Biblia Mli Anɔkwale ni Agbɛɔ Ashwãa yɛ Portugal

WUOYAA lɛji fɛfɛji akpei abɔ mamɔ Portugal Atlantik Ŋshɔnaa ni shɛɔ kilomitai 800 lɛ fɛɛ naa, kɛjɛ Caminha ni yɔɔ kooyigbɛ lɛ kɛbashi Vila Real de Santo Antônio, ni apɛnte amɛ kɛ sui sɔrɔtoi. Wolɛi ‘etee wuo yɛ amɛ lɛji amli’ afii ohai abɔ, ni eha ŋshɔŋloo efee Portugal bii pii aniyenii titri.—Lala 107:23.

Wuoyaa kroko miiya nɔ yɛ Portugal fe afii 70 ni eho nɛ. Yehowa Odasefoi kɛ sanekpakpa miiha okadi looi akpei nyɔŋmai abɔ ni deka bɛ mli kwraa. (Mateo 4:19) Ana Maŋtsɛyeli shiɛlɔi 44,650 ni ji yibɔ ni fe fɛɛ yɛ May 1995—shiɛlɔ 1 yɛ maŋbii aaafee 210 teŋ. Mlijaa lɛ shɛɔ enɛ fã yɛ maŋtiasei komɛi amli.

Akɛni nitsulɔi lɛ fa babaoo hewɔ lɛ, shikpɔŋkukuji ni ayeɔ odase yɛ mli lɛ pii yɛ ni atsuɔ mli nii daa otsi. No hewɔ lɛ Portugal Odasefoi lɛ sumɔɔ waa akɛ amɛaatsɔ gbɛi sɔrɔtoi anɔ amɛye odase bɔni afee ni amɛgbɛ amɛ Biblia mli hiɛnɔkamɔ lɛ amɛtsɔɔ mɛi krokomɛi. Hɛɛ, amɛhiɛ sɔɔ bɔ ni ehe hiaa ni amɛaaha ale Biblia mli anɔkwale lɛ yɛ gbɛ fɛɛ gbɛ ni amɛaanyɛ nɔ.—1 Korintobii 9:20-23.

Mɛi ni Sumɔɔ Nyɔŋmɔ Jamɔ ni Ayeɔ Abuaa Amɛ

Taakɛ gbɔmɛi akanemɔ ko ni afee yɛ 1991 lɛ tsɔɔ lɛ, mɛi ni amɛye afii 18 loo fe nakai ni yɔɔ Portugal lɛ oha fɛɛ mli 70 kɛɔ akɛ Roma Katolikbii ji amɛ. Yɛ enɛ fɛɛ sɛɛ lɛ, Biblia lɛ he nilee eba shi kwraa yɛ gbɔmɛi lɛ ateŋ. Adafitswaa wolo, Jornal de Notícias lɛ wie akɛ: “Enɛ ji osharai ni fe fɛɛ yɛ Katolik je lɛ mli lɛ ateŋ ekome: Biblia he nilee ni abɛ!” Mɛni hewɔ eyɔɔ nakai? Portuguese adafitswaa wolo, Expresso lɛ tsɔɔ nɔ ni ji hetoo lɛ. Beni ebɔɔ kpee ko ni osɔfoi 500 fee yɛ Fátima lɛ he amaniɛ lɛ, wolo lɛ kɛɛ: “Taakɛ osɔfonukpa lɛ tsɔɔ lɛ, ehe miihia ni osɔfo lɛ aye ehe kɛjɛ nifeemɔi babaoo ni bɛ naagbee lɛ ahe, bɔni afee ni enyɛ eto egbɛhe akɛ mɔ ni ‘jajeɔ sane etsɔɔ’ lɛ ema shi jogbaŋŋ. . . . Kɛji akɛ osɔfo lɛ kɛ esusuma muu fɛɛ wo Sanekpakpa jajemɔ mli lɛ, enaŋ be kɛhaŋ nitsumɔi krokomɛi.”

Nɔ ni tamɔɔɔ enɛ lɛ, Yehowa Odasefoi ni yɔɔ Portugal lɛ bɛ deka kwraa yɛ Biblia mli anɔkwale ni amɛhaa mɛi leɔ yɛ gbɛ fɛɛ gbɛ ni amɛaanyɛ nɔ lɛ mli. Yɛ enɛ hewɔ lɛ, Katolikbii anɔkwafoi pii miina Biblia lɛ he nilee.

Carlota ji Katoliknyo ni etu ehe eha kɛ gbekɛbii akuu ni ji jamɔ gbɛjianɔtoo lɛ fã lɛ mli nyo. Eji tsɔɔlɔ hu yɛ kindergarten, he ni Antônio, Odasefonyo ko tsuɔ nii yɛ lɛ. Ákɛ daa gbɛgbalɔ, loo be-fɛɛ sɔɔlɔ lɛ, Antônio bɔɔ mɔdɛŋ be fɛɛ be ni ekɛ enanemɛi nitsulɔi lɛ awie Biblia lɛ he beni akpa shwane. Gbi ko lɛ Carlota bi lɛ hɛl la mli hemɔkɛyeli kɛ Maria jamɔ he sane. Antônio tsɔɔ lɛ nɔ ni Biblia lɛ tsɔɔ yɛ saji nɛɛ ahe, ni enɛ je Biblia mli sanegbaai pii ashishi. Beni Carlota tee eklɛŋklɛŋ kpee yɛ Maŋtsɛyeli Asa lɛ nɔ lɛ, ehiɛ sɔ nɔ ni ena lɛ waa. Shi, kpee bei lɛ kɛ jamɔ gbɛjianɔtoo ni eyɔɔ mli lɛ nɔ̃ kpaaa gbee. Eyoo akɛ esa akɛ ekpɛ eyiŋ. Mɛni ebaafee?

Carlota bua gbekɛbii akuu muu lɛ fɛɛ naa kɛkpe, ni ejɛ Biblia lɛ mli etsɔɔ nɔ hewɔ ni eshiɔ amɛteŋ lɛ. Amɛ fɛɛ amɛwie amɛshi eyiŋkpɛɛ lɛ, ja obalayoo fioo ko ni atsɛɔ lɛ Stela, ni bo lɛ toi jogbaŋŋ lɛ pɛ. Beni yɛ sɛɛ mli lɛ Carlota kɛ lɛ wie lɛ, Stela bi saji pii yɛ wala shishijee kɛ eyiŋtoo he. Carlota kɛ Life—How Did It Get Here? By Evolution or by Creation?a wolo lɛ ha lɛ, ni ekɛ lɛ je Biblia lɛ kasemɔ shishi.

Beni enɛ yaa nɔ lɛ, Carlota tee ehiɛ waa yɛ mumɔŋ, abaptisi lɛ yɛ June 1991, ni eje daa gbɛgbamɔ sɔɔmɔ lɛ shishi no sɛɛ nyɔji ekpaa. Ekɛ Antônio bote gbalashihilɛ mli yɛ May 1992, ni amɛyi enyɔ lɛ fɛɛ tee nɔ amɛsɔmɔ yɛ asafo ko ni bɛŋkɛ ni hiamɔ da yɛ jɛmɛ lɛ mli. Ni Stela hu? Abaptisi lɛ yɛ May 1993, ni eesɔmɔ bianɛ akɛ daa gbɛgbalɔ.

Francisco ni edako tsɔ lɛ sumɔɔ Nyɔŋmɔ jamɔ waa. Eyaa Mass daa Hɔgbaa leebi kɛ Sɔlemɔ Ashinao lɛ kanemɔ yɛ shwane mli. Eyeɔ ebuaa osɔfo lɛ kɛ aafee Mass. Esɔle eha Nyɔŋmɔ po koni gbi ko lɛ afee lɛ “hetselɔ”!

Francisco miitao diɛŋtsɛ ni enine ashɛ Biblia nɔ, ni gbi ko lɛ enaanyo ko kɛ eko ma lɛ. Enaa kpɛ ehe beni ena akɛ Nyɔŋmɔ yɛ gbɛi, Yehowa. (2 Mose 6:3; Lala 83:19) Beni ekane yɛ 2 Mose 20:4, 5 akɛ Nyɔŋmɔ miihi amagai ni akɛtsuɔ nii yɛ jamɔ mli lɛ, eha enaa kpɛ ehe babaoo moŋ! Akɛni ena akɛ sɔlemɔ lɛ mli eyi obɔ kɛ amagai hewɔ lɛ, esɔle waa eha Nyɔŋmɔ koni eye ebua lɛ ni enu yiŋfutumɔi nɛɛ fɛɛ shishi. Gbii babaoo sɛɛ lɛ, ekɛ etsutsu skul nyo ko kpe ni ebi lɛ nɔ hewɔ ni ebaaa gbɛkɛ skul dɔŋŋ lɛ.

Enaanyo lɛ ha lɛ hetoo akɛ: “Miiya gbɛkɛ skul kpakpa bianɛ.”

Francisco bi lɛ akɛ: “Mɛni ji nakai skul lɛ, ni mɛni okaseɔ?” Enaanyo lɛ hetoo lɛ ha enaa kpɛ ehe waa diɛŋtsɛ.

Enaanyo lɛ kɛɛ lɛ akɛ: “Miikase Biblia lɛ yɛ Yehowa Odasefoi a-Maŋtsɛyeli Asa lɛ nɔ. Ani obaasumɔ ni ofata mihe kɛya?”

Francisco nyɛɛɛ ahe nɔ ni ena yɛ eklɛŋklɛŋ kpee lɛ shishi lɛ aye—miishɛɛ hiɛi ni miiŋmɔ; gbɔmɛi ni kɛ amɛhe miiwie yɛ miishɛɛ kɛ naanyobɔɔ su mli, gbekɛbii ni kɛ amɛ fɔlɔi tara shi ni miibo sane ni awieɔ lɛ toi.

Francisco wie akɛ: “Naa mi, gbɔ kwraa, ni minu he tamɔ nɔ ni mifata weku lɛ he!” Kɛjɛ no nɔ kɛbaa nɛɛ ebaa kpeei daa. Amrɔ nɛɛ Francisco miisɔmɔ akɛ onukpa yɛ asafo lɛ mli, ni ekɛ eŋa kɛ ebii enyɔ lɛ fɛɛ mli filiɔ amɛ yɛ Maŋtsɛyeli shiwoi wuji ni yɔɔ Nyɔŋmɔ Wiemɔ lɛ mli lɛ ahe.

Anɔkwale lɛ ni Agbaa Wekumɛi

Manuela, daa gbɛgbalɔ ko ni yɔɔ Lisbon kpokpaa lɛ nɔ gbe mumɔŋ looi babaoo yɛ etsuishiŋmɛɛ mli ni ejɛ ekɛ mlihilɛ yeɔ mɛi fɛɛ odase, ni wekumɛi fata he lɛ hewɔ. Mɔ ni fata ehe ji eheloonaa nyɛmi nuu, José Eduardo, ni atsɔse lɛ yɛ abɔtirifɔ̃ɔ kɛ mɔgbee dadei kɛ nitsumɔ mli lɛ. Etɔ̃ mla nɔ shii abɔ akɛ yɛ naagbee lɛ, akɛ saji 22 folɔ enaa ni awo lɛ tsuŋ afii 20. Bɔ ni eyɔɔ basabasa sɔŋŋ ha hewɔ lɛ, gbokɛlɛfoi krokomɛi lɛ po sheɔ lɛ gbeyei, ni akɛ lɛ yato buu he ko ni yɔɔ banee.

Manuela kɛ tsuishitoo ye ebua José Eduardo afii kpawo, shi ekpooɔ Biblia mli shɛɛ sane lɛ be fɛɛ be. Yɛ naagbee lɛ, beni afee Life—How Did It Get Here? By Evolution or by Creation? wolo lɛ, ekpɛlɛ nɔ, ni aje Biblia mli nikasemɔ shishi. Amrɔ nɔŋŋ ni efee tsakemɔi wuji yɛ ejeŋba mli. Otsi kome sɛɛ lɛ, eye lɛ diɛŋtsɛ ehe odase etsɔɔ gbokɛlɛfoi 200, ni yɛ otsi ni nyiɛ sɛɛ lɛ mli lɛ, 600 kroko. Enine shɛ gbɛŋmɛɛ wolo ni baaha eyasara gbokɛlɛfoi krokomɛi ni yɔɔ ŋsara lɛŋ hei krokomɛi hu lɛ nɔ. Yɛ tsakemɔ kpele ni ba ejeŋba mli hewɔ lɛ, atse etsuŋwoo lɛ nɔ kɛba afii 15. Beni esɔmɔ afii 10 sɛɛ lɛ, aha lɛ heyeli fioo ko. Kɛjɛ no beaŋ kɛbaa nɛɛ, afii enumɔ eho, ni José Eduardo ji Yehowa Odasefonyo ni abaptisi lɛ bianɛ, ni miisɔmɔ akɛ asafoŋ sɔɔlɔ yɛ emaŋ lɛ mli asafo lɛ mli. Lɛlɛŋ, ‘kalaŋ kɛ gwantɛŋ bi aaahi shi’ sane lɛ eko nɛ!—Yesaia 11:6.

Yɛ mɔdɛŋ ni Manuela tee nɔ ebɔ ni ekɛye eweku lɛ odase hewɔ lɛ, ena miishɛɛ akɛ eye ebua ewu kɛ eweku lɛ mli bii krokomɛi ejwɛ koni amɛkɛ amɛhe awo Yehowa sɔɔmɔ mli. Ewu lɛ ebafee asafoŋ sɔɔlɔ bianɛ.

“Mikɛ Ŋtiashimɔ kɛ Kpaa Baawo Amɛ Foi”

Maria do Carmo yɛ Lisbon maji bibii lɛ eko mli beni Odasefoi lɛ ba eŋɔɔ. Nɔ ni enu lɛ ŋɔɔ enaa, ni ebi ewu Antônio, kɛ ebaaŋmɛ lɛ gbɛ ni akɛ lɛ akase Biblia lɛ yɛ shia. Eha hetoo akɛ: “Kaajwɛŋ enɛ feemɔ he po! Kɛ mina Yehowa Odasefoi yɛ mishia lɛ, mikɛ ŋtiashimɔ kɛ kpãa baawo amɛ foi.” No mli lɛ Antônio ji abɔtirifɔ̃ɔ he tsɔɔlɔ kɛ mɔ ni eye abɔtirifɔɔ kɛ karate mli kunim. No hewɔ lɛ Maria do Carmo kpɛ eyiŋ akɛ ebaafee e-Biblia mli nikasemɔ lɛ yɛ he kroko.

Yɛ sɛɛ mli lɛ, ehe bahia ni Antônio aya England gbii kpaanyɔ kɛha karate he nikasemɔ, ni Maria do Carmo kɛ henɔkwɛmɔ jogbaŋŋ kɛ My Book of Bible Stories wolo lɛ wo ebaagi mli.b Akɛni Antônio na be babaoo yɛ egbɛfaa lɛ mli hewɔ lɛ, ekane wolo lɛ. Beni ekuɔ esɛɛ kɛbaa shia lɛ, ahum ko hoso kɔɔyɔŋ lɛlɛ lɛ waa, ni etɔ lɛ kɛ shiyimɔ. Enɛ ji klɛŋklɛŋ be yɛ Antônio shihilɛ mli ni esɔle eha Yehowa.

Beni Antônio bashɛ shia lɛ, Odasefonyo ni kɛ eŋa lɛ kaseɔ nii lɛ fɔ lɛ nine koni eba kpee. Ekpɛlɛ nɔ, ni ena akɛ mɔ fɛɛ mɔ yɛ naanyobɔɔ su. Ato gbɛjianɔ aha Biblia lɛ kasemɔ, ni yɛ be fioo mli lɛ, Antônio le akɛ esa akɛ ekpɛ eyiŋ yɛ saji komɛi ahe. Nɔ ni jɛ mli ba ji akɛ, ekpa karate tsɔɔmɔ, ni eje shishi etsɔɔ enikaselɔi lɛ bɔ ni aaafee ahi shi yɛ toiŋjɔlɛ mli bianɛ kɛ agbɛnɛ kɛmiiya naanɔ. Amɛteŋ mɔ kome, ni lɛ hu eji kunimyelɔ lɛ ji Kristofonyo ni abaptisi lɛ bianɛ.

Yɛ Antônio gbɛfaŋ lɛ, abaptisi lɛ yɛ April 1991. Ebaptisimɔ gbi lɛ sɛɛ pɛ ni eje shishi akɛ eeesɔmɔ akɛ gbɛgbalɔi awalɔ. Nyɔji ekpaa sɛɛ lɛ, eje shishi akɛ eeesɔmɔ akɛ daa gbɛgbalɔ, ni etsɛɛɛ ni ebɔi shia Biblia mli nikasemɔi 12 feemɔ. Ahala lɛ akɛ asafoŋ sɔɔlɔ yɛ asafo lɛ mli yɛ July 1993.

Yɛ Shikpɔŋkuku ni Afɔɔ Mli Nitsumɔ Mli

Hei pii yɛ maŋ lɛ mli ni atsuɔ shikpɔŋkuku lɛ mli nii daa otsi loo nɔ̃. Te Odasefoi lɛ tsuɔ amɛ ‘wuoyaa’ nitsumɔi lɛ ahe nii yɛ gbɛ ni woɔ yibii nɔ amɛhaa tɛŋŋ?

João bɔɔ mɔdɛŋ ni enine ashɛ mɔ fɛɛ mɔ nɔ yɛ shia fɛɛ shia. Beni esaraa awura ko lɛ, ebi kɛji akɛ mɛi krokomɛi hu yɛ shia lɛ mli. Awura lɛ ha hetoo akɛ ewu kɛ gbekɛbii hii enyɔ hiɔ jɛmɛ, shi akɛ nine aaashɛ amɛnɔ lɛ efeŋ mlɛo, ejaakɛ amɛtsuɔ nii ni amɛbaa shia gbɛkɛ pɛ. No hewɔ lɛ, João tsa eshiɛmɔ lɛ nɔ ni eyasara mɛi krokomɛi yɛ akutso lɛ mli. Aaafee ŋmɛlɛtswaa kome kɛ fã sɛɛ lɛ, nuu ko ba eŋɔɔ.

Nuu lɛ bi João akɛ: “Okɛɛ oosumɔ ni okɛ mi awie. Ofainɛ kɛɛmɔ mi nɔ ni otaoɔ.”

João ni naa ekpɛ ehe lɛ ha hetoo akɛ: “Ofainɛ, shi mileee bo. Namɔ ji bo?”

“Miji Antônio, ni gbɛjegbɛ nɛɛ nɔ mishia yɔɔ. Okɛɛ minyɛ akɛ oosumɔ ni okɛ weku lɛ mli bii krokomɛi ni eshwɛ lɛ awie, no hewɔ lɛ miba koni mibale nɔ ni otaoɔ.”

João ye Antônio odase jogbaŋŋ ni ekɛ lɛ je Biblia lɛ kasemɔ shishi. Yɛ nikasemɔ ni ji enyɔ lɛ sɛɛ lɛ, Antônio bi kɛ abaanyɛ afee nikasemɔ lɛ shii enyɔ yɛ otsi mli. Yɛ nyɔji ejwɛ pɛ sɛɛ lɛ, ekɛ ehe bɔ João he ni ebɔi sanekpakpa lɛ shiɛmɔ yɛ lɛ diɛŋtsɛ egbɛjegbɛ nɔ. Nyɔji etɛ sɛɛ lɛ, abaptisi lɛ. Enyɛ hu ebɔi Biblia lɛ kasemɔ nyɛsɛɛ nɛɛ. Kwɛ bɔ ni ehe hiaa akɛ aaabɔ mɔdɛŋ ni akɛ shia lɛ mli bii fɛɛ awie yɛ sɔɔmɔ lɛ mli!

Miishɛɛ niiashikpamɔi ni tamɔ nɛkɛ tsɔɔ akɛ mumɔŋ wuoyaa babaoo yɛ ni abaafee yɛ Portugal nui lɛ ahiɛ. Yehowa kɛ Biblia kasemɔi akpei abɔ ni yaa hiɛ ejɔɔ Odasefoi ni tsuɔ nii waa ni yɔɔ jɛmɛ lɛ. Yɛ be mli ni amɛyaa nɔ amɛbɔɔ mɔdɛŋ amɛtaoɔ gbɛi sɔrɔtoi babaoo ni amɛaatsɔ nɔ amɛha mɛi fɛɛ ale Biblia mli anɔkwale lɛ, belɛ bɔfo Paulo wiemɔi ni eŋma eyaha Kristofoi ni yɔɔ Filipi lɛ hu miiba mli anɔkwale yɛ Portugal ŋmɛnɛ: “Yɛ gbɛ fɛɛ gbɛ nɔ lɛ . . . aashiɛ Kristo aatsɔɔ.”—Filipibii 1:18, NW.

[Shishigbɛ niŋmai]

[Shikpɔŋ he mfoniri ni yɔɔ baafa 23]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

SPAIN

PORTUGAL

[Mfonirii ni yɔɔ baafa 24, 25]

Odasefoi ni yɔɔ Portugal lɛ kɛ hegbɛ fɛɛ hegbɛ tsuɔ nii koni amɛha ale Biblia mli anɔkwale lɛ