ajwɛŋmɔ kɛmiijɛ Imanuel Kpeteŋkpele lɛ nɔ. Namɔ ni?

17. (a) Namɔ ji Imanuel Kpeteŋkpele lɛ, ni efɔmɔ lɛ feɔ mɛni he okadi? (b) Mɛni hewɔ Nyɔŋmɔ webii baanyɛ akɛɛ ŋmɛnɛ akɛ, “Nyɔŋmɔ kɛ wɔ yɛ” lɛ?

¹⁷ Yɛ Yesaia wolo lɛ sɛɛ lɛ, gbɛi Imanuel lɛ jeɔ kpo shikome pɛ yɛ Biblia lɛ mli, yɛ Mateo 1:23. Yehowa kɛ mumɔ tsirɛ Mateo ni ekɛ gbalɛ ní kɔɔ Imanuel fɔmɔ he lɛ to Yesu, ni ji David maŋtsɛsɛi lɛ Gboshiniyelɔ ni sa lɛ fɔmɔ he. (Mateo 1:18-23) Klɛŋklɛŋ Imanuel lɛ fɔmɔ ji okadi ni tsɔɔ akɛ Nyɔŋmɔ kwako David we lɛ. Nakai nɔŋŋ Yesu, ni ji Imanuel Kpeteŋkpele lɛ hu fɔmɔ lɛ ji okadi ni tsɔɔ akɛ Nyɔŋmɔ kwako adesai loo e-Maŋtsɛyeli kpaŋmɔ ni ekɛ David we lɛ fee lɛ. (Luka 1:31-33) Akɛni Yehowa najiaŋdamɔlɔ nukpa fe fɛɛ lɛ yɛ adesai ateŋ agbɛnɛ hewɔ lɛ, Mateo baanyɛ akɛɛ lɛɛlɛŋ akɛ, ‘Nyɔŋmɔ kɛ wɔ yɛ.’ Ŋmɛnɛ, Yesu miiye nɔ akɛ ŋwɛi Maŋtsɛ, ni ekɛ esafo ni yɔɔ shikpɔŋ nɔ lɛ yɛ. (Mateo 28:20) Eka shi faŋŋ akɛ, Nyɔŋmɔ webii yɛ yiŋtoo babaoo ni amɛaadamɔ nɔ amɛkɛ ekãa akɛɛ akɛ: “Nyɔŋmɔ kɛ wɔ yɛ!”

Nibii Babaoo ní Jɛɔ Anɔkwa ní Ayeee lɛ Mli Baa

18. (a) Mɛni hewɔ Yesaia wiemɔi ni nyiɛ sɛɛ lɛ wo etoibolɔi lɛ ahe gbeyei lɛ? (b) Mɛɛ nibii ni baaba etsɛŋ ni amɛbaaba mli?

¹⁸ Shi bɔ fɛɛ bɔ ni esɛɛkpee wiemɔi lɛ shɛjeɔ mɔ mii ehaa lɛ, Yesaia wiemɔ ní nyiɛ sɛɛ lɛ ha gbeyei mɔmɔ etoibolɔi lɛ: “Yehowa kɛ gbii ní bako dã, kɛjɛ beyinɔ ni Efraim tse yɛ Yuda he lɛ, aaaba bo kɛ omaŋ lɛ kɛ otsɛ we lɛ nɔ: no ji Ashur maŋtsɛ lɛ.” (Yesaia 7:17) Hɛɛ, amanehulu miiba, ni ebaajɛ Ashur maŋtsɛ lɛ dɛŋ. Ekolɛ gbɛkpamɔ ni ji amɛnɔ ní Ashurbii ní ale amɛ akɛ amɛyitseiaŋ wa waa lɛ baaye lɛ bafee tsuiyeli sane yɛ be kakadaŋŋ mli kɛha Ahaz kɛ emaŋbii lɛ. Ahaz susu akɛ naanyo ní ekɛ Ashur aaabɔ lɛ baaha eye ehe kɛjɛ Israel kɛ Aram dɛŋ. Lɛɛlɛŋ, Ashur maŋtsɛ lɛ baakpɛlɛ Ahaz faikpamɔ lɛ nɔ kɛtsɔ tutuamɔ ní eeetutua Israel kɛ Aram yɛ naagbee kwraa lɛ nɔ. (2 Maŋtsɛmɛi 16:9) Eeenyɛ efee akɛ enɛ ji nɔ ni baanyɛ Peka kɛ Rezin nɔ koni amɛha amɛsraafoi ní ebawo Yerusalem he ká lɛ agbala amɛhe shi lɛ. Enɛ hewɔ lɛ, Aram kɛ Israel kpaŋmɔ lɛ baafee nɔ ni nyɛɛɛ aye Yerusalem nɔ kunim. (Yesaia 7:1) Shi agbɛnɛ, Yesaia kɛɛ etoibolɔi ní he ejɔ̃ amɛhe lɛ akɛ Ashur, ni ji amɛhebulɔ ní amɛhiɛ kã enɔ lɛ, baatsɔ amɛ yiwalɔ!—Okɛto Abɛi 29:25 he.

19. Mɛɛ kɔkɔbɔɔ yinɔsane mli nii ni ba nɛɛ hiɛ kɛha Kristofoi ŋmɛnɛ?

¹⁹ Nɛkɛ yinɔsane ni ji anɔkwale nɛɛ hiɛ kɔkɔbɔɔ ko kɛha Kristofoi ní yɔɔ ŋmɛnɛ lɛ. Kɛ́ wɔyaje nɔnyɛɛ shishi lɛ, ekolɛ abaaka wɔ ní wɔŋmɛɛ Kristofoi ashishitoo mlai ahe ní wɔkɛsaa, koni wɔkpoo Yehowa dɛŋ hebuu. Enɛ feɔ nii ní akwɛɛɛ kɛyaaa shɔŋŋ, kɛ hegbee diɛŋtsɛ po, taakɛ ebafee faŋŋ yɛ Yesaia wiemɔi ní nyiɛ sɛɛ lɛ amli lɛ. Gbalɔ lɛ tee nɔ etsɔɔ nɔ ni Ashurbii lɛ atutuamɔ lɛ kɛbaaba shikpɔŋ lɛ kɛ gbɔmɛi ní yɔɔ nɔ lɛ anɔ.

20. Namɛi ji ‘adɔ̃dɔ̃ji’ kɛ ‘wòbii’ lɛ, ni mɛni amɛbaafee?

²⁰ Yesaia jara esane jajemɔi lɛ amli ejwɛ, ni fã fɛɛ fã gbaa nɔ ni baaba “yɛ nakai gbi lɛ nɔ”—ni ji, gbi ní Ashur baaba ebatutua Yuda lɛ. “Aaaba mli yɛ nakai gbi lɛ nɔ akɛ Yehowa aaakpã bɛlɛ atsɛ́ adɔ̃dɔ̃ŋ ní yɔɔ Mizraim faai lɛ anaagbeehe lɛ kɛ wòbi hu ní yɔɔ Ashur shikpɔŋ lɛ nɔ lɛ; ni amɛ fɛɛ amɛaaba ni amɛaabasɔmɔ jɔɔi voovoo kɛ tɛsaaiaŋ fɔji lɛ amli kɛ ŋmeii fɛɛ nɔ kɛ jwɛi fɛɛ nɔ.” (Yesaia 7:18, 19) Abaagbala Mizraim kɛ Ashur asraafoi, ní tamɔ adɔ̃dɔ̃ji kɛ wòbii asafo yuu lɛ, ajwɛŋmɔ kɛba Shiwoo Shikpɔŋ lɛ nɔ. Enɛ jeee tutuamɔ ní baahe be kukuoo ko kɛkɛ. ‘Adɔ̃dɔ̃ji’ kɛ ‘wòbii’ lɛ baahe shi kwraa, ni amɛbaabote fɔji kɛ gbɛ̀i bibii fɛɛ amli yɛ shikpɔŋ lɛ nɔ.

21. Ashur maŋtsɛ lɛ baafee tamɔ asooyi yɛ mɛɛ gbɛ nɔ?

²¹ Yesaia yaa nɔ akɛ: “Nakai gbi lɛ nɔ lɛ Nuntsɔ lɛ kɛ asooyi ni abɔ lɛ apaa yɛ faa lɛ sɛɛ, ni ji Ashur maŋtsɛ lɛ, aaabashɛ yiteŋ tsɔi kɛ naji ahe tsɔi, ni eeeshɛ tsɛ̃ŋ hu.” (Yesaia 7:20) Amrɔ nɛɛ, atsĩ Ashur, ni ji hegbeyeiwolɔ kpele fe fɛɛ lɛ pɛ tã. Ahaz yabɔ Ashur maŋtsɛ lɛ apaa koni ‘ebashɛ’ Aram kɛ Israel yi. Shi, nɛkɛ “asooyi ni abɔ lɛ apaa” kɛjɛ Eufrate faa lɛ kpokpaa nɔ nɛɛ baafã ebatutua Yuda “yiteŋ” ni eeeshɛ lɛ hiahia, ni eeeshɛ etsɛ̃ŋ hu po!

22. Mɛɛ nɔkwɛmɔnii Yesaia kɛtsu nii ni ekɛtsɔɔ nibii ní baajɛ Ashur tutuamɔ ni baa lɛ mli aba?

²² Mɛni baajɛ mli aba? “Nakai gbi lɛ nɔ lɛ aaaba mli akɛ nuu ko aaalɛ̀ tsina biyoo kɛ too gwantɛŋi enyɔ; ni aaaba mli akɛ fufɔ ní eeená lɛ falɛ naa sɔŋŋ lɛ eeeye butru; ejaakɛ butru kɛ wò sɔŋŋ mɔ fɛɛ mɔ ní eshwɛ yɛ shikpɔŋ lɛ nɔ lɛ aaaye.” (Yesaia 7:21, 22) Beni aaashɛ be mli ni Ashurbii lɛ ‘baashɛ’ shikpɔŋ lɛ yi lɛ, no mli lɛ gbɔmɛi fioo pɛ baashwɛ, ni no hewɔ lɛ kooloi fioo hu pɛ he baahia kɛha niyenii. Abaaye “butru kɛ wò”—nɔ ko nɔ ko fataaa he, wein bɛ mli, aboloo bɛ mli, niyenii ní afɔɔ yeli lɛ eko kwraa bɛ mli. Yesaia wie shii etɛ sɔŋŋ akɛ he ní tsutsu ko lɛ, eji shikpɔŋ kpakpa ní woɔ yibii lɛ, ŋmeei kɛ jwɛi ji nɔ ni baakwɛ̃ yɛ jɛmɛ agbɛnɛ, tamɔ nɔ ni ekɛmiima bɔ ni amaŋfɔfeemɔ lɛ baaji lɛ nɔ mi. “Gãi mli bii kɛ gãii” ahe baahia mɛi ni baaka akɛ amɛbaaya akrowai lɛ koni amɛkɛbu amɛhe kɛjɛ kooloi awuiyelɔi ní eteetee amɛhe yɛ kowei lɛ amli lɛ ahe. Ŋmɔji ní ahũ lɛ baatsɔmɔ tsinai kɛ tooi anyiɛmɔhei. (Yesaia 7:23-25) Gbalɛ nɛɛ bɔi mlibaa yɛ Ahaz diɛŋtsɛ gbii lɛ amli.—2 Kronika 28:20.

Gbalɛi ni Ja Kɛmɔ Shi

23. (a) Mɛni afã Yesaia akɛ efee agbɛnɛ? (b) Te ama tao okadi lɛ nɔ mi aha tɛŋŋ?

²³ Agbɛnɛ Yesaia ku esɛɛ kɛba shihilɛ ní yɔɔ amrɔ lɛ nɔ ekoŋŋ. Beni Yerusalem yɔɔ ehe ká ni Arambii kɛ Israelbii lɛ efee ekome kɛbawo lɛ shishi lolo lɛ, Yesaia bɔ amaniɛ akɛ: “Yehowa kɛɛ mi akɛ: Kɔ tao kpeteŋkpele, ni okɛ gbɔmɔ woloŋmaa nɔ̃ aŋma yɛ nɔ akɛ: [Maher-shalal hash-baz] Nomŋɔɔ nii lɛ feɔ oyá, hàa nii lɛ yeɔ oyái! Ni miŋɔ odasefoi anɔkwafoi, ni ji osɔfo Uria kɛ Yeberekia bi Zakaria lɛ, mifata mihe ní amɛye odase.” (Yesaia 8:1, 2) Gbɛi Maher-shalal hash-baz lɛ shishi ji “Nomŋɔɔ Nii lɛ Feɔ Oyá! Hàa Nii lɛ Yeɔ Oyái.” Yesaia bi ní hii enyɔ ní abuɔ amɛ waa yɛ maŋ lɛ mli lɛ abaye gbɛi ní eŋma yɛ tao kpeteŋkpele ko nɔ nɛɛ he odase, koni sɛɛ mli lɛ amɛnyɛ amɛma bɔ ni wolo lɛ ji anɔkwale diɛŋtsɛ lɛ nɔ mi. Shi kɛlɛ, akɛ okadi ni ji enyɔ baama okadi nɛɛ nɔ mi.

24. Mɛɛ hewalɛ esa akɛ okadi ni ji Maher-shalal hash-baz lɛ aná yɛ Yuda maŋ lɛ mli bii lɛ anɔ?

²⁴ Yesaia kɛɔ akɛ: “Ni mitee gbalɔyoo lɛ ŋɔɔ, ni ená musu, ni efɔ́ binuu. Ni Yehowa kɛɛ mi akɛ: Wo lɛ gbɛi akɛ Maher-shalal hash-baz (nomŋɔɔ nii lɛ feɔ oyá, hàa nii lɛ yeɔ oyái.) Shi dani gbekɛ nuu lɛ aaale ataa loo awo tsɛ́mɔ lɛ, aaaloo Damasko nii lɛ kɛ Samaria nomŋɔɔ nii lɛ kɛaanyiɛ Ashur maŋtsɛ lɛ hiɛ kɛaatee.” (Yesaia 8:3, 4) Tao kpeteŋkpele lɛ kɛ gbekɛ nuu abifao lɛ fɛɛ baafee okadii ní tsɔɔ akɛ etsɛŋ ni Ashur baahà Aram kɛ Israel, ní nyɛɔ Yuda nɔ lɛ anii. Te etsɛŋ eha tɛŋŋ? Dani gbekɛ nuu lɛ baanyɛ atsɛ́ klɛŋklɛŋ wiemɔi ní abifabii pii kɛkaseɔ wiemɔ lɛ—“Ataa” kɛ “Awo.” Esa akɛ gbalɛ ní ja pɛpɛɛpɛ tamɔ nɛkɛ aha gbɔmɛi lɛ aná hekɛnɔfɔɔ yɛ Yehowa mli. Aloo ebaanyɛ eha mɛi komɛi aye Yesaia kɛ ebihii lɛ ahe fɛo. Bɔ fɛɛ bɔ ni eji lɛ, Yesaia gbalɛ wiemɔi lɛ ba mli anɔkwale.—2 Maŋtsɛmɛi 17:1-6.

25. Mɛɛ shihilɛi je amɛhe yɛ Yesaia gbii lɛ amli kɛ ŋmɛnɛŋmɛnɛ be nɛɛ mli?

²⁵ Kristofoi baanyɛ akase nii kɛjɛ Yesaia kɔkɔbɔi ní ekɛha shii abɔ lɛ amli. Bɔfo Paulo jie lɛ kpo etsɔɔ wɔ akɛ Yesaia fee Yesu Kristo he mfoniri, ni Yesaia bihii lɛ damɔ shi kɛha Yesu kaselɔi ní afɔ amɛ mu lɛ, yɛ yinɔsane mli nii ní ba nɛɛ mli. (Hebribii 2:10-13) Yesu tsɔɔ esɛɛnyiɛlɔi ní afɔ amɛ mu ní yɔɔ shikpɔŋ nɔ lɛ anɔ ekaiɔ anɔkwa Kristofoi yɛ bɔ ni ehe hiaa ní ‘amɛsara’ yɛ jaramɔ bei nɛɛ amli lɛ he. (Luka 21:34-36) Yɛ nakai beaŋ nɔŋŋ lɛ, abɔɔ shitee-kɛ-wolɔi ní tsakeee amɛtsui lɛ kɔkɔ yɛ hiɛkpatamɔ ni baa lɛ he, eyɛ mli akɛ bei pii lɛ, amɛyeɔ nɛkɛ kɔkɔbɔi nɛɛ ahe fɛo. (2 Petro 3:3, 4) Bɔ ni gbalɛi ní kɔɔ be he lɛ ba mli yɛ Yesaia gbii lɛ amli lɛ ji nɔmimaa nɔ̃ ni tsɔɔ akɛ Nyɔŋmɔ be he gbɛjianɔtoo kɛha wɔgbii nɛɛ hu ‘baaba lɛɛlɛŋ. Ekpeŋ sɛɛ.’—Habakuk 2:3.

“Nui” ni Kpataa Nii Ahiɛ

26, 27. (a) Mɛɛ nibii ni baaba Yesaia gba efɔ̃ shi? (b) Mɛni Yesaia wiemɔi lɛ tsɔɔ kɛha Yehowa webii ŋmɛnɛ?

²⁶ Yesaia tsá ekɔkɔbɔi lɛ anɔ akɛ: “Ákɛ nɔ̃ kɛ̃ ní maŋ nɛɛ ekwa Shiloa nui ní hoɔ blɛoo lɛ, ní emli filiɔ lɛ yɛ Rezin kɛ Remalia bi lɛ hewɔ nɛɛ: no hewɔ lɛ, naa, Nuntsɔ lɛ kɛ faa lɛŋ nui ní naa wa ní amɛfá hu miiba amɛnɔ, no ji Ashur maŋtsɛ lɛ kɛ eta lɛ fɛɛ, ni eeebahà enujɔɔi lɛ fɛɛ nɔ, ni eeesram etoii lɛ fɛɛ nɔ; ni eeetsɔ Yuda mli kɛaaho, eeeyi kɛaatá kuɛ; ni kɛ́ egbɛ efiji amli lɛ, eeekpele oshikpɔŋ lɛ hiɛ lɛɛmɔ lɛ nɔ, Imanuel!”—Yesaia 8:5-8.

²⁷ “Maŋ nɛɛ,” ni ji Israel kooyigbɛ maŋtsɛyeli lɛ, kpoo Yehowa kpaŋmɔ ní ekɛ David fee lɛ. (2 Maŋtsɛmɛi 17:16-18) Kɛha amɛ lɛ, kpaŋmɔ lɛ tamɔ nɔ ni hewalɛ bɛ mli, tamɔ bɔ ni Shiloa, he ni Yerusalem náa nu kɛjɛɔ lɛ, nui lɛ hoɔ ŋmaii lɛ. Amɛmli filiɔ amɛ yɛ ta ní amɛwuɔ amɛshiɔ Yuda lɛ he. Shi akwɛŋ bulɛ ní amɛbɛ nɛɛ efolo ní agbalaŋ amɛtoi yɛ he. Yehowa baaŋmɛ Ashurbii lɛ agbɛ ni ‘amɛaayi’ tamɔ nu afua, loo amɛaaye Aram kɛ Israel nɔ kunim kwraa, tamɔ bɔ ni etsɛŋ ní Yehowa baaŋmɛ je lɛ fã ni ji maŋkwramɔ gbɛjianɔtoo ni yɔɔ bianɛ lɛ gbɛ ní eyi apasa jamɔ nɔyelihe lɛ kɛteke nɔ tamɔ nu afua lɛ. (Kpojiemɔ 17:16; okɛto Daniel 9:26 he.) No sɛɛ lɛ, Yesaia wie akɛ, “nui” ní eyi kɛteke nɔ lɛ ‘aaatsɔ Yuda mli kɛaaho,’ ni ebaakwɔ “kɛaatá kuɛ” tɔ̃ɔ, kɛyashi Yerusalem, he ni Yuda yitso (maŋtsɛ) lɛ yeɔ nɔ yɛ lɛ.b Yɛ wɔbe nɛɛ mli lɛ, maŋkwralɔi ní baakpata apasa jamɔ hiɛ lɛ baatutua Yehowa tsuji hu, ni amɛbaabɔle amɛhe kpula “kɛaatá kuɛ.” (Ezekiel 38:2, 10-16) Mɛni baajɛ mli aba? Ojogbaŋŋ, mɛni ba yɛ Yesaia gbii lɛ amli? Ani Ashurbii lɛ ke yuu kɛtsɔ maŋtiase lɛ gbogboi lɛ amli ni amɛbɛɛ Nyɔŋmɔ webii lɛ kɛtee? Dabi. Nyɔŋmɔ kɛ amɛ yɛ.

Nyɛkashea Gbeyei—“Nyɔŋmɔ Kɛ Wɔ Yɛ!”

28. Yɛ amɛhenyɛlɔi lɛ amɔdɛŋbɔɔ babaoo lɛ fɛɛ sɛɛ lɛ, mɛni Yehowa ma nɔ mi eha Yuda?

²⁸ Yesaia bɔ kɔkɔ akɛ: “Nyɛ majimaji [ní nyɛteɔ shi nyɛwoɔ Nyɔŋmɔ webii ní ekɛ amɛ efee kpaŋmɔ lɛ], nyɛfea hoo, ni aaakumɔ nyɛ dukuduku kɛ̃! Ni nyɛ mɛi ni nyɛyɔɔ shikpɔji ní yɔɔ shɔŋŋ lɛ anɔ fɛɛ, nyɛboa toi! Nyɛmĩaa, ni aaakumɔ nyɛ dukuduku kɛ̃; nyɛmĩaa, ni aaakumɔ nyɛ dukuduku kɛ̃! Nyɛtoa ajina, ni eeefee yaka kɛ̃! Nyɛwiea wiemɔ hu, ni edamɔŋ shi; ejaakɛ Nyɔŋmɔ kɛ wɔ yɛ!” (Yesaia 8:9, 10) Afii komɛi asɛɛ lɛ, nɛkɛ wiemɔi nɛɛ ba mli anɔkwale, yɛ Ahaz binuu anɔkwafo Hezekia nɔyeli beaŋ. Beni Ashurbii lɛ bawo Yerusalem he gbeyei lɛ, Yehowa bɔfo gbe amɛteŋ mɛi 185,000. Eyɛ faŋŋ akɛ, Nyɔŋmɔ kɛ ewebii lɛ kɛ David maŋtsɛmɛi aweku lɛ yɛ. (Yesaia 37:33-37) Yɛ Harmagedon ta ní baa lɛ mli lɛ, Yehowa baatsu Imanuel Kpeteŋkpele lɛ nakai nɔŋŋ, jeee ní ebakumɔ E-henyɛlɔi lɛ dukuduku kɛkɛ, shi moŋ ní ekpɔ̃ mɛi fɛɛ ní kɛ amɛhiɛ fɔ̃ɔ enɔ lɛ hu.—Lala 2:2, 9, 12.

29. (a) Esoro Yudafoi ni hi shi yɛ Ahaz gbii lɛ amli yɛ mɛi ni hi shi yɛ Hezekia gbii lɛ amli lɛ ahe yɛ mɛɛ gbɛ nɔ? (b) Mɛni hewɔ Yehowa tsuji ní yɔɔ ŋmɛnɛ lɛ tsiɔ amɛhe kwraa kɛjɛɔ jamɔ kɛ maŋkwramɔŋ kpaŋmɔi ahe lɛ?

²⁹ Ákɛ mɛi ni tamɔɔɔ Yudafoi ni hi shi yɛ Hezekia be lɛ mli lɛ, Ahaz yinɔbii lɛ naaa Yehowa hebuu mli hemɔkɛyeli. Amɛmiisumɔ kpaŋmɔ, loo “apãm” ní amɛkɛ Ashurbii lɛ aaafee lɛ ákɛ hebuu nɔ̃ kɛmiijɛ Arambii kɛ Israelbii akpaŋmɔ lɛ he. Shi kɛlɛ, Yehowa ‘nine’ kanya Yesaia ni ewie eshi “maŋ nɛɛ gbɛ lɛ,” loo nifeemɔ gbɛ ní ehe gbɛi lɛ. Ebɔ kɔkɔ akɛ: “Amɛgbeyei ní amɛsheɔ lɛ, nyɛkashea, ni nyɛtsui akafãa hu! Shi moŋ, Yehowa Zebaot lɛ, lɛ moŋ nyɛfea lɛ krɔŋkrɔŋ, ni lɛ efee nyɛ gbeyeishemɔ kɛ nyɛ tsuifãa!” (Yesaia 8:11-13) Akɛni enɛ yɛ amɛjwɛŋmɔ mli hewɔ lɛ, Yehowa tsuji ni yɔɔ ŋmɛnɛ lɛ kwɛɔ jogbaŋŋ koni amɛkɛ jamɔ mli gwabɔɔi kɛ maŋkwramɔŋ kpaŋmɔi lɛ akaná yelikɛfuamɔ ko, ní amɛkɛ amɛhiɛ hu akafɔ̃ amɛnɔ. Yehowa tsuji yɛ Nyɔŋmɔ hewalɛ ní buɔ mɔ he lɛ mli hekɛnɔfɔɔ kwraa kɛmɔ shi. Ejaakɛ, kɛ́ ‘Yehowa yɛ wɔsɛɛ lɛ, mɛni gbɔmɔ aaanyɛ wɔ afee?’—Lala 118:6.

30. Mɛni baaba mɛi ni kɛ amɛhiɛ efɔ̃ɔɔ Yehowa nɔ lɛ anɔ?

³⁰ Yesaia tee nɔ etĩ mli shii abɔ akɛ Yehowa baafee “he krɔŋkrɔŋ,” ni ji hebuu kɛha mɛi ní kɛ amɛhiɛ fɔ̃ɔ enɔ lɛ. Nɔ ni tamɔɔɔ nakai lɛ, mɛi ní kpooɔ lɛ lɛ “aaatɛrɛ, ni amɛaagbeegbee shi, ni amɛaakumɔ, ni aaadũ amɛ, ni aaamɔ̃mɔ̃ amɛ hu”—feemɔ wiemɔi enumɔ ní jeɔ shi faŋŋ ní haaa yiŋkɔshikɔshifeemɔ ko aba nɔ ni baaba mɛi ní kɛ amɛhiɛ efɔ̃ɔɔ Yehowa nɔ lɛ anɔ lɛ he. (Yesaia 8:14, 15) Nakai nɔŋŋ mɛi ní kpoo Yesu lɛ hu tɛrɛ ni amɛgbeegbee shi, yɛ klɛŋklɛŋ afii oha lɛ mli. (Luka 20:17, 18) Nɔ ko ni tamɔ nakai nɔŋŋ baaba mɛi ní ekpɛlɛɛɛ ní amɛbaa amɛhe shi ŋmɛnɛ amɛhaa ŋwɛi Maŋtsɛ, Yesu ní akɛ lɛ eta maŋtsɛsɛi nɔ lɛ anɔ.—Lala 2:5-9.

31. Anɔkwa Kristofoi baanyɛ anyiɛ Yesaia kɛ mɛi ní bo enitsɔɔmɔ lɛ toi lɛ anɔkwɛmɔnɔ lɛ sɛɛ ŋmɛnɛ yɛ mɛɛ gbɛ nɔ?

³¹ Jeee mɛi fɛɛ tɛrɛ, yɛ Yesaia gbii lɛ amli. Yesaia kɛɔ akɛ: “Fĩi odase lɛ, ní osɔo mla lɛ naa yɛ mikaselɔi lɛ ateŋ! Shi miikwɛ Yehowa, mɔ ni eŋɔ ehiɛ etee Yakob we lɛ, gbɛ ni mihiɛ kã enɔ.” (Yesaia 8:16, 17) Yesaia kɛ mɛi ni boɔ enitsɔɔmɔ lɛ toi lɛ kwaŋ Nyɔŋmɔ Mla lɛ. Amɛyaa nɔ amɛkɛ amɛhiɛ fɔ̃ɔ Yehowa nɔ, eyɛ mli akɛ amɛmaŋbii mlatɔ̃lɔi lɛ efeee nakai, ni no hewɔ lɛ amɛhaa Yehowa ŋɔɔ ehiɛ eteeɔ amɛ. Éba akɛ wɔɔnyiɛ mɛi ní kɛ amɛhiɛ fɔ̃ɔ Yehowa nɔ lɛ anɔkwɛmɔnɔ lɛ sɛɛ, ni wɔ hu wɔtswa wɔfai shi nakai nɔŋŋ akɛ wɔɔkpɛtɛ jamɔ krɔŋŋ he kpɛŋŋ!—Daniel 12:4, 9; Mateo 24:45; okɛto Hebribii 6:11, 12 he.

“Okadii” kɛ “Naakpɛɛ Nii”

32. (a) Namɛi sɔmɔɔ ákɛ “okadii kɛ naakpɛɛ nii” ŋmɛnɛ? (b) Mɛni hewɔ esa akɛ esoro Kristofoi kwraa yɛ je lɛ he lɛ?

³² Agbɛnɛ Yesaia jaje akɛ: “Naa, mikɛ bii ni Yehowa eha mi lɛ ji okadii kɛ naakpɛɛ nii ni jɛ Yehowa Zebaot ni hiɔ Zion gɔŋ lɛ nɔ lɛ dɛŋ yɛ Israel.” (Yesaia 8:18) Hɛɛ, Yesaia, Shear-Yashub, kɛ Maher-shalal hash-baz ji Yehowa yiŋtoi kɛha Yuda lɛ he okadii. Ŋmɛnɛ hu, Yesu kɛ enyɛmimɛi ní afɔ amɛ mu lɛ sɔmɔɔ nakai nɔŋŋ ákɛ okadii. (Hebribii 2:11-13) Ni “asafo babaoo” ni ji “tooi krokomɛi” lɛ fataa amɛhe yɛ amɛnitsumɔ lɛ mli. (Kpojiemɔ 7:9, 14; Yohane 10:16) Shi kɛlɛ, okadi he baa sɛɛnamɔ kɛ́ anaa akɛ esoro lɛ kwraa yɛ nibii ni ebɔle ehe lɛ ahe. Nakai nɔŋŋ Kristofoi hu tsuɔ nitsumɔ ní akɛha amɛ akɛ okadii lɛ kɛ́ anaa amɛ faŋŋ akɛ esoro amɛ kwraa yɛ je nɛɛ he, ní amɛkɛ amɛhiɛ fɔ̃ɔ Yehowa nɔ kwraa kɛmɔɔ shi, ní amɛkɛ ekãa jajeɔ eyiŋtoi lɛ amɛtsɔɔ lɛ.

33. (a) Mɛni anɔkwa Kristofoi etswa amɛfai shi akɛ amɛbaafee? (b) Mɛni hewɔ anɔkwa Kristofoi baanyɛ amɛdamɔ shi shiŋŋ lɛ?

³³ Belɛ, ha mɔ fɛɛ mɔ anyiɛ tɛi ní Nyɔŋmɔ efolɔ eshwie shi lɛ asɛɛ, shi jeee je lɛ nɔ̃ lɛ sɛɛ. Nyɛkɛ ekãa ayaa nɔ nyɛhaa esoroa nyɛ kwraa—ákɛ okadii—ní nyɛya nɔ nyɛtsu nitsumɔ ní akɛha Yesaia Kpeteŋkpele, ni ji Yesu Kristo lɛ, akɛ: “[Ashiɛ] . . . duromɔ afi kɛ wɔ-Nyɔŋmɔ lɛ oweletɔɔ gbi [lɛ].” (Yesaia 61:1, 2; Luka 4:17-21) Lɛɛlɛŋ, kɛ́ Ashur nu afua lɛ ho yuu kɛbatsɔ shikpɔŋ lɛ nɔ—kɛ́ eyi kɛbata wɔkuɛi ahe po lɛ—elooŋ anɔkwa Kristofoi kɛyaŋ. Wɔbaadamɔ shi shiŋŋ ejaakɛ “Nyɔŋmɔ kɛ wɔ yɛ.”

[Shishigbɛ niŋmai]

[Mfoniri ni yɔɔ baafa 103]

Yesaia ŋɔ Shear-Yashub efata ehe kɛtee beni ekɛ Yehowa shɛɛ sane lɛ yaha Ahaz lɛ

[Mfoniri ni yɔɔ baafa 111]

Mɛni hewɔ Yesaia ŋma “Maher-shalal hash-baz” yɛ tao kpeteŋkpele nɔ lɛ?