Yitso Nyɔŋmai Enyɔ Kɛ Kpaanyɔ
La Kɛha Jeŋmaji Lɛ
1, 2. Mɛni hewɔ la he hiaa lɛ, ni mɛɛ duŋ eha shikpɔŋ lɛ nɔ ŋmɛnɛ?
YEHOWA ji la Jɛɛhe, “mɔ ni fee hulu ní ekpɛ́ shwane, ní ewo nyɔɔŋtsere kɛ ŋulamii akpɔi ní amɛkpɛ́ nyɔɔŋ” lɛ. (Yeremia 31:35) Yɛ enɛ pɛ hewɔ lɛ, esa akɛ akpɛlɛ enɔ akɛ wala Jɛɛhe, ejaakɛ la tsɔɔ wala. Eji shikpɔŋ lɛ naaa dɔlɛ kɛ la kɛjɛɛɛ hulu lɛ mli kulɛ, wala, taakɛ wɔle lɛ wɔha lɛ, nyɛŋ ahi shi kɔkɔɔkɔ. Kulɛ ehiŋ wɔ shibɔlemɔ ŋulami nɛɛ nɔ hilɛ.
2 No hewɔ lɛ, eji sane ní he hiaa wɔ waa diɛŋtsɛ, ákɛ beni Yehowa susuɔ wɔbe nɛɛ he kɛtsɔɔ hiɛ lɛ, egba duŋ be efɔ̃ shi, shi jeee la. Yesaia jɛ mumɔŋ eŋma akɛ: “Naa, duŋ hà shikpɔŋ lɛ nɔ, ni duŋ kpii hà majimaji lɛ anɔ.” (Yesaia 60:2) Yɛ anɔkwale mli lɛ, nɛkɛ wiemɔi nɛɛ kɔɔ mumɔŋ duŋ he, shi jeee duŋ diɛŋtsɛ he, shi esaaa akɛ abuɔ hiɛdɔɔ ní yɔɔ he lɛ akɛ sane ní he ehiaaa. Yɛ naagbee lɛ, mɛi ní bɛ mumɔŋ la lɛ nyɛɛɛ ahi wala mli, tamɔ bɔ ni eji yɛ mɛi ní naaa la kɛjɛɛɛ hulu lɛ mli lɛ agbɛfaŋ lɛ pɛpɛɛpɛ.
3. Nɛgbɛ wɔbaanyɛ wɔtsɔ wɔhe kɛya kɛha la, yɛ duŋ be nɛɛ mli?
3 Wɔnyɛŋ wɔku wɔhiɛ wɔfɔ̃ mumɔŋ la ní Yehowa haa wɔnine shɛɔ nɔ yɛ duŋ be ní ji be fɔŋ nɛɛ mli lɛ nɔ. Ehe miihia ní wɔkɛ wɔhiɛ afɔ̃ Nyɔŋmɔ Wiemɔ lɛ nɔ koni eha la akpɛ́ wɔ tempɔŋ nɔ, ní kɛ́ eeehi lɛ, wɔkane Biblia lɛ daa gbi. (Lala 119:105) Kristofoi akpeei haa wɔnáa hegbɛi ni wɔkɛwoɔ wɔhe hewalɛ koni wɔya nɔ wɔnyiɛ “jalɔi atempɔŋ lɛ” nɔ. (Abɛi 4:18; Hebribii 10:23-25) Hewalɛ ní wɔnáa kɛjɛɔ Biblia kasemɔ ní hiɛdɔɔ yɔɔ mli kɛ Kristofoi anaanyobɔɔ kpakpa mli lɛ yeɔ ebuaa wɔ ni wɔtsiɔ wɔhe kɛjɛɔ mi ní “naagbee gbii” nɛɛ amli duŋ be fɔŋ, ní baaba naagbee yɛ “Yehowa mlifu gbi” kpeteŋkpele lɛ nɔ lɛ aaami wɔ lɛ he. (2 Timoteo 3:1; Zefania 2:3) Nakai gbi lɛ miiba oyayaayai! Ebaaba tamɔ bɔ ni gbi ko ní tamɔ nakai ba blema Yerusalem maŋ lɛ mli bii anɔ lɛ pɛpɛɛpɛ.
Yehowa ‘Baakojo’
4, 5. (a) Yehowa te shi ewo Yerusalem yɛ mɛɛ gbɛ nɔ? (b) Mɛni hewɔ wɔbaanyɛ wɔmu sane naa akɛ mɛi fioo ko pɛ yi baaná wala kɛfo Yerusalem hiɛkpatamɔ lɛ yɛ afi 607 D.Ŋ.B. lɛ? (Kwɛmɔ shishigbɛ niŋmaa lɛ.)
4 Yehowa tsɔɔ nibii ní baatsɔ emlifu gbi lɛ hiɛ lɛ amli kɛ wiemɔi ní mli kã shi faŋŋ, yɛ Yesaia gbalɛ ní yɔɔ miishɛɛ lɛ naagbee kukuji lɛ amli. Wɔkaneɔ akɛ: “Yehowa kɛ la baaba, ni eshwiilii lɛ aaatamɔ lasuogbele, ni ekɛ emlifu lɛ aaawo nyɔmɔ kɛ mlila, ni ekɛ lalilɛii aaakã mɛi. Ejaakɛ la Yehowa kɛbaakojo, ni ekɛ klante hu aaakojo heloo fɛɛ, ni mɛi ní Yehowa aaagbe lɛ ayi aaafá babaoo.”—Yesaia 66:15,16.
5 Esa akɛ nakai wiemɔi lɛ aye abua Yesaia yinɔbii lɛ ní amɛyoo hiɛdɔɔ ní yɔɔ amɛshihilɛ lɛ he. Be ko baashɛ ni Babilonbii lɛ baaba amɛbatutua Yerusalem ákɛ Yehowa oblafoi, ni amɛshwiilii lɛ baawo mulu babaoo tamɔ lasuogbele. Mɛɛ nifeemɔ ní yɔɔ gbeyei waa po ebaaji nɛkɛ! Yehowa kɛ maŋ tutualɔi lɛ baatsu nii ni ekɛbaatsu lɛ diɛŋtsɛ ekojomɔi ní naa wa tamɔ la lɛ ahe nii eshi Yudafoi ní yeee anɔkwa lɛ ‘aheloo’ fɛɛ. Ebaafee tamɔ nɔ ni Yehowa diɛŋtsɛ miiwu kɛmiishi ewebii lɛ. Egbálaŋ “emlifu” lɛ sɛɛ. Yudafoi pii ahiɛ baakpata ákɛ “mɛi ní Yehowa aaagbe.” Gbalɛ nɛɛ ba mli yɛ afi 607 D.Ŋ.B.a
6. Mɛɛ nifeemɔi ní yɔɔ nyaŋemɔ tee nɔ yɛ Yuda?
6 Ani Yehowa yeɔ bem akɛ ‘eekojo’ eshi lɛ diɛŋtsɛ ewebii lɛ? Hɛɛ, eyeɔ bem! Wɔna shii abɔ yɛ Yesaia wolo lɛ mli saji ní wɔsusu he lɛ mli akɛ eyɛ mli akɛ Yudafoi lɛ ji gbɔmɛi ní ejɔɔ amɛhe nɔ amɛha Yehowa moŋ, shi amɛkɛ amɛhe wo apasa jamɔ mli vii—ni Yehowa ekuko ehiɛ efɔ̃ko amɛnifeemɔi lɛ anɔ. Wɔnaa enɛ shikome ekoŋŋ yɛ gbalɛ lɛ mli wiemɔi ní nyiɛ sɛɛ nɛɛ amli, akɛ: “Mɛi ní feɔ amɛhe krɔŋkrɔŋ, ní amɛtsuuɔ amɛhe amɛhaa tromii amli yaa, ní amɛnyiɛɔ mɔ kome ní yɔɔ amɛteŋ lɛ sɛɛ, ní amɛyeɔ kpolotoo loo kɛ nihii nii kɛ kwakwe lɛ: aaaloo amɛ fɛɛ tswɛ̃m kɛaatee! Yehowa kɛɛ.” (Yesaia 66:17) Ani nakai Yudafoi lɛ ‘miifee amɛhe krɔŋkrɔŋ ni amɛmiitsuu amɛhe’ koni amɛkɛsaa amɛhe kɛha jamɔ krɔŋŋ? Eka shi faŋŋ akɛ dabi. Shi moŋ, amɛkɛ amɛhe miiwo wɔŋjalɔi ahetsuumɔ kusumii amli yɛ tromii krɛdɛɛi amli. Yɛ no sɛɛ lɛ, amɛkɛ fufeemɔ yeɔ kpolotoo kɛ bɔɔ nii krokomɛi ní abuɔ akɛ amɛhe tseee yɛ Mose Mla lɛ shishi lɛ aloo.—3 Mose 11:7, 21-23.
7. Kristendom tamɔ Yuda wɔŋjalɔi amaŋ lɛ pɛpɛɛpɛ yɛ mɛɛ gbɛ nɔ?
7 Kwɛ shihilɛ ní yɔɔ nyaŋemɔ ní enɛ ji kɛha maŋ ní kɛ anɔkwa Nyɔŋmɔ kome lɛ yɔɔ kpaŋmɔ wekukpaa mli lɛ! Shi susumɔ enɛ he okwɛ: Shihilɛ ní yɔɔ nyaŋemɔ tamɔ nakai nɔŋŋ miiya nɔ yɛ Kristendom jamɔi lɛ ateŋ ŋmɛnɛ. Amɛ hu amɛkɛɔ akɛ amɛsɔmɔɔ Nyɔŋmɔ, ni amɛ hiɛnyiɛlɔi lɛ ateŋ mɛi babaoo kwaa amɛfeɔ amɛhe Nyɔŋmɔ gbeyeishelɔi. Ni kɛlɛ, amɛkɛ wɔŋjalɔi atsɔɔmɔi kɛ blema saji buleɔ amɛhe, ni amɛkɛjieɔ amɛhe kpo akɛ amɛyɛ mumɔŋ duŋ mli. Kwɛ bɔ ni nakai duŋ lɛ ewo kpii diɛŋtsɛ!—Mateo 6:23; Yohane 3:19, 20.
‘Amɛbaana Minunyam Lɛ’
8. (a) Mɛni baaba Yuda kɛ Kristendom fɛɛ nɔ? (b) Jeŋmaji lɛ ‘baana Yehowa anunyam lɛ’ yɛ mɛɛ shishinumɔ naa?
8 Ani Yehowa miina Kristendom nifeemɔi ní yɔɔ nyaŋemɔ kɛ epasa tsɔɔmɔi lɛ? Kanemɔ Yehowa wiemɔi ní nyiɛ sɛɛ lɛ, taakɛ Yesaia ŋmala eshwie shi lɛ, ní okwɛ akɛ te obaamu saji anaa oha tɛŋŋ: “Ejaakɛ mile amɛnitsumɔi kɛ amɛjwɛŋmɔi lɛ. Ni be aaaba ní mabua jeŋmaji kɛ lilɛii fɛɛ anaa, ni amɛaaba amɛbana minunyam lɛ.” (Yesaia 66:18) Yehowa le, ni efee klalo akɛ jeee mɛi ní kɛɔ akɛ etsuji ji amɛ lɛ anitsumɔi lɛ pɛ ebaakojo, shi moŋ ebaakojo amɛsusumɔi hu. Yuda kɛɔ akɛ eheɔ Yehowa eyeɔ, shi ewɔŋjamɔ nitsumɔi kɛ wɔŋjalɔi anifeemɔi lɛ haa nakai wiemɔ ní ewieɔ lɛ feɔ amale. Yakatswaa emli bii lɛ ‘tsuuɔ’ amɛhe yɛ wɔŋjamɔ kusum nifeemɔi anaa lɛ. Abaakpata maŋ lɛ hiɛ kwraa, ni beni enɛ baaba mli lɛ, ebaaba yɛ wɔŋjalɔi amaji krokomɛi ní ebɔle lɛ lɛ ahiɛ kpetekplee. Mɛnɛɛmɛi ‘baana Yehowa anunyam lɛ,’ kɛ shishinumɔ akɛ amɛbaaye nibii ní baaba lɛ ahe odase, ni no baanyɛ amɛnɔ ní amɛkpɛlɛ nɔ akɛ Yehowa wiemɔ eba mli anɔkwale. Te enɛɛmɛi fɛɛ kɔɔ Kristendom he ehaa tɛŋŋ? Kɛ́ ekɛ enaagbee kpe lɛ, abaanyɛ etsutsu nanemɛi kɛ nitsumɔ mli hefatalɔi lɛ ateŋ mɛi pii anɔ ni amɛbaadamɔ sɛɛ fɛlɛŋŋ ni amɛbaakwɛ bɔ ni Yehowa wiemɔ baa mli lɛ ní amɛnyɛɛɛ nɔ ko amɛfee yɛ he.—Yeremia 25:31-33; Kpojiemɔ 17:15-18; 18:9-19.
9. Mɛɛ sanekpakpa ko Yehowa jaje?
9 Ani Yerusalem hiɛkpatamɔ ní ba yɛ afi 607 D.Ŋ.B. lɛ tsɔɔ akɛ Yehowa náŋ odasefoi yɛ shikpɔŋ nɔ dɔŋŋ? Dabi. Emuuyeli mlihiɛlɔi ní sa kadimɔ waa, tamɔ Daniel kɛ enanemɛi etɛ lɛ, baaya nɔ amɛsɔmɔ Yehowa ákɛ nomii po yɛ Babilon. (Daniel 1:6, 7) Hɛɛ, Yehowa odasefoi anɔkwafoi akuu lɛ fɛɛ baaya nɔ amɛhi shi nakai nɔŋŋ, ni yɛ afii 70 lɛ naagbee lɛ, hii kɛ yei anɔkwafoi lɛ baashi Babilon ni amɛbaaku amɛsɛɛ kɛya Yuda koni amɛyato jamɔ krɔŋŋ shishi ekoŋŋ yɛ jɛmɛ. Bɔ ni Yehowa tee nɔ ewie yɛ he nɛ: “Mikɛ okadi ko aaato amɛhe, ni matsu amɛteŋ mɛi ní eje mli lɛ kɛaatee jeŋmaji lɛ aŋɔɔ: kɛaatee Tarshish, Pul kɛ Lud, gãitsɛ̃lɔi lɛ, kɛ Tubal kɛ Yavan, ŋshɔkpɔi ní yɔɔ shɔŋŋ ní nuko mihe ní amɛnako minunyam lɛ aŋɔɔ; ni amɛaajaje minunyam lɛ amɛtsɔɔ yɛ jeŋmaji lɛ ateŋ.”—Yesaia 66:19.
10. (a) Yudafoi anɔkwafoi ní akpɔ̃ amɛ kɛjɛ Babilon lɛ baasɔmɔ akɛ okadi yɛ mɛɛ shishinumɔ naa? (b) Namɛi sɔmɔɔ akɛ okadi ŋmɛnɛ?
10 Hii kɛ yei anɔkwafoi babaoo ní ku amɛsɛɛ kɛtee Yerusalem yɛ afi 537 D.Ŋ.B. lɛ baasɔmɔ akɛ okadi ko ní yɔɔ naakpɛɛ, odaseyeli ní tsɔɔ akɛ Yehowa ekpɔ̃ ewebii lɛ. Kulɛ namɔ baanyɛ asusu he po akɛ gbi ko lɛ, Yudafoi nomii lɛ baaye amɛhe koni amɛdi jamɔ krɔŋŋ sɛɛ yɛ Yehowa sɔlemɔwe lɛ? Mɛi ní sɔmɔ akɛ “okadii kɛ naakpɛɛ nii” yɛ gbɛ ní tamɔ nakai nɔŋŋ nɔ yɛ klɛŋklɛŋ afii oha lɛ mli ji Kristofoi ní afɔ amɛ mu lɛ, mɛi ní heshibalɔi ní taoɔ ní amɛsɔmɔ Yehowa lɛ kéɔ yuu kɛbafataa amɛhe lɛ. (Yesaia 8:18; Hebribii 2:13) Ŋmɛnɛ, Kristofoi ní afɔ amɛ mu lɛ, ní miishwere yɛ amɛshikpɔŋ ní akɛ amɛ eba nɔ ekoŋŋ lɛ nɔ lɛ, sɔmɔɔ ákɛ okadi ní yɔɔ naakpɛɛ yɛ shikpɔŋ lɛ nɔ. (Yesaia 66:8) Amɛji Yehowa mumɔ lɛ hewalɛ lɛ he odaseyeli ní hiɛ kamɔ, ni amɛgbalaa heshibalɔi ní amɛtsuii tsirɛɔ amɛ ní amɛsɔmɔ Yehowa lɛ kɛbaa.
11. (a) Yɛ sɛɛkuu lɛ sɛɛ lɛ, te aaafee tɛŋŋ ní eeeba akɛ jeŋmaji lɛ amli bii aaaba amɛbale Yehowa? (b) Zakaria 8:23 lɛ ná eklɛŋklɛŋ mlibaa yɛ mɛɛ gbɛ nɔ?
11 Shi, yɛ sɛɛkuu ní ba yɛ afi 537 D.Ŋ.B. lɛ sɛɛ lɛ, te jeŋmaji lɛ amli bii ní nuko Yehowa he amaniɛbɔɔ ko lɛ aaafee tɛŋŋ amɛbale lɛ hu? Ojogbaŋŋ, jeee Yudafoi anɔkwafoi lɛ fɛɛ baaku amɛsɛɛ amɛya Yerusalem yɛ Babilon nomŋɔɔ lɛ naagbee. Mɛi komɛi, tamɔ Daniel, baaya nɔ amɛhi Babilon. Mɛi krokomɛi baagbɛ amɛshwã shikpɔŋ lɛ koji ejwɛ lɛ fɛɛ nɔ. Beni shɛɔ afii ohai enumɔ D.Ŋ.B. lɛ, no mli lɛ Yudafoi yɛ Persia Maŋtsɛyeli lɛ mli fɛɛ. (Ester 1:1; 3:8) Ŋwanejee ko bɛ he akɛ amɛteŋ mɛi komɛi gba amɛnanemɛi wɔŋjalɔi lɛ Yehowa he sane, ejaakɛ nakai jeŋmaji lɛ amli bii babaoo batsɔmɔ mɛi ní etsake kɛba Yuda jamɔ lɛ mli. Eka shi faŋŋ akɛ nakai ji bɔ ni eba lɛ yɛ Etiopia piafonyo lɛ, ní Kristofonyo kaselɔ Filipo shiɛ etsɔɔ lɛ yɛ klɛŋklɛŋ afii oha lɛ mli lɛ gbɛfaŋ. (Bɔfoi lɛ Asaji 8:26-40) Enɛɛmɛi fɛɛ ba mli ákɛ klɛŋklɛŋ mlibaa kɛha wiemɔi ní gbalɔ Zakaria wie lɛ, akɛ: “Nakai gbii lɛ amli lɛ aaaba mli akɛ hii nyɔŋma ni jɛ jeŋmaji anɔ wiemɔi srɔtoi fɛɛ mli aaamɔ Yudanyo kome atade naamuu mli, amɛaakɛɛ: Wɔkɛ nyɛ aaatee; ejaakɛ wɔnu akɛ Nyɔŋmɔ kɛ nyɛ yɛ!” (Zakaria 8:23) Lɛɛlɛŋ, Yehowa tsu la kɛtee jeŋmaji lɛ aŋɔɔ!—Lala 43:3.
Akɛ Nikeenii Miiba “Abake Yehowa”
12, 13. Akɛ ‘nyɛmimɛi’ baaba Yerusalem, kɛjɛ afi 537 D.Ŋ.B. kɛyaa yɛ mɛɛ gbɛ nɔ?
12 Kɛ́ asaa Yerusalem ekoŋŋ agbe naa lɛ, Yudafoi ní egbɛ eshwã hei ní kɛ amɛmaŋ shikpɔŋ lɛ nɔ jɛkɛ waa lɛ baakwɛ maŋtiase lɛ kɛ esɔfoyeli gbɛjianɔtoo ní ebɔi nitsumɔ ekoŋŋ lɛ gbɛ ákɛ jamɔ krɔŋŋ shikwɛ̃ɛhe. Amɛteŋ mɛi pii baafã gbɛ kakadaŋŋ koni amɛbaye daa afi gbii juji lɛ yɛ jɛmɛ. Yesaia ŋma yɛ mumɔ naa akɛ: “Amɛkɛ nyɛnyɛmimɛi lɛ fɛɛ ní jɛ jeŋmaji lɛ amli lɛ aaaba abake Yehowa, yɛ okpɔŋɔi anɔ kɛ shwiilii amli kɛ akpãkãii amli kɛ tejiokpɔŋɔi kɛ yomai anɔ, yɛ Yerusalem, migɔŋ krɔŋkrɔŋ lɛ nɔ, Yehowa kɛɛ, taakɛ bɔ ni Israelbii lɛ hiɛɔ amɛnikeenii yɛ nibii ní mli tse mli, kɛbaa Yehowa we lɛ. Ni maŋɔ amɛteŋ mɛi komɛi hu mafee osɔfoi kɛ Levibii.”—Yesaia 66:20, 21.
13 Nakai “[nyɛmimɛi] lɛ fɛɛ ní jɛ jeŋmaji lɛ amli” lɛ ateŋ mɛi komɛi yɛ jɛmɛ, yɛ Pentekoste gbi lɛ nɔ beni afɔse mumɔ krɔŋkrɔŋ lɛ ashwie Yesu kaselɔi lɛ anɔ lɛ. Ehe sane ní aŋma lɛ kaneɔ akɛ: “Yudafoi Nyɔŋmɔ gbeyeishelɔi komɛi yɛ Yerusalem, ni amɛjɛ jeŋmaji fɛɛ ni yɔɔ shikpɔŋ lɛ nɔ lɛ anɔ.” (Bɔfoi lɛ Asaji 2:5) Amɛba Yerusalem koni amɛbajá yɛ Yudafoi akusum naa, shi beni amɛnu Yesu Kristo he sanekpakpa lɛ, amɛteŋ mɛi pii ná hemɔkɛyeli yɛ emli ni abaptisi amɛ.
14, 15. (a) Kristofoi ní afɔ amɛ mu lɛ bua amɛmumɔŋ ‘nyɛmimɛi’ lɛ babaoo naa yɛ Jeŋ Ta I lɛ sɛɛ yɛ mɛɛ gbɛ nɔ, ni akɛ mɛnɛɛmɛi baha Yehowa akɛ “[nikeenii] yɛ nibii ní mli tse mli” yɛ mɛɛ gbɛ nɔ? (b) Yehowa ‘ŋɔ amɛteŋ mɛi komɛi efee osɔfoi’ yɛ mɛɛ gbɛ nɔ? (d) Namɛi ji Kristofoi ní afɔ amɛ mu, ní fata he ní abua amɛmumɔŋ nyɛmimɛi lɛ anaa lɛ ateŋ mɛi komɛi? (Kwɛmɔ akrabatsa ní yɔɔ baafa nɛɛ.)
14 Ani gbalɛ nɛɛ yɛ eŋmɛnɛŋmɛnɛ beaŋ mlibaa? Hɛɛ, eyɛ mlibaa. Yɛ Jeŋ Ta I sɛɛ lɛ, Yehowa tsuji ní afɔ amɛ mu lɛ yɔse kɛjɛ Ŋmalɛi lɛ amli akɛ ato Nyɔŋmɔ Maŋtsɛyeli lɛ ama shi yɛ ŋwɛi yɛ afi 1914. Amɛtsɔ Biblia lɛ kasemɔ jogbaŋŋ nɔ amɛbale akɛ esa akɛ abua Maŋtsɛyeli gboshiniyelɔi, loo ‘nyɛmimɛi’ babaoo anaa kɛbafata he. Sɔɔlɔi ní yɔɔ ekãa fã gbɛ kɛtee “shikpɔŋ lɛ naagbeehei lɛ,” ni amɛkɛ gbɛ̀i ní atsɔɔ nɔ afãa gbɛ lɛ fɛɛ tsu nii, ni amɛtao mɛi ní baatsɔmɔ shwɛɛnii ní afɔ amɛ mu lɛ mli bii, ní amɛteŋ mɛi pii jɛ Kristendom sɔlemɔi lɛ amli lɛ. Beni amɛna mɛnɛɛmɛi lɛ, amɛkɛ amɛ ba ni amɛkɛ amɛ baha Yehowa akɛ nikeenii.—Bɔfoi lɛ Asaji 1:8.
15 Mɛi ní afɔ amɛ mu, ní abua amɛnaa yɛ mra be mli afii lɛ amli lɛ kpaaa gbɛ akɛ Yehowa baakpɛlɛ amɛnɔ, yɛ shihilɛi ní amɛyɔɔ mli dani amɛbale Biblia mli anɔkwale lɛ hewɔ. Amɛfee nii ni amɛkɛtsuu amɛhe kɛjɛ mumɔŋ kɛ jeŋba mli muji fɛɛ mli, bɔni afee ní anyɛ akɛ amɛ aha akɛ “[nikeenii] yɛ nibii ní mli tse mli,” loo taakɛ bɔfo Paulo kɛɛ lɛ, “oblayoo fro ní he tse [kɛha] Kristo.” (2 Korintobii 11:2) Kɛfata tsɔɔmɔ mli tɔmɔi ní amɛkpoo lɛ he lɛ, ehe bahia ní mɛi ní afɔ amɛ mu lɛ akase bɔ ni amɛaahi shi ní amɛkɛ amɛhe wooo je nɛŋ maŋkwramɔ saji amli. Yɛ afi 1931, beni Yehowa webii lɛ etsuu amɛhe kɛtee hiɛ saŋŋ kɛyashɛ he ni sa lɛ, ejɛ mlihilɛ mli ekɛ hegbɛ ha amɛ akɛ amɛkɛ egbɛi lɛ afɔ̃ amɛnɔ ákɛ Yehowa Odasefoi. (Yesaia 43:10-12) Shi kɛlɛ, mɛɛ gbɛ nɔ Yehowa ‘ŋɔ amɛteŋ mɛi komɛi efee osɔfoi’ yɛ? Ákɛ kuu lɛ, nɛkɛ mɛi ní afɔ amɛ mu nɛɛ batsɔmɔ “maŋtsɛmɛi ní yeɔ osɔfoi, jeŋmaŋ krɔŋkrɔŋ,” ní kɛ yijiemɔ afɔlei haa Nyɔŋmɔ lɛ fã.—1 Petro 2:9; Yesaia 54:1; Hebribii 13:15.
Naabuamɔ lɛ Tee Nɔ Lolo
16, 17. Namɛi ji “nyɛseshi” lɛ yɛ Jeŋ Ta I lɛ sɛɛ?
16 Nakai “maŋtsɛmɛi ní yeɔ osɔfoi” lɛ ayibɔ muu lɛ fɛɛ ji 144,000, ni yɛ be ko sɛɛ lɛ, agbe amɛnaabuamɔ lɛ naa. (Kpojiemɔ 7:1-8; 14:1) Ani no ji naabuamɔ nitsumɔ lɛ naagbee? Dabi. Yesaia gbalɛ lɛ yaa nɔ akɛ: “Tamɔ bɔ ni ŋwɛi hee kɛ shikpɔŋ hee ní mibafee lɛ aaadamɔ shi yɛ mihiɛ lɛ, Yehowa kɛɛ, nakai nyɛseshi kɛ nyɛgbɛi lɛ aaadamɔ shi.” (Yesaia 66:22) Yɛ nakai wiemɔi lɛ aklɛŋklɛŋ mlibaa mli lɛ, Yudafoi ní baaku amɛsɛɛ kɛjɛ Babilon nomŋɔɔ mli lɛ baabɔi bii afɔmɔ. Enɛ hewɔ lɛ, Yudafoi shwɛɛnii ní akɛ amɛ eku sɛɛ kɛba ekoŋŋ, ni ji “shikpɔŋ hee,” ní yɔɔ Yudafoi agbɛjianɔtoo hee, ni ji “ŋwɛi hee” lɛ shishi lɛ, baama shi shiŋŋ diɛŋtsɛ. Shi kɛlɛ, gbalɛ lɛ ená mlibaa ní sa kadimɔ waa yɛ wɔgbii nɛɛ amli.
17 ‘Seshi’ ní mumɔŋ nyɛmimɛi amaŋ nɛɛ náa lɛ ji “asafo babaoo,” ní yɔɔ hiɛnɔkamɔ akɛ amɛbaaná naanɔ wala yɛ shikpɔŋ nɔ lɛ. Amɛjɛ “jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli,” ni amɛdamɔ “maŋtsɛsɛi lɛ hiɛ kɛ toobi lɛ hiɛ.” Mɛnɛɛmɛi “[éfɔ] amɛtadei lɛ ahe, ni amɛha eyɛ futaa yɛ toobi lɛ lá lɛ mli.” (Kpojiemɔ 7:9-14; 22:17) Ŋmɛnɛ, “asafo babaoo” lɛ miije mumɔŋ duŋ lɛ mli kɛmiiba la ní Yehowa kɛhaa lɛ mli. Amɛjieɔ Yesu Kristo mli hemɔkɛyeli kpo, ni taakɛ amɛnyɛmimɛi hii kɛ yei ní afɔ amɛ mu lɛ ji lɛ, amɛ hu amɛbɔɔ mɔdɛŋ akɛ amɛaahi shi akɛ mɛi ní he tse yɛ mumɔŋ kɛ jeŋba mli. Ákɛ kuu lɛ, amɛyaa nɔ amɛsɔmɔɔ yɛ Kristo gbɛtsɔɔmɔ shishi, ni amɛbaaya nɔ ‘amɛdamɔ shi’ kɛya naanɔ!—Lala 37:11, 29.
18. (a) Asafo babaoo lɛ mli bii lɛ efee amɛnii tamɔ amɛnyɛmimɛi ní afɔ amɛ mu lɛ pɛpɛɛpɛ yɛ mɛɛ gbɛ nɔ? (b) Mɛi ní afɔ amɛ mu lɛ kɛ amɛhefatalɔi lɛ jáa Yehowa yɛ “nyɔŋ hee fɛɛ nyɔŋ hee kɛ hejɔɔmɔ gbi fɛɛ hejɔɔmɔ gbi nɔ” yɛ mɛɛ gbɛ nɔ?
18 Nɛkɛ hii kɛ yei ní yɔɔ shikpɔŋ nɔ hiɛnɔkamɔ, ní tsuɔ nii waa nɛɛ le akɛ eyɛ mli akɛ ehe miihia ní amɛya nɔ amɛhi shi akɛ mɛi ní he tse yɛ jeŋba kɛ mumɔŋ moŋ, shi babaoo he miihia kɛha Yehowa hiɛ saa. Naabuamɔ nitsumɔ lɛ miiya nɔ waa lolo, ni amɛmiisumɔ ní amɛná mli gbɛfaŋnɔ. Kpojiemɔ wolo lɛ gba yɛ amɛhe akɛ: “[Amɛyɛ] Nyɔŋmɔ maŋtsɛsɛi lɛ hiɛ, ni amɛjáa lɛ nyɔɔŋ kɛ shwane yɛ esɔlemɔtsu lɛ mli.” (Kpojiemɔ 7:15) Nakai wiemɔi lɛ haa wɔkaiɔ Yesaia gbalɛ lɛ kuku ní nyiɛ naagbee nɔ̃ lɛ hiɛ lɛ, akɛ: “Aaaba mli akɛ nyɔŋ hee fɛɛ nyɔŋ hee kɛ hejɔɔmɔ gbi fɛɛ hejɔɔmɔ gbi nɔ lɛ heloo fɛɛ aaaba abajá yɛ mihiɛ, Yehowa kɛɛ.” (Yesaia 66:23) Enɛ miiba mli ŋmɛnɛ. “Nyɔŋ hee fɛɛ nyɔŋ hee kɛ hejɔɔmɔ gbi fɛɛ hejɔɔmɔ gbi nɔ”—ni ji, daa, loo nyɔŋ fɛɛ nyɔŋ mli otsi fɛɛ otsi mli lɛ—Kristofoi ní afɔ amɛ mu lɛ kɛ amɛhefatalɔi, asafo babaoo lɛ, kpeɔ kutuu ni amɛjáa Yehowa. Amɛfeɔ enɛ, kɛtsɔɔ Kristofoi akpeei yaa kɛ amɛhe ní amɛkɛwoɔ maŋ shiɛmɔ nitsumɔ lɛ mli lɛ nɔ, kɛfataa nibii krokomɛi ahe. Ani oji mɛi ní ‘baa ní amɛbajáa yɛ Yehowa hiɛ’ be fɛɛ be lɛ ateŋ mɔ ko? Yehowa webii náa miishɛɛ kpele yɛ enɛ feemɔ mli, ni asafo babaoo lɛ mli bii lɛ miikpá be mli ní “heloo fɛɛ”—ni ji adesai fɛɛ ní yɔɔ wala mli lɛ—baasɔmɔ Yehowa yɛ “nyɔŋ hee fɛɛ nyɔŋ hee kɛ hejɔɔmɔ gbi fɛɛ hejɔɔmɔ gbi nɔ,” kɛya naanɔi anaanɔ lɛ gbɛ.
Nyɔŋmɔ Henyɛlɔi lɛ Anaagbee Kwraa
19, 20. Mɛɛ yiŋtoo he nii Gehena tsu yɛ Biblia bei amli, ni mɛni he mfoniri efeɔ?
19 Eshwɛ kuku kome yɛ Yesaia gbalɛ lɛ ní wɔkaseɔ lɛ mli. Wolo lɛ baa naagbee kɛ wiemɔi nɛɛ, akɛ: “Amɛaaje kpo amɛyakwɛ mɛi ní etɔ̃ minɔ lɛ agbohii lɛ; ejaakɛ amɛgɔgɔmi lɛ gboŋ, ni amɛla lɛ hu agbeŋ, ni amɛhe aaafee heloo fɛɛ nyaŋemɔ.” (Yesaia 66:24) Ekolɛ gbalɛ nɛɛ ji nɔ ni yɔɔ Yesu Kristo jwɛŋmɔ mli beni ewo ekaselɔi lɛ hewalɛ ní amɛha amɛshihilɛ afee mlɛo, ní amɛha Maŋtsɛyeli lɛ he nibii aye klɛŋklɛŋ gbɛhe lɛ. Ekɛɛ akɛ: “Kɛ́ ohiŋmɛi miitɔ̃tɔ̃ onane lɛ, fãa oshɛ́ ofɔ̃; faŋ nɔ ni okɛ hiŋmɛi kome bote Nyɔŋmɔ maŋtsɛyeli lɛ mli fe nɔ ni ohiɛ hiŋmɛii enyɔ ní aaashɛ́o afɔ̃ la gehena lɛ mli lɛ, he ni amɛgɔgɔmi lɛ gbooo, ní amɛla lɛ hu ahaaa egbo lɛ.”—Marko 9:47, 48; Mateo 5:29, 30; 6:33.
20 Mɛni ji nɛkɛ hé ní atsɛɔ lɛ Gehena nɛɛ? Afii ohai abɔ ní eho nɛ lɛ, Yudanyo woloŋlelɔ David Kimhi ŋma akɛ: “Eji hé ko . . . ní tsá Yerusalem nɔ, ni eji hé ko ní yɔɔ nyaŋemɔ, ní amɛshɛrɛɔ nibii ní he tseee kɛ gbohii amɛshwieɔ. Agbɛnɛ hu la tsoɔ yɛ jɛmɛ be fɛɛ be koni eshã nibii ní he tseee lɛ kɛ gbohii lɛ awui lɛ. No hewɔ lɛ, atsɛɔ mɛi fɔji lɛ akojomɔ lɛ yɛ abɛbuaiaŋ wiemɔ mli akɛ Gehinnom.” Taakɛ Yudanyo woloŋlelɔ nɛɛ tsɔɔ lɛ, kɛji akɛ Gehena tsuɔ nii ákɛ hé ni ashɛrɛɔ jwɛi kɛ mɛi ni abuɔ akɛ amɛsaaa fũu kpakpa lɛ agbohii ashwieɔ lɛ, no lɛ la baafee gbɛ ní sa ní aaatsɔ nɔ akpata jwɛi nɛɛ hiɛ kwraa. Nɔ ni la lɛ eshãaa lɛ lɛ, gɔgɔmii lɛ baaye. Mɛɛ Nyɔŋmɔ henyɛlɔi lɛ fɛɛ anaagbee kwraa ní baa lɛ he mfoniri ni sa waa enɛ ji nɛkɛ!b
21. Namɛi Yesaia wolo lɛ baa naagbee kɛ wiemɔi ní ŋɔɔ kɛha amɛ lɛ, ni mɛni hewɔ?
21 Yɛ gbohii, la, kɛ gɔgɔmii ní atsĩ tã nɛɛ hewɔ lɛ, ani ejeee anɔkwale akɛ Yesaia gbalɛ ní yɔɔ miishɛɛ lɛ baa naagbee kɛ saji ní yɔɔ gbeyei waa? Ŋwanejee ko bɛ he akɛ mɛi ní ejie amɛhe kpo faŋŋ akɛ Nyɔŋmɔ henyɛlɔi lɛ baasusu nakai. Shi yɛ Nyɔŋmɔ shieŋtsɛmɛi agbɛfaŋ lɛ, bɔ ni Yesaia tsɔɔ mɛi fɔji lɛ anaanɔ hiɛkpatamɔ lɛ mli eha lɛ ji miishɛɛ sane kpele diɛŋtsɛ. Ehe miihia ní Yehowa webii aná nɛkɛ nɔmimaa nɛɛ akɛ amɛhenyɛlɔi lɛ naŋ hewalɛ ko yɛ amɛnɔ dɔŋŋ. Abaakpata nakai henyɛlɔi lɛ ní kɛ amanehulu babaoo eba Nyɔŋmɔ jálɔi anɔ, ní amɛkɛ heguɔgbee babaoo hu eba egbɛi lɛ nɔ lɛ ahiɛ kwraa kɛya naanɔ. No sɛɛ lɛ, “fimɔ eteŋ shi nɔ ni ji shii enyɔ.”—Nahum 1:9.
22, 23. (a) Tsɔɔmɔ gbɛ̀i anɔ ní oná Yesaia wolo lɛ mli nikasemɔ lɛ he sɛɛ lɛ ekomɛi amli. (b) Yɛ Yesaia wolo lɛ ní okase nɛɛ hewɔ lɛ, mɛni ji ofaishitswaa, ni mɛni ji ohiɛnɔkamɔ?
22 Yɛ be mli ni wɔkɛ Yesaia wolo lɛ mli nikasemɔ nɛɛ baa naagbee lɛ, eka shi faŋŋ akɛ wɔnuɔ shishi jogbaŋŋ akɛ Biblia mli wolo nɛɛ jeee yinɔsane folo ko kɛkɛ ní eho. Shi moŋ, ehiɛ shɛɛ sane ko kɛha wɔ ŋmɛnɛ. Kɛ́ wɔsusu be fɔŋ ní Yesaia hi shi yɛ mli lɛ he lɛ, wɔbaanyɛ wɔna nibii ní je amɛhe yɛ nakai be lɛ kɛ wɔbe nɛɛ mli. Maŋkwramɔŋ basabasafeemɔ, jamɔ mli osatofeemɔ, saneyeli mli efɔŋfeemɔ, kɛ nɔnyɛɛ ní akɛbaa anɔkwafoi kɛ ohiafoi anɔ lɛ kadi Yesaia gbii lɛ, ni ekadiɔ wɔgbii nɛɛ hu. Eka shi faŋŋ akɛ Yudafoi anɔkwafoi ní hi shi yɛ afii ohai ekpaa D.Ŋ.B. lɛ mli lɛ da shi waa yɛ Yesaia gbalɛ lɛ hewɔ, ni eshɛjeɔ wɔ mɛi ní wɔyɔɔ ŋmɛnɛ lɛ amii beni wɔkaseɔ lɛ.
23 Wɔ fɛɛ wɔdaa shi babaoo yɛ jaramɔ bei nɛɛ amli beni duŋ ha shikpɔŋ lɛ nɔ, ní duŋ kpii ha majimaji lɛ fɛɛ anɔ lɛ, ákɛ Yehowa etsɔ Yesaia nɔ ekɛ la eha adesai fɛɛ! Nakai mumɔŋ la lɛ tsɔɔ naanɔ wala diɛŋtsɛ kɛhaa mɛi fɛɛ ní jɛɔ amɛtsui muu fɛɛ mli amɛkpɛlɛɔ nɔ lɛ, ní maŋ nɔ loo hewolonɔ su ní amɛjɛ mli lɛ kɔɔɔ he eko. (Bɔfoi lɛ Asaji 10:34, 35) Belɛ, eba akɛ wɔɔya nɔ wɔnyiɛ yɛ Nyɔŋmɔ Wiemɔ lɛ mli la lɛ mli, ní wɔkane daa gbi, ní wɔjwɛŋ nɔ, ní wɔbu eshɛɛ sane lɛ akɛ ehe hiaa waa. Enɛ kɛ naanɔ jɔɔmɔi baaha wɔ diɛŋtsɛ, ni ebaajie Yehowa gbɛi krɔŋkrɔŋ lɛ hu yi!
[Shishigbɛ niŋmai]
a Yeremia 52:15 lɛ wieɔ “maŋbii lɛ amli ohiafoi kwraa lɛ ateŋ mɛi komɛi kɛ maŋbii lɛ ateŋ mɛi ní eshwɛ ní ashi yɛ maŋ lɛŋ lɛ” he, yɛ shihilɛ ní hi shi beni Babilonbii lɛ ye Yerusalem nɔ kunim sɛɛ lɛ gbɛfaŋ. Beni Insight on the Scriptures, Kpo 1, baafa 415 wieɔ enɛ he lɛ, ekɛɛ akɛ: “Eka shi faŋŋ akɛ wiemɔ ni ji ‘mɛi ní eshwɛ ní ashi yɛ maŋ lɛŋ lɛ’ tsɔɔ akɛ no mli lɛ mɛi babaoo diɛŋtsɛ egboi yɛ hɔmɔ, hela, loo la hewɔ, aloo kɛ́ jeee nakai lɛ, agbe amɛ yɛ ta lɛ mli.”
b Akɛni gbohii ji nɔ ni hiɛ kpataa yɛ Gehena, shi jeee gbɔmɛi ní yɔɔ wala mli hewɔ lɛ, nɛkɛ hé nɛɛ jeee naanɔ piŋmɔ he okadi.
[Akrabatsa ni yɔɔ baafa 409]
Nikeenii ní Jɛ Jeŋmaji Fɛɛ Mli, ní Afɔ Amɛ Mu Kɛha Yehowa
Yɛ afi 1920 lɛ, Juan Muñiz shi United States kɛtee Spain, ni no sɛɛ lɛ efã gbɛ kɛtee Argentina, ni eyato mɛi ní afɔ amɛ mu lɛ asafoi ahe gbɛjianɔ yɛ jɛmɛ. Kɛjɛ afi 1923 kɛyaa lɛ, anɔkwale la lɛ kpɛ́ yɛ mɛi ní yɔɔ jalɛ tsuii, ní yɔɔ Afrika Anaigbɛ lɛ anɔ beni maŋsɛɛ sanekpakpa shiɛlɔ William R. Brown (ní afɔɔ lɛ tsɛmɔ akɛ Bible Brown lɛ) fã gbɛ ní eyashiɛ Maŋtsɛyeli shɛɛ sane lɛ yɛ hei tamɔ Sierra Leone, Ghana, Liberia, The Gambia, kɛ Nigeria lɛ. Nakai afi lɛ mli nɔŋŋ lɛ, Canadanyo George Young ba Brazil, ni no sɛɛ lɛ efã gbɛ kɛtee Argentina, Costa Rica, Panama, Venezuela, kɛ Soviet Union po. Aaafee nakai beaŋ nɔŋŋ lɛ, Edwin Skinner kɛ lɛlɛ fã gbɛ kɛjɛ England kɛtee India, ni ekɛ afii babaoo tsu nii waa yɛ jɛmɛ yɛ ŋmãakpamɔ nitsumɔ lɛ mli.
[Mfoniri ni yɔɔ baafa 411]
Yudafoi lɛ ateŋ mɛi komɛi fee ‘nyɛmimɛi ní jɛ jeŋmaji fɛɛ mli’ yɛ Pentekoste gbi lɛ nɔ
[Baafa muu mfoniri ni yɔɔ baafa 413]