Yitso Nyɔŋma Kɛ Etɛ
Yiwalaheremɔ kɛ Mlifilimɔ Yɛ Mesia lɛ Nɔyeli Shishi
1. Tsɔɔmɔ bɔ ni Nyɔŋmɔ webii ni ekɛ amɛ efee kpaŋmɔ lɛ amumɔŋ shihilɛ ji yɛ Yesaia gbii lɛ amli.
YƐ YESAIA gbii lɛ amli lɛ, no mli lɛ Nyɔŋmɔ webii ní ekɛ amɛ efee kpaŋmɔ lɛ amumɔŋ shihilɛ ehiii kwraa. Yɛ maŋtsɛmɛi anɔkwafoi tamɔ Uzia kɛ Yotam nɔyeli shishi po lɛ, no mli lɛ gbɔmɛi lɛ ateŋ mɛi babaoo jáa yɛ hei grɔŋŋi lɛ. (2 Maŋtsɛmɛi 15:1-4, 34, 35; 2 Kronika 26:1, 4) Beni Hezekia batsɔ maŋtsɛ lɛ, ehe bahia ní ejie nibii kɛ nifeemɔi ní kɔɔ Baal jamɔ he lɛ fɛɛ kɛjɛ shikpɔŋ lɛ nɔ. (2 Kronika 31:1) Ebɛ naakpɛɛ akɛ Yehowa wo ewebii lɛ hewalɛ ní amɛku amɛsɛɛ amɛba eŋɔɔ, ni ebɔ amɛ kɔkɔ yɛ toigbalamɔ ní baa lɛ he!
2, 3. Mɛɛ hewalɛwoo Yehowa kɛha mɛi ní sumɔɔ ní amɛsɔmɔ lɛ, yɛ anɔkwa ni ayeee, ní egbɛ eshwã he fɛɛ he lɛ fɛɛ sɛɛ?
2 Shi kɛlɛ, jeee maŋbii lɛ fɛɛ ji atuatselɔi diɛŋtsɛ. Yehowa yɛ gbalɔi anɔkwafoi, ni eeenyɛ efee akɛ Yudafoi lɛ ekomɛi yɛ ní bo amɛ toi. Yehowa hiɛ miishɛjemɔ wiemɔi kɛha mɛnɛɛmɛi. Beni etsɔɔ hiɛkpatamɔ ní yɔɔ gbeyei ní Ashurbii atutuamɔ lɛ kɛbaaba Yuda nɔ lɛ sɛɛ lɛ, akɛ mumɔ tsirɛ gbalɔ Yesaia ni eŋma wiemɔi kukuji ní ŋɔɔ fe fɛɛ yɛ Biblia lɛ mli lɛ ateŋ ekome, ni ji jɔɔmɔi ní baaba yɛ Mesia lɛ nɔyeli shishi lɛ mlitsɔɔmɔ efɔ̃ shi.a Nɛkɛ jɔɔmɔi nɛɛ fãi komɛi baná emlibaa yɛ gbɛ bibioo nɔ beni Yudafoi lɛ ku amɛsɛɛ kɛjɛ Babilon nomŋɔɔ mli kɛba lɛ. Shi gbalɛ muu lɛ fɛɛ baaná emlibaa wulu ŋmɛnɛ. Lɛɛlɛŋ, Yesaia kɛ Yudafoi anɔkwafoi krokomɛi ní hi shi yɛ egbii lɛ amli lɛ ehiii shi ní amɛaana jɔɔmɔi nɛɛ. Shi amɛkɛ hemɔkɛyeli kwɛ jɔɔmɔi nɛɛ agbɛ, ni amɛbaana Yesaia wiemɔi lɛ amlibaa yɛ gbohiiashitee lɛ sɛɛ.—Hebribii 11:35.
3 Hewalɛwoo he miihia Yehowa webii ní yɔɔ ŋmɛnɛŋmɛnɛ beaŋ lɛ hu. Jeŋbai kpakpai ní fiteɔ oyayaayai yɛ je lɛŋ, Maŋtsɛyeli shɛɛ sane lɛ he shitee-kɛ-woo ní naa wa, kɛ amɛ aŋkroaŋkro gbɔjɔmɔi ji kaa kɛha amɛ fɛɛ. Yesaia wiemɔi ni yɔɔ miishɛɛ, ní kɔɔ Mesia lɛ kɛ enɔyeli lɛ he lɛ baanyɛ awo Nyɔŋmɔ webii lɛ hewalɛ ní eye ebua amɛ ní amɛkpee nɛkɛ kaai nɛɛ anaa.
Mesia—Hiɛnyiɛlɔ ní Yɔɔ Nyɛmɔ
4, 5. Mɛni Yesaia gba efɔ̃ shi yɛ Mesia lɛ baa lɛ he, ni anaa faŋŋ akɛ Mateo kɛ Yesaia wiemɔi lɛ tsu nii yɛ mɛɛ gbɛ nɔ?
4 Afii ohai abɔ dani Yesaia gbii lɛ baashɛ lɛ, Biblia ŋmalɔi krokomɛi ní ji Hebribii gbala jwɛŋmɔ kɛtee Mesia lɛ, ni ji anɔkwa Hiɛnyiɛlɔ ní Yehowa baatsu kɛba Israel lɛ baa lɛ nɔ. (1 Mose 49:10; 5 Mose 18:18; Lala 118:22, 26) Agbɛnɛ Yehowa tsɔ Yesaia nɔ ekɛ otii krokomɛi fata he. Yesaia ŋma akɛ: “Tsofɔ́ ko aaakwɛ̃ kɛaajɛ Ishai tso kuku lɛŋ, tso nine aaajɛ eshishifã lɛŋ awo yibii.” (Yesaia 11:1; okɛto Lala 132:11 he.) “Tsofɔ́” kɛ “tso nine” lɛ fɛɛ tsɔɔ akɛ Mesia lɛ baafee Ishai seshinyo kɛtsɔ ebi David, mɔ ni afɔ lɛ mu ákɛ Israel maŋtsɛ lɛ nɔ. (1 Samuel 16:13; Yeremia 23:5; Kpojiemɔ 22:16) Kɛ́ anɔkwa Mesia lɛ bashɛ shi lɛ, nɛkɛ “tso nine” nɛɛ ní jɛ David we lɛ baawo yibii kpakpai.
5 Mesia ní awo shi yɛ ehe lɛ ji Yesu. Sanekpakpa ŋmalɔ Mateo tsĩ wiemɔi ní yɔɔ Yesaia 11:1 lɛ tã beni ewie akɛ tsɛmɔ ní atsɛɔ Yesu ákɛ “Nazarenyo” lɛ ha gbalɔi lɛ awiemɔi lɛ ba mli lɛ. Akɛni atsɔse lɛ yɛ Nazaret maŋ lɛ mli hewɔ lɛ, atsɛ Yesu ákɛ Nazarenyo, ni ji gbɛi ko ni anaa faŋŋ akɛ ekɛ Hebri wiemɔ ní akɛtsu nii yɛ Yesaia 11:1 kɛha “tso nine” lɛ yɛ tsakpaa.b—Mateo 2:23, NW shishigbɛ niŋmaa; Luka 2:39, 40.
6. Mɛɛ nɔyelɔ nɛkɛ agba afɔ̃ shi akɛ Mesia lɛ baaji?
6 Mɛɛ nɔyelɔ nɛkɛ Mesia lɛ baafee? Ani ebaafee tamɔ Ashurnyo yiwalɔ, kɛ kuɛŋtilɔ ní kpata Israel akutsei nyɔŋma kooyigbɛ maŋtsɛyeli lɛ hiɛ lɛ? Eka shi faŋŋ akɛ dabi. Yesaia wie yɛ Mesia lɛ he akɛ: “Yehowa mumɔ lɛ aaahi enɔ, ŋaalee kɛ sanesɛɛkɔmɔ mumɔ lɛ, ŋaawoo kɛ hewalɛ mumɔ lɛ, nilee kɛ Yehowa gbeyeishemɔ mumɔ lɛ. Ni eeená Yehowa gbeyeishemɔ lɛ he miishɛɛ.” (Yesaia 11:2, 3a) Jeee mu akɛfɔ Mesia lɛ mu, shi moŋ Nyɔŋmɔ mumɔ krɔŋkrɔŋ lɛ. Enɛ ba yɛ Yesu baptisimɔ be lɛ mli, beni Yohane Baptisilɔ lɛ na Nyɔŋmɔ mumɔ krɔŋkrɔŋ lɛ ní eekpeleke shi kɛmiiba Yesu nɔ tamɔ okpo lɛ. (Luka 3:22) Yehowa mumɔ lɛ ‘bahi’ Yesu ‘nɔ,’ ni eye enɛ he odase beni efee enii yɛ ŋaalee, sanesɛɛkɔmɔ, ŋaawoo, kɛ hewalɛ kɛ nilee mli lɛ. Mɛɛ sui ní nɔ bɛ, ní sa nɔyelɔ jogbaŋŋ nɛ!
7. Mɛɛ shiwoo Yesu kɛha esɛɛnyiɛlɔi anɔkwafoi lɛ?
7 Yesu sɛɛnyiɛlɔi lɛ hu baanyɛ aná mumɔ krɔŋkrɔŋ lɛ. Yesu jaje yɛ eshiɛmɔ wiemɔi lɛ ekome mli akɛ: “Kɛji nyɛ ni nyɛji mɛi fɔji lɛ nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛtsɛ ni yɔɔ ŋwɛi lɛ eŋɔŋ Mumɔ krɔŋkrɔŋ ehaŋ mɛi ni biɔ lɛ lɛ.” (Luka 11:13) No hewɔ lɛ, esaaa akɛ wɔshashaoɔ shi kɔkɔɔkɔ ákɛ wɔɔbi Nyɔŋmɔ mumɔ krɔŋkrɔŋ lɛ, ni esaaa akɛ wɔkpáa eyibii kpakpai—“suɔmɔ, miishɛɛ, hejɔlɛ, tsuishitoo, mlihilɛ, ejurɔfeemɔ, hemɔkɛyeli, mlijɔlɛ, hiɛshikamɔ” lɛ woo. (Galatabii 5:22, 23) Yehowa ewo shi akɛ ebaaha Yesu sɛɛnyiɛlɔi lɛ afaikpamɔ kɛha “nilee ni jɛ ŋwɛi” lɛ hetoo koni eye ebua amɛ ní amɛnyɛ amɛkpee shihilɛ mli naagbai anaa yɛ omanyeyeli mli.—Yakobo 1:5; 3:17.
8. Yesu náa Yehowa gbeyeishemɔ he miishɛɛ yɛ mɛɛ gbɛ nɔ?
8 Mɛni ji Yehowa gbeyeishemɔ ní Mesia lɛ jieɔ lɛ kpo lɛ? Eka shi faŋŋ akɛ, Nyɔŋmɔ wooo Yesu he gbeyei, ní eeeshe gbeyei akɛ eeebu lɛ fɔ́. Shi moŋ, Mesia lɛ yɛ Nyɔŋmɔ gbeyeishemɔ ní bulɛ yɔɔ mli, bulɛ ní suɔmɔ yɔɔ mli kɛha lɛ. Gbɔmɔ ní sheɔ Nyɔŋmɔ gbeyei lɛ sumɔɔ ní ‘efee nibii ní sa ehiɛ’ be fɛɛ be, taakɛ Yesu feɔ lɛ. (Yohane 8:29) Yesu tsɔ wiemɔ kɛ nɔkwɛmɔnɔ nɔ etsɔɔ akɛ miishɛɛ ko bɛ ní fe enɛ, ákɛ aaanyiɛ daa yɛ Yehowa gbeyeishemɔ kpakpa mli.
Kojolɔ ni Ji Jalɔ kɛ Mɔbɔnalɔ
9. Mɛɛ nɔkwɛmɔnɔ Yesu kɛhaa mɛi ni abiɔ ní amɛkojo saji yɛ Kristofoi asafo lɛ mli lɛ?
9 Yesaia gba Mesia lɛ sui lɛ ekomɛi ahe saji efɔ̃ shi akɛ: “Bɔ ni ehiŋmɛii naa lɛ, jeee nakai ebaakojo, ni bɔ ni etoii nuɔ lɛ, jeee nakai ebaabu atɛŋ.” (Yesaia 11:3b) Kɛ́ akɛ bo tee saneyelihe lɛ, ani ohiɛ esɔŋ akɛ oooná kojolɔ ní tamɔ nakai? Yɛ hegbɛ ní akɛha lɛ akɛ adesai fɛɛ a-Kojolɔ lɛ mli lɛ, amale naataamɔi, saneyeli mli ŋaa gbɛ̀i ní yɔɔ nigii, mɛi anaa wiemɔi ní jeee anɔkwale, loo otii komɛi ní he ehiaaa, tamɔ ninamɔ, naŋ Mesia lɛ kojomɔi anɔ hewalɛ. Eyooɔ shishiumɔ ni ekwɛɔ nii kɛtekeɔ kponɔgbɛ puemɔi ní akɛlakaa mɔ hiɛ lɛ, ni enaa ‘tsuiiaŋ gbɔmɔ ní aŋɔtee,’ ni ji “teemɔŋ gbɔmɔ lɛ.” (1 Petro 3:4, NW shishigbɛ niŋmaa) Yesu nɔkwɛmɔnɔ ní fe fɛɛ lɛ feɔ okadi kɛhaa mɛi fɛɛ ní abiɔ ni amɛkojo saji yɛ Kristofoi asafo lɛ mli lɛ.—1 Korintobii 6:1-4.
10, 11. (a) Mɛɛ gbɛ nɔ Yesu tsɔɔ ejajeɔ esɛɛnyiɛlɔi lɛ? (b) Mɛɛ kojomɔ Yesu kɛhaa mɛi fɔji lɛ?
10 Mɛɛ gbɛ nɔ Mesia lɛ sui ní fe fɛɛ lɛ baaná ekojomɔ yiŋkpɛi lɛ anɔ hewalɛ yɛ? Yesaia tsɔɔ mli akɛ: “Eeekojo ohiafoi yɛ jalɛ naa, ni jajemɔ hu ekɛaakã mɛi lɛ, ni eeebu mɛi ní nii yɔɔ mɔbɔ yɛ shikpɔŋ lɛ nɔ lɛ atɛŋ bɔ ni ja, ni ekɛ edaaŋ tso lɛ aaatswa shikpɔŋ lɛ, ni ekɛ enaabu mumɔ lɛ aaagbe mɔ fɔŋ lɛ. Ni jalɛ aaatsɔ ehɛfĩi nɔ̃, ni anɔkwayeli aaatsɔ emlifĩi nɔ̃.”—Yesaia 11:4, 5.
11 Kɛ́ jajemɔ he miihia esɛɛnyiɛlɔi lɛ, Yesu kɛhaa amɛ yɛ gbɛ ní he baa sɛɛnamɔ fe fɛɛ kɛhaa amɛ lɛ nɔ—nɔkwɛmɔnɔ ní nɔ bɛ kɛha Kristofoi onukpai. Yɛ gbɛ kroko nɔ lɛ, mɛi ni feɔ nibii fɔji lɛ baanyɛ akpa gbɛ akɛ amɛbaaná kojomɔ ní mli wa. Kɛ́ be shɛ ní Nyɔŋmɔ kɛ nibii agbɛjianɔtoo nɛɛ baabu akɔntaa lɛ, Mesia lɛ kɛ egbee ni ji enɔyeli hewalɛ lɛ “aaatswa shikpɔŋ lɛ,” ni eeejaje kojomɔ ni ji hiɛkpatamɔ kɛha mɛi fɔji lɛ fɛɛ. (Lala 2:9; okɛto Kpojiemɔ 19:15 he.) Yɛ naagbee lɛ, mɔ fɔŋ ko kwraa eshwɛŋ ní eeegbá adesai atoiŋjɔlɛ naa. (Lala 37:10, 11) Yesu, ní kɛ jalɛ kɛ anɔkwayeli efi ehɛ lɛ yɛ hewalɛ ní ekɛaatsu enɛ.—Lala 45:4-8.
Shihilɛi ní Etsake yɛ Shikpɔŋ Nɔ
12. Mɛɛ saji ní he hiaa ekolɛ Yudafonyo baajwɛŋ he kɛji eesusu esɛɛkuu kɛmiijɛ Babilon kɛmiiya Shiwoo Shikpɔŋ lɛ nɔ lɛ he?
12 Feemɔ Israelnyo ní kpaako ená ele akpɔ ní Koresh ewo akɛ Yudafoi lɛ aku amɛsɛɛ amɛya Yerusalem ní amɛyama sɔlemɔtsu lɛ ekoŋŋ lɛ he mfoniri okwɛ. Ani ebaashi Babilon ni yɔɔ shweshweeshwe lɛ ní efã gbɛ kakadaŋŋ lɛ kɛya emaŋ? Yɛ afii 70 ní Israel bɛ lɛ mli fɛɛ lɛ, jwɛi tsa yɛ ŋmɔji ní ashi ashwie shi lɛ amli. Nakai ŋmɔji lɛ etsɔmɔ hei ní klaji, kootsɛi, jatai, kɛ oshishibrishii kpaa shi amɛtaoɔ niyenii yɛ agbɛnɛ. Blikãi hu kɛ jɛmɛ efee amɛshihilɛhe. Ebaabi ní Yudafoi ní kuɔ amɛsɛɛ lɛ kɛ amɛhe afɔ̃ shia kooloi anɔ kɛha amɛshihilɛ—tooi kɛ tsinai lɛ baaha amɛ fufɔ, amɛhe tsɔi, kɛ loo, ni tsinahii lɛ baagbala tsinakɔi lɛ kɛhũ. Ani kooloi awuiyelɔi anine baashɛ amɛnɔ? Ani onufui baakɔmɔ gbekɛbii bibii lɛ? Ni oshara ni ji ojotswalɔi ni baanyɛ awo antɛo yɛ gbɛ lɛ nɔ lɛ hu?
13. (a) Mɛɛ shihilɛ ní haa anáa miishɛɛ Yesaia fee he mfoniri? (b) Te wɔfeɔ tɛŋŋ wɔleɔ akɛ toiŋjɔlɛ ní Yesaia wieɔ he lɛ tsɔɔ babaoo fe shweshweeshwe ní aaafee kɛjɛ kooloi awuiyelɔi adɛŋ kɛkɛ?
13 Agbɛnɛ Yesaia fee shihilɛi ní Nyɔŋmɔ baaha ehi shi yɛ shikpɔŋ lɛ nɔ lɛ he mfoniri ní haa mɔ náa miishɛɛ. Ekɛɛ akɛ: “Klaŋ kɛ gwantɛŋ bi aaahi shi, ni kootsɛ kɛ abotia bi aaabu shi; ni tsina bi kɛ jata bi kɛ kooloo ní ewo fɔ fɛɛ aaahi he kome, ni gbekɛ bibioo aaakpala amɛ. Tsina yoo hu kɛ oshishibrishi aaaye nii, ni amɛbii aaabumɔ shi yɛ he kome, ni jata aaaye jwɛi tamɔ tsina. Fufɔoo aaashwɛ yɛ shikpãa bu naa, ni gbekɛ ní etse fufɔ hu, aaaŋɔ enine awo onufu bu mli. Amɛfeŋ efɔŋ ni amɛfiteŋ nii yɛ migɔŋ krɔŋkrɔŋ lɛ nɔ fɛɛ; ejaakɛ shikpɔŋ lɛ nɔ aaayi obɔ kɛ Yehowa he nilee lɛ, tamɔ bɔ ni nu hà ŋshɔ shishi lɛ.” (Yesaia 11:6-9) Ani wiemɔi nɛɛ etaaa otsui mli? Kadimɔ akɛ toiŋjɔlɛ ní awieɔ he yɛ biɛ lɛ jɛɔ Yehowa he nilee namɔ mli kɛbaa. No hewɔ lɛ, babaoo he miihia fe shweshweeshwe ní aaafee kɛjɛ kooloi awuiyelɔi adɛŋ kɛkɛ. Yehowa he nilee lɛ tsakeŋ kooloi, shi ebaasa gbɔmɛi ahe. Ehe ehiaŋ ní Israelbii lɛ ashe kooloi awuiyelɔi loo gbɔmɛi ní tamɔ kooloi lɛ agbeyei beni amɛnyiɛ gbɛ nɔ kɛyaa amɛmaŋ loo beni amɛyɔɔ amɛshikpɔŋ ní akɛha amɛ ekoŋŋ lɛ nɔ lɛ.—Ezra 8:21, 22; Yesaia 35:8-10; 65:25.
14. Mɛni ji Yesaia 11:6-9 lɛ mlibaa wulu?
14 Shi, gbalɛ nɛɛ yɛ emlibaa wulu. Yɛ afi 1914 lɛ, akɛ Yesu ni ji Mesia lɛ ta maŋtsɛsɛi nɔ yɛ ŋwɛi Zion Gɔŋ lɛ nɔ. Yɛ afi 1919 lɛ, aŋmɛɛ “Nyɔŋmɔ Israel lɛ” ateŋ shwɛɛnii lɛ ahe kɛjɛ Babilon nomŋɔɔ mli ni amɛná anɔkwa jamɔ tswaa kɛ shimaa ekoŋŋ lɛ mli gbɛfaŋnɔ. (Galatabii 6:16) Nɔ ni jɛ mli ba ji akɛ, agbele gbɛ kɛha Yesaia gbalɛ ní kɔɔ Paradeiso he lɛ mlibaa yɛ ŋmɛnɛŋmɛnɛ beaŋ. ‘Anɔkwa nilee,’ ni ji Yehowa he nilee lɛ, etsake sui kɛ baŋi. (Kolosebii 3:9, 10) Gbɔmɛi ní tsutsu lɛ amɛfeɔ yiwalɛ nii lɛ etsɔmɔ mɛi ní he jɔ. (Romabii 12:2; Efesobii 4:17-24) Nɛkɛ tsakemɔi nɛɛ esa gbɔmɛi akpekpei abɔ ahe amrɔ nɛɛ ejaakɛ Kristofoi ni yɔɔ shikpɔŋ nɔ hiɛnɔkamɔ, ni amɛyifalɛ yaa nɔ oyayaayai lɛ ebafata Yesaia gbalɛ lɛ he. (Lala 37:29; Yesaia 60:22) Mɛnɛɛmɛi ekase akɛ amɛaakwɛ be mli ní akɛ shikpɔŋ muu lɛ fɛɛ baaba paradeiso shihilɛ ní yɔɔ shweshweeshwe kɛ toiŋjɔlɛ mli ekoŋŋ, taakɛ Nyɔŋmɔ shishijee yiŋtoo ji lɛ gbɛ.—Mateo 6:9, 10; 2 Petro 3:13.
15. Ani nilee yɛ mli akɛ wɔɔkpá Yesaia wiemɔi lɛ amlibaa diɛŋtsɛ gbɛ yɛ jeŋ hee lɛ mli? Tsɔɔmɔ mli.
15 Ani Yesaia gbalɛ lɛ baaná mlibaa kroko, ekolɛ emlibaa ŋmiiŋmi diɛŋtsɛ yɛ nakai Paradeiso ni akɛba ekoŋŋ lɛ mli? Etamɔ nɔ ni nilee yɛ mli akɛ aaasusu nakai. Gbalɛ lɛ kɛ nakai nɔmimaa wiemɔi ní ekɛha Israelbii ní ku amɛsɛɛ lɛ nɔŋŋ haa mɛi fɛɛ ní baahi Mesia lɛ nɔyeli shishi lɛ hu; amɛkɛ amɛbii lɛ nuŋ efɔŋ he gbeyeiwoo ko he kɛjɛŋ jɛɛhe ko kwraa—ni ji adesai loo kooloi aŋɔɔ. Shikpɔŋ lɛ nɔ bii fɛɛ baaná toiŋjɔlɛ shihilɛi ní tamɔ nɔ ni Adam kɛ Hawa hi mli yɛ Eden lɛ mli ŋɔɔmɔ, yɛ Mesia lɛ Maŋtsɛyeli nɔyeli lɛ shishi. Eji anɔkwale akɛ, Ŋmalɛi lɛ ejieee bɔ ni shihilɛ lɛ ji yɛ Eden—loo bɔ ni eeeji yɛ Paradeiso lɛ mli otii fɛɛ kpo fitsofitso etsɔɔɔ. Shi, wɔbaanyɛ wɔná hekɛnɔfɔɔ akɛ, nɔ fɛɛ nɔ baafee bɔ ni esa akɛ eji lɛ pɛpɛɛpɛ, yɛ Maŋtsɛ Yesu Kristo nɔyeli ní nilee kɛ suɔmɔ yɔɔ mli lɛ shishi.
Akɛ Jamɔ Krɔŋŋ Ma Shi Ekoŋŋ Kɛtsɔ Mesia lɛ Nɔ
16. Mɛni akɛma shi ákɛ aflaŋaa kɛha Nyɔŋmɔ webii lɛ yɛ afi 537 D.Ŋ.B.?
16 Jamɔ krɔŋŋ baje tutuamɔ shishi klɛŋklɛŋ kwraa yɛ Eden beni Satan ná Adam kɛ Hawa nɔ hewalɛ yɛ omanyeyeli mli ní amɛbooo Yehowa toi lɛ. Kɛbashi amrɔ nɛɛ lɛ, Satan eŋmɛɛko oti ní ekɛma ehiɛ akɛ ebaagbala gbɔmɛi babaoo bɔ ni eeenyɛ kɛjɛ Nyɔŋmɔ he lɛ he. Shi Yehowa eŋmɛŋ gbɛ ní jamɔ krɔŋŋ sɛɛ afo yɛ shikpɔŋ lɛ nɔ kɔkɔɔkɔ. Egbɛi yɛ sane lɛ mli, ni esusuɔ mɛi ní sɔmɔɔ lɛ lɛ ahe. Enɛ hewɔ lɛ, etsɔ Yesaia nɔ ekɛ shiwoo ní sa kadimɔ nɛɛ haa akɛ: “Aaaba mli yɛ nakai gbi lɛ nɔ akɛ Ishai shishifã ni ji aflaŋaa ní ashĩ aha majimaji lɛ, no sɛɛgbɛ jeŋmaji lɛ aaatao, ni ehejɔɔmɔhe lɛ hiɛ aaaba nyam.” (Yesaia 11:10) Mra mli yɛ afi 537 D.Ŋ.B. lɛ, Yerusalem, ni ji maŋ ní David kɛfee maŋtiase lɛ, tsu nii ákɛ aflaŋaa, ni etsɛ Yudafoi ní agbɛ amɛ ashwã lɛ ateŋ shwɛɛnii anɔkwafoi komɛi koni amɛku amɛsɛɛ ní amɛbama sɔlemɔtsu lɛ ekoŋŋ.
17. Yesu ‘te shi koni ebaye jeŋmaji lɛ anɔ’ yɛ klɛŋklɛŋ afii oha lɛ mli kɛ wɔgbii nɛɛ amli hu yɛ mɛɛ gbɛ nɔ?
17 Shi kɛlɛ, gbalɛ lɛ gbalaa jwɛŋmɔ kɛyaa nibii babaoo nɔ fe enɛ. Taakɛ wɔna kɛtsɔ hiɛ momo lɛ, egbalaa jwɛŋmɔ kɛyaa Mesia lɛ, ni ji anɔkwa Hiɛnyiɛlɔ kome pɛ kɛha jeŋmaji fɛɛ lɛ nɔyeli lɛ nɔ. Bɔfo Paulo tsɛ́ Yesaia 11:10 lɛ sɛɛ ni ekɛtsɔɔ akɛ jeŋmajiaŋbii ní hi shi yɛ egbii lɛ amli lɛ baaná gbɛhe ko yɛ Kristofoi asafo lɛ mli. Beni etsɛɔ wiemɔi asɛɛ kɛjɛɔ bɔ ni Septuagint lɛ tsɔɔ ŋmalɛ kuku nɛɛ shishi eha lɛ mli lɛ, eŋma akɛ: “Yesaia kɛɛ akɛ: ‘Ishai shishifã lɛ aaaba, mɔ hu ní aaate shi koni ebaye jeŋmaji lɛ anɔ lɛ; lɛ enɔ jeŋmaji lɛ aaaŋɔ amɛhiɛ amɛfɔ̃.’” (Romabii 15:12) Kɛfata he lɛ, gbalɛ lɛ mli lɛɛɔ kɛyaa shɔŋŋ po—kɛbaa wɔgbii nɛɛ amli beni jeŋmajiaŋbii lɛ jieɔ suɔmɔ ní amɛyɔɔ kɛha Yehowa lɛ kpo kɛtsɔ Mesia lɛ nyɛmimɛi ní afɔ amɛ mu lɛ asɛɛ ni amɛfĩɔ lɛ nɔ lɛ.—Yesaia 61:5-9; Mateo 25:31-40.
18. Yesu efee henaabuamɔhe yɛ wɔgbii nɛɛ amli yɛ mɛɛ gbɛ nɔ?
18 Yɛ ŋmɛnɛŋmɛnɛ beaŋ mlibaa mli lɛ, “nakai gbi” ní Yesaia wie he lɛ je shishi beni akɛ Mesia lɛ ta maŋtsɛsɛi lɛ nɔ akɛ Nyɔŋmɔ ŋwɛi Maŋtsɛyeli lɛ nɔ Maŋtsɛ yɛ afi 1914 lɛ. (Luka 21:10; 2 Timoteo 3:1-5; Kpojiemɔ 12:10) Kɛjɛ nakai beaŋ kɛbaa nɛɛ, Yesu Kristo efee aflaŋaa ní anaa faŋŋ, ni ji henaabuamɔhe kɛha mumɔŋ Israel, kɛ jeŋmajiaŋbii fɛɛ ní shweɔ ni amɛná jalɛ nɔyeli lɛ hu. Akɛ Maŋtsɛyeli lɛ he sanekpakpa lɛ etee jeŋmaji lɛ fɛɛ amli, yɛ Mesia lɛ kudɔmɔ shishi, taakɛ Yesu gba efɔ̃ shi lɛ. (Mateo 24:14; Marko 13:10) Sanekpakpa nɛɛ náa hewalɛ ní mli wa yɛ mɛi anɔ. “Asafo babaoo ni mɔ ko mɔ ko [nyɛɛɛ] akane ni jɛ jeŋmaŋ fɛɛ jeŋmaŋ” miiba amɛhe shi amɛmiiha Mesia lɛ kɛtsɔ shwɛɛnii ní afɔ amɛ mu lɛ ahe ní amɛfataa yɛ jamɔ krɔŋŋ mli lɛ nɔ. (Kpojiemɔ 7:9) Yɛ be mli ni mɛi heei babaoo yaa nɔ amɛkɛ amɛhe babɔɔ shwɛɛnii lɛ ahe yɛ Yehowa mumɔŋ “sɔlemɔwe” lɛ, belɛ amɛmiiha Mesia lɛ ‘hejɔɔmɔhe,’ ni ji Nyɔŋmɔ mumɔŋ sɔlemɔtsu kpeteŋkpele lɛ anunyam lɛ miifá babaoo kɛmiiya hiɛ.—Yesaia 56:7; Hagai 2:7.
Gbɔmɛi ní Efee Ekome Miisɔmɔ Yehowa
19. Mɛɛ bei enyɔ komɛi amli Yehowa kɛ ewebii lɛ ateŋ shwɛɛnii ní agbɛ amɛ ashwã shikpɔŋ lɛ nɔ fɛɛ lɛ ku sɛɛ kɛba amɛshikpɔŋ nɔ ekoŋŋ?
19 No sɛɛ lɛ, Yesaia kai Israelbii lɛ akɛ be ko lɛ Yehowa here amɛyiwala beni maŋ lɛ yaje nɔnyɛɛ shishi yɛ henyɛlɔ ko ni he wa waa dɛŋ lɛ. Nakai Israel yinɔsane lɛ fã—ni ji kpɔmɔ ní Yehowa kpɔ̃ maŋ lɛ kɛjɛ Mizraim nomŋɔɔ mli lɛ—kã Yudafoi anɔkwafoi fɛɛ atsui nɔ waa diɛŋtsɛ. Yesaia ŋma akɛ: “Aaaba mli akɛ nakai gbi lɛ nɔ lɛ, Nuntsɔ lɛ aaakpã enine mli nɔ ni ji shii enyɔ, koni ekpɔ̃ emaŋ lɛŋ mɛi ni eshwɛ lɛ, mɛi ni eshwɛ kɛjɛ Ashur kɛ Mizraim kɛ Patros kɛ Kush kɛ Elam kɛ Shinear kɛ Hamat kɛ ŋshɔkpɔi lɛ anɔ lɛ. Ni eeeshĩ aflaŋaa eha jeŋmaji lɛ, ni eeebua Israelbii ní ashɛrɛ amɛ ashwie lɛ anaa, ni eeeha Yudabii ní egbɛ eshwã lɛ ajɛ shikpɔŋ lɛ koji ejwɛ lɛ nɔ abakpe.” (Yesaia 11:11, 12) Yehowa baanyiɛ Israel kɛ Yuda fɛɛ shwɛɛnii anɔkwafoi komɛi ahiɛ kɛjɛ jeŋmaji ní agbɛ amɛ ashwã mli lɛ amli, tamɔ nɔ ni ehiɛ amɛnine mli kɛnyiɛ, ni ekɛ amɛ baaba amɛ diɛŋtsɛ amɛmaŋ shweshweeshwe. Enɛ ba mli yɛ gbɛ bibioo nɔ yɛ afi 537 D.Ŋ.B. Shi, kwɛ bɔ ni emlibaa wulu lɛ yɔɔ nyam ha! Yɛ afi 1914 lɛ, Yehowa kɛ Yesu Kristo ní ekɛ lɛ etá maŋtsɛsɛi nɔ lɛ damɔ shi ákɛ “aflaŋaa eha jeŋmaji lɛ.” Kɛjɛ afi 1919 kɛbaa lɛ, “Nyɔŋmɔ Israel lɛ” ateŋ shwɛɛnii lɛ babaoo bɔi aflaŋaa nɛɛ he baa, ní amɛmiishwe ní amɛná jamɔ krɔŋŋ mli gbɛfaŋnɔ yɛ Nyɔŋmɔ Maŋtsɛyeli lɛ shishi. Nɛkɛ mumɔŋ maŋ ní yɔɔ srɔto kwraa nɛɛ jɛ “akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli.”—Kpojiemɔ 5:9.
20. Mɛɛ ekomefeemɔ Nyɔŋmɔ webii baaná mli ŋɔɔmɔ yɛ amɛsɛɛkuu kɛjɛ Babilon lɛ mli?
20 No sɛɛ lɛ Yesaia tsɔɔ bɔ ni maŋ ní akɛ amɛ eku sɛɛ kɛba ekoŋŋ lɛ baafee ekome amɛha lɛ mli. Beni etsɛɔ kooyigbɛ maŋtsɛyeli lɛ akɛ Efraim kɛ wuoyigbɛ maŋtsɛyeli lɛ akɛ Yuda lɛ, ekɛɛ akɛ: “Efraim hetsɛ̃mɔ lɛ sɛɛ aaafo, ni Yuda henyɛlɔi lɛ hiɛ aaakpata; Efraim he tsɛŋ Yuda dɔŋŋ, ni Yuda hu enyɛŋ Efraim dɔŋŋ. Ni amɛaafiliki amɛaatara Filistibii akuɛ nɔ yɛ anaigbɛ, amɛaafee ekome amɛaahà bokagbɛ bii lɛ, amɛkɛ amɛnine aaafɔ̃ Edom kɛ Moab nɔ, ni Amonbii hu aaabo amɛ toi.” (Yesaia 11:13, 14) Kɛ́ Yudafoi lɛ ku amɛsɛɛ kɛjɛ Babilon lɛ, amɛjaŋ amɛmli amɛfeŋ jeŋmaji enyɔ dɔŋŋ. Israel akutsei lɛ fɛɛ amli bii baafee ekome kɛku amɛsɛɛ kɛba amɛshikpɔŋ nɔ. (Ezra 6:17) Amɛnáŋ nyɛ̃ɛ kɛ hetsɛ̃ amɛhaŋ amɛhe dɔŋŋ. Ákɛ gbɔmɛi ni efee ekome lɛ, amɛbaate shi amɛshi henyɛlɔi ní yɔɔ jeŋmaji ní ebɔle amɛ lɛ amli lɛ yɛ kunimyeli mli.
21. Ekomefeemɔ ni yɔɔ Nyɔŋmɔ webii ateŋ ŋmɛnɛ lɛ sa kadimɔ waa lɛɛlɛŋ yɛ mɛɛ gbɛ nɔ?
21 Shi nɔ ni sa kadimɔ waa hu ji ekomefeemɔ ni yɔɔ “Nyɔŋmɔ Israel lɛ” mli bii ateŋ lɛ. Mumɔŋ Israel mfonirifeemɔŋ akutsei 12 lɛ fɛɛ kɛ nɔ ni miihe ashɛ afii 2,000 sɔŋŋ ená ekomefeemɔ ni damɔ suɔmɔ ní amɛyɔɔ kɛha Nyɔŋmɔ kɛ amɛmumɔŋ nyɛmimɛi hii kɛ yei lɛ nɔ lɛ mli ŋɔɔmɔ. (Kolosebii 3:14; Kpojiemɔ 7:4-8) Ŋmɛnɛ, Yehowa webii—ni ji mumɔŋ Israelbii lɛ kɛ mɛi ní yɔɔ shikpɔŋ nɔ hiɛnɔkamɔ lɛ fɛɛ—náa toiŋjɔlɛ kɛ jeŋ muu fɛɛ ekomefeemɔ mli ŋɔɔmɔ yɛ Mesia lɛ nɔyeli shishi, shihilɛi ní anaaa yɛ Kristendom sɔlemɔi lɛ amli. Yehowa Odasefoi feɔ ekome yɛ mumɔŋ ni amɛkɛteɔ shi amɛwoɔ mɔdɛŋ ní Satan bɔɔ ní ekɛku amɛjamɔ lɛ naa lɛ. Amɛtsuɔ nitsumɔ ní Yesu kɛha amɛ akɛ amɛshiɛ Mesia Maŋtsɛyeli lɛ he sanekpakpa lɛ ní amɛtsɔɔ mɛi anii yɛ jeŋmaji fɛɛ mli lɛ he nii ákɛ gbɔmɛi kome.—Mateo 28:19, 20.
Abaaye Gbɛtsii Nii Anɔ Kunim
22. Yehowa “aaafee Mizraim ŋshɔnine lɛ musu,” ni ‘eeehoso enine etsɔɔ Faa lɛ’ yɛ mɛɛ gbɛ nɔ?
22 Gbɛtsii nii, ni ji gbɛtsii nii diɛŋtsɛ kɛ mfonirifeemɔŋ nɔ̃ babaoo yɛ ní baatsi Israelbii lɛ asɛɛkuu kɛmiijɛ nomŋɔɔ mli lɛ naa. Mɛɛ gbɛ nɔ amɛaatsɔ amɛye nɔ kunim? Yesaia kɛɔ akɛ: “Yehowa aaafee Mizraim ŋshɔnine lɛ musu, ni ekɛ emumɔ ní naa wa lɛ aaahoso enine atsɔɔ faa lɛ, ni eeetswa lɛ nɔ̃ ní etsɔ faai bibii kpawo ní akɛ tokotai po aaafo.” (Yesaia 11:15) Yehowa ji mɔ ni baajie gbɛtsii nii ní baatsĩ ewebii lɛ asɛɛkuu naa lɛ fɛɛ kɛjɛ jɛmɛ. Gbɛtsii nii ni yɔɔ hewalɛ waa tamɔ Ŋshɔ Tsuru lɛ nine (tamɔ Suez Ŋshɔnine lɛ) loo nɔ ni ehiii foo tamɔ Eufrate Faa kpeteŋkpele lɛ baagbi, kɛ́ wɔɔwie yɛ mfonirifeemɔŋ, bɔ ni abaanyɛ afo ní ehe ehiaŋ ni ajie tokotai!
23. Abaafee ‘tempɔŋ ní baajɛ Ashur’ yɛ mɛɛ gbɛ nɔ?
23 Yɛ Mose gbii lɛ amli lɛ, Yehowa gbele gbɛ eha Israel ni amɛye amɛhe kɛjɛ Mizraim ni amɛnyiɛ kɛtee Shiwoo Shikpɔŋ lɛ nɔ. Ebaafee nɔ ko ní tamɔ nakai nɔŋŋ agbɛnɛ: “Eeetsɔ tempɔŋ eha emaŋ lɛ mli mɛi ní eshwɛ lɛ, mɛi ni eshwɛ ni baajɛ Ashur lɛ, tamɔ bɔ ni etsɔ eha Israel gbi nɔ ní eje Mizraim lɛ.” (Yesaia 11:16) Yehowa baanyiɛ nomii ní kuɔ amɛsɛɛ lɛ ahiɛ tamɔ nɔ ni amɛnyiɛ gbɛjegbɛ nɔ kɛjɛ he ni aŋɔ amɛ nom kɛtee lɛ kɛmiiya amɛshikpɔŋ nɔ. Shitee-kɛ-wolɔi baaka akɛ amɛaatsĩ amɛnaa, shi Yehowa, amɛ-Nyɔŋmɔ lɛ, baafata amɛhe. Kristofoi ni afɔ amɛ mu lɛ kɛ amɛhefatalɔi ní yɔɔ ŋmɛnɛ lɛ hu bajeɔ tutuamɔ ní naa wa waa shishi, shi amɛkãa he amɛkɛ ekãa yaa hiɛ! Amɛ́shi ŋmɛnɛŋmɛnɛ beaŋ Ashur maŋ, ni ji Satan je lɛ, ni amɛyeɔ amɛbuaa mɛi krokomɛi hu koni amɛfee nakai. Amɛle akɛ jamɔ krɔŋŋ baaye omanye ni ebaashwere. Ejeee gbɔmɔ ko nitsumɔ, shi moŋ Nyɔŋmɔ nɔ̃.
Mlifilimɔ ní Sɛɛ Efooo Kɛha Mesia lɛ Shishibii Lɛ!
24, 25. Mɛɛ yijiemɔ kɛ hiɛsɔɔ wiemɔi Yehowa webii lɛ kɛbaalá kɛ mlifilimɔ?
24 Agbɛnɛ Yesaia kɛ miishɛɛ wiemɔi tsɔɔ bɔ ni Yehowa webii amli baafili amɛ yɛ E-wiemɔ lɛ mlibaa hewɔ lɛ mli akɛ: “Nakai gbi lɛ nɔ lɛ oookɛɛ akɛ: Miidao shi, Yehowa, ejaakɛ omli fũ mi moŋ, shi omlifu lɛ ejɔ ni oshɛje mimii!” (Yesaia 12:1) Tsɔsemɔ ní Yehowa kɛha ewebii ní kɔ́ gbɛ fɔŋ lɛ mli wa. Shi etsu yiŋtoo ní yɔɔ sɛɛ lɛ he nii, ákɛ esaa wekukpaa ní kã maŋ lɛ kɛ lɛ teŋ lɛ ni eto jamɔ krɔŋŋ shishi ema shi ekoŋŋ. Yehowa ma nɔ mi eha ejálɔi anɔkwafoi lɛ akɛ yɛ naagbee lɛ ebaahere amɛyiwala. Ebɛ naakpɛɛ akɛ amɛjie hiɛsɔɔ kpo yɛ enɛ he!
25 Awaje hekɛnɔfɔɔ ní Israelbii ní akɛ amɛ ba amɛshikpɔŋ nɔ ekoŋŋ lɛ yɔɔ yɛ Yehowa mli lɛ kɛmɔ shi, ni amɛlá akɛ: “Naa, Mawu ji miyiwalaheremɔ! Mitsui enyɔ mimli ni misheee gbeyei! Ejaakɛ mihewalɛ kɛ milala ji Nuntsɔ Yehowa, ni lɛ nɔŋŋ etsɔ miyiwalaheremɔ. Ni nyɛkɛ nyamɔ aaayɛ nu yɛ yiwalaheremɔ bui lɛ amli.” (Yesaia 12:2, 3) Hebri wiemɔ ní atsɔɔ shishi akɛ ‘hewalɛ’ yɛ kuku 2 lɛ jeɔ kpo akɛ “yijiemɔ” yɛ Septuajint shishitsɔɔmɔ lɛ mli. Jálɔi lɛ kɛ miishɛɛ lá yijiemɔ lalai yɛ yiwalaheremɔ ni jɛ ‘Yah Yehowa’ dɛŋ lɛ hewɔ. Akɛ ‘Yah,’ ni ji gbɛi Yehowa ní afo lɛ kuku lɛ, tsuɔ nii yɛ Biblia lɛ mli ni akɛtsɔɔ yijiemɔ kɛ shidaa henumɔi ní mli wa waa ní aná. Wiemɔ ‘Yah Yehowa’ ní akɛtsu nii—ní atĩ ŋwɛi gbɛi lɛ mli shii enyɔ lɛ—wóɔ yijiemɔ ní akɛhaa Nyɔŋmɔ lɛ nɔ kɛyaa ŋɛlɛ ní nɔ kwɔ nɔ.
26. Namɛi haa aleɔ Nyɔŋmɔ nifeemɔi yɛ jeŋmaji lɛ ateŋ ŋmɛnɛ?
26 Yehowa anɔkwa jálɔi nyɛŋ atsĩ amɛmiishɛɛ lɛ naa amɛha amɛ pɛ amɛhe. Yesaia gba efɔ̃ shi akɛ: “Nakai gbi lɛ nɔ lɛ nyɛaakɛɛ: Nyɛdaa Yehowa shi, nyɛtsɛa egbɛi lɛ! Nyɛhaa alea enifeemɔ nii lɛ yɛ majimaji lɛ ateŋ, nyɛjajea akɛ awó egbɛi lɛ nɔ! Nyɛlaa nyɛhaa Yehowa! shi efee nii wuji; nyɛhaa alea enɛ yɛ shikpɔŋ muu lɛ fɛɛ nɔ!” (Yesaia 12:4, 5) Kɛjɛ afi 1919 kɛbaa nɛɛ, Kristofoi ní afɔ amɛ mu lɛ—kɛ sɛɛ mli lɛ, amɛhefatalɔi ni ji “tooi krokomɛi” lɛ ayelikɛbuamɔ—eha amɛnyɛ ‘amɛjaje mɔ ní tsɛ́ amɛ kɛjɛ duŋ lɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ.’ Amɛji “weku ní ahala, . . . jeŋmaŋ krɔŋkrɔŋ” ní atu amɛ amã afã kɛha yiŋtoo nɛɛ. (Yohane 10:16; 1 Petro 2:9) Mɛi ni afɔ amɛ mu lɛ jajeɔ akɛ awó Yehowa gbɛi krɔŋkrɔŋ lɛ nɔ gojoo, ni amɛfataa he ni ahaa aleɔ yɛ shikpɔŋ lɛ nɔ fɛɛ. Amɛnyiɛɔ Yehowa jálɔi fɛɛ ahiɛ ni amɛmli filiɔ amɛ yɛ gbɛjianɔ ní eto kɛha amɛyiwalaheremɔ lɛ mli. Etamɔ bɔ ni Yesaia jaje lɛ pɛpɛɛpɛ, ákɛ: “Bo Zion biyoo, bolɔmɔ waa ní onya! ejaakɛ Israel Mɔ krɔŋkrɔŋ lɛ ní yɔɔ oteŋ lɛ da”! (Yesaia 12:6) Yehowa Nyɔŋmɔ diɛŋtsɛ ji Israel Mɔ Krɔŋkrɔŋ lɛ.
Okɛ Hekɛnɔfɔɔ Akwɛ Wɔsɛɛ Be Gbɛ!
27. Beni amɛmɛɔ amɛhiɛnɔkamɔ lɛ mlibaa lɛ, mɛni mli Kristofoi yɔɔ hekɛnɔfɔɔ yɛ?
27 Ŋmɛnɛ, gbɔmɛi akpekpei abɔ eke yuu kɛba ‘aflaŋaa kɛha jeŋmaji lɛ’—ni ji Yesu Kristo ní akɛ lɛ etá maŋtsɛsɛi nɔ yɛ Nyɔŋmɔ Maŋtsɛyeli lɛ mli lɛ he. Amɛmli filiɔ amɛ akɛ amɛji nakai Maŋtsɛyeli lɛ shishibii, ni amɛnáa miishɛɛ akɛ amɛbale Yehowa Nyɔŋmɔ kɛ e-Bi lɛ. (Yohane 17:3) Amɛnáa miishɛɛ babaoo yɛ amɛ Kristofoi anaanyobɔɔ ní efee ekome lɛ mli ni amɛbɔɔ mɔdɛŋ ní amɛbaa toiŋjɔlɛ ni ji Yehowa anɔkwa tsuji akadimɔ nii lɛ yi. (Yesaia 54:13) Akɛni amɛyɛ nɔmimaa akɛ Yah Yehowa ji Nyɔŋmɔ ní haa eshiwoi baa mli hewɔ lɛ, amɛyɛ hekɛnɔfɔɔ yɛ amɛhiɛnɔkamɔ lɛ mli ni amɛnáa miishɛɛ babaoo akɛ amɛkɛ mɛi krokomɛi aaagba he sane. Eba akɛ Yehowa jálɔ fɛɛ jálɔ aaaya nɔ ekɛ ehewalɛ fɛɛ atsu nii kɛsɔmɔ Nyɔŋmɔ ní eye ebua mɛi krokomɛi hu ní amɛfee nakai. Nyɛhaa wɔ fɛɛ wɔkɛ Yesaia wiemɔi lɛ atoa wɔtsui mli ní wɔmli afili wɔ yɛ yiwalaheremɔ ni baaba kɛtsɔ Mesia ni Yehowa ehala lɛ lɛ nɔ lɛ mli!
[Shishigbɛ niŋmai]
a Aná wiemɔ “Mesia” lɛ kɛjɛ Hebri wiemɔ ma·shiʹach mli, ni eshishi ji “Mɔ ni Afɔ Lɛ Mu.” Hela wiemɔ ní ekɛyeɔ egbɔ ji Khri·stosʹ, loo “Kristo.”—Mateo 2:4, NW shishigbɛ niŋmaa.
b Hebri wiemɔ kɛha “tso nine” ji neʹtser, ni wiemɔ kɛha “Nazarenyo” ji Nots·riʹ.
[Mfonirii ni yɔɔ baafa 158]
Mesia lɛ ji “tsofɔ́” ní jɛ Ishai mli, kɛtsɔ Maŋtsɛ David nɔ
[Baafa muu mfoniri ni yɔɔ baafa 162]
[Mfoniri ni yɔɔ baafa 170]
Yesaia 12:4, 5, taakɛ aŋma yɛ Ŋshɔ ní Egbo Wolokpoi lɛ amli (Áma hei ni Nyɔŋmɔ gbɛi lɛ jeɔ kpo yɛ lɛ anɔ mi)