Yitso Nyɔŋmai Enyɔ Kɛ Etɛ
Yaa Nɔ Omɛ Yehowa
1, 2. (a) Mɛɛ saji yɔɔ Yesaia yitso 30 lɛ mli? (b) Mɛɛ sanebimɔi wɔbaasusu he agbɛnɛ?
WƆKANEƆ ŋwɛi sane jajemɔi krokomɛi ní akɛshiɔ mɛi fɔji lɛ, yɛ Yesaia yitso 30 lɛ mli. Shi kɛlɛ, Yesaia gbalɛ lɛ fã nɛɛ maa Yehowa sui ni yɔɔ miishɛɛ waa lɛ ekomɛi anɔ mi. Yɛ anɔkwale mli lɛ, etsɔɔ Yehowa sui lɛ amli kɛ wiemɔi ní mli kã shi faŋŋ, aahu akɛ, kɛ́ wɔɔkɛɛ lɛ, efeɔ tamɔ nɔ ni wɔmiina lɛ ni enamɔ lɛ shɛjeɔ wɔmii, ni wɔmiinu egbee ní kudɔɔ mɔ, kɛ ehetaa ní tsáa mɔ lɛ he.—Yesaia 30:20, 21, 26.
2 Yɛ enɛ fɛɛ sɛɛ po lɛ, Yesaia maŋbii, ni ji Yuda bii hemɔkɛyeli kwalɔi lɛ, ekuuu amɛsɛɛ kɛbaaa Yehowa ŋɔɔ. Shi moŋ, amɛkɛ amɛhiɛ yafɔ̃ gbɔmɔ nɔ. Te Yehowa nuɔ enɛ he ehaa tɛŋŋ? Ni yɛ mɛɛ gbɛ nɔ Yesaia gbalɛ lɛ fã nɛɛ yeɔ ebuaa Kristofoi ŋmɛnɛ koni amɛya nɔ amɛmɛ Yehowa? (Yesaia 30:18) Ha wɔtao mli wɔkwɛ.
Kwashiafeemɔ kɛ Amanehulu ní Baaba
3. Mɛɛ ŋaatsɔɔ ko Yehowa kpá he mama?
3 Yuda hiɛnyiɛlɔi lɛ kɛ be kpalaŋŋ etsɔ ŋaa aahu yɛ teemɔŋ, ní amɛmiitao gbɛ ní amɛaatsɔ nɔ amɛjo Ashur apã lɛ shishi ní amɛaabote lɛ naa foi. Shi kɛlɛ, Yehowa miikwɛ amɛ. Agbɛnɛ ekpá amɛŋaatsɔɔ lɛ he mama akɛ: “Kpóo ha bii kaniŋkajelɔi lɛ, Yehowa kɛɛ, mɛi ní yaa ajina ní mibɛ mli, ní amɛkpaŋɔ kpaŋmɔ ní Mimumɔ lɛ bɛ mli, koni amɛŋɔ esha amɛfata esha he lɛ! Amɛyiŋ amɛtee Mizraim.”—Yesaia 30:1, 2a.
4. Nyɔŋmɔ webii atuatselɔi lɛ kɛ Mizraim ye Nyɔŋmɔ najiaŋ yɛ mɛɛ gbɛ nɔ?
4 Kwɛ hejɔ̃mɔ ní eji kɛha nakai hiɛnyiɛlɔi ní tsɔɔ ŋaa lɛ akɛ amɛaanu akɛ amɛyiŋtoo lɛ eje kpo! Gbɛ ní amɛfãa kɛyaa Mizraim ákɛ amɛkɛ lɛ yaafee kpaŋmɔ lɛ ji nifeemɔ ní mli wa po fe ní amɛte shi amɛwo Ashur; eji Yehowa Nyɔŋmɔ hiɛ atuatsemɔ diɛŋtsɛ. Yɛ Maŋtsɛ David beaŋ lɛ, maŋ lɛ kɛ amɛhiɛ fɔ̃ Yehowa nɔ ákɛ amɛmɔɔ ní wa ni amɛba abo ‘yɛ efiji ashishi hɔ̃ɔŋ lɛ mli.’ (Lala 27:1; 36:8) Amrɔ nɛɛ “amɛkɛ amɛhe [eyakpasa] Farao hewalɛ [lɛ], ni amɛba abo yɛ Mizraim hɔ̃ɔŋ lɛ mli.” (Yesaia 30:2b) Amɛkɛ Mizraim eye Nyɔŋmɔ najiaŋ! Kwɛ kpa ní amɛkpa yɛ esɛɛ!—Kanemɔ Yesaia 30:3-5.
5, 6. (a) Mɛni hewɔ kpaŋmɔ ní akɛ Mizraim fee lɛ ji tɔmɔ ní kɛ gbele baa lɛ? (b) Mɛɛ Nyɔŋmɔ webii atsutsu gbɛfaa ko maa bɔ ni gbɛfaa kɛyaa Mizraim nɛɛ ji kwashiafeemɔ lɛ nɔ mi?
5 Yesaia kɛ sane mlitsɔɔmɔ babaoo fata he, tamɔ nɔ ni ekɛmiiha naajiemɔ ní amɛkɛhaa akɛ eji gbɛfaa folo kɛkɛ kɛmiiya Mizraim lɛ hetoo. “Wuoyigbɛ kooloi lɛ akojomɔ he gbalɛ: Amɛtsɔɔ haomɔ kɛ hejaramɔ shikpɔŋ lɛ nɔ, he ni jata yoo kɛ jata nuu jɛɔ baa lɛ, he ni shinɔ̃ kɛ onufu filikilɔ ní naa yɔɔ la yɔɔ lɛ; amɛlooɔ amɛnii amɛshwieɔ teji bii akotosɛɛ, ni amɛkɛ amɛjwetrii lɛ shwieɔ yomai asɛɛ afũi anɔ.” (Yesaia 30:6a) Eyɛ faŋŋ akɛ, ato gbɛfaa lɛ he gbɛjianɔ jogbaŋŋ diɛŋtsɛ. Tsuji lɛ to gbɛfaa yomai kɛ tejii akui ahe gbɛjianɔ, ni amɛfimɔ jatsui ni ji nibii ní jara wawai amɛtere amɛ ni amɛyi mli kɛmiiya Mizraim kɛtsɔ ŋã shikpɔŋ ní baaa nii, ní jatai ní hũuɔ kɛ onufui ní naa ebɔɔ jaraa eyi nɔ obɔ̃ lɛ nɔ. Yɛ naagbee lɛ, tsuji lɛ yashɛ he ni amɛyaa lɛ ni amɛkɛ amɛjwetrii lɛ ha Mizraimbii lɛ. Amɛkɛ shika eyahe hebuu—aloo nakai amɛsusuɔ. Shi kɛlɛ, Yehowa kɛɛ: “[Amɛyaa] maŋ ko ní he bɛ sɛɛnamɔ ha amɛ lɛ ŋɔɔ. Shi Mizraim yelikɛbuamɔ lɛ yakatswaa ni, ni enyɛɛɛ nɔ ko nɔ ko efee: no hewɔ mitsɛ́ lɛ akɛ: [Rahab] Naafuutsɛ ní taa shi diŋŋ lɛ!” (Yesaia 30:6b, 7) ‘Rahab,’ ni ji “[ŋshɔ mli] drako lɛ,” bafee Mizraim he mfoniri. (Yesaia 51:9, 10) Ewoɔ shi babaoo, shi eyeee ekome folo po nɔ. Kpaŋmɔ ní Yuda kɛ lɛ efee lɛ ji tɔmɔ ní kɛ gbele baa.
6 Beni Yesaia tsɔɔ bɔ ni tsuji lɛ agbɛfaa lɛ ji lɛ, ekolɛ etoibolɔi lɛ baakai gbɛfaa ko ní tamɔ nakai ní ba yɛ Mose gbii lɛ amli lɛ. Amɛ blematsɛmɛi lɛ nyiɛ kɛtsɔ nakai “ŋã kpeteŋkpele ní nɔ yɔɔ gbeyei” lɛ nɔŋŋ nɔ. (5 Mose 8:14-16) Shi, yɛ Mose gbii lɛ amli lɛ, Israelbii lɛ fã gbɛ kɛshi Mizraim, kɛjɛ nyɔŋyeli shishi. Shi amrɔ nɛɛ, tsuji lɛ miifã gbɛ kɛmiiya Mizraim, ní amɛyaje amɛnɔyeli shishi diɛŋtsɛ. Mɛɛ kwashiafeemɔ nɛ! Ekaba akɛ wɔɔfee yiŋkpɛɛ ní nilee bɛ mli tamɔ nɛkɛ kɔkɔɔkɔ, ní wɔkɛ wɔ mumɔŋ heyeli lɛ atsake nyɔŋyeli!—Okɛto Galatabii 5:1 he.
Gbalɔ lɛ Shɛɛ Sane lɛ he Shitee-kɛ-woo
7. Mɛni hewɔ Yehowa ha Yesaia ŋma E-kɔkɔbɔɔ ní ekɛha Yuda lɛ efɔ̃ shi lɛ?
7 Yehowa kɛɛ Yesaia akɛ eŋma shɛɛ sane ní ekɛha nɔŋŋ lɛ efɔ̃ shi koni “eka shi eha be ní baaba lɛ daa kɛya naanɔ.” (Yesaia 30:8) Esa akɛ aŋma kpɛlɛmɔ ní Yehowa ekpɛlɛɛɛ ní akɛ kpaŋmɔi ní akɛ gbɔmɔ feɔ lɛ aye E-mli hekɛnɔfɔɔ ní aaaná lɛ hiɛ lɛ afɔ̃ shi kɛha yinɔi ní baaba wɔsɛɛ lɛ asɛɛnamɔ—ní wɔyinɔ ní yɔɔ ŋmɛnɛ lɛ hu fata he. (2 Petro 3:1-4) Shi yiŋtoo kroko yɛ ní fe enɛ, ni haa ehe hiaa waa akɛ aŋma afɔ̃ shi. “Maŋ atuatselɔ ni, bii amalelɔi, kɛ bii ní ekpɛlɛɛɛ Yehowa mla lɛ toiboo ni.” (Yesaia 30:9) Gbɔmɛi lɛ ekpoo Nyɔŋmɔ ŋaawoo. No hewɔ lɛ, esa akɛ aŋma afɔ̃ shi koni sɛɛ mli lɛ, amɛkanyɛ amɛkɛɛ akɛ amɛnine shɛɛɛ kɔkɔbɔɔ kpakpa nɔ.—Abɛi 28:9; Yesaia 8:1, 2.
8, 9. (a) Yuda hiɛnyiɛlɔi lɛ bɔ mɔdɛŋ ní amɛfite Yehowa gbalɔi lɛ yɛ mɛɛ gbɛ nɔ? (b) Yesaia tsɔɔ akɛ ehaaa awo ehe gbeyei yɛ mɛɛ gbɛ nɔ?
8 Agbɛnɛ Yesaia kɛ gbɔmɛi lɛ atuatsemɔ subaŋ lɛ he nɔkwɛmɔnɔ ha. “[Amɛkɛɔ] ninalɔi lɛ akɛ: Nyɛkanaa nii! kɛ gbalɔi lɛ hu akɛ: Nyɛkanaa nii ní ja nyɛhaa wɔ! Nyɛkɛ wɔ awiea naadɔkɔmɔ wiemɔi, nyɛgbaa shishiumɔ saji moŋ!” (Yesaia 30:10) Yuda hiɛnyiɛlɔi lɛ kɛ famɔ ní amɛkɛha gbalɔi anɔkwafoi lɛ akɛ amɛkawie nii ní “ja,” loo anɔkwale, shi moŋ amɛwie nii ní ji “naadɔkɔmɔ wiemɔ” kɛ “shishiumɔ saji,” loo amale lɛ tsɔɔ akɛ amɛtoiiaŋ miifɛ̃lɛ̃ amɛ ni amɛmiitao ní ata mli aha amɛ. Amɛmiitao ní ajie amɛyi, jeee ní abu amɛ fɔ́. Yɛ amɛsusumɔ naa lɛ, esa akɛ gbalɔ fɛɛ gbalɔ ní sumɔɔɔ ní egba nibii ní amɛsumɔɔ ní amɛnu lɛ ‘aje gbɛ lɛ nɔ, ní egba kɛjɛ tempɔŋ lɛ nɔ.’ (Yesaia 30:11a) Esa akɛ ewie nibii ni baaŋɔɔ amɛtoi naa, loo kɛ́ jeee nakai lɛ, ekpa shiɛmɔ kwraa!
9 Mɛi ní teɔ shi woɔ Yesaia lɛ ma nɔ mi akɛ: “Nyɛhaa Israel Mɔ krɔŋkrɔŋ lɛ ajea wɔhiɛ kwraa!” (Yesaia 30:11b) Ha Yesaia akpa wiemɔ yɛ Yehowa, ni ji “Israel Mɔ krɔŋkrɔŋ lɛ” gbɛi anɔ! Sabala nɛɛ kɛkɛ po haa amɛmli fuɔ ejaakɛ tɛi ní nɔ kwɔlɔ ní Yehowa efolɔ eshwie shi lɛ haa amɛshihilɛ fɔŋ lɛ jeɔ kpo faŋŋ. Te Yesaia fee enii yɛ he eha tɛŋŋ? Ejaje akɛ: “Bɔ ni Israel Mɔ krɔŋkrɔŋ lɛ kɛɛ nɛ.” (Yesaia 30:12a) Yesaia shashaooo shi, shi moŋ ewie wiemɔi pɔtɛɛ ní mɛi ni teɔ shi woɔ lɛ lɛ sumɔɔɔ ní amɛnu lɛ. Ehaaa amɛwo ehe gbeyei. Mɛɛ nɔkwɛmɔnɔ fɛfɛo eji kɛha wɔ nɛkɛ! Kɛ́ eba lɛ akɛ esa akɛ ajaje Nyɔŋmɔ shɛɛ sane lɛ, esaaa akɛ Kristofoi ŋmɛɛɔ saji ahe ní akɛsáa kɔkɔɔkɔ. (Bɔfoi lɛ Asaji 5:27-29) Taakɛ Yesaia ji lɛ, amɛyaa nɔ amɛjajeɔ akɛ: ‘Bɔ ni Yehowa kɛɛ nɛ’!
Nibii ní Jɛɔ Atuatsemɔ Mli Baa
10, 11. Mɛni baajɛ Yuda atuatsemɔ lɛ mli aba?
10 Yuda ekpoo Nyɔŋmɔ Wiemɔ lɛ, ni ekɛ ehiɛ efɔ̃ amale nɔ, ni ekɛ ehe efɔ̃ “kutumpɔo” nɔ. (Yesaia 30:12b) Mɛni baajɛ mli aba? Yɛ nɔ najiaŋ ní Yehowa aaaje maŋ lɛ hiɛ kwraa taakɛ amɛsumɔɔ lɛ, ebaaha maŋ lɛ moŋ hiɛ akpata kwraa! Enɛ baaba trukaa, ni abaafee kɛmɔ shi hu, taakɛ Yesaia kɛ mfonirifeemɔ ma nɔ mi lɛ. Maŋ lɛ atuatsemɔ lɛ tamɔ “gbogbo ko ní kwɔ mli gbálɔ ní ekpa ní eheɔ egbee shi ní ekũu baa trukaa yɛ hiŋmɛitswaa mli lɛ.” (Yesaia 30:13) Taakɛ bɔ ni kɛ́ gbogbo ní kwɔ teŋ bɔi fuumɔ ní naagbee lɛ ebaaha gbogbo lɛ aku agbee shi lɛ, nakai nɔŋŋ Yesaia yinɔbii lɛ atuatsemɔ ní yaa nɔ efaa babaoo lɛ baaha maŋ lɛ abutu kwraa.
11 Yesaia kɛ mfonirifeemɔ kroko hu tsɔɔ bɔ ni hiɛkpatamɔ ní baa lɛ baaye emuu kwraa kɛmɔ shi lɛ mli akɛ: “Eeekũ lɛ tamɔ ajwaa gbɛshɔ̃lɔ gbɛ́ ní ajwaraa lɛ wɔtsɔwɔtsɔ ní ashwɛɛɛ eko, ní anáaa ŋɛsukó tete yɛ ekói lɛ ateŋ, ní akɛje la yɛ latɛ mli, loo akɛaayɛ nu yɛ nubuŋ lɛ.” (Yesaia 30:14) Yuda hiɛkpatamɔ lɛ baaye emuu diɛŋtsɛ, aahu akɛ nii ní he yɔɔ sɛɛnamɔ ko kwraa eshwɛŋ—anáŋ ŋɛsukó ní da bɔ ni sa po ní akɛbaaloo lamulu yɛ latɛ mli loo ní akɛbaayɛ nu yɛ nubu mli. Mɛɛ naagbee ní yɔɔ hiɛgbele nɛ! Mɛi ní tseɔ anɔkwa jamɔ hiɛ atua ŋmɛnɛ lɛ hu ahiɛkpatamɔ ní baa lɛ baaba trukaa ni ebaaye emuu kɛmɔ shi nakai nɔŋŋ.—Hebribii 6:4-8; 2 Petro 2:1.
Akpoo Hegbɛ ní Yehowa Kɛha Lɛ
12. Te Yuda bii lɛ aaafee tɛŋŋ amɛjo hiɛkpatamɔ naa foi?
12 Shi kɛlɛ, mɛi ni feɔ toiboo amɛhaa Yesaia lɛ baanyɛ amɛjo hiɛkpatamɔ ní baaba lɛ naa foi. Gbɛ ko yɛ ní amɛbaanyɛ amɛtsɔ nɔ amɛje mli. Gbalɔ lɛ tsɔɔ mli akɛ: “Bɔ ni Nuntsɔ Yehowa, Israel Mɔ krɔŋkrɔŋ lɛ, kɛɛ nɛ: Sɛɛkuu kɛ baa kɛ diŋŋfeemɔ mli nyɛyi aaaná wala yɛ, kpoofeemɔ kɛ hiɛnɔkamɔ mli nyɛaaná hewalɛ yɛ!” (Yesaia 30:15a) Yehowa efee klalo akɛ ebaahere ewebii lɛ ayiwala—kɛji amɛjie hemɔkɛyeli kpo kɛtsɔ “diŋŋfeemɔ” nɔ, loo amɛtsi amɛhe kɛjɛ mɔdɛŋ ní amɛaabɔ akɛ amɛaaná yiwalaheremɔ kɛtsɔ adesai akpaŋmɔi anɔ lɛ he, kɛ agbɛnɛ kɛtsɔ “kpoofeemɔ,” loo hekɛnɔfɔɔ ní amɛaaná yɛ Nyɔŋmɔ hewalɛ ní buɔ mɔ he lɛ mli, ní amɛhaaa gbeyeishemɔ aye amɛnɔ kunim lɛ. “Shi,” Yesaia kɛɛ gbɔmɛi lɛ akɛ, “nyɛkpɛlɛɛɛ.”—Yesaia 30:15b.
13. Yuda hiɛnyiɛlɔi lɛ kɛ amɛhiɛ fɔ̃ mɛni nɔ, ni ani nakai hekɛnɔfɔɔ lɛ sa?
13 Agbɛnɛ Yesaia tsɔɔ nibii amli jogbaŋŋ akɛ: “Ni nyɛkɛɛ akɛ: ‘Dabi! shi wɔɔtara okpɔŋɔi anɔ kɛjo foi’ no hewɔ lɛ foi kɛ̃ nyɛaajo! ni ‘wɔɔtara kooloi ní he yɔɔ oyá nɔ!’ no hewɔ lɛ mɛi ní aaatiu nyɛ lɛ hu ahe aaafee oyá!” (Yesaia 30:16) Yuda bii lɛ susuɔ akɛ okpɔŋɔi ní he yɔɔ oyá lɛ baafee amɛyiwalaheremɔ, shi jeee Yehowa. (5 Mose 17:16; Abɛi 21:31) Shi kɛlɛ, gbalɔ lɛ te shi ewo amɛ akɛ, amɛ hiɛnɔkamɔ lɛ baafee lakamɔ nɔ̃ ejaakɛ amɛhenyɛlɔi lɛ baanina amɛ. Amɛyi ní aaafá babaoo lɛ po yeŋ ebuaŋ amɛ. “Mɛi akpe aaajo foi yɛ mɔ kome too yiŋãa naa, nyɛaajo foi yɛ mɛi enumɔ yiŋãa naa.” (Yesaia 30:17a) Yuda asraafoi lɛ atsui baafã ni amɛbaajo foi yɛ henyɛlɔi fioo komɛi pɛ abolɔmɔ hewɔ.a Yɛ naagbee lɛ, shwɛɛnii fioo ko pɛ baahi shi, ni abaashi amɛ, “tamɔ tso kakadaŋŋ ko ní ma gɔŋ ko yiteŋ, loo tamɔ aflaŋaa ní ma gɔŋkpɔ ko nɔ.” (Yesaia 30:17b) Lɛɛlɛŋ hu, taakɛ agba afɔ̃ shi lɛ, beni akpata Yerusalem hiɛ yɛ afi 607 D.Ŋ.B. lɛ, shwɛɛnii fioo ko pɛ yi ná wala.—Yeremia 25:8-11.
Miishɛjemɔ yɛ Fɔbuu Be Mli
14, 15. Mɛɛ miishɛjemɔ Yesaia 30:18 lɛ mli wiemɔi lɛ kɛhaa Yuda maŋ lɛ mli bii ni hi shi yɛ blema bei lɛ amli lɛ kɛ anɔkwa Kristofoi hu ŋmɛnɛ?
14 Beni wiemɔi ní hiɛdɔɔ yɔɔ mli nɛɛ jijeɔ lolo yɛ mɛi ni boɔ Yesaia toi lɛ atoiiaŋ lɛ, agbɛnɛ hewalɛ ní yɔɔ eshɛɛ sane lɛ mli lɛ tsake. Amanehulu he gbeyeiwoo lɛ tsake ni ebatsɔ jɔɔmɔi ahe shiwoo. “No hewɔ lɛ Yehowa miimɛ̃, koni eduro nyɛ, ni no hewɔ lɛ ewó ehe nɔ, koni ena nyɛ mɔbɔ; ejaakɛ Yehowa lɛ, kojomɔ Nyɔŋmɔ ni; ajɔɔ mɛi fɛɛ ní mɛɔ lɛ lɛ!” (Yesaia 30:18) Mɛɛ miishɛjemɔ wiemɔi nɛ! Yehowa ji Tsɛ ní musuŋ tsɔɔ lɛ, ní sumɔɔ ní eye ebua ebii. Enáa mɔbɔnalɛ kpojiemɔ he miishɛɛ.—Lala 103:13; Yesaia 55:7.
15 Nɛkɛ wiemɔi ní haa mɔ hiɛnɔkamɔ nɛɛ kɔɔ Yudafoi shwɛɛnii ni ajɛ mɔbɔnalɛ mli aha amɛyi ná wala kɛtsɔ Yerusalem hiɛkpatamɔ lɛ mli yɛ afi 607 D.Ŋ.B. lɛ, kɛ mɛi fioo ní ku amɛsɛɛ kɛtee Shiwoo Shikpɔŋ lɛ nɔ yɛ afi 537 D.Ŋ.B. lɛ ahe. Shi kɛlɛ, gbalɔ lɛ wiemɔi lɛ shɛjeɔ Kristofoi hu amii ŋmɛnɛ. Ekaiɔ wɔ akɛ Yehowa baawó “ehe nɔ” yɛ wɔ hewɔ, ni ekɛ jeŋ fɔŋ nɛɛ baaba naagbee. Anɔkwafoi ní jáa lɛ lɛ baanyɛ aná hekɛnɔfɔɔ akɛ Yehowa—ni ji “kojomɔ Nyɔŋmɔ” lɛ—eŋmɛŋ Satan je lɛ gbɛ ní ehi shi gbi kome po kɛteke he ni jalɛ sane biɔ ní ehi shi kɛyashi lɛ. No hewɔ lɛ, “mɛi fɛɛ ní mɛɔ lɛ lɛ” yɛ yiŋtoo babaoo ní amɛaadamɔ nɔ amɛná miishɛɛ.
Yehowa Shɛjeɔ Ewebii Amii Kɛtsɔ Sɔlemɔi Ahetoohamɔ Nɔ
16. Mɛɛ gbɛ nɔ Yehowa tsɔɔ eshɛjeɔ mɛi ní nijiaŋ eje wui lɛ amii?
16 Shi, ekolɛ mɛi komɛi anijiaŋ baaje wui akɛni kpɔmɔ lɛ baaa amrɔ nɔŋŋ taakɛ amɛkpa gbɛ lɛ hewɔ. (Abɛi 13:12; 2 Petro 3:9) Eba akɛ amɛaaná miishɛjemɔ kɛjɛ Yesaia wiemɔi ní nyiɛ sɛɛ, ní maa Yehowa subaŋ lɛ fã krɛdɛɛ ko nɔ mi lɛ mli. “Shi bo maŋ, ní oyɔɔ Zion kɛ Yerusalem: Ofóŋ dɔŋŋ! Duromɔ moŋ eeeduroo yɛ obolɔmɔ gbee lɛ naa; amrɔ pɛ ní eeenu lɛ eeehereo nɔ!” (Yesaia 30:19) Yesaia jie musuŋtsɔlɛ kpo yɛ wiemɔi nɛɛ amli kɛtsɔ tsakemɔ ní etsake kɛjɛ “nyɛ,” ní tsɔɔ mɛi pii ní ekɛtsu nii yɛ kuku 18 lɛ, kɛtee ‘bo,’ ní tsɔɔ mɔ kome ní ekɛtsu nii yɛ kuku 19 lɛ nɔ. Kɛ́ Yehowa miishɛje mɛi ní ehao lɛ amii lɛ, ekɛ mɔ fɛɛ mɔ yeɔ aŋkroaŋkro. Ákɛ Tsɛ lɛ, ebiii ebi ní nijiaŋ eje wui lɛ akɛ, ‘Mɛni hewɔ ohe waaa tamɔ onyɛmi nuu lɛ?’ (Galatabii 6:4) Shi moŋ, eboɔ amɛteŋ mɔ fɛɛ mɔ toi jogbaŋŋ diɛŋtsɛ. Yɛ anɔkwale mli lɛ, “amrɔ pɛ ní eeenu lɛ [eeehere] nɔ!” Mɛɛ wiemɔi ní woɔ mɔ hewalɛ nɛ! Mɛi ní nijiaŋ eje wui lɛ baanyɛ aná hewalɛ babaoo kɛji amɛsɔle amɛha Yehowa.—Lala 65:3.
Bó Nyɔŋmɔ Gbee ní Kudɔɔ Mɔ lɛ Toi Kɛtsɔ E-Wiemɔ lɛ Kanemɔ Nɔ
17, 18. Yehowa kɛ gbɛtsɔɔmɔ haa yɛ jaramɔ bei amli po yɛ mɛɛ gbɛ nɔ?
17 Beni Yesaia tsáa ewiemɔ lɛ nɔ lɛ, ekai etoibolɔi lɛ akɛ haomɔ baaba. Gbɔmɛi lɛ baaná “amanehulu aboloo kɛ haomɔ nu.” (Yesaia 30:20a) Haomɔ kɛ nɔnyɛɛ ní amɛbaaná beni amɛyɔɔ káwoo shishi lɛ batsɔ tamɔ nɔ ko ní amɛle jogbaŋŋ, taakɛ aboloo kɛ nu ji lɛ. Ni nakai po lɛ, Yehowa efee klalo akɛ ebaahere mɛi ní yɔɔ jalɛ tsuii lɛ ayiwala. “O-Tsɔɔlɔ Kpeteŋkpele lɛ kɛ ehe eteeŋ dɔŋŋ, ni ohiŋmɛii aaatsɔmɔ hiŋmɛii ní miina o-Tsɔɔlɔ Kpeteŋkpele lɛ. Ni otoii aaanu wiemɔ ko yɛ osɛɛ akɛ: ‘Gbɛ lɛ nɛ. Nyɛnyiɛa nɔ,’ ninejurɔgbɛ nyɛtsɔ́ jio, abɛkugbɛ nyɛtsɔ́ jio.”—Yesaia 30:20b, 21, “NW.”b
18 Yehowa ji “Tsɔɔlɔ Kpeteŋkpele” lɛ. Tsɔɔlɔ ko bɛ ní kɛ lɛ yeɔ egbɔ. Shi, te gbɔmɛi aaafee tɛŋŋ ‘amɛna’ lɛ ní ‘amɛnu’ egbee hu? Yehowa jieɔ ehe kpo kɛtsɔɔ egbalɔi lɛ, ní aŋmala amɛwiemɔi yɛ Biblia lɛ mli lɛ anɔ. (Amos 3:6, 7) Ŋmɛnɛ, kɛ́ ejálɔi anɔkwafoi lɛ kane Biblia lɛ, efeɔ tamɔ nɔ ni Nyɔŋmɔ gbee ní tamɔ tsɛ nɔ̃ lɛ miitsɔɔ amɛ gbɛ ní amɛnyiɛ nɔ, ní eewo amɛ hewalɛ ní amɛtsake amɛshihilɛ gbɛ kɛ amɛjeŋba koni amɛnyɛ amɛnyiɛ nɔ. Esa akɛ Kristofonyo fɛɛ Kristofonyo abo Yehowa toi jogbaŋŋ beni ewieɔ kɛtsɔɔ Biblia lɛ baafai lɛ anɔ, kɛ agbɛnɛ, kɛtsɔɔ Biblia kasemɔ woji ní “tsulɔ anɔkwafo kɛ nilelɔ” lɛ kɛhaa lɛ hu nɔ lɛ. (Mateo 24:45-47) Ha mɔ fɛɛ mɔ kɛ ehe awo Biblia lɛ kanemɔ mli waa, ejaakɛ ‘eyiwala ni.’—5 Mose 32:46, 47; Yesaia 48:17.
Susumɔ Wɔsɛɛ Be Mli Jɔɔmɔi Ahe
19, 20. Mɛɛ jɔɔmɔi asaa ato wɔsɛɛ kɛha mɛi ní boɔ Tsɔɔlɔ Kpeteŋkpele lɛ gbee toi lɛ?
19 Mɛi ni boɔ Tsɔɔlɔ Kpeteŋkpele lɛ gbee toi lɛ baashɛrɛ amɛ amagai lɛ amɛshwie, ni amɛbaabu amɛ akɛ nibii ni yɔɔ nyaŋemɔ. (Kanemɔ Yesaia 30:22.) No sɛɛ lɛ, mɛi ní feɔ toiboo lɛ baaná jɔɔmɔi ní yɔɔ naakpɛɛ mli ŋɔɔmɔ. Yesaia tsɔɔ bɔ ni jɔɔmɔi nɛɛ ji, taakɛ aŋma yɛ Yesaia 30:23-26 lɛ, ni ji gbalɛ ni yɔɔ miishɛɛ ní kɔɔ sɛɛkuu kɛbaa lɛ he, ni ná eklɛŋklɛŋ mlibaa beni Yudafoi shwɛɛnii ko ku amɛsɛɛ kɛjɛ nomŋɔɔ mli yɛ afi 537 D.Ŋ.B. lɛ. Ŋmɛnɛ, gbalɛ nɛɛ yeɔ ebuaa wɔ ni wɔnaa jɔɔmɔi ní yɔɔ naakpɛɛ ní Mesia lɛ kɛbaa yɛ mumɔŋ paradeiso lɛ mli bianɛ, kɛ nɔ ni ekɛbaaba Paradeiso diɛŋtsɛ ní baaba lɛ hu mli.
20 “Eeeha nugbɔ anɛ ashwie odumɔnii ní odũ yɛ oshikpɔŋ lɛ nɔ lɛ kɛ shikpɔŋ lɛ nibaa nii lɛ amli niyenii lɛ nɔ, ni eeefee niyenii kpakpa ní ŋɔɔ. Nakai gbi lɛ olɛ̀ɛ kooloi lɛ aaaye nii yɛ lɛ̀ɛhei ní dara; ni tsinai kɛ teji bii lɛ ní tsuɔ ŋmɔjiaŋ nii lɛ aaaye niyenii ní yɔɔ srɛ̃msrɛ̃m, ní akɛ tsene kɛ shaa nɔ̃ esha mli.” (Yesaia 30:23, 24) “Niyenii kpakpa ní ŋɔɔ”—ni ji niyenii ní hewalɛ yɔɔ mli—baafee adesai adaa gbi niyenii titri. Shikpɔŋ lɛ baaba nii babaoo aahu akɛ kooloi lɛ po baaná he sɛɛ. Akɛ “niyenii ní yɔɔ srɛ̃msrɛ̃m”—ni ji kooloi aniyenii ní akɛtoɔ kɛhaa bei pɔtɛɛ komɛi ní efɔɔɔ kaa lɛ, baalɛ kooloi lɛ. Ni ‘asha’ niyenii nɛɛ mli po—ni ji nifeemɔ ní akɛtsuɔ ŋmãa ní akɛto ní adesai baaye lɛ pɛ he nii lɛ. Kwɛ sane mlitsɔɔmɔi ni yɔɔ miishɛɛ ní Yesaia kɛhaa yɛ biɛ ní tsɔɔ bɔ ni Yehowa jɔɔmɔi ní ekɛbaaba adesai anɔkwafoi lɛ anɔ lɛ baafa babaoo aha!
21. Tsɔɔmɔ bɔ ni jɔɔmɔi ní baaba lɛ baaye emuu kwraa eha lɛ mli.
21 “Faai wuji kɛ faai bibii aaaba gɔji grɔŋŋi kɛ gɔŋkpɔi ní kwɔlɔ lɛ fɛɛ nɔ.” (Yesaia 30:25a)c Yesaia kɛ mfonirifeemɔ wiemɔ ní mli kã shi faŋŋ tsu nii ni ekɛtsɔɔ bɔ ni Yehowa jɔɔmɔ lɛ baaye emuu eha. Nu hɔmɔ bɛ he ko—nu ji nii ni he hiaa waa, ní baaho, jeee yɛ nu jɔɔi lɛ amli pɛ kɛkɛ, shi moŋ yɛ gɔŋ fɛɛ gɔŋ hu nɔ, yɛ “gɔji grɔŋŋi kɛ gɔŋkpɔi ní kwɔlɔ lɛ [po] fɛɛ nɔ.” Hɛɛ, hɔmɔ baafee tsutsu nii ní eho etee. (Lala 72:16) Kɛfata he lɛ, gbalɔ lɛ gbala ejwɛŋmɔ kɛtee nibii ní nɔ kwɔlɔ fe gɔji tete po nɔ. “Nyɔɔŋtsere kpɛmɔ aaatamɔ hulu kpɛmɔ, ni hulu aaakpɛ́ toi kpawo, tamɔ gbii kpawo mli kpɛ́mɔ, gbi ní Yehowa aaafimɔ emaŋ lɛ pilamɔi anɔ, ní eeetsá amɛyii lɛ naa faji lɛ.” (Yesaia 30:26) Mɛɛ gbalɛ fɛfɛo nɛɛ naagbee ní yɔɔ miishɛɛ waa diɛŋtsɛ nɛ! Nyɔŋmɔ anunyam lɛ baakpɛ́ yɛ egbojee lɛ fɛɛ mli. Jɔɔmɔi ní asaa ato Nyɔŋmɔ jálɔi anɔkwafoi lɛ baafa aahu kɛteke nɔ kwraa—shii kpawo—fe nɔ fɛɛ nɔ ní amɛná mli niiashikpamɔ dã.
Kojomɔ kɛ Miishɛɛ
22. Kɛ́ akɛto jɔɔmɔi ní baaba anɔkwafoi lɛ anɔ lɛ he lɛ, mɛni Yehowa esaa eto mɛi fɔji lɛ?
22 Hewalɛ ní yɔɔ Yesaia shɛɛ sane lɛ mli lɛ tsake ekoŋŋ. Ekɛɛ: “Naa!,” tamɔ nɔ ni eetao egbala etoibolɔi lɛ ajwɛŋmɔ. “Yehowa gbɛi lɛ jɛ shɔŋŋ miiba, emlifu lɛ miitso, ní eeje lasu kpii; enaabu eyi obɔ̃ kɛ mlila, elilɛi tamɔ la ní shãa nii.” (Yesaia 30:27) Kɛbashi amrɔ nɛɛ, Yehowa kɛ ehe woko amɛsaji amli, ni eŋmɛ ewebii ahenyɛlɔi lɛ agbɛ ni amɛkɔ amɛ diɛŋtsɛ amɛgbɛ. Amrɔ nɛɛ eetsi eebɛŋkɛ—tamɔ nugbɔnɛmɔ ní naa wa ní miibɛŋkɛ fiofio—koni ebatsu kojomɔ he nii. “Emumɔ ní emuɔ lɛ tamɔ faa ní eyi kɛbatá kuɛ, ni ekɛ hiɛkpatamɔ shaa nɔ̃ aaasha jeŋmaji lɛ amli, ni ekɛ gbɛdũu daaŋ dade aaawo majimaji lɛ adaaŋ.” (Yesaia 30:28) “Faa ní eyi” baabɔle Nyɔŋmɔ webii ahenyɛlɔi lɛ ahe kɛbaakpe, ni abaahoso amɛ waa ‘kɛya kɛba kɛ shaa nɔ̃,’ ni akɛ “daaŋ dade” baawo amɛdaaŋ ní akɛgbala amɛ kɛba. Abaakpata amɛhiɛ.
23. Mɛni haa Kristofoi náa “tsuijurɔ” ŋmɛnɛ lɛ?
23 Hewalɛ ni yɔɔ Yesaia wiemɔ mli lɛ tsake ekoŋŋ beni etsɔɔ jálɔi anɔkwafoi ní baaku amɛsɛɛ gbi ko kɛba amɛshikpɔŋ nɔ ekoŋŋ lɛ ashihilɛ ní yɔɔ miishɛɛ lɛ. “Nyɛaalá lala ko tamɔ bɔ ni aláa nyɔɔŋ kɛ́ aaye gbi jurɔ krɔŋkrɔŋ lɛ; nyɛaaná tsuijurɔ hu, tamɔ mɛi ní nyiɛɔ kɛ bɛlɛkpãmɔ kɛyaa Yehowa gɔŋ lɛ nɔ, kɛyaa Israel tɛsaa lɛ nɔ lɛ.” (Yesaia 30:29) Anɔkwa Kristofoi náa “tsuijurɔ” ní tamɔ nakai mli ŋɔɔmɔ ŋmɛnɛ beni amɛsusuɔ Satan je lɛ kojomɔ ní baa; hebuu ní Yehowa, ni ji ‘yiwalaheremɔ Tɛsaa’ lɛ kɛhaa amɛ; kɛ jɔɔmɔi ní Maŋtsɛyeli lɛ kɛbaaba wɔsɛɛ lɛ ahe lɛ.—Lala 95:1.
24, 25. Yesaia gbalɛ lɛ maa bɔ ni Ashur kojomɔ ní baa lɛ baafee kojomɔ diɛŋtsɛ lɛ nɔ mi yɛ mɛɛ gbɛ nɔ?
24 Yɛ miishɛɛ wiemɔi nɛɛ asɛɛ lɛ, Yesaia ku sɛɛ kɛtee saneyitso ni ji kojomɔ lɛ nɔ ekoŋŋ ni etsɔɔ yiŋtoo ní yɔɔ Nyɔŋmɔ mlifu lɛ sɛɛ. “Yehowa aaaha anu enunyam gbee lɛ, ni eeeha ana enine ní baa shi lɛ, kɛ emlifu ní naa wa kɛ lalilɛi ní shãa nii, kɛ nugbɔnɛmɔ kɛ ahum kɛ nyɔŋmɔŋtɛi. Ejaakɛ Yehowa gbee lɛ aaaha Ashur he akpokpo, beni ekɛ tso aaayi lɛ lɛ.” (Yesaia 30:30, 31) Yesaia kɛ sane mlitsɔɔmɔ ní mli kã shi faŋŋ nɛɛ miima bɔ ni Nyɔŋmɔ kojomɔ baaba Ashur nɔ diɛŋtsɛ lɛ nɔ mi. Yɛ naagbee lɛ, Ashur baadamɔ Nyɔŋmɔ hiɛ ni ehe baakpokpo beni enaa ekojomɔ ni ji ‘enine ni baa shi lɛ.’
25 Gbalɔ lɛ tee nɔ akɛ: “Tso ní ato ní Yehowa kɛbaayi lɛ lɛ, tswaa fɛɛ tswaa lɛ mĩji kɛ saŋkui aaafata he, ni eeetsɔ eninefɔ̃ɔ mli ekɛ lɛ aaawu. Ejaakɛ asaa shãahe [Tofet] ato jeeŋmɔ beebe, asaa ato maŋtsɛ lɛ, ekwɔ, elɛɛ; laiku ní yɔɔ jɛi lɛ la kɛ lai babaoo yɛ mli, ni Yehowa mumɔ ní emuɔ ní tamɔ swɔɔ faa lɛ aaama naa la.” (Yesaia 30:32, 33) Akɛ Tofet, ní yɔɔ Hinom Jɔɔ lɛ mli lɛ, miitsu nii yɛ biɛ ákɛ mfonirifeemɔŋ he ko ní la tsoɔ yɛ. Yesaia kɛ tsɔɔmɔ ní etsɔɔ akɛ Ashur baagbe naa yɛ jɛmɛ lɛ miima hiɛkpatamɔ ní baaba nakai jeŋmaŋ lɛ nɔ trukaa, ní ji hiɛkpatamɔ kwraa kɛmɔ shi lɛ nɔ mi.—Okɛto 2 Maŋtsɛmɛi 23:10 he.
26. (a) Yehowa sane jajemɔi ní ekɛshi Ashur lɛ kɔɔ ŋmɛnɛŋmɛnɛ beaŋ hu he yɛ mɛɛ gbɛ nɔ? (b) Kristofoi ní yɔɔ ŋmɛnɛ lɛ yaa nɔ amɛmɛɔ Yehowa yɛ mɛɛ gbɛ nɔ?
26 Eyɛ mli akɛ ajaje kojomɔ shɛɛ sane nɛɛ ashi Ashur moŋ, shi bɔ ni Yesaia gbalɛ lɛ he hiaa ha lɛ yaa shɔŋŋ fe nakai. (Romabii 15:4) Kɛ́ wɔɔkɛɛ lɛ, Yehowa baajɛ shɔŋŋ eba ekoŋŋ ni ebaayi ni ebaaloo mɛi fɛɛ ní nyɛɔ ewebii anɔ lɛ, ni ebaahoso amɛ, ni ebaawo amɛ manyofɛlɛ. (Ezekiel 38:18-23; 2 Petro 3:7; Kpojiemɔ 19:11-21) Eba akɛ nakai gbi lɛ aaaba oya! Shi dani eeeba lɛ, Kristofoi kɛ hehiamɔ miimɛ kpɔmɔ gbi lɛ. Amɛnáa hewalɛwoo kɛjɛɔ wiemɔi ní mli kã shi faŋŋ, ní aŋmala yɛ Yesaia yitso 30 lɛ hesusumɔ mli. Wiemɔi nɛɛ woɔ Nyɔŋmɔ tsuji hewalɛ ni amɛbu sɔlemɔ hegbɛ ní amɛyɔɔ lɛ, ni amɛkɛ amɛhe awo Biblia lɛ kasemɔ mli, ni amɛjwɛŋ Maŋtsɛyeli jɔɔmɔi ní baaba lɛ ahe. (Lala 42:2, 3; Abɛi 2:1-6; Romabii 12:12) Enɛ hewɔ lɛ, Yesaia wiemɔi lɛ yeɔ buaa wɔteŋ mɔ fɛɛ mɔ koni wɔya nɔ wɔmɛ Yehowa.
[Shishigbɛ niŋmai]
a Kadimɔ akɛ eji Yuda ye anɔkwa kulɛ, nɔ ni ba amɛnɔ lɛ baŋ.—3 Mose 26:7, 8.
b Biɛ pɛ ji he ni atsɛɔ Yehowa yɛ ákɛ “Tsɔɔlɔ Kpeteŋkpele” yɛ Biblia lɛ mli.
c Yesaia 30:25b kaneɔ akɛ: “Yɛ ta mli gbee kpeteŋkpele gbi lɛ nɔ, beni mɔji ní kwɔlɔ lɛ aaagbeegbee shi lɛ.” Yɛ klɛŋklɛŋ mlibaa lɛ mli lɛ, ekolɛ enɛ kɔɔ Babilon shigbeemɔ ní gbele gbɛ kɛha Israel koni amɛbaná jɔɔmɔi ní agba afɔ̃ shi yɛ Yesaia 30:18-26 lɛ mli ŋɔɔmɔ lɛ he. (Kwɛmɔ kuku 19 lɛ.) Ekolɛ ekɔɔ hiɛkpatamɔ ní baaba yɛ Harmagedon, ní baaha jɔɔmɔi nɛɛ anyɛ aná amɛmlibaa ní da fe fɛɛ yɛ jeŋ hee lɛ mli lɛ hu he.
[Mfonirii ni yɔɔ baafa 305]
Yɛ Mose gbii lɛ amli lɛ, Israelbii lɛ ye amɛhe kɛjɛ Mizraim. Yɛ Yesaia gbii lɛ amli lɛ, Yuda tee Mizraim kɛha yelikɛbuamɔ
[Mfoniri ni yɔɔ baafa 311]
‘Faai bibii aaaba gɔŋkpɔi ní kwɔlɔ lɛ fɛɛ nɔ’
[Mfoniri ni yɔɔ baafa 312]
Yehowa baaba kɛ ‘mlifu ní miitso, ní miije lasu kpii’