Mumɔŋ Daatɔlɔi Lɛ—Namɛi Ni?
“Kpoo ha Efraim daatɔlɔi lɛ ahewoo akekre lɛ.”—YESAIA 28:1.
1. Mɛɛ nɔ kpakpa he gbɛkpamɔ ko mɛi babaoo yɔɔ, shi ani amɛhiɛnɔkamɔ lɛ baaba mli?
BE Nl kanyaa henumɔ mli wɔyɔɔ lɛ. Tsakemɔi ni eba trukaa yɛ maŋkwramɔŋ yɛ je lɛŋ hei sɔrɔtoi fɛɛ kɛ bɔ ni anaa ni Jeŋmaji Ekomefeemɔ lɛ kɛ ehe ewo mli lɛ esa mɛi pii ahenumɔi ahe waa diɛŋtsɛ. Yɛ December 1989 mli lɛ, Detroit Free Press lɛ kɛɛ: “Amrɔ nɛɛ ni shibɔlemɔ ŋulami lɛ heɔ abote 1990 afi lɛ amli lɛ, toiŋjɔlɛ eba he fɛɛ he.” Soviet loo Russia wolo tɛtrɛɛ ko tswa adafi akɛ: “Wɔmiisaa wɔhe agbɛnɛ ni wɔkɛ wɔklantei asɔ̃ kɔii,” ni Jeŋmaji Ekomefeemɔ lɛ nɔkwɛlɔ-nukpa lɛ hu jaje akɛ: “Wɔbɛ ta ni awuuɔ yɛ dujiaŋ loo ta naŋii lɛ mli dɔŋŋ.” Hɛɛ, hiɛnɔkamɔ lɛ etee hiɛ, ni ŋwanejee ko bɛ he akɛ, je lɛ shikamɔ miitsake. Ni ta ni awuu nyɛsɛɛ nɛɛ nɔŋŋ, ni ji Gulf ta lɛ efee bɔ ni tsakemɔi baanyɛ aba oyayaayai lɛ he mfoniri. Shi ani jeŋ ni yɔɔ ŋmɛnɛ nɛɛ baanyɛ ana toiŋjɔlɛ kɛ shweshweeshwe shihilɛ be diɛŋtsɛ, kɛ sɛɛnamɔi ni jɛɔ mli baa lɛ hu? Hetoo lɛ ji dabi. Yɛ anɔkwale mli lɛ, amrɔ nɛɛ jaramɔ shihilɛ ko ni hiɛdɔɔ yɔɔ he waa ni baahoso je lɛ kɛyashi eshishitoo he tɔɔ lɛ miije shishi fiofio! Eji jaramɔ shihilɛ ko ni jamɔ kɛ ehe ewo mli vii diɛŋtsɛ.
2. Mɛɛ gbɛ nɔ afee shihilɛ ni yɔɔ ŋmɛnɛ lɛ he mfoniri yɛ blema Israel kɛ Yuda yɛ?
2 Afee nɛkɛ jaramɔ shihilɛ nɛɛ he mfoniri kɛtsɔ nibii ni ba yɛ blema Israel kɛ Yuda, yɛ afii ohai kpaanyɔ kɛ kpawo D.Ŋ.B. lɛ mli lɛ nɔ. Yɛ nakai beaŋ tɔ̃ɔ hu lɛ, gbɔmɛi lɛ susu akɛ amɛnine enyɛ eshɛ toiŋjɔlɛ nɔ. Shi Nyɔŋmɔ tsɔ egbalɔ Yesaia nɔ ebɔ amɛ kɔkɔ akɛ toiŋjɔlɛ he hiɛnɔkamɔ ni amɛyɔɔ lɛ ji lakamɔ nɔ, ni etsɛŋ ni abaakpa he mama ni ana faŋŋ. Yɛ nakai gbɛ nɔ nɔŋŋ hu lɛ, Yehowa miitsɔ e-Dasefoi lɛ anɔ eebɔ adesai akɔkɔ ŋmɛnɛ akɛ kɛji amɛhiɛ ka nɔ akɛ amɛnine baashɛ toiŋjɔlɛ ni sɛɛ tsɛɔ nɔ kɛtsɔ adesai amɔdɛŋbɔɔ nɔ lɛ, no lɛ amɛmiilaka amɛhe. Nyɛhaa wɔkanea Yehowa kɔkɔbɔɔ gbalɛ lɛ ni wɔkwɛa bɔ ni ekɔɔ nibii ni yaa nɔ ŋmɛnɛ lɛ ahe ehaa. Ejeɔ kpo yɛ Yesaia yitso 28 lɛ mli, ni aŋma dani afi 740 D.Ŋ.B. shɛ, ekolɛ yɛ Israel Maŋtsɛ Peka yiwalɔ lɛ kɛ Yuda Maŋtsɛ Ahaz ni gba afa lɛ nɔyeli bei amli.
“Efraim Daatɔlɔi Lɛ”
3. Mɛɛ heguɔgbee wiemɔ ni haa mɔ he jɔ̃ɔ ehe Yesaia jaje?
3 Yɛ kuku 1 yɛ yitso 28 Yes 28:1 lɛ, wiemɔ ni haa mɔ he jɔ̃ɔ lɛ nɛɛ hosoɔ wɔ: “Kpoo ha Efraim daatɔlɔi lɛ ahewoo akekre lɛ, kɛ enunyam fɔfɔi fɛfɛo ni ŋalaa, ni yɔɔ mɛi ni etɔrɔ kɛ wein lɛ ajɔɔ ni baa nii lɛ ayiteŋ lɛ!” Kwɛ bɔ ni Israelbii lɛ ahiɛ aaafee amɛ yaa aha akɛ amɛaanu nakai heguɔgbee wiemɔ ni mli wa ni awie ashi amɛ lɛ! Namɛi ji nɛkɛ “Efraim daatɔlɔi” nɛɛ? Mɛni ji amɛ “hewoo akekre lɛ”? Ni mɛni ji “jɔɔ ni baa nii lɛ yiteŋ lɛ”? Ni nɔ ni he hiaa fe fɛɛ lɛ, mɛni nakai wiemɔi lɛ tsɔɔ kɛhaa wɔ ŋmɛnɛ?
4. (a) Mɛɛ hei ji Efraim kɛ jɔɔ ni baa nii lɛ yiteŋ lɛ? (b) Mɛni hewɔ ni Israel nu he akɛ eyɛ shweshweeshwe lɛ?
4 Akɛni Efraim ji Israel akutsei nyɔŋma lɛ ateŋ nɔ ni da fe fɛɛ hewɔ lɛ, bei komɛi lɛ wiemɔ “Efraim” lɛ kɔɔ kooyigbɛ maŋtsɛyeli lɛ fɛɛ he kutuu. No hewɔ lɛ “Efraim daatɔlɔi lɛ” ji Israel daatɔlɔi lɛ diɛŋtsɛ. Israel maŋtiase ji Samaria, ni ato ama he grɔŋŋ ko ni abuɔ waa yɛ jɔɔ ni baa nii lɛ yiteŋ lɛ. No hewɔ lɛ nakai wiemɔ “jɔɔ ni baa nii lɛ yiteŋ” lɛ kɔɔ Samaria he. Beni aŋma nɛkɛ wiemɔi nɛɛ lɛ, no mli lɛ Israel maŋtsɛyeli lɛ ekpɔtɔ kɛ aawie yɛ jamɔ gbɛfaŋ. Ni nɔ ni fe fɛɛ lɛ, ekɛ Siria efee maŋkwramɔŋ kpaŋmɔ kɛte shi ewo Yuda, ni no hewɔ lɛ enuɔ he akɛ eyɛ shweshweeshwe (Yesaia 7:1-9) Shi nakai shihilɛ lɛ baatsake yɛ be fioo ko sɛɛ. Jaramɔ shihilɛ ko miibɛŋkɛ, ni no hewɔ ni Yehowa jaje akɛ “kpoo ha Efraim daatɔlɔi lɛ ahewoo akekre lɛ.”
5. (a) Mɛni ji Israel hewoo akekre lɛ? (b) Namɛi ji Efraim daatɔlɔi lɛ?
5 Mɛni ji “hewoo akekre lɛ”? Akekre feɔ odehe loo lumɔyeli hegbɛ ni ayɔɔ he okadi. Eka shi faŋŋ akɛ, “hewoo akekre lɛ” ji hegbɛ ni Israel yɔɔ akɛ maŋtsɛyeli ni etse ehe, ni eye ehe kɛjɛ Yuda nɔyeli shishi lɛ. Shi nɔ ko baaba ni baakpata Israel odeheyeli ni ji eheyeli lɛ hiɛ. Belɛ, namɛi ji “Efraim daatɔlɔi lɛ” mɔ? Ŋwanejee ko bɛ he akɛ, daatɔlɔi diɛŋtsɛ ni ale amɛ yɛ Israel, ejaakɛ Samaria ji he ko ni akɛ he woɔ wɔŋjamɔ he bɔlɛnamɔ mli waa yɛ. Shi kɛlɛ, Biblia lɛ wieɔ daatɔɔ kroko ni ehiii kwraa ko he. Wɔkaneɔ yɛ Yesaia 29:9 akɛ: “Amɛtɔrɔ dãa, shi jeee kɛ wein; amɛmiididãa, shi jeee kɛ dãa ni wa.” Mumɔŋ daatɔɔ nɛ, daatɔɔ ni he tseee, nɔ ni kɛ gbele baa. Eyɛ faŋŋ akɛ Israel hiɛnyiɛlɔi lɛ—titri lɛ ejamɔ mli hiɛnyiɛlɔi lɛ—na amanehulu babaoo yɛ mumɔŋ daatɔɔ ni tamɔ nɛkɛ mli.
6. Mɛni ha blema Israel tɔ daa lɛ?
6 Mɛni ji nɔ ni kɛ blema Israel mumɔŋ daatɔɔ lɛ ba? Klɛŋklɛŋ kwraa lɛ, ejɛ kpaŋmɔ ni ekɛ Siria fee kɛte shi ewo Yuda, ni ha maŋ lɛ hiɛnyiɛlɔi nu he waa akɛ amɛyɛ shweshweeshwe lɛ. Nɛkɛ mumɔŋ daatɔɔ nɛɛ haaa Israel asusu nii ahe yɛ bɔ ni nibii ji diɛŋtsɛ lɛ naa dɔŋŋ. Tamɔ daatɔlɔ diɛŋtsɛ ji lɛ, eekpa nɔ kpakpa ko gbɛ waa, tsɛbelɛ nɔdaamɔ nɔ ko bɛ ni akɛaakpa nɔ ko gbɛ nakai. Kɛfata he lɛ, Israel kɛ nakai edaatɔlɔi akpaŋmɔ ni ekɛ Siria efee lɛ tsɔɔ kɛ hewoo, tamɔ anunyam fai ko. Shi, taakɛ Yesaia kɛɛ lɛ, eji fai ko ni miikwa ni sɛɛ etsɛŋ kwraa.
7, 8. Eyɛ mli akɛ ehiɛ ka nibii kpakpai anɔ moŋ, shi mɛni etsɛŋ ni baaba blema Israel nɔ?
7 Yesaia maa enɛ nɔ mi waa yɛ Yes yitso 28, kuku 2 akɛ: “Naa, Nuŋtsɔ lɛ [Yehowa] yɛ hewalɔ kɛ kakalɔ ko ni tamɔ nyɔŋmɔŋtɛ ni nɛɔ, tamɔ ahum ni kpataa nii ahiɛ, tamɔ nyɔŋmɔnɛmɔ kɛ nu babaoo ni hoɔ luluulu, lɛ ekɛ enine aaaŋɔ amɛ atswia shi!” Namɔ ji nɛkɛ “hewalɔ kɛ kakalɔ” nɛɛ? Yɛ blema Israel beaŋ lɛ, lɛ ji Ashur Jeŋ Hewalɛ ni he wa waa lɛ. Nɛkɛ jeŋ hewalɛ ni yitsoŋ wa, ni enaaa mɔbɔ nɛɛ baaba Israel nɔ tamɔ ahum ni naa wa kɛ nyɔŋmɔnɛmɔ, kɛ nu babaoo ni loɔ nii kɛyaa. Ni mɛni baajɛ mli aba?
8 Yesaia yaa nɔ ekɛɔ akɛ: “Ni Efraim daatɔlɔi ahewoo akekre lɛ, akɛ naji aaanaanaa nɔ; ni enunyam fɔfɔii fɛfɛji ni ŋalaa ni yɔɔ jɔɔ ni baa nii lɛ yiteŋ lɛ aaatsɔ tamɔ agbami ni tsu mra dani shɛ tsulɛ be, ni mɔ fɛɛ mɔ ni aaana lɛ, edɛŋ ni eshɛɔ pɛ lɛ, eye.” (Yesaia 28:3, 4) Israel maŋtiase ni ji Samaria lɛ bafee tamɔ agbami ni etsu, ni esa akɛ atse aye, kɛha Ashur. Ni ebaanaanaa Israel kpaŋmɔ ni tamɔ fɔfɔi fai fɛfɛo ni ekɛ Siria fee lɛ nɔ. Kɛ eshɛ be ni akɛbaabu akɔntaa lɛ, abuŋ lɛ ahaŋ nɔ ko nɔ ko. Nɔ ni ehiii fe fɛɛ lɛ, akɛ ehenyɛlɔ Ashur naji baanaana eheyeli anunyam ni tamɔ akekre fɛfɛo lɛ nɔ. Mɛɛ amanehulu nɛ!
‘Osɔfo kɛ Gbalɔ Fɛɛ Miididaa’
9. Mɛni hewɔ ekolɛ Yuda baakpa gbɛ akɛ enine baashɛ shɛɛ sane ni hi nɔ kɛjɛ Yehowa dɛŋ fe nɔ ni akɛha blema lsrael lɛ?
9 Hɛɛ, akɔntaabuu be ko ni yɔɔ gbeyei miimɛ Israel, ni taakɛ Yehowa Nyɔŋmɔ ebɔ kɔkɔ momo lɛ, nakai akɔntaabuu be lɛ shɛ yɛ afi 740 D.Ŋ.B. beni Ashur bakpata Samaria hiɛ ni kooyigbɛ maŋtsɛyeli lɛ shihilɛ akɛ jeŋmaŋ ni yeɔ ehe nɔ lɛ sɛɛ fo lɛ. Nɔ ni ba blema Israel nɔ lɛ damɔ shi akɛ kɔkɔbɔɔ ni mli wa kɛha epasa jamɔ ni yeee anɔkwa ŋmɛnɛ lɛ, taakɛ bɔ ni wɔbaana lɛ. Shi Israel nyɛmiyoo Yuda, ni ji maŋtsɛyeli ni yɔɔ wuoyigbɛ lɛ hu? Yɛ Yesaia bei amli lɛ, atee nɔ akɛ Yehowa sɔlemɔ tsu ni yɔɔ Yerusalem, ni ji Yuda maŋtiase lɛ mli lɛ tsu nii. Atee nɔ akɛ osɔfoyeli gbɛjianɔtoo lɛ tsu nii yɛ jɛmɛ, ni gbalɔi tamɔ Yesaia, Hoshea, kɛ Mika wie yɛ Yehowa gbɛi amli. Belɛ, mɛɛ shɛɛ sane Yehowa yɔɔ kɛha Yuda?
10, 11. Mɛɛ nyaŋemɔ shihilɛ ko tee nɔ yɛ Yuda?
10 Yesaia yaa nɔ ekɛɔ wɔ akɛ: “Shi mɛnɛɛmɛi hu [ni ji osɔfoi kɛ gbalɔi ni yɔɔ Yerusalem lɛ] miididaa kɛ wein, ni dãa ni wa ewo amɛ sɛkɛ! Osɔfo kɛ gbalɔ fɛɛ miididaa kɛ daa ni wa.” (Yesaia 28:7a) Eka shi faŋŋ akɛ, Yuda jamɔ mli hiɛnyiɛlɔi lɛ hu etɔrɔ dãa. Ekolɛ amɛteŋ mɛi komɛi ji daatɔlɔi diɛŋtsɛ, taakɛ eji yɛ Israel lɛ, ni kɛ nakai ni lɛ, no lɛ eyɛ hiɛgbele. Nyɔŋmɔ Mla lɛ guɔ osɔfoi lɛ daa ni wa numɔ yɛ be mli ni amɛsɔmɔɔ yɛ sɔlemɔ we lɛ. (3 Mose 10:8-11) Daatɔɔ diɛŋtsɛ yɛ Nyɔŋmɔ shia lɛ baafee Nyɔŋmɔ Mla lɛ mlikuu yɛ gbɛ ni haa mɔ he jɔ̃ɔ lɛ nɔ.
11 Ni kɛlɛ, nɔ ni hiɛdɔɔ yɔɔ he fe enɛ ji akɛ, mumɔŋ daatɔɔ yɛ Yuda. Taakɛ bɔ ni Israel kɛ ehe eyakpɛtɛ Siria he kɛte shi ewo Yuda lɛ, nakai nɔŋŋ Yuda hu yatao shweshweeshwe-feemɔ kɛtsɔ kpaŋmɔ ni ekɛ Ashur fee lɛ nɔ. (2 Maŋtsɛmɛi 16:5-9) Eyɛ mli akɛ Nyɔŋmɔ sɔlemɔ we lɛ kɛ egbalɔi lɛ yɛ moŋ, shi Yuda kɛ ehemɔkɛyeli wo adesai amli yɛ nɔ najiaŋ ni esa akɛ ekɛ ehe afɔ Yehowa nɔ. Kɛfata he lɛ, akɛni enyiɛ ŋaawoo gbonyo sɛɛ ni ekɛ ehe eyakpɛtɛ maŋ kroko he hewɔ lɛ, ehiɛnyiɛlɔi lɛ hi shi ni jeee amɛhe sane ji nɔ ko, tamɔ bɔ ni amɛnanemɛi mumɔŋ daatɔlɔi ni yɔɔ kooyigbɛ lɛ ji lɛ. Amɛsubaŋ akɛ mɛi ni nɔ ko jeee amɛhe sane ko lɛ yɛ nyaŋemɔ yɛ Yehowa hiɛ.
12. Mɛni baajɛ Yuda mumɔŋ daatɔɔ lɛ mli aba?
12 Yesaia yaa nɔ ekɛɔ akɛ: “Wein emi amɛ po, daa ewo amɛ sɛkɛ, amɛmiididaa yɛ ninaa mli, amɛmiihaha momo yɛ saneyeli mli. Ejaakɛ okpɔlɔi lɛ fɛɛ nɔ eyimɔ obɔ tɔ kɛ shwee kɛ muji sɔŋŋ, ni gbɛ bɛ dɔŋŋ.” (Yesaia 28:7b, 8) Ekolɛ, kɛ amɛtɔrɔ daa lɛ, amɛteŋ mɛi komɛi shweɔ diɛŋtsɛ yɛ sɔlemɔ we lɛ. Shi nɔ ni ehiii fe fɛɛ ji, osɔfoi lɛ kɛ gbalɔi lɛ, ni kulɛ esa akɛ amɛkɛ jamɔ mli gbɛtsɔɔmɔ aha lɛ shweɔ mumɔŋ muji nibii amɛshwieɔ shi. Kɛfata he lɛ, yɛ mɛi fioo ko ni ji anɔkwafoi lɛ asɛɛ lɛ, kojomɔi ni gbalɔi lɛ kɛhaa lɛ etsɔ afa, ni amɛtsɔɔ hiɛ amɛnaa amale nibii amɛhaa maŋ lɛ. Yehowa baagbala Yuda toi waa yɛ nɛkɛ mumɔŋ mujiwoo nɛɛ hewɔ.
Mumɔŋ Daatɔlɔi Ŋmɛnɛ
13. Mɛɛ shihilɛ ni tamɔ Israel kɛ Yuda nɔ lɛ hi shi yɛ Ŋ.B. klɛŋklɛŋ afii oha lɛ mli, ni mɛɛ shihilɛ ni tamɔ nakai yɔɔ ŋmɛnɛ?
13 Ani Yesaia gbalɛi lɛ ba mli yɛ blema Israel kɛ Yuda pɛ nɔ? Dabida. Yesu kɛ bɔfo Paulo fɛɛ tsɛ ewiemɔi ni kɔɔ mumɔŋ daatɔɔ he lɛ asɛɛ ni amɛkɛto jamɔ mli hiɛnyiɛlɔ ni yɔɔ amɛbeaŋ lɛ ahe. (Yesaia 29:10, 13; Mateo 15:8, 9; Romabii 11:8) Ŋmɛnɛ hu, shihilɛ ni tamɔ nɔ ni hi shi yɛ Yesaia beaŋ lɛ eko ete shi—shi amrɔ nɛɛ yɛ Kristendom, jeŋ muu fɛɛ jamɔ gbɛjianɔtoo ni kɛɔ akɛ edamɔ Nyɔŋmɔ najiaŋ lɛ mli. Yɛ nɔ najiaŋ ni eeekɔ shidaamɔ ni yɔɔ shiŋŋ eha anɔkwale lɛ ni ekɛ ehe afɔ Yehowa nɔ moŋ lɛ, Kristendom, Katolekbii kɛ Protestantbii fɛɛ kɛ amɛhemɔkɛyeli woɔ je lɛ mli. No hewɔ lɛ eedidaa kɛmiiya kɛmiiba, tamɔ daatɔlɔi ni hi Israel kɛ Yuda lɛ didaa lɛ. Mumɔŋ daatɔlɔi ni hi nakai blema maji lɛ amli lɛ feɔ mumɔŋ hiɛnyiɛlɔi ni yɔɔ Kristendom ŋmɛnɛ lɛ ahe mfoniri jogbaŋŋ. Nyɛhaa wɔkwɛa nɔ hewɔ ni amɛfeɔ amɛhe mfoniri pɛpɛɛpɛ lɛ.
14. Mɛɛ gbɛ nɔ Kristendom jamɔ mli hiɛnyiɛlɔi lɛ etɔrɔ daa tamɔ bɔ ni blema Samaria kɛ Yerusalem hiɛnyiɛlɔi lɛ tɔrɔ daa lɛ nɔŋŋ yɛ?
14 Taakɛ Samaria kɛ Yerusalem fee lɛ, Kristendom hu enu maŋkwramɔŋ kpaŋmɔi awein lɛ babaoo. Yɛ 1919 lɛ, efata mɛi ni nyiɛ hiɛ ni ato Jeŋmaji Akpaŋmɔ lɛ ama shi lɛ ahe. Yɛ be mli ni Yesu ekɛɛ akɛ Kristofoi efeŋ je lɛ fa lɛ, Kristendom hiɛnyiɛlɔi lɛ haa wekukpaa ni ka amɛkɛ maŋkwramɔŋ hiɛnyiɛlɔi lɛ ateŋ lɛ yaa hiɛ. (Yohane 17:14-16) Nɛkɛ nifeemɔ nɛɛ he mfonirifeemɔŋ wein lɛ kanyaa osɔfoi lɛ waa. (Okɛto Kpojiemɔ 17:4 he.) Amɛnaa miishɛɛ waa akɛ maŋkwralɔi lɛ babibiɔ amɛ saji, ni amɛkɛ je lɛŋ mɛi wuji lɛ bɔɔ naanyo. Nɔ ni ejɛ mli eba ji, amɛbɛ anɔkwa mumɔŋ gbɛtsɔɔmɔ ko ni amɛkɛaaha. Yɛ nɔ najiaŋ ni amɛaawie wiemɔ krɔŋŋ ni ji anɔkwale lɛ moŋ lɛ, amɛshweɔ muji nii amɛshwieɔ. (Zefania 3:9) Akɛni amɛhiŋmɛii anɔ tseee ni amɛyiŋ efutu hu hewɔ lɛ, amɛjeee gbɛtsɔɔlɔi ni yɔɔ shweshweeshwe kɛha adesai.—Mateo 15:14.
“Mla Nyiɛ Mla Sɛɛ”
15, 16. Mɛɛ gbɛ nɔ Yesaia beaŋ bii lɛ here ekɔkɔbɔɔ wiemɔi lɛ anɔ yɛ?
15 Yɛ afii ohai kpaanyɔ D.Ŋ.B. lɛ, Yesaia kpa gbɛ ni ejaaa ni Yuda mumɔŋ hiɛnyiɛlɔi lɛ titri ekɔ lɛ he mama. Te amɛfee amɛnii yɛ he amɛha tɛŋŋ? Amɛnyɛ enɛ waa diɛŋtsɛ! Beni Yesaia yaa nɔ lolo yɛ Nyɔŋmɔ kɔkɔbɔi lɛ ajajemɔ mli lɛ, jamɔ mli hiɛnyiɛlɔi lɛ ha lɛ hetoo amrɔ akɛ: “Belɛ namɔ nilee ebaatsɔɔ mɔ? Ni namɔ eeeha enu sane lɛ shishi? Mɛi ni etse fufɔ, loo mɛi ni atse amɛ fufɔ lɛ?” (Yesaia 28:9) Hɛɛ, ani Yesaia susu akɛ ekɛ gbekɛbii bibii miiwie? Yerusalem jamɔ mli hiɛnyiɛlɔi lɛ buɔ amɛhe akɛ hii ni amɛdara, mɛi ni nyɛɔ amɛkpɛɔ amɛ diɛŋtsɛ amɛyiŋ amɛhaa amɛhe jogbaŋŋ. Ehe ehiaaa ni amɛbo kaimɔ wiemɔi ni Yesaia tee nɔ ekɛha amɛ yɛ be kɛ bei amli lɛ toi.
16 Nakai Nyɔŋmɔ jalɔi lɛ tee nɔ amɛye Yesaia shiɛmɔ nitsumɔ lɛ he fɛo po. Ni amɛla amɛha lɛ akɛ: “Ejaakɛ: ‘Mla nyiɛ mla sɛɛ, mla nyiɛ mla sɛɛ; akpɔ nyiɛ akpɔ sɛɛ, akpɔ nyiɛ akpɔ sɛɛ; fioo yɛ biɛ, ni fioo yɛ biɛ hu!’” (Yesaia 28:10) Amɛkɛɛ: ‘Nɔ kometoo lɛ nɔŋŋ Yesaia kɛɔ. Eyaa nɔ ekɛɔ akɛ: “Bɔ ni Yehowa ewo mla nɛ! Bɔ ni Yehowa ewo mla nɛ! Yehowa kita nɛ! Yehowa kita nɛ!’” Yɛ shishijee Hebri wiemɔ mli lɛ, Yesaia 28:10 lɛ tamɔ lalafoo wiemɔ ni atiɔ emli wiemɔi lɛ amli shii abɔ, tamɔ lalai ni atsɔɔ yɛ skul ni akwɛɔ abifabii yɛ lɛ. Nakai pɛpɛɛpɛ gbalɔ lɛ baafee yɛ jamɔ mli hiɛnyiɛlɔi lɛ ahiɛ, mɔ ko ni tiɔ wiemɔ kometoo lɛ nɔŋŋ mli tamɔ gbekɛ ko.
17. Te mɛi pii feɔ amɛnii yɛ kɔkɔbɔɔ shɛɛ sane ni Yehowa Odasefoi jajeɔ lɛ he amɛhaa tɛŋŋ?
17 Yɛ Ŋ.B. klɛŋklɛŋ afii oha lɛ mli lɛ, Yesu kɛ ekaselɔi lɛ ashiɛmɔ lɛ hu baafee tamɔ wiemɔ kometoo lɛ nɔŋŋ ni amɛmiiti mli ni atsakeko lɛ kwraa. Yudafoi ajamɔ mli hiɛnyiɛlɔi lɛ bu mɛi ni nyiɛ Yesu sɛɛ lɛ akɛ mɛi ni alomɔ amɛ, gbɔmɛi ni bɛ nilee ko ni abɔ amɛ apã, gbɔmɛi ni leee wojiaŋ kɛ gbɔmɛi foji ko kɛkɛ. (Yohane 7:47-49; Bɔfoi lɛ Asaji 4:13) Yɛ bei babaoo mli lɛ, abuɔ Yehowa Odasefoi ni yɔɔ ŋmɛnɛ lɛ hu yɛ nakai gbɛ nɔŋŋ nɔ. Amɛyako Kristendom osɔfoi askul ni akɛtsɔseɔ amɛ lɛ eko, ni amɛkɛ sablai wuji loo Nyɔŋmɔ jamɔ mli wiemɔ sɔrɔto ko tsuuu nii tamɔ bɔ ni osɔfoi lɛ feɔ lɛ. No hewɔ lɛ mɛi ni nɔ kwɔlɔ waa yɛ Kristendom lɛ ebuuu amɛ, ni amɛsusuɔ akɛ esa akɛ amɛle hegbɛ ni amɛyɔɔ lɛ ni amɛkɛ bulɛ babaoo aha nɛkɛ jamɔ mli hiɛnyiɛlɔi nɛɛ.
18. Mɛni jamɔ mli hiɛnyiɛlɔi ni yɔɔ ŋmɛnɛ lɛ kuɔ amɛhiɛ amɛshwieɔ nɔ?
18 Shi kɛlɛ, nɔ ko yɛ ni nakai jamɔ mli hiɛnyiɛlɔi lɛ miiku amɛhiɛ amɛmiishwie nɔ. Eyɛ mli akɛ gbɔmɛi ni abuɔ amɛ waa ni hi shi yɛ Yesaia gbii lɛ amli lɛ kpoo eshɛɛ sane lɛ moŋ, shi anɔkwale lɛ ewie etsɔɔ amɛ lɛ, ni ekɔkɔbɔɔ wiemɔi lɛ ba mli anɔkwale! Nakai nɔŋŋ, kɔkɔbɔi ni Yehowa Odasefoi kɛhaa ŋmɛnɛ lɛ ji anɔkwale, ni amɛdamɔ Nyɔŋmɔ Wiemɔ ni ji anɔkwale, Biblia lɛ nɔ shiŋŋ. (Yohane 17:17) No hewɔ lɛ, fɛɛ baaba mli!
Akɔntaabuu Lɛ
19. Mɛɛ gbɛ nɔ anyɛ Yuda nɔ ni efee toiboo eha maŋsɛɛ bii ni wieɔ momohaa wiemɔ lɛ yɛ?
19 Wɔkaneɔ yɛ Yesaia 28:11 akɛ: “Shi momohaa naabu kɛ maŋsɛɛ wiemɔ ekɛaawie etsɔɔ nɛkɛ maŋ nɛɛ.” Yesaia nitsɔɔmɔ lɛ bafee tamɔ maŋsɛɛ wiemɔ ko ni aakpɔtɔ aatsɔɔ Yuda. Eyɛ mli akɛ Yuda je Ashurbii hegbeyeiwoo ni ye Israel nɔ butuu lɛ mli moŋ, shi yɛ be ni sa mli lɛ, Yehowa kɛ Yuda yɛ kɛtsɔ gbɔ kroko ko nɔ, Nebukadnezar. (Yeremia 5:15-17) Babilon wiemɔ lɛ baafee tamɔ wiemɔ ko ni yɔɔ shɛii kɛ momohaa kɛha nakai Hebribii lɛ. Shi anyɛ amɛnɔ ni amɛbo toi beni akpata Yerusalem kɛ esɔlemɔ tsu lɛ hiɛ yɛ afi 607 D.Ŋ.B. ni agbala emlibii lɛ fɛɛ kɛtee Babilon nomŋɔɔ mli lɛ. Nakai nɔŋŋ hu ŋmɛnɛ, etsɛŋ ni Kristendom baana amanehulu, ejaakɛ, taakɛ Yuda ni hi shi yɛ blema lɛ ji lɛ, ekuɔ ehiɛ eshwieɔ Yehowa wiemɔ-kɛ-tsɔɔmɔ lɛ nɔ.
20, 21. Mɛni Yehowa Odasefoi jajeɔ be fɛɛ be ni amɛkpaaa, shi mɛni Kristendom hiɛnyiɛlɔi lɛ ekpoo akɛ amɛaafee?
20 Gbalɛ lɛ wieɔ gbɔmɛi ni tamɔ nɛkɛ lɛ ahe akɛ: “Ejaakɛ ekɛɛ amɛ akɛ: ‘Hejɔɔmɔ nɛ! Nyɛhaa mɛi ni etɔ amɛ lɛ ajɔa amɛhe! Ni tsuiwoo nɛ!’ Shi amɛkpɛlɛɛɛ toiboo. No hewɔ lɛ Yehowa wiemɔi lɛ aaatsɔ ‘mla nyiɛ mla sɛɛ, mla nyiɛ mla sɛɛ; akpɔ nyiɛ akpɔ sɛɛ, akpɔ nyiɛ akpɔ sɛɛ; fioo yɛ biɛ, ni fioo yɛ biɛ hu’ aha amɛ; koni amɛyagbeegbee amɛsɛɛ, ni akumɔ amɛ, ni adũ amɛ, ni amɔmɔ amɛ.”—Yesaia 28:12, 13.
21 Taakɛ bɔ ni Yesaia wie Nyɔŋmɔ shɛɛ sane lɛ ni ekpaaa lɛ, nakai nɔŋŋ Yehowa Odasefoi lɛ hu kɛɔ Kristendom be fɛɛ be ni ekɛ ehiɛ afɔ Yehowa wiemɔ lɛ nɔ. Shi ebooo toi. Odasefoi lɛ bafeɔ tamɔ gbekɛ ko ni miikpɔtɔ maŋsɛɛ wiemɔ ko kɛha lɛ. Amɛwieɔ wiemɔ ni enuuu shishi. Kristendom ekpoo akɛ eeeha mɛi ni etɔ amɛ lɛ ajɔɔ amɛhe kɛtsɔ Nyɔŋmɔ Maŋtsɛyeli lɛ kɛ jeŋ hee ni baa lɛ he saji ni eeewie he etsɔɔ amɛ lɛ nɔ. Yɛ no najiaŋ lɛ, wekukpaa ni ka ekɛ je nɛɛ teŋ lɛ he wein lɛ etɔ lɛ daa waa. Ehalaa moŋ akɛ ebaafi maŋkwramɔŋ tsabaa ni akɛhaa yɛ adesai anaagbai ahe lɛ asɛɛ. Taakɛ Yudafoi ni hi shi yɛ Yesu gbii lɛ amli lɛ fee lɛ, eyataooo Maŋtsɛyeli hejɔɔmɔ-he lɛ ehaaa lɛ diɛŋtsɛ ehe, ni ewieee he etsɔɔɔ mɛi krokomɛi kɔkɔɔkɔ.—Mateo 23:13.
22. Mɛni Yehowa hɛleɔ Kristendom hiɛnyiɛlɔi lɛ ashi yɛ he?
22 No hewɔ lɛ, Yesaia gbalɛ wiemɔi lɛ hɛleɔ osɔfoi lɛ ashi akɛ Yehowa eyaŋ nɔ etsɔŋ E-Dasefoi ni yeee awui ko kwraa lɛ anɔ ewieŋ sɔŋŋ nakai. Etsɛŋ ni Yehowa baatsu “[e]mla nyiɛ mla sɛɛ; akpɔ nyiɛ akpɔ sɛɛ” lɛ he nii, ni nɔ ni baajɛ mli aba lɛ baafee hiɛkpatamɔ eha Kristendom. Ejamɔ mli hiɛnyiɛlɔi lɛ kɛ amɛtooi lɛ, ‘abaakumɔ amɛ, ni adũ amɛ, ni amɔmɔ amɛ.’ Hɛɛ, taakɛ afee blema Yerusalem lɛ, abaakpata Kristendom jamɔ gbɛjianɔtoi lɛ ahiɛ butuu. Mɛɛ nifeemɔ ni haa mɔ he jɔ̃ɔ ehe, nifeemɔ ni akpaaa gbɛ kwraa enɛ aaaji nɛkɛ! Ni mɛɛ gbeyei nii aaajɛ mli aba nɛkɛ, ejaakɛ yɛ nɔ najiaŋ ni osɔfoi lɛ aaasumɔ Yehowa kaimɔi lɛ, amɛsumɔɔ mumɔŋ daatɔɔ moŋ!
Ani Obaanyɛ Otsɔɔ Mii?
◻ Namɛi ji Efraim daatɔlɔi lɛ, ni mɛni ha amɛtɔrɔ daa lɛ?
◻ Mɛɛ gbɛ nɔ anaanaa Efraim daatɔlɔi lɛ ahewoo akekre Iɛ nɔ yɛ?
◻ Mɛɛ shihilɛ ni yɔɔ hiɛgbele ni tee nɔ yɛ Yuda Yesaia kpa he mama lɛ?
◻ Nɛgbɛ wɔnaa mumɔŋ daatɔɔ yɛ ŋmɛnɛ?
◻ Mɛni hewɔ esa akɛ Kristendom abo nɔ ni ba blema Yuda maŋ lɛ nɔ Iɛ toi lɛ?