Mɛni Ŋmalɛi lɛ Kɛɔ yɛ “Nyɔŋmɔ ni Kristo Ji” lɛ He?
YESU KRISTO ena adesai anɔ hewalɛ waa yɛ jamɔ gbɛfaŋ. Nakai eji ejaakɛ akpekpei abɔ kɛɔ akɛ amɛji esɛɛnyiɛlɔi. Shi amɛ fɛɛ amɛkpaaa gbee yɛ mɔ ni eji diɛŋtsɛ lɛ he.
Mɛi ni kɛɔ akɛ amɛkpɛlɛɔ Yesu tsɔɔmɔi lɛ anɔ lɛ ateŋ mɛi komɛi buɔ lɛ Nyɔŋmɔ Bi, shi jeee akɛ Bɔlɔ lɛ diɛŋtsɛ. Mɛi komɛi heɔ “nyɔŋmɔ ni Kristo ji” lɛ amɛyeɔ ni amɛsusuɔ akɛ eji Nyɔŋmɔ diɛŋtsɛ. Amɛheɔ amɛyeɔ akɛ Yesu ehi shi yɛ be fɛɛ mli, ni be mli ni eyɔɔ shikpɔŋ nɛɛ nɔ lɛ no mli lɛ efe adesa ko kɛkɛ. Ani amɛ sane nɛɛ ja? Mɛni Ŋmalɛi lɛ kɛɔ?
Yesu Shihilɛ Dani Ebatsɔ Adesa
Yesu ye odase akɛ ehi shi dani ebatsɔ adesa. Ekɛɛ: “Mɔ ko ekwɔko kɛyako ŋwɛi, akɛ ja mɔ ni jɛ ŋwɛi kpeleke shi lɛ, gbɔmɔ Bi lɛ.” (Yohane 3:13) Yesu jaje hu akɛ: “Miji aboloo ni hiɛ ka ni jɛ ŋwɛi ba lɛ; kɛji mɔ ko ye aboloo nɛɛ eko lɛ, ehiɛ aaaka kɛaatee naanɔ. Shi aboloo ni mikɛbaaha lɛ ji miheloo ni mikɛbaaha yɛ je lɛ wala hewɔ lɛ.”—Yohane 6:51.
Akɛ Yesu hiɛ ka dani eba shikpɔŋ nɔ lɛ jeɔ kpo faŋŋ yɛ ewiemɔi nɛɛ amli: “Miyɛ dani Abraham yɔɔ.” (Yohane 8:58) Abraham hi shi kɛjɛ afi 2018 kɛbashi 1843 D.Ŋ.B., yɛ be mli ni Yesu shihilɛ akɛ adesa lɛ je shishi kɛjɛ afi 2 D.Ŋ.B. kɛbashi 33 Ŋ.B. Dani eeegbo lɛ, Yesu sɔle akɛ: “Ataa, ŋɔɔ anunyam ni miyɔɔ yɛ oŋɔɔ dani je lɛ yɔɔ lɛ owo mihiɛ nyam.”—Yohane 17:5.
Yesu sɛɛnyiɛlɔi lɛ ye odase ni tamɔ nakai nɔŋŋ. Bɔfo Yohane ŋma akɛ: “Shishijee mli lɛ Wiemɔ lɛ yɛ, ni Wiemɔ lɛ kɛ Nyɔŋmɔ yɔɔ, ni Wiemɔ lɛ ji nyɔŋmɔ ko. Lɛ enɔ nibii fɛɛ tsɔ kɛba, ni ashiii lɛ sɛɛ afeee nɔ kome folo. . . . No hewɔ lɛ Wiemɔ lɛ batsɔ heloo ni ebahi wɔteŋ, ni wɔna enunyam lɛ, akɛ bi koome ni jɛ tsɛ ko ŋɔɔ lɛ anunyam; ni duromɔ kɛ anɔkwale eyi lɛ obɔ.” (Yohane 1:1, 3, 14, New World Translation) Hɛɛ, “Wiemɔ lɛ batsɔ heloo” akɛ gbɔmɔ Yesu Kristo.
Yɛ be mli ni bɔfo Paulo wieɔ Yesu shihilɛ dani ebatsɔ gbɔmɔ lɛ he lɛ, eŋma akɛ: “Nɔ ni Kristo Yesu hu jwɛŋ lɛ, no nɔŋŋ nyɛjwɛŋa yɛ nyɛmli, mɔ ni Nyɔŋmɔ su lɛŋ eyɔɔ moŋ, shi ebuuu egbɔ ni ekɛ Nyɔŋmɔ ye lɛ akɛ nihaa nii; shi moŋ ejie yɛ ehe efɔ shi, eŋɔ tsulɔ su efɔ enɔ, ni etsɔ tamɔ gbɔmɔ.” (Filipibii 2:5-7) Paulo tsɛ Yesu “bɔɔ nii fɛɛ ateŋ kromɔ bi lɛ; ejaakɛ lɛ enɔ atsɔ abɔ nibii krokomɛi fɛɛ.”—Kolosebii 1:13-16, NW.
Ejeee Nyɔŋmɔ yɛ Shikpɔŋ Nɔ
Ŋmalɛi lɛ feɔ lɛ faŋŋ akɛ Yesu ji gbɔmɔ kwraa kɛjɛ efɔmɔ mli aahu kɛyashi egbele mli. Yohane ekɛɛɛ akɛ Wiemɔ lɛ kɛ heloo ha ehe kɛkɛ. Wiemɔ lɛ “batsɔ heloo” ni ejeee heloo fa kɛ Nyɔŋmɔ fa. Eji Yesu ji gbɔmɔ kɛ Nyɔŋmɔ fɛɛ yɛ nakai beaŋ nɔŋŋ kulɛ anyɛŋ awie akɛ “aha shwɛ fioo kɛkɛ ni ekɛ ŋwɛibɔfoi aye egbɔ.”—Hebribii 2:9; Lala 8:5, 6.
Eji Yesu ji Nyɔŋmɔ kɛ gbɔmɔ fɛɛ yɛ be mli ni eyɔɔ shikpɔŋ nɔ lɛ kulɛ, mɛni hewɔ esɔle shii abɔ eha Yehowa? Paulo ŋma akɛ: “Mɔ hu ni eheloo gbii lɛ amli lɛ, eŋɔ sɔlemɔi kɛ faikpamɔi ni bolɔmɔi ni naa wa kɛ yaafonui fata he esha afɔle eha mɔ ni yɔɔ hewalɛ ni ekɛaahere lɛ kɛaajɛ gbele mli lɛ, ni abo lɛ toi hu, ejaakɛ ebuɔ Nyɔŋmɔ.”—Hebribii 5:7.
Akɛ Yesu jeee mumɔ fa yɛ be mli ni eyɔɔ shikpɔŋ nɔ lɛ, Petro wiemɔ akɛ “agbe [Kristo] lɛ yɛ heloo gbɛfaŋ moŋ, shi aha lɛ wala yɛ mumɔ gbɛfaŋ” lɛ yeɔ enɛ he odase. (1 Petro 3:18) Akɛni Yesu ji gbɔmɔ kwraa lɛ, no hewɔ ni ebaanyɛ etsɔ niiashikpamɔi ni gbɔmɛi ni yeee emuu lɛ tsɔɔ mli lɛ mli koni no aha etsɔ osɔfonukpa ni nuɔ nii ahe ehaa mɔ. Paulo ŋma akɛ: “Ejaakɛ wɔsɔfonukpa ni wɔyɔɔ lɛ jeee mɔ ni nyɛɛɛ anu wɔgbedemɔi lɛ ahe aha wɔ, shi eji mɔ ko ni aka lɛ yɛ nibii fɛɛ gbɛfaŋ tamɔ wɔ, ni kɛlɛ esha ko esha ko bɛ ehe.”—Hebribii 4:15.
Akɛ “Nyɔŋmɔ Toobi lɛ ni woɔ je lɛ he esha lɛ kɛyaa lɛ,” Yesu “ŋɔ ehe eha akɛ kpɔmɔ nɔ eha mɛi fɛɛ.” (Yohane 1:29; 1 Timoteo 2:6) Nakai gbɛ nɔ Yesu tsɔ ehe nɔ ni Adam laaje lɛ pɛpɛɛpɛ—adesa wala ni yeɔ emuu ni hiɔ shi daa. Akɛni Nyɔŋmɔ jalɛsaneyeli bi ‘susuma yɛ susuma najiaŋ’ hewɔ lɛ, esa akɛ Yesu atamɔ bɔ ni Adam ji kɛjɛ shishijee lɛ—gbɔmɔ ni yeɔ emuu, jeee Nyɔŋmɔ kɛ gbɔmɔ fɛɛ.—5 Mose 19:21; 1 Korintobii 15:22.
Kaagbala Shishinumɔ Ni Jeee Nakai Atsɔɔ Kɛmiijɛ Biblia Mli Ŋmalɛi Amli
Mɛi ni kɛɔ akɛ Yesu ji Nyɔŋmɔ kɛ gbɔmɔ fɛɛ lɛ kɛ ŋmalɛi sɔrɔtoi pii tsuɔ nii koni amɛkɛtsɔɔ akɛ eji Kristendom Triniti lɛ mlinyo, ni tsɔɔ akɛ ekɛ Nyɔŋmɔ yeɔ egbɔ yɛ hewalɛ, anunyam, kɛ tsɛlɛ mli. Shi kɛji akɛ wɔpɛi ŋmalɛi nɛɛ amli jogbaŋŋ lɛ, wɔnaa akɛ mɛi ni fiɔ “Nyɔŋmɔ ni Kristo ji” lɛ sɛɛ lɛ buɔ nɛkɛ ŋmalɛ mli wiemɔi nɛɛ akɛ amɛmiitsɔɔ babaoo fe bɔ ni amɛfeɔ.
Mɛi komɛi kɛɔ akɛ Biblia mli ŋmalɛi ni Nyɔŋmɔ kɛ najiaŋ-gbɛi “wɔ” tsuɔ nii lɛ haa Yesu (Wiemɔ lɛ) ni bako shikpɔŋ nɔ lɛ kɛ Yehowa yeɔ egbɔ. Shi najiaŋ-gbɛi nɛɛ kɛ nitsumɔ etsɔɔɔ akɛ Nyɔŋmɔ kɛ mɔ ko ni ekɛ lɛ yeɔ egbɔ miiwie. Nɔ ni etsɔɔ moŋ ji akɛ yɛ Nyɔŋmɔ sɛɛ lɛ, mɔ ko yɛ gbɛhe ko ni hi mli yɛ ŋwɛi bɔɔ nii ateŋ. Yɛ anɔkwale mli lɛ, Yesu ni tsɔko gbɔmɔ lɛ ji Nyɔŋmɔ hefatalɔ ni bɛŋkɛ lɛ kpaakpa, Nitsulɔ Ŋaalɔ, kɛ Naawielɔ.—1 Mose 1:26; 11:7; Abɛi 8:30, 31; Yohane 1:3.
Shihilɛi ni kɔɔ Yesu baptisimɔ he lɛ etsɔɔɔ akɛ Nyɔŋmɔ, Kristo, kɛ mumɔ krɔŋkrɔŋ lɛ kɛ amɛhe yeɔ egbɔ. Akɛ gbɔmɔ lɛ, abaptisi Yesu akɛ ehe ni ekɛhaa eŋwɛi Tsɛ lɛ he okadi. “Agbele ŋwɛi naa aha lɛ” yɛ nakai be lɛ mli, ni Nyɔŋmɔ mumɔ lɛ kpeleke shi kɛba Yesu nɔ tamɔ okpo. Agbɛnɛ anu Yehowa gbee “kɛjɛ ŋwɛi” miikɛɛ: “Mɔ nɛɛ ji misuɔmɔ Bi ni mina ehe tsui lɛ.”—Mateo 3:13-17.
No hewɔ lɛ mɛni Yesu tsɔɔ beni ekɛɛ esɛɛnyiɛlɔi lɛ akɛ amɛbaptisi kaselɔi “yɛ Tsɛ lɛ kɛ Bi lɛ kɛ mumɔ krɔŋkrɔŋ lɛ gbɛi amli” lɛ? (Mateo 28:19, 20) Yesu etsɔɔɔ loo ekɛɛɛ akɛ lɛ, kɛ e-Tsɛ lɛ kɛ mumɔ krɔŋkrɔŋ lɛ yeɔ egbɔ. Shi moŋ mɛi ni abaptisi amɛ lɛ yɔseɔ Yehowa akɛ amɛ Wala-Halɔ kɛ Nyɔŋmɔ Ofe, mɔ ni amɛjɔɔ amɛwala nɔ amɛhaa lɛ. Amɛkpɛlɛɔ Yesu nɔ akɛ Mesia lɛ, kɛ mɔ ni Nyɔŋmɔ tsɔ enɔ ekɛ kpɔmɔ nɔ ha adesai ni heɔ yeɔ lɛ. Ni amɛyɔseɔ akɛ mumɔ krɔŋkrɔŋ lɛ ji Nyɔŋmɔ nifeemɔ hewalɛ, ni esa akɛ amɛba amɛhe shi amɛha. Shi esaaa akɛ mɛi ni abaabaptisi amɛ nɛɛ susuɔ Yehowa, Yesu, kɛ mumɔ krɔŋkrɔŋ lɛ ahe akɛ Triniti nyɔŋmɔ kome.
Shi ani naakpɛɛ nii ni Yesu fee lɛ etsɔɔɔ akɛ eji Nyɔŋmɔ kɛ gbɔmɔ fɛɛ? Dabi, ejaakɛ Mose, Elia, Elisha, kɛ bɔfo Petro kɛ Paulo kɛ mɛi krokomɛi fee naakpɛɛ nii ni amɛjeee Nyɔŋmɔ kɛ gbɔmɛi fɛɛ. (2 Mose 14:15-31; 1 Maŋtsɛmɛi 18:18-40; 2 Maŋtsɛmɛi 4:17-37; Bɔfoi lɛ Asaji 9:36-42; 19:11, 12) Yesu ji gbɔmɔ ni kɛ Nyɔŋmɔ hewalɛ fee naakpɛɛ nii tamɔ amɛ nɔŋŋ.—Luka 11:14-19.
Yesaia wie Yesu ni ji Mesia lɛ he yɛ gbalɛ mli akɛ “Nyɔŋmɔ hewalɔ.” (Yesaia 9:5) Nakai gbalɔ lɛ nɔŋŋ wie Yehowa he yɛ Yesaia 10:21 akɛ “Mawu hewalɔ.” Mɛi komɛi bɔɔ mɔdɛŋ ni amɛkɛ wiemɔi ni je amɛhe nɛɛ atsɔɔ akɛ Yesu ji Nyɔŋmɔ. Shi ehe miihia ni wɔkwɛ jogbaŋŋ koni wɔkatsɔɔ ŋmalɛ mli kukuji nɛɛ ashishi kɛmiiteke bɔ ni eshishinumɔ ji. Hebri wiemɔ ni atsɔɔ shishi akɛ “Nyɔŋmɔ hewalɔ” lɛ jeee nɔ ni akɛtoɔ Yehowa pɛ he tamɔ bɔ ni wiemɔ “Mawu Ofe” lɛ ji lɛ. (1 Mose 17:1) Wɔkpɛlɛɔ nɔ akɛ sɔrɔtofeemɔ yɛ hewalɔ ni mɔ ko ji lɛ kɛ ofe ni mɔ ko ji, ni mɔ ko bɛ ni fe lɛ lɛ teŋ.
Taakɛ Yesaia 43:10 tsɔɔ lɛ, Yehowa kɛɛ: “Atsɔko mihiɛ ashɔko Nyɔŋmɔ ko, ni eko eko baŋ yɛ misɛɛ.” Shi nakai wiemɔi lɛ etsɔɔɔ akɛ Yesu ji Nyɔŋmɔ. Oti ni yɔɔ mli ji akɛ, mɔ ko bɛ ni etsɔ Yehowa hiɛ, akɛ nyɔŋmɔ ko bɛ ni hi shi dani eba, ejaakɛ eyɛ daa. Nyɔŋmɔ ko baŋ yɛ Yehowa sɛɛ, ejaakɛ ebaahi shi daa ni mɛi ni baaye esɛɛ akɛ Je Muu Fɛɛ Maŋtsɛmɛi ni Fe Fɛɛ bɛ. Shi Yehowa fee mɛi komɛi ni lɛ diɛŋtsɛ etsɛ amɛ nyɔŋmɔi, taakɛ Ŋmalɛi lɛ tsɔɔ kɛtsɔ nɔ ni ewie yɛ adesai komɛi ahewɔ nɛɛ nɔ: “Mi lɛ mikɛɛ akɛ: ‘Nyɔŋmɔi ji nyɛ, ni Ŋwɛinyo lɛ bii ji nyɛbluublu kwa. Kɛlɛ nyɛbaagboi tamɔ gbɔmɛi nɔŋŋ, ni nyɛbaanyɔnyɔi tamɔ lumɛi lɛ eko nɔŋŋ!’” (Lala 82:6, 7) Nakai nɔŋŋ hu Wiemɔ lɛ ji nyɔŋmɔ ko ni Yehowa bɔ lɛ, shi no haaa Yesu kɛ Nyɔŋmɔ Ofe lɛ aye egbɔ yɛ be ko mli.
Yesu Gbɛhe Diɛŋtsɛ
Esa akɛ mɛi ni kɛɔ akɛ Nyɔŋmɔ bahi shi akɛ adesa kɛ Nyɔŋmɔ fɛɛ lɛ ayoo akɛ Biblia lɛ po etsɔɔɔ yɛ gbɛ ko nɔ akɛ Yesu susu lɛ diɛŋtsɛ ehe yɛ nɛkɛ gbɛ nɔ. Shi moŋ etsɔɔ yɛ be fɛɛ mli akɛ Yesu buɔ ehe mɔ ni baa shi kɛ ekɛ ehe miito e-Tsɛ lɛ he. Yesu ewieee gbi ko gbi ko yɛ be mli ni eyɔɔ shikpɔŋ nɔ lɛ akɛ efe Nyɔŋmɔ Bi. Agbɛnɛ Kristo kɛɛ: “Mi-Tsɛ da fe mi.”—Yohane 14:28.
Paulo kɛ sɔrɔto-feemɔ ba Yehowa kɛ Yesu teŋ beni ekɛɛ: “Wɔ lɛ Nyɔŋmɔ kome pɛ wɔyɔɔ, Tsɛ lɛ, mɔ mli ni nibii fɛɛ jɛ, ni wɔyɔɔ wɔha lɛ lɛ, kɛ Nuŋtsɔ kome hu ni ji Yesu Kristo lɛ, mɔ nɔ ni nibii fɛɛ tsɔ kɛba ni wɔ hu wɔtsɔ enɔ lɛ.” (1 Korintobii 8:6) Paulo kɛɛ hu akɛ: “Shi nyɛ lɛ Kristo nii ji nyɛ; shi Kristo lɛ, Nyɔŋmɔ nɔŋ.” (1 Korintobii 3:23) Yɛ anɔkwale mli lɛ, taakɛ Kristofoi fɛɛ ji amɛ Nuŋtsɔ, Yesu Kristo nii lɛ, nakai nɔŋŋ eji e-Yitso ni ji Yehowa Nyɔŋmɔ nii.
Yɛ be mli ni ewieɔ sane ni tamɔ nakai nɔŋŋ he lɛ, Paulo ŋma akɛ: “Nuu fɛɛ nuu yitso ji Kristo, ni yoo fɛɛ yoo hu yitso ji nuu, ni Kristo yitso ji Nyɔŋmɔ.” (1 Korintobii 11:3) Wekukpaa ni ka Nyɔŋmɔ kɛ Kristo teŋ nɛɛ baaya nɔ, ejaakɛ yɛ Yesu Afii Akpe Nɔyeli lɛ sɛɛ, “beni eeeŋɔ maŋtsɛyeli lɛ eha Nyɔŋmɔ kɛ Tsɛ lɛ” sɛɛ lɛ, Bi “lɛ diɛŋtsɛ hu eeeŋɔ ehe eto Mɔ ni ŋɔ nii fɛɛ to eshishi lɛ shishi, koni Nyɔŋmɔ afee nibii fɛɛ ayitso.”—1 Korintobii 15:24, 28; Kpojiemɔ 20:6.
Ŋmalɛi Krokomɛi Ahesusumɔ
Mateo ŋma yɛ Yesu fɔmɔ he akɛ: “Shi afee enɛ fɛɛ koni nɔ ni Nuŋtsɔ lɛ [Yehowa] wie yɛ gbalɔ lɛ naa [yɛ Yesaia 7:14] lɛ aba mli akɛ: ‘Naa, obalayoo fro lɛ aaana musu, ni eeefɔ binuu, ni aaawo lɛ gbɛi Imanuel,’ eshishi ji: ‘Nyɔŋmɔ Kɛ Wɔ Yɛ.’” (Mateo 1: 22, 23) Awooo Yesu gbɛi akɛ Imanuel, shi enitsumɔ akɛ adesa lɛ ha eshishinumɔ lɛ ba mli. Ba ni Yesu ba shikpɔŋ nɛɛ nɔ akɛ Mesia Seshi kɛ David maŋtsɛsɛi lɛ Gboshiniyelɔ lɛ ma nɔ mi ha Yehowa jalɔi akɛ Nyɔŋmɔ kɛ amɛ yɛ, eyɛ amɛsɛɛ, eefi amɛ sɛɛ yɛ amɛ nitsumɔi amli.—1 Mose 28:15; 2 Mose 3:11, 12; Yoshua 1:5, 9; Lala 46:6-8; Yeremia 1:19
Yɛ be mli ni ekɛ Yesu ni atee lɛ shi lɛ wieɔ lɛ, bɔfo Toma bo akɛ: “Mi-Nuŋtsɔ kɛ mi-Nyɔŋmɔ!” (Yohane 20:28) Enɛ kɛ nibii krokomɛi fee saji ni “aŋma koni [wɔ]he [wɔ]ye akɛ Yesu ji Kristo, Nyɔŋmɔ Bi lɛ.” Ni Toma eteee shi ewooo Yesu ni kɛ shɛɛ saji nɛɛ emaje E-kaselɔi lɛ: “Miiya ŋwɛi yɛ . . . mi-Nyɔŋmɔ kɛ nyɛ hu nyɛ-Nyɔŋmɔ lɛ ŋɔɔ.” (Yohane 20:17, 30, 31) No hewɔ lɛ Toma susuuu akɛ Yesu ji Nyɔŋmɔ Ofe lɛ. Ekolɛ Toma wie Yesu he akɛ “mi-Nyɔŋmɔ” kɛ shishinumɔ akɛ Kristo ji “nyɔŋmɔ ko,” eyɛ mli akɛ ejeee “anɔkwa Nyɔŋmɔ kome pɛ” lɛ. (Yohane 1:1; 17:1-3, NW) Aloo Toma kɛ ewiemɔ akɛ “mi-Nyɔŋmɔ” lɛ miikpɛlɛ Yesu nɔ akɛ Nyɔŋmɔ Naawielɔ, kɛ Najiaŋdamɔlɔ, taakɛ bɔ ni mɛi krokomɛi wie ŋwɛibɔfo ko ni atsu lɛlɛ he tamɔ akɛ eji Yehowa lɛ.—Okɛto 1 Mose 18:1-5, 22-33; 31:11-13; 32:24-30; Kojolɔi 2:1-5; 6:11-15; 13:20-22 he.
Taakɛ Biblia lɛ tsɔɔ lɛ, Yesu yɛ shihilɛ mli akɛ Wiemɔ lɛ dani ebatsɔ gbɔmɔ. Beni eyɔɔ shikpɔŋ nɔ lɛ no mli lɛ ejeee Nyɔŋmɔ kɛ gbɔmɔ fɛɛ. Eji gbɔmɔ kɛyi shi, eyɛ mli akɛ eyeɔ emuu, taakɛ Adam ji kɛjɛ shishijee lɛ. Kɛjɛ Yesu shitee lɛ sɛɛ kɛbaa nɛɛ, etsɔ mumɔ ni gbooo ni awo enɔ ni hɔ Nyɔŋmɔ shishi yɛ be fɛɛ mli. Belɛ eka shi faŋŋ akɛ, Ŋmalɛi lɛ fiii “Nyɔŋmɔ ni Kristo ji” he jwɛŋmɔ lɛ sɛɛ.
[Akrabatsa ni yɔɔ baafa 23]
Ani Ŋwɛibɔfoi Jaa Yesu?
SHlSHITSƆƆMƆl komɛi tsɔɔ Hebribii 1:6 shishi akɛ: “Ha Nyɔŋmɔ bɔfoi fɛɛ aja lɛ [Yesu].” (King James Version, The Jerusalem Bible) Eka shi Faŋŋ akɛ bɔfo Paulo tsɛ wiemɔ kɛjɛ Septuagint lɛ mli ni ekɛɔ yɛ Lala 97:7 akɛ: “Nyɛ E-bɔfoi lɛ fɛɛ, nyɛjaa Lɛ [Nyɔŋmɔ].”—C. Thomson.
Akɛ Hela wiemɔ pro·sky·neʹo ni atsɔɔ shishi akɛ “jamɔ” loo “aja” yɛ Hebribii 1:6 lɛ tsu nii yɛ Lala 97:7 yɛ Septuagint lɛ mli akɛha Hebri wiemɔ sha·chahʹ ni eshishi ji “akoto shi.” Enɛ baanyɛ afee nifeemɔ ni akpɛlɛɔ nɔ ni tsɔɔ bulɛ kɛha adesai (1 Mose 23:7; 1 Samuel 2:9; 2 Maŋtsɛmɛi 2:15) Aloo ebaanyɛ ekɔ anɔkwa Nyɔŋmɔ lɛ jamɔ aloo nɔ ni akɛhaa apasa nyɔŋmɔi yɛ gbɛ ni ejaaa nɔ lɛ he.—2 Mose 23:24; 24:1; 34:14; 5 Mose 8:19
Nɔ ní ale ji, pro·sky·neʹo ni akɛhaa Yesu lɛ tamɔ woo ni akɛhaa maŋtsɛmɛi kɛ mɛi krokomɛi. (Okɛ Mateo 2:2, 8; 8:2; 9:18; 15:25: 20:20 ato 1 Samuel 25:23, 24; 2 Samuel 14:4-7; 1 Maŋtsɛmɛi 1:16; 2 Maŋtsɛmɛi 4: 36, 37 he.) Yɛ bei babaoo mli lɛ efeɔ faŋŋ akɛ akɛ woo loo jamɔ haa Yesu ní jeee akɛ Nyɔŋmɔ, shi akɛ “Nyɔŋmɔ Bi” loo Mesia “gbɔmɔ Bi” lɛ.—Mateo 14:32, 33; Luka 24:50- 52: Yohane 9:35, 38.
Hebribii 1:6 lɛ kɔɔ Yesu gbɛhe akɛ mɔ ni yɔɔ Nyɔŋmɔ shishi lɛ he. (Filipibii 2:9-11) Shishitsɔɔmɔi komɛi tsɔɔ pro·sky·neʹo shishi yɛ biɛ akɛ “akɛ . . . bulɛ aha” (The New English Bible), “akɛ woo aha” (New World Translation), loo “akoto shi yɛ. . .hiɛ” (An American Translation). Kɛji mɔko miisumɔ wiemɔ “jamɔ” lɛ, belɛ akɛ jamɔ ni tamɔ nɛkɛ lɛ feɔ nɔ ni husu yɔɔ mli, ejaakɛ Yesu kɛɛ Satan akɛ: “Nuŋtsɔ [Yehowa] o-Nyɔŋmɔ lɛ oja, [pro·sky·neʹo] ni lɛ kɛkɛ osɔmɔ.”—Mateo 4:8-10.
Eyɛ mli akɛ akɛ Lala 97:7, ni wieɔ Nyɔŋmɔ ni aaaja lɛ lɛ he lɛ to Kristo he yɛ Hebribii 1:6 moŋ, shi Paulo etsɔɔ akɛ Yesu ni atee Iɛ shi Iɛ ji “[Nyɔŋmɔ] enunyam lɛ kpɛmɔ kɛ esu lɛ henɔ.” (Hebribii 1:1-3) No hewɔ lɛ “jamɔ” fɛɛ “jamɔ” ni ŋwɛibɔfoi lɛ kɛhaa Nyɔŋmɔ Bi lɛ ji nɔ ni akɛtoɔ nii ahe loo husu yɔɔ mli ni lɛ enɔ atsɔɔ akɛhaa Yehowa.