Kasemɔ Yehowa—Jiemɔ Jalɛsaneyeli kɛ Jalɛ Kpo
“Miji Yehowa, mɔ ni yeɔ mlihilɛ kɛ kojomɔ kɛ jalɛ sane yɛ shikpɔŋ lɛ nɔ lɛ; ejaakɛ enɛ sa mihiɛ.”—YEREMIA 9:24.
1. Mɛɛ gbɛkpamɔ ni yɔɔ naakpɛɛ Yehowa kɛha?
YEHOWA wo shi akɛ gbi ko baaba ni mɔ fɛɛ mɔ baale lɛ. Etsɔ egbalɔ Yesaia nɔ ejaje akɛ: “Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ̃ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” (Yesaia 11:9) Mɛɛ gbɛkpamɔ ni yɔɔ naakpɛɛ po nɛ!
2. Mɛni fata Yehowa ní aaale lɛ lɛ he? Mɛni hewɔ?
2 Shi, mɛni le ni aaale Yehowa lɛ tsɔɔ? Yehowa jie nɔ ni he hiaa fe fɛɛ lɛ kpo etsɔɔ Yeremia akɛ: “Éyoo ni asaŋ éle mi, akɛ miji Yehowa, mɔ ni yeɔ mlihilɛ kɛ kojomɔ kɛ jalɛ sane yɛ shikpɔŋ lɛ nɔ lɛ; ejaakɛ enɛ sa mihiɛ.” (Yeremia 9:24) Enɛ hewɔ lɛ, nɔ ni fata le ni wɔɔle Yehowa lɛ he hu ji ní wɔɔle gbɛ ni etsɔɔ nɔ ejieɔ jalɛsaneyeli kɛ jalɛ kpo. Kɛji yɛ no sɛɛ lɛ wɔjieɔ sui nɛɛ akpo lɛ, no lɛ ebaaná wɔhe miishɛɛ. Mɛɛ gbɛ nɔ wɔɔtsɔ wɔfee nakai? Yehowa ebáa bɔ ni ekɛ adesai ni yeee emuu lɛ eye eha yɛ yinɔi ni eho lɛ amli fɛɛ lɛ he saji ni aŋmala ashwie shi lɛ ayi yɛ e-Wiemɔ ni ji Biblia lɛ mli. Kɛ́ wɔkase lɛ, wɔbaanyɛ wɔle Yehowa gbɛ̀i ni ji jalɛsaneyeli kɛ jalɛ lɛ jogbaŋŋ, koni wɔtsɔ no nɔ wɔkase lɛ.—Romabii 15:4.
Eyeɔ Jalɛ Sane ni Kɛlɛ Emusuŋ Tsɔɔ Lɛ
3, 4. Mɛni hewɔ Yehowa sane ja akɛ ekpata Sodom kɛ Gomora hiɛ lɛ?
3 Ŋwɛi kojomɔ ni ba Sodom kɛ Gomora nɔ lɛ ji nɔkwɛmɔnɔ ni sa jogbaŋŋ ni feɔ Yehowa jalɛsaneyeli lɛ fãi babaoo ahe mfoniri. Jeee akɛ Yehowa kɛ toigbalamɔ ni he hiaa lɛ ba amɛnɔ kɛkɛ, shi moŋ eto yiwalaheremɔ he gbɛjianɔ kɛha mɛi ni sa lɛ. Ani nakai maŋtiasei lɛ ahiɛkpatamɔ lɛ sa lɛɛlɛŋ? Kɛjɛ shishijee lɛ, kulɛ Abraham, ní eka shi faŋŋ akɛ he ni Sodom efɔŋfeemɔ lɛ etee hiɛ kɛyashɛ lɛ he nilee bibioo pɛ eyɔɔ lɛ susuuu nakai. Yehowa ma nɔ mi eha Abraham akɛ kɛ́ abaanyɛ aná jalɔi nyɔŋmɔ po kɛkɛ lɛ, ekpataŋ nakai maŋtiase lɛ hiɛ. Eyɛ faŋŋ akɛ, Yehowa jalɛsaneyeli lɛ jeee nɔ ni yeɔ oyai loo nɔ ni mɔbɔnalɛ bɛ mli kɔkɔɔkɔ.—1 Mose 18:20-32.
4 Kwɛmɔ ni ŋwɛibɔfoi enyɔ lɛ yakwɛ bɔ ni maŋ lɛ yɔɔ lɛ kɛ bɔ ni Sodom ekpɔtɔ kwraa yɛ jeŋba gbɛfaŋ lɛ he odaseyeli ni mli kã shi faŋŋ ha. Beni maŋtiase lɛ mli hii, “obalahii kɛ hiimeji fɛɛ” ná amɛle akɛ hii enyɔ lɛ ebahi Lot shia lɛ, amɛyatutua eshia lɛ kɛ yiŋtoo akɛ amɛkɛ amɛ baawɔ akɛ hii akuu ni kɛ hii náa bɔlɛ. Amɛ jeŋba mli fitemɔ lɛ eba shi kɛbashɛ he ni ehiii fe fɛɛ! Ŋwanejee ko bɛ he akɛ Yehowa kojomɔ ni ekɛba maŋtiase lɛ nɔ lɛ ji jalɛ kojomɔ.—1 Mose 19:1-5, 24, 25.
5. Mɛɛ gbɛ nɔ Nyɔŋmɔ tsɔ ejie Lot kɛ eweku lɛ yɛ Sodom?
5 Beni etsĩ Sodom kɛ Gomora hiɛkpatamɔ lɛ tã akɛ kɔkɔbɔɔ nɔkwɛmɔnɔ sɛɛ lɛ, bɔfo Petro ŋma akɛ: “[Yehowa, NW] le bɔ ni efeɔ ejieɔ jalɔi yɛ kaa mli.” (2 Peter 2:6-9) Eji akpata Lot ni ji jalɔ lɛ kɛ eweku lɛ fɛɛ hiɛ afata Sodombii ni bɛ Nyɔŋmɔ gbeyeishemɔ lɛ ahe kulɛ, atsuuu jalɛsaneyeli he nii. Enɛ hewɔ lɛ, Yehowa bɔfoi lɛ bɔ Lot kɔkɔ yɛ hiɛkpatamɔ ni baa lɛ he. Beni Lot shashaoɔ shi lɛ, ŋwɛibɔfoi lɛ mɔ̃mɔ lɛ kɛ eŋa, kɛ ebiyei enyɔ lɛ aniji ashi, ‘yɛ Yehowa musuŋtsɔlɛ lɛ naa,’ ni amɛkɛ amɛ je kpo kɛshi maŋtiase lɛ mli. (1 Mose 19:12-16) Wɔbaanyɛ wɔná nɔmimaa akɛ Yehowa baajie mɔ hesusumɔ kpo kɛha jalɔi lɛ yɛ gbɛjianɔtoo fɔŋ nɛɛ hiɛkpatamɔ ni baa lɛ mli.
6. Mɛni hewɔ esaaa ni wɔhaoɔ wɔhe fe nine yɛ nibii agbɛjianɔtoo fɔŋ lɛ hiɛkpatamɔ ni baa lɛ he lɛ?
6 Eyɛ mli akɛ gbɛjianɔtoo nɛɛ naagbee lɛ baafee be ní ‘akɛaatsu jalɛsaneyeli he nii’ moŋ, shi yiŋtoo ko bɛ ni wɔɔdamɔ nɔ wɔhao wɔhe yɛ he bɔ ni esaaa. (Luka 21:22) Kojomɔ ni Nyɔŋmɔ baatsu he nii yɛ Harmagedon lɛ baafee nɔ ni “ja kwraa” kɛmɔ shi. (Lala 19:10) Taakɛ Abraham ná ele lɛ, wɔ ni ji adesai lɛ baanyɛ aná Yehowa jalɛsaneyeli, ní nɔ kwɔ kwraa fe wɔnɔ̃ lɛ mli hekɛnɔfɔɔ kɛmɔ shi. Abraham bi akɛ: “Ani shikpɔŋ fɛɛ nɔ kojolɔ lɛ ekojoŋ jalɛ kojomɔ?” (1 Mose 18:25; okɛto Hiob 34:10 he.) Aloo taakɛ Yesaia wie yɛ gbɛ ni ja nɔ lɛ, ‘namɔ etsɔɔ Yehowa jalɛ gbɛ?’—Yesaia 40:14.
Jalɛ Nifeemɔ ni Akɛaahere Adesai Ayiwala
7. Mɛɛ tsakpaa yɔɔ Nyɔŋmɔ jalɛsaneyeli lɛ kɛ emɔbɔnalɛ lɛ teŋ?
7 Nyɔŋmɔ jalɛsaneyeli lɛ ejeee kpo yɛ bɔ ni egbalaa efɔŋfeelɔi atoi lɛ pɛ mli. Yehowa wie lɛ diɛŋtsɛ ehe akɛ “Mawu jalɔ kɛ yiwalaherelɔ.” (Yesaia 45:21) Ejeɔ kpo faŋŋ akɛ, tsakpaa ko ni bɛŋkɛ kpaakpa yɛ Nyɔŋmɔ jalɛ, loo jalɛsaneyeli lɛ kɛ suɔmɔ ni eyɔɔ akɛ ehere adesai ayiwala kɛjɛ nibii ni esha kɛbaa lɛ amli lɛ teŋ. Beni ewieɔ ŋmalɛ nɛɛ he lɛ, The International Standard Bible Encyclopedia, afi 1982 Nɔ̃ lɛ feɔ lɛ faŋŋ akɛ, “Nyɔŋmɔ jalɛsaneyeli lɛ taoɔ gbɛ̀i pɔtɛɛ ní eeetsɔ nɔ ejie E-mɔbɔnalɛ lɛ kpo, koni enyɛ etsu E-yiwalaheremɔ lɛ he nii kɛgbe naa.” Jeee akɛ ehe miihia ni akɛ mɔbɔnalɛ aba bɔ ni Nyɔŋmɔ kɛ jalɛsaneyeli tsuɔ nii ehaa lɛ shi, shi moŋ, ákɛ mɔbɔnalɛ ji Nyɔŋmɔ jalɛsaneyeli lɛ kpojiemɔ. Kpɔmɔnɔ ni Nyɔŋmɔ to he gbɛjianɔ kɛha adesai ayiwalaheremɔ lɛ ji ŋwɛi jalɛsaneyeli lɛ fã nɛɛ he nɔkwɛmɔnɔ ni sa kadimɔ fe fɛɛ.
8, 9. (a) Mɛni fata wiemɔ ni awie akɛ, “jalɛ nifeemɔ kome” lɛ he? Mɛni hewɔ? (b) Mɛni Yehowa biɔ kɛjɛɔ wɔdɛŋ?
8 Kpɔmɔnɔ lɛ jarawalɛ lɛ diɛŋtsɛ—Nyɔŋmɔ Bi koome, ni ji Yesu Kristo wala ni jara wa lɛ—ji jara ni nɔ kwɔ waa ejaakɛ tɛi ni Yehowa efolɔ eshwie shi lɛ ji jeŋ muu fɛɛ nɔ̃, ni lɛ diɛŋtsɛ hu ehiɔ shi yɛ naa pɛpɛɛpɛ. (Mateo 20:28) Wala ni eye emuu, ni ji Adam nɔ lɛ, elaaje, no hewɔ lɛ wala ni eye emuu he miihia koni akɛhe wala kɛha Adam shwiei lɛ. (Romabii 5:19-21) Bɔfo Paulo wie Yesu emuuyeli mlihiɛmɔ gbɛ, ní kpɔmɔnɔ ni ewo lɛ fata he lɛ he jogbaŋŋ ákɛ “jalɛ nifeemɔ kome.” (Romabii 5:18, NW shishigbɛ niŋmaa) Mɛni hewɔ? Ejaakɛ yɛ bɔ ni Yehowa kwɛɔ nii ehaa lɛ naa lɛ, kpɔmɔ ni aaakpɔ̃ adesai lɛ sa ni eja gbɛ akɛ afee nakai, eyɛ mli akɛ esa akɛ efee nakai kɛ jara ni wa kɛha lɛ diɛŋtsɛ ehe. Adam shwiei lɛ tamɔ “gãlã ni amĩa lɛ,” ní Nyɔŋmɔ sumɔɔɔ ni ekũ lɛ, loo tamɔ “odonti hu ni tsoɔ sulii,” ní esumɔɔɔ ni egbe lɛ. (Mateo 12:20) Nyɔŋmɔ yɛ hekɛnɔfɔɔ akɛ hii kɛ yei anɔkwafoi babaoo baate shi kɛjɛ Adam shwiei lɛ ateŋ.—Okɛto Mateo 25:34 he.
9 Te esa akɛ wɔhere nɛkɛ suɔmɔ kɛ jalɛsaneyeli nifeemɔ ni nɔ kwɔ fe fɛɛ nɛɛ nɔ wɔha tɛŋŋ? Nibii ni Yehowa biɔ yɛ wɔdɛŋ lɛ ateŋ ekome ji akɛ ‘wɔfee nɔ ni ja gbɛ.’ (Mika 6:8) Mɛɛ gbɛ nɔ wɔɔtsɔ wɔfee enɛ?
Taomɔ Jalɛsaneyeli, Tiumɔ Jalɛ Sɛɛ
10. (a) Mɛni ji gbɛ kome ni wɔtsɔɔ nɔ wɔjieɔ jalɛsaneyeli kpo? (b) Wɔbaanyɛ wɔtao Nyɔŋmɔ jalɛ lɛ klɛŋklɛŋ yɛ mɛɛ gbɛ nɔ?
10 Klɛŋklɛŋ kwraa lɛ, esa akɛ wɔhi shi yɛ Nyɔŋmɔ jeŋba he tɛi lɛ anaa. Akɛni tɛi ni Nyɔŋmɔ efolɔ eshwie shi lɛ ja gbɛ ni eji jalɛ tɛi hu hewɔ lɛ, kɛ́ wɔhi shi yɛ naa lɛ, belɛ wɔmiijie jalɛsaneyeli kpo. No ji nɔ ni Yehowa kpaa gbɛ kɛjɛɔ ewebii adɛŋ. Yehowa kɛɛ Israelbii lɛ akɛ: “Nyɛkasea ekpakpafeemɔ! Nyɛtaoa jalɛsaneyeli sɛɛgbɛ!” (Yesaia 1:17) Yesu kɛ ŋaawoo ni tamɔ nakai nɔŋŋ ha mɛi ni bo lɛ toi yɛ Gɔŋ nɔ Shiɛmɔ lɛ mli lɛ, beni etsɔɔ amɛ akɛ ‘amɛtao maŋtsɛyeli lɛ kɛ Nyɔŋmɔ jalɛ lɛ klɛŋklɛŋ lɛ.’ (Mateo 6:33) Paulo wo Timoteo hewalɛ ní ‘enyiɛ jalɛ sɛɛ.’ (1 Timoteo 6:11) Kɛ́ wɔhi shi yɛ jeŋba he tɛi ni Nyɔŋmɔ efolɔ eshwie shi lɛ kɛ gbeekpamɔ naa ní wɔwo gbɔmɔtso hee lɛ, no lɛ wɔmiitiu anɔkwa jalɛsaneyeli kɛ jalɛ sɛɛ. (Efesobii 4:23, 24) Yɛ wiemɔ kroko mli lɛ, wɔtaoɔ jalɛsaneyeli kɛtsɔ nii ni wɔfeɔ yɛ Nyɔŋmɔ gbɛ nɔ lɛ nɔ.
11. Mɛni hewɔ, ni mɛɛ gbɛ nɔ wɔɔtsɔ wɔwuu wɔshi hewalɛ ni esha náa yɛ wɔnɔ lɛ?
11 Taakɛ wɔ fɛɛ wɔle lɛ, jeee be fɛɛ be efeɔ mlɛo kɛhaa adesai ni yeee emuu lɛ akɛ amɛaafee nɔ ni sa kɛ nɔ ja gbɛ hu. (Romabii 7:14-20) Paulo wo Kristofoi ni hi Roma lɛ hewalɛ ní amɛwuu amɛshi hewalɛ ni esha yɔɔ yɛ amɛnɔ lɛ, koni amɛnyɛ amɛkɛ amɛgbɔmɔtsei ní amɛjɔɔ nɔ lɛ aha Nyɔŋmɔ ákɛ “jalɛ tawuu nii,” ní he baaba sɛɛnamɔ kɛha Nyɔŋmɔ yɛ eyiŋtoo he nitsumɔ mli. (Romabii 6:12-14) Nakai nɔŋŋ hu kɛ́ wɔkaseɔ Nyɔŋmɔ Wiemɔ lɛ daa ní wɔkɛtsuɔ nii hu lɛ, wɔbaanyɛ wɔnu ‘Yehowa tsɔsemɔ kɛ ŋaawoo’ lɛ shishi, ni ‘ebaatsɔse wɔ yɛ jalɛ mli.’—Efesobii 6:4; 2 Timoteo 3:16, 17.
12. Kɛ́ wɔɔnyɛ wɔkɛ mɛi krokomɛi aye tamɔ bɔ ni wɔtaoɔ ni Yehowa kɛ wɔ aye lɛ, no lɛ mɛni esa akɛ wɔkwa?
12 Nɔ ni ji enyɔ lɛ, wɔjieɔ jalɛsaneyeli kpo kɛ́ wɔkɛ mɛi krokomɛi ye tamɔ bɔ ni wɔtaoɔ ni Yehowa kɛ wɔ aye lɛ. Eyɛ mlɛo akɛ wɔɔhiɛ jeŋba he mlai sɔrɔtoi enyɔ mli—nɔ ni mlijɔlɛ yɔɔ mli kɛha wɔ diɛŋtsɛ wɔhe, kɛ nɔ ni yɔɔ kpɛŋŋ kɛha mɛi krokomɛi. Wɔjieɔ wɔnaa amrɔ nɔŋŋ yɛ wɔ diɛŋtsɛ wɔ fatɔɔi ahe, shi kɛlɛ, wɔhe feɔ oya akɛ wɔɔwie wɔshi mɛi krokomɛi atɔ̃mɔi, ekolɛ tɔ̃mɔi ni he ehiaaa kwraa po kɛ́ akɛmiito wɔ diɛŋtsɛ wɔnɔ he. Yesu bi yɛ faŋŋ mli akɛ: “Shi mɛɛba onaa kuli ni yɔɔ onyɛmi hiŋmɛi mli lɛ, shi bo diɛŋtsɛ ohiŋmɛi mli mplaŋ lɛ, oyooo lɛ?” (Mateo 7:1-3) Esaaa ni wɔhiɛ kpaa nɔ kɔkɔɔkɔ akɛ kɛ́ Yehowa kɛɛ eepɛi wɔ tɔ̃mɔi amli fitsofitso lɛ, wɔteŋ mɔ ko mɔ ko nyɛŋ shi adamɔ. (Lala 130:3, 4) Kɛ́ Yehowa jalɛsaneyeli lɛ ŋmɛɔ lɛ gbɛ ni ekuɔ ehiɛ efɔ̃ɔ wɔnyɛmimɛi agbɔjɔmɔi anɔ lɛ, no lɛ namɛi ji wɔ ni wɔɔbu amɛ fɔ́?—Romabii 14:4, 10.
13. Mɛni hewɔ jalɔ nuɔ he akɛ eji sɔ̃ ni kã enɔ akɛ eshiɛ Maŋtsɛyeli lɛ he sanekpakpa lɛ?
13 Nɔ ni ji etɛ lɛ, wɔjieɔ jalɛsaneyeli ni Nyɔŋmɔ gbeyeishemɔ yɔɔ mli kpo kɛ́ wɔkɛ wɔhe wo shiɛmɔ nitsumɔ lɛ mli kɛ ekãa kɛ mɔdɛŋbɔɔ. “Mɛi ni sa ejurɔfeemɔ lɛ, kaakãmã amɛ, kɛji efeemɔ yɛ odɛŋ hewalɛ mli lɛ,” taakɛ Yehowa woɔ wɔ ŋaa lɛ. (Abɛi 3:27) Efeŋ nɔ ni ja gbɛ akɛ wɔɔtsĩ nilee ni haa mɔ wala, ní Nyɔŋmɔ ejɛ mlihilɛ mli eha wɔná babaoo lɛ naa wɔha wɔ pɛ wɔhe. Lɛɛlɛŋ, ekolɛ mɛi pii baakpoo wɔ shɛɛ sane lɛ, shi shii abɔ ní Nyɔŋmɔ yaa nɔ ekpãa mɔbɔnalɛ mli ehaa amɛ lɛ, esa akɛ wɔsumɔ akɛ wɔɔya nɔ wɔha amɛ hegbɛ lɛ koni ‘amɛtsake amɛtsui.’ (2 Petro 3:9) Ni taakɛ Yesu nu he lɛ, wɔ hu wɔnáa miishɛɛ waa kɛ́ wɔnyɛ wɔye wɔbua mɔ ko ní etsake kɛba jalɛsaneyeli kɛ jalɛ he ekoŋŋ lɛ. (Luka 15:7) Amrɔ nɛɛ ji be ni hi kɛha wɔ ní ‘wɔkɛaadu nii yɛ jalɛ mli.’—Hoshea 10:12.
‘Lumɛi Kɛha Jalɛsaneyeli Diɛŋtsɛ’
14. Mɛɛ gbɛfaŋnɔ onukpai lɛ yɔɔ yɛ jalɛsaneyeli gbɛfaŋ?
14 Esa akɛ wɔ fɛɛ wɔnyiɛ jalɛ gbɛ nɔ, shi gbɛnaa nii krɛdɛɛ kã onukpai ni yɔɔ Kristofoi asafo lɛ mli lɛ anɔ yɛ enɛ gbɛfaŋ. Yesu lumɔyeli lɛ, ‘jalɛsaneyeli kɛ jalɛ ji nɔ ni haa emaa shi shiŋŋ.’ Enɛ hewɔ lɛ, tɛ ni afo afɔ̃ shi kɛha onukpai lɛ ji ŋwɛi jalɛsaneyeli. (Yesaia 9:7) Amɛhaa nɔ ni awie he yɛ gbalɛ wiemɔ mli yɛ Yesaia 32:1 lɛ hiɔ amɛjwɛŋmɔ mli, akɛ: “Naa, maŋtsɛ ko baaye maŋtsɛ yɛ jalɛ naa, ni lumɛi hu, baaye lumɛi yɛ kojomɔ naa.” Ákɛ nɔkwɛlɔi ni akɛ mumɔ ehala amɛ, loo ‘Nyɔŋmɔ we lɛ nɔ tsulɔ nukpai’ lɛ, esa akɛ onukpai lɛ afee nii yɛ Nyɔŋmɔ gbɛ nɔ.—Tito 1:7.
15, 16. (a) Onukpai lɛ kaseɔ tookwɛlɔ anɔkwafo ni yɔɔ Yesu abɛbua lɛ mli lɛ yɛ mɛɛ gbɛ nɔ? (b) Te onukpai lɛ nuɔ he yɛ mɛi ni elaaje yɛ mumɔŋ lɛ ahe amɛhaa tɛŋŋ?
15 Yesu tsɔɔ akɛ Yehowa jalɛsaneyeli lɛ jieɔ musuŋtsɔlɛ, mɔbɔnalɛ, kɛ saneshishinumɔ kpo. Nɔ ni fe fɛɛ lɛ, ebɔ mɔdɛŋ akɛ eeeye ebua mɛi ni yɔɔ naagbai lɛ kɛ “nɔ ni elaaje lɛ taomɔ kɛ yiwalaheremɔ.” (Luka 19:10) Taakɛ tookwɛlɔ ni yɔɔ Yesu abɛbua lɛ mli ní kɛ mɔdɛŋbɔɔ tao etoo ni elaaje lɛ aahu kɛyashi be mli ni ena lɛ lɛ ji lɛ, onukpai lɛ taoɔ mɛi ni elaaje yɛ mumɔŋ lɛ ni amɛbɔɔ mɔdɛŋ ní amɛkudɔ amɛ kɛku sɛɛ kɛba tooku lɛ mli ekoŋŋ.—Mateo 18:12, 13.
16 Yɛ nɔ najiaŋ ní amɛaabu mɛi ni ekolɛ amɛfee eshai ni hiɛdɔɔ yɔɔ mli lɛ fɔ́ lɛ, onukpai lɛ sumɔɔ moŋ ní amɛtsá amɛ ni amɛye amɛbua amɛ kɛya tsuitsakemɔ mli kɛ́ eeehi nakai feemɔ. Kɛji akɛ amɛbaanyɛ amɛye amɛbua mɔ ko ni elaaje lɛ, amɛnáa he miishɛɛ waa. Shi, kɛ́ efɔŋfeelɔ ko shwaaa ehe lɛ, edɔɔ amɛ. Ni no lɛ, Nyɔŋmɔ jalɛ tɛi ni efolɔ eshwie shi lɛ biɔ ni amɛshwie mɔ ni shwaaa ehe lɛ kɛjɛ asafo lɛ mli. Kɛ́ eba lɛ nakai po lɛ, taakɛ bi nyenyeŋtswi lɛ tsɛ lɛ ji lɛ, amɛhiɛ kã nɔ akɛ gbi ko lɛ mɔ ni etɔ̃ nɛɛ ‘hiɛ baatserɛ lɛ ekoŋŋ.’ (Luka 15:17, 18) Enɛ hewɔ lɛ, onukpai lɛ ŋɔɔ hegbɛ lɛ ni amɛyasaraa mɛi ni ashwie amɛ lɛ ateŋ mɛi komɛi koni amɛkai amɛ yɛ gbɛ ni amɛaatsɔ nɔ amɛku amɛsɛɛ kɛba Yehowa gbɛjianɔtoo lɛ mli ekoŋŋ lɛ he.a
17. Mɛɛ oti onukpai lɛ kɛmaa amɛhiɛ kɛ́ amɛmiitsu efɔŋfeemɔ he sane ko he nii, ni mɛɛ su baaye abua amɛ ni amɛshɛ nakai oti lɛ he?
17 Ehe miihia ni onukpai lɛ titri akase Yehowa jalɛsaneyeli lɛ kɛ́ amɛmiitsu efɔŋfeemɔ saji ahe nii. Eshafeelɔi “tsi bɛŋkɛ” Yesu ejaakɛ amɛnu he akɛ ebaanu amɛ shishi ni ebaaye ebua amɛ. (Luka 15:1; Mateo 9:12, 13) Shi kɛlɛ, Yesu ekuuu ehiɛ efɔ̃ɔɔ efɔŋfeemɔ nɔ. Shikome pɛ ni ekɛ Yesu ye nii lɛ tsirɛ Zakeo, ní ale lɛ waa akɛ amimyelɔ lɛ ni eshwa ehe ni eto amanehulu ni ekɛba mɛi krokomɛi anɔ lɛ fɛɛ najiaŋ. (Luka 19:8-10) Onukpai ni yɔɔ ŋmɛnɛ lɛ hu hiɛ oti kome nɛɛ nɔŋŋ yɛ amɛ kojomɔ saneyelii amli—ákɛ amɛye amɛbua nɔtɔ̃lɔ lɛ kɛya heshwamɔ mli. Kɛ́ anyɛɔ abɛŋkɛɔ amɛ tamɔ bɔ ni Yesu ji lɛ, no lɛ ebaafee mlɛo kɛha nɔtɔ̃lɔi pii akɛ amɛaatao yelikɛbuamɔ kɛjɛ amɛdɛŋ.
18. Mɛni baaye abua onukpai lɛ ní amɛfee tamɔ “abobaahe yɛ kɔɔyɔɔ naa”?
18 Tsui ni nuɔ nii ahe haa mɔ baaye abua onukpai lɛ ní amɛkɛ ŋwɛi jalɛsaneyeli, ni ejieee yiwalɛ su kpo ni ejeee nɔ ni nuuu nii ahe lɛ atsu nii. Nɔ ni yɔɔ miishɛɛ ji akɛ, Ezra saa etsui, jeee ejwɛŋmɔ kɛkɛ, bɔni afee ni etsɔɔ Israelbii lɛ jalɛsaneyeli. (Ezra 7:10) Tsui ni nuɔ nii ashishi lɛ baaha onukpai lɛ anyɛ amɛkɛ Ŋmalɛ mli shishitoo mlai ni sa lɛ atsu nii, koni amɛsusu bɔ ni aŋkroaŋkroi fɛɛ ashihilɛ mli saji ji lɛ he. Beni Yesu tsá yoo lɛ ni lá hoɔ lɛ lɛ, etsɔɔ faŋŋ akɛ Yehowa jalɛsaneyeli lɛ tsɔɔ yiŋtoo diɛŋtsɛ ni yɔɔ mla lɛ sɛɛ, kɛ emli wiemɔi lɛ ashishi ni aaanu. (Luka 8:43-48) Abaanyɛ akɛ onukpai ni kɛ jalɛsaneyeli tsuɔ nii yɛ musuŋtsɔlɛ mli lɛ ato “abobaahe yɛ kɔɔyɔɔ naa” he kɛha mɛi ni naa nɔ̃ waa yɛ amɛ diɛŋtsɛ amɛgbɔjɔmɔi loo gbɛjianɔtoo fɔŋ ni wɔyɔɔ mli nɛɛ shishi lɛ.—Yesaia 32:2.
19. Te nyɛmiyoo ko here ŋwɛi jalɛsaneyeli ni akɛtsu nii lɛ nɔ eha tɛŋŋ?
19 Nyɛmiyoo ko ni fee esha ni hiɛdɔɔ yɔɔ mli lɛ diɛŋtsɛ bana bɔ ni ŋwɛi jalɛsaneyeli tsuɔ nii ehaa lɛ jogbaŋŋ. “Yɛ anɔkwale mli lɛ, mishe gbeyei akɛ maya onukpai lɛ aŋɔɔ,” taakɛ ekpɛlɛ nɔ lɛ. “Shi amɛkɛ mi ye yɛ musuŋtsɔlɛ kɛ bulɛ mli. Onukpai lɛ fee tamɔ tsɛmɛi moŋ fe kojolɔi ni yɔɔ kpɛŋŋ. Amɛye amɛbua mi ni minu shishi akɛ Yehowa kpooŋ mi kɛji akɛ mikpɛ miyiŋ akɛ majaje migbɛ̀i. Mi diɛŋtsɛ mibaná mile bɔ ni etsɔseɔ wɔ tamɔ Tsɛ ni yɔɔ suɔmɔ lɛ. Minyɛ migbele mitsui mli miha Yehowa, kɛ hekɛnɔfɔɔ akɛ ebaabo mifaikpamɔ lɛ toi. Kɛ́ misusu be ni eho lɛ he lɛ, manyɛ mikɛ anɔkwayeli awie akɛ nakai kpee ni mikɛ onukpai lɛ kpe afii kpawo ni eho nɛ lɛ ji jɔɔmɔ ni jɛ Yehowa ŋɔɔ. Kɛjɛ nakai beaŋ kɛbaa nɛɛ, mikɛ lɛ teŋ wekukpaa lɛ mli ewa waa fe tsutsu lɛ.”
Hiɛmɔ Jalɛsaneyeli Mli ni Ofee Nɔ ni Ja Gbɛ
20. Mɛɛ sɛɛnamɔi jalɛsaneyeli kɛ jalɛ shishi ní anuɔ ní akɛtsuɔ nii hu lɛ kɛbaa?
20 Wɔdaa shi waa akɛ ŋwɛi jalɛsaneyeli tsɔɔ babaoo fe nɔ ni sa mɔ fɛɛ mɔ ni akɛaaha lɛ kɛkɛ. Yehowa jalɛsaneyeli lɛ tsirɛ lɛ koni eha mɛi fɛɛ ni jieɔ hemɔkɛyeli kpo lɛ naanɔ wala. (Lala 103:10; Romabii 5:15, 18) Nyɔŋmɔ kɛ wɔ yeɔ yɛ nɛkɛ gbɛ nɔ ejaakɛ ejalɛsaneyeli lɛ susuɔ shihilɛi ni wɔyɔɔ mli lɛ he, ni esumɔɔ ni ehere wɔyiwala moŋ fe ní eeebu wɔ fɔ́. Lɛɛlɛŋ, bɔ ni Yehowa jalɛsaneyeli lɛ mlilɛɛmɔ ji lɛ he shishinumɔ kpakpa ni wɔnáa lɛ gbalaa wɔ kɛbɛŋkɛɔ lɛ kpaakpa. Ni yɛ be mli ni wɔbɔɔ mɔdɛŋ ní wɔkase esu kɛ baŋ lɛ fã nɛɛ, wɔ diɛŋtsɛ kɛ mɛi krokomɛi hu ashihilɛ baafee nɔ ni jɔɔmɔ babaoo diɛŋtsɛ yɔɔ mli. Jalɛsaneyeli sɛɛ ni wɔdiɔ lɛ efeŋ efolo yɛ wɔ ŋwɛi Tsɛ lɛ hiɛ kɔkɔɔkɔ. Yehowa ewo wɔ shi akɛ: “Nyɛyea kojomɔ nɔ, ni nyɛfea jalɛ nii; shi miyiwalaheremɔ lɛ eshɛ shi etã, ni mijalɛ lɛ hu abaajie lɛ kpo. Ajɔɔ adesa ni feɔ enɛ lɛ.”—Yesaia 56:1, 2.
[Shishigbɛ niŋmai]
a Kwɛmɔ April 15, 1991 Buu-Mɔɔ, [Vol. 112, No. 8GA] baafai 22-3.
Ani Okaiɔ?
◻ Mɛni Sodom kɛ Gomora hiɛkpatamɔ lɛ tsɔɔ wɔ yɛ Yehowa jalɛsaneyeli lɛ he?
◻ Mɛni hewɔ kpɔmɔnɔ lɛ ji Nyɔŋmɔ jalɛsaneyeli kɛ esuɔmɔ lɛ kpojiemɔ ni sa kadimɔ waa lɛ?
◻ Mɛni ji gbɛ̀i etɛ ni wɔbaanyɛ wɔtsɔ nɔ wɔjie jalɛsaneyeli kpo?
◻ Onukpai lɛ baanyɛ akase ŋwɛi jalɛsaneyeli yɛ mɛɛ gbɛ krɛdɛɛ nɔ?
[Mfoniri ni yɔɔ baafa 15]
Wɔjieɔ jalɛsaneyeli ni Nyɔŋmɔ gbeyeishemɔ yɔɔ mli kpo kɛtsɔ wɔ shiɛmɔ nitsumɔ lɛ nɔ
[Mfoniri ni yɔɔ baafa 16]
Kɛ́ onukpai lɛ jie jalɛsaneyeli ni Nyɔŋmɔ gbeyeishemɔ yɔɔ mli kpo lɛ, efeɔ mlɛo kɛhaa mɛi ni yɔɔ naagbai lɛ akɛ amɛaatao yelikɛbuamɔ kɛjɛ amɛdɛŋ