Yitso Nyɔŋma Kɛ Nɛɛhu
Yehowa Ba Tiro Henɔwomɔ lɛ Shi
1, 2. (a) Mɛɛ maŋtiase nɛkɛ ji blema Tiro? (b) Mɛni Yesaia gba efɔ̃ shi kɛha Tiro?
EHE yɛ “fɛo kɛwula shi” ni eyɛ “nii ni jara wa srɔtoi” babaoo. (Ezekiel 27:4, 12, An American Translation) Elɛji babaoo lɛ fãa gbɛ kɛnyiɛɔ ŋshɔ hiɛ kɛyaa shɔŋŋ. “[Ehiɛ] ba nyam yɛ ŋshɔ teŋ,” ni ekɛ ‘enii ní jara wa’ lɛ “[hã] shikpɔŋ lɛ nɔ maŋtsɛmɛi ná nii.” (Ezekiel 27:25, 33) Yɛ afii ohai kpawo D.Ŋ.B. lɛ, no mli lɛ nɛkɛ ji gbɛhe ní Tiro—ni ji Foenike maŋtiase ní yɔɔ Mediteranea ŋshɔ lɛ bokagbɛ naabu lɛ hiɛ.
2 Ni kɛlɛ, etsɛŋ ni hiɛkpatamɔ baaba Tiro nɔ. Aaafee afii 100 dani Ezekiel tsɔɔ bɔ ni eji eha nɛɛ, no mli lɛ gbalɔ Yesaia egba nɛkɛ Foenikebii amɔɔ ní wa nɛɛ shigbeemɔ, kɛ mɛi ni kɛ amɛhiɛ fɔ̃ɔ enɔ lɛ awerɛhoyeli efɔ̃ shi. Yesaia gba efɔ̃ shi hu akɛ yɛ be ko sɛɛ lɛ, Nyɔŋmɔ baagbala ejwɛŋmɔ kɛba maŋtiase nɛɛ nɔ, ni ebaaha ená shweremɔ hee ekoŋŋ. Te gbalɔ lɛ wiemɔi lɛ ba mli eha tɛŋŋ? Ni mɛni wɔbaanyɛ wɔkase kɛjɛ nibii fɛɛ ní ba Tiro nɔ lɛ mli? Nɔ ni ba enɔ lɛ kɛ nɔ hewɔ ní nibii nɛɛ ba enɔ lɛ he shishinumɔ ní mli kã shi faŋŋ ní wɔɔná lɛ baawo hemɔkɛyeli ni wɔyɔɔ yɛ Yehowa kɛ eshiwoi amli lɛ mli hewalɛ.
“Nyɛ Tarshish Lɛji, Nyɛwóa Lele!”
3, 4. (a) Nɛgbɛ Tarshish hi, ni mɛɛ wekukpaa hi Tiro kɛ Tarshish teŋ? (b) Mɛni hewɔ amlakui ní kɛ Tarshish yeɔ jara lɛ baaná yiŋtoo ní amɛaadamɔ nɔ ‘amɛwó lele’ lɛ?
3 Yesaia jaje, yɛ saneyitso ni ji “Tiro kojomɔ he gbalɛ” lɛ shishi akɛ: “Nyɛ Tarshish lɛji, nyɛwóa lele; ejaakɛ akpata ehiɛ, shĩa ko bɛ jɛi dɔŋŋ, mɔ ko eyaaa jɛi dɔŋŋ!” (Yesaia 23:1a) Aheɔ ayeɔ akɛ tsutsu lɛ kulɛ Tarshish ji Spain fã, ni ekɛ Tiro teŋ jɛkɛ waa, yɛ Mediteranea ŋshɔ lɛ bokagbɛ.a Shi kɛlɛ, Foenikebii lɛ ji amlakui ní he esa waa, ni amɛlɛji lɛ dara ni amɛsa kɛha ŋshɔ hiɛ nyiɛmɔ. Yinɔsaneŋmalɔi komɛi heɔ yeɔ akɛ Foenikebii lɛ ji mɛi ni kadi tsakpaa ní kã nyɔɔŋtsere lɛ kɛ ŋshɔ fãa kɛ eyimɔ teŋ lɛ klɛŋklɛŋ, ni amɛkɛ ŋulamii ahe nilee tsu nii kɛye amɛbua ŋshɔ hiɛ gbɛfaa. No hewɔ lɛ gbɛ kakadaŋŋ ní jɛɔ Tiro kɛyaa Tarshish lɛ jeee gbɛtsii nii ko kɛha amɛ.
4 Yɛ Yesaia gbii lɛ amli lɛ, Tarshish ni yɔɔ shɔŋŋ lɛ ji jarayelihe kɛha Tiro, ekolɛ eninamɔ lɛ jɛɛhe titri yɛ eyinɔsane be lɛ fã mli. Spain yɛ hei ní atsaa sũ mli nii babaoo yɛ, ní anáa jwiɛtɛi, dade, sanyaa, kɛ sũ mli nii krokomɛi yɛ. (Okɛto Yeremia 10:9; Ezekiel 27:12 he.) “Tarshish lɛji,” ní eeenyɛ efee akɛ amɛji lɛji ní jɛ Tiro ní kɛ Tarshish yeɔ jara lɛ, baaná yiŋtoo kpakpa ní amɛaadamɔ nɔ ‘amɛwó lele,’ ní amɛwo yara yɛ amɛmaŋ lɛji adaamɔhe lɛ hiɛkpatamɔ lɛ hewɔ.
5. Nɛgbɛ amlakui ní jɛɔ Tarshish kɛbaa lɛ baanu Tiro shigbeemɔ lɛ he adafitswaa yɛ?
5 Te amlakui ní yɔɔ ŋshɔ hiɛ lɛ aaafee tɛŋŋ amɛnu Tiro shigbeemɔ lɛ he hu? Yesaia haa hetoo akɛ: “Kitim shikpɔŋ lɛ nɔ ajɛ aha amɛle.” (Yesaia 23:1b) Eeenyɛ efee akɛ “Kitim shikpɔŋ lɛ” miitsɔɔ Kipro ŋshɔkpɔ lɛ, aaafee kilomitai 100 jɛkɛmɔ yɛ Foenike ŋshɔ lɛ anaigbɛ. Biɛ ji he ni lɛji ní jɛ Tarshish ní miifã gbɛ kɛmiiya bokagbɛ lɛ wàa naagbee kwraa dani amɛshɛɔ Tiro. No hewɔ lɛ, amlakui lɛ baanu amɛmaŋ lɛji adaamɔhe ní amɛsumɔɔ esane lɛ shigbeemɔ he adafitswaa kɛji amɛyawa yɛ Kipro. Kwɛ hejɔ̃mɔ sane ní eeeji kɛha amɛ! Awerɛho ní baamɔmɔ amɛ sɔŋŋ hewɔ lɛ, ‘amɛaawó lele’ kɛ haomɔ.
6. Tsɔɔmɔ wekukpaa ní kã Tiro kɛ Zidon teŋ lɛ mli.
6 Mɛi ni yɔɔ Foenike ŋshɔnaa gbɛ lɛ hu baahao nakai nɔŋŋ. Gbalɔ lɛ kɛɔ akɛ: “Nyɛ ŋshɔnaa bii, nyɛtɔa mú! Bo ní Zidon guɔyelɔi ní nyiɛɔ ŋshɔ hiɛ lɛ ewoo obɔ; ni nui wuji ahiɛ anyiɛɔ ni akɛ Shihor nibaa nii lɛ kɛ faa lɛ he nikpamɔ nii lɛ baa emli, ni etsɔ jeŋmaji ajaa nɔ̃.” (Yesaia 23:2, 3) “Ŋshɔnaa bii”—ni ji mɛi ní bɛŋkɛ Tiro lɛ—baatɔ mú kwraa yɛ amɛnaa ní baakpɛ amɛhe waa yɛ Tiro shigbeemɔ yɛ amanehulu mli lɛ hewɔ. Namɛi ji “Zidon guɔyelɔi” ní ‘ewo’ maŋbii nɛɛ “obɔ,” ni eha amɛtsɔmɔ niiatsɛmɛi nɛɛ? Tsutsu ko lɛ, kulɛ Tiro ji ŋshɔnaa maŋtiase ni ji Zidon, ní kɛ lɛ jɛkɛmɔ feɔ kilomitai 35 pɛ kɛyaa kooyigbɛ lɛ shihemɔhe. Zidon wieɔ lɛ diɛŋtsɛ ehe, yɛ eshikai ní ashwie lɛ anɔ akɛ Tiro nyɛ. Eyɛ mli akɛ Tiro ená nii kwraa fe Zidon moŋ, shi ekã he eji “Zidon biyoo” lolo, ni emli bii lɛ yaa nɔ amɛtsɛɔ amɛhe akɛ Zidonbii. (Yesaia 23:12) No hewɔ lɛ, ekolɛ wiemɔ ni ji “Zidon guɔyelɔi lɛ” kɔɔ Tiro maŋ lɛ mli bii ni ji jarayelɔi lɛ ahe.
7. Zidon guɔyelɔi egbɛ ninamɔ amɛshwã yɛ mɛɛ gbɛ nɔ?
7 Akɛni amɛkɛ amɛhe woɔ jarayeli nitsumɔi amli hewɔ lɛ, Zidon jarayelɔi niiatsɛmɛi lɛ fãa gbɛ kɛtsɔɔ Mediteranea Ŋshɔ lɛ hiɛ. Amɛlooɔ Shihor, ni ji Nilo Faa lɛ nine ní yɔɔ bokagbɛ fe fɛɛ, yɛ Mizraim kpokpaa ní faa lɛ egbala niji babaoo yɛ mli lɛ mli nibaa nii, loo dumɔ wui kɛyaa hei babaoo. (Okɛto Yeremia 2:18 he.) Mizraim nibaa nii krokomɛi hu fata “faa lɛ he nikpamɔ nii lɛ” he. Guɔyeli nibii nɛɛ ahɔɔmɔ loo amɛkɛ nibii krokomɛi atsakemɔ he yɛ sɛɛnamɔ waa kɛha ŋshɔ hiɛ jarayelɔi nɛɛ kɛ jeŋmaji hu ní amɛkɛ amɛ yeɔ jara lɛ. Zidon jarayelɔi lɛ ha Tiro maŋ lɛ nyɛ ebua shika babaoo naa. Lɛɛlɛŋ, amɛbaaye emaŋfɔfeemɔ lɛ he awerɛho!
8. Mɛɛ hewalɛ Tiro hiɛkpatamɔ lɛ baaná yɛ Zidon nɔ?
8 No sɛɛ lɛ, Yesaia kɛ Zidon wie wiemɔi nɛɛ, akɛ: “Zidon, ohiɛ agbo; ejaakɛ ŋshɔ kɛ ŋshɔnaa mɔɔ lɛ ewie akɛ: Mikɔ̃mɔko, ni asaŋ mifɔ́ko dã, milɛ̀ko oblahii, ni asaŋ mitsɔseko oblayei dã!” (Yesaia 23:4) Yɛ Tiro hiɛkpatamɔ lɛ sɛɛ lɛ, ŋshɔnaa shikpɔŋ, he ni maŋtiase lɛ yɔɔ be ko ní eho lɛ baatsɔ amaŋfɔ ni mɔ ko mɔ ko ehiŋ jɛmɛ. Ebaafee tamɔ nɔ ni ŋshɔ lɛ miifó kɛ hejaramɔ, tamɔ yoofɔyoo ní ebii egboi eshi lɛ, ní ehao aahu akɛ agbɛnɛ ewieɔ akɛ efɔ́ko bii po dã. Zidon hiɛ baagbo yɛ nɔ ni eba ebiyoo lɛ nɔ lɛ hewɔ.
9. Abaanyɛ akɛ awerɛho ní gbɔmɛi lɛ baaye yɛ Tiro shigbeemɔ lɛ hewɔ lɛ ato mɛɛ ŋmiŋmi kɛ hejɔ̃mɔ ní aaajɛ mɛɛ nibii krokomɛi amli aba lɛ he?
9 Hɛɛ, Tiro hiɛkpatamɔ lɛ he adafitswaa baaha awerɛhoyeli afá babaoo. Yesaia kɛɔ akɛ: “Kɛ́ sane lɛ yashɛ Mizraim lɛ, amɛaahao yɛ Tiro sane ní abagba lɛ hewɔ.” (Yesaia 23:5) Abaanyɛ akɛ piŋmɔ ní mɛi ni yeɔ awerɛho lɛ nuɔ he lɛ ato nɔ ni jɛ Mizraim he adafitswaa lɛ mli ba lɛ he. Mɛɛ adafitswaa gbalɔ lɛ tsɔɔ lɛ? Eeenyɛ efee “Mizraim kojomɔ he gbalɛ” ní ekɛha kɛtsɔ hiɛ lɛ mlibaa lɛ.b (Yesaia 19:1-25) Aloo ekolɛ gbalɔ lɛ miitsɔɔ Farao tai lɛ ahiɛkpatamɔ yɛ Mose gbii lɛ amli lɛ he adafitswaa, ni ha ŋmiŋmi mɔmɔ mɛi babaoo ní amɛhe jɔ̃ amɛhe lɛ. (2 Mose 15:4, 5, 14-16; Yoshua 2:9-11) Bɔ fɛɛ bɔ ni eji lɛ, mɛi ni baanu Tiro hiɛkpatamɔ lɛ he adafitswaa lɛ baahao waa diɛŋtsɛ. Aakɛɛ amɛ ní amɛjo foi kɛya Tarshish ní yɔɔ shɔŋŋ lɛ ní amɛyaba abo, ni aafã amɛ ní amɛjie amɛwerɛhoyeli lɛ kpo yɛ hoofeemɔ mli, akɛ: “Nyɛfoaŋ kɛyaa Tarshish! Nyɛ ŋshɔnaa bii lɛ, nyɛwóa lele!”—Yesaia 23:6.
Mlifilimɔ “Ní Jɛ Teteete”
10-12. Tsɔɔmɔ Tiro ninamɔ, blema nibii kɛ bɔ ni enáa mɛi anɔ hewalɛ lɛ mli.
10 Tiro ji blema maŋtiase, taakɛ Yesaia kaiɔ wɔ beni ebi akɛ: “Aso nyɛmlifilimɔ maŋ lɛ, ní jɛ teteete . . . lɛ, nɛ?” (Yesaia 23:7a) Tiro shweremɔ he yinɔsane lɛ yaa sɛɛ shɔŋŋ, kɛ hoo lɛ, kɛyashɛɔ Yoshua beaŋ. (Yoshua 19:29) Tiro ebahe gbɛi waa yɛ afii abɔ ní eho lɛ mli akɛ dade nibii, glase nibii, kɛ kɔɔjaŋ tsofai afeelɔ. Atadei ní akɛ Tiro kɔɔjaŋ mamai kpɛ lɛ ajara wa waa, ni abladei kɛ odehei taoɔ Tiro mamai ní jara wa lɛ waa diɛŋtsɛ. (Okɛto Ezekiel 27:7, 24 he.) Tiro ji jarayelihe kɛha jarayelɔi gbɛfalɔi akui ní fãa gbɛ kɛnyiɛɔ shikpɔŋ lɛ, kɛ fiase kpele hu ní ashɛɔ guɔ nii kɛbaa kɛ he ni ajɛɔ akɛ guɔ nii majeɔ kɛyaa maji asɛɛ hu.
11 Kɛfata he lɛ, maŋtiase lɛ yɛ asraafoi ahewalɛ kpele. L. Sprague de Camp ŋma akɛ: “Eyɛ mli akɛ amɛjeee tawulɔi titri—amɛji jarayelɔi, jeee asraafoi—moŋ, shi Foenikebii lɛ fãa amɛmaŋtiasei lɛ ahe kɛ ekãa kɛ kuɛŋtimɔ ní mli wa diɛŋtsɛ. Sui nɛɛ, kɛ hewalɛ ní amɛyɔɔ yɛ tawuu lɛji agbɛfaŋ lɛ, ha Tirobii lɛ nyɛ amɛte shi amɛshi Ashurbii asraafoi ní he wa fe fɛɛ yɛ nakai beaŋ lɛ.”
12 Lɛɛlɛŋ, aná Tiro he miishɛɛ waa yɛ Mediteranea je lɛ mli. “Enaji kɛ lɛ dom kɛtee shɔŋŋ yato gbɔ.” (Yesaia 23:7b) Foenikebii lɛ fãa gbɛ kɛyaa shɔŋŋ, ni amɛtoɔ jarayelihei kɛ lɛjiadaamɔhei, ni yɛ shihilɛi komɛi amli lɛ, amɛdara kɛbatsɔmɔ shihemɔhei. Ákɛ nɔkwɛmɔnɔ lɛ, Carthage, ní yɔɔ Afrika kooyigbɛ ŋshɔ lɛ naa lɛ ji Tiro shihemɔ maŋ. Yɛ be ko sɛɛ lɛ, ebaateke Tiro ni ekɛ Roma baashi mple kɛha hewalɛ yɛ Mediteranea je lɛ mli.
Abaaba Ehenɔwomɔ lɛ Shi
13. Mɛni hewɔ atee sanebimɔ ní kɔɔ mɔ ni baaná ekãa ni ekɛjaje kojomɔ wiemɔi eshi Tiro lɛ he lɛ shi lɛ?
13 Tiro blema saji kɛ eninamɔ lɛ hewɔ lɛ, sanebimɔ ni nyiɛ sɛɛ lɛ sa jogbaŋŋ, akɛ: “Namɔ to eyiŋ nɛkɛ yɛ Tiro ni ji akekere hãlɔ lɛ he? Ejarayelɔi lɛ lumɛi sɔŋŋ ni, eguɔyelɔi lɛ hu shikpɔŋ lɛ nɔ anunyam gbɔmɛi sɔŋŋ ni!” (Yesaia 23:8) Namɔ yɔɔ ekãa ní ekɛaawie eshi maŋtiase ní ehala aŋkroaŋkroi ni yɔɔ hewalɛ lɛ ewo nɔyeli hegbɛi ní nɔ kwɔlɔ mli yɛ eshihemɔ maji lɛ amli kɛ hei krokomɛi—ní no hewɔ lɛ ebatsɔ “akekere hãlɔ lɛ”? Namɔ yɔɔ ekãa ní ekɛaawie eshi maŋtiase ní ejarayelɔi lɛ ji lumɛi, ní eguɔyelɔi lɛ hu, anunyam gbɔmɛi sɔŋŋ ni lɛ? Maurice Chehab, ni ji blema nibii ni yɔɔ National Museum of Beirut, yɛ Lebanon lɛ tsutsu nɔkwɛlɔ lɛ wie akɛ: “Kɛjɛ afii ohai nɛɛhu kɛbashi afii ohai ekpaa Ŋ.B. lɛ, Tiro tee nɔ ehiɛ gbɛhe ní he hiaa ní ale waa yɛ London yɛ afii ohai nyɔŋmai enyɔ lɛ shishijee gbɛ lɛ mli.” No hewɔ lɛ, namɔ yɔɔ ekãa ní ekɛaawie eshi maŋtiase nɛɛ?
14. Namɔ jaje kojomɔ wiemɔi eshi Tiro lɛ, ni mɛni hewɔ?
14 Hetoo ní jɛ mumɔŋ lɛ kɛ ŋmiŋmi kɛ hejɔ̃mɔ baaba Tiro nɔ. Yesaia kɛɛ akɛ: “Yehowa Zebaot eto eyiŋ akɛ eeewo hewoo anunyam fɛɛ he muji, ni eeeha shikpɔŋ lɛ nɔ anunyam gbɔmɛi fɛɛ he guɔ agbó.” (Yesaia 23:9) Mɛni hewɔ Yehowa jaje kojomɔ eshi blema maŋtiase ní yɔɔ nii waa nɛɛ? Ani akɛni emli bii lɛ ji apasa nyɔŋmɔ Baal jálɔi lɛ hewɔ? Ani wekukpaa ní kã Tiro kɛ Izebel—ni ji Zidon, ní Tiro fata he lɛ Maŋtsɛ Etbaal biyoo lɛ—ní kɛ Israel Maŋtsɛ Ahab bote gbalashihilɛ mli, ní egbe Yehowa gbalɔi lɛ ateŋ mɛi babaoo lɛ teŋ lɛ hewɔ? (1 Maŋtsɛmɛi 16:29, 31; 18:4, 13, 19) Sanebimɔi enyɔ lɛ fɛɛ hetoo ji dabi. Abu Tiro fɔ́ yɛ ehenɔwomɔ kɛ bulɛ ní ebɛ lɛ hewɔ—ená nii babaoo kɛtsɔ mɛi krokomɛi amimyeli nɔ, ni Israelbii lɛ hu fata he. Yɛ afii ohai nɛɛhu D.Ŋ.B. lɛ, Yehowa tsɔ gbalɔ Yoel nɔ ekɛɛ Tiro kɛ maŋtiasei krokomɛi lɛ akɛ: “Yudabii kɛ Yerusalembii lɛ, nyɛhɔ̃ɔ amɛ nyɛha Helabii lɛ, beni afee ní nyɛkɛ amɛ ajɛ amɛkpokpaai lɛ anɔ kɛya shɔŋŋ.” (Yoel 4:6) Ani Nyɔŋmɔ baanyɛ aku ehiɛ efɔ̃ bɔ ni Tiro kɛ ewebii ní ekɛ amɛ efee kpaŋmɔ lɛ ye tamɔ jarayeli nibii komɛi kɛkɛ lɛ nɔ?
15. Kɛ́ Yerusalem gbee shi yɛ Nebukadnezar hiɛ lɛ, te Tiro baafee enii yɛ he eha tɛŋŋ?
15 Afii oha ni baaho lɛ tsakeŋ Tiro. Kɛ́ Babilon Maŋtsɛ Nebukadnezar asraafoi kpata Yerusalem hiɛ yɛ afi 607 D.Ŋ.B. lɛ, Tiro mli baafili lɛ yɛ he ni ebaakɛɛ: “Yiɛ! akumɔ [Yerusalem] majimaji lɛ agbó lɛ; atsɔ aha mi; ní etsɔ amaŋfɔ nɛɛ mibayi obɔ̃!” (Ezekiel 26:2) Tiro mli baafili lɛ, kɛ gbɛkpamɔ akɛ ebaaná sɛɛ kɛjɛ Yerusalem hiɛkpatamɔ lɛ mli. Akɛni Yuda maŋtiase lɛ bɛ ní ekɛ lɛ baashi mple dɔŋŋ hewɔ lɛ, ebaakpa jarayeli babaoo gbɛ kɛha ehe. Yehowa baaha mɛi ni tsɛɔ amɛ diɛŋtsɛ amɛhe “anunyam gbɔmɛi,” ni kɛ henɔwomɔ fataa ewebii ahenyɛlɔi lɛ ahe lɛ ahe guɔ agbó.
16, 17. Mɛni baaba Tiro maŋ lɛ mli bii lɛ anɔ kɛji maŋtiase lɛ gbee shi? (Kwɛmɔ shishigbɛ niŋmaa lɛ.)
16 Yesaia tsá bɔ ni Yehowa bu Tiro fɔ́ lɛ nɔ akɛ: “Bo Tarshish biyoo, yi oshikpɔŋ lɛ nɔ tɔ́ tamɔ Nilo; mlifii nɔ̃ ko bɛ ohe dɔŋŋ! Ekpã enine mli yɛ ŋshɔ lɛ nɔ, ehoso maŋtsɛyelihei lɛ: Yehowa ewo kita yɛ Kanaan hewɔ akɛ afite amɛmɔji lɛ; ni ekɛɛ akɛ: Omli akafilio dɔŋŋ, bo oblayoo ní atoo kabonaa, Zidon biyoo! Tee shi ní ofoŋ kɛya Kitimbii lɛ aŋɔɔ! shi jɛi hu onáŋ hejɔlɛ.”—Yesaia 23:10-12.
17 Mɛni hewɔ atsɛɔ Tiro akɛ “Tarshish biyoo” lɛ? Ekolɛ akɛni yɛ Tiro nɔ kunimyeli lɛ sɛɛ lɛ, Tarshish baafee maŋtiasei enyɔ lɛ ateŋ nɔ ní he wa lɛ hewɔ.c Tiro maŋtiase ní etsɔ amaŋfɔ lɛ mli bii baagbɛ ashwã tamɔ faa ní eje ŋã, ní eteke ehusui lɛ ní emli nui lɛ miiho babaoo kɛmiiya ŋã kpalanaa ní bɛŋkɛ lɛ lɛ nɔ. Yesaia shɛɛ sane ní ekɛha “Tarshish biyoo” lɛ maa bɔ ni nɔ ni baaba Tiro nɔ lɛ mli wa ha lɛ nɔ mi. Yehowa diɛŋtsɛ ekpã enine mli ni ekɛ famɔ eha. Mɔ ko mɔ ko nyɛŋ atsake nɔ ni baajɛ mli aba lɛ.
18. Mɛni hewɔ atsɛɔ Tiro akɛ “Zidon biyoo” lɛ, ni eshihilɛ baatsake yɛ mɛɛ gbɛ nɔ?
18 Yesaia wie Tiro he hu akɛ “Zidon biyoo,” ni tsɔɔ akɛ maŋsɛɛ kunimyelɔi yeko enɔ kunim yɛ ekãa naa ní amɛaahà enibii kɛya dã, ni enáa shihilɛ mli ŋɔɔmɔ lolo akɛ maŋ ni ayeko enɔ kunim. (Okɛto 2 Maŋtsɛmɛi 19:21; Yesaia 47:1; Yeremia 46:11 he.) Shi amrɔ nɛɛ abaakpata ehiɛ kwraa agbɛnɛ, ni taakɛ abobalɔi ji lɛ, emli bii lɛ ateŋ mɛi komɛi baatsa nɔ kɛya Foenikebii ashihemɔ maŋ ni ji Kitim lɛ mli. Ni kɛlɛ, akɛni amɛbɛ shika gbɛfaŋ hewalɛ dɔŋŋ hewɔ lɛ, amɛnaŋ hejɔɔmɔ yɛ jɛmɛ.
Kaldeabii lɛ Baakpata Ehiɛ Kwraa
19, 20. Namɔ agba afɔ̃ shi akɛ ebaaye Tiro nɔ kunim, ni nakai gbalɛ lɛ ba mli yɛ mɛɛ gbɛ nɔ?
19 Mɛɛ maŋkwramɔŋ hewalɛ baatsu Yehowa kojomɔ he nii yɛ Tiro nɔ lɛ? Yesaia jaje akɛ: “Naa, Kaldeabii ashikpɔŋ lɛ: nɛkɛ maŋ nɛɛ, amɛjeee maŋ ko dɔŋŋ, Ashurbii eŋɔha ŋã nɔ kooloi, amɛmamɔ amɛ diɛŋtsɛ amɛmɔji ní kwɔlɔ lɛ, ni amɛkumɔ emɔji lɛ, amɛfee lɛ koikoi! Nyɛ Tarshish lɛji, nyɛwóa lele; ejaakɛ akpata nyɛmɔɔ lɛ hiɛ!” (Yesaia 23:13, 14) Kaldeabii lɛ—jeee Ashurbii lɛ—baaye Tiro nɔ kunim. Amɛbaamamɔ amɛ káwoo mɔji lɛ, ni amɛbaakumɔ Tiro shihilɛhei lɛ amɛshwie shi, ni amɛbaakumɔ nakai Tarshish lɛji lɛ amɔɔ lɛ kwraa ni amɛbaafee lɛ koikoi.
20 Lɛɛlɛŋ hu taakɛ gbalɛ lɛ tsɔɔ lɛ, Yerusalem shigbeemɔ lɛ sɛɛ be fioo ko lɛ, Tiro tse Babilon hiɛ atua, ni Nebukadnezar bawo maŋtiase lɛ he ká. Akɛni Tiro heɔ ehe eyeɔ akɛ anyɛŋ enɔ kunim aye hewɔ lɛ, ete shi eshi. Yɛ káwoo be lɛ mli lɛ, Babilon asraafoi lɛ ayiteŋ “kpá” yɛ bɔ ni amɛtawuu faii lɛ shɔɔ amɛyiteŋ lɛ hewɔ, ni amɛkɔ̃ɔji anɔ ‘kpɔlɔ,’ yɛ nibii ní amɛkɛwo maŋ lɛ he ká, ní amɛtereɔ yɛ amɛkɔ̃ɔji anɔ lɛ hewɔ. (Ezekiel 29:18) Nebukadnezar kɛ nibii babaoo tsu nii yɛ káwoo lɛ mli. Ekpata Tiro maŋtiase lɛ diɛŋtsɛ hiɛ, shi kɛlɛ enine shɛɛɛ emli hàa nii lɛ nɔ. No mli lɛ ájie Tiro jwetrii lɛ babaoo kɛtee ŋshɔkpɔ bibioo ní kɛ ŋshɔ lɛ naa jɛkɛmɔ shɛɔ shitoo fã lɛ nɔ. Akɛni Kaldeabii amaŋtsɛ lɛ bɛ lɛji ní fá saŋŋ hewɔ lɛ, enyɛɛɛ eye ŋshɔkpɔ lɛ nɔ kunim ní enine ashɛ nɔ. Afii 13 sɛɛ lɛ, Tiro ŋmɛɛ ehe eha, shi kɛlɛ ebaahi shi ni ebaana gbalɛi krokomɛi amlibaa lolo.
“Eeená Epaabɔɔ Nii lɛ Ekoŋŋ”
21. ‘Hiɛ ekpa’ Tiro “nɔ” yɛ mɛɛ gbɛ nɔ, ni kɛyashi mɛɛ be?
21 Yesaia tee nɔ egba efɔ̃ shi akɛ: “Aaaba mli yɛ nakai gbi lɛ nɔ akɛ hiɛ aaakpa Tiro nɔ afii nyɔŋmai kpawo, ní tamɔ maŋtsɛ kome gbii.” (Yesaia 23:15a) Yɛ maŋtiase lɛ diɛŋtsɛ ní Babilonbii lɛ bakpata hiɛ lɛ sɛɛ lɛ, “hiɛ aaakpa” Tiro maŋtiase ní ji ŋshɔkpɔ lɛ “nɔ.” Lɛɛlɛŋ hu taakɛ gbalɛ lɛ kɛɛ lɛ, yɛ be sɛɛkɛlɛ ní feɔ “maŋtsɛ kome gbii”—ni ji Babilon Maŋtsɛyeli lɛ beaŋ lɛ—Tiro maŋtiase ni ji ŋshɔkpɔ lɛ efeŋ maŋ ni he wa yɛ shika gbɛfaŋ dɔŋŋ. Yehowa tsɔ Yeremia nɔ ekɛ Tiro fata jeŋmaji ní abaakadi amɛ akɛ amɛbaanu E-mlifu dãa lɛ eko lɛ ahe. Ekɛɛ akɛ: “Nɛkɛ jeŋmaji nɛɛ fɛɛ aaasɔmɔ Babel maŋtsɛ lɛ afii nyɔŋmai kpawo.” (Yeremia 25:8-17, 22, 27) Lɛɛlɛŋ, Tiro maŋtiase ni ji ŋshɔkpɔ lɛ ehiii Babilon nɔyeli lɛ shishi yɛ afii 70 lɛ mli fɛɛ, akɛni Babilon Maŋtsɛyeli lɛ gbee shi yɛ afi 539 D.Ŋ.B. lɛ hewɔ. Eka shi faŋŋ akɛ, afii 70 lɛ damɔ shi kɛha be ní Babilon nɔyeli lɛ he wa fe fɛɛ—beni Babilon maŋtsɛmɛi aweku lɛ shwãa akɛ ewó emaŋtsɛsɛi lɛ nɔ kɛteke “Nyɔŋmɔ ŋulamii lɛ” tete po lɛ. (Yesaia 14:13) Jeŋmaji srɔtoi baje nakai nɔyeli lɛ shishi yɛ bei srɔtoi amli. Shi yɛ afii 70 lɛ naagbee lɛ, nakai nɔyeli lɛ baabutu kwraa. Mɛni baaba Tiro nɔ yɛ nakai beaŋ mɔ?
22, 23. Mɛni baaba Tiro nɔ kɛji eje Babilon nɔyeli shishi?
22 Yesaia tsa nɔ akɛ: “Ni afii nyɔŋmai kpawo nɛɛ sɛɛ lɛ, aaafee Tiro tamɔ bɔ ni ajwamaŋ lala lɛ kɛɛ nɛɛ: Kɔ́ saŋku ní oyakpa maŋ lɛŋ, bo ajwamaŋ ni hiɛ ekpa onɔ! Tswaa saŋku lɛ jogbaŋŋ, ní olá lalai pii, beni afee ni akaio ekoŋŋ! Ni aaaba mli yɛ afii nyɔŋmai kpawo lɛ sɛɛ akɛ Yehowa aaabasara Tiro ekoŋŋ, ni eeená epaabɔɔ nii lɛ ekoŋŋ, ni ekɛ je lɛŋ maŋtsɛyelii fɛɛ ni yɔɔ shikpɔŋ muu lɛ fɛɛ nɔ lɛ aaayabɔ ajwamaŋ ekoŋŋ.”—Yesaia 23:15b-17.
23 Beni Babilon gbee shi yɛ afi 539 D.Ŋ.B. lɛ sɛɛ lɛ, Foenike batsɔ he ni Medo-Persia Maŋtsɛyeli lɛ amralo lɛ yeɔ nɔ yɛ. Persia nɔyelɔ, Koresh Kpeteŋkpele lɛ, ji nɔyelɔ ní ŋmɛɔ susumɔi krokomɛi agbɛ. Tiro baaje etsutsu nifeemɔ lɛ shishi ekoŋŋ yɛ nɔyeli hee nɛɛ shishi, ni ebaabɔ mɔdɛŋ ní eha ale lɛ ekoŋŋ akɛ je lɛŋ jarayeli maŋ ní ale—tamɔ bɔ ni yoo ajwamaŋ ní hiɛ ekpa enɔ, ni elaaje ekpelɔi fɛɛ lɛ bɔɔ mɔdɛŋ ní ená kpelɔi heei kɛtsɔ maŋtiase lɛ mli ní efoɔ shi kɛnyiɛɔ, ní etswaa esaŋku ní eláa elalai lɛ nɔ lɛ. Ani Tiro baaye omanye? Hɛɛ, Yehowa baaha eye omanye. Yɛ be ko sɛɛ lɛ, maŋtiase ni ji ŋshɔkpɔ lɛ baaná nii aahu akɛ kɛbaa afii ohai ekpaa D.Ŋ.B. lɛ naagbee gbɛ lɛ, gbalɔ Zakaria baakɛɛ akɛ: “Tiro etswa gbogbo ewo ehe, ni ebua jwiɛtɛi naa tamɔ mulu kɛ shika krɔŋŋ hu tamɔ blohuiaŋ ŋmiamɔ.”—Zakaria 9:3.
‘Ejarayeli Nii lɛ Aaatsɔ Nɔ̃ Krɔŋkrɔŋ’
24, 25. (a) Tiro jarayeli nii lɛ baatsɔ nɔ̃ krɔŋkrɔŋ kɛha Yehowa yɛ mɛɛ gbɛ nɔ? (b) Yɛ yelikɛbuamɔ ní Tiro kɛha Nyɔŋmɔ webii lɛ fɛɛ sɛɛ lɛ, mɛɛ gbalɛ Yehowa tsɔ emumɔ lɛ nɔ eha agba ashi lɛ?
24 Kwɛ bɔ ni gbalɛ wiemɔi ní nyiɛ sɛɛ nɛɛ sa kadimɔ waa hã! “Ejarayeli nii kɛ epaabɔɔ nii lɛ aaatsɔ krɔŋkrɔŋ aha Yehowa; atĩaŋ ni akɛbɔŋ jwetri, shi epaabɔɔ nii lɛ aaatsɔ mɛi ní hiɔ shi yɛ Yehowa hiɛ lɛ anɔ̃, ní amɛye nii amɛtɔrɔ, ní amɛbu mama kpakpa.” (Yesaia 23:18) Mɛɛ gbɛ nɔ Tiro jarayeli lɛ mli sɛɛnamɔ lɛ aaatsɔ nɔ̃ krɔŋkrɔŋ yɛ? Yehowa kudɔ saji koni akɛtsu nii yɛ esuɔmɔnaa nii kɛ gbeekpamɔ naa—koni ewebii lɛ aye nii ní amɛtɔrɔ ni amɛbumɔ mamai kpakpai hu. Enɛ ba mli yɛ be mli ní Israelbii lɛ ku amɛsɛɛ kɛjɛ Babilon nomŋɔɔ mli lɛ. Tirobii lɛ ye amɛbua amɛ kɛtsɔ tseneduru tsei ní amɛha amɛ kɛha sɔlemɔtsu lɛ maa lɛ nɔ. Amɛkɛ Yerusalem maŋtiase lɛ hu bɔi jarayeli ekoŋŋ.—Ezra 3:7; Nehemia 13:16.
25 Yɛ enɛ fɛɛ sɛɛ lɛ, Yehowa ha ajɛ mumɔŋ ajaje sane kroko hu ashi Tiro. Zakaria gba eshi maŋtiase ni ji ŋshɔkpɔ ní agbɛnɛ ená nii waa lɛ akɛ: “Naa, [Yehowa, NW] lɛ aaaŋɔ lɛ, ni eeetswa ehewalɛ lɛ nɔ yɛ ŋshɔ mli, ni lɛ diɛŋtsɛ lɛ, aaashã lɛ kɛ la.” (Zakaria 9:4) Enɛ ba mli yɛ July mli yɛ afi 332 D.Ŋ.B. beni Alexander Kpeteŋkpele lɛ kpata nakai ŋshɔŋ awula henɔwolɔ lɛ hiɛ kwraa lɛ.
Kwa Heloonaa Ninamɔ kɛ Henɔwomɔ
26. Mɛni hewɔ Nyɔŋmɔ bu Tiro fɔ́ lɛ?
26 Yehowa bu Tiro fɔ́ yɛ ehenɔwomɔ, ni ji su ní ehiɔ kwraa lɛ hewɔ. Atsĩɔ “hewoo hiŋmɛii” tã klɛŋklɛŋ yɛ nibii kpawo ní Yehowa nyɛɔ lɛ ateŋ. (Abɛi 6:16-19) Paulo kɛ henɔwomɔ toɔ Satan Abonsam he, ni bɔ ni Ezekiel wie Tiro henɔwolɔ lɛ he eha lɛ jieɔ kadimɔ nii komɛi ní kɔɔ Satan diɛŋtsɛ he lɛ kpo. (Ezekiel 28:13-15; 1 Timoteo 3:6) Mɛni hewɔ Tiro wó ehe nɔ lɛ? Beni Ezekiel kɛ Tiro wieɔ lɛ, ekɛɛ akɛ: “Otsui ewó ehe nɔ yɛ onii lɛ ahewɔ.” (Ezekiel 28:5) Atuu maŋtiase lɛ kwraa aha jarayeli kɛ ninamɔ babaoo naabuamɔ. Omanye ní Tiro ye yɛ enɛ gbɛfaŋ lɛ ha ebatsɔ henɔwolɔ diɛŋtsɛ. Yehowa tsɔ Ezekiel nɔ ekɛɛ “Tiro lumɔ lɛ” akɛ: “Otsui ewó ehe nɔ ni okɛɛ akɛ: ‘Mawu ji mi, Nyɔŋmɔ sɛ̃i nɔ mita.’”—Ezekiel 28:2.
27, 28. Mɛɛ tsɔne adesai baanyɛ agbee mli, ni Yesu kɛ abɛbua ko tsɔɔ enɛ mli yɛ mɛɛ gbɛ nɔ?
27 Jeŋmaji baanyɛ aŋmɛɛ amɛhe amɛha henɔwomɔ kɛ ninamɔ he susumɔ ní ejaaa—ni nakai pɛpɛɛpɛ ji aŋkroaŋkroi hu. Yesu gba abɛbua ko ní tsɔɔ bɔ ni tsɔne nɛɛ baanyɛ afee nigii hã. Ewie nuu niiatsɛ ko ní ŋmɔshi nii ba jogbaŋŋ lɛ he. Akɛni ená miishɛɛ waa hewɔ lɛ, nuu lɛ to eyiŋ akɛ ebaamamɔ aboŋoi wuji ní ekɛ eŋmɔshi nibii lɛ ato mli, ní ekɛ miishɛɛ akwɛ wala be kakadaŋŋ ní hejɔlɛ yɔɔ mli gbɛ. Shi ebaaa lɛ nakai. Nyɔŋmɔ kɛɛ lɛ akɛ: “Kwashia, nyɔɔŋ nɛŋ nɔŋŋ lɛ abaabi osusuma shi yɛ odɛŋ; ni nibii ní osaa oto lɛ, namɔ nɔ̃ aaatsɔ?” Hɛɛ, nuu lɛ gbo, ni eninamɔ lɛ he baaa sɛɛnamɔ ko kɛhaaa lɛ.—Luka 12:16-20.
28 Yesu mu abɛbua lɛ naa ni ekɛɛ: “Nakai mɔ ni bɔɔ jwetri ehaa lɛ diɛŋtsɛ ehe, shi ejeee niiatsɛ yɛ Nyɔŋmɔ gbɛfaŋ lɛ yɔɔ.” (Luka 12:21) Niiatsɛ ní mɔ ko aaaji lɛ jeee tɔmɔ, ni ŋmɔshi nii babaoo ní aaakpa lɛ hu jeee esha. Nuu lɛ tɔmɔ lɛ yɛ nibii nɛɛ ní ekɛfee nibii ni he hiaa lɛ titri yɛ eshihilɛ mli lɛ hewɔ. Ehiɛnɔkamɔ fɛɛ yɛ enii babaoo ní ená lɛ mli. Beni esusuɔ wɔsɛɛ be he lɛ, esusuuu Yehowa Nyɔŋmɔ he kwraa efataaa he.
29, 30. Yakobo bɔ kɔkɔ eshi mɔ he ní ekɛaafɔ lɛ diɛŋtsɛ ehe nɔ lɛ yɛ mɛɛ gbɛ nɔ?
29 Yakobo wie oti nɛɛ nɔŋŋ he yɛ gbɛ ni mli wa waa nɔ. Ekɛɛ: “Belɛ agbɛnɛ nyɛ hu, nyɛ mɛi ní nyɛkɛɔ akɛ: Ŋmɛnɛ loo wɔ́ lɛ wɔɔtee nɛkɛ loo nɛkɛ maŋ nɛŋ, ní wɔyaye afi kome yɛ jɛi, ni wɔɔye jara, ni wɔɔná sɛɛ. Tsɛ nyɛleee wɔ́ sane. Ejaakɛ mɛni ji nyɛwala lɛ? Eji lamɔ ní pueɔ fioo ko, ni kɛ́ fee sɛɛ lɛ elaajeɔ. Hewɔ lɛ sa moŋ akɛ nyɛkɛɔ akɛ: Kɛji [Yehowa, NW] miisumɔ ni wɔyi ná wala lɛ, no lɛ wɔɔfee enɛ loo enɛ.” (Yakobo 4:13-15) Kɛkɛ ni Yakobo tsɔɔ tsakpaa ní yɔɔ ninamɔ kɛ henɔwomɔ teŋ, ni etee nɔ ewie akɛ: “Nyɛshwãa yɛ nyɛhewooi lɛ amli; nɛkɛ shwãa nɛɛ fɛɛ lɛ, efɔŋ ni.”—Yakobo 4:16.
30 Shi kome ekoŋŋ lɛ, ejeee esha ákɛ aaaye jara. Esha lɛ ji henɔwomɔ, hewoo, kɛ hekɛnɔfɔɔ ní ninamɔ baanyɛ aha mɔ aná yɛ lɛ diɛŋtsɛ emli lɛ. Blema abɛbua lɛ wie yɛ nilee mli akɛ: “Kaaha miye ohia lɛ, asaŋ kaaha miná nii.” Ohia baanyɛ aha shihilɛ mli awa waa diɛŋtsɛ. Shi ninamɔ baanyɛ eha mɔ “[akwa Nyɔŋmɔ, ní ekɛɛ akɛ]: Namɔ ji Yehowa?”—Abɛi 30:8, 9.
31. Mɛɛ sanebimɔi Kristofonyo aaafee jogbaŋŋ akɛ eeebi lɛ diɛŋtsɛ ehe?
31 Mɛi pii eŋmɛɛ amɛhe amɛha hiɛjoomɔ kɛ pɛsɛmkunya yɛ jeŋ ní wɔyɔɔ mli nɛɛ mli. Jarayeli shihilɛ ní yaa nɔ lɛ hewɔ lɛ, amaa heloonaa ninamɔ nɔ mi waa diɛŋtsɛ. Enɛ hewɔ lɛ, Kristofonyo aaafee jogbaŋŋ akɛ eeepɛi lɛ diɛŋtsɛ emli ekwɛ koni ená nɔmimaa akɛ egbeee tsɔne ní dũ jarayeli maŋtiase ni ji Tiro lɛ nɔŋŋ mli. Ani ekɛ ebe kɛ ehewalɛ babaoo tsuɔ nii kɛdiɔ heloonaa nii asɛɛ, aahu akɛ, yɛ anɔkwale mli lɛ, eji ninamɔ nyɔŋ? (Mateo 6:24) Ani eyeɔ mɛi ní ekolɛ amɛyɔɔ nii babaoo, loo amɛyɔɔ nibii ni hi fe enɔ̃ lɛ ahe awuŋa? (Galatabii 5:26) Kɛ́ eji niiatsɛ lɛ, ani ekɛ henɔwomɔ nuɔ he akɛ esa akɛ asusu ehe ni aha lɛ hegbɛi babaoo fe mɛi krokomɛi? (Okɛto Yakobo 2:1-9 he.) Kɛ́ ejeee niiatsɛ lɛ, ani ‘eetao nii pii ená,’ yɛ gbɛ fɛɛ gbɛ nɔ? (1 Timoteo 6:9) Ani nitsumɔ saji ehe ejwɛŋmɔ fɛɛ aahu akɛ eshihilɛ mli be fioo ko pɛ enáa kɛhaa Nyɔŋmɔ sɔɔmɔ? (2 Timoteo 2:4) Ani ninamɔ sɛɛdii ehe ejwɛŋmɔ fɛɛ aahu akɛ ekuɔ ehiɛ efɔ̃ɔ Kristofoi ashishitoo mlai anɔ yɛ enitsumɔ mli nifeemɔi amli?—1 Timoteo 6:10.
32. Mɛɛ kɔkɔbɔɔ Yohane kɛha, ni wɔbaanyɛ wɔkɛtsu nii yɛ mɛɛ gbɛ nɔ?
32 Bɔ fɛɛ bɔ ni wɔshihilɛ ji yɛ shika gbɛfaŋ lɛ, esa akɛ Maŋtsɛyeli lɛ aye klɛŋklɛŋ gbɛhe yɛ wɔshihilɛ mli be fɛɛ be. Ehe miihia ní wɔhiɛ akakpa bɔfo Yohane wiemɔi nɛɛ anɔ kɔkɔɔkɔ, akɛ: “Nyɛkasumɔa je lɛ aloo nibii hu ni yɔɔ je lɛŋ. Kɛji mɔ ko miisumɔ je lɛ, belɛ tsɛ lɛ suɔmɔ lɛ bɛ emli.” (1 Yohane 2:15) Lɛɛlɛŋ, esa akɛ wɔkɛ je lɛ shika gbɛfaŋ gbɛjianɔtoo lɛ atsu nii koni wɔnyɛ wɔhi shi. (2 Tesalonikabii 3:10) No hewɔ lɛ, wɔkɛ ‘je lɛ tsuɔ nii’—shi wɔkɛtsuuu nii ‘kɛmɔɔɔ shi.’ (1 Korintobii 7:31) Kɛ́ wɔná suɔmɔ ni tekeɔ nɔ wɔha heloonaa nii—ni ji nibii ni yɔɔ je lɛŋ—lɛ kɛteke nɔ lɛ, no lɛ wɔsumɔɔɔ Yehowa dɔŋŋ. “Heloo lɛ sɛɛdii nii lɛ kɛ hiŋmɛii lɛ asɛɛdii nii lɛ kɛ shihilɛ lɛ mli hewoo lɛ” sɛɛdii kɛ Nyɔŋmɔ suɔmɔnaa nifeemɔ kpãaa gbee.d Ni Nyɔŋmɔ suɔmɔnaa nifeemɔ ji nɔ ni kɛ mɔ yaa naanɔ wala mli.—1 Yohane 2:16, 17.
33. Kristofoi baanyɛ akwa tsɔne ní dũ Tiro lɛ yɛ mɛɛ gbɛ nɔ?
33 Tsɔne ni ji heloonaa nibii asɛɛdii ní akɛyeɔ nɔ fɛɛ nɔ hiɛ lɛ tsɔ Tiro tsɔne. Eye omanye yɛ heloonaa ninamɔ gbɛfaŋ, ni ebaná henɔwomɔ, ni agbala etoi yɛ ehenɔwomɔ lɛ hewɔ. Enɔkwɛmɔnɔ lɛ feɔ kɔkɔbɔɔ kɛhaa jeŋmaji kɛ aŋkroaŋkroi ŋmɛnɛ. Kwɛ bɔ ni ehi jogbaŋŋ moŋ akɛ wɔɔnyiɛ bɔfo Paulo ŋaawoo lɛ sɛɛ! Ewoɔ Kristofoi hewalɛ ní “amɛkajwɛŋ nii wuji, ni amɛkaŋɔ amɛhiɛ amɛfɔ̃ nifalɛ ni bɛ shweshweeshwe lɛ nɔ, shi moŋ Nyɔŋmɔ hiɛkalɔ lɛ nɔ, mɔ hu ni ŋɔɔ nibii fɛɛ ehaa wɔ babaoo, akɛ wɔye mli ŋɔɔmɔ lɛ.”—1 Timoteo 6:17.
[Shishigbɛ niŋmai]
a Woloŋlelɔi komɛi tsɔɔ akɛ Tarshish nɔŋŋ ji Sardinia, ni ji ŋshɔkpɔ ko ni yɔɔ Mediteranea ŋshɔ lɛ anaigbɛ lɛ. Sardinia hu kɛ Tiro teŋ jɛkɛ.
b Kwɛmɔ wolo nɛɛ Yitso 15 lɛ, baafai 200-207.
c Yɛ gbɛ kroko nɔ lɛ, ekolɛ “Tarshish biyoo” lɛ kɔɔ mɛi ni yɔɔ Tarshish maŋ lɛ mli lɛ ahe. Wolo ko wieɔ akɛ: “Tarshish maŋ lɛ mli bii lɛ yɛ hegbɛ agbɛnɛ ní amɛkɛaafã gbɛ kɛya he fɛɛ he, tamɔ Nilo faa lɛ beni ehoɔ kɛyaa he fɛɛ he lɛ.” Shi kɛlɛ, nɔ ni amaa nɔ mi titri ji shihilɛi ní mli wa waa ní Tiro shigbeemɔ lɛ kɛbaaba lɛ.
d “Hewoo” ji bɔ ni atsɔɔ Hela wiemɔ a·la·zo·niʹa shishi aha, ni awieɔ he akɛ eji “henumɔ folo ní etsɔɔɔ Nyɔŋmɔ gbeyeishemɔ, ní kɛ ehe fɔ̃ɔ shikpɔŋ nɔ nibii ashiŋŋfeemɔ nɔ.”—The New Thayer’s Greek-English Lexicon.
[Shikpɔŋ he mfoniri ni yɔɔ baafa 256]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
EUROPA
SPAIN (He ni ekolɛ TARSHISH hi)
MEDITERANEA ŊSHƆ
SARDINIA
KIPRO
ASIA
ZIDON
TIRO
AFRIKA
MIZRAIM
[Mfoniri ni yɔɔ baafa 250]
Tiro baagbee shi yɛ Babilon hiɛ, jeee Ashur
[Mfoniri ni yɔɔ baafa 256]
Shika ní ashwie ni miitsɔɔ Melkart, Tiro nyɔŋmɔ wulu fe fɛɛ lɛ
[Mfoniri ni yɔɔ baafa 256]
Bɔ ni akpɛɔ Foenikebii alɛlɛ ahaa