Bulɔ lɛ Ní Wɔkɛ Lɛ Aaasɔmɔ

“[Yehowa, “NW”], jenamɔ nɛɛ fɛɛ lɛ midamɔ buuhe lɛ, ni nyɔɔŋnyɔɔŋ fɛɛ lɛ midamɔ mibuu nɔ.”—YESAIA 21:8.

 1. Mɛɛ shiwoi ní yɔɔ nyam Yehowa ji lɛ diɛŋtsɛ edasefonyo yɛ he?

YEHOWA ji Yiŋtolɔ Kpeteŋkpele. Bɔfo atuatselɔ ni batsɔ Satan Abonsam lɛ nyɛŋ afee nɔ ko ni ekɛfite E-yiŋtoo ni yɔɔ nyam akɛ ebaatse Lɛ diɛŋtsɛ egbɛi lɛ he, ni eto Maŋtsɛyeli ni yɔɔ nyam ni baaye paradeiso shikpɔŋ lɛ nɔ lɛ ema shi. (Mateo 6:9, 10) Adesai baaná jɔɔmɔi diɛŋtsɛ yɛ nakai nɔyeli lɛ shishi. Nyɔŋmɔ ‘baami gbele kɛaatee naanɔ; ni Nuntsɔ Yehowa aaatsumɔ hiɛaŋ fɛɛ yaafonui.’ Adesai ni efee ekome ni yɔɔ miishɛɛ lɛ baaná toiŋjɔlɛ kɛ shweremɔ mli ŋɔɔmɔ kɛya naanɔ. (Yesaia 25:8; 65:17-25) Yehowa ji lɛ diɛŋtsɛ edasefonyo kɛha shiwoi ní yɔɔ nyam nɛɛ!

 2. Mɛɛ odasefoi ni ji adesai Yehowa etee amɛ shi?

² Shi kɛlɛ, Bɔlɔ Kpeteŋkpele lɛ yɛ odasefoi ni ji adesai hu. Dani Kristofoi abe lɛ aaashɛ lɛ, “odasefoi babaoo . . . tamɔ atatu,” ni je shishi kɛjɛ Abel nɔ lɛ dá tsuishiŋmɛɛ he foi lɛ, ni bei pii lɛ amɛfee enɛ yɛ naagbai ni naa wawai amli. Amɛ nɔkwɛmɔnii kpakpai lɛ woɔ anɔkwa Kristofoi hewalɛ ŋmɛnɛ. Kristo Yesu ji odasefonyo ni yɔɔ ekãa he nɔkwɛmɔnɔ ni fe fɛɛ. (Hebribii 11:1–12:2) Ákɛ nɔkwɛmɔnɔ lɛ, kaimɔ enaagbee odase ni eye yɛ Pontio Pilato hiɛ lɛ. Yesu jaje akɛ: “Mi lɛ, enɛ hewɔ afɔ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase.” (Yohane 18:37) Kɛjɛ afi 33 Ŋ.B. kɛbashi afi 2000 Ŋ.B. nɛɛ, Kristofoi ni yɔɔ ekãa lɛ enyiɛ Yesu nɔkwɛmɔnɔ lɛ sɛɛ ni amɛtee nɔ amɛye odase ni amɛkɛ ekãa ejaje “Nyɔŋmɔ niwuji lɛ.”—Bɔfoi lɛ Asaji 2:11.

Babilon Mligbalamɔ Kui

 3. Satan ete shi ewo Yehowa kɛ esuɔmɔnaa nii ahe odase ní ayeɔ lɛ yɛ mɛɛ gbɛ nɔ?

³ Satan Abonsam, ni ji Henyɛlɔ kpeteŋkpele lɛ kɛ afii akpei abɔ etsɔ gbɛ fɔŋ nɔ koni ekɛgbe odase ní Nyɔŋmɔ odasefoi lɛ yeɔ lɛ he guɔ. Ákɛ “malemɔ tsɛ” lɛ, nɛkɛ “drako kpeteŋkpele . . . , ni ji blema onufu” nɛɛ “shishiuɔ jeŋ muu lɛ fɛɛ.” Etee nɔ yɛ ta ni ewuɔ eshiɔ mɛi ni yeɔ “Nyɔŋmɔ kitai” lɛ anɔ lɛ mli, titri lɛ yɛ naagbee gbii nɛɛ amli.—Yohane 8:44; Kpojiemɔ 12:9, 17.

 4. Te fee tɛŋŋ ni Babilon Kpeteŋkpele lɛ ba shihilɛ mli?

⁴ Aaafee afii 4,000 ni eho nɛ, yɛ Noa gbii lɛ amli Nu Afua lɛ sɛɛ lɛ, Satan tée Nimrod, ni ji “gbɔbilɔ kpanaa yɛ Yehowa hiɛ” lɛ shi. (1 Mose 10:9, 10) Nimrod maŋtiase kpeteŋkpele ní fe fɛɛ, ni ji Babilon (Babel) lɛ batsɔ daimonioi ajamɔ shikwɛ̃ɛhe. Beni Yehowa futu Babel mɔɔ malɔi lɛ awiemɔ lɛ, gbɔmɛi lɛ gbɛ amɛshwã shikpɔŋ lɛ nɔ fɛɛ, ni amɛkɛ amɛ apasa jamɔ lɛ tee. No hewɔ lɛ, Babilon batsɔ jeŋ fɛɛ apasa jamɔ maŋtsɛyeli, ní atsɛɔ lɛ Babilon Kpeteŋkpele yɛ Kpojiemɔ wolo lɛ mli lɛ jɛɛhe. Nakai wolo lɛ egba nɛkɛ blema jamɔ gbɛjianɔtoo nɛɛ hiɛkpatamɔ efɔ̃ shi.—Kpojiemɔ 17:5; 18:21.

Maŋ ni Ji Odasefoi

 5. Mɛɛ maŋ Yehowa to he gbɛjianɔ koni efee edasefonyo lɛ, shi mɛni hewɔ eŋmɛ gbɛ ni etee nomŋɔɔ mli lɛ?

⁵ Aaafee afii 500 yɛ Nimrod be lɛ sɛɛ lɛ, Yehowa to anɔkwafo Abraham seshibii lɛ ahe gbɛjianɔ ni efee amɛ Israel maŋ koni amɛsɔmɔ akɛ E-dasefoi yɛ shikpɔŋ lɛ nɔ. (Yesaia 43:10, 12) Nakai maŋ lɛ mli bii aŋkroaŋkroi babaoo sɔmɔ Yehowa yɛ anɔkwale mli. Shi, yɛ afii ohai abɔ lɛ fɛɛ mli lɛ, jeŋmaji ni ebɔle Israel he lɛ kɛ amɛ apasa hemɔkɛyelii lɛ fite lɛ, ni Yehowa webii ni ekɛ amɛ efee kpaŋmɔ lɛ tsi amɛhe kɛjɛ ehe kɛyajá apasa nyɔŋmɔi. No hewɔ lɛ, yɛ afi 607 D.Ŋ.B. lɛ, Babilon asraafoi, ni Maŋtsɛ Nebukadnezar nyiɛ amɛhiɛ lɛ kpata Yerusalem kɛ esɔlemɔwe lɛ hiɛ, ni amɛloo Yudafoi lɛ ateŋ mɛi babaoo kɛtee nomŋɔɔ mli yɛ Babilon.

 6. Mɛɛ sanekpakpa Yehowa gbalɔ bulɔ lɛ jaje, ni mɛɛ be eba mli?

⁶ Mɛɛ kunimyeli po eji kɛha apasa jamɔ nɛkɛ! Shi kɛlɛ, Babilon nɔyeli lɛ sɛɛ etsɛɛɛ. Aaafee afii 200 dani nakai nifeemɔ lɛ baaba lɛ, Yehowa fã akɛ: “Yaa ní oyato bulɔ: nɔ ni enaa lɛ, ha ejaje!” Mɛɛ saji esa akɛ bulɔ nɛɛ atswa he adafi? “Egbee shi ee ei! Babel egbee shi! Ni enyɔŋmɔi lɛ amagai lɛ fɛɛ akumɔ ashwie shi!” (Yesaia 21:6, 9) No hewɔ lɛ, gbalɛ wiemɔ lɛ ba mli anɔkwale yɛ afi 539 D.Ŋ.B. Babilon ni he wa lɛ gbee shi, ni etsɛɛɛ kɛkɛ ni Nyɔŋmɔ webii ni ekɛ amɛ efee kpaŋmɔ lɛ ku amɛsɛɛ kɛtee amɛmaŋ shikpɔŋ nɔ.

 7. (a) Mɛni Yudafoi lɛ kase kɛjɛ Yehowa tsɔsemɔ lɛ mli? (b) Mɛɛ tsɔnei Yudafoi ni ku amɛsɛɛ kɛjɛ nomŋɔɔ mli kɛba lɛ yagbee mli, ni mɛni jɛ mli ba?

⁷ Yudafoi ni ku amɛsɛɛ lɛ ekase nii bɔ ni kulɛ esa akɛ amɛtsi amɛhe kɛjɛ wɔŋjamɔ kɛ mumɔi atsɛmɔ nifeemɔi ahe. Shi kɛlɛ, yɛ afii abɔ lɛ fɛɛ mli lɛ, amɛyagbee tsɔnei krokomɛi amli. Hela jeŋ nilee tsɔ̃ amɛteŋ mɛi komɛi tsɔne. Mɛi krokomɛi hu yadi adesai ablema saji asɛɛ fe Nyɔŋmɔ Wiemɔ lɛ. Ni kɛlɛ, akɛ maŋhedɔɔ hu laka mɛi krokomɛi. (Marko 7:13; Bɔfoi lɛ Asaji 5:37) Beni afɔ Yesu lɛ, no mli lɛ, maŋ lɛ etsi ehe kɛjɛ jamɔ krɔŋŋ he ekoŋŋ. Eyɛ mli akɛ Yudafoi aŋkroaŋkroi komɛi bo sanekpakpa ni Yesu bajaje lɛ toi moŋ, shi ákɛ maŋ muu lɛ, amɛkpoo lɛ, ni no hewɔ lɛ, Nyɔŋmɔ hu kpoo amɛ. (Yohane 1:9-12; Bɔfoi lɛ Asaji 2:36) Israel jeee Nyɔŋmɔ odasefonyo dɔŋŋ, ni yɛ afi 70 Ŋ.B. lɛ, akpata Yerusalem kɛ esɔlemɔwe lɛ hiɛ ekoŋŋ, ni nɛkɛ be nɛɛ mli lɛ Roma asraafoi lɛ fee.—Mateo 21:43.

 8. Namɛi batsɔ Yehowa odasefonyo lɛ, ni mɛni hewɔ Paulo kɔkɔbɔɔ ni ekɛha odasefonyo nɛɛ ba yɛ ebe naa lɛ?

⁸ Yɛ nɛkɛ be nɛɛ mli lɛ, afɔ Kristofoi ni ji “Nyɔŋmɔ Israel lɛ,” ni no basɔmɔ agbɛnɛ akɛ Nyɔŋmɔ odasefonyo kɛha jeŋmaji lɛ. (Galatabii 6:16) Oya nɔŋŋ kɛkɛ ni Satan tsɔ ŋaa koni efite mumɔŋ maŋ hee nɛɛ. Beni klɛŋklɛŋ afii oha lɛ baa naagbee lɛ, ana mligbalamɔ jamɔ kui ni naa mɔ nɔ hewalɛ yɛ asafoi lɛ amli. (Kpojiemɔ 2:6, 14, 20) Paulo kɔkɔbɔɔ lɛ ba yɛ ebe naa, akɛ: “Nyɛkwɛa nyɛhe ni ahia, koni mɔ ko kɛ jeŋ nilee kɛ yakashishiumɔ akaŋɔ nyɛ nom, yɛ gbɔmɛi ablemasaji kɛ je nɛŋ shishijee nibii ni jeee Kristo lɛ anaa.”—Kolosebii 2:8.

 9. Taakɛ Paulo bɔ kɔkɔ lɛ, mɛɛ nibii kɛ Kristendom ba shihilɛ mli?

⁹ Yɛ naagbee lɛ, Hela jeŋ nilee, Babilonbii ajamɔ mli susumɔi, kɛ sɛɛ mli lɛ, adesai “anilee” tamɔ sutsakemɔ tsɔɔmɔ lɛ kɛ shitee-kɛ-woo wiemɔi ni mli wawai fite mɛi babaoo ni kɛɔ akɛ Kristofoi ji amɛ lɛ ajamɔ. Etamɔ bɔ ni Paulo gba efɔ̃ shi lɛ, akɛ: “Ejaakɛ mile akɛ, kɛ mikpa mihe lɛ, klaji fulɔi baabote nyɛteŋ, ni amɛbaaŋ tooiku lɛ yi; ni nyɛ diɛŋtsɛ nyɛteŋ hu lɛ, hii ni wieɔ nii ni ejaaa aaate shi, ni amɛaakpala kaselɔi lɛ amɛshwie amɛsɛɛ.” (Bɔfoi lɛ Asaji 20:29, 30) Nɔ ni jɛ mli ba ji akɛ, Kristendom tsɔ hemɔkɛyeli kwamɔ nɛɛ nɔ eba shihilɛ mli.

10. Mɛɛ nibii ni ba feɔ lɛ faŋŋ akɛ jeee mɔ fɛɛ mɔ eŋmɛɛ ehe eha Kristendom jamɔ nifeemɔi ni efite lɛ?

¹⁰ Ehe bahia ni mɛi ni etuu amɛhe yɛ anɔkwale mli amɛha jamɔ krɔŋŋ lɛ ‘apele hemɔkɛyeli ni atuu awo krɔŋkrɔŋbii lɛ adɛŋ shikome lɛ he.’ (Yuda 3) Ani jamɔ krɔŋŋ kɛ Yehowa he odase ní ayeɔ lɛ baalaaje yɛ shikpɔŋ lɛ nɔ? Dabi. Beni be ni akɛbaakpata Satan atuatselɔ lɛ kɛ enitsumɔi fɛɛ hiɛ lɛ bɛŋkɛ lɛ, ebafee faŋŋ akɛ jeee mɔ fɛɛ mɔ eŋmɛɛ ehe eha hemɔkɛyeli kwalɔi ajamɔ ni yaa nɔ yɛ Kristendom lɛ. Yɛ afii ohai 19 lɛ naagbee gbɛ, yɛ Pittsburgh, Pennsylvania, U.S.A. lɛ, ato Biblia kaselɔi anɔkwafoi akuu ko he gbɛjianɔ, ni no batsɔ Nyɔŋmɔ ŋmɛnɛŋmɛnɛ beaŋ odasefoi akuu lɛ shishijee. Nɛkɛ Kristofoi nɛɛ gbala jwɛŋmɔ kɛtee Ŋmalɛ naa odaseyeli nɔ akɛ, ŋmɛnɛŋmɛnɛ beaŋ jeŋ gbɛjianɔtoo lɛ naagbee lɛ ebɛŋkɛ. Taakɛ Biblia gbalɛ tsɔɔ lɛ, je nɛɛ “naagbee” lɛ je shishi yɛ afi 1914, ni klɛŋklɛŋ jeŋ ta ni fɛ lɛ ma enɛ nɔ mi. (Mateo 24:3, 7) Odaseyeli ni mli wa waa yɛ ni tsɔɔ akɛ ashɛrɛ Satan kɛ edaimonioi asafoi lɛ kɛjɛ ŋwɛi ashwie shi yɛ nakai afi lɛ sɛɛ. Afii ohai 20 ni mli eyi obɔ kɛ haomɔi sɔŋŋ lɛ yeɔ Satan nifeemɔi kɛ Yesu puemɔ yɛ ŋwɛi Maŋtsɛyeli hewalɛ mli lɛ mlibaa he odase yɛ faŋŋ mli.—Mateo, yitsei 24 kɛ 25; Marko, yitso 13; Luka, yitso 21; Kpojiemɔ 12:10, 12.

11. Mɛni Satan bɔ mɔdɛŋ akɛ ebaafee, shi te eba lɛ tɛŋŋ ni emɔdɛŋbɔɔ lɛ yeee omanye lɛ?

¹¹ Yɛ June 1918 mli lɛ, Satan bɔ mɔdɛŋ waa koni ekpata nakai Biblia kaselɔi, ni no mli lɛ, amɛshiɛɔ yɛ maji srɔtoi amli lɛ hiɛ. Ebɔ mɔdɛŋ hu koni ekpata amɛnitsumɔ ni akɛwo mla shishi, ni ji Watch Tower Bible and Tract Society lɛ hiɛ. Akɛ apasa maŋjwaa he naafolɔmɔi folɔ onukpai ni kwɛɔ Asafo lɛ nɔ lɛ anaa ni awo amɛ tsuŋ taakɛ afee Yesu yɛ klɛŋklɛŋ afii oha lɛ mli lɛ. (Luka 23:2) Shi yɛ afi 1919 mli lɛ, ajie onukpai nɛɛ ni amɛná hegbɛ amɛyatsa amɛsɔɔmɔ nitsumɔ lɛ nɔ. Sɛɛ mli lɛ, aŋmɛɛ amɛhe kwraa.

“Bulɔ” lɛ Damɔ Buuhe Lɛ

12. Namɛi feɔ Yehowa bulɔi akuu loo “bulɔ” lɛ ŋmɛnɛ, ni mɛɛ su amɛná?

¹² No hewɔ lɛ, beni “naagbee be lɛ” je shishi lɛ, Yehowa ná bulɔ kroko, koni ehɛle gbɔmɛi ashi yɛ nifeemɔi ni kɔɔ E-yiŋtoi amlibaa he lɛ ahe. (Daniel 12:4; 2 Timoteo 3:1) Nakai bulɔ kuu—Kristofoi ni afɔ amɛ mu, Nyɔŋmɔ Israel—lɛ miifee nii ni kɛ nɔ ni Yesaia wie yɛ gbalɛ mli bulɔ lɛ he lɛ kpãa gbee kɛbashi ŋmɛnɛ akɛ: “Ni eka etoi, ebo toi jogbaŋŋ. Ni ebo tamɔ jata akɛ: [Yehowa, NW], jenamɔ nɛɛ fɛɛ lɛ midamɔ buuhe lɛ, ni nyɔɔŋnyɔɔŋ fɛɛ lɛ midamɔ mibuu nɔ.” (Yesaia 21:7, 8) Bulɔ ni kɛ hiɛdɔɔ susuɔ enitsumɔ he nɛ!

13. (a) Mɛɛ shɛɛ sane Yehowa bulɔ lɛ ejaje? (b) Abaanyɛ akɛɛ akɛ Babilon Kpeteŋkpele lɛ egbee shi yɛ mɛɛ gbɛ nɔ?

¹³ Mɛni bulɔ nɛɛ naa? Yehowa bulɔ, ni ji edasefoi akuu lɛ tswa adafi ekoŋŋ akɛ: “Egbee shi ee ei! Babel egbee shi! Ni enyɔŋmɔi lɛ amagai lɛ fɛɛ akumɔ ashwie shi!” (Yesaia 21:9) Yɛ Jeŋ Ta I lɛ sɛɛ lɛ, Babilon Kpeteŋkpele, ni ji jeŋ apasa jamɔ maŋtsɛyeli lɛ ji mɔ ni yɛ nɛkɛ be nɛɛ mli lɛ, ajie lɛ yɛ hegbɛ ni eyɔɔ mli lɛ nɔ. (Yeremia 50:1-3; Kpojiemɔ 14:8) Ebɛ naakpɛɛ! Ta Kpeteŋkpele, taakɛ atsɛ lɛ yɛ nakai beaŋ lɛ, je shishi yɛ Kristendom, he ni osɔfoi ni yɔɔ afãi enyɔ lɛ wo mli hewalɛ kɛtsɔ hewalɛ ni amɛwo amɛ oblahii kɛ oblayei lɛ koni amɛya ta lɛ nɔ lɛ. Mɛɛ hiɛgbejianii nɛ! Yɛ afi 1919 mli lɛ, Babilon Kpeteŋkpele lɛ nyɛɛɛ atsĩ Biblia Kaselɔi lɛ, taakɛ atsɛɔ Yehowa Odasefoi yɛ nakai beaŋ lɛ anaa ni amɛkaje shihilɛ ni amɛnyɛɛɛ nɔ ko amɛfee lɛ mli, ni enɛ ha amɛje jeŋ fɛɛ odaseyeli he tafaa ni miiya nɔ lolo kɛbashi bianɛ lɛ shishi. (Mateo 24:14) Enɛ kadi Babilon Kpeteŋkpele lɛ shigbeemɔ, taakɛ Israelbii lɛ ajiemɔ yɛ afii ohai ekpaa D.Ŋ.B. lɛ kadi blema Babilon shigbeemɔ lɛ.

14. Mɛɛ wolo tɛtrɛɛ Yehowa bulɔ kuu lɛ kɛtsu nii babaoo, ni Yehowa ejɔɔ ekɛ nitsumɔ lɛ nɔ yɛ mɛɛ gbɛ nɔ?

¹⁴ Bulɔ kuu lɛ kɛ ekãa kɛ suɔmɔ ni amɛyɔɔ akɛ amɛaafee nɔ ni ja lɛ etsu amɛnitsumɔ lɛ be fɛɛ be. Yɛ July 1879 mli lɛ, Biblia Kaselɔi lɛ je wolo tɛtrɛɛ nɛɛ, ni no mli lɛ ale lɛ akɛ Zion’s Watch Tower and Herald of Christ’s Presence lɛ kalamɔ shishi. Kɛjɛ afi 1879 kɛbashi December 15, 1938 lɛ, akala wiemɔi ni ji “ ‘Bulɔ, Nyɔɔŋ Mɛɛ Be Nɛ?’—Yesaia 21:11”a lɛ, yɛ eko fɛɛ eko ni baa lɛ hiɛ. Buu-Mɔɔ kɛ afii 120 etee nɔ ekɛ anɔkwayeli ebɔ nibii ni etee nɔ yɛ je lɛ mli kɛ bɔ ni amɛkɔɔ gbalɛ he lɛ he amaniɛ. (2 Timoteo 3:1-5, 13) Nyɔŋmɔ bulɔ kuu lɛ kɛ amɛnanemɛi “tooi krokomɛi” lɛ kɛ wolo tɛtrɛɛ nɛɛ etsu nii yɛ ekãa mli amɛkɛjaje amɛtsɔɔ adesai akɛ be ni akɛbaabu Yehowa maŋtsɛyeli lɛ bem kɛtsɔ Kristo Maŋtsɛyeli lɛ nɔ lɛ ebɛŋkɛ. (Yohane 10:16) Ani Yehowa ejɔɔ odaseyeli nɛɛ nɔ? Ojogbaŋŋ, kɛjɛ klɛŋklɛŋ nɔ ni ji ekomekomei 6,000 ni akala yɛ afi 1879 mli lɛ nɔ kɛbaa nɛɛ, Buu-Mɔɔ etee hiɛ kɛyashɛ nɔ ni fe ekomekomei 22,000,000 yɛ wiemɔi 132 mli yɛ jeŋ fɛɛ—ni akalaa enɛɛmɛi amli 121 yɛ be kome mli. Kwɛ bɔ ni eja jogbaŋŋ akɛ esa akɛ Nyɔŋmɔ jamɔ he wolo tɛtrɛɛ ni ajaa fe fɛɛ yɛ shikpɔŋ nɔ lɛ afee nɔ ni wóɔ anɔkwa Nyɔŋmɔ, Yehowa gbɛi nɔ gojoo!

Hetsuumɔ ní Ba Fiofio

15. Mɛɛ hetsuumɔ je shishi fiofio po dani afi 1914 shɛ?

¹⁵ Aaafee afii 40 kɛbashi Kristo ŋwɛi nɔyeli lɛ je shishi yɛ afi 1914 mli lɛ, Biblia Kaselɔi lɛ ye amɛhe kɛjɛ Kristendom tsɔɔmɔi babaoo ni damɔɔɔ Biblia lɛ nɔ lɛ he, tamɔ abifabii abaptisimɔ, adesai asusuma ni gbooo, hetsuumɔhe, hɛl la mli piŋmɔ, kɛ Triniti Nyɔŋmɔ. Shi be kroko he bahia ni akɛtsuu he kɛjɛ susumɔi gbohii nɛɛ fɛɛ he. Ákɛ nɔkwɛmɔnɔ lɛ, yɛ afi 1920 afii lɛ amli lɛ, Biblia Kaselɔi babaoo tsɛɔ tsitsinaa tsɛɛ nii ni afee krɔs kɛ maŋtsɛfai he okadi yɛ nɔ, ni amɛye Blonya kɛ wɔŋjamɔ gbii juji krokomɛi. Shi kɛlɛ, dani amɛjamɔ lɛ aaafee krɔŋŋ lɛ, esa akɛ amɛjie wɔŋjamɔ he kadimɔ nii fɛɛ amɛshwie. Esa akɛ Nyɔŋmɔ Wiemɔ lɛ, ni ji Ŋmalɛ Krɔŋkrɔŋ lɛ afee Kristofoi ahemɔkɛyeli lɛ nɔdaamɔ nɔ titri kɛ amɛshihilɛ gbɛ. (Yesaia 8:19, 20; Romabii 15:4) Eji tɔmɔ akɛ, akɛ nɔ ko aaafata Nyɔŋmɔ Wiemɔ lɛ he loo aaajie nɔ ko kɛaajɛ mli.—5 Mose 4:2; Kpojiemɔ 22:18, 19.

16, 17. (a) Mɛɛ susumɔ ni ejaaa bulɔ kuu lɛ hiɛ mli afii nyɔŋmai abɔ? (b) Mɛni ji “afɔleshaa latɛ” lɛ kɛ “akulashiŋ” ni yɔɔ “Mizraim” lɛ shishitsɔɔmɔ ni ja?

¹⁶ Nɔkwɛmɔnɔ kome baama bɔ ni shishitoo mla nɛɛ he hiaa ha lɛ nɔ mi. Yɛ afi 1886 mli beni C. T. Russell ŋma wolo ko ni abatsɛ lɛ akɛ The Divine Plan of the Ages lɛ, no mli lɛ, nibii ni ato naa yɛ wolo nɛɛ mli ni tsɔɔ akɛ adesai ayinɔsaji kɛ Mizraim Tɛ Tsũ Kpeteŋkpele lɛ yɛ tsakpaa. Asusu akɛ nɛkɛ Farao Khufu kaimɔ nii nɛɛ ji tɛ ni atsĩ tã yɛ Yesaia 19:19, 20 akɛ: “Nakai gbi lɛ nɔ lɛ afɔleshaa latɛ ko aaama Mizraim shikpɔŋ lɛ teŋ aha Yehowa, ni okadi tɛ ko hu aaama ehusui lɛ anɔ aha Yehowa; ni eeetsɔ okadi kɛ odase eha Yehowa Zebaot yɛ Mizraim shikpɔŋ lɛ nɔ.” Mɛɛ wekukpaa baanyɛ ahi tɛ tsũ lɛ kɛ Biblia lɛ teŋ? Ojogbaŋŋ, ákɛ nɔkwɛmɔnɔ lɛ, akɛɔ akɛ abalanaai komɛi ni yɔɔ Tɛ Tsũ Kpeteŋkpele lɛ mli lɛ amli jɛkɛmɔ tsɔɔ be ni “amanehulu kpeteŋkpele” ni yɔɔ Mateo 24:21 lɛ baaje shishi, taakɛ anu shishi yɛ nakai beaŋ lɛ. Biblia Kaselɔi lɛ ateŋ mɛi komɛi kɛ amɛhe wo tɛ tsũ lɛ he nibii komɛi asusumɔ mli vii koni amɛkɛna nibii tamɔ gbi nɔ ni amɛbaaya ŋwɛi!

¹⁷ Ajie bulɛ ni mli kwɔ kpo aha Biblia Tɛ nɛɛ afii pii, kɛyashi be mli ni Watchtower ni je kpo yɛ November 15 kɛ December 1, 1928 lɛ fee lɛ faŋŋ akɛ tɛ kaimɔ nɔ ko ni farao wɔŋjalɔi ema, ni daimonioi okadii ni tsɔɔ ŋulamiiaŋkwɛlɔi yɔɔ mli he ehiaaa Yehowa koni ekɛma odaseyeli ni yɔɔ Biblia lɛ mli lɛ nɔ mi. Shi moŋ, ana akɛ Yesaia gbalɛ lɛ hiɛ mumɔŋ shishinumɔ. Taakɛ eji yɛ Kpojiemɔ 11:8 lɛ, “Mizraim” feɔ Satan je lɛ he mfoniri. ‘Yehowa afɔleshaa latɛ’ lɛ kaiɔ wɔ afɔleshaa ni akpɛlɛɔ nɔ, ni Kristofoi ni afɔ amɛ mu lɛ shãa yɛ be mli ni amɛyɔɔ je nɛɛ mli be kukuoo ko lɛ. (Romabii 12:1; Hebribii 13:15, 16) Okadi tɛ ni ma “[Mizraim] husui lɛ anɔ” lɛ tsɔɔ Kristofoi asafo ni afɔ lɛ mu, ni ji “anɔkwale lɛ akulashiŋ kɛ enɔdaamɔ nɔ,” ni damɔ shi akɛ odaseyeli yɛ “Mizraim,” ni ji jeŋ ni etsɛŋ ni amɛbaashi lɛ.—1 Timoteo 3:15.

18. (a) Yehowa etee nɔ eha saji efee faŋŋ eha anɔkwa Biblia kaselɔi lɛ yɛ mɛɛ gbɛ nɔ? (b) Kɛ Kristofonyo ko na akɛ Ŋmalɛ naatsɔɔmɔ ko shishinumɔ wa kɛha lɛ lɛ, mɛɛ su ni nilee yɔɔ mli esa akɛ ená?

¹⁸ Beni afii lɛ hoɔ lɛ, Yehowa tee nɔ eha anɔkwale lɛ, ni egbalɛ wiemɔ lɛ shishinumɔ ni yɔɔ faŋŋ lɛ fata he lɛ fee faŋŋ. (Abɛi 4:18) Awo wɔ hewalɛ yɛ nyɛsɛɛ afii nɛɛ amli koni wɔku sɛɛ wɔsusu yinɔ ni hoŋ eyaŋ dani naagbee lɛ baaba, gwantɛŋi kɛ abotiai lɛ he abɛbua lɛ, amaŋfɔ nihiinii lɛ kɛ be ni ebaama he krɔŋkrɔŋ lɛ, kpaŋmɔ hee lɛ, tsakemɔ lɛ, kɛ sɔlemɔwe ninaa ni yɔɔ Ezekiel wolo lɛ mli lɛ—kɛ saji krokomɛi—ashishinumɔ ni mli kwɔ lɛ he ekoŋŋ. Ekolɛ ebaawa akɛ wɔɔnu shishinumɔi heei nɛɛ ashishi jogbaŋŋ yɛ bei komɛi amli, shi jwɛŋmɔ ni yɔɔ sɛɛ lɛ bafeɔ faŋŋ yɛ be ni sa mli. Kɛ Kristofonyo ko nuuu ŋmalɛ mli shishitsɔɔmɔ hee ko shishi jogbaŋŋ lɛ, ebaafee jogbaŋŋ akɛ ekɛ heshibaa baawie wiemɔ ni gbalɔ Mika wie lɛ akɛ: “Mamɛ miyiwalaheremɔ Nyɔŋmɔ lɛ.”—Mika 7:7.

19. Shwɛɛnii ni afɔ amɛ mu lɛ kɛ amɛnanemɛi tooi krokomɛi lɛ ejie ekãa ni tamɔ jata nɔ̃ kpo yɛ naagbee gbii nɛɛ amli yɛ mɛɛ gbɛ nɔ?

¹⁹ Kaimɔ akɛ bulɔ lɛ tee nɔ “ebo tamɔ jata akɛ: [Yehowa, NW], jenamɔ nɛɛ fɛɛ lɛ midamɔ buuhe lɛ, ni nyɔɔŋnyɔɔŋ fɛɛ lɛ midamɔ mibuu nɔ.” (Yesaia 21:8) Shwɛɛnii ni afɔ amɛ mu lɛ ejie ekãa ni tamɔ jata nɔ kpo yɛ apasa jamɔ he mama kpamɔ kɛ gbɔmɛi lɛ agbɛ ni etsɔɔ kɛyaa heyeli mli lɛ nɔ. (Kpojiemɔ 18:2-5) Akɛ “tsulɔ anɔkwafo kɛ nilelɔ” lɛ, amɛkɛ Bibliai, woji tɛtrɛbii, kɛ woji krokomɛi ni yɔɔ wiemɔi srɔtoi amli—ni ji ‘ŋmãa yɛ be ni sa nɔ’ eha. (Mateo 24:45) Amɛnyiɛ hiɛ kɛbua “asafo babaoo . . . ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli” lɛ anaa. Akɛ Yesu kpɔmɔ lá lɛ tsuuɔ mɛnɛɛmɛi hu ahe, ni amɛjieɔ amɛhe kpo akɛ mɛi ni tsui tamɔ jata tsui, ni amɛjáa Nyɔŋmɔ “nyɔɔŋ kɛ shwane.” (Kpojiemɔ 7:9, 14, 15) Belɛ, mɛni ji yibii ni Yehowa Odasefoi akuu fioo ni afɔ amɛ mu ni eshwɛ lɛ kɛ amɛnanemɛi, ni ji asafo babaoo lɛ ewo yɛ afi ni eho nɛɛ mli? Wɔ nikasemɔ ni nyiɛ sɛɛ lɛ baatsɔɔ.

[Shishigbɛ niŋmaa]

Ani Okaiɔ?

• Mɛɛ odasefoi Yehowa etee amɛ shi yɛ afii lɛ amli?

• Nɛgbɛ Babilon Kpeteŋkpele lɛ jɛ?

• Mɛni hewɔ Yehowa ŋmɛ gbɛ ni akpata Yerusalem, ni ji maŋtiase ni ji edasefoi amaŋ lɛ hiɛ yɛ afi 607 D.Ŋ.B. lɛ? yɛ afi 70 Ŋ.B. lɛ?

• Mɛɛ mumɔ Yehowa bulɔ kuu lɛ kɛ amɛnanemɛi lɛ ejie lɛ kpo?

[Mfoniri ni yɔɔ baafa 7]

“[Yehowa, “NW”], jenamɔ nɛɛ fɛɛ lɛ midamɔ buuhe lɛ”

[Mfonirii ni yɔɔ baafa 10]

Yehowa bulɔ kuu lɛ kɛ hiɛdɔɔ tsuɔ amɛnitsumɔ lɛ