Yitso 18
Shikpɔŋhosomɔi yɛ Nuŋtsɔ lɛ Gbi lɛ Nɔ
1, 2. (a) Ni aaatsɔ shikpɔŋhosomɔ ko ni naa wa mli lɛ tamɔ mɛni? (b) Mɛni Yohane tsɔɔ mli yɛ be mli ni atse naasɔomɔ ni ji ekpaa lɛ naa lɛ?
ANI otsɔ shikpɔŋhosomɔ ko ni naa wa mli pɛŋ? Ejeee niiashikpamɔ ko ni ŋɔɔ kwraa. Shikpɔŋhosomɔ ko ni naa wa baanyɛ aje shishi kɛ kokolomɔ ni kɛ hiɛdimɔ baa kɛ hoofeemɔ ni naa wa. Obaadidaŋ kɛya biɛ kɛba biɛ waa kɛtsɔ fɔ̃ ni efɔ̃ɔ bo kɛyaa kɛbaa be mli ni ogba shi kɛyaa he ko ni yɔɔ shweshweeshwe lɛ—ekolɛ ni oyahɔ okpɔlɔ ko shishi lɛ. Aloo ekolɛ ebaanyɛ eba trukaa, tsimɔ ko ni naa wa, ni nɔ ni nyiɛɔ sɛɛ baa ji tsɛŋsii loo nihoomɔ nii, tsu mli nibii kɛ tsui po ni miigbeegbee shi. Nibii ni baafite lɛ baada naakpa, ni yɛ bei komɛi amli lɛ nibii komɛi tsaraa sɛɛ baa kpitiokpitio ni no hu fiteɔ nii ni kɛ eko fataa haomɔ lɛ he.
2 Yɛ be mli ni enɛ yɔɔ ojwɛŋmɔ mli lɛ, susumɔ nɔ ni Yohane tsɔɔ mli yɛ be mli ni atseɔ naasɔomɔ ni ji ekpaa lɛ naa lɛ he: “Ni mina beni etse naasɔomɔ ni ji ekpaa lɛ, ni naa, shikpɔŋ hoso babaoo.” (Kpojiemɔ 6:12a) Esa akɛ enɛ aba yɛ be kometoo lɛ ni akɛtserɛɔ naasɔomɔi krokomɛi lɛ anaa lɛ mli. Nuŋtsɔ lɛ gbi lɛ nɔ mɛɛ be kwraa nɛkɛ shikpɔŋhosomɔ nɛɛ baa, ni mɛɛ hosomɔ enɛ ji?—Kpojiemɔ 1:10.
3. (a) Mɛni nibii Yesu gba efɔ shi akɛ ebaaba yɛ gbalɛ ni kɔɔ ba ni eba lɛ he okadi lɛ mli? (b) Kɛ akɛ shikpɔŋhosomɔi diɛŋtsɛ ni baa lɛ to okadi shikpɔŋhosomɔ kpeteŋkpele ni yɔɔ Kpojiemɔ 6:12 lɛ he lɛ te anaa tɛŋŋ?
3 Atsiɔ shikpɔŋhosomɔi diɛŋtsɛ kɛ nɔ ni ji okadifeemɔ mli nɔ ta shii abɔ yɛ Biblia lɛ mli. Yɛ be mli ni Yesu gbaa egbalɛ kpeteŋkpele ni kɔɔ beni eba Maŋtsɛyeli hewalɛ mli lɛ he lɛ, egba akɛ “shikpɔŋhosomɔi baaba hei sɔrɔtoi fɛɛ.” Enɛɛmɛi baafee “kɔɔmɔi abɔimɔ” lɛ fa. Kɛjɛ 1914 kɛbaa nɛɛ, yɛ be mli ni shikpɔŋ lɛ nɔ gbɔmɛi ayifalɛ ebote akpekpei toi akpei abɔ mli nɛɛ, shikpɔŋhosomɔi diɛŋtsɛ kɛ eko efata haomɔi ni eba wɔbei nɛɛ amli lɛ he diɛŋtsɛ. (Mateo 24:3, 7, 8) Ni kɛlɛ, eyɛ mli akɛ amɛhaa gbalɛ baa mli moŋ, shi nakai shikpɔŋhosomɔi lɛ efee adebɔɔ mli nɔ ni kɛ osharai diɛŋtsɛ baa. Amɛji nɔ ni tsɔɔ okadifeemɔ mli shikpɔŋhosomɔ kpeteŋkpele ni yɔɔ Kpojiemɔ 6:12 lɛ hiɛ. Enɛ baa akɛ naagbee hiɛkpatamɔ kɛha shikpɔŋhosomɔi sɔrɔtoi ni hosoɔ adesa shikpɔŋ nɔ gbɛjianɔtoo ni Satan eto ema shi lɛ kɛyashɛɔ eshishitoi anɔ diɛŋtsɛ.a
Hosomɔi ni Yɔɔ Adesa Gbɛjianɔtoo Mli
4. (a) Kɛjɛ mɛɛ be mli Yehowa webii ekpa nakai nibii ni baatsɔɔ oshara ni baaje shishi yɛ 1914 lɛ gbɛ? (b) Mɛɛ be kplaŋŋ ko 1914 baakadi enaagbee lɛ?
4 Kɛjɛ 1870 afii lɛ teŋ gbɛ tɔɔ Yehowa webii ekpa nakai nibii ni kɛ oshara baa ni baaje shishi yɛ 1914 ni baakadi Jeŋmaji Abe lɛ naagbee lɛ gbɛ. Enɛ ji “bei kpawo” (afii 2,520) ni je shishi kɛjɛ be mli ni abutu David maŋtsɛyeli ni yɔɔ Yerusalem lɛ yɛ afi 607 D.Ŋ.B. kɛyashi be ni akɛ Yesu ta maŋtsɛsɛi nɔ yɛ ŋwɛi Yerusalem yɛ 1914 Ŋ.B. lɛ.—Daniel 4:24, 25; Luka 21:24.b
5. (a) Mɛɛ adafitswaa ko C. T. Russell kɛha yɛ October 2, 1914? (b) Mɛɛ maŋkwramɔŋ hetsimɔ kɛ basabasafeemɔ etee nɔ kɛjɛ 1914 kɛbaa?
5 Beni C. T. Russell pue kɛha leebi jamɔ yɛ Brooklyn, New York, Betel weku lɛ hiɛ yɛ October 2, 1914 leebi lɛ, ekɛ adafitswaa ko ni hɛleɔ mɔ shi ha: “Jeŋmaji Abe lɛ eba naagbee; amɛmaŋtsɛmɛi lɛ eye amɛgbi lɛ amɛta.” Yɛ anɔkwale mli lɛ, jeŋ muu fɛɛ hoofeemɔ ni je shishi yɛ 1914 lɛ yashɛ shɔŋŋ akɛ eha maŋtsɛmɛi amaŋtsɛyelii sɔrɔtoi laaje. Czar maŋtsɛyeli ni abutu lɛ yɛ Bolshevik maŋ hiɛ atuatsemɔ lɛ mli yɛ 1917 lɛ kɛ mpleshii ni tee nɔ yɛ bei kpalaŋŋ mli yɛ Marxist nɔyeli kɛ nɔyelii ni bɔɔ jwetrii amɛhaa amɛhe lɛ teŋ lɛ ba. Maŋkwramɔŋ hosomɔi ni kɛ tsakemɔi baa miiya nɔ lolo kɛmiihao adesa weku lɛ yɛ shikpɔŋ muu lɛ fɛɛ nɔ. Ŋmɛnɛ, nɔyelii pii nyɛɛɛ ahi shi kɛteke afi loo afii enyɔ. Afeɔ bɔ ni maŋkwramɔŋ je lɛ nyɛɛɛ adamɔ shi diŋŋ lɛ he mfoniri yɛ Italia, ni na nɔyelii sɔrɔtoi heei 47 yɛ afii 42 pɛ ni nyiɛ Jeŋ Ta II sɛɛ lɛ nɔ mli. Shi nɛkɛ hosomɔi ni tsɔɔ hiɛ nɛɛ ji shishijee nɔ ni baaya ayagbe naa yɛ nɔyeli mli hosomɔ mli. Mɛni baajɛ mli aba? Nyɔŋmɔ Maŋtsɛyeli lɛ baaŋɔ shikpɔŋ lɛ fɛɛ nɔ nɔyeli lɛ.—Yesaia 9:5, 6.
6. (a) H. G. Wells tsɔɔ be hee ni hiɛdɔɔ yɔɔ mli lɛ mli yɛ mɛɛ gbɛ nɔ? (b) Mɛni jeŋ nilelɔ ko kɛ maŋ nɔkwɛlɔ ko ŋma yɛ be ni je shishi yɛ 1914 kɛbaa lɛ he?
6 Yinɔsaneŋmalɔi, jeŋ nilelɔi, kɛ maŋkwramɔŋ hiɛnyiɛlɔi kɛ amɛnine etsɔɔ afi 1914 akɛ eji yinɔsane be hee ko ni hiɛdɔɔ yɔɔ mli shishijee. Nɛkɛ be nɛɛ sɛɛ afii nyɔŋma kɛ kpawo lɛ, yinɔsaneŋmalɔ H. G. Wells wie akɛ: “Eyɛ miishɛɛ akɛ gbalɔ lɛ aaagba nibii ni ŋɔɔ. Shi enitsumɔ ji ni egba nɔ ni enaa. Enaa jeŋ ko ni asraafoi, maŋhedɔlɔi, mɛi ni kɛ shika faa amɛheɔ ehe kpa babaoo, shika suɔlɔi yeɔ nɔ; jeŋ ni aŋmɛɛ ehe aha mɛi ahe jwɛŋmɔ fɔŋ namɔ kɛ nyɛɛ, ni eelaje heyeli ni aŋkroaŋkroi yɔɔ lɛ kɛ foi, eetɔ̃ kɛmiibote kui amli béi ni naa wa mli, ni eesaa ehe kɛmiiha tai heei.” Afi 1953 mli ni jeŋ nilelɔ Bertrand Russell ŋma akɛ: “Kɛjɛ 1914 kɛbaa nɛɛ, mɔ fɛɛ mɔ ni naa shihilɛ ni yaa nɔ yɛ je lɛ mli lɛ ehao waa yɛ nɔ ni tamɔ shɛɛ mli sane ko ni ka enɔ akɛ eshi ako kɛya ehiɛ kɛyabote osharai wuji amli lɛ hewɔ. . . . Amɛnaa adesa weku lɛ tamɔ mɔ ni ehe gbɛi yɛ Hela oshara ko mli, ni nyɔŋmɔi ni mli efu tsirɛɔ eyisɛɛ ni agbɛnɛ ejeee mɔ ni yeɔ shɛɛ mli sane nɔ dɔŋŋ lɛ.” Afi 1980 mli ni beni maŋ nɔkwɛlɔ Harold Macmillan susuɔ afii ohai 20 lɛ shishijee yɛ toiŋjɔlɛ mli lɛ he lɛ, ekɛɛ: “Nɔ fɛɛ nɔ baaya hiɛ ni eya nɔ jogbaŋŋ. Enɛ ji jeŋ ni afɔ mi yɛ mli lɛ. . . . Trukaa, ni akpaaa gbɛ, leebi ko yɛ 1914 ni enɛɛmɛi ba naagbee.”
7-9. (a) Mɛɛ hosomɔi komɛi ehoso adesa weku lɛ kɛjɛ 1914 kɛbaa nɛɛ? (b) Yɛ naagbee kwraa lɛ, mɛɛ shihilɛ ni fata hosomɔi ni adesai weku lɛ kɛbɔi kpee kɛjɛ beni Yesu ba lɛ he adesai baayaje mli?
7 Jeŋ Ta II kɛ hoofeemɔ kɛ hosomɔ kroko ba. Ni tai bibii kɛ awuiyeli ni akɛtutuaa mɛi yɛ majimaji amli lɛ miiya nɔ eehoso shikpɔŋ lɛ. Gbeyei ni mɛi sheɔ akɛ ekolɛ mɛi ni kɛ awuiyeli tutuaa mɛi lɛ kɛ okpɛlɛmii ni kpataa nibii babaoo hiɛ baatsu nii loo maji kɛ okpɛlɛmii ni kpataa nibii babaoo hiɛ baatsu nii lɛ miiha mɛi pii miisusu amɛyiŋ.
8 Kɛfata tai ahe lɛ, nibii krokomɛi hu ehoso adesa weku lɛ kɛjɛ 1914 kɛbaa nɛɛ kɛyashɛ eshishitoi anɔ. Haomɔ be ni hiɛ kpaŋ nɔ ni kɛ hosomɔi baa nɛɛ ekome ji nɔ ni U.S. Amerika shika ni gbee shi yɛ October 29, 1929 lɛ kɛba lɛ. Enɛ kɛ Fimɔ Be Kpeteŋkpele ni sa maji ni bɔɔ jwetri amɛhaa amɛhe lɛ fɛɛ he ba. Fimɔ be nɛɛ ba shi loo eyawa yɛ 1932 kɛ 1934 afii lɛ amli, shi wɔmiinu nɔ ni jɛ mli ba lɛ he lolo. Kɛjɛ 1929 kɛbaa nɛɛ, akɛ nibii sɔrɔtoi ebɛje jeŋ ni he yeɔ yɛ shika gbɛfaŋ lɛ tamɔ mama ni atara mli jabejabe loo eko kɛ eko kɛkɛ. Nɔyelii kɛ amɛhe woɔ shikafaa koni akɛwo nyɔji loo akɛtsu nii amli. Mu kɛ pɛtrol he naagba ni ba yɛ 1973 lɛ kɛ 1987 shika ni gbee shi lɛ kɛ eko fata shika maŋtsɛyeli lɛ hosomɔi lɛ ahe. Beni enɛ yaa nɔ lɛ, gbɔmɛi akpekpei abɔ filiɔ nii titri. Gbɔmɛi babaoo ni anyɛɛɛ akane amɛ lɛ etsɔmɔ mɛi ni atsɔɔ shika mli ŋaatsɔɔ, shishiumɔi, kɛ loto kɛ asɔshwɛmɔi sɔrɔtoi ni nɔyelii babaoo tsuɔ enɛɛmɛi ahe nii lɛ anɔ ashishiuɔ amɛ yɛ be mli ni esa akɛ nɔyeli lɛ moŋ abu gbɔmɛi lɛ ahe. Kristendom televishin nɔ sanekpakpashiɛlɔi lɛ po kpaa amɛniji amli koni amɛnine ashɛ amɛ gbɛfaŋnɔ ni shɛɔ dɔlai akpekpei toi akpekpei abɔ lɛ anɔ!—Okɛto Yeremia 5:26-31 he.
9 Shika he lɛtemɔ mli naagbai ni tsɔ hiɛ lɛ ji nɔ ni gbele gbɛ ni no ha Mussolini kɛ Hitler shɔ hewalɛ. Babilon Kpeteŋkpele lɛ fiteee be kwraa yɛ amɛdɛŋ hiɛnyam taomɔ mli, kɛkɛ ni Vatican kɛ Italia bote kpaŋmɔi amli yɛ 1929 kɛ agbɛnɛ Germany yɛ 1933. (Kpojiemɔ 17:5) Gbii ni mli wa ni nyiɛ sɛɛ ba lɛ ji Yesu gbalɛ ni tsɔɔ ba ni eba lɛ mlibaa diɛŋtsɛ, ni nɔ ni baafata he ji “jeŋmaji afimɔ lɛ [ni] aaaba shikpɔŋ lɛ nɔ, ni amɛaafee yeyeeye, . . . ni nɔ aaanyɔnyɔɔ gbɔmɛi anɔ yɛ gbeyei kɛ nibii ni baa je lɛŋ lɛ agbɛkwɛmɔ hewɔ” lɛ. (Luka 21:7-9, 25-31)c Hɛɛ, hosomɔi ni je shishi akɛ eeehoso adesa weku lɛ yɛ 1914 lɛ etee nɔ, ni hosomɔi ni naa wa enyiɛ sɛɛ kɛba.
Yehowa kɛ Hosomɔ lɛ Eko Baa
10. (a) Mɛni hewɔ hosomɔi pii eba adesai ashihilɛ mli lɛ? (b) Mɛni ji nɔ ni Yehowa feɔ, koni ekɛsaa ehe eha mɛni?
10 Nɛkɛ hosomɔi yɛ adesai ashihilɛ mli nɛɛ jɛ gbɔmɔ ni nyɛɛɛ akudɔ lɛ diɛŋtsɛ enajifaamɔi ahewɔ. (Yeremia 10:23) Agbɛnɛ, nakai blema onufu lɛ, Satan, “ni shishiuɔ jeŋ muu lɛ fɛɛ” lɛ, kɛ haomɔi miiba yɛ enaagbee mɔdɛŋ ni ebɔɔ ni etsi adesai fɛɛ kɛjɛ Yehowa jamɔ he lɛ mli. Ŋmɛnɛŋmɛnɛ beaŋ tsɔnei ahe nilee eha shikpɔŋ lɛ efee bibioo tamɔ akutso kome, he ni maŋhedɔɔ kɛ weku mli nyɛɛi miihoso adesa weku lɛ kɛmiishɛ eshishitoi anɔ, ni nɔ ni akɛɛ atsɛɔ lɛ Jeŋmaji Ekomefeemɔ lɛ naaa tsabaa ko ni mɔɔ shi. Agbɛnɛ gbɔmɔ miiye enyɛmi gbɔmɔ nɔ kɛmiiye lɛ awui fe be fɛɛ. (Kpojiemɔ 12:9, 12; Jajelɔ 8:9) Ni kɛlɛ, Nuŋtsɔ Maŋtsɛ Yehowa, ŋwɛi kɛ shikpɔŋ Feelɔ lɛ, miiha hosomɔ ko miiya nɔ yɛ nɔ ni miihe ashɛ afii 90 nɛ, koni ekɛsaa ehe ni ekɛ tsabaa aha shikpɔŋ lɛ naagbai lɛ shikome nyɔŋlo. Yɛ mɛɛ gbɛ nɔ?
11. (a) Mɛni hosomɔ ko atsɔɔ mli yɛ Hagai 2:6, 7? (b) Hagai gbalɛ lɛ miiba mli yɛ mɛɛ gbɛ nɔ?
11 Wɔkaneɔ yɛ Hagai 2:6, 7 akɛ: “Shi bɔ ni Yehowa Zebaot kɛɛ nɛ: Eshwɛ be, be kukuoo kɛkɛ, ni mahoso ŋwɛi kɛ shikpɔŋ kɛ ŋshɔ kɛ shikpɔŋ gbiŋ; ni mahoso jeŋmaji fɛɛ kwa, ni jeŋmaji lɛ fɛɛ anii ni jara wa lɛ aaaba, ni mikɛ anunyam sɔŋŋ aaawo shia nɛɛ obɔ, Yehowa Zebaot kɛɛ.” Kɛjɛ afi 1919 mli titri ni Yehowa eha edasefoi lɛ ejaje ekojomɔi yɛ adesa weku lɛ fɛɛ ni yɔɔ shikpɔŋ nɛɛ nɔ lɛ ateŋ. Aha Satan jeŋ gbɛjianɔtoo lɛ ele jeŋ muu fɛɛ kɔkɔbɔɔ nɛɛ.d Yɛ be mli ni kɔkɔbɔɔ lɛ mli waa lɛ, akanya adesai ni sheɔ Nyɔŋmɔ gbeyei, “nii ni jara wa lɛ,” koni amɛtsi amɛhe kɛjɛ jeŋmaji lɛ ahe. Jeee hosomɔ ni yaa nɔ yɛ Satan gbɛjianɔtoo lɛ mli lɛ hosoɔ amɛ kɛjeɔ kpo. Shi yɛ be mli ni amɛyɔseɔ shihilɛ lɛ, amɛkpɛɔ amɛ diɛŋtsɛ amɛyiŋ akɛ amɛbaafata Yohane kuu ni afɔ amɛ mu lɛ ahe ni amɛkɛ anunyam awo Yehowa jamɔ shia lɛ obɔ. Amɛfeɔ enɛ yɛ mɛɛ gbɛ nɔ? Kɛtsɔ Nyɔŋmɔ Maŋtsɛyeli ni ato ama shi lɛ he sanekpakpa lɛ shiɛmɔ kɛ ekaa nɔ. (Mateo 24:14) Nɛkɛ Maŋtsɛyeli, ni mɛi ni feɔ ji Yesu kɛ esɛɛnyiɛlɔi ni afɔ amɛ mu lɛ baadamɔ shi kɛya naanɔ koni ewo Yehowa hiɛ nyam akɛ “maŋtsɛyeli ni anyɛŋ ahoso lɛ.”—Hebribii 12:26-29.
12. Kɛ oje shishi akɛ ooobo shiɛmɔ ni agba afɔ shi yɛ Mateo 24:14 lɛ toi lɛ, belɛ mɛni esa akɛ ofee dani shikpɔŋhosomɔ kpeteŋkpele ni yɔɔ Kpojiemɔ 6:12 lɛ aba?
12 Ani oji mɔ ni ebɔi nakai shiɛmɔ lɛ toiboo? Ani ekolɛ ofata mɛi akpekpei abɔ ni nyɛsɛɛ nɛɛ amɛba Yesu gbele lɛ Kaimɔ lɛ yeli shishi lɛ ahe? Kɛji nakai ni lɛ, yaa nɔ oshwere yɛ Biblia mli anɔkwale ni okaseɔ lɛ mli. (2 Timoteo 2:15; 3:16, 17) Tsi ohe kɛjɛ Satan shikpɔŋ nɔ gbɛjianɔtoo ni abu lɛ gbele fɔ lɛ shihilɛ ni ekpɔtɔ lɛ he kwraa! Ba Kristofoi ajeŋ hee asafo lɛ mli amrɔ nɔŋŋ ni obana emli nitsumɔ lɛ mli gbɛfaŋnɔ dani naagbee “shikpɔŋhosomɔ” ni ji hiɛkpatamɔ lɛ akumɔ Satan je lɛ fɛɛ dukuduku. Shi mɛni ji nakai shikpɔŋhosomɔ kpeteŋkpele lɛ? Ha wɔkwɛ agbɛnɛ.
Shikpɔŋhosomɔ Kpeteŋkpele Lɛ!
13. Yɛ mɛɛ gbɛ nɔ shikpɔŋhosomɔ kpeteŋkpele lɛ ji ehee kwraa ni adesai enako eko da?
13 Hɛɛ, nɛkɛ naagbee gbii ni ji jaramɔ bei nɛɛ efee shikpɔŋhosomɔi abe—nɔ ni baa diɛŋtsɛ kɛ okadifeemɔ mli nɔ. (2 Timoteo 3:1) Shi nɛkɛ hosomɔi nɛɛ eko kwraa jeee naagbee hosomɔ kpeteŋkpele ni Yohane na yɛ be mli ni atse naasɔomɔ ni ji ekpaa lɛ naa lɛ. Hosomɔi ni tsɔ hiɛ lɛ abe lɛ eba naagbee. Agbɛnɛ shikpɔŋhosomɔ kpeteŋkpele ni ji ehee kwraa ni adesa enako eko da lɛ miiba agbɛnɛ. Bɔ ni shikpɔŋhosomɔ nɛɛ da sɔŋŋ ha kɛ bɔ ni ebaahoso nibii ni ekokolo nibii eha hewɔ lɛ, anyɛŋ akɛ Richter ŋsɛnii ni akɛsusuɔ shikpɔŋhosomɔ hewalɛ lɛ loo adesa susumɔ nɔ ko ato he. Enɛ jeee hosomɔ ko ni baa maŋ kome pɛ nɔ, shi moŋ eji jeŋ muu fɛɛ hosomɔ ni fiteɔ “shikpɔŋ” muu lɛ fɛɛ, ni ji akɛ, adesai ni bɛ jeŋba lɛ fɛɛ.
14. (a) Mɛɛ gbalɛ ko gba shikpɔŋhosomɔ kpeteŋkpele ko kɛ nɔ ni baajɛ mli aba lɛ? (b) Esa akɛ Yoel gbalɛ lɛ kɛ Kpojiemɔ 6:12, 13 akɔ mɛni he?
14 Yehowa gbalɔi krokomɛi gba shikpɔŋhosomɔ ni tamɔ nɛkɛ kɛ jeŋ muu fɛɛ hiɛkpatamɔ ni ekɛbaaba lɛ. Akɛ nɔkwɛmɔnɔ lɛ, aaafee afi 820 D.Ŋ.B. lɛ, Yoel wie “Yehowa gbi wulu ni he yɔɔ gbeyei” ni baa lɛ he, ni etsɔɔ mli akɛ “hulu aaatsɔ duŋ, ni nyɔŋtsere aaatsɔ lá.” Yɛ sɛɛ mli lɛ, ekɛ nɛkɛ wiemɔi nɛɛ fata he: “Asafoi, asafoi yɛ atɛŋbuu jɔɔ lɛ mli; ejaakɛ Yehowa gbi lɛ eshɛ shi eta, yɛ atɛŋbuu jɔɔ lɛ mli. Hulu kɛ nyɔŋtsere ewo duŋ, ni ŋulamii efɔɔ kpɛmɔ. Ni Yehowa aaahũu kɛaajɛ Zion, ni eeewo egbee nɔ kɛaaje Yerusalem, ni ŋwɛi kɛ shikpɔŋ aaahoso; shi Yehowa aaatsɔ abobaa he eha emaŋ lɛ kɛ mɔɔ ni wa hu eha Israelbii lɛ.” (Yoel 3:4; 4:14-16) Nɛkɛ hosomɔ nɛɛ baanyɛ akɔ Yehowa fɔbuu kojomɔ yɛ amanehulu kpeteŋkpele be lɛ mli lɛ pɛ he. (Mateo 24:21) No hewɔ lɛ sane ni tamɔ nakai nɔŋŋ ni yɔɔ Kpojiemɔ 6:12, 13 lɛ hu baakɔ enɛ he nakai nɔŋŋ.—Kwɛmɔ Yeremia 10:10; Zefania 1:14, 15 hu.
15. Mɛɛ hosomɔ ko ni naa wa waa gbalɔ Habakuk gba fɔ shi?
15 Yoel sɛɛ aaafee afii 200 lɛ, gbalɔ Habakuk wie nɛkɛ yɛ sɔlemɔ mli eha e-Nyɔŋmɔ lɛ akɛ: “Yehowa, minu ohe ni mishe gbeyei! Yehowa, tsiɛmɔ onitsumɔ lɛ hiɛ yɛ afii nɛɛ amli nɔŋŋ, ha ale yɛ afii nɛɛ amli nɔŋŋ; mlifu mli lɛ kaimɔ musuŋtsɔlɛ!” Nakai “mlifu” lɛ baafee mɛni? Habakuk tee nɔ etsɔɔ bɔ ni amanehulu kpeteŋkpele lɛ baaji lɛ mli fitsofitso, ni ewie yɛ Yehowa he akɛ: “Ewa edamɔ shi, ni shikpɔŋ hoso; ekwɛ, ni jeŋmaji ahe kpokpo, . . . okɛ mlila fa kɛtsɔ shikpɔŋ lɛ nɔ, okɛ mlifu shimɔ jeŋmaji lɛ dukuduku. Shi mi lɛ, manya yɛ Yehowa mli, mimli aaafili mi yɛ miyiwalaheremɔ Nyɔŋmɔ lɛ mli!” (Habakuk 3:1, 2, 6, 12, 18) Mɛɛ hosomɔ kpeteŋkpele po Yehowa aaaha aba shikpɔŋ muu lɛ fɛɛ nɔ nɛkɛ, yɛ be mli ni eshimɔɔ jeŋmaji lɛ dukuduku lɛ!
16. (a) Mɛni gbalɔ Ezekiel egba efɔ shi kɛha be ni Satan baatutua Nyɔŋmɔ webii lɛ yɛ naagbee kwraa lɛ? (b) Mɛni jɛɔ shikpɔŋhosomɔ kpeteŋkpele ni yɔɔ Kpojiemɔ 6:12 lɛ mli baa?
16 Ezekiel hu gba akɛ beni Gog ni jɛ Magog lɛ (Satan ni aba lɛ shi lɛ) kɛ enaagbee tutuamɔ baa Nyɔŋmɔ webii lɛ anɔ lɛ, Yehowa baaha “hosomɔ kpeteŋkpele” aba “Israel shikpɔŋ lɛ nɔ.” (Ezekiel 38:18, 19) Eyɛ mli akɛ shikpɔŋhosomɔ diɛŋtsɛ fata he moŋ, shi esa akɛ wɔkai akɛ akɛ Kpojiemɔ ha yɛ okadii amli. Nɛkɛ gbalɛ nɛɛ kɛ gbalɛi krokomɛi ni akɛha lɛ fɛɛ ji okadi mli nɔ. No hewɔ lɛ, etamɔ nɔ ni naasɔomɔ ni ji ekpaa lɛ ni atse naa lɛ haa wɔnaa hosomɔi fɛɛ ni eba shikpɔŋ nɛɛ nɔ nibii agbɛjianɔtoo lɛ nɔ lɛ naagbee—ni ji shikpɔŋhosomɔ kpeteŋkpele ni emli akpataa adesai fɛɛ ni teɔ shi woɔ Yehowa Nyɔŋmɔ maŋtsɛyeli lɛ hiɛ yɛ lɛ.
Duŋ Be
17. Shikpɔŋhosomɔ kpeteŋkpele lɛ saa hulu, nyɔŋtsere kɛ ŋulamii lɛ ahe yɛ mɛɛ gbɛ nɔ?
17 Taakɛ Yohane tee nɔ etsɔɔ lɛ, nɔ ni fata shikpɔŋhosomɔ kpeteŋkpele lɛ he ba ji nibii ni yɔɔ gbeyei ni kɔɔ ŋwɛi he. Ekɛɛ: “Ni hulu tsɔ ediŋ tamɔ tsɔi kotoku, ni nyɔŋtsere muu lɛ tsɔ tamɔ lá; ni ŋwɛi ŋulamii lɛ tserɛ shwie shikpɔŋ, tamɔ bɔ ni agbami tso yi agbamii ŋmilikitii shwieɔ shi, beni kɔɔyɔɔ kpeteŋkpele hosoɔ lɛ lɛ.” (Kpojiemɔ 6:12b, 13) Mɛɛ nii ni yɔɔ naakpɛɛ nɛ! Ani obaanyɛ osusu bɔ ni duŋ ni baawo nɛɛ baafee gbeyei aha kɛji akɛ gbalɛ nɛɛ aaaba mli pɔtɛɛ lɛ he? Hulu la ni kpɛɔ ni haa dɔlɛ yɛ jetsɛremɔ mli bɛ dɔŋŋ! Nyɔŋtsere ni kpɛɔ fɛfɛo gbɛkɛ tamɔ shieŋtsɛ ko lɛ bɛ dɔŋŋ! Ni ŋulamii akpekpei toi akpekpei abɔ lɛ kpɛlɛŋ yɛ ŋwɛi ni tamɔ kuŋtu lɛ mli dɔŋŋ. Shi moŋ, duŋ kpii ni efee ŋanii ni miiya nɔ kɛkɛ.—Okɛto Mateo 24:29 he.
18. ‘Ŋwɛi wo duŋ’ kɛha Yerusalem yɛ afi 607 D.Ŋ.B. yɛ mɛɛ gbɛ nɔ?
18 Yɛ mumɔŋ shishinumɔ naa lɛ, agba nɛkɛ duŋ nɛɛ he sane afɔ shi aha blema Israel. Yeremia bɔ kɔkɔ akɛ: “Shikpɔŋ muu lɛ fɛɛ baatsɔ amaŋfɔ koikoi, ani esaaa akɛ mibuleɔ amɛshishi? Yɛ enɛ hewɔ lɛ shikpɔŋ lɛ aaawo yara, ni ŋwɛi aaadi tuŋŋ.” (Yeremia 4:27, 28, New World Translation.) Beni nakai gbalɛ lɛ ba mli yɛ afi 607 D.Ŋ.B. lɛ, nibii amli badi tuŋŋ diɛŋtsɛ kɛha Yehowa webii. Amɛ maŋtiase, Yerusalem, gbee shi yɛ Babilonbii lɛ ahiɛ. Akpata amɛ sɔlemɔ tsu lɛ hiɛ, ni ashi amɛmaŋ lɛ amaŋfɔ. Kɛha amɛ lɛ, miishɛjemɔ ni tamɔ la ko baaa kɛjɛɛɛ ŋwɛi. Yɛ no najiaŋ lɛ, etamɔ bɔ ni Yeremia kɛ yaafo kɛɛ Yehowa lɛ: “Ogbe wɔ, onako mɔbɔ. Okɛ atatu eha ohe, koni faikpamɔ akatsɔ mli kɛmiiho.” (Yaafo 3:43, 44) Kɛha Yerusalem lɛ, nakai ŋwɛi duŋ lɛ tsɔɔ gbele kɛ hiɛkpatamɔ.
19. (a) Yɛ mɛɛ gbɛ nɔ Nyɔŋmɔ gbalɔ Yesaia tsɔɔ duŋ ko ni wo yɛ ŋwɛi ni kɔɔ blema Babilon he lɛ mli? (b) Mɛɛ be ni yɛ mɛɛ gbɛ nɔ Yesaia gbalɛ lɛ ba mli?
19 Yɛ sɛɛ mli lɛ, ŋwɛi duŋ ko ni tamɔ nakai nɔŋŋ batsɔ oshara kɛha blema Babilon. Akɛ mumɔ tsirɛ Nyɔŋmɔ gbalɔ lɛ koni eŋma yɛ enɛ he akɛ: “Naa, Yehowa gbi lɛ miiba kɛ yiwalɛ kɛ mlila kɛ mlifu ni naa wa, koni ebafee shikpɔŋ lɛ fɛɛ amaŋfɔ, ni ekpata emli eshafeelɔi lɛ ahiɛ kɛjɛ nɔ. Ni ŋwɛi ŋulamii kɛ oŋwɛ̃ kpɛŋ; hulu aaawo duŋ yɛ ekpojee mli, nyɔŋtsere hu haŋ ela lɛ akpɛ. Ni mawo je lɛ nyɔmɔ yɛ amɛ nɔ fɔŋ lɛ hewɔ, kɛ mɛi fɔji hu yɛ amɛ nɔ sha lɛ hewɔ, ni maha hewolɔi ahetsɔɔmɔ lɛ sɛɛ afo, ni maba yiwalɔi ahenɔwomɔ lɛ shi.” (Yesaia 13:9-11) Gbalɛ nɛɛ ba mli yɛ afi 539 D.Ŋ.B., beni Babilon gbee shi yɛ Media kɛ Persiabii lɛ ahiɛ lɛ. Etsɔɔ duŋ kpii, hiɛnɔkamɔ ni bɛ, la ni shɛjeɔ mɔ mii ko ni bɛ kɛha Babilon yɛ be mli ni egbee shi kwraa kɛjɛ egbɛhe akɛ tsutsu jeŋ hewalɛ kɛmiiya naanɔ lɛ.
20. Mɛni ni yɔɔ gbeyei ni baajɛ mli aba mɛɔ nibii agbɛjianɔtoo nɛɛ yɛ be mli ni shikpɔŋhosomɔ kpeteŋkpele lɛ aaaba lɛ?
20 Yɛ nakai gbɛ nɔ nɔŋŋ lɛ, beni shikpɔŋhosomɔ kpeteŋkpele nɛɛ aaahoso lɛ, nɛkɛ jeŋ gbɛjianɔtoo muu nɛɛ fɛɛ baabote yeyeeyefeemɔ ni tamɔ duŋ kpii mli. Satan shikpɔŋ nɔ gbɛjianɔtoo lɛ ŋulamii ni kpɛlɛɔ kaŋkaŋ lɛ kpɛŋ kɛ hiɛnɔkamɔ ko. Amrɔ nɛɛ po, shikpɔŋ nɔ maŋkwramɔŋ hiɛnyiɛlɔi lɛ, titri lɛ mɛi ni yɔɔ Kristendom lɛ ebafee mɛi ni ehe gbɛi akɛ mɛi ni efite kwraa, amalelɔi kɛ mɛi ni bɛ jeŋba. (Yesaia 28:14-19) Anyɛŋ akɛ he afɔ amɛnɔ dɔŋŋ. Amɛkane ni miihe agbo lɛ baabote duŋ mli kwraa yɛ be mli ni Yehowa kɛ fɔbuu kojomɔ baa enɔ lɛ. Abaakpa hewalɛ ni amɛnaa yɛ shikpɔŋ nɔ saji amli ni tamɔ nyɔŋtsere la lɛ he mama akɛ eji nɔ ni la eyi mli obɔ, nɔ ni kɛ gbele baa. Amɛ je lɛŋ ŋulamii wuji lɛ baagboi kwraa tamɔ ŋwɛi ŋulamii bibii ni jɛɔ ŋwɛi gbeɔ shi ni agbɛɔ amɛ ashwaa tamɔ wein yibii ŋmilikitii yɛ ahum ni naa wa mli. Wɔ jeŋ muu nɛɛ fɛɛ baahoso yɛ “amanehulu babaoo . . . ni anako nɔ da kɛjɛ je lɛŋ shishijee mli kɛbashi ŋmɛnɛŋmɛnɛ, ni asaŋ anaŋ enɔ gbi ko gbi ko dɔŋŋ” lɛ shishi. (Mateo 24:21) Mɛɛ gbɛkpamɔ ni yɔɔ gbeyei po nɛ!
“Ŋwɛi” Tsi Ehe Kɛtee
21. Mɛni Yohane na ni kɔɔ “ŋwɛi” kɛ “gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ” he yɛ eninaa lɛ mli?
21 Yohane ninaa lɛ tee nɔ: “Ni ŋwɛi tsi ehe kɛtee tamɔ akotaa wolo; ni atsirɛ gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ kɛjɛ amɛ gbɛhei.” (Kpojiemɔ 6:14) Eka shi faŋŋ akɛ enɛɛmɛi jeee ŋwɛi diɛŋtsɛ loo gɔji kɛ ŋshɔkpɔi diɛŋtsɛ. Shi mɛni amɛfeɔ he mfoniri?
22. Mɛɛ “ŋwɛi” nɛkɛ “akota tamɔ wolo ko” yɛ Edom?
22 Yɛ “ŋwɛi” nɛɛ he lɛ, gbalɛ kroko ni tamɔ nakai ni wieɔ Yehowa mlifu ni ekɛteɔ shi eshiɔ jeŋmaji fɛɛ he lɛ yeɔ ebuaa wɔ ni wɔnuɔ shishi: “Ni ŋwɛi asafo lɛ fɛɛ aaafite, aaakota ŋwɛi tamɔ wolo.” (Yesaia 34:4) Edom titri ji mɔ ni esa akɛ ena amanehulu. Yɛ mɛɛ gbɛ nɔ? Beni akpata Yerusalem hiɛ yɛ afi 607 D.Ŋ.B. lɛ sɛɛ nɔŋŋ pɛ kɛkɛ ni Babilon ye enɔ kunim. Aŋmaaa nɔ ko afɔɔɔ shi akɛ nɔ ko ni yɔɔ naakpɛɛ ba yɛ ŋwɛi diɛŋtsɛ ni anaa nɛɛ yɛ nakai be lɛ mli. Shi nibii ni kɛ osharai baa tee nɔ yɛ Edom “ŋwɛi” lɛ amli.e Aba amɛ adesai nɔyeli hewalɛi lɛ ashi kɛjɛ amɛgbɛhe ni awo nɔ, ni tamɔ gbɛhe ni yɔɔ ŋwɛi lɛ. (Yesaia 34:5) “Akota” amɛ ni akɛfɔ shi, tamɔ wolo momo ko ni he bɛ sɛɛnamɔ ko kwraa dɔŋŋ kɛha mɔ ko.
23. Mɛni ji “ŋwɛi” ni ‘baatsi ehe aya tamɔ wolo’ lɛ, ni Petro wiemɔi lɛ maa nɛkɛ shishinumɔ nɛɛ nɔ mi yɛ mɛɛ gbɛ nɔ?
23 No hewɔ lɛ, “ŋwɛi” ni ‘baatsi ehe aya tamɔ wolo’ lɛ kɔɔ nɔyelii ni yeɔ shikpɔŋ nɛɛ nɔ ni teɔ shi woɔ Nyɔŋmɔ lɛ ahe. Okpɔŋɔ Nɔtalɔ ni ta okpɔŋɔ yɛŋ lɛ nɔ ni yeɔ kunim yɛ mɔ fɛɛ mɔ nɔ lɛ baajie amɛ kɛya kwraa yɛ naagbee. (Kpojiemɔ 19:11-16, 19-21) Nɔ ni bɔfo Petro wie yɛ be mli ni ekpaa nibii ni naasɔomɔ ni ji ekpaa lɛ naatsemɔ feɔ he mfoniri lɛ agbɛ lɛ maa enɛ nɔ mi: “Shi ŋwɛi kɛ shikpɔŋ ni yɔɔ nɛɛ, lɛ nɔŋŋ ewiemɔ akɛto amɛ aha la, ni akɛ amɛ eto kɛyaashi kojomɔ kɛ gbɔmɛi ni kwa Nyɔŋmɔ lɛ ahiɛkpatamɔ lɛ nɔ.” (2 Petro 3:7) Shi wiemɔ, “ni atsirɛ gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ kɛjɛ amɛgbɛhei” lɛ hu?
24. (a) Mɛɛ be, yɛ Biblia gbalɛ mli, akɛɔ akɛ gɔji kɛ ŋshɔkpɔi hosoɔ aloo amɛtsirɛɔ amɛhe lɛ? (b) Yɛ mɛɛ gbɛ nɔ ‘gɔji hoso’ yɛ be mli ni Ninive gbee shi lɛ?
24 Awieɔ yɛ Biblia gbalɛ mli akɛ gɔji kɛ ŋshɔkpɔi hosoɔ aloo amɛhaoɔ yɛ be kɛ bei amli yɛ be mli ni maŋkwramɔŋ basabasafeemɔ ko eba lɛ. Akɛ nɔkwɛmɔnɔ lɛ, yɛ be mli ni egbaa Yehowa kojomɔi ni ekɛshiɔ Ninive lɛ, gbalɔ Nahum ŋma akɛ: “Gɔji hosoɔ yɛ ehiɛ, ni gɔŋkpɔi hu sereɔ; shikpɔŋ lɛ woɔ ehe nɔ yɛ ehiɛ, kɛ jeŋ kɛ emli bii lɛ fɛɛ.” (Nahum 1:5) Nɔ ko bɛ ni aŋma afɔ shi ni tsɔɔ gɔji diɛŋtsɛ ni kumɔ beni Ninive gbee shi yɛ 632 D.Ŋ.B. lɛ. Shi moŋ jeŋ hewalɛ ni tsutsu lɛ etamɔ gɔŋ yɛ hewalɛ mli lɛ gbee shi trukaa.—Okɛto Yeremia 4:24 he.
25. Yɛ mɛɛ gbɛ nɔ “gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ” baafamɔ kɛjɛ amɛgbɛhei yɛ nibii agbɛjianɔtoo nɛɛ naagbee ni baa lɛ mli?
25 No hewɔ lɛ “gɔŋ fɛɛ gɔŋ kɛ ŋshɔkpɔ fɛɛ ŋshɔkpɔ” ni awie he yɛ naasɔomɔ ni ji ekpaa lɛ naatsemɔ mli lɛ baadamɔ shi aha maŋkwramɔŋ nɔyelii kɛ gbɛjianɔtoi ni yɔɔ je nɛŋ ni hiɛ amɛhe ni tamɔ nɔ ni damɔ shi shiŋŋ kɛha adesai pii lɛ yɛ sane naatsɔɔmɔ ni ja naa. Abaahoso amɛ ni amɛfamɔ kɛjɛ amɛ gbɛhei, koni mɛi ni tsutsu lɛ amɛkɛ amɛhiɛ fɔɔ amɛnɔ lɛ ahiɛ afee amɛ yaa ni amɛshe gbeyei. Taakɛ gbalɛ lɛ yaa nɔ ejajeɔ lɛ, sanebimɔ ko baŋ he akɛ Yehowa kɛ e-Bi lɛ mlifu gbi kpeteŋkpele lɛ—naagbee hosomɔ ni jieɔ Satan gbɛjianɔtoo lɛ fɛɛ kɛyaa lɛ—eba kɛ oweletɔɔ!
“Nyɛgbeea Wɔ Nɔ ni Nyɛteea Wɔ”
26. Te gbɔmɛi ni teɔ shi woɔ Nyɔŋmɔ maŋtsɛyeli lɛ baafee amɛnii yɛ amɛgbeyeishemɔ lɛ mli amɛha tɛŋŋ, ni mɛɛ wiemɔi ni tsɔɔ gbeyeishemɔ amɛbaajaje?
26 Yohane wiemɔi lɛ yaa nɔ akɛ: “Ni shikpɔŋ lɛ nɔ maŋtsɛmɛi lɛ kɛ mɛi agboi lɛ kɛ asafoiatsɛmɛi lɛ kɛ niiatsɛmɛi lɛ kɛ hewalɔi lɛ, kɛ nyɔŋ fɛɛ nyɔŋ kɛ odehe fɛɛ odehe yateetee amɛhe yɛ bui amli kɛ gɔji atɛsai amli, ni amɛkɛɛ gɔji lɛ kɛ tɛsai lɛ akɛ: Nyɛgbeea wɔ nɔ, ni nyɛteea wɔ kɛjɛa mɔ ni ta maŋtsɛsɛi lɛ nɔ lɛ hiɛ kɛ toobi lɛ mlifu lɛ naa. Ejaakɛ emlifu gbi wulu lɛ eshɛ, ni namɔ aaanyɛ shi adamɔ?”—Kpojiemɔ 6:15-17.
27. Te Israelbii ni yɔɔ Samaria ni yee anɔkwale lɛ bolɔ amɛha tɛŋŋ, ni nakai wiemɔi lɛ ba mli yɛ mɛɛ gbɛ nɔ?
27 Beni Hoshea jajeɔ Yehowa kojomɔ eshwieɔ Samaria, kooyigbɛ Israel maŋtsɛyeli lɛ maŋtiase lɛ nɔ lɛ, ekɛɛ: “Ni aaakpata Bet-Awen hei grɔŋŋi lɛ ni ji Israel he esha lɛ ahiɛ; ŋmei kɛ aŋlɛŋlɛi ni aaakwɛ yɛ amɛfɔleshaa latɛi lɛ anɔ, ni amɛaakɛɛ gɔji lɛ akɛ: Nyɛhaa wɔ nɔ! Kɛ gɔŋkpɔi lɛ hu akɛ: Nyɛbagbeea wɔ nɔ!” (Hoshea 10:8) Wiemɔi nɛɛ ba mli yɛ mɛɛ gbɛ nɔ? Ojogbaŋŋ, beni Samaria gbee shi yɛ Ashurbii ni yi wa lɛ ahiɛ yɛ 740 D.Ŋ.B. lɛ, he ko he ko bɛ ni Israelbii lɛ baajo foi kɛaaya. Hoshea wiemɔi lɛ tsɔɔ henumɔ ko ni tsɔɔ akɛ nɔ ko nɔ ko kwraa bɛ ni abaanyɛ afee, gbeyei diɛŋtsɛ, kɛ bɔ ni mɛi ni aye amɛnɔ kunim lɛ nu he akɛ afee amɛ shwɛm ni akpoo amɛ. Ŋmeŋmei diɛŋtsɛ loo Samaria gbɛjianɔtoi ni tamɔ gɔji lɛ nyɛɛɛ abu amɛhe, eyɛ mli akɛ etamɔ nɔ ni amɛsusu yɛ tsutsu akɛ amɛbaahi shi daa.
28. (a) Mɛɛ kɔkɔ Yesu bɔ yei ni yɔɔ Yerusalem lɛ? (b) Yesu kɔkɔbɔɔ lɛ ba mli yɛ mɛɛ gbɛ nɔ?
28 Nakai nɔŋŋ hu, beni Roma asraafoi lɛ nyiɛ Yesu hiɛ kɛyaa egbele mli lɛ, ewie etsɔɔ Yerusalem yei lɛ ni ekɛɛ: “Ejaakɛ naa, gbii miiba, nɔ mli ni amɛaakɛɛ: Ajɔɔ kenei kɛ musui ni fɔko da kɛ fufɔi ni ayeko da! No mli lɛ amɛaabɔi gɔji lɛ akɛɛmɔ akɛ: Nyɛbagbeea wɔ nɔ! Kɛ gɔŋkpɔi lɛ hu akɛ: Nyɛbahaa wɔ nɔ!” (Luka 23:29, 30) Yerusalem hiɛkpatamɔ yɛ Roma asraafoi lɛ adɛŋ yɛ afi 70 Ŋ.B. lɛ ji nɔ ni aŋmala ashwie shi yɛ yinɔsane mli, ni eka shi faŋŋ akɛ Yesu wiemɔi lɛ mli shishinumɔ tamɔ Hoshea nɔ lɛ pɛpɛɛpɛ. Teemɔ he ko bɛ kɛha Yudafoi ni shwɛ yɛ Yudea lɛ. He fɛɛ he ni amɛaabɔ mɔdɛŋ akɛ amɛaatee amɛhe yɛ yɛ Yerusalem lɛ, aloo kɛ amɛjo foi kɛtee Masada gɔŋ lɛ yiteŋ po lɛ, amɛnyɛɛɛ amɛjo Yehowa kojomɔ mlifu ni naa wa lɛ naa foi.
29. (a) Kɛ Yehowa mlifu gbi lɛ ba lɛ, mɛni baaba mɛi ni fiɔ gbɛjianɔtoo nɛɛ sɛɛ lɛ anɔ? (b) Mɛɛ Yesu gbalɛ baaba mli beni Yehowa jieɔ E-mlifu kpo lɛ?
29 Agbɛnɛ, naasɔomɔ ni ji ekpaa lɛ naatsemɔ etsɔɔ akɛ nɔ ko ni tamɔ nakai baaba yɛ Yehowa mlifu gbi ni baa lɛ mli. Yɛ be mli ni abaahoso shikpɔŋ nɔ gbɛjianɔtoo lɛ yɛ naagbee kwraa lɛ, mɛi ni etuu amɛhe amɛha esɛɛfimɔ lɛ kɛ hehiamɔ baatao teemɔ he, shi amɛnaŋ eko. Apasa jamɔ, Babilon Kpeteŋkpele lɛ, eha amɛnine enyɛ shi yɛ gbɛ ni yɔɔ mɔbɔ nɔ. Gɔji diɛŋtsɛ amli bui loo okadi gɔji ni ji maŋkwramɔŋ kɛ jarayeli mli gbɛjianɔtoi nyɛŋ ekɛ shika mli hebuu loo yelikɛbuamɔ ko ni tamɔ nakai aha amɛ. Nɔ ko nɔ ko bɛ ni baabaa amɛyi kɛjɛ Yehowa mlifu lɛ naa. Yesu etsɔɔ bɔ ni amɛ gbeyeishemɔ lɛ ji lɛ diɛŋtsɛ mli nɛkɛ, akɛ: “Kɛkɛ ni gbɔmɔbi lɛ okadi lɛ aaapue yɛ ŋwɛi, ni no lɛ shikpɔŋ lɛ nɔ akutsei lɛ fɛɛ aaawo yara, ni amɛaana gbɔmɔbi lɛ akɛ eeba yɛ ŋwɛi atatui lɛ anɔ kɛ hewalɛ kɛ anunyam babaoo hu.”—Mateo 24:30.
30. (a) Sanebimɔ akɛ: “Namɔ baanyɛ shi adamɔ?” lɛ tsɔɔ mɛni? (b) Ani mɔ ko baanyɛ adamɔ shi yɛ Yehowa kojomɔ be lɛ mli?
30 Hɛɛ, mɛi ni amɛkpoo akɛ amɛaakpɛlɛ okpɔŋɔ yɛŋ lɛ Nɔtalɔ kunimyelɔ lɛ hewalɛ lɛ nɔ lɛ, abaanyɛ amɛnɔ ni amɛkpɛlɛ amɛtɔmɔ lɛ nɔ. Adesai ni amɛjɛ amɛsuɔmɔ mli amɛfee onufu lɛ seshi lɛ fa lɛ, hiɛkpatamɔ ji nɔ ni baaba amɛnɔ yɛ be mli ni Satan je lɛ hoɔ eyaa lɛ. (1 Mose 3:15; 1 Yohane 2:17) Bɔ ni jeŋ shihilɛ lɛ baatamɔ yɛ nakai be lɛ mli hewɔ lɛ eeeha mɛi pii abi yɛ no hewɔ akɛ: “Namɔ baanyɛ shi adamɔ?” Ekolɛ amɛbaawie akɛ mɔ ko mɔ ko kwraa bɛ ni baanyɛ adamɔ shi akɛ mɔ ni akpɛlɛ enɔ yɛ Yehowa hiɛ yɛ nakai ekojomɔ gbi lɛ nɔ. Shi amɛbaafee mɛi ni amɛtɔ̃ kwraa taakɛ Kpojiemɔ wolo lɛ yaa nɔ etsɔɔ lɛ.
[Shishigbɛ niŋmai]
a Shikpɔŋhosomɔi diɛŋtsɛ jeɔ shishi yɛ be babaoo mli lɛ kɛ shikpɔŋ lɛ hetsimɔi komɛi ni haa gbeei bolɔɔ waa ni amɛkɛkanyaa kooloi krokomɛi kɛ loi, eyɛ mli akɛ adesai leee enɛ aaahu kɛyashiɔ be mli ni shikpɔŋ lɛ hosoɔ diɛŋtsɛ.—Kwɛmɔ Awake!, July 8, 1982, baafa 14.
b Kɛha enɛ mlitsɔɔmɔ fitsofitso lɛ, kwɛmɔ baafai 22, 24.
c Yɛ nɔ ni fe afii 35 mli, kɛjɛ 1895 kɛbashi 1931 lɛ, atsɛ wiemɔi ni yɔɔ Luka 21:25, 28, 31 lɛ sɛɛ yɛ Watchtower wolo tɛtrɛɛ lɛ hiɛ baafa lɛ mli yɛ mfoniri ko ni ji kanetso ko ni miikpɛ yɛ atatui ni efee kpii yɛ ŋshɔ ni efee hamahama ko nɔ lɛ mli.
d Akɛ nɔkwɛmɔnɔ lɛ, Yehowa Odasefoi diɛŋtsɛ ja wolo bibioo The Kingdom, the Hope of the World lɛ amɛha osɔfoi, maŋkwralɔi, kɛ jarayeli mli nitsumɔtsɛmɛi wuji yɛ jeŋ fɛɛ yɛ tafaa krɛdɛɛ ko ni ba yɛ 1931 lɛ mli.
e Yɛ gbɛ ko ni atsɔ nɔ akɛ wiemɔ “ŋwɛi” tsu nii yɛ nakai gbɛ nɔ nɔŋŋ lɛ, gbalɛ ni kɔɔ “ŋwɛi hee” lɛ he ni yɔɔ Yesaia 65:17, 18 lɛ na eklɛŋklɛŋ mlibaa yɛ nɔyeli gbɛjianɔtoo hee, ni kɔɔ Amralo Zerubabel kɛ Osɔfo Nukpa Yeshua he, ni ato ama shi yɛ Shiwoo Shikpɔŋ lɛ nɔ yɛ be mli ni Yudafoi lɛ ku amɛsɛɛ kɛjɛ Babilon nomŋɔɔ mli amɛba lɛ he.—2 Kronika 36:23; Ezra 5:1, 2; Yesaia 44:28.
[Akrabatsa/Mfoniri ni yɔɔ baafa 105]
Atsɔ Hiɛ Ana 1914
“Afi B.C. 606 mli ni Nyɔŋmɔ maŋtsɛyeli lɛ ba naagbee, akpɔ akekre lɛ, ni akɛ shikpɔŋ lɛ fɛɛ wo Jeŋmajiaŋbii lɛ adɛŋ. Afii 2,520 kɛjɛ B.C. 606 baa naagbee yɛ A.D. 1914.”f—The Three Worlds ni aŋma yɛ 1877 lɛ, baafa 83.
“Biblia mli odaseyeli yɛ faŋŋ ni ema shi shiŋŋ akɛ ‘Jeŋmaji Abe’ lɛ ji be ni feɔ afii 2,520, kɛjɛ afi B.C. 606 kɛyashi A.D. 1914 ni fata he.”—Studies in the Scriptures, Kpo 2, ni C. T. Russell ŋma ni akala yɛ 1889, baafa 79.
Charles Taze Russell kɛ enanemɛi Biblia kaselɔi lɛ yɔse afii nyɔŋmai abɔ kɛtsɔ hiɛ akɛ 1914 baakadi Jeŋmaji Abe lɛ, aloo jeŋmaji abe ni ato lɛ naagbee. (Luka 21:24) Yɛ be mli ni yɛ nakai mra gbii lɛ amli lɛ amɛnuuu nɔ ni enɛ baatsɔɔ lɛ shishi jogbaŋŋ lɛ, amɛhe amɛye diɛŋtsɛ akɛ 1914 baafee tsakemɔ be yɛ adesa yinɔsane mli, ni amɛsane lɛ ja. Kadimɔ wiemɔi ni jɛ adafitswaa woji amli nɛɛ:
“Ta ni yɔɔ gbeyei ni fɛ yɛ Europa lɛ eha gbalɛ ko ni ekaaa eba mli. Aaafee afii nyɔŋmai enyɔ kɛ enumɔ ni eho nɛ, ni ‘Majimaji Ateŋ Biblia Kaselɔi’ ni ale amɛ jogbaŋŋ akɛ ‘Millennial Dawners’ lɛ etsɔ shiɛlɔi kɛ adafitswaa woji anɔ amɛjaje amɛtsɔɔ je lɛ akɛ Mlifu Gbi ni agba afɔ shi yɛ Biblia lɛ mli lɛ baaba yɛ 1914. ‘Nyɛkwɛa 1914 jogbaŋŋ ei!’ efee sanekpakpa jajelɔi gbɛfalɔi ohai abɔ lɛ abolɔmɔ.”—The World, New York adafitswaa wolo ko, August 30, 1914.
[Shishigbɛ niŋmaa]
f Yɛ Nyɔŋmɔ duromɔ naa lɛ, nakai Biblia Kaselɔi lɛ yɔseko akɛ zero afi ko kaaa “B.C.” kɛ “A.D.” teŋ. Yɛ sɛɛ mli, beni nibii amlipɛimɔ ha ehe bahia akɛ atsake B.C. 606 afee lɛ 607 D.Ŋ.B. lɛ, ajie zero afi lɛ hu yɛ jɛmɛ, no hewɔ lɛ eha gbalɛ lɛ ba mli anɔkwale akɛ “A.D. 1914.”—Kwɛmɔ “The Truth Shall Make You Free,” ni Yehowa Odasefoi fee yɛ 1943 lɛ, baafa 239.
[Akrabatsa ni yɔɔ baafa 106]
1914—Tsakemɔ Be
Wolo Politikens Verdenshistorie—Historiens Magt og Mening (Politiken’s World History—The Power and Meaning of History), ni aŋma yɛ 1987 yɛ Copenhagen lɛ wie nɔ ni aŋma nɛɛ yɛ ebaafa 40:
“Afii ohai 19 lɛ mli hemɔkɛyeli ni yaa nɔ fiofio lɛ fite kwraa yɛ 1914. Yɛ afi ni tsɔ afi ni kɛ ta lɛ ba lɛ hiɛ lɛ mli lɛ, Danish yinɔsaneŋmalɔ kɛ maŋkwralɔ Peter Munch ŋma kɛ jwɛŋmɔ kpakpa akɛ: ‘Odaseyelii lɛ fɛɛ tsɔɔ akɛ ta nyɛŋ aba Europa hewalɛi wuji lɛ ateŋ. “Ta he oshara” lɛ hu baalaaje yɛ wɔsɛɛ be mli, taakɛ eba mli shii abɔ kɛjɛ 1871 kɛbaa nɛɛ.’
“Nɔ ni tamɔɔɔ nakai lɛ, wɔkaneɔ yɛ wolo ko ni eŋma nibii ni ekaiɔ lɛ yɛ mli yɛ sɛɛ mli lɛ akɛ: ‘Ta ni fɛ yɛ 1914 lɛ ji tsakemɔ kpele diɛŋtsɛ yɛ adesai ayinɔsane mli. Wɔjɛ bei ni shweremɔ yɔɔ mli, he ni abaanyɛ adi nitsumɔi asɛɛ kɛ hiɛshikamɔ yɛ shweshweeshwe mli lɛ mli ni wɔyabote oshara yinɔ mli, gbeyeishemɔ kɛ nyɛɛ, ni shweshweeshwe bɛ he ko he ko shihilɛ ko mli. Mɔ ko mɔ ko nyɛɛɛ awie, ni ŋmɛnɛ po mɔ ko mɔ ko nyɛŋ awie kɛji akɛ duŋ ni nina wɔ yɛ nakai be lɛ mli lɛ baatsɔ gbɛjianɔtoo muu lɛ fɛɛ ni adesa eto eha ehe yɛ afii akpei abɔ lɛ amli lɛ hiɛkpatamɔ.’”
[Mfoniri ni yɔɔ baafa 110]
‘Ni atsi gɔŋ fɛɛ gɔŋ kɛjɛ egbɛhe’
[Mfoniri ni yɔɔ baafa 111]
Amɛtee amɛhe yɛ tɛsai amli