Aha Amɛ Hewalɛ Ni Fe Adesa Nɔ̃

“Hewalɛ ni fe adesa nɔ̃ lɛ [ji] Nyɔŋmɔ nɔ̃ shi jeee nɔ ní jɛ wɔ diɛŋtsɛ wɔmli.”​—2 KORINTOBII 4:​7, NW.

 1. Mɛni Yehowa etsɔ hiɛ ele yɛ wɔ ŋmɛnɛŋmɛnɛ yinɔsane be nɛɛ he, ni mɛɛ gbɛ nɔ etsɔ ebɔ etsuji kɔkɔ yɛ he?

¹ YEHOWA le haomɔ bei ni baaba shikpɔŋ nɔ jeŋmaji fɛɛ nɔ lɛ kɛjɛ blema beebe. Etsɔ hiɛ ele akɛ yɛ naagbee lɛ adesa pɛsɛmkunya kɛ yiwalɛ kɛ fitemɔ kɛ efɔŋfeemɔ ni efa babaoo nɛɛ baaba. Yehowa mumɔ lɛ tsirɛ bɔfo Paulo ni ekɛ kɔkɔbɔɔ ni mli ka shi faŋŋ nɛɛ ha: “Shi na enɛ ole akɛ naagbee gbii anɔ lɛ jaramɔ bei baaba. Ejaakɛ gbɔmɛi aaatsɔmɔ hesuɔlɔi, shikasuɔlɔi, shwalɔi, hewolɔi, musubɔlɔi, fɔlɔi anɔ toigbolɔi, trumui, mɛi ni he tseee, mɛi ni edɔɔɔ mɔ he, kpaŋmɔ mlikulɔi, oshekuyelɔi, mɛi ni nyɛɛɛ amɛkɔnɔ nɔ amɛye, mɛi ni hiɛ yɔɔ la, mɛi ni sumɔɔɔ ekpakpa, ‘sɛɛgbɛtsɔɔlɔi, yiwalɔi, henɔwolɔi, mɛi ni sumɔɔ shwɛmɔ kɛ ŋɔɔmɔ fe Nyɔŋmɔ, mɛi ni hiɛ Nyɔŋmɔ jamɔ su, shi amɛkwa emli hewalɛ lɛ.” (2 Timoteo 3:​1-5) Lɛlɛŋ akɛ eji be ni oshara yɔɔ mli kɛha mɛi ni taoɔ akɛ amɛaasɔmɔ anɔkwa Nyɔŋmɔ lɛ!

 2. Ani ebaafee mlɛo kɛha Yehowa odasefoi akɛ amɛaatsu eyiŋtoo kɛha amɛ lɛ he nii, ni mɛni he baahia amɛ dani amɛye omanye?

² Shi kɛlɛ shihilɛi ni tamɔ nɛkɛ mli Yehowa to eyiŋ akɛ ebaaha ajaje egbɛi lɛ kɛ Maŋtsɛyeli lɛ yɛ shikpɔŋ lɛ fɛɛ nɔ yɛ. Namɛi baafee enɛ? Kɛtsɔ gbɔmɛi ni ejie egbɛi kɛ eyiŋtoo ni tsɔɔ nɔ̃ ko pɔtɛɛ lɛ etsɔɔ amɛ lɛ anɔ​—Yehowa Odasefoi. (Yesaia 43:​10-12) Etsɔ hiɛ ele akɛ amɛkɛ shitee kɛ woo ni jɛ nɔyelɔi ni baasusu Nyɔŋmɔ Maŋtsɛyeli lɛ he akɛ nɔ ni tswaa amɛ mpoa loo nɔ ni kɛ amɛ shiɔ mple lɛ baakpe. (Lala 2:​2, 3) Ele hu akɛ edasefoi lɛ baatsɔ piŋmɔi kɛ naagbai ni baa adesai fɛɛ nɔ lɛ mli. Hewalɛ ni fe nɔ ni amɛ diɛŋtsɛ lɛ amɛbaanyɛ amɛbua naa he baahia amɛ. Ani amɛnyɔŋmɔ lɛ to gbɛjianɔ kɛha nɛkɛ hiamɔ nɛɛ?

 3. Gbɛjianɔ ni Yehowa eto kɛha etsuji yɛ jaramɔ bei fɛɛ amli lɛ tamɔ mɛɛ gbɛjianɔ ni ato aha bɔfo Paulo?

³ Bɔfo Paulo niiashikpamɔi lɛ kɛ nakai sanebimɔ lɛ hetoo haa. Aŋmala osharai ni ekɛkpe lɛ ekomɛi aha wɔ yɛ 2 Korintobii 11:​23-27. Akɛni Yehowa kɛ nitsumɔ wo Paulo dɛŋ akɛ jeŋmaji lɛ bɔfo kɛ tsɔɔlɔ hewɔ lɛ, nakai nitsɔɔmɔ nitsumɔ lɛ ji nɔ ni egbala ejwɛŋmɔ kɛtee nɔ titri. (Romabii 11:13) Shi te fee tɛŋŋ ni enyɛ eje nakai osharai lɛ fɛɛ mli ni egbe nitsumɔ ni akɛwo edɛŋ lɛ naa hu? Yehowa haa ehiŋmɛi hiɔ etsulɔ anɔkwafo lɛ nɔ ni ejieɔ lɛ, yɛ bei komɛi lɛ yɛ naagbee hiŋmɛitswaa lɛ mli, beni shihilɛ lɛ eshɛ nɔ ni mli wa fe fɛɛ. Bɔni afee ni Paulo anyɛ atsu Kristofoi asɔɔmɔ nitsumɔ lɛ yɛ omanyeyeli mli lɛ, Nyɔŋmɔ ha lɛ “hewalɛ ni fe adesa nɔ̃.” (2 Korintobii 4:​7, NW) Enɛ ha bɔfo lɛ ŋmɛ etsui shi yɛ piŋmɔi kɛ ohia mli. Paulo kpɛlɛ nɛkɛ ŋwɛi yelikɛbuamɔ nɛɛ nɔ yɛ faŋŋ mli beni eŋma akɛ: “Minyɛɔ nii fɛɛ mifeɔ yɛ mɔ ni wajeɔ mi ni ji Kristo lɛ mli.”​—Filipibii 4:⁠13.

 4. Ani Paulo yoo ŋwɛi yelikɛbuamɔ nɛɛ, ni mɛɛ hewalɛ enɛ ná yɛ enɔ?

⁴ No hewɔ lɛ, etamɔ akɛ nɔ ni fata naakpɛɛ gbɛ ni Nyɔŋmɔ tsɔɔ nɔ ekɛ ehe woɔ Paulo sane lɛ mli lɛ he ji akɛ ‘awajeɔ lɛ’ hu. Enɛ ha bɔfo lɛ nyɛ eŋmɛ etsui shi yɛ omanyeyeli mli ni egbe esɔɔmɔ lɛ naa. No hewɔ lɛ eŋma akɛ: “Mihiɛ gbooo Kristo sanekpakpa lɛ he, ejaakɛ eji Nyɔŋmɔ hewalɛ ni aŋɔhereɔ mɔ fɛɛ mɔ ni heɔ yeɔ lɛ yiwala.” (Romabii 1:16) Ajie sanekpakpa lɛ kpo atsɔɔ Paulo, kɛ blema gbalɛi pii kɛ amɛshishinumɔ kɛ nitsumɔ, ni ehé anɔkwale ni amɛji lɛ eye. Ŋwanejee ko bɛ he akɛ, anɔkwale lɛ he nilee kɛ hiɛsɔɔ ni eyɔɔ kɛha no lɛ bafee hewalɛwoo jɛɛhe kɛha lɛ.

Yehowa Gbɛjianɔtoo Ni Yɔɔ Naakpɛɛ Lɛ

 5. Ani Yehowa tsuko edasefoi ni yɔɔ shikpɔŋ nɔ bianɛ lɛ ahiamɔ nii ahe nii bɔ ni sa tamɔ tsutsu?

⁵ Shi Yehowa tsuji ni yɔɔ shikpɔŋ nɔ yɛ naagbee gbii nɛɛ amli lɛ hu? Ani Nyɔŋmɔ eto gbɛjianɔ kɛha amɛ? Efee nakai diɛŋtsɛ! Wɔyɛ gbalɛi ni yɔɔ naakpɛɛ babaoo yɛ Ŋmalɛ Krɔŋkrɔŋ lɛ mli tamɔ bɔfo Paulo hu nɔ lɛ. Akɛni Yehowa tsɔɔ hiɛ eleɔ ewebii ahiamɔ nii hewɔ lɛ, ekɛ mlihilɛ to niŋmai nɛɛ ahe gbɛjianɔ eha amɛ kɛha amɛ hiɛnɔkamɔ kɛ miishɛjemɔ. Gbalɛi nɛɛ amli baafee faŋŋ kɛ amɛmlibaa gbii lɛ shɛ.

 6. Gbalɛ ni Yehowa kɛha Yesaia lɛ eshɛje ni ewo Yehowa webii ahewalɛ ŋmɛnɛ yɛ mɛɛ gbɛ nɔ?

⁶ Amoz bi Yesaia ŋma nɛkɛ gbalɛi nɛɛ ateŋ ekome efɔ shi afii 700 dani afɔ Yesu Kristo. (Yesaia 1:⁠1) Jeee kojomɔ wiemɔi ni mli wa Yesaia ŋma ekɛshi lɛ diɛŋtsɛ emaŋbii lɛ pɛ, shi ekɛshi maji babaoo ni ebɔle amɛ lɛ hu, maji bibii kɛ maji wuji. Nɔ ni egbɛ eshwa kojomɔ wiemɔi nɛɛ amli hu ji sanekpakpa kɛha Yehowa jalɔi anɔkwafoi lɛ​—saji ni baaha amɛmii ashɛ amɛhe yɛ amɛ amanehului lɛ fɛɛ mli. Ni taakɛ Yudafoi anɔkwafoi ni yɔɔ Yesaia gbii lɛ amli lɛ ná hewalɛwoo kɛ hiɛnɔkamɔ kɛjɛ sanekpakpa ni jɛ Yehowa ŋɔɔ lɛ mli lɛ, nakai nɔŋŋ hu ŋmɛnɛ, Yehowa shiwooi wuji ni baa mli yɛ anɔkwafoi lɛ anɔ lɛ shɛjeɔ amɛmii, ewoɔ amɛ hewalɛ ni jɔɔmɔ jɛɔ mli baa haa amɛ.

 7, 8. (a) Wiemɔi ni yɔɔ Yesaia 32:​1, 2 lɛ wo Yudafoi ni sheɔ Nyɔŋmɔ gbeyei yɛ Yesaia gbii lɛ amli lɛ hewalɛ kɛ ekãa yɛ mɛɛ gbɛ nɔ, ni titri lɛ yɛ mɛɛ shihilɛi komɛi ahewɔ? (b) Nakai wiemɔi lɛ nɔŋŋ kɔɔ Yehowa Odasefoi ahe ŋmɛnɛ yɛ mɛɛ gbɛ nɔ?

⁷ Wɔnaa hewalɛwoo ni tamɔ nɛkɛ pɛpɛɛpɛ yɛ Yesaia yitso 32. Klɛŋklɛŋ kukuji enyɔ lɛ kɛ shiwoo ko ni miiba mli bianɛ po ha: “Naa, maŋtsɛ ko baaye maŋtsɛ yɛ jalɛ naa, ni lumɛi hu baaye lumɛi yɛ kojomɔ naa; ni mɔ fɛɛ mɔ aaatsɔ tamɔ abobaa he yɛ nugbɔnɛmɔ naa, tamɔ faai yɛ ŋa kpataa nɔ loo tɛsaa kpele ko ni haa hɔɔŋ yɛ shikpɔŋ gbiŋ nɔ.” Mɛɛ sanekpakpa po enɛ aaaji aha Nyɔŋmɔ jalɔi ni yɔɔ tsuijurɔ yɛ Yesaia gbii lɛ amli, yɛ beni amɛhi maŋtsɛmɛi kɛ lumɛi ni yeee anɔkwale lɛ ashishi yɛ be kakadaŋŋ mli lɛ!

⁸ Shi mɛɛ sanekpakpa po enɛ ji kɛha Yehowa Odasefoi ŋmɛnɛ nɛkɛ! Kɛjɛ 1919 titri Maŋtsɛ Yesu Kristo ni ta sɛi nɔ lɛ eto shihilɛ kpakpa ko yɛ esɛɛnyiɛlɔi ni yɔɔ shikpɔŋ nɔ lɛ ateŋ. Eto “lumɛi” (Hebri, sarim) ni kɛ nɔkwɛmɔ ni ja kɛ suɔmɔ tsuɔ nii yɛ amɛteŋ ema shi. Nɔ ni kɛ nɔyelɔi ni waa mɛi ayi ni sɔmɔɔ amɛ diɛŋtsɛ amɛhe ni anaa yɛ je lɛŋ he fɛɛ he lɛ kpaaa gbee lɛ, Maŋtsɛ ni yɔɔ Yehowa gbɛjianɔtoo lɛ mli lɛ etee gbɔmɛi ni sa ni akɛ woo haaa amɛ ákɛ “sɔlemɔ lɛ mli lumɛi” hewalɔi loo nɔ ni tamɔ nakai ashi. Shi moŋ amɛji tsuji ni baa amɛhe shi, hii ni susuɔ mɛi ni tamɔ gwantɛŋi ni Yehowa ebua amɛnaa efee amɛ asafoku kome lɛ ahilɛ-kɛhamɔ he diɛŋtsɛ. Nɔkwɛmɔ nitsumɔ ni nɛkɛ hii nɛɛ, ni amɛ hu akpaa gbɛ akɛ amɛbaafee “lumɛi” yɛ Gbɛjianɔtoo Hee lɛ mli lɛ kɛhaa lɛ haa mɔ he jɔɔ lɛ diɛŋtsɛ.a

 9. Mɛɛ tsakemɔ etee nɔ yɛ Yehowa webii ateŋ?

⁹ Mɛɛ tsakemɔ enɛ kɛba Yehowa tsuji ni yɔɔ shikpɔŋ nɔ lɛ agbɛjianɔtoo lɛ mli nɛkɛ! Etamɔ bɔ pɛ ni awie he yɛ Yesaia 32:3 lɛ: “Ni ashwilaŋ ninalɔi ahiŋmɛii, ninulɔi atooi hu aaanu nii jogbaŋŋ.” Akɛni amɛmiishwe waa akɛ amɛaawo Yehowa hiɛ nyam ni amɛsɔmɔ lɛ hewɔ lɛ egbele amɛtsuii ahiŋmɛii kɛ amɛ niiashishinumɔ tooi hu. Eha amɛ esuɔmɔnaa nifeemɔ kɛha amɛ lɛ he sanesɛɛyoomɔ ko ni yɔɔ miishɛɛ. Odasefoi anɔkwafoi lɛ kɛ amɛhe efɔɔɔ kwasafoŋ sui kɛ nifeemɔi anɔ. Amɛhiɛ yɛ anɔkwale ni eji akɛ amɛsɔmɔɔ yɛ teokrase gbɛjianɔtoo ko, gbɛjianɔtoo ni ataoɔ Nyɔŋmɔ suɔmɔnaa nii ni atsuɔ he nii yɛ mli lɛ nɔ. Teokrat Kpeteŋkpele lɛ ji mɔ ni yijiemɔ sa lɛ akɛni ejie eyiŋtooi lɛ akpo etsɔɔ etsuji ni baa amɛhe shi ni yɔɔ shikpɔŋ nɔ lɛ hewɔ.

10. Mɛni ji naakpɛɛ jɔɔmɔi ni Yehowa webii ni amɛnu nibii ashishi lɛ naa mli ŋɔɔmɔ?

¹⁰ Kɛ oosumɔ lɛ, kanemɔ jɔɔmɔi ni Yehowa tsuji anine eshɛ nɔ lɛ. Nibii komɛi ni fata he ji anɔkwale nilee ni kɔɔ maŋtsɛ ni Yesu Kristo ji bianɛ kɛjɛ 1914 lɛ he ni amɛyɔɔ; husu ni ka shi faŋŋ ni haa amɛnaa Nyɔŋmɔ gbɛjianɔtoo ni anaa lɛ kɛ Satan nɔ̃ lɛ; he ni esa akɛ shiɛmɔ nitsumɔ lɛ ayashɛ dani Satan je lɛ aba naagbee; krɔŋkrɔŋ ni lá ji; kɛ nɔ ni Nyɔŋmɔ nibii ni akɛaaha Nyɔŋmɔ lɛ tsɔɔ. Ato nɔkwɛmɔ gbɛjianɔtoo ko ama shi yɛ Yehowa Odasefoi asafo lɛ mli tamɔ bɔ ni eji yɛ klɛŋklɛŋ afii oha lɛ mli Kristofoi lɛ ateŋ lɛ. Jɔɔmɔi babaoo hu ji ŋmɛnɛŋmɛnɛ paradeiso shihilɛ ni yɔɔ anɔkwa jalɔi lɛ ateŋ lɛ. Jeee hewalɛ pɛ enɛɛmɛi fɛɛ kɛ nikeenii krokomɛi ni jɛ Yehowa ŋɔɔ lɛ kɛbaa, shi moŋ toiŋjɔlɛ, ekomefeemɔ kɛ tsui ni nyɔɔ mɔ mli ni ewebii anine shɛɔ nɔ, yɛ yinɔsane be ni mli wa nɛɛ po mli.

11. Yehowa etsɔse loo etsɔɔ eshikpɔŋ nɔ najiaŋdamɔlɔi lɛ anii yɛ mɛɛ gbɛ nɔ, ni mɛɛ ŋmalɛi tsɔɔ akɛ enɛ he miihia?

¹¹ Akɛ henilee ni damɔ Biblia lɛ nɔ eha Yehowa tsuji, no hewɔ lɛ amɛboɔ ekaimɔi atoi ni amɛtsuɔ he nii, amɛkɛtsuɔ nii yɛ amɛ daa gbi shihilɛi amli. (Lala 25:10) Abɔ amɛ nibii ni he tseee kɛ muji nitsumɔi ni Nyɔŋmɔ nyɛɔ lɛ he kɔkɔ. Amɛshɛrɛ pɛsɛmkunya, jeŋba shara, nibii ni esaaa ni amɛteŋ mɛi komɛi fee yɛ tsutsu lɛ fɛɛ amɛshwie amɛsɛɛ, amɛkpa feemɔ kwraa. (1 Petro 4:⁠3) Nɛkɛ ji bɔ ni esa akɛ ebalɛ yɛ mɛi fɛɛ ni aaasumɔ akɛ amɛaaya nɔ amɛná Maŋtsɛyeli jɔɔmɔi lɛ amli gbɛfaŋnɔ lɛ gbɛfaŋ. Esa akɛ amɛ fɛɛ amɛhe atse yɛ jeŋba mli, jwɛŋmɔ mli kɛ gbɔmɔtsoŋ, koni amɛná nikeenii ni ji yijiemɔ afɔle ni akɛhaa Yehowa “yɛ jalɛ mli” ni eji hegbɛ hu lɛ mli gbɛfaŋnɔ. (Maleaki 3:3; Yesaia 52:11) Mɛɛ shweshweeshwe shihilɛ henumɔ ni yɔɔ naakpɛɛ mɛi fɛɛ ni ji Odasefoi anɔkwafoi lɛ naa mli ŋɔɔmɔ nɛkɛ, yɛ be mli ni amɛkɛ amɛhe bɔɔ asafo babaoo ni amɛfee ekome yɛ Bɔlɔ lɛ sɔɔmɔ ni miishɛɛ yɔɔ mli lɛ ahe lɛ!

Ŋwɛi Nikasemɔ

12. Yesaia 32:4 ena emlibaa yɛ ŋmɛnɛŋmɛnɛ beaŋ Yehowa tsuji ateŋ yɛ mɛɛ gbɛ nɔ?

¹² Yesaia 32:4 yaa nɔ ekɛɔ akɛ: “Ni mɛi ni tsui yɔɔ floflo lɛ aaakase nilee, ni momohalɔi alilɛi aaawie pɛpɛɛpɛ ni emli aaatse.” Shwɛɛnii ni Yehowa efɔ amɛ mu lɛ bɛ shishinumɔ kpakpa ko yɛ Jeŋ Ta I be lɛ mli, ni amɛheɔ Babilon tsɔɔmɔi komɛi amɛyeɔ ni teokrase gbɛjianɔtoo ni akɛtsuɔ nii bɛ amɛteŋ hu. Shi Nyɔŋmɔ ha amɛye amɛhe kɛjɛ Babilon nyɔŋyeli mli yɛ 1919, ni etee nɔ eha amɛ enɔkwalei lɛ ahe nilee ni fa. Amɛtsɔ anɔkwalei nɛɛ anɔ amɛkase akɛ amɛkaye oyai kɛ wiemɔ shi moŋ amɛná hiɛshikamɔ. Amɛheɔ nɔ ni amɛwieɔ he lɛ amɛyeɔ agbɛnɛ, ni amɛhaaa amomo yɛ gbeyeishemɔ kɛ hekɛnɔfɔɔ ni amɛbɛ hewɔ. Shi te wɔ diɛŋtsɛ lɛ wɔɔfee tɛŋŋ wɔtsɔmɔ sanekpakpa lɛ he shiɛlɔi ni amɛdara yɛ mumɔŋ ni yɔɔ ekãa? Kɛtsɔ ŋwɛi tsɔsemɔ ni akɛhaa, titri lɛ yɛ kpeei ni Yehowa Odasefoi feɔ yɛ amɛ Maŋtsɛyeli Asai anɔ lɛ fɛɛ mli hegbɛ ni wɔɔná lɛ nɔ. Ákɛ nɔkwɛmɔ nɔ lɛ, ŋwanejee ko bɛ he akɛ Teokrase Sɔɔmɔ Skul lɛ ji nibii ni Yehowa etsɔ nɔ ejɔɔ etsuji ni ewo amɛ hewalɛ ni amɛshiɛ anɔkwale lɛ yɛ ekãa naa yɛ faŋŋ mli lɛ ateŋ ekome.

13. Mɛɛ wiemɔi esa akɛ wɔkwɛ wɔhe nɔ jogbaŋŋ yɛ he?

¹³ Yɛ nakai gbɛ nɔ nɔŋŋ ŋwɛi nikasemɔ etsɔɔ Nyɔŋmɔ tsuji lɛ akɛ amɛkɛ shiwoo ko ni amɛle akɛ amɛnyɛŋ amɛye nɔ akaha, ni amɛkagbe mɔ ko he guɔ ni amɛkawie mɔ ko he efɔŋ hu. Yɛ anɔkwale mli lɛ Nyɔŋmɔ jɔɔmɔ yɛ mɛi ni yeɔ ŋaawoo ni aŋma afɔ shi yɛ Jajelɔ 5:1 nɛɛ nɔ lɛ: “Kaaha onaa miifee blɛblɛ, ni otsui hu akaye oyai ewie wiemɔ ko yɛ Nyɔŋmɔ hiɛ; shi Nyɔŋmɔ lɛ ŋwɛi eyɔɔ, ni bo lɛ oyɛ shikpɔŋ lɛ nɔ; no hewɔ lɛ kaaha owiemɔi miifa.” No hewɔ lɛ ehe miihia waa akɛ okawo ogbee nɔ ní okɛ mlifu wie oshi Nuŋtsɔ lɛ gbɛjianɔtoo lɛ loo enajiaŋdamɔlɔi ni ehala amɛ lɛ. Yehowa ji Kojolɔ ni yɔɔ nilee fe fɛɛ ni lɛ wɔbaabu wɔhe akɔntaa wɔha yɛ enɛɛmɛi kɛ yaka wiemɔi krokomɛi fɛɛ hu ni wɔɔwie he.​—Mateo 12:​36, 37; 3 Mose 19:​16; Yuda 8.

14. Mɛɛ kɔkɔbɔɔ akɛhaa Yehowa webii yɛ biɛ, ni Abɛi 29:20 maa enɛ nɔ mi yɛ mɛɛ gbɛ nɔ?

¹⁴ Mɛi ni fata mɛi ni hiɔ Yehowa tsɔɔmɔ lɛ ahe ji aŋkroaŋkroi ni wieɔ shiɔ ni amɛwieɔ huhuuhu amɛshiɔ Yehowa gbɛjianɔtoo ni he tse lɛ kɛ emlai ni etsɔɔ nɔ ehaa toiŋjɔlɛ kɛ gbɛjianɔtoo kpakpa hiɔ shi lɛ. Gbɛ bibioo ko pɛ ka gbɔmɛi ni tamɔ nɛkɛ lɛ kɛ mɛi ni tseɔ atua kwraa lɛ ateŋ. Kora kɛ mɛi ni fiɔ esɛɛ lɛ na enɛ ni amɛhiɛ kpata beni amɛhe fee oya amɛwie amɛshi Nyɔŋmɔ tsulɔ Mose lɛ, (4 Mose 16:​1-40) Abɛi 29:20 kɛɔ yɛ nɛkɛ sane nɛɛ nɔŋŋ he akɛ: “Kɛ ona nuu ni he yɔɔ oya kɛ wiemɔ lɛ, hiɛnɔkamɔ yɛ ha kwashia fe lɛ.”

15. Yesaia 32:​5, 6 mli wiemɔi lɛ kɔɔ Yehowa tsuji ahe ŋmɛnɛ yɛ mɛɛ gbɛ nɔ?

¹⁵ Yehowa kɛ nilee hu ejɔɔ ewebii lɛ koni amɛyoo nɔ ni ji ekpakpa kɛ efɔŋ. Amɛkwɛɔ amɛhe nɔ jogbaŋŋ yɛ mɛi ni baa amɛŋɔɔ kɛ wiemɔi ni ŋɔɔ ni yɔɔ dɔkɔbii ni ekolɛ amɛhiɛ nikeenii komɛi po koni amɛkɛlaka mɛi ni bɛ shifimɔ lɛ atsui lɛ ahe. (Okɛto 1 Timoteo 6:​20, 21; Yuda 16 he.) Nyɔŋmɔi ajalɔi baabɔ mɔdɛŋ ni amɛkɛ sanekpakpa kroko ni soro no yɛ nɔ ni amɛnine eshɛ nɔ momo kɛjɛ Yesu Kristo kɛ ebɔfoi lɛ adɛŋ lɛ he aha. Agbɛnɛ akpoo aŋkroaŋkroi ni ji kwashiai kɛ shishiulɔi lɛ, ni aŋmɛɛɛ gbɛ ni ahala amɛ akɛ sɔɔlɔi yɛ Yehowa gbɛjianɔtoo lɛ mli. Enɛ kɛ wiemɔi nɛɛ kpãa gbee: “Atsɛŋ kwashia akɛ ablade dɔŋŋ, ni shishiulɔ hu abuŋ lɛ oje dɔŋŋ. Shi kwashia wieɔ kwashiai awiemɔ, ni etsui hu tsuɔ nishaianii, ni eyeɔ kutumpɔo sane, ni ewieɔ sakasaka eshiɔ Yehowa, ‘ni ehaa mɔ ni hɔmɔ yeɔ lɛ lɛ susuma kãa efolo, ni mɔ ni kumai yeɔ lɛ lɛ ehaaa ena nu enu.”​—Yesaia 32:​5, 6.

16. (a) Mɛni ji tsɔɔmɔi loo susumɔi ni hemɔkɛyelikwalɔi lɛ kɛba lɛ ateŋ ekomɛi? (b) Mɛni áwie yɛ Yesaia 32:7 ni kɔɔ enɛ he?

¹⁶ Ani ejeee anɔkwale akɛ mɛi ni ejɛ wɔteŋ amɛtee yɛ afii ni eho Iɛ amli akɛni “amɛjeee wɔteŋ mɛi komɛi” hewɔ, ní bɔɔ mɔdɛŋ ni amɛlaka mɛi komɛi ni amɛnyiɛ oshara gbɛ ni tamɔ nɛkɛ nɔ lɛ efo amɛ diɛŋtsɛ amɛhe kɛjɛ mumɔŋ niyenii kpakpa kɛ mumɔŋ nui ni shɛjeɔ mɔ mii lɛ ajɛɛhe lɛ he? (1 Yohane 2:19) Ni nɛkɛ kwashiai nɛɛ ni amɛfeee adesai ateŋ mɛi ni jalɛ he hɔmɔ kɛ kumai yeɔ amɛ lɛ ejurɔ lɛ enaaa bɔ ni shiɛmɔ nitsumɔ ni ato he gbɛjianɔ yɛ wɔbe nɛɛ mli lɛ he hiaa ha. Amɛbaasumɔ ni bɔ ni mɔ fɛɛ mɔ kaneɔ e-Biblia lɛ kɛ bɔ ni mɔ lɛ tsɔɔ shishi ehaa lɛ akudɔ mɔ lɛ moŋ fe ni akɛ amɛ aaaba gbɔmɛi ni atsɔse amɛ ni amɛhiɔ shi yɛ Nyɔŋmɔ Wiemɔ lɛ kaimɔi kɛ shishitoo mlai ni nɔ kwɔlɔ lɛ anaa lɛ kɛ naanyobɔɔ kɛ ekomefeemɔ mli. (Lala 133:​1-3; 1 Korintobii 1:10) Amɛbaalaka mɛi krokomɛi ni amɛhe amɛye akɛ Yehowa baaya nɔ ekɛ eshafeelɔi ahe eshai ake amɛ yɛ be fɛɛ mli yɛ bei abɔ ni amɛtsɔɔ yɛ kponɔ gbɛ akɛ amɛtsake amɛtsui lɛ. Nɔ ni yɔɔ miishɛɛ yɛ enɛ he ji nɔ ni Yesaia 32:7 kɛɔ yɛ blema Israel hemɔkɛyeli-kwalɔi lɛ ahe lɛ: “Shishiulɔ ŋaa [nɔ ni etsɔɔ nɔ etsuɔ eyiŋtoo he nii] lɛ, efɔŋ ni; etoɔ efɔŋ he ŋaa, koni ekɛ amale wiemɔi akpata mɛi ni nii yɔɔ mɔbɔ Iɛ ahiɛ, kɛ ohiafoi miiwie nɔ ni ja tete.”

17. (a) Namɛi Yesu ehala akɛ esɛɛnyiɛlɔi? (b) Mɛɛ sanebimɔi teɔ shi yɛ amɛ wɔsɛɛ be nitsumɔi ahe yɛ jeŋ fɔŋ nɛɛ mli shihilɛi ni yaa nɔ efiteɔ lɛ hewɔ?

¹⁷ Yesu anɔkwa sɛɛnyiɛlɔi ni ehala amɛ lɛ ‘wieɔ nɔ ni ja’ akɛni amɛhiɛ yɔɔ amɛmumɔŋ hiamɔ nii anɔ hewɔ. Shi kwashiai ni teɔ shi woɔ amɛ lɛ bɛ mɛi ni taoɔ anɔkwale lɛ ahilɛkɛhamɔ diɛŋtsɛ he miishɛɛ. Nɔ ni amɛtswa amɛfai shi akɛ amɛbaafee ji ni amɛgbala gbɔmɛi lɛ kɛnyiɛ amɛsɛɛ, ni oshara ni amɛkɛ amɛ diɛŋtsɛ kɛ mɛi krokomɛi woɔ mli lɛ jeee amɛhe sane ko. Shi ani Yehowa baaŋmɛ gbɛ ni apasa susumɔ atsɔ mɛi ni tsui ja lɛ tsɔne? Ani eto gbɛjianɔ kɛha lɛ diɛŋtsɛ etsuji kɛ amɛ jeŋ fɛɛ shiɛmɔ nitsumɔ lɛ jɔɔmɔ?b

[Shishigbɛ niŋmai]

Te Obaaha Hetoo Oha Tɛŋŋ?

◻ Yehowa ewaje ewebii lɛ ŋmɛnɛ yɛ mɛɛ gbɛ nɔ?

◻ Te wiemɔi ni yɔɔ Yesaia 32:​1, 2 lɛ kɔɔ Yehowa Odasefoi ahe ehaa tɛŋŋ?

◻ Mɛni ji jɔɔmɔi ni Yehowa webii ni amɛnu nibii ashishi lɛ naa mli ŋɔɔmɔ lɛ ekomɛi?

◻ Te Yesaia 32:​5, 6 baa mli ŋmɛnɛ ehaa tɛŋŋ?

[Mfoniri ni yɔɔ baafa 13]

Ani okpooɔ wiemɔ ni wa ni awieɔ ashiɔ Yehowa gbɛjianɔtoo lɛ toiboo? Esa akɛ okpoo