Abobaahe yɛ Kɔɔyɔɔ Naa
OBAANYƐ ona kowei ko ni ti ni atsɛɔ lɛ alps nɔ fɔfɔi yɛ alps gɔji ni yɔɔ Europa shɔŋŋ lɛ nɔ. Bei pii lɛ, nɛkɛ alps nɔ fɔfɔi kpitibii nɛɛ kwɛ̃ɔ yɛ koo hayii mli ni ehàa shikpɔŋ lɛ nɔ fɛɛ kɛha hebuu kɛmiijɛ ahum ni tswaa waa yɛ gɔŋ lɛ nɔ lɛ naa. Ahum ni naa wa waa lɛ gbaa alps fɔfɔii lɛ anaa kɛtsɔ kɔɔyɔŋ dɔlɛ loo ŋanii ni ehaa ebaa shi lɛ nɔ, ní ehaa kɔɔyɔɔ kɛ sũ lɛ mli gbiɔ, ní ejieɔ faji lɛ akpo.
Bei pii lɛ, alps nɔ fɔfɔi lɛ joɔ ahum ni fiteɔ nii lɛ naa foi kɛtsɔ kwɛ̃ ni ekwɛɔ̃ yɛ tesaai ni mli egbala lɛ nɔ. Eyɛ mli akɛ sũ ni yɔɔ nɛkɛ tɛsaai nɛɛ amli lɛ faaa moŋ, shi fɔji ni yɔɔ tɛsaai lɛ amli lɛ feɔ hebuu nɔ̃ yɛ ahum lɛ naa ni ehaa nu nyɛɔ ehiɔ tso lɛ mli. Akɛni alps fɔfɔii lɛ teeɔ amɛhe kwraa ni anaaa amɛ yɛ afi mli nyɔji babaoo mli hewɔ lɛ, yɛ hulutsoo be mli lɛ, nɛkɛ fɔfɔii nɛɛ sáa gɔji ni amɛyaba abo yɛ mli nɛɛ nɔ kɛ fɔfɔii tsuji ni kpɛlɛɔ.
Gbalɔ Yesaia tsɔɔ mli akɛ Nyɔŋmɔ baahala “lumɛi,” ni amɛteŋ mɔ fɛɛ mɔ aaatsɔ tamɔ “abobaahe yɛ kɔɔyɔɔ naa.” (Yesaia 32:1, 2) Yɛ Maŋtsɛ, ni ji Yesu Kristo gbɛtsɔɔmɔ shishi lɛ, nɛkɛ mumɔŋ lumɛi, loo nɔkwɛlɔi nɛɛ baatsɔmɔ tamɔ tɛsaa ni ma shi shiŋŋ, nɔ ni ma shi shiŋŋ yɛ haomɔ loo amanehulu bei amli. Beni nyɛmimɛi lɛ kɛ shihilɛ loo naagbai ni mli wawai ekpe lɛ, amɛbaaha amɛ abobaahe ni abaanyɛ akɛ he afɔ̃ nɔ, ni amɛbaaye amɛbua mɛi ni ehia amɛ lɛ bɔni afee ni amɛjɛ Nyɔŋmɔ Wiemɔ lɛ mli amɛbu amɛmumɔŋ nubu ni amɛyɔɔ lɛ he.
Ahum ni bafeɔ yiwaa, nijiaŋwujee, loo hela baanyɛ atswa Kristofonyo ko, ni ebaanyɛ eha ehemɔkɛyeli agbɔjɔ kɛji abuuu he. Kristofoi onukpai baanyɛ amɛkɛ hebuu aha kɛtsɔ enaagba lɛ ní amɛaabo toi jogbaŋŋ, ni amɛkɛ ŋaawoo ni damɔ Biblia lɛ nɔ, kɛ hewalɛwoo loo yelikɛbuamɔ ni anyɛɔ atsuɔ he nii aha lɛ nɔ. Taakɛ Kristo Yesu, amɛ Maŋtsɛ ni ahala lɛ lɛ ji lɛ, amɛmiisumɔ ni amɛye amɛbua mɛi ni “amɛfee yuyaa” lɛ. (Mateo 9:36) Ni amɛsumɔɔ ni amɛye amɛbua mɛi krokomɛi ni ahum ni ji apasa tsɔɔmɔ eye amɛ awui lɛ. (Efesobii 4:14) Nakai yelikɛbuamɔ yɛ be ni sa mli lɛ baanyɛ afee nɔ ni sɛɛnamɔ yɔɔ he waa diɛŋtsɛ.
Miriam kɛɛ akɛ: “Mibote shihilɛ ko ni piŋɔ mɔ mli yɛ miwala shihilɛ mli beni nanemɛi komɛi ni bɛŋkɛ mi kpaakpa lɛ shi anɔkwale lɛ, ni nakai beaŋ nɔŋŋ lɛ, mitsɛ ná hela ni haa lá hoɔ yɛ aŋsɔ mli lɛ. Bɔni afee ni maye mihaomɔ lɛ nɔ lɛ, mije shishi mikɛ gbekɛ nuu ko ni eji jeŋnyo lɛ bɔi nyiɛmɔ. No sɛɛ etsɛɛɛ lɛ, beni minu he akɛ misaaa lɛ, mikɛɛ asafoŋ onukpai lɛ akɛ mikpɛ miyiŋ akɛ mashi anɔkwale lɛ, akɛni miyɔse diɛŋtsɛ akɛ Yehowa nyɛŋ ajie suɔmɔ kpo atsɔɔ mi lɛ hewɔ.
“Yɛ nakai jaramɔ be lɛ mli lɛ, onukpa ko ni yɔɔ musuŋtsɔlɛ lɛ kai mi afii abɔ ni mikɛsɔmɔ ákɛ daa gbɛgbalɔ sɔɔlɔ lɛ. Ekɛɛ mi akɛ enyaa anɔkwayeli ni mijieɔ lɛ kpo lɛ he be fɛɛ be, ni ekɛ mlihilɛ kɛɛ mi ní miŋmɛ onukpai lɛ agbɛ koni amɛye amɛbua mi, ni amɛma suɔmɔ ni Yehowa yɔɔ kɛha mi lɛ nɔ mi. Suɔmɔ mli ni amɛjɛ ni amɛsusu mihe yɛ nakai jaramɔ be lɛ mli lɛ fee tamɔ “abobaahe” kɛha mi yɛ mumɔŋ ahum ni tswaa yɛ mihe hamahama lɛ naa. Yɛ nyɔŋ kome mli lɛ, mifo mikɛ minaanyo nuu lɛ bɔɔ lɛ mli, ni mitée nɔ minyiɛ yɛ anɔkwale gbɛ lɛ nɔ kɛbashi ŋmɛnɛ.”
Onukpai lɛ nuɔ he akɛ awo amɛ nyɔmɔ, kɛji amɛna akɛ nanemɛi Kristofoi miishwere yɛ mumɔŋ lɛ, fɛɛ jɛ hebuu ni akɛhaa amɛ yɛ be ni sa mli lɛ hewɔ lɛ. Ni nɛkɛ ‘abobaahei’ nɛɛ haa wɔtsɔɔ hiɛ wɔnaa mumɔŋ yelikɛbuamɔ babaoo ni wɔbaanyɛ wɔná mli ŋɔɔmɔ yɛ Kristo Afii Akpe Nɔyeli lɛ mli lɛ.