Maŋ ni Hiɛɔ Emuuyeli Mli Lɛ
“Nyɛgbelea agboi lɛ, koni jeŋmaŋ ni ja ni hiɛɔ anɔkwa jeŋba mli lɛ abote mli!”—YESAIA 26:2, NW.
1. Mɛni hewɔ Yesaia wiemɔ ni kɔɔ “jeŋmaŋ ni ja” he lɛ baafee mɔ naakpɛɛ lɛ?
ŊMƐNƐ, jeŋmaji sɔrɔtoi fɛɛ yɛ. Ekomɛi lɛ, demokrase nɔyelii ni, ni ekrokomɛi hu, yiwalɛ nɔyelii. Ekomɛi yɛ nii, ni ekomɛi hu bɛ nɔ ko kwraa. Shi nɔ kome yɛ ni kɔɔ amɛ fɛɛ amɛhe: Amɛ fɛɛ amɛfata jeŋ ni Satan ji enyɔ ŋmɔ lɛ he. (2 Korintobii 4:4) Enɛ hewɔ lɛ, ekolɛ Yesaia wiemɔi ni ewie nɛɛ baaha mɛi komɛi anaa akpɛ amɛhe, akɛ: “Nyɛgbelea agboi lɛ, koni jeŋmaŋ ni ja ni yeɔ anɔkwa lɛ abote mli!” (Yesaia 26:2) Jeŋmaŋ ni ja? Hɛɛ, jeŋmaŋ ni ja yɛ, ejaakɛ gbalɛ lɛ gbalaa jwɛŋmɔ kɛyaa shihilɛ mli ni eyɔɔ yɛ wɔgbii nɛɛ amli lɛ nɔ. Shi te mɔ ko aaafee tɛŋŋ ele nɛkɛ jeŋmaŋ ni ekaaa nɛɛ?
2. Mɛni ji “jeŋmaŋ ni ja” nɛɛ? Te wɔfeɔ tɛŋŋ wɔleɔ?
2 Bɔ ni atsɔɔ Yesaia 26:2 lɛ shishi aha yɛ New World Translation lɛ mli lɛ wieɔ ehe akɛ jeŋmaŋ ni “hiɛɔ anɔkwa jeŋba mli.” King James Version (naabugbɛ niŋmaa) lɛ tsɔɔ ŋmalɛ kuku nɛɛ shishi akɛ, “jeŋmaŋ ni ja ni hiɛɔ anɔkwalei lɛ amli.” Mlitsɔɔmɔi enyɔ lɛ fɛɛ ja. Yɛ anɔkwale mli lɛ, jeŋmaŋ ni ja lɛ yɔsemɔ waaa ejaakɛ no pɛ ji jeŋmaŋ ni yɔɔ shikpɔŋ nɛɛ nɔ ni baa ehe shi ehaa Kristo, Maŋtsɛ lɛ, ni no hewɔ lɛ, ejeee Satan je lɛ fã. (Yohane 17:16) No hewɔ lɛ, ale emli bii lɛ jogbaŋŋ akɛ mɛi ni ‘baa amɛjeŋ jogbaŋŋ yɛ jeŋmajiaŋbii lɛ ateŋ.’ Amɛhaa amɛshihilɛ woɔ Nyɔŋmɔ hiɛ nyam. (1 Petro 2:12) Kɛfata he lɛ, he fɛɛ he ni amɛyɔɔ yɛ je lɛŋ lɛ, amɛfata “Nyɔŋmɔ hiɛkalɔ lɛ asafo lɛ, anɔkwale lɛ akulashiŋ kɛ enɔdaamɔ nɔ lɛ” he. (1 Timoteo 3:15) Akɛni amɛfiɔ anɔkwale lɛ sɛɛ hewɔ lɛ, amɛkpooɔ wɔŋjalɔi ajeŋ nilee ni Kristendom tsɔɔ lɛ, ni amɛdamɔɔ shi amɛhaa “wiemɔ lɛ mli fufɔ krɔŋŋ lɛ”—Nyɔŋmɔ Wiemɔ, ni ji Biblia lɛ. (1 Petro 2:2) Agbɛnɛ hu, amɛkɛ ekaa shiɛɔ Maŋtsɛyeli lɛ he sanekpakpa lɛ “[amɛ]tsɔɔ bɔɔ nii fɛɛ ni yɔɔ ŋwɛi shishi lɛ.” (Kolosebii 1:23) Ani abaanyɛ aje he ŋwane akɛ mɛi ni feɔ nɛkɛ maŋ nɛɛ ji “Nyɔŋmɔ Israel lɛ” mli shwɛɛnii ni yɔɔ, ni ji Kristofoi ni afɔ amɛ mu lɛ asafo lɛ? Dabi, anyɛŋ aje he ŋwane!—Galatabii 6:16.
Afɔ Jeŋmaŋ Lɛ
3. Tsɔɔmɔ bɔ ni fee ni abafɔ “jeŋmaŋ ni ja” nɛɛ.
3 Mɛɛ be afɔ “jeŋmaŋ ni ja” lɛ? Agba eshishijee afɔ shi yɛ Yesaia wolo lɛ mli. Wɔkaneɔ yɛ Yesaia 66:7, 8 lɛ akɛ: “Dani [lɛ Zion] eeekɔmɔ lɛ, efɔ momo; dani piŋmɔ lɛ aaata ehe lɛ, efɔ binuu momo. . . . Zion kɔmɔ pɛ, ni efɔ ebii lɛ.” Eji nɔ ko ni efɔɔɔ kaa kwraa, akɛ Zion, ni ji Nyɔŋmɔ ŋwɛi gbɛjianɔtoo lɛ baafɔ “binuu” dani ebɔi kɔɔmɔ. Yɛ 1914 mli lɛ, afɔ Mesia Maŋtsɛyeli lɛ yɛ ŋwɛi. (Kpojiemɔ 12:5) Yɛ no sɛɛ lɛ, jeŋmaji babaoo kɛ amɛhe wo klɛŋklɛŋ jeŋ ta lɛ mli, ni Kristofoi ni afɔ amɛ mu lɛ kɛ haomɔ kɛ yiwaa ni naa wa waa kpe. Yɛ naagbee lɛ, abafɔ mumɔŋ maŋ, ni ji “bi nuu” lɛ yɛ shikpɔŋ nɛɛ nɔ, yɛ afi 1919 mli. Nɛkɛ gbɛ nɔ tsɔ ni Zion ‘fɔ ebihii lɛ’—ni ji “jeŋmaŋ [hee] ni ja” lɛ mlibii ni afɔ amɛ mu lɛ, ni ato mɛnɛɛmɛi ahe gbɛjianɔ kɛha odaseyeli nitsumɔ ko ni mlilɛɛmɔ miiya nɔ daa nɛɛ.—Mateo 24:3, 7, 8, 14; 1 Petro 2:9.
4. Mɛni hewɔ ehe hiaa ni Nyɔŋmɔ jeŋmaŋ ni ja nɛɛ amia ehiɛ waa ni ehiɛ emuuyeli mli lɛ?
4 Kɛjɛ eshishijee mli tɔ̃ɔ lɛ, maŋ nɛɛ kɛ emuuyeli mli ni ehiɛ lɛ he kaai ni mli wa waa ekpe. Mɛni hewɔ? Beni afɔ ŋwɛi Maŋtsɛyeli lɛ, ashɛrɛ Satan kɛ edaimonioi lɛ kɛjɛ ŋwɛi ashwie shikpɔŋ nɛɛ nɔ. Kɛkɛ ni gbee wulu ko jaje akɛ: “Agbɛnɛ yiwalaheremɔ lɛ kɛ hewalɛ lɛ kɛ maŋtsɛyeli lɛ etsɔ wɔ-Nyɔŋmɔ lɛ nɔ, ni ekɛ hegbɛ lɛ eha e-Kristo (mɔ ni efɔ lɛ mu) lɛ, ejaakɛ ashɛ wɔnyɛmimɛi lɛ anaafolɔlɔ lɛ ni folɔɔ amɛnaa yɛ wɔ-Nyɔŋmɔ lɛ hiɛ nyɔɔŋ kɛ shwane lɛ afɔ̃! Ni amɛ lɛ, Toobi lɛ lá lɛ kɛ amɛ diɛŋtsɛ amɛdaseyeli wiemɔ lɛ amɛkɛye enɔ kunim, ni amɛdɔɔɔ amɛ diɛŋtsɛ amɛwala he kɛyashi gbele mli tete.” Satan kɛ mlifu kpele te shi ewo nɛkɛ tsakemɔ ni ba nɛɛ, “ni eyiŋ etee ni ekɛ yoo lɛ seshibii ni eshwɛ ni yeɔ Nyɔŋmɔ kitai lɛ anɔ ni amɛhiɛ Yesu Kristo odase lɛ ayawuu.” Beni amɛkɛ Satan tutuamɔi lɛ kpe lɛ, Kristofoi ni afɔ amɛ mu lɛ damɔ shi shiŋŋ. Kɛbashi ŋmɛnɛ, Nyɔŋmɔ jeŋmaŋ ni ja nɛɛ mli bii ni yɔɔ ekaa lɛ jieɔ hemɔkɛyeli kpo yɛ Yesu lá ni kpɔɔ mɔ lɛ mli, ni amɛyaa nɔ amɛhaa Yehowa naa hetoo ehaa ahorabɔlɔ kpele lɛ kɛtsɔɔ emuuyeli mli ni amɛhiɛɔ “kɛyashi gbele mli tete” lɛ nɔ.—Kpojiemɔ 12:1, 5, 9-12, 17; Abɛi 27:11.
5. Mɛɛ ŋmɛnɛŋmɛnɛ beaŋ Odasefoi lɛ asu fɛfɛo ko eye ebua amɛ ni amɛhiɛ emuuyeli mli?
5 Yɛ 1919 mli, beni Nyɔŋmɔ Maŋtsɛyeli lɛ ŋmɛnɛŋmɛnɛ beaŋ odaseyeli lɛ je shishi lɛ, no mli lɛ, Biblia Kaselɔi, taakɛ atsɛɔ Yehowa Odasefoi yɛ nakai beaŋ lɛ, ayi faaa kwraa, shi amɛhe wa yɛ hemɔkɛyeli mli. Amɛbatsɔmɔ shishitoo bii kɛha ‘maŋ ni wa, ni kɛ yiwalaheremɔ efee ehe gbogboi kɛ ehe ka-woo gbogboi.’ Amɛ hiɛnɔkamɔ yɛ “Nuntsɔ Yehowa [mɔ ni] ji naanɔ Tɛsaa” lɛ mli. (Yesaia 26:1, 3, 4) Taakɛ Mose ni hi shi yɛ blema lɛ fee lɛ, amɛjajeɔ akɛ: “Yehowa gbɛi atã mibatsĩ. Nyɛŋɔa anunyam nyɛhaa wɔ-Nyɔŋmɔ lɛ! Tɛsaa ji lɛ, ni enitsumɔi lɛ hi pɛ; ejaakɛ egbɛi fɛɛ jalɛ ni. Anɔkwa Mawu ji lɛ, nɔ sha bɛ lɛ; jalɔ ji lɛ, ni esa pɛ.”—5 Mose 32:3, 4.
6. Yehowa ejɔɔ ewebii yɛ naagbee gbii nɛɛ amli yɛ mɛɛ gbɛ nɔ?
6 Kɛjɛ nakai beaŋ kɛbaa nɛɛ, Nyɔŋmɔ Maŋtsɛyeli gbɛjianɔtoo lɛ naa agbói lɛ anaa etee nɔ egbele tɛtrɛɛ, ni kɛjɛ shishijee lɛ abua Kristofoi 144,000 ni afɔ amɛ mu lɛ ateŋ mɛi ni eshwɛ lɛ anaa, ni amrɔ nɛɛ asafo babaoo ni ji “tooi krokomɛi” lɛ hu miifata he yɛ Yehowa Maŋtsɛyeli yiŋtoi lɛ jajemɔ mli. (Yohane 10:16) Enɛ hewɔ lɛ, abaanyɛ akɛ miishɛɛ atswa adafi akɛ: “Oha jeŋmaŋ lɛ yi efa, Yehowa, oha jeŋmaŋ lɛ yi efa, ohiɛ eba nyam, ogbele shikpɔŋ lɛ husui lɛ fɛɛ mli.” (Yesaia 26:15) Kɛ wɔkwɛ je lɛŋ fɛɛ kɛkpe ŋmɛnɛ lɛ, wɔnaa bɔ ni nakai wiemɔi lɛ ji anɔkwale ha! Kɛtsɔ mumɔ krɔŋkrɔŋ lɛ hewalɛ nɔ lɛ, aye Kristo Maŋtsɛyeli ni baa lɛ he odase “kɛyashi shikpɔŋ lɛ naagbee hei lɛ.” (Bɔfoi lɛ Asaji 1:8) Abaanyɛ ana he ni nakai shweremɔ lɛ etee hiɛ kɛyashɛ kɛjɛ 1994 Yehowa Odasefoi Ajeŋ Fɛɛ Sɔɔmɔ Afi Akɔntaabuu ni jeɔ kpo yɛ baafai 12 kɛyashi 15 lɛ mli.
Shiɛlɔi Ayifalɛ Hee ni Fe Fɛɛ
7, 8. (a) Mɛɛ odaseyeli yɔɔ ni tsɔɔ akɛ Nyɔŋmɔ webii ‘eha amɛtaŋkpei lɛ ekɛlɛ’? (b) Kɛ okwɛ 1994 Sɔɔmɔ Afi Akɔntaabuu lɛ, mɛɛ hei nɛkɛ onaa akɛ ‘eelɛɛ ehusui lɛ amli’ bɔ ni sa kadimɔ waa?
7 Susumɔ akɔntaabuu nɛɛ mli otii lɛ ekomɛi ahe okwɛ. Maŋtsɛyeli shiɛlɔi ayifalɛ ni fe fɛɛ ni tsuɔ nii lɛ yashɛ 4,914,094! Kwɛ bɔ ni eyɔɔ miishɛɛ akɛ wɔmiina bɔ ni ayaa nɔ abuaa “asafo babaoo . . . ni jɛ jeŋmaŋ fɛɛ jeŋmaŋ kɛ akutsei kɛ maji kɛ majianɔ wiemɔi amli” lɛ anaa, ni “[amɛ]damɔ maŋtsɛsɛi lɛ hiɛ kɛ Toobi lɛ hiɛ, ni amɛwo atadei yɛji”! Hɛɛ, mɛnɛɛmɛi hu ema nɔ mi akɛ emuuyeli mlihiɛlɔi ji amɛ. “Amɛfɔ amɛtadei lɛ ahe, ni amɛha eyɛ futaa yɛ Toobi lɛ la lɛ mli,” ni akɛni amɛjieɔ hemɔkɛyeli kpo yɛ Yesu kpɔmɔ afɔleshaa lɛ mli hewɔ lɛ, abuɔ amɛ jalɔi.—Kpojiemɔ 7:9, 14.
8 Akɛ famɔ etee nɔ eha Yehowa gbɛjianɔtoo lɛ, titri lɛ kɛjɛ 1919 mli kɛbaa nɛɛ akɛ: “Ha ni obuu lɛ mli alɛɛ, ni akpã oshihilɛ he lɛ he mamai lɛ amli; kaalɛte he! Ha ni otaŋkpeei lɛ akɛlɛ, ni okala oshiŋmlitsei lɛ ni awa!” (Yesaia 54:2) Yɛ enɔheremɔ mli lɛ, shiɛmɔ nitsumɔ lɛ miiya nɔ waa ni enaa baaa shi, yɛ Yukon po ni ais yɔɔ jɛmɛ waa, ni ekɛ Alaska jeɔ husu lɛ, he ni gbɛgbalɔi ni nyɛɔ amɛdamɔɔ shihilɛi ni mli wa waa naa lɛ tsuɔ nii yɛ hei ni jɔɔ ŋanii kɛshɛɔ 50 loo 60 degrees yɛ zero Fahrenheit shishi, ní etsaa nɔ aahu otsii babaoo lɛ. Gbɔmɛi babaoo miike yuu kɛmiiba Yehowa jeŋmaŋ ni hiɛɔ emuuyeli mli lɛ mli yɛ nyɛsɛɛ afii fioo nɛɛ amli. Agbói lɛ anaa egbele tɛtrɛɛ koni nɛkɛ gbɔmɛi ni jɛ Asia shikpɔji ni fataaa Kristendom he, kɛ tsutsu Komunist nɔyeli hei, kɛ Afrika shikpɔji pii anɔ, kɛ hei ni Katolik jamɔ ehe shi waa yɛ, tamɔ Italy, Spain, Portugal, kɛ South America lɛ fɛɛ aba mli. Gbɔmɛi ni shihilɛi komɛi enyɛ amɛnɔ ni amɛshi amɛmaji amli kɛtee hei krokomɛi lɛ egbele shikpɔŋkuku hee naa. Akɛ nɔkwɛmɔ nɔ lɛ, yɛ England nɛkɛ lɛ, Odasefoi miitsu maŋsɛɛ wiemɔ kui sɔrɔtoi 13 ahiamɔ nii ahe nii.
“Nyɛfea Enɛ”
9. (a) Mɛni mɛi ayifalɛ ni ba 1994 Kaimɔ lɛ shishi lɛ tsɔɔ? (b) Mɛni ji maji ni na mɛi babaoo ni efɔɔɔ kaa yɛ Kaimɔ lɛ shishi lɛ ateŋ ekomɛi?
9 Afi akɔntaabuu lɛ mli oti kroko hu ni sa kadimɔ ji mɛi abɔ ni ba Kaimɔ lɛ shishi. Beni eshwɛ fioo ni ebaagbo lɛ, Yesu to egbele lɛ Kaimɔ shishi ni ekɛɛ esɛɛnyiɛlɔi lɛ akɛ: “Nyɛfea enɛ ni nyɛŋɔkai mi.” (1 Korintobii 11:24) Eyɛ miishɛɛ waa akɛ yɛ 1994 mli lɛ wɔna mɛi 12,288,917—ni fa fe shiɛlɔi ni yɔɔ ekaa lɛ toi enyɔ—babua amɛhe naa ní amɛkɛbo nakai famɔ lɛ toi, ákɛ mɛi ni ye nibii lɛ eko, aloo mɛi ni baye he odase. Yɛ shikpɔji komɛi anɔ lɛ, mɛi ni ba Kaimɔ lɛ ayi fa kwraa fe shiɛlɔi ni yɔɔ jɛmɛ lɛ toi abɔ. Shiɛlɔi 4,049 ni yɔɔ Estonia, Latvia, kɛ Lithuania lɛ na miishɛɛ waa akɛ amɛna mɛi 12,876 ba Kaimɔ lɛ shishi, ni enɛ fe shiɛlɔi ayifalɛ lɛ toi etɛ. Ni yɛ Benin lɛ, mɛi 16,786 ni ba Kaimɔ lɛ shishi lɛ miihe ashɛ shiɛlɔi abɔ ni yɔɔ jɛmɛ lɛ toi enumɔ. Asafo ko ni yɔɔ shiɛlɔi aaashɛ 45 lɛ ná mɛi 831!
10. (a) Mɛɛ nitsumɔ mɛi babaoo ni ba Kaimɔ lɛ shishi lɛ kɛfɔ̃ɔ wɔ nɔ? (b) Tsɔɔmɔ nɔ ni baanyɛ aba kɛji mɛi ni ba Kaimɔ lɛ shishi lɛ ateŋ mɔ ko na yelikɛbuamɔ babaoo kɛfata he.
10 Yehowa Odasefoi naa miishɛɛ waa akɛ mɛi ni yɔɔ wiemɔ lɛ he miishɛɛ lɛ ateŋ mɛi pii bafataa amɛhe yɛ nakai be ni tsɔɔ gbɛkpamɔ kpakpa lɛ mli. Amrɔ nɛɛ amɛmiisumɔ ni amɛye amɛbua nɛkɛ gbɔmɛi nɛɛ ni amɛya hiɛ babaoo yɛ anɔkwale lɛ he shishinumɔ kɛ suɔmɔ ni amɛyɔɔ lɛ mli. Ekolɛ mɛi komɛi baahere nɔ tamɔ Alla fee yɛ Russia lɛ. Alla kɛ nyɛmiyoo daa gbɛgbalɔ ko miikase nii, shi hiɛyaa fioo pɛ ba yɛ egbɛfaŋ, no hewɔ lɛ akɛ lɛ kpa nikasemɔ lɛ feemɔ. Shi kɛlɛ, Alla kpɛlɛ nine ni afɔ̃ lɛ kɛba Kaimɔ lɛ shishi lɛ nɔ. Nakai kpee ni he hiaa waa lɛ, na enɔ hewalɛ ni mli wa waa. Beni eku esɛɛ etee shia lɛ, eshɛrɛ amagai bibii ni eyɔɔ lɛ fɛɛ eshwie ni esɔle eha Yehowa kɛha yelikɛbuamɔ. Gbii enyɔ sɛɛ lɛ, nyɛmiyoo gbɛgbalɔ lɛ tee Alla ŋɔɔ ekoŋŋ akɛ eyaabi lɛ bɔ ni ena Kaimɔ lɛ he miishɛɛ eha. Enɛ tsa nɔ ni ebatsɔ sanegbaa ni wo yibii kpakpai. Esaa ekɛ Alla je enikasemɔ lɛ shishi ekoŋŋ. Etsɛɛɛ ni ekɛ ehe wo shiɛmɔ nitsumɔ lɛ mli. Niiashikpamɔ nɛɛ tsɔɔ sɛɛnamɔ ni yɔɔ saramɔ ni aaasara mɛi ni ba Kaimɔ lɛ shishi lɛ he. Ekolɛ mɛi pii baahere nɔ tamɔ bɔ ni Alla fee lɛ.
“Wɔkakwa Wɔhe Naabuamɔ”
11-13. (a) Mɛni hu fata jeŋmaŋ ni ja lɛ anɔkwa jeŋba lɛ he? (b) Mɛni hewɔ ehe hiaa ni anɔkwa Kristofoi aya kpeei lɛ?
11 Kaimɔ lɛ ji kpee ni he hiaa fe fɛɛ yɛ Yehowa Odasefoi akalanda lɛ nɔ, shi eka shi faŋŋ hu akɛ jeee no pɛ ji kpee ni he hiaa kɛha amɛ. Daa otsi lɛ, Yehowa Odasefoi buaa amɛhe naa, yɛ bɔfo Paulo wiemɔi nɛɛ toiboo mli, akɛ: “Nyɛhaa wɔyɔseyɔsea wɔhe, koni wɔhiɛ adɔ suɔmɔ kɛ nitsumɔi kpakpai ahe, ni wɔkakwa wɔhe naabuamɔ, taakɛ bɔ ni mɛi komɛi fɔɔ feemɔ lɛ, shi moŋ wɔwowoo wɔhe ŋaa, ni titri lɛ akɛni nyɛnaa akɛ gbi lɛ miibɛŋkɛ nɛɛ.” (Hebribii 10:24, 25) Amɛkɛ amɛhe ebabɔ Yehowa jeŋmaŋ ni ja ni atsɔɔ enɔkwa jeŋba lɛ nɔ ayooɔ lɛ lɛ he. Nɔ ni fata anɔkwa jeŋba nɛɛ he ji anɔkwayeli ni akɛaaya kpeei daa.
12 Anaa odaseyeli ni tsɔɔ faŋŋ akɛ anu enɛ shishi jogbaŋŋ yɛ Philippines, he ni kɛ aja mli lɛ, mɛi ni baa kpeei daa Hɔgbaa yɛ maŋ lɛŋ he fɛɛ he lɛ feɔ shiɛlɔi ayifalɛ ni yɔɔ jɛmɛ lɛ oha mlijaa 125 lɛ. Odasefoi akuu ko kɛ mɛi ni yɔɔ wiemɔ lɛ he miishɛɛ yɛ Argentina lɛ hu enu shishi jogbaŋŋ nakai nɔŋŋ. He ni amɛyɔɔ lɛ kɛ Maŋtsɛyeli Asa lɛ nɔ jekɛmɔ aaashɛ kilomitai 20. Shi kɛlɛ, kpokpaa nɔkwɛlɔ lɛ bɔ amaniɛ akɛ kɛ jeee hela hewɔ lɛ, amɛteŋ mɔ kome folo po efooo kpeei amli. Amɛtaraa okpɔŋɔ kɛ shwiili loo okpɔŋɔ diɛŋtsɛ nɔ ŋmɛlɛtswai ejwɛ kɛfaa gbɛ nɛɛ, ni kɛ eshɛ fɛ̃i be lɛ, amɛnyiɛɔ duŋ lɛ mli nakai nɔŋŋ kɛkuɔ amɛsɛɛ kɛyaa shia.
13 Beni nibii agbɛjianɔtoo nɛɛ naagbee lɛ bɛŋkɛɔ lɛ, belɛ shihilɛ lɛ miiya nɔ eewa, naagbai lɛ miifa babaoo, ni enɛ miiha kpeei ni aaaya daa lɛ miitsɔ kaa ni mli wa waa. Shi kɛ wɔyaje shihilɛi ni tamɔ nɛkɛ shishi lɛ, mumɔŋ niyenii kɛ naanyobɔɔ kpakpa ni abaanyɛ ana yɛ kpeei ni tamɔ nɛkɛ pɛ shishi lɛ he bahiaa wɔ waa fe bei fɛɛ ni eho.
“Kã He”
14. Mɛni hewɔ Yehowa Odasefoi yɔɔ hehiamɔ henumɔ yɛ amɛsɔɔmɔ lɛ he lɛ, ni mɛɛ nibii ni ejɛ mli eba yeɔ enɛ he odase?
14 Nyɛsɛɛ afi lɛ, Katolik Sɔlemɔ ni yɔɔ Italy lɛ wie Yehowa Odasefoi anitsumɔ lɛ he akɛ “shiɛmɔ ni akɛtsakeɔ mɔ hemɔkɛyeli, ni hiŋmɛigbelemɔ bɛ mli.” Shi, yɛ anɔkwale mli lɛ, nɔ ko kwraa bɛ ni tsɔɔ hiŋmɛigbelemɔ ni bɛ, yɛ nɔ ni Odasefoi tsuɔ lɛ he. Shi moŋ, amɛ sɔɔmɔ nitsumɔ lɛ ji suɔmɔ ni mli kwɔ ni amɛyɔɔ kɛha amɛnanemɛi lɛ kpojiemɔ. Eji toiboo ni amɛfeɔ amɛhaa Paulo wiemɔi nɛɛ hu he odaseyeli, akɛ: “Shiɛmɔ wiemɔ lɛ, kã he, deka yɛ jio, deka bɛ jio.” (2 Timoteo 4:2) Hehiamɔ henumɔ tsirɛɔ Yehowa Odasefoi ni amɛnaa ekaa yɛ amɛsɔɔmɔ nitsumɔ lɛ mli, taakɛ anaa yɛ ŋmɛlɛtswai 1,096,065,354 ni amɛkɛtsu nii yɛ 1994 mli, ni amɛkɛshiɛ amɛtsɔɔ amɛkutsoŋbii, ni amɛtee sɛɛsaramɔi, ni amɛkɛfee Biblia mli nikasemɔi ni naa shɛɔ 4,701,357 hu lɛ. Mɛi pii nyɛ amɛkɛ amɛhe wo gbɛgbalɔi asɔɔmɔ lɛ mli, ni tsɔɔ akɛ gbɛgbamɔ mumɔ lɛ hiɛ kã ni eeya hiɛ waa. Gbɛgbalɔi 636,202 ni anaa yɛ je lɛŋ fɛɛ kɛ aja mli lɛ yeɔ enɛ he odase.
15, 16. (a) Gbekɛbii kɛ onukpai fɛɛ ejie gbɛgbamɔ mumɔ kpo yɛ mɛɛ gbɛ nɔ? (b) Kɛ wɔkwɛ maji komekomei lɛ yɛ 1994 Sɔɔmɔ Afi Akɔntaabuu lɛ mli lɛ, nɛgbɛ nɛkɛ onaa gbɛgbalɔi ayifalɛ babaoo ni sa kadimɔ waa yɛ?
15 Obalahii kɛ obalayei babaoo fata nakai gbɛgbalɔi lɛ he. Amrɔ nɛɛ mɛi ni yɔɔ United States lɛ ateŋ mɛi komɛi miisɔmɔ akɛ daa gbɛgbalɔi yɛ be mli ni amɛyaa nɔtsamɔ skul lɛ, ni amɛklasbii lɛ ji amɛ shikpɔŋkuku titri ni amɛtsuɔ nii yɛ mli. Nɛkɛ obalahii kɛ obalayei bibii nɛɛ ena akɛ gbɛgbamɔ ji gbɛ ni hi fe fɛɛ ni amɛaatsɔ nɔ amɛbu amɛhe kɛjɛ tsofai fɔji kɛ nitsumɔ, jeŋba shara, kɛ yiwalɛ nifeemɔi ni egbɛ eshwa skul sɔrɔtoi pii amli yɛ nakai shikpɔŋ lɛ nɔ lɛ ahe. Obalahii kɛ obalayei krokomɛi babaoo kɛ gbɛgbamɔ efee oti ni ma amɛhiɛ kɛ amɛgbe skul naa. Irina, ni jɛ Ukraine lɛ kɛ ehe wo gbɛgbalɔi awalɔi asɔɔmɔ mli aahu beni eyaa nɔtsamɔ skul lɛ, ni ekɛsaa ehe kɛha gbɛgbamɔ sɔɔmɔ lɛ kɛji egbe eskul lɛ naa. Beni egbe skul naa lɛ, eweku lɛ ha lɛ hegbɛ akɛ amɛbaaye amɛbua lɛ yɛ heloonaa hiamɔ nii agbɛfaŋ bɔni afee ni enyɛ edamɔ amɛnajiaŋ yɛ daa gbɛgbamɔ nitsumɔ lɛ mli. Shihilɛ lɛ bɛ mlɛo yɛ shika gbɛfaŋ, yɛ Ukraine. Shi Irina kɛɔ akɛ: “Mile akɛ miitsu nitsumɔ ko ni haa mɔ wala, jeee kɛha mi diɛŋtsɛ kɛkɛ, shi moŋ kɛha mɛi ni mishiɛɔ mitsɔɔ amɛ lɛ hu.” Eji miishɛɛ sane diɛŋtsɛ akɛ wɔnaa obalahii kɛ obalayei bibii pii ŋmɛnɛ ni susuɔ nii ahe tamɔ Irina. Mɛɛ shihilɛ kpakpa yɔɔ kɛha amɛ, fe akɛ ‘amɛaakai amɛ Bɔlɔ Kpeteŋkpele lɛ yɛ amɛbalahiiaŋ kɛ amɛbalayeiaŋ gbii lɛ amli’?—Jajelɔ 12:1.
16 Gbɛgbalɔi lɛ ateŋ mɛi babaoo edara yɛ afii amli. Amɛteŋ mɔ kome bɔ amaniɛ akɛ beni awuɔ jeŋ ta ni ji enyɔ lɛ, agbe etsɛ kɛ enyɛminuu beni amɛwuɔ ta lɛ eko lɛ, ni atswa enyɛ kɛ enyɛmiyoo hu tu yɛ maŋ lɛ shihilɛ hei fɔji lɛ eko mli. Sɛɛ mli lɛ, ebinuu hu bagbo. Amrɔ nɛɛ eda yɛ afii amli ni egbɔmɔtsoŋ kɛ ejwɛŋmɔŋ hewalɛ naa eba shi, ni ebɛ gbɔmɔtsoŋ hewalɛ tsɔ moŋ, shi Yehowa eha lɛ weku ni da kwraa fe nɔ ni elaaje lɛ, yɛ Kristofoi asafo lɛ mli. Ni enaa miishɛɛ akɛ enyɛɔ eyeɔ ebuaa mɛi krokomɛi akɛ daa gbɛgbalɔ.
17, 18. Mɛɛ gbɛ nɔ wɔteŋ mɔ fɛɛ mɔ baatsɔ ajie gbɛgbamɔ mumɔ kpo, kɛ wɔji gbɛgbalɔi aloo wɔjeee?
17 Shi kɛlɛ, jeee mɔ fɛɛ mɔ baanyɛ afee gbɛgbalɔ. Yehowa naa he miishɛɛ akɛ eeekpɛlɛ wɔ mlijaa nyɔŋma, ni ji nɔ ni hi fe fɛɛ ni wɔɔnyɛ wɔha lɛ fɛɛ nɔ, ni nɔ fɛɛ nɔ ni eeeji yɛ wɔ gbɛfaŋ akɛ aŋkroaŋkroi lɛ kɔɔɔ he eko. (Maleaki 3:10) Lɛlɛŋ, wɔ fɛɛ wɔbaanyɛ wɔna nɛkɛ gbɛgbalɔi ni yɔɔ ekaa nɛɛ amumɔ lɛ eko ni wɔfee nɔ fɛɛ nɔ ni wɔshihilɛ baaŋmɛ wɔ gbɛ ni wɔfee, ni wɔkɛlɛɛ sanekpakpa lɛ shiɛmɔ lɛ mli kɛya hiɛ.
18 Akɛ nɔkwɛmɔ nɔ lɛ, yɛ Australia nɛkɛ lɛ, ahala April 16 akɛ gbi krɛdɛɛ ko kɛha gbɛjegbɛ nɔ odaseyeli. Shiɛlɔi kɛ gbɛgbalɔi fɛɛ kɛ amɛhe wo mli jogbaŋŋ, taakɛ ejeɔ kpo faŋŋ yɛ shiɛlɔi ayifalɛ hee ni fe fɛɛ ni ji 58,780 ni ana yɛ nakai nyɔŋ lɛ nɔ lɛ mli lɛ. Agbɛnɛ hu, woji tɛtrɛbii ni akɛha lɛ fa fe nɔ ni akɛha yɛ nakai nyɔŋ lɛ nɔŋŋ nɔ nyɛsɛɛ afi lɛ kɛ 90,000 sɔŋŋ. Nɛkɛ gbi krɛdɛɛ nɛɛ nɔ lɛ, nyɛmiyoo ko ha nuu ko woji tɛtrɛbii lɛ eko, ni beni eŋmaa nuu lɛ gbɛi kɛ edrɛs koni enyɛ eyasara lɛ ekoŋŋ yɛ miishɛɛ ni eyɔɔ lɛ hewɔ lɛ, ena akɛ ewekunyo ji nuu nɛɛ! Amɛna amɛle akɛ yei enyɔ, mɔ kɛ enyɛmi bii ji amɛ, ni afii 30 sɔŋŋ eho ni amɛkɛ amɛhe ekpeko. Eka shi faŋŋ akɛ nɛkɛ sɛɛsaramɔi nɛɛ baafee nɔ ni yɔɔ miishɛɛ waa diɛŋtsɛ!
Hiɛmɔ Emuuyeli Mli Kɛyashi Naagbee
19. Mɛni hewɔ ehe hiaa waa ni Yehowa jeŋmaŋ ni ja lɛ ahiɛ emuuyeli mli aahu kɛyashi naagbee tɔ̃ɔ lɛ?
19 Ehe miihia ni mɛi fɛɛ ni yɔɔ Nyɔŋmɔ jeŋmaŋ ni ja lɛ mli lɛ aya nɔ ahiɛ emuuyeli mli beni Satan je lɛ boteɔ enaagbee mli kwraa lɛ. Etsɛŋ ni Yehowa maŋ krɔŋkrɔŋ lɛ baanu tsɛmɔ nɛɛ akɛ: “Yaa, mimaŋ, ni oyabote opia lɛ mli, ni oŋa oshinaa lɛ owo oyi; teemɔ ohe hiŋmɛitswaaoo ko kɛyashi beyinɔ ni mlifu lɛ aaaho!” Bɔ fɛɛ bɔ ni fee lɛ, nɛkɛ jeŋ ni eye la yi sɔ̃ nɛɛ kɛ ŋwɛi kojomɔ baakpe. “Shi naa, Yehowa miije kpo kɛmiijɛ ehilɛ he lɛ ni eyawo shikpɔŋ lɛ nɔ bii anyɔmɔ yɛ amɛ nishaianii lɛ ahewɔ; ni shikpɔŋ lɛ aaajie elá lɛ kpo ni ehaŋ mɛi ni agbe yɛ enɔ lɛ anɔ dɔŋŋ.” (Yesaia 26:20, 21) Eba akɛ wɔteŋ mɔ fɛɛ mɔ baadamɔ shi shiŋŋ akɛ Kristofonyo emuuyeli mlihiɛlɔ ni kɛ Yehowa jeŋmaŋ ni ja lɛ bɔɔ. Ni no lɛ, wɔmli aaafili wɔ akɛ wɔɔna naanɔ wala yɛ Kristo Maŋtsɛyeli lɛ shishi yɛ shikpɔŋ nɛɛ nɔ loo ŋwɛi.
Ani Okaiɔ?
◻ Mɛɛ be afɔ “jeŋmaŋ ni ja” lɛ?
◻ Mɛni hewɔ tsuishiŋmɛɛ he hiaa Nyɔŋmɔ webii yɛ naagbee gbii nɛɛ amli lɛ?
◻ Shiɛlɔi ayifalɛ kɛ ŋmɛlɛtswai babaoo ni amɛkɛtsu nii yɛ sɔɔmɔ nitsumɔ lɛ mli, ni anaa yɛ 1994 Sɔɔmɔ Afi Akɔntaabuu lɛ mli lɛ tsɔɔ mɛni?
◻ Mɛni hewɔ kpeei ni wɔɔya lɛ he hiaa waa beni je nɛɛ bɛŋkɛɔ enaagbee kwraa lɛ?
◻ Mɛni hewɔ esa akɛ mɛi fɛɛ ni kɛ amɛhe bɔɔ Nyɔŋmɔ jeŋmaŋ ni ja lɛ he lɛ ahiɛ emuuyeli mli lɛ?
[Akrabatsa ni yɔɔ baafa 12-15]
1994 SERVICE YEAR REPORT OF JEHOVAH’S WITNESSES WORLDWIDE
(Kwɛmɔ “bound volume”)
[Mfoniri ni yɔɔ baafa 18]
Emuuyeli mlihiɛlɔi ni yɔɔ Yehowa jeŋmaŋ ni ja lɛ mli lɛ baana naanɔ wala yɛ emuuyeli mli