Yitso Nyɔŋmai Enyɔ Kɛ Ekome

Yehowa Ewó Enine Nɔ

Yesaia 25:1–27:13

 1. Mɛni hewɔ Yesaia yɔɔ hiɛsɔɔ kɛha Yehowa lɛ?

YESAIA yɛ suɔmɔ ní mli wa kɛha Yehowa ni enáa eyijiemɔ he miishɛɛ. Ekɛ miishɛɛ kɛɛ: “Yehowa, mi-Nyɔŋmɔ jio. Miikafoo, miijie ogbɛi lɛ yi.” Mɛni ye bua gbalɔ lɛ ni ená hiɛsɔɔ kpele ní tamɔ nɛkɛ kɛha e-Bɔlɔ lɛ? Oti titri kome ji Yehowa kɛ enifeemɔi ahe nilee ní eyɔɔ lɛ. Yesaia wiemɔi ní nyiɛ sɛɛ lɛ jieɔ nɛkɛ nilee nɛɛ kpo: “Ejaakɛ otsu naakpɛɛ nii. Oyiŋtoo ni jɛ blema beebe lɛ ema shi shiŋŋ, ni anɔkwale ni.” (Yesaia 25:1) Taakɛ Yoshua ní tsɔ ehiɛ lɛ ji lɛ, Yesaia le akɛ Yehowa yeɔ anɔkwa ni anyɛɔ akɛ he fɔ̃ɔ enɔ, ni ákɛ ‘eyiŋtoi’—ni ji nibii ni etoɔ eyiŋ yɛ he lɛ—fɛɛ baa mli anɔkwale.—Yoshua 23:14.

 2. Mɛɛ Yehowa yiŋtoo Yesaia jaje etsɔɔ agbɛnɛ, ni mɛni ji oti ni yɔɔ nɛkɛ yiŋtoo nɛɛ sɛɛ?

² Nɔ ni fata Yehowa yiŋtoi lɛ ahe ji kojomɔ saji ní ejaje eshi Israel henyɛlɔi lɛ. Agbɛnɛ Yesaia jaje enɛɛmɛi ateŋ ekome ni ekɛɛ: “Oha maŋ lɛ efee koikoi, maŋ ní atswa gbogbo awo he lɛ etsɔ amaŋfɔ, maŋsɛɛ bii amɔɔ lɛ jeee maŋ dɔŋŋ, ni amaŋ dɔŋŋ gbi ko gbi ko.” (Yesaia 25:2) Mɛni ji nɛkɛ maŋ ní atsĩii tã nɛɛ? Ekolɛ Yesaia miiwie Ar ní yɔɔ Moab lɛ he—Moab ji jeŋmaŋ ní enyɛ̃ Nyɔŋmɔ webii aahu kɛjɛ jeeŋmɔ beebe lɛ.a Aloo ekolɛ eewie maŋtiase kroko ní he wa fe nakai—ni ji Babilon he.—Yesaia 15:1; Zefania 2:8, 9.

 3. Yehowa henyɛlɔi lɛ woɔ ehiɛ nyam yɛ mɛɛ gbɛ nɔ?

³ Kɛ́ Yehowa yiŋ ní eto yɛ ehenyɛlɔi lɛ amaŋtiase ní he wa lɛ he lɛ ba mli anɔkwale lɛ, te amɛaafee amɛnii amɛha tɛŋŋ? “Maŋ ko ni he wa aaawo ohiɛ nyam, jeŋmaji yiwalɔi lɛ amaŋ lɛ aaasheo gbeyei.” (Yesaia 25:3) Shishinumɔ yɛ mli akɛ Nyɔŋmɔ ofe lɛ henyɛlɔi lɛ baashe lɛ gbeyei. Shi kɛlɛ, mɛɛ gbɛ nɔ amɛaawo ehiɛ nyam yɛ? Ani amɛbaashi amɛ apasa nyɔŋmɔi lɛ ní amɛkpɛlɛ jamɔ krɔŋŋ nɔ? Amɛfeŋ nakai kɔkɔɔkɔ! Shi moŋ, taakɛ Farao kɛ Nebukadnezar fee lɛ, amɛbaawo Yehowa hiɛ nyam yɛ be mli ni anyɛɔ amɛnɔ ní amɛkpɛlɛɔ nɔ akɛ enɔ kwɔ kwraa fe amɛ lɛ.—2 Mose 10:16, 17; 12:30-33; Daniel 4:37.

 4. Mɛɛ “jeŋmaji yiwalɔi lɛ amaŋ” ko yɔɔ ŋmɛnɛ, ni lɛ hu po ebaawo Yehowa hiɛ nyam yɛ mɛɛ gbɛ nɔ?

⁴ Ŋmɛnɛ, “jeŋmaji yiwalɔi lɛ amaŋ lɛ” ji “maŋ kpeteŋkpele ni yeɔ shikpɔŋ lɛ nɔ maŋtsɛmɛi lɛ anɔ,” ni ji “Babilon kpeteŋkpele lɛ,” jeŋ apasa jamɔ maŋtsɛyeli lɛ. (Kpojiemɔ 17:5, 18) Nɛkɛ maŋtsɛyeli nɛɛ fã titri ji Kristendom. Mɛɛ gbɛ nɔ Kristendom jamɔ mli hiɛnyiɛlɔi lɛ woɔ Yehowa hiɛ nyam yɛ? Kɛtsɔ dɔlɛ ní amɛkɛkpɛlɛɔ naakpɛɛ nibii ní etsu yɛ e-Dasefoi lɛ agbɛfaŋ lɛ nɔ lɛ nɔ. Titri lɛ, yɛ afi 1919 beni Yehowa ha etsuji lɛ bɔi nitsumɔ ekoŋŋ kɛ ekãa beni ejie amɛ kɛjɛ Babilon Kpeteŋkpele lɛ mumɔŋ nomŋɔɔ mli lɛ, nɛkɛ hiɛnyiɛlɔi nɛɛ “she gbeyei, ni amɛŋɔ anunyam amɛha ŋwɛi Nyɔŋmɔ lɛ.”—Kpojiemɔ 11:13.b

 5. Yehowa buɔ mɛi ni yɔɔ hekɛnɔfɔɔ kwraa yɛ emli lɛ ahe yɛ mɛɛ gbɛ nɔ?

⁵ Eyɛ mli akɛ Yehowa henyɛlɔi lɛ naa lɛ akɛ ehe yɛ gbeyei moŋ, shi eji abobaahe kɛha heshibalɔi kɛ mɛi ní he jɔ ní sumɔɔ ní amɛjá lɛ lɛ. Ekolɛ jamɔ kɛ maŋkwramɔŋ yiwalɔi lɛ baabɔ mɔdɛŋ fɛɛ ní amɛaanyɛ ní amɛfite anɔkwa jalɔi ahemɔkɛyeli, shi amɛyeee omanye ejaakɛ mɛnɛɛmɛi yɛ hekɛnɔfɔɔ kwraa yɛ Yehowa mli. Yɛ naagbee lɛ, ehaa mɛi ní teɔ shi woɔ lɛ lɛ feɔ dioo yɛ gbɛ ní waaa nɔ, ni efeɔ nakai tamɔ nɔ ni ekɛ atatu miitsĩ shia ŋã nɔ hulu ní tsoɔ waa lɛ naa, loo ekɛ gbogbo miitsĩ nugbɔnɛmɔ ní yiɔ lɛ naa.—Kanemɔ Yesaia 25:4, 5.

‘Okpɔlɔ ní Aŋmɛ Aha Majimaji Fɛɛ’

6, 7. (a) Mɛɛ okpɔlɔ nɛkɛ Yehowa ŋmɛ, ni namɛi eŋmɛ eha? (b) Mɛni okpɔlɔŋmɛɛ ní Yesaia gba efɔ̃ shi lɛ feɔ he mfoniri?

⁶ Taakɛ tsɛ ní yɔɔ suɔmɔ ji lɛ, jeee akɛ Yehowa buɔ ebii ahe kɛkɛ, shi moŋ elɛɔ amɛ hu, titri lɛ yɛ mumɔŋ. Beni eha ewebii lɛ ye amɛhe yɛ afi 1919 sɛɛ lɛ, eŋmɛ amɛ kunimyeli okpɔlɔ, ni ji mumɔŋ niyenii babaoo diɛŋtsɛ kɛha amɛ: “Yehowa Zebaot aaaŋmɛ okpɔlɔ yɛ gɔŋ nɛɛ nɔ aha majimaji fɛɛ: fɔ nii kɛ wein kpakpa, fɔ nii kɛ wuiaŋ fɔ, wein kpakpa ní atsere nɔ.”—Yesaia 25:6.

⁷ Aŋmɛ okpɔlɔ lɛ yɛ Yehowa “gɔŋ” lɛ nɔ. Mɛni ji nɛkɛ gɔŋ nɛɛ? No ji “Yehowa we lɛ gɔŋ lɛ” ní jeŋmaji fɛɛ kéɔ yuu kɛbaa nɔ yɛ “naagbee gbii lɛ amli lɛ.” No ji Yehowa ‘gɔŋ krɔŋkrɔŋ lɛ,’ he ni ejálɔi anɔkwafoi lɛ efeee efɔŋ ko ní amɛfiteee nii hu yɛ lɛ. (Yesaia 2:2; 11:9) Yehowa ŋmɛɔ ekpɔlɔ ní niyenii babaoo yɔɔ nɔ nɛɛ kɛhaa emɛi anɔkwafoi lɛ yɛ nɛkɛ jamɔhe ní awó nɔ nɛɛ. Ni mumɔŋ nibii kpakpai ní akɛhaa babaoo amrɔ nɛɛ feɔ heloonaa nibii kpakpai ni akɛbaaha beni Nyɔŋmɔ Maŋtsɛyeli lɛ batsɔɔ adesai anɔyeli koome pɛ ní yɔɔ lɛ he mfoniri. Nakai beaŋ lɛ, hɔmɔ ehiŋ shi dɔŋŋ. “Shikpɔŋ lɛ nɔ aaaba abele babaoo kɛyashwie gɔji lɛ ayiteaŋ.”—Lala 72:8, 16.

8, 9. (a) Mɛɛ adesai ahenyɛlɔi kpelei enyɔ komɛi abaajie amɛ lɛ? Tsɔɔmɔ mli. (b) Mɛni Nyɔŋmɔ baafee ní ekɛjie emaŋ lɛ hiɛgbele lɛ?

⁸ Mɛi ni yeɔ mumɔŋ okpɔlɔŋmɛɛ ní ajɛ ŋwɛi akɛha lɛ nɔ niyenii lɛ bianɛ lɛ yɛ gbɛkpamɔi ní yɔɔ nyam. Bó Yesaia wiemɔi ní nyiɛ sɛɛ lɛ atoi. Beni ekɛ esha kɛ gbele toɔ “muhɔɔ ní alɛɛ mli” loo “hiɛhàa nɔ̃” he lɛ, ekɛɛ: “ [Yehowa aaajie] hiɛhàa nɔ̃ ní aŋɔhà majimaji fɛɛ hiɛ lɛ, kɛ muhɔɔ ní alɛɛ mli ahà jeŋmaji fɛɛ nɔ lɛ yɛ nɛkɛ gɔŋ nɛɛ nɔ. Eeemi gbele kɛaatee naanɔ; ni Nuntsɔ Yehowa aaatsumɔ hiɛaŋ fɛɛ yaafonui.”—Yesaia 25:7, 8a.

⁹ Hɛɛ, esha kɛ gbele ehiŋ shi dɔŋŋ! (Kpojiemɔ 21:3, 4) Kɛfata he lɛ, abaajie amale kɛ heguɔgbee ní Yehowa tsuji eŋmɛ amɛtsui shi yɛ mli aahu afii akpei abɔ lɛ hu kɛya kwraa. “Eeejie emaŋ lɛ hiɛgbele lɛ yɛ shikpɔŋ muu lɛ fɛɛ nɔ; ejaakɛ Yehowa ekɛɛ.” (Yesaia 25:8b) Mɛɛ gbɛ nɔ enɛ baatsɔ aba mli? Yehowa baajie nakai heguɔgbee lɛ jɛɛhe, ni ji Satan kɛ eseshi lɛ kɛjɛ jɛmɛ kwraa. (Kpojiemɔ 20:1-3) Ebɛ naakpɛɛ mɔ akɛ enɛ baatsirɛ Nyɔŋmɔ webii ni amɛaajaje akɛ: “Naa, wɔ-Nyɔŋmɔ lɛ ní wɔhiɛ kã enɔ, akɛ eeehere wɔyiwala lɛ nɛ! Mɔnɛ ji Yehowa ní wɔhiɛ kã enɔ lɛ̃! Nyɛhaa wɔnyaa ní wɔmli afilia wɔ yɛ eyiwalaheremɔ lɛ hewɔ!”—Yesaia 25:9.

Aba Henɔwolɔi lɛ Ashi

10, 11. Mɛɛ yiwaa shihilɛ Yehowa eto akɛ ebaaba Moab nɔ?

¹⁰ Yehowa hereɔ ewebii ní jieɔ heshibaa kpo lɛ ayiwala. Shi kɛlɛ, Moab ní bɛŋkɛ Israel lɛ wóɔ ehe nɔ, ni Yehowa miihi henɔwomɔ kwraa. (Abɛi 16:18) No hewɔ lɛ, akadi Moab akɛ abaaba lɛ shi. “Yehowa kɛ enine aaaŋmɛ nɛkɛ gɔŋ nɛɛ nɔ, ni aaanaanaa Moab nɔ yɛ he ni eyɔɔ lɛ, tamɔ anaa jwɛi nɔ yɛ tumu nɔ nu mli lɛ. Ni eeekpã eniji amli yɛ amɛteŋ, tamɔ serelɔ kpãa eniji amli ní ekɛsereɔ lɛ; ni eeeha ehewoo lɛ kɛ eninenaa ŋaa lɛ aba shi; ni ogbogboi ní wa ní amɛkwɔlɔ lɛ, eeekumɔ ni eeeha aba shi, ní ekɛ shikpɔŋ sũ aye egbɔ.”—Yesaia 25:10-12.

¹¹ Yehowa kɛ enine “aaaŋmɛ” Moab gɔŋ lɛ nɔ. Mɛni baajɛ mli aba? Ebaakpã enine mli yɛ Moab nɔ ni ebaanaanaa enɔ tamɔ “tumu nɔ.” Yɛ Yesaia beaŋ lɛ, anaanaa jwɛi nɔ ni etsɔɔ tumu ni akɛdũɔ nii ni ehaa dumɔnii lɛ baa jogbaŋŋ; no hewɔ lɛ Yesaia miigba Moab hiɛshishwiemɔ eefɔ̃ shi, yɛ egbogboi ní nɔ kwɔlɔ ní tamɔ nɔ ni yɔɔ shweshweeshwe lɛ fɛɛ sɛɛ.

12. Mɛni hewɔ akadi Moab pɛ kɛha Yehowa kojomɔ saji ní abaajaje lɛ?

¹² Mɛni hewɔ Yehowa kadi Moab pɛ kɛha eyiŋtoo ni mli wa waa nɛɛ? Lot, ni ji Abraham wɔfaase kɛ Yehowa jálɔ lɛ, seshibii ji Moab bii lɛ. Enɛ hewɔ lɛ, jeee Nyɔŋmɔ maŋ ní ekɛ amɛ efee kpaŋmɔ lɛ kuuŋbii kɛkɛ ji amɛ, shi moŋ amɛji amɛwekumɛi hu. Yɛ enɛ fɛɛ sɛɛ lɛ, amɛjáa apasa nyɔŋmɔi ni amɛjieɔ nyɛ̃ɛ ní mli wa waa kpo amɛtsɔɔ Israel. Nɔ ni ato ní baaba amɛnɔ lɛ sa amɛ. Yɛ enɛ mli lɛ, Moab tamɔ Yehowa tsuji ahenyɛlɔi ní yɔɔ ŋmɛnɛ lɛ pɛpɛɛpɛ. Etamɔ Kristendom titri, ní kɛɔ akɛ enifeemɔi nyiɛɔ klɛŋklɛŋ afii oha lɛ mli Kristofoi asafo lɛ nifeemɔi asɛɛ, shi kɛlɛ, taakɛ wɔna kɛtsɔ hiɛ momo lɛ, eji Babilon Kpeteŋkpele lɛ fã titri lɛ pɛpɛɛpɛ lɛ.

Yiwalaheremɔ Lala

13, 14. Mɛɛ “maŋ ní wa” Nyɔŋmɔ webii yɔɔ ŋmɛnɛ, ni namɛi aŋmɛɔ amɛ gbɛ ní amɛbote mli?

¹³ Shi Nyɔŋmɔ webii hu? Akɛni amɛmli filiɔ amɛ akɛ amɛyɛ Yehowa hiɛ duromɔ kɛ ehebuu hewɔ lɛ, amɛwóɔ amɛgbeei anɔ ni amɛláa. “Nakai gbi lɛ nɔ lɛ aaalá lala nɛɛ yɛ Yuda shikpɔŋ lɛ nɔ akɛ: Wɔyɛ maŋ ní wa; ekɛ yiwalaheremɔ efee ehe gbogboi kɛ ehe káwoo gbogboi. Nyɛgbelea agbói lɛ, koni jeŋmaŋ ní ja ní yeɔ anɔkwa lɛ abote mli!” (Yesaia 26:1, 2) Eyɛ mli akɛ ŋwanejee ko bɛ he akɛ wiemɔi nɛɛ ná amɛmlibaa yɛ blema beaŋ moŋ, shi amɛyɛ mlibaa ní yɔɔ faŋŋ ŋmɛnɛ hu. Ájɔɔ Yehowa “jeŋmaŋ ní ja,” ni ji mumɔŋ Israel kɛ gbɛjianɔtoo ko ní tamɔ maŋtiase ni he wa. Mɛɛ nɔdaamɔ nɔ kɛha mlifilimɔ, kɛha lala po nɛ!

¹⁴ Mɛɛ gbɔmɛi nɛkɛ baa “maŋ” nɛɛ mli? Lala lɛ haa hetoo, akɛ: “Jwɛŋmɔ ní ma shi shiŋŋ lɛ, [Nyɔŋmɔ] oooha ená hejɔlɛ, hejɔlɛ; ejaakɛ onɔ eŋɔɔ ehiɛ efɔ̃ɔ. Nyɛŋɔa nyɛhiɛ nyɛfɔ̃a Yehowa nɔ daa; ejaakɛ Nuntsɔ Yehowa ji naanɔ tɛsaa.” (Yesaia 26:3, 4) “Jwɛŋmɔ” ní Yehowa fiɔ sɛɛ ji suɔmɔ ní ayɔɔ akɛ aaaye ejalɛ shishitoo mlai lɛ anɔ ní akɛ hiɛ afɔ̃ enɔ, shi jeee je lɛŋ jarayeli, maŋkwramɔ, kɛ jamɔ gbɛjianɔtoi ní tamɔ nɔ ni miihe agbee shi lɛ. “Nuntsɔ Yehowa” ji Tɛsaa kome pɛ ní yɔɔ shweshweeshwe ní anyɛɔ akɛ he fɔ̃ɔ nɔ. Mɛi ni náa hekɛnɔfɔɔ kwraa yɛ Yehowa mli lɛ náa ehebuu ni amɛnáa “hejɔlɛ” ní hiɔ shi daa mli ŋɔɔmɔ.—Abɛi 3:5, 6; Filipibii 4:6, 7.

15. Mɛɛ gbɛ nɔ aba “maŋ ni kwɔ” lɛ shi yɛ ŋmɛnɛ, ni “nɔ̃nalɔi anaji” miinaanaa nɔ yɛ mɛɛ gbɛ nɔ?

¹⁵ Kwɛ srɔtofeemɔ ni yɔɔ enɛ kɛ nɔ ni baa Nyɔŋmɔ webii ahenyɛlɔi lɛ anɔ lɛ teŋ! “Mɛi ní tara ŋwɛi lɛ, ebaa amɛ shi; maŋ ní kwɔ lɛ, ebaa lɛ shi, ebaa lɛ shi kɛbaa shikpɔŋ, ní ekɛ shikpɔŋ sũ aye egbɔ; akɛ nane aaanaa nɔ; hɛɛ, nɔ̃nalɔi anaji kɛ ohiafoi ananefaamɔi hu.” (Yesaia 26:5, 6) Shikome ekoŋŋ lɛ, ekolɛ Yesaia miiwie “maŋ [ko] ní kwɔ” ni yɔɔ Moab lɛ he, aloo benɛ ekolɛ eetsɔɔ maŋtiase kroko, tamɔ Babilon, ní eka shi faŋŋ akɛ eyɔɔ he ni kwɔ yɛ henɔwomɔ mli lɛ. Bɔ fɛɛ bɔ ni eji lɛ, Yehowa etsake shihilɛ lɛ sɛɛsɛɛ kɛba “maŋ ní kwɔ lɛ” nɔ, ni ‘enɔ̃nalɔi kɛ ohiafoi lɛ’ miinaanaa nɔ. Ŋmɛnɛ, nɛkɛ gbalɛ nɛɛ sa Babilon Kpeteŋkpele lɛ jogbaŋŋ, titri lɛ Kristendom. Yɛ afi 1919 mli lɛ, anyɛ “maŋ ní kwɔ” nɛɛ nɔ ni eŋmɛɛ Yehowa webii ahe—hiɛshishwiemɔ shigbeemɔ diɛŋtsɛ—ni amrɔ nɛɛ, amɛ hu amɛmiinaanaa mɛi ní ŋɔ amɛ nom tsutsu ko nɛɛ anɔ agbɛnɛ. (Kpojiemɔ 14:8) Yɛ mɛɛ gbɛ nɔ? Kɛtsɔ oweletɔɔ ní Yehowa kɛbaaba enɔ, ní amɛjajeɔ amɛtsɔɔ yɛ faŋŋ mli lɛ nɔ.—Kpojiemɔ 8:7-12; 9:14-19.

Jalɛ kɛ Yehowa ‘Kaimɔ’ ní Aaashwe

16. Mɛɛ hetuu-kɛhamɔ he nɔkwɛmɔnɔ fɛfɛo Yesaia fee efɔ̃ shi?

¹⁶ Yɛ kunimyeli lala nɛɛ sɛɛ lɛ, agbɛnɛ Yesaia jie bɔ ni lɛ diɛŋtsɛ ehetuu-kɛhamɔ lɛ mli kwɔ ha kɛ sɛɛnamɔi ní jɛɔ jalɛ Nyɔŋmɔ lɛ sɔɔmɔ mli baa lɛ kpo. (Kanemɔ Yesaia 26:7-9.) Gbalɔ lɛ fee ‘ehiɛ ní ekɛfɔ̃ɔ Yehowa nɔ’ kɛ suɔmɔ ní mli wa waa ní eyɔɔ kɛha Yehowa ‘gbɛi’ kɛ ‘ekaimɔ’ lɛ he nɔkwɛmɔnɔ fɛfɛo efɔ̃ shi. Mɛni ji Yehowa kaimɔ lɛ? Mose Wolo ni Ji Enyɔ 3:15 kɛɔ akɛ: “Yehowa . . . ji migbɛi kɛyaa naanɔ, ni enɛ ji mikaimɔ kɛyaa yinɔi fɛɛ.” Yesaia sumɔɔ Yehowa gbɛi lɛ kɛ nɔ fɛɛ nɔ ní edamɔ shi kɛha lɛ waa, ni E-jalɛ shishitoo mlai kɛ egbɛ̀i lɛ fata he. Mɛi ni náa suɔmɔ ní tamɔ nɛkɛ amɛhaa Yehowa lɛ yɛ nɔmimaa akɛ amɛbaaná edɛŋ jɔɔmɔ.—Lala 5:8; 25:4, 5; 135:13; Hoshea 12:6.

17. Mɛɛ hegbɛi ahaŋ mɛi fɔji lɛ aná?

¹⁷ Shi kɛlɛ, jeee mɛi fɛɛ sumɔɔ Yehowa kɛ eshishitoo mlai ní nɔ kwɔlɔ lɛ. (Kanemɔ Yesaia 26:10.) Kɛ́ afɔ̃ efɔŋfeelɔi anine po lɛ, amɛkɛ kuɛŋtimɔ kpooɔ akɛ amɛaakase jalɛ koni amɛbote “jalɛ shikpɔŋ,” ni ji shikpɔŋ ní Yehowa tsuji jalɔi yɛ jeŋba kɛ mumɔŋ lɛ yɔɔ nɔ lɛ nɔ. Enɛ hewɔ lɛ, mɛi fɔji lɛ “[kwɛɛɛ] Yehowa agbojee lɛ.” Amɛhiŋ shi ní amɛaaná jɔɔmɔi ní baaba adesai anɔ yɛ Yehowa gbɛi lɛ hetsemɔ sɛɛ lɛ mli ŋɔɔmɔ. Mɛi komɛi hereŋ Yehowa suɔmɔ kɛ mlihilɛ lɛ nɔ yɛ jeŋ hee lɛ mli po, beni jeŋ muu lɛ fɛɛ etsɔ “jalɛ shikpɔŋ lɛ.” Aŋmalaŋ gbɔmɛi ni tamɔ nɛkɛ lɛ agbɛi yɛ wala wolo lɛ mli.—Yesaia 65:20; Kpojiemɔ 20:12, 15.

18. Yesaia gbii lɛ amli bii lɛ ekomɛi eshwila yɛ nihalamɔ gbɛfaŋ yɛ mɛɛ gbɛ nɔ, ni mɛɛ be abaanyɛ amɛnɔ ní ‘amɛna’ Yehowa?

¹⁸ “Yehowa, owó onine nɔ, shi kɛlɛ amɛnaaa; shi amɛaana joomɔ ní ojooɔ yɛ omaŋ lɛ he lɛ, ni amɛhiɛ aaagboi; la aaashã ohenyɛlɔi lɛ.” (Yesaia 26:11) Yɛ Yesaia gbii lɛ amli lɛ, Yehowa wó enine nɔ gojoo beni Yehowa fee nii ni ekɛte shi ewo ewebii lɛ ahenyɛlɔi lɛ ní ekɛbu amɛhe lɛ. Shi mɛi babaoo enaaa enɛ. Yɛ naagbee lɛ, abaanyɛ nɛkɛ gbɔmɛi ní eshwila yɛ mumɔŋ kɛtsɔ amɛnihalamɔ nɔ nɛɛ anɔ ni “amɛaana” loo amɛbaakpɛlɛ Yehowa nɔ beni ewuŋayeli la lɛ shãa amɛ kwraa lɛ. (Zefania 1:18) Nyɔŋmɔ kɛɛ Ezekiel yɛ sɛɛ mli akɛ: “Amɛaaná amɛle akɛ mi ji Yehowa lɛ.”—Ezekiel 38:23.

‘Mɔ ni Yehowa Sumɔɔ lɛ, Lɛ Etsɔseɔ’

19, 20. Mɛni hewɔ, ni mɛɛ gbɛ nɔ Yehowa tsɔse ewebii lɛ yɛ, ni namɛi ená nɛkɛ tsɔsemɔ nɛɛ he sɛɛ?

¹⁹ Yesaia le akɛ toiŋjɔlɛ fɛɛ toiŋjɔlɛ kɛ shweremɔ fɛɛ shweremɔ ní emaŋbii lɛ náa mli ŋɔɔmɔ lɛ jɛ Yehowa jɔɔmɔi ahewɔ. “Yehowa, oooŋɔ hejɔlɛ oha wɔ; ejaakɛ otsu wɔnitsumɔi lɛ fɛɛ oha wɔ.” (Yesaia 26:12) Yɛ enɛ, kɛ agbɛnɛ, yɛ hegbɛ ní Yehowa kɛma ewebii ahiɛ akɛ amɛbaanyɛ amɛtsɔmɔ “osɔfoi amaŋtsɛyeli kɛ maŋ krɔŋkrɔŋ” lɛ fɛɛ sɛɛ lɛ, Yuda yinɔsane efee nɔ ni ekpakpa kɛ efɔŋ fɛɛ yɔɔ mli. (2 Mose 19:6) Ewebii lɛ kpale kɛtee apasa nyɔŋmɔi ajamɔ he shii abɔ. No hewɔ lɛ, etsɔseɔ amɛ yɛ be kɛ bei amli. Shi kɛlɛ, nɛkɛ tsɔsemɔ nɛɛ feɔ suɔmɔ ní Yehowa yɔɔ lɛ he odaseyeli ejaakɛ ‘mɔ ni Yehowa sumɔɔ lɛ, lɛ etsɔseɔ.’—Hebribii 12:6.

²⁰ Bei pii lɛ, Yehowa tsɔseɔ ewebii lɛ kɛtsɔɔ jeŋmaji krokomɛi, ni ji “nuntsɔmɛi krokomɛi” ní eŋmɛɔ gbɛ ní amɛbayeɔ amɛnɔ lɛ nɔ. (Kanemɔ Yesaia 26:13.) Yɛ afi 607 D.Ŋ.B. lɛ, eŋmɛ Babilonbii lɛ gbɛ ni amɛbaŋɔ amɛ nom kɛtee. Ani enɛ he ba sɛɛnamɔ kɛha amɛ? Amanehulu diɛŋtsɛ he baaa sɛɛnamɔ kɛhaaa mɔ. Shi kɛlɛ, kɛ mɔ ni naa amanehulu lɛ kase nii kɛjɛ nɔ ni ba lɛ mli, ní eshwa ehe, ní ekɛ hetuu-kɛhamɔ ha Yehowa kome pɛ lɛ no lɛ enáa he sɛɛ. (5 Mose 4:25-31) Ani Yudafoi lɛ ekomɛi tsɔɔ heshwamɔ ní Nyɔŋmɔ gbeyeishemɔ yɔɔ mli? Hɛɛ! Yesaia wie yɛ gbalɛ wiemɔ mli akɛ: “Bo okome ogbɛi lɛ atã wɔɔtsĩ!” Beni amɛku amɛsɛɛ kɛjɛ nomŋɔɔ mli yɛ afi 537 D.Ŋ.B. sɛɛ lɛ, ehe bahia ní atsɔse Yudafoi lɛ yɛ be kɛ bei amli yɛ eshai krokomɛi ahewɔ, shi amɛgbeee tsɔne ni ji tɛ nyɔŋmɔi ajamɔ lɛ mli dɔŋŋ.

21. Mɛni baaba mɛi ní nyɛɔ Nyɔŋmɔ webii anɔ lɛ nɔ?

²¹ Shi mɛi ní ŋɔ Yuda nom lɛ hu? “Gbohii lɛ ahiɛ kamɔŋ, sisai hu eteŋ shi; ejaakɛ owo amɛ nyɔmɔ ni okpata amɛhiɛ, ni oha amɛkaimɔ fɛɛ elaaje.” (Yesaia 26:14) Babilon baana amanehulu yɛ yiwalɛ nibii ni efee Yehowa maŋ ní ehala lɛ hewɔ. Yehowa baatsɔ Mediabii kɛ Persiabii lɛ anɔ ebutu Babilon henɔwolɔ lɛ ni ebaaha ewebii ní eŋɔ amɛ nom lɛ aye amɛhe. Abaaha nakai maŋtiase kpeteŋkpele, Babilon hewalɛ atã kwraa, tamɔ nɔ ni egbo pɛpɛɛpɛ. Yɛ naagbee lɛ, ehiŋ shi dɔŋŋ.

22. Ájɔɔ Nyɔŋmɔ webii ni yɔɔ ŋmɛnɛŋmɛnɛ beaŋ lɛ yɛ mɛɛ gbɛ nɔ?

²² Yɛ ŋmɛnɛŋmɛnɛ beaŋ mlibaa mli lɛ, aha mumɔŋ Israel ní atsɔse amɛ lɛ amli shwɛɛnii lɛ ye amɛhe kɛjɛ Babilon Kpeteŋkpele lɛ dɛŋ ni akɛ amɛ ba Yehowa sɔɔmɔ mli ekoŋŋ yɛ afi 1919 mli. Akɛni awo amɛ hewalɛ ekoŋŋ hewɔ lɛ, Kristofoi ní afɔ amɛ mu lɛ kɛ amɛhe wo amɛshiɛmɔ nitsumɔ lɛ mli kɛ ekãa. (Mateo 24:14) Enɛ hewɔ lɛ, Yehowa kɛ shweremɔ babaoo ejɔɔ amɛ, ni ekɛ asafo babaoo ni ji “tooi krokomɛi” po ebafata amɛhe koni amɛkɛ amɛ asɔmɔ. (Yohane 10:16) “Oha jeŋmaŋ lɛ yi efá, Yehowa, oha jeŋmaŋ lɛ yi efá, ohiɛ eba nyam, ogbele shikpɔŋ lɛ husui lɛ fɛɛ mli. Yehowa, kɛ́ efi lɛ, no amɛhiɛ tsɔɔo; kɛ́ otsɔsemɔ lɛ kã amɛnɔ lɛ, amɛfɔseɔ faikpamɔ amɛshwieɔ shi.”—Yesaia 26:15, 16.

‘Amɛaate Shi’

23. (a) Mɛɛ Yehowa hewalɛ lɛ kpojiemɔ ní sa kadimɔ waa ba yɛ afi 537 D.Ŋ.B.? (b) Mɛɛ kpojiemɔ ní tamɔ nakai nɔŋŋ ba yɛ afi 1919 Ŋ.B.?

²³ Yesaia ku sɛɛ eba shihilɛ ní Yuda yɔɔ mli beni eyɔɔ nomŋɔɔ mli lolo yɛ Babilon lɛ nɔ ekoŋŋ. Ekɛ maŋ lɛ to yoo ní miikɔ̃mɔ, shi akɛni enáaa yelikɛbuamɔ ko hewɔ lɛ, enyɛɛɛ efɔ́ lɛ he. (Kanemɔ Yesaia 26:17, 18.) Nakai yelikɛbuamɔ lɛ ba yɛ afi 537 D.Ŋ.B., ni Yehowa webii lɛ ku amɛsɛɛ kɛba amɛmaŋ shikpɔŋ nɔ, ní amɛhe miitswa shi ní amɛsaa amɛma sɔlemɔtsu lɛ ní amɛto anɔkwa jamɔ shishi ekoŋŋ. Ni tsɔɔ akɛ, atee maŋ lɛ shi kɛjɛ gbohii ateŋ. “Omɛi ní egboi lɛ ahiɛ aaakãmɔ, migbohii lɛ aaate shi. Nyɛhiɛ atsɛ̃a, nyɛláa yijiemɔ lalai, nyɛ mɛi ní nyɛyɔɔ sũ mli lɛ! Shi obɔ́ lɛ, la bɔ́ ni, ni shikpɔŋ lɛ aaajie sisai lɛ ashwie.” (Yesaia 26:19) Mɛɛ Yehowa hewalɛ lɛ kpojiemɔ nɛ! Kɛfata he lɛ, kwɛ hewalɛ kpojiemɔ kpele ní ba beni nakai wiemɔi lɛ ba mli yɛ mumɔŋ shishinumɔ naa yɛ afi 1919 lɛ! (Kpojiemɔ 11:7-11) Ni kwɛ bɔ ni wɔkpáa be mli ni nakai wiemɔi lɛ baaba mli tɛ̃ɛ diɛŋtsɛ yɛ jeŋ hee lɛ mli, ní mɛi ni nyɛɛɛ nɔ ko afee yɛ gbele mli lɛ ‘baanu Yesu gbee ní amɛaaje kpo’ kɛaajɛ kaimɔ bui amli lɛ gbɛ!—Yohane 5:28, 29.

24, 25. (a) Mɛɛ gbɛ nɔ ekolɛ Yudafoi ni hi shi yɛ afi 539 D.Ŋ.B. lɛ mli lɛ tsɔ amɛbo kita ní Yehowa wo amɛ akɛ amɛtee amɛhe lɛ toi? (b) Mɛni ekolɛ ‘piai’ lɛ tsɔɔ yɛ ŋmɛnɛŋmɛnɛ beaŋ, ni mɛɛ su esa akɛ wɔjie lɛ kpo yɛ enɛɛmɛi ahe?

²⁴ Shi kɛlɛ, kɛ́ anɔkwafoi lɛ baaná mumɔŋ jɔɔmɔi ní awo shi yɛ he kɛtsɔ Yesaia nɔ lɛ mli ŋɔɔmɔ lɛ, no lɛ esa akɛ amɛbo Yehowa kitai lɛ atoi, akɛ: “Yaa, mimaŋ, ní oyabote opia lɛ mli, ní oŋa oshinaa lɛ owo oyi; teemɔ ohe hiŋmɛitswaaoo ko kɛyashi beyinɔ ní mlifu lɛ aaaho! Shi naa, Yehowa miije kpo kɛmiijɛ ehilɛhe lɛ ní eyawo shikpɔŋ lɛ nɔ bii anyɔmɔ yɛ amɛnishaianii lɛ ahewɔ; ni shikpɔŋ lɛ aaajie elá lɛ kpo ni ehàŋ mɛi ní agbe yɛ enɔ lɛ anɔ dɔŋŋ.” (Yesaia 26:20, 21; okɛto Zefania 1:14 he.) Ekolɛ nɛkɛ ŋmalɛ kuku nɛɛ ná eklɛŋklɛŋ mlibaa beni Mediabii lɛ kɛ Persiabii ní Maŋtsɛ Koresh nyiɛ amɛhiɛ lɛ, ye Babilon nɔ kunim yɛ afi 539 D.Ŋ.B. lɛ. Taakɛ Helanyo yinɔsaneŋmalɔ Xenophon tsɔɔ lɛ, beni Koresh bote Babilon lɛ, ewo kita akɛ mɔ fɛɛ mɔ ahi eshia mli ejaakɛ ekɛ famɔ eha esraafoi ní tara okpɔŋɔi anɔ lɛ akɛ “mɔ fɛɛ mɔ ní amɛkɛaakpe yɛ agbó naa lɛ, amɛgbe lɛ.” Ŋmɛnɛ, abaanyɛ akɛ gbalɛ nɛɛ mli ‘piai’ lɛ ato Yehowa webii asafoi akpei nyɔŋmai abɔ ní yɔɔ je lɛŋ fɛɛ lɛ ahe. Asafoi nɛɛ baaya nɔ aná gbɛfaŋnɔ ni he hiaa waa yɛ wɔshihilɛi amli, aahu kɛtsɔ “amanehulu kpeteŋkpele lɛ” po mli. (Kpojiemɔ 7:14) Kwɛ bɔ ni ehe hiaa akɛ wɔya nɔ wɔná subaŋ kpakpa yɛ asafo lɛ he, ni wɔkɛ wɔhe abɔ asafo lɛ daa!—Hebribii 10:24, 25.

²⁵ Etsɛŋ ni Satan je lɛ baaba enaagbee. Gbɛ ni Yehowa baatsɔ nɔ ebu ewebii ahe yɛ nakai be ní yɔɔ gbeyei waa lɛ mli lɛ, no lɛ wɔleee bianɛ. (Zefania 2:3) Shi kɛlɛ, wɔle akɛ wɔyiwalaheremɔ baadamɔ Yehowa mli hemɔkɛyeli ní wɔyɔɔ kɛ wɔ anɔkwayeli kɛ toiboo ní wɔfeɔ wɔhaa lɛ lɛ nɔ.

26. Mɛni ji “leviatan” lɛ yɛ Yesaia gbii lɛ amli kɛ wɔgbii nɛɛ amli, ni mɛni ba “drako ní yɔɔ ŋshɔ lɛ mli” nɛɛ nɔ?

²⁶ Beni ekpáa nakai be lɛ gbɛ lɛ, Yesaia gba efɔ̃ shi akɛ: “Nakai gbi lɛ nɔ lɛ Yehowa kɛ eklante ni naa wa ni eda ni emli wa aaawo leviatan ni ji onufu ní he yɔɔ oyá kɛ leviatan ni ji onufu lɔgɔligi lɛ nyɔmɔ, ni eeegbe drako ní yɔɔ ŋshɔ lɛ mli lɛ.” (Yesaia 27:1) Yɛ eklɛŋklɛŋ mlibaa mli lɛ, “leviatan” lɛ kɔɔ jeŋmaji ní agbɛ Israel ashwã amɛmli, tamɔ Babilon, Mizraim, kɛ Ashur lɛ ahe. Nɛkɛ jeŋmaji nɛɛ nyɛŋ atsĩ Yehowa webii lɛ asɛɛ ní amɛaaku kɛya amɛmaŋ shikpɔŋ nɔ yɛ be ni sa mli lɛ naa. Shi kɛlɛ, namɔ ji ŋmɛnɛŋmɛnɛ beaŋ Leviatan lɛ mɔ? Etamɔ nɔ ni lɛ ji Satan—“blema onufu lɛ”—kɛ enibii agbɛjianɔtoo fɔŋ ni yɔɔ shikpɔŋ nɛɛ nɔ, ni ji edɛŋdade ní ekɛtsuɔ nii kɛwuɔ eshiɔ mumɔŋ Israel lɛ. (Kpojiemɔ 12:9, 10; 13:14, 16, 17; 18:24) “Leviatan” lɛ laaje hewalɛ ni eyɔɔ yɛ Nyɔŋmɔ webii anɔ lɛ yɛ afi 1919 mli, ni etsɛŋ ni ebaalaaje kwraa yɛ be mli ni Yehowa “[baagbe] drako ní yɔɔ ŋshɔ lɛ mli lɛ.” Shi dani nakai be lɛ baashɛ lɛ, nɔ ko kwraa bɛ ní “leviatan” lɛ baaka akɛ eeefee eshi Yehowa webii ní eeeye omanye diɛŋtsɛ.—Yesaia 54:17.

“Weintrom Fɛfɛo Lɛ”

27, 28. (a) Mɛni Yehowa weintrom lɛ kɛwo shikpɔŋ lɛ nɔ obɔ? (b) Yehowa buɔ eweintrom lɛ he yɛ mɛɛ gbɛ nɔ?

²⁷ Agbɛnɛ, Yesaia kɛ lala kroko fee bɔ ni Yehowa webii ní eha amɛye amɛhe lɛ baawo yibii babaoo lɛ he mfoniri yɛ gbɛ ní hi jogbaŋŋ nɔ, akɛ: “Nakai gbi lɛ nɔ lɛ nyɛláa yɛ weintrom fɛfɛo lɛ he akɛ: Mi, Yehowa lɛ, mabaa yi, mashwie nɔ nu hiŋmɛitswaa fɛɛ hiŋmɛitswaa; koni nɔ ko akafee lɛ, mabaa yi nyɔɔŋ kɛ shwane.” (Yesaia 27:2, 3) Mumɔŋ Israel shwɛɛnii lɛ kɛ amɛhefatalɔi ní tsuɔ nii waa lɛ kɛ mumɔŋ nibii babaoo ewo shikpɔŋ lɛ nɔ obɔ̃ lɛɛlɛŋ. Mɛɛ nɔdaamɔ nɔ̃ kɛha gbijurɔyeli nɛ—kɛha lala! Ehe yijiemɔ lɛ fɛɛ yaa Yehowa, mɔ ni jɛɔ suɔmɔ mli ekwɛɔ eweintrom lɛ jogbaŋŋ lɛ ŋɔɔ.—Okɛto Yohane 15:1-8 he.

²⁸ Lɛɛlɛŋ, akɛ miishɛɛ eye Yehowa mlifu ní tsɔ hiɛ lɛ najiaŋ! “Mlifu ko bɛ mimli. Miná ní kulɛ kpitikpitii kɛ ŋmeii kɛ mi miiwu, kulɛ mafã kɛyanina amɛ ni mashã blublu tswɛ̃m! Ja ebaba mi abó, ní ekɛ mi kpata; hɛɛ, ha ekɛ mi akpata!” (Yesaia 27:4, 5) Bɔni afee ní ená nɔmimaa akɛ eweintrom lɛ miiya nɔ eewo “wein fɛfɛo” babaoo lɛ, Yehowa kpataa hewalɛ fɛɛ hewalɛ ní tamɔ jwɛi ní baanyɛ afite eweintrom lɛ hiɛ ni eshãa tamɔ bɔ ni akɛ la shãa nii lɛ. No hewɔ lɛ, mɔ ko kwraa akaka akɛ ekɛ Kristofoi asafo lɛ hilɛ-kɛhamɔ baawo oshara mli! Shi moŋ, ha mɔ fɛɛ mɔ ‘ababa Yehowa abó,’ ní etao ehiɛ duromɔ kɛ ehebuu sɛɛgbɛ. Yɛ nakai feemɔ mli lɛ, toiŋjɔlɛ baa amɛkɛ Nyɔŋmɔ teŋ—nɔ ko ní he hiaa aahu akɛ Yesaia tsĩ tã shii enyɔ sɔŋŋ. Mɛni jɛɔ mli baa? “Gbii ní baaba lɛ amli lɛ Yakob aaatsɛ̃rɛ̃ fãi, ni Israel hu aaagbá afofro ni eeefrɔke, ni amɛkɛ yibii aaawo je lɛŋ obɔ tɔ́.” (Yesaia 27:6)c Mɛɛ Yehowa hewalɛ lɛ odaseyeli ni yɔɔ naakpɛɛ po ŋmalɛ kuku nɛɛ mlibaa ji nɛkɛ! Kɛjɛ afi 1919 kɛbaa nɛɛ, Kristofoi ní afɔ amɛ mu lɛ kɛ “yibii,” ni ji mumɔŋ niyenii kpakpai ewo shikpɔŋ lɛ nɔ obɔ tɔ́. Nɔ ni ejɛ mli eba ji akɛ, tooi krokomɛi anɔkwafoi akpekpei abɔ ebafata amɛhe, ni amɛkɛ amɛ efee ekome ni “amɛjáa [Nyɔŋmɔ] nyɔɔŋ kɛ shwane.” (Kpojiemɔ 7:15) Mɛnɛɛmɛi kɛ miishɛɛ hiɛɔ etɛi ní nɔ kwɔlɔ lɛ amli yɛ jeŋ ní ekpɔtɔ ní amɛyɔɔ mli lɛ mli. Ni Yehowa miiya nɔ eejɔɔ amɛ kɛ shweremɔ babaoo lolo. Eba akɛ wɔhiɛ kpaŋ hegbɛ kpele ní wɔná akɛ wɔɔye “yibii” lɛ eko, ní wɔkɛ mɛi krokomɛi hu aja kɛtsɔ yijiemɔ wiemɔi ní wɔ diɛŋtsɛ wɔɔwie lɛ nɔ lɛ nɔ kɔkɔɔkɔ!

[Shishigbɛ niŋmai]

[Akrabatsa ni yɔɔ baafa 285]

“Tɛtɛrɛmantɛrɛ Wulu” ko Jaje Heyeli Etsɔɔ

Yɛ afi 607 D.Ŋ.B. lɛ, Yuda piŋmɔi lɛ bafá babaoo beni Yehowa tsɔse emaŋ ní ekɔ́ gbɛ fɔŋ lɛ kɛ toigbalamɔ ni ji nom ní eha aŋɔ amɛ lɛ. (Kanemɔ Yesaia 27:7-11.) Maŋ lɛ tɔmɔ lɛ da tsɔ̃ fe bɔ ni abaanyɛ akɛ kooloi afɔleshaai akpata aha amɛ. No hewɔ lɛ, taakɛ akɛ ‘shwiemɔ’ gbɛɔ gwantɛŋi loo abotiai ashwãa, loo kɔɔyɔɔ ní naa wa ‘looɔ’ baai kɛyaa lɛ, nakai Yehowa shwie Israel kɛjɛ amɛ diɛŋtsɛ amɛshikpɔŋ lɛ nɔ kɛtee. Yɛ no sɛɛ lɛ, gbɔmɛi ní he waaa, ní akɛ yei feɔ amɛhe mfoniri lɛ po nyɛ amɛná nibii ni eshwɛ yɛ shikpɔŋ lɛ nɔ lɛ he sɛɛ.

Shi kɛlɛ, be ni Yehowa kɛbaajie ewebii lɛ kɛjɛ nomŋɔɔ mli lɛ bashɛ. Eha amɛye amɛhe tamɔ bɔ ni, kɛ́ wɔɔkɛɛ lɛ, okwaafonyo haa mutso yibii ní eka tso lɛ nɔ lɛ yeɔ amɛhe lɛ. “Ni aaaba mli yɛ nakai gbi lɛ nɔ akɛ Yehowa aaagbee eŋmãa lɛ kɛaajɛ Eufrate faa lɛ naa kɛyashi Mizraim faa lɛ naa, ni nyɛ, Israelbii lɛ, aaakɔlɔ nyɛ ekomekome. Ni aaaba mli yɛ nakai gbi lɛ nɔ akɛ aaakpã tɛtɛrɛmantɛrɛ wulu, ni mɛi ní elaaje yɛ Ashur shikpɔŋ lɛ nɔ lɛ kɛ mɛi ní ashɛrɛ amɛ ashwie Mizraim shikpɔŋ lɛ nɔ lɛ aaaba, ni amɛaabajá Yehowa yɛ gɔŋ krɔŋkrɔŋ lɛ nɔ yɛ Yerusalem.” (Yesaia 27:12, 13) Yɛ kunim ní Koresh ye yɛ afi 539 D.Ŋ.B. lɛ sɛɛ lɛ, ewo akpɔ ko ní ha Yudafoi ni yɔɔ emaŋtsɛyeli lɛ mli, ní mɛi ni yɔɔ Ashur kɛ Mizraim lɛ fata he lɛ fɛɛ ye amɛhe. (Ezra 1:1-4) Etamɔ nɔ ni aakpã “tɛtrɛmantɛrɛ wulu” ko, ní miijaje miishɛɛ sane ni ji Nyɔŋmɔ webii lɛ aheyeli kɛmiiha.

[Mfonirii ni yɔɔ baafa 275]

‘Fɔ nii kpakpai ní akɛŋmɛ okpɔlɔ’

[Mfoniri ni yɔɔ baafa 277]

Aanaanaa Babilon nɔ yɛ mɛi ni ji gbokɛlɛfoi lɛ anajiashi

[Mfoniri ni yɔɔ baafa 278]

‘Nyɛyabotea nyɛpiai lɛ amli’