Nyɛŋɔa Nyɛhiɛ Nyɛfɔa Yah Yehowa Nɔ!
“Nyɛŋɔa Nyɛhiɛ Nyɛfɔa Yehowa nɔ daa, ejaakɛ Yah Yehowa ji naanɔ Tɛsaa.”—YESAIA 26:4, New World Translation.
1, 2. Mɛɛ yijiemɔ lala ji nɔ ni yɔɔ Yesaia 26:1-6, ni mɛni hewɔ?
BƆ NI eba ‘jeŋmaji yiwalɔi amaŋ’ lɛ shi eha lɛ biɔ kunimyeli lalai! (Yesaia 25:3) No hewɔ lɛ esa jogbaŋŋ akɛ gbalɛ ni yɔɔ Yesaia yitso 26, kukuji 1 kɛyashi 6 lɛ kɛ yijiemɔ kɛ mlifilimɔ lalai kɛha Jeŋ Muu Fɛɛ Nuŋtsɔ Yehowa lɛ aaaha. Aala enɛ bianɛ po “yɛ Yuda shikpɔŋ lɛ nɔ,” Yuda shishi ji “yijiemɔ.” King James Version lɛ kɛ wiemɔ “NUNTSƆ YEHOWA” tsu nii yɛ he ni akɛ ŋwɛi gbɛi lɛ bɔɔ he shii enyɔ yɛ lɛ. Shi kwɛ bɔ ni nakai wiemɔi lɛ bafeɔ miishɛɛ nɔ yɛ bɔ ni ejeɔ kpo yɛ New World Translation lɛ mli lɛ, heni enɛ kɛ shii abɔ ni ŋwɛi gbɛi lɛ jeɔ kpo pɛpɛɛpɛ baa yɛ lɛ!
2 Agbɛnɛ bo lala ni ŋɔɔ nɛɛ atoi: “Wɔyɛ maŋ ni wa; ekɛ yiwalaheremɔ efee ehe gbogboi kɛ ehe kawoo gbogboi. Nyɛgbelea agboi lɛ, koni jeŋmaŋ ni ja ni yeɔ anɔkwa lɛ abote mli! Jwɛŋmɔ ni ma shi shiŋŋ lɛ, oooha ena hejɔlɛ, hejɔlɛ; ejaakɛ onɔ eŋɔɔ ehiɛ efɔɔ. Nyɛŋɔa nyɛhiɛ nyɛfɔa Yehowa nɔ daa; ejaakɛ Nuŋtsɔ Yehowa ji naanɔ tɛsaa. Ejaakɛ mɛi ni taa ŋwɛi lɛ, ebaa amɛ shi; maŋ ni kwɔ lɛ, ebaa lɛ shi, ebaa lɛ shi kɛbaa shikpɔŋ, ni ekɛ shikpɔŋ su aye egbɔ; akɛ nane aaanaa nɔ; hɛɛ, nɔnalɔi anaji kɛ ohiafoi ananefaamɔi hu.” Mɛɛ miishɛɛ enɛ ji akɛ ooofata mɛi ni kɛ amɛhiɛ fɔɔ enɔ nɛɛ ni naa lala nɛɛ lamɔ mli gbɛfaŋnɔ—Yehowa Odasefoi lɛ ahe!
3. (a) Mɛni ji “jeŋmaŋ ni ja” lɛ, ni namɛi ebote “egboi” ni naa ka lɛ amli? (b) Te feɔ tɛŋŋ ni Yehowa gbɛjianɔtoo lɛ yaa ehiɛ yɛ ekomefeemɔ mli yɛ mɔdɛŋ ni henyɛlɔ lɛ bɔɔ koni ekɛfite lɛ lɛ fɛɛ sɛɛ lɛ?
3 Nyɔŋmɔ Yehowa—Yah Yehowa—baaba henɔwolɔi lɛ ashi lɛlɛŋ ni ehere mɛi ni kɛ amɛhiɛ fɔɔ enɔ yɛ be fɛɛ mli lɛ ayiwala. Eyɛ mli akɛ be ko lɛ amɛji “mɔ bibioo” moŋ, shi mumɔŋ Israel ebatsɔ “maŋ ni wa,” “jeŋmaŋ ni ja.” Gbɔmɛi babaoo ni hiɛ tsuijurɔ ni ji nanemɛi ni yibɔ fe akpekpei etɛ ebote Yehowa gbɛjianɔtoo ni tamɔ maŋ lɛ “agboi” ni agbele naa lɛ mli. Amɛ fɛɛ amɛfeɔ nyɛmimɛi ni jɛ majimaji anɔ, ni kɛ hoo lɛ, amɛyifalɛ fe maji komekomei 57 ni feɔ nɔ ni akɛɛ atsɛɔ lɛ Jeŋmaji Ekomefeemɔ lɛ mli bii lɛ ekomɛi. Shi, Nyɔŋmɔ “jeŋmaŋ” lɛ kɛ mɛi ni kɛ amɛhe bɔɔ he lɛ efee ekome diɛŋtsɛ. Jwɛŋmɔ ni ma shi shiŋŋ ni amɛyɔɔ yɛ shikpɔŋ muu lɛ fɛɛ nɔ ji ni amɛfee toiboo amɛha ejalɛ shishitoo mlai lɛ. Nyɔŋmɔ gbɛjianɔtoo ni tamɔ “jeŋmaŋ” lɛ “gbogboi” lɛ tsɔɔ hebuu nɔ kɛhaa amɛ yɛ mɔdɛŋ ni Satan baabɔ akɛ eeefite ejeŋba kpakpa lɛ ni ekɛfiɔ anɔkwale lɛ sɛɛ lɛ. Henyɛlɔ lɛ nyɛŋ afite anɔkwayeli ni Nyɔŋmɔ webii lɛ kɛshiɔ ako kɛyaa amɛhiɛ lɛ? Wɔhekɛnɔfɔɔ lɛ yɛ ‘Yah Yehowa naanɔ Tɛsaa lɛ mli kɛmiiya naanɔ’!—Yesaia 54:17; 60:22.
4, 5. (a) Mɛni ji “maŋ ni kwɔ lɛ,” ni Yehowa webii naanaa nɔ yɛ okadi gbɛ nɔ yɛ mɛɛ gbɛ nɔ? (b) Mɛɛ be mli gbalɛ ni yɔɔ Yesaia 26:10 lɛ naa emlibaa ni da, ni yɛ mɛɛ gbɛ nɔ? (d) Gbalɛ nɛɛ kɔɔ mɛɛ nɔ kroko he?
4 Yɛ be mli ni wɔbɔɔ kɔkɔ akɛ Yehowa miihe aba “maŋ ni kwɔ lɛ” ni ji “Babilon Kpeteŋkpele” lɛ shi lɛ, efeɔ miishɛɛ kɛ ana bɔ ni nɔnalɔi kɛ ohiafoi ni yɔɔ shikpɔŋ lɛ nɔ lɛ boɔ Maŋtsɛyeli lɛ he sanekpakpa lɛ toi amɛhaa lɛ. (Kpojiemɔ 18:2, 4, 5) Amɛ hu amɛnaanaa “maŋ ni kwɔ” lɛ nɔ yɛ okadi gbɛ nɔ, jeee akɛ amɛkɛ amɛhe woɔ hiɛkpatamɔ lɛ mli moŋ, shi gbɛfaŋnɔ ni amɛnaa yɛ Yehowa oweletɔɔ gbi ni ekɛbaa gbɛjianɔtoo ni ekpɔtɔ nɛɛ nɔ lɛ jajemɔ mli lɛ. (Yesaia 61:1, 2) Afii nyɔŋmanyɔŋmai abɔ nɛ ni Yehowa Odasefoi ejie mlihilɛ kpo amɛtsɔɔ yiwalɔi lɛ kɛtsɔ amɛshiai ni amɛkɛ Maŋtsɛyeli lɛ he sane ni hereɔ mɛi ayiwala lɛ yaa nɔ. Shi nɔ ni ejɛ mli eba lɛ efee tamɔ nɔ ni ajaje yɛ Yesaia 26:10 lɛ: “Kɛ aduro efɔŋfeelɔ tete lɛ, ekaseee jalɛ; shi moŋ eyeɔ saji fɔji yɛ jalɛ shikpɔŋ lɛ nɔ, ni ekwɛɛɛ Yehowa agbojee lɛ.”
5 Nɛkɛ gbalɛ ni kɔɔ nibii asaamɔ he ekoŋŋ nɛɛ naa emlibaa ni da ŋmɛnɛ. Eyɛ mli akɛ akɛ hegbɛ lɛ eha moŋ, shi gbɔmɛi fioo pɛ sumɔɔ ni amɛtsake amɛshihilɛ bɔni afee ni amɛna ehiɛ duromɔ “yɛ jalɛ shikpɔŋ lɛ nɔ.” Mɛi ni bɔɔ Yehowa kɛ edasefoi anɔkwafoi lɛ ahora lɛ ‘enaŋ Yehowa agbojee lɛ,’ ejaakɛ amɛjeŋ mli koni amɛyana naakpɛɛ jɔɔmɔi ni baaho kɛba adesai anɔ yɛ be mli ni atsuu Yehowa gbɛi lɛ he lɛ sɛɛ lɛ mli ŋɔɔmɔ. (Yesaia 11:9) Gbalɛ lɛ hu baanyɛ akɔ mɛi ni abaatee amɛ shi kɛjɛ gbohii abui amli kɛba Paradeiso shikpɔŋ lɛ nɔ lɛ ahe. Mɔ fɛɛ mɔ ni baakpoo akɛ eeehi shi yɛ Nyɔŋmɔ taomɔ nii anaa, taakɛ afee lɛ faŋŋ yɛ ŋwɛi “woji” lɛ amli yɛ nakai be lɛ mli lɛ enaŋ ni aŋma amɛgbɛi yɛ “wala wolo” lɛ mli.—Kpojiemɔ 20:12, 15; okɛto Ezekiel 33:11 he.
Yehowa Ŋɔɔ Toiŋjɔlɛ Ebaa
6. Mɛɛ wiemɔi Yehowa webii anɔkwafoi kɛ miishɛɛ jajeɔ amɛtsɔɔ, ni mɛni hewɔ?
6 Shi Yehowa webii anɔkwafoi lɛ yɛ miishɛɛ waa akɛ amɛaana ni awo Yah Yehowa nɔ gojoo ni abu lɛ bem. Amɛtsɛɔ lɛ koni ‘eŋɔ toiŋjɔlɛ eha’ ewebii lɛ, ni amɛkɛ miishɛɛ bolɔɔ akɛ: “Oha jeŋmaŋ lɛ yi efa, Yehowa oha jeŋmaŋ lɛ yi efa, ohiɛ eba nyam, ogbele shikpɔŋ lɛ husui lɛ fɛɛ mli.” (Yesaia 26:12, 15) Yehowa yaa nɔ ekɛ gbɔmɛi ni tamɔ gwantɛŋi fataa emumɔŋ maŋ lɛ he yɛ shikpɔji 210 nɔ yɛ jeŋ muu fɛɛ. Aabaptisi emli bii heei akpei ohai abɔ. Gbɛgbalɔi krɛdɛɛ, daa gbɛgbalɔi kɛ gbɛgbalɔi awalɔi fe akpeiakpe mlijaa sɔmɔɔ yɛ nyɔji krɛdɛɛi amli. Aaamamɔ Maŋtsɛyeli Asai kɛ Kpeei Asai babaoo. Buu Mɔɔ lɛ niji miilɛɛ amɛ-Betel Shiai kɛ nitsumɔ hei amli ni akɛ tsɔnei ni akɛkalaa woji miifata he. Shweremɔ lɛ ji nɔ ni yaa nɔ!
7. Mɛni haa Yehowa gbɛjianɔtoo ni tamɔ maŋ lɛ mli lɛɛɔ ni eshwereɔ lɛ?
7 Nɛkɛ mlilɛɛmɔ nɛɛ miiba lɛ nakai, ejaakɛ “Toiŋjɔlɛ Lumɔ” lɛ miikudɔ Nyɔŋmɔ webii ni yɔɔ shikpɔŋ nɛɛ nɔ lɛ asaji. Taakɛ Yesaia tsɔ hiɛ ejaje yɛ mra be mli gbalɛ ko mli lɛ: “Elumɔyeli lɛ shweremɔ kɛ hejɔlɛ lɛ sɛɛ efoŋ yɛ David maŋtsɛsɛi lɛ nɔ kɛ emaŋtsɛyeli lɛ nɔ, ni ekɛ kojomɔ kɛ jalɛ aaaha ema shi shiŋŋ ni eeewo lɛ hewalɛ kɛjɛ ŋmɛnɛ aaahu kɛyashi naanɔ. Yehowa Zebaot hiɛdɔɔ lɛ aaafee enɛ.” (Yesaia 9:6, 7) Kwɛ bɔ ni nɛkɛ wiemɔi nɛɛ eba mli fɛfɛo ŋmɛnɛ! Mɛi ni kɛ amɛhiɛ fɔɔ Yehowa nɔ lɛ naa nakai lumɔyeli lɛ mli toiŋjɔlɛ kɛ kojomɔ kɛ jalɛ lɛ mli ŋɔɔmɔ bianɛ. Ebua amɛnaa efee amɛ ekome yɛ suɔmɔ ekomefeemɔ ni Yesu anɔkwa kaselɔi lɛ pɛ naa mli ŋɔɔmɔ lɛ mli. (Yohane 13:34, 35) Agbɛnɛ, amɛkɛ hehiamɔ miikpa be mli ni Yesu Maŋtsɛyeli nɔyeli lɛ kɛ “Yehowa he nilee” aaayi shikpɔŋ muu lɛ fɛɛ nɔ obɔ ni baa kɛ foi lɛ gbɛ.—Yesaia 11:9; Daniel 2:35, 44, 45.
8. Mɛni ji nɔ ni Yehowa wiemɔi ni yɔɔ Yesaia 26:20 lɛ tsɔɔ, ni akɛ “piai” lɛ toɔ mɛni he?
8 Yɛ be mli ni Maŋtsɛyeli lɛ mlilɛɛmɔ yaa hiɛ kɛyashɛɔ naagbee lɛ, Yehowa tsɛmɔ ni yɔɔ Yesaia 26:20 lɛ jijeɔ akɛ: “Yaa, mimaŋ, ni oyabote opia lɛ mli, ni oŋa oshinaa owo oyi; teemɔ ohe hiŋmɛitswaoo ko kɛyashi beyinɔ ni mlifu lɛ aaaho!” Ŋwanejee ko bɛ he akɛ “pia” ni yɔɔ nɛkɛ gbalɛ nɛɛ mli lɛ kɔɔ asafoi fe 54,000 ni tamɔ maji ni sɔɔmɔ Yehowa Odasefoi yɛ shikpɔŋ muu lɛ fɛɛ nɔ ŋmɛnɛ lɛ ahe. Nɔ ni eshwɛ ni yɔɔ Yehowa jwɛŋmɔ mli lɛ, wɔbaana. Shi wɔbaanyɛ wɔna nɔmimaa akɛ kɛ ekpata efɔŋfeelɔi lɛ ahiɛ lɛ, ebaabu ewebii ni kɛ amɛhiɛ fɔɔ enɔ lɛ ahe, taakɛ bɔ ni efee yɛ Yesaia gbii lɛ amli ni eha Ashurnyo yiwalɔ lɛ ku esɛɛ kɛ foi lɛ.—Yesaia 10:24-26.
Ama Jiemɔ Nɔ Mi!
9. (a) Maŋtsɛ Hezekia tsɔɔ bɔ ni ekɛ ehiɛ fɔɔ Yehowa nɔ lɛ yɛ mɛɛ gbɛ nɔ? (b) Kɛ Yehowa henyɛlɔi lɛ miiwa wɔyi loo amɛmiije wɔ lɛ, mɛni ji wɔhetoo ni ja?
9 Yehowa tsuji ni yɔɔ ŋmɛnɛ kɛ amɛhiɛ fɔɔ enɔ tamɔ bɔ ni Maŋtsɛ Hezekia fee lɛ pɛpɛɛpɛ. Ekɛ ehe fɔ Yehowa nɔ kwraa akɛ e-Jeŋ Muu Fɛɛ Nuŋtsɔ. No hewɔ lɛ, be mli ni Ashurbii lɛ wo ehe gbeyei lɛ, esɔle eha Yehowa yɛ nɛkɛ wiemɔi nɛɛ amli: “Yehowa Zebaot, lsrael Nyɔŋmɔ, bo ni ohiɔ kerubim anɔ, bo okome too ji Nyɔŋmɔ yɛ shikpɔŋ lɛ nɔ maŋtsɛyelii lɛ fɛɛ nɔ; bo ofee ŋwɛi kɛ shikpɔŋ! Gbo otoi shi, Yehowa, ni onu; gbelemɔ ohiŋmɛi, Yehowa ni okwɛ! Ni onu Sanherib wiemɔi fɛɛ ni etsu akɛbasopa Nyɔŋmɔ hiɛkalɔ lɛ!” (Yesaia 37:16, 17) Kɛ mɛi ni nyɛɔ Yehowa lɛ wa wɔyi, amɛye wɔhe fɛo aloo amɛjɛ wɔ lɛ, ani sɔlemɔ ni tamɔ nakai nɔŋŋ eteee shi yɛ otsui mli? Akɛni oyɔɔ Yehowa mli hekɛnɔfɔɔ kwraa hewɔ lɛ, ani osɔleee ohaaa lɛ ni okpa lɛ fai koni ejie ahora ni abɔɔ egbɛi lɛ kɛya? Nakai pɛ ji bɔ ni Yesu nu he be mli ni ebaagbo yɛ sɛŋmɔtso nɔ lɛ. Ebi po akɛ kulɛ kɛaahi lɛ kpulu ni ebaanu lɛ “aho aya” yɛ ahorabɔɔ kpeteŋkpele ni baaba e-Tsɛ gbɛi lɛ nɔ lɛ hewɔ.—Mateo 26:39-44.
10. (a) Mɛni ji nɔ ni Hezekia sɔlemɔ lɛ jie lɛ kpo yɛ nɔ ni esusuɔ he titri he? (b) Te wɔɔfee tɛŋŋ wɔtamɔ Hezekia yɛ be mli ni wɔkɛ kaai ni tsɔɔ Harmagedon hiɛ lɛ kpeɔ lɛ?
10 Hezekia sɔlemɔ lɛ tsɔɔ akɛ jeee pɛsɛmkunya yiŋtoo ko hewɔ ni etaoɔ jiemɔ kɛjɛɔ Ashur dɛŋ lɛ. Jeee akɛ eeebɔ mɔdɛŋ ni ehere lɛ diɛŋtsɛ eyiwala. Shi moŋ, nɔ ni esusuɔ he ji ni Yehowa gbɛi lɛ he atse ni abu jeŋ muu fɛɛ maŋtsɛ ni E-ji lɛ bem. No hewɔ lɛ, esɔlemɔ lɛ ba naagbee kɛ nɛkɛ wiemɔi nɛɛ: “Shi agbɛnɛ, Yehowa wɔ-Nyɔŋmɔ, miikpao fai, heremɔ wɔyiwala kɛjɛ edɛŋ, koni shikpɔŋ lɛ nɔ maŋtsɛyelii fɛɛ ana ale akɛ bo okome too ji Yehowa!” (Yesaia 37:20) Nakai nɔŋŋ hu yɛ be mli ni wɔkɛ kaai ni tsɔɔ Harmagedon naagbee ta lɛ hiɛ lɛ kpeɔ lɛ, nyɛhaa ahia wɔjwɛŋmɔ mli akɛ wɔ diɛntsɛ wɔyiwalaheremɔ baa yɛ Yehowa gbɛi lɛ hetsemɔ sɛɛ.Wɔ jeŋ muu fɛɛ Nuŋtsɔ lɛ jaje aaafee shii 60 kɛtsɔ egbalɔ Ezekiel nɔ akɛ: Ni amɛaana amɛle akɛ mi ji Yehowa.”—Ezekiel 38:23.
11. (a) Sanherib tɔ yɛ mɛni mli, ni mɛni Yehowa kɛɛ yɛ enɛ he? (b) Yɛ nɔ ni jɛ mli ba kɛha Sanherib lɛ hewɔ lɛ, mɛɛ hekɛnɔfɔɔ wɔbaanyɛ wɔna?
11 Yɛ be mli ni Hezekia esɔle sɛɛ lɛ, Yesaia kɛɛ maŋtsɛ lɛ nɔ Yehowa wiemɔ ni ekɛshiɔ Sanherib. Mɛɛ tɔmɔ Ashur musubɔlɔ lɛ etɔ nɛkɛ yɛ Nyɔŋmɔ hiɛkalɔ lɛ ahora ni ebɔ lɛ hewɔ! Yehowa tsɔ Yesaia nɔ ekɛɛ Sanherib akɛ: “Namɔ ahora obɔ ni owie musubɔɔ wiemɔi oshi lɛ lɛ? Namɔ nɔ owo ogbee nɔ yɛ ni ohole ohiŋmɛi anɔ kɛtee ŋwɛi yɛ lɛ? Israel Mɔ Krɔŋkrɔŋ lɛ ni!” Ni Israel Mɔ Krɔŋkrɔŋ lɛ ji mɔ ni tsu nii nakai gbɛkɛ lɛ! Yehowa ha eŋwɛibɔfo kome pɛ tswia amɛ nii, ni eha Ashur asraafoi lɛ amli gbɔmɛi 185,000 ni ji Sanherib asraafoi kpakpai lɛ tsɔmɔ “gbohii sɔŋŋ.” Nakai maŋtsɛ henɔwolɔ lɛ kɛ hiɛgbele jo foi kɛtee Ninive ni yɛ afii komɛi asɛɛ lɛ, lɛ diɛŋtsɛ ebii gbe lɛ yɛ be mli ni ekaa he yɛ ewɔji ajamɔ lɛ mli lɛ. Wɔbaanyɛ wɔkɛ wɔhiɛ afɔ Yehowa nɔ, kɛ hekɛnɔfɔɔ akɛ E-baafee Satan kɛ esamaŋfoi fɛɛ ni kɛ musubɔɔ jɛɔ lɛ ni amɛwaa Yehowa Odasefoi lɛ ayi lɛ nakai nɔŋŋ.—Yesaia 37:23, 36-38.
“Mɛi Ni Agbe Yɛ Enɔ” lɛ He Oweletɔɔ
12. (a) Yɛ mɛɛ gbɛ nɔ Yesaia 26:21 tsɔɔ nɔ ni baaba yɛ Harmagedon lɛ mli? (b) Namɛi ji “mɛi ni agbe yɛ enɔ” lɛ ni abaatɔ amɛla he owele dani Harmagedon po aba lɛ, ni yɛ mɛɛ gbɛ nɔ?
12 Ebafee tawuu he ko ni yɔɔ gbeyei yɛ nakai blema be lɛ mli. Shi nɔ ko ni yɔɔ gbeyei kwraa fe nakai baaba yɛ “amanehulu kpeteŋkpele” lɛ mli. (Mateo 24:21) Yehowa fɔɔ nine etsɛɔ wɔ koni wɔkwɛ bɔ ni nakai hiɛkpatamɔ lɛ baaba aha: “Shi naa, Yehowa miije kpo kɛmiijɛ ehilɛ he lɛ ni eyawo shikpɔŋ lɛ nɔ bii anyɔmɔ yɛ amɛnishaianii lɛ ahewɔ; ni shikpɔŋ lɛ aaajie ela lɛ kpo ni ehaŋ mɛi ni agbe yɛ enɔ lɛ anɔ dɔŋŋ.” (Yesaia 26:21) Klɛŋklɛŋ lɛ, Yehowa baaha maŋkwramɔŋ yiwalɔi lɛ kɛ fɔbuu kojomɔ aba mɛi ni fiɔ apasa jamɔ sɛɛ lɛ anɔ. Apasa nyɔŋmɔi lɛ nyɛŋ ahere amɛyiwala yɛ nakai gbi lɛ nɔ! Ha Roma Paapa lɛ aya nɔ abua “Babilon Kpeteŋkpele” lɛ mli jamɔi lɛ fɛɛ anaa kɛha futufutu sɔlemɔi. Nɛkɛ futufutu hemɔkɛyeli mli hiɛnyiɛlɔi nɛɛ ateŋ mɔ ko bɛ ni woɔ anɔkwa hiɛkalɔ kome, Yehowa hiɛ nyam. Amɛtsɔɔmɔi lɛ ejaaa, ebɛ Biblia lɛ mli, ni nakai amɛgbɛi hu ji. Amɛgbegbee amɛhe yɛ afii ohai abɔ lɛ fɛɛ mli. Amɛfɔse Kristofoi ni kɛ amɛhe wooo awuiyeli mli lɛ ala amɛshwie shi. Nɛkɛ efɔŋfeelɔi ni yɔɔ wɔ afii ohai 20 nɛɛ mli lɛ ateŋ mɛi pii efi nɔyelɔi yiwalɔi ni gbe Yehowa Odasefoi yɛ gbokɛlɛfoi atsui amli kɛ yiwalɛ ŋsaraŋ sɔrɔtoi kɛtsɔ tui ni atswia amɛ kɛ lemai ni akɛfolɔ amɛyii lɛ anɔ. Taakɛ bɔ ni Yehowa jajeɔ yɛ faŋŋ mli kɛtsɔ egbalɔi lɛ anɔ lɛ, abaatɔ nɛkɛ “mɛi ni agbe yɛ enɔ” lɛ ala lɛ he owele.—5 Mose 32:41, 43; Yesaia 1:24; 63:4; Kpojiemɔ 17:15-18; 18:21, 24.
13. Mɛni Yesaia gba yɛ “Yehowa gbi” lɛ he, ni ewiemɔi lɛ kɔɔ namɛi ahe?
13 Yɛ be mli ni akpata apasa jamɔ hiɛ sɛɛ lɛ, Yehowa kɛ oyaiyeli baafa kɛba mɛi ni eshwɛ lɛ fɛɛ ni teɔ shi woɔ Kristo Maŋtsɛyeli lɛ anɔ. Nyɔŋmɔ wiemɔi ni yɔɔ Yesaia 13:6, 9 lɛ kɛɔ yɛ shitee-kɛ-wolɔi nɛɛ kɛ agbɛnɛ “Babilon Kpeteŋkpele” lɛ fɛɛ he akɛ: “Nyɛwoa lele, shi Yehowa gbi lɛ eshɛ shi eta; eeeba tamɔ hiɛkpatamɔ ni jɛ Ofe lɛ dɛŋ. Naa, Yehowa gbi lɛ miiba kɛ yiwalɛ kɛ mlila kɛ mlifu ni naa wa, koni ebafee shikpɔŋ lɛ fɛɛ amaŋfɔ, ni ekpata emli eshafeelɔi lɛ ahiɛ kɛjɛ nɔ.” Ebaafee tamɔ bɔ pɛ ni lalatsɛ David gba fɔ shi lɛ: “Yehowa baa mɛi fɛɛ ni sumɔɔ lɛ lɛ ayi; shi mɛi fɔji lɛ, eeekpata amɛ fɛɛ amɛhiɛ.”—Lala 145:20; Kpojiemɔ 19:11-21.
14. Mɛɛ Yesaia wiemɔi krokomɛi jeŋmaji lɛ baafee jogbaŋŋ akɛ amɛaabo toi, ni mɛni hewɔ?
14 Ebaahi jogbaŋŋ aha shikpɔŋ lɛ nɔ jeŋmaji lɛ akɛ amɛaabo Yesaia wiemɔi kroko ni yɔɔ yitso 34, kukuji 1 kɛyashi 8 lɛ toi: “Nyɛ jeŋmaji, nyɛtsia nyɛbɛŋkɛa ni nyɛnua; nyɛ jeŋmaji hu, nyɛboa toi! . . . Ejaakɛ Yehowa mli efu jeŋmaji lɛ fɛɛ ni egri ewo amɛtai lɛ fɛɛ; efee amɛ musu, ekɛ amɛ eha ni agbe amɛ. Ni aaashɛrɛ amɛmɛi ni enyɔnyɔi lɛ ashwie, ni amɛgbohii lɛ aaaje fu, ni gɔji lɛ aaasere kɛ amɛla lɛ. . . . Ejaakɛ Yehowa oweletɔɔ gbi ni.” Nɔ ni efa babaoo yɛ maŋkwramɔŋ, nitsumɔ kɛ jarayeli wuji amli kɛ apasa jamɔ mli ŋmɛnɛ ji fitemɔ kɛ jeŋba shara. Shi Yehowa eto eyiŋ kɛha shikpɔŋ ni nɔ tse. Yɛ enɛ hewɔ lɛ, eebua gbɔmɛi ni sumɔɔ ni amɛtsake amɛshihilɛ ni amɛsɔmɔ lɛ yɛ jalɛ mli lɛ anaa—kɛha yiwalaheremɔ—kɛmiijɛ jeŋmaji lɛ amli. Esa akɛ mɛi ni eshwɛ lɛ fɛɛ hiɛ akpata yɛ nakai egbi ni ji oweletɔɔ gbi lɛ mli.—Yeremia 25:31-33.
Toiŋjɔlɛ Paradeiso
15. Mɛni Yesaia tsɔɔ mli yɛ yitso 35 ni kɔɔ (a) ŋmɛnɛ he? (b) wɔsɛɛ be he?
15 Nyɔŋmɔ gbalɔ lɛ tee nɔ yɛ Yesaia yitso 35 ni ekɛtsɔɔ mfonirifeemɔ wiemɔi fɛfɛo ko mli, koni ekɛtsɔɔ shihilɛ mli ni Yehowa webii ni asaa amɛ ekoŋŋ lɛ yɔɔ, mɛi ni ŋmɛnɛ amɛkɛ amɛhiɛ fɔɔ enɔ yɛ be fɛɛ mli lɛ. Akɛni abua amɛnaa awo mumɔŋ paradeiso mli hewɔ lɛ, mɛnɛɛmɛi “naa Yehowa anunyam lɛ, kɛ wɔ-Nyɔŋmɔ lɛ wulamɔ lɛ.” Agbɛnɛ hu amɛmiikpa paradeiso diɛŋtsɛ ni baaba gbɛ kɛ ehe shiwoo nɛɛ mlibaa: “No mli lɛ aaagbele shwilafoi ahiŋmɛii, ni aaagbele toimulɔi atoii. No mli lɛ obubuafoi aaatumɔ akɛ ofrote, ni mumui lilɛi hu aaala kɛ nyamɔ; ejaakɛ nui aaatue yɛ ŋa kpataa nɔ, ni faai aaaho yɛ ŋa olɛŋlɛ nɔ.” (Yesaia 35:1, 2, 5, 6) Ani omlifiliɔ bo yɛ nakai gbɛkpamɔ lɛ hewɔ? Ani okɛ ohiɛ fɔɔ Yehowa nɔ kɛ hiɛnɔkamɔ akɛ ebaaha nakai shiwoi lɛ aba mli?
16, 17. (a) Mɛɛ faikpamɔ ni he hiaa waa Yesaia kɛha yɛ be mli ni etsɔɔ Paradeiso lɛ mli lɛ? (b) Te esa akɛ Yehowa webii ahere afaikpamɔ lɛ nɔ amɛha tɛŋŋ?
16 Akɛni okɛ ohiɛ fɔɔ Yehowa nɔ hewɔ lɛ, obaanyɛ ona gbɛfaŋnɔ yɛ mɛi heei kɛ agbɛnɛ mɛi krokomɛi ni esa akɛ awo amɛ hemɔkɛyeli hewalɛ lɛ mli. Yɛ be mli ni etsɔɔ Paradeiso nɛɛ mli lɛ, gbalɔ Yesaia kɛ faikpamɔ ni he hiaa waa nɛɛ bawo mli: “Nyɛwajea niji ni mli eje wui lɛ, nyɛwoa nakutsei ni egbɔjɔ lɛŋ hewalɛ! Mɛi ni tsui faa lɛ, nyɛkɛa amɛ akɛ: Nyɛwajea nyɛhe, nyɛkashea gbeyei! Naa, nyɛ-Nyɔŋmɔ lɛ miiba oweletɔɔ kɛ Nyɔŋmɔ najiaŋtoo, ni eeehere nyɛyiwala hu.” (Yesaia 35:3, 4) Hɛɛ, wɔmiisumɔ ni wɔna mɛi fɛɛ ni tsui ja yɛ Yehowa he lɛ akɛ amɛmiina Yehowa mli hekɛnɔfɔɔ, koni amɛnyɛ amɛbote shikpɔŋ nɔ Paradeiso lɛ mli.
17 No hewɔ lɛ, nyɛhaa wɔyea wɔbuaa niji ni miigbɔjɔ lɛ bɔni afee ni “amɛhiɛ wala wiemɔ lɛ mli.” Nyɛhaa wɔwajea mɛi ni amɛnakutsei amli ejɔ lɛ, wɔye wɔbua amɛ yɛ he ni ehe hiaa yɛ koni “amɛnyiɛ bɔ ni sa Nuŋtsɔ lɛ ni asa ehiɛ kwraa.” (Filipibii 2:16; Kolosebii 1:10) Hɛɛ, nyɛhaa wɔshɛjea mɛi fɛɛ ni amɛhao yɛ tsui mli lɛ amii, ni nyɛhaa wɔwoa wɔhe hewalɛ, kɛ wɔkɛ kaai loo yiwaai miikpe, koni ‘amɛna ekaa babaoo fe tsutsu amɛkɛjaje Nyɔŋmɔ wiemɔ lɛ.’ (Filipibii 1:14; 1 Tesalonikabii 5:14; Efesobii 5:15, 16) Kɛkɛ lɛ, kɛ Yehowa gbi lɛ fɛ lɛ, wɔbaanyɛ wɔna nɔmimaa yɛ jɔɔmɔ ni ekɛaaba wɔ nɔ lɛ mli, ‘yɛ be mli ni ebaa ni ebahere ewebii ayiwala lɛ.’ Ani obaanyɛ ofata mɛi ni kɛ amɛhiɛ fɔɔ Yehowa nɔ kɛha yiwalaheremɔ yɛ nakai gbi lɛ nɔ lɛ ahe?
18. Mɛɛ anunyam gbɛkpamɔ ka mɛi ni kɛ amɛhiɛ fɔɔ Yehowa nɔ lɛ ahiɛ, ni mɛni ji amɛfaishitswaa?
18 Kɛha mɛi ni kɛ amɛhiɛ fɔɔ Yehowa nɔ yɛ be fɛɛ mli lɛ, mɛɛ anunyam gbɛkpamɔ ka nakai gbi lɛ sɛɛ kɛha amɛ nɛkɛ! Eshafeelɔi yiwalɔi eho etee! Mɛi ni sumɔɔ Yah Yehowa yɛ jeŋ hee lɛ mli lɛ baafee mɛi ni e-Bi lɛ baasaa amɛ ekoŋŋ kɛbote emuuyeli ni esha bɛ mli lɛ mli! Ani oshweɔ nakai be lɛ! Yehowa nɔ ni okɛ ohiɛ fɔɔ lɛ kɛbo baabote nakai naakpɛɛ gbi lɛ mli. Hɛɛ, nyɛkɛ nyɛhiɛ afɔa Yehowa nɔ daa, nyɛ gbɔmɛi, ejaakɛ enɛ ji yiwalaheremɔ lɛ!
Ajie kɛjɛ January 15, 1988 Watchtower lɛ mli.
Sanebimɔi Ni Akɛtiɔ Mli
◻ Kunimyeli Iala ni yɔɔ Yesaia 26 Iɛ woɔ wɔ hewalɛ ni wɔfee mɛni?
◻ Mɛɛ “maŋ ni kwɔ” Yehowa baaba lɛ shi lɛ, ni wɔnaanaa enɛ nɔ yɛ mɛɛ gbɛ nɔ?
◻ Mɛni wɔkaseɔ kɛjɛɔ Hezekia sɔlemɔ Iɛ mli yɛ Sanherib he gbeyeiwoo lɛ hewɔ?
◻ Yɛ mɛɛ gbɛ nɔ atɔɔ “mɛi ni egbe yɛ enɔ” ni yɔɔ Yesaia 26:21 lɛ ala Iɛ he owele yɛ?
◻ Kɛ wɔkɛ wɔhiɛ fɔ Yah Yehowa nɔ Iɛ, mɛni baajɛ mli aba?
[Akrabatsa ni yɔɔ baafa 28]
Akɛ Paapa Iɛ Aya Saneyeli He?
Yɛ be mli ni emuaa sane ko ni Umberto Siniscalohi ŋma yɛ ll Giornale Iɛ mli yɛ Milan lɛ naa Iɛ, World Press Review Iɛ jaje akɛ: “Aawie aashi Italia Saneyeli He Wulu lɛ waa, ejaakɛ eŋmɛɛɛ gbɛ ni amɔmɔ Vatikan shikatoo he lɛ mli onukpai etɛ ko ni Banco Ambrosiano juu he sane Iɛ kɔɔ amɛhe Iɛ gbɛ yɛ July [1987].” Akɛni yiŋkpɛɛ lɛ damɔ blema kpaŋmɔ ni ka Vatikan Iɛ kɛ Italia nɔyeli lɛ teŋ hewɔ lɛ, amɛŋmɛɛ shikatoo he sɛinɔtalɔ ni no mli lɛ eji osɔfonukpa Iɛ kɛ agbɛnɛ shikatoo he Iɛ nɔkwɛlɔ kɛ shika nɔkwɛlɔ nukpa Iɛ he. Sane Iɛ kɛfata he akɛ: “Eyɛ mli akɛ mɛi ni wieɔ shiɔ nɛɛ kɛ tɔmɔ ko efɔɔɔ kojolɔi lɛ anɔ yɛ amɛyiŋkpɛɛ lɛ hewɔ moŋ shi, amɛmaa nɔ mi akɛ nakai blema kpaŋmɔ lɛ shwieɔ Italia maŋnɔkwɛmɔ gbɛjianɔtoo Iɛ hiɛ shi akɛni eŋmɛɛ gbɔmɛi ni amɛku mla mli yɛ Italia Iɛ ahe lɛ hewɔ. Mlawolɔi komɛi miitsirɛ saji ayisɛɛ koni akpɛlɛ nɔ koni Italia Saneyeli He lɛ kɛ Paapa lɛ aya saneyeli he yɛ efɔŋ ni amɛfee yɛ Italia Iɛ hewɔ.”