“Bulɔ,Nyɔɔŋ Mɛɛ Be Nɛ?”

“Bulɔ, nyɔɔŋ mɛɛ be nɛ? Bulɔ Iɛ kɛɛ: Jɛ miitsɛre, shi je hu miina.”​—Yes. 21:​11, 12.

 1. Jɛ lɛ miitsɔ mɛni mli yɛ mfonirifeemɔ gbɛ nɔ, ni ani nɔ ko yɛ ni abaanyɛ adamɔ nɔ akpa nɔ̃ kpakpa ko gbɛ yɛ nibii agbɛjianɔtoo nɛɛ he?

¹ JƐ LƐ miitsɔ ‘jenamɔ’ ko mli! Eebɛŋkɛ mfonirifeemɔ mli jenamɔ nɛɛ fa ni woɔ duŋ kpii lɛ he. Bo ni nibii aaatsɔ aba lɛ, kɛji akɛ je tsɛre lɛ, wɔbaana. Nɔ ni gbaa adesa naa babaoo yɛ be fɛɛ mli ji adesa shihilɛ ni kɔɔ ewala mli nɔ fɛɛ nɔ he ni yaa nɔ efiteɔ yɛ be fɛɛ mli lɛ. Jeŋ yinɔsane ekadi nɛkɛ be nɛɛ akɛ nɔ ni kɛ klɛŋklɛŋ jeŋ ta je shishi. Maŋkwralɔi, Nyɔŋmɔ jamɔ mli osɔfoi, kwasafo shihilɛ mli hiɛnyiɛlɔi kɛ niiahelɛtelɔi aaanyɛ asusu akɛ amɛmiina maŋkɛ ko kpɛmɔ ni miiba ni amɛbaabɔ mɔdɛŋ ni amɛtee miishɛɛ shi. Shi nɔ ko bɛ ni ma shi shiŋŋ ni amɛbaadamɔ nɔ amɛkpa nɔ ko kpakpa ko gbɛ yɛ nibii agbɛjianɔtoo ni miidida nɛɛ he.

 2. Mɛi ni tsɔɔ kɛji akɛ nɛkɛ “nyɔɔŋ” ni baa nɛɛ ji nɔ ko ni atsɔ hiɛ ana, ni agbala gbɔmɛi ajwɛŋmɔ kɛba ‘jetsɛremɔ’ ni baa lɛ nɔ yɛ mɛɛ gbɛ nɔ?

² Atsɔ hiɛ ana nɛkɛ “jenamɔ” aloo duŋ ni baa nɛɛ afii nyɔŋmai babaoo. Nɔ ni aŋmala ashwie shi ni kɔɔ afii oha ni eho lɛ he yeɔ enɛ he odase. Atsɔ hiɛ ana “gbi” ni kpɛɔ fe fɛɛ yɛ adesa yinɔsane mli lɛ maŋkɛ ni baa lɛ. Atsɔ naabu kɛ wiemɔ kɛ woji ni akala nɔ agbala gbɔmɛi ajwɛŋmɔ kɛba nɔ.

 3. Mɛɛ wolo tɛtrɛɛ ko ni akahe aafee lolo ŋmɛnɛ eyeɔ enɛ he odase, ni mɛni hewɔ ni egbɛi lɛ sa enitsumɔ lɛ jogbaŋŋ lɛ?

³ Wolo tɛtrɛɛ ko ni amrɔ nɛɛ eko fɛɛ eko ni abaakala lɛ yibɔ shɛɔ akpekpei yɛ majianɔ wiemɔi babaoo mli lɛ yeɔ anɔkwa sane nɛɛ he odase Be mli ni afee eklɛŋklɛŋ nɔ lɛ yɛ July 1879 mli lɛ, atsɛ wolo tɛtrɛɛ nɛɛ akɛ “Zion Buu-Mɔɔ kɛ Ba ni Kristo Eba Lɛ Be Adafitswaa.” Klɛŋklɛŋ nɔ ni afee lɛ hiɛ baafai kpaanyɔ ni eda fe wolo tɛtrɛɛ ni wɔhiɛ ŋmɛnɛ nɛɛ. Eyɛ nitsumɔ ko ni ebaatsu he nii yɛ ebe mli pɛpɛɛpɛ. Ale enɛ kɛtsɔ egbɛi ni shishinumɔ yɔɔ mli ni ji “Buu-Mɔɔ” lɛ nɔ. Agbɛnɛ nɔ ni je kpo yɛ wolo nɛɛ gbɛi lɛ shishi ni sa jogbaŋŋ ji wiemɔ ni atsɛ kɛjɛ blema wolo ni etsɛ fe fɛɛ yɛ shikpɔŋ nɔ lɛ mli lɛ. Ekaneɔ akɛ. “Bulɔ, Nyɔɔŋ Mɛɛ Be Nɛ?” “Je Miitsɛre.” Atsɛ nakai wiemɔi lɛ kɛjɛ Ŋmalɛ Krɔŋkrɔŋ lɛ mli. Kɛjɛ Yesaia gbalɛ lɛ yitso 21 kuku 11, 12, taakɛ King James aloo Authorized Version ni ji wɔ Ga Biblia lɛ tsɔɔ lɛ. Yɛ Biblia bei amli lɛ, anaa bulɔ yɛ buu-mɔɔ ni atswa ama gbogbo ni atswa abɔle maŋ ko he lɛ nɔ. Anyɛɔ adamɔɔ he ni kwɔ nɛɛ anaa he fɛɛ he. Mɛi ni fee wolo tɛtrɛɛ lɛ yiŋtoo ji ni amɛsɔmɔ akɛ bulɔ kuu. Mɛi ni fee wolo tɛtrɛɛ lɛ tsɔ ebaafai amli amɛbɔ mɔdɛŋ koni amɛha sanebimɔ, “Bulɔ, nyɔɔŋ mɛɛ be nɛ?” lɛ hetoo. Nakai sanebimɔ ni he hiaa ni biɔ hetoo lɛ tee nɔ epue yɛ wolo tɛtrɛɛ lɛ klɛŋklɛŋ baafa lɛ mli aahu kɛbashi December 15, 1938 nɔ ni afee lɛ nɔ.

 4. Mɛni nibii ni he hiaa ni ba yɛ 1870 afii lɛ amli ha Buu-Mɔɔ Wolo tɛtrɛɛ lɛ feemɔ bafee mɔ ni eba yɛ gbalɛ be ni tsɔɔ nɔ ko krɛdɛɛ mli?

⁴ Be mli ni Buu-Mɔɔ wolo tɛtrɛɛ lɛ je kpo klɛŋklɛŋ yɛ July 1, 1879 ni akala fioo ko aaafee ekomekomei 6,000 lɛ no mli lɛ, shihilɛ ni je lɛ baa mli lɛ miitsɔɔ nɔ ko, aloo eehe ejie Okadi ko kpo. No mli lɛ, Franse kɛ Germane ta ni awu yɛ 1870 lɛ eba naagbee, ni Germane Maŋtsɛyeli ni ji enyɔ lɛ ete shi. Tawuu nibii afeemɔ he foidamɔ miihe ate shi yɛ Ŋleshi Maŋtsɛyeli lɛ kɛ mɔ ni ekɛlɛ shiɔ akaŋ ni ji Germane Maŋtsɛyeli lɛ teŋ. Majimaji Agwabɔɔ ni afee yɛ Berlin koni akɛsaa Bokagbɛ Shikpɔji ahe bei ni kɔɔ Turkey Maŋtsɛyeli lɛ ni aja mli aha Europa Maŋtsɛyelii lɛ, titri Britania kɛ Rɔsia he lɛ eba naagbee yɛ 1878. Wɔsɛɛ be mli bei ni kɛ haomɔ kpele baaba ni baaka majimaji ateŋ lɛ miiwo je lɛ he gbeyei!

 5. No hewɔ lɛ be eshɛ kɛha mɛni mlitaomɔ, ni Buu-Mɔɔ wolo tɛtrɛɛ lɛ jie mɛni kpo yɛ gbɛ ni ja nɔ yɛ January 1, 1895 nɔ lɛ hiɛ?

⁵ Be eshɛ lɛɛlɛŋ yɛ nakai be lɛ mli ni akɛ aaakwɛ Biblia mli gbalɛi sɔrɔtoi lɛ amli ni akwɛ kɛji akɛ amɛyɛ nɔ ko kɛɛmɔ yɛ nibii ni yaa nɔ yɛ je lɛ mli lɛ kɛ nɔ ni baajɛ mli aba lɛ he. No hewɔ lɛ, yɛ January 1, 1895 lɛ, Buu-Mɔɔ wolo tɛtrɛɛ lɛ tsake bɔ ni ehiɛ yɔɔ lɛ ni afee Buu-Mɔɔ ko yɛ ekoŋ nɔ gbɛ ni tamɔ ŋshɔ ko ni efee hamahama. Agbɛnɛ hu yɛ ehiɛgbɛ baafa lɛ shishigbɛ lɛ, aŋma wiemɔi ni damɔ Luka 21:​25-31 nɔ nɛɛ yɛ jɛmɛ: “Ni jeŋmaji afimɔ aaba shikpɔŋ lɛ nɔ, ni amɛaafee yeyeeye yɛ ŋshɔ kɛ ŋshɔkei agbɛɛmɔ hewɔ (amɛhao, amɛtsui enyɔɔɔ amɛmli) ; ni nɔ aaanyɔnyɔɔ gbɔmɛi anɔ yɛ gbeyei kɛ nibii ni baa je (adesa weku) lɛŋ lɛ agbɛkwɛmɔ hewɔ; ejaakɛ aahoso ŋwɛi (nyɔŋmɔjamɔ) hewalɛi tete. Beni nyɛaana akɛ nibii nɛɛ etsɔ naa shi lɛ, nyɛnaa nyɛlea akɛ Nyɔŋmɔ Maŋtsɛyeli lɛ eshɛ eta. No lɛ nyɛkwɛa ŋwɛi ni nyɛholea nyɛyitsei anɔ, ejaakɛ nyɛkpɔmɔ lɛ miibɛŋkɛ​—Luka 21:​25, 28-31.

 6. Mɛni hewɔ ni afii ohai 20 ni aboteɔ mli lɛ baafee be ko ni miishɛɛ yɔɔ mli waa kɛha “bulɔ” kuu lɛ?

⁶ Spania kɛ Amerika Ta lɛ tsa nɔ yɛ 1898 ni Spania Maŋtsɛyeli lɛ gbee shi. Afi 1899 mli Boer Ta lɛ ba yɛ South Afrika ni Ŋleshi Maŋtsɛyeli lɛ ye kunim. Majimaji ateŋ tawuu nii ni afeɔ lɛ he foidamɔ lɛ tee nɔ. Beni afee ŋwɛi kɔɔyɔŋ lɛji pɛ kɛkɛ ni abɔi tawuu yɛ ŋwɛi. No mli lɛ akɛ ŋshɔ shishi tawuu lɛji hu etsu nii yɛ omanyeyeli mli yɛ tawuu mli. No hewɔ lɛ, afii ohai 20 lɛ baafee be sɔrɔto ko kɛha “bulɔ” kuu lɛ koni amɛbɔ mɛi ni taoɔ ale nibii amli lɛ amaniɛ. Titri lɛ nakai enɛ ji akɛni “bulɔ” kuu lɛ miikpa “Jeŋmaji abe” ni baaba naagbee yɛ 1914 gbo be mli lɛ gbe lɛ.​—Luka 21:⁠24.

Mɛni Hewɔ Esa Akɛ Abi “Bulɔ” Lɛ Sane?

 7. Mɛni hɔ sane ni abi “bulɔ” lɛ sɛɛ taakɛ wiemɔ ni nyiɛ sɛɛ lɛ fee he nɔkwɛmɔ nɔ lɛ?

⁷ Nɔ ni abi “Bulɔ” lɛ Yesaia 21:11 lɛ ji sane ko ni ana akɛ ekɔɔ tawuu he. Emli sane ni nyiɛ sɛɛ lɛ kaneɔ akɛ: “Arabia kojomɔ he gbalɛ: Nyɛ Dedanim gbɛnyiɛlɔi asafoi, nyɛwɔa Arabia koo lɛŋ! Nyɛ Tema shikpɔŋ lɛ nɔ bii, nyɛkɛ nu ayakpea mɛi ni kumai yeɔ amɛ lɛ! Nyɛkɛ aboloo hu ayakpea foijelɔi lɛ! Ejaakɛ klante naa foi amɛjoɔ, klante ni agbala kɛ gai ni adɔ kɛ ta ni mli wa. Shi bɔ ni Nuntsɔ Iɛ kɛɛmi nɛ: Biɛ afi ni tamɔ apaafonyo afi lɛ Kedar anunyam lɛ aaata kwraa ni Kedarbii lɛ ateŋ gaitsɛlɔi ekaalɔi ni aaashwa lɛ ayi faŋ; ejaakɛ Yehowa, Israel Nyɔŋmɔ lɛ, ekɛɛ.”​—Yes. 21:​13-17.

 8. Wiemɔ ni tsɔ sanegbaa ni tee nɔ yɛ nibilɔ lɛ kɛ bulɔ Iɛ tɛŋ lɛ hiɛ lɛ tsɔɔ mɛni hu, ni nɛgbɛ ji heni nibilɔ lɛ yɔɔ?

⁸ Nakai nɔŋŋ hu “kojomɔ he gbalɛ kroko ni tsɔ wiemɔi ni teenɔ yɛ nibilɔ lɛ kɛ bulɔ lɛ teŋ lɛ tsɔɔ tawuu. No hewɔ lɛ esa akɛ nibilɔ lɛ ahao yɛ enɛ he. Nɛɛgbɛ nibilɔ lɛ yɔɔ? Eka shi faŋŋ akɛ eyɛ jeŋ nɔyelɔ lɛ gbɛ lɛ mli. Yesaia 21:11 kaneɔ akɛ: “Duma kojomɔ he gbalɛ: Abo atsɛ mi kɛjɛ Seir akɛ: Bulɔ nyɔɔŋ mɛɛ be nɛ?”

 9. (a) Heni akɛ kojomɔ he gbalɛ wiemɔ lɛ shiɔ lɛ gbɛi lɛ shishi ji mɛni, ni te ekɔɔ he ehaa tɛɛŋ? (b) Yɛ mɛɛ gbɛ nɔ akɛ Seir ba le Edom ni ji Yakob nyɛminuu ni ekɛ lɛ ji haaji lɛ?

⁹ Gbɛi ni ajaje kojomɔ he gbalɛ lɛ ashi lɛ ji Duma, gbɛi ni eshishi ji “Diŋŋfeemɔ.” Eka shi faŋŋ akɛ, eji gbalɛ mli gbɛi, ni miitsɔɔ akɛ nɔ ni baakadi nakai he nɛɛ ji diŋŋfeemɔ. Gbɛi lɛ etsɔɔɔ diŋŋfeemɔ ni jɛ amaŋfɔfeemɔ kɛ gbele ni yɔɔ jɛmɛ momo. Anɔkwale ni eji akɛ Seir shikpɔŋ lɛ nɔ ajɛ atsɛ bulɔ lɛ tsɔɔ heni Duma yɔɔ. Akɛ shikpɔŋ nɛɛ toɔ Idumea, Edom maŋ lɛ he. Enɛ baanyɛ atsɔɔ nɔ hewɔ ni Hela Septuagint Version lɛ wieɔ Idumea he moŋ fe Duma lɛ. Edom ji sabla ni akɛha Esau, Yakob nyɛmi ni ekɛlɛ ji haaji lɛ. Gbɔmɛi ni jɛ Edom shikpɔŋ lɛ nɔ lɛ te shi wo Yakob maŋ lɛ, aloo Israel maŋ lɛ.

10. Mɛni hewɔ ni Edom, aloo Esau seshibii Iɛ banyɛ maŋ ni ji amɛnyɛmimɛi lɛ ni amɛnyã hu yɛ amanehulu ni ba enɔ yɛ afi 607 D.Ŋ.B. lɛ he lɛ?

¹⁰ Atsɛɔ Yakob nyɛminuu ni ekɛlɛ lɛ haaji lɛ, akɛ Esau, ni eshishi ji “tsɔiatsɛ” ejaakɛ beni afɔ lɛ lɛ, no mli lɛ, ehe fɛɛ lɛ tsɔi sɔŋŋ ni. Gbɛi Esau lɛ shishi ji “tsɔi sulaŋŋ aloo tsɔi-tsɔi,” shi jeee Esau hewɔ atsɛ shikpɔŋ lɛ nakai lɛ. Eseshibii ŋɔ Seir shikpɔŋ lɛ kɛtsɔ shikpɔŋ lɛ nɔ bii anɔ kunim ni amɛyɛ hewɔ. Ale Esau, aloo Edom yɛ bɔ ni eyasumɔ akɛ eeehɔɔ ekromɔbi gbɛnaa lɛ eha Yakob lɛ hewɔ. Yehowa, Yakob Nyɔŋmɔ lɛ kpɛlɛ nihɔɔmɔ nɛɛ nɔ ni ekɛ ŋwɛi jɔɔmɔ lɛ ha nihelɔ, Yakob. Yɛ enɛ hewɔ lɛ, Esau banyɛ Yakob. Enɛ bɛ naakpɛɛ mɔ akɛ be mli ni Babilonia bii lɛ kpata Yerusalem hiɛ yɛ afi 607 D.Ŋ.B. lɛ, Esau seshibii Edombii lɛ nya waa yɛ amanehulu kpeteŋkpele ni eba Yuda maŋ ni ji amɛnyɛmimɛi lɛ anɔ lɛ hewɔ. Nɛkɛ maŋ oshra, kɛ loomɔ ni aloo lsraelbii ni je mli lɛ kɛtee Babilonia lɛ ba yɛ afi oha ni ba yɛ Yesaia gbalɛ ni kɔɔ bulɔ lɛ he lɛ sɛɛ lɛ mli.

11. Sane ni abi lɛ hetoo lɛ jɛ nɛgbɛ, no hewɔ lɛ Yesaia damɔ shi kɛha namɔ ŋmɛnɛ?

¹¹ Nɛɛgbɛ ji heni bulɔ lɛ ni nibilɔ ni yɔɔ Edom shikpɔŋ lɛ nɔ yɛ Seir lɛ biɔ lɛ sane lɛ yɔɔ? Yesaia ji mɔ ni kɛ gbalɛ ni kɔɔ nibilɔ lɛ kɛ bulɔ lɛ he lɛ ha, ni ena ehe yɛ shikpɔŋ ni eye ehe ni ji Israel lɛ nɔ. No hewɔ lɛ, bulɔ lɛ hetoo lɛ jɛ Israel shikpɔŋ lɛ nɔ, ni heni lsraelbii lɛ banaa amɛdiɛŋtsɛ amɛhe yɛ, yɛ Yesaia gbalɛ lɛ mlibaa lɛ he lɛ kɔɔɔ he eko. Yɛ be mli ni akɛ gbalɛ lɛ haa lɛ, Yesaia badamɔ shi kɛha bulɔ ni Nyɔŋmɔ ehala lɛ yɛ famɔ naa koni eha nibilɔ lɛ hetoo ni ja lɛ. Nyɔŋmɔ ekpɛlɛ Yesaia kɛ ebii lɛ anɔ. Yesaia teɔ “bulɔ” kuu ni yɔɔ ŋmɛnɛ, mumɔŋ Israel shwɛɛnii ni yɔɔ ŋwɛi wala he hiɛnɔkamɔ lɛ he mfoniri yɛ gbɛ ni ja nɔ. Nɛkɛ mɛi nɛɛ ji mɛi ni aha amɛna jeŋ ni mli ewo duŋ ŋmɛnɛ lɛ he shishinumɔ aloo hiɛtɛjemɔ lɛ.

12. (a) Namɛi kɛ amɛhe ha akɛ amɛaasɔmɔ akɛ bulɔ kuu kɛha “bulɔ” kuu ni da lɛ yɛ afi 1879 Ŋ.B. lɛ mli? (b) Esa akɛ nakai sanebimɔ ni teɔ shi lɛ hetoo lɛ aba kɛjɛ nɛgbɛ, no hewɔ lɛ mɛni ni?

¹² Yɛ afi 1879 Ŋ.B. lɛ, no mli lɛ, Buu Mɔɔ wolo tɛtrɛɛ lɛ ŋmalɔ lɛ kɛ ehefatalɔi lɛ ji Kristofoi ni amɛjɔɔ amɛhe nɔ ni abaptisi amɛ. Amɛkɛ amɛhe ha ni amɛsɔmɔ akɛ bulɔ ‘kuu ko amɛha amɛnyɛmimɛi Kristofoi ni akɛ mumɔ efɔ amɛ mu lɛ. Mɛnɛɛmɛi fɛɛ fee ekome kɛfee “Bulɔ” kuu ko ni da. Amɛnyɛɛɛ amɛjo sanebimɔ ni teɔ shi, “Bulɔ, nyɔɔŋ mɛɛ be nɛ?” lɛ naa foi. Hetoo ni ja ni amɛbaanyɛ amɛkɛha ji ‘nɔ ni Nyɔŋmɔ Wiemɔ ni jɛ mumɔŋ lɛ kɛwo blema bulɔ lɛ naa lɛ. Ni no ji akɛ, “Je miitsɛre, shi je hu miina.” Yes. 21:12) Aa, hɛɛ, taakɛ bɔni Yehowa Nyɔŋmɔ eha ale Iɛ, gbi ni mli tse keŋkeŋ miiba, esa akɛ “jetsɛremɔ” aba. Enɛ kɛ millennium, aloo Yehowa Mesia, e-Bi Yesu ni ewo ehiɛ nyam lɛ afii akpe lɛ baaba. Shi dani no aaaba lɛ esa akɛ jeŋ haomɔ ni ji “jenamɔ” lɛ aba!

13. (a) Te atsɛɔ Studies in the Scriptures ni aje efeemɔ shishi yɛ 1886 lɛ tɛɛŋ, ni mɛni hewɔ? (b) Mɛni hewɔ nibilɔ lɛ ni yɔɔ Seir lɛ susuɔ “nyɔɔŋ” loo duŋ ni eba shikpɔŋ lɛ nɔ lɛ he waa lɛ?

¹³ Ŋwanejee ko kwraa bɛ he akɛ yɛ ‘jetsɛremɔ’ he shiwoo ni kɛ Kristo nɔyeli afii akpe lɛ baaba lɛ hewɔ lɛ, atsɛ́ Studies ni the Scriptures ni mɔ ni ŋmaa Buu-Mɔɔ lɛ je shishi eŋmala yɛ 1886 mli lɛ akɛ “Millenial Dawn” (Afii akpe jetsɛremɔ) . Ní nakai yitso lɛ. shishi atsɛ wiemɔi ni yɔɔ Abɛi 4:18: “Jalɔi Atempɔŋ lɛ Tamɔ La ni Kpɛɔ ni Eyaa nɔ Ekpɛɔ Aahu Kɛyashiɔ Shwane Fintii.” Shi “nyɔɔŋ” lɛ ji nɔ ni nibilɔ ni yɔɔ Seir shikpɔŋ lɛ nɔ lɛ susuɔ he. Yɛ gbalɔ Yesaia gbii lɛ amli lɛ, duŋ fɛɛ duŋ ni baawo “nyɔɔŋ” ni bakaa Edom shikpɔŋ ni ji Seir nɔ lɛ mli baati kabitii. Nakai ji bɔ ni sane lɛ baaji akɛni nakai shikpɔŋ lɛ baje nɔyelɔ hee ko hewalɛ shishi lɛ hewɔ, mɔ ni sumɔɔ Israel maŋ lɛ ni ji amɛnyɛmimɛi lɛ, shi jeee Edombii ni yɔɔ Seir Gɔŋ lɛ shikpɔŋ nɔ lɛ.

14. Namɛi ŋmɛnɛ amɛyɔɔ hetoo ni ja kɛha sanebimɔi ni kɔɔ “nyɔɔŋ” loo duŋ ni baaba jeŋ fɛɛ lɛ he lɛ, ni ani átsi sane ni aaabi yɛ he lolo lɛ naa lo?

¹⁴ Ŋmɛnɛ, yɛ nɔ ni fe afii oha ni Buu-Mɔɔ wolo tɛtrɛɛ lɛ pue klɛŋklɛŋ lɛ, je lɛŋ bii ni miitao Ia lɛ yaa nɔ amɛbiɔ sane ni he hiaa lolo akɛ, “Nyɔɔŋ mɛ be nɛ? Mɔ pɛ ni yɔɔ sanebimɔ lɛ hetoo ni ja ji “bulɔ” kuu lɛ. Nɛkɛ kuu nɛɛ ji mɛi ni yɔɔ hetoo ni ja, ni ji hetoo ni jɛ Biblia mli lɛ. Ekpɛlɛ sanebimɔi krokomɛi fɛɛ nɔ, taakɛ bɔni yɛ Yesaia gbalɛ lɛ mli lɛ bulɔ lɛ tee nɔ ekɛɛ akɛ: “Kɛ nyɛaabi lɛ, nyɛbia! Nyɛkua nyɛsɛɛ, ni nyɛbaa!” lɛ.​—Yes. 21:⁠12.

15. Yɛ sanebimɔi krokomɛi ni baaba ni abaakpɛlɛ nɔ lolo lɛ hewɔ lɛ Buu-Mɔɔ wolo tɛtrɛɛ lɛ esaa ehe yɛ mɛɛ gbɛ nɔ ni mɛɛ sane ni kɔɔ “nyɔɔŋ” loo duŋ lɛ he etee nɔ ejaje ni ekpaaa?

¹⁵ Yɛ enɛ hewɔ lɛ, átee nɔ aŋma Buu Mɔɔ wolo tɛtrɛɛ lɛ kɛbashi bianɛ. Taakɛ bɔni esa akɛ Bulɔ diɛŋtsɛ ashi kpe yɛ be fɛɛ mli yɛ heni ebuɔ yɛ lɛ, nakai nɔŋŋ hu Buu Mɔɔ wolo tɛtrɛɛ lɛ etee nɔ eshi kpe ni ekome po efoko mli ni afeee kɛjɛ be mli ni abɔi eklɛŋklɛŋ nɔ̃ lɛ feemɔ kɛjɛ July 1879 lɛ. Enɛ efee anɔkwale yɛ jeŋ fɛɛ yiwaa ni ba “bulɔ” kuu lɛ nɔ yɛ Jeŋ Ta I kɛ II lɛ mli fɛɛ lɛ sɛɛ. Etee nɔ etswa nɔ ni eba “nyɔɔŋ” lɛ he adafi, esheee gbeyei hu akɛ eeetswa adafi akɛ ebaashe heni duŋ lɛ mli baati waa yɛ “Nyɔŋmɔ Ofe lɛ gbi wulu lɛ nɔ ta lɛ mli” yɛ nɔ ni Biblia mli gbalɛ tsɛɔ lɛ akɛ Harmagedon lɛ. No hewɔ lɛ, “bulɔ” kuu lɛ yaa nɔ etsuɔ enitsumɔ lɛ mlibaa he nii akɛ “ejaje . . . wɔ-Nyɔŋmɔ lɛ oweletɔɔ gbi lɛ.​—Kpoj. 16:​14-16; Yes. 61:​1,2.

Kojomɔ He Gbalɛ Yɛ Be Mli Ni Akɛ Nitsumɔ Ewo Bulɔ Lɛ Dɛŋ Lɛ Sɛɛ

16. Mɛni hewɔ ni ebi ekãa dani “bulɔ” lɛ ajaje “kojomɔ he gbalɛ” ni akɛwo enaa lɛ, ni mɛni hewɔ ni ejajemɔ lɛ he hiaa wɔ waa ŋmɛnɛ fe nɔ ko ni yɔɔ miishɛɛ ni hoɔ eyaa kɛkɛ lɛ?

¹⁶ Esa akɛ Nyɔŋmɔ “bulɔ” lɛ ana ekaa ni eye anɔkwale beni afee ni enyɛ ejaje kojomɔ he gbalɛ ni akɛwo enaa lɛ ni mɔ fɛɛ mɔ anyɛ anu. Kojomɔ he gbalɛ lɛ jeee nɔ ni hi, shi moŋ nɔ ni ehiii kɛha enɔ ni baafee jeŋ hewalɛ ni fe fɛɛ kɛbashi nakai be lɛ mli lɛ. Shi etsɔɔ nɔ ni hi kɛha gbɔmɛi ni bulɔ lɛ fata amɛhe lɛ, Israel maŋ lɛ, yɛ nibii ni ba ni hoso nakai blema be lɛ mli je lɛ hewɔ. Kulɛ nɛkɛ sane nɛɛ baafee nɔ ko ni yɔɔ miishɛɛ kɛkɛ ni eho etee kɛha wɔŋmɛnɛŋmɛnɛ bii nɛɛ, eji jeee anɔkwale ni eji akɛ nibii ni ehiii ni yɔɔ “kojomɔ he gbalɛ” lɛ mli lɛ naa amɛnaagbee mlibaa ni da fe fɛɛ yɛ jeŋ muu lɛ fɛɛ mli yɛ wɔ afii oha nɛɛ ni ta kɛ lɛ ewu shi nɛɛ mli lɛ. No hewɔ lɛ esa akɛ enɛ ana wɔnɔ hewalɛ taakɛ eba yɛ Yesaia nɔ blema beebe lɛ.

17, 18. Wiemɔ “ŋshɔnaa ŋa” jeŋ hewalɛi ye nɔ kɛjɛ jɛmɛ?

¹⁷ Mumɔ naa shɛɛ wiemɔ kɛtsɔ Yesaia nɔ lɛ jeee nɔ ni haa mɔ naa miishɛɛ: “Ŋshɔnaa ŋa lɛ kojomɔ he gbalɛ: Bɔni wuoyigbɛ ahum tswaa huu lɛ, nakai ebaajɛ ŋa lɛ nɔ kɛ shikpɔŋ ko ni he yɔɔ gbeyei nɔ kɛba.”​—Yes. 21:⁠1.

¹⁸ Heni wiemɔ ni ji “ŋshɔnaa ŋa” lɛ yɔɔ lɛ yafee heko ni he hiaa waa yɛ adesa yinɔsane mli. Heni enɛ yɔɔ lɛ ji shikpɔŋ ni Eufrate Faa lɛ kɛ Tigri Faa aloo Hidekel Faa lɛ ni atsi fɛɛ ta yɛ be mli ni abɔ Adam, klɛŋklɛŋ nuu lɛ kpeɔ yɛ nɔ lɛ. (1 Mose 2:14) Yɛ be ko mli lɛ, nɛkɛ faai enyɔ nɛɛ hoɔ kɛboteɔ nɔ ni ale aloo atsɛɔ lɛ ŋmɛnɛ akɛ Persian Gulf lɛ mli yɛ hei sɔrɔtoi enyɔ, ni nɛkɛ faai nɛɛ bɛŋkɛ heni amɛhoɔ kɛboteɔ ŋshɔ lɛ mli lɛ. Yɛ nunɛmɔ be mli lɛ, faai nɛɛ jeɔ ŋa, ni shikpɔji ni yɔɔ teŋ lɛ batsɔɔ tamɔ ŋshɔ ko ni etsɔ amaŋfo, “ŋshɔnaa ŋa.” Nɔ ni jɛɔ mli baa ji ŋmɔtɔ ni tsiɔ gbɛ. Nɛkɛ he nɛɛ ji heni jeŋ hewalɛ ni ji enyɔ yɛ Biblia yinɔsane mli, Asiria, ye nɔ, yɛ gbalɔ Yesaia gbii lɛ amli. Nɔ ni baanyiɛ enɛ sɛɛ afii oha ni baa lɛ mli ji jeŋ hewalɛ ni he wa fe enɛ, nɔ ni ji etɛ.

19. Mɛni nakai Jeŋ Hewalɛ ni ji Etɛ lɛ kɛbaaba Yesaia webii lɛ anɔ ni sane lɛ kɔɔ namɛi ahe titri ŋmɛnɛ?

¹⁹ Jeŋ Hewalɛ Ní Ji Etɛ ni baa lɛ ji nɔ ni kɛ awerɛhoo kpele baaba Yesaia webii lɛ anɔ. No hewɔ lɛ nɔ ni baaba enɔ lɛ baafee nɔ ko ni Yesaia diɛŋtsɛ baanya he akɛ bulɔ, kɛ agbɛnɛ mɔ fɛɛ mɔ ni akɛ lɛ baatsu nii yɛ nakai be lɛ mli akɛ bulɔ, yɛ be mli ni “ŋshɔnaa ŋa lɛ kojomɔ he gbalɛ” lɛ fɛɛ baa mli lɛ. No hewɔ ni emlibaa ŋmɛnɛ yɛ naagbee kwraa lɛ ji nɔ ko ni “bulɔ” kuu lɛ yɔɔ he miishɛɛ ŋmɛnɛ kɛ agbɛnɛ mɛi fɛɛ ni biɔ koni nɔ ni “bulɔ” kuu lɛ ena lɛ atsɔɔ amɛgbɛ lɛ.

20. Akɛ nɔ ni haa amanehulu ni baa lɛ toɔ mɛni he ni nɛkɛ hiɛkpatamɔ hewalɛ nɛɛ baa kɛjɛɔ nɛgbɛ?

²⁰ Nɔ ko ni anyɛɛɛ atsi naa ni haa nɔ fɛɛ nɔ nɔ tamɔ “wuoyigbɛ ahum tswaa huu” lɛ miifa kɛmiijɛ ŋshɔ kɛ ŋwɛi kpeehe lɛ. Ahum ni tamɔ nɛkɛ lɛ ehiii kwraa ni efiteɔ nii waa. Nibii ni gbɔmɛi efee ni yɔɔ nɛkɛ ahum nɛɛ gbɛ nɔ lɛ eba eshara mli ejaakɛ ebaatsumɔ fɛɛ kɛya. Nɔ ni yɔɔ gbeyei yɛ amanehulu ni baa lɛ he lɛ jeɔ kpo yɛ anɔkwale ni eji akɛ akɛɛ ebaa kɛjɛɔ “ŋa lɛ nɔ kɛ shikpɔŋ ko ni he yɔɔ gbeyei nɔ” lɛ. (Yes. 21:⁠1) Yɛ nakai blema bei lɛ amli lɛ gbalɔ Yesaia tsu nii tamɔ mɔ ni kwɛɔ kɔɔyɔɔŋ tsakemɔ mli ni ebɔɔ kɔkɔ koni gbɔmɛi ni yɔɔ ahum lɛ gbɛ lɛ nɔ lɛ asaa amɛhe kɛha nɔ ni ehiii ni baa lɛ.

21. Namɛi eshi nakai kɔkɔbɔɔ okadi Iɛ tamɔ aflaŋaa yɛ wɔ afii oha nɛɛ mli, ni namɛi titri akɛ enɛ he sɔ̃ fɔɔ amɛnɔ akɛni ahɛle amɛshi lɛ hewɔ?

²¹ Nɔ ni kɛ enɛ kpaa gbee lɛ “bulɔ” kuu lɛ eshĩ kɔkɔbɔɔ aflaŋaa lɛ, titri kɛjɛ Jeŋ Ta l lɛ naagbee yɛ 1918. Buu Mɔɔ wolo tɛtrɛɛ lɛ je ehe gbeyei ni awo akɛ aaaha akpa feemɔ lɛ mli yɛ be ni he hiaa ni “bulɔ” kuu lɛ na shitee-kɛ-woo kɛ yiwaa mli amanehulu yɛ jeŋ fɛɛ lɛ. “Bulɔ” lɛ kɛ edɛŋdade ni ji Buu-Mɔɔ wolo tɛtrɛɛ lɛ ehi shi lolo kɛbɔ kɔkɔ ni abu enɛ he yɛ shikpɔŋ lɛ nɔ he fɛɛ he. Abɔ gbɔmɛi lɛ, titri lɛ amɛhiɛnyiɛlɔi lɛ kɔkɔ. Sɔ̃ ka amɛnɔ.

22. Mɛɛ kojomɔ he gbalɛ nɛkɛ etsɛŋ ni akɛ gbee ni wa baajaje atsɔɔ lɛ ni mɛɛ yiŋtoo hewɔ ni “asafo babaoo” ko baana he miishɛɛ lɛ?

²² Etsɛŋ ni “bulɔ” kuu lɛ kɛ gbee ni wa baajaje kojomɔ he gbalɛ ko ni haa ŋmiŋmi mɔɔ mɔ atsɔɔ. Kɛ́ trukaa lɛ, abo lɛ, miishɛɛ kpele baaji “asafo babaoo” krɛdɛɛ lɛ ni bo nakai kɔkɔbɔɔ okadi lɛ toi amrɔ nɔŋŋ lɛ!​—Kpoj. 7:​9-15a.

[Shishigbɛ niŋmaa]