Afee Ekome Yɛ Yehowa Wiemɔ Lɛ Jajemɔ Mli
“Nyɛnaa jwɛŋmɔ kome yɛ nyɛteŋ tamɔ Kristo Yesu; koni nyɛkɛ jwɛŋmɔ kome kɛ naabu kome awo Nyɔŋmɔ kɛ wɔ-Nuŋtsɔ Yesu Kristo tsɛ lɛ hiɛ nyam.”—ROMABII 15:5, 6.
1. (a) Mɛni ji gbɛjianɔ ni Yehowa eto koni efee ewebii lɛ ekome? (b) Mɛni ji nɔ ni Ŋmalɛi lɛ tsɔɔ yɛ bɔ ni ato ekomefeemɔ nɛɛ he gbɛjianɔ aha?
1 YEHOWA ebua edasefoi lɛ anaa ewo je muu fɛɛ ekomefeemɔ ko ni jara wa mli. Enɛ kɛ Nyɔŋmɔ we he gbɛjianɔtoo ni bɔfo Paulo tsɔɔ mli yɛ Efesobii 1:10 lɛ kpaa gbee: “Nɔkwɛmɔ gbɛjianɔtoo yɛ be ní ato lɛ naagbee, koni ebua nibii fɛɛ anaa ekoŋŋ yɛ Kristo mli, nibii ni yɔɔ ŋwɛi kɛ nibii ni yɔɔ shikpɔŋ nɔ.” Mɛi ni abaabua amɛnaa klɛŋklɛŋ ji “asafoku bibioo” ni ji Kristofoi ni afɔ amɛ mu ni baaya ŋwɛi lɛ kɛ agbɛnɛ yɛ no sɛɛ lɛ, “asafo babaoo . . . ni jɛ jeŋmaji fɛɛ mli” ni kpaa gbɛ akɛ amɛbaaje mli kɛyabote jalɛ “shikpɔŋ hee” ni Nyɔŋmɔ ewo shi yɛ he lɛ mli lɛ.—Luka 12:32; Kpojiemɔ 7:3, 4, 9, 13-17; 21:1, 5.
2. Mɛni haa Yehowa Odasefoi nyɛɔ amɛwieɔ “kɛ jwɛŋmɔ kome”?
2 “Jwɛŋmɔ kome”—nakai ji gbɛ ni nɛkɛ Yehowa odasefoi nɛɛ tsɔɔ nɔ amɛwieɔ Maŋtsɛyeli lɛ he sane nɛɛ. Mɛni hewɔ amɛnyɛɔ amɛfeɔ nakai? Ejaakɛ amɛjieɔ “jwɛŋmɔ kome” kpo “tamɔ Kristo Yesu” yɔɔ yɛ be mli ni eyɔɔ shikpɔŋ nɛɛ nɔ lɛ yɛ je lɛŋ he fɛɛ he. Ejeee je ni pupuuɔ ehe nɛɛ fã. Shi moŋ, eba ehe shi yɛ Nyɔŋmɔ suɔmɔnaa nifeemɔ mli ni ekɛtswa ekomefeemɔ ni suɔmɔ kɛ miishɛɛ yɔɔ mli ewo ekaselɔi lɛ amli. Enɛ ji je muu fɛɛ “ekomefeemɔ ko shishijee ni ha abayoo anɔkwale Kristofoi yɛ afii ohai abɔ ni nyiɛ sɛɛ lɛ amli lɛ.—Filipibii 2:5-8; Yohane 13:34, 35; 17:14.
3. (a) Mɛɛ sɔrɔtofeemɔ agbo ko anaa yɛ shikpɔŋ nɔ ŋmɛnɛ? (b) Mɛɛ gbɛ nɔ Ŋmalɛi lɛ yeɔ buaa yɛ koni ayoo anɔkwale Kristofoi aje muu fɛɛ asafo lɛ?
3 Nɛkɛ ekomefeemɔ yɛ gbɛjianɔtoo mli nɛɛ eshɛ he ni ejeɔ kpo waa yɛ naakpɛɛ gbɛ nɔ, yɛ “naagbee gbii” nɛɛ amli, ni eji nii ni damɔɔ shi akɛ nɔ ko ni esoro lɛ kwraa yɛ Satan nibii agbɛjianɔtoo ni mligbalamɔ yɔɔ mli ni nyɛ̃ɛ kɛ mlakwamɔ egbɛ eshwa mli nɛɛ he. (2 Timoteo 3:1-5, 13; Mateo 24:3, 12) Adesa yinɔsane mli be ko bako da ni gbɛjianɔtoo ko ni kɛ ehe kpaa yɛ hemɔkɛyeli, yiŋtoo kɛ nitsumɔ mli ehi shi yɛ je nɛɛ mli yɛ shikpɔji 203 nɔ nɛkɛ da. Abaanyɛ ayoo nɛkɛ je muu fɛɛ Yesu kaselɔi asafo nɛɛ kɛtsɔ yibii ni amɛwoɔ lɛ nɔ.—Yohane 15:8; Hebribii 13:15; Galatabii 5:22, 23.
Ekomefeemɔ Yɛ Nifeemɔ Mli
4. (a) Mɛɛ ŋwanejee te shi yɛ klɛŋklɛŋ afii oha lɛ mli asafo mli? (b) Taakɛ bɔfoi lɛ Asaji 15:1-6 tsɔɔ lɛ, mɛɛ teokrase nifeemɔ ato he gbɛjianɔ?
4 Áfee ekomefeemɔ yɛ nifeemɔ mli yɛ Yehowa gbɛjianɔtoo lɛ mli lɛ he nɔkwɛmɔ nɔ aha wɔ yɛ Bɔfoi lɛ Asaji yitso 15. Bo lɛ feemɔ Yehowa odasefoi ni amɛdara yɛ mumɔŋ niábua amɛnaa yɛ hekome lɛ ahe mfoniri yɛ ojwɛŋmɔ mli—bɔfoi 11 lɛ, kɛ Yerusalem asafo lɛ mli onukpai krokomɛi kɛ Paulo kɛ Barnaba, onukpai ni jɛ Antiokia asafo lɛ mli. Mɛi ni atsake amɛ kɛjɛ Yuda jamɔ mli ni yɔɔ Antiokia kɛ Yerusalem lɛ ateŋ mɛi komɛi miima nɔ mi akɛ esa akɛ afo gbɔmɛi ni jɛ jeŋmaji lɛ ateŋ lɛ ketia, ni esa akɛ amɛye Mose Mla lɛ nɔ dani ahere amɛyiwala. No hewɔ lɛ bɔfoi lɛ kɛ onukpai lɛ kpe “yɛ nɛkɛ sane nɛɛ hewɔ.”—Bɔfoi lɛ Asaji 15:1-6.
5-7. (a) “Aje ŋwane aahu” yɛ mɛɛ shishinumɔ mli? (b) Mɛɛ odaseyeli akɛha? (d) Mɛɛ gbɛ nɔ akɛ Ŋmalɛi lɛ tsu nii yɛ sane nɛɛ he yɛ? (e) Mɛɛ sane mlitsɔɔmɔ ni tsɔɔ mumɔŋ dalɛ Yakobo kɛha, ni ekɛ mɛɛ yiŋkpɛɛ ba yɛ naagbee? (ɛ) Mɛɛ nifeemɔ nyiɛ sɛɛ?
5 Amɛteŋ mɔ fɛɛ mɔ tsɔɔ ejwɛŋmɔ yɛ naagba lɛ he susumɔ mli, ni nɛkɛ hii ni amɛtu amɛhe amɛha nɛɛ fɛɛ tsɔɔ amɛjwɛŋmɔ kɛ nɔ hewɔ ni amɛfiɔ sɛɛ kɛ nɔ hewɔ ni amɛfiii sɛɛ lɛ. Amɛtsɔko hiɛ amɛtoko amɛyiŋ yɛ sane nɛɛ he. Amɛmiisumɔ ni amɛtao sane lɛ mli fitsofitso yɛ gbɛi sɔrɔtoi anɔ. “Aje ŋwane aahu,” shi eka shi faŋŋ akɛ amɛha gbɛjianɔtoo kpakpa hi shi ni amɛkɛ bulɛ bo jwɛŋmɔ ni mɔ fɛɛ mɔ hiɛ lɛ toi. Bɔfo Petro ye anɔkwale ni eji akɛ Nyɔŋmɔ kɛ mumɔ krɔŋkrɔŋ eha gbɔmɛi ni jɛ jeŋmaji lɛ ateŋ ni afoko amɛ ketia lɛ he odase—yɛ anɔkwale mli lɛ, odaseyeli ni mli wa waa ni tsɔɔ akɛ heloo naa ketiafoo he ehiaaa dɔŋŋ akɛ taomɔ nii kɛha mɛi ni abaahere amɛyiwala lɛ. Barnaba kɛ Paulo hu kɛ amɛ odaseyeli fata enɛ he, ni amɛtsɔɔ naakpɛɛ nibii ni Nyɔŋmɔ etsu kɛtsɔ amɛ sɔɔmɔ lɛ nɔ yɛ jeŋmaji abii lɛ ateŋ lɛ.—Bɔfoi lɛ Asaji 15:7-12.
6 Nɔ ni nyiɛ sɛɛ lɛ, Yakobo tsɛ Ŋmalɛi ni ekɛfi sane mlitsɔɔmɔ ni akɛha nɛɛ sɛɛ. Etsɔɔ mli akɛ Amos 9:11, 12 tsɔɔ be mli ni abaaku sɛɛ akɛ ŋwɛi duromɔ aha ekoŋŋ yɛ David Kpeteŋkpele, Yesu Kristo shishi, kɛ bɔ ni Yehowa kɛ mlihilɛ ni esaaa wɔ baaha “jeŋmaji fɛɛ ni akɛ migbɛi [Yehowa] ewo amɛ lɛ.” Yakobo na akɛ ehe ehiaaa ni ahao mɛi ni atsake amɛ ni jɛ jeŋmaji lɛ ateŋ lɛ kɛtsɔ ma ni aaama nɔ mi akɛ esa akɛ afo amɛ ketia ni amɛye mlai lɛ fɛɛ ni yɔɔ Mose Mla lɛ mli lɛ nɔ. Shi nibii fioo ko pɛ ji nɔ ni he hiaa. Esa akɛ amɛtsi amɛhe kɛjɛ wɔŋjamɔ he, amɛkaye lá ko lá ko, ni amɛtsi amɛhe kɛjɛ ajwamaŋbɔɔ he.—Bɔfoi lɛ Asaji 15:13-21.
7 Nɔyeli kuu lɛ ni yɔɔ Yerusalem lɛ kpa gbee ni amɛfee ekome yɛ amɛyiŋtoo lɛ mli. Amɛtsu bɔfoi kɛtee Antiokia asafo lɛ mli kɛ wolo ni kɛ hewalɛwoo wiemɔi nɛɛ gbe naa: “Kɛji nyɛtsi nyɛhe kɛjɛ nɛkɛ nibii nɛɛ fɛɛ he lɛ, nyɛbaashwere. Nyɛhia shi jogbaŋŋ!”—Bɔfoi lɛ Asaji 15:22-29, NW.
Nifeeemɔ Yɛ Teokrase Gbɛ Nɔ
8. (a) Mɛɛ gbɛ nɔ atsɔɔ akudɔɔ ŋmɛnɛŋmɛnɛ beaŋ Nɔyeli Kuu lɛ koni amɛkpɛ amɛyiŋ? (b) Mɛni ji saji komɛi ni aha emli efee faŋŋ yɛ nyɛsɛɛ nɛɛ?
8 Yɛ ŋmɛnɛŋmɛnɛ beaŋ hu lɛ, Yehowa Odasefoi a-Nɔyeli Kuu, ni damɔ Nuŋtsɔ lɛ “tsulɔ anɔkwafo kɛ nilelɔ” lɛ najiaŋ yɛ shikpɔŋ nɛɛ nɔ lɛ nyiɛɔ nakai bɔfoi lɛ anɔkwɛmɔ nɔ lɛ nɔŋŋ sɛɛ. (Mateo 24:45-47) No hewɔ lɛ, Kristofoi aniiashikpamɔ, gbɛtsɔɔmɔ ni jɛ Biblia lɛ mli, kɛ Yehowa mumɔ lɛ kudɔmɔ ni amɛnyiɛɔ sɛɛ lɛ kudɔɔ nɛkɛ Odasefoi akuu ni afɔ amɛ mu nɛɛ kɛyaa saji wuji ni he hiaa asafo lɛ waa ni amɛmuɔ naa yɛ Teokrase gbɛ nɔ lɛ he. Akɛ nɔkwɛmɔ nɔ lɛ, Nɔyeli Kuu lɛ enyiɛ Ŋmalɛ naa nifeemɔ gbɛ lɛ sɛɛ ni ámɛha saji tamɔ nɔ ni Biblia lɛ kɛɔ yɛ “sɔɔlɔi” (minsters) , henilee ni Nyɔŋmɔ kɛha, tawuu nii ni ahiɛɔ, kɛ he ni Yesaia gbalɛ lɛ mli nibii kɔɔ wɔsɛɛ be Paradeiso ni baaba shikpɔŋ nɛɛ nɔ lɛ he ehaa lɛ ahe lɛ mli efee faŋŋ.—Okɛto Yohane 14:26; 1 Korintobii 2:10 he.
9. Mɛɛ gbɛ esa akɛ onukpai lɛ atsɔ nɔ ni amɛkɛtsu naagbai ahe nii ŋmɛnɛ?
9 Esa akɛ asafoŋ onukpai lɛ hu anyiɛ nifeemɔ gbɛ ni yɔɔ Bɔfoi lɛ Asaji, yitso 15 lɛ sɛɛ yɛ naagbai ahe nitsumɔ mli ŋmɛnɛ yɛ asafo lɛ mli. Klɛŋklɛŋ lɛ, atsɔɔ naagba lɛ kɛ saji ni kɔɔ he lɛ fɛɛ mli faŋŋ. Nɔ ni nyiɛ sɛɛ lɛ, aha odasefoi ni abaanyɛ akɛ he afɔ amɛ nɔ aye nɛkɛsaji nɛɛ ahe odase yɛ anɔkwale mli. Atao Ŋmalɛi lɛ amli ni ana Yehowa jwɛŋmɔ, ni akɛ yelikɛbuamɔ ni ákɛha yɛ Buu Mɔɔ Asafo lɛ woji amli lɛ hu afata he. Akɛ sɔlemɔ atsu nii ni aba gbeekpamɔ yɛ sane lɛ naamuu mli, yɛ Yehowa Wiemɔ lɛ mlitsɔɔmɔ kɛ gbeekpamɔ naa, bɔ ni enɛ he aaaba sɛɛnamɔ aha asafo lɛ.—Yesaia 48:17; 1 Korintobii 14:33.
Miishɛɛ—Yɛ No Beaŋ Kɛ Ŋmɛnɛ
10. (a) Taakɛ eji yɛ klɛŋklɛŋ afii oha lɛ mli asafo lɛ mli lɛ, te esa akɛ yiŋ ni akpɛɔ yɛ teokrase gbɛ nɔ lɛ ana wɔnɔ hewalɛ yɛ ŋmɛnɛ aha tɛŋŋ? (b) Yɛ mɛɛ gbɛ nɔ nibii ni nine eshɛ nɔ ŋmɛnɛ lɛ ewaje Yehowa webii ni eha amɛyi efa?
10 Beni amɛnu nɔyeli kuu lɛ yiŋkpɛɛ lɛ, Antiokia asafo lɛ mlibii lɛ “amii shɛ amɛhe yɛ miishɛjemɔ lɛ hewɔ.” Nakai nɔŋŋ hu ŋmɛnɛ, Yehowa Odasefoi amii shɛɔ amɛhe kɛ amɛkase gbɛjianɔtoo lɛ yiŋkpɛɛi kɛ tsɔɔmɔi amlitsɔɔmɔ ni haa Nyɔŋmɔ webii amumɔŋ hewalɛ shwereɔ ni agbɛnɛ ehaa Yehowa nitsumɔ lɛ yaa hiɛ lɛ he nii lɛ. (Okɛto Tito 2:1 he.) Shi ehe ehiaaa dɔŋŋ akɛ Nɔyeli Kuu lɛ aaaŋmala gbɛtsɔɔmɔi ahe woji kɛ nine ni akɛha bɔfoi ni faa gbɛ ni amɛnyiɛ ni amɛkɛ enɛɛmɛi ayaha asafoi lɛ. Ŋmɛnɛŋmɛnɛ beaŋ gbɛ ni atsɔɔ nɔ awieɔ kɛ tsɔnei ni akɛkalaa woji ni yɔɔ Buu Mɔɔ Asafo lɛ nitsumɔ he niji fe 30 amli yɛ shikpɔŋ lɛ nɔ he fɛɛ he lɛ haa anyɛɔ akɛ “Yehowa wiemɔ lɛ he sanekpakpa lɛ” yahaa Nyɔŋmɔ webii akpekpei abɔ lɛ yɛ be kuku mli. Afeɔ enɛ, titri lɛ kɛtsɔɔ Buu-Mɔɔ wolo tɛtrɛɛ lɛ nɔ. No hewɔ lɛ asafoi ni yɔɔ jeŋ fɛɛ lɛ yaa nɔ ‘amɛnaa hewalɛ yɛ hemɔkɛyeli mli ni amɛyi faa daa nɛɛ.’—Bɔfoi lɛ Asaji 15:30–16:5.
11. Yehowa kɛ Buu-Mɔɔ lɛ etsu nii ni eha Yesaia 30:18-21 eba mli yɛ mɛɛ gbɛ nɔ?
11 Mɛi ni amɛkane Buu-Mɔɔ lɛ afii pii lɛ hu amii shɛɔ amɛhe akɛ yifalɛ ni akalaa lɛ miiya hiɛ. Kɛje be mli ni aje ekalamɔ shishi yɛ afii 105 ni eho nɛ lɛ, nɛkɛ wolo tɛtrɛɛ nɛɛ efa kɛjɛ ekomekomei 6,000 yɛ Ŋleshi wiemɔ mli shikome yɛ daa nyɔŋ nɔ, kɛyashɛ ekome-komei 11,150,000 yɛ wiemɔi 103 mli, ni wiemɔi titrii lɛ fɛɛ anɔ̃ jeɔ kpo shii enyɔ daa nyɔŋ nɔ. Ŋwanejee ko bɛ he, wɔ Tsɔɔlɔ Kpele, Yehowa Nyɔŋmɔ, kɛ Buu-Mɔɔ Iɛ etsu nii waa ni ekɛha eshiwoo nɛɛ eba mli: “Miishɛɛ ji mɛi fɛɛ ni kpaa lɛ gbɛ lɛ! . . . Ni bo diɛŋtsɛ otoii hu aaanu wiemɔ ko yɛ osɛɛ akɛ: ‘Gbɛ lɛ nɛ. Nyɛnyiɛa nɔ, nyɛ gbɔmɛi,’ ninejurɔgbɛ nyɛtsɔ jio, abɛkugbɛ nyɛtsɔ jio.”—Yesaia 30:18-21.
12. (a) Mɛni hewɔ wɔyɔɔ nɔ ni wɔbaanyɛ wɔdamɔ nɔ wɔna miishɛɛ lolo yɛ ŋmɛnɛ lɛ? (b) Esa akɛ nɛkɛ gbɛjianɔtoo hee nɛɛ he aba sɛɛnamɔ aha wɔ yɛ mɛɛ gbɛ nɔ?
12 Agbɛnɛ nɔ kroko hu yɛ ni abaanyɛ adamɔ nɔ ana miishɛɛ. Kɛjɛ afi 1985 shishijee kɛyaa nɛɛ, aakala Buu-Mɔɔ lɛ akɛ nɔ ni emli sane baafee ekome yɛ be kometoo lɛ nɔŋŋ mli, yɛ wiemɔia 23 mli! Nɔ ni akalaa yɛ be kome mli nɛɛ hiɛ hehaa nɔ kome. Hiɛkpamɔ wiemɔ kome yɛɛ fɛɛ mli kɛ nikasemɔ kome hu. Enɛ kɛ “lɛɛ” aloo niyeli he gbɛjianɔtoo kome yɛ mumɔŋ dalɛ mli “kɛyashi beyinɔ ni wɔ fɛɛ wɔɔshɛ . . . hemɔkɛyeli . . . ekomefeemɔ lɛ he hãa.” Esa akɛ ekanya wɔ babaoo koni wɔkɛ “jwɛŋmɔ kome kɛ naabu kome awo Nyɔŋmɔ kɛ wɔ-Nuŋtsɔ Yesu Kristo tsɛ lɛ hiɛ nyam.”—Efesobii 4:13; Romabii 15:6.
13. (a) Akɛ gbɛjianɔtoo nɛɛ etsu nii kɛtee shɔŋŋ kɛyashɛ nɛgbɛ? (b) Abaanyɛ akɛ 1 Korintobii 1:10 ato enɛ he yɛ mɛɛ gbɛ nɔ?
13 Kɛ ohiɛ wolo tɛtrɛɛ nɛɛ yɛ daa otsi asafoŋ Buu-Mɔɔ nikasemɔ shishi lɛ, ani omii shɛɛɛ ohe akɛni ole akɛ onyɛmimɛi ni yɔɔ je lɛŋ hei sɔrɔtoi hu efee ekome kɛmiiye nɛkɛ mumɔŋ niyenii nɛɛ nɔŋŋ yɛ nɛkɛ gbi nɛɛ nɔŋŋ nɔ? Hɛɛ, enɛ baaba mli yɛ Amerika Kooyi kɛ Wuoyigbɛ fɛɛ, yɛ Europa hei babaoo, yɛ Japan kɛ agbɛnɛ hei babaoo yɛ Afrika Wuoyigbɛ! Abuɔ naa akɛ mɛi ni fe oha fɛɛ mli 90 ni yaa Buu-Mɔɔ nikasemɔ lɛ shishi yɛ shikpɔŋ lɛ nɔ he fɛɛ he—aaafee gbɔmɛi 2,500,000 daa otsi—lɛ miiná niyenii ni ayeɔ yɛ be kome mli lɛ he gbɛjianɔtoo lɛ he sɛɛ. Aaha mɛnɛɛmɛi fɛɛ ‘ayitsoŋ kɛ jwɛŋmɔŋ sane miifee ekome.’ (1 Korintobii 1:10) Kɛ shihilɛi ŋmɛ gbɛ lɛ, akɛ wiemɔi krokomɛi hu baafata he.
14. Ehe baaba sɛɛnamɔ aha wekui yɛ mɛɛ gbɛ nɔ?
14 Dani gbɛjianɔtoo nɛɛ aaaba lɛ, nyɔji pii ji nɔ ni kamɔ wekui pii amli yɛ Buu-Mɔɔ lɛ mli saji pɔtɛɛ komɛi akasemɔ mli. Shi agbɛnɛ amɛbaafee ekome yɛ enɛ mli. Akɛ nɔkwɛmɔ nɔ lɛ, fɔlɔi ni amɛfa gbɛ amɛbahi maŋ nɛɛ mli ni le maŋ kroko nɔ wiemɔ jogbaŋŋ pɛ lɛ baanyɛ ni amɛkɛ amɛbii bibii ni wieɔ Ewe, Ga loo Twi lɛ atara shi ni amɛkase Buu-Mɔɔ lɛ mli nikasemɔ kɛha nakai otsi lɛ yɛ wiemɔi enyɔ lɛ fɛɛ mli. Wekui ni wieɔ wiemɔi enyɔ lɛ baaha fɔlɔi afee mɛi ni awula amɛ jogbaŋŋ koni amɛtsu famɔ ni yɔɔ Efesobii 6:4 kɛ 2 Timoteo 3: 14, 15 lɛ he nii.
15. (a) Mɛni wɔbaanyɛ wɔfee agbɛnɛ yɛ wɔ maŋ sɔɔmɔ mli yɛ Yesaia 52:8, 9 kɛ gbeekpamɔ naa? (b) Mɛni abaanyɛ afee kɛjɛ 1985 shishijee mli ni agbɛnɛ kɛha wɔsɛɛ be?
15 Agbɛnɛ susumɔ wɔ maŋ sɔɔmɔ ni wɔkɛ woji tɛtrɛbii tsuɔ lɛ hu he. Maŋtsɛyeli shiɛlɔi ni yɔɔ jeŋ muu lɛ fɛɛ lɛ baanyɛ ni “amɛbolɔ yɛ ekomefeemɔ mli” yɛ nɔ ni ato gbɛjianɔ afata he nɛɛ hu hewɔ, yɛ be mli ni amɛkɛ adafitswaa loo saji ni kɛ amɛhe kpaa gbee haa gbɔmɛi ni yɔɔ je lɛ mli yɛ be kometoo lɛ nɔŋŋ mli lɛ. (Yesaia 52:8, 9) Yɛ be mli ni amɛkɛ woji tɛtrɛbii haa yɛ gbɛjegbɛi anɔ yɛ shikpɔŋkukuji ni awieɔ wiemɔi sɔrɔtoi yɛ mli lɛ amli lɛ, shiɛlɔi baanyɛ ajie woji tɛtrɛbii ni yɔɔ wiemɔi enyɔ loo nɔ ni fe nakai mli ni wiemɔ kome too lɛ yɔɔ fɛɛ mli lɛ kpo amɛtsɔɔ. Bo lɛ susumɔ he okwɛ! Yɛ afi 1985 shishijee mli lɛ, Maŋtsɛyeli shiɛlɔi ni yɔɔ shikpɔŋ lɛ nɔ he fɛɛ he lɛ ye odase wulu ko yɛ ekomefeemɔ mli yɛ Harmagedon he! Yɛ be ni sa mli lɛ, Yehowa baakojo ewebii lɛ ni amɛjaje saji ni mli wa ni tamɔ nɛkɛ yɛ ekomefeemɔ mli yɛ jeŋ fɛɛ yɛ be mli ni amɛsɔmɔɔ ni amɛkɛ “jwɛŋmɔ kome miipele sanekpakpa lɛ hemɔkɛyeli lɛ he” lɛ. (Filipibii 1: 27) Buu-Mɔɔ lɛ ni akalaa emli saji yɛ wiemɔi sɔrɔtoi babaoo mli yɛ be kome too lɛ nɔŋŋ mli lɛ baaha nɛkɛ adafitswaa loo sane jajemɔ nɛɛ ahi.—Okɛto Daniel 11:44 he.
Wɔmiikwɛ Wɔhiɛ Gbɛ
16. (a) Mɛni ji nɔ ni nɛkɛ Buu-Mɔɔ nɛɛ kɛɔ wɔ yɛ woji tɛtrɛbii anitsumɔ lɛ he yɛ baafa 16?(b) Mɛni hewɔ wɔwoji tɛtrɛbii lɛ ahe hiaa gbɔmɛi ŋmɛnɛ lɛ?
16 Yehowa Odasefoi ja woji tɛtrɛbii, Buu Mɔɔ lɛ kɛ Awake! lɛ babaoo diɛŋtsɛ yɛ 1984 afi lɛ mli. Yehowa jɔɔ nitsumɔ nɛɛ nɔ babaoo, ni wɔnaa enɛ kɛjɛɔ akɔntaabuu ni atsɔɔ ni yɔɔ baafa 16 yɛ wolo nɛɛ mli lɛ. Kɛ akɛto jeŋ fɛɛ nɔ̃ lɛ he lɛ, woji tɛtrɛbii ni wɔkɛha yɛ 1984 lɛ tee hiɛ oha fɛɛ mli 11.1, ni fɛɛ feɔ woji tɛtrɛbii 287,358,064, ni nɔ ni ashɛɔ lɛ hu tee hiɛ oha fɛɛ mli 3.2, ni fɛɛ hu yafee 1,812,221. Sanebimɔ ko bɛ bɔ ni gbɔmɛi pii taoɔ ni amɛle nɔ hewɔ ni jeŋmaji lɛ efee hoo, ‘amɛfee yeyeeye’ lɛ he. (Luka 21:25, 26) Fɔlɔi miisumɔ wɔsɛɛ be ni miishɛɛ yɔɔ mli amɛha amɛbii—nɔ ko ni hi fe shikpɔŋ ni akɛ nuklea eshã fɛɛ. Wɔwoji tɛtrɛbii lɛ hiɛ hiɛnɔkamɔ ni wala yɔɔ mli!—Mateo 12:18, 21; Romabii 15:4.
17. Wɔ woji tɛtrɛbii lɛ baaye abaa wɔ ni wɔte shi wɔwo Abonsam yɛ mɛɛ gbɛ nɔ?
17 Ni afi 1985 hu? Shɛɛ sane ni yɔɔ Buu-Mɔɔ lɛ kɛ Awake! lɛ amli lɛ miifee nɔ ni amɛmiima nibii anɔ mi pɔtɛɛ diɛŋtsɛ. Abaakpa enɛ gbɛ yɛ be mli ni Satan je lɛ naagbee gbii lɛ anaa muaa lɛ. (Kpojiemɔ 12:12) Kaatɔ̃ yɛ enɛ mli! Abonsam baabɔ mɔdɛŋ ni eje wɔnijiaŋ wui koni wɔkɛ wɔhe akawo Yehowa sɔɔmɔ mli daa. Hɛɛ, Satan baasumɔ ni etsirɛ wɔ kɛjɛ Nyɔŋmɔ webii asafo lɛ kɛ nitsumɔ he, koni ena hegbɛ ni emi wɔ. (1 Petro 5:8) Shi wɔbaanyɛ wɔte shi wɔwo lɛ kɛtsɔ kpe ni wɔɔkpe daa koni wɔtao anɔkwale nilee lɛ nɔ, koni wɔkɛ anɔkwale nilee ni yaa hiɛ nɛɛ atsu nii ni wɔkɛsɔmɔ Yehowa.—Efesobii 6:11, 14-16; Kolosebii 1:9-11.
18. (a) Te gbɛnaa nii ni ka onɔ akɛ Maŋtsɛyeli shiɛlɔ lɛ da ha tɛŋŋ? (b) Te wɔɔfee tɛŋŋ ni wɔkɛ ŋaawoo ni yɔɔ Romabii 12:10, 11 kɛ 15:5, 6 lɛ atsu nii?
18 Ani oji Maŋtsɛyeli shiɛlɔ? Kɛji nakai ni lɛ, ohiɛ gbɛhe ni he hiaa yɛ ŋmɛnɛŋmɛnɛ beaŋ teokrase asafo lɛ mli. Akɛ Kristofonyo ni ojɔɔ ohe nɔ lɛ, ekolɛ oyɛ gbɛnaa nii krokomɛi yɛ asafo lɛ mli. Ni kɛlɛ, dani ooohi shi yɛ Yehowa gbɛi lɛ naa lɛ, esa akɛ ofee sɔɔlɔ ni yɔɔ ekaa yɛ shiɛmɔ mli. Akɛni wɔfee ekome yɛ nyɛmimɛi asuɔmɔ mli ni agbɛnɛ wɔdɔɔ wɔhe hewɔ lɛ, nyɛhaa wɔ fɛɛ wɔyaa nɔ akɛ mɛi ni mumɔ lɛ ewo amɛ hewalɛ yɛ be mli ni ‘wɔsɔmɔɔ Yehowa’ lɛ. (Romabii 12:10, 11) Bɔ fɛɛ bɔ ni nɔnyɛɛ ni jɛɔ Satan ŋɔɔ kɛ je lɛ mli baa wɔnɔ lɛ ji ha lɛ, esa akɛ wɔya nɔ akɛ gbɔmɔtso kome, hɛɛ, ‘kɛ jwɛŋmɔ kɛ naabu kome,’ koni wɔkɛwo Yehowa hiɛ nyam kɛtsɔ Maŋtsɛyeli yiŋtooi lɛ ni wɔɔha mɛi ale lɛ nɔ.
19. (a) Te wɔɔfee tɛŋŋ wɔnyɛ wɔdamɔ yiwaa kɛ naagbai krokomɛi anaa yɛ omanyeyeli mli? (b) Mɛɛ ŋaawoo Zefania 3:8, 9 kɛhaa wɔ?
19 Wɔteŋ mɛi pii tsuɔ nii kɛ tɔlɛ yɛ yiwaa mli, aloo yɛ shikpɔŋkukuji ni abooo wɔ shiɛmɔ lɛ toi yɛ mli lɛ amli. Shi kɛlɛ, nyɛhaa wɔyaa nɔ wɔjiea jwɛŋmɔ ni Kristo yɔɔ lɛ nɔŋŋ eko kpo. (Yohane 16:33; 1 Petro 4:1, 2) Akɛ kuu ni wɔfee ekome lɛ, nyɛhaa wɔjiea ekãa ni ji anɔkwale nɔ̃ kpo—mligbɛ mumɔŋ hewalɛ ni hiɔ shi daa ni kumɔɔɔ yɛ nɔnyɛɛ shishi lɛ. (Lala 27:14; Filipibii 1:14) Nyɛkahaa wɔgbɔjɔa wɔniji amli yɛ mɛi ni tamɔ gwantɛŋi lɛ ataomɔ mli. Nyɛhaa wɔfea mɛi ni “miikpa” Yehowa kɛ ekojomɔ gbi lɛ “gbɛ,” ni wɔkɛ kɔŋ kome asɔmɔ lɛ yɛ be mli ni wɔtsɛɔ egbɛi ni wɔwieɔ anɔkwale lɛ kɛ “naabu krɔŋŋ” lɛ.—Zefania 3:8, 9.
20. (a) Te wɔɔfee tɛŋŋ wɔna anɔkwale miishɛɛ? (b) Yesaia 11:6-9 ena mɛɛ mlibaa ni yɔɔ naakpɛɛ?
20 Eba akɛ wɔ fɛɛ wɔɔwo Nyɔŋmɔ hiɛ nyam yɛ ekomefeemɔ mli, ni “nyɛwo gbɔmɔ hee ni abɔɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.” (Efesobii 4:24) Nɔ ni jɛɔ mli baa ji anɔkwale miishɛɛ. Áfee enɛ he mfoniri yɛ Yesaia 11:6-9 ni gbaa wɔ mumɔŋ paradeiso ni yɔɔ Yehowa webii ni akɛ amɛ eba amɛshihilɛ hé ekoŋŋ lɛ ateŋ lɛ he sane lɛ. Kwɛ bɔ ni hiɛjoomɔ, kɛ sui gbohii elaaje kwraa ha! Wɔkadiɔ nɛkɛ wiemɔi nɛɛ akɛ nɔ ni gbeɔ nɛkɛ paradeiso shihilɛ nɛɛ mlitsɔɔmɔ lɛ naa: “Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu ha ŋshɔ shishi lɛ.” Akɛ Yehowa “gɔŋ krɔŋkrɔŋ” ni ji ejamɔ ni efee ekome lɛ ema shi shiŋŋ ŋmɛnɛ yɛ shikpɔŋ lɛ nɔ he fɛɛ he. Mɛni hewɔ? Ejaakɛ Yehowa etsirɛ edasefoi lɛ koni amɛkɛ ‘naabu kome kɛ jwɛŋmɔ kome’ awo egbɛi lɛ hiɛ nyam. No hewɔ lɛ, “shikpɔŋ lɛ” ni ji E-webii lɛ amumɔŋ shihilɛ hé lɛ eyi obɔ kɛ “Yehowa he nilee.”
21. Mɛni hewɔ esa akɛ wɔja wɔ woji tɛtrɛbii nɛɛ yɛ Jeŋ fɛɛ bɔ ni wɔɔnyɛ lɛ?
21 Eba akɛ wɔɔja Buu-Mɔɔ lɛ kɛ ehefatalɔ wolo tɛtrɛɛ ni ji Awake! lɛ babaoo diɛŋtsɛ bɔ ni wɔɔnyɛ yɛ hewalɛ ni Yehowa kɛha wɔ lɛ mli. Ni eba akɛ wɔɔfee nakai yɛ hiɛnɔkamɔ akɛ shikpɔŋ lɛ nɔ naagbee hei fɛɛ kɛ jeŋmaji amli wekui fɛɛ amli bii lɛ “aaakai ni amɛtsɔ amɛhe kɛba Yehowa ŋɔɔ.”—Lala 22:27; Kpojiemɔ 15:4, NW.
[Shishigbɛ niŋmaa]
a Nɛkɛ wiemɔi nɛɛ ji: Afrikaans, Danish, Dutch, English, Finnish, French, German, Italian, Japanese, Norwegian, Portuguese, Spanish, Swedish, kɛ Thai; Afrika wiemɔi lɛ ji: Sepedi, Sesotho, Tsonga, Tswana, Venda, Khosa kɛ Zulu; kɛ wiemɔi enyɔ yɛ shikpɔji ni atsi Yehowa Odasefoi anitsumɔ lɛ naa yɛ jɛmɛ.
Nikasemɔ Nɛɛ Mlitii—
◻ Te klɛŋklɛŋ afii oha lɛ mli asafo lɛ tsuɔ nii ehaa tɛŋŋ?
◻ Mɛɛ sɛɛnamɔi esa akɛ eba yɛ Buu-Mɔɔ Iɛ ni akalaa fɛɛ yɛ be kome mli lɛ hewɔ?
◻ Mɛɛ mɔdɛŋ kpakpa ko abɔ yɛ woji tɛtrɛbii lɛ ahe yɛ 1984?
◻ Te wɔɔfee tɛŋŋ wɔshwere yɛ mumɔŋ, yɛ kaai abe mli po?