Bulɔ Lɛ Kɛɛ: “Egbee Shi Eeéi!”a
1. Mɛni hewɔ esa akɛ wɔwaje wɔhe ni wɔpɛi ninaa ni Yesaia yɔɔ kɛha wɔ lɛ mli lɛ?
1 NƆ NI baa yɛ wɔsɛɛ be ni ebɛŋkɛ kpaakpa lɛ he ninaa lɛ mli wa. Nakai ji bɔni gbalɔ Yesaia wie sane lɛ eha wɔ yɛ Asiria Maŋtsɛyeli ni ye nakai je lɛ nɔ lɛ gbii lɛ amli. Ani “ninaa” lɛ “mli wa” tsɔ kɛha wɔ akɛ wɔɔpɛi mli ŋmɛnɛ? Shi kɛlɛ nyɛbaa wɔwajea wɔhe koni wɔnu nɔ ni Yesaia kɛɔ lɛ: “Ajie ninaa ko ni mli wa atsɔɔ mi: Kutumpɔfo lɛ miiye kutumpɔo, ni nihalɔ lɛ miiha nii.” Yes. 21:2, NW.
2. (a) Namɔ ji “nihalɔ” lɛ, ni yɛ mɛɛ gbɛ nɔ? (b) Namɔ he “kutumpɔo” eye titri lɛ, ni mɛni hewɔ?
2 Eyɛ mli akɛ atsiii mɔ ni jeɔ kpo waa yɛ enɛ mli, ni ji “kutumpɔfo” lɛ ta moŋ, shi anyɛɔ aleɔ lɛ. Enɛ ji blema Babilon ni bafee Jeŋ Hewalɛ ni ji Etɛ lɛ. Ebaafee mɔ ni ahiɔ waa yɛ ha ni eha Yerusalem maŋtiase lɛ hewɔ, ni eha Yehowa sɔlemɔwe lɛ ni yɔɔ jɛmɛ lɛ krɔŋkrɔŋ fe fɛɛ lɛ mli nii po. Yɛ anɔkwale mli lɛ, Yehowa kɛ Babilon maŋtsɛ Nebukadnezar tsu nii akɛ ‘etsulɔ’ koni ekɛgbala Yuda maŋtsɛyeli lɛ toi moŋ, shi Babilon kɛ kutumpɔo tsu Yehowa kpaŋmɔ bii lɛ ahe nii. Eŋmɛɛɛ Yudafoi ni yɔɔ nom mli lɛ agbɛ ni amɛya shikpɔŋ ni Nyɔŋmɔ kɛha amɛ lɛ nɔ kɔkɔɔkɔ, eyɛ mli akɛ be lɛ miihe aye afii 70. (Yes. 14:3-17) Mɔ ni ye Babilon Maŋtsɛyeli lɛ nɔ kunim lɛ ji mɔ ni gbele gbɛ kɛha nakai “gboklɛfoi” lɛ koni amɛya shia yɛ afi 537 D.Ŋ.B. Belɛ eja gbɛ akɛ “ninaa” ni akɛha Yesaia ni ji bulɔ lɛ ‘mli aaawa’ yɛ Babilon, mɔ ni haa jeŋmaji lɛ, titri lɛ mɔ ni ha Yesaia Nyɔŋmɔ lɛ webii lɛ nɔ.
3. Ni “kutumpɔfo” kɛ “nihalɔ” ni Babilon fa ni yɔɔ ŋmɛnɛŋmɛnɛ beaŋ lɛ ji lɛ hu?
3 Ni blema Babilon fa ni yɔɔ ŋmɛnɛ lɛ hu? Yɛ bɔni ekɛ nakai Kristofoi lɛ ni kɛ Yehowa yɔɔ kpaŋmɔ wekukpaa mli lɛ eye eha lɛ hewɔ lɛ, lɛ hu eji kutumpɔfo yɛ tsɔɔmɔi ni kɔɔɔ Kristojamɔ he lɛ mli. Ekɛ yiwalɛ eha nɛkɛ Kristofoi nɛɛ yɛ Nyɔŋmɔ kitai lɛ anɔ ni amɛyeɔ ni amɛtsuɔ odaseyeli nitsumɔ ni kɔɔ Maŋtsɛ Yesu Kristo ni ta sɛi nɔ lɛ he lɛ hewɔ. (Kpoj. 12:17) Kristendom ji mɔ ni enyiɛ nɛkɛ gbɛjianɔtoo ni akɛyeɔ kutumpɔo ni akɛhaa nii nɛɛ hiɛ, titri lɛ kɛjɛ Jeŋ Ta I gbii lɛ amli. Lɛ titri ji mɔ ni baanu “ninaa ni mli wa” lɛ mli hewalɛ lɛ he waa yɛ be mli ni ahãa ebaa mli yɛ ŋmɛnɛŋmɛnɛ beaŋ jeŋ apasa jamɔ maŋtsɛyeli, Babilon kpeteŋkpele lɛ nɔ lɛ. Shi namɔ Yehowa kɛlɛ baatsu nii koni ehã nakai “ninaa ni mli wa” lɛ aba mli diɛŋtsɛ yɛ be kukuoo nɛɛ mli?
4. Namɛi atsɛ amɛ yɛ Yesaia 21:2 akɛ amɛyatutua Babilon lɛ ni mɛni hewɔ ni etsiii Persiabii lɛ ata yɛ biɛ?
4 Yesaia kɛ nɔ ni abaadamɔ nɔ aha nakai hetoo lɛ ha yɛ be mli ni etee nɔ ekɛɛ akɛ: “Elam, ba! Media, baabɔ nsra owo ehe! Maha amɛkɛ̃ɛmɔ fɛɛ sɛɛ afo.” (Yes. 21:2) Elam ka Tigri Faa lɛ bokagbɛ ni ebafee nɔ ni atsɛɔ lɛ akɛ Persia lɛ fa, ni ŋmɛnɛ Iran hiɛ nakai shikpɔŋkukub lɛ. Media ji nɔ ni da ni eka Mesopotamia jɔɔ lɛ bokagbɛ. Yesaia gbalɛ lɛ sɛɛ afi 200 lɛ, Koresh (11) kpeteŋkpele lɛ ye Mediabii lɛ anɔ kunim ni eha Persia Maŋtsɛyeli lɛ bana hegbɛ yɛ Media nɔ. Shi kɛlɛ, enyɛ lɛ, Medianyo ni, ni esraafoi lɛ ateŋ mɛi pii ji Mediabii. Nɛkɛ Koresh nɛɛ ji Cyrus, aloo Koresh ni Yesaia gba ehe sane efɔ shi yɛ Nyɔŋmɔ mumɔ lɛ tsirɛmɔ naa lɛ. (Yes. 44:28 kɛyashi 45:7) Beni Yesaia gbaa lɛ no mli lɛ Media kɛ Persia Maŋtsɛyeli lɛ pueko, no hewɔ lɛ aleee Persiabii lɛ. No hewɔ lɛ Elam kɛ Media ji mɛi ni Yehowa kɛ amɛgbɛi tsɛ amɛ koni amɛyatutua Babilon.
5. Yɛ mɛɛ gbɛ nɔ Yehowa ha “amɛkɛɛmɔ fɛɛ” sɛɛ fo, ni ani amɛha “gboklɛfonyo” lɛ ye ehe koni eya shia?
5 Ani nakai tualɔi lɛ baaye omanye ni amɛtsake saji yɛ Asia wuoyi-anai gbɛ yɛ Boka Teŋgbɛ lɛ? Hɛɛ! Yesaia wiemɔi ni nyiɛ sɛɛ lɛ tsɔɔ nakai: “Maha amɛkɛ̃ɛmɔ fɛɛ sɛɛ afo.” “Yehowa Zebaot” diɛŋtsɛ, jeŋ muu fɛɛ Nuntsɔ lɛ wiemɔi nɛ. Etsa Elam kɛ Media ni ekɛ amɛ atsu nii akɛ enajiaŋdamɔlɔi lɛ nɔ ehã “amɛkɛ̃ɛmɔ fɛɛ” ni Babilon yiwalɔ lɛ kɛba lɛ sɛɛ fo. Yɛ faikpamɔ ni amɛkɛfɔ Yehowa Nyɔŋmɔ hiɛ kɛha kpɔmɔ kɛmiijɛ amɛnɔ kunimyelɔi ni amɛbuuu Israelbii lɛ ahe akɔntaa akɛ amɛaakpɔtɔ po yɛ amɛgboklɛfoi ashihilɛ mli ni amɛyɔɔ lɛ hewɔ lɛ, eha lalatsɛ lɛ ni mumɔ yɔɔ enɔ lɛ kɛɛ akɛ: “Ha gboklɛfonyo ŋtsɔidɔɔmɔ lɛ aba ohiɛ; baamɔ gbelebii lɛ ayi yɛ ohewalɛ lɛ dalɛ naa.” (Lala. 79:11-13; Yes. 14:17) Aha nɛkɛ sɔlemɔ nɛɛ hetoo yɛ Yudafoi lɛ ni yɔɔ nom mli yɛ Babilon lɛ anomŋɔɔ afi ni ji 70 lɛ nɔ kɛtsɔ akpɔ ko ni Koresh kpeteŋkpele lɛ wo lɛ nɔ.—Yes. 35:8-10.
Bɔni Mɛi Fee Amɛnii Amɛha Yɛ Babilon Shigbeemɔ Lɛ He
6, 7. Yesaia tsoɔ nɔ ni jɛ Babilon shigbeemɔ lɛ mli ba mɛi ni enɛ na amɛnɔ hewalɛ waa lɛ mli yɛ mɛɛ gbɛ nɔ?
6 Jeŋ Hewalɛ ni ji Etɛ lɛ shigbeemɔ yɛ 539 D.Ŋ.B. ni he ba sɛɛnamɔ kɛha Israel shikpɔŋ bibioo lɛ ji nɔ ko ni yɛ anɔkwale mli lɛ ewa akɛ aaahe aye. Ekɛ tsakemɔ kpele ba yɛ jeŋ yinɔsane mli. Aŋkroaŋkroi ani nɛkɛ Maŋtsɛyeli ni yɔɔ “ŋshɔnaa ŋa” nɔ lɛ shigbeemɔ sa amɛhe lɛ baapii waa. Nɔ ni jɛ enɛ mli ba nɛkɛ gbɔmɛi nɛɛ anɔ lɛ ji nɔ ko ni Yesaia wiemɔi lɛ feɔ he mfoniri yɛ be mli ni egbaa “ninaa ni mli wa” lɛ he sane lɛ, akɛ:
7 “No hewɔ lɛ mihɛ mli eyi obɔ kɛ piimɔ; kɔɔmɔ eta mihe tamɔ yoo ni baafɔ kɔɔmɔ; mishɔ kwekweekwe hewɔ lɛ minuuu nii; mijijaa, hewɔ lɛ minaaa nii. Mitsui miitswa kpalakpala, ŋmiŋmi emɔ mi; hiɛbulɛ ni mishweɔ lɛ etsɔ hekpokpomɔ eha mi.”—Yes. 21: 3, 4
8. Mɛni ji nɔ ni wiemɔi ni Yesaia kɛtsɔɔ nibii amli lɛ feɔ he nɔkwɛmɔnɔ yɛ jamɔ mli hiɛnyiɛlɔi ni yɔɔ Kristendom kɛ wɔŋjamɔ mli Iɛ ahe yɛ jeŋ apasa Jamɔ maŋtsɛyeli lɛ shigbeemɔ mli?
8 Nakai wiemɔi ni akɛtsɔɔ saji ni kɔɔ Jeŋ Hewalɛ ni ji Etɛ kutumpɔfo lɛ shigbeemɔ mli lɛ hu feɔ bɔni enɛ baahoso jeŋ jamɔ gbɛjianɔtoo muu lɛ fɛɛ yɛ be mli ni Babilon fa ni yɔɔ ŋmɛnɛ lɛ hu gbeɔ shi lɛ he mfoniri. Enɛ baaye mfoniri-feemɔ mli Babilonbii ni yɔɔ ŋmɛnɛ lɛ ajamɔ henumɔi awui waa fe wiemɔ ni wa ni amrɔ nɛɛ Yehowa Odasefoi jajeɔ yɛ “naagbee be” nɛɛ mli kɛjɛ afi 1914 kɛba nɛɛ. (Dan. 12:4) Kristendom kɛ wɔŋjamɔ kui lɛ amli osɔfoi kɛ amɛ onukpai aaatɔ mu ni amɛnaa aaakpɛ amɛhe tamɔ nɔ ni amɛnaaa aloo amɛnuuu nɔ ni yaa nɔ lɛ. Amɛtsui baatswa kpalakpala, amɛbɛ hejɔɔmɔ, amɛnyɛɛɛ amɛkɛ amɛhe afɔ nyɔŋmɔi ni be ko lɛ amɛja amɛ lɛ anɔ dɔŋŋ. Shihilɛ ni yɔɔ gbeyei ni aaaha mɔ he akpokpo kɛ gbeyeishemɔ waa, titri lɛ yɛ amɛjamɔ mli osatofeemɔ ni akpa he mama lɛ hewɔ. “Hiɛbulɛ” ni baa kɛ hejɔɔmɔ kɛ hejɔlɛ shiwoo yɛ be mli ni akpa gbi muu lɛ nitsumɔ lɛ baafee duŋwoo be kɛ hekpokpomɔ aha amɛ. Be ni amɛkɛ lakaa ni amɛkɛnyɛɔ gbɔmɛi ni yɔɔ amɛjamɔ gbɛjianɔtooi lɛ amli lɛ anɔ lɛ baaba naagbee kɛ hegbeyeiwoo. Amɛbaakɔmɔ tamɔ yei ni hiɛ amɛhɛ mli yɛ fɔmɔ kɔɔmɔ ni waa amɛhe lɛ hewɔ.
9. Nikwɛmɔ ni ejie Iɛ kpo atsɔɔ Yesaia lɛ tsake trukaa yɛ mɛɛ famɔ ni jɛ Yehowa ŋɔɔ lɛ hewɔ?
9 Trukaa ni nɔ ni yaa nɔ ni ajie lɛ kpo atsɔɔ gbalɔ Yesaia lɛ tsake tamɔ nikwɛmɔhe ko nifeemɔ tsakemɔ. Enu famɔ ni jɛ Yehowa ŋɔɔ lɛ: “Amɛŋmɛ okpɔlɔ, amɛto bulɔi, amɛmiiye nii, amɛmiinu dãai. Nyɛ lumɛi, nyɛtea shi, nyɛfɔa tsɛŋ lɛ mu! Ejaakɛ bɔni Nuntsɔ [Yehowa] lɛ kɛɛ mi nɛ.”—Yes. 21:5, 6.
10. Mɛni ji nɔ ni nakai ŋwɛi famɔ lɛ tsɔɔ, ni mɛɛ be mli sane ni ajie kpo atsɔɔ lɛ shɛ heni ehiii kwraa yɛ Yehowa Nyɔŋmɔ he guɔ ni agbe lɛ mli?
10 Enɛ tsɔɔ bɔni shihilɛ lɛ yɔɔ yɛ Babilon maŋtsɛwe lɛ yɛ jeŋ nɔyeli lɛ naagbee gbɛkɛ lɛ mli kuku. Etsɔɔ Belshazar, Maŋtsɛ Nabonido ni bɛ jɛmɛ lɛ binuu lɛ okpɔlɔŋmɛɛ lɛ mii tamɔ mfoniri ko. Aŋmɛ okpɔlɔ ni ato sɛii babaoo aha Babilon abladei akpe ni baa lɛ. Aye nii ni anu nii kɛ miishɛɛ Shi enɛ kwɔ kɛshɛ heni ajie bulɛ ko kwraa ni abɛ kɛha Yehowa Nyɔŋmɔ lɛ kpo, yɛ be mli ni amɛje shishi amɛkɛ esɔlemɔwe lɛ ni hi shi aahu kɛyashi be mli ni Babiloniabii lɛ ŋɔ Yerusalem ni amɛkpata sɔlemɔwe lɛ hiɛ lɛ mli nibii lɛ bɔi niyeli kɛ ninumɔ.
11. Mɛni Yehowa tsɔ naakpɛɛ gbɛ nɔ efee yee yɛ Beshazar okpɔlɔŋmɛɛ ni he ebule lɛ shishi, ni yɛ mɛɛ gbɛ nɔ Daniel tsu nii akɛ wiemɔ shishitsɔɔlɔ yɛ nakai be lɛ mli?
11 Agbɛnɛ Belshazar okpɔlɔŋmɛɛ lɛ bafee nɔ ni he ebule, ejaakɛ ekɛ Yehowa ba shihilɛ lɛ mli. Etsɔ naakpɛɛ gbɛ nɔ eha nine ko ŋma nii yɛ asa ni aŋmɛ okpɔlɔ yɛ nɔ lɛ gbogbo lɛ he, heni maŋtsɛ lɛ baanyɛ ana wiemɔi lɛ, akɛ: “Mene, mene, tekel, urfasin.” Beni afee ni anu nakai wiemɔi ni aleee eshishinumɔ lɛ shishi lɛ, ehe bahia ni atsɛ Yudanyo gbalɔ Daniel ni atswa enaneshi tu lɛ kɛba. Ninenaa niŋmaa lɛ naagbee wiemɔ, urfasin lɛ ji Kaldeabii awiemɔ perea ni damɔ shi kɛha nɔ ni fa, ni eshishi ji “mlijaai.” No hewɔ lɛ, yɛ eshishitsɔɔmɔ ni ejɛ mumɔ mli ekɛha lɛ naa lɛ, Daniel kɛɛ akɛ: “PERES, aja omaŋtsɛyeli lɛ mli, ni aŋɔ ha Mediabii kɛ Persiabii.”—Dan. 3:28.
12. Mɛni ji “Tsɛŋ” ni esa akɛ lumɛi lɛ afɔ he mu lɛ, ni mɛni ji nɔ ni famɔ akɛ afɔ “tsɛŋ” ni tamɔ nɛkɛ he mu lɛ tsɔɔ?
12 Nyɛ nyɔmɔwoo mli lɛ, akɛ odehei atade wo Daniel ni “etsɔ nɔyelɔ mɔ ni ji etɛ” yɛ maŋtsɛyeli lɛ mli. Shi enɛ jeee Yehowa famɔ kɛha Babilon abladei lɛ akɛ: “Nyɛ lumɛi nyɛtea shi, nyɛfɔa tsɛŋ lɛ mu” lɛ mlibaa. (Yes. 21:5) Ni enɛ jeee famɔ kɛha lumɛi lɛ akɛ amɛfɔ amɛtawuu tsɛŋi lɛ hu mu ni amɛkɛ mɛi ni ebawo Babilon he ka lɛ ayawuu) Shi moŋ, wiemɔ “tsɛŋ” lɛ damɔ shi kɛha maŋ lɛ nɔ maŋtsɛ lɛ. (Okɛto Lala 89:19 he.) Belɛ famɔ akɛ “nyɛfɔa tsɛŋ lɛ mu” lɛ tsɔɔ mɛni? Enɛ akɛ be eshɛ ni abaagbe Maŋtsɛ Belshazar, ni enɛ kɛ hegbɛ lɛ baaba akɛ mɔ kroko abatsɔ ‘nɔyelɔ mɔ ni ji enyɔ’ yɛ Babilonia Maŋtsɛyeli lɛ mli. Shi nɛkɛ Okadi “tsɛŋ” hee ni awoɔ lɛ kɛtsɔɔ mutɔɔ nɔ nɛɛ baaa mli. Belshazar awuyeli gbele lɛ gbeleee gbɛ kɛhaaa sɛɛyelɔ kroko ni ji odehe yɛ eweku lɛ mli.
13. No hewɔ lɛ ani famɔ ni akɛha yɛ Yesaia 21:2 lɛ fee efolo, ni ani gbɛhe hee ni Daniel ena lɛ tsa nɔ kɛbote nɔyeli hee lɛ be lɛ mli lo?
13 Daniel 5:30–6:1 kɛɔ akɛ: “Shi nakai nyɔɔ lɛŋ nɔŋŋ agbe Kaldeabii amaŋtsɛ Belshazar lɛ. Ní Dario, Medianyo lɛ, ŋɔ maŋtsɛyeli lɛ beni eye afii nyɔŋmai ekpaa kɛ enyɔ lɛ.” Mɛɛ tsakemɔ ni ba trukaa yɛ jeŋ maŋkwramɔ saji amli nɛ! Yehowa famɔ ni ekɛha lɛ efeee efolo: “Elam, ba Media, baabɔ nsra owo ehe!” (Yes. 21:2) Beni Babilon gbeɔ shi yɛ Mediabii lɛ kɛ Persiabii lɛ ahiɛ pɛ kɛkɛ ni Dario, Medianyo lɛ ŋɔ ‘nɔyelɔ mɔ ni ji enyɔ’ gbɛhe lɛ yɛ Babilon. Gbɛhe he ni akɛha Daniel ni ji “nɔyelɔ mɔ ni ji etɛ” yɛ Babilonia lɛ boteee Media kɛ Persia nɔyeli lɛ mli. Shi agbeee Daniel afataaa Belshazar he.
14. Mɛni blema Babilon shigbeemɔ lɛ tsɔɔ, ni te enɛ baasa mɛi ni yɔɔ mli lɛ ahe aha tɛɛŋ?
14 Blema Babilon shigbeemɔ ni yɔɔ naakpɛɛ lɛ tsɔɔ eŋmɛnɛŋmɛnɛ beaŋ fa ni yɔɔ, Babilon kpeteŋkpele lɛ shigbeemɔ ni baaba trukaa. Ebaati je lɛŋ nyɔŋmɔi ajalɔi ashi trukaa. Kɛji akɛ mɛi ni heɔ jeŋ apasa jamɔ maŋtsɛyeli lɛ amɛyeɔ akɛ anyɛŋ aye enɔ kunim lɛ kpaaa ashigbeemɔ gbɛ trukaa lɛ, belɛ abaahelɛ amɛ shi yɛ gbɛ fɔŋ nɔ trukaa kɛjɛ amɛ shikpilikpiifeemɔ lɛ mli.
Nɔ Ni Esa Akɛ Bulɔ Lɛ Abɔ He Amaniɛ
15. Famɔ ni akɛha yɛ Belshazar okpɔlɔŋmɛɛ lɛ gbalɛ mlitsɔɔmɔ Iɛ sɛɛ lɛ tsɔɔ mɛni yɛ blema Babilon kɛ eŋmɛnɛŋmɛnɛ beaŋ fa ni yɔɔ lɛ he?
15 Belɛ mɛni hewɔ Yesaia tsɔ hiɛ ekɛ nɔ ni ba Belshazar okpɔlɔŋmɛɛ lɛ shishi yɛ nakai gbɛkɛ ni yɔɔ mɔbɔ yɛ afi 539 D.Ŋ.B. lɛ he ninaa ha wɔ? Eje nɔ ni baanyiɛ sɛɛ aba lɛ hewɔ, ni ji akɛ, nakai afii oha lɛ mli nii ni baaba ni soro no kwraa lɛ he amaniɛ ni eeebɔ Yehowa webii ni ekɛ amɛ yɔɔ kpaŋmɔ mli lɛ, koni amɛnya yɛ “kutumpɔfo” lɛ shigbeemɔ lɛ hewɔ. Yesaia 21:5, 6 tsɔɔ nɔ ni baanyiɛ Babilon shigbeemɔ lɛ sɛɛ aba akɛ: “Nyɛ lumɛi, nyɛtea shi, nyɛfɔa tsɛŋ lɛ mu! Ejaakɛ bɔni Nuntsɔ lɛ kɛɛ mi nɛ: Yaa ni oyato bulɔ: nɔ ni enaa lɛ, ha ejaje.” Hɛɛ abaatswa nɔ ni ba lɛ he adafi yɛ jeŋ fɛɛ! Nakai nɔŋŋ hu esa akɛ Babilon kpeteŋkpele lɛ shigbeemɔ lɛ afee sane titri ni esa akɛ ale yɛ jeŋ fɛɛ!
16. Mɛni ji nɔ ni abaanyɛ akɛɛ yɛ “bulɔ” ni ato yɛ blema Babilon sane lɛ kɛ nɔ ni ato yɛ Babilon kpeteŋkpele le he lɛ he?
16 Yesaia ji mɔ ni akɛɛ lɛ akɛ eyato “bulɔ” lɛ koni ebɔ nɔ ni ebaana lɛ he amaniɛ. Yesaia ehiii wala mli koni ekɛ ehiŋmɛi ana nɔ ni ogba he sane efɔ shi ni eŋma efɔ shi kɛha wɔ lɛ. ‘No hewɔ lɛ esa akɛ mɔ kroko ni jɛ Yesaia diɛŋtsɛ webii lɛ ateŋ atsu nii akɛ bulɔ. Áto bulɔ ko ni tamɔ nakai nɔŋŋ yɛ Babilon kpeteŋkpele lɛ shigbeemɔ ni baa yɛ gbii ni yɔɔ shɔŋŋ lɛ amli. Nɛkɛ bulɔ nɛɛ bafee kuu ko ni akɛ Yehowa mumɔ lɛ efɔ amɛ mu, kuu ko ni ale amɛ kɛ Wolo tɛtrɛɛ ni egbɛi ‘ji’ Buu-Mɔɔ lɛ. Odaseyeli lɛ yɛ ni tsɔɔ akɛ Yehowa Nyɔŋmɔ etsɔ Yesu Kristo nɔ ehala nakai “bulɔ” kuu lɛ. Esɔmɔ yɛ nakai gbɛhe lɛ mli aahu kɛbashi nɛkɛ “nyɔɔŋ” ŋmlɛtswaa ni tsɔɔ nɔ ko ni baaba ni emli duŋ lɛ miihã jeŋ muu lɛ fɛɛ nɔ nɛɛ mli. (Mat. 24:45-47) Agbɛnɛ mɛni ji nɔ ni wɔbaakpa gbɛ akɛ nɛkɛ “bulɔ” nɛɛ baakɛɛ wɔ yɛ be ni sa mli?
17. Mɛni “bulɔ” ni ato lɛ na, ni enɛ damɔ shi kɛha mɛni?
17 Yesaia gbalɛ ni kɔɔ “bulɔ” lɛ he lɛ yaa nɔ ekɛɔ akɛ: “Ni ena shwiilii, okpɔŋɔianɔtsɛmɛi enyɔnyɔ, shwiilii kɛ tejii, kɛ shwiilii kɛ yomai; ni eka etoi, ni ebo toi jogbaŋŋ.” (Yes. 21:7) Eka shi faŋŋ akɛ Persia okpɔŋɔianɔtsɛmɛi ni he yɔɔ oya gbalaa nakai shwiilii lɛ ni baa kɛ foi lɛ, ni amɛmiiba kɛmiijɛ heni “ŋshɔnaa ŋa” [ni aye nɔ kunim] lɛ yɔɔ lɛ. Eka shi faŋŋ akɛ ta-shwiilii ni amɛto kɛmiiba fata he. Ta-shwiilii ni tejii gbalaa Iɛ damɔ shi kɛha Media tabilɔi ni yɔɔ Dario, Medianyo lɛ shishi lɛ. Ta-shwiilii ni kooloi ni dara lɛ gbalaa, yomai lɛ ni joɔ foi fe okpɔŋɔi lɛ damɔ shi kɛha Persia tabilɔi ni yɔɔ Koresh Kpeteŋkpelec lɛ shishi lɛ. Yɛ anɔkwale mli lɛ, nɛkɛ Persianyo nɛɛ ji tatsɛnukpa ni Mediabii kɛ Persiabii atai lɛ fɛɛ yɔɔ efɔmɔ shishi. Jeee Dario, Medianyo lɛ, shi moŋ Koresh Persianyo lɛ ji kunimyelɔ ni Yehowa tsɔ Yesaia nɔ ekɛɛ akɛ ekɛ egbɛi diɛŋtsɛ baatsɛ lɛ lɛ. Yehowa Nyɔŋmɔ baagbele Babilon akɔɔble agboi kɛ shinai lɛ aha nɛkɛ Koresh nɛɛ koni etsɔ Eufrate Faa ni egbi lɛ mli ni ekɛyabote Babilon maŋ ni atswa gbogboi ni dara awo he lɛ mli.—Yes. 44:27 kɛyashi 45:4; Okɛto Daniel 8:1-4, 20 he.
18. Taakɛ Yesaia 21:8, 9 tsɔɔ lɛ, mɛɛ “bulɔ” nɛkɛ mɔ ni akɛ lɛ to buuhe lɛ baaji, ni ani eba mli nakai?
18 Akɛ bulɔ lɛ, mɛɛ anɔkwayeli kɛ heni anyɛɔ akɛ he fɔɔ nɔ nɛkɛ buuhe nɛɛ aaanyɛ aji? Yesaia 21:8, 9 tsɔɔ mli kɛ nɛkɛ wiemɔi nɛɛ: “Ni ebo tamɔ Jata akɛ: Nuntsɔ, Jenamɔ nɛɛ fɛɛ lɛ midamɔ buuhe lɛ, ni nyɔɔŋnyɔɔŋ fɛɛ lɛ midamɔ mibuu nɔ. Ni naa, shwiilii kɛ gbɔmɛi kɛ okpɔŋɔiatsɛmɛi enyɔnyɔ miiba!” Eshi kpe, ni edamɔ ebuuhe lɛ aahu kɛyashi be mli ni ehiŋmɛii ni gbuɔ shi kɛnaa nibii amli lɛ na nɔ ni ebu aahu ni etɔɔɔ lɛ koni ena lɛ. Nakai nɔŋŋ hu “bulɔ” kuu ni yɔɔ ŋmɛnɛ lɛ hii ebo waa tamɔ Jata ni sheee gbeyei yɛ nitsumɔ ni Nyɔŋmɔ kɛwo edɛŋ kɛtsɔ Buu-Mɔɔ wolo tɛtrɛɛ lɛ kɛ teokrase lɛ he wolo krokomɛi kɛ maŋshiɛmɔi ahe nii ni amɛtsuɔ lɛ nɔ lɛ mli. Ebaatsɔ Yehowa hewalɛ ni nɔ gbɔɔɔ lɛ nɔ eya nɔ efee nakai kɛyashi be mli ni eeenyɛ etswa adafi ni Jeeŋmɔ beebe ajɛ ataoɔ anu lɛ.
19. Mɛni tsɔɔ kɛji akɛ bulɔ lɛ nu ta-shwiilii ni baa lɛ shishi diɛŋtsɛ yɛ gbɛ ni ja nɔ.
19 Bulɔ lɛ nii nɔ ni ta-shwiilii ni ena ni miiba yɛ buu-mɔɔ ni odamɔ nɔ lɛ tsɔɔ lɛ shishi Taakɛ be ni Yehowa eto lɛ ji lɛ—afii 70 amaŋfo-feemɔ kɛha Yuda shikpɔŋ lɛ—ni taakɛ gbalɛi ni Daniel ni atswa enaneshi tu lɛ kɛha yɛ Belshazar okpɔlɔŋmɛɛ ni he ebule yɛ afi 539 D.Ŋ.B. lɛ shishi lɛ tsɔɔ lɛ, bulɔ lɛ abaanyɛ atsɔɔ nɔ ni shwiilii ni jeee Babilonbii anɔ lɛ baa ni nɔ ko etsiii amɛ gbɛ lɛ shishi tsɔɔ yɛ anɔkwale mli. Ni Yesaia 21:9b kɛɔ akɛ, “Ni ehere nɔ ekɛɛ: Egbee shi eeei! Babel egbee shi! Ni enyɔmɔi lɛ amagai lɛ fɛɛ akumɔ ashwie shi!”
20. Mɛni hewɔ jeee Yudafoi ni yɔɔ nom mli yɛ Babilon lɛ kumɔ enyɔŋmɔi lɛ amagai lɛ ni nɔmɔ ji mɔ ni kumɔɔ amaga lɛ?
20 Mɔ ni kumɔɔ amaga ni awieɔ ehe yɛ biɛ lɛ ji Yehowa, anɔkwa Nyɔŋmɔ hiɛkalɔ kome lɛ. Nyɔŋmɔ awuŋayelɔ lɛ, aloo “Nyɔŋmɔ ni biɔ he ni atuɔ ahaa ekometoo.” (2 Mose 20:5, NW) Akɛni ehã Mediabii kɛ Persiabii ni jaaa Babilon nyɔŋmɔi lɛ ye enɔ kunim hewɔ lɛ, Yehowa tsɔɔ bɔni Jeŋ Hewalɛ ni ji Etɛ lɛ nyɔŋmɔi ni ji amagai lɛ ji amale ha, ni amɛbɛ shihilɛ mli. Jee Yudafoi ni yɔɔ nom mli yɛ Babilon lɛ te shi ni amɛtse atua ni no ha abutu Jeŋ Hewalɛ ni ji Etɛ lɛ; Yehowa amɛnyɔŋmɔ lɛ kɛ hewalɛ loo famɔ ko haaa amɛ ni amɛfee nakai. Shi moŋ, ekɛ Dario ni ji Medianyo lɛ kɛ Koresh ni ji Persianyo lɛ tsu nii koni amɛkɛ wɔŋjalɔ Babilon ni ji jeŋ hewalɛ lɛ shigbeemɔ aba. (Dan. 2:32, 36-38) No hewɔ lɛ jee “bulɔ” lɛ ji mɔ ni ha “kutumpɔo” Babilon gbee shi. Eye oshigbeemɔ lɛ he odase kɛkɛ, koni ekɛbu Yehowa akɛ gbalɛ Nyɔŋmɔ kɛ jeŋ muu fɛɛ Nuntsɔ lɛ bem.
21. Mɛɛ adafitswaa ni tamɔ nɔ ni “bulɔ” ni yɔɔ Yesaia gbalɛ lɛ mli lɛ kɛha lɛ yɔɔ lolo ni akɛbaaha?
21 Agba afɔ shi akɛ be eshɛ ni abaatswa adafi ko ni he hiaa jeŋ muu fɛɛ tamɔ Yesaia gbalɛ lɛ mli “bulɔ” lɛ nɔ̃ lɛ yɛ wɔ diɛŋtsɛ wɔbe nɛɛ mli. Kristofonyo bɔfo Yohane ni hi shi aahu kɛyashi klɛŋklɛŋ afii oha lɛ naagbee lɛ na mɔ ni baatswa adafi lɛ he ninaa ni eŋma akɛ: “Mina bɔfo kroko miikpeleke shi kɛmiijɛ ŋwɛi, ni eyɛ hegbɛ kpeteŋkpele, ni enunyam lɛ ha shikpɔŋ lɛ nɔ tse; ni ekɛ̃ ehe shi ekɛ gbee wulu bo ekɛɛ: Ejwa, Babilon Kpeteŋkpele lɛ ejwa, ni etsɔ daimonioi ashihilɛhe, kɛ mumɔi fɔji fɛɛ atsu, kɛ loofɔlɔ fɛɛ loofɔlɔ ni he tseee ni he yɔɔ taŋ hu tsu.”—Kpoj. 18:1, 2.
22. Namɔ kumɔɔ Babilon Kpeteŋkpele lɛ ni etsɔɔ amaŋfɔ koikoi lɛ, ni mɛɛ dɛŋdade ekɛbaatsu enɛ he nii?
22 Koresh Kpeteŋkpele lɛ, Nuntsɔ Yesu Kristo ni awo ehiɛ nyam lɛ ji Mɔ ni haa Babilon Kpeteŋkpele lɛ shigbeemɔ diɛŋtsɛ lɛ baa, koni etsɔ amaŋfɔ ni atsɔɔɔ jɛmɛ. Ŋmɛnɛ, Yehowa Odasefoi Kristofoi lɛ baanyɛ ashiɛ kɛkpa jeŋ muu lɛ fɛɛ mli bɔni amɛbaanyɛ yɛ Yehowa maŋtsɛyeli lɛ kɛ oweletɔɔ gbi ni eto lɛ he. Shi enɛ nyɛŋ ekɛ jeŋ apasa jamɔ maŋtsɛyeli lɛ shigbeemɔ aba kɔkɔɔkɔ Amɛkɛ tsuiyeli miimɛ be ni amɛkɛbaashiɛ adafitswaa ni kɔɔ Babilon Kpeteŋkpele lɛ shigbeemɔ he lɛ. (Kpoj. 18:2) Akɛni Koresh Kpeteŋkpele lɛ kɛ kaselɔi ni diɔ toiŋjɔlɛ sɛɛ yɛ shikpɔŋ nɔ lɛ tsuuu nii koni ekɛbutu Babilon Kpeteŋkpele lɛ hewɔ lɛ Kpojiemɔ, yitso 17 lɛ tsɔɔ akɛ ekɛ najiaŋdaamɔ nɔ̃ ko ni tamɔ kooloo baatsu nii; afee ehe mfoniri akɛ ‘kooloo ko ni tsuɔ tamɔ muneele, kooloo ni yɔɔ akolontoi 10. Eyitsei kpawo lɛ feɔ jeŋ hewalɛi kpawo yɛ Biblia yinɔsane mli lɛ ahe mfoniri. Nɛkɛ afii ohai 20 nɛɛ mli mfoniri-feemɔ mli kooloŋ nɛɛ nɔ majimaji ateŋ ajwamaŋ, Babilon Kpeteŋkpele lɛ ho eta yɛ be mli ni ato Jeŋmaji Akpaŋmɔ lɛ shishi yɛ Jeŋ Ta l sɛɛ lɛ.
23. Mɛi ni fiɔ mfoniri-feemɔ mli kooloo lɛ sɛɛ yɛ tsutsu lɛ, kɛ amɛhewalɛ fɛɛ baatsɔ amɛhiɔ amɛhe namɛi ni mɛni ji nɔ ni Koresh Kpeteŋkpele lɛ baafee?
23 Babilon Kpeteŋkpele lɛ eta Kpaŋmɔ lɛ sɛɛyelɔ, Jeŋmaji Ekomefeemɔ lɛ nɔ kɛbashi bianɛ Shi, agbɛnɛ etsɛŋ kwraa, ebaatɔ maŋkwralɔi ni fiɔ Jeŋmaji Ekomefeemɔ lɛ sɛɛ lɛ yɛ amɛnɔ ni jeŋ apasa jamɔ maŋtsɛyeli lɛ eye lɛ hewɔ, ni amɛbaashɛ lɛ amɛfɔ ni amɛkpata ehiɛ. Kɛkɛ lɛ, beni “bulɔ” lɛ ebo akɛ “Babilon Kpeteŋkpele lɛ ejwa” lɛ, amɛbaatsɔ amɛhiɛ amɛha Yehowa Odasefoi Kristofoi ni amɛje mli lɛ ni amɛkɛ amɛhewalɛ fɛɛ ayatutua amɛ. Biɛ ji heni Koresh Kpeteŋkpele, Yesu Kristo, “maŋtsɛmɛi a-Maŋtsɛ” lɛ kɛ ehe baawo mli ni ekpata mɛi ni tsutsu lɛ amɛfiɔ Jeŋmaji Ekomefeemɔ lɛ sɛɛ lɛ fɛɛ ahiɛ yɛ “Nyɔŋmɔ ofe lɛ gbi wulu lɛ nɔ ta” lɛ mli yɛ Harmagedon Yehowa “bulɔ” kuu lɛ ni efɔ amɛ mu lɛ kɛ “asafo babaoo” lɛ ni amɛhere amaniɛbɔɔ ni “bulɔ” kuu lɛ kɛ gbee ni wa jaje lɛ nɔ lɛ baaje nakai naagbee ta lɛ mli yɛ ŋwɛi hebuu shishi, ‘koni no abu Yehowa Nyɔŋmɔ akɛ ŋwɛi kɛ shikpɔŋ fɛɛ nɔ Maŋtsɛ lɛ bem.
24. Blema Israel ji Yehowa ŋmaagbeemɔhe lɛ “bi” yɛ mɛɛ gbɛ nɔ, ni namɛi ni ŋmɛnɛ agbeeɔ amɛ etsɛŋ ni abaaha eba naagbee lɛ, ni yɛ mɛɛ gbɛ nɔ?
24 No hewɔ lɛ atsɔse Yudafoi ni hi blema Babilon afii 70 lɛ tamɔ “nii ni agbee.” Kɛ́ aaawie he yɛ mfoniri-feemɔ mli lɛ, amɛji Yehowa ŋmaagbeemɔhe “bi.” Nakai tsɔsemɔ ni ji “ŋmaagbeemɔ” lɛ baaba yɛ Babilon shigbeemɔ lɛ sɛɛ. Yɛ be mli ni ewieɔ enɛ he lɛ, Yesaia 21:10 kɛ mɔbɔnalɛ kɛ miishɛjemɔ kɛɛ akɛ: “Minii ni agbee, Miŋmaagbeemɔhe lɛ bi! .Nɔ ni minu kɛjɛ Yehowa Zebaot ni ji Israel Nyɔŋmɔ lɛ naa lɛ, no nɔŋŋ mijajeɔ mitsɔɔ nyɛ nɛɛ.” Nakai nɔŋŋ hu aŋmɛ Babilon Kpeteŋkpele lɛ gbɛ ni egbee Yehowa anɔkwafoi ni ji edasefoi lɛ tamɔ ŋmaa. Shi kɛ egbee shi kɛtee hiɛkpatamɔ mli lɛ, nɛkɛ ‘gbeemɔ’ nɛɛ fɛɛ sɛɛ baafo. Etsutsu maŋkwramɔŋ hemɛi lɛ baabɔ mɔdɛŋ ni amɛha gbeemɔ lɛ sɛɛ atsɛ. Ákɛ najiaŋtoo lɛ, abaagbee amɛ kɛbote hiɛkpatamɔ mli yɛ Yehowa mfoniri-feemɔ mli ŋmaagbeemɔhe lɛ.—Kpoj 14:14, 15; Yoel 4:13-16; Mika 4:12, 13.d
25. Yɛ Babilon Kpeteŋkpele lɛ shigbeemɔ ni baa lɛ hewɔ lɛ, mɛni hewɔ enɛ ji be ni fe fɛɛ ni esa akɛ Yehowa “webii” lɛ aha efɔmɔ lɛ ajije waa, yɛ mɛɛ yiŋtoo hewɔ?
25 Yɛ Babilon Kpeteŋkpele lɛ shigbeemɔ ni baa lɛ hewɔ lɛ enɛ ji be ni fe fɛɛ ni esa akɛ “bulɔ” kuu lɛ kɛ “asafo babaoo” lɛ aha ŋwɛi famɔ nɛɛ ajije waa: “Nyɛjea emli, mimaŋ, koni nyɛkɛ lɛ akafee ekome yɛ ehe eshai lɛ amli, ni nyɛkana ehaomɔi lɛ eko.” (Kpoj. 18:4) Hɛɛ, “nyɛjea emli,” nyɛkafataa emaŋkwramɔŋ hemɛi lɛ aloo je nɛŋ hewalɛi ni teɔ shi woɔ Nyɔŋmɔ ni amɛbɛ hemɔkɛyeli lɛ ahe, shi moŋ nyɛbafea “mimaŋ” lɛ ni ji Yehowa webii ni amɛjɔɔ amɛhe nɔ amɛha lɛ lɛ fa. (Yer. 51:45) Nyɛfea Yesaia “ŋshɔnaa ŋa lɛ kojomɔ he gbalɛ” lɛ he nɔ ko bianɛ—Yes 21:1-10.
26. Mɛɛ shidaa he nyɔmɔ wɔhiɛ “Yehowa Zebaot” lɛ, ni mɛɛ hiɛnɔkamɔ ni jɔɔmɔ yɔɔ mli mɛi ni boɔ toi lɛ baana?
26 Belɛ shidaa fɛɛ afee “Yehowa Zebaot, Israel Nyɔŋmɔ” lɛ nɔ̃, akɛ ni otee “bulɔ” kuu ko shi eto buuhe ko ni agbɛnɛ eha lɛ amaniɛbɔɔ ni yɔɔ naakpɛɛ nɛɛ koni egba mli ejaje kɛya shɔŋŋ yɛ he fɛɛ he lɛ hewɔ. Mɛi fɛɛ mɛi ni baabo amaniɛbɔɔ ni Nyɔŋmɔ kɛha nɛɛ toi lɛ baana hiɛnɔkamɔ ni jɔɔmɔ yɔɔ mli akɛ amɛbaaje “nyɔɔŋ” loo duŋ ni yɔɔ gbeyei ni baa jeŋ nɛɛ nɔ lɛ mli koni amɛhere jalɛ nibii agbɛjianɔtoo ni yɔɔ nyam lɛ ‘jetsɛremɔ’ ni baa yɛ Koresh Kpeteŋkpele, Yesu Kristo, Kpɔlɔ lɛ nɔyeli shishi lɛ atuu. Enɛ baasa “Yehowa Zebaot,” wɔ jeŋ muu fɛɛ Maŋtsɛ kɛ Nuntsɔ lɛ hiɛ ni ebaafee yijiemɔ aha lɛ.e
[Shishigbɛ niŋmai]
a Ajie kɛjɛ July 1, 1980 Blɔfo Buu-Mɔɔ lɛ mli.
The Jerusalem Bible lɛ kɛɔ yɛ Yesaia 21:2 akɛ: “Elam ji gbɛi ni akɛtsɛɔ blema bii ni hi nakai shikpɔŋ ni kwɔ tamɔ gɔŋ ni Persiabii Iɛ jɛ jɛmɔ ba lɛ nɔ. Mediabii lɛ bafee mɛi ni sɔmɔɔ Koresh dani aye Babilon nɔ kunim.”
b Yɛ yomai ni Koresh kpeteŋkpele lɛ kɛtsu nii yɛ tawuu mli lɛ he lɛ, kwɛmɔ The History of Herodotus, First Book, ni atsɛɔ lɛ “Clio” lɛ baafa 29.
c Bɔni Fransebii lɛ tsɔɔ Driouk Bible 1884 mɔ lɛ shishi amɛha lɛ wieɔ Yesaia 21:7 he akɛ: “Nɛkɛ okpɔŋɔianɔtsɛmɛi enyɔ nɛɛ gbalaa shwiili, ni amɛji maŋtsɛmɛi enyɔ ni esa akɛ amɛye Babilon nɔ kunim lɛ. Dario Medianyo lɛ kɛ Koresh. Taakɛ Menochius. [ Italia osɔfo ni wieɔ Biblia Iɛ he yɛ afii ohai 17 lɛ mli lɛ] tsɔɔ mli jogbaŋŋ lɛ, mɛi ni tara okpɔŋɔi anɔ nɛɛ damɔ shi kɛha Mediabii kɛ Persiabii lɛ.”
d Kwɛmɔ nɔ ni ewie yɛ Yesaia 21:7 he tamɔ nakai nɔŋŋ yɛ Dr. Adam Clarke Commentary on The Old Testament lɛ mli, yɛ Vol. 4, page 2724.
e Yɛ tawuu mli ŋaa ni Koresh kɛ yomai tsu nii lɛ mli lɛ, kwɛmɔ wolo “The Outline of History” ni H. G. Wells ŋma lɛ Yitso 20 ni ji “The Greeks and the Persians” Iɛ mli yɛ ebaafa 257, kukuji 2, 3, 1971 nɔ.
[Mfoniri ni yɔɔ baafa 13]
Beni afee ni eto Yehowa Odasefoi ni ‘agbee amɛ’ lɛ najiaŋ lɛ, klɛŋklɛŋ lɛ apasa jamɔ maŋtsɛyeli lɛ kɛ agbɛnɛ emaŋkwramɔŋ hemɛi lɛ hu baafee mɛi ni ‘abaagbee amɛ’ kɛbote hiɛkpatamɔ mli
[Mfoniri ni yɔɔ baafa 14]
Belshazar okpɔlɔŋmɛɛ ni he ebule lɛ kɛ Yehowa hiɛkpatamɔ kojomɔ ba Babilon nɔ