“Maŋ” Ni Kɛ Yibii Woɔ Shikpɔŋ Nɔ Obɔ Tɔ

“Gbii ni baaba lɛ amli lɛ, Yakob aaatsɛ̃rɛ fãi, ni Israel hu aaagba afofro ni eeefrɔke, ni amɛkɛ yibii aaawo je lɛŋ obɔ tɔ.”​—YESAIA 27:⁠6.

 1. Te bɔfo Petro tsɛ mumɔŋ Israel maŋ lɛ tɛŋŋ?

BƆFO Petro ŋma wiemɔi ni kɔɔ Kristo kaselɔi asafo lɛ fɔmɔ akɛ “maŋ” yɛ afi 33 Ŋ.B. lɛ he lɛ sɛɛ etsɛɛɛ kwraa ni Yerusalem hiɛkpatamɔ yɛ afi 70 Ŋ.B. lɛ ba: “Shi nyɛ lɛ weku ni ahala ji nyɛ, maŋtsɛmɛi ni yeɔ osɔfoi, jeŋ maŋ krɔŋkrɔŋ, maŋ ni eŋɔfee enɔ̃, koni nyɛjaje mɔ ni tsɛ nyɛ kɛjɛ duŋ Iɛ mli kɛba lɛ diɛŋtsɛ enaakpɛɛ la lɛ he lɛ agbojee lɛ; nyɛ ni sa lɛ, nyɛjeee maŋ, shi agbɛnɛ lɛ Nyɔŋmɔ maŋ ji nyɛ, ní anaaa nyɛ mɔbɔ, shi agbɛnɛ ánanyɛ mɔbɔ.” (1 Petro 2:​9, 10) Kwɛ duromɔ ni enɛ ji yɛ Nyɔŋmɔ gbɛfaŋ!

 2, 3. Akɛ maŋ ni Yehowa Nyɔŋmɔ eŋɔfee enɔ̃ lɛ, mɛɛ gbɛnaa nii bakaa mumɔŋ Israel nɔ, ni mɛni Yesu Kristo kɛ amɛ toɔ he yɛ Yohane yitso 15?

² Ŋmɛnɛ, yɛ beni Petro ŋma nɛkɛ wiemɔi nɛɛ sɛɛ afii ohai 19 nɛ lɛ, nakai “maŋ” ni akɛ mumɔ efɔ́ amɛ lɛ ateŋ shwɛɛnii yɛ shikpɔŋ nɔ lolo. Amɛyifalɛ lɛ nɔ egbɔ kɛbashɛ nɔ ni shɛɛɛ akpei nyɔŋma, taakɛ daa afi Nuŋtsɔ Iɛ Gbɛkɛnaashi Niyenii lɛ he akɔntaabuu tsɔɔ lɛ. Amɛji ‘maŋ ni Yehowa eŋɔfee enɔ,’ ni akɛni nɛkɛ amɛji hewɔ lɛ, esa akɛ amɛjaje Yehowa Nyɔŋmɔ, mɔ ni tsɛ amɛ kɛjɛ je lɛŋ “duŋ Iɛ mli kɛba lɛ diɛŋtsɛ enaakpɛɛ Ia lɛ he lɛ” agbojee amɛtsɔɔ yɛ he fɛɛ he. Nɛkɛ “la” nɛɛ miikpɛ́, titri lɛ kɛjɛ “Jeŋmaji abei,” aloo “jeŋmaji abei ni ato” lɛ naagbee kɛjɛ 1914.a (Luka 21:​24, Ga Biblia; NW) Ákɛ Ŋwɛi Nihalɔ ni kɛ nakai naakpɛɛ la lɛ ha lɛ “maŋ ni eŋɔfee enɔ̃” lɛ, amɛjara wa kɛha lɛ. Amɛtamɔ mumɔŋ weintrom kɛha lɛ.

³ Wɔkaiɔ nɔ ni Yesu Kristo kɛɛ ekaselɔi lɛ ni damɔ shi kɛha mɛi fɛɛ ni baafee esɛɛnyiɛlɔi ni akɛ mumɔ efɔ́ amɛ lɛ yɛ biɛ: “Miji anɔkwa weintso lɛ, ni mitsɛ ji okwaafonyo lɛ. Mihe tso nine fɛɛ nine ni wooo yibii lɛ, efolɔɔ, ni nɔ fɛɛ nɔ ni wooo yibii lɛ, ekpɔlɔɔ he, bɔni afee ni ewo yibii fe tsutsu lɛ. Agbɛnɛ nyɛhe eje momo yɛ wiemɔ ni mikɛnyɛ ewie lɛ hewɔ; nyɛhia mimli, ni mi hu mahi nyɛmli. Taakɛ bɔ ni tso nine nyɛŋ ajɛ lɛ diɛŋtsɛ emli awo yibii akɛ ja ema weintso lɛ he lɛ, nakai nyɛ hu nyɛnyɛŋ akɛ ja nyɛhi mimli. Miji weintso lɛ, nyɛji niji lɛ. Mɔ ni hiɔ mimli ni mi hu mihiɔ emli lɛ, lɛ nɔŋŋ ewoɔ yibii pii; ejaakɛ kɛ jeee miŋ lɛ nyɛnyɛŋ nɔ ko nyɛfee.”​—Yohane 15:​1-5.

 4. (a) Yesu nɔkwɛmɔ nɔ lɛ kaiɔ wɔ mɛni ni atsɔɔ mli yɛ Yesaia yitso 27? (b) Mɛɛ be nɛkɛ gbalɛ nɛɛ baa mli yɛ ŋmɛnɛŋmɛnɛ beaŋ, ni yɛ namɛi anɔ? (d) Mɛɛ su ji nɔ ni Yehowa bɛ yɛ ewebii lɛ ahe dɔŋŋ?

⁴ Nakai sane ni akɛtoɔ nii ahe aloo abɛbua ni Yesu Kristo kɛha lɛ kaiɔ wɔ Yehowa wiemɔi ni yɔɔ Yesaia 27:​2-4 lɛ, he ni wɔkaneɔ yɛ akɛ:

“Nakai gbi lɛ nɔ lɛ nyɛlea yɛ weintrom fɛfɛo lɛ he akɛ: Mi, Yehowa lɛ, mabaa yi, mashwie nɔ nu hiŋmɛitswaa fɛɛ hiŋmɛitswaa; koni nɔ ko akafee lɛ, mabaa yi nyɔɔŋ kɛ shwane. Mlifu ko bɛ mimli.”

Abaanyɛ akɛ “weintrom fɛfɛo” ni yɔɔ shikpɔŋ nɔ ŋmɛnɛ lɛ ato okadi “weintso” lɛ nɔ niji ni Kristofoi ni akɛ mumɔ efɔ́ amɛ ni feɔ “maŋ krɔŋkrɔŋ” lɛ ji emlibii ni eshwɛ ni woɔ yibii lɛ ahe. No hewɔ lɛ gbɛnaa nii ka amɛnɔ akɛ amɛwo yibii babaoo. (Yohane 15:⁠5) Taakɛ Yesaia gbalɛ lɛ tsɔɔ Iɛ, be ni akɛ Yehowa webii ni ásaa amɛ lɛ baa eduromɔ mli ekoŋŋ mli alaa lala ni kɔɔ “weintrom fɛfɛo” lɛ he lɛ. (Okɛto Yesaia 27:13 he.) Enɛ kɛ gbalɛ ni yɔɔ miishɛɛ nɛɛ mlibaa yɛ ŋmɛnɛŋmɛnɛ beaŋ woɔ ta lɛ sɛɛ afi ni ji 1919 mli, ni yinɔsane mli anɔkwalei yeɔ emlibaa kɛbashi ŋmɛnɛ gbi nɛɛ amli lɛ he odase. Ŋmɛnɛ, Yehowa “mlifu” bɛ ewebii lɛ anɔ, ebɛ nɔ ko ni ekɛshiɔ ‘emaŋ krɔŋkrɔŋ’ lɛ mli shwɛɛnii lɛ hu, “maŋ ni eŋɔfee enɔ” lɛ ni emli fuko Kristofoi anɔkwafo ni kpaa naanɔ wala gbɛ yɛ shikpɔŋ nɔ lɛ hu. Yɛ mɔbɔnalɛ naa lɛ, etsɔ ehiɛ eha amɛ, ni enɛ hewɔ ni amɛshwere yɛ mumɔŋ ni amɛwoɔ yibii babaoo lɛ.

 5. Okadi weintrom nɛɛ etsɔ mɛni nɔ eha gbɔmɛi ena miishɛɛ, ni mɛni amɛbaanyɛ amɛgba yɛ he?

⁵ Nɛkɛ mumɔŋ “maŋ” nɛɛ kɛ ehefatalɔi ni tsuɔ nii waa lɛ tamɔ weintrom ni woɔ yibii babaoo ni ewo ‘wein ni ŋɔɔ.’ Eji mumɔŋ wein ni haa Yehowa kɛ gbɔmɔ fɛɛ tsui nyãa. (Kojolɔi 9:13) Yɛ yiŋtoo kpakpa nɛɛ hewɔ lɛ, mɛi ni nyãa yɛ mumɔŋ dãanumɔ hewɔ lɛ baanyɛ amɛkɛ miishɛɛ alá ni amɛjaje nibii ni Ŋwɛi Okwaafonyo ni fee nakai “weintrom” lɛ efee kɛha nɛkɛ okadi “weintrom” nɛɛ fɛɛ amɛtsɔɔ. Kɛ aaawie yɛ okadi gbɛ nɔ lɛ ‘ekɛ nii eshwã’ nɛkɛ “weintrom” nɛɛ nɔ lɛlɛŋ koni efee frɔ̃frɔ̃, ni yɛ enɛ hewɔ lɛ akpa yibii ni nu yɔɔ mli ni ŋɔɔ ni kɛ miishɛɛ baa.

Sɔrɔtofeemɔ Ko​—“Shikpɔŋ Lɛ Nɔ Weinyibii Lɛ

 6. Shi mɛni baafee “shikpɔŋ lɛ nɔ weinyibii” lɛ aniiashikpamɔ, taakɛ Kpojiemɔ yitso 14 lɛ tsɔɔ lɛ?

⁶ Shi jeee nɛkɛ sane lɛ ji yɛ nɔ ni Biblia lɛ mli naagbee wolo lɛ tsɛɔ lɛ “shikpɔŋ lɛ nɔ weinyibii” lɛ he. Etsɛŋ ni akɛ ŋwɛi famɔ baaha ŋwɛi tabilɔi blafoi lɛ akɛ: “Okɛ okakla ni naaba lɛ awo mli, ni obua shikpɔŋ lɛ nɔ weinyibii shabii lɛ anaa, ejaakɛ eweinyibii lɛ etsu.” Kɛkɛ lɛ taakɛ gbalɛ Kpojiemɔ lɛ yaa nɔ etsɔɔ lɛ, “Ni bɔfo lɛ shɛ ekakla lɛ efɔ shikpɔŋ lɛ nɔ, ni ebua shikpɔŋ lɛ nɔ weinyibii lɛ anaa, ni ekɛwo Nyɔŋmɔ mlila lɛ weinŋaanɔ kpeteŋkpele lɛ mli. Ni anaanaa weiŋaanɔ lɛ nɔ yɛ maŋ lɛ ŋmaŋmasha lɛ, ni lá jɛ weinŋaanɔ lɛ mli kɛyashɛ okpɔŋɔi lɛ adaaŋ nii lɛ ahe yɛ stadioi akpe kɛ ohai ekpaa jɛkɛmɔ mli.” (Kpojiemɔ 14:​18-20) Nakai ji bɔ ni ebaaba Abonsam shikpɔŋ nɔ gbɛjianɔtoo lɛ nɔyeli fã lɛ nɔ; lɛ ji okwaafonyo ni fee ŋmɔ nɛɛ, ni eteɔ shi eshiɔ “anɔkwa weintso” lɛ ni Yehowa Nyɔŋmɔ ji Okwaafonyo ni tɛo lɛ. Akɛ “shikpɔŋ lɛ nɔ weinyibii” lɛ tsuŋ nii kwraa dɔŋŋ!

7-9. Mɛɛ mlibaa ni bɔ he enyɔ Yesaia 27:​7-13 yɔɔ, ni yɛ mɛɛ bei amli?

⁷ Shi gbalɛ ni yɔɔ Yesaia yitso 27 nɛɛ ji gbalɛ ni kɔɔ nibii asaamɔ he diɛŋtsɛ, klɛŋklɛŋ lɛ, heloo naa Israel maŋ kɛ agbɛnɛ mumɔŋ Israel yɛ wɔ diɛŋtsɛ wɔ afii ohai 20 nɛɛ mli. Enɛ jeɔ kpo yɛ nɔ ni gbalɛ lɛ wieɔ yɛ kuku 7 kɛbashi kuku 13 (NW) ni yitso lɛ kɛbaa naagbee lɛ hewɔ. Nakai kukuji lɛ kaneɔ akɛ:

⁸ “Shi eyi lɛ tamɔ bɔ ni eyi mɛi ni yi lɛ lɛ aloo egbe lɛ tamɔ bɔni agbe mɛi ni gbe lɛ lɛ? Bolɔmɔ ko ni woɔ mɔ he gbeyei naa okɛ lɛ baaye yɛ beni oshwieɔ lɛ lɛ. Ekɛ ekɔɔyɔɔ ni naa wa lɛ aaaloo lɛ kɛaaya yɛ gbi ni boka kɔɔyɔɔ lɛ twaa lɛ. No hewɔ lɛ enɛ nɔ abaatsɔ atsumɔ Yakob nɔsha lɛ, ni yibii fɛɛ ni ehe esha lɛ jiemɔ lɛ wo lɛ nɛ, beni ehaa afɔleshaa latɛ lɛ he tɛi lɛ faa tsɔmɔɔ tamɔ kaaloo tɛi ni efufulu lɛ, ni wɔŋkooi la kɛ tsofakɛŋma shãa nibii lɛ mamɔŋ shi dɔŋŋ. Ejaakɛ maŋ ni atswa gbogbo awo he la aaatsɔ amanfo, aaashi lɛɛhe lɛ afɔ shi ni akwa tamɔ ŋa nɔ. Tsinabii aaaye nii yɛ jɛi, ni amɛaaye ebaai lɛ. Kɛ eniji lɛ gbi lɛ aaakumɔ; yei hu aaaba abalɛ lai yɛ jɛi ayashã. Ejaakɛ amɛjeee maŋ ko ni kɔɔ sane sɛɛ. Hewɔ lɛ e-Feelɔ lɛ musuŋ etsɔŋ lɛ yɛ amɛhe; ni e-Shɔ̃lɔ lɛ enaŋ amɛ mɔbɔ.

⁹ “Ni aaaba mli yɛ nakai gbi lɛ nɔ akɛ Yehowa aaatserɛ eyibii lɛ kɛaajɛ Eufrate Faa lɛ naa kɛyashi Mizraim Faa lɛ naa, ni nyɛ Israelbii lɛ, aaakɔlɔnyɛ ekomekome. Ni aaaba mli akɛ yɛ nakai gbi lɛ nɔ akɛ, aaakpa tɛtrɛmaŋtrɛ wulu, ni mɛi ni hiɛ kpatãa yɛ Ashur shikpɔŋ lɛ nɔ kɛ mɛi ni agbɛ amɛ ashwa Mizraim shikpɔŋ lɛ nɔ lɛ aaaba, ni amɛaabakula shi amɛha Yehowa yɛ gɔŋ krɔŋkrɔŋ lɛ nɔ yɛ Yerusalem.”

10. Mɛɛ jeŋ hewalɛ yeɔ nɔ yɛ Yesaia gbalɛ lɛ bei lɛ amli, ni mɛni ba enɔ yɛ mɔdɛŋ ni ebɔ akɛ eeetutua Yuda maŋtsɛyeli lɛ maŋtiase lɛ?

¹⁰ Yɛ Yesaia gbalɛ nɛɛ gbii lɛ amli lɛ, no mli lɛ Ashur ebatsɔ jeŋ hewalɛ ni yɔɔ shikpɔŋ nɔ, ni ebaye jeŋ hewalɛi kpawo ni baatsara nɔ aba lɛ mli klɛŋklɛŋ nɔ̃ lɛ nɔ kunim, eyɛ mli akɛ Mizraim yɛ lolo shi ákɛ mɔ ni bɛ hewalɛ tsɔ̃ tamɔ tsutsu. Israel akutsei nyɔŋma maŋtsɛyeli lɛ etsi ehe kɛjɛ Maŋtsɛ David odehei awe lɛ ni yɔɔ Yuda akutso lɛ mli lɛ he. No hewɔ lɛ Yerusalem maŋtiase lɛ ji nɔ ni Ashur maŋtsɛ lɛ te shi ewo koni eba ehe shi eha lɛ kwraa kɛji akɛ esumɔɔɔ ni akpata ehiɛ kwraa lɛ. Shi Yehowa wuu eha Yuda maŋtsɛyeli lɛ ni eha Maŋtsɛ Sanherib hepupuulɔ lɛ jo foi kɛtee emaŋ yɛ hiɛshishwiemɔ mli ni áye enɔ kunim.​—Yesaia, yitsei 36 kɛ 37.

11. Mɛɛ jeŋ hewalɛ maŋtsɛ nɔ atsɔ abutu Yuda maŋtsɛyeli lɛ, ni Yesaia 27 wieɔ nii ni ba nɛɛ he yɛ mɛɛ gbɛ nɔ?

¹¹ No hewɔ lɛ akɛ hegbɛ ha jeŋ hewalɛ ni nyiɛ sɛɛ ba lɛ, Babilonia Jeŋ Hewalɛ lɛ, koni ekpata maŋ krɔŋkrɔŋ Yerusalem kɛ esɔlemɔwe lɛ hiɛ. Taakɛ Biblia lɛ tsɔɔ lɛ, enɛ ba mli yɛ afi 607 D.Ŋ.B., yɛ Maŋtsɛ Nebukadnezar hewalɛ shishi. Lɛ ji mɔ ni kɛ nomii tee Babilonia shikpɔŋ lɛ nɔ, ni amɛya hi shi yɛ jɛmɛ afii 70 akɛ mɛi ni atswa amɛnaneshi tu. No hewɔ lɛ Yerusalem hiɛkpatamɔ ni baa lɛ kɛ nomii ni aaaŋɔ amɛ kɛya Babilonia nyɔŋyeli mli afii 70 lɛ hewɔ ni atee sanebimɔi ni sa jogbaŋŋ nɛɛ ashi lɛ:

“Ani eyi lɛ [Israel maŋ lɛ] tamɔ bɔ ni eyi mɛi ni yi lɛ lɛ?” (Yesaia 27:​7, NW)

Be ko bako yɛ maŋ lɛ yinɔsane mli kɛjɛ afi 1513 D.Ŋ.B., ni akɛ amanehulu ni tamɔ nɔ ni akɛyi lɛ yɛ afi 607 D.Ŋ.B., yii ni shwɛ sharao kulɛ ebule maŋ lɛ shishi lɛ eyi lɛ nakai da. Mɛi ni gboi yɛ Yerusalem ni ji maŋ ni awo he ka lɛ mli lɛ fa babaoo diɛŋtsɛ. Hɛɛ, Yehowa na akɛ nifeemɔ ni naa wa nɛɛ he miihia, ni esa akɛ otsu he nii. Ena bɔ ni ehe hiaa waa akɛ ekɛ mɛi ni esa akɛ kulɛ amɛhiɔ shi akɛ enanemɛi, mɛi ni amɛkɛ lɛ ebabɔ naanyo, ni amɛkɛ lɛ ebote Mla kpaŋmɔ kɛtsɔ Mose ni ji teŋdamɔlɔ lɛ nɔ lɛ aye aha.

12. No hewɔ lɛ mɛɛ sane Yehowa baanyɛ ekɛ emumɔ atsirɛ gbalɔ Yesaia ni ebi yɛ Israel niiashikpamɔ lɛ he, no hewɔ lɛ mɛni bafee wekukpaa ni baka Israel kɛ Yehowa teŋ?

¹² No hewɔ lɛ Yehowa baanyɛ abi ekoŋŋ akɛ:

“Aloo egbe lɛ [Israel loo Yakob maŋ lɛ] tamɔ bɔ ni agbe mɛi ni gbe lɛ lɛ?” (Yesaia 27:​7, NW)

Ah, hɛɛ, agbɛnɛ ehe ebahia ni Yehowa kɛ etsutsu webii ni he ko lɛ eduromɔ yɔɔ amɛnɔ lɛ aye, no hewɔ lɛ ewo lele ko nɔ, “bolɔmɔ ko ni woɔ mɔ he gbeyei” ni jɛ Babilonia Jeŋ Hewalɛ lɛ, nɔ ni ji etɛ yɛ Biblia yinɔsane mli lɛ asraafoi lɛ ŋɔɔ. No hewɔ ni wiemɔ ni jɛ ŋwɛi nɛɛ je kpo akɛ:

“Bolɔmɔ ko ni woɔ mɔ he gbeyei naa okɛ lɛ baaye yɛ beni oshwieɔ lɛ lɛ. Ekɛ ekɔɔyɔɔ ni naa wa lɛ aaaloo lɛ kɛaaya yɛ gbi ni boka kɔɔyɔɔ lɛ tswaa lɛ [ni ekɛtsɔɔ he ni gbɛ ni bolɔmɔ ko ni naa wa lɛ baajɛ kɛba].” (Yesaia 27:​8, NW)

Shishijee nifeemɔ ni tamɔ nɛkɛ nɔ ebaatsɔ eshwie maŋ ni yeee anɔkwale ni be ko lɛ amɛji emfoniri feemɔ mli ŋa kɛha lɛ ákɛ egbɛjianɔtoo ni anaa yɛ shikpɔŋ nɔ lɛ. Agbɛnɛ eeshwie lɛ kɛmiijɛ shikpɔŋ ni Nyɔŋmɔ kɛha lɛ lɛ nɔ ni ekɛ amɛ ewo Babilonia kunimyelɔi lɛ adɛŋ koni akɛ amɛ aya shikpɔŋ ko ni yɔɔ shɔŋŋ nɔ, tamɔ yoo ni ewu eshwie lɛ be fioo ko.​—Okɛto Yesaia 50:1 he.

13. No hewɔ lɛ, taakɛ Yesaia gbalɛ lɛ tsɔɔ lɛ, mɛɛ gbɛ nɔ Israel maŋ lɛ baatsɔ atsumɔ enɔsha ni eba yɛ Nyɔŋmɔ kpaŋmɔ lɛ mli ni eku lɛ hewɔ?

¹³ Agbɛnɛ be eshɛ ni esa akɛ Israel loo Yakob maŋ lɛ asha afɔle ni ekɛjie “enɔsha” lɛ yɛ gbɛ ni jara wa waa nɔ fe kooloi ni akɛ amɛ shaa afɔle yɛ Yerusalem sɔlemɔtsu lɛ mli afɔleshaa latɛ lɛ no lɛ. Enɛ ji nɔ ni Yehowa tsɔɔ akɛ tsabaa kɛha egbɛjianɔtoo ni tamɔ ŋa lɛ, akɛ:

“No hewɔ lɛ enɛ nɔ abaatsɔ atsumɔ Yakob nɔsha lɛ, ni yibii fɛɛ ni ehe esha lɛ jiemɔ lɛ wo lɛ nɛ, beni ehaa afɔleshaa latɛ lɛ he tɛi lɛ fɛɛ tsɔmɔɔ tamɔ kaaloo tɛi ni efufulu lɛ, ni wɔŋkooi lɛ kɛ tsofakɛŋma shaa nibii lɛ mamɔŋ shi dɔŋŋ.” (Yesaia 27:​9, NW)

Mɛɛ ŋwɛi mlifu loo mlila kpojiemɔ nɛkɛ gbalɛ nɛɛ mlibaa baaji yɛ gbɛ ni ja nɔ nɛkɛ! Wɔŋkooi lɛ kɛ tsofakɛŋma shãa nibii lɛ damɔŋ shi dɔŋŋ yɛ emaŋbii ni akã amɛhiɛ lɛ ateŋ.

14. Mɛɛ amaŋfo abaaha Israel shikpɔŋ lɛ atsɔ, ni ákɛ okadi tso lɛ, te abaatsu edalɛ lɛ he nii aha tɛŋŋ?

¹⁴ Yɛ be mli ni etsɔɔ amaŋfofeemɔ ni akɛbaaha nɛkɛ maŋ ni tamɔ mfoniri-feemɔ mli ŋa kɛha lɛ lɛ nɔ lɛ, Yehowa kɛfata he akɛ:

“Ejaakɛ maŋ ni atswa gbogbo awo he lɛ aaatsɔ amaŋfo, aaashi lɛɛhe lɛ afɔ shi ni akwa tamɔ ŋa nɔ.”

Be ko shikpɔŋ ni gbɔmɛi pii yɔɔ nɔ lɛ baafee nɔ ni mɔ ko mɔ ko bɛ nɔ, ebaatsɔ tamɔ ŋa nɔ yɛ be ko mli.

“Tsinabii aaaye nii yɛ jɛi, ni [Yehowa, kɛtsɔ mɔ ni feɔ nii haa lɛ lɛ nɔ lɛ] amɛaaye ebaai lɛ. Kɛ eniji Iɛ gbi lɛ, aaakumɔ; yei hu baaba abalɛ lai yɛ jɛi ayashã.” (Yesaia 27:​10, 11)

No hewɔ lɛ abaaha Yehowa maŋ ni tamɔ mfoniri-feemɔ mli ŋa kɛha lɛ lɛ shi ni etsɔ tamɔ tso ni egbi ni afolɔɔ akɛfeɔ lai ashãa, ni yei ni he waaa lɛ po baaloo nɔ fɛɛ nɔ ni eshwɛ yɛ nɔ lɛ aha amɛhe. Mɛɛ shi ni abaa mɔ ni yɔɔ mɔbɔ enɛ aaaji aha Israel asafo ni tamɔ mfoniri-feemɔ mli ŋa lɛ nɛkɛ! Shi mɛni hewɔ esa akɛ Nyɔŋmɔ ni tamɔ wu, Yehowa, atsɔ gbɛ ni mli wa ni akɛkumɔɔ mɔ nɛɛ nɔ? Bo toi:

15. Yɛ bɔ ni Yehowa kɛ amɛ ye yɛ gbɛ krɛdɛɛ nɔ hewɔ lɛ, kulɛ mɛɛ gbɔmɛi nɛkɛ esa akɛ Israel maŋ lɛ atsɔ, shi mɛni hewɔ amɛbatsɔmɔ tamɔ maji ni jaa amagai lɛ?

¹⁵ “Ejaakɛ amɛjeee maŋ ko ni kɔɔ sane sɛɛ. Hewɔ lɛ e-Feelɔ lɛ musuŋ etsɔŋ lɛ yɛ amɛhe; ni e-Shɔlɔ lɛ enaŋ amɛ mɔbɔ.”

Yɛ gbɛjianɔ fɛɛ ni Yehowa to kɛha esafo lɛ tsɔsemɔ kɛ hiɛtɛjemɔ yɛ naakpɛɛ gbɛ nɔ nɛɛ hewɔ lɛ, kulɛ esa akɛ Israelbii Iɛ afee gbɔmɛi ni yɔɔ nilee babaoo. Esa akɛ amɛle nii ni amɛkɔ sane sɛɛ bɔ ni sa ni aaaha amɛyoo jwɛŋmɔ ni bɛ amaga jamɔ ni jeŋmaji ni leee nɔ ko nɔ ko ni yɔɔ kpaŋmɔ wekukpaa ni ka amɛ kɛ Yehowa, anɔkwa Nyɔŋmɔ hiɛkalɔ kome lɛ teŋ lɛ sɛɛ lɛ diɔ sɛɛ lɛ mli. Shi akɛni amɛnaaa amɛ ŋwɛi Feelɔ kɛ Shɔlɔ lɛ hewɔ lɛ, amɛlaaje hemɔkɛyeli, ni amɛhala moŋ akɛ amɛaaadi nyɔŋmɔi ni adesai kɛ amɛniji fee amɛ ni amɛnaa amɛ lɛ asɛɛ kɛha amɛ diɛŋtsɛ amɛshigbeemɔ. No hu tsɔɔ nɔ hewɔ ni ejie duromɔ kɛ ŋwɛi mɔbɔnalɛ kɛjɛ nɛkɛ gbɔmɛi ni sumɔɔ ni amɛfee amɛtsuinaa nii lɛ ahe kɛtee Iɛ.

Kpɔmɔ Kɛmiijɛ Nomŋɔɔ Mli

16. Bɔni afee ni enyɛ esaa ewebii Iɛ ekoŋŋ Iɛ, ehe baahia ni Yehowa agbala ejwɛŋmɔ kɛya mɛni nɔ?

¹⁶ No hewɔ lɛ agbɛnɛ, bɔni afee ni esaa amɛ ni eŋɔ amɛ ewo ejamɔ mli yɛ amɛshikpɔŋ nɔ ekoŋŋ lɛ, ehe baahia ni Yehowa agbala ejwɛŋmɔ kɛya Babilonia shikpɔŋ ni “Faa” kpeteŋkpele, Eufrate hoɔ yɛ nɔ lɛ nɔ. Ebaagbele ejwɛŋmɔ kɛya wuoyigbɛ, kɛya Mizraim shikpɔŋ nɔ lɛ gbɛ, ejaakɛ hei ni tamɔ nɛkɛ aŋɔ ewebii lɛ anom kɛtee yɛ amɛtoigbalamɔ lɛ hewɔ. Yɛ enɛ hewɔ lɛ esa akɛ Yehowa aha eyiŋtoo ni ejaje lɛ aba mli:

“Ni aaaba mli yɛ nakai gbi lɛ nɔ akɛ Yehowa aaatserɛ eyibii lɛ kɛaajɛ Eufrate Faa lɛ naa kɛyashi Mizraim Faa lɛ naa [yɛ Shiwoo Shikpɔŋ lɛ wuoyi-anaigbɛ) , lɛ nyɛ Israelbii lɛ aaakɔlɔnyɛ ekomekome.”​—Yesaia 27:​12; ekɛto 4 Mose 34:​2, 5 he.

17. Te fee tɛŋŋ ni Yehowa tserɛ ewebii lɛ kɛjɛ amɛ nomŋɔɔ shihilɛ lɛ mli hu, ni kɛtsɔ mɛni nɔ?

¹⁷ Bɔni afee ni Yehowa akpɔ ewebii lɛ kɛba amɛshikpɔŋ nɔ ekoŋŋ yɛ Yuda lɛ, esa akɛ ekumɔ loo etserɛ mɛi ni aŋɔ amɛ nom lɛ tamɔ yibii koni ekɛŋmɛɛ amɛhe. Efee nakai kɛtsɔ Babilonia jeŋ hewalɛ lɛ ni ebutu lɛ ni ekɛ Media kɛ Persia Maŋtsɛyeli lɛ ni ji Biblia yinɔsane mli jeŋ hewalɛ ni ji ejwɛ lɛ ba lɛ nɔ. Akpɔ ni Persia maŋtsɛ, Koresh kpeteŋkpele lɛ wo yɛ enɔyeli be lɛ shishijee lɛ ji nɔ ni ekɛha ákɛ akpɔ̃ Yehowa webii ni yɔɔ nomŋɔɔ mli lɛ koni amɛku amɛsɛɛ amɛya he ni blema Yerusalem yɔɔ lɛ ni amɛyasaa amɛtswa Yehowa sɔlemɔtsu lɛ. Nɛkɛ sɛɛkuu nɛɛ ba yɛ Yudafoi lɛ anomŋɔɔ afi ni ji 70 lɛ nɔ, yɛ afi 537 D.Ŋ.B.​—Yesaia 45:​1-7.

18. Mɛni baanyɛ afee mɛi ni aŋɔ amɛ nom Iɛ asubaŋ yɛ be mli ni awo akpɔ akɛ aŋmɛɛ amɛhe Iɛ?

¹⁸ Israelbii ni áka amɛhiɛ loo atsɔse amɛ ni yɔɔ Babilonia, kɛ agbɛnɛ Ashur kɛ Mizraim lɛ ji Yehowa nii, ni eyɛ hegbɛ akɛ etserɛɔ amɛ tamɔ okadi yibii loo aduawai kɛjɛɔ nomŋɔɔ mli ni agbɛ amɛ ashwa ni jeee yɛ amɛsuɔmɔnaa lɛ mli, koni ena amɛ mɔbɔ, eduro amɛ. Oh, kwɛ bɔ ni nakai blema Israelbii lɛ amli baashɛ amɛhe aha yɛ nakai akpɔ ni Koresh wo lɛ hewɔ, ni kwɛ ekãa ni amɛbaajie lɛ kpo yɛ nakai hegbɛ ni yɔɔ nyam ni amɛnine shɛ nɔ lɛ fɛɛ ŋɔɔ mli! Belɛ mɛni yɔɔ ni abaawie yɛ nakai “gbi” ni kɛ hiɛnɔkamɔ haa lɛ he?

19. (a) Agba akɛ Israelbii ni agbɛ amɛ ashwa Ashur kɛ Mizraim lɛ baakula shi aha namɔ? (b) Mɛni ji nɔ ni enɛ baatsɔɔ yɛ Yehowa jamɔ yɛ he ni sɔlemɔtsu lɛ yɔɔ kɛjɛ shishijee lɛ he, ni mɛni enɛ tsɔɔ kɛhaa ŋmɛnɛŋmɛnɛ beaŋ mumɔŋ maŋ ko?

¹⁹ “Ni aaaba mli yɛ nakai gbi lɛ nɔ akɛ, aaakpa tɛtrɛmantrɛ wulu, ni mɛi ni hiɛ kpataa yɛ Ashur shikpɔŋ lɛ nɔ kɛ mɛi ni agbɛ amɛ ashwa Mizraim shikpɔŋ lɛ nɔ lɛ aaaba, ni amɛaabukula shi amɛha Yehowa yɛ gɔŋ krɔŋkrɔŋ lɛ nɔ yɛ Yerusalem.” (Yesaia 27:13) Mɛni po ji nɔ ni enɛ tsɔɔ fe Shiwoo Shikpɔŋ lɛ ni gbɔmɛi aaahi nɔ ekoŋŋ, ni aku sɛɛ atswa Yerusalem sɔlemɔtsu lɛ, ni asaa lɛ ekoŋŋ eha Israel maŋ ni átee lɛ shi lɛ Shɔlɔ kɛ Feelɔ lɛ jamɔ? Esa akɛ enɛ aba mli yɛ gbalɔ lɛ wiemɔi ni teɔ hiɛ ni yɔɔ kuku 6 lɛ naa. Esa akɛ ewebii ni aku sɛɛ akɛ amɛ eba lɛ ashikpɔŋ lɛ afee nɔ ni maŋbii eyi nɔ obɔ, ni amɛkɛ amɛhe ewo ejamɔ mli yɛ ekomefeemɔ mli yɛ esɔlemɔwe lɛ, eyɛ mli akɛ ekolɛ jamɔ he ni esaa nɛɛ bɛ fɛo tamɔ sɔlemɔtsu fɛfɛo ni Maŋtsɛ Salomo ma lɛ. Belɛ nɔ ni efeɔ he mfoniri yɛ ŋmɛnɛŋmɛnɛ beaŋ ji emlibaa yɛ mumɔŋ ni kɔɔ “Nyɔŋmɔ Israel” ni kɛ yibii ni haa wala, aloo “nibaa nii” woɔ “je lɛŋ obɔ tɔ” lɛ ahe.​—Galatabii 6:​16; Yesaia 27:​6, NW.b

[Shishigbɛ niŋmai]

Te Ohaa Hetoo Tɛŋŋ?

◻ Mɛɛ be ni mɛɛ gbɛ nɔ “ayi” heloo naa Israel taakɛ Yesaia 27:7 gba fɔ shi lɛ?

◻ Te fee tɛŋŋ ni Israel “tsɛrɛ fai” lɛ? (Yesaia 27:​2, 6)

Namɛi haa gbalɛ ni yɔɔ Yesaia yitso 27 lɛ baa mli ŋmɛnɛ lɛ?

◻ Yɛ mɛɛ gbɛ nɔ mɛnɛɛmɛi ebatsɔ tamɔ “weintrom fɛfɛo” ni woɔ yibii?

[Mfoniri ni yɔɔ baafa 24]

Yehowa tsɔ Babiloniabii lɛ anɔ egbala amɛtoi waa yɛ 607 D.Ŋ.B.