Yitso Nyɔŋma Kɛ Ejwɛ

Yehowa Ba Henɔwolɔi Amaŋ ko Shi

Yesaia 13:1–14:23

 1. Nɛgbɛ Yesaia wolo lɛ gbaa wɔsɛɛ be saji kɛyashiɔ?

AŊMA Yesaia gbalɛ wolo lɛ yɛ afii ohai kpaanyɔ D.Ŋ.B. beni Ashurbii batutua Shiwoo Shikpɔŋ lɛ. Taakɛ wɔna yɛ ewolo lɛ yitsei ní tsɔ hiɛ lɛ amli lɛ, Yesaia gba bɔ ni nibii baaya nɔ aha kɛyashi naagbee yɛ gbɛ ni ja jogbaŋŋ kɛmɔ shi nɔ. Shi kɛlɛ, wolo lɛ wieɔ nibii pii ahe kɛtekeɔ Ashurbii anɔyeli hewalɛ namɔ be lɛ kɛkɛ. Egbaa Yehowa webii ní ekɛ amɛ efee kpaŋmɔ lɛ asɛɛkuu kɛmiijɛ nomŋɔɔ mli yɛ shikpɔji babaoo, ní Shinear, he ni Babilon yɔɔ lɛ fata he lɛ anɔ. (Yesaia 11:11) Wɔnaa gbalɛ ko ní sa kadimɔ waa, ni emlibaa baagbele gbɛ kɛha nakai sɛɛkuu lɛ, yɛ Yesaia yitso 13 lɛ. Akɛ wiemɔi nɛɛ kpá nakai gbalɛ lɛ hiɛ, akɛ: “Babel kojomɔ he gbalɛ ní Amoz bi Yesaia na nɛ.”—Yesaia 13:1.

‘Maba Henɔwomɔ lɛ Shi’

 2. (a) Te fee tɛŋŋ ni Hezekia kɛ Babilon baná sharamɔ? (b) Mɛni ji “aflaŋaa” ní akɛbaama shi lɛ?

² Yuda kɛ Babilon baná sharamɔ yɛ Yesaia wala beaŋ. Hela mɔ Maŋtsɛ Hezekia waa ni no sɛɛ lɛ ebaná hewalɛ ekoŋŋ. Bɔfoi ni jɛ Babilon ba koni amɛbajwere lɛ yɛ hewalɛ ní ená ekoŋŋ lɛ hewɔ, ekolɛ kɛ teemɔŋ yiŋtoo hu ákɛ koni amɛbi Hezekia ní ebafata amɛhe yɛ ta ní amɛwuɔ amɛshiɔ Ashur lɛ mli. Maŋtsɛ Hezekia kɛ nilee eyatsuuu nii, ni ekɛ ejwetrii fɛɛ tsɔɔ amɛ. Enɛ hewɔ lɛ, Yesaia kɛɛ Hezekia akɛ yɛ maŋtsɛ lɛ gbele sɛɛ lɛ, abaaloo nakai jwetrii lɛ fɛɛ kɛya Babilon. (Yesaia 39:1-7) Enɛ ba mli yɛ afi 607 D.Ŋ.B. beni akpata Yerusalem hiɛ ní aŋɔ maŋbii lɛ anom lɛ. Shi kɛlɛ, Nyɔŋmɔ webii ni ehala amɛ lɛ ehiŋ Babilon kɛyaŋ naanɔ. Yehowa gba bɔ ní eeefee egbele gbɛ kɛha amɛsɛɛkuu kɛ amɛmaŋ baa ekoŋŋ lɛ efɔ̃ shi. Eje shishi akɛ: “Nyɛshĩa aflaŋaa yɛ gɔŋ kpataa nɔ, nyɛwóa nyɛgbee nɔ nyɛtsɛa amɛ, nyɛfɔ̃a amɛ nine, ní amɛbote abladei agbói lɛ amli!” (Yesaia 13:2) “Aflaŋaa” lɛ ji jeŋ hewalɛ ko ní miite shi ní ebajie Babilon kɛjɛ egbɛhe ní nɔ kwɔ lɛ. Akɛbaama “gɔŋ kpataa nɔ”—yɛ he ni abaanyɛ ana faŋŋ kɛjɛ shɔŋŋ. Akɛni afã lɛ ní eyatutua Babilon hewɔ lɛ, nakai jeŋ hewalɛ hee lɛ kɛ ekãa kɛ hewalɛ baatsɔ “abladei agbói lɛ,” ni ji nakai maŋtiase kpeteŋkpele lɛ agbói lɛ amli, ni ebaaye enɔ kunim.

 3. (a) Namɛi ji ‘krɔŋkrɔŋ bii’ ní Yehowa baatee amɛ shi lɛ? (b) “Afee” jeŋmaji asraafoi lɛ “krɔŋkrɔŋ” yɛ mɛɛ shishinumɔ naa?

³ Agbɛnɛ Yehowa kɛɛ: “Miwo mikrɔŋkrɔŋ bii lɛ akpɔ, mitsɛ mihewalɔi lɛ hu miha mimlifu lɛ, mimɛi ní nyaa kɛ hewoo lɛ. Naa, aafee hoo yɛ gɔji lɛ anɔ tamɔ mɛi babaoo hoofeemɔ! Naa, jeŋmaji ní ebua amɛhe naa kɛjɛ maŋtsɛyelihei lɛ ahoofeemɔ ni: Yehowa Zebaot miikane eta lɛ eto tawuu.” (Yesaia 13:3, 4) Namɛi ji ‘krɔŋkrɔŋ bii’ ní ahala amɛ ní amɛba Babilon henɔwolɔ lɛ shi nɛɛ? Amɛji jeŋmaji lɛ asraafoi ní efee ekome, ni ji “jeŋmaji ní ebua amɛhe naa” lɛ. Amɛbaajɛ gɔji ashikpɔŋ ní yɔɔ shɔŋŋ nɔ amɛkpeleke shi kɛba Babilon nɔ. “Amɛjɛ shikpɔŋ ni yɔɔ shɔŋŋ kɛ ŋwɛi naagbeehe amɛmiiba.” (Yesaia 13:5) Mɛɛ shishinumɔ naa afee amɛ krɔŋŋ lɛ? Eka shi faŋŋ akɛ jeee kɛ shishinumɔ ákɛ amɛyɛ krɔŋkrɔŋ. Amɛji asraafoi wɔŋjalɔi ní bɛ Yehowa sɔɔmɔ he miishɛɛ ko kwraa. Shi kɛlɛ, yɛ Hebri Ŋmalɛi lɛ amli lɛ, “afee krɔŋkrɔŋ” lɛ tsɔɔ akɛ “atu ama afã ní Nyɔŋmɔ kɛbaatsu nii.” Yehowa baanyɛ afee jeŋmaji lɛ asraafoi lɛ krɔŋkrɔŋ ní ekɛ amɛ pɛsɛmkunya hiɛnyam taomɔ lɛ atsu nii ní ekɛjie emlifu kpo. Ekɛ Ashur tsu nii yɛ nɛkɛ gbɛ nɔ. Ekɛ Babilon baatsu nii yɛ gbɛ ní tamɔ nakai nɔ. (Yesaia 10:5; Yeremia 25:9) Ni ekɛ jeŋmaji krokomɛi baatsu nii ní ekɛgbala Babilon toi.

4, 5. (a) Mɛni Yehowa gba efɔ̃ shi kɛha Babilon? (b) Mɛni ehe baahia ní mɛi ni tutuaa Babilon lɛ atsu he nii?

⁴ Jeee Babilon ji jeŋ hewalɛ ní yeɔ nɔ yɛ nakai beaŋ. Ni kɛlɛ, beni etsɔɔ Yesaia nɔ ekɛ sanejajemɔ haa lɛ, Yehowa kwɛ nii kɛtee wɔsɛɛ beni ebaayaje nakai gbɛhe lɛ mli lɛ, ni egba eshigbeemɔ efɔ̃ shi. Ekɛɛ: “Nyɛwóa lele, shi Yehowa gbi lɛ eshɛ shi etã; eeba tamɔ hiɛkpatamɔ ní jɛ Ofe lɛ dɛŋ.” (Yesaia 13:6) Hɛɛ, akɛ yaafo kɛ bolɔmɔ baaye Babilon shwãa lɛ najiaŋ. Mɛni hewɔ? Yɛ “Yehowa gbi lɛ,” ni ji gbi ní Yehowa baatsu kojomɔ he nii eshi lɛ lɛ hewɔ.

⁵ Shi kɛlɛ, te eeefee tɛŋŋ eba akɛ abaakpata Babilon hiɛ lɛ? Kɛ́ be ni Yehowa eto kɛha enɛ lɛ shɛ lɛ, maŋtiase lɛ bafee tamɔ nɔ ni eyɛ shweshweeshwe. Esa akɛ tai ní baatutua maŋ lɛ atsu adebɔɔ naa hebuu ní Eufrate Faa ni hoɔ kɛtsɔɔ maŋtiase lɛ teŋ, ní agbàla eko awo nu bu ko ní buɔ he lɛ mli, ní ehaa maŋtiase lɛ náa nu kpakpa amɛnuɔ lɛ he nii klɛŋklɛŋ. Agbɛnɛ, ebaashwɛ Babilon gbogboi wuji enyɔ ní akɛtsá ni tamɔ nɔ ni anyɛɛɛ aye nɔ kunim lɛ hu. Kɛfata he lɛ, akɛ niyenii babaoo diɛŋtsɛ baato maŋtiase lɛ mli. Daily Bible Illustrations wolo lɛ wieɔ akɛ Nabonidus—ni ji Babilon naagbee maŋtsɛ lɛ—“kɛ mɔdɛŋbɔɔ kpele tsu nii ni ekɛbua niyenii babaoo naa eto maŋtiase lɛ mli, ni abuɔ naa akɛ [niyenii] ní yɔɔ mli lɛ fá bɔ ni ebaanyɛ elɛ maŋbii lɛ afii nyɔŋmai enyɔ.”

 6. Mɛni baaba trukaa kɛ́ tutuamɔ ní agba afɔ̃ shi akɛ akɛaaba Babilon nɔ lɛ ná eba mli?

⁶ Shi kɛlɛ, kponɔgbɛ nibii ní anaa lɛ baanyɛ alaka mɔ. Yesaia kɛɔ akɛ: “Hewɔ lɛ nijiaŋ fɛɛ tswɛm aaaje wui, ni gbɔmɛi adesai atsuii fɛɛ aaafã; ni amɛaajijaa, ŋmiŋmi kɛ kɔ̃ɔmɔ aaamɔmɔ amɛ; amɛaababla shi tamɔ yoo ní kɔ̃mɔɔ; amɛaakwɛkwɛɛ amɛhiɛaŋ kɛ naakpɛɛ, ni amɛhiɛaŋ aaatsu tamɔ la.” (Yesaia 13:7, 8) Kɛ asraafoi ní yeɔ kunim lɛ tutua maŋtiase lɛ, akɛ trukaa piŋmɔ ni naa wa waa tamɔ bɔ ni yoo ní miifɔ́ piŋɔ lɛ baaye emli bii lɛ ahejɔlɛ lɛ najiaŋ. Amɛtsuii baafã waa kɛ gbeyeishemɔ. Akɛni amɛnijiaŋ baaje wui hewɔ lɛ, ebaajwere amɛhe kɛkɛ, ní enyɛɛɛ efã amɛhe. Amɛhiɛ “aaatsu tamɔ la” kɛ gbeyeishemɔ kɛ hejaramɔ. Amɛbaakwɛkwɛɛ amɛhiɛaŋ kɛ naakpɛɛ, ni amɛaasusu bɔ ni aaafee aye amɛmaŋtiase lɛ nɔ kunim lɛ he.

 7. Mɛɛ “Yehowa gbi” ko baa, ni mɛni baajɛ mli aba aha Babilon?

⁷ Shi kɛlɛ, abaaye nɔ kunim kɛ̃. Babilon kɛ akɔntaabuu gbi, ni ji “Yehowa gbi” lɛ baakpe, ni ebaafee hejaramɔ gbi diɛŋtsɛ. Kojolɔ ní nɔ kwɔ fe fɛɛ lɛ baajie emlifu kpo ni ekɛ kojomɔ ní sa baaba Babilon maŋ lɛ mli bii eshafeelɔi lɛ anɔ. Gbalɛ lɛ kɛɔ akɛ: “Naa, Yehowa gbi lɛ miiba kɛ yiwalɛ kɛ mlila kɛ mlifu ní naa wa, koni ebafee shikpɔŋ lɛ fɛɛ amaŋfɔ, ní ekpata emli eshafeelɔi lɛ ahiɛ kɛjɛ nɔ.” (Yesaia 13:9) Babilon gbɛkpamɔi lɛ efee kusuu. Efee tamɔ nɔ ni hulu, nyɔɔŋtsere, kɛ ŋulamii lɛ efɔ̃ɔ kpɛmɔ. “Ni ŋwɛi ŋulamii kɛ oŋwɛ̃ kpɛŋ; hulu aaawo duŋ yɛ ekpojee mli, nyɔɔŋtsere hu haŋ ela lɛ akpɛ́.”—Yesaia 13:10.

 8. Mɛni hewɔ Yehowa wo Babilon shigbeemɔ he akpɔ lɛ?

⁸ Mɛni hewɔ ato akɛ nɔ ko ní tamɔ nɛkɛ aba maŋtiase ní wóɔ ehe nɔ nɛɛ nɔ lɛ? Yehowa kɛɔ akɛ: “Mawo je lɛ nyɔmɔ yɛ amɛnɔ̃ fɔŋ lɛ hewɔ, kɛ mɛi fɔji hu yɛ amɛnɔ̃ sha lɛ hewɔ, ni maha hewolɔi ahetsɔɔmɔ lɛ sɛɛ afo, ni maba yiwalɔi ahenɔwomɔ lɛ shi.” (Yesaia 13:11) Yehowa mlifu ní aaafɔse ashwie amɛnɔ lɛ baafee Babilon toigbalamɔ kɛha Nyɔŋmɔ webii ní ewa amɛ yi lɛ. Shikpɔŋ muu lɛ fɛɛ baana amanehulu yɛ Babilonbii lɛ anɔ̃ fɔŋ feemɔ lɛ hewɔ. Nɛkɛ yiwalɔi henɔwolɔi nɛɛ etswaŋ Yehowa mpoa kpetekpelee dɔŋŋ!

 9. Mɛni mɛɔ Babilon yɛ Yehowa kojomɔ gbi lɛ nɔ?

⁹ Yehowa kɛɔ akɛ: “Ni maha adesa jara awa fe shika krɔŋŋ, kɛ gbɔmɔ hu fe Ofir shika ŋmiiŋmi.” (Yesaia 13:12) Hɛɛ, mɔ ko kwraa ehiŋ maŋtiase lɛ mli, ebaatsɔ amaŋfɔ. Yehowa yaa nɔ akɛ: “No hewɔ lɛ maha ŋwɛi akpokpo, ni shikpɔŋ lɛ aaahoso kɛaajɛ egbɛhe yɛ Yehowa Zebaot mlila lɛ naa, kɛ emlifu ní naa wa lɛ gbi lɛ hewɔ.” (Yesaia 13:13) Abaahoso Babilon “ŋwɛi,” ni ji enyɔŋmɔi kɛ nyɔŋmɔyei babaoo lɛ, ni amɛnyɛŋ amɛye amɛbua maŋtiase lɛ yɛ efimɔ be lɛ mli. Abaahoso “shikpɔŋ lɛ,” ni ji Babilon Maŋtsɛyeli lɛ kɛaajɛ egbɛhe lɛ, ni ebaaho kɛya yinɔsane mli ákɛ maŋtsɛyelii ní bɛ dɔŋŋ lɛ ateŋ ekome kɛkɛ. “Aaaba mli akɛ amɛaafee tamɔ soŋãi ní afã lɛ kɛ tooi ní mɔ ko bɛ ní buaa amɛnaa: mɔ fɛɛ mɔ aaatsɔ ehe kɛaatee emaŋ, mɔ fɛɛ mɔ aaajo foi kɛaatee eshikpɔŋ nɔ.” (Yesaia 13:14) Babilon sɛɛfilɔi maŋsɛɛbii lɛ fɛɛ baakwa lɛ ni amɛaajo foi, kɛ gbɛkpamɔ akɛ amɛaaná amɛkɛ jeŋ hewalɛ ní baaye enɔ kunim lɛ teŋ wekukpaa hee. Yɛ naagbee lɛ, Babilon baana amanehulu ákɛ maŋtiase ní aye nɔ kunim, ni ji amanehulu ní ekɛba mɛi krokomɛi babaoo nɔ yɛ enunyam gbii lɛ amli lɛ: “Mɔ fɛɛ mɔ ní aaana lɛ, aaatsu lɛ nɔ̃, ni mɔ fɛɛ mɔ ní aaamɔ̃ lɛ, eeenyɔ yɛ klante naa. Ni amɛbii lɛ, aaaŋɔ amɛ atswia shi yɛ amɛhiɛ, aaahahaa amɛwei lɛ, ni amɛŋamɛi hu, aaato amɛ kaabonaa.”—Yesaia 13:15, 16.

Nyɔŋmɔ Dɛŋdade Kɛha Hiɛkpatamɔ

10. Namɛi Yehowa kɛbaatsu nii ní ekɛye Babilon nɔ kunim?

¹⁰ Mɛɛ hewalɛ Yehowa kɛbaatsu nii ní ekɛ Babilon shigbeemɔ lɛ aba? Yehowa jie hetoo lɛ kpo aaafee afii 200 kɛtsɔ hiɛ, akɛ: “Naa, matée Mediabii ashi mawo amɛ, mɛi ní ebuŋ jwiɛtɛi, ni shika hu amɛnyaŋ he, amɛgãii lɛ aaaŋɔ oblahii atswia shi, amɛmli etsɔŋ amɛ yɛ bii ni yɔɔ musuŋ tete he, ni amɛhiŋmɛii hoŋ gbekɛbii ahe. Ni Babel ni ji maŋtsɛyelihei anunyam kɛ Kaldeabii ahewoo lɛ wulamɔ lɛ, aaatsɔ tamɔ Sodom kɛ Gomora beni Nyɔŋmɔ butu amɛ lɛ.” (Yesaia 13:17-19) Babilon maŋ fɛfɛo lɛ baagbee shi, ni Yehowa dɛŋdade ní ekɛbaatsu enɛ he nii ji asraafoi ni jɛ shɔŋŋ, ni ji Mediabii agɔji ashikpɔŋ lɛ nɔ.a Yɛ naagbee lɛ, Babilon baatsɔ amaŋfɔ tamɔ bɔ ni Sodom kɛ Gomora maji ni kɛ amɛhe woɔ jeŋba shara mli waa lɛ etsɔmɔ lɛ.—1 Mose 13:13; 19:13, 24.

11, 12. (a) Te fee tɛŋŋ ni Media batsɔ jeŋ hewalɛ? (b) Mɛɛ su ko ní ekaaa gbalɛ lɛ tsĩ tã yɛ Media asraafoi lɛ ahe?

¹¹ Yesaia gbii lɛ amli lɛ, no mli lɛ Media kɛ Babilon fɛɛ yɛ Ashur nyɔŋyeli shishi. Aaafee afii oha sɛɛ, yɛ afi 632 D.Ŋ.B. lɛ, Media kɛ Babilon asraafoi fee ekome ni amɛbutu Ninive, ni ji Ashur maŋtiase lɛ. Enɛ gbele gbɛ kɛha Babilon ni ebatsɔ jeŋ hewalɛ ní yeɔ nɔ. Shi eyɔseee akɛ aaafee afii 100 kɛjɛ nakai beaŋ lɛ, Media baakpata ehiɛ! Namɔ baanyɛ ekɛ ekãa agba nɔ ko ni tamɔ nɛkɛ efɔ̃ shi fe Yehowa Nyɔŋmɔ?

¹² Beni etsɔɔ edɛŋdade ní ehala kɛha hiɛkpatamɔ lɛ, Yehowa wie akɛ Media asraafoi lɛ “ebuŋ jwiɛtɛi, ni shika hu amɛnyaŋ he.” Mɛɛ su ní ekaaa yɛ asraafoi ní ta ewaje amɛ lɛ ahe nɛ! Biblia he nilelɔ Albert Barnes kɛɛ akɛ: “Yɛ anɔkwale mli lɛ, asraafoi ni yatutua mɛi lɛ ateŋ mɛi fioo ko pɛ hiɛnɔkamɔ ákɛ aaaná nomŋɔɔ nii lɛ náaa amɛnɔ hewalɛ.” Ani Media asraafoi lɛ ha Yehowa wiemɔ lɛ fee anɔkwale yɛ enɛ gbɛfaŋ? Hɛɛ. Susumɔ wiemɔi ní anaa yɛ The Bible-Work, ní J. Glentworth Butler fee lɛ mli nɛɛ he okwɛ: “Ákɛ mɛi ní tamɔɔɔ jeŋmaji babaoo ní ewu ta dã lɛ, Mediabii, kɛ titri lɛ Persiabii lɛ, susuuu shika he akɛ ehe miihia, tamɔ bɔ ni amɛsusuɔ kunimyeli kɛ anunyam he lɛ.”b Enɛ hewɔ lɛ, ebɛ naakpɛɛ akɛ beni Persia nɔyelɔ Koresh ŋmɛɛ Israelbii lɛ ahe kɛjɛ Babilon nomŋɔɔ mli lɛ, ekɛ shika kɛ jwiɛtɛi nibii akpei abɔ ní Nebukadnezar yaloo kɛjɛ Yerusalem sɔlemɔtsu lɛ mli lɛ ku sɛɛ eha amɛ ekoŋŋ lɛ.—Ezra 1:7-11.

13, 14. (a) Eyɛ mli akɛ amɛbɛ nomŋɔɔ nii ahe miishɛɛ moŋ, shi Mediabii kɛ Persiabii tabilɔi lɛ taoɔ hiɛnyam yɛ mɛni he? (b) Mɛɛ gbɛ nɔ Koresh tsɔ eye Babilon hefamɔ nii ní ekɛshwãa lɛ anɔ kunim?

¹³ Eyɛ mli akɛ Mediabii kɛ Persiabii tabilɔi lɛ nyaaa nomŋɔɔ nii ahe tsɔ moŋ, shi kɛlɛ amɛsumɔɔ hiɛnyam taomɔ. Amɛsumɔɔɔ ní amɛya nɔ amɛhi shi akɛ jeŋmaŋ ni ji enyɔ kɛha jeŋmaŋ kroko yɛ je lɛŋ fɛɛ. Kɛfata he lɛ, Yehowa kɛ “hiɛkpatamɔ” wo amɛtsuii amli. (Yesaia 13:6) No hewɔ lɛ, amɛtswa amɛfai shi akɛ amɛkɛ amɛdade gãii—ní jeee gãi mli bii pɛ abaanyɛ akɛtsɛ̃, shi moŋ amɛbaanyɛ amɛkɛtswia henyɛlɔi asraafoi, ní ji Babilon yei lɛ ashwiei lɛ anii ní amɛkpata amɛhiɛ lɛ—baatsu nii ní amɛkɛye Babilon nɔ kunim.

¹⁴ Babilon nibii ní ekɛwaje ehe lɛ etsĩii Koresh, ni ji Medo-Persiabii asraafoi lɛ ahiɛnyiɛlɔ lɛ naa. Yɛ October 5 loo 6, afi 539 D.Ŋ.B. gbɛkɛ lɛ, efã ni aha Eufrate Faa lɛ mli nui lɛ ho kɛtsɔ he kroko kɛtee. Beni nu lɛ miɔ lɛ, tutualɔi lɛ ju shi kɛbote maŋtiase lɛ mli, ni amɛnyiɛ kɛtsɔ faa lɛ mli nui ní eba shi kɛbashi shuɔ he lɛ mli. Amɛbati Babilonbii lɛ ashi trukaa, ni aye Babilon nɔ kunim. (Daniel 5:30) Yehowa Nyɔŋmɔ kɛ mumɔ tsirɛ Yesaia ni egba nii ní ba nɛɛ efɔ̃ shi, ni eha efee faŋŋ akɛ Lɛ ji mɔ ni kudɔɔ nibii.

15. Mɛɛ wɔsɛɛ be mɛɔ Babilon?

¹⁵ Nɛgbɛ abaakpata Babilon hiɛ kwraa kɛyashi? Bó Yehowa sane jajemɔ nɛɛ toi: “Mɔ ko ehiŋ jɛi gbi ko gbi ko, ni asaŋ akɛ jɛi efeŋ shihilɛhe yɛ yinɔ ko yinɔ ko nɔ; ni Arabianyo tete eshiŋ ebuu yɛ jɛi, ni tookwɛlɔi lɛ hu haŋ amɛtooi abumɔ shi yɛ jɛi; shi ŋãŋ kooloi aaakamɔ shi yɛ jɛi, ni amɛtsũi lɛ amli aaayimɔ obɔ̃bɔ̃ kɛ patui, ni dugumai hu aaahi jɛi, ni sasabonsami aaajo yɛ jɛi; ni klaji aaabolɔ yɛ amɛmɔji lɛ amli, kɛ ŋãŋ gbeei hu yɛ amɛtsũi fɛfɛji lɛ amli. Ni ebe lɛ eshɛ etã, egbii lɛ hu etsɛŋ dɔŋŋ.” (Yesaia 13:20-22) Akɛ amaŋfɔfeemɔ kwraa baaba maŋtiase lɛ nɔ.

16. Shihilɛ ni Babilon yɔɔ mli amrɔ nɛɛ haa wɔnáa mɛɛ hekɛnɔfɔɔ?

¹⁶ Enɛ baaa mli amrɔ nɔŋŋ yɛ afi 539 D.Ŋ.B. Shi kɛlɛ, eyɛ faŋŋ ŋmɛnɛ akɛ nɔ fɛɛ nɔ ní Yesaia gba efɔ̃ shi yɛ Babilon he lɛ eba mli anɔkwale. Biblia mli saji ahe wielɔ ko kɛɛ akɛ, Babilon “kã shi amaŋfɔ kwraa bianɛ, ni étee nɔ ehi shi nakai aahu afii ohai abɔ, ákɛ he ko ni efite kwraa, ní etsɔ koikoi.” Kɛkɛ ni ekɛfata he akɛ: “Anyɛɛɛ ana shihilɛ ní eyɔɔ mli nɛɛ ní akaiii bɔ ni Yesaia kɛ Yeremia gbalɛi lɛ eba mli pɛpɛɛpɛ lɛ kɔkɔɔkɔ.” Eyɛ faŋŋ akɛ, mɔ ko bɛ Yesaia gbii lɛ amli ní baanyɛ agba Babilon shigbeemɔ kɛ amaŋfɔfeemɔ ni baaba yɛ naagbee lɛ efɔ̃ shi. Ejaakɛ, Babilon shigbeemɔ kɛha Mediabii kɛ Persiabii lɛ ba aaafee afii 200 yɛ be mli ní Yesaia ŋma ewolo lɛ sɛɛ! Ni emaŋfɔfeemɔ kwraa lɛ ba yɛ afii ohai abɔ sɛɛ. Ani enɛ ewajeee wɔhemɔkɛyeli yɛ Biblia lɛ mli akɛ Nyɔŋmɔ Wiemɔ ni jɛ mumɔŋ? (2 Timoteo 3:16) Kɛfata he lɛ, akɛni Yehowa ha gbalɛi ba mli yɛ blema beaŋ hewɔ lɛ, wɔbaanyɛ wɔná hekɛnɔfɔɔ kɛmɔ shi akɛ Biblia gbalɛi ni bako mli lolo lɛ baaba mli yɛ Nyɔŋmɔ diɛŋtsɛ be ni sa mli.

‘Hejɔɔmɔ Kɛmiijɛ Owerɛho lɛ Mli’

17, 18. Mɛɛ jɔɔmɔi Babilon nɔ kunimyeli lɛ baatsɔɔ kɛha Israel?

¹⁷ Babilon shigbeemɔ lɛ baafee hejɔlɛ kɛha Israel. Ebaafee heyeli kɛmiijɛ nomŋɔɔ mli kɛ hegbɛ ní amɛkɛaaku amɛsɛɛ kɛya Shiwoo Shikpɔŋ lɛ nɔ. No hewɔ lɛ, agbɛnɛ Yesaia wie akɛ: “Yehowa musuŋ aaatsɔ lɛ yɛ Yakob he, ni eeená Israel he tsuijurɔ ekoŋŋ, ni ekɛ amɛ aaato amɛshikpɔŋ lɛ nɔ; ni gbɔi aaabafata amɛhe, ni amɛaakpɛtɛ Yakob we lɛ he. Ni majimaji lɛ aaaŋɔ amɛ ni amɛkɛ amɛ aaaba amɛshihilɛhe lɛ, ni Israel we lɛ aaaŋɔ amɛ afee amɛnii yɛ Yehowa shikpɔŋ lɛ nɔ, ní amɛtsɔmɔ wehii kɛ weyei; ni amɛaaŋɔ amɛnomŋɔlɔi lɛ anom, ni amɛaaye amɛhaolɔi lɛ anɔ.” (Yesaia 14:1, 2) “Yakob” ní atsɔɔ nɛɛ miitsɔɔ Israel maŋ lɛ fɛɛ—akutsei 12 lɛ fɛɛ. Yehowa baana “Yakob” mɔbɔ, yɛ maŋ lɛ ní eeeha amɛku amɛsɛɛ kɛba amɛshikpɔŋ nɔ lɛ nɔ. Gbɔi akpei abɔ baafata amɛhe kɛya, ni amɛteŋ mɛi babaoo baasɔmɔ Israelbii lɛ akɛ sɔlemɔwe sɔɔlɔi. Israelbii lɛ ekomɛi po baaná nɔkwɛmɔ hegbɛ yɛ mɛi ni ŋɔ amɛ nom tsutsu ko lɛ anɔ.c

¹⁸ Piŋmɔ ní nomŋɔɔ shihilɛ kɛbaa lɛ baaya kwraa. Yɛ no najiaŋ lɛ, Yehowa baaha ewebii lɛ “hejɔɔmɔ kɛaajɛ [amɛ]werɛho kɛ [amɛ]haomɔ kɛ nyɔ́ŋ ní [aye amɛ] ní naa wa lɛ mli.” (Yesaia 14:3) Akɛni amɛná heyeli kɛjɛ nyɔŋyeli jatsui lɛ ashishi diɛŋtsɛ hewɔ lɛ, Israel ehiŋ awerɛho kɛ haomɔ ni apasa nyɔŋmɔi ajálɔi ateŋ hilɛ kɛbaa amɛnɔ lɛ mli dɔŋŋ. (Ezra 3:1; Yesaia 32:18) Beni ewieɔ enɛ he lɛ, Lands and Peoples of the Bible wolo lɛ kɛɛ akɛ: “Kɛha Babilonnyo lɛ, enyɔŋmɔi lɛ tamɔ lɛ pɛpɛɛpɛ, yɛ esui ni ehiii fe fɛɛ ní amɛyɔɔ lɛ hewɔ. Gbeyeilɔi, kɛ dãatɔlɔi kɛ kwashiai ji amɛ.” Kwɛ heyeli ní eji akɛ aaaje jamɔ mli shihilɛ ní efite tamɔ nɛkɛ mli!

19. Mɛni he hiaa kɛji Israel baaná Yehowa dɛŋ eshaifaa, ni mɛni wɔkaseɔ kɛjɛɔ enɛ mli?

¹⁹ Shi kɛlɛ, Yehowa mɔbɔnalɛ lɛ damɔ nɔ ko nɔ. Esa akɛ ewebii lɛ ajie heshwamɔ kpo yɛ amɛnɔ̃ fɔŋ feemɔ ní ha Nyɔŋmɔ gbala amɛtoi waa lɛ he. (Yeremia 3:25) Amɛhe eshai ní amɛaajaje faŋŋ kɛjɛ amɛtsui mli lɛ baaha amɛná Yehowa dɛŋ eshaifaa. (Kwɛmɔ Nehemia 9:6-37; Daniel 9:5.) Shishitoo mla nɛɛ tsuɔ nii ŋmɛnɛ hu. Akɛni “mɔ ko mɔ ko bɛ ní efeee esha” hewɔ lɛ, Yehowa dɛŋ mɔbɔnalɛ he hiaa wɔ fɛɛ. (2 Kronika 6:36) Yehowa, Nyɔŋmɔ mɔbɔnalɔ lɛ, jɛɔ suɔmɔ mli etsɛ́ɔ wɔ ní wɔbajaje wɔhe eshai lɛ wɔtsɔɔ lɛ, ní wɔshwa wɔhe, ní wɔje gbɛ fɔŋ ní wɔnyiɛ nɔ lɛ nɔ, koni etsá wɔ. (5 Mose 4:31; Yesaia 1:18; Yakobo 5:16) Jeee ehiɛ duromɔ kɛkɛ enɛ yeɔ ebuaa wɔ ni wɔnáa, shi moŋ ehaa wɔnáa miishɛjemɔ hu.—Lala 51:3; Abɛi 28:13; 2 Korintobii 2:7.

‘Abɛbuiaŋ Wiemɔ’ ní Akɛshiɔ Babilon

20, 21. Maji ni bɛŋkɛ Babilon lɛ ná miishɛɛ yɛ eshigbeemɔ lɛ hewɔ yɛ mɛɛ gbɛ nɔ?

²⁰ Nɔ ni fe afii 100 dani Babilon aaawó ehe nɔ ákɛ jeŋ hewalɛ ní he wa fe fɛɛ lɛ, Yesaia gba bɔ ni je lɛ baafee enii yɛ eshigbeemɔ lɛ he lɛ efɔ̃ shi. Etsɔ gbalɛ wiemɔ nɔ efã Israelbii ní aha amɛye amɛhe kɛjɛ enyɔŋyeli shishi lɛ akɛ: “Oooŋɔ nɛkɛ abɛ nɛɛ obu Babel maŋtsɛ lɛ ni oookɛɛ akɛ: Té fee tɛŋŋ ní haolɔ lɛ bɛ dɔŋŋ nɛɛ? té fee tɛŋŋ ní naagbamɔ lɛ sɛɛ efo nɛɛ? Yehowa eku mɛi fɔji adɛŋ tso lɛ, kɛ nɔyelɔi lɛ amaŋtsɛtso lɛ, mɔ ni kɛ mlila tswia majimaji lɛ anii, ní etooo enine shi, ní ekɛ mlifu yeɔ jeŋmaji lɛ anɔ, ní eyiwalɛ sɛɛ efooo lɛ!” (Yesaia 14:4-6) Babilon efee gbɛi efɔ̃ shi jogbaŋŋ ákɛ kunimyelɔ, kɛ yiwalɔ ní haa gbɔmɛi ni eye amɛhe lɛ tsɔmɔɔ nyɔji. Kwɛ bɔ ni esa jogbaŋŋ akɛ akɛ ‘abɛbuiaŋ wiemɔ’ ní akɛshiɔ Babilon maŋtsɛmɛi aweku lɛ titri—kɛjɛ Nebukadnezar nɔ aahu kɛyagbe naa yɛ Nabonidus kɛ Belshazar nɔ—ní ye maŋtiase kpeteŋkpele lɛ nɔ yɛ enunyam gbii lɛ amli lɛ, aaaye eshigbeemɔ lɛ he gbi jurɔ!

²¹ Kwɛ srɔtofeemɔ diɛŋtsɛ ní eshigbeemɔ lɛ kɛaaba! “Shikpɔŋ muu lɛ fɛɛ ená hejɔlɛ, ni enɔ ejɔ, ni amɛmiilá nyamɔ lalai. Sɛsɛoi lɛ kɛ Lebanon tsenedurui lɛ miiyeo yɔɔ akɛ: Gbii abɔ ní okã shi nɛɛ, mɔ ko baŋ ebatooŋ wɔ.” (Yesaia 14:7, 8) Kɛha Babilon nɔyelɔi lɛ, maji ní ebɔle amɛ lɛ anɔ maŋtsɛmɛi lɛ tamɔ tsei ní amɛbaatoo amɛshwie shi ní amɛkɛtsu amɛ diɛŋtsɛ amɛyiŋtoi ahe nii. Ojogbaŋŋ, fɛɛ sɛɛ efo agbɛnɛ. Babilonnyo tsotoolɔ lɛ etoo enaagbee tso efɔ̃ shi!

22. Yɛ lalafoo wiemɔi ashishinumɔ naa lɛ, te Babilon maŋtsɛmɛi aweku lɛ shigbeemɔ lɛ sa Gbohiiaje he eha tɛŋŋ?

²² Babilon shigbeemɔ lɛ yɛ naakpɛɛ aahu akɛ gbonyobu lɛ diɛŋtsɛ fee nii yɛ he: “Gbohiiaje po ní yɔɔ shishi lɛ, ohewɔ lɛ ebú kɛmiiba ebakpeeo; eta sisai amli yɛ ohewɔ, kɛ shikpɔŋ lɛ nɔ onukpai lɛ fɛɛ, ni eha jeŋmaji lɛ amaŋtsɛmɛi lɛ fɛɛ ete shi kɛjɛ amɛsɛii anɔ. Amɛ fɛɛ tswɛm amɛaahere nɔ amɛaakɛɛo akɛ: Ani bo hu ogbɔjɔ tamɔ wɔ nɔŋŋ? otsɔ tamɔ wɔ nɔŋŋ pɛ? Aba ogbojee lɛ shi kɛba gbohiiaje kɛ osaŋkui agbɛɛmɔ lɛ hu; osaa ní aŋmɛ yɛ oshishi ji omlɛ̃gɛ̃i, ni onɔhaa nɔ̃ hu ji gɔgɔmii.” (Yesaia 14:9-11) Mɛɛ lalafoo wiemɔ mli mfoniri ní mli wa nɛ! Etamɔ nɔ ni adesai akwamaŋ gbonyobu lɛ baatsĩɛ nakai maŋtsɛmɛi ní tsɔ Babilon maŋtsɛmɛi aweku lɛ hiɛ kɛtee gbele mli lɛ fɛɛ ahiɛ koni amɛnyɛ amɛkpee mɔ hee ní baa lɛ atuu. Amɛyeɔ Babilon hewalɛ ní yeɔ nɔ, ní amrɔ nɛɛ ebɛ hewalɛ ko kwraa, ní eka saa ni ji omlɛ̃gɛ̃i anɔ yɛ saatso kpakpa ní jara wa najiaŋ, ní gɔgɔ̃mii ehà enɔ yɛ klala ni jara wa najiaŋ lɛ he fɛo.

“Tamɔ Gbonyo ní Anaanaa Enɔ”

23, 24. Mɛɛ henɔwomɔ ní teke nɔ Babilon maŋtsɛmɛi lɛ jie lɛ kpo?

²³ Yesaia tsá abɛbuiaŋ wiemɔ lɛ nɔ akɛ: “Té fee tɛŋŋ ni ojɛ ŋwɛi obagbee shi nɛɛ, bo toloo ní okpɛ́ɔ hɛŋŋ! Té fee tɛŋŋ ni afoò afɔ̃ shikpɔŋ nɛɛ, bo ní obaa jeŋmaji lɛ ashi lɛ!” (Yesaia 14:12) Pɛsɛmkunya henɔwomɔ tsirɛ Babilon maŋtsɛmɛi lɛ ni amɛwó amɛhe nɔ kɛteke mɛi ní ebɔle amɛ lɛ. Amɛkɛ hewoo jieɔ hewalɛ kɛ hegbɛ ní amɛyɔɔ lɛ kpo, tamɔ ŋulami ní miikpɛ kaŋkaŋ yɛ ŋwɛi leebi maaŋkpa. Henɔwomɔ jɛɛhe titri ko ji Yerusalem nɔ kunim ní Nebukadnezar ye, ni ji nifeemɔ ko ní Ashur nyɛɛɛ etsu he nii lɛ. Abɛbuiaŋ wiemɔ lɛ feɔ Babilon maŋtsɛmɛi aweku lɛ he mfoniri akɛ amɛkɛɔ akɛ: “Makwɔ kɛya ŋwɛi, ni mawó mimaŋtsɛsɛi lɛ nɔ kɛaateke Nyɔŋmɔ ŋulamii lɛ, ni maho mata kpee gɔŋ lɛ nɔ yɛ kooyigbɛ naagbeehei lɛ tɔ̃ɔ; makwɔ kɛaateke atatuiaŋ hei grɔŋŋi lɛ, ni matamɔ mɔ ní yɔɔ ŋwɛi shɔŋŋ lɛ!” (Yesaia 14:13, 14) Ani nɔ kroko yɛ ní yɔɔ mlila fe enɛ?

²⁴ Akɛ maŋtsɛmɛi ní jɛ David maŋtsɛmɛi aweku lɛ mli lɛ toɔ ŋulamii ahe yɛ Biblia lɛ mli. (4 Mose 24:17) Kɛjɛ David nɔ kɛbaa lɛ, nakai “ŋulamii” lɛ ye nɔ kɛjɛ Zion Gɔŋ lɛ nɔ. Beni Salomo ma sɔlemɔtsu lɛ yɛ Yerusalem sɛɛ lɛ, gbɛi Zion lɛ bakɔ maŋtiase muu lɛ fɛɛ he. Yɛ Mla kpaŋmɔ lɛ shishi lɛ, abiɔ ní Israelbii hii fɛɛ afã gbɛ kɛya Zion shii etɛ yɛ afi mli. Enɛ hewɔ lɛ, ebatsɔ “kpee gɔŋ.” Yɛ efai shi ní etswa akɛ ebaaye Yuda maŋtsɛmɛi lɛ anɔ kunim ní ejie amɛ kɛjɛ gɔŋ lɛ nɔ lɛ hewɔ lɛ, Nebukadnezar miijaje eyiŋ ní eto akɛ ebaawó ehe nɔ kɛteke nakai “ŋulamii” lɛ kpo faŋŋ. Ekɛ amɛnɔ kunim ní eye lɛ he yijiemɔ haaa Yehowa. Shi moŋ, enɛ tsɔɔ akɛ ekɛ ehe miiwo Yehowa gbɛhe lɛ mli yɛ henɔwomɔ mli.

25, 26. Babilon maŋtsɛmɛi aweku lɛ kɛ amɛnaagbee ni yɔɔ hiɛgbele kpe yɛ mɛɛ gbɛ nɔ?

²⁵ Mɛɛ shihilɛ tsakemɔ sɛɛsɛɛ ato aha Babilon maŋtsɛmɛi aweku ní wóɔ ehe nɔ lɛ nɛkɛ! Awooo Babilon nɔ kɛtekeee Nyɔŋmɔ ŋulamii lɛ kwraa. Shi moŋ, Yehowa kɛɛ akɛ: “Aaabao shi kɛaatee gbohiiaje, kɛaatee bu lɛ shishi tɔ̃ɔ! Mɛi ní aaanao lɛ aaakwɛo diŋŋ, amɛaajwɛŋ ohe akɛ: Ani nuu lɛ ní ha shikpɔŋ lɛ hoso, ní eha maŋtsɛyelii ahe kpokpo lɛ nɛ? Mɔ ni ha je lɛŋ tsɔ ŋã kpataa, ní ebutu emli maji lɛ, ní eŋmɛɛɛ enomii lɛ ahe ní amɛya amɛmaŋ lɛ nɛ?” (Yesaia 14:15-17) Maŋtsɛmɛi aweku ní sumɔɔ hiɛnyam taomɔ lɛ baaba shi kɛya Gbohiiaje (Sheol), tamɔ adesa fɛɛ adesa.

²⁶ Belɛ, nɛgbɛ hewalɛ ní ye maŋtsɛyelii anɔ kunim, ní ekpata shikpɔŋ ni baa nii lɛ hiɛ, ni ebutu maŋtiasei babaoo ní anyɛɛɛ akane lɛ baahi? Nɛgbɛ jeŋ hewalɛ ní ŋɔ gbɔmɛi anom ní eŋmɛɛɛ gbɛ ní amɛku amɛsɛɛ amɛya amɛmaŋ lɛ baahi? Ejaakɛ, Babilon maŋtsɛmɛi aweku lɛ naŋ fũu kpakpa po! Yehowa kɛɛ akɛ: “Jeŋmaji lɛ amaŋtsɛmɛi lɛ fɛɛ lɛ, amɛ fɛɛ kwa amɛkamɔkamɔɔ shi kɛ anunyam, mɔ fɛɛ mɔ yɛ ewe; shi bo lɛ, ashɛo afɔ̃ shi kɛjɛ ogbonyobu lɛ mli, tamɔ tso nine ní agbe he guɔ, ni mɛi ní enyɔnyɔi ní akɛ klante egbulɔ amɛ ní amɛkpeleke shi kɛtee bu lɛŋ tɛi lɛ amli lɛ eha ohe, tamɔ gbonyo ní anaanaa enɔ. Akɛ bo fataŋ amɛhe yɛ fũu mli, ejaakɛ ofite oshikpɔŋ lɛ, ni ogbe omaŋbii lɛ; atsĩŋ efɔŋfeelɔi ashwiei tã gbi ko gbi ko!” (Yesaia 14:18-20) Yɛ blema beaŋ lɛ, abuɔ akɛ eji hiɛgbele kɛha maŋtsɛ kɛji akɛ woo kɛ agbojee efũuu lɛ. No hewɔ lɛ, Babilon maŋtsɛmɛi aweku lɛ hu? Eji anɔkwale akɛ ekolɛ afũ maŋtsɛmɛi aŋkroaŋkroi lɛ kɛ woo moŋ, shi ashɛrɛ maŋtsɛyeli lɛ mli maŋtsɛmɛi aweku ní jɛ Nebukadnezar mli lɛ ashwie kwraa “tamɔ tso nine ní agbe he guɔ.” Efee tamɔ nɔ ni ashɛ maŋtsɛmɛi aweku lɛ afɔ̃ gbonyobu ní akadiko mli—tamɔ asraafonyo nanenɔ nyiɛlɔ folo ko kɛkɛ ní agbe lɛ yɛ ta mli. Mɛɛ hiɛshishwiemɔ nɛ!

27. Babilonbii ayinɔi ni baaba wɔsɛɛ lɛ baana amanehulu yɛ amɛblematsɛmɛi lɛ anɔ̃ sha lɛ hewɔ yɛ mɛɛ gbɛ nɔ?

²⁷ Abɛbuiaŋ wiemɔ lɛ ba naagbee kɛ naagbee famɔi ní akɛha Mediabii kɛ Persiabii kunimyelɔi lɛ, akɛ: “Nyɛsaa gbɛhe nyɛtoa ebii lɛ yɛ amɛtsɛmɛi anɔ̃ sha lɛ hewɔ, koni amɛkate shi amɛmiiŋɔ shikpɔŋ lɛ amɛmiifee amɛnɔ̃ ní amɛwo je lɛŋ obɔ̃ kɛ maji.” (Yesaia 14:21) Babilon shigbeemɔ lɛ baahi shi nakai daa. Abaabule Babilon maŋtsɛmɛi aweku lɛ shishi kwraa. Atsĩɛŋ hiɛ dɔŋŋ. Babilonbii ayinɔi ni baaba wɔsɛɛ lɛ baana amanehulu yɛ “amɛtsɛmɛi anɔ̃ sha lɛ hewɔ.”

28. Mɛni ji esha ní Babilon maŋtsɛmɛi lɛ fee lɛ shishifã, ni mɛni wɔkaseɔ kɛjɛɔ enɛ mli?

²⁸ Kojomɔ ní ajaje ashi Babilon maŋtsɛmɛi aweku lɛ feɔ nikasemɔ ní he yɔɔ sɛɛnamɔ kɛha wɔ. Esha ní Babilon maŋtsɛmɛi lɛ fee lɛ shishifã ji amɛ hiɛnyam taomɔ ní sɛɛ efooo lɛ. (Daniel 5:23) Amɛtsuii eyimɔ obɔ̃bɔ̃ kɛ nɔyeli hewalɛ taomɔ. Amɛmiitao ní amɛye mɛi krokomɛi anɔ. (Yesaia 47:5, 6) Ni amɛshwe ní gbɔmɛi kɛ anunyam ní esa akɛ akɛha Nyɔŋmɔ pɛ lɛ aha amɛ. (Kpojiemɔ 4:11) Enɛ feɔ kɔkɔbɔɔ kɛha mɛi fɛɛ ní hiɛ nɔyeli hegbɛ lɛ—yɛ Kristofoi asafo lɛ mli po. Hiɛnyam taomɔ kɛ pɛsɛmkunya henɔwomɔ ji sui komɛi ní Yehowa eŋmɛŋ gbɛ kɔkɔɔkɔ, yɛ aŋkroaŋkroi kɛ jeŋmaji fɛɛ ahe.

29. Babilon nɔyelɔi lɛ ahenɔwomɔ kɛ hiɛnyam taomɔ lɛ jieɔ mɛni kpo?

²⁹ Babilon nɔyelɔi lɛ ahenɔwomɔ lɛ jieɔ Satan Abonsam, ni ji “je nɛŋ nyɔŋmɔ lɛ” mumɔ lɛ kpo. (2 Korintobii 4:4) Lɛ hu eshweɔ ní ená nɔyeli hewalɛ, ni eetao ní enɔ akwɔ fe Yehowa Nyɔŋmɔ. Taakɛ eji yɛ Babilon maŋtsɛ lɛ kɛ gbɔmɛi ní eye amɛnɔ kunim lɛ agbɛfaŋ lɛ, Satan hiɛnyam taomɔ fɔŋ lɛ kɛ nɔnaa kɛ amanehulu eba adesai fɛɛ nɔ.

30. Mɛɛ Babilon kroko hu atsĩ etã yɛ Biblia lɛ mli, ni mɛɛ mumɔ ejie lɛ kpo?

³⁰ Kɛfata he lɛ, wɔkaneɔ Babilon kroko—“Babilon kpeteŋkpele lɛ” he sane yɛ Kpojiemɔ wolo lɛ mli. (Kpojiemɔ 18:2) Nɛkɛ gbɛjianɔtoo, ni ji jeŋ apasa jamɔ maŋtsɛyeli nɛɛ hu ejie henɔwomɔ, kɛ nɔnyɛɛ, kɛ yiwalɛ mumɔ kpo. Enɛ hewɔ lɛ, esa akɛ lɛ hu ekɛ “Yehowa gbi” lɛ akpe ní akpata ehiɛ yɛ Nyɔŋmɔ diɛŋtsɛ be ni eto lɛ mli. (Yesaia 13:6) Kɛjɛ afi 1919 kɛbaa nɛɛ, ajaje shɛɛ sane nɛɛ yɛ shikpɔŋ lɛ nɔ fɛɛ akɛ: “Babilon maŋ kpeteŋkpele lɛ ejwa!” (Kpojiemɔ 14:8) Ejwa beni enyɛɛɛ etsĩ Nyɔŋmɔ webii anaa yɛ nomŋɔɔ mli dɔŋŋ lɛ. Etsɛŋ ni abaakpata ehiɛ kwraa. Yehowa kɛ famɔ ha yɛ blema Babilon he akɛ: “Nyɛwoa lɛ nyɔmɔ yɛ enitsumɔ lɛ naa! Bɔ fɛɛ bɔ ni efee lɛ, nyɛfea lɛ nakai nɔŋŋ; ejaakɛ ewó ehe yɛ Yehowa nɔ, yɛ Israel Mɔ krɔŋkrɔŋ lɛ nɔ!” (Yeremia 50:29; Yakobo 2:13) Babilon Kpeteŋkpele lɛ baaná kojomɔ ní tamɔ nakai nɔŋŋ.

31. Mɛni etsɛŋ ni ebaaba Babilon Kpeteŋkpele lɛ nɔ?

³¹ No hewɔ lɛ, Yehowa naagbee wiemɔ ni yɔɔ Yesaia wolo lɛ mli gbalɛ nɛɛ mli lɛ kɔɔɔ blema Babilon pɛ he, shi moŋ ekɔɔ Babilon Kpeteŋkpele lɛ hu he, akɛ: “Mate shi mawo amɛ . . . ni mafo Babel gbɛi kɛ nɔ ni eshwɛ lɛ kɛ bi kɛ nabi mashɛ mafɔ̃ . . . Asaŋ maha etsɔ kɔtɔkɔi agbɛfaŋnɔ kɛ nu kpaakpoi sɔŋŋ, ni mikɛ fitemɔ bɔlɔ lɛ aaabɛɛ lɛ!” (Yesaia 14:22, 23) Bɔ ni blema Babilon etsɔ amaŋfɔ kɛ koikoi lɛ tsɔɔ nɔ ni etsɛŋ ní Yehowa baafee Babilon Kpeteŋkpele lɛ. Kwɛ miishɛjemɔ ní eji kɛha mɛi ni sumɔɔ anɔkwa jamɔ lɛ! Mɛɛ hewalɛwoo nɛ, koni wɔbɔ mɔdɛŋ ní wɔkaŋmɛ gbɛ ní Satan sui ni ji henɔwomɔ, kɛ hewoo, loo yiwalɛ miije shishi yɛ wɔmli kɔkɔɔkɔ!

[Shishigbɛ niŋmai]

[Mfoniri ni yɔɔ baafa 178]

Babilon ní egbee shi lɛ baatsɔ shia ŋã nɔ kooloi anyiɛmɔhe

[Mfonirii ni yɔɔ baafa 186]

Babilon Kpeteŋkpele lɛ baatsɔ koikoi, tamɔ blema Babilon