Yitso Nyɔŋmai Enyɔ Kɛ Enyɔ
Yesaia Gba Yehowa ‘Naakpɛɛ Nii’ lɛ Efɔ̃ Shi
1, 2. Mɛni hewɔ Israel kɛ Yuda nuɔ he akɛ amɛyɛ shweshweeshwe lɛ?
ISRAEL kɛ Yuda nuɔ he yɛ be kukuoo mli akɛ amɛyɛ shweshweeshwe. Amɛhiɛnyiɛlɔi lɛ kɛ jeŋmaji ní dara, ní amɛhe wa fe amɛ lɛ efee maŋkwramɔŋ kpaŋmɔi akɛ amɛkɛmiibɔ mɔdɛŋ ní amɛfee shweshweeshwe yɛ jeŋ ní yɔɔ oshara lɛ mli. Samaria, ni ji Israel maŋtiase lɛ, etsɔ ehe kɛtee Aram ní bɛŋkɛ lɛ lɛ ŋɔɔ, ni Yerusalem, ni ji Yuda maŋtiase lɛ, kɛ ehiɛ efɔ̃ Ashur yiwalɔ lɛ nɔ.
2 Kɛfata amɛhiɛ ní amɛkɛfɔ̃ maŋkwramɔŋ kpaŋmɔi heei ní amɛfee lɛ anɔ lɛ he lɛ, ekolɛ mɛi ni yɔɔ kooyigbɛ maŋtsɛyeli lɛ mli lɛ ateŋ mɛi komɛi baakpa gbɛ akɛ Yehowa baabu amɛhe—yɛ shika tsinabii ní amɛkɛtsuɔ nii lolo yɛ jamɔ mli lɛ fɛɛ sɛɛ. Yuda hu yɛ nɔmimaa nakai nɔŋŋ akɛ ebaanyɛ ekɛ ehiɛ afɔ̃ Yehowa hebuu nɔ. Ejaakɛ, ani jeee Yerusalem, ni ji amɛmaŋtiase lɛ ji he ni Yehowa sɔlemɔtsu lɛ yɔɔ? Shi shihilɛi komɛi ní akpaaa gbɛ jwere maji enyɔ lɛ fɛɛ ahiɛ. Yehowa kɛ mumɔ tsirɛ Yesaia koni egba nifeemɔi ní baatamɔ naakpɛɛ nii diɛŋtsɛ efɔ̃ shi kɛha ewebii ní ekɔ gbɛ fɔŋ lɛ. Ni nikasemɔi ni he yɔɔ sɛɛnamɔ yɛ ewiemɔi lɛ amli kɛha mɔ fɛɛ mɔ ŋmɛnɛ.
“Efraim Dãatɔlɔi Lɛ”
3, 4. Israel kooyigbɛ maŋtsɛyeli lɛ shwãa yɛ mɛni he?
3 Yesaia je egbalɛ lɛ shishi kɛ wiemɔi ní hɛleɔ mɔ shi, akɛ: “Kpóo ha Efraim dãatɔlɔi lɛ ahewoo akekere lɛ, kɛ enunyam fɔfɔi fɛfɛo ní ŋãlãa, ní yɔɔ mɛi ní etɔrɔ kɛ wein lɛ ajɔɔ ní baa nii lɛ yiteŋ lɛ! Naa, [Yehowa, “NW”] lɛ yɛ hewalɔ kɛ kãkãlɔ ko ní tamɔ nyɔŋmɔŋtɛ ní nɛɔ, . . . lɛ ekɛ enine aaaŋɔ amɛ atswia shi! Ni Efraim dãatɔlɔi ahewoo akekere lɛ akɛ naji aaanaanaa nɔ.”—Yesaia 28:1-3.
4 Efraim, ni ji kooyigbɛ akutsei nyɔŋma lɛ ateŋ nɔ ni ehe gbɛi fe fɛɛ lɛ, ebadamɔ shi kɛha Israel maŋtsɛyeli muu lɛ fɛɛ. Emaŋtiase, ni ji Samaria, kã he ko ni yɔɔ fɛo ní gbalaa mɔ jwɛŋmɔ amrɔ nɔŋŋ, yɛ “[jɔɔ] ní baa nii lɛ yiteŋ.” Efraim hiɛnyiɛlɔi lɛ kɛ amɛ ‘hewoo akekere’ ni ji heyeli ní amɛná kɛjɛ David maŋtsɛyeli ni yɔɔ Yerusalem lɛ shishi lɛ shwãa. Shi “dãatɔlɔi” ji amɛ, ni amɛtɔrɔ dãa waa yɛ mumɔŋ yɛ kpaŋmɔ ní amɛkɛ Aram yafee kɛte shi amɛwo Yuda lɛ hewɔ. Etsɛŋ ni tutualɔi anaji baanaanaa nɔ fɛɛ nɔ ní amɛsumɔɔ waa lɛ nɔ.—Okɛto Yesaia 29:9 he.
5. Mɛɛ oshara shihilɛ Israel yɔɔ mli, shi mɛɛ hiɛnɔkamɔ Yesaia kɛhaa amɛ?
5 Efraim yɔseee oshara shihilɛ ní eyɔɔ mli lɛ. Yesaia tee nɔ akɛ: “Enunyam fɔfɔi fɛfɛo ní ŋãlãa ní yɔɔ jɔɔ ní baa nii lɛ yiteŋ lɛ aaatsɔ tamɔ agbami ní tsu mra dani shɛ tsulɛ be, ni mɔ fɛɛ mɔ ní aaana lɛ, edɛŋ ní eshɛɔ pɛ lɛ, eye.” (Yesaia 28:4) Efraim baagbee Ashurbii lɛ adɛŋ, tamɔ atroma kɛ ŋɔɔmɔ ní abaami lɛ shikome. Belɛ, ani hiɛnɔkamɔ ko kwraa bɛ? Ojogbaŋŋ, taakɛ efɔɔ feemɔ lɛ, Yesaia kɛ hiɛnɔkamɔ ba bɔ ni ekojomɔ gbalɛi lɛ amli wa ha lɛ shi. Eyɛ mli akɛ maŋ lɛ baagbee shi moŋ, shi anɔkwafoi aŋkroaŋkroi komɛi ayi baaná wala kɛtsɔ Yehowa yelikɛbuamɔ nɔ. “Yehowa Zebaot aaatsɔ akekere fɛfɛo kɛ anunyam fai eha emaŋ lɛŋ mɛi ní aaashwɛ lɛ, kɛ kojomɔ mumɔ hu ha mɔ ní táa shi kojoɔ lɛ, kɛ hewalɛ hu ha mɛi ní shwieɔ ta kɛyaa agbó naa lɛ.”—Yesaia 28:5, 6.
“Amɛmiididãa”
6. Mɛɛ be Israel kɛ ehiɛkpatamɔ kpe, shi mɛni hewɔ esaaa akɛ Yuda mli filiɔ lɛ yɛ he lɛ?
6 Samaria akɔntaabuu gbi lɛ bashɛ yɛ afi 740 D.Ŋ.B. beni Ashurbii kpata shikpɔŋ lɛ hiɛ kwraa, ni maŋ lɛ shihilɛ ákɛ jeŋmaŋ ní yeɔ lɛ diɛŋtsɛ ehe lɛ sɛɛ fo kwraa lɛ. Shi Yuda hu? Ashur baatutua eshikpɔŋ lɛ, ni sɛɛ mli lɛ Babilon baakpata emaŋtiase lɛ hiɛ. Shi yɛ Yesaia wala bei amli lɛ, Yuda sɔlemɔtsu lɛ kɛ osɔfoyeli gbɛjianɔtoo lɛ baaya nɔ atsu nii ni egbalɔi lɛ hu baaya nɔ amɛgba. Ani esa akɛ Yuda mli afili lɛ yɛ enyɛmi ní yɔɔ kooyigbɛ lɛ hiɛkpatamɔ ní baa lɛ he? Eka shi faŋŋ akɛ dabi! Yehowa baaha Yuda kɛ ehiɛnyiɛlɔi lɛ hu abu amɛhe akɔntaa yɛ amɛtoigbele kɛ hemɔkɛyeli ní amɛbɛ lɛ hewɔ.
7. Yuda hiɛnyiɛlɔi lɛ etɔrɔ dãa yɛ mɛɛ gbɛ nɔ, ni mɛni baajɛ mli aba?
7 Beni ekɛ eshɛɛ sane lɛ haa Yuda lɛ, Yesaia tee nɔ akɛ: “Shi mɛnɛɛmɛi hu miididãa kɛ wein, ni dãa ní wa ewo amɛ sɛkɛ! Osɔfo kɛ gbalɔ fɛɛ miididãa kɛ dãa ní wa, wein emi amɛ po, dãa ewo amɛ sɛkɛ, amɛmiididãa yɛ ninaa mli, amɛmiihaha momo yɛ saneyeli mli. Ejaakɛ okpɔlɔi lɛ fɛɛ nɔ eyimɔ obɔ tɔ́ kɛ shwee kɛ muji sɔŋŋ ni gbɛ bɛ dɔŋŋ.” (Yesaia 28:7, 8) Kwɛ bɔ ni eyɔɔ nyaŋemɔ ha! Dãatɔɔ diɛŋtsɛ yɛ Nyɔŋmɔ we lɛ ji tɔmɔ ní ehiii kwraa. Shi osɔfoi kɛ gbalɔi nɛɛ etɔrɔ dãa yɛ mumɔŋ—hekɛnɔfɔɔ ní amɛná yɛ adesai akpaŋmɔi amli fe nine lɛ ehà amɛjwɛŋmɔi anɔ. Amɛlaka amɛhe ni amɛsusuɔ akɛ gbɛ ní amɛkɔ lɛ ji gbɛ kome pɛ ní nilee yɔɔ mli akɛ amɛaakɔ, ni ekolɛ amɛheɔ amɛyeɔ akɛ agbɛnɛ amɛná ŋaa gbɛ ní amɛbaanyɛ amɛkɛtsu nii kɛji eeeba akɛ Yehowa hebuu lɛ eyafaaa bɔ ni sa. Akɛni amɛyɛ amɛ mumɔŋ dãatɔɔ shihilɛ mli hewɔ lɛ, nɛkɛ jamɔ mli hiɛnyiɛlɔi nɛɛ miishwe atuatsemɔ, ni ji wiemɔi ní he tseee ní tsɔɔ anɔkwa hemɔkɛyeli ní amɛbɛ kwraa yɛ Nyɔŋmɔ shiwoi amli lɛ amɛmiishwie.
8. Te ahere Yesaia shɛɛ sane lɛ nɔ aha tɛŋŋ?
8 Te Yuda hiɛnyiɛlɔi lɛ fee amɛnii yɛ Yehowa kɔkɔbɔɔ lɛ he amɛha tɛŋŋ? Amɛye Yesaia he fɛo, ni amɛfolɔ enaa akɛ ekɛ amɛ miiwie tamɔ nɔ ni abifabii kwraa ji amɛ: “Belɛ namɔ nilee ebaatsɔɔ mɔ? ni namɔ eeeha enu sane lɛ shishi? mɛi ní etse fufɔ, loo mɛi ní atse amɛ fufɔ lɛ? Ejaakɛ amɛkɛɔ akɛ: mla nyiɛ mla sɛɛ, mla nyiɛ mla sɛɛ; akpɔ nyiɛ akpɔ sɛɛ, akpɔ nyiɛ akpɔ sɛɛ; fioo yɛ biɛ, ni fioo yɛ biɛ hu!” (Yesaia 28:9, 10) Kwɛ bɔ ni Yesaia tamɔ mɔ ni tĩɔ ewiemɔi amli, ní ehe yɔɔ naakpɛɛ kɛha amɛ! Eyaa nɔ etĩɔ ewiemɔi amli ni ekɛɔ akɛ: ‘Mla ní Yehowa ewo nɛ! Mla ní Yehowa ewo nɛ! Yehowa kita nɛ! Yehowa kita nɛ!’a Shi etsɛŋ ni Yehowa kɛ Yuda maŋbii lɛ ‘baawie’ kɛtsɔ nifeemɔ nɔ. Ebaatsu Babilon asraafoi—ni ji maŋsɛɛbii ní wieɔ wiemɔ srɔto kwraa lɛ ni amɛbatutua amɛ. Bɔ fɛɛ bɔ ni fee lɛ, nakai asraafoi lɛ baatsu Yehowa “mla [ní] nyiɛ mla sɛɛ” lɛ he nii, ni abaaye Yuda nɔ kunim.—Kanemɔ Yesaia 28:11-13.
Mumɔŋ Dãatɔlɔi Ŋmɛnɛ
9, 10. Mɛɛ be ni mɛɛ gbɛ nɔ Yesaia wiemɔi lɛ ená shishinumɔ kɛha yinɔi ní eba yɛ sɛɛ mli lɛ?
9 Ani Yesaia gbalɛi lɛ ba mli yɛ blema Israel kɛ Yuda pɛ nɔ? Dabida! Yesu kɛ Paulo fɛɛ tsɛ́ ewiemɔi lɛ asɛɛ ni amɛkɛto maŋ ni hi shi yɛ amɛbeaŋ lɛ he. (Yesaia 29:10, 13; Mateo 15:8, 9; Romabii 11:8) Ŋmɛnɛ hu, shihilɛ ní tamɔ nɔ ni hi shi yɛ Yesaia beaŋ lɛ eko ete shi.
10 Amrɔ nɛɛ, Kristendom jamɔ mli hiɛnyiɛlɔi lɛ ji mɛi ni kɛ amɛhiɛ fɔ̃ɔ maŋkwramɔ nɔ lɛ. Amɛmiididãa kɛmiiya kɛmiiba, tamɔ Israel kɛ Yuda dãatɔlɔi lɛ, ni amɛkɛ amɛhe woɔ maŋkwramɔ saji amli, ni amɛnáa miishɛɛ waa akɛ mɛi ní akɛɛ atsɛɔ amɛ je lɛŋ mɛi wuji lɛ babiɔ amɛ ŋaawoo. Yɛ nɔ najiaŋ ní amɛaawie Biblia mli anɔkwale krɔŋŋ lɛ he lɛ, amɛwieɔ muji nii he moŋ. Amɛmumɔŋ hiŋmɛii anɔ tseee, ni no hewɔ lɛ amɛjeee gbɛtsɔɔlɔi ni yɔɔ shweshweeshwe kɛha adesai.—Mateo 15:14.
11. Te Kristendom hiɛnyiɛlɔi lɛ feɔ amɛnii yɛ Nyɔŋmɔ Maŋtsɛyeli lɛ he sanekpakpa lɛ he amɛhaa tɛŋŋ?
11 Kɛ́ Yehowa Odasefoi gbala Kristendom hiɛnyiɛlɔi lɛ ajwɛŋmɔ kɛtee anɔkwa hiɛnɔkamɔ koome pɛ ní yɔɔ, ni ji Nyɔŋmɔ Maŋtsɛyeli lɛ nɔ lɛ, te amɛfeɔ amɛnii yɛ he amɛhaa tɛŋŋ? Amɛnuuu shishi. Kɛha amɛ lɛ, Odasefoi lɛ feɔ tamɔ mɛi ní miiwie nɔ kome too lɛ nɔŋŋ he blɛblɛ. Jamɔ mli hiɛnyiɛlɔi lɛ ebuuu bɔfoi ní atsu amɛ nɛɛ, ni amɛyeɔ amɛhe fɛo. Taakɛ Yudafoi ní hi shi yɛ Yesu gbii lɛ amli lɛ fee lɛ, amɛtaooo Nyɔŋmɔ Maŋtsɛyeli lɛ ni amɛsumɔɔɔ ní amɛ asafoku lɛ hu anu ehe sane ko kwraa. (Mateo 23:13) No hewɔ lɛ, aakai amɛ akɛ jeee be fɛɛ be Yehowa baaya nɔ ekɛ amɛ awie kɛtsɔ ebɔfoi ní yeee awui ko lɛ anɔ. Be baashɛ ní mɛi ni baaa amɛhe shi amɛhaaa Nyɔŋmɔ Maŋtsɛyeli lɛ, ‘abaakumɔ amɛ, ní adũ amɛ, ní amɔmɔ amɛ,’ hɛɛ, abaakpata amɛhiɛ kwraa.
“Wɔkɛ Gbele Ekpaŋ”
12. Mɛni ji Yuda kpaŋmɔ ní ekɛɛ ekɛ “gbele ekpaŋ” lɛ?
12 Yesaia tsa esane jajemɔ lɛ nɔ akɛ: “Nyɛkɛɔ akɛ: Wɔkɛ gbele ekpaŋ, ni wɔkɛ gbohiiaje eye efua! kɛ́ kplebi ní eyi kɛteke nɔ lɛ miiho lɛ, eshɛŋ wɔnɔ kwraa! ejaakɛ wɔkɛ amale efee wɔbobaahe, ni wɔyatee wɔhe yɛ kutumpɔo shishi!” (Yesaia 28:14, 15) Yuda hiɛnyiɛlɔi lɛ shwãa akɛ amɛ maŋkwramɔŋ kpaŋmɔi lɛ miibu amɛhe kɛmiijɛ amɛnɔ kunimyeli mli. Amɛnuɔ he akɛ amɛkɛ “gbele ekpaŋ” akɛ ekabata amɛhe kwraa. Shi amɛbobaahe ní he bɛ sɛɛnamɔ ko lɛ ebuŋ amɛhe. Amɛkpaŋmɔi lɛ, amale, kɛ kutumpɔo diɛŋtsɛ ni. Nakai nɔŋŋ hu ŋmɛnɛ, wekukpaa ní yɔɔ gbagbalii ní kã Kristendom kɛ je lɛ hiɛnyiɛlɔi lɛ ateŋ lɛ ebuŋ ehe kɛji be ní Yehowa eto ní ebaaha ebu ehe akɔntaa lɛ shɛ. Yɛ anɔkwale mli lɛ, no baafee ehiɛkpatamɔ kwraa.—Kpojiemɔ 17:16, 17.
13. Namɔ ji “tɛ ní aka akwɛ” lɛ, ni Kristendom ekpoo lɛ yɛ mɛɛ gbɛ nɔ?
13 Belɛ, nɛgbɛ esa akɛ jamɔ mli hiɛnyiɛlɔi nɛɛ atsɔ amɛhiɛ kɛya mɔ? Yesaia ŋma Yehowa shiwoo lɛ agbɛnɛ, ni ekɛɛ: “Naa, mikɛ shishitoo tɛ ko ema shi yɛ Zion, tɛ ní aka akwɛ, koŋtɛ ní jara wa ní ma shi shiŋŋ. Mɔ ni heɔ yeɔ lɛ ejooo foi. Ni maŋɔ kojomɔ mafee susumɔ kpãa, ni mikɛ jalɛ aaafee kũlomũlo; ni nyɔŋmɔŋtɛ aaaloo amale abobaahe lɛ, ni nu aaaŋɔ teemɔhe lɛ kɛaatee.” (Yesaia 28:16, 17) Beni Yesaia wie wiemɔi nɛɛ sɛɛ etsɛɛɛ lɛ, akɛ Maŋtsɛ Hezekia anɔkwafo lɛ tá maŋtsɛsɛi nɔ yɛ Zion, ni ahere emaŋtsɛyeli lɛ yiwala, jeee kɛtsɔ ehemɛi ní bɛŋkɛ lɛ lɛ anɔ, shi moŋ kɛtsɔ Yehowa he ní ekɛwo mli lɛ nɔ. Shi kɛlɛ, nɛkɛ wiemɔi ní jɛ mumɔŋ nɛɛ baaa mli yɛ Hezekia nɔ. Beni bɔfo Petro tsɛɔ Yesaia wiemɔi asɛɛ lɛ, etsɔɔ akɛ Yesu Kristo, ni ji Hezekia wekunyo ní kɛ lɛ teŋ jɛkɛ lɛ, ji “tɛ ní aka akwɛ” lɛ, ni esaaa ní mɔ fɛɛ mɔ ní náa E-mli hemɔkɛyeli lɛ sheɔ gbeyei. (1 Petro 2:6) Kwɛ bɔ ni eyɔɔ mɔbɔ akɛ yɛ be mli ni Kristendom hiɛnyiɛlɔi lɛ tsɛɔ amɛhe Kristofoi moŋ lɛ, amɛfee nɔ ni Yesu kpoo efeemɔ lɛ! Amɛtao akɛ amɛaaná gbɛi kɛ hewalɛ yɛ je nɛɛ mli moŋ fe ní amɛaamɛ Yehowa ní ekɛ e-Maŋtsɛyeli ní yɔɔ Yesu Kristo ni ji Maŋtsɛ lɛ shishi lɛ aba.—Mateo 4:8-10.
14. Mɛɛ be abaafite kpaŋmɔ ní Yuda kɛ “gbele ekpaŋ” lɛ?
14 Kɛ́ “kplebi ní eyi kɛteke nɔ,” ni ji Babilon asraafoi lɛ baho kɛtsɔ shikpɔŋ lɛ nɔ lɛ, Yehowa baakpá Yuda maŋkwramɔŋ abobaahe lɛ he mama akɛ eji amale diɛŋtsɛ. Yehowa kɛɛ: “Nyɛkɛ gbele kpaŋmɔ lɛ sɛɛ aaafo,” . . . ”ni kɛji kplebi ní eyi kɛteke nɔ lɛ miiho lɛ, eeenaanaa nyɛnɔ. Shii abɔ ní eeebaho lɛ, . . . sane lɛ shishinumɔ lɛ, gbeyei sɔŋŋ ebaafee.” (Yesaia 28:18, 19) Hɛɛ, nikasemɔ ní mli wa yɛ ní abaanyɛ akase kɛjɛ nɔ ni ba mɛi ní kɛɔ akɛ amɛsɔmɔɔ Yehowa, shi amɛkɛ amɛhiɛ fɔ̃ɔ kpaŋmɔi ní amɛkɛ jeŋmaji lɛ efee lɛ nɔ lɛ anɔ lɛ mli.
15. Te Yesaia fee bɔ ni Yuda hebuu lɛ faaa bɔ ni sa lɛ he mfoniri eha tɛŋŋ?
15 Susumɔ gbɛhe ní Yuda hiɛnyiɛlɔi lɛ naa amɛhe yɛ mli agbɛnɛ lɛ he okwɛ. “Saa lɛ kɛɛɛ bɔ ni mɔ aaanyɛ emli akpã yɛ nɔ, ni nɔhaa nɔ̃ lɛ hu elɛɛɛ bɔ ni mɔ aaanyɛ akota ehe awo mli.” (Yesaia 28:20) Etamɔ nɔ ni esa akɛ amɛkã nɔ akɛ amɛmiijɔɔ amɛhe, shi efeɔ efolo. Ejaakɛ amɛnaji jeɔ kpo kɛbaa fɛ̃i lɛ mli aloo amɛdɔrɔɔ amɛnaji amɛwoɔ nɔhaa nɔ̃ lɛ mli, shi elɛɛɛ bɔ ni ebaanyɛ ehà amɛhe fɛɛ ní eha amɛhe afee kulɔɔ. Enɛ ji shihilɛ ní ehiii ní hi shi yɛ Yesaia gbii lɛ amli. Ni nakai ji shihilɛ ní yɔɔ ŋmɛnɛ kɛha mɔ fɛɛ mɔ ní kɛ ehiɛ fɔ̃ɔ Kristendom abobaahe ni ji amale lɛ nɔ. Kwɛ bɔ ni eyɔɔ nyaŋemɔ akɛ yɛ amɛhe ní amɛkɛwoɔ maŋkwramɔ saji amli lɛ hewɔ lɛ, Kristendom jamɔ mli hiɛnyiɛlɔi lɛ ateŋ mɛi komɛi ebafee mɛi ní kɛ amɛhe ewo efɔji komɛi ní áfee, tamɔ weku shishibulemɔ kɛ gbɔmɛi babaoo ní agbe amɛ lɛ amli!
Yehowa ‘Naakpɛɛ Nii Lɛ’
16. Mɛni ji Yehowa ‘naakpɛɛ nii lɛ,’ ni mɛni hewɔ nitsumɔ nɛɛ efɔɔɔ kaa lɛ?
16 Bɔ ni saji baagbe naa aha lɛ baafee srɔto kwraa yɛ bɔ ni Yuda jamɔ mli hiɛnyiɛlɔi lɛ ahiɛ kã nɔ akɛ ebaafee lɛ he. Yehowa baafee nɔ ko ni yɔɔ naakpɛɛ kɛha Yuda mumɔŋ dãatɔlɔi lɛ. “Yehowa aaate shi adamɔ shi tamɔ bɔ ni efee yɛ Perazim gɔŋ lɛ nɔ lɛ, ni eeegiri tamɔ bɔ ni efee yɛ Gibeon jɔɔ lɛŋ lɛ, koni etsu enii ni ji naakpɛɛ nitsumɔ lɛ, ní efee enii ni ji hejɔ̃mɔ nifeemɔ lɛ.” (Yesaia 28:21) Maŋtsɛ David gbii lɛ amli lɛ, Yehowa ha ewebii lɛ kunimyelii ní sa kadimɔ waa yɛ Filistibii lɛ anɔ yɛ Perazim Gɔŋ lɛ nɔ kɛ Gibeon jɔɔ lɛ mli. (1 Kronika 14:10-16) Yɛ Yoshua gbii lɛ amli lɛ, eha hulu lɛ po wá edamɔ shi yɛ Gibeon yiteŋ koni Israel anyɛ aye Amorbii lɛ anɔ kunim kɛmɔ shi. (Yoshua 10:8-14) Eji nɔ ko ní efɔɔɔ kaa kwraa! Amrɔ nɛɛ Yehowa baawu ta ekoŋŋ, shi yɛ be nɛɛ mli lɛ, ebaawu eshi mɛi ni kɛɔ akɛ ewebii ji amɛ lɛ. Ani nɔ ko yɛ ní yɔɔ naakpɛɛ loo efɔɔɔ kaa tamɔ nɛkɛ? Jeee yɛ anɔkwale ní eji akɛ Yerusalem ji Yehowa jamɔ shikwɛ̃ɛhe, kɛ maŋtsɛ ní Yehowa efɔ lɛ mu lɛ maŋtiase lɛ hewɔ. Kɛbashi ŋmɛnɛ lɛ, abutuko David maŋtsɛmɛi aweku ni yɔɔ Yerusalem lɛ pɛŋ. Shi yɛ fɛɛ sɛɛ lɛ, bɔ fɛɛ bɔ ni fee lɛ, Yehowa baatsu ‘enaakpɛɛ nii’ lɛ kɛ̃.—Okɛto Habakuk 1:5-7 he.
17. Mɛɛ hewalɛ hefɛoyeli baaná yɛ Yesaia gbalɛ lɛ mlibaa nɔ?
17 No hewɔ lɛ, Yesaia bɔ kɔkɔ akɛ: “Nyɛkaŋɔfea fɛoyeli dɔŋŋ, koni akamĩa nyɛkpãai lɛ amli; ejaakɛ minu hiɛkpatamɔ kɛ nɔ ni ama nɔ mi ko he kɛjɛ Nuntsɔ Yehowa Zebaot ŋɔɔ, ni ebaaba shikpɔŋ muu lɛ fɛɛ nɔ.” (Yesaia 28:22) Eyɛ mli akɛ hiɛnyiɛlɔi lɛ yeɔ Yesaia shɛɛ sane lɛ he fɛo moŋ, shi eji anɔkwale. Enu kɛjɛ Yehowa, mɔ ni nakai hiɛnyiɛlɔi lɛ kɛ lɛ yɔɔ kpaŋmɔ wekukpaa mli lɛ naa. Nakai nɔŋŋ hu ŋmɛnɛ, kɛ́ Kristendom jamɔ mli hiɛnyiɛlɔi lɛ nu Yehowa ‘naakpɛɛ nii’ lɛ he lɛ, amɛyeɔ he fɛo. Amɛkɛ mlifu wieɔ waa amɛshiɔ po. Shi shɛɛ sane ní Yehowa Odasefoi jajeɔ lɛ ji anɔkwale. Anaa yɛ Biblia lɛ, ni ji wolo ní nakai hiɛnyiɛlɔi lɛ kɛɔ akɛ amɛdamɔ shi kɛha lɛ mli.
18. Te Yesaia fee bɔ ni Yehowa ŋmɛɔ pɛpɛɛpɛ kɛ́ ekɛ tsɔsemɔ miiha lɛ he mfoniri eha tɛŋŋ?
18 Shi aŋkroaŋkroi anɔkwafoi ní enyiɛɛɛ nakai hiɛnyiɛlɔi lɛ asɛɛ lɛ, Yehowa baasaa amɛ ni ebaaha amɛná ehiɛ duromɔ ekoŋŋ. (Kanemɔ Yesaia 28:23-29.) Taakɛ okwaafonyo kɛ tsuishitoo babaoo tsuɔ nii kɛ eegbee ŋmãa ní he waaa tuutu ko, tamɔ kumino lɛ, nakai Yehowa hu tsakeɔ tsɔsemɔ ní ekɛhaa lɛ mli yɛ bɔ ni mɔ aŋkro ní ekɛhaa lɛ kɛ bɔ ni shihilɛ lɛ ji lɛ naa. Efeee enii keketee loo kɛ nineshiwalɛ, shi moŋ efeɔ enii kɛ yiŋtoo akɛ ebaasaa nɔtɔlɔi lɛ kɛba shihilɛ kpakpa mli ekoŋŋ. Hɛɛ, kɛ́ aŋkroaŋkroi here Yehowa faikpamɔ lɛ nɔ lɛ, no lɛ hiɛnɔkamɔ yɛ. Nakai nɔŋŋ hu ŋmɛnɛ, eyɛ mli akɛ atsakeee nɔ ni ato akɛ ebaaba Kristendom nɔ akɛ kuu lɛ moŋ, shi mɔ aŋkro fɛɛ mɔ aŋkro ní baa ehe shi ehaa Yehowa Maŋtsɛyeli lɛ baanyɛ aje efɔbuu kojomɔ ní baa lɛ mli.
Kpóo ha Yerusalem!
19. Yerusalem baatsɔ tamɔ “afɔleshaa latɛ” yɛ mɛɛ gbɛ nɔ, ni mɛɛ be kɛ mɛɛ gbɛ nɔ enɛ tsɔ eba mli?
19 Shi kɛlɛ, mɛni Yehowa wieɔ he agbɛnɛ? “Kpóo ha Ariel, Ariel, maŋ he ni David bɔ nsara yɛ lɛ! Nyɛkɛ afi afataa afi he, nyɛhaa gbii juji lɛ abɔlea shi! Shi maha efi Ariel, ŋkɔmɔyeli kɛ awerɛho aaaba, ni eeetsɔ tamɔ Ariel eha mi!” (Yesaia 29:1, 2) Eeenyɛ efee akɛ “Ariel” shishi ji “Nyɔŋmɔ Afɔleshaa Latɛ,” ni eka shi faŋŋ akɛ nɔ ni etsɔɔ yɛ biɛ ji Yerusalem. Jɛmɛ ji he ni sɔlemɔtsu lɛ kɛ efɔleshaa latɛ lɛ yɔɔ. Yudafoi lɛ nyiɛɔ nifeemɔ gbɛ̀i ní afo afɔ̃ shi ni ji gbijurɔyelii kɛ afɔleshaai asɛɛ yɛ jɛmɛ, shi Yehowa náaa amɛjamɔ lɛ he miishɛɛ. (Hoshea 6:6) Shi moŋ, ewo akpɔ akɛ maŋtiase lɛ diɛŋtsɛ baatsɔ “afɔleshaa latɛ” yɛ shishinumɔ kroko naa. Taakɛ afɔleshaa latɛ ji lɛ, lá baaho yɛ nɔ babaoo ni abaashɛre la awo shishi. Yehowa tsɔɔ bɔ ni enɛ baaba lɛ aha lɛ mli po akɛ: “Mabɔ nsara mawo ohe kɛaakpe, ni mikɛ bulɔi aaabɔleo kɛaakpe, ni matswa káwoo gbogboi mawo ohe. Ni aaabao shi, shikpɔŋ ooowie kɛaajɛ, owiemɔ aaagbɛɛ blɛoo kɛaajɛ sũ mli.” (Yesaia 29:3, 4) Enɛ ba mli yɛ Yuda kɛ Yerusalem nɔ yɛ afi 607 D.Ŋ.B. beni Babilon asraafoi bawo maŋtiase lɛ he ká ní amɛkpata hiɛ ní amɛshã sɔlemɔtsu lɛ. Aba Yerusalem shi kwraa ni etsɔ tamɔ shikpɔŋ ní ama maŋtiase lɛ yɛ nɔ lɛ.
20. Mɛni baaba Nyɔŋmɔ henyɛlɔi lɛ anɔ yɛ naagbee kwraa?
20 Dani nakai be fɔŋ lɛ shɛ lɛ, Yuda ná maŋtsɛ ní boɔ Yehowa Mla toi yɛ be kɛ bei amli. Agbɛnɛ mɛni ba? Yehowa wu eha ewebii lɛ. Eyɛ mli akɛ henyɛlɔi lɛ ye shikpɔŋ lɛ nɔ moŋ, shi amɛfee tamɔ “mulu bɔdɔbɔdɔ” kɛ “tutuu.” Yehowa gbɛ amɛ ashwã yɛ lɛ diɛŋtsɛ ebe ní eto mli “kɛ nugbɔshimɔ kɛ shikpɔŋhosomɔ, kɛ gbɛɛmɔ kpeteŋkpele, kɛ lasuogbele kɛ ahum, kɛ lalilɛi ní shãa nii.”—Yesaia 29:5, 6.
21. Tsɔɔmɔ mfonirifeemɔ ní yɔɔ Yesaia 29:7, 8 lɛ mli.
21 Ekolɛ henyɛlɔi asraafoi kɛ miishɛɛ baakpá gbɛ akɛ amɛaashwie Yerusalem ní amɛkɛ fufeemɔ aloo hàa nii ni amɛaaná kɛjɛ ta lɛ mli lɛ. Shi abaaha nɔ ko abati amɛ shi trukaa! Taakɛ mɔ ko ní hɔmɔ miiye lɛ lɛ laa ní eeye nii kɛ ŋɔɔmɔ, kɛkɛ lɛ ehiɛ etsɛ̃ ní hɔmɔ miiye lɛ waa lolo lɛ, nakai Yuda henyɛlɔi lɛ naŋ nɔ ni amɛkpaa gbɛ akɛ amɛbaaye kɛ ŋɔɔmɔ lɛ kɔkɔɔkɔ. (Kanemɔ Yesaia 29:7, 8.) Susumɔ nɔ ni ba Ashur asraafoi ní yɔɔ Sanherib shishi lɛ anɔ beni amɛwo Yerusalem he gbeyei yɛ Maŋtsɛ Hezekia anɔkwafo lɛ beaŋ lɛ he okwɛ. (Yesaia, yitsei 36 kɛ 37) Gbɛkɛ kome pɛ mli lɛ, aha Ashur asraafoi akuu ní he yɔɔ gbeyei waa lɛ ku amɛsɛɛ kɛ foi, ní awóko adesa nine po nɔ ashiko amɛ—ni esraafoi kãkãlɔi lɛ ateŋ mɛi 185,000 gboi! Abaaha kunimyeli hiɛnɔkamɔ afee efolo ekoŋŋ beni Gog ní jɛ Magog lɛ asraafoi agbɛjianɔtoo lɛ sáa amɛhe ní amɛkɛ Yehowa webii awu yɛ wɔsɛɛ be ní ebɛŋkɛ kpaakpa lɛ mli lɛ.—Ezekiel 38:10-12; 39:6, 7.
22. Te Yuda mumɔŋ dãatɔɔ lɛ sa ehe eha tɛŋŋ?
22 Beni Yesaia wie egbalɛ lɛ fã nɛɛ mli wiemɔi lɛ, no mli lɛ Yuda hiɛnyiɛlɔi lɛ bɛ hemɔkɛyeli tamɔ Hezekia. Amɛtɔrɔ dãa waa ni nɔ̃ enyɔ amɛnɔ yɛ mumɔŋ kɛtsɔ kpaŋmɔi ní amɛkɛ jeŋmaji ní bɛ Nyɔŋmɔ gbeyeishemɔ lɛ efee lɛ nɔ. “Nyɛhe ajɔ̃a nyɛhe ní nyɛnaa akpɛa nyɛhe! nyɛshwilaa nyɛhe ní nyɛtsɔmɔa shwilafoi! Amɛtɔrɔ dãa, shi jeee kɛ wein; amɛmiidĩidãa, shi jeee kɛ dãa ní wa.” (Yesaia 29:9) Akɛni amɛtɔrɔ dãa yɛ mumɔŋ hewɔ lɛ, hiɛnyiɛlɔi nɛɛ nyɛɛɛ ayoo bɔ ni ninaa ni akɛha Yehowa anɔkwa gbalɔ lɛ he hiaa ha. Yesaia jaje akɛ: “Yehowa efɔse wɔ ní mli tsii mumɔ eshwie nyɛnɔ, ni eŋamɔ nyɛhiŋmɛii ni ji gbalɔi lɛ, ni nyɛyitsei ni ji ninalɔi lɛ ehà amɛnɔ. Ni enɛɛmɛi ahe ninaa lɛ etsɔ tamɔ wolo ko ní asɔo naa mli wiemɔi eha nyɛ: kɛ́ akɛ nɛkɛ wolo nɛɛ ha woloŋlelɔ ko akɛ: Kanemɔ enɛ! lɛ, ebaakɛɛ akɛ: Minyɛŋ, ejaakɛ asɔo naa! ni kɛ́ akɛ wolo lɛ ha mɔ ni leee woloŋ akɛ: Kanemɔ enɛ! lɛ, ebaakɛɛ akɛ: Mileee woloŋ!”—Yesaia 29:10-12.
23. Mɛni hewɔ Yehowa baaha Yuda abu ehe akɔntaa lɛ, ni mɛɛ gbɛ nɔ ebaafee enɛ yɛ?
23 Yuda jamɔ mli hiɛnyiɛlɔi lɛ kɛɔ akɛ amɛle nii waa yɛ mumɔŋ, shi amɛkwa Yehowa. Amɛtsɔɔ amɛ diɛŋtsɛ amɛsusumɔi ní egbá afã ní kɔɔ nɔ ni ja kɛ nɔ ni ejaaa he lɛ, ni amɛbuɔ hemɔkɛyeli ní amɛbɛ kɛ amɛnifeemɔi fɔji lɛ kɛ gbɔmɛi lɛ ahiɛ ní amɛnyiɛ kɛtee nifeemɔi ní haaa amɛná Nyɔŋmɔ hiɛ duromɔ mli lɛ bem. Kɛtsɔ “sane ní haa mɔ he jɔ̃ɔ ehe”—ni ji ‘enaakpɛɛ nii’ lɛ nɔ lɛ—Yehowa baaha amɛbu amɛ osatofeemɔ lɛ he akɔntaa. Ekɛɛ: “Ákɛ nɔ ni nɛkɛ maŋ nɛɛ bɛŋkɛɔ mi kɛ amɛdaa kɛkɛ, ni amɛkɛ amɛnaabu kɛkɛ woɔ mi, shi amɛtsui etsi ehe kɛjɛ mihe kɛtee shɔŋŋ, ni gbeyei hu ní amɛsheɔ mi lɛ gbɔmɛi akitai ní amɛkase kɛkɛ ni, hewɔ lɛ, naa, mikɛ nɛkɛ maŋ nɛɛ aaaye naakpɛɛ sane, naakpɛɛ sane kɛ sane ní haa mɔ he jɔ̃ɔ ehe, ni amɛnilelɔi lɛ anilee aaafite, ni amɛhiɛtɛ̃lɔi lɛ ahiɛtɛ̃ɛ lɛ aaalaaje!” (Yesaia 29:13, 14) Nɔ ni Yuda tsɛɔ lɛ nilee kɛ hiɛtɛ̃ɛ ní ená lɛ hiɛ baakpata yɛ be mli ni Yehowa kudɔɔ nibii koni Babilon Jeŋ Hewalɛ lɛ ababɛɛ ehemɔkɛyeli kwalɔi ajamɔ gbɛjianɔtoo muu lɛ fɛɛ kɛya kwraa lɛ. Nɔ ko ní tamɔ nakai nɔŋŋ ba yɛ klɛŋklɛŋ afii oha lɛ mli beni mɛi ní tsɛɔ amɛhe hiɛnyiɛlɔi nilelɔi lɛ ha Yudafoi amaŋ lɛ du gbɛ lɛ sɛɛ. Ni nɔ ko ní tamɔ nakai baaba Kristendom nɔ yɛ wɔgbii nɛɛ amli.—Mateo 15:8, 9; Romabii 11:8.
24. Yuda bii lɛ jie Nyɔŋmɔ gbeyeishemɔ ní amɛbɛ lɛ kpo yɛ mɛɛ gbɛ nɔ?
24 Shi kɛlɛ, bianɛ lɛ, Yuda hiɛnyiɛlɔi ní shwãa lɛ heɔ yeɔ akɛ amɛhiɛ etɛ̃ waa bɔ ni amɛbaanyɛ amɛje anɔkwa jamɔ ní amɛfite lɛ lɛ he toigbalamɔ lɛ mli. Shi ani amɛbaaje mli? Yesaia jie amɛhiɛhàa nɔ̃ lɛ, ni ekpá amɛhe mama akɛ amɛbɛ anɔkwa gbeyeishemɔ kɛha Nyɔŋmɔ, ni no hewɔ lɛ amɛbɛ anɔkwa nilee hu, ni ekɛɛ: “Kpóo ha mɛi ní ŋɔɔ amɛyiŋtoi amɛteeɔ Yehowa gbidigbidi, ní amɛnitsumɔi yɔɔ duŋ mli, ní amɛkɛɔ akɛ: Namɔ ŋaawoo, loo namɔ le wɔ? lɛ! Nyɛmiifee ashituu! Aso aaabu gbɛshɔ̃lɔ lɛ tamɔ sũ? ni nɔ̃ ní afee lɛ aaakɛɛ yɛ mɔ ní fee lɛ lɛ he akɛ: Jeee lɛ efee mi! loo nɔ̃ ni ashɔ̃ lɛ aaakɛɛ yɛ mɔ ní shɔ̃ lɛ lɛ he akɛ: Eleee nɔ ko?” (Yesaia 29:15, 16; okɛto Lala 111:10 he.) Bɔ fɛɛ bɔ ni amɛsusuɔ akɛ amɛtée amɛhe jogbaŋŋ amɛha lɛ, amɛyɛ “faŋŋ ni agbele [amɛnɔ]” yɛ Nyɔŋmɔ hiŋmɛiiaŋ.—Hebribii 4:13.
‘Toimulɔi Tete Aaanu Nii’
25. Mɛɛ shishinumɔ naa “toimulɔi” baanu nii yɛ?
25 Shi kɛlɛ, mɛi ni jieɔ hemɔkɛyeli kpo lɛ baaná yiwalaheremɔ. (Kanemɔ Yesaia 29:17-24; okɛto Luka 7:22 he.) “Toimulɔi” lɛ “aaanu wolo lɛ mli wiemɔi,” ni ji shɛɛ sane ní jɛ Nyɔŋmɔ Wiemɔ lɛ mli lɛ. Hɛɛ, enɛ jeee gbɔmɔtsoŋ toimuu tsámɔ. Eji mumɔŋ tsámɔ. Yesaia gbala jwɛŋmɔ kɛtee Mesia Maŋtsɛyeli ní abaato shishi lɛ, kɛ anɔkwa jamɔ ní akɛbaama shi ekoŋŋ yɛ shikpɔŋ nɔ kɛtsɔ Mesia lɛ nɔyeli lɛ nɔ lɛ nɔ ekoŋŋ. Enɛ eba mli yɛ wɔbe nɛɛ mli, ni anɔkwafoi akpekpei abɔ miiŋmɛ gbɛ ni Yehowa miijaje amɛ ni amɛmiikase bɔ ni afeɔ ajieɔ eyi. Mɛɛ emlibaa ni yɔɔ miishɛɛ waa nɛ! Yɛ naagbee lɛ, gbi ko baaba ni mɔ fɛɛ mɔ, ni ji nɔ fɛɛ nɔ ní muɔ lɛ baajie Yehowa yi ni amɛbaatse egbɛi krɔŋkrɔŋ lɛ he.—Lala 150:6.
26. Mɛɛ mumɔŋ kaimɔi “toimulɔi” lɛ nuɔ ŋmɛnɛ?
26 Mɛni “toimulɔi” nɛɛ ní nuɔ Nyɔŋmɔ Wiemɔ lɛ ŋmɛnɛ lɛ kaseɔ? Amɛkaseɔ akɛ esa akɛ Kristofoi fɛɛ, titri lɛ mɛi ní asafo lɛ kwɛɔ amɛ ákɛ nɔkwɛmɔnii lɛ, aje gbɛ akwɛ jogbaŋŋ ní ‘amɛkadidãa kɛ dãa ní wa.’ (Yesaia 28:7) Kɛfata he lɛ, esaaa akɛ Nyɔŋmɔ kaimɔi lɛ, ní yeɔ ebuaa wɔ koni wɔná mumɔŋ shishinumɔ yɛ nibii fɛɛ he lɛ, toiboo jeɔ wɔtsine. Eyɛ mli akɛ Kristofoi baa amɛhe shi amɛhaa hegbɛi ní yeɔ nɔ lɛ yɛ gbɛ ni sa nɔ ni amɛkɛ amɛhe fɔ̃ɔ amɛnɔ kɛha shihilɛ mli hiamɔ nii komɛi moŋ, shi yiwalaheremɔ jɛɛɛ je lɛŋ nɔyelii lɛ aŋɔɔ, shi moŋ ejɛɔ Yehowa Nyɔŋmɔ ŋɔɔ. Agbɛnɛ hu, esaaa akɛ wɔhiɛ kpaa nɔ kɔkɔɔkɔ akɛ taakɛ kojomɔ ní akɛba Yerusalem hemɔkɛyeli kwalɔ lɛ nɔ lɛ ji lɛ, anyɛŋ ajo kojomɔ ní Nyɔŋmɔ kɛbaaba nɛkɛ yinɔ nɛɛ nɔ lɛ naa foi kɔkɔɔkɔ. Wɔbaanyɛ wɔtsɔ Yehowa yelikɛbuamɔ nɔ wɔya nɔ wɔjaje ekɔkɔbɔɔ lɛ wɔtsɔɔ, yɛ shitee-kɛ-woo ní wɔkɛaakpe lɛ fɛɛ sɛɛ, taakɛ Yesaia fee lɛ.—Yesaia 28:14, 22; Mateo 24:34; Romabii 13:1-4.
27. Mɛɛ nikasemɔi Kristofoi baanyɛ aná kɛjɛ Yesaia gbalɛ lɛ mli?
27 Onukpai kɛ fɔlɔi baanyɛ akase nii kɛjɛ gbɛ ni Yehowa tsɔɔ nɔ ekɛ tsɔsemɔ haa lɛ mli, ní amɛbɔ mɔdɛŋ be fɛɛ be akɛ amɛkɛ efɔŋfeelɔi lɛ aaaba Nyɔŋmɔ hiɛ duromɔ mli ekoŋŋ, shi jeee ní amɛgbala amɛtoi kɛkɛ. (Yesaia 28:26-29; okɛto Yeremia 30:11 he.) Ni aakai wɔ fɛɛ, kɛ gbekɛbii lɛ hu akɛ ehe miihia ní wɔsɔmɔ Yehowa kɛjɛ wɔtsui mli, shi jeee ní wɔɔkwa wɔfee wɔhe Kristofoi kɛkɛ koni wɔkɛsa gbɔmɛi ahiɛ. (Yesaia 29:13) Esa akɛ wɔtsɔɔ akɛ, ákɛ mɛi ní tamɔɔɔ Yuda maŋ lɛ mli bii ní bɛ hemɔkɛyeli lɛ, wɔ lɛ wɔyɛ gbeyeishemɔ kpakpa kɛha Yehowa kɛ bulɛ ní mli kwɔ waa kɛha lɛ. (Yesaia 29:16) Kɛfata he lɛ, esa akɛ wɔha ana faŋŋ akɛ wɔmiisumɔ ní Yehowa ajaje wɔ ní wɔkase nii kɛjɛ eŋɔɔ.—Yesaia 29:24.
28. Te Yehowa tsuji buɔ eyiwalaheremɔ nifeemɔi lɛ amɛhaa tɛŋŋ?
28 Kwɛ bɔ ni ehe hiaa ní aná Yehowa kɛ gbɛ ní etsɔɔ nɔ efeɔ nii lɛ mli hemɔkɛyeli kɛ hekɛnɔfɔɔ! (Okɛto Lala 146:3 he.) Kɔkɔbɔɔ shɛɛ sane ní wɔshiɛɔ lɛ baafee tamɔ gbekɛbii awiemɔ kɛha mɛi babaoo. Gbɛjianɔtoo, ni ji Kristendom, ní kɛɔ akɛ esɔmɔɔ Nyɔŋmɔ lɛ hiɛkpatamɔ ní baaba wɔsɛɛ lɛ ji nifeemɔ ní yɔɔ naakpɛɛ, ní efɔɔɔ kaa. Shi Yehowa baatsu ‘enaakpɛɛ nii’ lɛ kɛgbe naa. Ŋwanejee ko kwraa bɛ no he. No hewɔ lɛ, Nyɔŋmɔ tsuji kɛ amɛhiɛ fɔ̃ɔ e-Maŋtsɛyeli lɛ kɛ e-Maŋtsɛ ní ehala lɛ, ni ji Yesu Kristo nɔ kwraa kɛmɔɔ shi, yɛ nibii agbɛjianɔtoo nɛɛ naagbee gbii lɛ amli. Amɛle akɛ Yehowa yiwalaheremɔ nifeemɔi—ní ebaatsu efata ‘sane ní haa mɔ he jɔ̃ɔ ehe’ lɛ he lɛ—kɛ naanɔ jɔɔmɔi baaba abaha adesai toibolɔi fɛɛ.
[Shishigbɛ niŋmaa]
a Yɛ shishijee Hebri ŋmalɛ lɛ mli lɛ, Yesaia 28:10 lɛ ji lalafoo wiemɔ ní atĩɔ emli wiemɔi lɛ amli, tamɔ lalai ní atsɔɔ yɛ abifabii askul lɛ. Enɛ hewɔ lɛ, Yesaia shɛɛ sane lɛ bafee tamɔ gbekɛbii awiemɔ ní aatĩ mli shii abɔ kɛha jamɔ mli hiɛnyiɛlɔi lɛ.
[Mfonirii ni yɔɔ baafa 289]
Kristendom kɛ ehiɛ efɔ̃ kpaŋmɔi ní ekɛ adesai nɔyelɔi efee lɛ nɔ moŋ fe Nyɔŋmɔ
[Mfoniri ni yɔɔ baafa 290]
Yehowa tsu ‘enaakpɛɛ nii’ lɛ beni eŋmɛ gbɛ ní Babilon bakpata Yerusalem hiɛ lɛ
[Mfoniri ni yɔɔ baafa 298]
Mɛi ní tsutsu ko lɛ amɛmu toi yɛ mumɔŋ lɛ baanyɛ ‘amɛnu’ Nyɔŋmɔ Wiemɔ lɛ