Yehowa Ni Wɔɔɔsɔle Wɔha Koni Ebo Wɔ Toi
“Mɔni baa Nyɔŋmɔ ŋɔɔ lɛ, ja ehe eye akɛ eyɛ, ni eji mɛi ni taoɔ esɛɛgbɛ lɛ anyɔmɔwolɔ hu.”—Heb. 11:6.a
1-3. (a) Mɛni ji nɔni gbekeyoo fioo ko lɛ niiashikpamɔ lɛ kɛɔ wɔ? (b) Mɛɛ nikasemɔ yɔɔ enɛ mli kɛha fɔlɔi fɛɛ?
1 EBA MLI NAKAI yɛ Yehowa Odasefoi a-Maŋtsɛyeli Asa ko nɔ. Yɛ ehe gbeyei ni nyɛ lɛ wo kɛ hiɛtumɔ kɛ etoiŋ ni ewie ewo kɛ hiɛkamɔ lɛ fɛɛ sɛɛ lɛ gbekɛyoo fioo lɛ tee nɔ ebɔ kũa. Kɛkɛ ni nyɛ lɛ wó tse lɛ toi nɔ akɛ efee he nɔ̃ ko. Emɔ ebiyoo lɛ nineshi ni ekɛlɛ tee tsu fioo ko ni yɔɔ Asa lɛ sɛɛ lɛ mli. Akɛni ena ele nɔ ni baaba enɔ hewɔ lɛ, gbekɛyoo fioo lɛ bɔi yaafoi “Oo,Yehowa, Ofainɛ ye Obua mi!”
2 Be fɛɛ be ni aaagba nɛkɛ sane nɛɛ atsɔɔ lɛ, eteeɔ ŋmɔlɔ shi, ni esa nakai jogbaŋŋ hu. Shi ani ewoɔ mɔ naa ŋmɔlɔ kɛkɛ, aloo ekɛɔ wɔ nɔ̃ ko? Yɛ anɔkwale mli lɛ ekɛɔ nɔ̃ ko. Gbekɛyoo fioo lɛ le Nyɔŋmɔ ni ji Bɔlɔ lɛ gbɛi, akɛ eji Yehowa; nɔ̃ ko ni gbekɛbii bibii fioo ko pɛ le. Átsɔɔ lɛ sɛɛnamɔ ni yɔɔ sɔlemɔ he akɛ abaanyɛ atsɛ Yehowa kɛha yelikɛbuamɔ yɛ haomɔ be mli. Lɛlɛŋ, eyɛ ŋmɔlɔ akɛ eeebi ni Nyɔŋmɔ abu ehe kɛjɛ tsɔsemɔ ni he hiaa lɛ lɛ he. Shi, ani gbekɛbii bibii ni leee nɔ̃ ko lɛ pɛ ji mɛi ni biɔ enɛ? Dabida. Israel maŋ muu lɛ tee nɔ amɛfee nakai nɔŋŋ shii abɔ,‘ titri yɛ Kojolɔi lɛ agbii lɛ amli. Kɛji akɛ atee nɔ akɛ toigbalamɔ ni sa amɛ lɛ ha amɛ lɛ, amɛsɔleɔ amɛhaa Nyɔŋmɔ koni ejie amɛ kɛjɛ mli.—Koj. 2:11-18; 4:1-3, 23, 24; 10:6-16; 11:32, 33.
3 Nikasemɔ ko yɛ enɛ mli kɛha fɔlɔi ni ji Kristofoi fɛɛ. Jee shishi mra ni otɛo Nyɔŋmɔ mli hemɔkɛyeli owo obii lɛ amli. Ye obua amɛ ni amɛle ni amɛnu shishi akɛ Yehowa ji gbɔmɔ diɛŋtsɛ ni boɔ sɔlemɔi atoi ni ehaa hetoo. Gbekɛbii ni aaatsɔɔ amɛ sɔlemɔ kɛjɛ amɛ abifaobiaŋ lɛ baaye abua amɛ ni amɛtsɔmɔ mɛi ni sheɔ Nyɔŋmɔ gbeyei kɛ́ amɛdara kɛshɛ afii ni amɛbaabu amɛdiɛŋtsɛ amɛhe akɔntaa amɛha Nyɔŋmɔ Iɛ mli.—Okɛto Lala 22:9, 10; Abɛi 22:6; 2 Timoteo 3:14, 15 he.
Nɔ Hewɔ Ni Esa Akɛ Osusu Osɔlemɔi Ahe
4, 5. (a) Mɛɛ sanebimɔi ni kɔɔ sɔlemɔ he ebaahi jogbaŋŋ akɛ wɔɔɔbi wɔdiɛŋtsɛ wɔ he? (b) Mɛni hewɔ sanebimɔi nɛɛ sa jogbaŋŋ yɛ nɛkɛ be nɛɛ mli lɛ?
4 Mɛni ji nɔ ni sɔlemɔ tsuɔ yɛ oshihilɛ mli? Shii enyiɛ osɔleɔ? Ani onaa akɛ obɛ deka kwraa kɛha sɔlemɔi Aloo, ekolɛ okɛ oyaiyeli sɔleɔ tamɔ tsɔne ko, akɛ nitsumɔ ko ni osumɔɔɔ ni ka onɔ ni esa akɛ otsu he nii? Te osɔlemɔi lɛ hi ha tɛɛŋ?
5 Nɛkɛ sanebimɔi ni kanyaa mɔ jwɛŋmɔ nɛɛ sa yɛ be nɛɛ mli. Mɛi komɛi yɛ gbɔmɛi ni tsɛɔ amɛhe akɛ Yehowa tsuji lɛ ateŋ po ni jeee daa amɛsɔleɔ. Mɛi komɛi nuɔ he akɛ shishinumɔ ko bɛ amɛsɔlemɔi lɛ amli ni nɔ ko pɔtɛɛ hu bɛ mli. Enɛ ji nɔ ko ni Kristofonyo lɛ ebuŋ akɛ nɔ̃ flɛflɛ, ejaakɛ bɔni esɔlemɔi lɛ ji ha lɛ tsɔɔ nɔ̃ mumɔŋ shihilɛ mli ni eyɔɔ. Mɔ ko mumɔŋ hewalɛnamɔ damɔ emumɔŋ nibii ni he hiaa lɛ lɛ ahe ni esusuɔ kɛ nɔ̃ ni efeɔ yɛ he lɛ nɔ titri. (Mat; 5:8) Yɛ nakai beaŋ nɔŋŋ lɛ kɛji akɛ esusu bɔni esɔlemɔi lɛ hilɛ yɔɔ lɛ he lɛ, mɔ lɛ baanyɛ aha bɔni emumɔŋ shihilɛ yɔɔ lɛ aya hiɛ.
Nɔ Hewɔ Ni Wɔbaanyɛ Wɔba Yehowa Ŋɔɔ Yɛ Hekɛnɔfɔɔ Mli
6. Yɛ nɔni Biblia lɛ kɛɔ yɛ Lala 65:2, Filipibii 4:6 kɛ 1 Tesalonikabii 5:17 hewɔ lɛ, mɛni hewɔ wɔbaanyɛ wɔsɔle wɔha Nyɔŋmɔ kɛ hekɛnɔfɔɔ lɛ?
6 Mɛni hewɔ wɔbaanyɛ wɔba Yehowa ŋɔɔ yɛ hekɛnɔfɔɔ mli, ni wɔkpa gbɛ akɛ ebaabo wɔsɔlemɔi atoi? Klɛŋklɛŋ kwraa lɛ, ejieɔ ehe kpo atsɔɔ akɛ “sɔlemɔi a-Toibolɔ” ni eyaa nɔ efãa wɔ ye be fɛɛ mli akɛ wɔsɔle (Lala 65:2, NW) Famɔi ni tamɔ nɛkɛ yɔɔ e-Wiemɔ lɛ mli: “Nyɛshia kpe ni nyɛsɔlea, koni nyɛkabote kaa mli.” (Mat. 26:41) “Nyɛsɔleɔ nyɛhaa nyɛhe.” (Yak. 5:16) “Nyɛhiɛa sɔlemɔ mli daa.” (Rom. 12:12) “Nyɛsɔlea ni nyɛkafɔa.” (1 Tes. 5:17) “Nyɛkahaoa yɛ nɔ ko nɔ ko he, shi moŋ, nɔ fɛɛ nɔ mli lɛ, nyɛkɛ sɔlemɔ kɛ faikpamɔ kɛ shidaa atsia nyɛtutɔmɔi lɛ ata yɛ Nyɔŋmɔ hiɛ.”—Fil. 4:6.
7. Mɛɛ hii komɛi fee nɔkwɛmɔ nɔ kpakpa yɛ sɔlemɔ mli?
7 Biblia lɛ kɛ nɔkwɛmɔ nii hu haa, ni ji, famɔi yɛ gbɛi sɔrɔtoi anɔ koni wɔsɔle. Nɔ ni eyi obɔ yɛ niŋmaa ni jɛ mumɔŋ nɛɛ mli, kɛjɛ 1 Mose kɛyashi Kpojiemɔ ji gbɔmɛi ni sɔleɔ ahe nɔkwɛmɔ nii.Wɔkaneɔ bɔni Abraham sɔle eha Yehowa. (1 Mose 12:8) Yesu Kristo tee nɔ esɔle be kɛ bei amli eha e-Tsɛ lɛ kɛjɛ be mli ni abaptisi lɛ yɛ Yordan aahu kɛyashi be mli ni etsotsoro sɛŋmɔtso nɔ. (Luka 3:21; 23:46) Bɔfo Paulo tsiɔ sɔlemɔ ta diɛŋtsɛ shii abɔ yɛ ewoji lɛ amli. Etiɔ mli ekɛɔ akɛ asɔle aha mɛi krokomɛi, awo hewalɛ yɛ sɔlemɔ he, aloo ebiɔ ni mɛi krokomɛi asɔle aha lɛ. (Fil. 1:9-11; Efe. 6:18, 19) Kpojiemɔ wolo ni bɔfo Yohane ŋma lɛ kɛ sɔlemɔi sɔrɔtoi enyɔ gbeɔ naa.—Kpoj. 22:20, 21.
8. Mɛɛ sane ko ni ka shi hewɔ ni wɔbaanyɛ wɔbɛŋkɛ Nyɔŋmɔ kɛ hekɛnɔfɔɔ lɛ?
8 Yiŋtoo ni ji enyɔ ni haa wɔnyɛɔ wɔkɛ hekɛnɔfɔɔ bɛŋkɛɔ Nyɔŋmɔ yɛ sɔlemɔ mli ji akɛ ekɔɔ egbɛi lɛ he. Nɔ ni fata enɛ he ji gbɛi ni ‘ehe akɛ “Sɔlemɔ Toibolɔ” lɛ. Agbɛnɛ hu, akɛni egbɛi lɛ kpɛtɛ ewebii ahe hewɔ lɛ, odaseyeli ko ni aaatsɔɔ akɛ eekwa amɛ lɛ baaha mɛi ni naa lɛ atsɔɔ shishi yɛ gbɛ ni ejaaa nɔ akɛ Yehowa, nyɛɛɛ aye abua etsuji ni amɛdu gbɛ lɛ. Enɛ kɛ ahorabɔɔ baaba egbɛi lɛ nɔ. No hewɔ lɛ wɔkaneɔ yɛ Luka 79:9 akɛ: “Ye Obua wɔ, wɔyiwalaheremɔ Nyɔŋmɔ, yɛ ogbɛi lɛ hiɛnyam hewɔ, ni ojie wɔ ni otsumɔ wɔ he eshai lɛ yɛ ogbɛi lɛ hewɔ.” Mose, Yoshua, David kɛ Hezekia fɛɛ sɔle nakai nɔŋŋ. (2 Mose 32:11, 12; Yos. 7:8, 9; 2 Maŋts. 19:15-19; Lala 25:11) Ní gbalɔ Daniel kɛ wiemɔi nɛɛ kpa fai: ‘Oo Yehowa, bo toi ni ofee. Kaashashao shi kwraa, ejaakɛ akɛ ogbɛi ewo omaŋ kɛ omaŋbii lɛ.’ (Dan. 9:19) Hɛɛ, kɛji akɛ Yehowa gbɛi lɛ ka Wɔnɔ lɛlɛŋ lɛ, wɔbaanyɛ wɔdamɔ no nɔ wɔkpa fai nakai.
9. Mɛni hewɔ wɔbaanyɛ wɔkpa Nyɔŋmɔ fai yɛ hekɛnɔfɔɔ mli ni ena wɔ mɔbɔ ni ekɛ wɔhe eshai akɛ wɔ?
9 Yiŋtoo ni ji etɛ hewɔ ni wɔkpaa Yehowa gbɛ akɛ eeebo wɔsɔlemɔi atoi ji akɛ ele wɔfatɔi ni eesumɔ ni eye ebua wɔ. Lalatsɛ David wie lɛ nɛkɛ, akɛ: “Bɔni boka kɛ anai teŋ jɛkɛ lɛ, nakai ehaa wɔ kɛ wɔnɔtɔmɔi lɛ ateŋ jɛkɛɔ. Bɔ ni tsɛ musuŋtsɔɔ lɛ yɛ ebii ahe lɛ, nakai Yehowa musuŋ tsɔɔ lɛ yɛ mɛi ni sheɔ lɛ lɛ ahe. Ejaakɛ ele wɔ su kɛ baŋ, ekaiɔ akɛ su kɛkɛ ji wɔ.” (Lala 103:12-14; kwɛmɔ 51:5 hu) No hewɔ lɛ, kɛji akɛ tɔmɔ ko banina wɔ ni wɔfee wɔsaji basaa aloo wɔtɔ tɔmɔ ko ni mliwa lɛ, wɔbaanyɛ wɔdamɔ wɔfatɔi kɛ emuu ni wɔyeee lɛ nɔ wɔkpa Yehowa Nyɔŋmɔ fai.
10. Taakɛ afee he nɔkwɛmɔ nɔ yɛ Hiob kɛ Paulo kɛ mɛi krokomɛi asaji lɛ amli Iɛ, mɛni hewɔ wɔbaanyɛ wɔbɛŋkɛ Nyɔŋmɔ kɛ hekɛnɔfɔɔ?
10 Yiŋtoo kroko ni tsii waa ni haa wɔnyɛɔ wɔbaa Yehowa ŋɔɔ yɛ hekɛnɔfɔɔ mli ji akɛ ebaadamɔ emuuyeli-mlihiɛlɔi ni wɔji lɛ nɔ ebo wɔsɔlemɔi atoi. Hiob sɔle fɛfɛo yɛ enɛ he akɛ: “No lɛ Nyɔŋmɔ aŋmɛ mi yɛ jalɛ nseni mli,ni ena akɛ kpa ko bɛ mihe!” (Hiob 31:6) Nakai nɔŋŋ hu Paulo kɛɛ nanemɛi heyelilɔi lɛ akɛ: “Nyɛsɔlea nyɛhaa wɔ; ejaakɛ wɔhiɛ ka nɔ akɛ wɔyɛ henilee kpakpa, ni wɔmiitao akɛ wɔba wɔjeŋ fɛfɛo yɛ nii fɛɛ mli.” (Heb. 13:18) Ákɛ esa ni wɔfee mɛi ni ja yɛ Nyɔŋmɔ hiɛ lɛ hu jeɔ kpo yɛ nɔ ni Yohane ŋma lɛ mli: “Suɔmɔmɛi, kɛji wɔtsui ebuuu wɔ fɔ lɛ, wɔyɛ ekaa yɛ Nyɔŋmɔ hiɛ, ni nɔ fɛɛ nɔ ni wɔbaa lɛ, wɔnaa yɛ edɛŋ, ejaakɛ ekitai lɛ wɔyeɔ nɔ, ni wɔfeɔ nii ni sa ehiɛ.”—Yoh. 3: 21, 22.
Nyɛsɔlea Kɛtsɔa Yesu Kristo Nɔ Shi Jeee Kɛmiiha Lɛ
11. Namɔ pɛ wɔbaanyɛ wɔtsɔ enɔ wɔbɛŋkɛ Nyɔŋmɔ yɛ sɔlemɔ mli?
11 Mɛɛ gbɛ nɔ wɔɔnyɛ wɔtsɔ wɔbɛŋkɛ “sɔlemɔ Toibolɔ” kpeteŋkpele lɛ? Efa akɛ esa ni afee enɛ kɛtsɔ Yesu Kristo pɛ nɔ. Teŋdamɔlɔ kome pɛ ka Nyɔŋmɔ kɛ gbɔmɛi ateŋ, kɛ Osɔfo Nukpa kome, Yesu Kristo. (1 Tim. 2:5; Heb. 7:25, 26) Yesu diɛŋtsɛ wie enɛ yɛ faŋŋ mli akɛ: “Mɔ ko baaa tsɛ lɛ ŋɔɔ akɛ ja etsɔ minɔ.” (Yoh. 14: 6) “Nɔ fɛɛ nɔ he fai ni nyɛaakpa tsɛ lɛ yɛ migbɛi anɔ lɛ, eeeha nyɛ. . . . Nyɛkpaa fai, ni nyɛaana, ni nyɛmiishɛɛ lɛ ayi.”—Yoh. 16:23, 24.
12, 13. (a) Yɛ nɔni bɔfo Yohane kɛ Stefano fee hewɔ lɛ, mɛɛ saji abaanyɛ abi? (b) Shi mɛni hewɔ ni enyɛŋ aŋɔ Stefano kɛ bɔfo Paulo nɔkwɛmɔnii Iɛ akɛ nɔni abaadamɔ nɔ ni asɔle aha Yesu tɛ̃ɛ?
12 Shi, mɛi komɛi susuɔ akɛ: ‘Ani wɔnyɛŋ wɔbi nɔ ko diɛŋtsɛ tɛ̃ɛ kɛjɛ Yesu ŋɔɔ? Ani kaselɔ Stefano sɔleee ehaaa Yesu diɛŋtsɛ, ni ani bɔfo Yohane diɛŋtsɛ efeee nakai?’ Eji anɔkwale, be mli ni Stefano baagbo pɛ kɛkɛ ni ekɛɛ akɛ: “Nuntsɔ Yesu, heremɔ mimumɔ lɛ.” (Bɔf. 7:59) Ní bɔfo Yohane sɔle akɛ: “Amen. . . . . Hɛɛ, ba, Nuntsɔ Yesu.”—Kpoj. 22:20,
13 Shi kɛlɛ ebaahi jogbaŋŋ akɛ wɔɔɔsusu shihilɛ ni ha ebalɛ nakai lɛ ahe. Akɛ nɔkwɛmɔ nɔ lɛ, Stefano na ninaa, ejaakɛ ekɛɛ akɛ: “Naa, miina ŋwɛi naaa ni egbele, kɛ gbɔmɔ ‘bi lɛ ni edamɔ Nyɔŋmɔ ninejurɔ nɔ.” No hewɔ Iɛ akɛni ena Yesu yɛ ninaa mli hewɔ lɛ, Stefano baanyɛ ewie atsɔɔ Nyɔŋmɔ bi lɛ tɛ̃ɛ. (Bɔf. 7:56) Bɔfo Yohane hu na ŋwɛi nibii ahe ninaa. (Kpoj. 1:1, 10; 4:1, 2) Be mli ni enaa ninaa nɛɛ, bɔfo Yohane na Yesu ni enu ni eekɛɛ akɛ: “Mɔ ni yeɔ nɛkɛ nii nɛɛ he odase lɛ miikɛɛ akɛ: Hɛɛ, miiba oya.” (Kpoj. 22: 20) No hewɔ lɛ Yohane hã nɔ̃ ni enu akɛ Yesu miikɛɛ lɛ hetoo. Abaanya akɛ shihilɛi ni tamɔ nɛkɛ lɛ ato nɔ ni ba yɛ be mli ni yiwalɔ Saul ni jɛ Tarso lɛ nyiɛ gbɛ kɛmiiya Damasko lɛ he. Yesu Kristo jie ehe kpo etsɔɔ Saul akɛ: “Saul, Saul, mɛɛ ba owaa mi yi?” Ní taakɛ eji anɔkwale yɛ bɔfo Yohane kɛ Stefano he lɛ, Saul ha Yesu hetoo tɛ̃ɛ akɛ: “Bo namɔ, Nuntsɔ?”—Bɔf. 9:4, 5.
Kɛ Bulɛ Ni Sa
14, 15. Kɛ̀ wɔmiisɔle lɛ, mɛni esa akɛ wɔsubaŋ, wiemɔi kɛ gbee atsɔɔ, ni mɛni hewɔ?
14 Kɛ wɔmiibɛŋkɛ jeŋ muu fɛɛ Maŋtsɛ kpeteŋkpele lɛ yɛ sɔlemɔ mli lɛ, esa ni wɔba eŋɔɔ hu yɛ gbɛ ni sa nɔ. Wɔbaanyɛ wɔkɛ bulɛ kɛ woo ni fe fɛɛ kɛ heshibaa ni mlikwɔ pɛ abɛŋkɛ lɛ. Yɛ anɔkwale ni eji akɛ Nyɔŋmɔ Wiemɔ lɛ kɛɔ wɔ akɛ wɔbaanyɛ wɔkɛ “wiemɔ mli heyeli” aba Nyɔŋmɔ ŋɔɔ lɛ etsɔɔɔ akɛ belɛ wɔkɛ Bɔlɔ kpeteŋkpele lɛ baashwa ni wɔya ni wɔba ehiɛ bɔni wɔsumɔɔ (Heb. 4:16, NW; 1 Yoh. 3:21, 22) Kwɛ bɔni jwɛŋmɔ bɛ mli ni esaaa kwraa hu akɛ wɔɔɔje wɔsɔlemɔ shishi kɛ wiemɔ ko ni tamɔ nɛkɛ, akɛ, “Oshwiee, Yehowa” Wɔbaanyɛ wɔkɛ wiemɔ mli heyeli aba ehiɛ yɛ wɔhemɔkɛyeli kɛ hekɛnɔfɔɔ yɛ suɔmɔ ni E-sumɔɔ akɛ eeebo wɔ toi lɛ hewɔ, kɛ emuuyeli-mli-hiɛlɔi ni wɔji lɛ hewɔ. Shi esa akɛ wɔkɛ bulɛ ni mlikwɔ kɛ woo afee nakai—Okɛto Jajelɔ 5:1, 2 he.
15 Wɔhiɛ akakpa nɔ akɛ Yehowa kwɔ gojoo yɛ wɔyiteŋ shɔŋŋ. Akɛni shikpɔŋ nɔ gbɔmɛi ji wɔ, ni yɛ bɔni abɔ wɔ aha lɛ hewɔ lɛ, wɔbaa shi fe bɔfoi lɛ yɛ hewalɛ kɛ anumnyam mli. (Heb. 2:7) Agbɛnɛ hu, wɔji adesai eshafeelɔi ni yeee emuu. No hewɔ lɛ esa ni wɔkɛ wiemɔi kɛ gbee ni tsɔɔ akɛ wɔnuɔ wekukpaa ni ka wɔ kɛ Yehowa Nyɔŋmɔ teŋ lɛ shishi ni wɔle enɛ krɛdɛɛ hu atsu nii, ejaakɛ heshibalɔi pɛ eŋmɛɔ amɛ gbɛ ni amɛbaa ehiɛ, ‘mɛi ni he kpokpoɔ yɛ ewiemɔ lɛ naa.’ (Yes. 66:2) Kwɛ bɔni Yesu Kristo ma nɛkɛ Shishitoo mla nɛɛ nɔ mi jogbaŋŋ ha yɛ ebɛbua ni ‘kɔɔ hii enyɔ ni tee Yerusalem sɔlemɔwe lɛ akɛ amɛmiiya sɔlemɔ lɛ he! Yehowa Nyɔŋmɔ booo Farisifonyo henɔwolɔ ni buɔ ehe jalɔ lɛ toi, shi ŋwanejee ko kwraa bɛ he akɛ ebo toohelɔ heshibalɔ ni tsui ekumɔ lɛ sɔlemɔ lɛ toi ni ehã hetoo.—Luka 18:9-14.
Yɛ Hemɔkɛyeli Mli Kɛ Hekamɔ
16. Mɛɛ ŋmalɛi tsɔɔ bɔni hemɔkɛyeli he hiaa ha yɛ sɔlemɔ mli?
16 Taomɔnii kroko ni he hiaa ni Yehowa abo mɔ ko toi ji ni mɔ lɛ aba eŋɔɔ yɛ hemɔkɛyeli mli. Atiɔ shihilɛ ni tamɔ nɛkɛ ni wɔɔɔna yɛ sɔlemɔ mli lɛ mli shii abɔ atsɔɔ wɔ yɛ Nyɔŋmɔ Wiemɔ lɛ mli. Yesu kɛɛ akɛ: “Kɛji nyɛyɛ hemɔkɛyeli ni tamɔ sinapiwu lɛ, . . . nɔ ko bɛ ni nyɛnyɛŋ nyɛfee.” (Mat. 17:20) Akɛɔ wɔ yɛ Hebribii 11:6 akɛ, kɛ wɔɔnyɛ wɔsa Nyɔŋmɔ hiɛ jogbaŋŋ lɛ, belɛ jeee hemɔkɛyeli akɛ eyɛ shihilɛ mli lɛ pɛ esa akɛ wɔna, shi moŋ akɛ, “eji mɛi ni taoɔ esɛɛgbɛ” lɛ anyɔmɔwolɔ. Kaselɔ Yakobo ŋma akɛ: “Nyɛyaa nɔ nyɛbia yɛ hemɔkɛyeli mli ni nyɛyiŋ akafee nyɛ kɔshikɔshi kwraa, ejaakɛ mɔ ni yiŋ feɔ lɛ kɔshikɔshi lɛ” nine shɛŋ “nɔ ko nɔ ko nɔ kɛjɛŋ Yehowa dɛŋ.”—Yak. 1:6, 7, NW.
17. Mɛɛ ŋaawoo Ŋmalɛi lɛ kɛhaa yɛ hekamɔ ni wɔkɛ aaawo sɔlemɔ mli lɛ he?
17 Beni afee ni aha wɔfaikpamɔi lɛ ahetoo lɛ, esa akɛ wɔka sɔlemɔ he hu. Esa akɛ wɔsumɔ akɛ wɔkɛ sɔlemɔ aaafee wɔsubaŋ. Biblia lɛ woɔ wɔ ŋaa akɛ: “Nyɛkɛ Shiŋŋ feemɔ ahiɛa subaŋ ni nyɛhiɛ yɛ sɔlemɔhe lɛ mli.” (Rom. 12:12, The New Testament ni Modern English J. B. Philips) Yesu ma sɔlemɔ ni tamɔ nɛkɛ lɛ nɔ mi yɛ bei babaoo mli. Yɛ e-Gɔŋ nɔ Shiɛmɔ lɛ mli lɛ ekɛɛ akɛ: “Nyɛyaa nɔ nyɛbia, ni akɛaahanyɛ; nyɛyaa nɔ nyɛtaoa, ni nyɛaana; nyɛyaa nɔ nyɛshia, ni aaagbele aha nyɛ.” (Mat. 7:7, NW) Yesu ma bɔni sɔlemɔ ni aaaka he afee lɛ he hiaa lɛ nɔ mi waa yɛ abɛbua ni kɔɔ okulafo ko ni kojolɔ ko ni sheee Nyɔŋmɔ gbeyei ni asaŋ ebuuu gbɔmɔ hu ye esane eha lɛ lɛ mli. (Luka 18:1-8) Kɛji akɛ nibii ni wɔbiɔ Yehowa Nyɔŋmɔ lɛ ahe miihia wɔ lɛlɛŋ lɛ, wɔbaaya nɔ ni ‘wɔkɛ hekamɔ asɔle’ ni ‘wɔsɔle daa.’—Rom. 12:12; 1 Tes. 5:17, NW.
18. Mɛni nibii esaaa akɛ wɔŋmɛɔ gbo koni nomɛi abafite be ni wɔɔɔna wɔkɛsɔle lɛ?
18 Nɔ ni bɛŋkɛ sɔlemɔ ni wɔkɛ hekamɔ aaafee lɛ he kpaakpa ji be ni aaaŋɔ ni akɛsɔle. Esaaa akɛ wɔfeɔ mɛi ni bɛ deka kwraa ni amɛkɛsɔleɔ. Eji anɔkwale akɛ shihilɛ mli nibii ni he hiaa lɛ yɛ—wɔ daa gbi nitsumɔ, niyeli, hesaamɔ, wɔɔ—ŋɔɔ wɔ gbi ni feɔ ŋmlɛtswaa 24 lɛ mli nɔ ni fa titri. Shi ani nibii sɔrɔtoi babaoo hu bɛ ni heɔ wɔ be fe bɔni esa akɛ efee? Nibii ni baafata enɛɛmɛi ahe ji adafitswaa woji akanemɔ, television kwɛmɔ, kpɔiaŋ-gbɔlemɔ mli nitsumɔi ni wɔkɛ wɔbe aaawo mli kɛ hiɛtserɛjiemɔi kɛ hejɔɔmɔi sɔrɔtoi. Kɛji akɛ wɔhiɛ esɔɔɔ hegbɛ ni jara wa ni sɔlemɔ ji lɛ yɛ anɔkwale mli lɛ, wɔbaana wɔhe akɛ wɔmiiku wɔhiɛ wɔshwie nɔ, yɛ nibii ni wɔtsi ta ni heɔ wɔ be ni wɔkɛ aaasɔle lɛ hewɔ.
Bei Amli Ni Wɔɔɔnyɛ Wɔsɔle
19. Mɛɛ bei sɔrɔtoi babaoo wɔyɔɔ ni wɔbaanyɛ wɔkɛsɔle?
19 Be aloo hegbɛi ni wɔyɔɔ kɛha sɔlemɔ lɛ fa babaoo diɛŋtsɛ. Ni ‘wɔɔɔsɔle ni wɔkpaaa’ lɛ kɔɔ sɔlemɔ ni wɔɔɔsɔle yɛ be fɛɛ mli lɛ he—be mli ni wɔte shi leebi, be mli ni wɔbaawɔ yɛ gbɛkɛ mli, be mli ni wɔbaaye nii kɛ be mli ni wɔhiɛ ka yɛ gbɛkɛ. (Kwɛmɔ Lala 5:3; 92: 1, 2; 119:147-149, 164; 1 Timoteo 4:4, 5.) Wɔbaanyɛ wɔkɛ naagbai ni mli wawai akpe aloo haomɔ be ni ebaabi ni wɔtsu gbɛnaanii ni tsiitsii ahe nii; abaanyɛ afɔ nine atsɛ wɔ ni wɔbaawie yɛ Kristofoi esafo ko hiɛ, aloo ni wɔfa wɔhemɔkɛyeli lɛ he yɛ nɔyeli lɛ mli onukpai ahiɛ. Yɛ anɔkwale mli lɛ, bei ni wɔkɛ nibii ni he hiaa wɔ lɛ aaafɔ Yehowa hiɛ lɛ nɛ. Hɛɛ, “kaimɔ lɛ [Nyɔŋmɔ] yɛ ogbɛi fɛɛ mli, ni lɛ eeejaje otɛmpɔŋi lɛ.” (Abɛi 3:6) Agbɛnɛ nu, kɛji akɛ wɔnine shɛ jɔɔmɔi krɛdɛɛi komɛi anɔ lɛ, titri kɛji akɛ wɔkpaaa gbɛ, aloo nɔ ko ni wɔsumɔɔ jogbaŋŋ lɛ, esa akɛ wɔtsuii anya yɛ wɔ wɔmli ni wɔda Yehowa shi. Shi, yiŋtooi krɛdɛɛi komɛi ahe ehiaaa wɔ dã. Wɔtsuii kɛ wɔjwɛŋmɔi baanyɛ atsirɛ wɔ ni wɔda shi yɛ bei krokomɛi fɛɛ mli.
20. Mɛni abaanyɛ akɛɛ yɛ bɔni wɔfeɔ wɔgbɔmɔtsei wɔhaa yɛ sɔlemɔ mli Iɛ he?
20 Akɛni be fɛɛ sa jogbaŋŋ kɛha sɔlemɔ hewɔ lɛ, ani no tsɔɔ akɛ ehe ehiaaa ni wɔsusu bɔni wɔfeɔ wɔgbɔmɔtsei yɛ be mli ni wɔmiisɔle lɛ he? Yɛ anɔkwale mli lɛ Biblia lɛ etsɔɔɔ bɔni esa akɛ wɔfee gbɔmɔtso lɛ wɔha lɛ mli, tamɔ akɛ, shi ni akulaa kɛ nine ni ekotaa aloo adɔrɔɔ yɛ be mli ni aasɔle. Shi wɔkaneɔ gbɔmɛi ni sɔle yɛ be mli ni amɛdamɔ shi, ámɛkulashi aloo amɛkɛ amɛhiɛ ebumɔshi, kɛ nijii ni áhole nɔ kɛ sɔlemɔ lɛ ahe sane. (Kwɛmɔ 1 Mose 24:26, 48; 1 Maŋts. 8:22, 42, 44, 54; Nehemia 2:1-4; Marko 11:25.) Enɛ baatsɔɔ akɛ kɛ aaahi lɛ, esa jogbaŋŋ akɛ mɔ ko aaasaa egbɔmɔtso yɛ gbɛ ni bulɛ yɔɔ mli nɔ koni esɔle. Ákɛ nɔkwɛmɔ nɔ lɛ, yɛ asafoŋ kpelei ashishi lɛ, wɔbaanyɛ wɔte shi ni wɔmamɔ wɔyitsei ashi. Gbɔmɔtso mli tsakemɔ kɛ shidaamɔ ni tamɔ nɛkɛ lɛ baaye abua wɔ beni afee ni wɔsusu sɔlemɔ ni yaa nɔ yɛ wɔfɛɛ wɔ hewɔ lɛ he. Etamɔ nɔ ni shikulamɔ yɛ nɔkɔtsei anaa lɛ hi jogbaŋŋ kɛ́ mɔ ko miisɔle yɛ teemɔŋ. (Okɛto Daniel 6:10; Filipibii 2:9, 10 he.) Kɛji akɛ wɔkã saatso nɔ po ni wɔmiisɔle dani wɔwɔ lɛ, esa akɛ wɔkwɛ jogbaŋŋ ni wɔbo bɔfoi afamɔ nɛɛ toi akɛ ‘nyɛsɔlea daa,’ nyɛhiɛ akaa shi, nyɛsraa yɛ bo mli ni nyɛmiisɔle lɛ —Efe. 6:18.
21. Beni afee ni wɔba Nyɔŋmɔ ŋɔɔ ni ebo wɔ toi lɛ, mɛɛ gbɛ nɔ esa akɔ wɔtsɔ wɔsɔle?
21 Lɛlɛŋ, Yehowa Nyɔŋmɔ ni wɔɔsɔle wɔha Jɛ ji nɔ ko ni esa akɛ wɔkɛ hiɛdɔɔ afee. Eŋɔɔ wɔnaa ni wɔdaa shi hu akɛ wɔɔɔnyɛ wɔbɛŋkɛ wɔ ŋwɛi Tsɛ lɛ kɛ hekɛnɔfɔɔ akɛ ebaabo wɔ toi yɛ be fɛɛ mli! Shi moŋ, enɛ damɔ eŋɔɔ ni wɔɔɔba yɛ hemɔkɛyeli mli lɛ nɔ, kɛtsɔ gbɛ ni ja lɛ nɔ, kɛ jwɛŋmɔ ni sa, koni agbɛnɛ wɔkã sɔlemɔ lɛ he, wɔkafee mɛi ni bɛ deka akɛ wɔɔɔsɔle. Ní kɛ́ oyɛ bii lɛ, okɛ tsuishitoo atsɔɔ amɛ bɔni sɔlemɔ he hiaa ha lɛ, kɛtsɔ famɔ kɛ nɔkwɛmɔ fɛfɛo nɔ.
[Shishigbɛ niŋmai]
a Ajie kɛjɛ June 1, 1980 Blɔfo Buu-Mɔɔ lɛ mli.
[Akrabatsa ni yɔɔ baafa 8]
“Kuu osɛɛ, Yehowa, mɛɛ beyinɔ nɔŋŋ ni? Ni oha otsuji lɛ onii afeo mɔbɔ.Ha wɔtɔrɔ lebi kɛ omɔbɔnalɛ lɛ, koni wɔnya ni wɔmii oshɛ wɔhe yɛ wɔgbii Iɛ fɛɛ mli. Ha otsuji lɛ ona onitsumɔi lɛ, ni amɛbii hu ana onumnyam lɛ!”—Lala 90:13-16.