Yitso Nyɔŋma Kɛ Kpaanyɔ
Nikasemɔi ní Kɔɔ Anɔkwa ní Ayeee He
1. Te blema maŋtiase ko ní awo he ká lɛ mli shihilɛ baafee aha tɛŋŋ?
FEEMƆ blema maŋtiase ko ní awo he ká lɛ mli shihilɛ he mfoniri okwɛ. Henyɛlɔ lɛ yɛ gbogboi lɛ asɛɛ—ehe wa ni eyitsoŋ hu wa. Nyɛle akɛ eye maŋtiasei krokomɛi anɔ kunim momo. Amrɔ nɛɛ etswa efai shi akɛ ebaaye nyɛmaŋtiase lɛ hu nɔ kunim, ni ebaahà emli bii lɛ anii, ni ebaato amɛ kabonaa, ni ebaagbe amɛ. Henyɛlɔi asraafoi lɛ ahe wa tsɔ̃ fe bɔ ni abaanyɛ akɛ amɛ awu hiɛ kɛ hiɛ; nyɛ hiɛnɔkamɔ pɛ ji akɛ, nyɛmaŋtiase lɛ he gbogboi lɛ baanyɛ atsĩ amɛnaa. Kɛ́ okwɛ gbogboi lɛ asɛɛgbɛ lɛ, onaa káwoo mɔji ní henyɛlɔi lɛ kɛba. Amɛyɛ káwoo tsɔnei hu ní baanyɛ ahole tɛi wuji ní efɔ̃ kɛtswia nibii ní buɔ nyɛmaŋtiase lɛ he lɛ. Onaa amɛ nikuumɔ dadei kɛ atswerei ní amɛkɛkwɔɔ nii lɛ, amɛgãitsɛ̃lɔi kɛ shwiilii lɛ, kɛ amɛ asraafoi babaoo lɛ. Mɛɛ shihilɛ ni yɔɔ gbeyei nɛ!
2. Mɛɛ be káwoo ní atsɔɔ mli yɛ Yesaia yitso 22 lɛ ba?
2 Wɔkaneɔ káwoo ní tamɔ nɛkɛ—Yerusalem he káwoo lɛ he sane yɛ Yesaia yitso 22 lɛ. Mɛɛ be enɛ ba mli? Ewa akɛ aaawie káwoo pɔtɛɛ ko he ákɛ otii ní awie he lɛ fɛɛ ba mli yɛ mli. Eka shi faŋŋ akɛ, anuɔ gbalɛ lɛ shishi jogbaŋŋ ákɛ eji Yerusalem he káwoo srɔtoi ni baaba enɔ, ni feɔ nibii ni baaba wɔsɛɛ lɛ ahe kɔkɔbɔɔ lɛ amlitsɔɔmɔ.
3. Te Yerusalem maŋ lɛ mli bii lɛ fee amɛnii yɛ káwoo ní Yesaia wie he lɛ he amɛha tɛŋŋ?
3 Beni káwoo ní Yesaia wie he lɛ ba lɛ, mɛni gbɔmɛi ní yɔɔ Yerusalem maŋ lɛ mli lɛ fee yɛ he? Ákɛ Nyɔŋmɔ webii ní ekɛ amɛ efee kpaŋmɔ lɛ, ani amɛbolɔ amɛtsɛ Yehowa ní ehere amɛyiwala? Dabi, amɛjie su ní nilee bɛ mli kpo, tamɔ nɔ ni anaa ŋmɛnɛ yɛ mɛi ní kɛɔ akɛ amɛjáa Nyɔŋmɔ lɛ ateŋ mɛi pii ahe lɛ.
Maŋtiase ní Awo he Ká
4. (a) Mɛni ji “ninaa jɔɔ lɛ,” ni mɛni hewɔ eyɔɔ gbɛi ní tamɔ nɛkɛ? (b) Te Yerusalem maŋ lɛ mli bii lɛ amumɔŋ shihilɛ yɔɔ tɛŋŋ?
4 Aje kojomɔ shɛɛ saji etɛ ni yɔɔ Yesaia yitso 21 lɛ ateŋ eko fɛɛ eko shishi kɛ wiemɔ ni ji “kojomɔ he gbalɛ.” (Yesaia 21:1, 11, 13) Yitso 22 lɛ hu jeɔ shishi nakai nɔŋŋ, akɛ: “Ninaa jɔɔ lɛ kojomɔ he gbalɛ: Mɛni feɔo ni okɛ omɛi lɛ fɛɛ ekwɔ kɛtee tsũi ayiteaŋ nɛɛ?” (Yesaia 22:1) “Ninaa jɔɔ lɛ” miitsɔɔ Yerusalem. Atsɛɔ maŋtiase lɛ ákɛ jɔɔ ejaakɛ eyɛ mli akɛ ekã shikpɔŋ ní nɔ kwɔ nɔ moŋ, shi gɔji ní nɔ kwɔlɔ ebɔle lɛ kɛkpe. Ekɛ “ninaa” yɛ tsakpaa ejaakɛ akɛ ŋwɛi ninaai kɛ kpojiemɔi babaoo ha yɛ jɛmɛ. Enɛ hewɔ lɛ, esa akɛ maŋtiase lɛ mli bii abo Yehowa wiemɔi atoi. Shi yɛ no najiaŋ lɛ, amɛku amɛhiɛ amɛfɔ̃ enɔ ni amɛkplaŋ kɛtee apasa jamɔ mli. Henyɛlɔi ní ebawo maŋtiase lɛ he ká lɛ ji Nyɔŋmɔ dɛŋdade kɛha kojomɔ ní ekɛshiɔ ewebii ní ekɔ gbɛ fɔŋ nɛɛ.—5 Mose 28:45, 49, 50, 52.
5. Eeenyɛ efee akɛ mɛni hewɔ gbɔmɛi kwɔɔ kɛyaa amɛtsũi ayiteaŋ lɛ?
5 Kadimɔ akɛ Yerusalem maŋ lɛ mli bii lɛ ‘kɛ amɛmɛi lɛ fɛɛ ekwɔ kɛtee’ amɛtsũi lɛ ayiteaŋ. Blema lɛ, Israelbii lɛ feɔ amɛtsũi lɛ ayiteaŋ tɛtrɛɛ, ni bei pii lɛ wekui buaa amɛhe naa yɛ jɛmɛ. Yesaia etsɔɔɔ nɔ hewɔ ní amɛfee nakai yɛ be nɛɛ mli lɛ, shi ewiemɔi lɛ tsɔɔ akɛ akpɛlɛɛɛ amɛnɔ. Belɛ, eeenyɛ efee akɛ amɛkwɔ kɛtee amɛtsũi lɛ ayiteaŋ koni amɛyakpa amɛ apasa nyɔŋmɔi lɛ fai. Enɛ ji nɔ ni amɛfeɔ yɛ afii ní tsɔ Yerusalem hiɛkpatamɔ yɛ afi 607 D.Ŋ.B. lɛ hiɛ lɛ mli fɛɛ.—Yeremia 19:13; Zefania 1:5.
6. (a) Mɛɛ shihilɛi yaa nɔ yɛ Yerusalem? (b) Mɛni hewɔ mɛi komɛi amli filiɔ amɛ lɛ, shi mɛni kã amɛhiɛ?
6 Yesaia tee nɔ akɛ: “Bo ní omli eyi obɔ kɛ hoofeemɔ, maŋ kɛ emli kiŋkãa, mlifilimɔ maŋ! Omli mɛi ní enyɔnyɔi lɛ, jeee klante naa amɛnyɔ yɛ, ni jeee ta mli hu amɛgboi yɛ!” (Yesaia 22:2) Mɛi babaoo eke yuu kɛba maŋtiase lɛ mli, ni ekɛ basabasafeemɔ eba. Gbɔmɛi ní nyiɛ gbɛjegbɛi anɔ lɛ efee hoo ni amɛmiishe gbeyei. Shi, mɛi komɛi hu amli efili amɛ, ekolɛ akɛni amɛnuɔ he akɛ amɛyɛ shweshweeshwe aloo akɛni amɛheɔ amɛyeɔ akɛ oshara lɛ sɛɛ miifo lɛ hewɔ.a Shi, eji kwashia feemɔ akɛ amɛmli aaafili amɛ yɛ be ní tamɔ nɛkɛ mli. Mɛi ni yɔɔ maŋtiase lɛ mli lɛ ateŋ mɛi pii baagboi yiwalɛ gbele ní naa wa fe klante naa gbele tete po. Kɛ́ awo maŋ he ká lɛ, atsĩɔ niyenii ní jɛɔ sɛɛ kɛbaa maŋ lɛ mli lɛ fɛɛ naa. Nɔ ni abua naa yɛ maŋtiase lɛ mli lɛ nɔ gbɔɔ. Gbɔmɛi ní hɔmɔ miigbe amɛ kɛ mɛi babaoo ní atsĩ amɛnaa awo fimɔ shihilɛi amli lɛ kɛ tsɛŋemɔ helai baa. Enɛ hewɔ lɛ mɛi ni yɔɔ Yerusalem lɛ ateŋ mɛi pii baagboi kɛtsɔ hɔmɔ kɛ tsɛŋemɔ helai anɔ. Enɛ ba mli yɛ afi 607 D.Ŋ.B. kɛ afi 70 Ŋ.B. fɛɛ.—2 Maŋtsɛmɛi 25:3; Yaafo 4:9, 10.b
7. Mɛni Yerusalem nɔyelɔi lɛ fee yɛ káwoo lɛ mli, ni mɛni ba amɛnɔ?
7 Mɛɛ hiɛnyiɛmɔ Yerusalem nɔyelɔi lɛ kɛha yɛ amanehulu be nɛɛ mli? Yesaia haa hetoo akɛ: “Olumɛi lɛ fɛɛ kwa ejo foi kɛtee, ahiɛɛɛ gãi tete ni amɔmɔ amɛ! Mɛi ní ana yɛ omli lɛ fɛɛ lɛ amɛmiijo foi kɛmiiya shɔŋŋ ni amɔmɔ amɛ!” (Yesaia 22:3) Nɔyelɔi lɛ kɛ hii kãkãlɔi lɛ miijo foi ni amɔmɔ amɛ! Ahiɛɛɛ gãi ní atá yɛ amɛnɔ po, kɛkɛ ni amɔmɔ amɛ ni aloo amɛ kɛtee ákɛ gboklɛfoi. Enɛ ba yɛ afi 607 D.Ŋ.B. Beni amɛgbu fɔlɔ yɛ Yerusalem gbogboi lɛ amli sɛɛ lɛ, Maŋtsɛ Zedekia kɛ ehii kãkãlɔi lɛ jo foi nyɔɔŋteŋ. Henyɛlɔi lɛ ná amɛle, ni amɛtiu amɛ, ni amɛyanina amɛ yɛ Yeriko ŋã kpalanaa lɛ nɔ. Hii kãkãlɔi lɛ gbɛ amɛshwã. Amɔ Zedekia, ni ashwila lɛ, ni awo lɛ akɔɔble gbokɛlɛi, ni agbala lɛ kɛtee Babilon. (2 Maŋtsɛmɛi 25:2-7) Kwɛ amanehulu shihilɛ ní anɔkwa ní eyeee lɛ kɛba enɔ!
Hejɔ̃mɔ yɛ Amanehulu lɛ Hewɔ
8. (a) Te Yesaia fee enii yɛ gbalɛ ní gbaa amanehulu ní baaba Yerusalem nɔ lɛ efɔ̃ɔ shi lɛ he eha tɛŋŋ? (b) Te shihilɛ lɛ baafee tɛŋŋ yɛ Yerusalem?
8 Gbalɛ nɛɛ sa Yesaia he waa diɛŋtsɛ. Ekɛɛ: “Nyɛfɔ̃ɔa mi kwɛmɔ ní mafó waa! Nyɛkagbaa nyɛhe naa akɛ nyɛmiishɛje mimii yɛ mimaŋ biyoo lɛ hiɛkpatamɔ lɛ hewɔ!” (Yesaia 22:4) Yesaia ye nɔ ni agba afɔ̃ shi ní baaba Moab kɛ Babilon nɔ lɛ he awerɛho. (Yesaia 16:11; 21:3) Agbɛnɛ ehejɔ̃mɔ kɛ eyaafo lɛ mli wa kwraa po beni esusuɔ amanehulu ní baaba lɛ diɛŋtsɛ emaŋbii lɛ anɔ lɛ he lɛ. Anyɛɛɛ ashɛje emii. Mɛni hewɔ? “[Ejaakɛ] hoofeemɔ kɛ nɔnaanaamɔ kɛ butumɔ gbi ní jɛ Nuntsɔ, Yehowa Zebaot, ŋɔɔ ni yɛ ninaa jɔɔ lɛ mli; aakumɔ gbogboi lɛ, aabolɔ kɛmiiya gɔji lɛ anɔ.” (Yesaia 22:5) Yerusalem baayi obɔ kɛ basabasafeemɔ kɛ hoofeemɔ. Gbɔmɛi baakpa shi kɛya kɛba kɛ gbeyeishemɔ, ní amɛbɛ yiŋtoo ko. Kɛ́ henyɛlɔi lɛ bɔi maŋtiase lɛ he gbogboi lɛ kuumɔ lɛ, abaanu ní “aabolɔ kɛmiiya gɔji lɛ anɔ.” Ani enɛ tsɔɔ akɛ maŋtiase lɛ mli bii lɛ baabolɔ amɛtsɛ́ Nyɔŋmɔ yɛ esɔlemɔtsu krɔŋkrɔŋ ní yɔɔ Moria Gɔŋ lɛ nɔ lɛ mli? Ekolɛ amɛaafee nakai. Shi, anɔkwa ní amɛyeee lɛ hewɔ lɛ, ekolɛ nɔ ni enɛ tsɔɔ pɛ ji akɛ, amɛbolɔmɔi ní tsɔɔ gbeyeishemɔ lɛ baajije yɛ gɔji ní ebɔle amɛhe lɛ anɔ.
9. Tsɔɔmɔ bɔ ni asraafoi ní wo Yerusalem he gbeyei lɛ ji.
9 Mɛɛ henyɛlɔ nɛkɛ woɔ Yerusalem he gbeyei lɛ? Yesaia kɛɔ wɔ akɛ: “Elam hiɛ gãi mlibii akotoku kɛ shwiilii kɛ gbɔmɛi kɛ okpɔŋɔiatsɛmɛi kɛmiiba, ni Kir hu miijie tsɛ̃ŋ kpo.” (Yesaia 22:6) Henyɛlɔi lɛ ewula amɛhe kɛ tawuu nii jogbaŋŋ. Amɛyɛ gãitsɛ̃lɔi ní amɛgãimlibii akotoku lɛ eyimɔ obɔbɔ kɛ gãimlibii. Tabilɔi miifee amɛtsɛ̃ŋi klalo kɛha ta. Amɛyɛ ta shwiilii kɛ okpɔŋɔi ní atsɔse amɛ kɛha tawuu. Mɛi ni fata ta lɛ he ji asraafoi ni jɛ Elam, ní kã he ni amrɔ nɛɛ eji Persia Ŋshɔnine lɛ kooyigbɛ lɛ, kɛ asraafoi ní jɛ Kir hu, ní ekolɛ ebɛŋkɛ Elam lɛ. Nakai shikpɔji lɛ atã ní atsĩ lɛ tsɔɔ akɛ tutualɔi lɛ jɛ shɔŋŋ diɛŋtsɛ kɛba. Etsɔɔ hu akɛ ekolɛ Elambii gãitsɛ̃lɔi fata asraafoi ní woɔ Yerusalem he gbeyei yɛ Hezekia gbii lɛ amli lɛ ahe.
Hefamɔ he Mɔdɛŋbɔɔi
10. Mɛɛ nibii ní tee nɔ tsɔɔ shihilɛ fɔŋ ní baaba maŋtiase lɛ nɔ?
10 Yesaia tsɔɔ shihilɛ ní tee nɔ lɛ mli akɛ: “Aaaba mli akɛ ojɔɔi kpakpai lɛ amli aaayimɔ obɔbɔ kɛ shwiilii sɔŋŋ, ni okpɔŋɔiatsɛmɛi lɛ hu aaabɔ nsara yɛ agbó lɛ naa. Ni eeejie Yuda nɔhaanɔ̃ lɛ.” (Yesaia 22:7, 8a) Shwiilii kɛ okpɔŋɔi babaoo eyi jɔɔi ní yɔɔ Yerusalem maŋtiase lɛ sɛɛ lɛ amli, ni amɛdamɔ amɛgbɛhei ní amɛfee klalo ní amɛbaatutua maŋtiase lɛ agbói lɛ. Mɛni ji “Yuda nɔhaanɔ̃” ní ajie lɛ? Eeenyɛ efee akɛ, eji maŋtiase lɛ naa agbó, ni enɔ kunimyeli tsɔɔ shihilɛ fɔŋ ní baaba ehefalɔi lɛ anɔ.c Kɛ́ ajie nɔhaanɔ̃ ní fãa ehe nɛɛ kɛjɛ jɛmɛ lɛ, maŋtiase lɛ naa baakã kɛha etutualɔi lɛ.
11, 12. Mɛɛ hefamɔ nibii ahe gbɛjianɔ Yerusalem maŋ lɛ mli bii lɛ to?
11 Agbɛnɛ Yesaia gbala jwɛŋmɔ kɛtee mɔdɛŋ ní gbɔmɛi lɛ bɔɔ ní amɛfã amɛhe lɛ nɔ. Amɛ klɛŋklɛŋ susumɔ ji—tawuu nii! “Nakai gbi lɛ oookwɛ koo lɛ shia lɛ mli tawuu nii lɛ. Ni nyɛaana akɛ David maŋ lɛŋ gbogboi ní egbalagbalai lɛ fá, ni nyɛaabua shishigbɛ kpaakpo lɛ mli nu lɛ naa.” (Yesaia 22:8b, 9) Akɛ tawuu nii toɔ koo mli shia lɛ mli tawuu nitoohe lɛ. Salomo ji mɔ ni ma tawuu nitoohe nɛɛ. Akɛni akɛ tsenedru tsei ní jɛ Lebanon ma hewɔ lɛ, abale lɛ akɛ “Lebanon koo lɛ tsũ lɛ.” (1 Maŋtsɛmɛi 7:2-5) Akwɛ gbogbo lɛ hei ní egbalagbalai lɛ. Abua nu naa—eji hefãmɔ nifeemɔ ko ni he hiaa. Nu he hiaa gbɔmɛi ní amɛhi shi. Kɛ́ nu bɛ lɛ, maŋtiase ko nyɛŋ ahi shi. Shi, kadimɔ akɛ awieee nɔ ko kwraa yɛ Yehowa ní amɛkɛ amɛhiɛ aaafɔ̃ enɔ kɛha kpɔmɔ lɛ he. Shi moŋ, amɛkɛ amɛhiɛ fɔ̃ nibii ní amɛ diɛŋtsɛ amɛyɔɔ lɛ anɔ. Ekaba kɔkɔɔkɔ akɛ wɔɔtɔ̃ nakai tɔmɔ lɛ!—Lala 127:1.
12 Mɛni abaanyɛ afee yɛ nakai fɔji ní eba maŋtiase lɛ he gbogbo lɛ mli lɛ he? “Nyɛaakane Yerusalem tsũi lɛ, ni nyɛaakumɔ tsũi lɛ tete ní nyɛkɛwaje gbogbo lɛ.” (Yesaia 22:10) Akwɛ shiai lɛ koni ana amɛteŋ nɔ ni abaanyɛ akumɔ koni aná nibii ní abaanyɛ akɛsaa fɔji ni eba gbogbo lɛ mli lɛ. Afee enɛ koni akɛbɔ mɔdɛŋ ní akɛtsĩ henyɛlɔ lɛ naa ní ekanyɛ eye gbogbo lɛ nɔ kunim kɛmɔ shi.
Gbɔmɛi ní Bɛ Hemɔkɛyeli
13. Gbɔmɛi lɛ bɔ mɔdɛŋ ní amɛha maŋ lɛ aná nu be fɛɛ be yɛ mɛɛ gbɛ nɔ, shi amɛhiɛ kpá namɔ nɔ?
13 “Nyɛaagbá nujɔɔ yɛ gbogboi enyɔ lɛ teŋ, koni nyɛkɛbua kpaakpo momo lɛŋ nu lɛ naa. Shi nyɛhiɛ tsɔŋ mɔ ni fee enɛ lɛ, ni mɔ ni to kɛjɛ jeeŋmɔ lɛ, nyɛkwɛŋ lɛ gbɛ.” (Yesaia 22:11) Mɔdɛŋ ní abɔ ní akɛbua nu naa, ní awie he yɛ biɛ kɛ kuku 9 lɛ hu mli lɛ, haa wɔkaiɔ nɔ ni Maŋtsɛ Hezekia fee ní ekɛbu maŋtiase lɛ he kɛjɛ Ashurbii atutuamɔ mli lɛ. (2 Kronika 32:2-5) Shi, gbɔmɛi ní yɔɔ maŋtiase lɛ mli yɛ Yesaia gbalɛ nɛɛ mli lɛ bɛ hemɔkɛyeli kwraa. Beni amɛtsuɔ maŋtiase lɛ hebuu he nii lɛ, amɛsusuuu Bɔlɔ lɛ he, tamɔ bɔ ni Hezekia susu ehe lɛ.
14. Yɛ kɔkɔbɔɔ shɛɛ sane ní Yehowa kɛhaa lɛ fɛɛ sɛɛ lɛ, mɛɛ su ní nilee bɛ mli gbɔmɛi lɛ yɔɔ?
14 Yesaia tee nɔ akɛ: “Nakai gbi lɛ Nuntsɔ, Yehowa Zebaot, aaakpee mɛi kɛaaba, ní amɛbafó ní amɛbaye ŋkɔmɔ ní amɛshɛ amɛyi ní amɛmĩa kpekpe. Shi naa, nyamɔ kɛ mlifilimɔ sɔŋŋ nɛ: aagbegbee tsinai ni aagbegbee tooi, aaye loo ni aanu wein: ‘Nyɛhaa wɔyea nii ní wɔnua dãa; ejaakɛ wɔ́ be nɛ wɔgboi!’” (Yesaia 22:12, 13) Yerusalem maŋ lɛ mli bii lɛ ejieee heshwamɔ kpo yɛ atua ní amɛtse amɛshi Yehowa lɛ he. Amɛfooo, amɛshɛɛɛ amɛyi, ni amɛbumɔɔɔ kpekpe ní amɛkɛaafee tsuitsakemɔ he okadi. Kɛji amɛaafee nakai lɛ, kulɛ eeenyɛ eba akɛ Yehowa baaha amɛye amɛhe kɛjɛ nibii ni yɔɔ gbeyei ní baa lɛ amli. Shi yɛ no najiaŋ lɛ, amɛŋmɛɛ amɛhe amɛha bɔlɛnamɔ mli ŋɔɔmɔyeli moŋ. Nakai su lɛ yɛ mɛi babaoo ní ejieee Nyɔŋmɔ mli hemɔkɛyeli kpo lɛ hu ateŋ ŋmɛnɛ. Akɛni amɛbɛ hiɛnɔkamɔ—yɛ gbohiiashitee lɛ loo wala yɛ Paradeiso shikpɔŋ ni baaba wɔsɛɛ lɛ mli hewɔ lɛ—amɛdiɔ shihilɛ ní haa akɛ he woɔ nɔ fɛɛ nɔ feemɔ mli lɛ sɛɛ, ni amɛkɛɔ akɛ: “Nyɛhaa wɔyea nii ni wɔnua dãai, ejaakɛ wɔ́ lɛ, wɔbaagboi!” (1 Korintobii 15:32) Kwɛ bɔ ni amɛkwɛɛɛ nii kɛyaaa shɔŋŋ hã! Kɛ́ amɛkɛ amɛhiɛ baafɔ̃ Yehowa nɔ lɛ, no lɛ amɛbaaná hiɛnɔkamɔ ni hiɔ shi daa!—Lala 4:7-9; Abɛi 1:33.
15. (a) Mɛɛ kojomɔ shɛɛ sane Yehowa jaje eshi Yerusalem, ni namɛi tsu ekojomɔi lɛ ahe nii? (b) Mɛni hewɔ Kristendom baana amanehulu ní tamɔ nɔ ni ba Yerusalem nɔ lɛ pɛpɛɛpɛ lɛ?
15 Yerusalem maŋ lɛ mli bii ní awo amɛhe ká lɛ efeeŋ shweshweeshwe. Yesaia kɛɛ akɛ: “Yehowa Zebaot jie enɛ kpo yɛ mitoiiaŋ akɛ: Lɛɛlɛŋ akɛ aŋɔŋ nɛkɛ nɔ̃ sha nɛɛ afaŋ nyɛ kɛyashi beyinɔ ní nyɛaagboi! Nuntsɔ, Yehowa Zebaot, kɛɛ.” (Yesaia 22:14) Gbɔmɛi lɛ atsuiwalɛ hewɔ lɛ, akɛ amɛhe ekeŋ amɛ. Bɔ fɛɛ bɔ ní fee lɛ, gbele baaba amɛnɔ kɛ̃. Nɔ ko ní baaba mli diɛŋtsɛ nɛ. Nuntsɔ, Yehowa Zebaot diɛŋtsɛ ekɛɛ. Yɛ Yesaia gbalɛ wiemɔi lɛ amlibaa mli lɛ, amanehulu ba Yerusalem ní yeee anɔkwa lɛ nɔ shii enyɔ sɔŋŋ. Babilon asraafoi kpata ehiɛ, ni sɛɛ mli lɛ Roma asraafoi hu fee nakai. Nakai nɔŋŋ amanehulu baaba Kristendom ní yeee anɔkwa lɛ mli bii ní kɛɔ akɛ amɛjáa Nyɔŋmɔ, shi amɛkɛ amɛnitsumɔi kwaa lɛ diɛŋtsɛ lɛ hu nɔ. (Tito 1:16) Kristendom kɛ je lɛŋ jamɔi krokomɛi ní kuɔ Nyɔŋmɔ jalɛ gbɛ̀i lɛ amli lɛ ahe eshai lɛ fɛɛ “eshɛ ŋwɛi tɔɔ.” Taakɛ Yerusalem ni ji hemɔkɛyeli kwalɔ lɛ tɔmɔ lɛ ji lɛ, amɛ hu amɛtɔmɔ lɛ da tsɔ fe bɔ ni abaanyɛ akpãta aha.—Kpojiemɔ 18:5, 8, 21.
Tsulɔ Nukpa ní Feɔ Pɛsɛmkunya
16, 17. (a) Namɔ nine shɛ kɔkɔbɔɔ shɛɛ sane nɔ kɛjɛ Yehowa ŋɔɔ agbɛnɛ, ni mɛni hewɔ? (b) Mɛni baaba Shebna nɔ, yɛ otii ní nɔ kwɔlɔ ní ekɛmamɔ ehiɛ lɛ hewɔ?
16 Agbɛnɛ gbalɔ lɛ gbala ejwɛŋmɔ kɛjɛ maŋ ní yeee anɔkwa lɛ nɔ kɛtee mɔ aŋkro ko ní yeee anɔkwa lɛ nɔ. Yesaia ŋma akɛ: “Bɔ ni Nuntsɔ, Yehowa Zebaot, kɛɛ nɛ: Tee shi ní oya nɛkɛ tsulɔ nukpa Shebna nɛɛ ní kwɛɔ shia lɛ ŋɔɔ [ní oyakɛɛ lɛ akɛ]: Mɛni oyɔɔ yɛ biɛ? ni namɔ oyɔɔ yɛ biɛ hewɔ okpɛ́ ofũuhe yɛ biɛ nɛɛ? Ekpɛ́ efũuhe yɛ he ni kwɔ, ekpɛ́ tɛsaa mli ekɛfee eshihilɛhe!”—Yesaia 22:15, 16.
17 Shebna ji ‘tsulɔ nukpa ní kwɛɔ shia lɛ,’ ekolɛ Maŋtsɛ Hezekia shia lɛ. Enɛ hewɔ lɛ, ehiɛ gbɛhe ní nɔ kwɔ waa, ni maŋtsɛ lɛ pɛ ji mɔ ní nɔ kwɔ fe lɛ. Aakpa babaoo gbɛ yɛ edɛŋ. (1 Korintobii 4:2) Ni kɛlɛ, yɛ nɔ najiaŋ ní esa akɛ ekɛ maŋ lɛŋ saji ahe susumɔ aye klɛŋklɛŋ gbɛhe lɛ, Shebna miitiu anunyam sɛɛ kɛha lɛ diɛŋtsɛ ehe. Eha akpɛ́ fũuhe fɛfɛo ko—tamɔ maŋtsɛ lɛ nɔ̃ lɛ pɛpɛɛpɛ—aha lɛ yɛ tɛsaa ko ní nɔ kwɔ mli. Beni Yehowa na enɛ lɛ, ekɛ mumɔ tsirɛ Yesaia ni ebɔ tsulɔ nukpa ní yeee anɔkwa lɛ kɔkɔ akɛ: “Naa, Yehowa baashɛo afɔ̃, tamɔ hewalɔ shɛɔ nɔ̃ fɔ̃ɔ, ni eeemɔ omli tswɛ́; kotamɔ eeekotao kokloo, ni eeeshɛo efɔ̃ shikpɔŋ ní da naakpa ko nɔ; jɛi oooyagbo yɛ, ni onunyam shwiilii lɛ aaaka jɛi, bo ní oji hiɛgbele ha onuntsɔ we lɛ! Ni mashwieo kɛaajɛ onitsumɔ lɛ mli, ni aaakpao yɛ oyelihe lɛ.” (Yesaia 22:17-19) Shebna kome pɛ ehe ní esusuɔ hewɔ lɛ, enaŋ gbonyobu folo kɛkɛ po yɛ Yerusalem. Yɛ no najiaŋ lɛ, abaakota lɛ kokloo ni abaashɛ lɛ afɔ̃, ní eyagbo yɛ maŋsɛɛ shɔŋŋ. Kɔkɔbɔɔ yɛ enɛ mli kɛha mɛi fɛɛ ní akɛ nɔkwɛmɔ hegbɛi eha amɛ yɛ Nyɔŋmɔ webii ateŋ lɛ. Hewalɛ ní amɛkɛaatsu nii yɛ gbɛ fɔŋ nɔ lɛ baaha nakai hegbɛ lɛ aje amɛdɛŋ, ni ebaanyɛ ekɛ amɛjiemɔ kwraa po aba.
18. Namɔ baaye Shebna najiaŋ lɛ, ni Shebna nitsumɔ atadei kɛ David we lɛ naa samfee ní akɛbaaha nɛkɛ mɔ nɛɛ tsɔɔ mɛni?
18 Shi, mɛɛ gbɛ nɔ abaatsɔ ajie Shebna kɛjɛ egbɛhe lɛ? Yehowa tsɔ Yesaia nɔ etsɔɔ mli akɛ: “Aaaba mli yɛ nakai gbi lɛ nɔ akɛ matsɛ́ mitsulɔ Eliakim, Hilkia bi lɛ, kɛaaba. Ni mikɛ otade yuu lɛ aaawo lɛ, ni mikɛ ohɛfii nɔ̃ lɛ aaamĩa lɛ, ni maŋɔ onɔyeli lɛ hu mawo edɛŋ, ni eeetsɔ tsɛ eha Yerusalembii lɛ kɛ Yuda we lɛ. Ni maŋɔ David we lɛ samfee lɛ mafɔ̃ ekɔŋ nɔ, ni kɛ́ egbele lɛ, mɔ ko bɛ ní aaaŋá, ni kɛ́ eŋá lɛ, mɔ ko bɛ ní aaagbele.” (Yesaia 22:20-22) Kɛ́ akɛ Eliakim ye Shebna najiaŋ lɛ, akɛ tsulɔ nukpa nitsumɔ atadei lɛ baawo lɛ ni akɛ David we lɛ naa samfee lɛ baaha lɛ. Biblia lɛ kɛ wiemɔ “samfee” lɛ tsuɔ nii kɛfeɔ hegbɛ, nɔyeli, loo hewalɛ he mfoniri. (Okɛto Mateo 16:19 he.) Blema lɛ, maŋtsɛ ŋaawolɔ, ní ahaa ehiɛɔ samfei lɛ, nyɛɔ ekwɛɔ maŋtsɛwe lɛ piai lɛ fɛɛ nɔ, ni enyɛɔ etsɔɔ mɛi po ni esa akɛ ahe amɛ awo maŋtsɛ lɛ sɔɔmɔ mli. (Okɛto Kpojiemɔ 3:7, 8 he.) Enɛ hewɔ lɛ, tsulɔ nukpa gbɛhe lɛ he hiaa waa, ni akpaa babaoo gbɛ kɛjɛɔ mɛi ní sɔmɔɔ yɛ nakai gbɛhe lɛ mli lɛ adɛŋ. (Luka 12:48) Ekolɛ Shebna bɔɔ mɔdɛŋ, shi akɛni eyeee anɔkwa hewɔ lɛ, Yehowa kɛ mɔ kroko baaye enajiaŋ.
Mfonirifeemɔŋ Shiŋmlitsei Enyɔ
19, 20. (a) Eliakim baafee jɔɔmɔ kɛha emaŋbii lɛ yɛ mɛɛ gbɛ nɔ? (b) Mɛni baaba mɛi ni yaa nɔ amɛkɛ amɛhiɛ fɔ̃ɔ Shebna nɔ lɛ anɔ?
19 Yɛ naagbee lɛ, Yehowa kɛ mfonirifeemɔ wiemɔ tsu nii ni ekɛtsɔɔ bɔ ni abaahe hegbɛ lɛ kɛjɛ Shebna dɛŋ ní akɛha Eliakim lɛ mli. Ejaje akɛ: “Maŋɔ lɛ [Eliakim] maka he ko ní wa tamɔ shiŋmlitso, ni eeetsɔ anunyam maŋtsɛsɛi eha etsɛ we lɛ; ni akɛ etsɛ we lɛ anunyam lɛ fɛɛ aaatsotsoro enɔ, eseshi kɛ eshwiei fɛɛ, kɛ emli nibii bibii fɛɛ, kɛjɛ kpuji anɔ kɛyashi gbɛ́i anɔ fɛɛ. No gbi lɛ nɔ lɛ, Yehowa Zebaot kɛɛ, shiŋmlitso [Shebna] ní aŋɔka he ko ní wa lɛ, aaafee wɔkɔwɔkɔ, ni aaafo afɔ̃ shi, ni jatsu ní tsotsoro nɔ lɛ aaafite; ejaakɛ Yehowa ekɛɛ.”—Yesaia 22:23-25.
20 Yɛ kukuji nɛɛ amli lɛ, klɛŋklɛŋ shiŋmlitso lɛ ji Eliakim. Ebaatsɔ “anunyam maŋtsɛsɛi” eha etsɛ, Hilkia we lɛ. Ákɛ mɔ ni tamɔɔɔ Shebna lɛ, eshwieŋ etsɛ we lɛ hiɛ shi, loo ekɛ heguɔgbee baŋ etsɛ we lɛ nɔ. Eliakim baafee shia lɛ mli nibii fɛɛ, ni ji, mɛi krokomɛi ní sɔmɔɔ maŋtsɛ lɛ asɛɛfilɔ. (2 Timoteo 2:20, 21) Nɔ ni tamɔɔɔ nakai lɛ, shiŋmlitso ni ji enyɔ lɛ kɔɔ Shebna he. Eyɛ mli akɛ ekolɛ etamɔ mɔ ní yɔɔ shweshweeshwe moŋ, shi abaajie lɛ. Mɔ fɛɛ mɔ ní yaa nɔ ekɛ ehiɛ fɔ̃ɔ enɔ lɛ nine baanyɛ shi.
21. Namɔ akɛ mɔ kroko ye enajiaŋ yɛ ŋmɛnɛŋmɛnɛ beaŋ, taakɛ afee Shebna lɛ, mɛni hewɔ, ni namɔ akɛye enajiaŋ lɛ?
21 Shebna niiashikpamɔ lɛ kaiɔ wɔ akɛ esa akɛ mɛi ní kpɛlɛɔ sɔɔmɔ hegbɛi anɔ yɛ mɛi ní kɛɔ akɛ amɛjáa Nyɔŋmɔ lɛ ateŋ lɛ kɛtsu nii ní amɛkɛsɔmɔ mɛi krokomɛi ní amɛkɛ yijiemɔ abaha Yehowa. Esaaa akɛ amɛkɛ amɛgbɛhe lɛ tsuɔ nii yɛ gbɛ fɔŋ nɔ ní amɛkɛnáa nii loo ní amɛkɛnáa hiɛnyam amɛhaa amɛhe. Ákɛ nɔkwɛmɔnɔ lɛ, Kristendom kɛ be kakadaŋŋ ewó lɛ diɛŋtsɛ ehe nɔ akɛ tsulɔ nukpa ní ahala lɛ, ni ji Yesu Kristo najiaŋdamɔlɔ yɛ shikpɔŋ nɛɛ nɔ. Shi, taakɛ bɔ ni Shebna wo etsɛ hiɛgbele kɛtsɔ lɛ diɛŋtsɛ ehiɛnyam taomɔ nɔ lɛ, nakai nɔŋŋ Kristendom hiɛnyiɛlɔi lɛ hu kɛ heguɔgbee eba Bɔlɔ lɛ nɔ kɛtsɔ ninamɔ kɛ hewalɛ ní amɛbua naa amɛha amɛhe lɛ nɔ. No hewɔ lɛ, beni kojomɔ be ní ‘baaje shishi kɛjɛ Nyɔŋmɔ we lɛ’ shɛ yɛ afi 1918 lɛ, Yehowa jie Kristendom kɛjɛ jɛmɛ. Atsɔɔ tsulɔ nukpa kroko yɛ enajiaŋ—“tsulɔ nukpa anɔkwafo kɛ nilelɔ”—ni ahala lɛ akɛ ekwɛ Yesu shiabii ní yɔɔ shikpɔŋ nɔ lɛ anɔ. (1 Petro 4:17; Luka 12:42-44) Nɛkɛ kuu ní mɛi babaoo yɔɔ mli nɛɛ ejie ehe kpo akɛ esa mɔ ní akɛ David odehei awe lɛ naa “samfee” lɛ haa lɛ. Taakɛ “shiŋmlitso” ní anyɛɔ akɛ he fɔ̃ɔ nɔ ji lɛ, ejie ehe kpo akɛ eji sɛɛfimɔ nɔ̃ ní anyɛɔ akɛ he fɔ̃ɔ nɔ kɛha “nibii” srɔtoi lɛ fɛɛ, ni ji Kristofoi ní afɔ amɛ mu, ní tsuɔ gbɛnaa nii srɔtoi ahe nii, ní kɛ amɛhiɛ fɔ̃ɔ enɔ kɛha mumɔŋ niyenii lɛ. Ni taakɛ ‘gbɔi ní yɔɔ’ blema Yerusalem ‘agbói lɛ amli’ lɛ ji lɛ, “tooi krokomɛi” lɛ hu kɛ amɛhiɛ fɔ̃ɔ “shiŋmlitso” nɛɛ, ni ji ŋmɛnɛŋmɛnɛ beaŋ Eliakim lɛ nɔ.—Yohane 10:16; 5 Mose 5:14.
22. (a) Mɛni hewɔ mɔ kroko ní akɛye Shebna najiaŋ ákɛ tsulɔ nukpa lɛ ba yɛ ebe naa pɛpɛɛpɛ lɛ? (b) Mɛni hewɔ “tsulɔ nukpa anɔkwafo kɛ nilelɔ” lɛ halamɔ yɛ ŋmɛnɛŋmɛnɛ beaŋ lɛ ba yɛ ebe naa pɛpɛɛpɛ lɛ?
22 Eliakim baye Shebna najiaŋ beni Sanherib kɛ esraafoi akuu lɛ woɔ Yerusalem he gbeyei lɛ. Nakai nɔŋŋ hu ahala “tsulɔ nukpa anɔkwafo kɛ nilelɔ” lɛ akɛ esɔmɔ yɛ naagbee be lɛ, ní baaba naagbee yɛ be mli ní Satan kɛ etai babaoo lɛ fãa kɛha naagbee tutuamɔ ní amɛkɛaaba “Nyɔŋmɔ Israel lɛ” kɛ amɛhefatalɔi ni ji tooi krokomɛi lɛ anɔ lɛ mli lɛ. (Galatabii 6:16) Taakɛ eji yɛ Hezekia gbii lɛ amli lɛ, nakai tutuamɔ lɛ baaba naagbee kɛ hiɛkpatamɔ kɛha jalɛ henyɛlɔi lɛ. Mɛi ni kɛ amɛhe kpasaa “he ko ní wa tamɔ shiŋmlitso,” ni ji tsulɔ nukpa anɔkwafo lɛ ayi baaná wala, tamɔ bɔ ni Yerusalem maŋ lɛ mli bii anɔkwafoi lɛ ayi ná wala kɛtsɔ Ashurbii lɛ atutuamɔ ní ba Yuda nɔ lɛ mli lɛ. Belɛ, kwɛ bɔ ni nilee yɔɔ mli akɛ wɔkɛ wɔhe akakpasa Kristendom “shiŋmlitso” ní akpoo lɛ lɛ!
23. Yɛ naagbee lɛ mɛni ba Shebna nɔ, ni mɛni wɔbaanyɛ wɔkase kɛjɛ enɛ mli?
23 Mɛni ba Shebna nɔ? Wɔbɛ nɔ ko ní aŋma afɔ̃ shi ní tsɔɔ bɔ ni gbalɛ ní kɔɔ ehe, ní aŋma yɛ Yesaia 22:18 lɛ ba mli eha. Beni ewó ehe nɔ ní no sɛɛ lɛ ashwie ehiɛ shi lɛ, ebatamɔ Kristendom pɛpɛɛpɛ, shi ekolɛ ekase nii kɛjɛ tsɔsemɔ ní akɛha lɛ lɛ mli. Yɛ enɛ gbɛfaŋ lɛ, esoro lɛ kwraa yɛ Kristendom he. Beni Ashurnyo Rabshake bawie akɛ Yerusalem kɛ ehe aha akɛ aye enɔ kunim lɛ, Hezekia tsulɔ nukpa hee, Eliakim, nyiɛ kuu ní atsu amɛ akɛ amɛya ní amɛkɛ lɛ ayakpe lɛ ahiɛ. Shi, no mli lɛ Shebna fata ehe ákɛ maŋtsɛ lɛ woloŋmalɔ. Eka shi faŋŋ akɛ, no mli lɛ Shebna kã he eesɔmɔ maŋtsɛ lɛ lolo. (Yesaia 36:2, 22) Kwɛ nikasemɔ fɛfɛo ni enɛ ji kɛha mɛi ni sɔɔmɔ hegbɛi jeɔ amɛdɛŋ yɛ Nyɔŋmɔ gbɛjianɔtoo lɛ mli lɛ! Yɛ nɔ najiaŋ ní eeedɔ amɛ ní amɛmli aaawo la yɛ he lɛ, eeefee nilee gbɛ kɛha amɛ akɛ amɛaaya nɔ amɛsɔmɔ Yehowa yɛ gbɛhe fɛɛ gbɛhe ní eeeŋmɛ gbɛ lɛ mli. (Hebribii 12:6) Kɛ́ amɛfee nakai lɛ, no lɛ amɛbaajo amanehulu ní baaba Kristendom nɔ lɛ naa foi. Shi moŋ, amɛbaaná Nyɔŋmɔ hiɛ duromɔ kɛ edɛŋ jɔɔmɔ kɛya naanɔ.
[Shishigbɛ niŋmai]
a Yɛ afi 66 Ŋ.B. lɛ, Yudafoi lɛ ateŋ mɛi babaoo amli fili amɛ beni Roma asraafoi ní bawo Yerusalem he ká lɛ gbala amɛhe shi lɛ.
b Taakɛ klɛŋklɛŋ afii oha lɛ mli yinɔsaneŋmalɔ Josephus tsɔɔ lɛ, hɔmɔ ní ba Yerusalem yɛ afi 70 Ŋ.B. lɛ naa wa aahu akɛ gbɔmɛi ye kooloi ahewolo, jwɛifɔ, kɛ jwɛi gbiŋ ní akɛhaa kooloi. Yɛ shihilɛ ko ní abɔ he amaniɛ mli lɛ, yoofɔyoo ko shã lɛ diɛŋtsɛ ebinuu ni eye.
c Yɛ gbɛ kroko nɔ lɛ, ekolɛ “Yuda nɔhaanɔ̃ lɛ” kɔɔ nɔ kroko ní buɔ maŋtiase lɛ he lɛ he, tamɔ mɔɔi ní akɛ tawuu nibii toɔ mli, ní ahaa asraafoi hiɔ mli lɛ.
[Mfoniri ni yɔɔ baafa 231]
Beni Zedekia jo foi lɛ, amɔ lɛ ni ajwara ehiŋmɛii
[Mfoniri ni yɔɔ baafa 232, 233]
Gbɛkpamɔi ní mli wa kã Yudafoi ní atsĩ amɛnaa yɛ Yerusalem lɛ ahiɛ
[Mfoniri ni yɔɔ baafa 239]
Hezekia fee Eliakim “he ko ní wa tamɔ shiŋmlitso”
[Mfoniri ni yɔɔ baafa 241]
Taakɛ Shebna fee lɛ, Kristendom hiɛnyiɛlɔi lɛ ateŋ mɛi pii kɛ heguɔgbee eba Bɔlɔ lɛ nɔ kɛtsɔ ninamɔ babaoo naabuamɔ nɔ
[Mfonirii ni yɔɔ baafa 242]
Ahala tsulɔ nukpa anɔkwafo kuu yɛ ŋmɛnɛŋmɛnɛ beaŋ koni amɛkwɛ Yesu shiabii lɛ anɔ