Yitso Nyɔŋmai Enyɔ Kɛ Ekpaa
“Nyɛmli Afilia Nyɛ Kɛyaa Naanɔ yɛ Nii ní Mibɔɔ lɛ Ahewɔ”
1. Mɛɛ hewalɛwoo wiemɔi bɔfo Petro ŋmala, ni mɛɛ sanebimɔ teɔ shi?
ANI jalɛ sane ní ayeee kɛ amanehulu sɛɛ baafo gbi ko? Nɔ ni fe afii 1,900 ní eho nɛ ní bɔfo Petro ŋmala wiemɔi ní woɔ mɔ hewalɛ nɛɛ, akɛ: “Yɛ [Nyɔŋmɔ shiwoo] lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Petro, kɛ Nyɔŋmɔ tsuji anɔkwafoi krokomɛi babaoo ní ehi shi yɛ afii ohai abɔ ní eho lɛ amli fɛɛ lɛ, kwɛ nakai gbi ní yɔɔ nyam, beni mlakwamɔ, nɔnyɛɛ, kɛ yiwalɛ nifeemɔ sɛɛ baafo, ní jalɛ nifeemɔ baahe shi kwraa lɛ gbɛ. Ani wɔbaanyɛ wɔná nɔmimaa akɛ nɛkɛ shiwoo nɛɛ baaba mli?
2. Mɛɛ gbalɔ wie “ŋwɛi hee kɛ shikpɔŋ hee” he lɛ, ni mɛɛ mlibaai nakai blema gbalɛ lɛ yɔɔ?
2 Hɛɛ, wɔbaanyɛ wɔná nɔmimaa! Beni Petro wie “ŋwɛi hee kɛ shikpɔŋ hee” he lɛ, no mli lɛ jeee susumɔ hee ko etsĩɔ tã lɛ. Aaafee afii 800 ní etsɔ hiɛ lɛ, Yehowa tsɔ gbalɔ Yesaia nɔ ewie wiemɔi ní tamɔ nakai nɔŋŋ. Nakai shiwoo ní tsɔ hiɛ lɛ ná emlibaa bibioo yɛ afi 537 D.Ŋ.B., beni aŋmɛɛ Yudafoi lɛ ahe kɛjɛ Babilon nomŋɔɔ mli, ní no ha amɛnyɛ amɛku amɛsɛɛ kɛtee amɛmaŋ shikpɔŋ nɔ lɛ. Shi Yesaia gbalɛ lɛ miiná emlibaa ní yɔɔ nyam ŋmɛnɛ, ni wɔmiikpa emlibaa ní yɔɔ miishɛɛ waa po gbɛ yɛ Nyɔŋmɔ jeŋ hee ní baa lɛ mli. Yɛ anɔkwale mli lɛ, gbalɛ ní haa mɔ tsui nyaa, ní akɛha kɛtsɔ Yesaia nɔ lɛ haa wɔnaa jɔɔmɔi ní Nyɔŋmɔ esaa eto mɛi ní sumɔɔ lɛ lɛ he okadi fioo ko.
Yehowa Kpa “Maŋ ní Tseɔ Atua” lɛ Fai
3. Mɛɛ sanebimɔ aha hetoo aha wɔ yɛ Yesaia yitso 65 lɛ?
3 Kaimɔ akɛ Yesaia 63:15–64:11 lɛ wieɔ Yesaia gbalɛ mli sɔlemɔ ní esɔle yɛ Yudafoi nomii ní yɔɔ Babilon lɛ ahewɔ lɛ he. Taakɛ Yesaia wiemɔi lɛ feɔ lɛ faŋŋ lɛ, no mli lɛ Yudafoi lɛ ateŋ mɛi pii kɛ amɛsusuma fɛɛ jáaa Yehowa, shi amɛteŋ mɛi komɛi etsake amɛtsui ni amɛku amɛsɛɛ kɛba eŋɔɔ. Ani Yehowa kɛ maŋ lɛ baaba amɛtsutsu shihilɛ lɛ mli ekoŋŋ yɛ shwɛɛnii fioo ní etsake amɛtsui lɛ ahewɔ? Wɔnaa hetoo lɛ yɛ Yesaia yitso 65 lɛ. Shi dani Yehowa kɛ kpɔmɔ he shiwoo wiemɔ ko baaha mɛi fioo ní ji anɔkwafoi lɛ, etsɔɔ kojomɔ ní mɛɔ amɛteŋ mɛi babaoo ní bɛ hemɔkɛyeli lɛ.
4. (a) Kɛ́ akɛmiito ewebii atuatselɔi lɛ ahe lɛ, namɛi baatao Yehowa sɛɛgbɛ lɛ? (b) Te bɔfo Paulo kɛ Yesaia 65:1, 2 lɛ to he eha tɛŋŋ?
4 Yehowa eŋmɛ etsui shi yɛ ehiɛ atua ní ewebii lɛ etee nɔ amɛtse aahu lɛ mli. Shi kɛlɛ, be ko baashɛ ní ebaaŋmɛɛ amɛhe kwraa ewo amɛ henyɛlɔi adɛŋ, ni ekɛ mlihilɛ baahere mɛi krokomɛi kɛba ehiɛ duromɔ mli. Yehowa tsɔ Yesaia nɔ ewie akɛ: “Mihaa mɛi ní biko mi lɛ hetoo, mihaa mɛi ní taoko mi lɛ naa mi; mikɛɔ jeŋmaŋ ní tsɛko migbɛi lɛ akɛ: Naa mi, naa mi!” (Yesaia 65:1) Eji wiemɔ ko ni ji dɔlɛ sane yɛ Yehowa webii ní ekɛ amɛ efee kpaŋmɔ lɛ agbɛfaŋ, ákɛ jeŋmaji lɛ amli bii baaba Yehowa ŋɔɔ, shi Yuda fɛɛ ni ji kuɛŋtilɔ lɛ efeeŋ nakai kɔkɔɔkɔ. Jeee Yesaia pɛ ji gbalɔ ní gba efɔ̃ shi akɛ yɛ naagbee lɛ, Nyɔŋmɔ baahala gbɔmɛi komɛi ní tsutsu ko lɛ eleee amɛ. (Hoshea 1:10; 2:23) Bɔfo Paulo tsɛ́ Yesaia 65:1, 2 lɛ sɛɛ kɛjɛ Septuagint lɛ mli ni ekɛma nɔ mi akɛ jeŋmajiaŋbii lɛ baaná “jalɛ ní jɛ hemɔkɛyeli mli,” yɛ be mli ni mɛi ni ji heloonaa Yudafoi lɛ ekpoo akɛ amɛaafee nakai.—Romabii 9:30; 10:20, 21.
5, 6. (a) Mɛɛ suɔmɔ ní mli wa waa Yehowa ejie lɛ kpo, shi te ewebii lɛ ehere nɔ amɛha tɛŋŋ? (b) Mɛni wɔbaanyɛ wɔkase kɛjɛ bɔ ni Yehowa kɛ Yuda ye ha lɛ mli?
5 Yehowa tsɔɔ nɔ hewɔ ní ebaaŋmɛ gbɛ ní amanehulu aba lɛ diɛŋtsɛ ewebii anɔ lɛ mli, akɛ: “Migbɛɔ miniji amli daa nɛɛ mihaa maŋ ní tseɔ atua ní amɛnyiɛɔ gbɛ ní ehiii nɔ yɛ amɛ diɛŋtsɛ amɛjwɛŋmɔi anaa lɛ.” (Yesaia 65:2) Ákɛ mɔ ko aaagbɛ eniji amli lɛ tsɔɔ ninefɔɔ loo faikpamɔ. Yehowa egbɛ eniji amli, jeee yɛ be kukuoo pɛ mli, shi moŋ gbi muu fɛɛ. Nɔ ni eshweɔ yɛ etsui mli ji ní Yuda aku esɛɛ kɛba eŋɔɔ. Ni kɛlɛ, nɛkɛ gbɔmɛi kuɛŋtilɔi nɛɛ hereee lɛ nɔ.
6 Kwɛ nikasemɔ ní haa mɔ tsui náa miishɛɛ, ní wɔnáa kɛjɛɔ Yehowa wiemɔi lɛ amli! Eetao ní wɔtsi wɔbɛŋkɛ lɛ ejaakɛ eji Nyɔŋmɔ ní anyɛɔ abɛŋkɛɔ lɛ. (Yakobo 4:8) Wiemɔi nɛɛ hu tsɔɔ wɔ akɛ Yehowa baa ehe shi. (Lala 113:5, 6) Ejaakɛ, eyaa nɔ egbɛɔ eniji amli yɛ mfonirifeemɔ mli, ni ekpaa ewebii lɛ fai ní amɛku amɛsɛɛ, yɛ anɔkwale ni eji akɛ amɛ atuatsemɔ lɛ ‘woɔ emli la’ lɛ fɛɛ sɛɛ. (Lala 78:40, 41) Beni ekpa amɛ fai aahu afii ohai abɔ lɛ sɛɛ dani naagbee lɛ eŋmɛɛ amɛhe eha amɛ henyɛlɔi lɛ. Ni nakai beaŋ po lɛ, ekpooo aŋkroaŋkroi heshibalɔi ni yɔɔ amɛteŋ lɛ.
7, 8. Yehowa webii kuɛŋtilɔi lɛ wo emlila yɛ mɛɛ gbɛ̀i anɔ?
7 Yudafoi kuɛŋtilɔi lɛ etee nɔ amɛwo Yehowa mli la kɛtsɔ amɛjeŋba ní yɔɔ hiɛgbele lɛ nɔ. Yehowa tsɔɔ bɔ ni amɛnifeemɔi ni yɔɔ mlila lɛ ji lɛ mli akɛ: “Maŋ ní jeɔ kpetekplee woɔ mimli la daa nɛɛ, ní amɛshãa afɔle yɛ abɔɔi amli, ní amɛshãa tsofa-kɛ-ŋma yɛ ntayai anɔ, mɛi ní yataraa gbonyo bui amli, ní amɛwɔɔ gbatsui amli, ní amɛyeɔ kpolotoo loo tete, ni nihii nii awonu yɔɔ amɛnibii amli, mɛi ní kɛɔ akɛ: Tsi ohe kɛya sɛɛ, kaabɛŋkɛ mi, shi mihe tse feo! lɛ: mɛnɛɛmɛi ji lasu yɛ migugɔŋ, kɛ la ní tsoɔ daa jenamɔ!” (Yesaia 65:3-5) Nɛkɛ gbɔmɛi ní feɔ amɛhe tamɔ Nyɔŋmɔ gbeyeishelɔi nɛɛ miiwo Yehowa mlila ‘yɛ ehiɛ kpetekplee’—ni ji wiemɔ ní ekolɛ etsɔɔ amɛhiɛ ní gbooo lɛ kɛ bulɛ ní amɛbɛ kwraa kɛha lɛ lɛ. Amɛbɔɔɔ mɔdɛŋ akɛ amɛkɛ amɛ nihii nii lɛ aaatee po. Ani ebɛ nyaŋemɔ titri akɛ aaafee eshai yɛ Mɔ ni kulɛ esa akɛ amɛkɛ woo kɛ bulɛ aha lɛ lɛ hiɛ kpetekplee?
8 Nɛkɛ eshafeelɔi ní buɔ amɛhe jalɔi nɛɛ kɛ amɛnifeemɔ miikɛɛ Yudafoi krokomɛi lɛ akɛ: ‘Kaabɛŋkɛ mi, ejaakɛ miyɛ krɔŋkrɔŋ fe bo.’ Mɛɛ osatofeemɔ nɛ! Nɛkɛ “Nyɔŋmɔ gbeyeishelɔi” nɛɛ miishã afɔlei, ni amɛmiishã tsofa-kɛ-ŋma amɛmiiha apasa nyɔŋmɔi, nii ní Nyɔŋmɔ Mla lɛ buɔ lɛ fɔ́ lɛ. (2 Mose 20:2-6) Amɛyataraa gbonyo bui amli, ni enɛ haa amɛfeɔ mɛi ní he tseee yɛ Mla lɛ naa. (4 Mose 19:14-16) Amɛyeɔ kpolotoo loo, ni ji niyenii ní he tseee lɛ.a (3 Mose 11:7) Ni kɛlɛ, amɛjamɔ mli nifeemɔi lɛ haa amɛnuɔ he akɛ amɛyɛ krɔŋkrɔŋ fe Yudafoi krokomɛi, ni amɛmiitao ní mɛi krokomɛi lɛ akabɛŋkɛ amɛ koni no akaha amɛfee krɔŋkrɔŋ, aloo kɛ́ wɔɔkɛɛ lɛ, amɛhe tse kɛtsɔ nakai sharamɔ lɛ nɔ. Shi kɛlɛ, jeee nakai kwraa ji bɔ ni Nyɔŋmɔ “awuŋayelɔ” lɛ susuɔ saji ahe ehaa!—5 Mose 4:24.
9. Te Yehowa naa eshafeelɔi ní buɔ amɛhe jalɔi lɛ ehaa tɛŋŋ?
9 Yɛ nɔ najiaŋ ní Yehowa baabu mɛi ní buɔ amɛhe jalɔi nɛɛ akɛ amɛyɛ krɔŋkrɔŋ lɛ, ekɛɛ akɛ: “Mɛnɛɛmɛi ji lasu yɛ migugɔŋ.” Bei pii lɛ, akɛ Hebri wiemɔ kɛha “gugɔ” loo “gugɔŋ fɔlɔ” lɛ tsuɔ nii yɛ mfonirifeemɔŋ kɛhaa mlifu. Akɛ lasu hu toɔ Yehowa mlifu ní naa wa tamɔ la lɛ he. (5 Mose 29:19) Wɔŋjamɔ ní yɔɔ nyaŋemɔ ní ewebii lɛ egbee mli lɛ etée Yehowa mlifu ní naa wa waa shi.
10. Yehowa baawo mɛi ní yɔɔ Yuda lɛ nyɔmɔ yɛ amɛhe eshai lɛ ahewɔ yɛ mɛɛ gbɛ nɔ?
10 Yɛ ejalɛsaneyeli mli lɛ, Yehowa nyɛŋ eha gbɔmɛi ní jɛ amɛsuɔmɔ mli amɛfee esha nɛɛ aye amɛhe kɛjɛ toigbalamɔ mli. Yesaia ŋma akɛ: “Naa, aŋma afɔ̃ mihiɛ: Mifeŋ dioo, ja mito najiaŋ dã, ni mato najiaŋ hu mashãkã amɛtsitsi; amɛ diɛŋtsɛ amɛnishaianii kɛ amɛtsɛmɛi ní shã tsofa-kɛ-ŋma yɛ gɔji lɛ anɔ ní amɛbɔ mi ahora yɛ gɔŋkpɔi lɛ anɔ lɛ anishaianii lɛ fɛɛ he nyɔmɔwoo lɛ masusu mashãkã amɛtsitsi tswɛ̃m dã, Yehowa kɛɛ.” (Yesaia 65:6, 7) Yudafoi nɛɛ ebɔ Yehowa ahora, kɛtsɔ amɛhe ní amɛkɛwo apasa jamɔ mli lɛ nɔ. Amɛha anɔkwa Nyɔŋmɔ lɛ jamɔ lɛ efee tamɔ nɔ ni srɔto ko bɛ ekɛ jeŋmaji ní ebɔle amɛ lɛ anɔ̃ lɛ teŋ. “Amɛ diɛŋtsɛ amɛnishaianii,” ní wɔŋjamɔ kɛ mumɔi atsɛmɔ nifeemɔi fata he lɛ ahewɔ lɛ, Yehowa baawo amɛ nyɔmɔ “[eshãkã] amɛtsitsi.” Eka shi faŋŋ akɛ wiemɔ ni ji ‘tsitsi’ lɛ kɔɔ ŋwɛi gbɛ atade lɛ hé ni epiŋpiŋ loo ebua ehe naa, ní feɔ tamɔ kotoku, he ni nihɔɔlɔi nyɛɔ amɛfɔseɔ nibii ní asusuɔ amɛwoɔ lɛ he. (Luka 6:38) Eshishinumɔ yɛ faŋŋ kɛha Yudafoi hemɔkɛyeli kwalɔi lɛ—Yehowa baasusu amɛ ‘najiaŋtoo,’ loo toigbalamɔ lɛ eha amɛ. Jalɛsaneyeli Nyɔŋmɔ lɛ baaha amɛwo nyɔmɔ. (Lala 79:12; Yeremia 32:18) Akɛni Yehowa tsakeee hewɔ lɛ, wɔbaanyɛ wɔná hekɛnɔfɔɔ akɛ ebaasusu toigbalamɔ eha nibii agbɛjianɔtoo fɔŋ nɛɛ yɛ gbɛ ní tamɔ nakai nɔŋŋ nɔ, yɛ lɛ diɛŋtsɛ ebe ní eto mli.—Maleaki 3:6.
“Yɛ Mitsuji lɛ Ahewɔ”
11. Yehowa tsɔɔ akɛ ebaahere shwɛɛnii anɔkwafoi komɛi ayiwala yɛ mɛɛ gbɛ nɔ?
11 Ani Yehowa baana anɔkwafoi ní yɔɔ ewebii ateŋ lɛ mɔbɔ? Yesaia tsɔɔ mli akɛ: “Bɔ ni Yehowa kɛɛ nɛ: Taakɛ bɔ ni anáa wein yɛ weinyibii amli ní akɛɔ akɛ: Kaafite, shi jɔɔmɔ yɛ mli! lɛ: nakai mafee yɛ mitsuji lɛ ahewɔ, beni afee ní mikafite fɛɛ. Shi maha seshi ajɛ Yakob mli aba, ni migɔji lɛ ayelɔ ko aaajɛ Yuda mli: ni mɛi ní mihala lɛ aaaŋɔ ákɛ amɛnɔ̃, ni mitsuji lɛ aaahi jɛi.” (Yesaia 65:8, 9) Yehowa kɛ mfonirifeemɔ ní amɛbaanyɛ amɛnu shishi jogbaŋŋ lɛ miitsu nii yɛ ewebii ní ekɛtoɔ weinyibii he lɛ hewɔ. Weinyibii fá babaoo yɛ shikpɔŋ lɛ nɔ, ni wein ní anáa kɛjɛɔ weinyibii amli lɛ ji jɔɔmɔ kɛha adesai. (Lala 104:15) Ekolɛ nɔ ni ekɛfeɔ mfoniri nɛɛ ji weinyibii kusha ní emli weinyibii lɛ fioo ko pɛ ji ekpakpa, shi jeee fɛɛ. Aloo ekolɛ nɔ ni etsɔɔ ji akɛ, weinyibii kushai lɛ ekome hi, shi kushai krokomɛi lɛ etsuko loo amɛkpɔtɔ. Yɛ shihilɛi nɛɛ eko fɛɛ eko mli lɛ, weintrom saalɔ lɛ kpataŋ weinyibii kpakpai lɛ ahiɛ. Enɛ hewɔ lɛ, Yehowa miima nɔ mi kɛmiiha ewebii lɛ akɛ ekpataŋ maŋ lɛ fɛɛ hiɛ kɛmɔŋ shi, shi moŋ ebaabaa shwɛɛnii anɔkwafoi komɛi ayi. Ejaje akɛ nɛkɛ shwɛɛnii ní aduro amɛ nɛɛ anine baashɛ ‘egɔji’ lɛ, ni ji Yerusalem kɛ Yuda shikpɔŋ lɛ, ni ji gɔji ashikpɔŋ ní Yehowa kɛɔ akɛ eji lɛ diɛŋtsɛ enɔ̃ lɛ anɔ.
12. Mɛɛ jɔɔmɔi mɛɔ shwɛɛnii anɔkwafoi lɛ?
12 Mɛɛ jɔɔmɔi mɛɔ shwɛɛnii anɔkwafoi nɛɛ? Yehowa tsɔɔ mli akɛ: “Sharon aaatsɔ tooiku alɛ̀ɛhe, ni Akor jɔɔ lɛ hu aaatsɔ tsinai ashibumɔhe aha mimaŋ ní taoɔ misɛɛgbɛ lɛ.” (Yesaia 65:10) Tooi akui tsuɔ gbɛfaŋnɔ ní he hiaa waa yɛ Yudafoi pii ashihilɛ mli, ni kooloi aniyelihei babaoo yeɔ ebuaa ni ehaa anáa nii babaoo yɛ toiŋjɔlɛ bei amli. Yehowa tsĩ shikpɔŋ lɛ naagbeehei enyɔ tã ni ekɛfee toiŋjɔlɛ kɛ shweremɔ ní baaba lɛ he mfoniri. Sharon Ŋa Kplanaa, ní ale jogbaŋŋ akɛ shikpɔŋ ní yɔɔ fɛo ní ebaa nii hu lɛ, kã Mediteranea Ŋshɔ lɛ Naabu yɛ anaigbɛ. Akor Jɔɔ lɛ feɔ shikpɔŋ lɛ kooyi-bokagbɛ husu lɛ fã. (Yoshua 15:7) Shikpɔji nɛɛ, kɛ shikpɔŋ lɛ hei krokomɛi fɛɛ ní eshwɛ lɛ, baakamɔ shi amaŋfɔ, yɛ nomŋɔɔ be ní baa lɛ mli. Shi kɛlɛ, Yehowa ewo shi akɛ yɛ nomŋɔɔ lɛ sɛɛ lɛ, amɛbaatsɔmɔ kooloi aniyelihei fɛfɛji ekoŋŋ kɛha shwɛɛnii ní baaku amɛsɛɛ lɛ.—Yesaia 35:2; Hoshea 2:15.
He ní Akɛfɔ̃ɔ “Shade Wɔŋ” Nɔ
13, 14. Mɛɛ nifeemɔi tsɔɔ akɛ Nyɔŋmɔ webii lɛ ekwa lɛ, ni mɛni baaba amɛnɔ yɛ no hewɔ?
13 Agbɛnɛ Yesaia gbalɛ lɛ ku sɛɛ kɛtee mɛi ní ekwa Yehowa, ní amɛkã he yɛ wɔŋjamɔ mli lolo lɛ anɔ. Ekɛɛ akɛ: “Nyɛ mɛi ní nyɛkwa Yehowa, ní nyɛhiɛ ekpa egɔŋ krɔŋkrɔŋ lɛ nɔ, ní nyɛŋmɛɔ okpɔlɔ nyɛhaa shade wɔŋ, ní nyɛfɔseɔ wein ní afutu mli nyɛshwieɔ shi nyɛhaa shɛɛ mli wɔŋ lɛ.” (Yesaia 65:11) Niyenii kɛ dãa okpɔlɔ ní amɛŋmɛɔ amɛhaa “shade wɔŋ” kɛ “shɛɛ mli wɔŋ” lɛ hewɔ lɛ, nɛkɛ Yudafoi sɛɛsɛɛyalɔi nɛɛ kɛ amɛhe eyawo jeŋmaji wɔŋjalɔi lɛ awɔŋjamɔ nifeemɔi lɛ amli.b Mɛni baaba mɛi fɛɛ ní kɛ amɛhiɛ fɔ̃ɔ nyɔŋmɔi nɛɛ anɔ yɛ hemɔkɛyeli mli lɛ anɔ?
14 Yehowa bɔ amɛ kɔkɔ yɛ faŋŋ mli akɛ: “Mi hu mato nyɛ maha klante, ni nyɛ fɛɛ nyɛaakula shi ní agbe nyɛ; ejaakɛ mitsɛ́ nyɛ ni nyɛhereee mi nɔ, miwie, ni nyɛbooo toi, shi moŋ nyɛfee nɔ ni ji efɔŋ yɛ mihiɛ, ni nyɛhala nii ní esaaa mihiɛ lɛ!” (Yesaia 65:12) Yɛ Shɛɛ mli wɔŋ lɛ gbɛi ní Yehowa kɛtsu nii yɛ hefɛoyeli mli yɛ shishijee Hebri niŋmaa lɛ mli lɛ hewɔ lɛ, eekɛɛ akɛ ‘ebaato’ mɛi ní jáa apasa nyɔŋmɔ nɛɛ ‘eha klante,’ ni ji hiɛkpatamɔ. Yehowa etsɔ egbalɔi lɛ anɔ ewo gbɔmɛi nɛɛ kita aahu ní amɛtsake amɛtsui, shi amɛbooo lɛ toi, ni amɛkɛ kuɛŋtimɔ ehala akɛ amɛbaafee nɔ ni amɛle akɛ eji efɔŋ yɛ ehiɛ lɛ moŋ. Kwɛ bulɛ ní amɛbɛ kwraa kɛha Nyɔŋmɔ! Yɛ Nyɔŋmɔ kɔkɔbɔɔ lɛ mlibaa mli lɛ, maŋ lɛ baana amanehulu kpeteŋkpele yɛ afi 607 D.Ŋ.B. beni Yehowa baaŋmɛ Babilonbii lɛ agbɛ ní amɛbakpata Yerusalem kɛ esɔlemɔtsu lɛ hiɛ lɛ. Yɛ nakai beaŋ lɛ, “shade wɔŋ” lɛ hereŋ mɛi ní yɔɔ Yuda kɛ Yerusalem ní jáa lɛ lɛ ayiwala.—2 Kronika 36:17.
15. Kristofoi boɔ kɔkɔbɔɔ ní anaa yɛ Yesaia 65:11, 12 lɛ toi yɛ mɛɛ gbɛ nɔ?
15 Ŋmɛnɛ, anɔkwa Kristofoi boɔ kɔkɔbɔɔ ní anaa yɛ Yesaia 65:11, 12 lɛ toi. Amɛheee “shade wɔŋ” ko amɛyeee, tamɔ nɔ ni eji hewalɛ ko ní nɔ kwɔ fe adesai anɔ̃, ní nyɛɔ efeɔ mɛi ejurɔ. Akɛni amɛsumɔɔɔ ní amɛkpata heloonaa nibii ní amɛyɔɔ lɛ hiɛ ákɛ amɛkɛmiibɔ mɔdɛŋ ní amɛsa “shade wɔŋ” lɛ hiɛ hewɔ lɛ, amɛtsiɔ amɛhe kɛjɛɔ asɔshwɛmɔi srɔtoi fɛɛ he. Amɛyɛ nɔmimaa akɛ yɛ naagbee lɛ, mɛi ní tuuɔ amɛhe amɛhaa nyɔŋmɔ nɛɛ anɔ fɛɛ nɔ ní amɛyɔɔ lɛ baaje amɛdɛŋ, ejaakɛ Yehowa kɛɔ nakai gbɔmɛi lɛ akɛ: “Mato nyɛ maha klante.”
“Naa, Mitsuji lɛ Aaanya”
16. Yehowa baajɔɔ etsuji anɔkwafoi lɛ yɛ mɛɛ gbɛ̀i anɔ, shi mɛni baaba mɛi ní ekwa lɛ lɛ anɔ?
16 Beni gbalɛ lɛ kãa mɛi ní ekwa Yehowa lɛ ahiɛ lɛ, etsɔɔ gbɛfaŋnii ní teɔ shi woɔ amɛhe, ní mɛɔ mɛi ní kɛ anɔkwayeli jáa Nyɔŋmɔ, kɛ mɛi ní kɛ osatofeemɔ feɔ nakai lɛ, akɛ: “Bɔ ni Nuntsɔ Yehowa kɛɛ nɛ: Naa, mitsuji lɛ aaaye nii, shi nyɛ lɛ hɔmɔ aaaye nyɛ; naa, mitsuji lɛ aaanu nii, shi nyɛ lɛ, kumai aaaye nyɛ; naa, mitsuji lɛ aaanya, shi nyɛ lɛ, nyɛhiɛ aaagboi; naa, mitsuji lɛ aaalá kɛ tsuijurɔ, shi nyɛ lɛ nyɛaabolɔ kɛ tsuiŋdɔlɛ, ni nyɛkɛ mumɔ ní ekumɔ aaafó yoo!” (Yesaia 65:13, 14) Yehowa baajɔɔ etsuji anɔkwafoi lɛ. Amɛkɛ tsuii ní eyimɔ obɔbɔ kɛ miishɛɛ aaabolɔ waa kɛ tsuijurɔ. Niyeli, ninumɔ, kɛ mlifilimɔ ji wiemɔi ní tsɔɔ akɛ Yehowa baaha ejálɔi lɛ ahiamɔ nii babaoo diɛŋtsɛ kɛteke nɔ. Nɔ ni tamɔɔɔ nakai lɛ, hɔmɔ kɛ kumai baaye mɛi ní ehala akɛ amɛaakwa Yehowa lɛ yɛ mumɔŋ. Atsuŋ amɛhiamɔ nii ahe nii ahaŋ amɛ. Amɛaabolɔ ni amɛaafó yoo yɛ amanehulu kɛ haomɔ ní baaba amɛnɔ lɛ hewɔ.
17. Mɛni hewɔ Nyɔŋmɔ webii yɔɔ yiŋtoo kpakpa ní amɛaadamɔ nɔ amɛkɛ tsuijurɔ anyá ŋmɛnɛ lɛ?
17 Yehowa wiemɔi lɛ tsɔɔ mumɔŋ shihilɛ ní mɛi ní kɛɔ kɛkɛ akɛ amɛsɔmɔɔ Nyɔŋmɔ ŋmɛnɛ lɛ yɔɔ mli lɛ mli jogbaŋŋ. Yɛ be mli ní Kristendom bii akpekpei abɔ atsuii kumɔɔ kɛ yaafo lɛ, belɛ Yehowa jálɔi miinya kɛ miishɛɛ. Ni amɛyɛ yiŋtoo kpakpa ní amɛaadamɔ nɔ amɛmli afili amɛ. Akɛ mumɔŋ niyenii kpakpa lɛɔ amɛ. Yehowa haa amɛ mumɔŋ niyenii babaoo kɛtsɔɔ Biblia kasemɔ woji kɛ Kristofoi ahenaabuamɔi anɔ. Lɛɛlɛŋ, anɔkwalei ní tswaa mɔ emaa shi, kɛ Nyɔŋmɔ Wiemɔ lɛ mli shiwoi ní shɛjeɔ mɔ mii lɛ haa wɔ “tsuijurɔ”!
18. Mɛni baashwɛ aha mɛi ní ekwa Yehowa lɛ, ni ekolɛ amɛgbɛi ní akɛaatsu nii yɛ kitakamɔ mli lɛ tsɔɔ mɛni?
18 Yehowa tee nɔ ekɛ mɛi ní ekwa lɛ lɛ wie akɛ: “Nyɛaashi nyɛgbɛi nyɛha mɛi ní mihala lɛ ní amɛkɛlomɔ; ni Nuntsɔ Yehowa aaagbeo, ni eeewo etsuji lɛ gbɛi kroko: koni mɔ ni jɔɔ lɛ diɛŋtsɛ ehe yɛ shikpɔŋ lɛ nɔ lɛ, ajɔɔ ehe yɛ anɔkwale Nyɔŋmɔ lɛ mli, ní mɔ ni kãa kita yɛ shikpɔŋ lɛ nɔ lɛ, akã anɔkwale Nyɔŋmɔ lɛ kita; ejaakɛ hiɛ ekpa tsutsu haomɔi lɛ anɔ, ni aŋɔtee yɛ mihiɛ.” (Yesaia 65:15, 16) Nɔ̃ pɛ ní baashwɛ aha mɛi ní ekwa Yehowa lɛ ji amɛgbɛi, ni akɛbaatsu nii yɛ kitakamɔ, loo loomɔ mli pɛ. Ekolɛ enɛ miitsɔɔ akɛ mɛi ní miitao ní amɛwo shi yɛ gbɛ ní hiɛdɔɔ yɔɔ mli nɔ, kɛtsɔ kitakamɔ nɔ lɛ baakɛɛ akɛ: ‘Kɛ́ miyeee shiwoo nɛɛ nɔ lɛ, no lɛ ha toigbalamɔ ní nɛkɛ hemɔkɛyeli kwalɔi nɛɛ ná lɛ eko aba minɔ.’ Ebaanyɛ etsɔɔ po akɛ ekolɛ akɛ amɛgbɛi baatsu nii yɛ mfonirifeemɔ mli, ákɛ toigbalamɔ ní Nyɔŋmɔ kɛbaa efɔŋfeelɔi anɔ lɛ he okadi, tamɔ Sodom kɛ Gomora.
19. Akɛ gbɛi kroko baatsɛ Nyɔŋmɔ tsuji lɛ yɛ mɛɛ gbɛ nɔ, ni mɛni hewɔ amɛbaaná Nyɔŋmɔ ní yeɔ anɔkwa lɛ mli hekɛnɔfɔɔ lɛ? (Kwɛmɔ shishigbɛ niŋmaa lɛ hu.)
19 Kwɛ bɔ ni Nyɔŋmɔ diɛŋtsɛ tsuji lɛ agbɛfaŋnɔ baafee srɔto kwraa ha! Akɛ gbɛi kroko baatsɛ amɛ. Enɛ tsɔɔ jɔɔmɔ shihilɛ kɛ woo ní amɛbaaná mli ŋɔɔmɔ kɛ́ amɛku amɛsɛɛ kɛba amɛmaŋ shikpɔŋ nɔ ekoŋŋ lɛ. Amɛyataoŋ jɔɔmɔ kɛjɛŋ apasa nyɔŋmɔ ko dɛŋ, ni amɛkɛ amaga ko ní wala bɛ emli hu kãŋ kita. Shi moŋ, kɛ́ amɛmiiba jɔɔmɔi amɛha amɛhe loo amɛmiikamɔ amɛhe kita lɛ, amɛbaafee nakai yɛ Nyɔŋmɔ ní yeɔ anɔkwa lɛ mli. (Yesaia 65:16, NW shishigbɛ niŋmaa) Shikpɔŋ lɛ nɔ bii lɛ baaná yiŋtoo ní amɛaadamɔ nɔ amɛná hekɛnɔfɔɔ kwraa yɛ Nyɔŋmɔ mli, ejaakɛ no mli lɛ eha eshiwoi lɛ eba mli anɔkwale.c Akɛni amɛfee shweshweeshwe yɛ amɛmaŋ shikpɔŋ nɔ hewɔ lɛ, etsɛŋ ni Yudafoi lɛ ahiɛ baakpa amɛtsutsu haomɔi lɛ anɔ.
“Miibɔ Ŋwɛi Hee kɛ Shikpɔŋ Hee”
20. Yehowa shiwoo ní kɔɔ “ŋwɛi hee kɛ shikpɔŋ hee” he lɛ ba mli yɛ afi 537 D.Ŋ.B. yɛ mɛɛ gbɛ nɔ?
20 Agbɛnɛ, Yehowa tsɔɔ shiwoo ní ekɛha akɛ ebaatsake shwɛɛnii ní etsake amɛtsui lɛ ashihilɛ, yɛ amɛsɛɛkuu kɛmiijɛ Babilon nomŋɔɔ mli lɛ mli babaoo. Yehowa tsɔ Yesaia nɔ ewie akɛ: “Naa, miibɔ ŋwɛi hee kɛ shikpɔŋ hee, ni akaiŋ tsutsu nii lɛ dɔŋŋ, ni asaŋ ebaŋ jwɛŋmɔ mli dɔŋŋ.” (Yesaia 65:17) Bɔ fɛɛ bɔ ní fee lɛ, Yehowa shiwoo ní kɔɔ sɛɛkuu he lɛ baaba mli kɛ̃, no hewɔ lɛ ewie nakai wɔsɛɛ be mli shihilɛ saamɔ lɛ he tamɔ nɔ ko ní miiba mli momo. Nɛkɛ gbalɛ nɛɛ ná eklɛŋklɛŋ mlibaa yɛ afi 537 D.Ŋ.B., beni akɛ Yudafoi shwɛɛnii lɛ ku sɛɛ kɛba Yerusalem ekoŋŋ lɛ. Mɛni fee “ŋwɛi hee” lɛ yɛ nakai be lɛ mli? No ji Zerubabel lumɔyeli ní Osɔfonukpa Yoshua fĩ esɛɛ, ní ato shishi yɛ Yerusalem lɛ. Yudafoi shwɛɛnii ní akɛ amɛ eba amɛmaŋ ekoŋŋ lɛ fee “shikpɔŋ hee,” ni ji adesai akuu ní atsuu amɛhe, ní ba amɛhe shi amɛha nakai nɔyeli lɛ, ní amɛye amɛbua ní ato jamɔ krɔŋŋ shishi ekoŋŋ yɛ shikpɔŋ lɛ nɔ lɛ. (Ezra 5:1, 2) Miishɛɛ ní amɛsɛɛkuu lɛ ha amɛná lɛ ye tsutsu amanehulu ní amɛna lɛ nɔ kwraa; amɛkaiii tsutsu haomɔi lɛ po kwraa dɔŋŋ.—Lala 126:1, 2.
21. Mɛɛ ŋwɛi hee ko ba shihilɛ mli yɛ afi 1914?
21 Shi, kaimɔ akɛ Petro tĩ Yesaia gbalɛ lɛ mli ekoŋŋ ni etsɔɔ akɛ ebaaná emlibaa kroko hu wɔsɛɛ. Bɔfo lɛ ŋma akɛ: “Yɛ eshiwoo lɛ naa lɛ wɔmiikwɛ ŋwɛi hee kɛ shikpɔŋ hee ni jalɛ hiɔ mli lɛ gbɛ.” (2 Petro 3:13) Yɛ afi 1914 lɛ, ŋwɛi hee lɛ ní akɛ be kakadaŋŋ emɛ aahu lɛ ba shihilɛ mli. Mesia Maŋtsɛyeli lɛ ní afɔ́ yɛ nakai afi lɛ mli lɛ yeɔ nɔ kɛjɛɔ ŋwɛi diɛŋtsɛ, ni Yehowa kɛ hegbɛ eha lɛ akɛ eye shikpɔŋ muu lɛ fɛɛ nɔ. (Lala 2:6-8) Nɛkɛ Maŋtsɛyeli nɔyeli, ní yɔɔ Kristo kɛ ehefatalɔi nɔyelɔi 144,000 lɛ ashishi nɛɛ, ji ŋwɛi hee lɛ.—Kpojiemɔ 14:1.
22. Namɛi baafee shikpɔŋ hee lɛ, ni aasaa gbɔmɛi amrɔ nɛɛ po koni amɛbafee nakai gbɛjianɔtoo lɛ shishijee yɛ mɛɛ gbɛ nɔ?
22 Shi shikpɔŋ hee lɛ hu? Yɛ blema mlibaa lɛ he nɔkwɛmɔnɔ lɛ sɛɛnyiɛmɔ mli lɛ, mɛi ní baafee shikpɔŋ hee lɛ ji gbɔmɛi ní kɛ miishɛɛ baa amɛhe shi amɛhaa ŋwɛi nɔyeli gbɛjianɔtoo hee lɛ nɔyeli lɛ. Amrɔ nɛɛ po lɛ, aŋkroaŋkroi akpekpei abɔ ní sumɔɔ jalɛ nifeemɔ lɛ baa amɛhe shi amɛhaa nɔyeli nɛɛ, ni amɛbɔɔ mɔdɛŋ ní amɛnyiɛ emlai ní anaa yɛ Biblia lɛ mli lɛ asɛɛ. Mɛnɛɛmɛi jɛ jeŋmaji, wiemɔi, kɛ hewolonɔ sui srɔtoi fɛɛ mli, ni amɛfeɔ ekome kɛtsuɔ nii kɛsɔmɔɔ Maŋtsɛ Yesu Kristo ní yeɔ nɔ lɛ. (Mika 4:1-4) Beni nibii agbɛjianɔtoo fɔŋ nɛɛ eho etee sɛɛ lɛ, nɛkɛ kuu nɛɛ baafee shikpɔŋ hee ní yɛ naagbee lɛ ebaafee adesai ashihilɛ gbɛjianɔtoo ní sheɔ Nyɔŋmɔ gbeyei, ní baakpele jeŋ fɛɛ, ní baahi Nyɔŋmɔ Maŋtsɛyeli lɛ nɔyelihe ní yɔɔ shikpɔŋ nɔ lɛ shishijee.—Mateo 25:34.
23. Mɛɛ adafitswaa ko wɔnaa yɛ Kpojiemɔ wolo lɛ mli ní kɔɔ “ŋwɛi hee kɛ shikpɔŋ hee” ko he, ni gbalɛ nɛɛ baaba mli yɛ mɛɛ gbɛ nɔ?
23 Kpojiemɔ wolo lɛ tsɔɔ ninaa ko ní bɔfo Yohane na, ní kɔɔ Yehowa gbi lɛ baa lɛ he, beni abaajie nibii agbɛjianɔtoo nɛɛ kɛjɛ jɛmɛ lɛ. Yɛ no sɛɛ lɛ, akɛ Satan baawo bu kwɔŋkwɔŋ mli. (Kpojiemɔ 19:11–20:3) Yɛ nakai saji amlitsɔɔmɔ lɛ sɛɛ lɛ, Yohane tĩ Yesaia gbalɛ wiemɔ lɛ mli ekoŋŋ, ni eŋma akɛ: “Mina ŋwɛi hee kɛ shikpɔŋ hee.” Ninaa ní yɔɔ nyam nɛɛ he saji ní yɔɔ kukuji ní nyiɛ sɛɛ lɛ amli lɛ gbaa wɔ be mli ní Yehowa Nyɔŋmɔ baatsake shihilɛi ní yɔɔ shikpɔŋ nɛɛ nɔ lɛ kwraa ní efee ekpakpa diɛŋtsɛ. (Kpojiemɔ 21:1, 3-5) Eyɛ faŋŋ akɛ, Yehowa shiwoo ní kɔɔ “ŋwɛi hee kɛ shikpɔŋ hee” he lɛ baaná emlibaa ní yɔɔ naakpɛɛ yɛ Nyɔŋmɔ jeŋ hee lɛ mli! Shikpɔŋ nɔ shihilɛ gbɛjianɔtoo hee ko baaná paradeiso ní ji mumɔŋ nɔ̃ kɛ heloonaa nɔ̃ fɛɛ mli ŋɔɔmɔ, yɛ ŋwɛi nɔyeli hee lɛ shishi. Shiwoo ní akɛha akɛ “akaiŋ tsutsu nii [ni ji helai, amanehulu, kɛ haomɔi krokomɛi babaoo ní adesai kɛkpeɔ] lɛ dɔŋŋ, ni asaŋ ebaŋ jwɛŋmɔ mli dɔŋŋ” lɛ baafee nii ní shɛjeɔ mɔ mii diɛŋtsɛ. Nɔ fɛɛ nɔ ní wɔbaakai yɛ nakai beaŋ lɛ haŋ wɔnu dɔlɛ ní naa wa, loo awerɛho ní kumɔɔ mɛi pii atsuii ŋmɛnɛ lɛ eko he.
24. Mɛni hewɔ Yehowa baaná miishɛɛ yɛ Yerusalem maŋ lɛ saamɔ hewɔ lɛ, ni mɛni he anuŋ dɔŋŋ yɛ nakai maŋtiase lɛ gbɛjegbɛi anɔ?
24 Yesaia gbalɛ lɛ yaa nɔ akɛ: “Nyɛnyaa ní nyɛmli afilia nyɛ kɛyaa naanɔ yɛ nii ní mibɔɔ lɛ ahewɔ; ejaakɛ naa, miibɔ Yerusalem ní etsɔ mlifilimɔ, kɛ emli bii lɛ hu ní amɛtsɔ nyamɔ! Ni mimli aaafili mi yɛ Yerusalem he, ni manyá mimaŋbii lɛ ahe, ni anuŋ yaafo aloo bolɔmɔ gbee yɛ emli dɔŋŋ.” (Yesaia 65:18, 19) Jeee Yudafoi lɛ pɛ amii baashɛ amɛhe akɛ akɛ amɛ eku sɛɛ kɛba amɛmaŋ shikpɔŋ nɔ ekoŋŋ, shi moŋ Nyɔŋmɔ diɛŋtsɛ hu mii baashɛ ehe, ejaakɛ ebaaha Yerusalem afee fɛo—ebaafee anɔkwa jamɔ shikwɛ̃ɛhe ekoŋŋ yɛ shikpɔŋ lɛ nɔ. Anuŋ yaafo gbee yɛ amanehulu hewɔ, tamɔ bɔ ni afii nyɔŋmai abɔ komɛi ní etsɔ hiɛ lɛ, kulɛ anuɔ yɛ nakai maŋtiase lɛ gbɛjegbɛi anɔ lɛ he dɔŋŋ.
25, 26. (a) Yehowa miifee Yerusalem “ní etsɔ mlifilimɔ” yɛ wɔgbii nɛɛ amli yɛ mɛɛ gbɛ nɔ? (b) Yehowa kɛ Yerusalem Hee lɛ baatsu nii yɛ mɛɛ gbɛ nɔ, ni mɛni hewɔ wɔmli baanyɛ afili wɔ ŋmɛnɛ lɛ?
25 Ŋmɛnɛ hu, Yehowa feɔ “Yerusalem ní etsɔ mlifilimɔ.” Yɛ mɛɛ gbɛ nɔ? Taakɛ wɔna momo lɛ, yɛ naagbee lɛ, hefatalɔi nɔyelɔi 144,000, ní yɔɔ ŋwɛi maŋtsɛyeli lɛ mli gbɛfaŋnɔ lɛ, baafata ŋwɛi hee ní ba shihilɛ mli yɛ afi 1914 lɛ he. Awie mɛnɛɛmɛi ahe yɛ gbalɛ wiemɔ mli akɛ “Yerusalem hee.” (Kpojiemɔ 21:2) Yerusalem Hee lɛ ji mɛi ní Nyɔŋmɔ wie yɛ amɛhe akɛ: “Naa, miibɔ Yerusalem ní etsɔ mlifilimɔ, kɛ emli bii lɛ hu ní amɛtsɔ nyamɔ!” Nyɔŋmɔ kɛ Yerusalem Hee lɛ baatsu nii ní ekɛ jɔɔmɔi ní anako dã abaha adesai toibolɔi. Anuŋ yaafo gbee loo ŋkɔmɔyeli bolɔmɔ ko dɔŋŋ, ejaakɛ Yehowa baaha wɔ “nii ní [wɔ]tsui taoɔ.”—Lala 37:3, 4.
26 Lɛɛlɛŋ, wɔyɛ yiŋtoo ní wɔɔdamɔ nɔ wɔmli afili wɔ ŋmɛnɛ! Etsɛŋ ni Yehowa baatse egbɛi ní yɔɔ nyam lɛ he kɛtsɔ shitee-kɛ-wolɔi fɛɛ ahiɛkpatamɔ nɔ. (Lala 83:18, 19) Kɛkɛ lɛ ŋwɛi hee lɛ baaye nɔ kwraa kɛmɔ shi. Kwɛ bɔ ni enɛɛmɛi ji yiŋtoi ní yɔɔ nyam ní wɔɔdamɔ nɔ wɔmli afili wɔ ní wɔmii ashɛ wɔhe kɛya naanɔ yɛ nɔ ni Nyɔŋmɔ bɔɔ lɛ mli!
Wɔsɛɛ Be ní Yɔɔ Shweshweeshwe He Shiwoo
27. Te Yesaia tsɔɔ shweshweeshwe shihilɛ ní Yudafoi ní baaku amɛsɛɛ lɛ baaná mli ŋɔɔmɔ yɛ amɛmaŋ shikpɔŋ nɔ lɛ mli eha tɛŋŋ?
27 Yɛ klɛŋklɛŋ mlibaa lɛ mli lɛ, te shihilɛ baafee tɛŋŋ kɛha Yudafoi ní eku amɛsɛɛ lɛ, yɛ ŋwɛi hee lɛ shishi? Yehowa kɛɛ akɛ: “Fufɔoo ko bɛ jɛi ní aaaye gbii fioo kɛkɛ, loo nuumo ko ní egbii shɛɛɛ; shi oblanyo aaaye afii oha ni eeegbo, ni eshafeelɔ ní ye afii oha pɛ lɛ, alomɔ lɛ.” (Yesaia 65:20) Mɛɛ shweshweeshwe shihilɛ ní Yudafoi nomii ní baaku amɛsɛɛ lɛ baaná mli ŋɔɔmɔ yɛ amɛmaŋ shikpɔŋ ní akɛ amɛ eba nɔ ekoŋŋ lɛ nɔ lɛ he mfoniri fɛfɛo po nɛ! Kpatu gbele ebaŋɔŋ abifao ní eye gbii fioo pɛ kɛkɛ lɛ kɛyaŋ. Nakai nɔŋŋ nakai gbele ko ebaŋɔŋ nuumo ko ní yeee ewala gbii fɛɛ egbeee naa hu kɛyaŋ.d Kwɛ bɔ ni Yesaia wiemɔi lɛ ji hewalɛwoo nɔ̃ kɛha Yudafoi ní baaku amɛsɛɛ kɛya Yuda lɛ! Akɛni amɛbaafee shweshweeshwe yɛ amɛshikpɔŋ nɔ hewɔ lɛ, ehe ehiaŋ ní amɛhao amɛhe akɛ henyɛlɔi baaba abaloo amɛbii abifabii lɛ kɛya loo abagbe amɛteŋ hii lɛ.
28. Mɛni wɔkaseɔ kɛjɛɔ Yehowa wiemɔi ní tsɔɔ jeŋ hee lɛ mli shihilɛ yɛ e-Maŋtsɛyeli lɛ shishi lɛ mli?
28 Mɛni Yehowa wiemɔi lɛ kɛɔ wɔ yɛ jeŋ hee ní baa lɛ mli shihilɛ he? Yɛ Nyɔŋmɔ Maŋtsɛyeli lɛ shishi lɛ, gbekɛ fɛɛ gbekɛ baaná wɔsɛɛ be ní yɔɔ shweshweeshwe he gbɛkpamɔ. Gbele ebaŋɔŋ gbɔmɔ ní sheɔ Nyɔŋmɔ gbeyei lɛ kɛyaŋ yɛ eblahiiaŋ loo eblayeiaŋ be mli dɔŋŋ. Nɔ ni tamɔɔɔ nakai lɛ, adesai toibolɔi lɛ baafee shweshweeshwe, ni amɛbaanyɛ amɛná wala mli ŋɔɔmɔ. Ni mɛi ní halaa akɛ amɛaatse Nyɔŋmɔ hiɛ atua lɛ hu? Wala hegbɛ ní mɛnɛɛmɛi yɔɔ lɛ baaŋmɛɛ amɛ. Kɛji atuatselɔ eshafeelɔ lɛ “ye afii oha” po lɛ, ebaagbo. Kɛ́ eba lɛ nakai lɛ, ebaafee tamɔ “oblanyo” kɛkɛ, kɛ́ akɛmiito bɔ ni kulɛ ebaada ní ebatsɔ—nuu ní baahi shi kɛya naanɔ lɛ he.
29. (a) Mɛɛ miishɛɛ Nyɔŋmɔ webii toibolɔi lɛ baaná yɛ Yuda shikpɔŋ ní aku sɛɛ abahi nɔ ekoŋŋ lɛ nɔ? (b) Mɛni hewɔ tsei ji wala sɛɛtsɛlɛ he nɔkwɛmɔnɔ ní sa lɛ? (Kwɛmɔ shishigbɛ niŋmaa lɛ.)
29 Yehowa tee nɔ etsɔɔ shihilɛi ní baahi shi yɛ Yuda shikpɔŋ ní aku sɛɛ abahi nɔ ekoŋŋ lɛ nɔ lɛ mli akɛ: “Amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii! Amɛmamɔŋ tsũi, ní mɔ kroko ahi mli, ni amɛhuŋ hu, ní mɔ kroko aye; ejaakɛ mimaŋ lɛ gbii aaatamɔ tsei agbii, ni mɛi ni mihala lɛ aaaye amɛnine naa nitsumɔ lɛ mli nii aahu po.” (Yesaia 65:21, 22) Beni amɛku amɛsɛɛ kɛba Yuda shikpɔŋ ní ekã shi amaŋfɔ ní ŋwanejee ko bɛ he akɛ shiai kɛ weintromi bɛ nɔ lɛ nɔ sɛɛ lɛ, Nyɔŋmɔ webii toibolɔi lɛ baaná miishɛɛ akɛ amɛaahi amɛ diɛŋtsɛ amɛshiai amli, ni amɛaaye amɛ diɛŋtsɛ amɛ weintromi ayibii. Nyɔŋmɔ baajɔɔ amɛnitsumɔ nɔ, ni amɛbaahi wala mli be kakadaŋŋ—tamɔ tsei agbii—ni amɛbaaye amɛdeŋmegbomɔi lɛ amli ŋɔɔmɔ yɛ mli.e
30. Mɛɛ miishɛɛ shihilɛ Yehowa tsuji náa mli ŋɔɔmɔ ŋmɛnɛ, ni mɛni amɛbaaná mli ŋɔɔmɔ yɛ jeŋ hee lɛ mli?
30 Gbalɛ nɛɛ ená emlibaa yɛ wɔgbii nɛɛ amli. Yehowa webii je kpo kɛjɛ mumɔŋ nomŋɔɔ mli yɛ afi 1919, ni amɛbɔi amɛ “shikpɔŋ,” loo shihilɛhe kɛha nitsumɔ kɛ jamɔ lɛ saamɔ ekoŋŋ. Amɛto asafoi ashishi, ni amɛfee nibii ní kɛ mumɔŋ yibiiwoo babaoo baa. Nɔ ni ejɛ mli eba ji akɛ, Yehowa webii náa mumɔŋ paradeiso kɛ toiŋjɔlɛ ní Nyɔŋmɔ kɛhaa lɛ mli ŋɔɔmɔ amrɔ nɛɛ po. Wɔbaanyɛ wɔná nɔmimaa akɛ toiŋjɔlɛ nɛɛ baatsa nɔ kɛyabote Paradeiso lɛ diɛŋtsɛ mli. Wɔnyɛŋ wɔfee nɔ ni Yehowa baatsu kɛtsɔ ejálɔi lɛ atsuii kɛ amɛniji ní shweɔ ní ekɛ amɛ atsu nii yɛ jeŋ hee lɛ mli lɛ anɔ lɛ he mfoniri bianɛ po. Kwɛ miishɛɛ ní eeeji akɛ oooma bo diɛŋtsɛ oshia ní ohi mli! Nitsumɔ ní haa mɔ tsui nyɔɔ emli sɛɛ efoŋ, yɛ Maŋtsɛyeli nɔyeli lɛ shishi. Kwɛ nyɔmɔwoo diɛŋtsɛ ní eeeji akɛ oooye “nii kpakpai,” ni ji odeŋmegbomɔi lɛ amli yibii be fɛɛ be! (Jajelɔ 3:13) Ani wɔbaaná be ní fa ní wɔkɛye wɔninenaa nitsumɔi lɛ amli ŋɔɔmɔ kɛmɔ shi? Hɛɛ, wɔbaaná! Adesai anɔkwafoi lɛ awala ní baŋ naagbee lɛ “aaatamɔ tsei agbii”—afii akpei abɔ, kɛ nɔ ni fe nakai!
31, 32. (a) Mɛɛ jɔɔmɔi nomii ní baaku amɛsɛɛ lɛ baaná mli ŋɔɔmɔ? (b) Mɛɛ gbɛkpamɔ adesai anɔkwafoi lɛ baaná yɛ jeŋ hee lɛ mli?
31 Yehowa tsɔɔ jɔɔmɔi babaoo ní mɛɔ nomii ní baaku amɛsɛɛ lɛ mli lolo ni ekɛɛ: “Amɛgboŋ deŋme yakatswaa, ni amɛfɔŋ amɛhaŋ oshara; ejaakɛ mɛi ní Yehowa ejɔɔ amɛ lɛ aseshibii ji amɛ, ni amɛshwiei kɛ amɛ aaahi shi.” (Yesaia 65:23) Yehowa baajɔɔ Yudafoi ní baaku amɛsɛɛ kɛba amɛshikpɔŋ nɔ lɛ, no hewɔ lɛ amɛgboŋ deŋme yakatswaa. Fɔlɔi fɔŋ bii kɛkɛ ní amɛbana amanehulu ni ji gbele yɛ amɛgbekɛbiiashi. Jeee tsutsu nomii lɛ pɛ baaná sɛɛkuu lɛ mli jɔɔmɔi lɛ amli ŋɔɔmɔ; amɛshwiei hu kɛ amɛ baahi shi. Nyɔŋmɔ miiye oyai kɛkɛ ní etsu ewebii lɛ ahiamɔ nii ahe nii aahu akɛ ewo shi akɛ: “Aaaba mli akɛ, dani amɛaatsɛ́ mi lɛ, mahere nɔ; ni beni amɛwieɔ lolo lɛ, mabo toi!”—Yesaia 65:24.
32 Mɛɛ gbɛ nɔ Yehowa baaha shiwoi nɛɛ aba mli yɛ jeŋ hee ní baa lɛ mli? Wɔbaamɛ ní wɔkwɛ nɔ ni baaba. Yehowa kɛ emli saji fɛɛ ni yɔɔ fitsofitso hako, shi wɔbaanyɛ wɔná nɔmimaa akɛ adesai anɔkwafoi ‘gboŋ deŋme yakatswaa’ dɔŋŋ kɔkɔɔkɔ. Asafo babaoo lɛ ní baaná yibaamɔ kɛfo Harmagedon kɛ amɛbii ní amɛbaafɔ́ lɛ baaná gbɛkpamɔ akɛ amɛaaná wala ní sɛɛ tsɛɔ, ní haa mɔ tsui nyɔɔ emli—ni ji naanɔ wala diɛŋtsɛ mli ŋɔɔmɔ! Mɛi ní baaba wala mli ekoŋŋ yɛ gbohiiashitee lɛ mli, ní amɛaahala akɛ amɛaahi shi yɛ tɛi ní Nyɔŋmɔ efolɔ eshwie shi lɛ anaa lɛ hu baaná miishɛɛ yɛ jeŋ hee lɛ mli. Yehowa baanu ni ebaatsu amɛhiamɔ nii ahe nii, ni ebaatsu he nii kɛtsɔ hiɛ po eha amɛ. Lɛɛlɛŋ, Yehowa baagbɛ edɛŋ ni ebaaha ‘nɔ fɛɛ nɔ ní hiɛ kã atɔ kɛ nibii kpakpa ní etaoɔ.’—Lala 145:16.
33. Kɛ́ Yudafoi lɛ ku amɛsɛɛ kɛtee amɛmaŋ shikpɔŋ nɔ lɛ, amɛkɛ kooloi lɛ baahi shi yɛ toiŋjɔlɛ mli yɛ mɛɛ shishinumɔ naa?
33 Te toiŋjɔlɛ kɛ shweshweeshwe shihilɛ he shiwoo lɛ mli baalɛɛ aha tɛŋŋ? Yehowa mu gbalɛ lɛ fã nɛɛ naa akɛ: “Klaŋ kɛ too gwantɛŋ bi aaaye nii yɛ he kome, ni jata aaaye jwɛi tamɔ tsina; ni onufu lɛ, sũ aaafee eniyenii: ayeŋ awui ni akpataŋ hiɛ dɔŋŋ yɛ migɔŋ krɔŋkrɔŋ lɛ nɔ fɛɛ, Yehowa kɛɛ.” (Yesaia 65:25) Kɛ́ Yudafoi shwɛɛnii anɔkwafoi lɛ ku amɛsɛɛ kɛtee amɛmaŋ shikpɔŋ nɔ lɛ, amɛbaahi Yehowa kwɛmɔ shishi. No hewɔ lɛ, jata baaye jwɛi tamɔ tsina, ejaakɛ jata efeŋ Yudafoi lɛ loo amɛshia kooloi efɔŋ ko. Nɔmimaa diɛŋtsɛ yɛ shiwoo nɛɛ he, ejaakɛ eba naagbee kɛ wiemɔi nɛɛ, akɛ, “Yehowa kɛɛ.” Ni ewiemɔ baa mli anɔkwale be fɛɛ be!—Yesaia 55:10, 11.
34. Mɛɛ mlibaa ní yɔɔ miishɛɛ Yehowa wiemɔi lɛ náa ŋmɛnɛ, kɛ jeŋ hee lɛ hu mli?
34 Yehowa wiemɔi lɛ miiná mlibaa ní yɔɔ miishɛɛ yɛ anɔkwa jálɔi ateŋ ŋmɛnɛ. Kɛjɛ afi 1919 kɛbaa nɛɛ lɛ, Nyɔŋmɔ ejɔɔ ewebii lɛ amumɔŋ shikpɔŋ lɛ, ni etsake lɛ ni efee lɛ mumɔŋ paradeiso. Mɛi ní baa mumɔŋ paradeiso nɛɛ mli lɛ feɔ tsakemɔi ní sa kadimɔ waa yɛ amɛshihilɛi amli. (Efesobii 4:22-24) Kɛtsɔ Nyɔŋmɔ mumɔ lɛ yelikɛbuamɔ nɔ lɛ, aŋkroaŋkroi ní be ko lɛ amɛhiɛ subaŋi ní tamɔ kooloi anɔ̃—mɛi ní ekolɛ amɛyeɔ amɛnanemɛi adesai ahe nii loo amɛshishiuɔ amɛ lɛ—etee hiɛ ni amɛye subaŋi ní ehiii nɛɛ anɔ kunim. Nɔ ni ejɛ enɛ mli eba ji akɛ, amɛkɛ amɛnanemɛi heyelilɔi lɛ náa jamɔ mli toiŋjɔlɛ kɛ ekomefeemɔ mli ŋɔɔmɔ. Jɔɔmɔi ní Yehowa webii náa mli ŋɔɔmɔ bianɛ yɛ amɛmumɔŋ paradeiso lɛ mli lɛ mli baalɛɛ kɛya Paradeiso diɛŋtsɛ lɛ mli, he ni toiŋjɔlɛ ní baahi adesai kɛ kooloi ateŋ lɛ baafata toiŋjɔlɛ ní yɔɔ adesai sɔŋŋ ateŋ lɛ he lɛ. Wɔbaanyɛ wɔná nɔmimaa akɛ yɛ Nyɔŋmɔ diɛŋtsɛ be ní eto mli lɛ, abaatsu shishijee nitsumɔ ní ekɛha adesai lɛ he nii jogbaŋŋ, ni ji akɛ: “Nyɛyia shikpɔŋ lɛ nɔ obɔ, ni nyɛnaanaa nɔ, ni nyɛyea ŋshɔŋloi kɛ ŋwɛi loofɔji kɛ kooloo fɛɛ kooloo ni tsiɔ ehe yɛ shikpɔŋ lɛ nɔ lɛ nɔ.”—1 Mose 1:28.
35. Mɛni hewɔ wɔyɔɔ yiŋtoo ní wɔɔdamɔ nɔ wɔha ‘wɔmli afili wɔ kɛya naanɔ’ lɛ?
35 Kwɛ bɔ ni wɔdaa Yehowa shi yɛ shiwoo ní ekɛha akɛ ebaabɔ “ŋwɛi hee kɛ shikpɔŋ hee” lɛ he! Nakai shiwoo lɛ ná emlibaa yɛ afi 537 D.Ŋ.B., ni eená emlibaa kroko hu ŋmɛnɛ. Nɛkɛ mlibaai enyɔ nɛɛ gbalaa jwɛŋmɔ kɛyaa wɔsɛɛ be ní yɔɔ nyam kɛha adesai toibolɔi lɛ nɔ. Yehowa ejɛ mlihilɛ mli etsɔ Yesaia gbalɛ lɛ nɔ eha wɔtsɔ hiɛ wɔna nɔ ni esaa eto kɛha mɛi ní sumɔɔ lɛ lɛ he okadi bibioo. Lɛɛlɛŋ, wɔyɛ yiŋtoo ní wɔɔdamɔ nɔ wɔbo Yehowa wiemɔi nɛɛ atoi, akɛ: “Nyɛmli afilia nyɛ kɛyaa naanɔ yɛ nii ní mibɔɔ lɛ ahewɔ”!—Yesaia 65:18.
[Shishigbɛ niŋmai]
a Mɛi pii susuɔ akɛ eshafeelɔi nɛɛ tee gbonyo bui lɛ amli akɛ amɛmiiya amɛyabi gbohii lɛ anii. Ekolɛ kpolotoo loo ní amɛyeɔ lɛ kɛ wɔŋjamɔ yɛ tsakpaa ko.
b Beni Biblia shishitsɔɔlɔ Jerome (ní afɔ́ lɛ yɛ afii ohai ejwɛ Ŋ.B. lɛ) wieɔ ŋmalɛ kuku nɛɛ he lɛ, ewie blema kusum ko ní wɔŋjalɔi lɛ feɔ yɛ amɛ afi lɛ mli naagbee nyɔŋ lɛ mli naagbee gbi lɛ nɔ lɛ he. Eŋma akɛ: “Amɛŋmɛɔ okpɔlɔ ní akɛ niyenii srɔtoi emamɔ nɔ kɛ kpulu ní afutu wein dɔkɔdɔkɔ yɛ mli, koni amɛkɛma shade kpakpa nɔ mi kɛha yibiiwoo babaoo yɛ afi ní eho lɛ loo nɔ ni baa lɛ mli.”
c Taakɛ Yesaia 65:16 tsɔɔ yɛ Hebri Masoret ŋmalɛ lɛ mli lɛ, Yehowa ji “Amen Nyɔŋmɔ lɛ.” “Amen” shishi ji “aba mli nakai,” loo “ebaaba mli lɛɛlɛŋ,” ni eji nɔmimaa loo sɛɛdaamɔ nɔ̃ ni tsɔɔ akɛ, nɔ ko ji anɔkwale, loo bɔ fɛɛ bɔ ní fee lɛ, ebaaba mli anɔkwale. Yehowa kɛ eshiwoi fɛɛ ní etsuɔ he nii lɛ tsɔɔ akɛ nibii ní ekɛɔ lɛ ji anɔkwale.
d The Jerusalem Bible lɛ tsɔɔ Yesaia 65:20 lɛ shishi akɛ: “Anaŋ abifao ko ní baaye gbii fioo ko pɛ, aloo nuumo ní ehiii shi kɛyashiii egbii anaagbee dɔŋŋ.”
e Tsei ji wala sɛɛtsɛlɛ he nɔkwɛmɔnɔ ní sa, ejaakɛ amɛfata nibii ní wala yɔɔ amɛmli, ní ale akɛ amɛsɛɛ tsɛɔ waa lɛ ahe. Ákɛ nɔkwɛmɔnɔ lɛ, mu tso woɔ yibii aahu afii ohai abɔ, ni ebaanyɛ ehi shi aahu afii akpe.
[Mfoniri ni yɔɔ baafa 389]
Wɔbaaná be ní fa babaoo ní wɔkɛaaye wɔninenaa nitsumɔi lɛ amli ŋɔɔmɔ yɛ Nyɔŋmɔ jeŋ hee lɛ mli