Saji Ni Aaajaje Yɛ Nyɔŋmɔ Kɛ Bo Teŋ
“Kɛ nyɛhe eshai lɛ tsuɔ tamɔ la po, amɛaayɛ tamɔ snoo.”—YESAIA 1:18.
1, 2. (a) Mɛni ji nɔ ni obaasumɔ kɛ mɔ ko kɛɛ: “Ba ko, koni wɔbatao naa”? (b) Mɛni hewɔ esaaa akɛ wɔkpaa gbɛ akɛ Nyɔŋmɔ baaye sane ni wɔkpɛlɛ eko nɔ ni wɔŋmɛɛ eko he ni lɛ hu efee nakai lɛ?
YƐ TƆMƆ ko ni ba yɛ be ko ni eho lɛ mli aloo mlihilɛ kpo ni ajieee hewɔ lɛ, bei ebaka bo kɛ mɔ kroko teŋ, belɛ te oofee tɛŋŋ ohere nɛkɛ wiemɔi nɛɛ anɔ: Nyɛbaa ko, ni wɔbatao naa”? No baanyɛ atsɔɔ nine ni afɔɔ koni abatara shi ni akwɛ saji amli ni aŋmɛɛ ekomɛi ahe, ni afee ekome akɛŋmɛɛ saji ahe koni asaa. Mɔ fɛɛ mɔ baanyɛ ni ekɛ nɔ ni esusuɔ aba, mɔ fɛɛ mɔ baanyɛ akai tɔmɔ ko ni eba yɛ egbɛfaŋ aloo shishinumɔ ko ni yabaaa lɛ.
2 Shi ani ooonyɛ osusu akɛ Bɔlɔ lɛ baanyɛ akpa fai yɛ nakai shishinumɔ mli akɛ, “Nyɛbaa ko, ni wɔbatao naa,” taakɛ Yesaia 1:18 kaneɔ yɛ Bibliai babaoo mli lɛ? Dabi kwaa. Wɔteŋ mɔ ko nyɛŋ akpa gbɛ akɛ “eeeje esane lɛ he ŋwane” (The New English Bible) aloo ni ekɛ Yehowa akpɛlɛ sane nɔ ni eŋmɛɛ ekomɛi ahe, tamɔ nɔ ni ehe miihia ni ekpɛlɛ etɔmɔ nɔ ni eŋmɛɛ sane he ni akɛsaa. Kɛji akɛ wɔmiitao ni toiŋjɔlɛ aba wɔkɛ Nyɔŋmɔ teŋ lɛ, belɛ, mɛni ji nɔ ni Yesaia 1:18 biɔ?
3. Mɛni ji Hebri wiemɔ ni yɛ bei komɛi amli lɛ atsɔɔ shishi akɛ “abaatao naa” yɛ Yesaia 1:18 lɛ shishinumɔ ni ja?
3 Hebri wiemɔ ni akɛtsu nii akɛ: “Wɔbatao naa” lɛ tsɔɔ “akpɛ yiŋ, akojo, atsɔɔ naa.” Mla naa wiemɔ ko hɔ mli, ni tsɔɔ gbɔmɛi babaoo fe mɛi enyɔ ni miitao saji anaa. Esa akɛ akpɛ yiŋ yɛ sane ni tamɔ nakai mli.a (1 Mose 31:37, 42; Hiob 9:33; Lala 50:21; Yesaia 2:4) Wilson’s Old Testament Word Studies kɛ shishinumɔ ni ji “sane aja, asusu saji ahe, atsɔɔ nɔ ni ja ni ji anɔkwale” haa. Nyɔŋmɔ kɛ famɔ miiha akɛ: “Nyɛbaa ko, koni wɔjaje nibii” (The New American Bible) Aloo, nyɛhaa wɔjajea saji.”
4-6. Namɔ ji Yesaia, ni mɛɛ be mli esɔmɔ akɛ gbalɔ?
4 Yehowa kɛ gbalɔ ni ji Yesaia tsu nii koni ekɛ shɛɛ sane ni hewalɛi waa yɔɔ mli nɛɛ aha. Namɔ ji Yesaia, ni mɛni hewɔ esane lɛ ja yɛ ebe naa pɛpɛɛpɛ? Agbɛnɛ, te wɔɔfee tɛŋŋ wɔna enɛ he sɛɛ?
5 Kɛ atsi “gbalɔ” ta pɛ lɛ, nɔ ni mɛi pii baasusu ŋmɛnɛ ji obalanyo ko ni ekwa ehe ni miijaje shihilɛ he jwɛŋmɔ ko ni ejaaa lɛ he nii. Mɛi krokomɛi hu baasusu mɔ ko ni egbɔ ni egba afa aloo ebe eho ni buɔ ehe akɛ shihilɛ ni yaa nɔ lɛ nɔ kojolɔ hee. Kwɛ bɔ ni gbɔmɔ ni ji Yesaia, ni Yehowa Nyɔŋmɔ kɛ lɛ tsu nii ni eŋma Biblia wolo ni egbɛi ka nɔ lɛ ji mɔ ni yɔɔ shishinumɔ ni ŋmɛɔ pɛpɛɛpɛ ni esoro lɛ kwraa yɛ nɔ ni asusuɔ nɛɛ he.
6 “Amoz bi Yesaia” hi shi yɛ Yuda ni ekɛ ekaa sɔmɔ Yehowa “Yɛ Yuda maŋtsɛmɛi Uzia kɛ Yotam kɛ Ahaz kɛ Hezekia yinɔ”—nɔ ni fe afii 40. Heshibalɔ Yesaia etsɔɔɔ saji ni kɔɔ lɛ diɛŋtsɛ ehe lɛ mli tsɔ. Blema sane tsɔɔ akɛ ejɛ Yuda odehei aweku lɛ mli. Wɔle jogbaŋŋ akɛ eyɛ weku ni eŋa fɔ bii enyɔ eha lɛ. Ebaanyɛ efee mɔ ni ku sɛɛ ebote gbalashihilɛ mli ekoŋŋ yɛ be mli ni eŋa lɛ gbo, ni ebatsɔ tsɛ kɛha binuu kroko ni atsɛ lɛ yɛ gbalɛ mli akɛ Imanuel.—Yesaia 1:1; 7:3, 14; 8:3, 18.
7. Mɛni hewɔ esa akɛ wɔnya Yesaia gbalɛ lɛ he?
7 Shihilɛi ni je amɛhe yɛ Yesaia be lɛ kɛ wɔnɔ lɛ mli. Oona akɛ be ni majimaji ateŋ bei, tawuu kɛ tawuu he gbeyeishemɔ yɔɔ mli lɛ mli wɔyɔɔ lɛ. Yɛ be mli ni jamɔ kɛ maŋkwramɔŋ hiɛnyiɛlɔi kɛɔ akɛ amɛjaa Nyɔŋmɔ lɛ jieɔ amɛhe kpo akɛ nɔkwɛmɔ nii ni esa akɛ anyiɛ sɛɛ lɛ, wɔnaa ni wɔnuɔ adafitswaa woji amli amaniɛbɔɔ ni kɔɔ bɔ ni amɛjuɔ shika ni amɛjeŋba efite lɛ he. Te Nyɔŋmɔ buɔ nɛkɛ hiɛnyiɛlɔi nɛɛ ehaa tɛŋŋ, titri lɛ mɛi ni yɔɔ Kristendom lɛ? Mɛni ka shi ha amɛ kɛ mɛi ni nyiɛɔ amɛsɛɛ lɛ? Wɔnaa ŋwɛi wiemɔi ni kɔɔ nɛkɛ saji ni yaa nɔ nɛɛ ahe yɛ Yesaia wolo lɛ mli. Agbɛnɛ hu wɔnaa nikasemɔi kɛha wɔteŋ mɔ fɛɛ mɔ yɛ be mli ni wɔ diɛŋtsɛ lɛ wɔbɔɔ mɔdɛŋ ni wɔsɔmɔ Nyɔŋmɔ lɛ yɛ mli.
Gbalɔ Kɛha Maŋ ni Eye Fɔ
8. Mɛni yɔɔ Yesaia wolo lɛ mli, ni mɛɛ gbɛ nɔ atsɔ aŋma enɛ?
8 Kɛ okane Yesaia wolo lɛ, obaanu shɛɛ saji ni kɔɔ Yuda kɛ Yerusalem he esha lɛ he, yinɔsane mli saji ni kɔɔ bɔ ni henyɛlɔi batutua amɛ, ni ajaje akɛ jeŋmaji ni ebɔle amɛ lɛ baatsɔmɔ amaŋfɔ, kɛ gbalɛ ni woɔ mɔ hewalɛ ni kɔɔ Israel saamɔ kɛ yiwalaheremɔ ko he. Aŋma enɛ yɛ gbɛ ni naa mɔ nɔ hewalɛ diɛŋtsɛ waa lɛ nɔ. Nilelɔ I. Slotki kɛɛ: “Woloŋlelɔi jɛɔ amɛtsui mli fɛɛ amɛjieɔ Yesaia nilee kɛ nii ahesusumɔ kɛ bɔ ni etsɔ mfonirifeemɔ kɛ nɔkwɛmɔ nɔ nɔ etsɔɔ saji amli eha, bɔ ni ekɛ saji feɔ mfoniri, esane mlitii fɛfɛo kɛ egbɛɛmɔ lɛ, kɛ bɔ ni fɛɛ ŋmɛɔ pɛpɛɛpɛ ni ewiemɔi lɛ yaa yɔɔ lɛ yi.” Nyɛhaa wɔpɛia Yesaia shishijee wiemɔi lɛ titri mli—nɔ ni anaa yɛ yitso 1 lɛ.
9. Mɛni ji nɔ ni wɔle yɛ be kɛ shihilɛ mli ni ha aŋma Yesaia yitso 1 lɛ?
9 Gbalɔ lɛ etsɔɔɔ be pɔtɛɛ ni eŋma nɛkɛ yitso nɛɛ. Aŋma Yesaia 6:1-13 yɛ afi nɔ ni Maŋtsɛ Uzia gbɔ lɛ mli. No hewɔ lɛ, kɛji akɛ Yesaia ŋma shishijee yitsei lɛ mra lɛ, no lɛ amɛbaatsa shihilɛ ni yɔɔ saji ashishi lɛ diɛŋtsɛ yɛ Uzia yɛ maŋtsɛyeli be lɛ mli. Kɛjɛ shishijee lɛ, Uzia (829-777 D.Ŋ.B.) “fee nɔ ni ja yɛ Yehowa hiɛ,” no hewɔ lɛ, Nyɔŋmɔ kɛ shweremɔ jɔɔ enɔyeli lɛ shi wɔle akɛ jeee nɔ fɛɛ nɔ tee nɔ jogbaŋŋ kɛha amɛ, ejaakɛ “maŋ lɛ miisha afɔlei kɛ tsofa kɛ ŋmai yɛ hei grɔŋŋi lɛ lolo” dani Nyɔŋmɔ kɛ kpiti tswa Uzia (aloo Azaria) yɛ henɔwomɔ mli ni ejɛ efee akɛ ekɛ tsofa kɛ ŋma aaasha afɔle yɛ sɔlemɔwe lɛ hewɔ. (2 Kronika 26:1-5, 16-23; 2 Maŋtsɛmɛi 15:1-5) Bɔ ni gbɔmɛi lɛ efite eha yɛ Uzia be lɛ mli lɛ baanyɛ aha efɔŋfeemɔ ni je kpo ni wɔkaneɔ ni kɔɔ enabi Maŋtsɛ Ahaz (762-745 D.Ŋ.B.) he lɛ ashwere, ni ebaanyɛ efee akɛ no ji nɔ ni Yesaia hu tsɔɔ mli lɛ. Shi nɔ ni he hiaa fe be pɔtɛɛ ko kɛha Yes yitso 1 lɛ ji nɔ ni tsirɛ Nyɔŋmɔ koni ekɛɛ akɛ: “Nyɛhaa wɔjajea saji yɛ wɔteŋ” lɛ.
10. Mɛɛ shihilɛ yɔɔ Yuda, yɛ Maŋtsɛ Ahaz nɔyeli be mli, titri lɛ yɛ hiɛnyiɛlɔi lɛ ateŋ?
10 Yesaia jaje yɛ faŋŋ mli akɛ: “Ao! Jeŋmaŋ ni fee esha, maŋ ni sɔ ka amɛnɔ, efɔŋfeelɔi ashwiei, bii ni efite! Amɛkwa Yehowa, amɛgbe Israel Mɔ Krɔŋkrɔŋ lɛ he guɔ, amɛku amɛsɛɛ kɛtee! . . . Yitso muu lɛ fɛɛ he miiye, ni tsui muu lɛ hu egbɔjɔ! Kɛjɛ naneshi aaahu kɛyashi yiteŋ fɛɛ lɛ he ko he ko bɛ ni eye emuu.” (Yesaia 1:4-6) Nɔ ni kadi Maŋtsɛ Ahaz afii 16 nɔyeli lɛ ji wɔŋjamɔ diɛŋtsɛ. Esha “ebihii [akɛ afɔshaa nii] yɛ la mli, tamɔ jeŋmaji . . . lɛ anihii nii lɛ . . . ni eshashaa afɔlei kɛ tsofa-kɛ-ŋmai yɛ hei grɔŋŋi lɛ kɛ gɔŋkpɔi lɛ anɔ kɛ tso fɛɛ tso ni ebu kusuu shishi.” (2 Kronika 28:1-4; 2 Maŋtsɛmɛi 16:3, 4) Jalɛsane ni ayeee, nyɔɔŋnihamɔ, kɛ jeŋba shara ni egbɛ eshwa lumɛi lɛ ateŋ, mɛi ni sa nɔyelɔi yɛ blema Sodom lɛ. (Yesaia 1:10, 21-23; 1 Mose 18:20, 21) Eka shi faŋŋ akɛ Nyɔŋmɔ ekpɛlɛŋ nifeemɔ ni tamɔ nɛkɛ nɔ. Ni kɛ hiɛnyiɛlɔi ni tamɔ nɛkɛ yɛ lɛ, te gbɔmɛi lɛ aaafee tɛŋŋ?
11. Te esa akɛ wɔnu Yesaia 1:29, 30 shishi wɔha tɛŋŋ?
11 Gbalɔ Yesaia fee shihilɛ ni ehiii kwraa ni gbɔmɛi lɛ yɔɔ mli lɛ he mfoniri kɛtsɔ tsi ni etsi gɔŋkpɔi lɛ kɛ tsei ni ebu kusuu lɛ kɛ abɔɔi ni amɛshaa amɛ wɔŋjalɔi afɔlei yɛ shishi ni amɛshaa tsofa-kɛ-ŋma amɛhaa wɔŋjalɔi anyɔŋmɔ lɛ nɔ. Nɛkɛ “tsei kpelei” nɛɛ aaaha amɛhiɛ agboi (Yesaia 1:29; 65:3) Yɛ be mli ni etsɔɔ ewiemɔi lɛ ashishi ehaa wɔŋjalɔi lɛ diɛŋtsɛ lɛ, Yesaia ŋma akɛ: “Ejaakɛ nyɛaatsɔmɔ tso kpele ko ni eyibai egbi, kɛ trom ko ni nu bɛ mli.” (Yesaia 1:30) Hɛɛ, “aaaplene gbɔmɛi ni shiɔ Yehowa lɛ.” Amɛbaatsɔmɔ tamɔ ananaa tsei gbiji, ni amɛ amagai lɛ fɛɛ kwa lɛ, amɛaasha.—Yesaia 1:28, 31.
12, 13. Mɛni nibii yɔɔ ni je amɛhe yɛ be lɛ kɛ Yesaia be lɛ teŋ ni abaanyɛ ana?
12 Agbɛnɛ okɛ enɛ ato shihilɛ ni yɔɔ ŋmɛnɛ lɛ he. Yɛ nyɔŋ kome pɛ mli lɛ, U.S.Amerika adafitswaa woji bɔ amaniɛ akɛ: Mɔ ko ni kɛ ehe eha akɛ ahala lɛ akɛ maŋnɔkwɛlɔ nukpa lɛ gbala ehe shi akɛni amaniɛbɔɔ ko ha ayoo lɛ akɛ mɔ ni “esumɔɔ yei” hewɔ; akɛ osɔfo ko to osɔfo kroko ni ehe gbɛi lɛ najiaŋ akɛni ekpɛlɛ nɔ akɛ efite gbala ni agbɛnɛ afɔlɔ enaa akɛ etsɔ nuu ni kɛ hii krokomɛi wɔɔ, ekɛ mɛi krokomɛi tsakeɔ amɛŋamɛi, eju shika ekɛwo nyɔji komɛi yɛ teemɔŋ lɛ hewɔ. (“Abɔ amaniɛ akɛ ejie shika ni yɔɔ naakpɛɛ ni ji Amerika shika dɔlai akpekpei 12.6 akɛ najiaŋtoo shika yɛ 1984, Time, May 11, 1987) Yɛ Austria yɛ nyɛsɛɛ afi lɛ mli lɛ, ashwie Rein Nyɔŋmɔjamɔ Nikasemɔ He lɛ Onukpa lɛ ‘akɛni efite shika ni ji Amerika shika dɔlai akpekpei 6 yɛ gbɔbimɔ tsu ko he kɛ okpɔlɔ ni eŋmɛ kɛha tsutsu nɔyeli lɛ mli bii kɛ amɛwekui kɛ agbɛnɛ nɔ ni efite yɛ obalayei ni jeee abaladei ahe lɛ hewɔ.’ Ekolɛ obaanyɛ okɛ nɛkɛ nɔyelɔi nɛɛ ahe nɔkwɛmɔ nii krokomɛi aha. Bo hu obaanyɛ okɛ onukpai nɛɛ ahe nɔkwɛmɔ nii ni tamɔ nɛkɛ aha. Mɛni ji nɔ ni osusuɔ akɛ eji Nyɔŋmɔ jwɛŋmɔ yɛ amɛhe?
13 Yɛ gbɔmɛi lɛ ahe lɛ, amɛmli ejara yɛ jamɔ gbɛfaŋ yɛ fɛɛ mli. Mɛi komɛi tsiɔ amɛhe kɛjɛɔ jamɔ he yɛ mlifu loo shikplikpiifeemɔ hewɔ. Akɛ nɔkwɛmɔ nɔ lɛ, gbɔmɛi ni yɔɔ Ŋleshi Ablotsiri lɛ fɛɛ mli oha fɛɛ mli 3 pɛ yaa sɔlemɔi wuji lɛ eko. Yɛ maji krokomɛi anɔ lɛ, wɔnaa ni gbɔmɛi lɛ sumɔɔ Nyɔŋmɔjamɔ waa. Enɛ he odaseyeli ji mumɔi sɔlemɔi ni faa babaoo, ni gbalaa gbɔmɛi lɛ ahenumɔi akɛ “ahere” amɛyiwala, ni amɛkɛɛ amɛwieɔ lilɛi sɔrɔtoi, aloo “amɛtsaa” helatsɛmɛi lɛ. Asafoi babaoo hoɔ kɛyaa gbatsui ahe kɛ hiɛnɔkamɔ akɛ amɛaana okadii. Mɛi krokomɛi hu shaa afɔlei akɛ nomɛi ji amɛ “hemɔkɛyeli” nitsumɔi, tamɔ waamɔ ni amɛwamɔɔ yɛ amɛnakutsei anaa yɛ be mli ni nakutsei nɛɛ anaa ekpɔlɔ ni eeho la aahu kɛyaa akɛ amɛmiiya ni amɛyakwɛ Guadalupe [Mexico City] Obalayoo Fro lɛ. Adafitswaa wolo ko kɛɛ: “Yɛ be mli ni mɛi ni jɛ maŋsɛɛ lɛ baakpɛlɛ nɔ akɛ shihilɛ mli ni eyɔɔ lɛ kɛ henumɔ ni akɛjaalɛ lɛ baanyɛ afee nɔ ko ni ji Kristojamɔ kɛ wɔŋjamɔ ni efutu moŋ lɛ, kɛ aaawie lɛ, Obalayoo Fro lɛ ji mɔ ko ni he hiaa waa yɛ Mexico Katolek jamɔ mli.”
Te Ooofee Tɛŋŋ Ona Ehiɛ Duromɔ Hu?
14. Yɛ mɛɛ gbɛ nɔ Yehowa fee lɛ faŋŋ kɛtsɔ Yesaia nɔ akɛ E-kpɛlɛɛɛ mɛi fɛɛ ni kɛɔ akɛ amɛjaa Lɛ lɛ anɔ?
14 Yehowa Nyɔŋmɔ shii wɔ kɛ yiŋfutumɔ yɛ bɔ ni esusuɔ mɛi ni kɛɔ akɛ amɛyɔɔ egbɛfaŋ yɛ emasɛi shi amɛjaaa “Tsɛ lɛ yɛ mumɔŋ kɛ anɔkwale mli” lɛ he. (Yohane 4:23) Kɛji akɛ maŋ ko, jamɔ kuu ko, mɔ ko efeee enii yɛ tɛi ni Nyɔŋmɔ efolɔ eshwie shi ni ejie lɛ kpo lɛ anaa lɛ, ejamɔ mli nifeemɔi fɛɛ lɛ baafee nɔ ni sɛɛnamɔ bɛ he. Akɛ nɔkwɛmɔ nɔ lɛ, jamɔ mli nɔyelii kɛ afɔleshai ji anɔkwale jamɔ ni tee nɔ yɛ blema Israel lɛ fa ni abiɔ enɛ hu. (3 Mose, yitsei 1-7, 23) Ni kɛlɛ, Yesaia kɛ bɔ ni Nyɔŋmɔ kwɛɔ enɛ lɛ mamɔ shi—emli efu nakai Yudafoi lɛ ni yeee anɔkwale ni yeɔ nakai gbii juji lɛ. Nyɔŋmɔ kɛɛ: “Ni kɛ nyɛgbɛ nyɛniji amli lɛ, matsɔ mihiɛ matee nyɛ; ni kɛ nyɛsɔle babaoo tete lɛ, miboŋ nyɛ toi.” (Yesaia 1:11-15) Eji anɔkwale yɛ ŋmɛnɛ hu. Ni eeesumɔ jamɔ mli nifeemɔi loo hemɔkɛyelii kɛ sɔlemɔi ni akase awo yitsoŋ ni ataa lɛ, Nyɔŋmɔ miisumɔ sɔlemɔi kɛ nitsumɔi kpakpai ni jɛɔ tsui mli.
15. Mɛni hewɔ Yesaia 1:18 haa wɔ nɔ ni wɔbaadamɔ wɔna hiɛnɔkamɔ lɛ, ni mɛni ji wiemɔi ni ji ‘ba ni wɔjaje saji yɛ wɔteŋ’ lɛ shishi?
15 Enɛ ni wɔɔle lɛ kɛ shishitoo nɔ kɛha hiɛnɔkamɔ haa. Adesai baanyɛ ana Nyɔŋmɔ hiɛ duromɔ. Shi yɛ mɛɛ gbɛ nɔ? Yesaia wo hewalɛ akɛ: “Nyɛjua nyɛhe, nyɛtsumɔa nyɛhe! Nyɛjiea nyɛnifeemɔ nii fɔji lɛ kɛjɛa nyɛhe! Nyɛfɔa efɔŋfeemɔ! Nyɛkasea ekpakpafeemɔ! Nyɛtaoa jalɛsaneyeli sɛɛ gbɛ!” Kɛkɛ ni Yesaia kɛ Nyɔŋmɔ famɔ lɛ ha yɛ biɛ: “Yehowa kɛɛ: Nyɛbaa ko, ni wɔjaje saji yɛ wɔteŋ.” No hewɔ lɛ Yehowa biii ni tipɛŋfoi akpe ni akpɛlɛ saji anɔ ni aŋmɛɛ ekomɛi ahe. Nyɔŋmɔ le nɔ ni ja aloo nɔ ni yɔɔ trɔmɔɔ. Ekojomɔ ji: Kɛ tsakemɔi komɛi yɛ ni he miihia lɛ esa akɛ eba kɛjɛ adesai agbɛfaŋ, mɛi ni esa akɛ amɛtsake ni amɛhi shi yɛ ejalɛ taomɔ nii ni ja lɛ anaa lɛ ŋɔɔ. Nakai pɛpɛɛpɛ eji ŋmɛnɛ hu. Tsakemɔ baanyɛ aba, ni nɔ ni baajɛ mli aba ji duromɔ. Mɔ ni egbɛ efee nɔ ni ehiii lɛ po baanyɛ atsake. Yesaia ŋma akɛ: “Kɛ nyɛhe eshai lɛ tsuɔ tamɔ la po, amɛaayɛ tamɔ snoo.”—Yesaia 1:16-18, New World Translation.
16. Mɛɛ gbɛ nɔ mɛi komɛi ekpɛlɛ ŋaawoo ni damɔ Biblia nɔ ni kɔɔ efɔŋfeemɔ he lɛ nɔ yɛ?
16 Shi su ko yɛ ni haa akadiɔ ŋaawoo ni tamɔ nɛkɛ, shi asusuɔ akɛ ekɔɔ mɛi krokomɛi ahe. Eka shi faŋŋ akɛ mɛi ni yɔɔ Yesaia gbii lɛ amli lɛ fee nakai. Yɛ anɔkwale mli lɛ, esa akɛ aŋkro fɛɛ aŋkro apɛi lɛ diɛŋtsɛ emli ni ekwɛ. Kɛ Kristofonyo ko eye tɔmɔ ko ni hiɛdɔɔ yɔɔ mli he fɔ lɛ, kɛ eji amale, shishiumɔ, bɔlɛnamɔ mli jeŋba shara, aloo tɔmɔ ko ni hiɛdɔɔ yɔɔ mli lɛ, tsuitsakemɔ kɛ nitsumɔi ni sa tsuitsakemɔ he miihia. (Bɔfoi lɛ Asaji 26:20) Nɔ ni sa yijiemɔ ji akɛ mɛi komɛi efee nii koni ‘amɛjaje amɛkɛ Yehowa teŋ saji.’ Akɛ nɔkwɛmɔ nɔ lɛ, October 1, 1985 Buu-Mɔɔ lɛ, wie sane ni kɔɔ teemɔŋ tɔmɔi ni mɛi krokomɛi enaaa shi Nyɔŋmɔ naa lɛ ni aaasaa enɛɛmɛi lɛ he. (Mateo 6:6; Filipibii 4:13) Atsi hei etɛ ni esa akɛ agbala jwɛŋmɔ kɛya nɔ lɛ ta: teemɔŋ ni aaajɛ agbala la awo mɔ mli, fɔmɔ nii kɛ shwɛmɔ, kɛ daatɔɔ. Yɛ be mli ni mɛi pii esusu nakai sane lɛ he lɛ, nikanelɔi lɛ ateŋ mɛi pii ŋma woji amɛkɛtsɔɔ hiɛsɔɔ; amɛkpɛlɛ nɔ akɛ amɛyɛ nakai tɔmɔi lɛ, shi enɛ kanya amɛ ni amɛfee tsakemɔi.
17. Kɛji akɛ wɔtɔ tɔmɔi ni hiɛdɔɔ yɔɔ mli po lɛ, yɛ mɛɛ gbɛ nɔ Yesaia 1:18 baanyɛ akɔ wɔhe ni eye ebua wɔ?
17 Shi, Kristofoi pii ni miisusu nɛkɛ sane nɛɛ he lɛ jeee mɛi ni eye tɔmɔ ni hiɛdɔɔ yɔɔ mli he fɔ. Ni kɛlɛ, esa akɛ Yesaia sane lɛ atsirɛ wɔ ni wɔpɛi wɔtsui mli wɔkwɛ. Ani ehe miihia ni wɔjaje sane ko ni ka wɔkɛ Nyɔŋmɔ teŋ lɛ? Yesaia sane lɛ mli agugu ko ji ni wɔna tsui kanyamɔ ni ja. Mɔ ko baanyɛ abi yɛ sɔlemɔ he akɛ: ‘Ani misɔlemɔi baa kɛjɛɔ mitsui mli ni taakɛ bɔ ni mile mi diɛŋtsɛ mihe lɛ, ani minifeemɔi kɛ misɔlemɔi lɛ kpaa gbee?’ Mɛi ni pɛiɔ amɛmli nɛkɛ amɛkwɛɔ lɛ ena akɛ nibii komɛi yɛ ni esa akɛ amɛjaje. Amɛmiisɔle koni amɛna Nyɔŋmɔ suɔmɔnaa nifeemɔ he nilee ni yaa hiɛ, ni kɛlɛ, be fioo ko pɛ amɛfiteɔ amɛkɛ kaseɔ Biblia lɛ kɛ Kristofoi awoji. Mɛi krokomɛi sɔleɔ koni amɛna sɔɔmɔ nitsumɔ lɛ mli gbɛfaŋnɔ babaoo, shi amɛdiɔ shihilɛ ko ni haaa amɛfo shika ni baa amɛkoto mli lɛ nɔ kɛtsɔ heloo gbɛfaŋ nitsumɔ ni amɛaaha eba shi lɛ nɔ. Aloo ekolɛ osɔle koni Nyɔŋmɔ ajɔɔ okaselɔi afeemɔ nitsumɔ lɛ nɔ? Shi ani otsuɔ nii koni ofee tsɔɔlɔ ni he esa? Ani ojɛ henilee kpakpa mli obɔ mɔdɛŋ koni osɛɛsaramɔi afa ni oosumɔ ni okɛ be babaoo awo daa Biblia kasemɔ ni okɛ mɛi krokomɛi feɔ lɛ mli? Kɛ omia ohiɛ koni onifeemɔi kɛ osɔlemɔi akpa gbee lɛ, no baatsɔɔ akɛ oosumɔ ni Nyɔŋmɔ abo bo toi lɛlɛŋ.
18. Mɛni hewɔ esa akɛ wɔjwɛŋ wɔkɛ Nyɔŋmɔ teŋ nibii ni wɔɔjaje amɛ lɛ he lɛ?
18 Eja gbɛ akɛ wɔteŋ mɔ fɛɛ mɔ aaabɔ mɔdɛŋ ni eha eshihilɛ gbɛ fɛɛ ‘aja’ yɛ Nyɔŋmɔ wɔ-Bɔlɔ lɛ hiɛ. Kadimɔ bɔ ni Yesaia susu nɛkɛ sane nɛɛ he lɛ: “Tsina le etsɛ, ni teji hu le enuŋtsɔ niyenii anɔ: shi Israel lɛ, lɛ lɛ, eleee, mimaŋ lɛ hu jwɛŋŋ nɔ.” (Yesaia 1:3) Wɔteŋ mɔ ko sumɔŋ ni abu lɛ akɛ mɔ ni tsina loo teji le nii loo hiɛ sɔɔ nii fe lɛ. Shi sanemlitsɔɔmɔ lɛ baakɔ wɔhe, kɛji akɛ wɔnu he akɛ ehe ehiaaa ni wɔtsu nii koni wɔkase wɔ-Wala Halɔ lɛ kɛ etaomɔ nii lɛ ahe nii ni wɔɔbɔ mɔdɛŋ koni wɔhi shi yɛ naa.
19. Mɛni ji gbɛkpamɔ kpakpa ni Yesaia kɛha mɛi ni saa aloo amɛjajeɔ amɛkɛ Nyɔŋmɔ teŋ lɛ, ni mɛɛ shishinumɔ yɔɔ enɛ mli kɛha wɔ?
19 Yesaia kɛ yiŋtoo kɛha hiɛnɔkamɔ kpakpa fɔ ewebii lɛ ahiɛ ekɛɛ amɛ akɛ abaanyɛ atsake shidaamɔ ni amɛyɔɔ yɛ Yehowa hiɛ lɛ koni efee nɔ ni yɔɔ krɔŋŋ. Ekɛɛ akɛ kɛ etsuɔ tamɔ muneele po lɛ, ebaanyɛ etsɔ tamɔ too hetsɔi yɛŋ aloo tamɔ snoo ni haa Hemon Gɔŋ lɛ nɔ lɛ. (Yesaia 1:18; Lala 51:7; Daniel 7:9; Kpojiemɔ 19:8) Kɛji akɛ mɛi ni fa lɛ po ekpɛlɛɛɛ nɔ, ni no hewɔ lɛ akɛ maŋ lɛ ha klante ni amɛtee nomŋɔɔ mli po lɛ, shwɛɛ nii anɔkwafoi komɛi baanyɛ aku amɛsɛɛ amɛba. Nakai nɔŋŋ hu wɔbaanyɛ wɔna Yehowa hiɛ duromɔ ekoŋŋ, ekolɛ kɛtsɔ nɔkwɛlɔi ni kɛ henilee kpakpa tsuɔ nii lɛ ayelikɛbuamɔ nɔ, mɛi ni sɔmɔɔ yɛ asafo lɛ mli akɛ ‘kojolɔi kɛ ŋaawolɔi’ ni yɔɔ suɔmɔ lɛ. (Yesaia 1:20, 24-27; 1 Petro 5:2-4; Galatabii 6:1, 2) No hewɔ lɛ na nɔmimaa akɛ obaanyɛ ojaje saji ni ka okɛ Nyɔŋmɔ teŋ lɛ. Aloo, kɛji akɛ ona Nyɔŋmɔ hiɛ duromɔ momo lɛ, obaanyɛ owaje wekukpaa ni ka okɛ lɛ teŋ lɛ. Enɛ he mɔdɛŋ ni ooobɔ lɛ sa diɛŋtsɛ.b
[Shishigbɛ niŋmai]
a Dr. E. H. Plumptre tsɔɔ mli akɛ: “Bɔni [atsɔɔ shishi yɛ King James Version] lɛ mli lɛ tsɔɔ akɛ mɛi enyɔ baasusu saji ahe. Shi Hebri lɛ tsɔɔ akɛ mɔ kome kɛ famɔ miiha tamɔ kojolɔ ni kɛ wiemɔ miiha mɔ ni afolɔ enaa lɛ.”
b Ajie kɛjɛ October 15, 1987 Watchtower lɛ mli.
Saji Otii Ni Akɛtiɔ Mli
◻ Famɔ akɛ ‘nyɛbaa ni wɔjajea saji’ kɛ Nyɔŋmɔ Iɛ tsɔɔ mɛni?
◻ Yesaia be lɛ tamɔ wɔbe Iɛ yɛ mɛɛ gbɛ nɔ?
◻ Mɛni Yesaia tsɔɔ akɛ ehe miihia ni aŋkroaŋkroi ana dani amɛna Nyɔŋmɔ hiɛ duromɔ?
◻ Yɛ esha ni mli wa sɛɛ lɛ, nɛgbɛ hu ehe baahia ni wɔjaje wɔkɛ Nyɔŋmɔ teŋ saji hu yɛ?
[Mfoniri ni yɔɔ baafa 10]
Hermon Gɔŋ lɛ nɔ snoo ni enɛ, kɛ ajɛ Yordan yiteŋgbɛ jɔɔ lɛ ni yɔɔ kooyi-bokagbɛ lɛ aakwɛ kɛmiiya Galilea gɔji lɛ ayiteŋ
[He ni Sane lɛ Jɛ]
Pictorial Archive (Near Eastern History) Est
[Mfoniri ni yɔɔ baafa 13]
Yesaia kɛɛ akɛ ‘teji le enɔtsɛ niyenii anɔ.’ Mɛni nikasemɔ yɔɔ enɛ mli kɛha wɔ?