Yehowa—Wɔ Hewalɛ
“Yah Yehowa ji mihewalɛ kɛ minyɛmɔ.”—YESAIA 12:2, New World Translation.
1. (a) Mɛni hewɔ Yehowa odasefoi yɔɔ sɔrɔto kwraa nakai lɛ? (b) Yɛ mɛɛ gbɛ nɔ Yesaia 12:2 (New World Translation) tsɔɔ nɔ ni Yehowa efee kɛha ewebii lɛ mli?
ANI oyaa kpee yɛ Yehowa Odasefoi a-Maŋtsɛyeli Asa lɛ eko nɔ? Jɛmɛ onaa gbɔmɛi ni esoro amɛ kwraa yɛ gbɔmɛi krokomɛi ahe! Namɛi ji nɛkɛ gbɔmɛi nɛɛ, ni mɛni hewɔ amɛyɔɔ sɔrɔto lɛ? Wɔji Nyɔŋmɔ diɛŋtsɛ webii, ni wɔyɛ sɔrɔto ejaakɛ wɔtere gbɛi ni da fe fɛɛ—naakpɛɛ nibii ni yɔɔ jeŋ muu fɛɛ ni ebɔle wɔhe lɛ anunyam Bɔlɔ lɛ gbɛi. Egbɛi lɛ ka wɔ nɔ. Lɛ egbɛi mli wɔkɛ miishɛɛ buaa wɔhe naa yɛ ni wɔyeɔ mumɔŋ niyenii ni hi fe fɛɛ ni ekɛhaa “yɛ be ni sa mli” kɛtsɔɔ egbɛjianɔtoo lɛ nɔ lɛ. (Luka 12:42) Akɛ Yehowa Odasefoi lɛ, wɔkɛ miishɛɛ gbaa egbɛi ni fe gbɛi fɛɛ lɛ wɔtsɔɔ yɛ wiemɔi ni yɔɔ Yesaia yitso 12, kuku 2 (New World Translation) ni kaneɔ nɛkɛ lɛ mli: “Naa! Nyɔŋmɔ ji miyiwalaheremɔ. Mikɛ mihe aaafɔ enɔ ni misheŋ gbeyei; ejaakɛ Yah Yehowa ji mihewalɛ kɛ minyɛmɔ, ni lɛ ebafee miyiwalaheremɔ.” Wɔ-Nyɔŋmɔ lɛ kɛwɔ etsɔ kaai sɔrɔtoi amli. Agbɛnɛ wɔnaagbee yiwalaheremɔ lɛ ebɛŋkɛ —ni enɛ hu baaba kɛtsɔ Yah Yehowa nɔ!
2. (a) Shii enyiɛ wiemɔ “Yah Yehowa” lɛ pueɔ yɛ Biblia lɛ mli, ni yɛ nɛgbɛ? (b) Mɛni ji wiemɔi krokomɛi ni akɛtsɔɔ “nyɛmɔ” shishi yɛ Yesaia 12:2, ni mɛni hewɔ amɛsa jogbaŋŋ lɛ?
2 Wiemɔ “Yah Yehowa,” lɛ ji gbɛi krɔŋkrɔŋ lɛ ni akɛbɔ he enyɔ, ni epueɔ shii enyɔ pɛ yɛ Biblia lɛ mli, biɛ kɛ agbɛnɛ yɛ Yesaia 26:4 (New World Translation) . Mɛi ni tsɔɔ King James Version lɛ shishi lɛ po na akɛ esa akɛ aaatsɔɔ shishi akɛ “NUŊTSƆ YEHOWA.” Taakɛ New World Translation Reference Bible lɛ shishigbɛ niŋmaa ko tsɔɔ lɛ, abaanyɛ atsɔɔ “nyɛmɔ” shishi yɛ. Yesaia 12:2 akɛ “lala” kɛ “yijiemɔ.” Kwɛ bɔ ni eji anɔkwale akɛ Yah Yehowa Ofe lɛ ni kɛ hewalɛ kpele haa ejalɔi lɛ sa yijiemɔ lala ni ŋɔɔ waa!—Yesaia 40:28-31.
3. (a) Yah Yehowa egbele gbɛ kɛha mɛni, ni mɛni nɔ edamɔ efee enɛ? (b) Te Paul wiemɔi ni yɔɔ Romabii 11:33-36 lɛ ena Yehowa Odasefoi anɔ hewalɛ eha tɛŋŋ?
3 Yehowa hewalɛ lɛ kɛ enilee, jalɛsaneyeli, kɛ suɔmɔ ŋmɛɔ pɛpɛɛpɛ. Yɛ nɛkɛ ŋwɛi sui nɛɛ kɛ nitsumɔ mli lɛ, Yah Yehowa egbele gbɛ koni adesa ni heɔ yeɔ lɛ adamɔ Yesu kpɔmɔ afɔleshaa lɛ nɔ ana yiwalaheremɔ. Yɛ enɛ hewɔ lɛ, bɔfo Paulo bo akɛ: “Oo, bɔ ni Nyɔŋmɔ nifalɛ kɛ ŋaa kɛ nilee mli kwɔ ha nɛ! Ekojomɔi lɛ anyɛɛɛ shishi ana. Ni egbɛi lɛ hu anyɛɛɛ sɛɛ mo aja! Ejaakɛ namɔ le Nuŋtsɔ lɛ jwɛŋmɔ lɛ, aloo namɔ ewo lɛ ŋaa pɛŋ? Aloo namɔ etsɔ hiɛ eha lɛ nɔ ko, ni kulɛ aaato lɛ najiaŋ? Ejaakɛ edɛŋ nii fɛɛ jɛ, ni enɔ amɛtsɔ kɛba, ni lɛ nɔŋŋ amɛyɔɔ amɛha. Aaaŋɔ anunyam aha lɛ kɛya naanɔ! Amen.” (Romabii 11:33-36) No hewɔ lɛ, kwɛ bɔ ni eja gbɛ akɛ wɔɔmɔ Yah Yehowa mli kpɛŋŋ ni wɔjaje wɔhekɛnɔfɔɔ kɛ hiɛnɔkamɔ ni wɔyɔɔ yɛ emli akɛ wɔ-Nyɔŋmɔ Ofe kɛ Jeŋ Muu Fɛɛ Nuŋtsɔ lɛ wɔtsɔɔ!—Okɛto Hebribii 3:14 he.
4. (a) Mɛni hewɔ Yesaia gbalɔ lɛ yɔɔ yiŋtoo kpakpa hewɔ ni eeejaje akɛ, ‘Mikɛ mihiɛ aaafɔ enɔ ni misheŋ gbeyei’ lɛ? (b) Mɛni hewɔ Yehowa webii yɔɔ nɔ ni amɛbaadamɔ nɔ ni amɛkɛ amɛhe afɔ Yah Yehowa nɔ yɛ wɔ afii ohai 20 nɛɛ mli lɛ?
4 Yesaia yɛ yiŋtoo kpakpa nɔ ni eeedamɔ ejaje akɛ, ‘Mikɛ mihe aaafɔ enɔ ni misheŋ gbeyei.’ Yɛ sɛɛ mli lɛ gbalɔ lɛ bale Yehowa yiwalaheremɔ nifeemɔi lɛ jogbaŋŋ, eji mɔ ni kɛ ehiŋmɛi na be mli ni Yehowa ha e-Wiemɔ ba mli kɛtsɔ Ashur maŋtsɛ hepupuulɔ Sanherib ni eba lɛ shi lɛ nɔ lɛ. Gbɛkɛ kome, wɔ-Nyɔŋmɔ Ofe Yehowa tsu bɔfo kome ni eyagbe Ashur asraafoi lɛ ateŋ mɛi 185,000! Nakai yiwalaheremɔ kpeteŋkpele lɛ ba mli nakai ejaakɛ Maŋtsɛ Hezekia kɛ Yuda fɛɛ kɛ amɛhe fɔɔ Yah Yehowa nɔ kwraa. (Yesaia 37:6, 7, 21, 36-38) Yehowa ejie ewebii lɛ kɛjɛ nɔnyɛɛ, nitsumɔ lɛ ni atsiɔ naa, yiwaai, kɛ gbokɛlɛfoi aŋsraŋ sɔrɔtoi amli yɛ wɔ afii ohai 20 nɛɛ mli. Taakɛ nakai Ashurbii hepupuulɔi lɛ ji yɛ Yesaia gbii lɛ amli lɛ, Nazi nɔyelɔ Adolf Hitler hu bolɔ ewo Yehowa Odasefoi, yɛ be ko lɛ ebolɔ waa akɛ, “Mabule nɛkɛ shwiei nɛɛ ashishi kɛjɛ Germane!” Shi Hitler kɛ e-Nazibii lɛ moŋ ji mɛi ni abule amɛshishi. Ni amrɔ nɛɛ nakai Germane Odasefoi akuu fioo lɛ ni kɛ amɛhe fɔ Yehowa nɔ lɛ eda ni amɛyi efa fe 121,200!—Lala 27:1, 2; Romabii 8:31, 37.
5. Te wiemɔi ni yɔɔ Yesaia 12:3-5 lɛ kɛɔ Nyɔŋmɔ webii ni kɛ amɛhiɛ fɔɔ enɔ ŋmɛnɛ lɛ ahe ehaa tɛŋŋ?
5 He fɛɛ he ni yiwaa aaate shi yɛ lɛ, Yehowa webii ni amɛkɛ amɛhe fɔɔ enɔ lɛ naa miishɛjemɔ kɛ hewalɛwoo kɛtsɔɔ anɔkwale nui ni haa wala ni amɛnuɔ lɛ nɔ. Etamɔ bɔ pɛ ni Nyɔŋmɔ gbalɔ lɛ kɛɛ yɛ Yesaia 12:3-5 lɛ: “Ni nyɛkɛ nyamɔ aaayɛ nu yɛ yiwalaheremɔ bui lɛ amli. Ni nakai gbi lɛ nɔ lɛ nyɛaakɛɛ: Nyɛdaa Yehowa shi, nyɛtsea egbɛi lɛ! Nyɛhaa alea enifeemɔ nii lɛ yɛ majimaji lɛ ateŋ, nyɛjajea akɛ awo egbɛi lɛ nɔ! Nyɛlaa nyɛhaa Yehowa! Shi efee nii wuji; nyɛhaa alea enɛ yɛ shikpɔŋ muu lɛ fɛɛ nɔ!” Eba akɛ wɔɔya nɔ wɔnu Maŋtsɛyeli anɔkwale lɛ babaoo ni wɔkɛ shidaa ajie wɔ-Nuŋtsɔ Yehowa Maŋtsɛ lɛ gbɛi lɛ yi. Yɛ hekɛnɔfɔɔ kwraa ni wɔyɔɔ yɛ Yehowa mli hewɔ lɛ, ‘nyɛhaa wɔshiɛa wiemɔ lɛ, wɔka he, deka yɛ jio, deka bɛ jio.’ (2 Timoteo 4:2) Bɔ fɛɛ bɔ ni shitee-kɛ-wolɔi aaafee lɛ, Yah Yehowa baajɛ esuɔmɔ mli ekudɔ wɔ yɛ yiwalaheremɔ gbɛ lɛ nɔ!
‘Jeŋmaji Yiwalɔi Amaŋ’
6, 7. (a) Yɛ Yesaia 25:1 kɛ gbeekpamɔ naa lɛ, esa akɛ Yehowa jalɔi awo ehiɛ nyam yɛ mɛni hewɔ? (b) Yɛ mɛɛ gbɛ nɔ Yesaia 26:2, 3 tsɔɔ bɔ ni maŋ ko ji eha? (d) Mɛɛ maŋ nɛkɛ eka shi faŋŋ akɛ gbalɔ lɛ wieɔ he lɛ, ni mɛni hewɔ?
6 Nyɛhaa wɔtsɔa wɔhe kɛyaa Yesaia yitso 25 he. Wɔkaneɔ yɛ kuku 1 akɛ: “Yehowa, mi-Nyɔŋmɔ jio. Mikafoɔo, miijie ogbɛi lɛ yi, ejaakɛ otsu naakpɛɛ nii. Oyiŋtoo ni jɛ blema beebe lɛ ema shi shiŋŋ, ni anɔkwale ni.” Yehowa jalɔi ni kɛ amɛhe fɔɔ enɔ lɛ woɔ ehiɛ nyam yɛ naakpɛɛ nitsumɔi ni etsu yɛ amɛteŋ lɛ hewɔ. Shi Yesaia gbala sɔrɔtofeemɔ agbo ko kɛba mli, ni ekɛɛ Yehowa akɛ: “Ejaakɛ oha maŋ lɛ efee koikoi, maŋ ni atswa gbogbo awo he lɛ etsɔ amaŋfo, maŋsɛɛ bii amɔɔ lɛ jeee maŋ dɔŋŋ, ni amaŋ dɔŋŋ gbi ko gbi ko. . . . Jeŋmaji yiwalɔi lɛ amaŋ lɛ aaasheo [Yehowa] gbeyei.”—Yesaia 25:2, 3.
7 Mɛni ji nɛkɛ yiwalɔi amaŋ ni atsiii egbɛi ata nɛɛ? Ekolɛ Yesaia miitsɔɔ Ar, Moab maŋtiase lɛ, ni yɛ be fɛɛ mli lɛ, eji Nyɔŋmɔ webii ahenyɛlɔ lɛ. Shi emli sane lɛ tamɔ nɔ ni esa Satan gbɛjianɔtoo lɛ fa ko jogbaŋŋ moŋ—ehenyɛlɔ ni fe fɛɛ ni ji Babilon. Yɛ be ni sa mli lɛ, Babilon baaha Yuda kɛ Yerusalem atsɔ amaŋfo, ekpata Yehowa jamɔ we lɛ hiɛ, ni eŋɔ gbɔmɛi lɛ ateŋ mɛi ni baaje mli lɛ nom kɛya nomŋɔɔ mli. Yesaia tsɛ wiemɔ kɛjɛ Babilon maŋtsɛ lɛ wiemɔi amli akɛ epupuu ehe akɛ: “Makwɔ kɛya ŋwɛi, ni mawo mimaŋtsɛ sɛi lɛ nɔ kɛaateke Nyɔŋmɔ ŋulamii lɛ, ni maho mata kpee-gɔŋ lɛ nɔ yɛ kooyigbɛ naagbee hei lɛ tɔɔ. . . . Matamɔ mɔ ni yɔɔ ŋwɛi shɔŋŋ lɛ!” Shi Yehowa baatee “Koresh ni jɛ Persia lɛ shi koni efo Babilon efɔ shi ni eha Nyɔŋmɔ webii lɛ aku amɛsɛɛ amɛya amɛshikpɔŋ nɔ. Taakɛ agba afɔ shi lɛ, he ni Blema Babilon yɔɔ lɛ “efee koikoi,” ni “etsɔ amaŋfo.”—Yesaia 14:12-14; 13:17-22.
8, 9. (a) Mɛɛ Babilon kroko hu esa akɛ Yehowa jalɔi kɛkpe, ni mɛɛ gbɛ nɔ etsɔ eba? (b) Te Yesaia tsɔɔ bɔ ni eji lɛ mli ehaa tɛŋŋ, ni mɛni hewɔ bɔ ni etsɔɔ mli eha nɛɛ sa lɛ lɛ?
8 Shi Babilon nɔ kunim ni aye lɛ sɛɛ afii 2,500 lɛ, ehe bahia ni Yehowa webii aya nɔ amɛkɛ Babilon kroko—“Babilon Kpeteŋkpele lɛ, shikpɔŋ lɛ nɔ ajwamaŋi lɛ kɛ nihii nii lɛ anyɛ lɛ” ashi mpele lolo. (Kpojiemɔ 17:5) Lɛ ji jeŋ apasa jamɔ maŋtsɛyeli lɛ. Ena eshishijee yɛ Noa Nu Afua lɛ sɛɛ nɔŋŋ, beni Nimrod tswa shishijee Babilon ni bafee apasa jamɔ kɛ futufutu jamɔ shikwɛɛ he lɛ ema shi lɛ. Beni Yesu kɛ ebɔfoi lɛ to Kristo jamɔ amɛma shi lɛ, hemɔkɛyeli kwalɔi fite Biblia mli anɔkwale lɛ kɛtsɔ Babilon wɔŋjamɔŋ “daimonioi atsɔɔmɔi” ni amɛkɛba mli lɛ nɔ, kɛkɛ ni amɛbafɛlɛ Kristendom jamɔi sɔrɔtoi babaoo lɛ. (1 Timoteo 4:1) Nɛkɛ apasa Kristo jamɔ nɛɛ ebatsɔ “Babilon Kpeteŋkpele” lɛ fa titri, ni egbɛ eshwa shikpɔŋ muu lɛ fɛɛ nɔ kɛbote adesai ajeŋmaji fɛɛ mli. Yesaia tsɔɔ akɛ eji ‘jeŋmaji yiwalɔi amaŋ.’
9 Nɔ ni fe afi akpei ejwɛ nɛ, kɛjɛ be mli ni ato shishijee Babilon lɛ shishi aahu kɛbashi bianɛ, ni nɔyelɔi yiwalɔi kɛ osɔfoi yiwalɔi etsu nii akɛ amɛdɛŋ dadei ni amɛkɛnyɛ ni amɛkɛkudɔ gbɔmɛi fɔji lɛ. No hewɔ lɛ, “gbɔmɔ eye enaanyo gbɔmɔ nɔ ni ekɛye lɛ awui.” (Jajelɔ 8:9, New World Translation) Gbɔmɛi lɛ anii fee Yesu mɔbɔ ejaakɛ nɛkɛ Apasa jamɔ mli tookwɛlɔi nɛɛ eha gbɔmɛi lɛ efee “yuuyaa tamɔ toi ni bɛ kwɛlɔ.” Ŋmɛnɛ, kuu ni anyaŋeɔ loo ahiɔ amɛ waa lɛ ji nɔ ni ale akɛ “esha gbɔmɔ lɛ,” ni mɛi ni feɔ enɛ ji Kristendom osɔfoi ni woɔ amɛhe nɔ lɛ, ni amɛnyiɛɔ hiɛ ni awaa Yehowa Odasefoi ayi ni ateɔ shi awoɔ amɛ lɛ.—Mateo 9:36; 2 Tesalonikabii 2:3, 4.
10. (a) Yɛ Yesaia 25:3 kɛ gbeekpamɔ naa lɛ, yɛ mɛɛ gbɛ nɔ anyɛ ‘jeŋmaji yiwalɔi amaŋ’ lɛ nɔ koni ewo Yehowa hiɛ nyam, ni eshe lɛ gbeyei? (b) Yɛ mɛɛ gbɛ nɔ Yesaia wieɔ Yehowa he yɛ Yesaia 25:4, 5 yɛ “nɔnalɔi” kɛ “yiwalɔi” fɛɛ he yɛ?
10 Afi 1919 mli ni Yehowa jie ewebii diɛŋtsɛ lɛ kɛjɛ “Babilon Kpeteŋkpele” lɛ kudɔmɔ shishi. Anyɛ nakai ‘jeŋmaji yiwalɔi amaŋ’ lɛ nɔ koni ewo Yehowa ‘hiɛ nyam akɛni abi ni ekɛ dɔlɛ akwɛ “naakpɛɛ nibii” ni efee yɛ ejalɔi lɛ ni eto amɛ ema shi ekoŋŋ ni ekɛ nitsumɔ ewo amɛdɛŋ yɛ ekaa naa lɛ hewɔ. Anyɛɔ apasa jalɔi anɔ koni amɛshe Yehowa gbeyei, ni amɛkpa nɔ ni ka shi ha amɛ ni baa amɛnɔ lɛ gbɛ. Afii ohai babaoo nɛ ni osɔfoi yiwalɔi ehole amɛ diɛŋtsɛ amɛhe nɔ yɛ gbɔmɛi foji lɛ anɔ. Shi agbɛnɛ Yesaia wieɔ Yehowa he akɛ: “Otsɔ mɔɔ oha nɔnalɔ, otsɔ mɔɔ oha ohiafo yɛ efimɔ mli, abobaa he yɛ ahum mli, kɛ hɔɔŋ yɛ latsa mli, be mli ni yiwalɔi lɛ amumɔ tamɔ ahum kɛ nyɔŋmɔnɛmɔ ni yiɔ gbogbo lɛ. Bɔ ni latsa feɔ yɛ ŋa kpataa nɔ lɛ, nakai oba maŋsɛɛ bii ahoofeemɔ lɛ shi; bɔ ni atatu hɔɔŋ mli laatsaa yɔɔ lɛ, nakai oba yiwalɔi lɛ alala lɛ shi.”—Yesaia 25:4, 5.
Miishɛɛ Lala Ko Bɛ “Babilon”!
11. Mɛni hewɔ miishɛɛ lala ko bɛ “Babilon Kpeteŋkpele” lɛ shihilɛ he lɛ fɛɛ lɛ, ni yɛ mɛɛ gbɛ nɔ afee enɛ he mfoniri yɛ majimaji ateŋ nyɔŋmɔjamɔ kpee ko ni tee nɔ yɛ Assisi, yɛ Italia lɛ shishi?
11 Nakai pɛpɛɛpɛ ji shihilɛ ni yɔɔ “Babilon Kpeteŋkpele” lɛ shihilɛ he lɛ fɛɛ. Anuuu miishɛɛ lala ko he yɛ jɛmɛ. Ejamɔ mli hiɛnyiɛlɔi lɛ ayiŋ efutu amɛ yɛ nɔ nyɔŋmɔi ni esa akɛ amɛja amɛ lɛ he. Nɔ ni yeɔ enɛ he odase yɛ faŋŋ mli ji jamɔi sɔrɔtoi babaoo ni bua amɛhe naa yɛ Assisi, Italia, yɛ October 27, 1986 lɛ. Amɛhenaabuamɔ ni kɔɔ Jeŋmaji Ekomefeemɔ lɛ Majimaji Ateŋ Toiŋjɔlɛ Afi lɛ he hewɔ lɛ, Paapa John Paul II bua “Babilon Kpeteŋkpele” lɛ mli jamɔi titrii lɛ amli hiɛnyiɛlɔi lɛ anaa yɛ jɛmɛ. Amɛ fɛɛ amɛsɔle amɛbi toiŋjɔlɛ, Buddha osɔfoi lɛ ekomɛi sɔle aaafee ŋmɛlɛtswai 12 yɛ gbi kome mli. Shi amɛsɔle amɛha namɔ? Amɛsɔle amɛha Maria? Aloo Kristendom Triniti krɔŋkrɔŋ lɛ? Aloo Hindu Triniti lɛ? Aloo Buddha jamɔ mli nyɔŋmɔi akpekpei abɔ lɛ? Aloo Allah? Aloo amɛsɔle amɛha nakai kooloo ni baa shi ni ji osɔ, ni Shintobii jaa lɛ lɛ? Aloo sɔlemɔ ni akpɛlɛ nɔ fe fɛɛ ji Amerika-India Crow weku lɛ hiɛnyiɛlɔ lɛ nɔ lɛ? Abɔ amaniɛ akɛ ‘Efi akekre ko ni yɔɔ nyam kɛ fɛo fɛɛ, kɛkɛ ni esu toiŋjɔlɛ tawa blɛ ko ni esɔle ewo “lasu lɛ ni faa kɛjɛɔ mli kɛyaa ŋwɛi tamɔ tsofa kɛ ŋma lasu ni yaa kɔɔyɔŋ lɛ mli.”
12. Mɛɛ Mika kɛ Yesaia wiemɔi nakai nyɔŋmɔi ajalɔi lɛ ekpɛlɛɛɛ nɔ?
12 Nɔ kome ji anɔkwale yɛ enɛ he: Nakai nyɔŋmɔi ajalɔi lɛ ateŋ mɔ kome folo po bɛ, kɛjɛ Buddha jamɔ mli Dalai Lama lɛ nɔ kɛyashi “Mɔ ni Hiɛ Yɔɔ Nyam” Methodius ni jɛ Hela Orthodox Sɔlemɔ lɛ mli lɛ nɔ ni kpɛlɛ Biblia mli wiemɔi ni yɔɔ Mika 4:5 akɛ: Shi wɔ lɛ, wɔɔnyiɛ yɛ Yehowa, wɔ-Nyɔŋmɔ lɛ gbɛi amli kɛaatee naanɔi anaanɔ!” lɛ nɔ. Amɛkpɛlɛɛɛ anɔkwale ni Yesaia wiemɔ ni jɛ mumɔŋ ni yɔɔ Yes yitso 42, kukuji 5 kɛ 8 lɛ ji akɛ: “Bɔ ni Nyɔŋmɔ Yehowa, mɔ ni bɔ ŋwɛi ni egbele mli, ni elɛɛ shikpɔŋ kɛ emli nibaa nii lɛ amli, ni ekɛ susuma haa enɔ bii lɛ, ni ekɛ mumɔ haa mɛi ni nyiɛɔ nɔ lɛ, kɛɛ nɛ: Miji Yehowa, migbɛi ji no, ni mikɛ minunyam lɛ haŋ mɔ kroko ni mikɛ miyijiemɔ lɛ hu haŋ amagai!” lɛ nɔ.
13. Mɛni tee nɔ diɛŋtsɛ yɛ Assisi, ni yɛ mɛɛ gbɛ nɔ Yesu bu enɛ fɔ yɛ be mli ni eyɔɔ shikpɔŋ nɔ lɛ?
13 Nɔ ni tee nɔ yɛ Assisi ji nii ni afee atsɔɔ, atadei fɛfɛji wuyawuyaa ni awo, kɛ sɔlemɔi kakadaji ni atiɔ mli akɛɔ ni akɛtsɔɔ maŋ bii. Enɛ ji nɔ ni Yehowa Bi lɛ wie eshi be mli ni eyɔɔ shikpɔŋ nɛɛ nɔ lɛ. Ewie yɛ jamɔ mli hiɛnyiɛlɔi ni hi shi yɛ egbii lɛ amli lɛ ahe akɛ: “Shi amɛnii fɛɛ lɛ amɛfeɔ koni mɛi ana,” ni eka amɛhiɛ yɛ faŋŋ mli akɛ: “Kpoo ha nyɛ, woloŋmalɔi kɛ Farisifoi, osatofoi! Akɛni nyɛŋaa ŋwɛi Maŋtsɛyeli lɛ naa yɛ gbɔmɛi ahiɛ lɛ, ejaakɛ nyɛ diɛŋtsɛ lɛ nyɛboteee mli, ni mɛi ni taoɔ mli abote lɛ hu, nyɛhaaa amɛ mlibotemɔ gbɛ.” (Mateo 23:5, 13; kwɛmɔ Mateo 6:1-8.) Jeee kponɔgbɛ nifeemɔ aloo jamɔ he lɛ ji nɔ ni hiaa Nyɔŋmɔ. Taakɛ Yesu kɛɛ lɛ: “Nyɔŋmɔ lɛ mumɔ, ni mɛi ni jaa lɛ lɛ, ja amɛja lɛ yɛ mumɔ kɛ anɔkwale mli.”—Yohane 4:21, 24.
Toiŋjɔlɛ Jɛɛhe Diɛŋtsɛ
14. (a) Mɛni hewɔ je lɛŋ jamɔ mli hiɛnyiɛlɔi asɔlemɔi kɛha toiŋjɔlɛ lɛ ji osatofeemɔ nifeemɔ lɛ? (b) Mɛni ji ŋwɛi fɔbuu kojomɔ kɛha Kristendom jamɔi lɛ?
14 Kɛ akwɛ yiŋfutumɔ ni yɔɔ je lɛŋ jamɔi amli lɛ, ani mɔ ko aaanyɛ afee mɔ ni susuuu nii ahe kwraa ni aaaha ejwɛŋ akɛ jamɔ mli hiɛnyiɛlɔi asɔlemɔi aaanyɛ ekɛ jeŋ toiŋjɔlɛ aba? Amɛkɛ osatofeemɔ esɔle afi ohai abɔ, yɛ be mli ni yɛ nakai beaŋ nɔŋŋ lɛ, amɛkɛ amɛhe woɔ jeŋmaji lɛ atai, Tai Krɔŋkrɔŋi kɛ yiwai ni yɔɔ hiɛgbele mli shishiishi. Yahowa gbalɔ lɛ bi akɛ: “Ani mɔdiŋ aaanyɛ ehewolɔ atsake, aloo kootsɛ aaanyɛ ehe ŋwataŋwata lɛ atsake? No lɛ nyɛ hu nyɛaanyɛ ekpakpa nyɛfee, nyɛ mɛi ni efɔŋfeemɔ eka nyɛhe lɛ!” (Yeremia 13:23) Akɛ “Babilon Kpeteŋkpele” ni ji jeŋ apasa jamɔ maŋtsɛyeli lɛ fa ni ehe gbɛi fe fɛɛ lɛ—aŋmɛ Kristendom jamɔ lɛ titri yɛ ŋwɛi nsɛni mli ni ana akɛ esheee kwraa. Abu lɛ fɔ aha hiɛkpatamɔ!—Yeremia 2:34, 36, 37; 5:29-31; Daniel 5:27.
15. Te Yehowa aaafee tɛŋŋ ekɛ naanɔ toiŋjɔlɛ aba, ni yɛ mɛɛ gbɛ nɔ mɛi ni kɛ amɛhiɛ fɔɔ enɔ lɛ sɔmɔɔ yɛ toiŋjɔlɛ he?
15 Yehowa, “toiŋjɔlɛ Nyɔŋmɔ lɛ” kɛ naanɔ toiŋjɔlɛ baaba kɛtsɔ mɛi ni eye la yi sɔ lɛ fee ni aaakpata amɛhiɛ ni akɛ adesai ni sumɔɔ toiŋjɔlɛ kɛ jalɛ nifeemɔ diɛŋtsɛ lɛ aaato shikpɔŋ lɛ nɔ lɛ nɔ. (Filipibii 4:9, New World Translation) Taakɛ Maŋtsɛ David kɛɛ lɛ, mɛi ni he jɔ ‘ni ŋɔɔ amɛhiɛ amɛfɔɔ Yehowa nɔ ni amɛfeɔ ekpakpa’ lɛ ji mɛi ni “shikpɔŋ lɛ aaatsɔ amɛnɔ” ni “amɛmii aaashɛ amɛhe yɛ hejɔlɛ babaoo mli.” (Lala 37:3, 11) Mɛi ni kɛ ‘amɛhiɛ fɔɔ Yehowa nɔ yɛ be fɛɛ mli ni amɛfeɔ ekpakpa’ ni amɛsɔmɔɔ yɛ toiŋjɔlɛ he lɛ feɔ nakai yɛ gbɛ ni mɛi ni kɛ futufutu sɔlemɔi haa nyɔŋmɔi kɛ amagai sɔrɔtoi lɛ nyɛŋ afee nakai kɔkɔɔkɔ lɛ nɔ.—Lala 115:2-8; Yesaia 44:14-20.
16. Mɛɛ okpɔlɔ Yehowa ŋmɛɔ ehaa mɛi ni baa amɛhe shi ni abuaa amɛnaa kɛjɛɔ “jeŋmaji yiwalɔi lɛ amaŋ” lɛ amli Iɛ?
16 Mɛɛ shihilɛi ni kɛ amɛhe kpaaa gbee ka Yehowa diɛŋtsɛ webii lɛ asɔlemɔi kɛ hiɛnɔkamɔi kɛ mɛi ni fiɔ “Babilon Kpeteŋkpele” lɛ sɛɛ lɛ anɔ mli nɛkɛ! Kwɛ bɔ ni wɔhiɛ sɔɔ bɔ ni eba hewalɔi lɛ alala lɛ shi” eha lɛ! (Yesaia 25:5) Ye be mli ni wɔwieɔ heshibalɔi ni abuaa amɛnaa kɛjɛɔ “yiwalɔi lɛ amaŋ” lɛ amli lɛ he lɛ, Yesaia tee nɔ ekɛɛ akɛ: “Ni Yehowa Zebaot aaaŋmɛ okpɔlɔ yɛ gɔŋ nɛɛ nɔ aha majimaji fɛɛ: fɔnii kɛ wein kpakpa . . . ni atsere nɔ.” (Yesaia 25:6) Mumɔŋ niyenii ni mɛi ni bajaa Yehowa ŋmɛnɛ lɛ naa mli gbɛfaŋnɔ lɛ ji nɔ ko ni haa mɔ tsui nyɔɔ emli diɛŋtsɛ, eji okpɔlɔŋmɛɛ diɛŋtsɛ! Ewoɔ wɔtsui hewalɛ koni wɔŋmɛ wɔtsui shi ni wɔmiishɛɛ lɛ tekeɔ nɔ yɛ be mli ni wɔsɔmɔɔ Yehowa ekaa naa ni wɔkɛkpaa jeŋ hee lɛ kɛ nibii kpakpai ahe okpɔlɔŋmɛɛ ni Yehowa ewo shi kɛha shikpɔŋ hee lɛ gbɛ lɛ.—Lala 104:1, 14, 15; Mateo 19:28.
17. Mɛɛ “naakpɛɛ nibii” Yehowa baatsu, ni mɛɛ miishɛɛ ekɛbaaha?
17 Etsɛŋ ni Yah Yehowa baafee “naakpɛɛ nibii” ni jeee jiemɔ ebaajie “Babilon Kpeteŋkpele” lɛ kɛya pɛ kɛkɛ, shi moŋ, ebaajie “fɔbuu muhɔɔ” ni alɛɛ mli aha adesai anɔ yɛ Adam esha lɛ hewɔ lɛ kɛya. (Yesaia 25:7) Hɛɛ, Yesu afɔleshaa lɛ hewɔ lɛ, wɔnyɔŋmɔ lɛ baaha gbalɛ ni yɔɔ Yesaia 25:8 lɛ aba mli: “Eeemi gbele kɛaatee naanɔ; ni Nuŋtsɔ Yehowa aaatsumɔ hiɛaŋ fɛɛ yaafonui, ni eeejie emaŋ lɛ hiɛgbele lɛ yɛ shikpɔŋ muu lɛ fɛɛ nɔ; ejaakɛ Yehowa ekɛɛ.” Mɛɛ miishɛɛ ji enɛ akɛ aaana ni ajie Adam esha kɛ gbele lɛ kɛtee koni wɔhere wɔsuɔlɔi ni kuɔ amɛsɛɛ kɛjɛɔ gbele nyɔŋyeli mli amɛbaa lɛ atuu lɛ! Mɛɛ mlifilimɔ enɛ aaaji akɛ wɔɔle akɛ Yehowa Odasefoi anɔkwafoi lɛ kɛ hetoo ni yeɔ emuu eha Ahorabɔlɔ kpeteŋkpele ni ji Satan Abonsam! (Abɛi 27:11) Mɔ ko mɔ ko ebɔŋ amɛ ahora dɔŋŋ, ejaakɛ amɛye omanye yɛ amɛ emuuyeli mli. Yehowa diɛŋtsɛ baatsu nibii ni egba efɔ shi lɛ he nii ejaakɛ “[Yehowa] oyiŋtoo ni jɛ blema beebe lɛ ema shi shiŋŋ, ni anɔkwale ni.” No mli lɛ shikpɔŋ muu lɛ fɛɛ etsɔ jalɛ paradeiso, ni jalɔi eyi mli obɔ. Gbɛkpamɔ ni yɔɔ nyam lɛlɛŋ!
18. Yɛ nɔnyɛɛ fɛɛ sɛɛ lɛ, mɛni wɔtswa wɔfai shi akɛ wɔbafee, yɛ Yesaia 25:9 kɛ gbeekpamɔ naa?
18 Kɛ wɔkɛ wɔhe fɔ Yehowa nɔ yɛ be fɛɛ mli kɛtsɔ nɛkɛ gbii ni mli ewo duŋ nɛɛ amli lɛ, wɔnine baashɛ enyɔmɔwoo ni sa lɛ nɔ. Yɛ nɔnyɛi sɔrɔtoi ni wɔɔwu wɔshi yɛ wɔdaa gbi shihilɛ mli lɛ fɛɛ sɛɛ lɛ—kɛji akɛ eji wɔwekui anɔkwɛmɔ, Biblia mli shishitoo mlai ni wɔmɔɔ mli kpɛŋŋ yɛ skul, aloo odase ni wɔyeɔ yɛ shikpɔŋkukuji ni mli nitsumɔ wa lɛ amli hu lɛ—nyɛhaa wɔkɛ wɔhe afɔa Yehowa nɔ yɛ be fɛɛ mli. Wɔhe ni wɔkɛaabɔ Yehowa he kpaakpa yɛ be fɛɛ mli akɛ “Sɔlemɔ Toibolɔ” lɛ baama yiwalaheremɔ nɔ mi aha wɔ. (Lala 65:3, New World Translation) No hewɔ lɛ, nyɛhaa wɔtswaa wɔfai shi akɛ wɔbaahi mɛi ni kɛɔ yɛ Yesaia wiemɔi ni yɔɔ 25:9 lɛ mli lɛ ateŋ, akɛ: “Naa, wɔ-Nyɔŋmɔ lɛ ni wɔhiɛ ka enɔ, akɛ eeehere wɔyiwala lɛ nɛ! Mɔnɛ ji Yehowa ni wɔhiɛ ka enɔ lɛ! Nyɛhaa wɔnyaa ni wɔmli afilia wɔ yɛ yiwalaheremɔ lɛ hewɔ!a
[Shishigbɛ niŋmai]
a Ajie kɛjɛ January 15, 1988 Watchtower lɛ mli.
Sanebimɔi Ni Akɛtiɔ Mli
◻ Yah Yehowa ji wɔhewalɛ kɛ wɔnyɛmɔ yɛ mɛɛ gbɛ nɔ?
◻ Mɛni ji “jeŋmaji yiwalɔi amaŋ” lɛ?
◻ Yɛ mɛɛ gbɛ nɔ anyɛ ‘jeŋmaji yiwalɔi amaŋ’ lɛ nɔ koni ewo Yehowa hiɛ nyam ni agbɛnɛ eshe lɛ gbeyei hu?
◻ Mɛni tsɔɔ akɛ miishɛɛ lala ko bɛ “Babilon Kpeteŋkpele” lɛ mli?
◻ Mɛɛ “naakpɛɛ nibii” yɔɔ lolo ni Yehowa baafee aha ewebii lɛ?